رواية الكارمــا الفصل الثالث 3 - بقلم آيــه آلـ صبري

جَزَى اللــهُ الشَّدَائِدَ كُلَّ خَيْـر
‏وإن كانت تُغصّصُنِي بِرِيقِـي
‏ومـا شُكْرِي لهَـا حمْـداً وَلَكِـن
‏عرفتُ بها عدوّي من صديقي
‏— الإمام الشافعي.

الاحـداث المتسلسلـه تـبدأ مـن بـارت 5
البـارتات الاولـى ، غـير مناسبـه لعـقول الـجميـع  اقتـضى التنـبيه .

لالــــي ؛

گاعدة على أعصابي لو ما الحظور ولا أدخل للجامعة
منتظرة الـ دكتور يخلص بـ فارغ الصبر ، الشرح مُعقد ويحتاجله تركيز نوم ما نايمة بسبب الكوزات أكل اتعاجز أسوي وأكل، الشباب گاعدين وراي بيهم الـ مشغل الـ مُباراة ويشوفها وبيهم يصور بنفسه لو بـ جماعتـه ويحشش عليهم  لو وأحد يسولف ويه جماعته ، وبيهم الـ عيونه على وحده يتأملها

أريد أرجع للبيت الگاعد بـ صفي ضايقني بـ صوت همسة يحچي لـ صديقه عن وحدة من غير مرحلـة عاجبته وهي لابسته مدا تنطي فرصة

عدلت گعدتي خليت رجل على رجل ، مُجرد ما غلق الـ داته شو يعلن إنتهاء المحاضرة ، بسرعه أخذت جنتطتي ولابكوت وطلعت 

علاقتي شبه محدودة ويه الـ طلاب والطالبات
ما احجي ويه أحد فقط من أريد شي عن الماده أو أذا چان شغل عملي يجمعنا ، الأغلب مُجتمع منافق ما يناسبوني گعداتهم عباره عن نفاق لو طلعات وصرف فلوس على ناس ما تسوى

تمشيت لحد ما وصلت على مكان توگف بي الفورتات
صعدت انتظرها تَنملي حتى يحرك دفعت الكروه ولبست الهتفون بـ أذني شغلت أغاني وفصلت عن الـ دنيا كلها لحد ما وصلت 

دخلت حضرت غده لـ امي ونمت ما گعدت للعصر
غيرت ملابسي مالي خلك أخلي مكياج بس رفعت شعري ، تمشيت للصيدلية قريبة عليه عندي تدريب بيها ، ولأن أحب كُلش الصيدلة تعلمت على الـ علاجات وأخذت على الـ مهنة بسرعة ، وخليته يحسب الي راتب أتدرب واشتغل بنفس الوقت .

دخلت مراه كبيرة انطتني الوصفة قريتها و كم شغله معرفتها بعدنـي تحت التدريب وأحب أسأل كُلش هواي حتى أخذ معلومات أكثر ، اتجهت للدكتور كبير بالعمر انطيته الوصفه شرحلي عنهن انطيتهن الها

صَفت سياره تاهو گدام الـ صيدلية نزل منها وأحد لابس لبس رسمي طويل كُلش لحيته محدده عضلاته اوفر مو من طبعي أركز بس شكله چان مُلفت

دخل للصيدليه أتجه ناحيتي
- اريد حبوب ** وقطره ** متوفرات لو لا

- نعم أكو

- انطيني

- ثوانـي

بـ كُل غباء طلعتهن اله وخليتهن گدامه ، الدكتور الكبير بالعمر مسؤول عليه جوا دا يحضر علاج أحد الـ مرضى

رفعت نظري بـ حديـه من تصرفـه الـ غير مسموح
- عزيزي ممنوع الـ تدخين داخل الـ صيدلية

اخذهن ورفع حاجبه خازرنـي ، رمى الجگاره على الأرض داسها بـ حذائـه
- تعرفين تگولين ممنوع الـ تدخين بس ما تگولين ممنوع هالعلاج ينصرف بدون وصفه ؟!

بعدني حتى ما مستوعبه كلامه لـَف ودخل يمي نادى بـ صوت عالـي
- دكتور سنان تگدر تتفضل أذا خلصت شغلك

اجه الـ دكتور انطه العلاج للمريض طلع المريض محد بقى ب الصيدلية غيرنا ، أستغربت الـ دكتور سلم عليـه وبَوسه ويحجي وياه بـ ميانة !
واكفة اباوع بـ غرابة ، ترزلت وحتى ما لحگت أرد على رزالته ولا عرفت قصده

باوع عليه من فوگ لـ يجوا وگله
- دكتور سنان منو هاي البنيه

- طالبة صيدلة داخله تدريب عندي شاطره ونبهه جداً فوگ ما تتصور حسبت الها راتب

التفت عليـه مَبتسم
- لالي دكتور ازاد مالك هاي الـ صيدلية وأيضاً مالك صيدلية الفرع ثاني

حرف وأحد ما حجيت ولا رحبت بي رزالته بقت تأكل بـ گلبي

- دكتور سنان هاي البنيه ما تبقى بعد ، شلون تصرف علاج ممنوع ينصرف الا بوصفه طبيه ؟ وفوگاها تنطي الي بدون حتى ما تسأل ليش وبشنو راح تستعمله تعرف يا دكتور هالحبوب ممنوعه لأن شباب دايستخدمونها للمخدرات وغير أشياء شلون هيج تنطيهن معقولـة ما منبهة !

دكتور سنان باوع عليه بـ عتب
- ليش هيج لالي مو كم مره بلغتج أكو حبوب وقطرات ممنوع ينصرفن ألا بوصفه

بشعور لا إرادي خزرت الـ أسمه ازاد
- دكتور نسيت أول مرة اخطأ هيج

ازاد ضحك بـ صوت
- فوگاها تخزر ما عاجبها الوضع

صَرت بموقف لا اكدر اعوف الـ صيدلية واطلع محتاجة التدريب ومرتاحة بوجودي هنا هالفترة ولا اگدر أسكت  كبر الموضوع ويرز على راحته ، رديت بـ هدوء وابتسامـة مُستفزة
- مو شغله ما عاجبني الوضع بس تكدر تكُلي ممنوع مو تجي تصيح عليه ب أي حق ؟؟ ترا بعدني طالبة أكيد ما راح اگدر أعرف كُل هالاشياء بـ هالسرعه
أهم شي الأسلوب والتعامل شنو الفايدة دكتور وتستهزاء بطلابك أي قيمة لشهادتك ما بقيت .

ما انتظرته يكمل تركتـه ودخلت جوا ارتب العلاجات أسمعه يحجي بصوت ناصي ويه دكتور سنان ومفهمت كلامهم چان همس ، احجي بيني وبين نفسي معصبـة شلون دكتور استغفر الله شايف نفسه راح يطگ نافخ نفسه طلعن هالعضلات من شوفة النفس مو من الرياضه

شويه وطلع اجاني الـ دكتور سنان
- لالي ترا دوامج راح يبقى ثابت من 8 لـ 12 بالليل ، اني بعد ما اجي العصر راح أحول لدوام الـ صبح أفضل الي ، المهم الـ دكتور ازاد راح يجي بـ مكاني بس كم يوم بالاسبوع مو دائماً

- دكتور خلي العصر ما اگدر بالليل ولا أريد أكون ويـه الدكتور ازاد

- مادري بنيتي هاي تقسيم الأوقات الدكتور ازاد ثبتهن هَم أكو طلاب غيرج دا يتدربون الصبح

خلص الوقت بين كسب الخبرة بـ التعامل وبين الـكم الهائل من المعلومات الـ اكتسبتها وصار لازم اطلع ، للحظه اتذكرت ازاد سامعه هالاسم بس مدا اتذكر وين ؟ ظل يتردد بـ مسامعي !!

زيتونـــة ؛

صَعدت بـ السياره گعدت ورا وهمه أثنين گدامي گاعدين ما حجوا حرف وأحد ، طريق طويل ولليل وبغداد بـ هاي الـ سنين تخوف ب أي لحظه يصير إنفجار بـ اي لحظه تلگه نفسك شهيد لو مقتول !

بغداد بالنسبة للناس العادية او الناس العايشه بـ بساطة مكان آمن بس خلِ يصير الليل بكل شارع أكو شي بشع راح يصير بكل منطقه أكو جريمه أو قتل راح تصير ومحد يدري بيها غير الله ، ماكو لا دوله لتراقب شباب هالوكت ولا أكو قانون قوي يحمي ويردعهم عندك فلوس تعيش ملك زمانك ماعندك فلوس كُل قوانين الـ دنيا يطبقونها عليك !
هالسنوات كانوا غيمـة سودة مَرت علينا

وصلت بـ المنطقة الـ ما توقعت بـ حياتي أدخلها ولا اگدر ادخلها شلون كدروا يدخلونها ؟ بكُل سهولة وشنو سلطتهم حتى هيج يدخلونها وهمه مأمنين .

وگفت الـ سياره مُقابيل بيت كبير واضح كُلش مال واحد مُقتدر مادياً ، فتحوا الباب ودخلت للصالـة  بابها مفتوح اشروا الي أدخل وسدوا الباب وراي .

گعدت على كُرسي من الكراسي الموجودة وعينـي على اثاثه بيت كامل مكمل لاحظت أكو تراب فوگ الطاولات والتخم وحتى الباب وماكو أي صوت نهائياً كانوا بس اني بي شبه فارغ !

انتظرت خمس دقايق وصارت عشره وصارت نص ساعة لحد ما صارت ساعة كاملة ومحد اجاني وماكو صوت ولا أكو حركه  ، مليت من الكعده والانتظار اجيت أطلع اتجهت دا افتح باب الـ صاله ما انفتح مقفول حاولت ماكو ، رجعت على الـ باب الثاني أكو بابين وأحد داخلي وأحد خارجي هم ما يفتح !

توترت بس ما بينت توتري رجعت كعدت بـ مكاني وخليت رجل على رجل ، مراه ومكان وحدي والوضوع مشكوك ما يصير ابين ألهم خايفه لو متوتره وما عندي أي سلاح حالياً غير ابين الوضع عادي وما هامني وما مأثرين عليه .

شويه وانفتح الباب
دخل نفس الشخص الشفته بـ المركز واتفقت وياه
- شلونج زيتونه اسفين على تأخير

- ما مقبول اعتذارك بـ مزاجي انتظرت

- تدللين زيتونة ، هسه خلِ نتفق على شغله گومي وياي

- شنو زيتونـة أختك الصغيرة وما أدري؟

أبتسم بـ استهزاء
- آسف آسف ست

فتح باب الصالة الداخلي يكون اتجاهة داخل البيت
يمشي وامشي ورا البيت كُله تراب خاصه الـ جوا بس أكو أثاث ، وصل لآخر غرفه بالبيت ودخل بيها
دخلت وراه فارغة مابيها غير الحياطين

سَد الباب وباوع عليه

نَترت بـ صوت عالـي
- انتَ بس أريد أعرف سالفتك ليش تسد الأبواب ترا عادي هو اصلاً مبين البيت فارغ منو يسمع الـ تحجي مثلاً ؟

- اتعلمي يا حلوة الحيطان إلها أذان

باوعت عليه من فوك ليجوا ما عاجبني الوضع متجاهلـة الرد عن كلامـة ، فتح التليفون وطلع صوره بنية صغير يطلع عمرها 12 أو أقل ، صورة بـ المول و صوره باب المدرسة وصوره دا تمشي بشارع و واضح كُل الصور بدون علمها وبدون محد يدري .

- اتوقع و متأكد انتِ ذكية وأكيد البارحه عرفتي ، ما جايچ علمود بنات ولا علمود تكونين الماكيره مالتهن

- أدري تراااا هاي كلاواتكم أنتم الزلم مت تعبر عليه

- ما تشوفين ليش استقتلت حتى انتِ تنفذيلي هالشغله اعرف بس انتِ تگدرين تجيبين رأسها بـ ذكائج

جتفت أيدي
- ديلا احجي شنو تريد من الأخير

- تخطفينها الي بطريقتج انتِ الوحيده تگدرين تسوينها وما تخلين وراج أثر

- شنو تسوون بيها ليش تخطفونها !

- شغله بيناتنا مالج دخل بيها ولا تخافين مو البالج

- خوش أذا بيناتكم لعد تگدر تأجر اي وحده وتخطفها ألك وتگدر انتَ تخطفها أني ما الوث أيدي بدم أحد صح أريد فلوس بس ما أسوي التريده !
تررا تكدر تخلي أي شخص يجيبها ألك وبكل سهوله شكو خبصتني صار يومين تفتر وراي بزعنني بـ اتصالاتك ؟ سوالف الخطف وغيرها و قتل ما اسويهن

- ما نگدر حاولنا صار سنة كاملة نحاول ما خليت وحده وكحه تعتب عليه اذا ما جبتها وانطيتها فلوس بس ما گدرن ينلزمون من أول لحظه واذا ما نلزموا تخرب السالفة ، زلم خشنه ما گدروا يجيبوها الي
وسألت عنج هواي گالوا بس زيتونة تگدر

- ليش بنت منو حتى ما تگدرون لهدرجة ، ومنو دازكم عليـه اطلعلي من الأخير بـ النظيف

_بنت التاجر ** وابوها مأمن وضعها لدرجة فشلت كُل محاولاتنا

فتحت عيونـي على وسعهن
- مُستحييييل لا تدخلني بهاي المصيبة أبتعد عني
وراح أعتبر نفسي ما شفتك ولا سمعت هالكلام منك وإذا خايف مني أطلع حجايه فـ اطمأن ما احجي
عوف البنيه خطيه مالها علاقه بـ سوالف أبوها الطايح حظـه .

عفته ومشيت دا اطلع ما أحس ألا انسحبت من قميصي حيل

صرخت بوجهة
- وخرر دير بالك تمد ايدك عليه

- اعصابج اعصابج

تقرب مني وهمس
- راح ادزلج كل معلوماتها برساله وادزلج وين تتواجد باجر والج منا للـ 6 المغرب أذا ما نفذتي الطلبته فـ اخسرج كُلشي وبكيفج بعد ، و زيتونة سوالف الـ شرفيات لا تبيعيهن برأسي بعد ترا ماضيج كُله عندي .

- شنو تريد تسوي سوي ما عندك شي عليـه لا ماضي ولا غيره
ما  اهتميت لكلامه بسرعه طلعت وصعدت بـ السيارة لگيتهم نفسهم گاعدين وفاتحين الباب رجعوني گدام المركز ما ردت ادليهم بيتي ولو همه يجوز حتى بيتي يندلوا

الساعه بـ الـ 2 ماكو أي بشر بـ الشارع حتى سيارات ماكو علمود أرجع لشقتي تبعد عن المركز نص ساعه مشي ، مشيت لحد ما وصت أول ما دخلت نمت ونسيت كُلشي ، ثاني يوم گعدت من الصبح للمركز افتر عليهم وأشوف شغلهم

مر الوقت وعبرت الساعة 6 وما انتبهت إلها اصلاً ، ما بقى شي لـ نهاية الـ شهر ولازم اوزع رواتب ألهم
خلص الدوام من وقت الأحد مو هواي أكو شغل مثل باقي الأيام

رجعت للبيت نظفته وغسلت السيارة أتصلت وصيت كم شغله أحتاجها للمركز ونواقص هَم محتاجتهن
بعدني هسـة دا اغفى مَدده على السرير بين النايمة والكاعده فزيت على تليفوني الحارس يتصل
رديت والنوم بـ عيوني يمكن هو الشخص الوحيد أرد عليه حتى لو بنص الليل
- هلا عمو صاير شي

- ست زيتونة لحگي المركز احترگ أتصلت عليج صار ساعة وهسه يلا رديتي

فزيت فزه گمزت من السرير أركض بـ بجامتي بس أخذت السويج من الطاولة ونزلت أركض على السيارة صعدت بيها وأسوق مثل المخبله بس أريد الحگ

محد جان أكو بـ البشارع غير الاطفائيه والحراس وكم واحد كُلها نايمة ولو ما الحارس شام الريحة چان احترگ كُله ، بـ بجامتي وشعري المفتوح وجهي كله نوم واكفه مثل المخروعه ميخلوني أدخل أشوف شكو على أعصابي واكفه

اجه وأحد من الاطفائيه وحسب ما گال صاير تماس كهربائي ومحترگه الصالات الجوا ، بس صالتين الخارجيات باقيات صاحيات مابيهن شي ولا واصل الهن نار وحتى الواجهيه مابيها شي أبد .

الحارس چان نايم بوحده من الصالات الخارجية المابيها شي من البرد وتلاحگ للوضع بس الداخل كُلش متضرر ، كُلها راحت صار الفجر حاطه أيدي على رأسي وكاعده ومكابلته بس الحراس يمي وصيتهم ما يحجون گدام أحد المركز احترگ ولا يطلعون سالفة وحذرتهم أكثر من مره .

رجعت سبحت وغيرت ملابسي منظر الحرك مدا يروح من بالي تأذيت من شفته گلبي يوجعني ونفسي ضاق حاولت ابچي ما گدرت صار سنين ناسيه شي أسمه دموع لازم ابچي لأن اذا ما ابجي راح اموت من وجع گلبي 

تركت كُلشي وراي من هموم ورجعت للمركز
بلغتهم للموظفين ممنوع أي شخص يجيب طاري الحرگ وخل يبلغون الزبائن أكو ترميم بالمركز وكل الأقسام انغلقت فقط قسم الكوافير والماكيرات مفتوح أساساً الوحيدات الما لاحتهن نار ادواتهن
قررت اخليهن بـ صالتين البقن مابيهن شي على أقل أجمع كم فلس من العرايس حتى أرجع المكان أفضل من قبل .

دا امكيج وحده من العرايس واسمع وحده من اليشتغلن عندي تتهامس بصوت ناصي
و وحده بـ الصالة الثانية صوتها عالي تتعارك عفت البنيه ورحت دا اشوف شكو

تلگتني سلسبيل تمشي بـ صفي وتحچي بـ صوت ناصي حتى لا يسمعنهـا
- زيتونه تعالي شوفي هاي شنو سوت ما خلت لا غلط ولا فشار راح تطير الزبائن
أبتسمت على طريقة كلامهـا وصوتهـا الگوه أسمعه لأن بس يعرفن هي توصلي اخبارهن وسوالفهن يشدن وياها ، مخليتها تراقبهن ألي بدون ما يحسن

دخلت وصرخت 
- طايحـات الحظ أركض منا ومنا حتى بس أحافظ على سُمعه المركز وانتن جايات تَروحن تعبي من ورا اهمالجن صووووچي اني صوووچي انقهر عليجن اگول خطية ما احاجيهن بس انتن ماتنطن عين وما تمشن إلا بالعين الحمرررره

- هي العروس بس تتعيقل على رأسي ما تخليني أشتغل عدل تتنعوص وهي اختارت المگياج شوفتني صوره رغُم گلت الها محلو ومُديله قديم بس عاندت ومن كملت اجتي أم زوجها وحماتها بس يعيبن عليها وتعاركن وياي 

- اسكتتي انتِ لا تحجين گلبي مورم منج
والله وتعرفني من أحلف أسوي ، اذا ما تجرن عدل كُلجن اطردجن ، جرن عدل ولا تعلبن من وراي هاي السوالف كُلها ما تمشي عليه مو زيتونة التسكت الجن

يومين والوضع زاد العمال يريدون راتب انجبرت أغلق المركز وانطيهم عطلة بلغتهم كم يوم ادز ألهم الراتب و وياه زياده بس انطوني مجال .

گاعده على التخم والمنفضة انملت چكاير ماعندي فلوس أرجع ارمم يحتاج ملايين ولا عندي فلوس انطيهم راتب وآخر كم مليون ضامتهن انطيتهن لكم وأحد چانوا يطلبوني قبل الحرگ بـ يومين

أيد على رأسي و الايد ثانية الچكاره بيها اعتازيت هواي وماعندي أحد أخذ منه ولا عندي أحد أثق بي
ما اگدر أبيع شُقتي ولا اگدر أبيع سيارتي إذا أبيعهم وين أروح ؟!

أخذت التليفون أتصفح بصفحه المركز ودخلت على اسمائهم وعددهم وشكد أحتاج علمود رواتبهم طلع المبلغ ضخم بالنسبه لـ حالتي بـ الوقت الحالـي

بعدني دا أتصفح بـ التليفون واجاني إشعار رسالة على الرصيد مكتوب بيها
:: زيتونة عجبتج المفاجأة وشنو رأيج اصدمج بـ المفاجأة الـ ثانية مثل ما سويت بـ الأولى لو أبلغج هسه لأن أخاف عليج لا تنجلطين .

تعابير وجهي كُلها تغيرت شنو قصده بسرعه دخلت للمحادثة كتبت
:: منو

:: أخاف انتِ نسيتيني بس أني ما نسيت
شنو عندج زهايمر مُبكر ما صار كم يوم من التقينا يا حلوة ، بس يلا عادي خلِ اذكرج مركزج احترگ مو صح ؟

من انشغالي نسيت التهديد ونسيت شنو يريد هو اصلاً توقعت بس يهدد أبد ما توقعت يسويها
ومحد يدري المركز احترگ غير المقربين والقريبن على المركز أما العالم الباقية تعرف ترميم .

مُباشرةً أتصلت أكثر من مرة انطاني رفض ودز
:: انتظري الـ سبرايز زيتونة

وانطاني حظر

اتهسرت شلون فاتتني مو أني الينلعب عليها مو زيتونة التتهدد المنفضة گدامي شمرتهـا برجلي
رجعت أتصلت على كُل ارقامهم التصلوا عليه بيها قبل كم يوم وماردوا .

خلصت باگيت الـ چكاير  ورأسي صار طبل صبح الصبح بس صافنة شنو أسوي ؟ شلون أرجع كُلشي ؟
شنو الشي اليريد يسوي ؟

ما اگدر أشتكي عليهم إذا يسألوني شلون تعرفتي عليهم راح يفرون السالفة عليه ذولي شياطين ما اگدر ألهم وحتى دليل قوي ماعندي وحتى لو اعترافهم بالمحادثه فـ ما يفيد
فلوس أرفع دعوة ما عندي !!

ما أعترف بـ القانون زيتونة تأخذ حقها بأيدها .

مَر الوقت واعصابي تلفت كل الـ أعرفه مو زيتونة الـ تتهدد أدخل بعين أكبر وأحد وأخذ حقي ، الي يطعني مرة اطعنـه ألف مرة ..

يتبــــــــع ..