رواية الكارمــا الفصل التاسع 9 - بقلم آيــه آلـ صبري

وياك آني حرب وكلمن يشيل اسلاح
تكتلني لو أكتلك بالحالتين ارتاح !
ـ الكاطع

بَعدت وجهي عنه متنرفزة ، خَلـه أيده بـ جيبه وبقى يفتر بـ الصالة رايح جاي ..
حچه بدون ما يباوع مُستمر يمشي
ـ تفهمين شنو يعني صحتج بـ النازل ترا وضعج ابد مو طبيعي ؟

ـ لا ما بيه شي .

طلع تليفونـه يتصفح بي فجأة صار يحچي
:: يعني انتِ جايه بـ الطريق ؟
:: ماشي لعد ما راح أطلع ، انتظرج يابـة .

دخل لـ غرفته وسد الباب ألي طلع صوت عالـي بـ سدته ، تنرفزت شنو قصده بـ هالحركة قابل راح أدخل ورا للغرفـة .

شويـة وطلع مغير ملابسه هم للرسمي كاشخ على آخر حبه ، هسة لو بس أعرف شنو يشتغل لدرجة كُل الرسمي ألي يلبسه مبين غالـي

تقدم بـ إتجاهي يلبس بـ ساعته و يحچي بـ هدوء
ـ اجتي لالـي بـ الطريق

بعده دا يحچي و اندگ باب المطبخ ، من شفتها كانوا شفت أهلي كُلهم حتى صحتي رجعتلي
مُجرد سلم عليها وطلع تركنا بـ راحتنا
ما اگدر اگوم تقربت حضنتني و دموعها ينزلن
ـ شكو متت و أني ما أدري
ـ ياااا لالـي كافي بجي شكو

بَعدت عني تجمع شعرها معصبة
ـ المفروض هسة بعد ولا احچي وياج ، ما تحسين شلون گلبي نار عليج من يگلولي مريضة وما تأكل و فوگاها أريد احجي وياج و أسمع على الأقل صوتج وهم ما تقبلين بقيتيني بين نارين لا اگدر اعوف امتحاناتي ولا اگدر أبعد قلقي عنج .

مسحت عيونها المليانة دموع
ـ اهووو كافي بچي هسة مو تدرين اضوج أشوف أحد يبجي

ـ يلا هاي هَي خلص بعد ما ابجي بس شو صايرة مومياء من الضعف

أخذت نفس بـ حيرة
ـ مادري لالي شوفيلي حل الطفلة دمرتني لا شكلها ولا صوتها دا يروح من بالـي بـ الواقع و بـ الحلم  .

كرصتني من أيدي بـ قوة
ـ صوتچ يمعودة لا تفضحين نفسج بنفسج ،
ترا بس يعرف يودينه  ورا الشمس !!

باوعت عليها مصدومة من ردة فعلها
ـ ليش منو هو قابل ؟

دخل گعد على التخم مُقابيلنا ، حچت بـ صوت ناصي
ـ اسكتي و غيري الموضوع بسرعة .
ما فهمت ولا وضح ألي قصدها إلا من صاروا يتناقشون .

ـ شلونج ويـه الصيدلة

ـ الحمدلله بس مخليتني أنسى حتى نفسي من الضغط .

ـ اتفاجأت من عرفت داخله صيدلة بغداد ما توقعتج هيج سباعية 

ـ حتى أني أنصدمت من عرفت بيك قاضي .

فتحت عيوني على وسعهم من آخر كلمة بـ شعور لا إرادي صارت عيني بـ عينه
ـ قاضي !!!!

باوع مستغرب
ـ و ليش متفاجاة ؟

انتبهت لـ نفسي و رجعت الوضع طبيعي
ـ لا بس أستغربت ما چنت متخليه تكون قاضي .

هز رأسه وگام وگف بدون كلام
ـ من رخصتج يابـة لالي عندي طلعة ضرورية و أكو جهاز للسكر بـ غرفة الوالدة على السرير يجوز تحتاجي من تشوفين وضعها .

ـ تمام هسة أشوفه .
اترخص وطلع ما سمعنه غير صوت سيارته اتحركت .

وگفت تهفي على وجها وتحچي بـ خوفـه
ـ هسة عرفتي ليش اگلج اسكتي وگعنا بـ مصيبة ثانية ، ما چنت أعرف بي قاضي من أتصلت و طلبت منه تبقين عند أمه لأن آخر فترة صرت أسمع أمي هواي بـ الصدفة تحچي بيهم أنُ أحوالهم متغيرة و عنده بيت بـ بستان بـ أطراف بغداد گاعده بي بس أمه و أخته و هو دوامه و استقراره الخاص بـ بغداد .

ـ واعية للي دا تحچي من كُل عقلج ؟؟

ـ مُستحيل أكذب عليج بـ أي شي گلته أو راح اگوله
بـ الصدفة عرفت هو قاضي چنت متوقعه يكون عنده مهنة عادية ، من دا أطلع من الصيدلية شفته گاعد بـ سيارة مضللة و وياه حماية ما أعرف شنو چان عنده شغل بـ هالمنطقة وسألته و منها عرفت .

خليت أيدي على رأسي افتر متوترة
ـ شلون لالي شلون جبتيني هنا بلا ما تتأكدين ؟؟!

ـ انتِ بس أخذي حذرج وما راح يعرف خلال هالفترة و بـ اسرع وقت راح أخذج لـ سليمانية .

تقربت سحبت أيدي طلعت منها الكزاز
ـ و بعدين ليش أيدج مجروحة هسة يلا أنتبهت ؟

بقت تفحصني و تسألني عن عن كُلشي يخص وضعي
ـ أول شي راجع الج الاكتئاب و ثاني شي إذا تبقيت على هالوضع راح يصير بيج سكر .

ـ شنو يصير خلِ يصير ماكو أسوء من ألي صارلي .

ـ وين غرفة أمه ؟

أشرت إلها عن إتجاها ، دقايق واجتي شايله جهاز هم رجعت فحصتني ، تركت كُلشي من أيدها و بقت تحچي و تلوم شلون هاملة صحتي ؟ آخر شي فتحت جنطتها و شمرت عليه حبوب .

ـ هَذهِ حبوب الاكتئاب ألي چنتي تأخذينهم حافظه أسمائهم و من الأساس چنت متأكدة راجع الج ..

ـ شنو سويتي على مركزي ؟

ـ اتصلت بـ الحارس من تليفون صديقتي علمود لا يعرفني ، وبلغته زيتونــــة مسافره بـ شغل ضروري وتتأخر يلا ترجع أغلق المركز والمفاتيح تجي سياره العصر تأخذهم منك بـ البداية ما قبل بس من ظليت الح وانطيته معلومات عنج يلا قبل .
و انطيت فلوس لـ سايق التكسي وصيته يروح يأخذهم بـ صفته دزوه و قطني بـ 100 الف وين موديتك لـ جهنم استغفر الله .

وهم انطيت فلوس للسايق انطاهم للحارس 500 الف يگولي ما انطتني راتب ، أدري بي كذاب بس شسوي علمود اسكته ..

ـ ماشي هسه انطيج الفلوس الـ صرفتيهم .

ـ عوفيهم بعدين هسة أريد أشوفج ، وين الحجيه لعد ؟

ـ راحت للسوگ على جيه لأن صار هواي من طالعات .

_باعي ركزي وياي امتحانات الخارجي بعد أسبوع انتِ مو مقدمه ، لعد شوكت تمتحنين ولحد هسه ما مراجعة

ـ مالي خلگ وشلون أطلع ؟

ـ همه يعرفون أسمج الحقيقي ؟!!

ـ لا محد يعرف

ـ بعد شكو قابل راح يدرون بيج مقدمه خارجي منو يجي بـ باله هالموضوع ، لو يدرون بيج راح تمتحنين وحتى اسمج الحقيقي ما يعرفوا
أني هم حسبت حسابي وجبت وياي الكتب والملازم
وحتى العلاج جبته كامل بس اقري قرايه مال نجاح علمود تدخلين وزاري صار شگد ننتظر هالامتحانات
أنتِ ضابطه كم ماده ما يحتاج بس مراجعة .

ـ لالي أريد أروح لـ سليمانية مستحيل ابقى هنا أكثر لازم تشوفيلي طريق أطلع بـ أسرع و أقصر وقت .

ـ بس اسمعي كلامي ، أني مرتبة وضعج كُله طول امتحاناتي وتفكيري عندج لا تضيعين تعبنا و تعمدت أجيبچ هنا وما خليتج تروحين لـ سليمانية .

ـ ما فهمت قصدج ؟؟

ـ أخاف بسبب المشاكل نسيتي امتحاناتج الصار سنين ننتظر هالحظة أني ما نسيت
ولأن أعرف موعدها قريب اتعمدت اجيبج هنا
ابقي لحد ما تخلص مصلحتج !!
امتحني واضمني دخولج للوزاري بعدها نحاول نشوف طريقة تطلعين بيها لـ سليمانية بدون ما يشك و بدون ما أحد يعرفج و من تروحين أبيع سيارتج و المركز وادزلج الفلوس وارجعي أبني حياتج من الصفر ولا كانوا صار شي .

ـ مُستحيل لالي مُستحيل عقلي بعد ما يستوعب ألي دا أسمعه نوب طلع قاضي شيخصلني بعد ، وين و لـ أي مكان رجعتيني ؟؟!!!!!!

حچت بـ حدية معصبة
ـ وين أخذج لعد وين ؟؟ منو عندج لا عمام ولا خوال ولا أهل ، ولا أحد ثقة نعرفــه كُل إلي تعرفينهم معرفتهم بيج مصلحة على گد مصلحتهم يتملقون الج !! لحد هسة محد بيهم سأل عنج أو حاول يدور رغُم بعضهم يعرفوني و يصادفوني بشكل يومي .

ـ الكلاب أوفى منهم و ما يهموني لا تجيبين سيرتهم

ـ نسيت اگُلج حارس العماره الساكنة بيها قبل أسبوع هم رجعت أتصلت عليه وگلي بين فترة وفترة دايجون شباب محد يعرفهم يسألون عنج مو بس الحارس حتى الجيران يسألونهم يعني بعدهم لحد هسه ما ناسيج ويدورون عنج .

وحتى حارس المركز لح وياي علمود يعرف مكانچ و بـ طريقتي اتصرفت وياه ومن انطيته فلوس سكت بعد ما حجه ولا سأل .

ـ أريد انطيچ فلوسي ضميهم عندج .

ـ لا مستحيل أخذهم أمي بس أشوفهم تأكل رأسي وترا هسه من اجيت ما تدري اجيتج عبالها أني بـ الصيدلية شنو أسوي مجبورة أكذب كُله علمودچ .

ـ لعد شلون كُلشي يصير خوما يبقن هنا ما أثق بـ أحد غيرچ .

ـ لا تخافين المكان أمان كُلهم ناس عرب يخافون الله ملتهين بس بـ شغلهم محد اله علاقة بيچ .

ـ شنو أسمها المنطقة ؟

ـ ***** صاير أطراف بغداد وقريبة على ديالى فـ محد تجي بـ باله .

ـ لاحظت من خلال الطريق أطراف بغداد بس ناسية أسمها و هم ما داخلتها قبل ، لعد اذا قاضي شو هنا مشتري بيت ؟

ـ لا مو گلت گاعد بـ منطقة ***** منو الي يگدر يدخلها بس حسب المعلومات الجمعتهم من أمي أمه عايشة بـ هالبيت لأن تحب الزرع و هي اصلاً مراة عُربية ما تحب تطلع من البيئة ألي كبرت وتعودت عليها وبعد ما أدري شنو سالفتها الأصلية .

بقت يمي لحد ما اجتي الحجيه وعهد
مجرد سلمت عليهم وراحت ، أخذت العلاج ونمت
فزيت بـ الليل على صوت عهد تخابر بالتليفون

كمت وگفت گدامها بسرعة نزلته وغلقته
ـ عهد ويه منو دا تحچين مو أتفقت وياج أحل الموضوع ؟

ـ ويه صديقتي

ـ صديقتچ بنص الليل !

ـ ما طول گعدت انطيني تليفونچ أحل الموضوع و احچي ويه هذا الطايح الحظ المراهق .

ـ ما يحتاج بعد انطيته حظر وعافني .

ـ أريد أسويله جره أذن حتى ما يلعب على بنات العالم ترا شباب الهيج نوعيه دواهم يمي
لا تخافين بس احجي وياه وما اخليچ تتضررين بـ العكس حتى يصير يخاف يفكر بيج مو نوب يهددچ

عافتني و مددت على السرير
ـ لا والله ما يحتاج بعد عوفي خلِ يولي هو عافني لاتتدخلين .

هزيت رأسي وطلعت من افز بعد يطير النوم من عيني ما عجبني وضعها شنو قبل يومين تبجي وتتوسل وشنو هسه ما أتدخل .

أخذت الكتب من الصاله وگعدت اقرأ ، مر أسبوع كامل لهيت نفسي بـ القرايه طول الوقت بس اقرأ خلصت المواد كُلهم من الأساس چنت قاريتهم قبل لا أتصير آخر الأحداث ..

أتصلت لالـي على تليفون الحجية قبل الامتحانات بـ يوم انطتني عنوان المكان الراح امتحن بي بـ الضبط.

جهزت قميص نص ردن و بنطلون كابوي ألبسهم بس الحجية رفضت و گالت شلون أمشي وياچ حتى أوصلج و انتِ بـ هالبرد لابسه خفيف ، احتراماً إلها طلعت من قمصان لالي المخليتهم و أغلبهم ردانهم طويل و مستور .

بقيت سهرانة بـ الصالة وحدي على الهدوء مندمجة أراجع ، فزيت على دخلته من باب المطبخ

باوع عليه بدون أهتمام ودخل الـ غرفته ، طلع يجي بس يوم وأحد بـ الأسبوع علمود أمه وحتى ينطيهم مصرف ويجيب احتياجاتهم ويروح وهسه يلا عرفت بسبب دوامه جياته تكون بس بـ الليل .

بـ 12 طلعت الحجيه من غرفتها الصايرة مُقابيل گعدتي انطتني التليفون تگولي لالي تريد تحجي وياج ، بلغتها ب جيته و أخذت التليفون تركتني متجها لـ غرفة أبنها .

تمشيت خارج البيت للحديقة يلا رجعت أتصلت ردت بسرعة منفعلة

ـ مصيبه وگعت على رأسنا

ـ شنو صاير ؟!

ـ مركزج احترگ للمرة الثانية وحتى المحلات البصفه والمطعم محترگات .

ـ ماشــي

ـ شنو ماشي أنتِ مستوعبه شنو دا احجي صار ساعه أخاف أتصل خايفة من ردة فعلج لا يصير بيج شي بعدين ولا كانوا صاير شي !! النبي عليج احچي ابچي مو وقت مكابرتچ أرحمي نفسج لا تبقين تكتمين

ـ باي لالي وراي امتحان

ما انطيتها مجال تحچي أو ترد غلقته
فتحت باب غرفه الحجيه بـ هدوء لگيتها راجعه لنومتها بس خليت التليفون قريب على  رأسها وطلعت

أخذت تليفوني والكتاب و رجعت برا بـ الظلمه قريب على سيارتي بنص الزرع بعيد عن الضوه

أحس گلبي يريد يطلع من مكانه نفسي ضاق عني
رجع الشعور البشع الـ چنت اعيشه قبل أسبوع ، ما أهتميت كملت مراجعة جابرة نفسي بس أيدي الترجف منعتني اگلب حتى الورقة ..

تمنيت لو ميته ولا سامعه الخبر ، حلمي و الشي الأحبه وضحيت بـ نفسي وصحتي و سنوات عمري علموده راح بـ لمح البصر ، طلعت الشهكه من گلبي ليش هيج صار وياي ؟ ليش حياتي انگلبت ؟

معقولة كُل الصار قدر لو صدفة لو حوبه
لـ منو اشكي ولـ منو احچي ؟
دائماً اسمع لالي تكولي .. من أسمع الشعراوي والوائلي أرتاح غمضت عيوني ونزلت رأسي
أدور على شي بس ما أعرفه شنو أريد أحاچي ربي بس معقوله يسمعني بعد كل الي سويته !!

فتحت اليوتيوب وكتبت الوائلي ، طلع أكثر من مقطع وما ارتاحيت من سمعتهم مثل ما توصف لالي بـ العكس اختنگت كانوا دا يذكرني بسوء أعمالي

ويه مجموعة المقاطع بقى مقطع يتردد بـ عقلي
ـ شي اسمه صدفه ماكو
الصدفه تناقض منطق العلم
بسم الله الرحمن الرحيم
" كل شي خلقناه بقدر"

غلقت التليفون ما أريد أسمع أي شي بعد ، طلع قريب على النافوره يردد الأستغفار صوتـه وهو
يقرأ قرآن قشعر جسمي صوته دعائه لـ ربه فزز كُل جرح بيه

دموعي صاروا يتسابقون
ليش حياته تغيرت للأحسن واني أتدمرت ؟ ليش هو حياته أفضل مني
منو چان الخطأ بينه ومنو جان صح
منو دمر حياة منو !!

اختنگت گوه أجر النفس صرت اشهگ بسبيل اتنفس
أريد هوى اختفى
معقوله كُل هالصدمات صارت تتراكم بـ جسمي على هيئة أمراض ، معقوله كتماني دمر صحتي وسلب عافيتي لهالدرجه اختلطت دموعي ويه شهكاتي الاستنجد بيها علمود أجر النفس مقارنته ويـه نفسي و وضعي الخالي زاد أنهياري

واگف فوگ رأسي فاتح عيونه بـ خوف
اشرت اله مدا أگدر أتنفس
حار بيه شلون يهديني ويرجعني لـ وعيي

حاول يتقرب يلزمني من أيدي أشرت يبتعد ، تركني ودخل جوا ينادي أمه بـ صوت عالي

كلشي ضاگ بعيني مابقى عندي روح ولا عندي أحد ليشوف هذهِ حالتي ويخاف عليه
چنت متروسه ناس بس محد وياي .

غمضت عيني وخليت رأسي على الزرع
اجتي الحجيه سحبتن خلته بحضنها و تقرأ المعوذات وتنفخهم بوجهي مادري بي وين راح بس أمه يمي بقت

ـ مدگوليلي شبيج لا تقبلين أخذج للـ طبيب ولا تقبلين تگولين شبيج
احچي طلعي كلمة منج خلِ افهم بعدج صغيرة والي يشوفج يگول عجوز اجيتني مثل الورده ليش ذبلتي

دموعي حرگت خدي
ـ حياتي يوم عن يوم أتصير سوده

_ "يا بنتي حوبه الابيض گلب تحرك خضار ايامج "
هاي نتيجه افعالج ولازم تتحمليها

بقت تقرأ ايات ومستمره تنفخهم بوجهي
ودموعي وحدها تنزل

ـ يلا كومي نامي وراج امتحان

ـ لا روحي نامي فزيتي من نومتج بسببي

ـ لا تضوجين من كلامي من خوفي عليج

هزيت رأسي بدون كلام
بقيت گاعده وحدي فوگ الساعه صافنة و صوت الحشرات بكل مكان والبرد يكص كص واني بـ النص ردن جسمي مريض لدرجه ما يتأثر حتى بـ البرد

گمت أمشي خطوه خطوه بـ هدوء
واكف بعيد عني گدام النافورة ومخلي أيده بـ جيوبه
بقيت مركزة بـ اتجاهه و أخذتني الصفنة

حرك ب أصابعه شعره الأشيب طلع جداحه ورث الجگارة  ايده بيها الجكاره و أيد مخليها بـ جيبه
تقربت أكثر

طلحه

ألتفت بـ سرعه مُجرد ما ناديته بـ إسمه لأول مره من بعد سنوات

صارت عيني بـ عيونـه الكُلها أسئلة

ـ طلحة أتمنى هسه تموت گدامي وما يرفلي جفن .

رفع حاجبه وحچه بـ كُل هدوء و استفزاز
ـ ليش على الأساس انتِ بريئة !!

ـ كُلشي ما أريد بـ هالدنيا غير يومك يكون قبل يومي حتى أشوف موتك ..

يتبـــــــــــع ..