رواية المليحة والمهووس الفصل التاسع والعشرون 29 - بقلم Shaqraa

المليحة والمهووس
الجزء السابع والعشرون

لج اهلها يكلولها مترجعين واهله يكلوله مترجعها وصايرة مكافش..
وروية رايده تتزوج وممخلينها لان حامل..
يااا عزاا لج اصلا طلاقها باطل يمكن لان حامل..
شبيج ذوله يعرفون حلال حرام
كلشي عادي..
ع كولتج هم صدك..

التهينا سوالف وضحك لليل راحت شمس..
فتحت الفون لكيت مكالمات من مرتضى ومسجات..
اني حاجيت الوالدة شوكت تريدين نجي.؟
اممم ماعرف كيفك..
لعد خليها باجر..
لا مو بهالسرعه..
للجمعة احسن..
ماشي مثل متحبين..

مرت الايام مرتضى يراسل وجوابي ويا جاف كلش..
صارت الجمعة واجو امه واخته ومرت اخو..
امه جبيره بالعمر كلش واخته تقريبا بكد امي
او اصغر شويه..
مرت اخو شكلها اريحي بعد ماعرف..
نظرات امه ماعجبتني..
حتى من كعدت يمهم تفحصني فحص بنظراتها..
ماعرفت افسرها بس فهمت من نظراتها عدم موافقتها..

امي حست بيها وثكلت بالكلام..
كالت نكول لاخوانها ويصير خير..
هو سالني..
شنو وضع اهلج..؟؟
ماعرف يعني شويه ميريد يتسرعون..
تعرف مو سهلة زواجي الاول صارت بيهم خوفة..
ماشي مريتي ننتظر شعدنا..
شكد متدللون يجرالكم..
لوصت الموضوع وسكتت لان اضوج من يتغزل..
مرض خبال مادري..
بس احس نفسي بعدني عندي اعراض الخوف..

رضا مدح بي وحجه وياي كال تعرفت عليه خوش ولد ومن عائلة عريقة ومثقفه..
وهم الولد سالو عنه يكل مكان..
الا ان كلش تاكدو..
رجعو الخبر الهم وصار الاتفاق..
بس امه من ورا خشمها تحجي..
موقفها خوفني..
بلحظه اجيت اتنازل عن كلشي..
واكله ماريد والغي الخطوبة..

بس اطياف وياي ومساندتني
تهدي بيه وتسهل الامور..
صار يوم الخطوبه مجرد عقد سيد وبالبيت شي بسيط..
لان هو راد الزواج ورا اسبوعين..
طبعا بعد نقاشات واقناع..
وافقت وكلت الي ضكته وشفته قبل ماكو اصعب منه..
شنو اريد اشوف بعد وهيج متخوفه..
خليها يم الله هي تصفى..

لبست فستان ردان طويلة كيبور
وردة متلاصقة بالثانية وحده رصاصي وحده وردي..
والفستان بينصل وبي ذيل قليل..
من الصدر حفرة واسعة جبت شعري خليته صفح حتى يتغطى صدري..
ماريد احد يشوف جسمي اتضايق واخاف..
ماانكر خوفي من مرتضى واخاف يعيد عليه الي سواه بيه منتصر..
اعرف ميسويها بس هو هاجس..

من اجه يمي كعد ولبسني الذهب حسيت نظراته عدها ذراعات..
رفعتني للسما وخلتني اطير..
مرتضى عيونه حلوة جبيرة والها نظره مميزه..
نظراته مو حاده لااا..
بس بيها كلام..
يعني من اباوع بعيونه اعرف هو جاي يفكر بقلبه..
عيونه معبرة الى درجه..
وجانت النظرات الجريئة اميزها بسهوله..
لان اول مانظرلي بيها..
لهذا انطبعت ببالي..

تقرب مني وحاجاني..
مبروك عليج اني ههه..
الله يبارك بيك انت هم مبروك..
اروح فدوات لليباركلي..لج شكد مرتاح اف..
حورية الخبلة صارت الي..
تتذكرين اول ماشفتج اجيتي مريضة وتهلوسين..
اول ماسمعتج كلتي ثور غير انضغطت..
بس من شفتج بردت اعصابي..
ومن شفت شفتج تلفت اعصابي هم..
اوف اسكت مرتضى شنو هالحجي..
اني اصلا متضايقة من نظراتك..
احسك تريد تبلعني..
شعدها البندولة هههههه...

ضلينا شوي نسولف وامه ماتقربت ابد ولا حجت وياي..ركصو وتونسو شوي وماطولو بسرعة راحو..
طيوف وياي وشموسة احسهم فرحانين اكثر مني..
امي احسها خايفه رغم فرحتها بس تخاف عليه وحقها..
كال مرتضى جهزي الي يعجبج وانطاني مهر قوي..
بلشت اجهز والبنات يساعدني..
مرتضى يتصل ويراسل بس بحدود ماتعداها..
مرات احسه من كلامه يلمح لشي..
بس ادور الموضوع لو انعس..
هو يعرف اني اتهرب وثنينا نخدع نفسنا..

قرر نسكن وي اهله هو الصغير ..
واخوه الاكبر منه عايش وياهم بالبيت ع مود امهم جبيره ومتكدر..
هو نفسه اجت مرته خطبتني..
كالت احنا نريد نطلع بس ننتظر مرتضى يتزوج ع مود الحجية..
الظاهر عدهم مسكن ..

كملت كلشي وخلصت الفترة واجه يوم زواجي..
هم قررنا نسافر بطلب من مرتضى..
اني سعدني هالشي ..
حجزت بدلة عري اوف وايت ..
هم ردن طويله بس شفافة..
وملفوف ع الخصر مسطرة شفافة بيها نجم فضي طش..
ومن فوك كصتها مو عريضة..
تقريبا مستورة اختاريتها..
كملت مكياج وتسريحه طلعت صدك نزاكة وجمال..

رحنا اخذنا صور بس بالكوة تحملت قربه يمي..
مارتاح احس نفسي اتضايق من الرجال حتى ريحته..
طلعنا للقاعة والناس ملتمه هواي..
من فتنا حسيت هواي نظرات مو مريحه..
بس غلست وماهتميت..
كعدنا وهو ايدي بحضني ويسولف..
احس سوالفه كلها تحفيزية..
يحس بخوفي ووحش الذكريات يحاول يفترسني..

كمل العرس وامه تخزر بيه..
وتكله دكتور ودكتور ع اساس اني جاهلة ماعرف اكتب..
كلت بدا ضيم جديد ع راسي..
خلصت الحفلة وزفونا للفندق ..
دخلنا وكعدت ع السرير...
بيه رجفه واحس نفسي جازفت ..
مثل الميعارف يرمي ويفوت بمعرركة..
عالسن خسارته من البداية..

اجه يمي ذب سترته جان الجو حار ..
كعد ع جرباية واخذ ايدي باسها..
تدرين شكد حلمت بهالشي ويأست منه..
بس صدك نصيبك تاخذه لو من حلك السبع..
وانت نصيبي يا ام شفة نار..
باوع لشفتي نظره مفشرة نفسها..
عض شفته حيل
جرني يريد يحضني عطت بي..
وخرررر ...

للحكاية بقية
بقلم شقراء(قمر كانون)