المليحة والمهووس
الجزء الثالث
سد الخط بوجهي وراح..
ضليت صافنه شبي هذا..
اني ماعندي زايده ناقصه..
حتى اكول سامع شي..
لا والغلط الغلطه!!!!
عفته لليل خابر حرك الجو..
ودز مسجات يتعذر..
عفته يوم ثاني خابر كانه شيء لم يكن!!!
سالته ع امس كال جنت عصبي وطلعتها بيج..
سكتت وماحجيت..
جنت اطيعه بهبل..
ولا احجي ولا افك حلكي رغم الشي غلط!!
ويزعلني يدوس بمصاريني..
ورا شوي يخابر مصاير شي..
واني عادي عندي انسى!!!
وجنت الاحظ طبع الشك بي..
بس اوهم نفسي هو يحبني ويغار..
ضل يحاول يمهد بالكلام لامور ممنوعة...
بس ماجان يطلب بالحقيقة ابد..
جان يريد بس كلام بالفون..
كتله اني مو كلش بهالامور يعني بلا تجارب سابقة..
ابقى هواي امور اجهلها..
صل يحاجيني ويعلمني وتعلمت..
بس التعلمته اليعجبه هو...
يعني علمني مزاجه..
واستمرينا بهالشي لحد فترة الامتحانات .
سافر لبغداد بشغله..
وصار انفجار بنفس المنطقة..
تخبلت من شفت الاخبار بالفيس..
حان عندي نت ع الشريحه بالفون..
انهد حيلي ضليت ابجي ..
اطياف ..لج حوراء شبيج يمعودة قابل جديدة الانفجارات علينا؟
_لج اطياف منتصرررر هناك ..
_يامنتصر!!اهاااا شمدريج..
لج احبه واني ويا علاقة..
_ياعمري هسه نتطمن اوكفي انت صبري..
ضلت تصبر بيه وادك يطلع مغلق..
مادخلت محاضرة وبس ابجي..
لشوي كالت دك حصلته..
دكتاه من فونها وتطمنت عليه وحاجيته..
كال ماكو شي ليضل بالج..
وراها استمرينا اتصالات..
بس ماجيت سيرة خطبه احس اقلل من نفسي لو سالته..
وصلنا اني ويا مراحل بالكلام..
وضل ميكتفي لازم طول اليوم احاجي..
واني ماكدر ..
اذا اتصل ومجاوبت يكلب الدنيا..
لازم بس يتصل لو يدز مسج رايدج!
لازم اجاوب وانطي اليريده..
حسيت هالشي عنده هوس بس غالطت نفسي..
وعبير من تخابرني تسال شلونكم اكلها بخير..
احسها تنعقج..
من نتزاعل وتخابرني تكلي عوفي يولي..
مايفيدج مايستاهل!!
كرهتها وضليت ماحاجيها..
شكد ساذجة اني !!
بدل مااسالها ليش تحجي هيج؟
وشنو اليخليها تنطي باخوها!!
بس سويت العكس تجاهلتها وسكتت
صارت العطلة وفاتحني بموضوع الخطوبة..
كال حاجي اهلج حتى نجي..
رحت كلت لشمس باعتبارها اكبر مني..
هي تعرف بعلاقتنا كالت اني احاجي امي..
طبعا احنا عائلتنا ٣ولد و٣ بنات..
الجبيرة اماني متزوجة ابن خالتي..
الجبير قاسم متزوج وموظف بالكمارك ..ورضا وحيدر بعدهم..
هم لازمين شغل الوالد الله يرحمه..
عدنا محلات احذيه وجنط..
وهالشغله ابً عن جد ووضعنا ميسور الحمدلله..
عائلتنا متكاتفة ولمتنا حلوة..
راحت شمس حاجت امي كلتلها هلا بيهم
شوكت ميجون..
خابرته كال باجر العصر نجي..
صدك صار يوم ثاني واجو خطبوني..
كالت امي احاجي اخوانها واردلكم خبر..
هم نفس منطقتنا بس ابعد شويه..
الولد يعرفوهم يعني..
من حاجتهم امي كالو لتردين جواب هسه..
وهواي تأخرو بالجواب..
هو جان يسالني من يخابر اكله عدهم شغل ..
وملتهين شويه..
تالي سالوني برايي كتلهم كيفكم..
كالو لعد نصرف نظر!!!كالت امي..
_باجر اخابر المرة واكلها ماكو نصيب..
اني اباوعلها ومخنوكة بعبرتي..
كمت اجت وراي..
_ماما كلشي قسمة..
ومدام اخوانج معاجبهم معناها اكيد بي عيب..
انت بعدج صغيره والعمر كدامج لتستعجلين..
_لترجعين جواب ماما عفيه..
انتظري يجوز يغيرون رايهم؟؟
_حورا انت تردي؟؟؟
_ليش اجذب عليج اي اريده وهو رايدني..
ليش تحرموني منه...
_يعني بينكم علاقة ولج؟؟
_لااا ابد بس مرات اشوفه بالكلية..
واسمع عنه من اخته..
صراحه مينرفض..
والاهم من هذا يحبني..
وهو اختارني ..
_اشوف اخوانج ويصير خير..
حاجت امي اخواني كذلك رفضو ..
كتله بقرارهم تخبل ..
شلون يرفضون واني احسن منهم..
ومابقى شي ما حجاه..
سد الخط بوجهي واني احجي..
يوم ثاني هم ماخابر..
اني كلت يبرد ويرجع يحجي..
صار اسبوع وهو ماكو..
كلت لاطياف كالت معليج اني اشوفلج شبي..
صدك ورا شويه خابرتني اطياف..
_ها حور ياعمري لتضوجين..
ترى انت الف اليتمناج!!!
_شكوووو اطياف احجي هبطتيني...
_اف ماعرف شحجي بس..
منتصر مسافر لتركيا صارله يومين !!!
ويريد يقدم لجوء لامريكا..
لان مديرة شركة اليشتغل بيها مساعدته..
ميبقى بالعراق بعد!!!!!
للحكاية بقية..
بقلم شقراء(قمر كانون)
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!