انا ردتك ثَلج وتطَفي هَالنار
صِرت جَمرة وتِزيد النار بِية..
-صلو على محمد والِ محمد الأطهار
-متابعة للحساب+تصويتكم+تعليقاتكم⭕️
~~~~~~~~~~~~~~~~~~~~~~~~
دموع:حچيت هالكلمة ولزمت ايد وهيب حيل
تقرب علينة متوتر ويتلفت
وكف كدامي مكور ايديناتة قبل لا يحچي نطقت
دموع:شسوي هنا؟
رفع شعرة عن وجهة بتوتر
الكسار:چنت عند علاء
دموع:علاء الي تكرهة؟ واصلاً باهر كال علاء طالع شسوي ببيتة
الكسار:تحقيق هوَ؟
دموع:اي تحقيق كسار تحقيق شسوي بهالبيت
وهيب:دموع احنة بالشارع والأطفال نعسانين خلي ندخل
استوعبت احنة وين خليت ودخلت وهيب اخذ الأطفال فوك واني بقيت واكفة واباوع للكسار بشك واهز برجلي وهوَ معصب على متوتر
دموع:انتظرك تحچي؟
الكسار:شحچيييي
تقربت اكتم غضبي
دموع:شسوي ببيت علاء بغيابة واختة وحدها بالبيت؟
من نطقت بهالكلام رفع عيونة بصدمة وبسرعة لزم فكي بعنف وقرب وجهة لوجهي لزمت ايدة متأذية
الكسار:تشكين بية؟
دموع:احچيلي وما اشك شسوييييي ببيت علاء كسااااار
عصر فكي اكثر عيوني دمعت من الوجع
دموع:وخر عني
تركني وبأصبعة ينقر على راسي
الكسار:علاء بالبيت وسيارتة بالباب ما شفتيها؟ لشوكت تبقين بهالعقلية لشوكت تبقين تشكين بية
دموع:وضعك يثير الشكوك تغيرك اكبر دليل
تقربت انقر على صدرة
دموع:كسار اسامحك على كلشي بس على الخيانة مستحيل أي غلط منك راح انهي هالزواج واخذ اطفالي وبعد متشوفني
تنهد واخذ باكيت الجگاير يطلعلة جگارة
الكسار:مخاينچ وما اسويها دموع انتِ روحي من هالدنيا لو الكل يكول اني خنتچ لا اصدگين لأن الكسار كاسر الكل علمودچ مستحيل يباوع لغيرچ دموع انتِ طفلتي بريئتي گوة گدرت احصل على گلبچ شلون ارجع نفسي لنقطة الصفر؟
هزيت راسي ورحت كعدت على المرجوحة فتحت شالي ورجعت باوعتلة
دموع:ليش ممرتاحة؟
كعد يم رجلي ولزم ايديناتي بوسهم
الكسار:ريحي گلبچ ما اتسبب بكسرتچ
دموع:واذا تسببت؟
الكسار:شنو تردين واطلبين اني جاهز
دموع:تطلگني وتنساني
هز راسة ما مهتم
الكسار:ادوس على نفسي علمودچ دمعتي
بقيت ساكتة ممرتاحة ابد
كمت من عندة وصعدت فوك غيرت ملابسي ورجعت ارتب بالغرفة صعد وراية ذب نفسة على الچرباية وهستوني مرتبتها
الكسار:شنو رأيچ اليوم نسهر على فلم لو مسلسلتچ التافهة
دموع:مرتك متشوف شي تافه لو سمحت يعني
الكسار:اي خلي نتابع
تركت الي بيدي وكعدت بصفة
دموع:شوف اكو مسلسل حلوة البنية تشهد على جريمة قتل والقاتل يتزوجها وتالي يحبها وتحبة واخوها شرطي يموت وهواية احداث حلوة نتابعها؟
اني احچي وهوَ مبتسم ويلف خصلة من شعري على اصبعة
الكسار:تركي الي بيدچ وخلي نتابعها ورة العشة
هزيت راسي احب هالسوالف احب نتابع سوية وهوَ كل اسبوع لازم نخصص يوم النة نتابع ونلعب بس صار فترة ماعرف شبي واني مشيت الموضوع بمزاجي لأن اذا اكو شي بالنهاية كلشي ينكشف ويصير غير كلام
نزلت جوة حتى اجهز العشة بس دخلو وهيب والأطفال شايلين اكياس ويسولفون وادم العلاگة اكبر من عندة وگوة شايلها
وهيب:انتو عصير ماكو بيبسي متفقين؟
ادم:بس انتو تشربون؟
وهيب:علمودكم احنة حبيبي مانريد تتمرضون هاي امكم هنا
حطو الاكياس على الكاونتر
دموع:هاي شنو؟
اندگ الباب وهيب ابتسم
وهيب:اليوم عازمكم
اباوع الأكياس هواية راح يفتح الباب سمعت صوت باهر حطيت شالي على راسي دخلو والكسار نزل سلم علينة وكعد يفتح بالأكياس
باهر:هاي شنو علمودي شكرًا شكرًا
وهيب:اي ما تشوف جبت هواية ادري بيك ابو بطن وما تشبع تعاي دمعتي
كعدني وكعد بصفي والكسار من الجهة الثانية
باهر:عاشت ايدك جوعان
سكت ما حچة
باهر:عاشت ايدك
هز راسة بدون كلام
باهر:عاشت ايدك وهيب
باوع لباهر بخزرة ودفرة برجلة
وهيب:افتهمنة لا تلح
ذبلة بوسة بالهوى
باهر:عاشت ايدك
جر شعرة وما سكت اموت على علاقتهم باهر يحب يضحك ويسولف عكس وهيب الي دوم ساكت وبس الي وللأطفال يضحك ونادرًا ما يضحك وياهم وباهر لازگلة فد لزگة
كملو اكل واني اكل على كيف كامو باهر والكسار طلعو للحديقة يسولفون بالشغل والأطفال يمي وهيب يجيب ويحط كدامي
سمعت الباب اندگ وصوت وداد يلعلع
شوي ودخلت وهيب عگد حواجبة
وداد:مساء الخير عيوني
دموع:مساء النور تفضلي ويانة
وداد:هستوني اكلت باچة تخبل وشربت سڤن وراها سرسح على گلبي المهم دموع بس اريد اخلي تلفوني هنا خلي يشحن ماعندي كهرباء
دموع:ليش ماعندچ
تنهدت
وداد:اختي تعرفين وضعها بعد بيها توحد واني چنت رايحة اجيبلها علاجها ومن رجعت لگيتها گاطعة الوايرات كلها وهمزين ما متكهربة ولگيتها حارگة روحها بقينة بدون كهرباء باچر اخابر احد يجي يصلحها بس اريد اشحن فوني حتى اخذة وياي لجامعتي
دموع:ياااا عزا زين شلون خاف تخافون تعالو هنا
وداد:لا منخاف لتفكرين حبيبتي
وهيب:اكدر اشوفها تتصلح لولا؟
باوعت لوهيب مصدومة وهوَ عيونة على الطاولة مارفعهم
وداد:لا ماريد اتعبكم
كام غسل ايدة
وهيب:هسة نروح اني ودموع ترى اعرف بالكهرباء اشتغلت
وداد:تمام براحتك وبطريقك شوف السبلت شبي والگلوب مكسور ياريت تبدلة وبغرفتي اكو بريعصييييي ياريت تكتلة
هز راسة تركت الي بيدي ورحت وياهم كلت للكسار ورحنة
شفت اختها كاعدة بالحديقة تهز بنفسها وتحسب بالأنكليزي خطية عمرها 14 سنة وبيها توحد وتاخذها لمركز تأهيل
دلت وهيب على الكهرباء انطاها تلفونة تضوي اله
ضل يصلح بيها ساعة كاملة لأن 4 وايرات مگطوعة لحد ما خلص وانفتحت الكهرباء
وداد:هسة البيت رجع حلو
وهيب:السبلت؟ البريعصي؟
باوعتلة ما فاهمة
وداد:شبيهم
وهيب:وينهم
وداد:ها اي تعال
لزمتة من ايدة واني بقيت فاكة حلگي تجر بي وهوَ عاگد حواجبة
نتر ايدها
وهيب:مو طفل اعرف امشي بس دليني
ما اهتمت تمشي كدامنة وتسولف ويا نفسها
وداد:وداد المصگوعة وداد الأدبسز ليش خليتي الشباك مفتوح ودخل الزائر المخيف
دموع:هسة اخوية حبيبي يقتلة لتخافين
ابتسمت وضربت وهيب على عضلات ايدة
وداد:بطل هوبي بطل
اباوع لوهيب عصب هالتصرفات ميحبها بس وياي وهوَ هم مادري شبي ما طايقها ميعرف انُ وداد متقصد وهيَ هيچ شخصيتها حبابة ومتخجل من احد بسرعة تاخذ ميانة وهالشي ممكن يسببلها مشكلة
دلتة على الغرفة هوَ فتح الباب بس دخل طلع حاط عيونة بالأرض
وهيب:دموع اكو ملابس خلي تشيلهن
وداد:ياااا نسيتهن يلا اني اختك
گلب عيونة معاجبة دخلت شالتهم كلهم وطلعت دخل وراها شاف البريعصي واكف نزع حذائة وبضربة وحدة انجعص البريعصي لأن چان ناعم وبعدها سوة السبلت الها وخلتة يسوي السنگ متت ضحك
وداد:اني حيل استغلالية مو؟
دموع:ابد ابد وينچ وين الأستغلال
وداد:لعد شسوي وحدنة بالبيت واغلب الأشياء ما اكدرلها خلي نستغل اخوچ
كمل السنگ سوة الگلوب الها ذب جگارتة وداس عليها
وهيب:وبعد؟
باوعت للجگارة
وداد:اخاف اكلك اكو بعد شي وتدوسني مثل الجگارة
باوعلها من فوك لجوة وحضن كتفي
وهيب:يلا نروح دمع
لوحت بيدي الها وطلعنة
وهيب:ما ارتاحلها مو بيدي احسها ملعبة عيونها بيهن شر خفي
دموع:اووف وهيب لتصير شكاك البنية حبابة والله ممكن تصرفاتها شوي محلوة بس تتصرف بعفوية ومتتقيد ويا احد انتَ تخيل مصارلها 3 سنوات هنا والمنطقة كلها تعرفها وتحبها حيل لطيفة
وهيب:ماعرف حاس وراها شي حيل مزعجة تحچي هواية واني ما اتحمل غير كلام دموع
باوعتلة رافعة حاجبي
دموع:قصدك اني احچي هواية؟
ابتسم
وهيب:اتمنى تبقين تحچين على راسي لحد ما اموت لا امل ولا اتعب من سمع صوتچ اموت على كلامچ وعليچ
حضنت ايدة فرحانة
دموع:دمعة تموت على وهيب
بقى مبتسم رجعنة للبيت قفلت الباب باهر رايح لملمت المطبخ وجهزت للمسلسل وبعدها صعدت لگيتة منتظرني
دموع:انتظرتني هواية؟
ابتسم ومد ايدة الية
الكسار:طول العمر انتظرچ بدون ملل تعالي
خليت الحبشكلات ع الميز ولزمت ايدة وتمددت بصفة
فتحت التلفزيون وطلعت المسلسل حيل احبها اسمها حب ابيض اسود قديمة بس احبها
حطيت راسي على صدرة ورجليناتنة متشابكة وهوّ يحرك ايدة على بطني بخفة حطيت ايدي على ذقنة
دموع:كسورتي
الكسار:ها دموعتي
دموع:ماريد تروح لبيت علاء ممرتاحة والله هاي اختة ملعبة ومو راحة اني اعرفها تصرفاتها ايع صح حلوة بس خفيفة والله
الكسار:واني ممباوع لأختة اني عندي مصلحة عند علاء ولازم اخلصها على السريع شغلي يتطلب هواية اشياء
دموع:بس اغار عليك احس احس گلبي يأذيني
الكسار:انتِ بحياتي گمر ويضوي دنياي وانتِ بگلبي شريان ينبض معقولة اباوع لغيرچ يبعد الكسار انتِ؟
باوعتلة بدلع
دموع:اعرفك متخون بس اذا فكرت وخنت تنسى دموع
الكسار:يوم موتي نسيانچ
حركت كتفي
دموع:اني انطيتك خبر اذا خنت يا كسار دموع تنتهي وانتَ تنتهي بگلب دموع
فزيت من گرصني بظهري ضربت ايدة
الكسار:انطيني بوسة ولو حلگچ حاليًا ينطق بالسم بس عادي
ابتسمت ورفعت نفسي بمهل وبستة
دقايق وابتعدنة عن بعض ورجعنة نكمل المسلسل اندمجنة لأن المسلسل حيل ممتعة
بعد هاليوم صار لود فضيع عند الكسار بشغلة يطلع الصبح وميرجع غير بنص الليل تعبان يحط راسة وينام وثاني يوم نفس الشي
ابد مچنت مرتاحة گلبي يلعب لعب وحاسة حيصير شي
فزيت من صفنتي على دخلة ادم
ادم:ماما اجت براد بالباب تريدچ
ابتسمت
دموع:حبيبي ماما مو براد اسمها وداد
حرك كتفة ممهتم كمت حتى اروحلها بس وكفت بباب المطبخ من شفتها واكفة كدام وهيب على اطراف اصابعها مخلية ايديها ورة ظهرها ومادة راسها قريب ع وهيب
واخوية مبعد وجهة عنها عاگد حواجبة
استغربت وكفتهم چانو حيل قريبين على بعض بس وهيب مبعد راسة رحت اتمشالهم وزاد استغرابي من شفت وداد رفعت ايدها لخد وهيب الي محروگ وتلمست الحروق
هوَ فتح عيونة مستنكر فعلها وقبل لا يستوعب نطقت وملامحها متألمة وتحچي بأسف وعبالك هي حارگنة
وداد:شلون احترگت؟
دفع ايدها بعنف وابتعد خطوتين
وهيب:شلون تسمحين لنفسچ تلزميني؟
وداد:دا اسألك على الحروق
وهيب:شعليييييچ؟؟؟ وجهي لوووو وجهچ منووو سمحلچ تلزميني
عصب هواية وضل يرجف خفت يتهور ويضربها ركضت لازمتة اهدي بي وهيَ دحست نفسها بالحايط تباوعلة بفطارية
وهيب:دموووووع هاي شتريد مني
دموع:اهدأ وهيب
حطت اصابعها بحلگها وحچت بخوف
وداد:شبيك هوبي؟
باوعتلها بخزرة وهوَ تخبل
وهيب:اسمييييي وهيييييب مو هوبييييي تردين ارتكب بيچ جريمةةةةة تردين ارجع للسجن؟ منوووو دازچ انتِ منووووو
حاوطت وجهة احاول اخلي يباوعلي وهوَ عيونة تركزت عليها
دموع:باوعلي باوعلي حبيبي وهيب عيوني باوعلي
نزل عيونة علية يتنفس سريع
وهيب:لااااا تكول هوبيييي اني مو هوبي موووو هوبيييي
دموع:اي انتَ وهيب مو هوبي لا تفكر اخذت علاجك اليوم لو لا
ارتحت ملامحة ومسح العرگ الي بلل جبينة بقهر
وهيب:نسيتة
دموع:اكول لحسوني يجيب علاجك؟
هز راسة مثل الدايخ
اموت الف موتة من اشوفة هيچ يعصب على اقل شي وينزعج واذا ما اخذ علاجة حيل يتأذة لأن مصارلة 3 اشهر من طلع من السجن بعدها نفسيتة تعبانة وما متأقلم على الحياة الجديدة
صحت حسوني يجيب العلاج ثواني وجابة خليتة ياخذهم كلهم ويا كل حباية انطيها اله ياخذها ويدنگ يبوس ايدي
دموع:تروح لغرفتك ترتاح
همس
وهيب:اريد يمچ هاي ماريد اشوفها زاعجتني
هزيت راسي التفتت عليها چانت واكفة تاكل بأظافرها وتباوعلنة خايفة كسرت خاطري البنية فطيرة بس وهيب عصبي وميتحمل شخص غيري اني والأطفال وهيَ مدتستوعب هالشي
وداد:اني اسفة دموع
عافتنة وطلعت لبيتها خايفة بس دقايق وسمعت صوتها تلعب ويا الأطفال بالشارع وعبالك كلشي مصاير
لزمت وهيب چان تعبان ودايخ لأن اخذ علاجة مو بوقتة
وهيب:ماريد اشوفها دموع راح توكعني بسالفة ممرتاحلها
مشيتة على كيف رجفتة تخوف ماكدر يتحمل كعد بالأرض واني كدامة محتارة شنو اسوي صرت افرك بصدرة
دموع:يروح دمعة على كيفك ويا روحك تهدأ
باوعلي وحچة باللسان ثگيل
وهيب:اني مو هوبي دموع اسمي مو هوبي
هزيت راسي ابچي على حالتة عرفتة تذكر امي من چان صغير تدلع اسمة من چانت ما تخاف من عندة
گلب عيونة وصارن بس بياض العدسة اختفت عوج رگبتة وصار ينتفض ضربت على خدي من استوعبت وهيب رجعتلة نوبة الصرع من بعد سنين شفاء عرفت هالمرض مستحيل يفارگنة
اخذت شالي حطيتة بحلگة وراسة بحضني حتى لا يضرب بالأرض واصرخ
دموع:حسنين جييييب التلفون اخابر ابوووك
طلعو خايفين وبقو صافنين من صحت بيهم يلا جابو التلفون اتصل على الكسار مرتين ثلاثة وماكو رد من أيست اتصلت ع خالي فهد
بس كال الو حچيت بخوف وبچي
دموع:خالوووو الحگ وهيب رجعتلة نوبة الصرع قوية والله راح يموت بين ايدي
فهد:جاي لا تبچين انتبهي علية
سدة مني واني اشوف خشمة ضل ينزف
متت خوف لأن اعرف وهيب حالتة چانت اصعب من حالتي من تجي نوبة الصرع يبقى عبالك مشلول ورجلة تبقى تأذي يومين سودة علية
هدأت حركتة شوي شوي
صرت اسمع بس صوت انفاسة الثگيلة واحس بيدة الي تعصر ايدي
وهيب:د دموع
حضنتة حيل ودموعي تنزل
دموع:يا حيلها
وهيب:لا تخافين مني
دموع:خايفة عليك وهيب والله مستحيل اخاف منك الكل يأذيني وانتَ تداويني الكل يبچيني وانتَ تمسح دموعي شلون رجعلك الصرع شلون
وهيب:من چنت بالسجن بالشهر تجي مرتين من العصبية الزايدة
دموع:لا تعصب بعد ما اتحمل اشوفك متأذي
هز راسة عصر عيونة يحاول يكوم بس ما يكدر يحتاج وقت بسيط حتى يسترجع قوتة
دقايق واندگ الباب راحو الأطفال فتحو ودخل خالي يركض وهيب غمض عيونة وعصر ايدي اكثر
فهد:شصار دموع شبي وهيب
وهيب:مابية شي
رفعة عن حضني وكفة ساندة
فهد:ليش ما تاخذ علاجك مو كل يوم ادزلك رسالة اوصيك
دموع:يعني تعرفون رجع الصرع بس اني ماعرف
فهد:منريد نزعلچ دموع
ردت احچي بس وهيب دفع خالو عنة وحط راسة بالحديقة وصار يستفرغ سودة علية ما ضل شي بمعدتة
ركضت ناسية نفسي جبتلة مي اخذة من ايدي شرب نصة وغسل وجهة بالباقي لزمتة امسح بوجهة وهوَ يمسح بدموعي
وهيب:لا تبچين هسة اسبح وانام واصير زين
دموع:خايفة عليك شصار بيك ردت اموت والله
وهيب:اسم الله عليچ بنيتي يومي قبل يومچ يصير
حضنتة اناشغ سمعت تلفوني يدگ بس من خوفي ماكدرت اجاوب وتجاهلتة دخل يسبح بالحمام الجوة واني صعدت جبتلة ليفتة وصابونتة والشامبو وملابس ومنشف لأن اعرفة ميسبح بس بمي لازم ينظف نفسة زين
كعدت بالصالة وخالو كعد يمي شوي وراح لأن عندة شغل ووصاني اذا صار شي اخابرلة
حاطة ايدي على خدي انتظرة يطلع وهوَ حيل يتأخر بالحمام
حسيت بشخص دخل يركض باوعت شفتة الكسار بس يباوعلي بتوتر وعيونة تدور بالمكان
الكسار:متصلة علية ما ماكدرت اجاوب ومن اتصلت ماكو انتِ واخر شي انغلق شكو شصاير
دموع:ماكو شي لتشيل هم ارجع لشغلك
چنت احچي بضوجة على حالة وهيب وهوَ عبالة ضايجة من عندة تقرب علية
الكسار:شصاير
طبطبت على كتفة
دموع:مصاير كسوري شي صار وانتهى
جحظ عيونة بغضب وسيحبني من زندي صرخت بوجع
الكسار:عباااالي صاير شيييي ليش اتصلتيييي اكثر من مرة وتالي انغلق شنوووو تضحكين علية انتِ
الدم وكف بيدي بقيت بس اباوعلة مابية حيل لشي
ثواني واندفع الكسار وصار وهيب كدامي وكدامة ضربة بصدرة
وهيب:ايدك عن اختي لا اسود حياتك بوجودي وتريد تضربها بغيابي شچنت تسوي بيها
باوع لوهيب بقلق وحط ايدة على جبينة
الكسار:هاي شبي وجهك هيچ ومصخن هم عيونك حمر صاير شي فهموني
الحسنين:بابا بابا ترى خالو وهيب ضل نام بالأرض وضل يرجف مثل ماما من چانت ترجف وينضرب راسها وماما خلت راس خالو بحضنها مثل ما انتَ تسوي
وهيب ابتسم بحنية ومسح على راس حسوني والكسار اخذ ايد وهيب يقيس النبض
الكسار:رجعلك الصرع
هز راسة الكسار تنهد وسحبة خلا يكعد لأن بعدة تعبان وراح للمطبخ سواله عصير برتقال وليمون مثل ما يسويلي وجبرة يشربة
دموع:شلونك هسة وهيب
سحب راسي لصدرة يلعب بشعري
وهيب:زين اني زين بس هاي لتخلوني اشوفها بعد
الكسار:منو
وهيب:هاي فؤاد لو رواد مادري
دموع:قصدة على وداد
استوعب وهز راسة
الكسار:بس البنية مابيها شي ابوها وامها ماتو وكعدت هيَ واختها بهالبيت واني بنفسي سألت عليهم وطلعو ناس ونعم منهم هيَ صح تحس اكو شي مو صاحي بعقلها لأن بسرعة تاخذ ميانة بس بنية شريفة وتعبانة على نفسها
وهيب:مادري شي بداخلي ممرتاحلها احسها شيطانة ومتخفية بوجهة البريئ مكدرت ابلعها ولا حتى اسايرها من اول يوم شفتها بي
دموع:والله البنية حبابة يتيمة وعمامها ممخليها بحالها قبل لتطلع من السجن بشكم يوم اجوها عمامها يردون يطلعوها من البيت بس ميكدرون لأن بأسمها واسم اختها ضربوها ضرب ايدها انكسرت لو ما الكسار وزياد چان خلصو عليها وسودة علية رايدين يأذوها بأختها لازمين هالمسكينة ويحرگون بيها بالجگاير حتى بلكت تتنازل الهم
فاتح عيونة متفاجئ
وهيب:بدون شرف هذول!!! يعني يردون يطلعون بنت اخوهم عرضهم من البيت وهيَ بنية شابة لا حول ولا قوة الا بالله
دموع:من هيچ اكلك خطية معندها سوالف مكسرة وحبابة ممسوية شي والمنطقة تشهد بس تحب تلعب ويا الجهال بالشارع
وهيب:اي خوش بس بعدني ممرتاحلها شلون تلزم وجهي ماحب احد يلزم ندوبي غيرچ انتِ
ابتسمت اريد ابوسة والكسار رفع ايدة ولزم خدة بغيض وهيب دفع ايدة يعنف وخازرة
وهيب:شبيييييك
الكسار:تريد تبوسك لا تخليها
بعنادة حضني حيل يبوس بخدودي والكسار يضرب بظهرة حتى يعوفني
الكسار:وخررر لا اشعلهم شعل وخر عن حضنها
وهيب:هستوة تريد تضربها وخر انتَ
الكسار:غير خفت عبالي صاير شي اهوووو وخر عنها لا تلزگ كوم نام انتَ تعبان ولي نام يلا
باسني بخدي بوسة قوية واني اضحك والكسار يجرة عني
الكسار:شفطتهاااا شخليتليييي
كام عني گرص خدي وصعد ينام
دموع:متت خوف لازم احچي ويا وداد بموضوع وهيب واخليها تبتعد حتى لا هوَ يتأذة ولا حتى هيَ
شفتة راح سد الباب وتقرب علية يبوس بزندي الي أذاه
الكسار:اسف والله اسف احاول ابتعد عنچ حتى لا اخلي ضغط الشغل بيچ اعتذر منچ
ابتسمت وشوفتة زندي
دموع:مابي شي شوف
الكسار:بس أذيتچ واني اسف
رمشت عيوني وابتسمت ابتسامة لطيفة وهوَ يموت على هاي نظرتي تقرب علية اكثر وحاوط وجهي
الكسار:اسف دتتأذين مني
دموع:اعتذارك مقبول لأن اعرف شغلك متعب وحتى سيدرا تكول خالو جوجو نفس الحالة لأن مشغول اني عاذرتك
تنهد بحيرة وطلع بوسة بطرف شفتي
الكسار:يا شهر دخلتي
دموع:يومين وادخل بالرابع
باوع لساعتة وابتسم بخبث وعيونة لمعت
الكسار:بعد ساعة وتخلص اجازتي الزمنية شنو رأييچ اطيرچ بوسط حضني
ضحكت بخجل وضربتة على ايدة چان عبالي يشاقة بس من شفتة نزع ساعتة عرفت ميشاقة
صار فوكاية راد يتقرب يبوسني وخليت اصابعي على شفايفة
دموع:احنة بالصالة ترى
باس اصابعي ونزلهم عن شفايفة
الكسار:الباب مقفول بعد گلبي ماكو هروب من حضني
كال هالكلام وصدگ طيرني بحضنة
فترة وابتعد تلفونة يدگ باوع للأسم اخذ جگارة ورثها وجاوب
الكسار:هلا بباهر الي بمصاريني باعر
نص ساعة واجي چنت اكل جوعان شسوي يعني
دنچب
كال اخر كلمة وسد الأتصال باوعلي وابتسم
الكسار:هاي نظرتچ الذبلانة تطير عقلي من راسي باوعيلي عدل ولچ
ضحكت وكعدت سحبت الجگارة من بين شفايفة ردت ادخن وسحبها من ايدي يهز براسة
الكسار:ها يالبربـ*** تردين تدخنين
دموع:انطيني ادخن اشتهيتها اخاف يطلع بعين الطفل
الكسار:كلشي ما يطلع ادومي وحسوني طلعو يخبلون بدون دخان
دموع:چنت ادخن من حبلت بحسونات و هسة تنسيت انطيني حبااااااب
ابتسم بمكر سحب نفس من الجگارة وحط ايدة ورة راسي واخذ شفايفي يبوسني ويزفر الدخان بثغري
ابتعد
الكسار:ها بعد
هزيت راسي لا ضحك وصار يزفر الدخان بوجهي جگارتة تجنن ريحتها صارت او يمكن لأن اتنسى اني
سحب ملابسة وحچة بأستعجال
الكسار:اذا بيچ حيل بس تجيبيلي ملابس وعطري حتى اسبح واروح باهر اكل راسي وگلبي هسة يضل يمسلت ويكول ذاب الشغل عليه
هزيت راسي وراح للحمام رحت جبتلة ملابس والمشط وعطرة وكعدت بالصالة انتظرة نعسانة والأطفال كاعدين بالغرفة يلعبون لأن عطلة ومعندهم دراسة
طلع بدل بسرعة وكمل وراح لشغلة رحت قفلت الباب وردت اصعد بس لفتت انتباهي الكاميرات وكفت اباوع للشاشة
الكسار صعد سيارتة واخت علاء واكفة بالباب بملابس تخزي وبيدها ڤيب تدخن بي الكسار ما حرك السيارة وانتبهت چان يخابر
مرتاحيتلها ابد نظراتها مو راحة بس اني واثقة الكسار ميباوعلها
حرگتني حرگ راح الكسار واني لبست حجابي وركضت فتحت الباب صارت كدامي تباوع للسيارة ومن شافتني ابتسمت بطريقة مقرفة واني باوعتلها بشمئزاز
منظرها منظر عاهرات فستان ستن ويا الركبة طابع على جسمها وصلوخ وخيط الفستان الي ع كتفها واحد منهم واكع بأهمال
سحبت نفس من الڤيب وضحكت ضحكة رنانة هزت جسمها وغنت والدخان يطلع من حلگها
لينا:مو گتلك يعذبونك يگلبي
أسمر دخيلك يسمر
عينة شهل وشعر أشگر
بقيت فاكة حلگي وعيوني سوية مچان اكو احد بالشارع وهيَ ماخذة راحتها على الأخر مشت للداخل وفتحة الفستان طويلة بحيث بس مشت طلع فخذها كلة سدت الباب واني صافنة
استوعبت اني وين دخلت وقفلت الباب
كعدت بالصالة صافنة واسولف ويا نفسي بشرود
دموع:شقصدها شنو هالحركات المشبوهة ليش عينها على الكسار ومن شافتني سوت هالتصرف المقرف
صارت حسبة تجيبني وحسبة توديني شفتي خلصتها من كثر ما اكلت بيها وبس اباوع للساعة
من قربت جية الكسار كمت سبحت ورتبت نفسي ووكفت كدام الشاشة اباوع الشك دخل بگلبي وهيب نام والأطفال هم اكلو من الغدة ونامو
قربت وجهي على الشاشة من وكفت سيارة الكسار بقيت اباوع
نزل منها شايل وردة واكياس هوَ هالفترة يخلي السيارة برة لأن يطلع مستعجل
ما شفت شي مشبوه ابد دگ الباب ورحت فتحتة مبتسمة دخل ذب الأغراض سحببني من خصري بخفة وطبع بوسة على خدي
الكسار:شريان گلبي
بست صدرة
دموع:اروح فدوة لگلبك
قدملي الوردة چانت وردة حمرة مابيها اشواك مفتوحة وحيل حلوة
وهيَ بيدي حاوطت رگبتة نزل نفسة لمستواي واني بستة
ابتعدت اباوعلة بدلع
دموع:مشتاقتلك شنو هاي
عض شفتة بمكر ترك كلشي بمكانة وشالني بحضنة
الكسار:طاح حظ الشغل اليبعدني عنچ
صعدني لغرفتنة وهوَ بين خطوة وخطوة يطبع بوسة على شفايفي
غفيت بحضنة ناسية نفسي نعسانة اليوم چان يوم متعب بسبب التفكير
حسيت بي من كام عني بس كلت راح يسبح رجعت لغفوتي
واني ونايمة ماعرف شنو صار فزيت فزة شاهگة وعبالك اكو شي نبهني اكعد من نومتي خليت ايدي على گلبي چان يدگ سريع ودگاتة توجع
باوعت الكسار ماكو صرت اتلفت بالغرفة ادورة
سحبت ملابسي لبستهم ونزلت واول شي سويتة باوعت بالكاميرات سيارتة چانت بباب البيت
بقيت اباوع متوترة حاسة اكو شي چبير ديصير اني جاهلتة
ساعة كاملة مرت ماشفت اي شي ردت اتراجع واصعد
بس الي شدني وخلاتي اوكف چان بيت علاء الباب مالهم مفتوح واضح هالشي
فز گلبي وتقربت فاتحة عيوني بكل وسعهم من شفتة طلع من البيت يتلفت
بلعت ريگي وخليت ايدي على گلبي...
.
يتبعع
ضيفو حساب الانستا وقناة التلي
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!