رواية الكسار (سلاسل الغوث) الفصل الثامن وثلاثون 38 - بقلم لـ ميامي

ردنه نعيش ضحگه والزمن ما راد
وبدلنه الضحك بالبچي وما عشنه!
وردنه
نموت سگته والزمن ما راد
مدري شراد!
لا عشنه ولا متنه
وردنه
نگوم گوه وماگدرنه نگوم
وصرنه حلم والعوز چتفنه
وگالوا
بأول الخمسين ويبدي الشيب
وكبل لا نوصل العشرين شيبنه

قراءة ممتعة 🤍
...........................................................

دموع:اختفى صوتي وصوت انفاسي مصدومة من الي اسمعة الكسار يحب وحدة؟ يحبها واني على ذمتة وحامل بأبنة؟

صرت استرجع ذكرياتي من اول يوم شفتة گلبي احسة يريد يوكف

اني ما احبة هو مجرد الشخص الي رباني وهو ابو ابني بسسس بس ليش گلبي ديحترگ! ليش احس النار شبت بضلوعي ليش احس روحي تريد تطلع مني

رفع راسة من رگبتي وصار يتلمس عيوني واني حتى مرمشت اريد اشوف وجهة وهو يحچي

الكسار:عيونها كبااااار و ومن تتضحك تصغر ع عيونها چنها ملاك

نزل اصابعة بهدوء لشفايفي وعيونة تنسد وتنفتح
الكسار:شفايفهاا م مينشبع منهم ككل يوم ابوسها ا احبها

وخر عن شفايفي الي ترجف ونزل لرگبتي صار يحرك اصابعة على حنجرتي باسها بعمق وابتعد يحچي بخفوت

الكسار:صوتها ححياة ثاانية اتمنى ي يدفنوني بحنجرتهاا

مكدرت اتحمل دموعي نزلت والكسرة الي بگلبي بس الله يعلم بيها روحي دتحترگ احسة ديسحب انفاسي مني بكلامة

دفعتة عني نام على ظهرة يتمتم بكلام ممسموع تركتة وطلعت للصالة ارجف من القهر حتى لو بيناتنة زعل الخيانة صعبة وخصوصاً اني حامل

وچان يكول يحبني! أي حب يسمحلك تخون؟

تمددت بالأرض صافنة بالفراغ عرفت هسة ليش يريد ياخذ الطفل حتى يحرمني من عندة ويخلي الي يحبها تربي

مكدرت انام ابد امسح بدموعي وترجع تنزل حتى دموعي تعاندني من قهري احتاجيت احچي ويا شخص خفت اموت من الكتمان خفت اموت من حرگة گلبي

كمت امشي بخطوات مهزوزة ورحت للحديقة چانت الشمس دتطلع اخذت مي ورحت للتراب سويت طين ورجعت للبداية

سويت هيكل لفرح والثاني لوهيب ورجعت اتخيلهم واحچي وياهم

لزمت وهيب واتلفت خايفة
:وهيب اريد يمك م محد يحبني صدك غيرك اخذني اني وابني؟ هنا ماكو شي حلو بس ابچي تعبت گلبي يأذيني احس اني حموت

تركتة ولزمت هيكل فرح
:زين فرح اخذيني يمچ اريد ارتاح

بقيت احچي واحچي هوااااية كلام احچيلهم وكأنما موجودين كدامي انمليت ملي طين كمت عنهم عبارة عن جليد يمشي مسويت اي شي دخلت للحمام فتحت المي وصرت اوكع الطين مني

رجعت لرشدي من اجاني ألم قوي ببطني حسيت احشائي دتتگطع كعدت بالأرض اعض ايدي واحاول اتحمل الألم وبس صوت وناتي ينسمع حسيت ابني حيطلع خفت ومن خوفي كعدت وفتحت رجلية منتظرة الطفل يطلع

ربع ساعة واني اصارع هالوجع لحد ما تلاشى شوي شوي انتچيت على الحايط اتلمس بطني عبالي ولدت

نضفت نفسي واني كاعدة احس رجلية ميحملني
فزيت من انفتح الباب ونزلت راسي من شفتة دخل شعرة مخربط ركض علية يمسح وجهي

الكسار:ليش كاعدة شبيچ تعبانة؟

مجاوبتة راح جاب منشف واجة كومني لف المنشف على جسمي وطلعني يمشيني بحذر دخلني للغرفة وگعدني على الچرباية وجابلي ملابس يريد يلبسني بس دفعت ايدة وكلت بهدوء

:اطلع اني البس ممحتاجتك

عگد حواجبة مستغرب وخر عني رافض يطلع تجاهلت وجودة ولبست وبعدها مشطت كل هذا وهو واكف متكتف محتار

كملت ورحت للچرباية نمت وغطيت راسي
:قبل لتطلع طفي الضوة

حسيتة كعد يمي ثواني ورفع البطانية عني
الكسار:وجهچ اصفر تحتاجين طبيب؟

حچيت واني مغمضة عيوني
:احتاج عدم وجودك يمي

الكسار:دموع شبيچ مللتيني بروحي

فتحت عيوني بغضب وكلت بحدة
:اطلع عني روح اسبح خلي يروح هالسم من راسك وخلي توكع قذارتك منك

شاطت عيونة معصب تقرب علية عبالك يريد يفترسني
الكسار:يااااا قذارةةةة شبيييييچ

ابتسمت بأستفزاز ومشيت اصبعي على صدرة
:ماعرف انتَ تذكر؟ منو چانت نايمة هناا؟ شفايفك باست منو؟

ضل صافن بوجهي وعاگد حواجبة
الكسار:شبيچ شدتكولين!

رجعت غطيت راسي وحچيت بكل برود
:اطلع عني اريد انام

كام معصب طفة الضوة وطلع سد الباب بكل قوتة
واني بدون أي تفكير استسلمت لملجأي الوحيد النوم نمت هواية اكعد وارجع انام

اخر شي الطفل كعدني دفرني دفرة ببطني وكأنما يكول كعدي كافي نوم فتحت عيوني اتلفت شفت الكسار نايم يمي وحاط ايدة على بطني بسرعة دفعت ايدة وكمت طلعت

رحت للحمام غسلت وبعدها للمطبخ شفتة جايب اكل بس بارد حميتة وكعدت بالصالة اكل مهامني شي لحد مشبعت تمددت بمكاني اباوع للتلفزيون

على صوت التلفزيون طلع
الكسار:ها شلون صرتي؟

مجاوبتة ولا حتى باوعتلة بكل برود كمت لازمة ظهري ورحت للمطبخ سويتلي عصير ورجعت شفتة على نفس وكفتة اخذت تلفوني وصرت اتابع باليوتيوب وحتى ممهتمة لوجودة وهو راح للغرفة غير ملابسة وطلع من البيت معصب

من هاليوم صرت كتلة من الجليد كلامنة قل بس سلام بيناتنة وهو كثرو مخابراتة وطلعاتة صرت احسب يوم عن يوم لولادتي حتى اخذ ابني واتركة يتزوج براحتة

اليوم كاعدة اخابر سيدرا نسولف ستوني سديتة ودخل مبتسم كعد كدامي يدخن

الكسار:اليوم دخلتي بالتاسع؟

هزيت راسي توسعت ابتسامتة وكال
الكسار:نروح نجهز؟ اليوم لو باچر شنو رأيچ

حطيت ايدي على بطني وكلت بتنهيدة
:روح انتَ اني ماريد

اختفت ابتسامتة وكال
الكسار:ليش؟ لازم وياية هذا ابنچ هم

بقيت ساكتة كام واجة كعد يمي مستغرب وضعي
الكسار:شبيچ صار ايام وهذا وضعچ احس اكو حزن چبير بداخلچ شكو بابا

بس كال بابا احس گلبي رفرف بسرعة باوعتلة ابلعم
:مبية شي

تركتة ورحت للغرفة اسحل بنفسي سحل
صار ايام لا ابچي ولا عندي مشاعر اصلاً عبارة عن جسد يمشي ودوم يسألني واني ما انطي جواب واضح

ثاني يوم راح جاب اشياء بسيطة للطفل كعد يشوفنياهم ومتحمس هواية
الكسار:شوفي هذا من تطلعين من المستشفى يلبسة وهذا اذا طهرنا شوفي حلو لو نغيرة

اني بس اهز براسي اجاملة
الكسار:شوفي هذا فد حلو اكو مال بنات هم

قاطعتة وكلت بصوت يرجف
:كسار شوكت نطلگ يعني شكد بعد ولادتي؟

لانت ملامحة يباوعلي ويبلعم مجاوبني كمت گلبي يدُگ سريع وارجف بشكل مو طبيعي والحزن واضح بوجهي

حسيت ايدي انلزمت وكفت بمكاني منزلة راسي وكف كدامي ورفع راسي صارت عيوني بعيونة حاوط وجهي وكال بهدوء

الكسار:مُصرة على الطلاق؟

هزيت راسي بأيجاب والغصة مچلبة ببلعومي تقرب اكثر جسمة يرجف
الكسار:يصير اعرف ليش؟

دفعت ايدة عني وابتعدت خطوتين
:هذا چان الاتفاق بس اولد ننفصل

لزم ايدي حطها على گلبة
الكسار:يعني تردين الطلاق متأكدة دموع

هزيت راسي شفايفي ترجف
:نتطلگ وروح تزوج الي تحبها

تركني ممستوعب ونطق بصدمة
الكسار:الي احبها؟؟ منو الي احبها؟

ضحكت بكسرة وباوعتلة
:ام عيون كبار؟ الي من تضحك يختفون عيونها نفسها الي متكدر تشبع من شفايفها

صفن بوجهي وتقرب عصر شفايفي
الكسار:يعني انتِ

دفعت ايدة ابچي
:لا مو اني هاي حبيبتك الي كل يوم تبوسها والي احلى مني لتضحك علية خلص طلگني وتزوجها

ابتسم وسحبني لحضنة
الكسار:تذكرين من كلتلچ ماكو لا قبلچ ولا بعدچ؟

جاوبتة من بين دموعي
:وهسة صار وحدة بعدي

حاوط وجهي وكال بهمس
الكسار:تخسى

كال هيچ وطبع بوسة بطرف شفتي
الكسار:انتِ الأولى والأخيرة انتِ حبيبة روحي انتِ بنتي مرتي ام طفلي ام العيون الكبار

دفعتة ابچي
:دتضحككك عليةةةةة

رجع سحبني والتهم شفايفي حاوطت رگبتة
ابتعد بعد فترة حط گُصتة على گُصتي

الكسار:اكرر لا اكو قبلچ ولا اكو بعدچ انتِ دمعتي دمعة عيوني شريان عيني

وخرت عنة ابچي
:بس اني سمعتك تحچي عنها وتكول تحبها وهي احلى مني اجيتني سكران تتغزل بيها بعيونها بشفايفها بصوتها وحتى كلت كل يوم ابوسها شوكت بايسني انتَ؟ لتكذب علية طلگني كافي

الكسار:انتِ من تنامين تحسين بشي؟ اذا نمتي لو تصير جبهات متكعدين واني اخذ راحتي ابوس بيچ احضنچ وبعدها اصعد انام فوك لأن انتِ مترديني

هزيت راسي ممصدكتة
:كذاب انتَ لعد شنو احلى مني؟ كافي وخر

رفع حاجبة
الكسار:يعني انتِ بنفسچ كلتي اني چنت سكران يعني ما احس على نفسي شنو احچي واكيد چنت اتخيلچ والله دموع بغيرچ ما افكر

بقيت ابچي وگلبي يرفرف بكلامة تقرب علية وطلع تلفونة طلعلي من يدخل للغرفة وشنو يسوي شفت كلشي صرت ابچي فرحانة ومرتاحة من عرفت مديخوني

رجع تلفونة لجيبة وسحبني طبع بوسة عميقة على شفايفي غمضت عيوني وحاوطت رگبتة ابادلة وهو يبوسني ويمسح بدموعي يبتعد ويرجع يبوس عبالك حطير من ايدة

مشاني للغرفة بحذر تمددت على الچرباية وهو يمي يريد يرجع يبوسني نطقت كلمة خلتة يجمد بمكانة

:كسوري احس اني احبك

ضل صافن بوجهي ممستوعب الي كلتة ابتسمت واخذت شفايفة بين شفايفي بادلني بحب وايدة تمشي على جسمي

چانت ليلة هادئة وكلها حب

تمدد يمي يباوعلي نزلت راسي خجلانة تقرب علية وسحب راسي لصدرة

الكسار:احبچ هواية ومحضرلچ فد شي

رفعت راسي احچي بخجل
:شنو؟

الكسار:الهدية الي وعدتچ بيها وكلتلچ من يصير عدنة طفل هديتچ خاصة خليها مفاجئة الچ

سكتت وهو رجع سحبني يتسرسر

رجع الوضع بيناتنة واحسن احنة الأثنين غلطة بتصرفاتنة

بقينة طول الوقت بالغرفة نعاتب بعض نبچي نضحك اخر شي تعبت لازم اتحرك كمت امشي واتمايل يمين يسار ردت احچي وطگها ضحكة خلاني صافنة

:شبيك

صار يكح من قوة ضحكتة
الكسار:ااااخخخخ من زمان لازم اضحك هيچ بس چنت عود ابيع ثگل

تحركت ورجع ضحك وهالمرة اقوة وعاط
الكسار:چنچ بطريييق

كام يبوس بخدودي
الكسار:مشيتچ مشية بطريق بطريقتي الحلوة

برطمت شفايفي بدلع
:ترة بسببك انتَ وابنك امشي هيچ

دنگ باس بطني وهمس
الكسار:وليدي اروحلك فدوة انتِ وابني

:وخر وخر بعدني زعلانة منك كل تفكيرك صار بالطفل واني حتى متفكر بية ولاتهتم بية

الكسار:انتِ شفتي كلامي وتصرفاتي كدامچ بس مشفتي من تلتفتين عيوني تضل وراچ ومشفتي من تتحركين شلون اعصابي ترجف اخاف تتأذين دموعي اني احب هالطفل لأن انتِ امة لأن منچ

ابتسمت وبستة بصدرة
:احبك خوش؟

الكسار:اموت عليچ خوش؟

ضحكت ورحت للكنتور طلعتلنة ملابس ودخلنة سبحنة هو خلص قبلي لبس ملابسة وطلع واني كملت بعدة رحت للغرفة ملگيتة مشطت شعري ولبست شي خفيف لأن صيف وحارة داحط عطر ودخل مبتسم

الكسار:تعالي

اخذني من ايدي للصالة شفتة مسوي كعدة بالصالة حاط فراش ونمنميات باوعتلة مبتسمة گرص خدي وكال

الكسار:باچر اخذت اجازة اليوم نسهر سوية

حضنتة وهو باس راسي كعدنة سوية نتابع فلم ونضحك چان يوم كلش حلو كلشي مر هادئ وحلو

حطيت ايدي على صدرة وهمست
:مكسرات احبك

رفع ملابسي وصار يمشي ايدة على ظهري وهمس
الكسار:دمعات احبچ

:من عبالي تحب وحدة غيري گلبي صار يأذيني هواية

الكسار:شلون احب غيرچ يكيفي بنظرة ما اباوع لغيرچ انتِ كل حياتي

رفعت نفسي وبستة بادلني شوي ابتعد عاض شفتة
الكسار:بعد بوسه قويه كون

:فد نيتك محلوة چنت دابوسك بس وانتَ طارت نيتك للمريخ

الكسار:اوي منچ المنحرفة

ضربتة على صدرة اضحك
:اي اي اني منحرفة وانتَ الشيخ أمام جامع انتَ

بس كلت هيچ تذكرت شي كعدت اباوعلة بحدة ورفعت اصبعي بوجهة
:شوف اني سكتتلك هواية بس والله يا غوث والله يا غوث اذا اشتميت ريحة شرب بيك اعتبر خلص انتهينة وحتى ابني اخذة ومتشوفنة وبكيفك بعد

نزل راسة يتنهد
الكسار:راح اتركة بعد وداعتچ وما اشرب

:اي وتصلي وتصوم

باوعلي يضحك
الكسار:اني اصلي؟

:اي شبيك ناقصك ايد رجل عين رجال شكدك وشكبرك ومن الفجر تبدي تصلي ترة حرام والله

الكسار:ماشي من الفجر ابدي بعد شنو؟

رجعت نمت على صدرة وحضنتة من خصرة
:ماكو شي

الكسار:لعد خوش بأجر نروح نشتري اشياء للطفل حتى لو بس اشياء بسيطة اريدچ تشاركيني فرحتي بي وتشاركين بتجهيز طفلچ

:ان شاء الله باجر نروح بس ها اخاف اولد ومعندة لا چرباية لا هذا ممة

الكسار:اي باچر نختار

رجعت على صدرة فرحانة
صار الفجر كمنة توضينة وصلينة واحلى شي هو متكتف واني لا احس هالفرق حلو بيناتنة

من كملنة صلاة الفجر نمنة بالصالة واحد حاضن الثاني

وثاني يوم العصر رحنة للسوگ چنت امشي بصعوبة وهو لازمني خايف علية دخلنة لمحل اشترينة چرباية للبيبي وملابس هواية كل منكول كافي نرجع نشتري اكثر اشترينة احتياجات الطفل كلها

المغرب يلا طلعنة من السوگ اخذنة الغراض ورحنة للسيارة
چان عبالي حياخذني للبيت بس شوي ووكفنة بمكان چان بي اثاث مال بيت

:وين وكفتنة؟

ابتسم ونزل فتحلي الباب
الكسار:نشتريلنة غرفة نفس أي عرسان صح ماسوينة عرس بس عادي اريد احس بالفرحة وياچ

بقيت ساكتة فرحانة نزلت ويا ودخلنة وصرنة نختار چانت الغرف التركيا دارجة هواي واغلب العرسان يشترون منهم واني اكيد اختاريت وحدة بيضة ومليانة مرايات ماعرف ليش حبيتها وهو بسرعة وافق عليها

وبعدها رجعنة للبيت وبعد يومين شدوها بالغرفة الفوك والقديمة تبرع بيها

ومن هاليوم بديت اجهز الجنطة مال الولادة والخوف اكل گلبي اكل خايفة من الولادة هواية وهو يهدي بية

مر على دخولي الشهر التاسع 15 يوم وتجيني اوجاع وتروح وليلي ما انامة من الخوف مرات ابچي بگد مچنت متحمسة اشوف ابني خايفة

كعدت العصر بالصالة احرك ايدي على بطني
شوي ودخل الكسار وخوالي سلمت عليهم وكال الكسار

الكسار:روحي لبسي حجاب زياد وباهر برة

هزيت راسي وكمت امشي بشكل ممتوازن واسمع ضحكهم علية رحت للغرفة لبست حجاب وطلعت متحلفة بيهم شفت باهر وزياد داخلين سلمت عليهم وبديت بعركتي

:تضحكون علية هاااا روحو ان شاء الله تحبلون كلكم سوية وتصيرون تمشون نفسي

فهد:لا يا ادبسز

كال زياد يهز بيدة
زياد:احنة نحبلهن مو نحبل

:انتَ اسكت كون توم يصيرون ببطنك متستحي كسار ضربة

قبل ليرد رفع ايدة الكسار وضربة بعلابية وزياد كام طفر يم خالي
زياد:ابن الكلب صدك لو كالو الاخو اخو مرتة

باهر:اي والله بعد ماكو اخوان بهالزمن

صلخ باهر علابية خلاهم يتطافرون
الكسار:انجبو وعوفو مرتي

كعدت الهث وبعدهم يضحكون علية راح الكسار جابلنة عشة وخالو جناح جاب سيدرا وداني وتعشينة سوية وبعدها تركناهم بالصالة واني وسيدرا كعدنة بالحديقة نسولف

سيدرا:بعد شكد على ولادتچ

:مادري بهالأيام تكول الدكتورة احتاج سوالف سرسرية وهذا المكسر متونس على السوالف السرسرية

سيدرا:فضحتي الرجال خية

:خية هو مفضوج اني انرزقت بزوج متسرسر

عدلت حجابها وكالت بشرود
سيدرا:كلها سرسرية شبيچ انتِ حتى خالچ الشيخ

بس كالت هيچ لزمت ايدها وهي فزت
:هااااا شصاير من ورانةةةةة؟

نزلت راسها خجلانة
سيدرا:يريد يسويلي عرس

:كوليييي والله يعنييييي بعد متسافرين؟

سيدرا:اي خالچ ينحب وحتى ما اهتم للماضي مالتي

:حبيتي؟

هزت راسها وغطت وجهة بخجل
سيدرا:حبيت جناحي

بس كالت هيچ طگيتها هلهولة وهي تريد تسد حلگي ماكو كلهم طلعو مستغربين مهتميت لشي رحت سحبت خالي جناح واخذتة على صفحة

جناح:شبيچ تخبلتي؟

:الله عليها جناحها حبيتها موووو حبيت سيدرا وحتسون عرس مو

باوع لسيدرا مبتسم ورجع باوعلي
جناح:اي ان شاء الله هو اني اجيت احچي وياكم بهالموضوع ورة ولادتچ نسوي عرس بسيط وتلبس البدلة البيضة ونتزوج اني وياها

رجعت هلهلت وهو كال للكل عن الخطة وكلها فرحت وباهر صار يلطم على راسة ويصيح

باهر:كلها تزوجت ضليييييت بس انيييييي زوجوووونييييييي

فهد:انتَ متريد شنسويلك يعني

باهر:اريد وحدة انتو متردوها شسويلكم

كلش اضوج على باهر شكد يحبها وشكد اكو معارضات على زواجهم يمكن اني الوحيدة الي واكفة ويا بهالموضوع

راحو كل واحد لبيتة
بس رجعت للغرفة حسيت بوجع قوي بس بسرعة راح
رحت تمددت بحضنة وهو كال بهدوء

الكسار:شوكت يجي مو متحمس

بس كال هيچ اجاني وجع قوي هوااااية بحيث خلاني اعيط صوت يهز البيت هز طفر الكسار خايف

الكسار:هاااا ولادة موووو

حسيت نفسي تبللت من خوفي معرفتة شنو عبالي سويتها على نفسي هو نزل عيونة للفراش وعاط

الكسار:نزللللل ميييي الهذاااا عندچ ولادةةةةة

زاد الألم وعطت بعلو صوتي
:اخخخخخخ رااااااححححح يجييييي رااااااحححح يجييييي

طفر اخذ الجنطة خايف وكومني بس وكفت زاد الألم
:ماكددرررر امشييييي مااااااااكدررررر

اجة سندني
الكسار:ومايصير اشيلچ لازم تمشين حتى تتسهل ولادتچ

مشيت بصعوبة وهو أسم الله ما غاب عن حلگة ويا كل كلمة يكولة
اخذني بالسيارة واني اعيط واعضعض بأيدة من الوجع

من وصلنة للمستشفى نزلني يدعي سلمني للممرضات وهو يوصي علية من دخلت اشوف البنات كلهم امهاتهم وياهم خواتهم بس اني دخلت وحدي بس الله وياية

حطوني على السدية و هنا صار التحدي اصعب واصعب تولدني وتصيح وياية عبالك هي دتولد مو اني

:دفعييييي اقوةةةةة لتخنگين الطفلللل

ارجع ادفع اقوة واقوة فجأه مصرت اشوف شي ابد عرفت صار ضغط على راسي وانعميت بس مهتميت المهم الطفل يطلع سالم

ساعة كاملة واني اصارع بهالغرفة والوجع ديصير اقوة واقوة

واخيراً وكع الطفل نزلت رجلية الهث وبلاعيمي تأذيني بس مچان اكو صوت بچي رفعت راسي احرك عيوني اريد اشوف

:ل ليشششش مديبچييييي شبيييي ابنييييي

حسيت وحدة لزمتني من ايدي تهدي بية دفعت ايدها اعيط
:ويييينننن ابنيييييي ليييييشش مااااكوووو صووووتتت

صرت الوم ومحد تقبل تنطيني جواب صرت اعض بأصبعي ونسيت كل ألامي

هناااااك واجة صوتة يبچي لا ارادياً صرت ابچي ويا
:هذا صوت ابني مووو صوت ابني؟

الدكتورة:اي صوت ابنچ المشاغب شوفي حبيبي هو وخديداتة

جابتة حطتة على صدري
الدكتورة:شوفي ابنچ شلون حلو

بچيت واني احاول اشوف
:ما اشوف انعميت عندي عمى مؤقت

سكتت الدكتورة اخذتة يسبحو واني نظفوني زين وغيرو ملابسي يلا طلعوني بكرسي متحرك دايخة بشكل ولساني ثگيل

حسيت نفسي انحضنت
الكسار:الحمدلله على سلامتچ يروحي

بس هزيت راسي مكدرت اجاوبة اخذوني لمكان وشالني الكسار نومني على الچرباية عرفت حاجز غرفة ليلة حتى يطمئنون على صحتي وصحة ابني

شوي شوي نمت تعبانة كلش
من كعدت چنت اتمنى اشوف بس مع الأسف بعدة نظري مرجع چنت اسمع يمي اصوات واكثر صوت ميزتة صوت الكسار

حچيت بصوت متشحرج
:كسرات؟

ثواني وصار صوتة بأذني وانفاسة تلفح وجهي
الكسار:يبعد عيونة ورمشهم الحمدلله على سلامتچ

رفعت ايدي احاول اوصل لوجهة
:الله يسلمك الطفل وينة!

كال بخفوت
الكسار:دموع مدتشوفين؟

هزيت راسي
:عادي تعودت بس اريد اشوف ابني اريد يرجع بس دقيقتين اشوفة شلون

تنهد وحضن راسي
الكسار:يرجع يبعد عيوني والله يرجع

سكتت اجو خوالي تحمدولي السلامة وكعدو يسولفون ويتنقاشون بأسم الطفل

فهد:يابة اسمعني ميصير تسمي الطفل حسن مو زين تسمي على اسم شخص ميت

الكسار:بس اريدة حسن هالأسم غالي على گلبي

جناح:اكو هواية اسماء سمي حسين؟ ادم علي عمر محمد

ابتسمت وكلت بتساؤول
:غوث عادي اسمة يصير حسنين؟

سكتو كلهم اختفت ابتسامتي
:كلت شي غلط؟

جاوبني الكسار فرحان
الكسار:لا انتِ الصح خلص ابنة اسمة الحسنين

:حسنين لو الحسنين؟

الكسار:الحسنين بالجنسية ونكلة حسنين احنة

عجبتني الفكرة والأسم فرحانة بس فرحتي ناقصة اريد اشوفة

نص ساعة وجابتة الممرضة اسمع صوتة واحس گلبي مفرفر على شوفتة جابة الكسار حطة على صدري وكال بصوت يرجف

الكسار:شمي ريحتة دموع حلوة چنها ريحتچ

سويت مثل مكال صرت اشتم بريحتة وابچي ريحتة تجنن بودرة قرب خدة لحلگي وبستة واسمع الممرضة تكول

الممرضة:خلي ترضعة جوعان

كالت هيچ وراحت طلعو خوالي وهو كعدني عدل وطلع صدري يرجف واجهنة صعوبة بهالشي لأن احنة الأثنين منعرف للأطفال

حطة بحضني وصرت ارضعة واحسة بعدة واكف خايف علينة

من شبع عدل ملابسي ولبسني حجابي واخذنة الطفل وطلعنة للبيت واني بالطريق وبحضني الطفل يلا رجعلي النظر واول شي شفتة حسنين صرت اباوعلة وابچي

:يروووح امك يحبيبي حياتي ماماتي

باوعت للكسار اناشغ
:يخبل كسوري حسنين يخبلللل اريد اكلة

ضحك بعلو صوتة
الكسار:عمي دستري علية احنة ماصدكنة يطلع من بطنج تردين ترجعين تاكلينة اروح فدوة لعيونچ اخيراً رجع نظرچ

بقيت ساكتة اباوع لحسنين وكل شوي وبستة وصلنة قريب على بيتنة وفزيت من سمعت صوت طبل ومعزوفات باوعت للشباك وشفت سيارتين وحدة على جهتي والثانية على جهة الكسار الي على جهتي زياد طالع من الجامة ويدُگ بالطبل وغيث بصفة هم والسيارة الثانية خالي جناح وباهر سولنة عرس بالمنطقة

وصلنة للبيت چان خالي واكف بالباب نزل الكسار واجة نزلني اني وحسنين من السيارة ساندني من نزلنة انفتح باب بيتنة وتعالت الهلاهل چنت كلش فرحانة

اجة زياد ذبح خروف جوة رجلينة وخالي فهد حط دم على روسنة ثلاثتنة اني والكسار وحسوني ورجعو هلهلو وزياد وباهر يهلهلون وياهم

دخلنة للبيت اخذوني للغرفة چانت نظيفة ومتزينة نومني الكسار على الچرباية واخذ حسنين حطة بأيد خالي فهد أذن بأذنة

راد يرجعة لحضني وركض زياد اخذة من ايدة وكال
زياد:بنتي الك بنتي الك بنتي الك

:للاااا وين اني اصير عمة بنتك ماريد

زياد:وخري تلگين احسن من بنتي انتِ

سكتت عنة اضحك وهو طلع فلوس وحطهم بگماط حسنين ومادري شنو همس بأذنة وبعدها كلهم صارو يدلعو بالفلوس

أما الكسار كعد يمي وكال
الكسار:هديتي الچ مختلفة ومتأكد راح تحبيها وصار هوااااية اجهز الها

:شنو؟

ابتسم ودنگ باس راسي
الكسار:هديتچ وهدية حسنين حجة بيت الله الحرام

شهگت بفرحة
:كول والله؟؟

الكسار:والله ان شاء الله بس تطلعون من الاربعين نروح اسويلكم جوازات وهالسنة نروح لأن ماريد اخذچ عمرة اريد اخذچ حجة

ردت احضنة بس استحيت كلهم موجودين الفرحة مواسعتني

راحو كلهم واني والكسار وحسنين بقينة وحدنة حطيت حسنين بيناتنة وصرنة نباوعلة

:شكد حلو

الكسار:يخبل يشبهچ

ضحكت وباوعت للكسار
:يشبهني بس بالوزن اني سمينة وهو سمين بس بعدة ملامحة متبين هسة

الكسار:ان شاء الله يكبر بحضنة ونزوجة

حطيت اشبعي كدامة وكلت اضحك
:بسسسس مو بنت زياد استر علينة

الكسار:لا مو بنت زياد متوازي

ضحكنة دنخطط من هسة وهو عمرة يوم بس

بيومها نمنة ثلاثة اشخاص اني وغوث والحسنين مرتاحين ...

..يتبعع..

توقعاتكم؟

.
.
.
.
.
.
.
.
.
.
تعذروني على تأخير البارت بس مريضة وبصعوبة كدرت اكتبة احنة بالبارتات النهائية يعني تحملوني 🥹😂

وها ماكو قفلة اليوم الله هاديني عليكم

ضيفو حساب الانستا

وقناة التلي

اللهم صلِ على محمد والِ محمد 🦋

مها ال عبدالله