الغزالة في عرين الاسد الفصل السابع وثلاثون 37 - بقلم فيّد عبدالله

صباح الووور يا ورداتي اعتذر جاي اتأخر عليكم بس هذا الاكدر عليه حبايبي ان شاء الله مااقصر منكم،،متابعة طيبة

البارت الثالث والثلاثون
فيد عبدالله

ام حمزة،،مو بكيفج

حمزة،، يمة بكيفي انة وين ارتاح اكعد هذا خصم الحجي

ريم،،سكت الكل واني فد ارتاحيت لان مشيت كلامي ولو راح اتعب بين الدوام والبيت بس ميخالف هذا ابو ابني واذا تعبت علمودة،،شوية واترخصت منهم اروح للبيت احضر عشا مكانة ردت اطلع وشفت فاطمة طبت غرفتنة القديمة صحتهة

فاطمة،،ها ريمة

ريم،،اريد ملابس بيت لابو اسد مو هواي يمي اكثرهن مال طلعة

فاطمة،،اي تعاي اخذي شتردين

ريم،،مااعرف ليش گلبي انعصر ما ردت اطب واشوف غرفتي شون متغيرة وشون غراض غيري صايرات بيهة،،لا لا انتي جيبيلي

فاطمة،،شمدريني شتحتاجين شيمج هناك دتعاي

ريم،،جرتني من ايدي وطبيت استغربت بيهة غرفة شبابية ام النفر جرباية وكنتور وميز تواليت بس عطور رجالية واغراضة عليه فتحت فاطمة الكنتور بس ملابسة بي

فاطمة،،هاي اخذي شتردين

ريم،اي شكرا اخذت الاحتاجة وسديتة وطلعت بسرعة وبداخلي شي مرتاح انه بقت هاي الغرفة باسمي ما دخلتهة غيري بقة محافظ على خصوصيتنة بيهة رحت للبيت بسرعة حضرت شوربة الة وطلعت لاهلي شويت دجاج بتنورهم ووصيت حسناء عليهة وخليت اسد يمهم جلب يلعب هناك وي بنت علي فدوة يموت عليهة وهي تنكط عسلل رجعت حضرتلة الجرباية ينام بغرفتنة الحمام قريب اريحلة كملت الغرفة واندكت باب المطبخ ركضت فتحتة حمزة وساندة ابراهيم يمشي بي ومشيتة وحدة من رجلية اليمنة ميدوس عليهة زين يكزل شوي هي ضربتة بالجهة اليمنة ايدة ورجلة لان ممرودة السيارة الحمدلله بس هااي

ابراهيم،،ها وين اكعدك

ريم،،هنا هنا يرتاح بفراشة وطبيت للغرفة كدامهم طبوا وحمزة مبتسم ،،وخرت الغطا وكعدة ابراهيم وعدل كعدتة

ابراهيم،،ها ابو اسد محتاج شي بعد

حمزة،،مشكوور تعبناك هواي

ابراهيم،،لا بوية تتدلل انة اترخص

حمزة،،وين يمعود مو وكت طلعة

ريم،،هذا صاير العشا والله

ابراهيم،،غير مرة هذا علاجة ريم باعي شون تنطيه الة

ريم،،علمني عليه واترخص وطلع ورحت وراه سديت الباب ورجعت للغرفة،،اسوي العشا هسة

حمزة،،براحتج

ريم،،اي هسة،،طلعت وصاحني

حمزة،،ريم

ريم،،هاا طبيت للغرفة

حمزة،،وين اسد شومالة حس

ريم،،يم اهلي هسة اجيبة واجي

حمزة،،جيبي يونسني

ريم،،رحت لاهلي جبت اسد وجبت الدجاجة ورجعت اول ما طبيت ركض اسد لابوه خليتة يمة ورحت احضر بالعشا صبيتلة صينية ووديتهة الة بالغرفة وجبت طبلة حطيتة بصفة واخذت اسد خليتلة العابة يلعب ورجعت باوعتلة ما متعود ياكل باليسرة كعدت يمة واخذت ماعون الشوربة وكمت اوكل بي واسويلة لگم دجاج وياهن ياكل ملتهية اوكل بي باوعت عيونة علية ياكل من ايدي وعيونة ميحركهة بعيوني تباوعلي بلهفة ،،،نصيت ما اريد مشااعر تتحرك وما باوعتلة بعد شبع و كال كافي شلت الصينية للمطبخ غسلت وجهي و اخذتلة مي ورحت طلع من الحمام مغسل سحبت الخاولي انطيتة الة نشف ورجعة يمشي للجرباية، اسندك باوعلي وابتسم

حمزة،،لا رحم الله والديج

ريم،،كعد عالجرباية وغطيتة وانطيتة علاجة شربة وتمدد مبين تعباان ومتوجع،

حمزة،،اخذي راحتج تعبناج

ريم،،من تريد شي صيحني

حمزة،،متقصرين

ريم،،طفيت الضوة وطلعت اسد على كعدتة يلعب حبيبي هادئ جان عبالك يحس اكو واحد تعبان صبيت عشا اتعشينة ولملمت المطبخ والبيت ونظفتهن ورجعت طبخت غدة لباجر سويت مي لحم وحشوة برياني ويبقة بس التمن من ارجع اطبخة اسد كام يغفي بدلتلة ونومتة حضرت غراضي برة الغرفة ابدل حتى لا يكعدون فرشت ونمت بالگاع هستوني غفيت واسمع حمزة يگح بخنكة كمت من مكاني شعلت الضوة الخافت انطيتة مي جان عرگان كللش ويتنفس بقوة همست شبيك يوجعك شي

حمزة،،ايدي ورجلي دمرني وجع

ريم،،مصخن انتة شو عرگان

حمزة،،ما ادري انطيني شي خفيف حبابة

ريم،،اي اي جان كوة مفتح رحت بللت الخاولي وطلعت بجامة وفانيلة نضيفة خليتهن يمة جر السحابة مال التراك نزعتةالة وبقة بالفانيلة مسحت وجهة بالخاولي المبلل غمض عيونة على برودتة همس ضهري هم ريمتي، ،رجفت لهالكلمة صاار شكد ما سامعتهة منة نزعتة الفانيلة بهددوء مسحت ضهرة وركبتة وصدرة ولبستة فانيلة نضيفة وانطيتة بندول غطيتة واريد ابتعد وسحب ايدي باس راحة ايدي وهمس احبج وغفة بسرعة تعبان من الصخونة احس رجفة سررت لعضامي وصلت ،،،رجعت تغطيت بفراشي اريد اسيطر على گلبي ودگاتة نفسي مضطرب كوة كدرت اغفة دك المنبه كمت بسرعة سلكت بيض وطلعت خبز واندكت الباب فتحتة عمتي فرحة جايبة حليب

فرحة،،هذا حليب جمس وصة حسين عليه وجابوه يفيد عضامة خل يشرب

ريم،،مشكورة عمة تعاي تريكي وياي

فرحة،،لا اريك امي خطية تضوج ومن تطلعين ارد هنا

ريم،،مشكوورة عمة تعبتج خليت الحليب عالنار فار خليتة على صفحة وبدلت اتريكت ورحت لبيت عمي طبيت بعدهم ما متريكين،،صباح الخير

ابو حمزة،،هلا يا بعد عمج شونج شونة حمزة

ريم،،زين عمي شوية صخن بالليل بس هسة احسن

فرحة،،هسة اتريك واروحن للبيت لايظل بالج

ريم،،اي عمة حضرتلة ريوك وخليتة على صفحة والحليب بالقوري الثاني

فرحة،،چا شبية عمة انة اسويلة هذا حمزة

ريم،،ميخالف عمة وعلاجة مال الصبح خليتة بالصينية حتى يتريك وياخذة مينسة

ابو حمزة،،عفية بنيتي الله يرضة عليج

ريم،،طبت عمتي من باب المطبخ

ام حمزة،،ليش ما ضليتي يمه اليوم الا تداومين مو دكيتي رجل الا هناك يروح

ابوحمزة،،سدي المووضوع لا اكوملج بالعگال اريگج بي ومحمد يلا ولي شكبرج بعد تصيرين

ريم،،نزلت دموعهةعمتي وكامت تحجي وي عمي بهدوء ،،اترخصت منهم وطلعت مااحب هالسوالف صايرة كللش اجاني الخط لكيت علي بالباب ينتضرني ابتسمت هاي عادتة يوصلني للخط سلمت عليه باس راسي وصعدني للخط رحت للدوام وشرحت للمدرسة وضعي وضرفي خطية اتفهمت الوضع هية والمديرة جانت ورردة الله يوفقهة شكد ساعدتني لهسة ادعيلهة،،صار الامتحان باول محاضرة امتحنت والمديرة انطتني اجازة كالت رجعي لبيتج وتعاي هالاسبوع امتحني وطلعي ميخالف نتساهل وياج شنجازي من اهلج وعمج تعرف عمي ابو حمزة وواكفلهم بفصل اخوهة من داعم واحد من العشيرة فجانت كلش مقدرتني امتحنت وخابرت الخط ورجعت حتى انسام مالحكت اكعد وياهة كم سالفة مقتطفات وطلعت رجعت للبيت طبيت اسد كاعد وحمزة بعدة على نومتة

فرحة،،ها عمة من وكت

ريم،،اي عمة امتحنت وطلعت اجازة شلت اسد ابوس بي

فرحة،،ياعيوني حنينة كلبج النضيف ما يعرف كره اي بعد عمتج ردي لحياتج وعيشتج وانسي الراح هي هذيج المكرودة هم بنص الضيم ومريضة

ريم،،الله كريم اكعدي عمة ليش واكفة

فرحة،،لاعمة لعد اروحن اركب الغدة اشوف البيت بس ثريا وجديتج بي اليوم ورة ماطلعتي عمج وعمتج صارت صلايخ وعمتج طبت لغرفتهة زعلانة ما تطلع بعد،،انتي عمة شتسمعين انسيه هاي عمتج

ريم،،هو اني رديت،، ما ارد عمي موجود شون ارد وهو واكف

فرحة،،ادري عمة الله يهدي هالرسمية،،يلا عمة اروحن بعد

ريم،،عمة تعاي انتي وجديتي هنا تغدوا والله تونسوني

فرحة،،خلي زلمتج يرتاح هو شرد من الهوسة،،مع السلامة

ريم،،الله وياج عمة،،طلعت عمتي بدلت لاسد وجان متريك طبيت اخذت ملابسي حمزة غافي يمكن من المسكنات خليت اسد يم التلفزيون ونصيتة ويمة الالعاب وطبيت للحمام الثاني سبحت ولبست وطلعت لافة المنشفة فوك راسي اتفاجأت بحمزة واكف بباب الغرفة مستند عليهة ويباوع لاسد مبتسم هو هم استغرب لشوفتي يجوز عبالة بالدوام ،،صباح الخير

حمزة،،صباح النور شني ما داومتي

ريم،،لا داومت امتحنت واخذت اجازة،،اتقربت سندتة صرت بصفة،،تعال اتريك بالمطبخ احسن من كعدة الغرفة موو،،ظل صافن بوجهي لان صرت بصفة ولزمتة اسندة

حمزة،،احمم،،ااي تكسر جسمي خليني اكدر اوصل

ريم،،ميخالف،،وصلتة للمطبخ وهو يباوعلي عبالك ديكتشف شي جديد بية جرأتي الما متعود عليهة يجوز ولااني بس هواي اشياء تغيرت بية ميعرفهة ،،كعد علكرسي واني دنكت انفتح الخاولي ونزل شعري لميتة شون ماجان ولفيت الخاولي انتبهتلة ذبلانة عيونة وصافن علية من اتحرك من انتبهلي اباوعلة اتحمحم وصاح اسددد وينك بوية رحت للغرفة جبتلة قميص مال تراك باردة همست واني وكفة بصفة لا تبرد ويصل عليك الوجع اخذت اسد من حضنة خليتة عالميز ولبستة القميص وسحبت السحابة صرت قريبةعليه وحسيت انفاسة الدافية المضطربة تضرب برگبتي وسحب نفس عميق ابتعدت مرتبكة صدك رجفت رحت عالطباخ احاول اسيطر سويت روحي احرك بالحليب ،،،صبيتلة الريوك وخليت كرسي قريب عليه، ،،اشرب الحليب يفيدك دزة عمي من الصبح قربت الكلاص يمة اخذة جرة بشربة وحدة

حمزة،،عاشت ايدج كافي هذا

ريم،،ميصير لازم تاكل شون تتقوة عضامك وتطيب،،اكل هاي البيضة

حمزة،،من ايدج متنرد

ريم،،ما جاوبتة ولا رفعت عيوني وكلتة وكملت وانطيتة علاجة وهو كام للحمام، ،اساعدك

حمزة،،احمم لا لا،،بعدين وينج جنج فارة يمي

ريم،،اني فااارة

حمزة،،عمي كتكوت ولا تزعلين

ريم،،حجاهة وطب للحمام لميت المواعين اغسل بيهن وهو طلع للغرفة كملت ورحت للغرفة كاعد عالجرباية ما مرتاح

حمزة،،اريد اسبح بيج تساعديني

ريم،،فزيت باوعتلة عيوني متوسعة

حمزة،،ههههه شبيج بهدومي اظل ،يلا عوفيهة يجي ابراهيم واصيحة

ريم،، اي اي احسن سحبت المشط وطلعت للصالة مشطت ولفيت شعري ولبست شال وجواريب طبيت هو يدخن،،،موزين عليك ترة

حمزة،،هذا اسد هيج خانس دائما

ريم،،غلس ما رد،،،اي هادئ

حمزة،،عبالي خانس يمنة من اجيبة مستغرب

ريم،لا هو هيج

حمزة،،عليج

ريم،،اي يجوز،،رحت فتحت البردة وصوتة يهمس

حمزة،،عالاقل مياذي ليحبهم باعصابة

ريم،،بقيت اباوع من الشباك ما درت وجهي ولا التفتت احس مدري شبية اشتعل، ،اعترف باعصابة اذاني ودمرنة كلنة بس اثاري الاعتراف بعد ميفوت الاوان ميريح بالعكس يشعلك بنااار، ،طلعت من الغرفة ما طبيت يمة ابد طبخت التمن واحضر بالغدة ودموعي تنزل شي بية مكسور ما جاي يتصلح ابد كملت وصبيتة وصحتة للمطبخ عالميز اريحلة واكفة اخبط باللبن وحسيتة وكف وراية وكفت حركتي من حسيتة تقرب اكثر التفتت بسرعة هو بوجهي يباوعلي بقلق اتقرب اكثر لزك بية يباوعلي مبينة جنت ابجي همس بهدوء وقلق ما متعودة هذا هدوئة

حمزة،،شبيج ليش تبجين

ريم،،مابية شوية مو زينة بالامتحان وبعدت نضري رفع وجهي بايدة

حمزة،،من وراية موو

ريم،،بقيت ساكتة بس احس حتى رجفة بشفايفي من العبرة

حمزة،،اذيتج موو

ريم،،هوووواي وغصيت بعبرتي

حمزة،،كلة يتصلح بس...

رين،،اندكت الباب مال المطبخ ابتعدت فازة عدلت شالي ووخرت البردة عمتي فرحة فتحت الباب

فرحة،،هلا عمة هلا بهالطول شونك اليوم

حمزة،هلا عمة الحمدلله زين بشوفتج

ريم،،اباوعلة خذاهة لحضنة وباس راسهة

فرحة،،هذا غدة عمج دزة

ريم،،شسالفة عمة هذا خير من الله طبخت من البارحة،،والله جاي نتعبج

حمزة،،مشكوورة عمة تعبناج

ريم،،يلا تعاي تغدي ويانة عالواهس

فرحة،،لا عمة اروحن محد بالبيت

حمزة،،ليش امي وين

فرحة،،هاا مو خالك متخربط وراحت عليه

ريم،،تباوعلي عمتي بقلق عرفتهة زعلانة وطالعة كالعادة ويردهة اخوهة

حمزة،،الله يشافيه

فرحة،،يلا بالعافية عمة

ريم،،طلعت عمتي وكعدنة نتغدة ما نطقنة بعد حررف اوكلة وابد ما اباوع بعينة كملنة واخذ علاجة ونام اني اخذت اسد وطبيت للغرفة الثانية نمت واحس كوة اجبر روحي انام وماافكر شوية وكعدت على صوتة يصيح بالموبايل اتقربت يم الباب

حمزة،،ابراهيم شني القصة شون تطلع لبغداد مو تدري بية احتاجك، ،واذا انعل ابو المعرض ،،يلا يلا رووح

ريم،،سويت جاي احس مسطورة شربت ووديتلة طبيت جان يدخن بعصبية،،مساء الخير

حمزة،،مساء النور

ريم،،خليت الجاي يمة بهدوء وطلعتلة ملابس ومنشفة وحضرت الحمام ورحت للمطبخ جبت نايلون

حمزة،،شجاي تسوين انتي

ريم،،اساعدك تسبح

حمزة،،ما اريد

ريم،،ترتاح من تسبح، بقيت اباوعلة رافعة حواجبي بتأمل انتظر ردة

حمزة،،اني وحدي بس حضريلي الغراض

ريم،،ماشي براحتك خل الف ايدك حتى لا يلوحهة مي،،ساعدتة ينزع ملابسة الفوك لفيتهة ووازنت المي وخليتلة ملابسة الداخلية بالحمام وطب هو يسبح شغلت الصوبة وفتحت الشباك تتهوة الغرفة وعزلتهة وشلت النفاضة وغسلتهة ونظفت الميز ورشيت معطر جوو رجعت مريحة طلع هو ركضت سديت الشباك والبردة اخذت المنشفة انشف بجسمة والبس بي لبستة البجامة والقميص سحبت السحابة وانشف بشعرة اجتي عيني بعينة جان منتهي ونفسة يتگطع مد ايدة لشعري من بين شالي المفتوح من جنت البسة هدومة غرس اصابعة بشعري وقربني الة واني كوة متوزانة واخذ شفايفي بلهفة واحد عطشان وصايم ولگة مي يروي عطشة بي اجذب لو كلت ما مشتاقتلة انسجمت وياه و احس بديت افقد سيطرتي على نفسي ما ردت هيج ابتعدت بسرعة وطلعت من الغرفة طبيت للحمام كبل اغسل بوجهي احسة ناار تطلع منة اباوع للمراية وابتسم اتلمس مكان بوستة شي بية طاير فرح وصوت بداخلي يردد لا تتسرعين وترجعين لاتضعفين لا تنكسريلة مرة ثانية اريدة وما اريدة، ،تالي قررت اسلم الامور لگلبي الميت عليه احس بردت نااري خلص لازم اعيش هو يحبني واني احبة هو غلط واني غلطت كاافي نعاني،،و تناسيت وجود زوجة ثانية بحياتنة مالهة كل ذنب بقيت فرحانة بي كل اليوم اجتي امي وخواني العصر والتهيت بالعشا وهوستة ونضفت وقريت امتحان حاولت اشغل نفسي ما اريد انفرد وياه بعد خلي اهدي مشاعري شوية بقيت عايشة هالحلم الحلوو واتخيل حياتنة الجاية سوة،،نومت اسد ووديتة مكانة وهو راد ينام رحت غطيتة وابتسمتلة بفرحة،،تصبح على خير

حمزة،،متنامين

ريم،،اكمل امتحاني وانام نام انتة حتى ترتاح

حمزة،،بشوفة وجهج فرحان اني ارتاح

ريم،،ان شاء الله ايامنة الجاية كلهة فرح،،تصبح على خير طلعت من الغرفة كلبي طبللل كعدت اقرة ونعست كلش كوة كملت المادة وطبيت نمت دك المنبه وكمت لنفس الروتين والركضة رحت للدوام والمدرسة ماكو متأخرة وين يلا اجت،، يلا عمتي فرحة يمهم امتحنت ورجعت للبيت راسا مشتاقتلة والله،، باب المطبخ مفتوح شوية خفت لا اسد طالع طبيت بسرعة للبيت لكيتة عالتلفزيون كاعد هستوني جاي اشيلة واسمع صوت بنية تبجي وتحجي بغرفتي اتقربت عرفت الصوت دك كلبي حيل

حنان،،ليش متكلولي مو اني هم مرتك غير اعرف لهدرجة نازلة من عينك شكو خذتني لعد مو الي حق، عليك الله

حمزة،،اكيد الج كل الحق والاحترام بس انتي هم مريضة وتعبانة

حنان،،اخدمك بعيوني انتة متدري شكد احبك حمزة

حمزة،،كاافي لاتبجين حنان موزين عليج

ريم،،اكلني القهر واني اشوفة حضنهة وباس راسهة ويمسح ضهرهة بحنان وهي تبجي بحضنة متت بدمي احس واحد وضربني راشدي قووووي صحاني عالواقع احس عبالك ذبوا علية سطل مي ثلج هو هذا الواقع ريم هذا اللازم تفتحين عيونج وتشوفيه هذا غلط حمزة الي مينغفر هذا الطلعتي من وراه وهذا التحملتي المر والحجي من وراه مستعدة تغفريه وتتجاوزين وجود مرة ثانية بحياتج تتحملين تتحمللللين رريم حمزة مو كلة الج مو كللة،،،يتبع