رواية الكسار (سلاسل الغوث) الفصل الثاني وأربعون 42 - بقلم لـ ميامي

انه وانتَ
شمعة فوك الگمر
ومن تطفى ضويات المدينة
نشعل الظلمة بعشكنا
ماكو مني
ولا اكو منك

مشتاقين عيني🙈 حبيت افاجئكم بالبارت الأضافي اعرف جاي تنتظرونة هواااااي استغليت الأمتحانات وقفت قصة غليان وبديت اكتب بالبارت چنت ناوية من تخلص غليان اكتب بس ماريد اتأخر عليكم اكثر من هيچ

وتنوروني بقصة غليان🤍
...................................................

دموع:فزيت من نومتي عطشانة باوعت للچرباية مشفت الكسار عگدت حواجبي مستغربة

كمت لبست فوك ملابسي روب وطلعت رحت لغرفة اطفالي فتحت الباب على كيف لكيتهم نايمين

ابتسمت رحت غطيتهم وطلعت ادور على الكسار
البيت ظلمة ونسمات برودة خفيفة تلفح وجهي

نزلت للصالة وماكو دورت داخل البيت كلة وهم ماكو
طلعت للحديقة وكفت بمكاني هادئة

شفت الكسار كاعد على المرجوحة وكدامة صورة مَلِك وحسن ويحچي وياهم بكسرة وحسرة ودموعة تنزل احس گلبي انفطر

مسح على صورة مَلِك وكال بنبرة مهزوزة
الكسار:مشتاقلك هواية اجيتني بالحلم ماكدرت احضنك ليش ما تريدني

سكت وهوَ يبوس بالصورة ويحضنها
الكسار:كلش مشتاقلك وين رحت ليش ما اخذتني كلكم عفتوني

ترك صورة مَلِك وباوع لصورة حسن غمض عيونة يبچي وبس جسمة يهتز حسيتة كلش متأذي

الكسار:حسن يا روح الغوث انتَ وينك وين عايفني ابنك صار زلمة وهوَ ما يتذكر شي من ابو مشتاقلك مشتاق لسوالفنة سوية جاي تجيني اخبار كاذبة عنك ومن اروح ما الگاك دزولي انتَ بسوريا مسجون رحت بنفسي وماكو أثر منك

مسح دموعة وضل يباوع للصور ويتنهد زفرت نفس وتحمحمت رفع راسة شافني بسرعة حط الصور بصفة وسوة نفسة طبيعي

الكسار:ها دموع ليش كعدتي

رحت كعدت بصفة وسحبت راسة لصدري
:اعرف محتاج وقت تبقى بي وحدك بس لا تخجل مني من تريد تبچي شاركني همك ابچي بحضني

حط وجهة بصدري وحضني حيل
الكسار:جاي يجولي بالحلم دموع مَلِك فرحان ويضحك وحسن زعلان مني يكول ما تريدني اني ما اريدة شلون ما اريدة افدي بروحي اني

:اعرفك والله وان شاء الله تلگة حسن ويرجع ينور بيتة ويعيش ويا زوجتة وابنة مو اجاك خبر هوَ بسجون لبنان؟

الكسار:اي بس خايف اروح ويطلع ماكو وارجع خايب ظني

:روح وبلكت الله هالمرة يطلع هناك عاد نكدر نوكل محامي ويطلعة بس ادعي يطلع هناك روح حبيبي انتَ

رفع راسة الي حط ايدة على خدي
الكسار:اروح والله كريم

بستة بخدة ورفعت شعرة عن وجهة
:حاسة بيك اني يروحي اخوية هم مو يمي وبعيد عني واحس گلبي موجر عليه حاسة بشعورك

الكسار:ان شاء الله ما ضل شي ويطلعلچ سالم غانم

سحبت نفس عميق وزفرتة بحسرة
:ان شاء الله

الكسار:يلا كومي ننام لا يكعدون الأطفال وبعد ما تكدرين تنامين

كمت ويا وهوَ اخذ الصور رجعهم المكانهم وصعدنة فوك ومثل كل يوم صلينة وبعدها واحد حضن الثاني ورحنة بسابع نومة

احنة الخميس محد ينام من وكت نتأخر يلا ننام والجمعة منكعد من وكت مرات للعصر يلا

الظهر كعدنة صلينة ورجعنة نمنة
كعدت من النوم العصر شفتة بعدة نايم والبيت هدوء مبين الأطفال هم بعدهم ما كاعدين كمت امشي على اطراف اصابعي طلعتلي ملابس ورحت للحمام سبحت ومن طلعت لگيتة واكف بالباب يدخن

ابتسمت ورحت وكفت كدامة رفعت نفسي وبستة بشفتة
:صح النوم كسورتي

دنگ علية حط وجهة برگبتي وسحب نفس قوي وطبع بوسة خفيفة عليها
الكسار:لو منتظرة نسبح سوية

ضربتة على ايدة اضحك
:حياتي كافي تسرسر

باس كتفي وراح للحمام واني رحت مشطت شعري ورتبت نفسي ونزلت اسوي شي ناكلة صارت عصر لا هوَ غدة ولا هوَ عشة عصرونية

سويت اشياء بسيطة ردت اصعد اكعد الأطفال وگبت العيطة
صعدت اركض دخلت لغرفتهم ولگيتهم واحد جار شعر الثاني

ادم:وخل وخل حسون الخبل

الحسنين:انتَ خبل اصبر اكول لبابا عليك ابو البنات

ادم:اني مو ابو بنات البنات يحبوني ميحبوك

صرخت عليهم بعصبية مصطنعة
:اااادمممم حسنييييين

تركو شعر بعض وباوعولي اجو وكفو كدامي منزلين روسهم
:اني شكم مرة اكول لتتعاركون؟ ليش تتعبوني

باوعلي ادم ببراءة وعيونة تلمع
ادم:اسف ماما

:يلا اعتذرو من بعض

بكل هدوء واحد اعتذر من الثاني وباسو بعض ابتسمت
:يلا ماما روحي غسلو حتى ننزل ناكل نازلة قبلكم

هزو روسهم واني طلعت بس سديت الباب رجعت گبت العيطة رجعو تعاركو يا يابة گلبي ورم منهم كلة هيچ يسوون بية

رحت للغرفة باوعت للكسار چان يرش عطر
:كسار روحلهم ديتعاركون والله موتوني ميخافون مني بس طلعت رجعو يتعاركون روح فض النزاع

باوعلي وابتسم گرص خدي وراحلهم واني نزلت كملت كلشي سويت عصير برتقال الهم
شوي ونزل لازمهم وهمَ هادئين قهروني يسمعون كلام ابوهم واني لا كعدو بمكانهم واحنة هم وكعد الكسار يحچي وياهم

الكسار:ماريد تتعاركون بعد اريد واحد يحب الثاني واحد يسند الثاني ماريد شي يخرب علاقتكم

الحسنين:بس بابا ادومات يكول خالو يحبة وميحبني

الكسار:خالكم يحبكم انتو الأثنين حبيبي

ادم:بابا وهسونات يكول يكول خالو شالة بحضنة واني مشالني

الكسار:لا شالكم انتو الأثنين وباسكم هم لا تتعاركون بعد ترى ماما تزعل وخالو هم يزعل منكم

هزو روسهم ورجعو اصدقاء هاي اسطوانة كل يوم يتعاركون ويتصالحون چنهم اني وابوهم

كملو اكلهم وطلعو للحديقة يلعبون كعد الكسار يمي يشرب قهوة واني رتبت المطبخ البيت نظيف وماعندي شي
بس خلصت كعدت بصف الكسار وهوَ ترك قهوتة وتلفونة وسحبني كعدني بحضنة

الكسار:ولدچ عليمن طالعين ملعبين هيچ

حطيت ايدي على خدي عود افكر
:امممم يمكن ابوهم چان واحد ملعب وسرسري وطلعو عليه

الكسار:منيلي سرسرة اني امهم يمكن وحدة مسـ**گودة وطالعين عليها

رفعت حاجبي وتحارشت بي
:اني هاااا

خزرني
الكسار:الأطفال منا كعدي

ردت احچي ودخل حسوني يحچي طفرت من حضن الكسار وكفت على حيلي

الحسنين:بابا اريد چبس

الكسار:تدلل حبيبي روح للغرفة تلگة بيها وبعدين اخذكم اشتريلكم

هز راسة وصعد فوك الكسار باوعلي يضحك
الكسار:ام چيس حب تستحي من اطفالها

:ماريد يتعلمون على اشيائك السرسرية حياتشي

عض شفتة بتلاعب
الكسار:اموت بالسرسرة وياچ دمدم

طلع حسنين للحديقة وهوَ كام سحبني من خصري واخذ شفتي وكالعادة طرت بأيدة

وخر عني يمسح شفايفي بأبهامة
الكسار:كلش احبچ نعمتي انتِ روحي بيچ انتِ واطفالنة

:واني اموت بيك كسوري

رفعني من خصري كعدني على الكاونتر
الكسار:فرحان وسعيد لأن عمري راح يگضي وياچ

فتحت دگم التيشيرت من البداية وبستة بصدرة
:عمري وكل دنيتي

ضحك ولزم ايدي
الكسار:ذكرتيني بيچ من تحبلين تبقين تشمشمين بصدري

:صدرك يصير حلو

دفع راسي لصدرة
الكسار:شمي وبوسي كلني تحت أمرچ

ضحكت علية
چانت ايامنة حلوة هواية متفاهمين صح نتناگر بس ما نطول بسرعة نتصالح اني چانت ناقصتني رجعة وهيب احسب الأيام والساعات على طلعتة

كل يوم ادعي يرجعلي بسرعة گلبي مفرفر عليه رغم اشوفة بس كل شهر لو كل شهرين مرة ما يسمحولي اروح

مرت الأيام بشكل طبيعي حياتنة مستقرة چان الكسار يريد طفل واني هماتين اريد بس هالشي مو بدينة مديصير برغم تعالجت من الجرثومة بس كل ما اراجع يكولون بعدة رحمچ ممستعد

مرة من المرات سألتة
:كسوري هوَ عادي يبقون بس حسونات وادومات ومنسوي غيرهم؟

ابتسم وحضن وجهي
الكسار:اذا ما تردين اني هم ماريد بس اني ماعندي احد اخواني ما معترف بيهم وعلاقتي وياهم مو كلش قوية اريد اطفال يصيرون فد 4 واحد يحمي الثاني ويدافع عن الثاني ماريد يبقون نفسي وحيد

:انتَ مو وحيد احنة عائلتك

الكسار:واجمل عائلة انتو سعادة روحي ومثل ما كتلچ اذا ما تردين كولي

:لا حبيبي اريد گلبي طاگ على الطفل بس خايفة ما يصير عدنة

الكسار:ماذا ما يصير هذا أمر الله وما نعترض واحنة راح نحاول ونتعالج

:بس انتَ ما بيك شي الصوچ بية

الكسار:مو مهم يجوز بية

رفعت راسي اباوعلة
:ترى سوينة فحوصات وانتَ ما بيك شي والصوچ مني لا تذبها براسك

ابتسم واخذ ايدية يبوس بيهم
چان كل همة يحاول ينسيني من عندي الخلل حتى چان يكول من عندة السبب عود هوَ ما بي اطفال وجبرتة نروح نفحص وطلع مني مچان يريد يحسسني بنقص

عشيت الأطفال ونومتهم وبقيت انتظرة يجي
كعدت بالصالة وغمضت عيوني اتذكر الماضي الحلو والمر

چنت كاعدة بغرفتي اجهز نفسي لأن ملاك جاية وطايرة من الفرح
كملت ونزلت والحجل صوتة يرن

چنت اركض من الفرح وفجأه انلطخت بصدر الكسار
ابتعدت احك بخشمي

:اخخخخ

حاوط وجهي يشوف شبية خايف علية ابتسمت چانت علاقتنة مو زينة وعلى حافة الأنهيار بس ما يكدر يخفي خوفة واهتمامة بية

الكسار:صارلچ شي

ابتعدت خطوتين اعدل بشعري
:ها لا مابية شي

باوعلي من فوك ليجوا
الكسار:هاي كلة لفرح واني شبقيتيلي

نزلت راسي اسوي نفسي ما مهتمة تقرب علية طبگني بالحايط يباوع لوجهي ويتحسر دنگ يبوس برگبتي واني انتفض بين ايديناتة الخشنة

:امم كسار و وخر

حصرني بالحايط
الكسار:ليش حارمتني منچ

ماعرف شجاوب صار ايام رافضة حتى ينام يمي وهوَ متعلعل بس شي مو بيدي ممتقبلتة ابد
رفع راسة واخذ شفايفي يمشيني للصالة

كعدني وكعد بصفي يطبطب على ايدي
الكسار:حقچ بكلشي تسوينة بس لا تحرميني من عطرچ روحي تنسلب مني دموعي

باوعتلة عيوني مدمعة
:مو بيدي

الكسار:انتِ ما دتنطيني مجال اعودچ علية عاجبچ هذا الوضع؟

هزيت راسي بلا عصر ايدي يتنهد
الكسار:ولا اني عاجبني نجرب اليوم انام يمچ بالغرفة

باوعتلة بتورط ابتسم يهز براسة اندگ الباب كام عني وكال بهدوء
الكسار:ابقي انتِ واختچ بالبيت واخذو راحتكم اني ومَلِك ما نجي وها خالچ راح يجيب مرتة هم

:اي اني كلتلها تجي

سكت ما حچة شي راح يفتح الباب كمت عدلت ملابسي ونفسي شوي وسمعت صوت حسن بالبيت ركضت فرحانة بس شافني طفر فرحان

حسن:خالة تموووع

ركض لحضني واني ابوس بي بلهفة
:تروحلك فدوة دموع حبيبي انتَ يروح خالتك

رفعت راسي شفت امة متكتفة تركتة ورحت حضنتها
:مشتاقتلچ هواية

باست خدي
فرح:واني هماتين صار اسبوع مشايفتچ وروحي طگت عليچ همزين نحچي اتصال چان تخبلت

دخلنة جوة واني كالعادة ما اوخر عن حضنها اريد اشبع منها احسها هيَ امي ماكو غيرها حنونة

اجت سيدرا واخوها وحسن تونس ويا داني بقو يلعبون سوية واحنة كعدنة نحچي وندردش اني وفرح نضحك على سيدرا لأن تستحي من خالي جناح واني ناسية نفسي بس وجودة يوترني

سيدرا:ياااا بنات والله استحي هذاك اليوم طخت ايدة بزندي ردت اموت بمكاني وهوَ بس يعتذر مني اني مخفت بس استحيت

فرح:والله بطرانة اني ما اخاف بس اتسرسح بنظرة من عيونة فديتة ملوكي

باوعلي ثنينهم
:خير تباوعلي

غمزتلي
فرح:وانتِ ما تخافين تخجلين هاااا

حطيت اصابعي بحلگي وحچيت بخجل
:أصلًا مننام سوية هوَ ينام بالصالة واني بالغرفة

استغفرت تهز براسها
فرح:لشوكت دموع كافي انسي زوجچ هذا ويحبچ

:ماكدر اتوتر واتعب

سيدرا:بس هوَ يحبچ الكل منتبهة لحبة الچ

لزمت ايدي تحچي وياية بهدوء
فرح:سمعيني ماماتي حبيبتي اذا هجرتي زوجچ يصير ذنب عليچ وهوَ يحبچ حاولي تتأقلمين ويا خصوصًا انتِ عشتي ويا كل هالسنين ماريد يصير عليچ ذنب والملائكة تلعنچ

:بس ماكدر ابقى ارجف اذا اجة يمي

فرح:شي طبيعي لأن انتِ مدتقبلين  تنطين نفسچ فرصة حتى تتعودين علية سمعي ونفذي الي اكولة لا تخسرين الأول والتالي

هزيت راسي استمعلها واستمع لنصائحها الي تريح الگلب قررت انطي نفسي فرصة هاليوم

رجعت لواقعي لگيت نفسي ابچي مشتاقتلها هواية ومحتاجتها اريد اسمع نصائحها اريدها تهدي گلبي اتمنى بعدها موجودة حتى نصبر بعض على فراگ وهيب

سمعت صوت باب البيت ينفتح طفرت للمراية عدلت نفسي ماريدة يشوفني ابچي اني اخلي مكياج جوة احتياط خليت بلشر وحمرة خفيفة

فتح باب المطبخ ودخل بأيدة وردة تقدم علية سحبني لحضنة وانوب خلاها بأيدي

الكسار:شفت واحد يبيع ورد بس شفت الوردة تذكرتچ

:شكرًا حياتي انتَ

خليتها بمي وحميتلة العشة اجة كعد يتعشة
الكسار:الجمعة عرس اخوية ابن سلوى وابوي ولازم نروح

:ماشي حبيبي

الكسار:اخذكم تشترون ملابس هاليومين ان شاء الله

هزيت راسي وسكتت اعرفة مشغول بس هم ميصير ميحضر عرس اخو حتى لو علاقتة بيهم مو قوية لازم يروح بالنهاية هوَ اخوهم الچبير

مرت الأيام طبيعي بس اني مادري شبية نحلانة كلش اريد بس انام
اشترينة ملابس واكيد اربعتنة طقمنة سوية احب نلبس نفس الشي لو نفس الألوان

كملنة واخذنة الكسار بالسيارة چان اكو هواية ناس عندهم معارفهم هواية دخلت اسلم على الكل كلها موجودة حتى سارة طليقة زياد شايلة بنتها ورافعة خشمها بغرور ولابسة ذهبها كلة

كعدت بصف روان لأن بس هيَ علاقتي قوية بيها چان العرس بالبيت ابوهم ما قابل يسوونة بقاعة

رحنة زفة نجيب العروس والطريق كلة يرگصون اطفالي گلبو الدنيا هلاهل ورگص وابوهم يضحك عليهم واني چانت السيارة مضللة ارگص براحتي بس زياد يخبث يكسر علية بسيارتة ويخلي الكسار يسبة

رغم چان بس طريق بس جد تونسنة
اخذنة العروس ورجعنة للبيت دخلوها للبيت وكعدوخا على الكوشة ما شاء الله جدًا جميلة وحتى اخو الكسار شكلة حلو ومرتب الله يهنيهم

بعد الزفة تجمعنة كلنة بالصالة الكل يسولف وسارة تباوع لزياد تريدة بس ينتبهلها وهوَ ما مهتم يدخن ويباوع بتلفونة

ما تحملت حچيت بحقد وغل
سارة:اي زياد شنوو هاي مشيب شوكت تتزوج بعد لو مدتلگة نفسي

باوعلها ببرود ذب الجگارة وداس عليها
زياد:اي مالگيت مطية تتحمل الدگ بگدچ يعني بختصار ما لگيت وحدة ماعدها كرامة

سارة:ازعل عليك الصراحة شوف اني وين وانتَ وين عمرك حيدگ الأربعين ولا زواج ولا حتى اطفال شوف اني عندي بنية وهسة حامل

زياد:عندي تاج راسچ وراس الخلفوچ وفهمچ كفاية

سكت عنها متجاهلها وهيَ ضلت تاكل بنفسها تريد تعرف منو هاي زياد هواية متكتم عن الموضوع واضح يحب بس محد يعرف منو

رجعنة للبيت تعبانين واني روحي رايحة احس اكو ثگل بمعدتي وحرقة
كسوري راح ينوم الأطفال واني دخلت للغرفة مسحت المكياج رطبت وجهي وجسمي

رحت للكنتور لبست تراك ستن ارتاح بي واكيد رشيت عطر ورحت للچرباية انتظرة يجي حتى ننام

نص ساعة ودخل تركت التلفون وباوعتلة مبتسمة
:هلا عيني

ذبلي بوسة بالهوى
الكسار:فدوة لعينچ حبيبتي

ذب ملابسة واجة دخل بحضني
الكسار:تعبان كلش

غمضت عيوني اشتم عطرة
:يروحي انتَ التعب العدوينك

سكت يريد ينام بس اني شميت بي عطر حلو
:اممم كسوري نام على ظهرك

نام على ظهرة واني حطيت وجهي بصدرة ومثل ما توقعت الريحة الحلوة من صدرة دفنت وجهي اشتم كلش احبها
زادت حالتي بهالليلة هوَ نايم واني اشمشم بي

صفنت ابلعم
:معقولة!!!!

كعدت على حيلي احسب وقت شهريتي شهگت
:فايتتني اسبوع كامل!!

بقيت الوب ممصدگة وخايفة اطلع صدك حامل ويوكع
ماكدرت انام الليل بس افكر لازم اتأكد ماعندي تحليل منزلي بقيت محتارة

غطيت وجهي اضحك وادعي اطلع صدك حامل ويثبت الحمل هالمرة ماريد يخيب أملنا من الضحك تحولت للبچي مادري شبية خايفة من كلشي ماريد الطفل يروح اذا صدك حامل ماريد اتعب بالأجهاض ولا اريد افقد طفل اريد افرح عائلتي ويصير عدنة فرد جديد

حضنت بطني بأيدية وكملت بچي ادعي
:يااااارب فرحنة ياااارب

فز الكسار على صوت شهگاتي حاوط وجهي
الكسار:ليش تبچين

هزيت راسي مابية احچي الله ذب علية الدموع سحبني لحضنة احتاريت ابچي لو اشمشم بصدرة

الكسار:حبيبتي شكو لا تخوفيني عليچ

مسحت دموعي اناشغ
:مابية شي

الكسار:شنو مابيچ شي جاي تبچين منو مزعلچ تعبانة؟ احچيلي

:محد والله مادري شبية حبيت ابچي

صفن بوجهي يحرك ابهامة على وجناتي
الكسار:ذكرتيني من چنتي حامل بـ أدم هم هيچ بس تبچين وهم وجهچ هيچ يذبل شنو حامل انتِ

ابتسمت بتعب بسرعة لگفها بس اني نكرت
:لا منين حامل بس شهريتي تأخرت لأن عندي خلل بالهرمونات عادي دوم تصير مو حامل منين احبل

حط ايدة على رگبتي رافع حاجبة
الكسار:شنو منين تحبلين لعد اني گـ**اد هنا

ضحكت بصوت عالي بسرعة سد حلگي
الكسار:انشهرنا ولچ الأطفال نايمين

بقيت اضحك على كلامة وهوَ مبتسم ويدردم
الكسار:البر**گ منين تحبل اني خراعة خضرة هنا

:والله مقصدي هيچ شبيك قصدي على الشهرية حتجي شلون احبل

دار وجهة عود ضايج رجعت وجهي بصدرة ريحتة كلش طيبة
:احبك حيل وعيونك

الكسار:محد يحبچ بگدي وردتي انتِ

بدأ بسوالفة السرسرية نفسة
ثاني يوم راح لشغلة والأطفال لمدرستهم بقيت بالبيت محتارة شسوي

ابتسمت وحچيت بحماس
:ماكو غير سيدرا

اخذت تلفوني واتصلت عليها بسرعة جاوبتني
سيدرا:هلا دموع

:هلا بيچ شلونچ شو صوتچ مادري شلونة

سيدرا:قبل شوي كعدت من النوم ماكو شي

:مبين خالو ماخذ طاقتچ عادي عادي تصير

ضحكت بصوت عالي
سيدرا:عابتلچ

:المهم اريد اكلچ شي

سيدرا:شكو

عضيت شفتي فرحانة
:اني يمكن حامل

صرخت فرحانة طرشت أذني
سيدرا:يااااااااا دموووووع كولي والله

:مادري يمكن محد يدري بس انتِ اريد اتأكد يلا احچي

سيدرا:بعدين اني وخالچ نجي وحجيبلچ وياية تحليل منزلي

:ياريت لأن محتارة شسوي

ضحكت حيل
سيدرا:اذا طلعتي حامل شيفكني من خالچ يريد بعد اطفال واني ياقوت وداني كافي علية مو انوب اجيب الثالث

:لچ اني هماتين حسوني وادم متعبيني بس اريد اطفال ما اتعب منهم عادي

سيدرا:يااااارب تطلعين صدك حامل وتفرحين ويتمملچ على خير

:امين يارب الله يسمع منچ

حچينة شوي وسديتة منها اكمل الغدة
قربو يجون الأطفال وابوهم صعدت فوك سبحت ماحب ريحة الطبخ ولبست ملابس مرتبة ورتبت شكلي ماريد يبين التعب بوجهي
نزلت انتظرهم دقايق معدودة وصار هجوم

اصواتهم يتعاركون بينهم هزيت راسي بعدم رضى من شافوني ابتسمو وصارو عقال ركضو لحضني

الحسنين:هلاو ماما الله يساعدچ

دنگت بستة بخدة
:حبيبي ويساعدك

ادم:الله يساعدچ ماماتي

هم بستة
:ويساعدك يروحي يلا روحي غسلو وغيرو ملابسكم وتعالو ركض ركض

صعدو لغرفتهم يركضون باوعت للباب شفتة منتچي ومتكتف ابتسمت ورحت بستة بخدة وحضنتة

:هلا عمري

الكسار:هلا بيچ بعد وكت مدام

:مو الأطفال هنا انتَ الك الحصة الچبيرة

باسني وصعد رحت صبيت الغدة والعصير ممنوع يشربون بيبسي بس العصير الطبيعي نشربة لأن اطفالي مناعتهم مو كلش قوية منخليهم ياكلون شي يضرهم حتى لا يتعبون

نزلو وكعدنة نتغدة وبين سوالفهم وضحكهم ومشاغباتهم انتهى الوقت
كعدنة بالصالة الوقت الي مخصص النة نلعب وياهم ونسمعهم مثل كل يوم نهتم بيهم وبدراستهم كلش زين ونسمع كلامهم وناخذ مواضيعهم بجدية حتى شخصيتهم تكون قوية ويتعودون ينطون رأيهم بكلشي

كعد ادم بحضني يبوس بوجهي
ادم:اني احبچ

:واني احبك حبيبي

باسني بشفتي وابو عاط
الكسار:ها هااا ترى هاي مالتي

حضني يباوع لأبو بحدة
ادم:ماما هاي مالتي

الكسار:انچب ولك مالتي دموع

باوعلي يرمش
ادم:ماما انتِ مال منو

گرصتة بخدة اضحك
:مالتك يعمري

دفن وجهة بصدري فرحان وابو يضحك علية الله انعم علية بهالأطفال ملو حياتي اللوان وفرح

نام ادم وهوَ حاضني وحسوني يحچي ويا ابو انوب اني نعست محسيت بنفسي من نمت

كعدت على صوت الكسار باوعت لنفسي متغطية
:شنو

الكسار:خالچ ومرتة اجو

كمت تركت ادم نايم حتى استقبلهم دخلو وخالو بعناد الكسار حضني لصدرة يبوس بخدودي

جناح:حبيبة خالها روحة وعمرة بنيتي شلونچ

يحچي ويباوع للكسار
:الحمدلله خالو انتَ شلونك

جناح:زين بنيتي مشتاقلچ

الكسار:افتهمنة ادخل لا ادفرك

ضحك دوم هيچ يسوي يعاند الكسار سلمت على سيدرا ودخلنة للصالة كعدت بصفها

:ها جبتي؟

سيدرا:اي جبت وخالچ عبالة الية اشتريت واحد الچ والثاني الية حتى نكمل الچذبة

هزيت راسي طلعتة من جنطتها واخذتة ضميتة حتى بعدين اسوي
كعد ادم وصار يلعب ويا ياقوت والحسنين وداني

ما طولو ساعة وراحو اطفالي طلعو بالحديقة يلعبون وابوهم راح للمكتب يشتغل استغليت الوضع ورحت اخذت التحليل للحمام

چنت كلش متوترة سويتة وتركتة 20 دقيقة عبالك 20 سنة متحمسة للنتيجة اخيراً انتهى الوقت اخذتة اشوف النتيجة

نزلت دموعي وابتسمت ممصدگة
:حاااامل انييييي

طرت من الفرح بس چان اكو خوف بگلبي لازم اسوي تحليل دم واراجع دكتورة حتى اطمئن ماريد انطيهم أمل وتالي يخيب

غسلت وجهي وطلعت ضميت التحليل بمكان محد يشوفة بي همزين چانت مراجعتي للدكتورة قريبة يعني اكدر اطمئن

طول اليوم واني الضحكة شاگة حلگي العب ويا الأطفال وصار عندي واهس لكلشي سويت كيك وصاج نظفت المطبخ ورتبت الثلاجة مخليت شي مسويتة

طلع الكسار شافني اقصص خيار حضني من ورة
الكسار:ليش الحلو يتعب نفسة

اخذت خيار وقربتها لشفتة اكل منها واني اكلت الباقي
:ماكو تعب ابد

اخذ مني هوَ يقصص الخيار واني رحت اجهز العشة اجو الأطفال واحد يجيب مي والثاني عصير ويخلون الملح ابوهم علمهم اذا شافوني اشتغل لازم يساعدوني

كعدنة نتعشة واني اكل بشراهة واضحك بصوت عالي
:تذكر كسورتي من حرگت قميصك وكلتلك ممتقصدة هوَ كذب اني متقصدة لأن طالع حلو عليك

الكسار:اعرف لعد ماعرف ادري بيچ فد وحدة

باوع للأطفال وكمل كلامة
الكسار:فد وحدة حلوة

الحسنين:بابا ماما حلوة وين لكيتها

باوعلي مبتسم
الكسار:من سطح القمر جبتها وحيدة فريدة

فرحو عبالهم صدك
بعد العشة كل واحد اخذ صحنة للسنگ اني اغسل مواعين وثلاثتهم يرتبون المطبخ ومن كملنة كعدنة بالصالة نحچي واشوف الكسار عيونة علية يباوع بشك واني اسوي نفسي طبيعية ماريد اكول لازم اتأكد من سلامة الجنين اول

نومنة الأطفال ودخلنة للغرفة تأفأفت
:مشتاقة لوهيب اريد اروحلة

الكسار:ماكو روحة دموع ماحب من تروحين للسجن اني اروحلة واصورة الچ عندي عرف هناك

:حباب والله فد مشتاقتلة

الكسار:دموع كتلچ ماكو روحة وانتهى النقاش

كعدت على الچرباية متكتفة بعناد
:اكول لخالو ياخذني

خزرني
الكسار:دموع

حچيت بحزن
:اريد اروح

تنهد واجة كعد كدامي
الكسار: مبقى شي ويطلع دموع اصبري

:گلبي طاگ عليه

الكسار:اصورة الچ؟ فيديو مو صورة واخلي يحچي بي

هزيت راسي بتفهم ميحب اروح للسجن وحتى وهيب يكول لتجين لأن الي هناك مو راحة بس شسوي اشتاقلة ما مصدگة ما ضل شي وطلع

تمددت اباوع لبطني هوَ هم تمدد وحرك ايدة على بطني
الكسار:ليش حاس انتِ حامل؟

بسرعة باوعتلة
:لا بطني تأذيني يمكن باچر تجي تأخرت هالمرة

هز راسة ساكت
مر شكم يوم والوضع طبيعي قنعت الكسار عود اجتني الشهرية واحاول ابين نفسي طبيعية رغم چانت نساوتي متعبتني بس اتقيئ واحب اشمشم بصدرة

بعد شكم يوم انصدمنة بزياد ترك شغلة ويريد يتزوج وحدة روسية محد چان متوقع يترك شغلة بس متوقعين يتزوج روسية لأن من زمان يريد روسية الحلو بالموضوع بيبيتها عراقية من الموصل

تزوجها سوالها عرس بسيط مثل ما طلبت هيَ چانت كلش حلوة سيلا واضح زياد يحبها واكيد سارة من عرفت انطعنت طعن بعدها تحبة وتريدة كلش ضاجت بحيث بنتها عافتها وراحتلة شوي وطردها من البيت كلة

الحمدلله هوَ طلع بيت وحدة من زمان ويا اختة وابنها بس هسة غيث ابن اختة اشترة بيت وسجلة بأسم امة بصف بيت زياد بالضبط

الله يهنيهم

مر شهر على حملي والحمدلله مر هالشهر بخير صح هواية اتعب بس المهم يتم على خير
الكسار راح للبنان يدور على حسن وطلع تشابه اسماء واصلاً الشخص ميت شاف صورتة وكل بصماتة وقارنهم بحسن وطلع مو هوَ

دخلت للغرفة ارتبها دخل وراية الكسار
الكسار:اكلچ اني معاجبني وضعچ خلي نروح لدكتورتچ باچر

:ياااا لتبالغ مبية شي بس نوبة صرع اجت عادي

الكسار:دموع خاف يصير بيچ شي وجهچ اصفر

ابتسمت وحضنتة
:كلشي مبية يروحي بس تعرف تعب الأطفال والصرع وتفكيري بوهيب انقهر من عرفت المساجين ديأذو

الكسار:لا تشيلين هم وهيب اخوچ ما تهمة هالسوالف بس لو يبطل يتعارك وياهم كلشي يصير بخير ما باقيلة شي ويطلع

حط شعري ورة أذني مبتسم
الكسار:من باچر نبدي نجهز غرفتة ببيتنة

:متحمسة اريدة يعيش يمي ما اخلي يطلع والله

الكسار:اني هم ما اخلي من هسة دبرتلة شغل مثل ميريد وراح نجهز غرفتة وبس يطلع احجزله عند طبيب نفسي مثل ما طلب بعدة شاك بنفسة عندة اضطرابات يمكن السجن تعب نفسيتة

:ياروحي هوَ شوكت تروحلة

الكسار:الأحد نروحلة انه وخوالچ

:زين خلي اجهز جنطة حخلي بيها معجون وفرشة اسنان وصابون وشامبو خاف خلص الي عندة وهم اشتريلة فراش جديد

الكسار:زين بوية جهزيلة كلشي واني اخذة

بستة بخدة بعد مچان ميطيق اسم وهيب صار كلش يحبة وميقبل عليه ابد من عرف المساجين يأذو بالكلام وهوَ يروح يضربهم راحلة وفهمة ميصير يتعارك خاف يزيدون مدة حكمة وخلاهم ينقلو لغير غرفة

اخوية ميحب يحچي هواية ومنطوي يخلص يومة بالسجن يصلي لو يكتب ومن يشوفو هيچ يصيحولة المخبل لو المتوحد وهوَ ميتحمل عصبي يكوملهم يضربهم ويضربو شكد ما اكول عنة قوي اظلمة ميكدرولة ويحقدون علية

عصبي بس ماكو اطيب من گلبة حتى وهوَ متعارك وياهم الأكل الي ندزة اله يقاسمة بينة وبينهم ومن عرفت صرت ازيد واسوي هواية يكول ماكدر اكل واخلي البقية
كريم وطيب والناس عليها بالمظاهر وبس شافو شكلة الحاد ومشافو گلبة الطيب

السبت كتبت كلشي احتاجة بورقة وراح جابة الكسار خليتلة كلشي بالجنطة ملابس نظيفة ومنظفات شخصية وجبت فراش جديد

كعدت من الفجر رحت اطبخلة سويتلة دولمة وبرياني تكفيهم وسويتلة اكلة هوَ يحبها چان شيخ محشي ماريد يبقى شي بنفسة
اخذهم الكسار وراحلة واعرفة حيدفع فلوس يلا يدخلون الأغراض لأن مادري ليش ممنوع

اتمنيت اروح ويا بس ميقبل لا هوَ ولا وهيب حتى خوالي ميقبلون سدوها بوجهي لأن يعرفون بس اروحلة اضل ابچي لحد ما تجيني نوبة صرع

الظهر يلا اجة الكسار طفرت على حيلي متلهفة
:ها غوث شفتة شلونة طمني

احتضن اكتافي يمشيني
الكسار:زين حبيبتي كلش زين

سحب ايدية باسهم وكال
الكسار:كال بوسلي ايدين دمعة وكللها عاشت ايدچ

:دخلو الأكل حياكل مو

الكسار:اكيد كلشي دخل بعد ما تفتش لا تشيلين هم تعالي يمي

سحبني كعدني بصفة وطلع تلفونة
الكسار:وهاي صورتة الچ

اخذت التلفون من ايدة عيوني مدمعة بقيت صافنة على ملامح وجهة الحلوة مكدرت ما ابچي چان يباوع للتلفون ويحچي

وهيب:ديصور؟

الكسار:اي احچي

ابتسم ولوحلي بأيدة
وهيب:سلام دمعة مشتاقلچ هوااااااية لا تخافين علية اني بخير وعاشت ايدچ على الأكل وكلشي حبيبتي

چان يحچي بلهفة عبالك اني كدامة عيونة تلمع
وهيب:بوسيلي حسوني وادم حييييل وها كليلهم خالكم يحبكم  ومشتاقلكم

اجة صوت
:كافي ليجي المدير شيفكني من عندة

هز راسة دار وجهة وانصدمت اكو كدمة بصف أذنة
وهيب:يلا دمعة مع السلامة انتبهي على نفسچ راجعلچ

خلص الفيديو واني ابچي وباوعت للكسار
:منو ضاربة شنو هاي

الكسار:اششش ماكو شي لا تهتمين هم تعارك وياهم بس مصارلة شي اخوچ سبع مكسرهم تكسر

غطيت وجهي ابچي
:شنو يردون من عندة الحقراء سودة علية حبيبي

الكسار:كافي دمعة اهدي تعالي وصاني ابوسچ هم هوَ كال على خدچ بس الخد ميصرفلي

باسني بشفتي وابتعد ضحكت علية امسح بدموعي
:احبك واحبة واحب اطفالي احبكم

الكسار:واحنة نحبچ حبيبي

اجو الأطفال وبعد الأكل صعد الكسار ينام الأطفال يلعبون واني كعدت بالصالة اكل مخليت شي ما اكلتة حتى مربى وجزر اكلت معدتي خبطت

اتصفح بالتلفون واكل يطلعولي اطفال يبچون يجننون
الكسار شاك بية بس اني انكر چنت مخططة لفد شي حتى اكوللهم

صرنة بوقت فراغنة نطلع نشتري اغراض لوهيب اشترينالة غرفة وملابس  وخالي فهد هم جهزلة غرفة ببيتة رغم چنت مقابلة بس مردت اكسر فرحتة بوهيب

غرفتة صارت تجنن رتبت ملابسة واغراضة وكل ما اشوف شي اجيب من الفرح حتى دب جبتلة وغوث يضحك علية

الأطفال كل يوم يسألون شكد بعد ويطلع ويطفرون فرحانين

كملت غرفة وهيب من كلشي تلفزيون ملابس غرفة نوم اغراض شخصية قفلتها وصرت احسب الساعات حتى يرجعلي

ليلة رأس السنة نمت العصر صايرة شكد احب النوم كعدت بالليل خليت مكياج ولبست فستان احمر شسورت شعري رتبت نفسي على الأخر

نزلتلهم حتى نصور اربعتنة احنة ليلة رأس السنة نعتبرها مناسبة عائلية لأن عيد ميلادي كل سنة نحتفل مع بعض

فاجأوني مثل كل سنة مسوين كيكة واجواء عيد ميلاد
الحسنين:كل عام وانتِ بخير ماما

ادم:كل عام وانتِ بخير ماما حلوة

سحبتهم لحضني فرحانة بيهم
:يروح الماما وانتِ بألف خير كل سنة وانتو وياية الله يحفظكم الية

باوعلهم الكسار وكال
الكسار:روحو جيبو الهداية وتعالو بسرعة

راحو يركضون وهوَ استغل الوضع وسحبني حضني
الكسار:كل عام وانتِ حبيبتي ومرتي وروحي وام اولادي كل عام وانتِ بخير دموعي

تعلگت برگبتة
:وكل عام وانتَ عيوني وگلبي ربي يخليك الية

باسني بشفتي بادلتة
دخلو الأطفال وابتعدنة عن بعض خلو الهداية على صفحة چنت اسمع شي يتحرك بس غلست

نفخت شموعي مبتسمة وقصيت الكيكة
:عيد ميلادي الثلاثين اتمنى من ربي تدوم علينة هالفرحة وهاللمة الحلوة والسنة الجاية ينورونة فردين

رفع حاجبة وصفن بوجهي
الكسار:فردين؟ وهيب ومنو؟

تقربتلة اباوع بعيونة طلعت تحليل الحمل خليتة كدامة
:وهيب وطفلنة الي جاي

فتح عيونة وضل يباوع للتحليل ويباوعلي ممصدگ
الكسار:صدگ عود؟

خليت التحليل على الميز وحچيت بفرحة وعيوني مدمعة
:اني حامل مُكسراتي

توسعت ابتسامتة واخذني بحضنة شالني يفر بية واني اضحك
الكسار:چنتتتتت شااااك والله چنت شاااااك

نزلني وحاوط وجهي من فرحتة يرجف
الكسار:كلش فرحان دموع گلبي راح يوگف لچ هديتيني هدية بعيد ميلادچ

:تدوم علينة الفرحة يروحي

ميعرف شلون يعبر صار يحضني ويبوسني ممصدگ باوعت لأطفالي فرحانين لأن حيجيهم اخو جديد حمدت ربي وشكرتة على هالنعمة

اجو اطفالي انطوني هديتهم چانت قطة صغيرة تجنن كلش فرحت بيها لأن من زمان اريد قطة

والكسار اهداني گلادة ذهب وسوار حضنتهم
بيومها منمنة ابد كعدنة اكلنة وسولفنة والفرح مالي حياتنة

للفجر الأطفال نامو واني صعدت للغرفة وهوَ اجة وراية بس دخلنة حضني
الكسار:فرحتيني هواااااية

:واني هم فرحانة كسوري روح جديدة تمنو داخل احشائي بعد كلشي صار

داعب وجهي بأبهامة
الكسار:الماضي راح علينه بالحاضر والمستقبل بس تخف زحمة الناس نروح لدكتورتچ طمنة على الجنين

هزيت راسي وصدگ بعد 3 ايام رحنة لدكتورتي وبشرتني الطفل سليم بس حيتعبني بالنساوة فرحنة بزيادة

صار الكسار ميقبل اشيل هالگد بالبيت حتى طبخ ميقبل اطبخ تنظيف هوَ ينظف كال اجيب مساعدة بس اني رفضت خطية ام جمال تعبانة هالفترة بس احفادها يجون يلعبون ويا اطفالي

خوالي عرفو وباركولي زياد مسافر وبعد يومين ويرجع
تجمعنة كلنة خوالي موجودين وباهر واجو روان وغيث

كعدو يسولفون طبيعي اني عود داخلي گلاص العصير بس طاح من ايدي وانكسر كلها باوعتلي واني بچيت خلصت هالفترة بس ابچي

كلهم التمو علية خوالي لازمين ايدية والكسار يهديني وباهر يهفي علية وغيث يجيبلي مي وسيدرا وروان يمسحون بدموعي واطفالي يعصرون برجلية حصرتني الضحكة بنص البچية

الكسار:انكسر الشر حبيبتي لتبچين

فهد:اني اجيبلچ عشر سيتات گلاصات مسحي دموعچ

:ليش ينكسر هوَ اني شسويتلة بس وكع شبي انكسر

الكسار:يروحلچ فدوة هوَ دلوع يغار منچ وايدچ ترفة

مسحت دموعي وابتسمت
:اي خلي يولي يغار

باهر طلع هوَ وغيث برة يضحكون لأن لو ضاحكين كدامي چان الكسار وخوالي شبعوهم چلاليق
هدئت وانوب صرت اضحك على نفسي متحمليني ومتحملين هرموناتي السرسرية صايرة كلش اتعاير بس مو بيدي

20241/13 جاي اشوف الكسار كلش مشغول وبس يخابر ماعرف شنو يريد يشتري بس الحديث بي سيارة

خلص مكالمتة وراح لسيارتة شوي واجة شايل ايفون 12 برو ماكس حطة بحضني شلتة مستغربة

الكسار:هذا لأخوچ بس يطلع خلي يتعلم عليه يفيدة يعرف انكليزي مو

كلش فرحت لأن ذكر وهيب لأن اني چنت ناسية موضوع التلفون
:اي يعرف چان يحچي بطلاقة

الكسار:هم زين حتى السنة هاي يقدم خارجي سادس علمي اخوچ احسة كلش ذكي وبسرعة يفهم

:اي هوَ ذكي چان كلش شاطر بدراستة بس ترك بسبب التنمر على شكلة وعلى اهلة ماكدر يتحمل بس هسة يرجع اريدة يشوف الحياة حلوة يفرح بيها

الكسار:مو لأن كدامچ بس وهيب كلش قوي تحمل هواية اشياء متأكد مستقبلة راح يكون حلو

حطيت ايدي على حلگي متحمسة
:متحمسة شوكت يطلععع الله اريد احضنة وابوسة اريد نلعب سوية

الكسار:اي مو جهال

تكتفت معاجبني
:وانتَ هم تلعب ويانة سمعت

ضحك وگرص خدي
الكسار:مفهوم دمدمي

ضحكنة سوية اخذت التلفون وصعدت اخلي بغرفتة شفتها بيها تراب ما هان علية شكلت ملابسي ومسحتها كلها وعطرت الأرضية وبخرتها صارت تجنن جنت جايبتلة ملابس زيادة هم رتبتهم

بيومها نمت واحس نفسيتي مرتاحة ماعرف ليش
كعدت ثاني يوم ملگيت الكسار عرفت راح لشغلة والأطفال هم رايحين سودة علية راحو بدون ريوگ

نزلت تريگت ورتبت البيت مادري شبي گلبي يدگ سريع واحس نفسي متحمسة لشي ما اعرفة
اتصلت علية سيدرا كالت اني بالباب رحت فتحتلها طلعت جاية هيَ وروان وداني وياقوت شوي ودخلو وراهم حسونات وادومات استغربت ليش مو بالمدرسة سألتهم كالو بابا رجعنة

:هاي شكو يااا لازم اتصل على ابوكم عندكم امتحانات انتو

رفعت التلفون اريد اتصل وسحبتني سيدرا
سيدرا:عوفي ابوهم هسة روحي لبسي صاية ولفي حجابچ وتعالي

عگدت حواجبي
:ليش

سيدرا:بدون الليش دموع اخذت أذن زوجچ حتى نروح نحف بسرعة يلا يلا

:ياااا سيدرا والأطفال

روان:ناخذهم ويانة معليچ روحي يلا

رحت مستغربة الوضع لبست صاية فوك ملابسي ولفيت حجابي خليت مسكارا وحمرة شي خفيف

نزلت بس مشفت الأطفال
:كملت بس وينهم احباب الله

سيدرا:معليچ بيهم امشي ويانة

سحبني من ايدي واني بس اريد افهم شكو طلعني للحديقة چان غيث واكف يخابر أشرتلة امة وهوَ هز راسة وطلع

روان:هسة شوي ويجي غيث حتى يوصلنة

:احسسسس اكو شي مو طبيعي شكو

تجاهلو سؤالي واني گلبي يلعب اباوع للباب واكل بشفايفي ماعرف من شنو دارجف

دخلو اطفالي يطفرون ويصيحون
:اجة خالو اجة خالوووو

فتحت عيوني على وسعها وحسيت نفسي دخت بقو الأطفال يطفرون ويصفگون فرحانين واني ممصدگة

انفتح الباب كلة واحس گلبي انخمش محسيت بنفسي من دفعت روان وسيدرا وعيوني متركزة بوجهة الحنون

اباوع بعيونة وعيوني من وحدها تنزل دموعها چان عاگد حواجبة من شافني لانت ملامحة وابتسم ترك الكل وركض علية ملهوف فتحتلة ايدية

:يروح اختك يا نظر عيونها

اخذني بحضنة يبچي واني ابچي ويا يضمني بحضنة ميريد يبتعد ولا اني اريدة يبتعد عني يبوس براسي ويشهگ

:يمة گلبي حيوگف دخيلك ربي شكد كريم الحمدلله والشكر رجعتلي اخوية سالم غانم فرحتني بي وبشوفتة

ابتعدت عنة ابوس بوجهة وهوَ مدنگ عليه يبتسم ويبچي
:حبيبي شلونك مشتاقتلك الحمدلله على سلامتك گلبي طاگ عليك

سحب ايدية من وجهة يبوس بيهم
وهيب:الله يسلمچ الية دمعة روح وهيب انتِ ميت على شوفتچ روحي تلوب عليچ بالسجن طلعت علمودچ

بقيت بحضنة نعبر عن اشتياقنة لبعض ناسين الكل احضنة وابوس بوجهة وهوَ يدنگ يبوسني ويبوس ايدية وراسي ويرجع يحضني محتار شنو يسوي

:شوف هذول يتعاركون عليك شوفهم

مسح دموعة وباوعلهم كعد على ركباتة وفتحلهم ايديه
وهيب:تعالو خالو

ركضو لحضنة فرحانين بخالهم غمض عيونة وحضنهم حيل
وهيب:گلبي ما فرح بحريتي گلبي فرح بشوفتكم وبشوفة امكم

الحسنين:خالو احنة نحبك هواااااية

باسو بخدة ما استغربو لأن من البداية خليتهم يعرفون وهيب ويحبو
تركهم ورجع حضني ميقبل يعوفني ذبحو خروف لسلامتة ورحنة كعدنة بالصالة حاضنتة حيييييل ماريد حتى اتحرك وهوَ يحچي وياية والكل عيونهم علينة فرحانين

وهيب:كتبت كلشي عنچ بالسجن عنچ وعن فرحتي الماتت كل يوم اخلص وقتي اصلي واكتب ماكتبت عن نفسي كتبت عنكم

:رجعنة وهيب لحد هسة ممستوعبة الموضوع اخيراً ربي جمعني بيك بعد كل هالسنين واني انتظرك فرحانة اريد اصلي صلاة شكر

كال الكسار
الكسار:روحي صلي خلي اخوچ يسبح ويرتاح ويرجع

طفرت بفرح
:اي صدگ امشي اشوفك غرفتك كلشي اختاريتة اني

كام وياية بس حسيتة رافض يبقى هنا بس ميريد يكسر فرحتي واني مستحيل اخلي يبتعد عني
اخذتة لغرفتة اشوفة كلشي والفرحة بوجهي واضحة

:شوف هاي غرفة النوم اني اختاريتها حلوة مو

باوعلي عيونة تلمع
وهيب:كلشي من اختيارچ حلو

سحبتة للتلفزيون
:شوف هنا اذا تحب تشوف مسلسلات لو لعبة كرة قدم اعرفك تحب كرة القدم وچانت امنيتك تصير لاعب وها هنا جبتلك عطورات واكو حمام بغرفتك رتبتلك كلشي شبي

ضل صافن علية اخذتة للكنتور اشوفة الملابس
:اختاريتلك ملابس على ذوقي اعرفتك تحب هاي الألوان اطلعلك ملابس تسبح وترتاح اروح اصلي وارجعلك

وكفني يتنهد
وهيب:ليش تعبتي نفسچ هيچ

:شنو تعبت نفسي يروحي انتَ كلشي قليل بحقك اني مصدگت ترجعلي انطيك روحي بدون ما افكر

سكت طلعتلة تراك وانطيتة المنشف راح للحمام واني ركضت توضيت ورحت لغرفتي فرشت سجادتي وصليت ركعتين شكر لربي من كمت رفعت ايدي ابچي وصرت اشكر ربي على كلشي الله سبحانه وتعالى ابد مينسى عبد من عباده فرحني بأخوية ونظر عيني

كملت ونزلت جوة چان بعدة يسبح كامو خوالي حضنتهم اتشكر منهم وحضنت الكسار ابچي وهوَ يمسح بدموعي فرحان على فرحتي كسار ونعم الزوج ماكو رجال يسوي الي سوة لأخوية

وخرت عنة اشكرة بنظراتي وهوَ يبتسملي ويهز ايدة مسح دموعي وكال
الكسار:لتبچين من ينزل افرحي ويا طلبت غدة حتى ياكل ويروح ينام لحد يزعجة

:اي اي محد يزعجة نعوفة يرتاح

باس راسي مبتسم تركتة ورحت وكفت بباب الصالة انتظرة ينزل اعرفة يحب يسبح ويتأخر بس چنت مشتاقتلة هواية ما ابالغ بس هذا اخوية الي انحرمت من عندة سنين

نزل حبيبي سابح رحتلة عبالك طفلة رايحة لأبوها حضن اكتافي
:نعيمًا

وهيب:الله ينعم عليچ دمعة

حضنت خصرة ورحنة كعدنة على القنفة
:تعبان مو هسة نتغدة وتروح لغرفتك ترتاح وتنام محد يزعجك

مسح على راسي بحنية
وهيب:ماريد انام اريد ابقى يمكم اشبع منكم

اجة حسنين وكف كدامة تركني وسحبة كعدة على رجلة
الحسنين:خالو اليوم انام عندك عادي

باسة بخدة
وهيب:اكيد عادي احن شي على گلبي تعالو انتَ وادم نامو يمي

برطمت شفايفي اريد ابچي
:لعد واني؟

باوع للكسار ورجع باوعلي يضحك
وهيب:اني ادفر بنومتي وانتِ حامل استري علينة

:ماااا مااا والله ما انام يمك خلي الأطفال ينامون عند ابوهم اني مشتاقتلك اريد انام يمك

وهيب:بعدچ عنيدة وراسچ يابس

:اخوية وهيب اطباعي نفس اطباعك

وهيب:يروحلچ فدوة وهيب دمعة

بستة بخدة طايرة من الفرح
وصل الغدة كمنة اني والبنات صبينة والكل كعد غلى السفرة انتبهت وهيب كلامة محدود ويا الكل بس اني والأطفال يحچي ويانة وفرحان هوَ انطوائي واكيد البقية متفهمين حالتة

كعدت بصفة ناكل افتحلة اللبن اقربلة الطرشي
وهيب:داكل اني اكلي لتلتهين وياية

:وين دتاكل والله متكوم اذا متخلص الصحن كلة

وهيب:هيچ يطلعلي كرش

ضحكو كلهم على كلامة
:عادي حتى بالكرش حلو شوف باهر كرشة مترتين وعادي عندة

رجعو ضحكو وباهر غص باللگمة هوَ كذب معندة كرش بس احب اضوجة شمر علية خاشوگة بلاستك

باهر:كرش بعينچ ويني وين الكرش

:اي اكيد متقبل تحچي على نفسك روح اضعف ابو النسوان

بس كلت ابو النسوان باوع لأبو
باهر:والله كذابة منيلي نسوان هيَ بس اريج ولينا وريحانة ومريم

:ممقصر فريق كرة قدم هذا

عض اصبعة يسكتني واني متونسة لأن دافضح بي
كملنة الغدة وچان كلشي سفري راح للزبالة اكرمكم الله طول الوقت كاعدة بصف وهيب واحچيلة كلشي مخليت شي محچيتة وهوَ يرد علية متونس

:ادم وحسوني يتعاركون عليك واني سكتتهم اكللهم خالكم يحبني وبس

وهيب:احبچ واحبهم من شفتهم روحي تعلگت بيهم

تقربت همست بأذنة
:تحب خوالي؟

دنگ راسة مجاوبني سوة سكيب لسؤالي رجعت همست
:زين وزوجي تحبة لو تكرهة

ابتسم
وهيب:ما احب احد بس احبچ بس هم اعزهم ما قصرو بحقي واني ما انكر بس بعدني ممتقبلهم يمكن بالمستقبل اتقبلهم الي سوو وياية محد يسوي

:ترى والله يحبوك كلهم ويحترموك

هز راسة وسكت مردت احرجة مع الأيام يتقبلهم
صار الليل الكل راح بقينة بس احنة كاعدين بالصالة من شاف محد كال موجه كلامة للكسار

وهيب:اني بس هاليومين ابقى هنا راح ابيع بيتنة القديم واشتريلي بيت على گدي واكعد بي

بهت وجهي من حچة هيچ ردت احچي وقاطعني الكسار
الكسار:لا ابد ماكو روحة من هالبيت اختك هنا وهذا بيتها مو بيتي كلة مسجل بأسمها

وهيب:حتى لو اني ما احب ابقى بمكان مو مكاني هنا انتو عائلة شعندي وياكم اريد اعتمد على نفسي

الكسار:الأعتماد على النفس شي سهل اني خاسر اخوة أثنين ومن اجيت انتَ صرت اخوية الثالث حالك حالهم واني اريد افيدك طلعة ماكو وراح تعتمد على نفسك عندي سوبر ماركت چبيرة مبيها مدير احتاجك تصير المدير وراتبك الشهري مليون والمبلغ يزيد

حط ايدة على صدرة
وهيب:مشكور ماكدر اشتغل عندك عندي صديقي دبرلي شغل عمالة وياهم 25 وعشرين تكفيني وزايدة علية

الكسار:مراح تشتغل عندي راح تصير ملكك الأيرادات للعاملين تحت تصرفك وكلشي بيها الك ماكدر اثق بغيرك

لزمت بأيدة
:وافق وهيب ليش تكسر ظهرك بالعمالة حباب وافق

تنهد
وهيب:ان شاء الله خير

الكسار:هسة المهم ترتاح شكم يوم حتى ناخذك تزور اهلك وبالوقت الي يعجبك تجي تستلم الشغل

بس كال اهلك رفع عيونة يباوع بحدية
وهيب:اهلي شنو؟؟

الكسار:اختك وزوجها وابنها امك وابوك اذا متريد لتزورهم

وهيب:ماريد المح قبورهم اني كتلتهم بأيدي وخلصت من شرهم لا تجيبولي سيرتهم

:مثل متريد لتعصب حبيبي

وهيب:ممعصب دمعة ممعصب

كام يباوعلي مبتسم
وهيب:رايح انام وين الأطفال

بس كال هيچ دخلو يطفرون لزمو ايدة وهوَ يضحك حابهم
وهيب:يلا تصبحون على خير

الكسار:وانتَ بخير

تخوصرت اباوع للأطفال بصدمة كل يوم اسحل بيهم سحل حتى ينامون وهسة بس صاحلهم راحو فد قهروني على ابوهم ملعبين

باوعتلة متخوصرة
:شنو هاي ولدك؟

الكسار:خلي يروحون لخالهم تعالي بحضني تعالي

كام يريد بحضني ابتعدت اباوعلة ببراءة
:خلي اروح انام عند وهيب

لزمني من زنودي يحچي بتمسكن
الكسار:لعد واني؟

رفعت عيوني افكر
:تنام وحدك؟ بس اليوم هاااا

حضني حيل
الكسار:ماكدر ماكدر امشي ننام واخوچ باقي يمچ طول العمر كل يوم بعد تشوفينة وتكعدين ويا وتسويلة اكلات يحبها

تأفأفت
:ماشي

رحت كدامة للغرفة ضايجة غيرت ملابسي وهوَ دخل ابتسمت ورحت بستة بخدة

:فرحتني هوااااااية اليوم

الكسار:سويتها الچ مفاجأه صار 3 ايام اعرف راح يطلع

دخلت بحضنة اليوم اسعد يوم بحياتي نمت واني من الفرح احس گلبي يريد يطلع من مكانة

ثاني يوم كعدت من الصبح سويت ريوگ من كلشي مخليت شي مسويتة خليت الچاي على النار اول شخص كعد الكسار وصار يساعدني

وهيب:صباح الخير

التفتت وابتسمت ابتسامة عريضة
:صباح النور حبيبي تعال اكعد سويتلك ريوگ يجنن

كعد بدون ولا كلمة نزلو الأطفال لابسين ملابس المدرسة كعدو بصف خالهم واحد منا والثاني منا وصارو يسألون بي اسئلة ما الها داعي بس حتى يحچي وياهم وهوَ متونس عليهم

حطيت البيض وكلت
:ماما لا تتعبون خالكم بالأسئلة

وهيب:لا عوفيهم يحچون اي خالو كمل

كعدو يشرحولة كلشي والبزونة اجت وكعدت بحضن الكسار وهوَ تلعب نفسة منها بوقت الأكل

الكسار:اني ورطت نفسي من جبت هالبزونة شيليها دموع

كام وهيب اخذها من حضنة من زمان يحب البزازين چان كل يوم يوكلهم واذا مطرت يسويلهم مكان ببيتنة حتى لا يتبللون
كعد وحطها بحضنة

وهيب:شنو تخاف منها؟

الكسار:لا يا اخاف بس لعبان نفس كاعدة بحضني واني اكل

وهيب:چان عندي هواية بس من ردت اطلع تهريب عرضتهن للتبني وحتى بزازين شارع عندي

ادم:خالو تحب بزونات انتَ

وهيب:اي احب الحيوانات كلها

:اتذكر چنت تدخل البزازين للبيت واتذكر الكلاب تنطيهم اكل

تنهد يلاعب البزونة
نزلت من حضنة وهوَ كام غسل ورجع يتريگ سويتلة البيض مثل ميحب نص استواء وصار ياكل
صار عمرة 34 وانحرم من ابسط حقوقة الي هيَ حياة طبيعية وتكوين عائلة

كمل ريوگ وكال بهدوء
وهيب:اريد اروح للنجف البارحة فرح اجتني بالحلم مشتاقتلي لازم اروحلها

الكسار:تدلل باچر اخر يوم لأمتحانات الأطفال ان شاء الله من يعطلون اخذك انتَ واختك حتى تزورونها ويمكن خوالك يردون يروحون عادي مو؟

وهيب:اي عادي شعلية اني ماعندي مشكلة وياهم

سكتو فرحت لأن حنروح لفرح مشتاقتلها هواية
الكسار اخذ الأطفال وراحو واني صرت ارتب المطبخ ووهيب وياية يسولف ويضحك

وهيب:وين چنتي شعرچ ملولو هسة صاير سرح وضعفانة

:لتتنمر علية اني تغيرت

وهيب:كل ما تكبرين تحلوين ماكدر اتنمر عليچ دمعة

:حبيبي انتَ كول شنو مشتهي اسويلك غدة

وهيب:ماريد شي دمعة كلشي من أيدچ حلو

نشفت ايدية اباوعلة
:لا حباب كول شنو اسويلك اسوي بامية لو تبسي دجاج لو برياني لو أي شي تختارة انتَ

اخذ ايدي باسها
وهيب:سويلي برياني من ايدچ الحلوة حتى من تكملين اريد تشوفيني صور فرح كلها وابنها وزوجها واذا عندچ فيديوهات الهم هم

:تدلل حبيبي ياااا صدگ نسيت حتى تلفون جبنالك حروح بسرعة اجيبة واجي

ردت اروح لزمني من ايدي
وهيب:حامل ترى شنو تركضين اني اجيبة وينة

دليتة على مكانة وراح رتبت المطبخ وبديت اجهز بالغدة
نزل لازمة بأيدة يضحك

وهيب:چنت اتذكر عندي ايفون 5 انقرض مو؟

:من زمان هسة نزل ايفون 15

هز راسة يضحك
وهيب:حييييل

حطة على الشحن وكعد يمي نحچي فتحت تلفوني وطلعتلة صور فرح وعائلتها والفيديوهات كلها

شاف اول صورة ضل صافن يكبر بيها كام وحچة بغصة
وهيب:اني بالغرفة دموع من تحتاجيني صيحيلي

اخذ التلفون وراح تركتة براحتة ميكدر يظهر مشاعرة يبقى وحدة احسن
رجعت اكمل الغدة اول مرة اطبخ واني فرحانة ومتحمسة
سويت برياني وتبسي وسويت لبن وچان الكسار جايب طرشي قصصتة مخليت شي شنو اتذكر اسوي

كملت الغدة وكعدت بالمطبخ انتظرهم يجون وهيب ما نزل بعد خليتة براحتة طبيعي يحتاج وقت لنفسة متفهمة هالشي

نزل بعد فترة وجهة تعبان كلش انطاني تلفوني
وهيب:اجو الأطفال لو لا

:لا لسة هسة يجون

هز راسة وكعد ساكت ما حچة شي بعد
اجو الأطفال وابوهم وتغدينة وبعدها رحنة نمنة حتى من اكعد ادرس اطفالي لأمتحان باچر

خلصت الأمتحانات جهزنة نفسنة حتى نروح للنجف
احنة بسيارة وخوالي بسيارة چان الجو بارد لبسنة هواي ملابس
چان الطريق طويل بس اني نمت ولا حسيت بي والكسار ووهيب يسولفون

وصلنة الفجر توضينة ودخلنة زرنة الأمام علي عليه السلام وصلينة وبعدها رحنة للمقبرة وهيب وجهة انطعن وعيونة صارت حمرة وضل ساكت ما نطق بحرف لزمت ايدة عصرتها باوعلي يبلعم

چانت اول زيارة لوهيب لقبر فرح
وصلنة بعد نص ساعة نزلنة ورحت لزمت ايدة وصرت امشي ويا اهدي بي وابچي باهر لزم الأطفال

وصلنة لقبورهم اباوعلة ضل صافن على اسم فرح ويرجف
اجة خالو فهد طبطب على كتفة

فهد:هذا قبر اختك خالو وابنها وزوجها

كعد تلمس اسمها المحفور وونطق بغصة
وهيب:فرحتي

كعدت بصفة ابچي هوَ حضن قبرها وصار ينحب عبالك طفل امة ماتت كل الموجودين صارو يبچون وهوَ يعاتبها

وهيب:فرحة اني وهيب اجيتچ وين عفتيني امي ليش رحتي قبل لا اشوفچ حبيبتي مسمعت كلمة خالو من حسن مكدرت احضنچ واشكيلچ تدرين بية متعلق بيچ هيچ تعوفيني

سكت يبچي بكسرة ثواني ورجع حچة
وهيب:الية الموت مو الچ فرحة الموت الية اني المذنب مو الچ انتِ البريئة والحنونة والطاهرة

حضنت ظهرة وعيوني مبطلت بچي
:ترحملها حبيبي وهيب

باس قبرها وباوع لقبر حسن الي مطبوعة بي صورتة هنا انتهى وهيب كلش فقد يبچي بصوت عالي ويحچي ويا قبورهم بحسرة

وهيب:ياريييييييت لو ملتقي بيكم ياااارييييت لو بس ماخذكم بحضني انتَ وامك اتمنى لو شام عطركم وسامع صوتكم

قرالهم الفاتحة ثلاثتهم مهدود حيلة ودموعة تصب
شفتة كام يدور بعيونة هناك وطاحت عينة على قبر امي وابوية باوعلهم بحقد مسح دموعة

وهيب:ليش دافنيهم هنا

فهد:لتهتم وهيب ابقى عند اختك

مسمع كلامة راحلهم يهرول يباوع للقبور بحقد وغل كور ايدة وضرب قبر ابوية بقوة حسيت ايدة انكسرت وايدة الثانية على قبر امي كلش فقد گوة كدرو يلزمو خوالي والكسار وهوَ يحاول يفلت نفسة منهم ويضحك

وهيب:انييييي قتلتكممممم بأيديييي وما متندممم لو باقيييين هم اكتلكم اني اني وهيب قتلتكم بكل دم بارد هسة اني حر طليق وانتو بجهنم الحمرة حرمتوني من خواتيييييي وحدة منهم ماتت والثانية رجعتلي ما مسامحككممم ابدددد ما مسامحكمممم

نزلت دموعة وهوَ يضحك واني احاول اهدي بي
وهيب:ما اسامحكم على بيعكم لخواتي ما اسامحكم على موتة فرح وعائلتها ما اسامحكم على شبابييييي سياف وشاهيناز ابنكم ما باريكم الذمة

دفعو للسيارة وهوَ يصيح عليهم
وهيب:وخروووو اريدددد اودع فرحتي وخرووو

تركو وراحو وكفو كدام قبور اهلي حتى ليروحلهم باس القبر يودعها يحچي وياها بهمس انوب باوعلي واشرلي اكعد بصفة كعدت وحضني

وهيب:شوفي هاي دموع التقيت وياها ان شاء الله اصير انسان زين والتقي وياچ بالجنة  سامحيني لأن ما لگيتچ دورت عليچ هواية دخلت اماكن مشبوهة بس اريد أثر منكم وما لگيت ليلي ما نمتة واني افكر بيكم

:اششش حبيبي على شنو نسامحك انتَ مسويت شي انتَ حاربت وحاولت علمودنة مو بيدك كلشي صار

فهد:كافي وهيب تعبت نفسك كوم وياية خالو

سحبة وحضنة اول مرة اشوف وهيب يحضن خالو
كعد الكسار يزور اخو والأطفال هم اجو لأن حاچيلهم عن خالتهم وعائلتها

طلعنة من المقبرة الكل مهموم الكسار بالطريق نزل لصيدلية جاب معقم وشاش لأن ايدين وهيب تأذت خليتة يجي يكعد يمي والأطفال كعدو كدام

سحبت ايديه اعقم بيهم والفهم
:ليش أذيت نفسك هيچ

وهيب:ماعرف دموع فقدت اني اني يمكن بعدني احتاج المصحة

باوعتلة خازرتة وشفايفي ترجف
:لا مبيك شي انتَ اني هم من شفت قبورهم هيچ سويت لتكول هيچ عن نفسك وهيب ماكدر اتخيل ترجع تبتعد عني

دنگ راسة يتنهد كملت ايديناتة وسحبت راسة خليتة ينام على رجلية واني امسد بشعرة الناعم

وهيب:دموع لا تدنگين هيچ انتِ حامل

عدلت ظهري
:تمام ما ادنگ ارتاح حبيبي

ابتسم بتعب وغمض عيونة باوعت للكسار چان يباوعلنة من المراية ويبتسم
الكسار:اكو عصير يمچ شربي

:اخاف تلعب نفسي من نوصل لكربلاء ناكل

سكت منتبه للطريق
بعد فترة وصلنة لكربلاء أجرنة فندق دخلنة سبحنة وانوب رحنة نزور
چان شعور ولا اروع ناس هواية بالحضرة منظرهم يجنن
الأطفال انطلقو يلعبون يحبون من نجي هنا كعد وهيب بصفي وخوالي يمنة سيدرا بصف زوجها وباهر كعد يخابر بعيد

شفت الكسار تمدد وحط راسة بحضني دخلت اصابعي بين شعرة غمض عيونة باوعت لوهيب شفتة يباوعلنة رافع حاجبة

وهيب:عمرك داگ الأربعين صغيرون نايم بحضنها؟

باوعلة الكسار
الكسار:غير يستقر العشريني ترى حالك حالي ماكو فرق هواية وبعدين مرتي

حچة بغيض
وهيب:اختي قبل لا اصير مرتك

الكسار:المهم هسة هيَ مرتي

باوعلي معاجبة
وهيب:سكتي رجلچ دموع سكتي

:ياااا شبيكم تتعاركون اريدكم انتو الأثنين كلهم وليداتي

بس كلت هيچ رفع حاجبة بتفاجئ والكسار عادي متعود
وهيب:وليداتچ شنو

فتحت ايدي اعد بأصابعي
:الكسار ابني الأول حسوني الثاني وادمي الثالث وانتَ الرابع والي ببطني الخامس كلكم اطفالي

وهيب:احلى ام بهالدنيا

ضحكت عيوني تلمع هوَ عاند الكسار ونام على رجلي وصارو يتعاركون بين بعض

وهيب:وخر شوية ماخذ حضنها كلة

الكسار:وين اوخر انتَ اكتافك شعرضهم شكبرك متگلي

وهيب:على اساس انتَ مقصر هسة بهاي عضلاتك چنها عضلات باباي

الكسار:دموع شوفي يحچي على رجلچ

وهيب:دموع شوفي يحچي على اخوچ

خبلوني خلصوها عركة واني اهدي بيهم اسكت واحد والثاني يحچي اعرف يشاقون بس خبلوني خلوني حاجوز بينهم

طلعنة من الأمامين ورحنة لمطعم تعشينة واني چنت مشتهية گيمر عرب وعسل چانت ليل واني الوب اريد اكل الگيمر اهم شي

اخذوني لمطعم بي گيمر اكلت يلا ارتاحيت انوب رحت تعشيت وياهم عادي ولا عبالك اكلت

بقينة يومين بكربلاء وبعدها رجعنة
والحمدلله وهيب وافق يستلم الشغل بالسوبر ماركت وصار يروح الصبح ويرجع الظهر ويروح العصر ويرجع بالليل الحمدلله العملاء هناك حبو

راح بات عند خالي فهد ليلة وحدة ورجع يتونس على سوالف باهر
اجو هوَ وباهر بالليل باهر يخابر ووهيب يمشي وساكت

وصلو يمي عرفت باهر يحچي ويا بنية تخوصرت هوَ شافني وسد الأتصال وابتسم

باهر:سلام

:بدون سلام لا تعلم اخوية على سوالفك المكسرة ابو النسوان

باهر:اخوچ شاب ومن حقة عندي اخت صديقتي ادبرها الك وهيب

باوعت لوهيب رافعة حاجبي
وهيب:لا شلي بيها هاي السوالف مو الية خليها الك حبيبي

ابتسمت وبعناد باهر حضنتة
وهيب:اخوية شريف عفيف مو مثل بعض الناس انتَ وزياد غاسلة ايدي منكم

فززني صوت زياد
زياد:وليش غاسلة ايدچ مني شمسويلچ اني

:نسوانكم مطشرة متتأمنون

زياد:اني رجال متزوج وتايب ابن خالچ واحد ميستحي

باهر:صدكتك حبيبي

وهيب بس يضحك عليهم بيومها باهر تعشة عدنة هوَ وزياد وسيلا انتبهت على وهيب ولا رفع راسة حتى من يحچي يحچي مدنگ ومن سألتة كال خاف بدون قصد تروح عيني على زوجة زياد حرام وفشلة

كلش يعجبني تفكيرة

الحمدلله استقرينة بحياتنة اخيراً
اني دخلت الشهر الثالث وبطني دتكبر وهيب ملتهي بشغلة سويتلة حساب انستا وچان كلش ذكي بسرعة يعرف للشي

كملنة حياتنة فرحانين كـ عائلة وهيب ضاف جو حلو للبيت صح هوَ والكسار يتناگرون لأن يغارون علية بس بشقة والأطفال ينامون عند خالهم وحتى هوَ تعود عليهم لازم يقرالهم قصة يلا ينامون

الكسار جاب لوهيب كتب السادس حتى يدرس بوقت فراغة وهم وهيب رحب بالفكرة لأن يحب الدراسة

حاليًا وهيب ديراجع دكتور نفسي مثل ما طلب
صار يتعرف على ناس بشغلة ويختلط وياهم والحمدلله كدر يتقبل الحروق الي بوجهة يكول هذا أمر ربي والحمدلله صارت علاقتة بخوالي وزوجي كلش حلوة هوَ والكسار دوم يطلعون سوية للجم وللكوفي علاقتهم تجنن بس لو يتركون غيرتهم علية

اني والكسار ماكو اجمل من علاقتنة الي مليانة حب واهتمام والبقية عايشين بسعادة الحمدلله والشكر الك ربي

نامو الأطفال واجة الكسار تمدد بصفي
الكسار:اكلچ اخوچ طلع ينحب

توسعت ابتسامتي
:والله هواية ينحب فد حنون

سحبني من خصري لناحيتة
الكسار:حتى اختة كلش تنحب يكولون حامل وحلوة

مشيت ابهامي على خدة احچي بدلع
:صدُگ شايفها اختة شلونها

عص شفتة عيونة ذايبة
الكسار:تخبل

:صدووووك؟؟ اهووو كسوري ايدك نزلها

الكسار:مو بنية ملاك متربعة بگلبي وبعقلي

تقربت وحركت انفي على انفة
:اممم ومتزوجة واحد حلو بس سرسري

الكسار:سرسري بس ويا مرتة شو تعالي اكلچ

اخذ شفايفي ببوسة هادئة غمضت عيوني ابادلة ماعرف شوكت وشلون رحنة لغير عالم

بعد ساعتين حضنتة اشم بصدرة
:احبك حييييييييل حيل

ذب جگارتة وباس خدي
الكسار:احبچ حد گطع النفس دمعاتي حزن گلبي

عشنة باقي ايامنة بهدوء وسعادة عائلة متكاملة يعم بيها الفرح والسرور عشت اني واطفالي وزوجي واخوية أيام حلوة

من بعد مچنت دمعة المگطمة والمنبوذة والي معرف احد غير الكسار واكو أمل تلتقي بأخوانها

صرت دمعة صاحبة عائلة چبيرة بيها زوج واطفال وأخ وخوال واقارب وأحد اخوتها يمها وكدام عيونها والثاني تحت التراب

لهنا وينسد باب دموع وعائلتها
دُمتم بخير ...

.
.
.

ضيفو حساب الانستا حتى تعرفون كل الأخبار

وقناة التلي كذلك

اللهم صلِ على محمد والِ محمد 🦋

مها ال عبدالله