رواية المغرورة و الأعمى الفصل الثلاثون 30 - بقلم بسمة البياتي

المغرورة-و-الأعمى-
(بقلم بسمة البياتي )
- بارت التاسع و العشرون -

أيلول ... إياس صار يومية يجي علينا واني من أسمع صوت سيارتة بسرعة أدخل للغرفة وأقفل الباب
هو يبقة يدك باب الغرفة الحد ميمل ويروح

ماما والبنات يحجون عليه يكولون اذا تبقين على هذا وضعج راح تخسرين إياس للأبد حتى سيف وعيسى حجوا وياي وحاولوا يقنعوني ارجعلة
بابا الوحيدة مدخل بقراري عافني براحتي

قطعة الأرض الحمدلله انباعت وكدرنا نحصل بيت قريب على بيت سيف بس مو نفس الفرع

جان البيت مساحتة صغيرة بس بناء مرتب ثلاث غرف شوية صغار فوك والجوة مطبخ وهول صغير واستقبال وصحيات
البيت مبي  حديقة

احنا أغراضنا والأثاث كلها بهذاك البيت

مياسة ... هيثم شوكت تروح تجيب الأغراض 

هيثم ... والله مستحي شلون اروح اجيبهن

مياسة ... لعد خوما نبقة هيج على الأقل بس الضروريات الي نستخدمهم والفراش

إياس من عرف أشترينا بيت
مأجر سيارة كبيرة وجايب بيها جمع أغراضنا وحتى اثاث بيتة الي هو مشتريهن هم جايبهم

بابا رفض يأخذهن بس إياس بالكوة خلى يوافق

اني جنت بيت سيف مساعدتهم بشي لان بداية الحمل كولش تعبانة

خالتي منى وبناتها اجوي ساعدوا ماما وخواتي بالترتيب

انتقلنا للبيت وهسه يلا كدرت اخذ راحتي صح سيف وبان ممقصرين ويانة بس واحد مياخذ راحتة اذا مو بيتة

الغرف الفوك واحدة البابا وماما والثانية اني وماري والثالثة الأدومي

سيف اشكد حاول يبقة ادم يما لكن ادم رفض
 
صرت بالشهر الثالث من حملي وبعدني مشايفة إياس

وكالعادة أجة إياس البيتنا واني صعدت للغرفة

اجت ماما دكت الباب كالت افتحي اريد احجي وياج

مضطرة رحت فتحت الباب

ماما... لشوكت تبقين حابسة روحج  انتي مو تكولين ما أريدة وميهمني لعد ليش تخافين تشوفي

أيلول... على شنو اخاف بس اني ميعجبني اشوفة

ماما... والله منا وجاي لأزم تتعودين على شوفتة

أيلول... وليش لأزم اتعود ؟

ماما... راح يجي يبقة اهنا

أيلول ... عزاااااا اكيد دتتشافين  شعندة جاااااي

ماما... إياس واحد من هاي العائلة يجي باي وقت يعجبه البيت بيتا

أيلول.... كمت افور من العصبيه لعد امه الله يرحمها مو جانت اتكول النسيب اذا عاش ويا عيالة يسموا كعدي وهذا شي عيب عدهم

ماما خلت أيدها على حلكي

ماما... والله العظيم مو اني امج بس راح اكولج كلمة حرامات إياس من نصيبج

بس مو صوجج صوجة هو ذابح روحة عليج

والله يا أيلول اذا مجرين عدل وتحترمين وجودة بهذا البيت واذا سمعتي كلمة مو زينة اني بنفسي اروح اخطبلة وأزوجة

أيلول ... اني اسمع ماما وفاتحة حلكي عزاااا هاي عود امي وهيجي تحجي
صخام هاي بس لا تسويها وتروح تزوجة

مياسة ترة انتي امي مو أمه على كيفج وياية وثاني شي اني شعليه بي لا احجي ويا ولا يحجي وياي

ماما... يكون افضل

أيلول...ماما عافتني ونزلت بقيت افتر بالغرفة يبووو اني شلون راح اشوفة

اخير شي استسلمت للأمر الواقع ونزلت جوة

جانوا كاعدين بالهول الدرايج صاير بنص الهول اول منزلت صار كدامي

رفع رأسة شافني

من الأرتباك كمت اتعثر عبالك اول مرة بحياتي اشوفة
بس ياربي اشكد مشتاقتلة

هو بقة يباوع عليه  نزلت فتت من يمه ورحت للمطبخ حتى مسلمت

ماما جانت دتحظر العشى شافتني ابتسمت

وكفت ساعدتها

أيلول... جنا دنصب أجت ريحة دولمة بخشمي

اكولج دتشمين ريحة دولمة لو لا

ماما... لا ماكو هاي ريحة التبسي

أيلول... الله عليج مياسة اريد دولمة ورق عنب وحامضة

ماما... هههههههه وانتي بهذا الوقت أشتهيتها  باجر ان شاء الله أسويها الج

ايلول...اي فدوة اريد تسويها من الصبح من اكعد اتريك بيها

ماما... هههههههههه تتريكين دولمة ماشي ان شاء الله

أيلول .. اني اهنا اتعشى

ماما... ايلووووول شحجيت اني كتلج تعودي وبدون كلام زايد تعالي تعشي ويانة

أيلول... ما أكدر اعترض لان اخاف من تهديدها

رحت كعدت بعيد عن إياس مجنت اريد اصير كدامه

إياس... من عرفت أيلول حامل يومية اروحلهم اريد اشوفها بس العنودية متقبل تطلع

انتقلوا بيت أبو قدر البيت جديد جنت يومية اروح ازورهم

ومثل كل يوم جنت يمهم ابو قدر وأم قدر اقترحوا عليه ابقة يمهم

عزت عليه نفسي بصراحة احنا عدنا صعبه الرجال يعيش بيت عياله بس ام قدر كدرت تقنعني

أم قدر.... انت خوما راح تبقة اهنا طول عمرك هي فترة مؤقتة الحد ما هاي ام راس اليابس ترجع وياك

هي من راح تشوفك راح تنسى الزعل

إياس ... وافقت بس جان عندي طلب

اريد ابو قدر يرجع للشغل والله متبهذل بدونة

بالبداية ابو قدر رفض

إياس... ابو قدر انت دتشتغل بتعبك اني ممفضل عليك بشي ترة اني المحتاجك والله

اخير شي اقتنع ابو قدر يرجع

قبل العشى بدقايق نزلت المغرورة

بقيت صافن عليها الحمل لايكلها
من لمعة عيونها عرفت هي هم مشتاقتلي بس اوووف من عنادها 

باليل نمت ويا ادم بغرفتة وكلت باجر اروح اجيب ملابسي والأغراض الأحتاجها

أيلول... بعز النوم اجت ماما كعدتني

ماما ... مو البارحة خبصتيني على الدولمة وتريدين تتريكين بيها

أيلول... بيش ساعة هسة ؟

ماما... بثمانية

أيلول... شنوووو هاي شوكت لحكتي تسويها

ماما... والله من ساعة ستة كاعدة علمودج

ايلول... كمت حضنتها فدوة اروحلج ربي لايحرمني منج

غسلت بالحمام الفوك ونزلت جوة

جانوا بابا وإياس ديتريكون كلت صباح الخير رحت كعدت بصف بابا بوستة صباح العسل هيثومي حبيبي

جنت متقصدة هيجي أسوي اريد احرك دم إياس

بابا... صباح الجمال باباتي شنو كل هذا الغزل الي

أيلول... هو الغزل يلوك الك ميلوك الغيرك

شفت إياس وجهة صار احمر بالكوة يبلع اللكمة

اجت ماما جايبتلي الدولمة

بابا خربان ضحك عليه
وإياس صافن ويباوع عليه

واني نسيت نفسي أكل وامطك من الحموضة ومستمتعة

بابا... عافيات بنتي بس على كيفج هههههههههه

ماما... ولج بالكذب كولي تفضلوا وياي

أيلول.... وووي نسيت مدوا أيدكم طعمها يجنن تفوتكم

ماما... هههههه من صدك انفتحت نفسي عليها من ورا طريقة اكلج

ماما باوعت الإياس وكالت ترة هذا ابنك من البارحة يريد دولمة

إياس...بالعافية على گلب ابني شعندي غيرة

أيلول... وكفت اللكمة بلاعيمي باوعت عليه وخزرتة حجيت بداخلي هذا أكيد يريد يضوحني لان ضوجتة

بقينا اني وإياس على هاي الحالة مثل توم وجيري اضوجة يرجع يضوجني

دخلت بشهر الرابع جنت أراجع دكتورتي بموعدها رفضت اعرف شنو جنس الجنين كل اليجي من ربي نعمة المهم الصحة الزينة وتمام الخلقة

جانت بداية الشتا والجو بي برودة

دنيا صبح جنت نايمة صارت صوت يمي كعدت بس بقيت مغمضة سمعت صوت بان بالغرفة تحجي ويا ماما

ماما... شعجب اليوم جاية من الصبح

بان... اني طلبت من سيف يجيبني قبل لايروح للدوام لان ابقة وحدي اضوج

ماما...لعد خابري سيف كوليلة يجي يتغدى يمنا

بان... ماشي هسه راح انام لان نعسانة

ايلول... اسمع كلامهم واني بعدني مغطية راسي ردت ارجع انام سمعت صوت بجي بس بصوت مخنوك
رفعت الغطة شفت بان نايمة بفراش ماري لان ماري بالدوام

جانت متغطية وكاتمة صوتها حتى لاينسمع

متحملت كمت من الفراش رحت كعدت بطارف السرير يمها

سحبت الغطة من راسها هي فزت يمكن عبالها ماما

ايلول... لاتخافين هاي اني

باوعت عليه جانت عيونها حمرة من البجي من شافتني حضنتني وصارت تبجي قوووي

خفت من شفت هذا منظرها
اسم الله حبيبتي شبيج

بان مستمرة بالبجي متحجي بقيت حاضنتها عفتها اطلع كل البقلبها وترتاح

هدأت شوية رفعت راسها ومسحت دموعها

أيلول.. مدام هدئتي شويه احجيلي شبيج
شفتها تباوع على باب الغرفة كمت قفلت الباب ورجعت كعدت يمها

بان... راح احجيلج كولشي بس الله عليج لاتستحقريني وتكرهيني

أيلول... من هيجي حجت خفت بنونه احجي خوفتيني شصاير

بان ...صارلي اشكد عايشة ويا سيف جنت دائما اعتبرة زوج اختي الله يرحمها وابن خالي مفديوم فكرت بي غير تفكير

وهو هم نفس الشي جان يعاملني مثل ميتعامل ويا ريان

جان من يأخذني البيت خالي لو هما يجون يمنا وأمه تبقة تسمعني كلام ليش لهسه مصار عندج حمل
هو يسكتها يكول اني ما أريد طفل هسه
  وابد ميقبل احد يضوجني او يحجي عليه

من جنت أشوف هاي حنيتة عليه يزيد احترامي اله

دراستي ديساعدني بيها جابلي كومة كتب حتى ابدي ادرس من هسه  قبل لا أقدم على الماجستير

من نكعد انسوالف سوى يكول

سيف.... بان اي وقت تشوفين نفسج مليتي من هاي العيشة كوليلي اني عد وعدي انطيج حريتج ولاتتصورين هذا كلامي حتى اعوفج واروح اشوف حياتي لا والله ابد اني حياتي من بعد قدر انتهت بس ما أريد اظلمج وياي

بان.... لا مو هسه اخاف من اطلق اهلي بعد يمنعوني اكمل دراستي
واني هم اريد ريان شوية  يكبر ما أريد اعوفه هسه

البارحة جنت بالغرفة بيدي كتاب داقرأ ويمي كوب قهوة

ريان جان كاعد بالكاع مطشر كتبة وديدرس

ريان من خلص قرأية اجة كعد على السرير من يم رجلي وبقة يلعب

اني جنت مندمجة بالكتاب الداقرأ فاصلة عن العالم

ريان .. اني روح انام يم بابا طفى الضوة وراد يطلع

بان ... شغل الضوة ليش طفيتة

عاند ميشغلة عافني وراح تعاجزت اروح اشغلة
فتحت لايت موبايلي ورجعت اقرأ

اني جنت لابسة دشداشة قصيرة ربع ردن وشعري مفتوح متعودة بس من انام هيجي البس

باقي الأوقات احترم وجود سيف بالبيت ملابسي كلها طويلة وبيها عرض وحتى شعري ابرمة واشيلة

شلت كوب القهوة اريد ارجعة للمطبخ اول منزلت من السرير
رجل نزلتها بالكاع دانزل الرجل الثانية انجبحت على وجهي
طلع ريان رابط وحدة من رجلي بحبل بحافة السرير
لوتشوفين منظري رجل فوك ورجل جوة ونص جسمي بالكاع
من وكعت الكوب وكع من ايدي انكسر وايدي صارت على الكزاز

من صوت الطبة والعيطة مالتي اجة سيف يركض
شغل الضوة وشافتي بهذا المنظر ولج ثوبي مرفوع جسمي كلة طالع

ردت اموت من الفشلة بقيت ابجي هو واكف مصدوم بمنظري ميعرف شيسوي

بالكوة تحركت جريت الغطة سترت نفسي بس بقت رجلي معلكة ما اكدر افتحها

هو من شافها مربوطة عرف هاي سوالف ريان

أيلول.... هي تحجي وتبجي واني ميتة من الضحك ههههههههههههههه اتخيل منظرها شلون رجل بالكاع ورجل معلكة بالسرير

ادري شبيج هلكد ثولة شنو محسيتي من ربط رجلج هههههههه

بان .... واللع محسيت اني من الزم كتاب افصل عن العالم

بان رجعت كملت كلامها

سيف فتح الحبل من رجلي وساعدني اكوم راد يروح يضرب ريان مقبلت

هو كعد يلم الكزاز من شاف الدم فز

سيف ... شنو هذا الدم انتي انجرحتي

بان ... فتحت ايدي وشوفتها اله

سيف لم الكزاز وطلع
بعدين رجع بيدة معقم وقطن ولاصق جروح

اخذ أيدي عقمها بس جان مرتبك مدري شبي

حتى اني جنت متوترة من قربة مني

سيف ... الحمد لله الجرح سطحي مو عميق

خلى لاصق على ايدي رفع راسة اجت عينه بعيني اني جنت بعدني ابجي

مد ايدة مسح دموعي
ايدة من لمست خدي جسمي قشعر

تقرب مني حضني وصار يبوسني ما اعرف شصار كل الي اعرفة اني بحضنة وممنعتة

ومحسيت على نفسي وعلى المصيبة الصارت غير لمن حسيت بالم قوي

حاولت ابعدة عني بس بعد فوات الأوان

أيلول.... اباوع خلت ايدها على وجها وصارت تبجي قوي

نزلت ايدها من وجها وحجيت وياها

بان جاوبيني يعني سيف أخذج ؟

بان... هزت راسها بمعنى اي

أيلول... زين هو شسوة بعد الصار

بان ... بقة كاعد على حافة السرير ولأزم راسة بيدة
سيف ... بان اني اسف والله ما أعرف شلون هيجي سويت

بان .. اني جنت بس ابجي هو بقة يعتذر بعدين عافني وطلع

بقيت كاعدة للصبح
طلعت من الغرفة جان هو مبدل يريد يروح للدوام ومبين من شكلة هو هم منايم

بان ... سيف أريد اروح الأهلي
حتى مسئلني ليش اريد اروح لو شسوي

سيف.. ماشي تحظري اخذج

أيلول... بان هسه انتي على شنو اموتة نفسج من البجي ترة هو زوجج والصار شي عادي

بان... شلون عادي واني خنت قدر

أيلول... جريت حسرة الله يرحمها
بنونة حبيبتي انتي مخنتيها هي راحت الدار حقها
بالعكس هسه هي مرتاحة لأن انتي يم زوجها واولادها ودتهتمين بيهم

يعني لو سيف مزوج وحدة غريبة وتعاملت ويا ريان بقسوة تعتقدين قدر راح ترتاح بقبرها

انتي خالتهم ماكو احن منج عليهم حتى من راح يصير عندج اولاد مراح تفرقين بينهم وبين أدم وريان

حبيبتي بعد الصار بينكم لازم تتقبلين الوضع وعيشي حياتج

زين سؤال انتي شنو مشاعرج اتجاه سيف ترة اذا مجان عندج مشاعر اله مجان سلمتي نفسج  بهاي السهولة

بان.. والله احبه واحترمة بس مو الحب الي بين اي ثنين مزوجين

أيلول... صدكيني يجي يوم وتحبون بعض

مو تدرين بيه اني اشكد جنت اكره إياس وما اطيقة وهسه رغم كل هاي المشاكل البينة روحي بي

بان...بس ترة هو هم مبين ميريدني وتندم على الصار

أيلول ... مو حقة يتندم اشو انتي كدامة دموعج صايرة مثل دجلة والفرات الله يساعدة عليج

اليوم ابقي ارتاحي اهنا وباجر من ترجعين اريدج تفتحين صفحة جديدة بحياتج وتتقبلين وضعج
والله سيف وردة متلكين احسن منه

سيف مقبل يجي على الغدة بس بابا اتصل عليه كاله شعندك باقي وحدك بالبيت تعال

من اجة جان شكلة تعبان يبووووو حالتة اصعب من بان

جان يستحي يباوع على بان وهي هم نفس الشي

كعدنا نتغده اني مادري شبيه صايرة اكل بشكل مو طبيعي حتى وزني زاد هاي اذا ابقة هيجي الحد ما اولد اصير فيل

إياس جان كلما يدخل للبيت محمل ويا اشكال والوان ميبقي شي ميجيبة لان يعرفني ما أطلب منه فهو يجيب

بعد الغده سيف راح بس بان وريان بقوا عدنا

أيلول..بنونة شنو رايج نروح للصالون نسوي تغيرات صارلي هوايه مرايحة

بان... عزااااا انتي حامل موزين تصبغين وهاي السوالف

أيلول... ههههههه صرتي مثل مياسة يمعودة عادي قابل شراح يصير
يلا خابري سيف استاذني منه حتى نروح اكو صالون اهنا قريب

بان... ممممم وانتي مراح تستأذنين

ايلول... عوجت حلكي وحجيت هسه ادز مياسة تكولة

رحت على ماما

أيلول .. مياسة كولي النسيبج اريد اروح للصالون

ماما... ومتروحين تكوليلة انتي اني معليه

أيلول... اذا مكتيلة اروح بدون ما أكولة والله

راحت ماما تكولة

أيلول... أتصلتي بسيف لو لا

بان... والله استحي هسه يكول هاي تريد تروح للصالون علمودي

أيلول... اخذت منها الموبايل  واني اتصلت

الووو سيف اريد اروح للصالون كلت اخذ بان وياي ما أريد اروح وحدي

اوك تسلم ابو ادومي

باوعت على بان مديتلها الموبايل سيف يريد يحجي وياج
ههههههه وجها صار احمر انطيتها الموبايل وطلعت

ماما.... إياس هو يوصلكم

ايلول... اهوووو هو الصالون هياتة أريد اطلع اتمشي مختنكة
جنت احجي وصار إياس كدامي

إياس... يعني اذا مشيتي هاي الشوية راح تتونسين

أيلول...هووووووو اني الله غاضب عليه عفتة ومشيت

أخذت بان ورحت للصالون
رجعت صبغت شعري اسود وحفيت

بان خليتهم يصبغون شعرها عسلي وخصلتة ميش وحفت طلعت كيكة

من دنرجع سئلتها من حجة وياج سيف شكالج هههههه فضولية موبيدي

بان ... سئلني عندي فلوس لو لا حتى يجيبلي

أيلول... اوووي فدوة للحنين

بان ثاني يوم رجعت البيتها

هاي الأيام إياس وضعة ميعجبني موبايلة ميسكت كل شوية يوصل مسج لو اتصال

جان مخلي موبايلة على الشحن بالأستقبال وهو بالحمام

رن الموبايل اتصال على الفايبر
رحت بسرعة فتحتة جان الاتصال من وحدة مكتوب أسمها ام سوزان خلص الأتصال دخلت على اسمها جانت دازة كومة مسجات صح المسجات عادية
صباح الخير

مساء الخير

لو اليوم اجيت للمعرض انت ماكو

مسج لاخ انت بيا معرض تتواجد اكثر

هو ممجاوبها
بقيت اقرأ بس مرتاحيت أبد اكيد هاي عدها شي ويا

رجعت الموبايل المكانة
انداريت لكيت إياس واكف متكتف ويباوع عليه .......

يتبع