رواية المليحة والمهووس الفصل الثاني والعشرون 22 - بقلم Shaqraa

المليحة والمهووس
الجزء العشرين

فتحت عيوني بالمستشفى والم براسي يدك..
امي فوك راسي بس شافتني فتحت عاطت..
يمه زينه انت زينه يمه بس حاجيني..
كولي اي شي..
اني ابجي وارجف ..
وفاقدة كلش مابيالي شي غير ابني..
انعادت عليه ذكريات العملية وشلون عرفت مات..

تذكرت سالفة الفستان !!
كعدت ع حيلي رغم الدوخة والتعب..
فتحت العبايه شمرتها ..
امي تعيط..
صخام شبيج حوراء شبيج ولج شبيج ....
لزمت الفستان واجر بي..
امي تريد تلزمني ماكو..
صارت عندي قوه فظيعه...

حاولت اشكة انشك الصدر لان خفيف..
شكيت الردانات واجر وامي تجر..
صدك انهاريت..
اصيح واعيط..
رجعووو شمس حياذيها جلال الجذاااااب...
رجعوها هذا حقير مثل اخو..
شفت اطباء اثنين اجو يركضون ..
بعدو امي ولزموني جتفوني...
تالي واحد عافني واخذ عباتي من الارض لبسني..
يحجون ويهدأون بيه..

امي عاطت ولج موتي روحي كااااافي..
وكعت امي كدامي ..
سكتت مثل الجمرة ويوكع فوكها ماي..
راح الدكتور الثاني صاح ع واحد حتى يشيلوها..
ضليت اباوعلها وابجي..
شكل الطبيب الكانونه ..
ورا شوي غفيت..

كعدت لكيت رضا وقاسم يسولفون..
امي متمدده ع سرير مسافه عني..
هي الغرفه بيها اربع اسرة..
ومفصولة ببردات..
البردة كافيها بيني وبين امي..
وكاعدين يسولفون..
فتحت عيني لساني بس يذكر امي..
حاجاني قاسم..

حورية انت زينه حاجيني..
عيوني مغوشة فتحتها شوي ركزت..
امي شلونها.؟؟
زينة هاي يمج خطيه ماقبلت ترجع..
كامت اجت يمي..
تبوس براسي وبكل مكان بوجهي..
يمه انت زينه يبعد امج كومي لا تشلعين كلبي عليج..
لتخافين يمه الحمدلله مابيه شي..
شمس بس لا عرفت؟؟
_لا يمه راحت بفالها لتخافين عليها..
كالو الولد رح نطلع لان وضعج ميحتاج تبقين..

رجعنا شوي كعدت يمي اطياف..
حجيتلها الصار خطيه انصهرت وانفعلت..
كالت ليش ما كتيلي انتف عطوبها اليشبهن واير السحب..
تولي يمعوده انت حامل مو زين عليج..
يمه خبصتني خبص..
تالي نمت وبالي يم اختي..
كون مايطلع مخبل جلال..
اني احترمه واعزه..
بس ليش كال الفستان منه ؟؟

بين التفكير نمت كعدت الصبح صادف جمعة..
مخروعة ركض ع الفون..
خابرت اطياف كتلها خابرتكم شمس..
كالت اي خابر جلال قاسم وحجت ويانا..
رحتله خابرها وتاكدت منها امورها ماشية تمام..
ارتاحيت من حجت ع تفهم جلال وشلون مخليها براحتها..
كتلها انطيني جلال اذا يمج..

صدك حاجاني وبكل ثقة..
هلا خيتي شلونج انشالله زينه..
_ع الخير جلال انشالله بالرفاه والبنين..
بس اني عندي عتب عليك لان احترمك والك معزة عندي..
ليش مكتلي الفستان من منتصر؟؟؟
_يا فستان مال زواجنا؟؟؟
نعم..
ههه منو كلج هالحجي حوراء؟
يعني اني تتوقعين اجذب عليج واتصرف هيج تصرف..
اني من عرفت بالسواه منتصر وياج ضليت استحي اباوع بوجهج..
سود وجهنا منتصر ومحد راضي ع تصرفاته..
وصدكيني لو مامطلكج اني اوكفلج ..
وتدرين بي من جان يتهرب من الجلسات ..
اني كلت للولد تعالو موجود بالبيت هو..
الي وصلج هالكلام يكرهج..
لتخلين احد يغيضج محد يستاهل ينزل دمعتج..

اوكي مشكور اسفة ازعجتك ..
بس حزت بنفسي وكلت اتاكد منك..
لا حوراء لتكولين هيج اني حاسبج اختي الصغيره..
وغلاتج مثل اخواتي واعز..
تسلملي خويه اخذ راحتك وسلم ع شموسه..
مع السلامة..

عرفته ملعوب من رواء..
واني الغبية بسرعة اصدك..
حسبنا الله ونعم الوكيل بيج رواء..
سولفت لاطياف وكعدنا ندردش ورا العشا..
امي نامت والشباب برا..
كاعدين اني وياها تذكرت السفاح..
لج طيف صدك هذا السفاح شكد نظراته مزعجه..
احسها بيها ان..
_هو الولد حاط عينه عليج بس انت قافله..
_اوووش دخيلج سدي السيره..
مناقصة مخابيل ترى..
عفيه عفيه لتكملين ترى اكوم..
سكتت وباوعتلي بحسرة..

مرت ايام والحياة بين بيت ودوام وماشية..
بيوم اطياف تعبت لان تاكل ملوحه هواي ..
وحامها ع ملوحة..
ويتخلخل ضغطها وماتجوز..
بهاليوم تعبت كعدنا وشربت عصير وماكو..
تعبانه حيل..
بس لسانها ميدخل بحلكها..
شوي. كالت حوراء امشي نطلع ..
وين نروح ولج..
للطبابه عفيه ينطوني شي..
اوكي يلا..
لا مناك نفتر احسن وتجر بيه..
شكو شبيج ؟؟

درت شفت منتصر كدامي..
اه شكد حاقده عليه..
ماشتهي اباوع بجهرته..
تقرب يمنا اطياف كالت..
عوفيني خل امسح بي الارض..
لا لا معليج يولي اني احرك قلبه مو انت...
اجه وكف كدامي ..

_عاش من شافج غزالتي حليانه..
_اكلك انت شكد فارغ..
ماتنتبه لحياتك لبقرتك قصدي مرتك وطفلك..
_لسانج رح يعم عليج..
بس تدرين البدلة بشدة عليج..
هاي وي الكلبجة تطلع تخببل..
شلون جسم ميخرب خرب يومج..

لا يا ناقصات اكيد وحده منهم مصورتني..
ماكو غير عبير ..
صدك طكت روحي وانجنيت ..
انت صدك ملطلط ومتستحي..
ولو كلشي يطلع منك..
اليكعد ببيته وحدة المنطقة كلها طافره عليها
بالليل كلشي يسوي..
من سمع هيج تخبل..
لج تكولين ع مرتي هييييج..
كتلج اندمج صبري بس..
هههه بعدك تهدد شكد قديم لعد ..

قديم موووو؟؟؟؟
انتظري دقايق وانطيني رايج بالراح ادزه الج..
نشوف اليوم تباتين ببيتكم لو بالكبر!!!

للحكاية بقية
بقلم شقراء(قمر كانون)