الفصل الاول1
بقلم دانيا
صليت العشاء في الجامع وجيت راجع البيت اول ما جيت دخلت المطبخ طوالي سخنت اللبن ... جبتو لأمي في غرفتها واخواتي الصغار نايمين جنبها قلت ليها آسف ياامي اتأخرت عليكم شويه لمن البنات نامو كنت بتكلم مع حاج "مختار" قال لي بكره في زبون جاي يشوف البيت قلت ليهو تمام خليهو يجيني بعد العصر لأنو الصباح بكون في الجامعه .
قالت لي م مشكله ياولدي ربنا يديك العافيه ... صحيت " دعاء و نداء " اديتهم اللبن وقعدت اتونست مع امي شوية وبعدها مشيت غسلت الكبابي وختيتهم وجيت رقدتا في سريري وبقيت افكر نحن كيف نبيع البيت الأتولدنا فيهو انا واخواتي وعشنا فيهو اجمل اللحظات مع ابوي "الله يرحمه" البيت دا الزكرى الوحيدة الفضلت لينا منو ... لكن مافي طريقه إلا يتباع لأنو انا ياداب في اولى جامعه وعلينا مصاريف الجامعه والبيت ومصاريف مدرسة البنات ،، ماعندنا حل تاني ومافي مصدر دخل ثابت عشان نقدر نتصرف منو ... وانا مع الجامعه دي م بقدر اشتغل حاجه تانيه .
بفكر لمن شالتني نومه صحيت الصباح مع الآذان مشيت صليت الصبح وجيت لقيت امي عملت الشاي ... قلت ليها ليه ياامي قمتي وعزبتي نفسك كان تخليهو انا بجي اعملو إنتي الدكتور قال ترتاحي وم تتعبي نفسك ،، قالت لي عبدالله يا ولدي م فيها تعب وبعدين انت ماشاء الله منظف ومرتب اي شيء بس اطلع الحليب من التلاجه واسخنو دي هينه م بتتعب ،، الناس دائماً بحمدو الله على البت لأنها بتساعد امها بس انت يا ولدي الله يرضى عليك م حوجتني للبت .. وبكره اخواتك يكبروا يساعدوني ويريحوك .
قلت ليها ولو ياامي الله من الواجب والله ... بالعكس انا بكون مرتاح لمن اخدمك انتي واخواتي " الأميرات " ربنا يحفظكم لي ،، بعد شربنا الشاي طلعنا وصلت البنات المدرسه وانا ركبت المواصلات مشيت الجامعه ... اول ما وصلت باب الجامعه سمعت صوت وراي قال لي انتظر "ياباش مهندس" اتلفت وراي وضحكت قلت ليهو ابوعبيدة انت الحركات دي م داير تخليها نحن ياداب في سنه اولى يازول ،، جاء سلم علي وضحك قال لي انت لمن لقيت زول من هسي بناديك "باش مهندس" مفروض تكون مبسوط مش دا حلمك وانت كدا كدا ح تصبح باش مهندس اتعود من هسي على "اللغب" .
قلت ليهو خلينا من دا الليله جايني زبون للبيت ادعي لي بالتوفيق يا صاحبي ... وقف وبقى يعاين لي قال لي يعني انت كنت جادي في الموضوع؟
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!