رواية الكارمــا الفصل الثالث عشر 13 - بقلم آيــه آلـ صبري

الهوى يلتم علية
منين ما ذكروك
وأدك رچلي
و أضَل بـ عازة الخنگة
اغص بـ ريحتك
ما كمت اغص بالزاد

- علي رشم

.............

السياره تمشي بكل سرعتها ..
بالي مو يمي
لو ما الشارع فارغ جان على هاي السرعه صار حادث ..
قربت اطلع من بغداد مابقى شي ..

اختنكت مجرد حسيت خلص راح اطلع من بغداد وما ارجع بعد ..

وكفت السياره على الجانب
ونزلت ..

سديت الباب وراي واستندت على السياره رافعه راسي للسما ...

ماكو غيري وغير الهوا والسيارات القليله تفوت بالشارع ..

لاول مره احس محتاجه ادعي ...
بس ما اعرف شلون الواحد يدعي لربه

بقيت رافعه راسي ما احس الا الدمعه وحدها نزلت ...

ربي اني ما اعرف ادعي ولا اعرف شنو يكولون بس كل الاعرفه تعبت ..

صعبه عليه ارجع ابدي حياتي من الصفر
صعبه عليه ابقى وحيده طول عمري
صعبه عليه ابقى هاربه من شي مو ذنبي

اني كبرت والعمر مشى بيه ما بقيت ذيج زيتونه الصغيره الشابه البعدها بحيلها ..

التركض منا ومنا حتى تأسس حياه الكل يتمناها حتى اعيش برفاهيه ..

اتمنى تكتب الي حياه نظيفه بعد هاي الخطوه ....

رجعت صعدت السياره وشغلتها اردد وياها

فاجبني بربك انقذني....
تسمعني ولست تكلمني .....
يا روح ماهكذا كنت تشتاقك لاروقة البيت........
هل سبق وان اشتاق احدهم لملاك ......
يا روح ماهكذا كنتي......

رجعت حركت بكل سرعتي
خلص هذا قراري واني اتحمله لازم اتحمل كلشي يصير بيه هاي الحياه مو سهله ..
مو سهله بنيه تعيش وحيده بهالدنيا بدون سند ...
لازم ابدي من جديد من دون الكل
ارجع انفي الكل من حياتي ...
مو زيتونه تحتاج احد ...
فلوس عندي بيت عندي سياره عندي شهاده عندي ..
اردد هالكلمات براسي ...
ما احتاجهم خلص ما احتاج احد
اكدر اعيش وحيده اكدر اعيش من دونهم ....

قربت على السيطره خففت السرعه
وطلعت الاوراق ..

من وصلت للعسكري نزلت الجامه ومديت ايدي انطي الاوراق ..

شو هذا قراه اسمي ..

مد راسه من الجامه

_تفضلي انزلي

عكدت حاجبي مستفهمه

عفواً

دك على السياره حيل واشر للمجموعه جيش من بعيد ..

فزيت من طريقه كلامه وياي
كلشي ولا البالي ...

مابينت خوفي ولا توتري خليت نفسي طبيعيه ...

صعدت الجامه وجنت ناويه اتحرك وشنو يصير خل يصير ...

السيارات مال عالم بعدها واكفه وراي ينتظروني اتحرك ...

ندكت الجامه بقوه

الضابط يأشرلي انزلها ..

نزلتها واني خازرتهم ..

_تفضلي انزززلي

السبب

_اسمج مطلوب

فزيت من حجايته

على شنوو وضح اكثر

اشر للعسكري ياخذ السياره

_انزلي اسمج مطلوب

ما انزل شنو اليثبت كلامك صح

صارت هوسه وكلهم لتموا لان اني معانده ما انزل

تقربوا رادوا ينزلوني

خلص ابتعدوا اني انزل

اخذوا سيارتي ما اعرف وين

ويمشون واني امشي وياهم بدون ما اعرف شنو سالفه ولا اعرف على شنو اسمي مطلوب ..

دخلوني جوا والمكان عباره عن عساكر كومه

اذا اسمي مطلوب ليش ما اخذوني للتوقيف ..

بقيت كاعده بغرفه بيها سبلت ومكتب كامل
كعدت على اي كرسي ..

انتظر احد يجي ماكوو عافوني وحدي ..

اليمر يباوع عليه ب استغراب
لان كلهم لابسين قماصل ثكيله من البرد والتدفأه بالغرفه ..
واني لابسه قميص نص ردن ابيض وبنطرون كابوي ....
واحس احتريت من التوتر ايدي وجهي صار احمر
من اتوتر جسمي ينگلب احمر ....

فات عسكري ناديته

بلازحمه شوف الي الضابط وينه

_هسه يجي

رجع فات واحد

انطوني تلفوني نسيته بالسياره اريد اتصل

_من يجي الضابط كليله

اتهسترت مادري كم ساعه مرت واني هنا
ظليت افتر رايحه جايه .....

معقوله بلغوا عليه بسالفه الخطف
معقوله هالانذال بلغوا عليه لان مدايلكوني
اي ليش لا اذا تسجيلات عدهم
منو اليصدكني ...

اكو ثلاجه صغيره اتجهت الها وفتحتها طلعت منها بطل مي شربته ...

رجعت كعدت على الكرسي انتظرهم ..

الجو بدأ يكشف اباوع من الجامه
صارت السما زركه
يعني قرب الصبح وهمه عايفيني هنا

دخل الضابط الوكفني ..

كعدت على المكتب

وكفت مقابيله ..

انطيني تلفوني اريد اتصل

باوع عليه ورجع نزل نظره على التلفون ب ايده يراسل ...

هسسسه غير افهم شكو موقفيني شكو اسمي مطلوووب ...

ميرد عليه بس ساكت

_تفضلي اكعدي انتي اليوم ضيفتنا

ياااضيفه مستعجله وراي سفر ....

كام طلع من المكان وكال

_انتظري اجازتي اليوم الصبح خل اصير واخذج وياي

تنرفزت عافني وطلع بعد مشفت احد ولا احد اجاني

ضجت من شعري مفتوح
كعدت على الكرسي وحتى بس اضيع وقت
ظفرته كله ظفيره فرنسيه حتى مينفتح بعد....

لا تلفون يمي واتصل لا سياره لا واحد بيهم يجيني ويفهمني السالفه نوب خلوني وحدي ....

خلص شيسون خل يسون يريدون يسجنوني مو مهم ولا هل قلق العايشته ...

نص ساعه ورجع دخل نفس الضابط ..

_اعتذر خليتج تكعدين هنا بس مجان عندي مكان ثاني لحد ما اخذ الاجازه واتأكد من سالفتج

ظليت صافنه شنو يعتذر شنو مطلوبه ...

_هسه تكدرين تتفضلين وياي للبيت

على اي اساس انت منو حتى امشي وياك شنو هالمهزله هاي

_انطلب مني ابقيج ضيفه عندي وين المشكله ب الموضوع

اخي ضابط على روحك مو عليه ب اي حق تخليني كاعده هنا ساعات بحجه مطلوبه و تأخرت على سفري وبعدين تكولي تفضلي لبيتي

_اختي فهمتيني خطأ اني مطلوب مني ابقيج بيتي

منو طلب منك

_خطيبج طلحه

يا مخطوبه هذا شبي ظليت موقف لا اكدر اكله اني مو خطيبته ولا اكدر اسكت ....

شنو اليثبت كلامك قبل شويه جنت احجي وياه وما كال هيج شي ...

_ما ادري بعد انتي وخطيبج
الرجال مسوي الي افضال هواي و اول مره يطلب مني وما اكدر ارده

اتصل بي كدامي يلا اصدكك

_هسه هو مشغول بس حمايته موجودين اذا تريدين اتصل عليهم

لا الا طلحه واسمعه ب أذني

حسيته ضاج لان دا اشكك بكلامه بس ميهمني شنو وين عايشين اروح وياه ولا اعرفه ولا يعرفني شنو طفله اني حتى اصدك بي من اول حجايه ..

_انطيني السيد طلحه
ادري مشغول
بس كله شغله تخصك وهو راح يفهم

انتظرك بس شويه استعجل

ظل كاعد على المكتب ومدنك راسه على التلفون ولا باوع عليه ولا حاول يحجي وياي

ربع ساعه وتلفونه رن

بسرعه جاوب وفتح مايك واشر الي اتقرب

جتفت ايدي وكفت قريب عليه

اسمع صوت طلحه يسلم عليه عزززا العزززاني رحتي بيها زيتونه ...

_شلونك طلحه

_هلا ب الغالي اعذرني غالق تلفوني ف ما ادري ب اتصالاتك
الا الحمايه اجوي بلغوني

_الامانه وصلت وتأكدت منها طلعت هي
هسه شنو تأمر

_مشكور بس اكمل شغلي اني اجي لبيتك بنفسي

بعدها سد المايك وصاروا يحجون مواضيع جانبيه
هو مو مختفي وحتى تلفونه غالقه شلون عرف بيه
طلعت ...

خلص مكالمه والتفت الي

_ جداً اعتذر مجنت اعرف بيج تخصين طلحه
خليتج تنتظرين هواي
بس جنت مجبور لحد ما تأكدت انتي نفسج لخاصه ب طلحه .....

امشي ورا لحد ما طلعنا
فتح الي باب السياره مالته ...

لعد سيارتي وين

_هسه الولد يجيبوها وراي

اوراقي وين

_ اي شي يخصج عسكري وصيته يجيبهن وراي لبيتي

صعدت بالجهه الورا للسياره ظلينا ساكتين محجيت ...

وكف السياره كدام محل الالعاب اشتره كوومه العاب ..

المسافه جانت قريبه مو هواي مشينا

اتصل يفتحون اله الباب الخارجي حتى يدخل سيارته ...

اباوع عليهن اربع بنات صغار طلعن يركضن فرحانات
فتحن الباب اله
من دخلت السياره للكراج اني فتحت الباب ونزلت

نزل على بناته يبوسهن وينطيهن الالعاب ..

مرته مدت راسها من المطبخ تضحك بس من شافتني گلبت وجهه

راح وكف بصفها وكللها

_خطيبه طلحه القاضي السولفت الج عليه
ضيفتنا اليوم

ظلت تباوع عليه من فوك ليجوا
تقربت سلمت عليه من ورا خشمها ...
يطلع عمرها قريب على عمري او اصغر مني بس هامله نفسها .....

فتحوا باب الصاله دخلت اجت وحده من البنات انطتني مي وبعدها طلعوا ...

اسمعه يكول الها ما نايمه فرغي الها غرفه البنات خل تنام ..

شايله صينيه بيدها بيها بيض قلي ...

خلتها كدامي وكعدت مقابيلي ..

اباوع على الصينيه مدهنه من الوصخ والماعون مدري شلونه والبيضه صايره سوده هلكد ما الدهن قديم

كلت الها ما احب اتريك شكراً

_تعالي وياي حتى تنامين مبينه تعبانه

مشيت وياها بدون اي كلام

غرفه بناتها بيها اربع اسره ..

_نامي على اي واحد براحتج

داتطلع جان ترجع عليه

_شنو انتي ما بردانه لابسه مشلح والجو يكص اني بالبيت ومتت من البرد

لا متعوده

_هاا لعد اخذي راحتج نامي

سدت الباب وطلعت

مددت على السرير القريب من الباب وحسيت برطوبه كمزت بسرعه من مكاني ...

تلمست السرير ناكع ..

تنرفزت ولعبت نفسي شنو هالقذاره هاي
اليشوف هالرجال وهيبته يكول الله اليعلم مرته شلونها وشلون مرتبه ...

مو من طبعي احجي بيت احد بس فعلاً اقذر بيت دخلته بحياتي ..

من اول مدخلت كفختني ريحه عفونه والحياطين كلها تحسيها مدهنه من الوسخ
وحتى اطفالها مو نظيفين .....
اما ريحه الكراج من نزلت موضوع ثاني ....

شقتي بس اني عايشه بيها وما تتوسخ ورغم هالشي اجيب عامله كل يومين تنظفها وانطيها فلوس ...

رحت على الاسره الباقيه نفس الشي اذا مو رطبات ف ريحتهن تكتل والغرفه ماتنطاق من الريحه زفره ....

نوب ما اكدر اطلع مبينه نزعجت من شافتني ..

قفلت باب الغرفه ...
كعدت على الكاشي وخليت راسي على رجليه ونمت
ما كعدت الا على صوت الاطفال يدكون الباب بقوه

كمت عدلت قميصي وفتحت الباب ..

دخلوا البنات يكمزن على السرير ظليت واكفه اني
ما استنظف اكعد على اي سرير ...

وحده منهن سحبت كرسي خلته بصفي وصعدت عليه صارت بطولي ...

جلبت بشعري جر بي وصيح

مامااااااا تعاي شوووفي

اريدها تعوف شعري جلبت ...

اجتي امها

_شتريدين

_شووفي شعرها جنها اميره مثل الاميره بالتلفزيون ...
اتقربت على شعري وشمته
ااااااالله ماما ريحتها تخبل ....

باوعت عليه معاجبها الكلام

_سويلي شعري مثلها اررريد

والتمن البنات كلهن داير مداير امهن يصيحهن نريد ....

_جاي اشتغل بالمطبخ تكعدين يمي

اي هسه اجي وراج

اريد اشوف الوقت ظليت اباوع على الحياطين ادور على ساعه شفت الساعه ب الـ 7 المغرب شكدد نايمه بدون ما احس على نفسي...

وحده منهن ظلت اسولف الي واتعدد ب اصابعها

_احنا نعرف نسوي بيض قلي ونسوي بتيتا وبيتنجان لان امي ظل نايمه للعصر واحنا نسوي النا ريوك لان نجوع هي علمتنا وهم احنا نغسل لامي الماعين

يمكن جان عمرها حسب نظري الها 8 سنوات ...

مستغربت لان شايفه هواي نسوان وسخات اهم شي نفسهن ..

رحت للمطبخ ..

كعدت على كرسي الميز طعام ..

جانت تنظف سمج ودجاج كملتهن وخلتهن بالفرن ..

بعدين ب السنك الغسلت بي الزفره فرغت الفواكهه والخضراوت ترست السنك مي وخلتهن طايفات بالمي
لعبان النفس الصار عندي فضييع معقوله السنك تنغسل بي اماعين وكل الاشياء زفره اجي انكع بي الخضراوت والفواكهه واخليهن بعدين ب مصفي ..
طباخها طبقات دهن سود الارضيه قذره وحتى السگف بي مثل الخيال الاسود من الوسخ
قررف ...

طلعت الاكل خلته على الميز

تقربت مني لزمت ايدي

_ شلون هيج ناعمه ازيلين الشعر كل يوميه
حجتها وضحكت

سحبت ايدي بسرعه

لا ليزر

صاحت زوجها يجي يتعشى
كلهم كعدوا على الميز وياكلون اني غصبت نفسي اكل لكمه لان عيب ندخل بيت احد وما ناكل منهم معناها دا نقلل من قيمتهم ....

بالليل البنات كل وحده نامت على سريرها واني قفلت باب الغرفه وكعدت على الارض
نوم ما اجاني لان نمت هواي

هسه من گلبي تمنيت يجي طلحه ياخذني ولا ابقى هنا ...
استحيت اسوي اي خطوه او حركه خطأ كدامهم يعني مثلاً احاول اخذ سيارتي واطلع لسليمانيه همه ونايمين ..
بعد ما عرفت طلحه مبلغهم اني خطيبته محبيت اشوه صورته كدامهم او اخلي بموقف محرج
خطيبته شردت وهو يدور عليها
محبيت هالكلام ينكال عنه ويقلل من قيمته ....

للصبح فكره توديني وفكره جيبني حاطه ايدي على خدي ...

الصبح ندك باب الغرفه والرجال يصيح

_خيتي طلحه ينتظرج بصاله

فتحت الباب ماكو احد اتجهت للصاله

لكيت طلحه كاعد وياه الرجال

كام طلحه وكف وشكر منه
جلب بينا على الريوك بس طلحه رفض بشده ...

طلع كدامي صعد بسيارته واشر للحمايه الدايسوق ينزل من السياره ويروح بسيارتي ....

طلحه اني اروح بسيارتي ما اجي وياك

ما اهتم لكلامي طلع مفتاح سيارتي من جيبه وشمره على الحمايه
واشر اله يروح ..

واني صرت اشيل روحي وادكها

صعد بسياره وشغلها ينتظرني اصعد ....

صعدت بصدر وطبكت الباب حيل
يسوق ومركز عينه ليكدام ولا مهتم الوجودي....

تلفونه يتصل بشكل مستمر ...

رد وخفف السياقه

_يعني حضرتوا البيت
متأكد
ماشي

الطريق مو طريق بيت امه

طلحه وين ما خذني
مو احجيييي ويااااك
طلحه رجعني لبيت امك وخلص بعد مراح اشرد مره ثانيه ..

دك ب ايده على الستيرن حيل

_ اسكتييييي حرف ما اسمع منج

دخلنا لمنطقه ....

البيت كولها فخمه

طلحه ما اريدددد اروح لبيتك

وكف سياره كدام بيت حديث ..
مجرد وكفت السياره انفتحت الباب الرئيسيه
وطلع منها الحمايه
اخذ المفتاح من طلحه

دخلت للبيت حتى ما انتبهت عليه كد ما اعصابي تلفانه ...

جانت اكو وحده بنكلاديشيه استقبلتنا ...
وبعدها اختفت ما ادري وين راحت ..

ما عندي القدره اركز على تفاصيل البيت ..

دخل كعد على التخم ونزع الكوت ونزع الستره

وخله رجل على رجل

ظليت واكفه مكاني
تقربت عليه فوك راسه احجي

طلحه مستحيل اكدر ابقى وياك بنفس البيت رجعني لامك
مو دااااحجي

رفع عينه باوع عليه بستهزاء

_شنو يعني اذا انتي سابقتني بخطوه اني سابقج بعشر خطوات

كام وكف كدامي
رجعت ليورا

_منوووو انتي مفكررره نفسج حتى تلعبين ويااااي
شردين شنو ما اكدر ارجعج
متكدرين تخطين خطوه وحده خارج هالبيت بعد ...

شنو اتريد اسوي اليييي

الكلاص جان ب ايده
ركعه حيل ب الارض

_لاااااا تختبرين صبررري

لزمني حيل من زندي ..

وهمس ب اذني ..

_ قبل لا شردين ب اسبوع اني معمم اسمج بكل السيطرات مطلوبه
متكدرين طلعين خارج بغداد بدون علمي
شنو عبالج ما اعرف بسوالفج

حافظج اكثر من روحج .....

كلهم مسوي الهم فضل بمكالمه وحده تعمم اسمج ممنوع طلعين خارج بغداد وبس طلعين يوصلني خبر مثل مصار البارحه ...

كعدت ابجي كدامه على الارض خلص اني انتهيت طلحه من يخلي واحد براسه ينهي ...

طلحه كافي تعبتني كل الداعيشه بسببك انت
ما اتحمل ابقى وياك نفس البيت رجعني عند امك

_ما اثق بيج

كعد على التخم مقابيلي مخلي ايده على راسه
ويدخن بكثره لدرجه خلص باكيت كامل ...

_بس خل افرغ الج هالفتره مشغول ماعندي وقت ادور وراج ولا عندي مجال اروح اتأكد من سالفتج بنفسي
اكدر ادز اي واحد من الحمايه يجيب الي كل حياتج خلال 16 سنه
بس ما اريد من احد اريد اني اتأكد بنفسي

واعاقبج على كل افعالج وحده وحده بالعدل .....

راح دخل لغرفه صايره بعيده عن الصاله ..

ظليت كاعده بمكاني ..
انيي صوجي صوووجي اعرف طلحه مينلعب وياه شلون سويت هالخطوه الغبيه .....

للمغرب واجت البنكلادش خلت الاكل كدامي وكالت

_السيد طلحه يكول خل تاكل

عفته ما مديت ايدي نهائياً

روحي لعبت من القميص الابسته كل ما اذكر شلون دمر ونسيته من الاعصاب هسه يلا انتبهت على روحي

اتجهت على الغرفه الدخل بيها
ودكيت الباب بكل قوتي

فتح الي ونوم بعيونه

_شكو

اريد ملابسي هسسسه اريد ابدل

راح كدامي فتح خزانه وطلع منها فانيله سوده بعدها بالكيس وبجامه هم ...

ورجع مدد على السرير

_اطلعي وسدي وراج الباب

اخذتهن بس اريد ابدل داموت من الريحه هو ماكو ريحه بس اني منقرفه ..

ظليت ادور بعيوني على البنكلادش وينها اريد اندل الحمام

دخلت للمطبخ لكيتها واكفه تشرب مي
احاجيها ما تفهمني ، رجعت حچيت وياهـا بـ الانكليزي فهمت ودلتني

دخلت للحمام ولبست الفانيله جانت كبيره عليه شديتها من ورا على شكل اكس هاي مستوره بالنسبه لملابسي جنت البسهن ..
البجامه شديتها حيل لا تنزل هلكد ما احبه البس ملابسه استغفر الله ..

فتحت شعري احس هسه يلا كدرت اتنفس ...

مددت على التخم وغمضت عيني

فزيت على صوته يناديني

واكف فوك راسي ومخلي ايده بجيوب البجامه

كمت على حيلي تربعت على التخم

شو هذا يباوع على رقبتي وخزرني

اجيت احجي بعدين ذكرت سالفه الوشم وين سالفه طايح حظها صارت كدامه ...

نثرت شعري على رقبتي ..

تقرب عليه ودنك راسه

وخر شعري ب اصابعه وباوع بتركيز

ابتسم تك خد خازرني وكال

_تكولين ناسيه وانتي داكته وشم .....

يتبع ...