رواية المغرورة و الأعمى الفصل الرابع 4 - بقلم بسمة البياتي

-المغرورة - و - الأعمى
( بقلم بسمة البياتي )
- بارت الثالث -

أيلول .. واكفة بالمطبخ داسوي عشا  وخواتي وياي ديساعدوني وحدة تسوي مقبلات والثانية دتحظر المواعين دنصب

ماما ..صاحت من الهول يلا بنات هاي شصار أشو طولتوا خطية ابوكم جوعان

أيلول ...صحت بصوت دقايق واكمل ترة عادي حبيب القلب ينتظر شوية الحد منكمل أصبري ميوسة

ماما... ولج ايلول وتالي ويا هذا لسانج ترة اجي بالصوندة واكطعها عليج

أيلول ...رحت وكفت باب الهول وباوعت عليها كتلها حتى حبيب قلبج يخليج تنامين يمي مثل هذاك اليوم
اباوع على بابا خربان ضحك الله عليك هيثومي تقبل ميوسة تضربني

بابا ... بضحك كال شحدها منو يكدر يمد ايدة على حبيبة أبوها
أيلول... سويت الماما حركة بيدي وكتلها على عنادج
ماما.. أرتاحيت هيثم خليتني اوكع بالسان بنتك ولج تروحين تصبين لا أجي اسحلج من شعرج

أيلول .. ارسي على بر بالصوندة لو من شعري مو كل شوية بكلام ذبيتلها بوسة بالهوى ورجعت للمطبخ

اسمعها اتكول البابا هاي البنية من دون خواتها مدري لسانها على منو هيجي طالع طويل

بابا .. ههههه والله هالبنية عسل  البيت

ماما.. هو منو خربها غيرك

اني اسمع واضحك.

صحت  ماريا كتلها روحي فرشي السفرة
وبديت اني اصب وبان وماريا ينقلون الأكل
كعدنا نأكل

بان ...عفية بابا اكو معهد ينطون دروس تقوية وصديقاتي سجلوا بي اريد اني هم اسجل رياضيات وأنكليزي من هسه حتى من تبدي السنة اكون ضابطتهم

بابا.. عادي بنونة سجلي شوفي اي مادة ضعيفة بيها وسجلي

بان... بفرحة فدوة اروحلك بابا حبيبي

ايلول... باوعت الخواتي كلت اني لهنا وخلص دوري اروح اسبح وانام والباقي عليكم

ماري... بتذمر والله اني معلية ما أغسل مواعين هذا دور بان تغسلهم

بان ...ولج كذابة مواعين الغدة منو غسلهم مو اني

ماري... والله هاي مشكلتج حبي هو جان دوري انتي من وحدج رحتي غسلتيهم

بان... والدمعة بطرف عينها شفتهم مكومات على السنك وحظرتج نايمة

ماما... كافي مناكَر بينكم هو جم ماعون شخبصتوا الدنيا لج ماري انتي تغسليهم

بابا.... عيني مياسة باجر ان شاء الله اجيب باجة حتى للجمعة تطبخيها لأن عزمت إياس على الغدة
ماما ..هلا بي يستاهل إياس
أكول هيثم هو بعدة قافل على موضوع الزواج وميقبل يزوج
بابا...والله يا مياسة تعبت واني اقنعة وماكو فايدة يكول أبقى هيج مرتاح ما أريد دوخت رأس
ماما ... بس ترة ميصير هو موصغير قبل فترة صار حجي كال عمره 38 سنة وهو وحيد معندة احد لا أهل لا كرايب على الأقل تجي مرة يمه تملي عليه بيته وتهتم بي وبلكي يصير عنده اطفال يشيلون اسمه وهو ما شاء الله حالتة المادية ممتازة وشكلة حلو وشخصية أكيد الف وحدة تتمنى

أيلول ... أويلي عليج ماما حتى هذا الرجال مخلص من كلامج تريدي يزوج بالكوة

ماما... انتي سكتي ولا كلمة اني غسلت ايدي منج وبعد معليه بيج ولا اكولج ازوجي

بابا قاطع كلامنة لان عرف راح تعلك بيني وبين ماما
صورتلكم القماش شوفوا شنو يعجبكم حتى اجيبة وبقينا نتفرج على الصور اني وخواتي 

أيلول...شفت بابا وماما ديتبسبسون ويضحكون
كلت أحم  ترة ميصير هيجي كولوا اكو عزباوات كدامنا خلي نراعي مشاعرهم

ضحكوا كالوا ولج قابل شمسوين

بان.. اكول ايلول بدون زحمة ممكن تكوليلي وين لكيتي كلمة عزباوات

ايلول ...الله وكيلج اني هم ما ادري وين لكيتها هي طلعت من وحدها

بان ... اسمها عازبات طيحتي حظ اللغة العربية
دنحجي ودك موبايل بابا

فجأة بابا وكف على حيلة وجهة صار اصفر بالكوة حجه يمعود أشدتكول هاي شوكت!

اني وماما وخواتي وحدة تباوع بوجه الثانية
اباوع على بابا صار بالكوة يجر النفس ويردد لا حول ولا قوة الا بالله احنا نريدة بس يخلص الاتصال ونفهم شبي متنا من القلق

نهى بابا الأتصال وتوجه للغرفه

ماما ..كالت  هيثم احجي شصاير

باوع علينا  وجاوب بنكسار المحل احترك دنك راسة وفات للغرفة

ماما... ضربت على خدها عزا العزاج مياسة منين اجتنا هاي المصيبة

راحت للغرفة على بابا جان مستعجل ديبدل وحالتة تكسر الخاطر

أني بسرعة اخذت فوني وتصلت على اختي ود
خلص الأتصال وهي مجاوبت يبووو وين ولت هاي
رجعت اتصلت على عيسى دك شوية

وجان يجاوب كال ألوووو

أيلول ..بستعجال الو عيسى فدوة تعال البيتنا بسرعة

عيسى... بخوف ولج ايلول شكو خوفتيني خوما صاير شي

ايلول... محل بابا محترك

عيسى ...شنو هاي شوكت

ايلول... مدري هسه خابروا وكالولة فدوة تعال لان بدل ديروح ودأشوفة بالكوة واكف وضعة ابد مو مال يسوق بهل ليل

عيسى ... لاتخلوا يطلع دقايق واني يمكم

أجه عيسى وأخو أسامة راحوا ويا بابا

ماما بقت منهارة وتبجي مقهورة على بابا وبان كابلتها وكعدت تبجي وياها عطت بيها ولج هاي بدال متسكتيها كاعدة كبالها وتبجين اندك الباب

راحت ماري تفتحة اجتنا ود وعمتها

كعدت عمتها يم ماما تهدي بيها اني أخذت راما   وطلعت للحديقة كعدت بالمرجوحة وراما بحضني تضحك ودردم وكولشي ما افهم من كلامها واني مو مثل كل مرة مالي خولك العبها القهر يعصر قلبي رغم ما أبين كدامهم 
شوية وجان تجي ود كعدت يمي سالتها
متصلتي بعيسى كالت اي اتصلت بس نطاني رفض

ايلول... ارجعي اتصلي هسه بلكي يجاوب

أتصلت ود بقى يرن اخير شي جاوب
ود ..الو حبيبي طمني شنو الأخبار يمك

أيلول.. هسه وكت غزل بربج حبيبي وحياتي وهزيت ايدي

ود ...باوعت عليه ورفعت حاجبها معجبها
كلامي

ود..اهاا ماشي عمري وسدتة

أيلول ...كولي شكال

ود... مكال شي يكول هسه مشغول بعدين اتصل بيج وسده

ايلول... بملل هفف هسه غير أحد يكولنا شصاير

ود ... ننتظر والله كريم ان شاء الله ماكو شي

ظلينا ننتظر صارت ساعة 12 وبعدهم مراجعين
أم عيسى اترخصت ورجعت البيتها لان مرة جبيرة ومريضة
بس ود بقت يمنا

ساعة 1 سمعنا صوت سيارة بابا كلنا طلعنا حتى نشوفة دخلوا  السيارة للكراج جان اسامة هو يسوق وعيسى فاتحلة باب الحوش
توجه عيسى للسيارة وساعد بابا حتى ينزل

سودة عليه نباوع على بابا بالكوة يمشي دخلوا للبيت احنا نريد نسأل حتى نعرف شبي بابا عيسى اشرلنا حتى نسكت

راحت بان جابت فراش البابا حتى يتمدد بالهول
اني طلعت وصحت عيسى
اجة عليه
ايلول ... شبي بابا ليش ميكدر يحجي وهيجي تعبان اجوي ود وبان هم يمنا

عيسى ... من شاف المحل محترك هو والبضاعة تخربط وأخذنا للمستشفى هم زين لحكنة عليه جان ضغطة مرتفع لو باقي شوية لا سامح الله جان انضرب جلطة

أيلول ...اني وخواتي بفزع اسم الله عليه ليش هلكد ينقهر فدوة اله المهم هو بخير

اجة اسامة اخو عيسى هم وكف يمنا وعينه منزلها مني الخاطر الله اشكد صلف هذا الولد عفتهم رحت يم بابا لكيتة نايم
وماما كاعدة يم راسة وأيدها على خدها
وهاي الليلة محد منا نام بقينا سهرانين نراقب نومة بابا جنا نخاف لايتخربط وتسوء حالتة بس الحمد لله عدت الليلة على خير ...