رواية الكسار (سلاسل الغوث) الفصل الخامس عشر 15 - بقلم لـ ميامي

وهي حيرهَ ، وجهي درتهَ
بس إحساسي شلون أديرهَ !

قراءة ممتعة
.........................................................

دموع:لبست ملابس المدرسة وطلعت من الغرفة للمطبخ شفتة مجهز الريوگ بدون اي كلمة كعدت اكل وهو كدامي بس يشرب چاي وعيونة علية

اليوم اداوم فاتني هواية دروس وهواية امتحانات ماعرف شلون حكدر اسيطر بس وعدت نفسي اكمل دراستي

من كملت ريوگ اخذت جنطتي وكمت
:توصلني لو يجي باهر؟

بس كلت هيج كور ايدة وكال بحدة
الكسار:وباهر منو حتى يوصلچ؟ امشي كدامي

مشيت واني وجهي ثگيل مثل الاسبوع الي فات خلصها يتوسل بية اسامحة واني باردة عبالك ما املك مشاعر ومينكسر خاطري عليه بس الي سوا بية مو قليل واسامحة

صعدت بسيارتة ورة وهو صعد وخلص الطريق يستغفر
مهتميت صرت اباوع للطريق متجاهلتة

وصلنة للمدرسة ردت انزل استوقفني صوتة
الكسار:اوكفي دموع

باوعتلة مستغربة شفتة طلع فلوس وحطهم بأيدي
الكسار:خاف تجوعين لو تشتهين شي

رفعت حاجبي بقرف اخذت الفلوس وشمرتهم علية
:ماريد منك شي بس اريد تعوفني بحالي

قبل ليجاوب تركتة ونزلت اريد ابچي وصلت لباب المدرسة شفتة بعدة واكف دخلت للمدرسة گوة لازمة دموعي

بس دخلت لصفي صارو يتحمدولي بالسلامة بسبب اخر حادث صار بالمدرسة واني اهز براسي اجاملهم

رحت لرحلتي وانصدمت من شفت رونق كاعدة ومنزلة الحجاب على حواجبها وتهرب نظراتها عني بس وجهة اصفر

كعدت بمكاني مصدومة هاي شمسوين بيها؟ صرت بدون قصد التفت واباوعلها واحسها تريد تبچي

من دخلت المُدرسة يلا انتبهت زين
امتحنتني اول امتحان واضح الكسار ناطيهم خبر اليوم اداوم

خلص الدوام وعناد بي طلعت انتظرة برة المدرسة اعرفة يتخبل يكول مايضل هتلي مايشوفچ بس اني اريد اعاندة اريد اتعبة

چنت اشوف اشكال الشباب يلعبون الروح عبالك قرودة
شفت سيارة الكسار اجت رحت امشييلة هو نزل عيونة بخشمة تقرب علية حط ايدة على كتفي يمشيني

الكسار:بنت الكلب مو اكلچ انتظريني بالمدرسة اني اجيچ

مجاوبتة ضغط على كتفي متت من الألم جبرني اصعد كدام وبس صعد انهد بية چنة ديچ اذا طلع صوتة ميسكت

الكسار:بنتتتت الكلب وتكول ليش اعصب لعد مو اكلچ ابقيييي بالمدرسة هذووول هتلية سرسرية الف كلمة يذبون عليچ الفففف واحددد تخيلچ اعرف عقول الزلم النگسة

خفت من صوتة يهرج هرج وصوت هورنات يمنة وورانة واسمع رجال يصيح

:حرك ياخييييي ساد علينة الطريييق

خفت من شفتة نزل معصب وراح يتعارك ويا الرجال راد يضربة لو ما فاككوهم الناس رجع علية معصب وضايج بقيت ساكتة وهو هم سكت حرك السيارة يفرك بصدرة ويدخن وكل شوي راد يدعمنة حسيت وضعة مو تمام تقربت اشتم بملابسة باوعلي مستغرب

الكسار:شبيچ؟

شميت ريحة شرب ابتعدت لعبانة نفسي
:متكدر تصبر لليل وتشرب؟ تريد تفشلني بمدرستي ولي أمرها سكير!!!

بس كلت هيچ زادت عصبيتة صار يسوق ويضرب الستيرن
الكسار:بنتتتت الكلببب تستنكفيييين منييييي اشرب من ضيمچ اشرب من وراچ انييييي

درت وجهي للجامة ادردم
:يشرب من وراية على اساس اني بطل عرگ

الكسار:لا تدردمين لا والله ارگعچ

سكتت واحنة الأثنين بارود صايرين بس احد يذب نار بينا ننشعل
وصلنة للبيت بس وكف السيارة نزلت صايرة نار بحيث دفرت باب البيت مدگيتة

انفتح الباب وصارت بوجهي سلوى عوجت وجهة وكالت
سلوى:لا هلا اكو واحد عاقل يدفر بالباب هيچ

عضيت شفتي بغضب وكلت
:سحير الليل توخرين عني لا والله ادفرچ ترة واصلة لهنا

تخوصرت وصارت تلعلع
سلوى:منوووو تدفرنيييي بلااااا ولچ انتِ نفخة مابيچ بعدچ زعطوطة لتخليني امدچ هنا واكسرچ تكسر

زادت الطين بله ذبيت جنطتي ورفعت اكمام القميص وتقدمت عليها ناوية اتعارك وياها

:شو تعالي خلي اشوف منو تكسرني چنچ خفاش معجز وماكاعدة وساكتة

بس كلت هيچ تقدمت تريد تضربني ودخل الكسار بسرعة لزمها من دشداشتها وهي خنست

الكسار:وين رايحة؟ تردين تضربين دموع؟ تردين اكسر راسچ سليوة؟

ردت بخوف
سلوى:هي راددتني وتريد تضربني ترة اني اكبر منها لازم تحترمني

تركها واجة وكف يمي يباوعلها بأشمئزاز
الكسار:سلوى كفي شرچ عن مرتي ترة ميصير خير ترة اني مخليچ علمود اخواني غير هيچ اطردچ احترمي اصحاب البيت افضل الچ

رادت تجاوب حط ايدة كدامها بمعنى اسكتي وسحبني من ايدي لفوك چان جسمة حار وصلنة لفوك تركت ايدة ورحت للغرفة

نزعت حجابي وكعدت على الچرباية اهز برجلي معصب مني ويدافعلي زفرت نفس بعصبية وكمت نزعت ملابس المدرسة بقيت بالداخليات باوعت للمراية وشد انتباهي جسمي

تقربت عليها وصرت الزم بجسمي فرحانة وزني نازل نزول واضح بس خدودي باقيات صح بعدني سمينة بس مو مثل قبل صرت اباوع على نفسي بأعجاب وفرح صرت افتر فرحانة واضحك واطفر عصبيتي تبخرت كلها

بأثناء ما دا اطفر سمعت صوت باب الغرفة انفتح بسرعة وكفت اغطي بنفسي شفتة واكف بالباب عيونة علية مصدوم

عطت بفشلة
:شبييييككك شلوون تدخل للغرفة بدون متدُگ الباببببب؟

وخر عيونة عني وصار ياخذ نظرة وينزل عيونة
الكسار:م مادري عبالي بيچ شي صوتچ واصل لبرة

:اطلللع اطللعععع

باوعلي يبلعم وطلع ميشوف دربة خليت ايدي على گلبي گلبي يدُگ سريع صح هو شايف كُلشي بس اني نفسيتي مدتتقبل يشوفني هيچ كبرت وجسمي كبر صرت اعرف الصح من الغلط

باوعت للمراية وصرت الطم على راسي صدري كلة طالع ركضت لبست ملابسي بسرعة وكعدت بالغرفة مثل المؤدبة

دقايق واندگ الباب واجة صوتة
الكسار:دموع ادخُل؟

كلت واني احك راسي
:تعال

فتح الباب ودخل وجهة تعبان كال بتعب
:جبتلچ غدة اكلي اني داخل انام عادي تكعديني بالأربعة؟

هزيت راسي بدون ما اجاوبة تنهد وطلع راح للغرفة الثانية صارلة اسبوع ينام بيها رفضت ينام يمي

رحت للمطبخ شفتة مجهز اكل ومي وعصير وعلاجي ابتسمت بحزن
:اذا عندك هالحنية ليش تأذيني؟

كعدت اكل بدون نفس واتذكر ايامنة چان ميقبل ياكُل اذا اني مموجودة وچان الوقت يخلص بس ضحك وهسة عبالك اغرباء

كملت اكلي واخذت علاجي ورتبت المطبخ شفت الساعة بعدها 3 ونص رجعت لغرفتي وكفت على الشباك اباوع للحديقة

ماعرف ليش كُل ما اباوعلها اتذكر وهيب وفرح يمكن لأن داتمنى هذا بيتنة وعايشين بسعادة

بقيت واكفة وقت طويييييل لحد مشفت غيث طلع يمشي بالحديقة ابتسمت من كثر ميحب الكسار صاير بكُلشي يشبهة حتى بالمشية

ماعرف ليش بس شفتة تذكرت الكسار باوعت للساعة وانصدمت من شفتها 4 وربع ركضت للغرفة الثانية فتحت الباب على كيف چانت الغرفة باااااردة بشكل والكسار يشخر تقربت علية بهدوء

:كسار كسار كوم الساعة 4

عگد حواجبة خليت ايدي على ظهرة العاري طلع شاب نار ويرجف كعدت بصفة خايفة واريد ابچي

:كسوري شبيك لتخوفني

فتح عيونة باوعلي وابتسم مد ايدة لخدي
:تشبهين الحنينة

:كسار انتَ مريض اتصل بالريس يجي ياخذك للطبيب

نزل ايدة عني وغمض عيونة
الكسار:تعبباااااان دمعتي

:اتصل عليهم ياخذوك للطبيب

صار يفتح بعيونة ويسدهم
الكسار:انتِ علتي يا دمعتي

صفنت بوجهة وهو يرجف بشكل مو طبيعي احتاريت شنو اسوي اذا انزل جوة سلوى تضربني وحتى متخليني احچي تلفونة بي رمز چان اتصلت على احد يجي ياخذة

مچان بأيدي غير اروح للمطبخ اسويلة كمادات اخذتهم ورجعت للغرفة چان نايم على بطنة احتاريت شلون اخلي الكمادات

حاولت ادفعة بكل قوتي واخيراً كدرت بعد ما انكسر ظهري
خليت كمادة على گُصتة فز وية فزتة گلبي انخمش چان نازع ملابسة ونايم بالشورت صرت اخلي كمادات على جسمة خليت على صدرة وعلى ايديه وعلى افخاذة وهو بس ينتفض

من الخوف صرت ابچي وهو يفتح عيونة يباوعلي ويرجع يسدهم اول مرة امر بهيچ موقف چنت كلة اني اتمرض وهو من يتمرض بسرعة يصير زين

صار يبچي ويخربط بالكلام وماكو بالسانة غير ثلاثة الحنينة حسن دموع يذكر بس هالأسماء وعيونة تصب احتاريت شنو اسوي بدون شعور صرت ابچي ويا چان يحچي بكسرة وصوت تعباااااان

الكسار:الحنينة ر راحت حسن راح ودمعتي تريد ت تروح محد يريدني اهلي نفسهم مايردوني

خليت ايدي على راسة احچي بأذنة
:كسار حباب اكعد لتخوفني عليك

صار يبچي ويشهگ انصدمت اول مرة اشوفة هيچ رغم قوتة وصلابتة حسيتة مثل الطفل الي تركتة امة وحيد او بالأحرى اكتشفت اكو بداخل الكسار طفل مهزوز

صرت اسويلة كمادات لحد منزلت حرارتة وجسمة هدئ نام على جنبة يحاول يباوعلي بس ميكدر يفتح عيونة  خليت ايدي على راسة العب بشعرة چنت كاعدة بالأرض وساندة نفسي بالچرباية

مر هواية وقت هو واضح ارتاح نام وصار يتنفس طبيعي ارتاحيت حطيت راسي بصف راسه وغفيت مطمئنة

چان وقت صعب خفت يصيرلة شي اني وين اروح برغم چانت صخونة عادية بس هم خفت اذا راح وتركني اضيع حتى لو أذاني ما اكدر انكر فضلة علية لو غيرة سواني زوجتة من ساعة الي اخذني بيها لو غيرة چان نسيت الدراسة نسيت دلالة

بعد فترة كعدت من النوم گوة فاتحة عيوني باوعت لمكانة ملگيتة عگدت حواجبي وصرت ادور بأرجاء الغرفة ماكو مموجود

لحد ما انفتح الباب ودخل يطوطح وشعرة مبلل بسرعة طفرت اتلمس صدرة
حرارتة نازلة

:الحمدلله حرارتك نزلت

باوعلي بذبول وكال بصوت تعبان
الكسار:شكراً لأن اهتميتي  بية واني مريض

كال هيچ وكعد دايخ خليت ايدي على كتفة وحچيت بهدوء
:شسمة عادي تتصل بباهر او الريس او اي شخص ياخذك للطبيب احسك مو بخير وجهك تعبان

الكسار:ماكو داعي روحي نامي انتِ تعبتي

زفرت نفس بضيق وكعدت كدامة لازمة ايدة
:اني منسيت اي شي وبعدني مراضية عليك بس اني هم خايفة عليك واريدك تكون بخير لتفكرها شفقة انتَ هماتين چنت تهتم بية واني مريضة حتى چنت تسبحني وتمشطلي وتسويلي اكل ومترتاح اذا مصرت زينة اذا فكرت مجرد تفكير معاملتي الك دافعها الشفقة ف انتَ هم چنت تهتم بية لأن دتشفق علية

ابتسم گوة فاتح عيونة وحط ايدة على راسي يلعب بشعري
الكسار:ماكو بحنيتچ انتِ اعرفچ

كمت وسحبتة وياية
:لعد اتصل بيهم وروح للطبيب ممتعودة عليك تتمرض وتضعف هيچ

كام وهز راسة بهدوء
الكسار:علمودچ ادخل للنار وماخاف

نزلت راسي وهو اخذ تلفونة مادري على منو اتصل
الكسار:هلا اخي شلونك
تكدر تجيني؟
لا بس شوي تعبان ومرتي متقبل ما اروح للطبيب
اي بعد تعرف دموع حنينة
يلا لتتأخر انتظرك

سدة وصار يلبس بملابسة
الكسار:تريدين اجيبلچ شي وياية؟

هزيت راسي بلا سكت وكمل يلبس حتى وهو رايح للطبيب لبس ساعتة ومحبسة لا شعورياً كلت

:وين اكو مجرم يكشخ هيچ

ضحك بتعب يباوعلي
:عادي اني مجرم كشاخ

حكيت راسي اباوعلة بفشلة لساني مينلزم صايرة ماكدر اتحكم بي
كمل لبس ورش عطر وطلع من الغرفة واني ورة يوصي بية

الكسار:كعدي بالغرفة وقفلي الباب عليچ لتفتحي لأحد اني اجيبلچ عشة واجي انتبهي على نفسچ من الكهرباء والدفاية طفيها اخاف تحترگين

بقيت اهز براسي وهو قبل لينزل باوعلي وابتسم
الكسار:عادي ابوسچ؟ بخدچ مو بغير مكان

نزلت راسي وهو افتهم رافضة كال بهدوء
الكسار:براحتچ يلا اني رايح

نزل يتنهد واني ركضت للغرفة قفلتها علية هاي سحير الليل متتأمن ولو البيت كلة ميتأمن بس غيث احسة عاقل بيهم

كعدت بالغرفة ضايجة اريد اتعلم اصلي بس منو يعلمني عبالك كلها كفار استحي اطلب من احد شيكول علية هسة يلا تذكرت ربها

انوب جعت ولا اكدر اطلع من سليوة مادري شبيها نشبت وياية احتاريت شنو اسوي كمت للكنتور اجرب ملابسي صرت انزع والبس داريد البس غير شي ولفت انتباهي كيس متوسط الحجم طلعتة من الكنتور مستغربة

واستغربت اكثر من فتحتة سيتات نوم مختلفة الانواع والالوان ضربت على خدي

:هذا بس لا يطلب مني شي

طردت هالتفكير من راسي وبسرعة لميتة خايفة ورجعتة لمكانة ورجعت ملابسي بمكانهم

كعدت على الچرباية افكر
اني والكسار؟ شلون نرهم هو يريدني بس اني ماريدة لأن يريد جسمي بعيداً عن اعتبرة مثل أب الية بس هو اكبر مني ديطلع شيب براسة صح ميبين عليه بس شنو يجبرني ابقى وية شخص عمرة يمكن فوك الثلاثين واني بعدني 17 سنة شنو يجبرني اسلمة نفسي واصيرلة زوجة

مرات افكر بحالنة هيچ شنو حيصير لو الكسار اعتبرني زوجة من البداية شلون حتكون حياتنة هم هيچ مشاكل ويهتم لأمري لو لا مجرد بالفراش يذكرني

هزيت راسي طاردة هالتفكير من راسي
بس گلبي يلعب لعب قررت اسوي نفسي مشفت شي

مرت ساعتين بين التفكير والخوف
اندگ الباب كمزت

:منوووو؟

الكسار:اني دموع تعالي

تنفست براحة وكمت فتحت الباب شفتة واكف بالباب ملامحة باردة

:ها شلونك هسة؟

الكسار:زين مابية شي تعالي اكلي

مشة كدامي واني مشيت و اباوع لأكتافة چانو عريضات من يمشي عبالك النمر الاسود

عيوني على اكتافة فجأه وكف واني ارتطمت بظهرة ابتعدت احك براسي وهو التفت يباوعلي مستغرب

الكسار:شبيچ بس لا دايخة؟ شنو عديتچ

:هاا لا بس دامشي وراك وانتَ وكفت فجأه

هز راسة ساكت دخلنة للمطبخ صار يفتح بالأكياس الي جابهم انتبهت ايدة بيها كانونة

:شنو طلع بيك؟

الكسار:مابية شي بس فلاونزة وضغطي نازل عادي

رفعت نفسي خليت ظهر ايدي على رگبتة اقيس حرارتة
:چانت حرارتك حيل مرتفعة بس هسة زين

ابتسم ابتسامة جانبية وگرص خدي
الكسار:شنو تخافين علية؟

وخرت عنة ورحت افتح الاكياس
:اكيد اني ما انكر جميلك علية

سكت مبتسم وكعد كدامي
الكسار:اكلي حبيبتي اكلي

كعدت اكل وهو اكل لگمتين وكام مبين كُلش تعبان
من كملت رحتلة للغرفة شفتة نايم تركتة ورحت لغرفتي هم نمت

كعدت على صوت الكسار يكعد بية
الكسار:يلا كومي مدرسة عندچ امتحانين

فركت عيوني وكلت بنعس
:دوخر لك اريد انام نعساااااااااااانةةةة

جرني من ايدي وكومني يدفع بية للحمام دخلني وسد الباب ردت ابچي ومن النعس بدل لا اغسل وجهي نزعت ملابسي وسبحت واسمع الكسار يصيح

الكسار:راحت سبحت هاي ولچ تأخرتيييييي

استوعبت دا اسبح فتحت الباب ومديت راسي ميتة ضحك على نفسي شفتة متخوصر

::مادرييي بنفسي وسبحت عود دا اغسل وجهي

هز ايدة وكال
الكسار:نظيفة بنت الوصخ رايح اجيبلچ ملابس واجي

شفتة راح سديت الباب اضحك على نفسي شوي ودگ الباب فتحتة واخذت الملابس من ايدة البس واسمعة يدردم

الكسار:ولچ تأخرتي طلعي راح اشعل وانعل؟

:دووووكف طلعت يعني اطلع مصلخه

الكسار:اي عادي طلعي لا عيب ولا حرام

سكتت عنة لبست وطلعت خزرتة
:شبيك متصبرررر؟

الكسار:روحي لبسي يلاااا

ركضت للغرفة لبست ملابس المدرسة ومشطت بسرعة اخذت جنطتي وطلعت لگيتة بوجهي بدون اي كلمة انطاني لفة وچاي

الكسار:هاي اكليها هسة وراح اخليلچ وحدة بجنطتچ هم اكليها امشي يلا

نزلنة نركض وصعدني بالسيارة وساق بأقصى سرعتة واني اكل ممستعجلة بگدة

وصلني ونزل وياية اخذني لصفي يلا راح وهم مر الوقت عادي امتحنت امتحاناتي وارتاحيت

اجة رجعني للبيت طول الطريق ساكت
مر اسبوع وبيناتنة برود فضيع صار حتى قليل يتواجد بالبيت يجي بس ينام ويجيب اكل ومرات حتى مينام هنا

اليوم جمعة وهو موجود چنت كُلش حابة اصلي بس ماعرف شنو اسوي ولمنو اروح مچان عندي غيرة رحتلة خجلانة دگيت الباب وسمعت صوتة

الكسار:تعالي دمعة

فتحت الباب ودخلت چان ناثر اوراق كدامة ويكتب
:عادي احچي وياك؟

عدل كعدتة وكال
الكسار:اكيد تعالي اصلاً اني وقتي بس الچ

ابتسمت ورحت كعدت كدامة افرك بأيدي وهو منتظرني احچي
الكسار:احچي حبيبتي محتاجة شي؟ تردين فلوس لو مريضة شبيچ؟

حكيت راسي وكلت
:اريد اصلي بس ماعرف شلون تعرف احد يعلمني؟

ابتسم وصار يمسد على راسي
الكسار:اكدر اعلمچ اني بس طائفتي تختلف عن طائفتچ ماكدر اعلمچ صلاواتنة

:يعني احنة من طوائف مختلفة؟

الكسار:اي بس اني الحنينة چانت نفس طائفتچ

:لعد شلون اريد اصلي؟

حط ايدة على فكة يفكر دقايق وكال
الكسار:حبيبة باهر

كلت بأستغراب وفضول
:شنو يا حبيبة هاي؟

باوعلي بنظرة شك وبخزرة غيرت سؤالي بسرعة
:شبيها؟

الكسار:نفس طائفتچ اشوف باهر يخليها تحچي وياچ وتعلمچ

:كسار استحي

الكسار:ماكو داعي للخجل دموع انتِ مو تردين تتعلمين ماكو غير حل

صفنت شوي وهزيت راسي
:موافقة خابرة هسة؟

ابتسم وگرص خدي
الكسار:هسة انتِ صرتي المؤمنة الگو**

مديتلة لساني رفع التلفون خابر باهر بسرعة رد واجة صوتة يلعلع

باهر:هلاااا بمكسرات دميعة هلاا أمر خدمة

الكسار:هلاا حبيبي شلونك مطي

باهر:حبيبي ومطي مترهم عزيزي البغل

الكسار:على اساس انتَ كحلتها هسة المهم اكلك اريد حبيبتك ت...

قبل ليكمل كلامة عاط باهر
باهر:ولككككك شتريييييدددد منننن حبيبتيييييي عيننننكككك عليهاااا هاااا

ضحك الكسار وجاوبة
الكسار:بالك فد نگس مثلك تريد اذكرك بوفاء الحفافة؟ لو بسناء

باهر:هذول ماضي وحدة تزوجت والثانية تطلگت اني حاضري حبيبتي

الكسار:هسة انچب انتَ وياها اسمع دموع وحبيبتك نفس الطائفة مو صح؟

باهر:اي والمطلوب

الكسار:تعرف تصلي حبيبتك لولا؟

باهر:اكيد قابل يهودية

الكسار:تكدر تعلم دموع الصلاة؟

كال بدون تفكير
باهر:فد مطي انتَ لعد مو ام سلمان نفس الطائفة مال دموع وهاي هي يمي

الكسار:اييي رحم الله والديك جيبها خلي تعلمها اذا تكدر

فزيت من صاح
باهر:امممم سلماااااااااننن تعالي حبيبتي خالة

جابها ومكالت شي صارت تعلمني والحمدلله ذاكرتي قوية بسرعة حفظت كلشي فد ارتاحيت من تعلمت صرت اصلي صلواتي بوقتها وبوقت فراغي اصلي الي فاتني چان شعور كلش حلو حتى نفسيتي ارتاحت

مر اسبوعين واحنة على نفس الحال يحاول يصالحني بس اني مداكدر اسامحة

الييوم چنت كاعدة بالغرفة ادرس امتحاناتي قربت
فزيت من انفتح الباب ودخل مبتسم وبدون ليدُگ الباب باوعتلة بأستغراب وكلت

:شبيك؟

سد الباب ودخل مادري شنو حاط ورة ظهرة
الكسار:جبتلچ شي

:شنو؟

طلع من ورة ظهرة بلورة وردية وابتسمت واخذتها من ايدة
:الله كسار هاي اشوفها بالمسلسلات وهاي

حط ايدة على شعري فرحان على فرحي
الكسار:منتبه عليچ مرات من تشوفيهم تكولين الله دورت ام الثلچ وملگيت لگيت بس هاي

:شكراً كسار كُلش حلوة

اخذها من ايدي شغلها وصارت تفتر وتطلع موسيقى متت عليها بقيت اباوعلها واصفگ رفعت راسي شفتة يباوعلي مبتسم

الكسار:شگد احبچ من تضحكين

برطمت شفايفي وكلت
:لعد ليش تحب تزعلني اذا هيچ

جاوب بتنهيدة
الكسار:غبي

اجة كعد يمي ولزم ايدي يبوس بيها
الكسار:لا اسف تفيد ولا هدية تصلح الي صار بس اني اشتاقيتلچ دمعتي بگد رحمة الله مشتاقلچ مشتاق احضنچ ابوسچ اشمچ مشتاق لصوتچ وانتِ تلحين علية ومشتاق لنومتچ بحضني

:انتَ اذيتني

حط رگبتة بوجهي وكال
الكسار:رگبتي گبالچ ذبحيني وأذيني اني رگبتي بين ايديچ

:اعرفك حترجع تأذيني كسار

رفعت الدشداشة عن رجلي وشوفتة اثار الضرب الخفيفة
:شوف اثارك بعدهم مكفاك تعيرني صرت تضربني وكلة بجهة ومن خليتني اصدگ انتَ اعتديت علية بجهة چان هالموضوع قاتلني

حط وجهة بأيدية يتنفس
الكسار:چان راح ياخذچ مني اعرفة يسويها اضطريت اكول هيچ

:ليش تخاف من عندة؟

رفع راسة يباوعلي بحيرة
الكسار:اخاف عليچ مو من عندة اذا اخذچ معناها الكسار انتهى بحياتچ ودموع تبقى حسرة بگلب كسارها

بچيت ودفعت ايدة عني
:لعد ليش ضربتني؟

ضرب على راسة بندم
الكسار:چنت شارب هالسم

باوعتلة بتفكير وحچيت منتظرة ردة فعلة
:اسامحك بمقابل تترك الشرب؟

بدون تفكير هز راسة وكال بلهفة
الكسار:اتركة اصلاً تركتة من أذيتچ لليوم

:واذا شربت؟

ابتسم بكسرة وكال
الكسار:اذا شربت معناها انتِ مموجودة بحياتي

:شنو يعني؟

الكسار:ماكو شي وهسة متصافين؟

هزيت راسي بأيجاب بسرعة حضني ملهوف عصرني بحضنة عصر اريدة يوخر وماكو

الكسار:بعد ما اضربچ ولا اشرب ولا ازعلچ وعد مني

ابتعد وصدمني من رفع الدشداشة وصار يبوس بمكان الاثار بسرعة دفعتة وتغطيت

:شبيييييكك

الكسار:ابوس الواوا شبيچ لعد هيفاء شكالت مو كالت بوس الواوا

رفعت حاجبي اهز بأيدي
:الواوا طابت من زمان هسة تذكرت تبوسها

ضحك بصوت عالي وسحبني اخذني للكنتور وصار يطلعلي ملابس ماعرف لشنو طلعلي بنطرون وقميص طويل ونسق وياهم شال

الكسار:لبسي على ما اروح اسبح واجي

:وين نروح؟

الكسار:لبسي ومعليچ

هزيت راسي وهو طلع لبست بسرعة وشالي وكعدت انتظرة مر نص ساعة واجة مبدل وعطرة يمشي ورا وبيدة كيس بدون اي كلمة طشر الي موجود بداخلة على الچرباية بقيت صافنة چان كلة مكياج عطور باوعتلة وكلت

:بس اني ماريدهم

سحبني من ايدي مبتسم اخذ مرطب بي لون وصار يحطلي وبعدها حط مورد خدود لخدودي وكال

الكسار:زدتي جمال فوك هالجمال شوي شوي على گليبي

ابتسمت خجلانة وهو صار يشوفني الباقي
الكسار:شوفي هاي كلهم الچ بس ماريد تحطين من نطلع تعلمي بالبيت وخلي بالبيت

هزيت راسي بأي فرحانة ضحك ورشلي عطر وسحبني لازم ايدي نزلنة وشفنة العائلة الكريمة كلها متجمعة تقرب همس بأذني

الكسار:ارفعي خشمچ الحلو

رفعت راسي بثقة عض شفتة ورجع اردف
الكسار:ميلوگلچ غير رفعة الخشم بوية

ابتسمت وطلعنة كدامهم صعدنة بالسيارة وطول الطريق نغني ونضحك صار شهر مضاحكين هيچ او بالاحرى صار شهر محد حاچي ويا الاخ بشكل طبيعي كلامنة بس ع گد السؤال والجواب صح مرات يجي ويحجي وياية بس اني ما انطي فرصة

نزلنة كدام مطعم لزم ايدي ودخلنة
الكسار:اليوم راح افرچ بغداد فر نروح للألعاب واي مكان تردي

هزيت راسي وطلبنة وصرنة ناكُل ونسولف وهو يباوعلي بنظرات ماعرف افسرها شنو

الكسار:تدرين بهالشهر احس روحي لايبة عليچ لوب كُلشي راح عني حضنچ ريحتچ صوتچ حتى عيونچ استخسرتي علية اشوفهم

:تستحق واكثر كسار ترة اني انسان انتَ ضربتني ضرب حتى الحيوان ميقبلة على نفسة

الكسار:حقچ بس اوعدچ متتكرر صدگيني اني انسان واغلط وهسة داصحح غلطي

هزيت راسي بقبول مچان بيدي شي غير اقبل
اني احكمها بالعقل اذا مل مني وطردني وين اروح؟ اصير طعم للرايح والجاي اني محد الية غيرة

نحيا غُرباء ونموت غُرباء

اخذني للمدينة وماخلة لعبة مصعدني بيها بس اللعبات الخطرات رفض اصعدهم چان بس يضحك ووجهة مورد

من صارت الساعة 12 يلا رجعني للبيت اطوطح من التعب والنعس دخلنة للبيت وصعدنة فوك وانصدمنة من شفنة سلوى وزوجة عمة فوك بيديهم اوراق تقرب عليهم معصب

الكسار:هاي شنو الاوراق؟

جاوبت سلوى تتراجف
سلوى:ها اوراق علاجاتي ردت اجي انطيهم الك تجيبلي

حط ايدة على فكة واردف مستهزء بيهم ومادري شلون سحب الاوراق من ايدها هي شهگت خايفة وهو يقرة ويضحك من كمل قراية شگگهم وكال

الكسار:عندي الف نسخة من هالاوراق الي كدامچ مزقتهم والأصلية ضميتها بمكان بس الله يعلم بي بس اريد اعرف اذا اخذتي اوراق البيت شنو راح تستفادين؟ تريدين تزوريهم مو

بقت ساكتة ومبينة تريد تبچي تقرب عليها لزمها من ملابسها
الكسار:انتِ شبيچ شو احسچ مراهقة بدون عقل ماكافي تاركة ضلع من ضلوعچ المفروض انتِ مخلصتها بچي عليه بس شترجى من وحدة مثلچ ماعرف ابوية ششاف بيچ وفضلچ علينة اني وامي

دفعتة ونزلت تركض وزوجة عمة رادت تركض وراها لزمها وحچة بحدي الكسار:شوفي يالمنقطة انتِ سمچ اقوى من سم سحير اليل سليوة كفي شرچ عني لا وحق هو الله ما احسب حساب حتى لعمي واطردكم برة البيت

رادت تحچي بس حط اصبعة على حلگة وكال بغضب
الكسار:اشششش ولا كلمة نزلي وما المحچ هنا بعد

تركها ونزلت تركض واني بمكاني مصدومة چان عبالي النسوان الكبار بالعمر هادئات وحبابات بس ايقنت ماكو احد حباب

سحبني للغرفة معصب ويدور بالغراض مالاتة
الكسار:خرببببب اني شلون نسيت ماقفلت الغرففف شلون راح عن باااالييي

بقيت واكفة اكل بأصابعي خايفة احچي ويعصب علية من انتبه علية باوعلي وصفن مثل الي تذكر شي ابتسم وتقدم علية مادري شنو طلع من الكنتور واجة ناسي كلشي

الكسار:اسف خوفتچ هاي جبتلچ شي هدية الصلح صح قليلة بحقچ بس المهم تعجبچ

:بس اني ماريد شي منك خلص تصالحنة مو لازم تهديني

چان بيدة علبة خلاها على الچرباية وتقرب علية ينزعني حجابي
الكسار:مو من قيمتچ صدگيني انتِ غالية علية راح البسها الچ متأكد تطلع تجنن عليچ من شفتها حسيتها مكتوبة بأسمچ

رجع اخذ العلبة وطلع منها گلادة ذهبية بيها 7 حبات تقرب لبسها الية وكال

الكسار:يلوگ الذهب للذهب

باوعتلة مبتسمة
:تجنن كسوري

غمض عيونة وعض شفتة
الكسار:يا عيون كسورچ دمعة عيوني

:شكراً اليوم هواية فرحتني

گرص خدي وباس اصبعة
الكسار:عيونچ تستاهل بس الفرح

بقيت اوزع ابتسامات رجع كال بتوسل
الكسار:اكدر انام هنا اليوم؟

بس كال هيچ ابتعدت مزعوجة
:وحترجع لحركاتك القديمة بوس وهاي السوالف

حرك ايدية بسرعة
الكسار:لالا والله بس انام يمچ وتنامين على صدري والله ماضايگ النوم صار شهر ومن انام ما ارتاح بنومتي ماسوي اي شي يزعجچ

:واذا سويت شي؟

الكسار:ضربيني وزعلي مني زعلچ اكبر عقاب بالنسبة الية

:تمام بس اي شي غلط يصير سچينة بگلبك اموتك بيها

عض شفتة مبتسم
الكسار:ماكو داعي بس باوعيلي بچتالاتچ بالنظرة الي احبها واموت

كل شوي يذبلة كلمة يخجلني بيها اخذت ملابس ورحت للحمام ابدل بين المزعوجة والفرحانة

لبست ورجعتلة شفتة منتظرني وهالمرة لابس تراك اعرفة يكره ينام بملابس بس مبين خايف يزعجني بعد ما الية حجة ارفض استسلمت للأمر الواقع بس واثقة منة اعرفة ميسوي شي

مدلي ايدة رحت لزمتها خجلانة تمدد وسحبني تمددت بصفة وراسي على صدرة بس صار راسي على صدرة عاط

الكسار:اخخخخخ يابويةةةةة صار شكد ممرتاح ولچ اني راحتي بس يمچ

بقيت ساكتة وهو ايدة تصعد وتنزل على شعري
الكسار:مشتاقلچ دمعة هم اشتاقيتيلي؟

هزيت راسي بلا قهقة بخفة
الكسار:حقچ حبيبتي

سكت واني نعست نمت بسرعة تعبانة وهو ماعرف اذا نام او كعد
چان التعب مسيطر علية دراسة وطلعة اليوم كلهم تعبوني

ماعرف شكد مر وقت كعدت ارجف من البرد شفت الغرفة ضلمة تلمست مكان الكسار ملگيتة موجود عگدت حواجبي بأستغراب

:وين راح؟

كمت على كيفي خايفة تطلعلي سليوة فتحت الباب شفت المكان كلة ضلمة بس الغرفة الي چان ينام بيها الكسار بيها ضوة ومفتوح بابها تمشيت على كيف ردت ادخل بس وكفت من سمعت صوت مألوف يكول

:غوث مداكدر تعبت ارحموني

يجاوبها بحدة
الكسار:شنو المطلوب مني اني؟

مديت راسي اباوع للغرفة انصدمت من شفت الكسار وكدامة روان تبچي

روان:زوجة ابوك دتعيرني بالي صار وانتَ كلت محد حيفتح حلگة وياج

الكسار:روان روحي نامي شغلي وياها باچر

شفتها تقربت علية وتبچي
روان:ليش متعترف وتريحني؟

صفنت بشنو يعترف ضاق نفسي وصار الشيطان يلعب براسي
شفتك فرك وجهة ممرتاح

الكسار:مو وقتة روان موووو وقتة

روان:لعد شوكت والله تعبت اني داموت شوكت تعترف غيث ابن...

رادت تكمل وقاطعها يرجف
الكسار:اشششش لحد يسمعچ اشششش غيث ابو مات وبس

صرت ارجف واتمنى أطلع فاهمة غلط روان صارت تلطم على وجهة

روان:انتَ مهتمممم بسسسس بدموووعععع نسييييييت امك ونسييييت حسن نسيت الكل ومتذكر دموووووع لككك غوث غيث ديكبررر

عض اصبعة يتنفس سريع
الكسار:چاااانتتت غلطةةةة رواااان سكتييييي

رادت تحچي وصارت عينها علية حطت ايدها على حلگها وكالت بصوت مهزوز

روان:د دموع؟

بس نطقت اسمي باوعلي الكسار فاتح عيونة على وسعهم واني ارجف واحس النفس مديوصلي تقرب علية يلهث

الكسار:دموع بس اهدئي حتى افهمچ كُلشي

خليت ايدي كدامة وكلت بصوت يرجف ودمعتي نزلت
دموع:كسار غيث ابنك؟......

..يتبعع..

توقعاتكم؟

.
.
.
.
.
.
.
.
.
.

7000كلمة مثل ما وعدتكم مو تكولون قصير داده ارميكم وانتحرررررر🙂😂

البلورة الي اشتراها الكسار لدموع تعالو للتلي حنشر فيديو واضح الها

ضيفو حساب الانستا

وقناة التلي

اللهم صلِ على محمد والِ محمد 🦋

مها ال عبدالله