رواية الكارمــا الفصل العاشر 10 - بقلم آيــه آلـ صبري

ــــــــــــــــــــ

من العصبية الرجفة صارت بـ كُل جسمي
ـ ما أريد أي شي بعد غير أشوف موتك
وبعدها خلِ أموت ما يهمني

تقرب بـ حركة سريعة سحب رأسي وخلـه أيده على حلگي و عيونـه الخازرتني صارت بـ عيني
ـ كافي .

دفعته عني بـ قوة

ـ لا تحاول تتقربلي مره ثانيه

أبتسم بـ استهزاء
ـ انتِ آخر وحدة أفكر اتقرب إلها .

ـ طلحه تذكر من گتلي قبل 16 سنه
عساج بـ جرح علي وحزن يعقوب وعذاب ادم .

عشتهن كُلهن و أسوء منهن و اليوم أني أگُلك
بس كون يصير بيك الصار بيه ولا يرفلي جفن الك
هذهِ رجفه أيديه ما تتعداك .

يستمع وعيونـه مركز بـ برود على الفراغ ما هزتـه أي كلمة من ألي حجيتهم تركني وراح يتمشى لـ داخل البيت بدون كلام .

كعدت على الأرض والدنيا طالعه من عيني
ليش عايشه شعندي لا أهل لا أحد وياي

فتحت التليفون وطلعت صفحه المطعم الـ بصف مركزي ناشر مقطع مطعمه محترك وطالع مركزي وياه

لأول مرة بـ حياتي أحس بـ عجز نهائي
خلص انتهت شخصية زيتونة ألي بنيتها
انتهت الشخصية ألي صنعتها لـ عالمي الثاني .

المقطع مدا يطلع من راسي تعبي هذا تعبي
ضحيت بـ كُلشي علمود أبني هالمركز واملكه واصنع إسمه بعد هالحرگ مستحيل اگدر أبني مره ثانية
منين اجيب فلوس بـ هذا وضعي ؟ وشلون أروح ارممه ؟
مرتين لزموني من أيدي التوجعني
مرتين استفزوني حرگوا للمره الثانية حتى يجبروني أروح ألهم بس مو زيتونه الـ تخضع الكم
سويتها مره بس ما أسويها مره ثانيه .

كُلشي راح بـ لمح البصر فجأة اتغيرت أحوالي منو چان متوقع هذا يكون حالي ؟!

الضيقه العايشتها صعب عليه حتى النفس ، صوت أذان الفجر عالي تلقائياً رفعت رأسي وصار لساني يردد وياه ! أستغربت چنت اضوج أسمعه 

يا ترى إذا أتوب يتقبل مني
يغفرلي أني ما خسرنـه بس أهلي حتى ديني و رضى ربي خسرتـه

صوت الحجيه اتصلي على النبي وتناديني تدور

گمت لكيتها بـ باب المطبخ واكفه تنتظرني
ـ مو راح تتمرضين الليل كله بـ هالصلوخ الابسته كاعده برا ، انتبهي لنفسج لا يصير بيج شي .

صارت ما تگولي تعالي صلي لأن ملت وهي تنصحني وما يفيد

تربعت على التخم مخليه أيدي على رأسي وشعري نازل على وجهي رفعت رأسي على حركته فرش السجادة وگعد يسبح بـ صوت ناصي بين ما تجي عهد و أمه حتى يصلي بيهم جماعة .

ما ألتفت ولا باوع ناحيتي كانوا ما موجودة ، دقايق وتجمعوا يصلون صفنت لا إرادياً بـ حياتي ما شايفه ولا عايشة هيج منظر ولا حاسة وفاهمة شعور العائلة

تركتهم ودخلت للغرفه طلعت الملابس المحظرتهم
ورحت للحمام سبحت ، مديت أيدي على شعري يوكع بشكل فضيع 
شنو الصار ؟ معقولة الخريف دخل الحياتي وناوي يبقى بيها .

بقيت بالبانيو فترة طويلة ما اعرف ساعه او اكثر ..

بعد هالبجي البجيته اليوم تأكدت مُستحيل ترجع زيتونة القديمة .

طلعت انشف بشعري وامشطه بعدها ظفرته
لبست القميص والبنطلون ما لگيت غير بس أحذية كعب مخليه لالي لان هي أصلاً تلبس بس كعب .

لبست اي شي وكعدت أراجع أول امتحان چان إسلامية ، مُجرد اتخرج هالسنه أصير طالبه جامعيه للمرة الثانية ..

صارت بـ الـ 6 گعدت الحجيه حتى تروح وياي لأن طريق ازدحام أخاف اتأخر ، گوه عليه أمشي واحجي إضغط على نفسي بسبيل محد يشوف ضعفي .

أول ما گعدت راحت لـ غرفه طلحة مادري شنو تحجي وياه ، شويه وطلع وراها كاشخ على آخر حبه حتى وهو شايب يهتم بنفسه .

ـ يمة بنيتي ماطول طلحه موجود يأخذج وياه

ما گدرت احچي ولا أعارض مبينه ما تريد تروح وياي ، ما حجيت اي شي عفتهم يتناقشون وطلعت وكفت يم سياره انتظره ..

فتح باب السياره صعد وأني صعدت گعدت بالصدر
ـ وين المكان ؟

انطيته العنوان بـ الضبط وبعدها بديت اغفي ما نايمة ابدد ، فزيت على صوته يناديني

ـ شنو صار على مركزج ؟

فتحت عيوني مصدومه
ـ شمدريك

ـ كُلشي اعرف لا تظنين مدخلچ لـ بيتي بلا ما أعرف عنچ شي ..

احترگ

خليت ظفيرتي ورا ظهري وفتحت الباب انزل بعد ما قريت اسم المكان الامتحن بي

نزل وراي

ومد ايده انطاني علاكه سوده

شنو

_شلون تمتحنين وانتي مشايله لا قلم ولا اي شي وياج

اخذتهن منه

رجع صعد السياره وكال

_ ب 9 ونص تجي الحمايه تاخذج حتى تعرفيهم
سياره سوده تاهو نفس سيارتي

هزيت راسي ودخلت

فتحتها دا اطلع الاقلام واشوف بيها حليب وحلويات
وعصاير ودرزن اقلام ومساحات وكُلشي مُمكن احتاجه ..

اخذت الاقلام والباقيات انطيتهن للحارس الواكف بالباب

عود مسوي نفسه يخاف عليه استغفر الله.......

امتحنت وجانت الاسئله سهله واضحه

اول مطلعت لكيت سياره تاهو سوده مثل سيارته بضبط واكفه يعني صح كلامه

بسرعه تقدموا ب اتجاهي من شافوني مبين واصف الهم شكلي ولبسي ...

_ عيني ست السيد طلحه بلغنا نوصلج

اي

صعدت وياهم مجرد وصلوني وراحوا

اول مدخلت للبيت لكيت عهد والحجيه منتظراتني

_ هاا شلونها الاسئله

سهله

كعدت على ميز طعام وعهد هم كاعده هستوها من نوم دا تتريك

وامها تفتر تحضر الغدا

_ اكلج زيتونه شنو شعجب تمتحنين سادس هسه ليشياكليه تريدين دخلين

مو مهم شنو ادخل المهم الشهاده
كل ما طلعين للعالم الخارجي كل ما تتأكدين ماكو شي اهم من الشهاده
حتى لو عندج فلوس بس الانسان بدون شهاده يظل منقوص

_ ليش هاي مو اكو مشهورات ماعدهن شهاده

ليش شنو تريدين اصيرين مثلهن انتي لو تعرفين واقعهن وعيشتهن القرف راح تكرهيهن

بقت تحجي مواضيع جانبيه واني تعبت ومليت
وبقت تلح على امها علمود تشتري الها
منتجات عنايه للجسم وحده مشهوره تحبها ومسويها عليها اعلان

_يمه اريدهن شوفيهن اذا هاي ..... سوت عليهن اعلان شوفي لعد شكد زينات

عهد ديري التلفون عليه خل اشوف شكلها

_ شبيج هاي ......

عهد ترا كولهن كذابات يعني دافعين الها فلوس علمود اسوي اعلان او يمكن هذا براندها الخاص او بيجها
اكيد راح تكعد تمدح بي
يصير همه منطيها فلوس وتكعد تحجي بكلام محلو عنهم

وترا هاي شايفتها بالواقع اني عدها اهم شي الفلوس والاعلانات عيشتها عليهن .....

_ معقوله يعني هاي مو كل التحجي عنه صح

اي بعد لا تتأثرين بيهن وبكيفج يجي يوم وتوعين على كذبهم

اتجهت للغرفه مددت بملابسي ونمت ماكعدت للعصر و اول ما كعدت فتحت الكتب والملازم اقرا

خلصت تقريباً كل الامتحانات وبقى بس امتحانين جانوا يوميه يوصلوني الحمايه ب امر منه

طول الامتحانات سهرانه وملهيه نفسي بالقرايه ادري بروحي بس اصفن لو اعوف الكتب اكعد ابجي لان صوره المركز شلون محترك مدا تطلع من راسي
ما صدكت صوت الطفله اختفى وصار ما يجيني هواي مثل قبل
نوب اجاني المركز عبالك الحرك مو بالمركز لا
الحرك احسه بروحي نار تاكل بيه من جوا
تحرك بيه حرك .....

الامتحان قبل الاخير مثل كل امتحان امتحنته وجاوبته بسهوله اني زيتونه من اخلي شي براسي اسوي وهالفتره وبعد الصار خليت الشهاده براسي ...

طلعت من القاعه ودا تمشى حتى اوصل للباب الخارجيه

رجعت ليورا بسرعه وختلت ورا الشجره الموجوده
بالساحه

واحد واكف ويه الحارس مدري شنو يحجي وياه
ومتأكده هالشخص نفسه جان وياي من خطفت الطفله اذكر شكلهم لدرجه اكدر اميزهم من بعيد ...

دخلت بسرعه للاداره وجان واكف مدير ويه مجموعه تدريسين

بلا زحمه

_تفضلي

اكدر اتصل من تلفونك ضروري

_نعم تفضلي

فتح تلفونه وانطانيه
حافظه رقم لالي بسرعه كتبته واتصلت عليها
مرتين يلا ردت ..

_نعم منو وياي

لالي هاي واحد منهم واكفلي باب المركز الامتحاني

_ثواني مو على اساس حمايه طلحه توصلج وترجعج

اي بس هسه من طلعت من الامتحان شفته ولحد هسه بعده مدري شنو يحجي ويه الحارس

_باعي زيتونه ابقي جوا بالاداره سوي نفسج مريضه اي شي حتى يقبلون يبقوج
واني هسه راح اخابر طلحه اكوله خل حمايتك يرجعون
لان اني اخذت زيتونه واحنا هسه مسافه طريق ونوصل للبيت

_ ترا بس يشوفوج اصعدين ويه حمايه طلحه اكيد راح يتعرضون الج ويسوون مشكله
وبس يعرف طلحه بالموضوع نروح كلنا بيها

ماااشي اصرفي بسرعه

_يلا نص ساعه واني يمج اخاف اتاخر ابقي انتظريني

مرت اكثر من نص ساعه واني باقيه ب الساحه
انتظر لالي

وأخيراً اجتي شفتها واكفه برا ومبين الحارس ميقبل يدخلها

تقربت ب اتجاههم اسمع الحارس يكوللها

_ممنوع دخلين

لالي مدت ايدها كالت اخذيها

اخذتها بيها عبايه

وكفت ورا الشجره لبستها
الحارس ظل بس يباوع وميكدر يحجي لان احنا واكفات تقريباً خارج المدرسه ف مو من حقه يدخل ويحجي

اول ما طلعت لكيت تكسي واكف باب المدرسه عدل بسرعه فتحت الباب وصعدت ويه لالي

_لا تخافين واكفين بالركن مال شارع واحنا طلعنا بسرعه مستحيل يكونون شافوج

لالي راح اتخبل شمدريهم اني احنا محد يعرف اسمي الحقيقي حتى الموظفين العندي ميعرفون

_لا يجوز احد شافج لان انتي شكلج معروف ما اتوقع عرفوا اسمج لو عرفوا جان لكوج من زمان مو هيج مشلوع كلبهم يدورون

شلون قنعتي طلحه

_اقتنع بسرعه ميشك بيه
ونبي اني خايفه لا يعرف بس يعرف يگلب حياتنا جحيم ...

لا ما اظل بس خل اخلص امتحانات واشوف طريقه اطلع بيها

_يلا اني راح انزل وصيت سايق يوصلوج وانطيته العنوان مضبوط
وراي دوام بصيدليه كوه كدرت اطلع

لالي ما انسى فضلج

_زيتونه كافي تمسلت هو غير گلبي وكع لحد ما وصلتج

فتحت تلفونها وطلعت شريحه منه

_هاج هاي شريحتي الثانيه ما استخدمها هواي
اخذيها خليها بتلفونج كلشي يصير خابريني
احسن ماتشترين شريحه ب اسمج ونوب من خلالها يعرفوج ذولي شياطين كلشي يعرفون .....

اخذت منها الشريحه وراحت نزلت على الشارع
واني كملت الطريق للبيت

اول ما وصلت للبيت دخلت نمت
للعصر خليت الشريحه ب التليفون واتصلت على لالي

_ هلا زيتونه شلون صرتي

يعني

بس يمكن باجر ما اروح للامتحان

_اي افضل اني هم ردت اكلج لا تروحين بس نسيت من استعجالي
انتي ضامنه نجاحج بالباقيات

اي كولهن مجاوبه بيهن وزينه

_اي المهم دخلين وزاري مو مهم هالامتحان عوفي خل يروح
الصبح من استعجالي اخذت العبايه من امي الجبتها الج ونسيت اغسلها من رجعتها وياي
وعبالها البزونه موسختها لان كولها تراب
وتريد تحركها من الصبح لحد هسه مخلت دعوه مدعتها على البزونه
واني ظاله اضحك بيني وبين نفسي ما اكدر احجي بس احجي تخلي سجينه بگلبي اذا تعرف انتي لابستها .....

ههه مو بس تخلي سجينه بگلبج يجوز تحرك العبايه بتيزاب ...

ثاني يوم كوه قنعت الحجيه ما اريد امتحنه لان ماقاريته وميحتاج امتحنه لان ضامنه نجاح بالباقيات عافتني ما حجت شي ....

طول هاي الفتره صح مابيه ونفسيتي تعبانه بس ملاحظه على عهد رجعت تخابر هواي ورجعت على كولشي تبجي وسوي نفسها مريضه ....

ومن عرفت طلحه راح يجي اليوم ظلت حابسه نفسها بالغرفه وماتقبل تأكل او تطلع منها بحجه نايمه ودوام يوم داوم وعشره تغيب .....

المغرب اسمع صوت طلحه يحجي ويه امه

شويه وعله صوتهم وصارت امه تحجي

عهد بسرعه غطت راسها ب البطانيه مدده على السرير

ظليت ساكته اريد اعرف على شنو هيج منفعل حتى من عصبي صوته ناصي ويحجي بهدوء ماينسمع اي شي منه
عكس امه صوتها كولش عالي .....

الفهمته قبل فتره جاب وياه مليونين ضمهن ب غرفته علمود عمليه امه وهسه ما لكاهن
لان الاعرفه هو ما يضم هنا فلوس اي شي يخصه بيتا الثاني هنا موجودات بس كم قطعه ملابس اله..

تنرفزت من عرفت السالفه هسه عباله اني
كمت اكل بروحي اكل من المغثه ....

ظليت افتر بالغرفه وكلمه امه تغثني من تكوله
صار سنين نضم فلوسنا ماكو احد غريب بيتي يشيلهن ....

نداريت على عهد جريت البطانيه منها

باعي عهد هاي السوالف متعبر عليه
احچي من الاخير انتي ما خذتهن

_شنو انتي تهمينييي
منو انتي حتى هيج تحجين وياي

عهددددد لا دوخيني كولي اي لو لا

_ليش مو يطلع انتي الماخذتهن

من عصبيتي
تقربت عليها وضربتها راجدي

لساااانج اكصه اذا تحجين عني كمله مو زينه
مو تالي عمررري تجي وحده تجاوز عليه

من ضربتها خافت وكامت تبجي

_والله انجبرت ظل يهددني ويجي للمدرسه يحجي
وگلي انطيني خمس ملايين واسكت عنج

واني اعرف ب طلحه راج يجيب فلوس علميه امي فكتله عندي ب مليونين
وظليت اتوسل بي يلا قبل ياخذ بس مليونين

احس سكري تخربط من السمعته اعصابي احتركت
بكل برود سولف الي فوكاها

انتيي ثوووله مو كتلج اني احلج الموضوع مااقبلتي وكلتي لا تدخلين
شسوووي بيج هسسسه شسوي
اكيد عبالهم انييي لان بس غريبه بينكم
عقلللل ماكووو برايج انتي ما تفكرررين

_ من نطيته الفلوس حلف يحذف كولشي بس شو هسه رجع يهددني

عهد باجر الصبح تلفونج يميييي واني اصرف وحلكج ما تفتحي

ظليت بالغرفه اكل بروحي اكل يوميه طالعه الي سالفه
متأكده هسه هو شاك بيه
حتى لو ما يحجي بس مبينه راح يشكون بيه ماكو غيري غريب بهالبيت ....

انتظرتها تنام واخذت مفتاح سيارتي من الخزانه ما اريدها تشوف منين راح اخذ الفلوس ما اثق ب اي احد

قررت اخذ من فلوسي وارجعهن اله بدون محد يدري

فتحت سيارتي وشغلت ضوا تليفون
وكعدت احسب بالفلوس
ايدي ترجف هاي صارت بيه حاله من العصبيه واكثر شي من اعصب تلزمني الرجفه وعيوني تغوش
نوب حتى العلاج مخلصته ومالي خلك ارجع اكول لالي جيب الي ....

حسبت الفلوس وطلعت منهن مليونين اخذتهن ضميتهن بجيب القميص جان اكو بي جيوب ....

جفلت من شفته كاعد على الكاشي ب باب المطبخ
متربع ب طرك الفانيله الرياضيه والبجامه
فاتح السلاح ينظفه ....

شنو ماعندك غرفه الا هنا تكعد
كل المواقف السيئه والتخلي يشك بيه دا صير وياه شلون سالفه هاي ....

مخلي تلفونه بصفه ومشغل اغنيه

_ياما كتلك ياما ياما
جوز من عندهم وتوب
ذولي لمتهم ثلج ساعه ويذوب
باعوا العشره ونسونا
وشحصلينا غير تعبك وتعبي لا ياقلبي ....

نزلت دموعي واني اسمعها
لميت شعري المفتوح ب ايدي وخرته عن عيوني ومسحتهن

_تعاي ادري بيج واكفه هنا

فزيت من حجايته هاي شلون شافني

ما احس الا صار فوك راسي

_بس لو اعرف سالفتج اني ارتاح

ابتعدت عنه ومشيت دا ادخل للمطبخ

جر ايدي لواها دفعني على الحايط

وخر شعري من عيوني ب ايده

_شعندج اجيتي الي وليش ما امتحنتي وليش مركزج احترك
احجي احسن ما اعرف بطريقتي الخاصه

اريده ادفعه حضني بكل قوته ويحجي همس ب اذني

هو اطول واضخم مني واني الضعف ما اكل جسمي اكل ..

طلحه وخررر عني ما اريد امك تشوفنا

_ ترا بدقيقه وحده اكدر اعرف سالفتج كلها
بس اريد اسمع منج انتي

عضيته من ايده حيل علمود يوخر عني

بس وخرت طشرت الفلوس كلها من جيبي

ظل فاتح عيونه بصدمه ......

يتبع ....

مشاعركم راح تكون متناقضه بكل بارت تجاه زيتونه ب اخر بارت يلا تكدرون تقررون اذا راح تحبوها او لا ....