رواية المهووسة والعاشق الفصل الثاني 2 - بقلم صباح عبدالله

بالليل… عامر في عربية بيتكلم في التليفون مع حنين وهو بيسوق.
عامر بقلق
يا حبيبتي اهدي بس واحكيلي إيه اللي حصل بالظبط.
عامر يسكت شوية وبعدين يقول.
عامر باستغراب
إنتِ متأكدة من الكلام ده؟
عامر يسكت شوية وبعدين يقول.
عامر
طيب طيب اهدي علشان خاطري، وأنا مسافة الطريق وهكون عندك.
عامر يقفل التليفون وهو بيقول بغضب.
عامر
أقسم بالله يا مليكة لو كان ليكي إيد في اللي حصل ده ليكون آخر يوم في عمرك.
————
في بيت حنين… حنين قاعدة بتعيط، وفي إيديها ورقة، وقاعد معاها إخواتها تؤام سارة وسما.
حنين بعياط
يا رب أعمل إيه دلوقتي؟ يا ترى إنتِ فين يا ماما ولا حصلك إيه؟
سارة بدموع
أنا خايفة أوي يا حنين، لا ماما يكون حصل لها حاجة، إحنا مالناش غيرها من بعد بابا.
سما
في حاجة أنا مش فاهمها يا بت إنتِ وهي. إنتوا الاتنين مش لاحظين إن في حاجة غريبة في الموضوع ده؟ يعني ماما تتخطف ليه وهي في السن ده؟ حاسة إن في حاجة غلط.
حنين تبص لها باستغراب وهي بتقول.
حنين
مش فاهمة إنتِ عايزة تقولي إيه يا سما، مش فاهمِك.
سما
ما هو أنا كمان مش فاهمة، ماما ليه هتتخطف؟ وكمان غريبة إن الخاطف يسيب رسالة في البيت، يعني معنى كده إن ماما اتخطفت من قلب البيت، مش غريبة؟ دي واحدة خمسين سنة تتخطف من بيتها وما حدش يحس بيها؟
سارة
أيوه صح، إزاي ماما تتخطف كده من غير ما حد ياخد باله؟
حنين تبص لهم وتسكت وتفرك في إيديها وهي بتفكر.
حنين
معقولة المجنونة بنت عم عامر هي اللي خطفت ماما علشان تضغط عليا أسيب عامر؟
فجأة الباب يخبط، سارة تقوم وهي بتقول.
سارة
هروح أشوف مين اللي بيخبط.
حنين تقوم بسرعة وهي بتقول.
حنين
ده أكيد عامر، خليكي إنتِ، أنا هفتح له.
حنين تروح وتفتح الباب، تلاقي عامر.
عامر بقلق
خير يا حنين، إيه اللي حصل؟ وماما فين؟
حنين بدموع
ما عرفش يا عامر، أنا كنت في الشغل والبنات كانوا في الكلية، رجعنا ما لقناهاش ولقينا الرسالة دي.
حنين تناوله عامر الرسالة… عامر يقراها وبعدين يقول بهدوء.
عامر
طيب ما تخافيش يا حبيبتي، أنا معاكي ومش هسيبك، وإن شاء الله ماما هترجع على البيت بالسلامة.
حنين بعياط
المجرم بيقول لازم ندفع مليون جنيه، وإحنا مش معانا المبلغ ده، ومش عارفة أعمل إيه دلوقتي.
عامر يفكر بحيرة.
عامر
أنا كنت مفكر إن مليكة اللي خطفتها علشان تضغط على حنين، بس طلع واحد عايز فلوس، وأنا أعتبر مفلس ومديون، أتصرف إزاي دلوقتي بس يارب؟ أنا مش عارف المصيبة دي طلعتلي منين هي كمان.
عامر يبص لحنين وهو بيقول.
عامر
حنين يا حبيبتي إنتِ بس اهدي، وأنا هتصرف، ما تقلقيش.
تليفون عامر يرن، عامر يطلع التليفون ويرد، يبرق بصدمة وبعدين يبص لحنين بخوف.
حنين بقلق
خير يا عامر؟ مين اللي على التليفون ده؟
عامر بصدمة
واحد بيقولي أن أمك ماتت..
حنين بصدمة
انت بتقول ايه؟ ماما ماتت ازاي يعني؟
—————–
في مكان تاني
قاعده أحلام مع مليكة.
مليكة باستغراب
انا عملت كل اللي قولتي عليه بس اي اللي يضمن ليا ان عامر هسيب بنتك وهيوفق يتجوزني انا.
احلام بخبث
اصبري وهتشوفي بنفسك واحنا لسه في الاول اهم حاجه فلوسك تكون جاهزة.
مليكة بقرف
انا بجد اول مره اشوف واحده بتبيع بنتها علشان الفلوس علي العموم زي ما احنا متفقين لو الخطة نحجك وعامر اتجوزني هديكي المليون دولار وفوقيهم بوسه يا ستي.
احلام بطمع
خلاص اتفقنا. بس خدي بالك مش عاوزه حد من عيالي يتبهدل ولا يحصل له حاجه انا بقولك اهو.
مليكة بغرور
انا مش عيله قدامك وبهزر معاكي قولتلك مش هيحصل لهم مع اني نفسي اشرب من دم بنتك واحرقها حية بس علشان انا ما برجعش في كلامي هحافظ عليها.
احلام تكلم نفسه بحزن
احلام
سامحني يا حنين بس يوم ما تعرفي اني عملت كل ده علشانك انتي وخواتك هتفهمي انا عملت كل ده ليه.
————-
في العربيه
عامر بيسوق وحنين قاعده جنبه عماله تعيط
عامر بحزن
ما خلاص بقا يا حنين ياحبيبتي ما انا قولتلك انا مش مصدق حاجه من كلام الراجل ده.
حنين
طيب افرض كلامه صح انا هعمل اي ولا هروح فين بخواتي.
عامر بحزن
انا مهما حصل مش هسيبك يا حنين ما تقوليش كده.
حنين تبص له بدموع وتسكت.. عامر يبص لها بشك وبعدين يقول
عامر
حنين هسألك سؤال عارف ان الوقت مش مناسب بس ضروري اعرف.
حنين باستغراب
سؤال اي ده وعاوز تعرف اي؟
عامر يسكت شويه وبعدين يقول بشك
عامر
لما مليكة جاتلك البيت أمك كانت موجوده؟
حنين باستغراب
ايوه وسمعت كل حاجه بس بتسأل ليه مش فاهمه؟
عامر
لا أبداً بسأل عادي
حنين
عامر انت عايز توصل لأي انت شاكك ان ممكن ماما بتعمل كل ده علشان نسيب بعض وتاخد الفلوس؟
عامر
طالما قولتي الكلام ده يبقي انتي كمان شاكة في نفس النقطة مش هنكدب علي بعض انتي اكتر واحده عارفه امك.
حنين بزعل
انا ما نكرش أن أمي مادية شويه والفلوس لمعة في عيونها بس مش معقولة تعمل فيا كده وتاجر بسعادي.
عامر بهدوء
ربنا يخيب ظني وظنك يا حنين وما يكنش اللي بفكر فيه ده صح.
حنين بخوف
إن شاءلله مش صح ماما مستحيل تعمل حاجه زي كده.
عامر
الفلوس بتغير النفوس يا حنين وما نكرش مليكة بتلعب علي وتر حساسة وبتستخدم احتياجات غيرها لمصلحتها بس اتمنى تكون أمك فعلاً مالهاش ذنب في حاجه وعلي العموم هنعرف كل حاجه لما نوصل.