رواية الكسار (سلاسل الغوث) الفصل الحادي والعشرون 21 - بقلم لـ ميامي

لا تبعد ..
تعال أگرب
اريدك
موش اريدنهم
هاي الوادم ازمة طين
وانغث بسوالفهُم

قراءة ممتعة🤍
............................................................

دموع:كال هاي وسكت يباوعلها بحنية

:اي منو؟

حط ايدة على راس الطفل وكال
الكسار:هاي سيدرا البنية الي حچيتلچ عليها

صفنت بعدم فهم
:يا بنية؟

الكسار:خلي تكعد تعبانة والطفل جوعان

اشرلها تدخل دخلت وكعدت على القنفة حاضنة الطفل والخوف واضح بعيونها بس كعدت بچة الطفل طفر الكسار فتح جنطتها وانطاها ممية

الكسار:رضعي خطية

بدون اي كلمة صارت ترضعة باوعلي الكسار وأشرلي اجي رحت مستغربة كعدت بصفة وهو حضن كتفي وصار يعرفني

الكسار:سيدرا هاي مرتي دموع

ابتسمت وكالت بتسرع
سيدرا:ياا عزا عبالي اختك الصغيرة

تحمحم الكسار منزعج بس اني حصرتني الضحكة هي من حست حطت ايدها على حلگها وكالت بخجل

سيدرا:اسفة بس اني دوم اكول اشياء بدون ما احس

ضحك الكسار وضرب على ظهري بخفة
الكسار:عادي صار عندي اثنين چفوصات

ضحكت بخجل وخدودها صارت حمرة واني مثل الاطرش بينهم گرصت الكسار بدون متحس وكلت

:منووو هاي كسوري

ابتسم وكال بهدوء
الكسار:هاي سيدرا الي حچيتلچ عنها الي چانت عند الثعلب

طفرت فرحانة
:عزااااا يعني طلعتهاااا

الكسار:اي وهنا صارت بأمان محد يكدر يوصللها

وخرت عنة اضحك رحت كعدت بصفها اباوع للطفل الي بحضنها يطلع عمرة 9 اشهر لو سنة ماعرف چان سمين وعندة خدود ذكرني بنفسي من چنت سمينة

مديت ايدي لخدة وكلت
:هذا ابنچ؟

هزت راسها مبتسمة
سيدرا:لا ه هذا اخوية داني

:يروحي الله يحفظة

رفعت راسي من كام الكسار
:هم راح تروح؟

الكسار:شوي وراجع سولفو انتو

بأخر كلامة غمزلي فهمت قصدة هزيت راسي وهو طلع رجعت اباوع للطفل وابتسم لحد مشبع يلا وخر الممة ونام

:چان يمچ هم مخطوف؟

هزت راسها تتنهد
سيدرا:خطفونة سوية

:ضل يمچ لو اخذو؟

سيدرا:ياخذو طول اليوم ويرجعو الية چانو يتسولون بي

:الله ينتقم منهم كون ان شاء الله

كالت بغصة
سيدرا:امين الله يمهل ولا يهمل حقي وحق كل واحد مظلوم حيرجع

:ونعم بالله

سكتنة وهي تلعب بشعر اخوها احس هالطفل دخل بگلبي بدون استئذان شفتها ممرتاحة كمت جبتلها ملابس ورجعت

:انطيني داني وكومي اسبحي وارتاحي حتى هو هماتين يسبح

باوعتلة بحزن
سيدرا:ماشي بس حبابة انتبهي علية

:بعيوني

خلتة بأيدي وكامت دليتها على الحمام وراحت تسبح كسرو گلبي
صرت العب بشعر داني وابتسم اول مرة الزم طفل واخلي بحضني

دخل الكسار بأيدة اكياس تركهم وانتچى على الباب يباوعلي شلون شايلة الطفل ومبتسم

:تعال شوفة شلون حلو

تقرب علية يباوعلنة احنة الاثنين حط ابهامة على طرف شفتي وكال
الكسار:ان شاء الله تشيلين طفلنة هيچ

اختفت ابتسامتي ونزلت راسي اباوع للطفل اجة كعد يمي
الكسار:حبيبتي دموع جبت عشة وفاكهة وجبت ملابس للبنية والطفل تكدرين تغسلين الفاكهة وتجهزين العشة لو اكوم عنچ

:لا اني اكوم بس الزم داني

قبل ليرد حطيتة بحضنة بسرعة جسمة تشنج رفعت حاجبي اهز بأيدي
:الكساااااار اسم شكبرة وهيبة وطلع يخاف من طفل؟

باوعلي يبلعم
الكسار:انچبي صار هواية مشلت طفل اخاف يوكع

:ميوكع لتخاف رايحة اني انتبه كسار ديربالك

ركضت للمطبخ غسلت الفاكهة والخضار وجهزت ميز الطعام داخلي الببسي وسمعت صوت سيدرا تكول اسمي ركضت للحمام شفتها فاتحة الباب

:ها سيدرا؟

سيدرا:اكدر اطلع مو؟

:الكسار بالصالة تعالي اخذچ للغرفة مشطي شعرچ

هزت راسها وطلعت تتلفت اخذتها وصعدتها فوك للغرفة انطيتها مشط وكعدت يمها هي تمشط واني اسولف وياها

:انتو من يا محافظة؟

سيدرا:من بغداد

:بغدادية نفسي اوووي

ابتسمت وكملت شعرها صح چان قصير بس كثيف وسرح ردنة نطلع لزمتني من ايدي وكفتني خجلانة

سيدرا:دموع اتمنى متنزعجين من وجودنة هنا بس شكم يوم ونروح حنزعجچ شكم يوم

ابتسمت وحطيت ايدي على زندها مبتسمة
:بالعكس اني فرحانة بجودكم مراح انزعچ حسيتچ مثل ملاك اختي لتفكرين هيچ مرة ثانية هذا بيتچ

دمعت عيونها ولزمت ايدي
سيدرا:شكراً الكم شكد ما اشكركم ما اوفي حقكم

:ماكو داعي لهالكلام المهم هسة انتِ واخوچ بخير
يلا يلا الاكل حيبرد امشي ننزل

نزلنة اني وياها رحنة للمطبخ ساعدتني بالباقي لحد مكملنة كُلشي كعدتها وركضت اصيح للكسار دخلت ردت احچي بس سكتت من شفت هالمنظر كدامي

چان الكسار حاط داني على القفنة يلعب ويا وداني متونس چان منظرهم يجنن بحيث بقيت بس صافنة عليهم

رفع راسة الكسار وشافني
الكسار:ها دموع البنية بخير؟

ابتسمت احك براسي
:احمم اي تعال نتعشة

هز راسة شال داني وكام مشينة سوية بس دخلنة للمطبخ كامت سيدرا

سيدرا:انطيني داني تعبك ها

الكسار:هالكتكوت هم يتعب بالعكس چنة نسمة هوى خلي عندي

رجعت كعدت بمكانها والكسار كعد وكعد داني بحضنة واني كعدت اباوعلهم  وحلگي يريد ينشگ من الابتسامة بسرعة واحد اخذ على الثاني صار يسويلة لگمات صغار وينطي وداني ياكل بشراهة وعيون سيدرا علية خايفة وخجلانة صرت احچي حتى الطف جو واخليها متخاف

:سوسو تدرين اخوچ كُلش يشبهچ

ابتسمت وكالت
سيدرا:كلها تكول هيچ

قربتلها الفلفل والمقبلات
:اكلي اكلي لتخجلين حبابة

هزت راسها بالرفض
سيدرا:لالا ماكدر اكل فلفل

عگدت حاجبي مستغربة
:ليش؟

نزلت راسها تبلعم وكالت بخفوت
سيدرا:م ميصير لأن ا اني ارضع د داني

شهگت وهي نزلت راسها اكثر ميتة خجل اني استوعبت شنو سويت كلت بفشلة

:اسفة بس استغربت

سيدرا:لا عادي كلها استغربت

كملت اكلي ساكتة خفت اچفص والكسار ملتهي بداني
خلصنة رادت تساعدني رفضت

:روحي سبحي داني خلي يرتاح خطية اكو ملابس

سيدرا:اساعدچ واروح؟

:لا حبيبتي روحي سبحي الطفل اني معندي شي والله

هزت راسها وراحت اخذت الطفل تسبحة واني كملت شغلي وجهزت بقلاوة وعصير واخذتهم للصالة شفتها كاعدة وبحضنها داني سابح وطالع يجنن خليت الصينية كدامهم وكعدت يمها العب ويا داني شوي والكسار طلع عرفتة يريدها تسولفلي انتظرت ينام داني واحچي وياها

نص ساعة ونام داني كمت جبتلة بطانية ورجعت كعدت يمها حطتة على القنفة وغطتة احتاريت شلون افتح الموضوع اخر شي مكدرت لزمت ايدها وكلت

:سيدرا عادي تسولفيلي؟اعتبريني اختچ وفضفضيلي

تنهدت وهزت راسها
سيدرا:اكيد معندي مانع بالنهاية اني ضحية مو المذنبة

:اكيد انتِ مو مذنبة المذنب هو الي يخجل

ابتسمت وهزت راسها وبدت تحچيلي
سيدرا:قبل شهور چان عمر داني شهر واحد راحو ابوية وامي للطبيب لأن امي تمرضت چان داني يبچي والدنيا ليل واني محتارة شسوي
بهالاثناء اندگ الباب عبالي اهلي اجو اخذت اخوية وطلعت اركض وبدون ما اعرف منو فتحت الباب وخاب ظني طلعت مرة منقبة هنا اني خفت كلش خفت وغلطت من متأكدت اذا كانو اهلي او لا المهم هاي المرة طلبت مني گلاص مي اخذت اخوية والتفتت اريد اجيبلها بس بسرعة انحطت وصلة قماش على خشمي خلتني افقد الوعي
ومن كعدت لگيت نفسي بمزبلة وكدامي شخصين رجال وبنية واخوية ماكو يمي هنا اني اتهسترت صرت اعيط خايفة وهالشخصين يباوعولي ببرووووود اخخخخ يااااا دموع الشي الي صارلي ما اتمنى يصير لعدوي

عصرت ايدها خايفة واشوفها مغمضة عيونها وترجف
سيدرا:چنت مربوطة واتوسل بيهم يخلوني اطلع چان عبالي بس اني خطفوني لحد مجابو اخوية شايلة رجال يبچي تخيليييي بعدة طفل رضيع وضربو لأن يبچي بس تخيلي واني اعيط واكول يبچي لأن جوعان تدرين شنو سوة الرجال الي كدامي

:شنو

خلت ايدها على عيونها تبچي
سيدرا:شگ ملابسي وطلع صدري وحط صدري بحلگ اخوية صح اخوية سكت بس اني ردت اموت بهالحظة حسيت بذل ابچي كدامهم واتوسل وهم يضحكون متونسين بالشي الي يصير
اخوية مو شاف ماكو حليب رجع يبچي اخذو من يمي وطلعو من المكان الي اني بي فرفحت روحي هنا وفرفحت اكثر من اجة هالرجال وصار يغتصبني اغتصبني لحد الاغماء تخيلي وكرر هالشي لمدة اسبوع كامل وبهالاسبوع اخوية يجيبو يمي بس بالليل وياخذو من الصبح
چنت ادعي اهلي ينقذوني

صرت امسح على ظهرها ارجف وية رجفتها الي صار وياها مو قليل ابد صارت تضرب على راسها بخفة وتحچي بكسرة

سيدرا:من كملت شهر عندهم صارو يعتدون علية اكثر من واحد بنفس الوقت

سكتت ثواني ورجعت گالت بتلكؤ
سيدرا:ل لحد مصرت ح حامل واني ماعرف الاب منو

مكدرت اتحمل بسرعة حضنتها مذهولة وهي بچت بقوة وحضنتني تحچي
سيدرا:ماعرف منوووو ابووو تخيلي وبالحرام واني حامل ويعرفون بهالشي هم كملو بأعتدائهم طول اشهر حملي يعتدون علية لحد منولد الطفل ميت ومتشوه ش شفتة چان قطعة حمرة و ومعندة اصابع ووحدة من رجليناتة اقصر من الثانية ولدتة بالليل وحدي وميعرفون الصبح اجو من شافو ميت اخذو وطلعو بكل دم بارد
بهالفترة تعبت هواية نفسياً وجسدياً واعتدائاتهم رجعت من ثاني يوم ولادتي
اخوية داني تعب هم وضعف چانو من يجيبو مفرفح من الجوع شفت صدري بي حليب صرت ارضعة وابچي مچان بأيدي حل اذا ينترك هيچ يموت

ابتعدت عني تمسح بدموعها
سيدرا:بعد ولادتي بأسبوع دخل علية شخص اسمة الغوار هالشخص هو الوحيد الي اشفق علية وساعدني صار يرفض يدخلون علية احد ويرفض ياخذون داني بس مرات ميكدر فياخذو بس يرجعو وخلصت من فعلهم البشع بية صح چان ميحچي بس كاعد يدخن
وبعدها هالشخص اختفى واجة زوجچ دخلو بنفس الغرفة الي اني بيها وصارو يعذبون بي كدامي زينو شعرة كدامي يصعقو ويحرگو بمي حار وكل اسبوع يوكلو وبعدها يضربو ابرة ويفتحون ايدية ويجون علية ينزعوني ويربطوني بس چان زوجچ واحد شريف لزم نفسة عني وچان يردد بكلام اتذكرة (ربك ثم دموع ثم براءة هالبنية) مسوالي شي ابد مع انُ چان يتأذة يصير يضرب راسة بالحايط ويعيط بألم لحد ميتعب وينام گوة يتنفس وهالشي يستمر 3 ايام لأن الحقنة قوية ومن يجون ويشوفو ملامسني يعصبون ويضربو

غمضت عيوني ابچي
:سودة علية عليكم

سيدرا:من طلعو عبالي قتلو بس بعد شهر اجة وانقذني اني واخوية الله يحفظة الچ والشبابة ربي يوفقة بكل خطوة يمشيها

:امين يارب زين واهلچ؟

ابتسمت بحزن
سيدرا:اهلي انقتلو وعمامي رفضو يستلموني لأن دنست شرفهم مثل ميكولون

رجعت حضنتها بحنية
:احنة اهلچ اني اختچ وزوجي اخوچ

بدلتني الحضن تشهگ
سيدرا:ونعم منكم الله ينور طريقكم ويرزقكم على گد نيتكم

وخرت عنها مبتسمة حسيتها نعست كمت صعدت فوك ردت اجيبلهم فراش ينامون لفت انتباهي باب غرفة من الغرف مفتوح وبي صوت رحت مستغربة شفت الكسار دينظفها ويرتبها كلت مبتسمة

:الله يساعدك

باوعلي والابتسامة شگت حلگة
الكسار:ويساعدچ دموعي الجماعة نامو؟

:داني نام بس سيدرا خطية نعسانة

تخوصر يحرك لسانة بجوف فمة يفكر شوي وكال ياخذ رأيي
الكسار:دموع عادي ينامون بغرفتنة اليوم وانة ننام بالصالة لأن خطية انومهم بهالغرفة والغرفة هيچ باردة وفارغة

تقربتلة مبتسمة
:اكيد عادي باجر نرتبها الهم وينامون بيها

باسني بخدي واني تركتة ورحت لغرفتنة عدلت فراشها ونزلت لسيدرا بس دخلت شفتها تبوس بأخوها وكأنما ممصدگة صارت حرة تقربت عليها رفعت راسها تباوعلي

:اذا نعسانة كومي نامي

هزت راسها شالت داني وكامت اخذتها لغرفتنة تمددت على الچرباية وداني بحضنها طفيت اخذت فراش وطفيت الضوة وطلعت
نزلت جوة شفت الكسار كاعد يهز برجلة بس شافني اخذ مني الفراش وفرش واحد بالأرض

الكسار:واحد كافي علينة

:لاااا مراح ارتااااح

باوعلي معاجبة وسكت سوة الي براسة فرش دوشگ واحد وتمدد فاتحلي ايدة
الكسار:يلا تعالي مشتاقلچ

نمت على صدرة اتصنع الزعل
:هسة ليش بس واحد دشوووف الحصرةةة

عض شفتة وكال بصوت هامس
الكسار:حتى احصرچ براحتي

ضربت على صدرة خازرتة
:ايييييع شهالتفكيييير

رفعني نومني فوكة وعيونة تتنقل على ملامحي
الكسار:احبچ

بلعت ريگ متوترة وتوترت اكثر من حط راسة برگبتي وبصعوبة يتنفس
الكسار:دموع اريد منچ طفل

عصرت ملابسة وحچيت بتوتر
:ك كسوري ماريد

كال بهمس
الكسار:مو هسة

سكتت وهو ضل ساكت صار يلعب بشعري بدون ما احس نمت
فتحت عيوني من حسيتة وخرني وكام عني

:وين رايح؟

التفت علية وكال بهدوء
الكسار:رايح اجيب ريوگ الكم عندي فد شغلة اريد اكملها

غمضت عيوني وگلبت نفسي نمت على بطني وحچيت بنعس
:الله يستر من فد هالشغلة

ضحك بصوت وطلع من الصالة اني رجعت نمت
مر وقت قصير وحسيت بثگل على ظهري تأفأفت وكلت منزعجة

:توخر لا ادفرك

الكسار:جاي اسويلچ حركة جونسينا بس خفت ينكسر ظهرچ المهم كومي غسلي وجهچ الحلو خلي نجهز اني وياچ الريوگ حتى من يكعدون ياكلون

هزيت راسي كام وكومني ويا غسلت ورحنة للمطبخ صرنة نجهز الريوگ هو يطبخ البيض والطماطة واني اسوي الجبن والمربى

واكفة على الكاونتر اقطع بالخيار واغني
:هالأسمر اللون هالأسماراني
تعبان يا گلب خيو هواك راماني
يا بو عيون وساع حطيت بگلبي وجاع
بعطيك سبع رباع خيو من العين رسمالي

حسيتة حضني من ورة وحط راسة برگبتي
الكسار:اروح فدوة لهالصوت حبيبتي

ملت راسي مبتسمة
:چنت اريد اقرة انشودة يا طيبة انوب حولت على اغنية

الكسار:گلبچ عامر بالأيمان بس يستگود

طگيتها ضحكة بكل علو صوتي وهو يضحك وياية
:والله ادبسز

طبع بوسة خفيفة على رگبتي وابتعد
الكسار:بس وياچ عند الباقي مؤدب وتقي ونقي

:كسرسر لو تقنعني منا لباچر انتَ تقي ونقي ما اصدگ

گرصني بخصري وراح يكمل البيض
الكسار:بنت الكلب شمسويلچ

:لا ابد فقير فقير

سكت يهز بأيدة
كملنة الريوگ شوي ونزلت سيدرا شايلة اخوها خجلانة ابتسمت ورحت اخذتة من ايدها متت بي هالطفل

سيدرا:صباح الخير

ردينة عليها اني والكسار وراحت غسلت اخذت داني غسلت وجهة وهو يضحك متونس على المي

:ولك سنو انتَ سنووو تخبللل اعضك ها اعضك

حطيت وجهي برگبتة ادغدغ بي وهو يضحك بصوت رجعت للمطبخ شفت الكسار مبتسم كلت بضحكة

:كسورييييي اريد واحد

عض شفتة ولعب بشواربة
الكسار:اي يلا جاهز

اختفت ابتسامتي من استوعبت شنو كلت حكيت راسي
:ترة مو قصدي الي بالك

راد يحچي ودخلت سيدرا وداني بس شافها رفع ايدة وصار يطلع لسانة
داني:ادا ادا

متت بي بشكل مو طبيعي اول مرة يصير يمي طفل اشيلة وابوسة انحرمت من هالشي بطفولتي ومراهقتي مچنت اشوف اطفال صغار ولا المسهم واذا اشوف اشوفهم من بعيد عند أهاليهم

اخذتة اختة وكعدنة نتريگ وداني منطلق يلعب بكلشي كدامة والكسار متونس صار يلعبة يحط ايدة على وجهة ويرجع يطلعة وداني يضحك

چنت گُلش فرحانة بوجودهم وفرحانة بيهم حسيتهم ملو هالبيت الفارغ علية

لكن مو كُلشي يخلينا نفرح يوم حيفرحنا دوم......

..يتبعع..

توقعاتكم؟

.
.
.
.
.
.
.
.
.
.

بارت قصير 3000 كلمة باجر التكملة 🤍

ضيفو حساب الانستا

وقناة التلي

اللهم صلِ على محمد والِ محمد 🦋

مها ال عبدالله