رواية الكارمــا الفصل الثاني عشر 12 - بقلم آيــه آلـ صبري

الحطب يلتم حرگ مو لمة اخوان
وبعد كلبي إشتعل بلكت يشوفوك
ينشاف الهوه من يصير دخان

..................

_فهميني شلون احميج من القانون واني القانون ...

وجهه كله غضب بس من شاف دموعي
صار يمسحهن ب ايده

لزم وجهي ب اثنين اديه ويحجي كلمه كلمه

_احجي فهميني كليلي
طلحه كل السمعته والوصل الكل كذب
راح اكذب الدنيا واصدكج الج
ما راح اسمع من غيرج
بس اريد كلمه منج كلممممه ...

مجان عندي اي جواب غير الدموع وصوت الشهكات التطلع من گلبي ...

عافني وظل يفتر بالغرفه فوك العشر دقايق ماكو اي كلام بينا

_احجيييي ليش سااااكته كووولي لااااا
اصدكج واكذب كل السمعته والشفته
احجيييي....

نزلت على الارض ظهري مثبته على السرير
ورفعت رجلي ضميت راسي بيها ..

ما اسمع الا صوت التكسير

ب ايده ضرب كل التحفيات الموجوده على الميز

عين على طلحه وهو يكسر وعين على ايده تنزف دم

تقرب ب اتجاهي

ولزمني ب ايده تنزف دم من فكي ..

_ارفعيييي عينج خليها بعيييبني واحجييي اسمعج
لا ظليييين ساكته

رفعت عيني لعيونه الصايرات دم من العصبيه

_لييييش ليييش هيج سويتي
شلون انطاج گلبج طفله بعمر الوردددد

دفعني على الارض وفتح الباب

_تتعاقبين حالج حال اي مجرمه ..

حجه هالكلام وركع الباب حيل وراه وطلع ..

بسرعه دخلت عهد وراه تباوع على الاغراض المتكسره وترجع تباوع عليه ..

كعدت على السرير قريب عليه وسمي ب الله

اسمع صوته امه وهي تحجي بصوت عالي

_شبيك ويه البنيه اول تالي صوتك عالي واصيح

_يمممه انتي بذات لا تحجين تدرين بيها قاتله طفله ومخليتهااااا بيتج

_الله غفور رحيم والبنيه جانت مجبوره

_محددددد يدخل بيكم

_لا ادخل ونص هم عوزك تسجنها
يمه عيوني انت طلحه استهدي بالرحمن وانت قاضي تخاف الله
زيتونه من اجتي لليوم منهاره وضميرها دمرها بعدها مريضه ومدا تصحى
ولو هي مجرمه جان بقت وياهم مو اجت مهزومه منهم

وين طااالع وعايفني احجي وحدي
اووكف لا تروووح لا تتسرع يمه .......

مجرد حجوا هالكلام عهد ظلت فاتحه عيونها تباوع عليه
بسرعه طلعت ..

سديت اذني ما اريد اسمع اي شي بعد

تعبت تعبت كلشي دايصير ضدي

شويه ودخلت عهد شايله ب ايدها كلاص مي

كعدت بصفي على الارض

_هاج اشربي مي وجهج صار احمر من البجي
طلحه گلبه طيب ما يسويها

ما اريد مي

_لخاطري اشربي مي وراح اكوم اجيب العلاج
شفتج بيضه تخوف مو زين عليج

اخذته بس خليته على شفايفي وبعدته عني

صارت تفتر بالغرفه دور على العلاج

عفتها ومددت على الارض
اسمعها تناديني واني حيلي كله خاوي
ملت وعافتني راحت نامت ...

مجرد غمضت عيني شريط حياتي كله صار كدامي
وين جنت وين صرت
بيتي سيارتي مركزي الموظفين يشتغلون عندي
ما عندي شي اهم من شغلي
كل وجباتي ب المطاعم هلكد ما مركزه بالمركز وهامله بيتي
كل عطله اسافر بيها ل اي مكان اريده
طلعاتي ونستي كله ويه صديقاتي ومعارفي
كلهم طلعوا يمشون وياي علمود مصلحه وحتى اصرف عليهم
محد بيهم افتقدني محد بيهم دور عليه محد بيهم سأل عني عشت وحيده ومبين راح اموت وحيده ...
انقهرت على نفسي كل الجنت اقضي وياهم وقتي طلعوا وهم وناس مصلحه ...
محد تذكرني وافتقدني بهالدنيا غير لالي ...
حياتي كلها فنيتها على شغلي
وهسه وين جنت وين صرت
خسرت كلشي البنيته وتعبت عليه بلحظه
كل الاملكه خسرته بلحظه ....
انگلبت وتغيرت حياتي ب مجرد لحظات ...

غفيت بدون ما احس على نفسي
فزيت على حلم بشع اسنين اخاف لا ارجع احلم بي واليوم ماادري شجاني ..

فتحت تلفوني ودخلت على اليوتيوب اريد اصلي قبل لا اخطي هالخطوه
جان بنفسي أصلي واتعلم الصلاه ولو مره وحده بحياتي
ظليت ادور شفت هواي مقاطع بس ما افتهمتهن
ما اعرف اي شي لازم احفظ صعبوها عليه اليوتيوب
لازم اصلي هسه
لازم قبل لا اخطي هالخطوه أصلي.....

الضوا طلع رفعت راسي على الساعه ب 5 ونص عدل ....

كمت على حيلي صارت المرايه كدامي على طول الحايط
تقربت اباوع على نفسي .. عهد نايمه على السرير

القميص صاير هدل عليه من الضعف
شعري مفتوح على طوله
عيوني حمر
وجهي احمر
شفايفي بيض يخوفن
صايره هيكل عظمي واتحرك .....

فتحت الباب على كيف حتى لا تكعد عهد ولا امها
جنت متأكده طلحه مو بالبيت ..

دخلت للمطبخ وفتحت المجر مال سكاكين طلعت مكص منه

كعدت على الارض وخليت رأسي على الطباخ
لازمه المكص ب ايدي والف فكره براسي ...

طلعت التلفون من جيبي واتصلت على طلحه
مرتين رن يلا رد

طلحه

_نعم

اني جنت اتمنى التقي بيك بعد هاي السنين كلها واشوفني انسانه ناجحه بحياتها وقويه وما محتاجه لاحد

مسحت دموعي ما اريد يسمع شهكاتي

وحققت هالشي وصلت لمرحله من الإستقرار الاغلب يتمنى يكون ب مكاني
بس خسرت كولشي بسهوله
وشفتني بالحاله المجنت اتمنى بيوم شوفني بيها .....

بس رغم كل هذا اني ابقى اكرهكك وقابله تسجني بس هاي اذا حصلتني ...

غلقت التلفون بسرعه الكلام الجنت رايده احجي حجيته خلص بعد .....

فتحت شعري على طوله اريد اول شي اكصه

خليت المكص عليه انكص جزء قليل منه واني دموعي تنزل وحدها

رفعت رأسي طلحه واكف وشايل التلفون ب ايده

كعد مقابلي وحضني بسرعه ادفع بي بكل قوتي ما يوخر

لوه ايدي حيل سحب منها المكص احس ايدي انجرحت من لواها

اكرهككك طلحه من العرفتك لليوم ادمرت حيااتي

_ليش ليييييش خليتيني بهذا الموقف اي لييييش

لزم ايدي قوي كومني غصب عني

فتح الحنفيه مال سنك غسل ايده المجروحه من ضربته نزفت ....
ايده يغسل بيها ايده وايد الثانيه لازم معصمي قوي

جر ايدي وغسلها من الدم لان من جر المكص انجرحت ...

ظل يحجي ويعيد بنفس الكلام

_استغفرري ربج تعوذي من الشيطان عوفي هاي الافكار

باوع عليه وكال

_نصلي اليوم نمت تعبان ومسمعت المنبه فاتتني الصلاه

مرديت عليه بس بداخلي جنت رايده اتعلم
صار يتوضى كدامي حسيت بي يدري بيه ما اعرف ودا يعلمني بدون ميحسسني
ظليت اراقب خطواته شلون يتوضى حتى احفظهن

وكفت مكانه وتوضيت مثله ب الضبط ...

اتجهت للصاله لكيته فارش سجاده الي واله ..

اخذت حجاب الصلاه مال عهد لبسته

وكف كدامي يصلي بصوت عالي وبهدوء تطلع الكلمات
حتى اسمعه واردد وراه ...

مجنت متوقعه بحياتي هو الراح يعلمني على الصلاه ...

سجدت اخر سجده ومرفعت راسي منها
اول مره اسجد بكل خشوع لربي
اول مره اصلي
اول مره اتوجهه واوكل امري لربي ....

ما دعيت اي شي ما جنت اعرف شلون ادعي او شنو ادعي ....

رفعت رأسي ..

رافع ايده ويدعي بصوت ناصي
سلم واني سلمت وراه ...

اخذ سجاده من الارض رتبها ورجعها لمكانها

دخل للغرفه شويه وطلع لابس رسمي ..

كعد على التخم وطلع الجكاير يدخن على ريگه من الصبح بدون ريوك ....
كل شويه ويتصلون عليه وما يرد

_نعم
لا بيتي الثاني اني
القضيه معقده
عزيزي يصير خير الله كريم

نزعت الحجاب وشلت السجاده

انداريت ما لكيته ...

ما سمعت غير صوت شخطه السياره ...

مر اسبوع كامل وطلحه مختفي حتى على اتصالات امه ما يرد
الجو توتر بالبيت الكل خايف عليه اختفى فجأه بدون حتى ما ينطي خبر ل اي شخص ..

كل يوم امه تكعد تتصل عليه بشكل مستمر ويطلع تلفونه مغلق كل ارقامه مغلقه وحتى على نت ما متصل ...

تعبت من الانتظار بقيت معلكه
لا اني الطالعه لسليمانيه ولا اني الشايفه طلحه ومفتهمه منه شنو يريد يسوي بيه ، و حابه أصلي بس ما اعرف باقي الصلوات شلون الواحد يصليهن بالمضبوط واستحي اخلي الحجيه تعلمني
بس صلاه الفجر جنت اصليها علمني عليها طلحه اما الباقي ما اعرفهم ..

كل اليوم ما انام اذا ما اسمع هاي الغنيه او القصيده مجنت اعرف شنو بس كل الاعرفه صوته دافي ...

(فبدأت رواياتي )

انا وقع فؤادي بالغرام ..
واحاول في ليلي انام ..

اقدم المقطع على البارت المتعلقه بي

فااجبني بربك انقذني
تسمعني ولست تكلمني
ياروح ماهكذا كنتي تشتاق لاروقه البيت

هالبارت جان يوصفني ...
كل يوم ما انام اذا اسمعها ودموعي تملي المخده
بـ الصدفة طلعت الي باليوتيوب جانت نازله جديد وقليل المشاهدات عليها بس احبها .

دخلت عهد للغرفه
صارت تقرأ وملتزمه بقرايتها وصلاتها وحتى التليفون ما تلزمه هواي وتنام من وقت ..

_زيتونه والله سالفتج محيرتني انتي مو مخلصه دراسه شلون رجعتي تمتحنين وزاري

جنت متخرجه من الفرع الادبي وخلصت كليه
تربيه قسم انكليزي

_بعد شكو ترجعين تمتحنين

هالحجي قبل هوواي سنوات حتى ناسيه شوكت تخرجت
بس هسه دامتحن خارجي الفرع العلمي

_ليش شنو تريدين

بعدين تعرفين بس هو علمود المركز امتحنت خارجي علمي حتى اطوره اكثر ...

_منتظره امتحاناتج اكثر منج

الله كريم

_الله دزج رحمه الي ب الوقت الجنت راح اوكع بالحرام
راح ابقى طول عمري ممنونه منج ..
وما اعرف شلون اجازيج
وعيتيني ودليتيني للطريق الصح بدون ما سببين الي فضيحه وبدون متخرب علاقتي ب اخوي ....

راحت تمشط شعرها كدام المرايه

اني محجيت اي شي على كلامها

اجت سالفه براسي

عهد اذا اطلب منج اسوين الي

_اذا اكدر طبعاً اقل شي حتى ارد فضلج

اريد هويتي وكل اوراقي اكيد تعرفين طلحه وين يضم اغراضه

_اي اني شفته ضمهن بغرفته بس المفتاح عند امي

تكدرين ترجعيهن الي

_ليش شسوين بيهن مو اخاف طلحه ما يقبل

شنو اسوي بيهن غير اوراقي
اذا متريدين اجيبيهن عادي

حجيتها وطلعت من الغرفه حتى اشوف رده فعلها

ركضت وراي

_اي اجيبهن الج بس انتظر امي تنام علمود اخذ المفتاح

ابتسمت الها

لليل جابتهن الي كل الاوراق معقوله شلون فاتت طلحه هاي السالفه شعجب بقاهن بالبيت ..

انتظرت البيت كله ينام علمود اطلع
وناويه بعد هالطلعه انفي الكل من حياتي وما ارجع بعد ....
حتى لالي مراح اكول الها علمود اخاف يضغطون عليها ويجبروها تحجي ف هي متعرف اني وين ...

غلقت التلفون حتى ميكدرون يحددون موقعي.... وطلعت بكل هدوء للبستان

صعدت السياره وسديت الباب على كيف
تفكيري وتوتري يم طلحه واختفائه
بس عقلي يكلي روحي وبعد لا ترجعين ....

حركت السياره وطلعت بكل سرعتي
ما ارتاح گلبي الا لمن عبرت المنطقه وصرت بعيده عنها ...

شغلت هاي الاغنيه الاحبها حتى يخف توتري
كل شويه تخلص وارجع اعيدها ..

كل الايام السوده صارت بعيني
الشارع اظلم ومابي سيارات قليله
عيوني غوشن من البجي
خففت السرعه ....

حجايه طلحه ترن ب اذني

عساج بجرح علي وحزن يعقوب وعذاب ادم ...

سنين مرت على هالكلام بس ما مر مرور الكرام
لاااا خلاني اعيشهن بكل تفاصيلهن واتعذب بيهن...

اريد صوت هالكلام يطلع من رااااسي

دست السياره بكل سرعتي ....

يتبع ...

أدري البارت قصير ..