رواية الحارس الفصل السادس 6 - بقلم رشا منصور

عمو عبدالرحيم… فتحت المكتبة الصبح وكالعادة رشا اتأخرت، بس حقها هي بتساعدني من غير ما تاخد مني فلوس. وبعد أكتر من ساعة وصلت رشا وشكلها مجهد، قولت لها: "شكلك مش بتنامي، على العموم اطمنك وليد جالي امبارح وقالي أكلم له ابن عمي وأشوف لك مهندس ديكور، وأنا كلمته وفي خلال يومين هيكون عندك أحسن مهندس ديكور، بس على الله بقى متنسيش عمك عبدالرحيم لما تشغلي الشركة." رشا منصور…

أول ما وصلت المكتبة فضل عمو عبدالرحيم يتكلم وأنا مش مركزة في أي حاجة أصلاً، وبعد ما خلص كلامه قولت له: "بقولك إيه يا راجل يا طيب، ما تشوف لي الكتب الخاصة بسيدنا سليمان." "أصل أنا بفكر أغير موضوع رسالتي." عمو عبدالرحيم… "أنتي يا بنتي هترركزي في الشغل ولا في الدراسة، على العموم القسم الديني في الرف اللي هناك، بس إشمعنى سيدنا سليمان؟

علشان كان عاصر الفراعنة يعني، ولا علشان اتجوز بنت ملك فرعوني، وبنى لها قصر كبير لوحدها مخصوص، وكانت مميزة عن باقي زوجاته." "طب ما سيدنا إدريس هو أول من خط بالقلم، وكان بيفهم في الفلك والهندسة، وبيتقال أنه ساعد في بناء الأهرامات وأبو الهول، وفي بعض الكتب بتقول أن هو أوزوريس والعلم عند الله." "ولا أنتي هتغيري مجال الآثار وعاوزة تعملي رسالتك عن قوة سيدنا سليمان وسيطرته على الجن؟ رشا منصور…

"واضح أن عندك معلومات حلوة قوي، وأنت أسهل من الكتب، احكي لي كل اللي تعرفه." "استني، أنت قولت أن سيدنا سليمان كان موجود في زمن الفراعنة وأنه اتجوز منهم، يعني كان موجود في مصر؟ ممممم." "يعني ممكن تكون الأرض دي تبع بنت فرعون، أو يكون موجود فيها آثار تخصها وتخص سيدنا سليمان." وابتدي عمو عبدالرحيم يقول لي كل اللي يعرفه من معلومات. برك…

أول ما نزلت لنا الجثث، فضلت واقف مع أهاليهم أواسيهم وطلبت منهم يدفعوا فاتورة المستشفى لحد ما نجهز أوراق تصريح الدفن، وأخدتهم بعدها يودعوهم، وبسبب صعوبة الموقف طلبت منهم ينتظروا لحين الانتهاء من الغسل والكفن.

ورحت على المشرحة، وابتدي الدكتور سلامه والدكتور شريف في سلخ الجلد من الجثث، ولأن الدكتورة سوزان مكنتش موجودة بقيت أساعدهم، وبعدها كفنتهم بنفسي ووضعت على كل جثمان اسمه لعدم اللخبطة، علشان الأهل ميطلبوش فتح الكفن لمعرفة المتوفي. والموضوع خلص ومشيت الناس، والدكتور سلامه نضف الجلود بمحلول تعقيم. ووصلت الدكتورة سوزان ولقيتها بتقولي: "بيعجبني فيك لمساتك الإنسانية، بتعزي الناس وبتواسيهم بنفسك، وأنت اللي سلخت أهليهم؟

يا حنين." قولت لها: "الدكتور سلامه والدكتور شريف هما اللي سلخوا." بصت لي وقالت: "وأنت كملت الجثة التانية، وبعدها كفنتهم لحد ما سلامه يعقم الجلود، أخلص وهات نص اللي خنصرته." قولت لها: "خنصرة إيه أنا مش فاهم حاجة." ووصل الدكتور سلامه وسمع اللي اتقال، ولقيته بيقول لها: "لو المبلغ بسيط يبقى حلال عليه، ده الراجل بتاعي ومش خسارة فيه." سوزان…

"قولت ل سلامه برك، كلم موظف الحسابات وخليه يكتب فاتورتين، واحدة للمستشفى وواحدة أداها لأهل المتوفي، وأعطي موظف الحسابات عشر آلاف جنيه، وهو خد أربعين ألف، وأنا عن نفسي مش عاوزاهم، أنا بصرفهم في يوم." "أنا بس حبيت أعرفك أن أي حاجة بتحصل أنا بعرفها، ولما تحتاج فلوس يا برك، اطلب من سلامه أو مني، ده أنت الراجل بتاعنا، أعتقد كده أنت معاك حق قسط الشاليه." وسيبته وروحت مكتبي بعد ما قولتلهم: "يلا، أنا طلبت غداء لنا كلنا."

وبقي برك واقف هيتجنن. رزان… روحت الكلية وأنا معنديش محاضرات أصلاً، وفضلت منتظرة وليد، ولقيته جاي لي ومعاه هدية حلوة، وقالي: "يلا نحتفل بعيد ميلادي، رغم أنه لسه على ميعاده أسبوع، بس علشان بابا مش يشك في الهدية." "بصراحة بابا بيتلكك علشان مش يتمم الخطوبة، هو متعلق بيَّ قوي ومش عاوز حد ياخدني منه." "رغم أن وليد طيب قوي، بس بابا بقى." وقضينا وقت حلو قوي، واتمنيت السنة الجاية نكون متجوزين. سحر…

بعد ما سوزان قالت لي أن البيت اتفتح والورثة هيعملوا مشروع فيه والناس هتدخل وتخرج، وأن سلامه ابني هيتمكن من البنت ويسيطر عليها، وساعتها هنحقق اللي كان عاوزه نزار. حسيت أني هقدر أحقق حلمي اللي عشت طول عمري أتمناه، وأخلي الجن يرجعني صغيرة وحلوة، وأكون أغنى ست في الكون ده كله. وأنسى السنين اللي عشتها في الفقر من بعد ما تخلصوا من نزار. كنت بشحت اللقمة من بعد ما اتطردت من الشقة الكحيانة.

وملقتش غير المقابر أعيش فيها أنا وعيالي. ومافيش حد نفعني غير عيالي والجن اللي معاهم، علموهم إزاي يسيطروا على القرناء علشان الناس تنفذ لهم طلباتهم وتدينا أكل وفلوس. لكني رفضت أنهم يمارسوا السحر أحسن الناس تعرف ويقتلوهم، ويحرموني منهم. أنا عاوزة أدوس على كل الناس اللي افتروا عليا، وأولهم عيلة حمدي، ومش بس كدا، أنا مش هرتاح إلا لما ينقطع نسله من الأرض. ماما ميرفت…

"رشا نزلت المكتبة وكالعادة فضلت قاعدة لوحدي، ناديت على فاتن من البلكونة تيجي نقعد مع بعض، اهو نضيع الوقت." "والله أنا لو قادرة كنت نزلت اشتغلت، اهو أعمل حاجة تشغل وقتي." خالتوا فاتن… "ميرفت نادت عليا، أخدت التسالي وروحت لها، وهي جهزت الكيك والشاي وقعدنا قدام التليفزيون ونتسلى ونحكي." "ولقيت ميرفت بتقولي: أنا زهقانة، يا ريت كنت بشتغل." "قولت لها: أقولك على فكرة، إيه رأيك إحنا هنشتغل ومن البيت كمان."

"إحنا اللي هنمسك الدعاية والإعلانات اللي على النت أول ما الشركة تفتح، وكده يبقى اشتغلنا من غير ما نخرج، وفي نفس الوقت اهو بنساعد عيالنا." واتفقنا على كده، وابتدينا نفتح الفيس ونشوف الصفحات اللي بتعمل دعاية علشان نتعلم منهم. رشا منصور… فضلت أسمع لعمو عبدالرحيم ودماغي مشغولة وبحاول أفهم التنانين دي بتحمي إيه وليه في خطر لحد دلوقتي من نسل نزار. والوقت عدى وقولت له: "أنا هروح بقى." وأول

ما خرجت من المكتبة قولت: "يا عيشوش، عاوزاكي ومش عاوزة حد يشوفني." وفي لحظة كنت في بيت جدو حمدي وفي غرفة المكتب. عيشوش "التنين الأبيض"… "من لحظة دخول الإنسية البيت وأنا معاها على طول، منها بحميها، وفي نفس الوقت براقبها." "وسمعت كلامها ونقلتها البيت، وظهرت لها بشكل بشري، وقولت لها: إيه طلباتك؟ رشا منصور… "أنا كل اللي عرفته عن نزار أنه كان ساحر، وعنده ولد وبنت ومراته اسمها سحر."

"لكن لحد دلوقتي معرفش هو مات إزاي، وليه جدو حمدي حذرني من نسله، معنى كده أن أولاده لسه موجودين." "طب هما عاوزين إيه مني؟ وليه إنتوا مش عارفين تعملوا لهم حاجة؟ عيشوش التنين الأبيض… "إحنا منقدرش نأذي الإنسان إلا بأمر من إنسان مثله، لكن كل اللي نقدر نعمله أننا نمنع دخولهم للبيت." "وبالنسبة ل نزار، هتشوفي بنفسك اللي حصل." رشا منصور… "وكالعادة لقيت نفسي اتنقلت وشوفت الناس ملمومة وبيرموا طوب على بيت تقريباً بتاع نزار،

وطلع واحد منهم يقول: منه لله، هو السبب أن ابني يموت، قالي أنه مسحور، وعلاجه عند الجن." "وأنه علاجه أسيبه في مدفن يبات فيه لوحده، وتاني يوم لقيت ابني بيصرخ وبيكلم نفسه، وفضل يجري في الشارع لحد ما عدى على مزلقان القطر وهو معدي، شوفت ابني بيتقطع قدامي." "وواحد تاني اتكلم وقال: نزار فهماني أن مراتي معمول لها سحر، ولازم أسيبها له تلات أيام علشان يشيل السحر عنها."

"وخرجت من البيت، وفي نص الطريق افتكرت أني نسيت الفلوس، ولما رجعت البيت شوفت مراتي مذبوحة، وهو بياخد من دمها وبيكتب أرقام وحاجات على الحيطان." "وتركت الناس ومشيت براحة ودخلت جوه البيت، وشوفت نزار وهو بيكلم سحر مراته وبيقولها: أنا هطلع على السطوح وههرب منه، وأروح على بيت حمدي الجديد، لسه محدش يعرفه، هروح استخبى هناك، وبالمرة أدور على الكنز." "وجري، وسحر

أخدت عيالها وقالت لهم: الناس عاوزة تحرمنا من أبوكم، الناس دي لازم تموت، محدش له حق يعيش غيرنا." "وفجأة دخلت الناس تدور على نزار، وأخدوا سحر وولادها، طردوهم بره وولعوا النار في الشقة." "وسحر جريت والعيال في إيدها، والناس وراها، ودخلت بيت استخبت فيه، وبعدها فضلت تجري شوية ويقعدوا شوية، لحد ما قالت: يلا نروح على بيت حمدي ونقعد مع أبوكم."

"وأول ما قربت من البيت شوفت جدو حمدي واقف قدام بيته، ونزار واقف بيترعش كأنه بيتكهرب، وفضل كده لحد ما اختفى لحمه وبقى عظام، وشوفت زي ورق بردي وقع من إيد نزار على الأرض، وجدو حمدي خده ودخل به البيت." "وببص على سحر لقيتها صرخت وقالت لعيالها: حمدي قتل أبوكم وطمع في الكنز لوحده."

"الكنز ده بتاعي أنا ونزار، حمدي حرمنا منه، لازم انتقم منك يا حمدي ومش هرتاح إلا لما أحسرك على الكنز وأخليك تعيش مذلول، وبعدها أقطع من لحمك وأنت حي." "ومن كتر ما حسيت بالرعب، قولت: يا عيشوش." "ورجعت على غرفتي وأنا بترعش ومش قادرة أستوعب اللي شوفته." "جدو حمدي هو اللي أمر الجن بقتل نزار وطمع في الكنز."