رواية المغرورة و الأعمى الفصل الخامس 5 - بقلم بسمة البياتي

-المغرورة- و - الأعمى -
(بقلم بسمة البياتي )
-بارت الرابع -

ثاني يوم بيتا جدآ كئيب بابا مقهور بالكوة يأكل اشكد دنحاول نهون عليه منريدة ينقهر لان مو زين على صحتة بس ابد ماكو فايدة
اجوي قدر وسيف وحاولوا يساعدون بابا
 
سيف ... عمي لاتضوج اني مسوي سلفة بس استلمها انطيها الك
بابا تشكر منه وكالة من احتاج اني اكلك

اجوي خوالي وخالاتي من سمعوا بالخبر وعرفوا بابا مريض شويه بابا كدر يلتهي وياهم ويطلع من الكأبة الي هو بيها
احنا علاقتنا بس ويا اهل ماما زينة
اما اهل بابا معدنا اختلاط بيهم لان هما مقاطعين بابا

بيبيتي الله يرحمها قبل لاتموت من جانت بحيلها جانت تريد بابا يزوج حتى يصيرلة ولد
ماما من ولدتني بيبيتي شنت الحرب على بابا
تكولة مرتك جابت ثلاث بنات هاي خلفتها بس بنات
ومن بابا رفض قاطعته وعمامي و عماتي يمشون بكلامها  صاروا وياها
خطيه ماما جانت تنقهر وقررت تحمل مرة رابعة حتى بلكي يصيرلها ولد
بس رب العالمين مكاتبلها هذا شي واجت بان للدنيا
بابا جدآ يحبنا ومتعلق بينا و ميهمة اذا صار عندة ولد او لا
بس ماما بقت مصرة تريدلة ولد وحملت مرة خامسة رغم الحمل كان صعب عليها بسبب الربو العدها
بولادتها ماريا حالتها جانت كولش خطرة وبرحمة الله     كامت منها سلامات وبعدها بابا خلى ماما تحلف بعد تأخذ احتياطها حتى  متحمل بعد

بعدين بيبيتي تمرضت وطلبت تشوف بابا وتراضت ويا وبعدها بفترة توفت

من كبرت اختي قدر عمي الجبير رادها الأبنة بس بابا رفض لان ابن عمي عندة سوالف مكسرة ومتعب اهلة
عمي زعل من بابا ورجع قاطعة
ومن قدر انخطبت الأبن خالي عمامي تعاركوا ويا بابا
يكولون شلون تفضل ابن خالها على ابن اخوك ورجعوا قاطعوا وعماتي هم  ابد مو حنينات

راحوا الخطار بقوا  ماما وبابا بالهول وخواتي تمددو بفراشهم
اني طلعت اريد اروح اسبح قبل لا انام لان الجو حار سمعت بابا يحجي ويا ماما
اني مو من طبيعتي اصنط بس كلامهم شدني وخلاني اوكف اسمع

بابا... شسوي فهميني شلون متريدني انقهر البضاعة راحت واني من اخذتها من ابو الجملة انطلبت عليها ثلاث ملايين
منين اجيب وأسدد الدين
وصاحب المحل تعارك وياي يكولي اريد المحل يرجع مثل مجان انت ترجع  تصلحة  وانتي لو تشوفي صاير فحم مباقي بي لا كهرباء لا صبغ    وبعد كم يوم صاحب البيت يريد الأجار ومصاريف البيت والبنات منين اجيبهن
ماما... اخذ هاي التراجي والحلقة والمحبس بيعهم بلكي يفكون شوية من دينك
بابا... يمعودة هذولة قابل اشكد راح يجيبون
باجر اني اروح ابيع السيارة بلكي تجيب سعر ولو ادري مراح تجيب هواية لان تعبانة

ماما ..الله كريم  المهم صحتك والباقي يهون

أيلول رجعت للغرفة واني ميتة قهر على بابا سودة عليه اشكد تعبان ومقهور وكفت كدام مرآيتي وغمضت عيني وهمست بداخلي فعلآ بابا لو جان عنده ولد جان سندة بهاي شدتة
أشكد حاولت ويا بابا حتى يقبل أتوظف بمكاتب او شركات أهلية بس يرفض رفض قاطع يكول لو حكومي او تبقين كاعدة بالبيت انتي حلوة والف عين عليج شلون اكدر اخليج تشتغلين بهيجي أماكن
اندريت على بان وماري بنات انطوني تراجيكم

..بسرعة نزعوهن وحطوهن بيدي حتى بدون ميسالون على السبب بتسمت شنو مراح تسالون شراح اسوي بيهم

بان ... اعتقد راح تنطيهم البابا

ايلول...طول عمرج ذكية

ماري... فدوة البابا لو انطي روحي هم قليل علية

ايلول..اباوع على خواتي فعلآ ماكو احن من البنات

اني جان عندي كلادة وثنين محابس وزوجين تراجي وخلخال ناعم
لأن بابا من ينطيني مصروفي ما أصرفة  اجمعة واشتري ذهب لو ملابس كنتوري متروس ملابس أحب الأناقة والأهتمام بكشختي رغم ما اطلع هوايه ههههه

حطيت الذهب بعلبة وقررت الصبح ان شاء الله انطيهم الماما هي تنطيهم البابا لأن اعرف اذا اني انطيتهم اله راح يرفض ماما احسن هي تقنعة 

وفعلآ الصبح انطيتهم الماما وبالكوة كدرت تخلي بابا ياخذهم

صار العصر بابا أخذ سيارتة وراح يوديها للمعارض حتى يبيعها
مشى الوقت عادي رجع بابا المغرب بس جان مبايع السيارة واشوف وجهة الحمد لله احسن ويضحك فرحان وجان جايب مسواك وباجة
اني وماما استغربنة بس فرحانة الفرحة
ورا العشى ماما سالتة

ماما .. اكول هيثم اشو مبعت السيارة شنو مجابت سعر

بابا... ببتسامة لا ميحتاج مراح ابيعها وصدك ذكرتيني ذهبكم بالسيارة باباتي ماري اخذي السويج من جيبي روحي جيبي العلبة

ماما ...مستغربة لعد شلون راح تفك الدين ؟

بابا...راح احجيلج كلشي بس قبلها صبيلي استكان جاي ثاني

ماما... تدلل

وبدة بابا يحجي واحنا مركزين ويا بكل كلمة يكولها

من جنت بالطريق رايح للمعارض اتصل علية إياس جاوبتة

إياس .. أبو قدر أنت وين اريد أشوفك

أبو قدر.. والله هسه عندي شغلة ضرورية خليها الباجر
إياس ... ويشد على  أبو قدر هسه اريد اشوفك لو انت تجي لو اني اجيك

أبو قدر .. بصراحة انحرجت منه كتله ماشي نص ساعة واني يمك أنت بمعرض الأثاث مو

إياس ... اي بالمعرض تعال

ابو قدر .. غيرت طريقي ورحت للمعرض شافني عيسى سالتة إياس وينة  كال موجود بمكتبة

أبو قدر.. إياس ليش يريد يحجي وياي خوما عرف بموضوع المحل

عيسى ... اي والله عرف صديقة كايلة واجه عتب عليه  يكول ليش مكتلي وبصراحة معرفت شجاوبة

ابو قدر ...  يلا عادي هو بيها وبلايها جان راح يعرف عفت عيسى وتوجهت المكتب إياس

أول مشافني كام من مكتبة بوسني وتحمدلي بالسلامة
إياس .. ولو اني زعلان منك هاي مرتين دتحسسني اني غريب لو ما بالصدفة مجان عرفت

أبو قدر... والله حقك بس الي صار مبقة عقل برأسي

إياس ... الله يساعدك
كلي هسه شراح تسوي وشنو تشتغل

أبو قدر .. دنكت راسي وخجلت احجي بس جاوبت الله كريم هسه بعدني ممفكر بشي

إياس ... يعني بعدك مصر متحجيلي شي

ابو قدر... بتعجب ليش هيجي تكول

إياس .. ترة اني عرفت بموضوع الدين وأنت تريد تبيع سيارتك وتسددة

أبو قدر .. لعد شسوي ماكو غير حل

إياس .. لا اكو حل ثاني وجدآ بسيط

أبو قدر... بستفهام وشنو هو الحل ؟

إياس .. معليك بموضوع الدين اني اسدده

قاطعت كلامة لا إياس اني ما أقبل هذا الشي ترة هنا مو 100 أو200 حتى تسددهم بمكاني

إياس .. ليش هيجي أبو قدر الله يشهد أني معتبرك اخوية الجبير وأنت هسه هيجي تجاوبني

أبو قدر ... وأنت تعرف غلاتك عندي بس والله صعبه

إياس ... واني عندي حل يرضيك

أبو قدر .. شنو هو ؟

إياس ..شنو رأيك تعوف شغلك بالأقمشة وتجي تشتغل اهنا
اني اريد افتح معرض اثاث ثاني  وأكيد مراح  اكدر ادير شغل المعرض وحدي وما اكدى أجيب ياهو الجان لان معندي ثقة باحد غيركم انت وعيسى

واني راح اقطع كل شهر من راتبك فلوس الدين الي راح اسددة بمكانك أعتقد هذا احسن حل

أبو قدر .. والله ما اعرف شكلك بس انت دائمآ تفاجئني

إياس  ..  انت راح تشتغل بتعبك اني ممفضل عليك
بس هسه معليه وين عزيمتك شنو راح تغلس عليها

أبو قدر ... هههههه من عيوني باجر غداك يمي

ماما ..الف الحمد لله هذا إياس الملاك المنقذ صدك لو كالوا لو خليت قلبت رب العالمين مينسى عبادة

أيلول .. شفت بابا وماما شلون فرحانين حمدت الله وشكرتة وهذا إياس اشكد كبر بعيني

هذا إياس اني مشايفتة زين يمكن مرة او مرتين من ورا جام المطبخ ومن بعيد اشكد يجي البيتنا وصارلنا سنين نعرفة بس اني وخواتي ابد مملتقين بي  من يجي بابا وماما وعيسى يقومون بضيافتة لأن مهما يكون هو رجال غريب

صار وقت العزيمة وأجة أياس بابا عزم سيف و عيسى حتى يكعدون ويا

اني حبست روحي بالغرفة لان اتخبل من ريحة الباجة ييييع بصراحة ما ادري شلون ياكلوها هي عبارة عن راس ورجلين شلون الهم نفس بيها ما ادري من شكلها انرعب

خلصت العزيمة وراح إياس
بابا بدة بشغلة الجديدة بالمعرض يروح ساعة 8 صباحآ ويرجع ساعة 3 الظهر وجان جدآ مرتاح بهذا شغلة عكس شغلة بالأقمشة لازم يفتح المحل من الصبح ويجي بس يتغدة يرتاح شوية هم يرجع ويبقة للمغرب
لكن هسه صار يقضي وقت ويانة اطول ويكدر يطلع يم اصدقائة العصر وبالنسبة للراتب جان مبلغ كبير حتى بابا مقبل من سمع بالرقم وراد يترك الشغل بس إياس بطريقتة كدر يقنعة

وبيوم وقت العصر جنا بس اني وبان بالبيت بابا وماما وماري راحوا البيت خالي

اندكت الباب طلعت بان تشوف منو اني كاعدة بالأستقبال سمعت صوت بجي راما شفت ود بيدها راما مفرفحة من البجي وحتى ود دتبجي اتي شفتهم هيجي تخبلت
أخذت راما باوعت الأيدها مضمدة عطت لج ود هاي شبيها ايدها

ود.. وبالكوة تحجي كالت احتركت ايدها

.اني سمعت كلامها لوما راما بيدي يمكن جان ملختها
ولج شلون تحترك وانتي وين جنتي عايفتها شنو هاي فهاوتج
عفتها ولتهيت اسكت براما وبان وياي
بعد نص ساعة من البجي المتواصل بدء المسكن يجيب مفعولة وكدرت تنام

ايلول .. باوعت على ود يلا احجي شلون احتركت ايدها

ود ..جان عندي شغل بغرفتي دارتبها وتعرفين راما كلش حركة خبلتني نزلتها خليتها يم عمتي وصعدت اكمل شغلي
فجاة سمعت عيطت راما هزت البيت نزلت اركض مثل المخبلة فتت للمطبخ شفت راما بالكاع مفرفحة من البجي وجهة صاير ازرك ركضت عليها وجانت يمها مها اخت عيسى وابنها محمد
شلت راما بس اريد افهم شبيها راما تأشرلي على  ايدها ولمن فتحتها لكيت بطن ايدها مصلوخة بحيث اللحم طالع
تخبلت و على صوت بجي راما اجتي عمتي واجه اسامة
باوعت على مها وصيحت راما شلون احتركت هذا ابنج حركها مو اليوم اخلي عيسى يذبحة
الطفل ختل ورا امه وكال لا والله مو اني هاي ماما جوتها
مها .. برتباك لا تكذب مو انت حركتها بالجداحة
محمد . وهو يبجي لا والله انتي حركتيها مو اني

عمتي بقت تغلط عليها
اسامة كال امشي بسرعة خلي نروح نضمد ايدها
اني هديت على مها
ولج ايلول لو تشوفيها شلون صلفة تكولي اي حركتها كسرت علبة مكياجي تسوى راسها
وعافتني ودخلت الغرفتها

ايلول اني مصدومة وبس اسمع والنار تطلع من عيوني وصوت بجي راما لسه بأذني
متحملت عفت ود بعدها تحجي ركضت للغرفة اخذت شال ولبست صاية فوك ملابسي وطلعت اركض
ود بقت تلطم وراي لج ايلول وين رايحة ارجعي واني ولا عبرتها
رحت البيت اهل عيسى ود اجتي وياي بس تريد تمنعني شفت الباب مفتوح دفرتة  ودخلت.....