رواية المغرورة و الأعمى الفصل الحادي والثلاثون 31 - بقلم بسمة البياتي

المغرورة-و-الأعمى-
(بقلم بسمة   البياتي )
- بارت الثلاثون -

أيلول... من شفتة واكف ومتكتف
جمدت بمكاني تمنيت اتبخر واختفي ولا هاي الفشلة

إياس.. خلصتي تفتيش لو بعد ؟

جان يحجي وهو مبتسم

أيلول.. اني بهذا الموقف اخذت دور الغبية جاوبتة

شنو يا تفتيش سمعت صوت موبايل عبالي موبايل بابا جيت أشوفة

إياس... اهاااا عبالج موبايل ابوج لا لعد حقج معذورة

أيلول ... مشيت اريد اطلع وصلت يمه لان هو واكف يم الباب
جان يكول

إياس ... بالمناسبة حبيت اذكرج ترة ابوج بعدة بالمعرض مراجع للبيت هههههههههههه

أيلول... من كال هيج صار عندي وجع بطني لوما عيب اكعد ابجي كمت امشي واتعثر بس اريد اختفي من كدامة

صعدت بسرعة على الدرج

أياس... على كيفج لاتركضين اخاف يصير على ابني شي هههههههههههه

أيلول... دخلت للغرفة بقيت اغم بروحي وابجي
وانوب هاي ام سوزان مدتروح من بالي والغيرة اشتغلت عندي بقيت الوب بس اريد اعرف هاي منو وشتريد منه

معندي غير ود هي أجيبلي المعلومات اتصلت عليها

ايلول... الوووو  هلو قلبي ام رمرم

ود... ياساتر هذا ترحيبج ورا شي

أيلول.. امداج صوجي اني مخابرة وداسئل عليج

ود... والله ممتعودة على هذا اسلوبج انتي بس بالمصايب تخابريني

ايلول... ولي هو اني صوجي احجي وياج

ود... ههههههه اشاقة وياج شبيج بسرعة ازعلين الظاهر الحمل مخليج فدمرة حساسة

أيلول... دودو ليش متجين يمنا ضوجة واني مشتاقة الج وللبنات صارلج كم يوم  مجاية تعالي حتى اسويلج كيكة

ود... صار بيها دودو وتعالي ومشتاقة وكيكة
لج والله ممرتاحتلج

ايلول... لادوخيني مختصر الكلام تجين لولا؟

ود.. الدنيا مغرب وعيسى بعدة بالشغل مومال جية بهيجي وقت

أيلول... اوووي براحتج يلا ولي باي

ود... طاح حظج باي

بعد العشى كاعدين كلنا واني عيني على إياس الموبايل موكع من ايده وبس يبتسم
واني كاعدة احمس بروحي

اندكت الباب اجوي ود وعيسى

ود... يلا ست ايلول هاي اجيت وين كيكتج

أيلول.. خرب ببليسها هاي راح تفضحني

انتي مو كلتي مراح اجي اني هم مسويتها

ود... لعد اني خبصت عيسى وخليتة بسرعة يتعشة كتلة اليوم اختي حبيبتي مشتاقتلي وعازمتني وراح تسويلي كيكة  تالي اجي كولشي ما احصل

أيلول... طخت براسي من صدوك اروح اسحلها اريدها تسكت ماكو

إياس جان لازم نفسه بالكوة حتى ميضحك خرب حظي عبالك قرأ افكاري وعرف شريد من ود

عيسى راح كعد يم يم بابا وإياس

اجت ود كعدت بصفي

ايلول... جان بطريقج وانتي جاية جبتي مايك وحجيتي بي

ود... والله من البداية عرفت هاي عزيمتج وراها سالفة

ايلول... مو هسه من نصعد فوك نحجي

اهلي راحوا ناموا بقينا احنا كعدين نتعلل

عيسى وإياس جانوا هواية يتبسبسون

جنت مخليه اذن يمهم واذن يم ود 

عيسى... اليوم ام سوزان اجت المغرب للمعرض سئلت عليك

ايلول... اني سمعت اسمها لو متت ركزت بكل حواسي عليهم

إياس... معرفت شتريد؟

عيسى... لا مكالت

إياس... هي المغرب اتصلت واني جنت بالحمام

عيسى... هههههه من جانت دتحجي وياي اكو واحد بالمعرض ديشتري غرفة نوم هو شاف ام سوزان لو تخبل من راحت اجة يسئلني عليها

أيلول.. اني د اسمعهم الدم صار يفور برأسي

ود... عيسى منو هاي ام سوزان الي صارلك ساعة تحجي عليها

ايلول... ههههه الحمد لله طلعت مو بس اني اذني يمهم

عيسى... هيج وحدة دائماً تجي ويا زوجة أخوها يشترون أثاث

ود... ما شاء الله وتعرف مرة اخوها هم

عيسى... هههههههه خرب ولج ما اعرفها هي تجي تسئل على إياس

إياس... ههههههههه ام راما اطمئني ترة هاي زبونة عادية

من صعدنا فوك حجيت الود كولشي طلبت منها تستجوب عيسى وتعرف منه منو هاي بس بدون مجيب طاريي

ايلول.. من راحت ود اتصلت عليه كالت كولشي مكدرت اعرف منه يكول زبونة عادية

إياس حتى بعد محاول يصالحني واني كرامتي متسمحلي اتنازل اله

دخلت للشهر السابع من الحمل واني وإياس على نفس وضعنا
اني وماما بدينا نجهز للطفل ماخذت هواية ملابس بس الضروريات لان مجنت اعرف جنس الطفل شنو كلت من اولد بالسلامة أكمل الباقي

إياس وضعة صار اسوء يتاخر بالرجعة للبيت ومرات اصلاً ميجي يبات بهذاك البيت واني ما اكدر احاسبة جنت طول الوقت عصبية ازعل واتعارك على اتفه الأسباب

بان... لولة شبيج من اجيت لهسه انتي ساكتة وبس صافنة

ايلول... مختنكة احس روحي تريد تطلع

بان... اسم الله عليج والله من اشوفج اني من يمي اختنك بالكوة تكومين وتكعدين بطنج ما شاء الله جبيرة لولة اخاف حامل بتؤام

ايلول... هههههه لا يس، واحد اخذت سونار

هسه عوفج مني انتي شخبارج وضعج شلونة ويا سيف

بان... الحمد لله زينين بس والله بعدني اخجل منه

ايلول... يبوووو صارلكم اشكد وبعدج تخجلين الله يساعد سيف عليج زين هو شلونه وياج

بان... هو يحاول يتقرب مني ويشيل الحواجز البينه

بعد الصار بينا حجة وياي

سيف... بان اني جنت واعدج انطيج حريتج بس هسه الوضع اختلف اذا تقبلين خلينا نكمل سوى ونعيش حياة طبيعية حالنا حال المزوجين اني ما ألكي احسن منج اكمل وياها حياتي وتكون أم اولادي بس بنفس الوقت ما اكدر اجبرج على شي اذا متريديني عادي نرجع مثل قبل واي وقت تريدين ننفصل

بان... جنت اسمعة واني مدنكة راسي وخجلانة منه
اخير شي تشجعت وحجيت

سيف اني هم ما الكي احسن منك واني بعد الصار بينا شلت موضوع الانفصال من راسي
بس اني ما اريدك تنجبر تعيش وياي بسبب  هذيج الليلة

قطع كلامي اجة كعد بصفي وسحب راسي الحضنه

سيف... اني لوما جنت رايدج مجان اخذتج

رفع راسي بيدة وباسني من شفايفي واني هم بدون شعور خليت ايدي على صدرة وبادلتة البوسة

ومن هذاك اليوم انتقلت ويا النفس الغرفة والحمدلله حياتنا حلوة

بس اكو شغلة مضوجتني هو ميريد اطفال صايرة عندة خوفة بسبب ولادة قدر الله يرحمها

ايلول... الله يرحمها قلبي، انتي حاولي تقنعي وطمني هو بمرور الايام  ان شاء الله ينسى ومن تصيرين حامل اكيد مراح يكولج نزلي وراح يتقبل الوضع

بان... ان شاء الله

اليوم الكل موجودين ابيتنا سيف عيسى إياس ود و بان

كاعدين كلنا جان يحجي إياس

إياس.. ابو قدر اريد منك انت وسيف وعيسى تجون وياي راح اخطب

كلنا رفعنا رأسنا نباوع عليه بتعجب

إياس... كمل كلامة ابو قدر انت مو تكول اني مثل اخوك الصغير وصديقك لهذا اريد وكفتك وياي

ايلول... الكل ساكت محد حجة بس اني نار صارت بقلبي

باوعت عليه بحقد اي بابا شكو بيها روح اخطبلة بس، لازم قبل لايخطب يطلكني

إياس... اني طلاك ما اطلك اذا تريدين روحي خلعيني وتتنازلين عن ابني البطنج اول متولدين اخذة

ايلول... من كال هيج صرت اشوف الشياطين تكمز  كدامي من العصبيه

كل عقلللللللك انطي طفلي الك نجوم السماااااااا اقربلك والله لو اعرف اخنكة واموتة ولا اخليك تاخذة

بابااااااا متحجي شي ليش سسسسسساكت

بابا... اول شي نصي صوتج وحترمي الموجودين

ثاني شي اني مو انطيتج وعد بعد ما ادخل بحياتج والقرار  انتي وحدج تتخذي

أيلول... يعني شنووووو انت راضي على كلامة وتريد تروح تخطبلة

بابا... اي راضي لان هذا الشي من حقة انتي مو هاجرتة ومتريدينه بعد على شنو متعصبه وضايجة

ايلول.... اسمع كلام بابا واني ممستوعبه الديكولة

عفتهم وصعدت فوك كعدت بالكاع ابجي

اجوي ود وبان يمي

ود... لج كافي موزين على الطفل

أيلول... سمعتيهم شيكولون لو يزوج عليه واني ابقة ساكتة
لو ياخذ مني طفلي  ويطلكني

ود... انتي السبب عنادج وكبريائج وصلوج الهاي المرحلة لج وين اكو رجال يصبر على مرتة هلكد
عاف بيتة واجة كعد كبالج وانتي بقيتي بعنادج

اشكد نصحناج وكنالج حافظي على بيتج و زوجج
ترة إياس حلو وشخصية وحالتة المادية زينة الف وحدة تتمنى وتركض ورا

ايلول... خليت ايدي على اذني سديتها كافي الخاطر الله ترة مناقصتج
اني جاي اموووووووت وانتي جاي تحجين عليه

ود... اني داحجي الحق
وراح اكولج شغلة ثانية تدرين إياس راح ياخذ منو؟

ايلول... باوعت عليها واني ابجي و اشهك منو! ؟

ود... نفسها ام سوزان الي انتي جنتي شاكة بيها

ايلول... من كالت هيج لزمتها من ايدها قووي وهزيتها
لعد اذا جنتي تعرفين عنده شي وياها ليشششش من سئلتج مكتيلي هسه جاية تكولين من إياس قرر يخطب

ود... والله اول بارحة يلا عيسى حجالي 

هاي وحدة ارملة عدها بنية عمرها 9 سنوات
عايشة يم اخوها ومرتة لان امها وابوها متوفين

زوجة اخوها موزينة وياها تريدها بس تزوج وتخلص منها
وهذا اخوها يمشي بكلام مرتة ويريد يزوج اختة الواحد اكبر منها شايب

وهاي ام سوزان جاية للمعرض ويا زوجة اخوها ومن شايفة إياس متخبلة عليه ومجلبه بي

اخير شي صارت تتوسل بي حتى يزوجها ويخلصها من اخوها ومرتة قبل لا يزوجوها الهذاك الشايب؟

ايلول... جنت اسمع كلامها وابجي معندي غير الدموع
كلام ود كله صح
بسبب تصرفاتي وانانيتي خسرت إياس

كمت من الكاع رحت نمت بفراشي والبنات يمي معافوني

بقيت طول اليوم بالغرفة مطلعت منها حتى الأكل جانوا يصعدوا الي صح جنت ما اشتهي اكل بس اجبر نفسي الخاطر طفلي

ثاني يوم الظهر نزلت جوة جان البيت هدوء بس ود وعيسى كاعدين

باوعت على عيسى بكل حقد لوبيدي امخله

عيسى... اعوذ بالله من هاي النظرات شبيج لوبيدج تأكليني

ايلول... اششش ولا كلمة صوتك ما اريد اسمعة روح خلي إياس يفيدك

عيسى... هههههههههه شنو خلي يفيدني لازم راح يزوجني واصير ضرتج وانتي هلكد حاقدة عليه

ايلول... من كال هيجي صكيت على اسناني بقيت اتلفت يمنه ويسرة ادور على شي اضربة براسة

تسوي روحك فقير
جنت اعتبرك اخوية  الماجابتة امي تالي طلعت تعرف اكو وحدة تريد إياس وراح يزوجها
وانت ولا كلفت نفسك وجيت كتلي

عيسى... لا مجنت اعرف يريد يزوجها جديد عرفت

أيلول... معجبني كلامة مجاوبتة شوية سكتت وسئلتة

لعد إياس وين مو الظهر هو يرجع للبيت

ود...هههههههه اشتغلت الاستخبارات والتحقيقات

عيسى... اي كال رايح البيتي

أيلول... بقيت افكر بيني وبين نفسي هذا شعندة هوايه ديروح البيته عزااااااااا هذا اكيد مزوجها وجان ديجس نبضنة اني واهلي
كمت من مكاني رحت لبست صايه وشال ونزلت

ود... خير ياربي هاي وين رايحة بهل ظهرية

أيلول... رايحة الجهنم معليكم بيييييييييييه

عيسى... مغرورة يمعودة بس كولي وين اني اوصلج

ايلول... اريد اروح البيت إياس

عيسى و ود بقوا يباعون عليه

ايلول... راح تبقون صافنين بوجهي توصلنييييييي لو لا

عيسى... امشي امري لله
تعالي ود ويانة

ايلول... باوعت عليهم ياويلكم اذا شفت واحد بيكم بيدة تلفون ويخابر إياس

ود... مراح نصخم امشي الله يستر من هاي خبالاتج

صعدنا بالسيارة وتوجهنا البيتة احس الطريق صار شطولتة

متسوق سريع شبيك دتمشي على بيض مو هذا الطريق كدامك فارغ

ود... باوعت عليه على شنو مستعجلة معليك بيها حبيبي لاتستعجل

ايلول... حبتكم حيه انتي ويا شلون يريدون اجي اضرب راس براس

عيسى... اكول ود متاكدة انتي اكبر من ايلول اشو ساحلتج ذهاب واياب

ود... ديلا على اساس ساحلتني وحدي انت هم وياي

ايلول... صارت طسة قوية من القوة بطني اهتزت

عطت بي على كيفك شبيييييييك

عيسى اندار عليه

عيسى... ليش متجين تسوقين بدالي ترة خبلتيني تريدين اسوق سريع ومن اسرع شويه ميعجبج
الله يسسسسساعدك إياس على هاي البلوة

ايلول... وصلنة للببت نزلت بسرعة بقيت ادك بالجرس مشلت ايدي منه انوب رجعت ادك الباب بيدي

ود وعيسى يحجون عليه يكولون الناس راح تطلع من صوت دكج على الباب
خمس دقايق ادك بالباب ومحد يفتح

هذا اكيد غركان بالعسل معندة مجال يفتح الباب

بعدني دافكر وجان اسمع صوت إياس

فتح الباب وانصدم بينا جان شعرة مكفش مبين نايم

دفعتة وفتت جوة
هما واحد يباوع بوجه الثاني ميعرفون اشداسوي
دخلت للبيت فتشتة غرفة غرفة مبقيت مكان حتى الحمامات
بس مجان اكو احد جوا

عزااااا هذا بس لا جايبها بغرفتي وعلى فراشي

داصعد سمعت إياس يسئل عيسى

إياس... هاي شبيها على شنو داادور؟

عيسى.. والله علمنا علمك جابتنة بهل ظهرية مانعرف علمود شنو

صعدت دورت فوك ماكو احد دخلت غرفتي شفت السرير مخربط طلعت بسرعة للبلكونة هم ماكو حتى بالكنتور دورت من شفت ماكو شي نزلت
لكيتهم كلهم واكفين يم الدرج

إياس... على شنو ادورين خو سئليني واني اجاوب جان وفرت عليج هذا التعب كله

أيلول... كالوا للحرامي احلف على اساس لو اسئلك راح اجاوبني

إياس... لج يا حرامي بنتي شبيج متخبلة ومسوية عليه مداهمة وتفتشين
ترة بعدني مزوجت قابل خايف منج حتى ازوج واجيبها بالسر
اطمئني بعد يومين تجي تنور البيت

ايلول... من كال هيج هجمت عليه حتى نسيت نفسي حامل وبطني شكبرها

تنور بيتك مو لك انت وااااااااااحد حقييييير ونذل الله يلعنك ويلعن اليوم العرفتك بي جنت احجي واضرب بي ود تريد اجرني منه متكدر

إياس... جنت اتمنى انتي مو حامل جان شوفتج الحقير والنذل شيسوي
لزمني من ايدي قوي سحبني عليه لزك ظهري بصدرة وقيد حركتي هو طويل وضخم مكدرت اتحرك بعد
بس بقيت اغلط واحجي جان يسد حلكي بيدة والايد الثاني لازمني

إياس... ياجماعة جنت احب اضيفكم بس مثل مدتشوفون بيت عزابي كلشي مبي يلا عيسى اخذ مرتك وتوكلوا

أيلول.. هذا شديحجي بقيت ارفس جوة ايدة اريده يهدني

عيسى.. انتي جبتيها النفسج مغرورة

ود.... ههههههههه والله انصاديتي يحلوة

ايلول... خرب اشو هذولة عافوني وراحوا

إياس... همس بأذني اني نذل موو منين ابدي بيج

ايلول...يمه من سمعته هيجي كال متت من الخوف
جان اعضة من ايدة الساد بيها حلكي اريد انهزم والحك ود وعيسى

إياس... اااااخ ولج انعل يومج شوكت تبطلين سالفة العض

ايلول... عوووووفني اريد اروح

إياس... ههههههههههه والله انتي جيتي برجلج وبعد ماكو رجعة

اكو كرسي قريب منه كعد ويريد يكعدني بحضنه

أيلول... ماه عوفني

جرني قوي وكعدني على رجلة

بتك ايده حاوط خصري والايد الثانية خلاها على بطني وصار يمشي ايده عليها

إياس... اشكد ظالمة ولج من اول يوم عرفت بيج حامل تمنيت المس بطنج واحس بوجود ابني بيها بس أخ من عنادج

ايلول... عود من مرتك الجديدة تحمل ظل لازم بطنها ليل ونهار

إباس....ههههههههههه لا مو هذا اول طفل ومن المغرورة الشعور يختلف

ايلول... ضربتة على صدرة قوووي وخر يا خاين

إياس... لج لشوكت يبقة عقلج صغير كم مرة كايلج اني ما ابدلج بحورية من الجنة

ايلول... لا واضح والدليل ردت تزوج عليه ام سوزان الارملة مو حورية

إياس.... ههههههههههههه ولج والله جان كلة تمثيل واهلج يدرون

ايلول... شششششنو هاي كل عقلكم لو صاير بيه لو بطفلي شي بسببكم كملت كلامي وبجيت

إياس.. والله مكدرت اصبر الحد مجيبين شسوي اذا انتي معندج حساس كافي حبيبتي اروحلج فدوة لاتبجين

أيلول... اسم الله عليك جنت احجي وابجي بس لاتكذب شنو فلم ام سوزان

إياس... والله ماكو فلم وحدة مجلبتلي الف مرة كتلها اني مزوج واحب زوحتي هي بدون كرامة شسويلها

ايلول... لعد هي شلون عرفت رقمك

إياس... ماخذته من اخوها لان اخوها دائماً يجي ياخذ اثاث من المعرض

ايلول... شبكت ايدي بركبتة وبستة من شفايفة
مشتاقتلك بكد رحمة الله

إياس.. اذا مشتاقتلي صدك تعالي نصعد الغرفتنا وعبريلي عن اشتياقج وغمزلي

أيلول.... ضربتة على كتفة صير عاقل شعبرلك مدتشوف بطني واصلة الخشمي كافي عليه ابنك مادري بنتك لاعب بيه طوبه

والله لو مو ابني لو عشيرتة  تجي كدامي هم مراح اعوفج اليوم اريد اطلع ضيم گلبي كله بيج

ايلول... هههههههههههههه شكلي اليوم راح اجيب بسببك

بهذا اليوم تراضيت ويا حبيبي وقضيت ويا احلى اللحظات

جنت نايمة بحضنه رفعت راسي
ايلول... حبيبي اني شلون راح اكدر اعيش بهذا البيت الجبير وحدي والله صعبه

إياس... اوووف منج ايلول انتي السبب لو ساكتة مجان صار كل هذا

ايلول... لا إياس انت شلون ترضاها اسكت واعوف اهلي الناس تشمت بيهم

إياس.. سدي الموضوع حبيبتي شي صار وراح بس متاكد  ابوج مستحيل بعد يجي يعيش اهنا

أيلول.. اي اعرف شنو رأيك تبيع هذا البيت ونشتري بيت قريب من اهلي

إياس... لا حرامات اذا ابيعة مراح الكي مثلة وبهيجي منطقة بس الخاطرج راح أجرا

وناجر بيت قريب من بيت اهلج الحد متتعودين وبعدين نرجع الهذا البيت

ايلول... مممم اوك هم خوش اقتراح

فعلاً اخذنا بيت قريب من اهلي جان صغير على كدنا
دخلت بشهري واجة موعد ولادتي
يبووووو شصار بحالي متت الحد مولدت بسلامة وجان يشرف استاذ احمد للدنيا فدوة الاسمة حبيب امه وابو

ماما وخواتي جانوا وياي معافوني خطية جانوا خايفين اكثر مني

اما حبيبي إياس من شفتة جان حتى دموع اكو بعينة

اجة باسني من راسي

إياس... الحمدلله على سلامتج ام احمد اوووف اشكد جنت خايف. عليج

أيلول.. الله يسلمك حبيبي لاتخاف مبيه شي

ابني وين اريد اشوفة

ماما... حبيبتي لولة شوية ويجيبوا الج
بس ما شاء الله لو تشوفي اشكد حلوو

ود... ولج لولة ماخذ جمالج وجمال ابو اني من هسه حجزتة البنتي

جابوا الي فدوة العمره صدوك جان حلو

احمد هو الفرحة الكملت سعادتي وسعادة إياس

إياس صارت روحة بي يمووت عليه
اني وإياس حبنا يوم بعد يوم يزيد مينقص تعلمت اخفف من كبريائي وعنادي حتى اكدر اعيش براحة

بان صارت عدها بنوته وعلاقتها ويا سيف الحمدلله زينه

ود اختي وصديقتي  حالياً حامل بولد ربي يكومها بسلامة

بابا وماما  موجودين ربي يحفظهم

ماري البلبل ههههههه لا هسه صايرة عاقلة راحت كلية تربية

ادم وريان هذوله احلى ذكرى النه من قدر مدللين بزود اهلي وابوهم

حكاية أيلول وإياس انتهت ان شاء الله تكونوا استمتعتوا بيها ونالت اعجابكم

تحياتي الكم