رواية المغرورة و الأعمى الفصل الخامس عشر 15 - بقلم بسمة البياتي

المغرورة-و-الأعمى-
(بقلم بسمة البياتي )
- بارت الرابع عشر  -

أيلول .. اني والبنات بالمطبخ كل وحدة بيدها شغلة دتسويها سمعت صوت إياس
مدري شصار بيه جان قريب من المطبخ
صوت خالاتي ديسلمون عليه ويتحمدولة بالسلامة

البنات انخبصوا كلها تريد تشوفة
الصوت صار قريب  ختلت ورا أسماء
هو لو حتى يشوفني مراح يعرفني بس مدري شبيه انثولت

أسماء... لج لولة شبيج ختلتي ترة ماراح ياكلج

أيلول ... اسماء اسكتي الخاطر الله

دخل للمطبخ كال السلام عليكم

البنات ردو السلام وبدت وحدة ورة الثانية تتحمدللة بالسلامة

صاحة بابا من برا تعال إياس اجوا اصدقائك
ترخص من البنات وطلع

كل هذا واني ورا أسماء

البنات رجعوا الشغلهم اجت يمي قدر

قدر .. ولج ليش مسلمتي عليه

أسماء .. عوفيها جانت خاتلة وراية

أيلول... عود بعدين اسلم

أسماء.. يمكن ضامتلة سلام خاص وغمزت
بس شفتي شلون راجع الدم بوجهة صاير احلى من قبل جعلتة اخوية

أيلول... وين أشوفة ولا باوعت عليه

صبينا الغدا تغدو وبعدها الشاي والفواكه واحنا بس جيب ودي انكسر ظهرنا 
إياس بعد مشفتة التهى ويا الخطار بس شفت عيسى وسلمت عليه

للساعة ثلاثة الكل راح
وكالعادة بس بقت خالتي منى وبناتها حتى يساعدونا بالتنظيف

أيلول .. فدوة بنات اريد اروح اسبح وانام انتوا كملوا لان يمكن ضغطي نزل من التعب

عفتهم رحت سبحت ونمت جنت بس اريد انهزم منه

اجت ود للغرفة جانت دتجمع ملابسها يمكن تريد تروح

أيلول.. ود اليوم عوفي راما يمي وانتي التهي بعيسى خطية ادري بيج مشتاقتلة وهو مشتاقلج

ود... فدوة القلبج لو هيجي الاخت لو متنراد

جانت راما نايمة عافتها وراحت
نمت مكعدت غير ساعة بالستة
باوعت خطية البنات كل وحدة نايمة بمكان وفاتحة حلكها من التعب ههههه

لكيت راما كاعدة دتلعب ويا ريان بقيت متمددة بفراشي ما أريد اكوم

جان أشوف ريان ضرب راما ودفعها قووي انضرب راسها بحافة السرير
كمت بسرعة شلتها اشو هاي صارت زركة وانكطع صوتها اضرب بخدها بس اريد صوتها يطلع تخبلت كلت خلص راح تموت

بس الحمدلله اخير شي كدرت تتنفس وطلع صوتها  خطية مكان الضربة بكصتها صار عنجورة وأزرك كعدوا البنات يسكتون بيها  ورا وين يلا سكتت

جان تتصل ود كلت بقلبي معقولة  حست بنتها متأذية

ايلول ... الووو

ود ... الووو ايلول شبيها راما جانت مهبوطة وتحجي بخوف

ايلول .. على كيفج اهدئي ما بيها شي هياتها يمي تريدين تحجين وياها انطيت الموبايل بيد راما

وبقت ادردم ويا امها  وكولشي منفهم من كلامها

أيلول ... اخذت المويايل من ايد راما

اكول ود انتي شلون عرفتي براما

ود .. عوفج من هذا الموضوع المهم راما بخير

أيلول.. صكيت على اسناني ود احجي هاي ماري كالتلج موو ؟

ود .. اي هي لكيتها دازتلي مسج

أيلول.. سديته من ود ونطيت راما البان
جان عندي مشط جبير واسنانة هم تصير كبار اخذتة وطلعت ادور على ريان وماري لان ثنينهم اختفوا

دخلت للهول شفت ريان بحضن بابا وماري كاعدة بين ماما وخالتي
رحت اول شي على ريان
هو من شافني لزم قميص بابا وختل بحضنة

جيت  اريد اسحبة بابا مقبل

بابا... عوفي شبيج ويا بنتي مدتشوفي اشكد خايف

أيلول.  تنطينا لو اسوي كارثة اليوم

هو بحضن بابا وجان اضربة بالمشط قووي بقة يعيط ويبجي

بابا.... هاي صدك كذب اشو متحترمين مو كتلج عوفي

قدر ... لج شبيج متخبلة علينا اليوم

أيلول ... دروحي شوفي كصت راما وبعدين احجي

قدر... عزااا شبيها راما
عافتني وراحت تركض للغرفة  للامانة قدر تموت على راما

عفت ريان ورحت على ماريا من شافتني لزكت بظهر ماما
جريتها من شعرها قوي ماما وخالتي بس يريدون يفكوها مني
ضربتها بكل قوتي بالمشط على زندها ورجعت ضربتها مرة ثانية خالتي جرت المشط من ايدي اخذته

ماما ... حاطة عقلج بعقل الجهال شوكت تكبرين

بابا ... والله لو ما رجلج كاعد جان بنفس المشط رجعت ضربتج

أيلول من كال رجلج كاعد جمدت بمكاني وفتحت عيني احس انشليت

انداريت وراية وجان اشوف إياس كاعد يباوع عليه وفاتح حلكة يمكن هو هم انصدم مثلي

منى ... والله يا إياس الله يساعدك على هاي البلوة اني من زمان جنت اكوللهم هاي ديربالكم ازوجوها

إياس بس يباوع ولا جاوبها

إياس... أنتي أيلول!!؟

بابا... مستغرب ليش أيلول مسلمت عليك ؟

إياس... بلي سلمت بس معرفتها لان هواية بنات جانوا بالمطبخ

أيلول .. اني بعدني جامدة بمكاني بس تفاجئت لكلام إياس منطة بيه وكال البابا اي سلمت عليه

عفتهم يحجون وبسرعة رجعت للغرفة
اسماء .. شبيج لولة اشو وجهج احمر مو رحتي تكتليهم بس لا هما كتلوج

أبلول .. دنجبي شفت إياس وشافني

أسماء ... خرب غير تصيحيني حتى اتفرج عليكم

أيلول .. مو قرودة كدامج وتتفرجين علينا

أسماء .. لا ولج قصدت ردت اشوف ردت فعل إياس من يشوفج عزااااااااااا أيلول بس لا شافج وانتي هادة على ريان وماري وبيدج المشط وبهذا شكلج عبالك امنا الغولة

أيلول... لج شفتي حظي المصخم طول النهار خاتلة منه وتالي يشوفني بهذا منظري
جان شعري مفتوح ولابسة دشداشة قصيرة جوا الركبة بشوية ربع ردن

أسماء... عادي هو زوجج مو عيب ولا حرام

إياس...سويت العملية وبفضل الله نجحت
رجعنا اني وعيسى للعراق وأكثر شي جنت اتمنى اشوفة هي أيلول بس جنت مقرر اذا بعدها مصرة على الطلاك  اطلكها ما أكدر اجربها تبقة وياي
وصلنا الفجر خطية ابو قدر وسيف جانوا منتظرينا والفرحة بعيونهم استقبلوني قبل لا ادخل للبيت ذبحوا ذبائح على سلامتي
من دخلت للبيت عيني أدور على أيلول
شفت ام قدر ومرة ثانية وياها عرفتها هاي خالتهم منى أجوي بنات ثنين وثنينهم اني شايفهم قبل واعرفهم زوجة عيسى والثانية بان
بس للأسف أيلول ماكو ام قدر كالت البنات بعدهم نايمات

اني وعيسى هم جنا تعبانين ترخصت منهم وصعدت دخلت للغرفة كلت بلكي الكيها موجودة بس ملكيتها

سبحت ونمت
كعدت ساعة 11 نزلت لكيت البيت هوسة كومة نسوان وبنات سلمت على النسوان اجاني أدم كال جدو يريدك برا اجو اصدقائك

رحت للمطبخ داطلع برا
باوعت المطبخ متروس بنات خرب هسة هاي لو حتى اشوفها مراح اعرفها

سلمت عليهم جان اكو بنية تحجي وياي بخجل وتنصي راسها  كلت يمكن هاي أيلول جانت ملامحها عادية مبيها شي مميز بس متتعب باوعت عليها وبتسمتلها هي هم ردتلي الأبتسامة كلت اي اكيد هاي ايلول

بعدها التهيت ويا أصدقائي وأقارب ابو قدر للساعة ثلاثة يلا راحوا

جنت مسطور صعدت ارتاح فتريت بالغرفة فتحت الكنتور ماكو اي ملابس الها

عرفت أيلول حاسمة قرارها وتريد لانفصال
ردت ارجع أنام طار النوم من عيني

العصر نزلت كعدت يم أبو قدر وام قدر

جان تجي قدر تعرفني عن نفسها
بعد شوية اجت بنية تركض كعدت يم امها من سوالفها عرفتها هاي ماري

الله يستر عليهن كلهن حلوات

كاعدين دنسوالف ابو قدر جان كاعد كدامي هو وام قدر واختها منى

أجت بنية صايرة بركان من العصبيه تريد تضرب ريان  ضحكت على عصبيتها  بس دنكت راسي لان لابسة قصير وبدون حجاب

سمعت ابو قدر يكولها بنتي بس ابد متوقعت ممكن هاي تكون أيلول وحتى صوتها من العصبيه والصياح مكدرت اركز عليه

بس من كال ابو قدر لوما رجلج كاعد رفعت راسي بسرعة هي هم جمدت بمكانها وندارت بسرعة

ياويلييييي ياريتها ممندارة اشكد جنت راسملها صور بخيالي بس ابد ميشبهن الواكفة كدامي صار وجع بعيني هلكد مركزت بيها حتى رمش مرمشت سبحان الخالقها على هذا الحسن الشايلتة
حجت وياي خالتهم مكدرت اجاوبها

كلمة وحدة كدرت انطق انتي ايلول

بس من سمعت ابوها حجة ومتعصب تلحكت الموقف بسرعة وكتلة بلي سلمت عليه

عافتنا وراحت واني لوبيدي تبقة واكفة كدامي 

أيلول.. لبست تراك البدي مالتة طويل سويت شعري كعكة
وطلعت احظر العشى ويا البنات سوينا نواشف
واكفة بالمطبخ شفت ود دخلت للمطبخ

..اعوذ باللة انتي مو الظهر رحتي شجابج  لوتجين تعيشين يمنا مو أحسن

ود.. طيح الله حظج على هذا الأستقبال شسوي بالي يم راما وعيسى هم مشتاقلها اجينا نأخذها لاتخافين منبات

أيلول .. اي احسن خفتآ وراحة
ههههه غمتني وراحت

سيف هم اجة ديأخذ قدر اهلي مقبلوا يروحون قبل ميتعشون
صبينا العشى ولازم كلنا نكعد سوا يبوووو عيون إياس تلحكني وين ما أروح

بعد العشى كاعدين كلنا ود حجت

ود .. لك ريان هاي شمسوي بكصة راما

قدر .. يلا عادي هذا مهرها هي تاليها اله

أيلول .. شنو شنو عيدي مسمعت منو ياخذ منو لو بس ريان يظل بالدنيا ما اخلي يأخذ راما

قدر .. لج ايلول انتي شعليج هاي على اساس انتي خالتة امداج امها وابوها موجودين انتي شكووو

ايلول .. ليش بكيف امها وابوها هاي اني مربيتها شحدهم ينطوها بدون موافقتي

قدر .. عيسى متحجي اشو ساكت

عيسى .. اني معليه لاتوكعيني باللسان المغرورة

ايلول... عريس راما موجود متاخذ غيرة

سيف... هههههه واني اعرف منو هو

ايلول .. فدوة الابو ادومي اني كايلة محد يفهمني غيرك

قدر .. منو هذا بله ؟

سيف... اكو غيرة حبيب كلبها أدم

قدر... عابتلج دكولي هيج من البداية لو لازم تحركين دمي

ايلول.. قبل شوية تريدين تأكليني وهسه الابتسامة وصلت الأذنج

قدر .. انجبي جنت اشاقة وياج
هو أدم دائما يكول من اكبر اريد ازوج وحدة تشبه لولتي

أيلول ... فدوة تروحلة لولتة بس هو هيجي يدلعني حبيبي

إياس... اترخص منكم الكعدة وياكم حلوة بس تعبان اريد ارتاح تصبحون على خير

وقبل لايوصل للباب كال ايلول تعالي

ايلول... اول مرة بحياتي هيجي اخجل حسيت روحي معت الكل يباوع عليه ويتغامزون ويسوون حركات بقيت بمكاني متحركت

قدر .. مو صاحج الرجال متكومين شمنتظرة

ايلول ... خزرتها وكمت

صعدت الدرج واني احجي ويا روحي هفففف شيريد مني هذا وجمالة كدام الكل يكولي تعالي
فتحت باب الغرفة ودخلت هو جان واكف كدام البلكونة من شافني اندار عليه مبين عليه عصبي
تقدم عليه وحجة

إياس ... اني كم مرة منعتج تتشاقين ويا سيف وعيسى
وياريت بس على الشقة طلع حتى لبسج طايح حظه كدامهم وحجاب ماكو

أيلول.. الف مرة كتلك هذولة مثل اخواني واني ممتعودة اتقيد كدامهم ولا البس حجاب

أياس ... انتي دتضحكين على روحج لو عليه هذولة مو اخوتج ومحرمين عليج قسما بالله اذا بعد شفتج هيجي لابسة كدامهم لو شعرج طالع اندمج على الساعة الجيتي بيها للدنيا

ايلول... انهضمت من كلامة بس ما اكدر احجي اخاف منه لان شكلة متعصب بقيت ساكتة

إياس .. ليش ناقلة هدومج من الغرفة ؟

أيلول ... انت بعد متحتاجني على شنو باقيه اريد اطلك
من كلت اطلك شكلة صار يخوف تقدم عليه واني رجعت ليورا

إياس .. لج سمعيني زين طلاك ماكو انسي
لو اعرف اعوفج طول عمرج هيج تبقين معلكة

أيلول .. باوعت عليه بتحدي اوك عادي وانت تحلم تلمس شعرة مني

إياس ... استفزتني بكلامها بالكوة سيطرت على اعصابي

عادي اني مميت عليج الحمدلله صحتي رجعتلي وحالتي زينة أكدر ازوج بدال الوحدة ثلاثة

ايلول... طلكني  وروح ازوج

إياس... هههههههه لا محزرتي انتي تبقين هيج والباقي يصيرن ضرايرج

أيلول... هذا بعدة امه مجايبتة الي يذلني ويزوج عليه

إياس ... هاي شبيج شنو تغارين ؟

أيلول.. عشتوو على شنو اغار بس ما اقبل احد يهين كرامتي

إياس... ماشي انشوف

أيلول... خلصت لو بعد عندك كلام ؟

إياس .. طلعيلي البوم صور العرس وروحي

إيلول ... تفاجئت من طلبة بس رحت طلعتة انطيتة الة ونزلت

إياس .. متت من الغيرة من شفت لبسها كدام سيف وعيسى بس مكدرت احجي
بقت تشاقة وتضحك ولا حاسبتلي حساب صعدت فوك وصحتلها

حجيت وياها جانت تمثل القوة كدامي بس ادري بيها خايفة
تمنيت اخذها الحضني بس اوووف مبين راح تعبني هواية يلا عادي اليريد الحلو يصبر على مرة
كعدت اتفرج على البوم الصور جانت طالعة حورية

رجعت الشغلي بالمعرض الحمدلله لكيت الشغل احسن من قبل ابو قدر و عيسى امشين الشغل على احسن مايكون دوم احمد الله واشكرة لان هما بحياتي

بس جان الشي الوحيد المنغص عليه عيشتي هي أيلول اشكد احاول اقترب منها هي تبتعد
غيرتي زادت عن حدها صرت لو بيدي اضمها عن عيون الناس كلها اكتشفت نفسي اني غركان بحبها
بس صدك لو كال القيصر منين اجيب احساس للي مايحس

أيلول...تعبت من غيرة إياس بديت أختنك حتى لبسي يتحكم بي ومن أشتكي الأهلي يكولون احنا معلينا هذا زوجج غصبا عليج تسمعين كلامة
تحدد عرس أسامة وقررت اروح لان اذا اكول ما اروح هم يطلعلي سالفة

إياس .. تريدين تروحين العرس أسامة ؟

أيلول .. اي

إياس.  لا ماكو روحة العرس بقاعة مختلطة تريدين الشباب يتفرجون عليج

أيلول.. طفح الكيل عندي
كافي الخاطر ربك ترة خنكتني بالخطوبة كلت ما اروح كلبت الدنيا على رأسي
وهسة لان اريد أروح متقبل

إياس .. نصي صوتج كلت ماكو روحة يعني ماكو انتهى النقاش

وفعلا مخلاني اروح وهو هم مراح بس دز هدية بيد بابا الهم

بعد عرس اسامة مها وزوجة أسامة شدوا ويا ود يومية مسويلهم مشكلة وياها أسامة مبي خير يمشي بكلام مرتة
اخير شي صايرة مشكلة جبير بينهم وعيسى واسامة مضاربين ود اجتنا زعلانة تبقة يمنا الى ان عيسى يلكي مشتمل صغير ويشلون بي

باليل متمددة بفراشي وداتراسل ويا أسماء

أسماء .. لولة اليوم رحت على كماليات مراد شلون جايب زيوت شعر تجنن متروحين تشترين يفيدون شعرج مو كلتي لاطراف متقصفة من الصبغ 

أيلول.. يمعودة سكتي هو إياس وين يخليني اطلع اصلا نسيت شكل السوك

أسماء .. لج  كالي عدهم خدمة توصيل بس راسلي البيج وانطيهم العنوان ورقم تلفون

أيلول ... اوك خلي أراسلهم

لكيت البيج وراسلتة بس مجاوبوا
رجعت اكمل كلام ويا اسماء

أسماء .. شوكت تحنين على الرجال ترة والله حرام عليج

أيلول .. وشمسويتلة اني حتى حرام عليه ؟

أسماء .. ايباااااه اشكد فقيرة كولشي ممسوية

ايلول .. لحظة جاوبوني

رحت دزيت صورة للزيت الي اريدة وسئلتة على السعر

رجعت اكمل كلام ويا اسو

اسماء .. الله عليج اكو وحدة عدها هيجي رجال عايفتة وعايفة حضنه ومكابلة بان وماري شنو انتي متعوزين حنان و رومانسية

ايلول... عود اذا عوزت رومانسية وحنان احضن المخدة وانام

جيت ادزها الأسماء لكيت نفسي دازتها للبيج

طفر من مكاني وبقيت الطم على خدي والله بهذيج اللحظة تمنيت الكاع تنشك وتبلعني موقف ما اتمنى العدوي

المصيبة جان الماسنجر مبي حذف  يطلع يمي شاف الرسالة

كتبلي شنو ومخلي علامة استفهام هواية

اريد اكتب وابرر موقفي ايدي ترجف

رجع كتب وليش تحضنين المخدة من تعوزين حنان تعالي اني احضنج

كمت الطم وابجي
بالكوة كدرت اكتب اخي والله العظيم غلطانة بالمحادثة

كتب عادي بس هم اني بالخدمة
وبقة كل شوية يدز مسج
اخير شي كتب اذا مجاوبين راح اصور المحادثة وانشرها بالبيج وانزل رابط صفحتج

ايلول ... تخبلت من هيجي  كال
المصيبة خالاتي ونسوان خوالي وبناتهم كلهن يعرفوا عزااااا بعيني راح انفضح

طلعت اركض ادور العيسى بلكي بعدة مرايح لان يومية يجي يشوف ود و راما ويروح

باوعت بالغرفة الثانية ماكو سمعت صوت راما بالاستقبال رحت اركض واني ابجي فتت بسرعة وصحت عيسى
وجان اشوف إياس يمه بقيت بمكاني واكفة

ود.... ايلول تبجي لا اكيد اكو مصيبة

عيسى .. شبيج لولة

إياس بسرعة اجة وكف كدامي يمكن ميريد عيسى يشوفني لان شعري مفتوح ولابسة دشداشة فانيلة لطش على جسمي

إياس.. شكو شبيج ليش تبجين

إيلول ... انخرست اخاف احجي
بلعت ريك وجاوبت والله مو قصدي جاي اراسل اسماء ودزيت مسج للبيج بالغلط

إياس. . انتي اشدتخربطين يارسالة يابيج احجي عدل

أيلول .. جنت احجي وابجي ردت اشتري زيت شعر راسلت البيج حتى يدزو الي بنفس الوقت جنت اراسل اسماء وغلطت بالمحادثة

بسرعة سحب من ايدي التلفون وسالني على الرمز انطيتة اله واني لو تذبحوني ميطلع مني قطرة دم

فتح الموبايل ودخل على الماسنجر
اني بسرعة ختلت ورة ود

ود بصوت ناصي يمعزاية شبيج خايفة شمصخمة

إياس يقرأ وفاتح عينة ونار يطلع منها

باوع عليه وسئلني وين عنوان هاي الكماليات

ايلول .. موجودة بالبيج

أخذ الموبايل وعافني وصعد فوك

ود... ولج الفضول كتلني احجي شمسوية حجيتلها كولشي اشو هاي بقت تضحك

ايلول.  ترة والله محجيت نكتة

ثاني يوم إياس رايح للولد متعارك ويا وحتى ضرب ضاربة وهذا الجبان باقي يتوسل لان يخاف لاينفضح وبعد محد يشتري منه

ايلول..كاعد ويا ماما واني من اكعد ويا مياسة تفتح وياي نفس الاسطوانة

ماما.. ايلول شوكت ترجعين العقلج مو كافي يعني تشوفين الرجال ساكت وصابر عليج انتي تستغلي ترة اني وابوج قررنا بعد منسكتلج غصبا عليج تصعدين يم رجلج

أيلول ... اهوووو انتي متملين من هذا الكلام يومية تعيدين بي  القاضي راضي انتوا معليكم بينا اني كتلج وارجع اكول ما أريد خوما كوة

ماما... صح انتي بنتي وتربيتي بس بديت اشك بيج
ليش متقبلين إياس يتقرب منج بيج شي

أيلول.... حجت ماما هذا الكلام واني احس جبل وكع على راسي معقولة امي تشك بشرفي .......

يتبع....