رواية المغرورة و الأعمى الفصل الثامن عشر 18 - بقلم بسمة البياتي

المغرورة-و-الأعمى-
(بقلم بسمة البياتي )  
- بارت السابع عشر -

أيلول... سافر إياس يشوف أبوه جانت حالتة خطرة بقة يومين بالمستشفى وبعدها توفى

بابا وعيسى انجمعوا ويا اصدقاء إياس وراحوا للفاتحة
جانوا ميندلون بس بقوا على اتصال ويا آياس دلاهم الطريق

طلعوا من الفجر ورجعوا ساعة سبعة المغرب

ماما سئلت بابا عن وضع إياس

بابا... خطية والله لو تشوفي شلون مقهور  ومكسور ظهرة يكول بقيت بعيد عنه كل هاي السنين ومن شفتة ملحكت اشيع منه وراح

ماما .. الله يساعدة ويصبرة

أيلول... اني مرة وحدة اتصلت بي أخذت من خاطرة لان معندة مجال مسوين فاتحة جبيرة وناس هواية رايحين جاين
اليوم اخير يوم الفاتحة

بابا.. بنتي لولة حظري نفسج باجر اخذج انتي وأمج وسيف وقدر نروح البيت أهل إياس
مكدرت اخذكم بأيام الفاتحة لان جان بيتهم هوسة

أيلول... أوك بابا ان شاء الله

ثاني يوم ود اجتي بقت يم بان وماري وقدر هم عافت أدم يمهم بس ريان اجة ويانة

اني من اسافر ما أكدر البس تنورة او فستان ما أخذ راحتي لبست بنطرون جينز اسود وبدي هم أسود وفوكاهم بوليرو طويلة وحذاء فلات لفيت الشال زين حتى لايطلع شعري جان لبسي مستور
ماما وقدر هم لابسين اسود
طلعنة من الصبح بسيارة سيف
جنت ممتريكة لان بيه طبع اذا اكل شي ابقة طول الطريق اتقيئ

وبعد عناء طويل وصلنا البيت اهل إياس

يبووو هاي شنو بيتهم بعده هوسة ومتروس ناس وكووومة شباب بالباب
سيف ركن السيارة ونزلنا

الشباب كلها تباوع علينا ههههههه هسة عرفت ليش إياس ميقبل يجيبني على أهلة
وصلنا اليم الباب وجان اشوف إياس ديتقدم علينا لزمت ايد قدر قوي

شكلة مبين متعصب

سلم على اهلي وجان يصيح على اختة حتى ادخلنا جوة يم النسوان

جان طول ماهو واكف يخزر بيه

فتنا المكان يسمووا ربعة جان متروس نسوان
اختة كالت هذولة خطار من كركوك من طرف أياس

النسوان كصونا من فوك ليجوة
رحنا سلمنة على ام إياس وعلى  هواية نسوان  ما اعرفهم
سولنا مكان كعدنا بصراحة رغم حزنهم بس جان استقبالهم النه حلووو
حتى مسئلوا انتوا منو ومنين تعرفون إياس

صار الظهر شفتهم مدو السفرة يريدون يصبون الغدة

أيلول ... ولج قدر راح يجيبون الأكل وانتي تعرفين بيه ما أكدر اكل ورانا رجعة وطريق وثاني شي نفسي متتقبل اكل الفواتح

قدر... عزااا بعينج أيلول سدي حلكج وأسكتي لاتفضحينا هذولة عرب عيب اذا يقدمولج اكل ومتأكلين

صبوا الغدة واني سويت نفسي داكل وبالحقيقة مخليت لكمة بحلكي هم زين محد شافني جانوا ملتهين ديأكلون صار الظهر واحنا بعدنا كاعدين شوكت نرجع ما ادري ظهري تكسر من الكعدة والتعب

أيلول... قدر اتصلي على سيف شوفي شوكت نرجع لج راح اتصير عصر

اتصلت قدر على سيف كاللها الجماعة مديقبلون نرجع يكولون لأزم انبات

اني وقدر بقينا وحدة تباوع بوجه الثانية عزااا شلون راح نكدر انبات

طول ما احنا كاعدين اكو وحدة بس تباوع علينا
من صاحوها عرفت هاي فرح طليقت إياس

دنحجي اني وقدر سمعنا صراخ برا عبالنة نسوان اجوي للفاتحة وديصرخون علمود المرحوم
اشو اجة ريان الجني يركض وكعد بيني وبين امة وهو خربان ضحك باوعت عليه عرفت مسويلة مصيبة
شاورتة لك ريان احجي شمسوي
ريان .. اكو مرة سمينة بس تصيح علينا ذبيتلها بالكاع صجم مال مسدس وهو داست عليهم وزحلكت يحجي ويضحك

ايلول ... عزااا بعينك سديت حلكة بيدي
شوية ودخلت فرح تعرج
خرب هذا موكع فرح
كعدت تحجي للنسوان شلون وكعت اتكولهم انفضحت دشداشتي انرفعت والحوش متروس زلم مبقة احد مشافني

ريان رجع شاورني كالي لابسة شورت مثل شورت بابا
خرب ببليسة ويكركر من الضحك

اني حابسة ضحكتي بالكوة 

صارت دنيا مغرب واحنا على نفس كعدتنا اكثر الموجودين راحوا لبيوتهم
شفت بنية طلبت منها تأخذني للحمام اريد اغسل لان بديت ادوخ

واكفة على المغسلة د أغسل  جان حجابي نازل سمعت واحد كال هاي الغزالة منين
وبهاي الأثناء سمعت صوت إياس صيح عليه متت من الخوف بقيت جامدة بمكاني ما اكدر اندار
جنت اسمعة يرزل بالولد وكالة روح اطلع
جان يجي يسحبني من ايدي

إياس.. شعندج واكفة اهنا ومطلعة شعرج
لج موزين اني ساكت على هذا لبسج الطايح حظة بقة إياس يرزل بيه واني الدمعة واكفة بطرف عيني

عفتة ورحت على ماما

أيلول خابري بابا هسه نرجع للبيت

ماما ... بنتي مظل وكت مو مال رجعة

أيلول .. كتلج هسه نرجع يعني هسه يلا خابري

قدر .. لولة شبيج ليش متعصبة

أيلول.. مابيه شي أريد ارجع

ماما من شافت وضعي اتصلت على بابا

ماما... ابوج يكول خلي اشوف بلكي نكدر نرجع

دنحجي ودخل إياس

إياس... خير أم قدر سمعت تريدون ترجعون

أم قدر ... والله هاي أيلول خبصتني تريد ترجع

إياس. . خلي تكعد وتسكت ماكو رجعة

أيلول... جانت روحي بخشمي جاوبتة

اني اريد ارجع وين بابا

النسوان كلها تباوع علينا خو فرح مشالت عينها

أياس تقرب مني وسحبني من ايدي كومني

إياس... تعالي اعرفج على أمي
حجية هاي زوجتي أيلول

صار سكوت بالمكان كلها فاتحة حلكها

أم إياس هم متفاجئة كالت انت مزوج

إياس.. لعد ابقة طول عمري عزابي حجية

أم إياس ...لعد ليش محجيت ومجبتها من البداية نتعرف عليها جان على الأقل ابوك شافها

إياس ... معرفت شجاوب امي

يمة من جان ابوية الله يرحمة بالمستشفى كتلة اني مزوج وشوفتة صورتها

أم إياس ... صاحتني بوستني بس جانت مبينة ضايجة وممتقبلتني

أياس باوع على أهلي وصاح أختة فاطمة

إياس... معقولة عايفين ام قدر والبنات لهسة كاعدات بنفس المكان ليش منطيتوهم غرفة يرتاحون بيها مو تعرفون جايين من سفر وتعبانين

جاوبتة تغريد مرة وسام

والله جم مرة كلت الأم قدر تعالي ارتاحي بغرفتي هي مقبلت

أم قدر ... والله عبالنا نرجع مجنت اعرف راح نبقة

تغريد.. تعالوا وياي انطيكم غرفة ترتاحون بيها

ترخصت ماما هي وقدر وراحوا 
ردت اروح وياهم إياس لزمني من أيدي

إياس... انتي تعالي وياي

أيلول... همست عوف أيدي ولاتحجي وياي

اخذني من ايدي وطلعنا قدر جانت يم المغسلة صاحتلة
مدري شحجت ويااا

إياس... امشي نصعد الغرفة ياسين

أيلول... ما اصعد اريد اروح يم ماما

إياس.. امشي نصعد لاتخليني اصعدج بالغصب

أيلول... رحت صعدت واني حاقدة عليه

فتح باب الغرفة ودخلنة
رحت كعدت على السرير  اجة كعد بصفي

إياس.. راح تبقين كالبة خلقتج

أيلول .. اني هسه مراح احجي لان مقدرة الحزن الأنت بي  بس من نرجع للبيت لازم نخلي حد الهاي تصرفاتك وياي

إياس.. يا تصرفات ؟

أيلول... شكك وغيرتك

إياس... اني ما اشك بيج بس اغار وهذا شي موبيدي

بقة يحضن ويبوس بيه يريد يراضيني  واحنا بهذا الوضع جان ينفتح الباب ويدخل اخو مبين انصدم بقة جامد بمكانة

اني متت من الفشلة إياس بسرعة وكف صار كدامي لان شعري جان مفتوح

إياس... شكو شبيك واكف فاتح عينك وحلكك

ياسين ... هااا اي طالع

خطية طلع الولد وسد الباب إياس هم طلع ورا اني تعبانة ودايخة تمددت على السرير مابية حيل اتحرك 

بعد شوية رجع وجان جايبلي أكل جاهز

إياس .. كومي اكلي قدر كالت اليوم كلشي ممأكلة جنت جوعانة هجمت على الأكل

ثاني يوم من الصبح رجعنا إياس بقة كال فد يومين وأرجع

مر شهرين وحياتنا عادية إياس جان دائما يروح الأهلة ومرات يأخذني ويا
أم إياس ابد محسيتها تحبني وكلما تشوفني تسئلني ليش مصار عندج حمل لهسه جنت اموت من القهر
لهذا بعد مرحت ويا عليهم

اكثر من مرة راجعت دكتورة ويا ود طلع عندي التهابات وتكيسات وانطتني كومة علاج

من جنت ارجع من الدكتورة ادخل الغرفتي اشبع بجي
إياس دائما يكلي انتي ليش مهتمة اذا عليه اني ما اريد انتي عندي تسوين مليون طفل

بس مجنت اكدر اتقبل الوضع لان اني اتمنى يكولي طفل

أهلي عزموا أهل إياس البيتنا
من دخلوا للبيت جانوا متفاجئين من جمال البيت وترتيبة
اني وخواتي انكسر ظهرنا بالطبخ قدر وود اجوي يساعدونا

لان عائلة إياس ماشاء الله  جبيرة امة وأخوانة ونسوانهم وخواتة وحتى عمتة هي وبناتها جايين

الزلم كعدوا بالأستقبال  والنسوان بالهول
اني وخواتي مبقينا صنف مطبخنا جانت عزيمة ترفع الرأس

بعد الغدة كاعدين كالت ام إياس

ام إياس.. شعجب إياس كاعد وياكم نفس البيت ؟

باوعت على ماما حسيتها تفشلت متعرف شجاوب

جاوبتها اني

إيلول.. عادي خالة ترة البيت شراكة بين بابا وإياس  يعني محد كاعد عند احد كل واحد كاعد بملكة احنا بالطابق الفوك واهلي بالجوة

أم إياس... ها اي زين عبالي إياس صاير كعيدي

أيلول ..  ضجت من كلامها بس سكتت لان هما خطارنا وثاني شي هي مرة جبيرة عيب عليه اجاوبها

اني ابد مرتاحيت لا العمة إياس ولا الخواتة  جانوا بس يتبسبسون بينهم

اما مرة حسن ومرة وسام وبناتهم جانوا  حبابات

اهلة باتوا يمنا وثاني يوم راحوا

إياس جان كلما يروح الأهلة يرجع ضايج ومن اسئلة شبيك يكولي مبية شي بس تعبان من السفر لو يكول خايف على امي لان مريضة

عصبية إياس زادت خصوصا من طلعت سنوية أبو جان من يروح ويرجع كلمة ما أكدر احجي ويا روحه بخشمة

باليل كاعدين
إياس... باجر اني رايح الاهلي

أيلول .. انت مو هذا الأسبوع جنت يمهم

إياس..  امي اتصلت اتكول مريضة تعال أشوفك

ايلول.. اهاا سلامتها
بس بداخلي ابد مرتاحيت

اريد اجي وياك

إياس.. شعندج جاية هو يوم وراجع

أيلول.. والله معليه رجلي على رجلك اذا متأخذني ما اخليك تروح

إياس... اهوووو بدينا خبال ماشي تحظري اخذج وامري لله

ثاني يوم رحنا اني وإياس باوعت  خوات موجودات حتى فرح جاية
وأمه كولشي مبيها

هما من شافوني انصدموا الظاهر ممتوقعين جيتي

كعدت يمهم جانوا كل شوية يتبسبسون ويحجون بالألغاز

جنت اسمع صوت إياس كل شوية يرتفع وبعدين يسكت جان كاعد بالربعة ويا اخوتة وعمامة

رحت للمطبخ شفت سلوى بنت وسام  جيت يمها

سلوى.. تعالي حبيبه شبيج ليش واكفة اهنا

أيلول.. سلوى الله عليج كوليلي شنو ديصير اهنا اشو ممرتاحة للوضع

باوعت عليها لونها تغير صفنت بوجهي كالت تعالي وياي الغرفة اهلي

أيلول.. دخلت للغرفة يلا احجيلي شصاير

سلوى ... والله اني من اول يوم شفتج حبيتج راح احجيلج بس الله عليج موتكولين البيبي لو بابا اني كتلج

أيلول .. والله ما اكول

سلوى ... بيبي تريد تزوج عمو إياس البنت عمتة وعمو جان ميقبل
سمعتهم البارحة يحجون يكولون اليوم من يجي نخلي غصب عنا يكطع عليها مهر

أيلول.... يعني إياس اليوم يزوج ؟؟؟؟.......

مساء الورد حبايبي
انتظروني باليل انزل بارت ثاني تحياتي الكم 🌹🌹