رواية الخامس من أكتوبر الفصل الثاني 2 - بقلم دانيا

رواية الخامس من أكتوبر

الفصل الثاني2

بقلم دانيا

قلت لأبوعبيده خلينا من دا كله انا الليله جايني زبون للبيت لازم اطلع بدري .... ادعي لي بالتوفيق يا برو ،، وقف وبقى يعاين لي قال لي يعني انت كنت جادي في الموضوع؟ اتلفتت عاينت ليهو وم وقفت قلت ليهو والبخليني امزح في موضوع زي دا شنو ؟ اها وإن شاء الله لو اتفقنا وتمت البيعه انا ح امشي المنطقه القلتها ليك عشان اشتري فيها بيت ونرحل طوالي وانت شوف لي موضوع صحبك دا للركشه عشان لو م داير يبع م نعتمد عليهو .

دخلنا القاعه وشوية كدا الدكتور جاء خاشي ... بعد المحاضرة انتهت تاني ابو عبيده فتح معاي الموضوع ،، عاينت ليهو بتمعن قلت ليهو خلينا نتفق إنو المنطقه دي صاح بعيده شوية بس م للدرجه دي وبعيد ما ياهو بنتقابل في الجامعه والأمور طيبه .... قال لي انت م فهمتني ! انتوا ح ترحلوا من الحله لمنطقه جديده م بتعرفوا فيها زول وبتعرفوا اخلاق اهلها ،، والبنات لسه صغار كيف ح يتأقلموا مع الوضع " منطقه جديد ، وبيت جديد ، ومدرسه جديده "؟ عاينت ليهو مسافه وكلامو دا لخبط لي افكاري .. لكن تاني فكرت في الوضع النحن فيهو قلت ليهو يا زول م صعبه للدرجه دي بتأقلوا كلها كم يوم وبتعودوا على المكان .

قال لي طيب يا زول دامك مصر خلاص اديني يومين انا ح اجري بحوثاتي واستفساراتي عن المنطقه ... م بخلي "الباشا" يسكن في اي محل ،، قال كلامو دا وكان ماسك نظارتو في يدو لبسها نظام دا الزول المحقق بقيت اضحك فيهو وقلت ليهو .. اتفقنا يابرو خد راحتك وطوالي طلعنا مشينا ... ماشين كدا سمعت صوت ورانا بنادي بإسمي عاينت ل ابوعبيده قبل ما اتلفت اشوف دا منو ،، هو زاتو عاين لي وطوالي وقفنا لأنو لسه كان الصوت شغال ينادي فيني ... اتلفت وراي لقيتها بت على بعد كم خطوه مننا .

عاينت لأ بو عبيده نظام دي منو ؟ هو طوالي فهم وعمل لي حركه بكتفو نظام هو زاتو ما عارف ... جات وقفت قدامنا وسلمت لينا ،، مديت ليها يدي سلمت ليها بتعابير استفسار نظام م عرفتك .. شكلها فهمت طوالي قالت لي "مفاز" م عرفتني معقول قرينا الثانوي في نفس المدرسه "مدرسة العميد" قلت ليها ايواه كويس شرفنا ،، طوالي قالت لي سبحان الله ونزلنا في نفس الجامعه ... قبل ارد ليها ابو عبيده كان مركز معاها شديد قال ليها ونفس التخصص؟ قالت ليهو لا انا بدرس في قسم الحاسوب ،، قبل يجروها ونسه طويله قلت ليها موفقه إن شاء الله عن إذنك وطوالي مشيت منها.

ابو عبيده كان لسه واقف هي قامت مشت منو طوالي لحقني قال لي "اصدقاء الثانوي" ااا بطريقه كدا غياظه تاني قبل ارد ليهو قال لي حرام عليك ليه مختصر البت كدا ؟ عاين ليها هي من شافتك اتزكرتك وطوالي جات سلمت عليك ... اتلفت عليهو قلت ليهو ونحن قرينا سوى صاح ؟ تعتبر دفعتك انت برضو ،، قال لي لكن هي نادت بإسمك انت وجات قاصداك انت ... مشيت منو قدام وقلت ليهو ابوعبيده انت عارف انا موضوع البنات دا آخر همي وبحب اركز معاهم وبنصحك انت كمان ،، المواضيع دي دا ما وقتها ،، ضحك وعاين لي قال لي ياباشا نحن لو م اتعرفنا عليهم في الجامعه نتعرف عليهم وين تاني؟ عاينت ليهو معاينة حقاره طوالي كشر وشو وقال لي انسى الموضوع خلاص عارفك انصار سنه.

ضحكنا وكملنا طريقنا مشينا المواصلات وقفنا في الموقف مسافه م جات عربيه ... طلعت تلفوني اتصلت لأمي قلت ليها وانا جاي عاوزين حاجه من السوق ؟ قالت م اظن عاوزين حاجه غير العيش قلت ليها تمام ،، بعد خلصت كان في مخبز جنب الموقف مشيت اشتريت العيش وجيت راجع قلت لأبوعبيده الليله المواصلات دي مالها غريبه كدا معقول كلها قفلت وطلعت ؟ قال لي مع جوا المطر دا اقلب ناس الحافلات م بجو الموقف .. بعد شوية اتصل لي عم صالح قال لي الزبون اتصل وقال جاي في الطريق قلت ليهو تمام ياعم صالح انا زاتي مسافة الطريق وبكون عندك.

عاينت للساعه لقيتها عامله 2:30 ابوعبيدة قال لي مالك الزبون وصل ولشنو قلت ليهو لسه بس في الطريق شكله ح يوصل قبلي ... والمواصلات ليه م جات طلعت القروش الفي جيبي عاينت ليهم وتاني دخلتهم قلت في نفسي ديل م بأجرن ركشه ،، ابو عبيده لاحظ لي قام دخل ايدو في جيبو طلع القروش المعاهو مسك يدي وختاهم لي عاينت ليهو قلت ليهو دا شنو يازول ؟ قال لي دقيقه ديك ركشه جايه قبل اتم كلامي معاهو وقف الركشه ولزاني على الركشه قال لي اركب سريع يازول انت اصلاً متأخر ،، قلت ليهو يازول ركشة شنو هسي المواصلات بتجي بتاع الركشه رد لي قال ناس المواصلات مأضربين الليله بسبب ارتفاع سعر البنزين ... عاينت ليهو وعاينت لأبوعبيده قلت ليهو والله دي مصيبه اختارت وقت غلط .

لكن برضو م صاح انت ح تمش بشنو ؟ قال لي عديها يا باشا ماتأكل همي انا بتصرف واصلاً م مستعجل وراي شنو لو كداري بمش ... عاينت ليهو وعاينت فوق قلت ليهو في المطرة الشايله دي؟ بتاع الركشه قال لينا انا بحلها ليكم انتوا الأتنين اركبو ورح هاتو العندكم بس محلوله بإذن الله ،، عاينت ليهو وقلت ليهو يكتر خيرك يامان ما قصرت .. ركبنا وعلى وصلتي لقيت الناس منتظرني ،، ابوي عبيده قال لي بينا تلفون ونزل مشى قلت ليهو تمام .

مشيت سلمت عليهم ودخلنا جوا جات مطرة قعدنا في الصالون ومشيت لأمي في المطبخ جبت ليهم المويه وبعدها طوالي الغداء .... وبعدين الزول قال مسافة المطرة تقيف عاوز يشوف البيت من جوا ،، قلت ليهو طوالي .

مشيت لأمي في المطبخ وريتها وناديت البنات قعدوا معاها في المطبخ ... ووريت الزول كل الغرف حقت البيت واخر شيء المطبخ ،، بعد شاف البيت قال لي يا ولدي عبد الله بيتكم سمح شديد والله ليه عاوز تبيعو؟ قلت ليهو لظروف ياعم لكن بتتسهل بإذن الله ... طوالي عم صالح اتدخل قال ليهو والله ابوه الله يرحمو كان زول ممتاز خلاص لكن الدنيا فراقة الأحبه ،، مامشلكه بكره ولدنا عبد الله يبقى باش مهندس ويبني لأمو بيت اجمل من كدا بتكلم وخاتي يدو في كتفي ابتسمت وقلت ليهو إن شاء الله .

اتفقنا مع الزول وتمت البيعه ...بعد يومين كدا تمينا الإجراءات اتصلت ل ابوعبيده قلت ليهو ورح المنطقه القلتها ليك انا اتصلت لزول هناك بتاع عقارات واتفقت معاهو .. قال