رواية الكسار (سلاسل الغوث) الفصل الرابع وأربعون 44 - بقلم لـ ميامي

ماكو شي طفّالي حزني
دنيا شكبرها وما گدرت تلمني .

-صلو على محمد والِ محمد الأطهار

-متابعة للحساب+تصويتكم+تعليقاتكم⭕️

~~~~~~~~~~~~~~~~~~~~~~~~

دموع:لبستة قميصة واخذت العطر ارشلة وهوَ يباوعلي ومبتسم كملت اخذ ايدي وباسها بعمق

الكسار:عاشت هالأيد الحلوة دمعتي

دموع:تتأخر لو لا

الكسار:لا حبيبتي مثل كل يوم

دموع:تمام انتبه لنفسك

باس خدي حيل واخذ نفس يشتم شعري
الكسار:رجعي نامي مو تبقين كاعدة ارتاحي

دموع:ان شاء الله

گرص خدي وباس اصابعة
طلعنة من الغرفة ومثل كل يوم شاف الأطفال وباسهم ونزلنة سوية

قبل لا يطلع من البيت باوعلي مبتسم دنگ باس بطني ورجع باسني
دموع:استودعتك الله

فتح الباب
الكسار:احبچ

لوحتلة بيدي وهوَ صعد سيارتة وراح قفلت الباب علينة ردت ادخل بس نزل وهيب لازم حذائة والجگارة بيدة مورثة

وهيب:صباح الخير دمعة

تمشيتلة مبتسمة ذب الحذاء وحضني
دموع:صباح النور حبيبي وين رايح

وهيب:رايح افتح السوبرماركت اليوم العمال عندهم عطلة

دموع:بس بعد وكت وما تريگت

وهيب:اتريگ هناك بنتي يلا تعالي قفلي الباب وبوسيلي ادوم وحسوني واعتذريلي منهم ماكدر العب وياهم اليوم

هزيت راسي طلع من البيت السوبرماركت قريب يروحلة مشي لأن بعدة ما اشترة سيارة
رجعت قفلت الباب ورحت اكمل نومتي

بس اكيد شلون انام واطفالي فوك راسي بس غفيت كعدو وصارو يهوسون

ادم:ماما ماما كومي انتِ عندچ بنية

فتحت عيوني اباوعلهم الأثنين واكفين فوك راسي واحد يدفع بالثاني ويتسابقون منو يحچي اول

ادومي جر وجهي لناحيتة يريد يحجي وحسوني يجر وجهي من ايدة لحد ما تعاركو تأفأفت وكعدت

دموع:ما اسمع منكم ثنينكم وين الصباح الخير؟ وين بوساتي

طفرو علية يبوسون بخدودي واني ارجعلهم البوسات
خليتهم يروحون يغسلون ويفرشون اسنانهم واني وياهم وبعدها نزلتهم للمطبخ كل واحد كعد بمكانة

كعدت كدامهم استمعلهم
الحسنين:ماما اني حلمت اكو بنية ببطنچ وحلووووة عيونها لونهن ازرگ

أدم:اني هم والله بس عيونها مثل عيون خالو وشعرها طويل وتركض لحضن خالو وتضحك ماما يعني حيصير عدنة اخت

ابتسمت
دموع:ادعو تصير عندكم اخت لأن اذا ما صارت بنية تبقى حسرة بگلبي

رفعو ايديهم يدعون من كل گلبهم
كمت سويتلهم ريوگ

بعدها كعدنة نتريگ ومن كملو اخذو المواعين الي اكلو بيهم وحطوهم بالسنگ وصعدو ينظفون غرفتهم واني بديت بالغدة وبتنظيف البيت

حطيت الغدة على النار وصعدت رتبت غرفتي كلها ورحت على غرفة وهيب حبيبي مرتبها مع انُ اكلة اني انظفها يكول ماريد اتعبچ

نزلت اكمل الغدة

للثنتين واندگ الباب چنت سابحة ومرتبة نفسي كالعادة
فتحت الباب ودخل كسورتي وجهة تعبان سد الباب وحضني

الكسار:خلي اخذلي بوسة قبل لا يجون الزعاطيط

ابتسمت حاوطت رگبتة وبادلتة بالبوسة
بس بسرعة ابتعدنة بعد ما اجانة الهجوم

ادم:بابااااا

ركضو يحضنو وحچون ويا وهوَ يستمعلهم
خابرت على وهيب كال دقايق واوصل للبيت رحت اجهز الغدة

رجع اندگ الباب تركت كلشي بيدي وركضت مثل الطفلة ملهوفة فتحت الباب قابلني وهيب بأبتسامة بشوشة ومدلي نستلة اني كلش احبها اخذتها من ايدة بفرحة وعبالك ناطيني الدنيا كلها

حضنت ايدة وصرنة نمشي
دموع:شسويت اليوم شغلك زين محد ضوجك مو

وهيب:لا تخافين كلشي بخير

باس راسي وراح يسبح
نص ساعة والكل تجمع على الغدة الأطفال يحچون ويا خالهم وهوَ ما يحب يحچي هواي بس علمودهم يتفاعل ويحچي ويضحك وياهم

بعد الغدة راح الكسار لشغلة و وهيب دخل ينام واني اقرة قصص ميمتي واذا ما تغششني ازعل منها

حياتي الحمدلله عايشتها بسعادة
زوجي واخوية واطفالي وخوالي وياية واخيراً التم شملنة اني ووهيب وعندي زوج يحبني واطفال مالين الدنيا علية وصار الحمل الي انتظرة صار سنين وبعد اجهاضات متكررة

الحمدلله والشكر

مرت الأيام بأنشغالاتنة وبحملي الي ماخذ نص حيلي وبهرموناتي العجيبة الغريبة چان زوجي هوَ الي ينتبه للأطفال لأن اني كلش صرت كسولة احب بس المكياج والأكل

بيوم من الأيام واني نايمة ومحاسة بشي
فزيت على صوت سد الباب

عگدت حواجبي من ما لگيت الكسار يمي
كمت لبست الروب فوك ملابسي ونزلت ادورة وماكو بالبيت وسيارتة بعدها بالكراج ماعرف وين راح

كعدت على المرجوحة انصل بي بس يرن وما يجاوب انشغل بالي
نص ساعة ودخل وجهة مغيم وما منتبهلي بس سد الباب فرك وجهة بقهر ورفع راسة للسماء

الكسار:ربي ساعدني

كمت مستغربة وضعة صار صوت بالمرجوحة بسرعة باوعلي وبهت وجهة وصار يبلعم

الكسار:دموع؟

تقربت لزمت ايدة
دموع:وينك انشغل بالي رين رحت

حك طرف حاجبة وكال بتوتر
الكسار:اجاني باهر ابن خالچ تناقشنة بشغل باچر

دموع:والمناقشة تصير هسة بنص الليل

خزرني ونتر بية
الكسار:هذا شغلي لازم بكل وقت موجود شوكت تتعودين

ابتعدت خطوتين متفاجئة
دموع:شبيك گبيت بوجهي ما حچيت شي بس لأن قلقت عليك

الكسار:لا تبزعيني دموع روحي نامي مالي خلگ

اباوعلة رافعة حواجبي انهضمت محچيت شي حتى هيچ يگب بوجهي
تركتة واكف يستغفر وصعدت فوك اهز ايدي

دموع:هوَ هم صوچي

حيل ضجت رحت غطيت الأطفال ورجعت لغرفتي تمددت على ظهري وغمضت عيوني

شوي ودخل وراي فتحت عيوني شفتة ذب ملابسة وعباك مقهور من شي ما فهمت شصاير كعد على القنفة مغمض عيونة ويهمس

الكسار:ابيع روحي بس حتى ترجعلي

رجعت غمضت من رفع راسة وسمعت تنهيدتة العالية
ثواني وحسيتة صار يمي وايدة تمشي على خدي ما فتحت عيني لأن اعرف بس افتح نتعارك

تمدد بصفي وحط راسة على صدري حاضني دقايق ورحت بسابع نومة صايرة حيل كسولة

كعدت الصبح ما لگيتة عرفتة رايح للشغل
وهيب اليوم يتأخر يلا يروح لشغلة لأن العمال موجودين

سويتلهم الريوگ ونزل وهيب صبح علية هستوة يريد يكعد واندگ الباب راح يفتحة واني اكمل بالريوگ بس تأخر رحت ورة

لگيتة واكف بالباب الجگارة بيدة ويأشر ماعرف وين وكدامة بنت جيرانة
وهيب:تروحين للفرع الثاني وتلگين اسواق اسمها ***

شافتني عبرت من جوة ايد وهيب واجتني تضحك بوستني
وداد:هلو دموع صباح الخير شلونچ

ابتسمت
دموع:صباح النور وداد هاي شنو منورتنة اليوم

باوع لوهيب عاگد حواجبة حصرتني الضحكة
وداد:اي اجو عمامي الغثة وعمي يريد چاي محمود حتى يجمع العائلة الله يشتت شملنة كولي امين

دموع:ولج هاي شبيچ عمامچ

وداد:خلي يولون اني واختي صار سنتين هنا وحدنة وبس مرتين اجونة ايع فد اكرههم حاقدة عليهم حاقدة

دموع:ساعتين ورايحين تحمليهم

وداد:اي لعد شسوي بعد

رجعت باوعت لوهيب تمشتلة ترفع بشعرها وتگرط كاجو
وداد:وانتَ وين كلت الأسواق لأن هذا معزل على حظي

وهيب باوعلها معصب
وهيب:وانتَ؟

شدت شعرها وضحكت
وداد:اعصابك هوبي اعتذر

عصب اكثر وكز على أسنانة
وهيب:راسچ بي شي؟

وداد:لا لا تخاف ماكو گمل

تقرب عليها وهيب ماعندة استوب وكفت كدامة اهدي بي
دموع:اهدأ شبيك ترى هيَ شخصيتها هيچ

گوة هدأ وهيَ بكل صلافة تباوعلة وتاكل بالكاجو تارسة جيوبها ترس
وداد:يلا اترخص اروح اجيب چاي محمود بس يمكن اجيب چاي احمد حتى يشتت العائلة

طلعت من البيت وچان اكو اطفال يلعبون طوبة بالشارع دخلت بنصهم تلعب وهيب هز ايدة ودخل واني دخلت ورة

وهيب:فلا ارتاحيتلها

دموع:حرام عليك البنية وردة صار سنتين هنا هيَ واختها صح بيها نوع من الخبال بس خبالها عفوي الي بگلبها على لسانها

سكت وضل ياكل ومن كمل اكلة راح للشغل
الأطفال بعد ما كعدو من النوم طلعن يلعبون بالشارع واني اباوعلهم من الكاميرات لأن موصيتهم ما يبتعدون عن البيت اخاف عليهم الدنيا مو أمان وبالأخص اعداء ابوهم هواية

قبل لا يستوي الغدة سمعت صوت سيارة وكفت بالباب عبالي الكسار اجة بس ما اندگ الباب رحت اباوع بالكاميرات

عگدت حواجبي وتقربت اباوع بتركيز
الكسار واكف حاط ايد بجيبة وايدة الثانية يدخن بيها وبس واكف ما يسوي شي ما فهمت شكو

رفعت تلفوني وتعمدت اتصل اباوعلة اخذ تلفونة شاف المتصل فرك وجهة مثل واحد مقهور وباوع على بيت من البيوت ماكدرت اميزة بيت منو

جاوب
الكسار:هلا دمعة

حچيت بفضول
دموع:هلا كسوري وينك اجيت لو بعدك

سكت ثواني واني اراقب تصرفاتة احسة حيل متوتر ماعرف ليش گلبي ولا ارتاح حسيت بشي مثل الجبل وصار بصدري ماعرف ليش اجاني هالشعور بس كل الي اعرفة اني مرتاحيت ابد

رجع جاوبني
الكسار:بالباب بس نسيت ما جبت حلويات ادومي وحسوني

دموع:عندهم هواية  لتهتم جاية افتح الباب

تمشيت للباب وگلبي يلعب فتحتة وصار كدامي ومبين روحة طالعة سكتت لأن كلت تعبان ماريد ازيد تعبة

دخل جوة يمشي سريع غير عن عادتة الي معودني عليها چان بكل مرة من يدخل من هالباب يحضني ويبوسني صارلة شكم يوم مجافيني

هم سكتت مو وقتهة
اجة وهيب والأطفال نزلو دزيت أدومي يصيحة شوي ونزل كال بابا مايريد وحينام انسدت نفسي عن الأكل بس وهيب ميقبل صار يوكلني

بعد الغدة والتنظيف صعدت فوك لگيتة نايم تركتة براحتة مچان جايني نوم كعدت ارتب بملابسنة واباوع مسلسل حتى ما امل

فترة مو بسيطة سمعت تلفونة دگ سندت نفسي وكمت
رحت اخذت تلفونة چان باهر وهوَ نايم ف كلت خلي اجاوبة

حطيت التلفون على أذني وقبل لا انطق كلمة اجاني صوت باهر
باهر:كمل كلشي تعال بس نص ساعة ولا تتأخر علاء طلع من البيت ومحد بي

عگدت حواجبي
دموع:باهر؟

سكت حسيتة تفاجئ
باهر:دموع؟ وين رجلچ

دموع:نايم شنو وين تردون ترحون شحسوون؟

انجر التلفون من عندي بقوة ايدي تأذت باوعتلة بفزة
دموع:كسار أذيتني شكو

سد التلفون وباوعلي معصب حيل سحبني من زندي
الكسار:منو سمحلچ تجاوبين؟ هااااااا

دموع:شفتة باهر وجاوبت شبيك ايديييي

تركها ودفعني من كتفي بخفة ايدة
الكسار:باهر مو باهر بعد تلفوني ما اشوفة بيدچ هذاااا شغليييي لا تدخليييين بشغليييييي

بقيت بس اباوعلة شنو هالتحول الفضيع الي صاير بي تركني وراح للحمام يسبح كتمت دموعي وذبيت حرگة گلبي بالغرفة صرت ارتب بيها وجلفت الأرضية جلف حاسة نفسيتي تعبانة

طلع من الحمام شافني اغسل وضل يهوس
الكسار:همممم غسلت هم غسلتتتت راح تخبليييينيي دموعععع انتِ حامل لا توكعين ويروح الطفل حرامات

اخذ الماسحة مني يطلع بالمي بدون ولا كلمة صرت انشف بالغرفة والدمعة مچلبة بطرف عيني
راح لبس ملابسة وتعطر وطلع من البيت بدون ما يكول اسف ولا حتى يراضيني خزت بخاطري

تركت كلشي بيدي وكعدت بالغرفة ابچي بچيت لحد ما ورمت عيوني قهرني هواية هسة لو اكو سبب لتصرفاتة چان عذرتة بس اني ممسوية شي

اندگ باب غرفتي
وهيب:دمعة كومي شوفي شجبتلچ

مسحت دموعي وهدأت نفسي وكمت فتحت الباب
وهيب:شوفي من شفتهم كلت اجيبهم لبنتي بس ماعندي بنية غيرچ

مچان منتبهلي وفرحان بالقراصات الي جايبهم الي بس رفع راسة وباوعلي بهت وجهة وكعو الغراض من ايدة وحضن وجهي

وهيب:شبيچ منو وياچ دمعتي بعد روحة لأخوچ

رجعت ابچي وذبيت نفسي بحضنة
دموع:مابية شي بس بس تعبانة هرمونات الحمل تعبتني

حضني اقوة يطبطب على ظهري
وهيب:بنيتي لا تخوفيني عليچ صاير شي مزعوجة من شي؟

هزيت راسي بلا حسيتة عرف اكو خلاف صاير بس ما حب يتدخل بيناتنة نزلني جوة غسل وجهي وكعدني بالصالة جاب القراصات وصار يحطهم بشعري فرحان

وهيب:ضحكي يلا ضحكي ماريد دموعچ تنزل اريد اشوفچ بس تضحكين

ابتسمت كعد وراية وصار يظفرلي شعري وكل شوي باس راسي بحنية
دموع:وهيب مختنگة هنا

وهيب:ناخذ الأطفال ونطلع؟

دموع:وشغلك

وهيب:انتِ اهم من كلشي اهم من نفسي علية

حضنتة امسح بدموعي
وهيب:يلا كومي تجهزي اني اخابر زوجچ واجهز الأطفال لا تشيلين هم

هزيت راسي وكمت لفوك
وهيب نعمة من ربي چانت مفقودة ورجعتلي

سبحت وجهزت نفسي ومن نزلت لگيتة مجهز الأطفال لزم ايدي وطلعنة من البيت كدرت اتناسى الي صار بوجود وهيب عرف شلون يطلعني من جو الكئيب الي چنت بي

اخذني للمنتزه اني ويا نتمشة والأطفال يلعبون بالألعاب شوي تعبت كعدنة نباوعلهم حطيت راسي على كتفة

وهيب:دموع عادي نحچي

عدلت گعدتي
دموع:شنو

لزم ايدي يطبطب عليها
وهيب:لگيتلي بيت صغير بمنطقة**** على گدي وقررت اسكن بي وأجارة مو كلش عالي

سحبت ايدي ابلع غصتي
دموع:ليش زعجناك بشي ليش ماترديني

فتح عيونة بتعجب
وهيب:اني ماريدچ؟؟ اني افديچ بروحي دمعتي بس اني ماريد احس نفسي ثگيل عليكم وهم اريد استقر وحدي انتو عائلة شعندي بنصكم

دموع:انتَ عائلتي بدونك اضيع انتَ ما تكدر تتصور شگد فرحانة بوجودك يمي وهيب اذا عفتني اموت قهر والله تعودت كل ليلة ادخل لغرفتك اطمئن عليك حالك حال اطفالي لا تعوفني

وهيب:بس وضعي بيناتكم غلط اني انحرج

دموع:وعلى شنو تنحرج هوَ انتَ متدخل للبيت اصلاً تطلع الصبح ترجع الظهر والعصر تروح لشغلك وترجع نص الليل والكل يكون نايم اذا عبالك انُ زوجي ينزعج منك بالعكس هوَ يريدك والله حتى كل يوم يوصيني عليك

وهيب:اعرف بس نفسيتي ما تتقبل

نترت ايدة وكمت
دموع:أصلًا انتَ متريدني ولا الكسار يريدني هالگد مليتو مني

وكف كدامي ابتعدت عنة رجعت ضجت
دموع:خلي نرجع للبيت

وهيب:هسة ليش زعلتي شوفي الموضوع من وجهة نظري

سكتت ضل ينافخ عرف قفلت على الروحة
راح جاب الأطفال ورجعني للبيت بتكسي

وصلنة نريد ندخل بس وكفت اباوع لبيت جيرانة بتركيز
چان شخص واكف بالباب وداخل للنص ومبين يحچي ويا شخص

وهيب:دخلي دموع ليش واكفة

بلعت ريگي وسندت نفسي بأيد وهيب من الخوف
دموع:كسار؟

ما فهم شنو باوع للمكان الي اباوعلة وحسيتة انصدم
ما چنت اريد اتأكد من هالشخص بس فضولي خلاني واكفة

ثواني كانت اشبه بالموت البطيئ
طلع هالشخص من هالبيت يعدل بملابسة واني عيوني متشوف غيرة

وكف بنص الطريق عيونة تتنقل علينة بصدمة
حچيت والخوف واضح بصوتي

دموع:كسار؟...

.

يتبعع

قصير تمهيد للجاي وحتى لا تملون🤍

ضيفو حساب الانستا وقناة التلي