الغزالة في عرين الاسد الفصل الحادي عشر 11 - بقلم فيّد عبدالله

مساء الورد يا اغلى نااس شلونكم،،حبايب طلب صغيروني انه اتصوتون للبارت ليش المشاهدات بالالوف والتصويت مئات والله جاي اتعب بالبارت حتى اوصل الاحساس دعموه بتصووووويتك ،اتمنالكم متابعة طيبة

البارت العاشر
فيد عبدالله

ريم،،ضليت الليل كلة الوب وفكرة تجيبني وفكرة توديني اخر شي ما تحملت كمت لابراهيم من سمعت صوتة يصعد الدرج طلعت ركض، ،وصحتة ابراهيم

ابراهيم،،ها ريم شبيج عيونج مورمة شصاير

ريم،،ماكو عادي اخذ تلفونك اخابر حمزة

ابراهيم،،ها اي هاج خابري براحتج خلي يمج للصبح اذا تردين

ريم،،لا اخابر واخلي الك من جوة الباب

ابراهيم،،لا لا خلي يمج احسن

ريم،،مشكور التفتت اروح لغرفتي وصاحني

ابراهيم،،ريم يمكن ما الي حك اتدخل او الومج بس الله الشاهد حالج حال فاطمة وافراح وغصون

ريم،،واني هم والله احسك مثل حسنين

ابراهيم،،مااعرف شكولج بس تصرفاتج انة اعرفهة نابعة من طيب خاطر وعگل نظيف يمكن غيري ميفهمهة هيج وينقدج ويلومج ويسويلج مشاكل اعرفي ترفعين روحج عن كل هاللغوة

ريم،،يعني حتى انتة هيج تكول ودنكت مبرطمة

ابراهيم،،كتلج اعزج مثل اختي وردت انصحج لا تبجين لمصلحتج حجيت ومحمد

ريم،،يعني شسوي هذا فكري وعگلي

ابراهيم،،اتغيري ريم ومحمد تتعبين هيج تصفين حالج حال عمتي فرحة لا بيت ولا جهال ولا رجل ولا وظيفة ولا كلشي

ريم،،ادور اتوظف تريدني

ابراهيم،،شوف هاي عافتهن كلهن جلبت بهاي جلبي بذنيج

ريم،،الله كريم

ابراهيم،،ريم ديربالج على روحج وعلى حمزة

ريم،،اي ان شااء الله

ابراهيم،،هاج خابري الزكيلة لا تعوفي ولج احنة واحدنة مينعاف بوحدة ابد

ريم،،انطاني تلفونة وصعد نام شكد طيب يارب الله يريحة دخلت للغرفة وكلبي يدك اخابر لو لا اخابر لو لا حجاية ابراهيم تربعت براسي مينعاف بوحدة شعورالغيرة يموت اشتعلت وخابرتة رأسا دكتين ورد

حمزة،،الووو ها ابراهيم

ريم،،بقيت سكتة وكلبي يدك حيل هاي اول مرة اخابرة

حمزة،،ابراهيم شبيك

ريم،،احم،،ااني رريم

حمزة،،شكو ريم بيج شي

ريم،،لا ما بية بس بس.....سكتتت وهو تنهد

حمزة،،سدي وانة اخابرج خطية ابراهيم رصيدة

ريم،،اي ،،،سدة وثواني واتصل

حمزة،،ريم شبيج احجي

ريم،،انت وين هسة

حمزة،،بالشقة

ريم،،دمعت واختنكت، ،من شوكت عندكم شقة ما ادري

حمزة،،ليش انتي شتدرين ريم شتدرين صارلنة سنة متزوجين شتدرين عني

ريم،،ما ادري كلشي انت متكول

حمزة،،انتي سألتي وما جاوبتج يوم سألتيني شبيك شمسوي شصايرلك

ريم،،انت متسولف حتى لو اسألك

حمزة،،جربتي سالتيني وما جاوبتج بداعت ابوج

ريم،،سكتت اتنفس كوة همستلة لااء

حمزة،ليش تضلميني لعد

ريم،،اني الضالمتك لو انتة

حمزة،،ههههه طلعت ظالمج هم والله ما عرفت روحي، ،بشنو ظلمتج

ريم،،اتعصبت من ضحكتة جنة مستهزأ،،،اصلا كل حياتي وياك ظلم

حمزة،،رررررريم لا تخربطين ،شمسويلج انة شمسوي شو اداري واهتم وانتي دايرة وجهج ترة الزواج مو بس اكل وهدمة نظيفة لو عليهن جانن ذني حاضراتلي كبل مااخذج لا تخليني اكعد اعدلج عيب احسب على مرتي اغلاط وزلات بس اكلج هن هوواي وما ينعدن

ريم،،هيج يعني ما تطيقني صاير حمزة احجي بداعت ابوي عندك ،،انت مليت مني وكارهني موو عندك غيري خذت مكاني

حمزة،،شتخربطين احنة وين نحجي وين طفرتي شبيج ريم اركدي واعگلي ومحمد واصلة وياج لخشمي

ريم،،نترت بقهر لا تجبر روحك ولا توصل لخشمك باجر لامة غراضي ورايحة لاهلي وطلكني وريحني وريح روحك،،سكت وهو يتنفس بغضب سريع همس بتعب

حمزة،،هيج تاليهة تشوفين راحتج بطلاكج هذا الحل متدورين الغلط وين وبيمن،،

ريم،،كمت ابجي وهو يحجي بهدوء ومبين انصدم من كتلة طلكني

حمزة،،اششش اشش بلا بجي جبناهة كلة بجي كلشي ما مفتهمين،،،بس جاوبيني مجبورة بية ريم احد جبرج علية

ريم،،شهكت وابجي

حمزة،،جاااوبي ررريم

ريم،،لا لاا لاا

حمزة،،وهسة اذا اكلج نكمل سوة مجبورة

ريم،،ليش تريد تعوفني من صار بيناتنة جاهل

حمزة،،استغفرك ربي انعل ابو الجاهل شبيج انتي مو هذا حجيج رييم راح تخبليني رووحي نامي انعل ابو اليسولف وياج بعگل

ريم،،اصلا من هاي اني مااحجي وياك لان اخاف منك شووف شلون تصيح شووف

حمزة،،تخافين مني!!!!!!

ريم،،سكتت ما جاوبت عاط بصوت فززني يمكن حتى حسنين كعد

حمزة،،تخااافيييين

ريم،،كلهة تخاف منك

حمزة،،ماعلية بكلهة انتي انتي تخافين مني شردتج هاي وما تحجين وضامة روحج لو اطب، تخافين مني!!!

ريم،،اي اخاف تتع....

حمزة،،روحي ريم روحي الحجي وياج يوجع الگلب روحي نامي تذبين كل حجاية تخليني اشوغ لسابع سما روحي نامي روحي

ريم،،حمزة مو قصدي والله مو..

حمزة..اشش قصدج لو لا هو هذا الصدك بعد ،،بس من تحطين راسج عالمخدة بداعت العشرة راجعي روحج انة بشني قصرت وياج لو خوفتج اذا لكيتي ذاك الوكت الج كل الحك تردين الطلاك لو تختلين وتخافين لو تديرين وجهج مني وتنامين

ريم،،ما جاوبتة كال فيمالا وسدة بوجهي، ،خابرت ابرد ناري شلت روحي وشمرتهة بنص النار كمت اختنك كدما ابجي وكاتمة بجيتي تالي حضنت المخدة وصرت اعيط واشهك اريد النار البصدري تطفى حسيت بساعتهة خسرت حمزة صدك ما عرفت احجي عدل لساني وكعني بمكانات تصورهة حمزة كره لو مجبورة لو ما اريدة ميدري اني اموت بدونة انتهي اذن الفجر واني اناشغ كمت توضيت واصلي وادعي ربي يهدي ويريحني وياه حقدي على عمتي جان يكبر حسيت كل مشاكلي منهة هي الماجاي تخلينة نرتاح جنت اقنع روحي بهالاغلاط واخليهة تعلاكة لقصوري اني وجهلي اني،، بالستة دك الباب ابراهيم على تلفونة انطيتة الة باوعلي وعرفني جنت ابجي

ابراهيم،،شما صار تنحل ريم ،،اتأخرت ارد ونكعد نسولف

ريم،،الله وياك

ريم،،رديت نمت مع انه بدوا يكعدون بس انسطرت كوة افتح غفيت من التعب ما فزيت الا على عمتي تدك بالباب وتعيط

ام حمزة،،يالمسعدة يالعروس الساعة دكت التسعة وانتي نايمة من اول يوم دريتي حامل تكترتي

الجدة صالحة،،شبلاج يا مرة من الصبح تعوين بباب هالمسيكينة عوفيهة وكفي بلاج عنهة لا تعيدين المضة

ريم،، لبست دشداشتي وشالي وفتحت الباب باوعتلي عمتي باستغراب ومشت ما حجت شي بس هزت ايدهة

الجدة صالحة،،شبيج جدة عيونج مسلگة ورايحة هالعيون الحلوات ليش هالكد باجيات حميزة موو

ريم،،ماكو شي جدة،،خل اغسل من رخصتج طبيت لغرفتي للحمام واباوع عيوني رايحة منتهية وحمررر غسلت وكامن يحركني ليكول ذبيت بيهن ملح طلعت لجديتي اخذتني لغرفتهة وطبكت الباب

الجدة صالحة،،يلا سولفي شبيج راح تموتيني ياجدة

ريم،،جدة انة خسرت حمزة خربطت وياه هواي

الجدة صالحة،،ليش يمفلوكة شخطتي وخربطتي هالنوبة

ريم،،جدة ونزلت دموعي

الجدة صالحة،،اذا بجيتي بالعصة على راسج احجي يمدهورة موتيني

ريم،،سولفت لجديتي وهي فاكة حلكهة علية

الجدة صالحة،،اياا ثولة شمالج عود هاي انتي العاگلة چا شخليتي للباقيات ولج اكو وحدة تكول لزلمتهة طلگني واخاف منك وظالمني شهالخرابيط شمسويلج الزلمة شو حتى امة ما يرضالهة لو حاجتج

ريم،،جدة والله مو بقصدي هو لساني اغبر وكام يحجي بكيفة

الجدة صالحة،،لا عگلج الاغبر لسانج شعليه

ريم،،جدة شسوي هسة حمزة شون وياه اخاف يدير وجهة فدنوب ويكرهني من صدك ساعتهة اموت والله

الجدة صالحة،،ما يكرهج اليحب من كلبة ما يكره بس اصبريلة حت لو زعل وداس وياج وعاند اصبريلة واصبري عليه اليريد الحلو يصبر على مرة ولو انتي غبرة جبتي المر لروحج

ريم،،شسوي جدة طك كلبي ادور عندة شقة ببغداد متت من عرفت

الجدة صالحة،،غبرة ولج انتي چا شتعرفين على رجلج ولج المرة المعدلة تصير هي الكل بالكل بحياة زلمتهة جدج بكبرة الله يرحمة جان ما ينام اذا ما يسولفلي سوالف العشيرة كلهة وشعندة جنت انة الفوكاه والجواه

ريم،،اي مو متت وانة اكلج علميني

الجدة صالحة،،كل رجال عگلة شكل المرة العدلة هي تعرف شلون تفتح عگل زلمتهة گبل گلبة وتكعد بي بس اخخ منج شكد افيهية

ريم،،ان شاء الله يرضى

الجدة صالحة،،لا وعلي ان شاء انتي تعرفين لزلمتج عدل ولج حميزة ذهب ومحمد ويحبج لا تنطيه للنسوان

ريم،،كمت من جديتي وكلامهة ابالي اصبر اوووف هو جبتهة صبر بصبر ،،لليل اجوي الولد وحمزة ماكو عمي كال خابرني العصر ما مكمل شغلة يرد باجر،،، بالمطبخ واكفة اخدر جاي لعمي راد وفات ابراهيم

ابراهيم،،اكلج ريم اذا ما عندج شي تعاي نسولف بالحديقة

ريم،،علواه روحي راح تطك جديتي نامت وعمتي فرحة يم بيت عمي ،،وديت الجاي لعمي وكاعد هو وعمتي وبيت صادق بس صادق فوك والي لاحظتة بهالفترة ابد ميكعد ويانة يكمل اكلة ويصعد وعالغدة ميجي، طلعت للحديقة ابراهيم فارش والهوة حلو وحاط كرزات وجبتلة جاي وكعدت

ابراهيم،،اي الف رحمة على عمي

ريم،، دمعت بطاري ابوي،، تتوقع لو عايش تغير شي بحياتي

ابراهيم،،ليش اكو احد مقصر وياج اشوف علي اكثر من ابوو

ريم،،لا حشا الله يحفظة

ابراهيم،،ريم لا تضلين تدورين حجج تصلح حياتج ترة الحياة اذا ما تعاركين بايديك وسنونج متحصلين الترديه

ريم،،اني مو اعارك عالاريدة اني الاريدة بيدي ضيعتة

ابراهيم،،شبيج الصبح خوفتيني خشمج صاير گلوب صفر

ريم،،هو منو يبجيني غيرة

ابراهيم،،لا ومحمد انتي على كلشي تبجين

ريم،،صح هم يكلي حمزة

ابراهيم،،البجي مو حل ترة الزلمة يضوج من المرة التتبجبج يمل منهة لا توصلين حمزة لهالمواصيل وحمزة اخوي واعرفة صعب وراس يابس ومو بكلشي يقنع ينرادلج صبر وطولة بال وياه وبعدكم باولهة توكم سنة موو

ريم،،اي

ابراهيم،،اي اعتبروهة فترة خطربة عرفتوا اطباع بعضكم بيهة وهسة ابدوا صفحة جديدة وجايكم اسد بالطريق لا تخلوه بنص مشاكلكم حلوهة وابدوا وياه بجو عايلة وتفاهم

ريم،،شكد ارتاح لحجيك والله تنزل ماي بارد على كلبي وتنطيني امل بباجر الله يسعدك وهنيال الانت تصير نصيبهة

ابراهيم،،يمعودة غير امي كربستني بب.....

ريم،،قاطعنة صوت حمزة

حمزة،،السلام عليكم

ريم،،كمزت من مكاني وكفت لجيتة ورديت السلام بارتباك كام ابراهيم باس جتفة وسلم عليه ابراهيم كلش يحبة ويحترمة سلم عليه وباوعلي مضيق عيونة خزرني احس رجفت عضامي مشة وصااح ريم وراي للغرفة مشيت وابراهيم يضحك ويسويلي علامة النصر ولك يا نصر راح اوكع من طولي. طبينة كلهة طاشة لغرفهة دخل واني دخلت وراه طبكت الباب وجان يلتفت علية ويلزمني من زندي حيل وعيونة حمرر وصاك اسنانة بغضب،،،تخافين تحجين وياي وية زلمتج سترج وغطاج بس عادي تكعدين تسولفين وية حماج موووو عادي مووو نتر ايدي ودفعني حيل ما سيطرت واني ارجف خوف و عثرت و طحت بالكاع .....يتبع

ملتقانا يوم الجمعة احبتي مع السلامة