رواية المليحة والمهووس الفصل الحادي والعشرون 21 - بقلم Shaqraa

المليحة والمهووس
الجزء التاسع عشر

باوعت ع الرقم غريب معقولة منتصر؟؟
هذا مو منطق منتصر بالكتابة..
صح اليسمعني يمكن يضحك علي..
بس اعرف اسلوب كل انسان بالمسجات..
هو مو خط ايد وينعرف..
بس اسلوب ومفردات ومنطق..

طلعته بالكاشف ماطلع ..
رحت للبرنامج الثاني هم ماكو..
منو هذا؟؟
وولنفرض منتصر شلون عرف؟؟
غلست ونمت..
مرت كم يوم بين دوام وبيت وكعدة اهل ..
احس نفسي صرت احسن..

شمس..بما انه احنا متجمعين عندي الكم خبر..
كالت امي..خير يمه كولي..
_جلال عنده بعثه لايطاليا..
وقرر نتزوج بسرعة حتى ياخذني..
منها شهر عسر وهم اتونس لان بلد مشايفته..
_اه لج ترحين لروما واني حلمي اشوفها..
صدك حظ الزرك كاعد..
_انجبي الصخلة ع اساس انت شقرا ...
_كلش كافي سماري ينضرب بي المثل..

كالت امي..
بالخير يمه الله يهنيج ..
من يجون اخوانج انطيهم خبر..
_لا يمه جلال كال اخابرهم اني..
خوش حجي الله يهدي الج ويسعدج..

خلال هالايام كملت شمس كلشي..
منتصر ماشفته صارلي فتره..
صح ارقام غريبه تدك نص الليل..
واعرف طبعه حتى يشوف مشغول لو لا..
من قبل هالشي عنده..
حددو موعد زواج شمس الاسبوع الجاي ..
وحاجزين ع سفرة هم  كبل يرحون..

لج شموسه شعجب ترحون كبل ليش مو ورا كم يوم..
_هو يريد يخلص من سوالفهم التعبانه..
يكول اضوج من هذا التخلف مال يوكفون ورا الباب..
انت اطهر من واحد يقلل قيمتج بهالطريقة..
وماريد اعصيهم حتى ليفكرون بيج غير تفكير..
اني معاشرهم واعرفهم..
عاد نروح نحيي ليلة العمر هناك..
هالليلة مقدسة لازم واحد يعيشها عدل..

الله يهدي الج ويحفظكم لبعض..
شكد تفكيره حلو تستاهلين شمسيتي..
حظنتها وضلينا نبجي..
اختي مو سهل تبعد عني ..
حتى بالكلية احنا قريبات..
بس فرحتلها من عرفت تفكير جلال..
معناها فعلا مو مثل منتصر..
صح هي حجتلي هو يختلف ..
واني مقتنعه بس مو مية بالمية..
تبقى اكو خوفه بداخلي..

عرفت من شمس منتصر مسافر ..
ورواء لسه يم اخوها..
هي اهلها ميتين وخواتها متزوجات بغير محافظات..
ورواء هم مكايلتله ع حملها الا عليها ٣ اشهر..
بس عرفت شلون تلعب باعصابه..
ومشوفته الويل هو وخالتي..

صافنه اتذكر شلون جنت مطيعة ويا..
لا مو مطيعة جبانة..
مثل الخروف عنده جنت..
وكل هذا مراضي عليه..
مايوم جبت سيره امه بباطل ..
لان المرة زينه ومااذتني ..
بس اذا حجيت شي يكلي لتجيبين سيرتها ع لسانج..
هيج خبال منه مو اكثر..
شكد جنت غبييييية..

بس صدك علمني درس..
ماامشي ورا احد واني مغمضه..
والثقة متنطي لرجال مية بالمية..
اني جنت اخر شي بالدنيا اتوقعه الخيانه..
جنت اكول ميشوف غيري..
بس طلع خايني حتي وي........ولد...
شكد صعب ومخجل هالاعتراف..
شكد انهانت انوثتي بمعرفتي هالشي..
صعبة ع المرة من تعرف زوجها الي هي مخلصة اله وتسعى لسعادته..
تلبس تمكيج تتعطر تتغنج..
لعيونه حتى لتحس مقصره تجاهه..

وتالي تعرف زوجها يخونها وي الغريبه والقريبة..
هنا المرة تنجرح انوثتها قبل كرامتها..
احساس الانثى جنح فراشة..
من الهوا يتأثر..
مهما تكون شخصيتها قوية..
او ضعيفه حلوة مو حلوة جبيرة صغيرة..
حتى المتسلطة والعرمه..
بسرعة تجرح انوثتها اقل كلمة ..
بس مو كل وحدة تبين..

وخصوصا منتصر خيانته جانت اسم الله عليه ثري دي..
شرقا وغربا وارضا وجوا ههه..
ببغداد مخليله حبايب..
وكروبات عنده بنات وولد والحجي يلعب النفس..
ماعرف شنو من نفسيه عنده مثيرة للغثيان..

اجه يوم زواج شمس..
جلال كال فستانج علي..
جابلي فستان بيجي قصير للركبة..
ووالردن كامله وشفافه..
وع الصدر شفاف كصة سبعة..
ومنثور علي لؤلؤ..
جان شكله كلش مميز ..
من شفته فرحت..
صح عندي كومه وشنو يعجبني اشتري..
بس من احد يهديلي شي افرح..

لبسته وشعري مرفوع تسريحه نازكة ..
ومكياج واو..
والكعب بيج ومرصع بلؤلؤ..
طلع شكلي ملفت للنظر.،
بلش العرس واحنا بالقاعه..
خالتي ضلت تبجي من شافتني..
تكلي خسرج وضيع عمره..
ضلت تشكي من رواء..
كتلها الله يهديهم ثنينهم بعد هو اختار..

نسوان اخوانه اجو سلمو عليه ويبوسون بيه..
صح ماجان الي اذيه ع احد..
ويرتاحولي بس هم قصدهم يضغطون رواء..
لان يضوجون منها كلهم..
هي كاعده ووياها عبير..
عبير عود تريد تغيضني يبسبسن ويضحكن..
شكد عين صلفه عدها..
هي صديقتي وهي عرفتني بي..
بس احسها شامته ماعرف ليش..

يمكن لان كملت وهي لا..
جانت تكلي نيالج تطلعين وتدخلين..
اكلها لج كعده البيت حلوة اذا زوجج يحبج ومرتاحه..
تكلي اي هي التطلع وتدخل كله هيج تكول..
حتى لحد يحسدها!!!
ههه اكو احد يحسد ع الطلعة؟!!!!
عجيب صدك حسد عيشة..

المهم صارت المراسيم وكملت ..
منتصر بعد مسافر فكة ..
اني واطياف يم شمس شنو تريد شنو تحتاج..
صارت الزفة ورادو يطلعون..
ودعناها لان ماردنا نروح للبيت ..
وهم بس ياخذون اغراضهم ويطلعون للمطار..
رحت لغرفة التبديل البس وارتب نفسي حتى نطلع..
التفتت وراي رواء ..

شلونج حوراء شدعوه متسلمين؟؟
هيج حاقده عليه..
شعندي وياج حتى احقد؟؟؟
احقد ع وحده اخذت فضالتي!!!
عادي هي الفضالة مصيرها الزبالة..
وانت زبالة اكيد تروحلج..
هههههه وتكولين محاقدة..
لج شوفي حقدج عاميج..
حقج تغارين رجلج وسحبته لحضني..
وطفلج وسوا منتصر تشريب هههههههههه..
ميريد طفل منج اخاف يطلع ازرك مثل امه..
اني من سمع بحملي طار فرح..

اه من جابت سيرة الطفل وضحكت نار وشبت بيه..
احس قلبي يريد يطلع من صدري ..
اي بالعافية عليج هو الزبالة شتخلف غير الزباله..
حتى من يكرروها ويعيدون تدويرها تصير طاسة حمام ..
هههه بعدج ع لسانج ماكسر عينج ابنج..
ست اشهر وكامل وراح من ايدج..
وشكو بطنج وطلعو ميت اوف انت ماشفتي..
تسولف عبير تكول شكبره جنه عمرة ١٠اشهر ..
بس خطيه شحاله..

هنا فقدت..
تخيلت شكله وتذكرت نبضه لهسه باذني..
صار مثل الصدى باذني..
وراسي انضغط...
ضلت دموعي تصب..
انكلعيييييييي الله يحرك قلبج لج انت هم ام حسي بيه حراااام عليج....
راحت طلعت ومدت راسها..
بالمناسبة الفستان من منتصر مو جلال..
واني اختاريته بيدي..

هنا تهسترت اكثر..
راسي احسه صار وزنه ٥٠ كيلو ماكدر اسنده..
ودموعي تنزل بدون توقف..
طلعت بلا وعي برا..
كدام القاعة الشباب هوسه بس ماشوف شي..
رحت فتت من بينهم واني ابجي وازلغ ايدي باظفري..
شفت منذر واكف جاي يسولف شافني هو اجه عليه..
خير ليش طالعه بين الزلم خويه شبيييج؟؟!!
سلامات صار شي!!!!

وديني لبييييييتنااااااا هسه..
ضل يتلفت هو لان صوتي عالي.،
بدون وعي جرني من ايدي واخذتي لسيارته..
صعدني يريد يحاجيني..
بس لهنا وفقدت اعصابي..
كبتت لخاطر شمس ليخرب عرسها..
بس صعدت السياره بعد ماضلت اعصاب..
ضليت الطم وديييني للبيت بسررررعة..
وادك ع وجهي واخرمش بي..

هو ضل محتار ميعرف يتصرف..
يريد يفهم شي ماكو..
ماخليته يحجي من العياط والبجي..
اخير شي حسيت خشمي طك دم وفقدت...

للحكاية بقية..
بقلم شقراء(قمر كانون)