نزلنة انا ونوار گتلة ما اگدر اطلع بهل الهدوم راح اروح للبيت ابدل وانتة هم بدل وبعدهة نلتقي بمكان .
رجعت للبيت لگيت بابا يتعشة گال من شافني
-هلة بوية الله يساعدج
-الله يسعادك بابا
-تعالي نتعشة سوة ؟
-بابا معزومة على عشة هسة ابدل واطلع
-بس لا شغل بوية انعل ابو الشغل ترة احنة ما محتاجين بطلي
-بابا السالفة مو فلوس بس بالبيت امل ولا تخاف مو شغل نوار گال اخرج على الكورنيش واني وافقت لان ظايجة
-يا بنتي نوار خوش رجال وابن عائلة وامبين معجب بيج لا تضيعي من ايدج
-شنو هاي يابة صاير تدور رجال لبنتك
-أي مو بنتي عنست وماتقبل تعرس ما ادري ليش ؟
-ههههههههه عنست نوب مقبولة منك حجي
-من ترجعين من الكورنيش اريدج اتحجزينة للعراق ارد اشوف اهلي وناسي روحي طلعت من الكعدة ابحدي
-تدلل بابا انا هم عندي شغل بالعراق همزين راح نروح سوة
-يلة روحي بدلي لا تتاخرين على الولد
-خوش ابو يخلي بنتة تطلع باليل وية رجال بحدهم
-مو كتلج نوار ابن اوادم وثاني شي انا يأست منج ادري بيج راح تهججي للولد
-ههههههههههههههههههههه
عفت بابا وصعدت انا يم بابا لازم اضحك واسولف حتة لو ضايجة او مابية لان هو ايحس بملل وحدة مرات اجبر روحي على الضحك والشقة طبيت سبحت وبدلت اشو عاجزت اطلع جسمي خدر من الحمام ضليت متممدة على الجرباية اتصل بية نوار
-هلة نوار
-هلة والله وينج انتي في ؟
-انا بعدني بالبيت
-انتي من صجج تحجين ؟
-اذا انتة تجي اطلع ما بية اسوق
-مسافة الطريج واكون عندج ....اكول رغد تعرفين تلعبين طاولي؟
-مو هواي بس اعرف العب شطرنج
-خلص يبي الشطرنج نلعب فيهة
-بهل ليل تلعب هههههه
-انتي ماتعرفين انا بكندا غلبت كل الي معاي بالبعثة
-تكفة ما اريد اخسر ما اتحمل
-انتي دوم الفايزة الة هل مرة
-هذا غش اني مو كلش زينة بيهة
-اذا انا فزت ابي تعزميني على دولمة عراقية الكل يتحجة فيهة واذا انتي فزتي حددي شرطج
-اذا انتة فزت علية راح اطبخلك الدولمة بيدي وتعرف صارلي 3 سنوات ماداخلة المطبخ يعني فوزك راح يدخلني المطبخ واذا انا فزت اريد تحجي وية ابوك يحولني لشهر بشركة بغداد وافتتاح الفرع الجديد بالبصرة ..شنو تكول؟
-اعتبرهة اتفاق؟
-تعال علية بالول لان قبل ما انام
-صارلك يومين ما بتنامبن الاحين اجتك النومة ؟
- ارد اشرد من الدولمة والطبخ
-بيتكم وينة بالضبط انا بالفريج
-اجة نوار وطلعنة ضلينة نفتر الى ان كتلة انا جعت اريد اكل . اول مرة احس روحي جوعانة ايجوز لان مزاجي مرتاح وية نوار رحنة للمطعم وطلبنة فگال
-رغد اليوم اكتشفت فيج اشياء يديدة
-اشياء مخبئة انتة طلعتهة يا دكتورة
-اله صج ما عندج رع بالامارات؟
-أي في واييد
-من هم الوايد ؟ابوي واشخاص ثانيين ؟
-ابوك ما يحبني يحب مصلحتة لااكثر انا امدية شغلة بنظام واكثر دقة من حركة الساعة لهذا السبب يتحمل مزاجييتي واسلوبي الي لا يطاق
- طيب ليش اسلوبج سيء مع الي حواليج ؟
-علمود محد يتقربلي لان ما اريد احد يدخل حياتي
-مافي احد يحب الوحدة
-احيانا الابتعاد عن الناس افضل
-طيب ليش تقبلتيني بحياتج ؟
-اني بهاي المرحة كلش محتاجة لصديق
-رغد ودي اسئلك سؤال
-اذا كانت عن علاقات او حب رحائا لا تكمل
-طيب مثل ما تبين انا عن نفسي حبيت بنت كانت معاي بالبعثة واهي بعد حبتني استمرت علاقتنة طول فترة الدراسة بالمستر و سنة اولى من الدكتوراء الى ان اتعرفت على شب ثاني واتركتني
-اهي الخسرانة صدكني انت رجال ما تتعوض اشر على أي بنت اهية الي تجيك
-الة صج يا رغد انتي جم عمرج؟
-كم تتوقع انت؟
-31 او اقل
-هههههههههههه مشكور رفعت معنوياتي ...بس انا عمري 28 سنة
-كيف وصلتي للي وصلتيلة الحين انا هذا الي معجبني الي يشتغل معاكي بدون ما يشوفك يكول عمرهة 45 سنة او اكثر اله صدمتي يوم شفتك
-اول شي الممارسة اهم من العمر لان هية الي تنطي الخبرة وانا توظفت بالعراق سنتين ونص واكتسبت خبر وبعدة اجيت هنا وحياتي تكرست فقط للشغل لهذ السبب انا هيج صرت ..... اما ايوم الي اجيت بي ههههههه فانة متعودة على الناس الي يشوفون اول مرة وخاصة بعد ما يعرفون انا ما مرتبطة يبدي الزحف
-ههههههههههه حگج الي يشوف هل الجمال اشتبينة يسوي
-مو شرط الي يجوني اعجاب مرات علمود مركزي بالشركة ومرات علمود التسلية فقط صدگني فترة ويمل من شكلي ويكلي انتي جنتي نزوة بحياتي ولازم ننفصل اما يخاف على مركزة الاجتماعي او يخاف على علاقتة بمرتة او الاثنين
-واذا كان ما متزوج
-ماعندي ثقة بكل رجال من الاساس اهم ما يعرفون شنو الحب والوفة من الاساس
-اوف اوف يا رغد الواضح حتة انتي تاركج الحبيب
-خلاص شبعت اذا تكدر تطلب جاي
-رغد دوري شوفي من يه هذا معانة في الشركة الحين راح يعلم الي بالشركة كلهم
-ههههههههه راح يگول (المديرة رغد تتقرب الى نوار علمود الفلوس)
-ليش ما بگول نوار يتقرب لرغد عشان جمالهة ؟
-ما اعتقد وخاصة انت تعرف حبهم الي اشكبرة
-الحين انتي ما بتضوجين لو طلع عنج حجي ؟
-لا ما اهتم لحجي الناس اعرف انو ماك وشي بينة والصراحة ارتحت من عرفت انك اتحب وحدة يعني ما حاط عينك علية
-ههههههههههههه
خلصنة وكمنة اخذنة نوار الى حديقة عامة مقابل البحر فيهة طاولات وبيهم اضائة گعدنة نلعب شطرنج المسكين حسبالة ما اعرف اللعب بگيم الثالث ما اعرف اشلون نطقت بسمة ايجوز لان اتعودت اللعب ويا.
- كش ملك يا قيصر .
الابتسامة بوجهي واني اباوعلة هوة انگلبت ملامحة وباوعلي بستغراب.
- من قيصر؟!!
- منو جاب طاري قيصر ؟
- انتي الحين گلتي قيصر من قيصر؟
- غلطت سد الموضوع.
- اله صج من امتة تلعبين ؟
- امممم من انة عمري 10 سنوات جابلي بابة رقعة هدية ومن وقتهة اللعب وليهسة محتفضة بيهة.
- حسبتك ما تعرفين تالعبين تعاطفة معك في اول لعبةالى ان سمعت كش ملك تأملت انهة صدفة الثانية والثالثة كش ملك لا عاد انمسحت كرامتي اليوم.
- لا اتضوج اني ما اخسر يمكن اخر مرة قبل 14 سنة وية بابة وبعدهة خطية كرهتة بام اللعب ما بقة عندة امل ايفوز
- انتي ما تخسرين بشي ؟
- سامع غلطت الشاطر بالف اني خسرت بشي و خاي ادفع ملايين مو الف ... تاللعب بعد؟
- لا تعبت في ورانة طيارة باجر.
- مو تنسة وعدك الي اريد تحجي وية ابوك لان حجزت على روحتي للعراق.
- انشالله.
وصلني للبيت ورجعت حضرت جنطتي وانتبهت على نفسي صدك اتونست بطلعة وية نوار وحيل ارتاحيتلة والحقيقة اني الي ارد اخلص الوقت وي امو بس هو سفرة الكويت صارت عبارة عن شغل يومين ورجعنة ونوار وفة بهدة الي وقبل العم ايحولني بعثة العراق لاختيار االموضفين لا وشرط اني الي اختار عشتو اني ردت اروح ارتاح بس التعب وراي ورايالمهم وصلنة للبصرة اتلگانة عمو علاء باب المطار ردت اروح لفندق بس ما قبل واتعارك ياي استحيت ا ردت اثگل عليهم بس هية هم فرصة مشتاقة لودع وسوالفهة واخذتلي يوم كامل سختة اني ودع فهية گاعدة يمي واتصل نوار رفعتة
هلة نوار اشلونك انشالله بخير ... حمد لله اني تمام ها خلصتو مني خو الشركة صارت سختة بروحتي اخذولكم اسبوعين راحة بس اذا رجعت ولگيت تقصير والله اقدم بيكتقرير للعم مو اتگول.... ههههههه أي ايهون علية... أي صوجك اتخابرني ههههه... اشاقة وياك ... أي اعرف قيمتي شنو حسبالك حتة لصياحي هم راح تشتاق وشتلتك لل5 ولليل ...انشالله باجر اروح بس وديلي المتطلبات باميل واريد واحد يشتغل وياي شوف ابوك ترة ما اقبل لا واحد....هههههه دير بالك على روحك ... انشالله الواتساب مفتوح اذا اتريد شي... باي
سديت التليفون اباوع على ودع الي الضحكة شاگة حلكهة
- منو هذا نوار ؟؟؟
- وليش هيج تحجيهة بابتسامة اتحسسيني امسوية مصيبة؟؟
- بلة لف ودوران منو نوار؟
- زميلي بشركة .
- زميلج وبس؟
- أي اشبيج بس هوة احجي ويا وارتاحلة.
- حلوو؟
- ههههه وبشنو ايهمج اذا حلو او لا؟
- ومرض احجي صاير عندي نقص بشوفت الحلوين.
- عندي ويا صور لحضة اشوي.
- ولج هذا صاك ايخبل انوب الدشداشة لايگتلة باعي اشلون ايباوعلج امبين معجب بيج.
- ادري بي .
- اعترف الج؟
- لا ما منطيتة مجال .
- ومرض ولج ما يتفوت هذا .
- الحقيقة اني هم معجبة بي بعدين انشوف سالفتة هذا بس هسة لازم اگوم عندي شغل بالابتوب وباجر طلعة ممن الصبح .
- بسمم الله شبسرعة اجيتتي شبسرعة راح تشتغلين ؟
- ولج راح اموت احس روحي روبوت .
- ويييع بطلي.
- أي الحجي سهل لو ما الشغل جان متت من التفكير.
عفتة وگمت مر اسبوع على جيتي للبصرة ومن الشغل للبيت وهذا الوضعالى ان اجة يوم المقابلات طبعن صارت تصفية للمقدمين بقو بس 100 ولازم اختار 50 حسب الكفائة بيوم المقابلات خلصت نصف الوجبة اجاني اتصال من نوار فطلعت برة احجي ومن خلصت شفت بوجهي حسين ومنار اني انصدمت بشوفتهم الواضح من نضراتهم انو ما يدرون اني المسؤولة عن القبولات اني نسيت كل حجي حسين واگفت اسلم جان حسين يسحب منارويزمخ بوجهي
- اني شنو گتلج رغد لا تتقربين منة ما ايشرفنة وحدة مثلج تحجي ويانة.
- اهة نسيت اسفة بس على شنو جاين اليوم بس لا على التقديم؟
- أي وانشالله هم انتي اذا انتي تنقبلين فاني انسحب.
- هههههه والله جاي اضحكني يا حسين بس العتب مو عليك على هاي الي عشتو اعتبرتهة اخت الي بس على هذا حجيكم والله الة اندمكم .
- دروحي دايحة .
- احترم نفسك لا هسة اسويك فرجة لمت محمد والي بيتة من الجام لا ايرامي الناس احجار حسين خاف نسيت ترة دفناهة سوة سافتكم شو ما عيرتكم فصم حلگك وما اسمع هذا الحجي لا افضحكم ومحمد ..على العموم انصحكم اتولون من احسن لا تنصدمون بالرفض جوة.
- عدنة واسطة وغصب عليج ننقبل.
- ههههههههههههههه مشكور ضحكتني .
فتهم ودخلت ساعتهة عرفت الدية والله اصغيرة ههههه لا انوب ايكلي عندة واسطة خطية من ايشوفني شنو راح ايسوي
اشوي واكو واحد بصفي ايگلي ست رغد عندي اثنين مهندسين حاسبات ممتازين وهم بعدهم شباب وعدهم دورات بتركيا واشتغلو بشركات اهلية...
هذا الرحجي ما ايهمني دخلهم وخلي ينطوني مأهلاتهم .
ودخلو حسين ومنار جنت گاعدة على المكتب وحاطة رجل على رجل وباوعلهم واني رافعة الحاجب.
جان حسين ايگول
- هاي اشجابهة اهنا؟
- احترم هاي المديرة المؤقتة الي تختار الموضفيين .
- شنووو؟
- شنو اسمك حسين مو؟؟ ما عجبني ملفك لا انت ولا منار ومن الاخير انتو غير مقبولين ها مو بس اهنا حتة بفرع بغداد اسمكم راح يندك بالحاسبة فلا اتعب نفسك بعد مو انت گلت ما تشرف اشتغل وية وحدة مثلج.
- رغد لا ادخلين المشاكل الشخصية بالشغل احنة صدك محتاجين الوضيفة.
- من تحجي كول استاذة رغد ...اشو اسلوبك اتغير لحضة وين الواسطة الي جايبهة لا ايكون هذا؟؟
- لا ستاذة اني ما اعرفهم؟
- حسبالي جان فنشتك وياهم يالة طلعو مالي خلك اشوف هاي الشكول البذيئة .
بيومهة حسيت براحة نفسية انتقمت من حسين ومنار كافي طيبة بحياتي اشو خلصت عمري الناس تستغلني خلي اطلع حقي .
لكن للاسف فرحتي ما تمت لان حسين كلشش حقد علية وبفس اليوم راح هوة و منار لبوي بيت عمو علاء اول شي سلم علية وبعدهة
منار: عمو بقية بحياتك اني ما اجيت للفاتحة لان كالو انت ما موجود بيهة .
كمال: حياتج الباقية هسة اتصل على رغد تجي هية عدهة شغل اليوم .
منار : لا عمو ما يحتاج تتصل قبل اشوي جنت عدهة واني جايتك بخصوص هذا الموضوع.
كمال : خير بوية خو ما صاير شي.
حسين : عمي بنتك طردتنة من الشركة و رفضت تعينة بيهة وعممت اسمة بكل الفروع وفوگ كل هذا ضلت تغلط واتسب وتحجي حجي مالة داعي.
كمال : رغد هيج سوة مستحيل .
منار : اذا ما اصدگنة اسالهة من تجي ومراح اجاوبك لان ما عهة وجه اتگول الصدك.
كمال : ماشي اذا حجيكم صدگ شنو الاسباب الي خلت رغد هيج اسوي؟
منار: عمو اني كاتمة هذا السر لسنين بس رغد اليوم جبرتني افضحة الك .
كمال: حجيثكم جاي ايخوفني؟
منار: عمو ما سالت روحك رغد ليش دائماً ترفض الزواج اكيد يجوهة خطابة لان هية حلو و الكل ينعجب بيهة.
كمال: هذا الشي ايخصهة ترفض او تقبل.
منار عمو رغد بسنة الرابعة بحادثة خطفي اتعرفت على القاضي قيصر وبعدهة ازوجتة بسر حسب حجيهة هية وبقت ويا على علاقة طول فترت اقامتهة بغداد وبعدهة اني وحسين رفضنة علاقتنة بيهة لان هذا الشي غلط ونصحتة اكثر من مرة بس هية ما جانت اترد و گلتهة قيصر يضحك عليج وقت وايمل منج وايعوفج بس هية جانت مصرة اتكمل علاقتهة بي واليوم من شافتنة طردتنة وسوت مشكلة خاف نحجي عليهة لو نفضحة عمو اني اليوم من حجيتلك مو قصديي اشهر بيهة بس هية جبرتني اسوي هذا الشي علمود الشغل ياريت تحجي وياهة اتغير قرارهة وحتلو ينقبل بس حسين ولا ادخل الامور الشخصية بالشغل.
كمال: الحجي الي حجيتو مستحيل وكلة جذب.
منار : اذا اني جذابة اسال بنتك وبعدين انت ما شفت حالهة اشلون اتغير من سافرت بغداد ها عمو نسيت اگولك رغد اثناء علاقتهة بقيصر جهضت طفل لان قيصر ما قبل يعترف بالزواج.
كمال: اعتذر منكم بس ارد اتاح .
منار : عمو اني اسفة اذا ضوجتك بحجي وصدكني محد يدري ولا راح احجي بس كل الي اتمنى تقبلنة بالوضيفة.
كمال: انشالله .
الحجي مثل الواحد الگلب الدنية على راسي مستحيل رغد العاقلة اسوي هيج شي مستحيل بس لحضة رغد صدگ اتغيرت من سافرت بغداد وحتة هسة وكل انريد نتقرب منهة ترفض واذا اجة احد عليهة اتنگلب180 درجة اني اعرف اشلون اكشف الحقيقة ....
علاء جان گاعد بالمطبخ فحمحمت ودخلت
- هلة خوية اشو وجهك اصفر؟
- لا ما بية شي بس اريد منك شغلة .
- انت تامر .
- ما يامر عليك ضام ارد اشوف قيصر اخوك.
- قيصر؟!!
- أي والله ارد احول الاملاك بسم رغد ويرادهلة واسطة ومحد ايساعدنة بالمحاكم بس قيصر.
- همزين حجيت هسة لان قيصر بالبصرة وايريد ايروح لبغداد باجر.
- اتصل بي خلي يجي .
- تمام.
علاء اتصلت بقيصر وحجيتلة عن الموضوع اشو هذا گبل كال اني جاي كل مرة ايطلعلي الف حجة والف عذر يالة همزين .
- كمال قيصر جاي بالطريق .
- مشكور خوية.
- بس ليش اتريد اتحول الاملاك؟
- لان اذا تبقى ما يبقى احد مراح ايشاركهة فأحول كلشي بسمهة قبل ما اموت احسن.
- العمر الطويل الك.
- اتصل برغد اتجي تحجي وية قيصر خاف يحتاجهة بشي .
اتصلت بيهة گالتهة رغد تعاالي بسرعة اريد بشغلة.
- بابة ساعة واني يمك بس مسافت الطريق.
- ما ايصير اقل من ساعة؟
- بابة الرميلة بعيدة اطير راح اعوف شغلي واجي.
- تمام لعد.
اجة قيصر سلم عليه و گعدنة انسولف بس كارهة ودي اكتلة كل ما ذكر حال رغد والي وصلتلة حتة دكتور نفسي راجعت وهسة عرفت السبب فسالتة عن جهاله ومرتة كال
- حاليين اني بلة مرة يا خوي .
- ليش جا وين مرتك؟
- طلگتهة قبل الحاد ماتكم تقريباً بسبوع.
- ليشم و عندك جهال منهة؟
- ياخوي تعبت منهة ومن اهلهة مرمرتني ودمرت حياتي اصلاً اهلي اتباركولي من طلكتهة وعلاء سوة حفلة.
- علاء: أي والله خوية انت ما شايفهة نسرة مو مرة.
- كمال: واشناوي هسة.
- قيصر: يا خوي اني احب وحدة بس هية مستحيل تقبل ترجع الي.
- كمال: يعني الي حبيتهة جنت مرتبط بيهة ؟
- هاي السالفة يابو رغد ما يتحملهة گلبي فياريت اسد الموضوع.
- علاء: واگول طلگت صخيلة ثاري الافندي عاشگ ولله مانك هين يا قيصر.
- علاء سد الطاري .
- المعاملة اشگد تتاخر ؟
- انتو لا تهتمون بتاخير اني احتاجكم بس يومين انت ورغد والباقي اني اكملة ونبقة على تواصل.
- ماشي بس رغد ما اعتقد تفرغ يوم كامل لان عدهة شغل واحتمال باجر ما تجي.
- مايصير لازم باجر تجي .
- اشوفهة .
- اشلونهة رغد ؟
- والله رغد جسد بلة روح جامدة المشاعر وامكرسة كل حياتهة للشغل واذا اسالهة ليش اتعبين روحج اتكلي اريد انسة همي .
- الله ايساعدهة خاصة بعد وفاة والدتهة واخوهة اكيد هيج راح ايصير بيهة.
- من البدية هية هيج من انتقلنة للامارات رغد من سيئ الى اسوء اخر فترة شفتهة تاخذ ادوية اهواي حسبالي مخدرات من وديتهم للصيدلية كالي هاي مهدئات ومنوم ينطوهة للمرضة الي ايعانون اكأب .
- علاء : يا خوي من البدية گلتك بنتك اتعاني من الاكتأب بس انت ما تقتنع .....
رغد: اتصل بية بابة كالي تعالي بسرعة خفت لا صاير بي شي وخاصة هوة مريض عفت كلشي بيدي وطلعت بسرعة وكل اشوي بابة يتصل ابو التتكسي طار بية طير صار طريق الرميلة نص ساعة تقريباً دخلت اركض وجفتت على بابة بالاستقبال جان گاعد وبصفة عمو علاء ركضت علية
- بابة ابسرعة امشي اوديك للدكتور.
- مايحتاج بنتي مابية شي.
- علاء : ولج بوية سلمي اشمالج اجيتي اتركضين وگفتي كالبي .
- عمو دك علية بابة و گال تعالي بسرعة خفت لا صاير بي شي.
- قيصر: اشلونج رغد حمد الله على السلامة.
رغد سمعت صوتة من وراي جنت گاعدة على رجلي يم وباة على القنفة درت بس راسي وشفتة احس جسمي اشتعل نار وكلة ضل يرجف من الغضب بس ما اكدر احجي شي حتة ما رديت بشي سحبت نفس وكتلهم
- عن اذنكم ارد ارتاح.
- كمال: وين رايحة اني متصل على قيصر وجايبة علمود المعاملة ايريد ايفهمج عليهة.
بساعتهة انهاريت شنو قيصر يتغيشم بعد كل الي سوى اله عين ويحجي وياي صرت بوجه ابوي وبدون وعي.
- ماريد من هذا الخسيس ولا أي شي وجهة ما اريد اشوفة.
- كمال: رغد اتأدبي.
- انت شنو من انسان ما كفاك الي فات خاف بقة اشوي الي امل بالحياة رجعت اتفلشة( صرخت بصوت عالي) اطلع من حياتي اني اكرهك.
- علاء : بوية شنو القصة ليش هيج تحجين ؟ّ!!!
- كمال: علاء خوية ممكن تطلع واتعوفنة احنة التلاثة سوة.
- محد غيري يطلع والله اكتل روحي اذا اشوف وجهة بعد.
- علاء : خوية كمال فهمني شنو الموضوع؟
- كمال : خوية اطلع رحمة لربك.
//////////////////////////////////////////////
مساء الخير لكل متابعيني الحلوين هذا البارت 3000 كلمة طلعت روحي على ما خلصتة مو تنسون التعليقات والنجمة والمتابعة ومثل ما نبهت من قبل المتابعة مردودة.
امة التعليقات الاول الى
لى مااعتقد رغد راح تنتقم من قيصر وقيصر يكون مطلق زوجته وراح يحاول يرجع رغد 😁 خلص بعد عقلي مو مال توقعات 🌚💔
والثاني
اكيد يسوي روحه مسكين وانضغط عليه او كان يريد يجميهة وبعدين الثولة تسامحة لان تحبة
EN. Zahraa
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!