رواية المهووسة والعاشق الفصل الأول 1 - بقلم صباح عبدالله

في بيت بسيط، قاعده مليكة 40 سنه جميلة أوي، بيضاء، شعرها بني طويل، عيونها خضرا… حاطة رجل على رجل… واقفة حنين قدامها، بنت سمرا، عيونها عسلي، محجبة.
مليكة بغرور
هاتي من الآخر، تاخدي كام وتسيبي خطيبك ليا.
حنين
اتفضلي اطلعي من بيتي، وأنا مش رخيصة زيك علشان أتاجر بالشخص اللي بحبه.
مليكة بضحك
بتحبيه؟ هو إحنا هنضحك على بعض ولا إيه؟
على العموم يا شاطرة، عامر شركته مديونة، يعني شهرين بالكتير وهيفلس، ومش هتطولي منه لا أبيض ولا أسود.
مليكة تحط كارت علي الاربيزة وتقوم وهي بتقول.
مليكة
على العموم أنا هاعتبر إن ده مش آخر كلام بينا، وهسيبك تفكري يومين، ومتأكدة إنك شاطرة وهتعرفي تختاري صح، ومليون دولار مبلغ يعيشك عيشة محترمة إنتِ وأهلك لباقي عمرك.
مليكة تسيبها وتمشي، وحنين تفضل واقفة باين عليها الحيرة… تدخل أحلام أم حنين وهي بتقول.
أحلام
حقيقي الكلام اللي سمعته ده؟ خطيبك مديون وهيفلس قريب؟
حنين
وحتى لو حقيقي، أنا ما يهمنيش، أنا بحب عامر، مش بحب فلوسه.
أحلام بغيظ
حب إيه وزفت إيه على عينك؟ هو حبك ده هيأكلك عيش؟
تسكت شوية وبعدين تقول بخبث.
أحلام
يا خيبة، فكري مرة بعقلك، لو على الجمال والجسم، المال هيجيب الأحلى منه. سيبيه، إحنا أولى بالفلوس نعيش منها إحنا وخواتك، بلا حب بلا بصل وتوم.
حنين بزعل
إنتِ بتقولي إيه يا ماما بس؟ بقى هو ده عامر اللي كنتي هتموتي من الفرحة علشان هتجوزها جايه دلوقتي عاوزني ابيعه وابيع حبه لي ده رغم ظروفي وفارق المستوى الاجتماعي اللي بينا، حبني وساب بنت عمه علشاني، وإنتِ جاية تقولي فكري بعقلك؟ عقل إيه ده اللي يخليني رخيصة للدرجة دي؟ أنا بحب عامر، ومهما حصل مستحيل أتخلى عنه أو أسيبه تحت أي ظرف من الظروف، والفلوس الدنيا كلها في كفة، وحبي لعامر في كفة… إنتِ فاهمة؟
حنين تسيبها وتجري وهي بتعيط… أحلام تفضل واقفة تبص لها بغيظ وهي بتقول.
أحلام
بنتي وأنا عارفة هبلة، وقلبها قاعد مكان عقلها. أنا لازم أعمل حاجة، ما هو مش معقول أسيب مليون دولار علشان الهبل بتاع بنتي ده.
أحلام تبص لكارت مليكة اللي على الترابيزة، وتبتسم بخبث.
—————
في مكتب مليكة في شركة حمزة.
مليكة قاعدة على كرسي المكتب، قدامها لاب توب… فجأة الباب بيتفتح ويدخل عامر… شاب جميل، عيونه بني، شعره أسود، لابس بدلة. يقول بغضب وهو رافع صباعه في وشهها
عامر
مليكة، أقسم بالله ده آخر تحذير ليكي، لو ما بعديش عن طريقي أنا وحنين، صدقيني هنسى إنك كنتِ بنت عمي في يوم، وحسّك عينك رجلك تخطي ناحيتها تاني، وده آخر تحذير.
مليكة ببرود
نفسي تفهم إني بحبك يا عمورة، ومش هاين عليا أسيبك لغيري، وزي ما قالوا القريب أولى من الغريب. ثم يا حبيبي دي طمعانة فيك، مش بتحبك، صدقني.
عامر
إنتِ بجد مريضة ومحتاجة تتعالجي، ومش معنى إنك رخيصة يبقى الكل زيك.
مليكة تضحك وهي بتقول.
مليكة
والله إنت اللي عبيط يا ابن عمي. على العموم خلينا نصبر ونشوف في الآخر مين اللي مريض فينا، ونشوف الست حنين بتاعتك هتختارك ولا هتختار المليون دولار.
عامر باستغراب
قصدك إيه؟ مش فاهم.
مليكة بسخرية
مش بقولك عبيط؟ يعني الحلوة مش قالتلك إني مستعدة أشتريك بمليون دولار.
عامر يبص لها بصدمة.
عامر
إنتِ مجنونة؟ إنتِ عارفة مليون دولار دول يعملوا كام؟
مليكة بخبث
مستعدة أديك قدهم مرتين يا عامر، ومستعدة أسدد كل ديونك، بس توافق تتجوزني… قلت إيه؟
عامر بحنق
قلت إنك رخيصة، ومفكرة إن الحب وقلوب الناس بيتباعوا في سوق التلات. روحي اتعالجي، أنا مش ناقص جنان.
عامر ييجي يمشي، مليكة تقف وهي بتقول.
مليكة
هكتبلك كل ثروتي باسمك يا عامر، بس اتجوزني.
عامر يقف فجأة ويبص لها بصدمة.
عامر
إنتِ اتجننتي ولا إيه؟
مليكة بدموع
أيوه اتجننت علشان بحبك. أنا كبرت وأنا مش شايفة غيرك يا عامر. عارفة إني داخلة على الأربعين، وإنت أصغر مني بعشر سنين، بس صدقني أنا بحبك أوي. نفسي أتجوزك وأخلف منك. أنا اكتشفت إني لو اتأخرت في الجواز أكتر من كده ممكن ما أقدرش أخلف. علشان خاطري يا عامر وافق تتجوزني، أنا مش قادرة أتخطاك وأفكر في غيرك. مستعدة أعمل أي حاجة علشان بس نتجوز أنا وإنت.
عامر
مليكة، صدقيني الحب عمره ما كان بالسن ولا بالفلوس. أنا لو كنت حبيتك صدقيني كنت اتجوزتك إنتِ، بس أنا عمري ما فكرت فيكي أكتر من بنت عمي وأخت كبيرة ليا. روحي اتعالجي من الهوس اللي عندك، والحقّي نفسك، واتجوزي وخلفي من واحد يقدر يحبك بجد ويسعدك في حياتك. أنا قلبي مع حنين، ومش هقدر أتقبلك حتى لو اتجوزتك. ياريت تبعدي عن طريقي علشان ما نخسرش بعض يا مليكة. عن إذنك.
عامر يسيبها ويطلع، ومليكة توقع كل حاجة قدامها على المكتب وهي بتقول بشر.
مليكة
يكون في بعدك يا عامر لو سبتك لغيري… إنت ليا، ليا أنا وبس.
فجأة تليفون مليكة يرن… مليكة تطلع التليفون وترد، وتسكت شوية وبعدين تقول باستغراب.
مليكة
وإنتِ منين واي مصلحتك من الكلام اللي بتقولي ده؟