رواية القاضي و الشاهدة الفصل الثالث عشر 13 - بقلم شامخ

مرت احلة ايام عشتهة بحياتي وية قيصر صَـَـَـَـح ما چان يجي دائماً بس اليوم الي اخلصة ويا يسوة الدنية وما بيهة ضليت احبة حب جنون بحيث ما اگدر اتخيل حياتي من دونة وهوة نفس الشي .. اشوف الحب بعيونة مرت سنة ونص على علاقتنة اني ويا بسر . متعب هذا الشي بالنسبة الي لان صورتي گبال المجتمع مو لائقة ابنية وحلوة وعايشة بيت بحدهة اسمع انواع الانتقادات واسكت وابلعهم حتة ما اگول لقيصر لان هوة يجي اشويت وقت احاول اخلي هذي الساعات الي ايخلصهم وياي مصدر سعاتة .
بس اكيد السعادة مراح ادوم العمر كلة واكيد الانسان لازم ايعيش تجارب صعبة وكل الناس اتمر بتجارب صعبة لان الحياة هية من الاساس عقاب للانسان ...

اتقربت موعد الانتخابات و قيصر بدة ايحضر الهة وايحسن علاقتة بكل اطراف البرلمانين عن طريق عمة ابو مرتة واني الطرف الاضعف بالموضوع صرت ما اشوفة غير كل شهر مرة واتصالتة قلت بحجت الشغل بقيت عند وعدي اله ما احاسبة على دخلتة او طلعتة گلت هنة كم سنة وراح ينعلن زواجنة خليني اصبر وبيوم من الايام عرفت روحي حامل صَـَـَح جنت خايفة من ردت فعلن الناس بس هذا الشي مو غلط واني مزوجة واكيد قيصر مراح ينكر ابنة ..

خلص عقدي وية الشركة الي اشتغل بيهة وهسة ايحق الي اسافر للامارات اشتغل اهناك بابة لح علية بهذا الموضوع وگال روحي الامارات اامن من العراق بس اني ما قبلت ومشيت اجرائت تجديد العقد ورجعت للبيت وجانت احلة مفاجئة وجود قيصر ركضت علية وشبگتة بكل قوتي لان مشتاقتلة موت وبشكل مو طبيعي گعدني بحضنة وگالي
- ام خدود مشتاقلچ وگلبي طگ عليچ ارد اموت بفراگج .
- والله اني اكثر قيصر احس الهوة مگطوع وانت ابعيد .
- هم يجي يوم وما افرگج والله تعبت .
- قيصر عندي الك مفاجئة .
- هذا الحجي الحلوة اموت على المفاجئات دحجيلي والله تعبان اريد شي ايفرحني .
- اني حامل راح يجيك ولد .

بعدني من حضنة وگف اگبالي وبرود اعصاب گال

- وشراح اتگولين للناس هذا ابن منو؟؟
- اكيد ابنك قابل ابن منو!!
- آنتي اكيد اتخبلتي يعني توگفين بوجه ابوچ واتگوليلة  صارلي سنة ونص اني مزوجة بسر وبابة حبيبي اني حامل هسة .. هيج راح اسوين مثلاً.
- يعني شنو اتريد اسوي مثلاً ؟!
- اتجهضين هذا الولد مو وكتة .
- شنووو!! مستحيل .
- اذا اهلج گدرو يتقبلون هذا الموضوع لانكم عائلة متحررة مو معناهة اهلي راح يتقبلو ولا وقتهة واني من البدية حذرتچ من هذا الموضوع يا رغد .
- هسة اهلي صارو مو خٌوش ناس ياقيصر مو؟
- ما گلت مو خوش ناس بس آنتي عائلة متحررة كلشي عدكم عادي والدليل آنتي عايشة بغداد بحدچ ومزوجة بالسر ومحد يدري عن هوة دارچ...استمر النقاش اني ويا الى ان تعبت منة وگتلة مامستعدة اسمع منك اي شي مراح اطردك بس راح اطلع اني .

ما گدرت اتقبل اسلوبة وياي ابد هاي اول صدمة الي من قيصر جانت من اصعب المواقف الي مرت بحياتي والي هزت حب قيصر بداخلي اي جهضتة للطفل كتلت ابني بأيدي وحتة ما اجة وسئل علي خلاني شهرين بحدي اتصال اعتذار ماكلف نفسة .
اتصل بية المدير گلي تعالي لغرفتي رحتلة گلي

- بابة رغد هذا عقد جديد ست اشهر الى ان اتخلص دوام اخوچ ابوچ كال بعد ست اشهر اسافرون فاني سويت هذا العقد علمودچ.
- شكراً استاذ ما اعرف اشلون اجازي فضلك وياي .
- بنتي والله اني اتمنة تبقين ويانة آنتي من اكفئة الموضفات الي عدنة .
- وانت بمثابت اب الي اهنا .
- بالنسبة للاجازة الي طلبتيهة ليمتة ما اتريدين اتسافرين للبصرة سافري بس مو تنسين بس ٤ايام .
- تسلم استاذ ما اتقصر بس اشوف اهلي وهذا الشي كافي .

سافرت للبصرة علمود اغير جو بغداد صارت تخنگني ماعندي اي احد بيهة نسيت اسولف الكم على منارصديقتي 😔 الي گطعت علاقتهة بية نهائياً اتصلت عليهة مليون مرة ما اترد الى ان غيرت شريحتهة حسين رجلهة ما عندي رقمة وصيت ولد ويانة بالجامعة ايجيبة الي يعني صرت بحدي وكميت الضغوط النفسية الي اواجهة خلتني شبه المعقدة وصلت بية الحالة ضليت ادخن واشرب ادوية منومة علمود أَنَـام النهار كلة حتة اهلي بالبداية جانو خايفين علية بس اتعودو علية قيصر ورة فترة اجة اعتذر مني واكيد اني سامحتة لان هوة للاسف نقطة ضعف عندي..

اتصلت بية خالة ام علاء تعزمني على عرس بنت عمو علاء بعد اسبوع والعرس چان بغداد وهمة راح يجون لبغداد كلهم اني وافقت طبعاً بس علمود اشوفهة لجنان الي هية سبب تعاستي اني وقيصر ومرت الايام بسرعة وصار يوم العرس اني اتصلت بودع علمود اروح وياهة لان ما اعرف ناس هواي طبعاً القاعات بغداد كلهة مختلطة لبست فستان اسود عندي وحجان يشبه الي بالصورة

جنت گاعدة يم ودع امتانية جنان تجي اني حاجية وية ودع من فترة ومنبهة عليهة ما اجيبلي طاري موضوع قيصر كلش واي شي ايخصة فحسيت بيهة اتريد اتگول شي بس خايفة وبنفس الوقت اتگلي خلينة انروح من هاي الجهة الشباب كلهة عينة عليج لا اصير مشكلة هنا گتلهة لا عادي المهم اجو العرسان واني عيني على الباب امتانية جنان وقيصر الي ما اجو ليهسة وصدگ حجي ودع كلش اضايقت من نضرات الشباب فغيرت مكاني وگعدت على جهة بحدي بس عيني ما انشالت من الباب ولحضات ورة بداية الحفلة اجة قيصر وجنان سوة حاط ايدة بيدهة ويتبسم الهة وبتهم تركض گدام بس اكو شي غريب بجنان احس بطنهة جبير خاف مريضة لو فد شي ما اعرف شفتهة شاورهة وباس راسهة وراح يم علاء وهية اجت متجهة على طاولتي لان ابحدي ابتسمت بوجهة وگعدت هية گالت

- ﺁسفة خاف ازعجتج بس القاعة مليانة وبس آنتي طاولتج فارغة .
- عمري عادي اذا اني مضوجتچ اعوف الطاولة واگوم علمود تاخذين راحتچ.
- تسلمين گلبي من وين آنتي ؟
- من البــஓـــصـرهـﮯ .
- يعني آنتي ويانة من جماعت العروس ؟!
- اي ..آنتي من جماعة العروس؟
- اي اني مرت عم العروس بس آنتي منو؟

قاطعتة ودع

- هاي شنو جنان گعتي يم رغد!!
-جنان: اتعرفيهة؟!
ودع: رغد بنت عمو كمال صديق علاء وهية صديقتي .
جنان: والله زين هم عندچ صديقة براسهة خير.
ودع: شحسبالچ قابل الم الزبايل داير مادايري .

ردت احاول اهدي الجو الي بيناتهم لان الواضح راح تعلگ.

رغد: اعذريني هاي البنية الحلوة بنتچ ؟
جنان: اي هاي زينب بنتي طالعة على ابوهة .

گعدت اگبالي واتباوعلي بأبتسامة كلش حبيتهة لان صدگ تشبه قيصر و گتلهة
- الله يحفضهة الج ولبوهة.
- تسلمين .
- گلبي اشبيچ شو ما مرتاحة؟ اذا معتازة شي هسة اگوم واجيبة الج؟
( ردت اسحبهة بالكلام لان اعتقد مريضة سألتهة وياريتني ما سألتهة)
- لا ياعمري اني حامل واشوي اتعب بفترت الحمل.

قسم بالله من گالت حامل حسيت گلبي وگف من الخبر اذكرت  حملي ومن حچة وياي قيصر وجبرني اطيح الطفل ومن طيحتة حتة ما اجة وگالي حمدلله على سلامتچ حسيت بدوخة وصداع صحيت على صوت جنان وهية تحجي وياي

- رغد رغد !!
- اسفه عمري اشوي صدعت من الصوت العالي شنو جنتي اتگولين؟
- لا گتلج علية شهر الرابع .
- الله يحفضچ ويحفظ الطفل الج .
- تسلمين حياتي .
- عن اذنكم راح اروح لان كلش دخت .
- وين رايحة بعدني ماشفتچ وكلش حبيتچ.
- والله ما اگدر خليهة على غير مرة اذا آنتي باقية بغداد مرو على بيتي آنتي ودع باجر عازمتكم على غدة .
- اعتبرهة عزيمة ؟؟
- اكيد وخالة ام علاء راح اتصل على ودع وادليكم .
- خليهة على عگب باجر لان قيصر عندة شغل بغداد باجر .
- على راحتكم وهسة اني استأذن .

گمت من الميز والدموع بالگوة لازمتهة بعيني ليش اني هيج حضي اشجابهة عليهة هاي المن اجيت للعرس من الاساس لزمت حسيت بأيد جرتني درت واشوفهة ودع

- رغد وين رايحة شبيچ شنو سوتلچ جنان ؟
- ماكو شي بس تعبت وجنت بدوام وهم باجر عندي دوام ما اگدر ابقة اعتذريلي من امچ مع السلامة
- اشبيهم اعيونچ مدمعة هاي الحيزبونة شنو سوتلج.
- مع السلامة .

عفتهة وطلعت ما اگدر حتة ادور واشوف قيصر صعدت بسيارة وحركت بسرعة والدموع وحدة ضلت تنزل ليش هيج قيصر خليتني انزل ابني وهو يدري بية اشگد احب الجهال وفرحان بمرتة لان حامل لا ومن احجي ويا ايگلي ارد اطلگهة بس انجح بالانتخابات الچذاب اشلون ايطلگهة وهية هسة حامل واني الخلاني انزل الطفل جنت اشك بي يحبني هسة اتأكدت كل وعودة چذب واني مجرد رغبة عندة وكل يوم جاي اتقل ...
من حرگتي ضربت الستيرن وظليت اصرخ احس نار بداخلي شنو اسوي و شنو الحل اشلون اعوفة واني احبة اكثر من روحي محتاجة احد احجي ويا اشكيلة همي راح اموت الهم الي بداخلي كل يوم ايزيد ومخلصتهة بس على الجگاير وحبوب المنومة وهالكة روحي بشغل علمود انسا وصلت للبيت ما اعرف اشلون جبت باكيت جگاير وحدة ورة وحدة وادموعي تنزل احس صوتي راح من گد ما بچيت اتمنيت منار يمي على الاقل اشكيلهة دگيت عليهة تليفونهة خارج الخدمة رجعت دگيت على رجلهة رد علية گال

- الوو منو وياي؟
- هلوو حسين اني رغد اشلونك شخبارك انشالله بخير؟
- الحمدلله بخير.
- منار اشلونهة ليش ما تتصل علية مغيرة شريحتهة وما عندي رقمهة وكلش مشتاقتلهة ..
- رغد خوية بعدي عن منار لان اني مانعهة منچ وما اريدهة تخطلط بيج.
- ليش حسين شنو بية اني؟!
- آنتي اعرف شنو بيچ ما يحتاج اگول.
- لا ما اعرف انت گول !!
- شنو اسمين علاقتچ بالسر وية رجال مزوج وعندة جهال وعايشة بغداد بحدچ وين اكو وحدة شريفة اسوي اسوايتچ ..
- اها لا تكمل فهمتك اسفة خوية اذا سببت الكم مشاكل او خربت شرفكم بس العتب مو عليك على الي اعتبرتهة مثل اخت الي ترضة بهذة الحجي علية وهية تعرف شنو سبب زواجي بسر ...
- رجائاً رغد اذا اشوفين منار بمكان سوي روحچ ماشايفتهة.
- ما يحتاج اتوصي مع السلامة .

سديت التليفون ورحت لغرفتي واني بالگوة امشي بدلت اهدومي وغسلت اخذت حباية فاليوم وگعدت ادخن دگ علية قيصر اني اباوع على التليفون وكارهة روحي وين وصلت نفسي الناس ظلت اتعيرني بعلاقتي بيك لا ومنو منار تستعار مني ولو ما اني اموافقة على زواج چان هية هسة بسجن واني مسولفتلهة على كلشي بوقتهة بس علمتني درس بالحياة اليوم وهوة ما اضحي بأي شي علمود اي شخص بالدنيا لان محد يسوة خليت التليفون صامت وبديت انعس جانت الساعة بالستة المغرب ...

———————
اسفة على التأخير بس الدوام متعب مجاي الحگ اكتب .
En.Zahraa