رواية المنجمة الفصل التاسع عشر 19 - بقلم كفايه

﷽

#المنجمة
الكاتبة_كفايه

لاتنسون متابعه الحساب
التصويت والتعليق بين الفقرات لطفاً 💙

يا علي مدد ♕.

الصدمة تجفف العين والخذلان يعميها،،
ف عدم بكائي لا يعني اني بحال جـيد.

______________________________

. كواكب  .

لحظة بس لحظة جانت موتتني وجمدتني عيوني من الصدمة احسهن طلعن من مكانهن قبل كلبي والله قبل گلبي هنا طلقات رموهن ومشو بسيارتهم
بقة الصوت يرج بذني وروحي وريحة البارود بخشمي اجت سمعت صرختة متوجع صرخ ماكدرت التفتت واشوفة اخاف ادير وجهي واطيح على وجهي  .

شهكت شهكات طلعت كلبي من صدري وذبحتة تمنيتني عمية ولا شايفتة هيج طايح بالكاع لازم صدرة ينزف دم ومن الالم يرافس برجلية بالتراب
ويعصر بيدة الثانية يضرب بيها، روح ماضلت بيه روح تعتنيلة ولا رجلين التاخذني اله زحفت زحفت وطحت يمة بالتراب حيلي قبل حيلة راح  .

لزمت ايدة كلها دم رجفت بشكل مو طبيعي وريكي يبس ماكدرت احجي شي رفع عيونة بوجهي وابتسم بوجع تنفسة عالي حجة بصعوبة كطعة لكلبي كطعة شلون اعيش بعد الكالة  .

_غضنفر: ابريني الذمة كواكب ابريني

زحفت اكثر ارجف لطمت على حلكة بيدي اردد بخبال:: انجب انجب انجب

دفع ايدي يريد يحجي يردني اسمعلة واني ماريدة يحجي خليت ايدي على مكان الطلقة اايدي انترست بدمة دورت بعيوني على شي اشدة بيه من كل عقلي امنع النزف حتى لايخسر دمة مالكيت باوعت بملابسي لا عندي شال شي الفة علية كمت اريد اروح للبيت اجيب شال اي شي قماش عقلي مايفكر بشي بس هاي اجت على بالي لزم ايدي درت اباوعلة اشرت بيدي على البيت بس ردت احجي ماكدرت  .

بكلمات متقطعة والالم يدك بروحة دك كال

_غضنفر: كواكب انتي اشجع ووافى بشر اشوفة بحياتي... اهلي كلهم يروحولج فدوه
محد يوصل لوفائج انتي سويتي دهر على البنات
بجيتي دم عليهن وهنا مو اخواتج
جلبت بيج لان اني ماعندي ناس هيج
سامحيني ولاتنسيني

نترت ايدة بقوة وكمت اضرب رجلي بالكاع بحركة الطم واصيح بصوت عالي مليان حركة الم قهر  .

_كواكب: ااااانجب غضنفررررر الجلب ابن الجلبببببب اااانجب مابيك شييييي حيووووان انت حيووووان هسة تكووووم زماااال

حاول يعدل نفسة لازم صدرة بقوة عيوني مايرمشن واني اباوع لدمة ينزف  .

_غضنفر: تعاركت، وسويت مصايب علمودج
اني متاكد راح يغدروني هاي الغدرة بس عادي لعيونج ذني الشذرات روحي اشردي لايرجعون

رفعت ايدي ترجف وشفتي يبست احس روحي بحلم والله بحلم مو حقيقة  .

_كواكب: راح اخذك للمستشفى واسوق هاي السيارة واوصلك بس اجيب قماش امنع دمك القذررر

حجيتها ورحت اركض للبيت ماشوف دربي وكعت على وجهي ونهضت كم خطوة ورجعت وكعت مرة ثانية عيوني صرت  ماشوف بيهن اكو طابوك مكسر بالكاع عثرني كمت ما حاسة بوجع  كملت دربي وهو يصيح علية:: علمودج سويت كلشي  خليني ارتاح من ناحيتج لج عوووفيني واشردي

_كواكب: اشتعلت رررروح ابوووك الگ**
معليك بيه معليككككك

رحت للبيت الباب مقفول رجعتلة على المفتاح  طايرة طيرررر ولساني يسب ويغلط بالكاع لكيت المفتاح اخذتة واحس فصلت عن العالم حتى من يحجي مااسمعة رحت اركض  للمهجور كون مهجور فوك راسي وخلصانة فتحت الباب ودخلت اكو كم قطعة ملابس جانن  هنا اريد اشوفهن وين ماكو اختفن الدنيا صارت ادور بيه  رجعت للحايط ركعت راسي اريد اشوف بس اريد اشوف واميز مسحت وجهي  ضايعة بس يموت ما ابقى اموت من الحركة علية  .

طاحت عيني على وصلة ثخينة بالكاع مشمورة ضحكت بفرحة مو وصلة بيها نجاتي يكول اخذتها بيدي وطلعت اصيح

_كواكب: ما تموووت هي طلقة انمووونة تطلع تطلع اكو ناس تزرف وتبقى عايشة

وصلت للباب اريد اطلع من البيت وكفت رجلية وكف شعر راسي وكف دمي اليمشي بجسمي تلاثة واكفين بالباب سادينة سد فرحتي تبخرت وملامحي اختفت رجعت ليورة من تقدمو بلسان ثكيل حاجيتهم  واشر بيدي  برا  .

_كواكب: راح يموت بس اخلية يعيش
بس مايموت ونعيشة خل اطلع

ماردو علية بحرف هجم واحد عليه صرخت بصوت عالي بقة يرن بذني رن لو اموت ما انسى هاي صرختي بيدة وصلة خنكني بيها خنك خرب معاني وجهي رفست رفست خرمشتة حاولت افلت روحي منه اختنكت بيها واحس جسمي نمل وخدرت اعصابي صارت ماي وتبدى  .

اصوت عالية هوسة وصياح وصريخ ريحة دخان وحرارة تدك بعظامي دك فتحت عيوني اريد بس اعين روحي واكوم على حيلي تعبانة ماكدر
نفسي بطيء كوة اجر النفس عيوني ينفتحن ويرجع ينسدن مر وقت هواي لو شوية ماحسيت بية كمت وساعدت روحي اطلع منا  .

تلمست الفراش بيدي ودورت عيوني بالغرفة مرتبة ونظيفة مابيها غراض هواي بس ميز علية فراشات منضودة هذا مو البيت الجنة بية قبل  .

انداريت بنص جسمي عيني على الباب انفتح ودخلت بلقيس بجمود بقيت اباوعلها ابتسمت وتقدمت تجاهي وصلت يمي خلت ايدها على كصتي ايدها باردة واني نار  .

_بلقيس: الحمدلله صرتي احسن
صخونتج نزلت احسن من مساع

باوعتلي وانرسمت ملامح الحزن على وجهها لزمت وجهي بثنين ادية بصوت هادئ كالتلي  .

_بلقيس: احجي شبيج

رمشت بعيوني وحاولت احجي احس روحي مبنجة
_كواكب: نحلانة

ضربت على رجلها بقوة وراحت تفتر ايدها على راسها رجعت يمي سحبت ايدي  .

_بلقيس: كومي شو كومي انتي مريضة اول ماشفت راح يسممونج بهذا السم اليشتغلون بية حسبي الله ونعم الوكيل عليهم

كمت وياها اخذتني لازمتني من ايدي اباوع للبيت جديد اخذتني للمطبخ على السنك غسلت وجهي بمي بارد رفعت شعري واخذت ادية تغسل بيهن

_بلقيس: تسبحين؟

هزيت راسي لا
_بلقيس: دمشي، اسبحي بلكت ترتاحين وتصرين احسن

ماحجيت حالتي تعبانة راسي فارغ من كلشي اخذتني للحمام خلت ملابسي وطلعت سبحت بمي بارد طلعت امشي جثة بدون روح كعدت وهي تطبخ راحت للثلاجة طلعت فواكة خلت كدامي وكعدت تكشر وتنطيني مدنكة عيوني واكل على كيف  رفعت عيوني من حجت  .

_بلقيس: ولج يمة لاتدمرين روحج اسمعي كلامهم والله يدمرونج ويخلونج تكتلين روحج بيدج
اشتغلي وياهم احسن من هالعذاب حتى الشرطة ماتلزمج هاي هما سنين يشتغلون

نزلت دموعها مسحتهن تحجي بحركة
_بلقيس: اكلج اشتغلي لان ماكو حل والله ماكو حل ثاني اخاف عليج منهم اريد اساعدج واني روحي ما مساعدتها 

_كواكب: هذا مو بيتج

_بلقيس: اي جديد من ورة غضنفر مبلغ عليهم بس ماكملت وياة

هي جابت اسمة لو احس ضربتني راجدي ورجعتني للواقع اللكمة وكفت بلعومي وكلبي دك بقوة سالتها واني الخوف محتلني خايفة ينفجع كلبي بية  .

_كواكب: غـ غضنفر عايش هو عايش مو؟؟

عيوني على حلكها بس اريد تكول اي بس ماكالت كامت من مكانها صارت وراي تمسح على ضهري دفرت ايدها وكمت رجعت الرجفة لجسمي عيوني من الدموع صرت ما اشوف بيها  .

_كواكب: عايش هو عايش ما ميت
غضنفر يعيش مايموت لا تكولين مات لااااا تكولين

هزيتها بقوة ودموعي نزلت تبجي وياي ساكتة تحير شدكول تخبلت هذا عقل مابقة براسي رحت للمواعين اشيل بيها واركع بالحايط اسويهن طشار وبلعومي من الصريخ تشنج  .

_كواكب: ما يموت مايمووووت

تحجي بصوت عالي مبتعدة مني لا اذيها تريدني بس اسمعها  .

_بلقيس: ايجوز عايش  مادري والله مادري

شلت دولة كزاز وعيوني احسهن نار رفعتها اهدد
_اكتلكم كلكمممم والله كلكم تمووتون المن عايشين المممممن

فلشتها بالحايط وهي تصيح رجلج دنكت اشوف الدم تارس الكاع طحت طاقة وحيل مابية مددت رجلية ودموعي تنزل كعدت بين رجلية تسحب بالكزاز بالي مو وياها احس كلبي ينزف دم واني اتذكر ضحكتة وسوالفة عركنة ايامنة  .

_كواكب: مايموت كليلي مايموت
بعدة ماتارك شغلة بعدة ماصاير زين بعدة مامكون عائلة ولا متزوج بعدة حتى اهلة ماشايفهم
مايموووووت يمة مايموووت

لحظات، دقايق، ساعات مرت واني بين الحقيقة والخيال بين البجي والصريخ والعويل تكطع كلبي هسة يلا عرفت شكد احبة هاي مو نهايتة مو نهايتة لازم نهايتة حلوة ماشاف شي من بدايتة هو  .

بمكاني ماتحركت منه وبلقيس تفتر علية عيوني بالكاع منزلتهن احسب بدموعي غركن الكاع اريد ابجيلة محد يبجيلة لا ام ولا اخت،،  بسطال صاير كدامي رفعت راسي وباوعت بحقد كازة على اسناني برود حاجاني  .

_الاعرج: شبيج خبصتي الدنيا شبيج

خليت ايدي بالكاع استند عليها اول ماوكفت على حيلي هجمت علية لو بيدي اكطعة تكطع قيد حركتي ادية ضابهن على جسمي ولازمهن بيدة صرخت اطلع بروحي مفرفحة..

_عوووووووفنييييييي لو اموووتك لو تمووووتني

بصوت اعلى من صوتي صاح بيه ومن كثر مارجلية ترفس شمرني على الكاونتر مثل المخبلة ركضت على السجاجين وصلت الوحهن ورفعهن ليفوك يصيح  .

_شبيج انجلبتييييي مكسررررة المطبخ علموووود منوووو مو هووو نفسة الذبج بوسط الناااار لو ماهووو انتي هذا حالج هيييي غبية انتي

_والله اكتلك بدالة والله اكتلك والله

غمضت عيوني بقوة من ضربني راجدي كورت ايدي وضربتة على كلبة دفعني يصيح  .

_الاعرج: كلة علمود نغ** المفررروض تفرحين

_كواكب: اكتلك وافرررررح

دورت جسمي ادور على شي اضربة بية ناوية موتة ولله ناويتها خل شيصير اكثر، من الصار؟ لزم ادية من ورة ربطهن بيدة  .

_الاعرج: تخبلتييي مو صاحية

_كواكب: اكتلك اليوم باجر بعد سنة اكتلكككك

_ما ماااات لج عايش هال*** ابن،*** عايش حريشي مايصيبة

رخت اعصابي بيدة وانفاسي انخفضت دفعني وكعت ماكدرت اكوم رفعت عيوني مامصدكة اسئل بية  .

_كواكب: عايش غضنفر عايش؟؟

كلب عيونة ومسح صلعتة
_الاعرج: عار يموت العار؟

_كواكب: مايموت العار هو عار الحمدلله

ضحكت بخبال اختفت ابتسامتي ضحك علية جذاب كمت ارجف واحجي  .

_كواكب: كلي فدوه كلي وينة مات مات
تصوب هو بصدرة عفتة ينزف كول شصار بية

_الاعرج: اخذو ربعة عالجو

اندار يغسل ادية بصابون صرت وراة
_كواكب: احجي الصدك لاتجذب

_رفع ادية بنفاذ صبر وصاح
_يا طلابة غضنفرررر يا طلابتة خرب ** شكد لحيتييي عايش

_اريد اشوفة

_تشوفينة

سكتت انظم انفاسي واستوعب الفكرة واتخيل بعقلي امحي كل التفكير الرسمتة خليت ايدي على حلكي اضحك اني اكول غضنفر مايموت عار مايموت بعد وراة حياة يعيشها  .

دخل جوة الاعرج واني بقيت بالمطبخ متفلش كلشي بية عبالك اعصار داخلة معقولة هاي اني هيج سويت اكيد مو اني عبرت الكزاز ورحت وراة لكيت غرفتهم مقفولة وصوت بلقيس تصيح بحركة

_بلقيس: عوووفني امشييي ما اتحمل ابقى وياك بعد

_الاعرج: شتردين لا تخليني افقد عقلي عليج

_بلقيس: تفهممم انت تفهممم عوفني راح تموتني خاف جنت افكر بس بروحي صرت افكر بهاي المسكينة رجعها منين ما اجت

برود جاوبها
_ماعدها مكان

_بلقيس: وين ماجان تروح بس لايمكم شسويتو بيها دمرتوووها يومين هي ماتدري بالدنيا مريضة مو صاحية تمرضوها بالزايد

_مالج شغل بيها

_لاتتقررربلييي كااافي اطلع منااااا

صاح بيها بصوت عالي
_لج انتي مو مال احترام

بعدها ماسمعت غير ضرب الحزام وصريخها طلعت ماتحملت الكراج صغير وخنكة مو مثل ذاك باب صغير ابو الطلاقة الباب مقفول باوعت للحايط وتشلبيتة جني قرد رفعت روحي على السياج وفتحت عيوني بتعجب المنطقه قذرررة وشوارعها ضيكة درابين تلعب الروح سمعت صوتة طفرت للشارع وطكيتها ركضة  ..

جنت عبالي اتحرر بس اعبر السياج بس العرفتة المنطقة كلها بيت واحد والكل نفس القذارة والشغل
لاكاني قامة ضحك من شافني اركض استغربت ليش ماوكفني استغربت من ضحكتة حسيت اكو شي مو طبيعي لا الاعرج دز واحد يركض وراي رجعتلة فحطانة كوة اجر بالنفس  .

_قامة: ها رجعتي ماتكملين
_اكو طلعة منا وين احنا هسة؟
_بالعراق اكيد
_قامة مدري طبر حاجيني اريد اطلع منين

ضحك بصوت عالي يهز بيدة مستهزأ
_قامة: نصيحة نصيحة بلاش تاخذينها ماتاخذينها بكيفج بعد شوفي هاي المنطقة كلها حرامية ومسلبجية وتجار ممنوعات وحتى بشر اشكال بيها
اكعدي وامشي وي الاعرج احسن مايشوفج غيرة ويشتريج بس بوكتها تعرفين النعمة الجنتي بيها

_هه نعمة هذا الشغل  !!!

_الاضرررررب اكو ارجعي لا واحد يشوفج ويطلبج بشغل يدمرونج بية روحي منين ما اجيتي وطلعة منا ماتطلعين وحدج لو تنكلب وحدج ماتطلعين الا اذا شخص منا وبينا يطلعج بساعتها يلا تسلمين لا تحاولين تطلعين ادخلين بالاتعس بوكتها عوفي سوالف الزعاطيط ذني

كلامة جان قوي وبية الف معنى ومعنى سكت وراح يمشي رجعت لنفس الطريق احس بصدري يضيگ عنة الهوى بعد كلامة ايست اطلع وحدي منا وكل ما اتذكر خسرت غضنفر كلبي يريد يوكف والدنيا تظلم بعيوني منو بعد يدري عني اني هنا منو يطلعني  ؟

لكيت الاعرج يتنفس بصعوبة وجهة مايتفسر من العصبية رفع عيونة خزرني بغضب ماحجة شي وياي
وكفت يم راسة هو كاعد  .

_كواكب: جاوبني فدوه غضنفر شلونة؟ صدك عايش؟

_تردين تشوفينة؟؟

_اي والله اريد اررريد

نهض من مكانة صار بوجهي يكلي
_امشي وياي بشغلة نخلصها واخذج لغنضفر

راح للسيارة شغلها صعدت وياة
_كواكب: شنو من شغل هالمرة؟

_سهل بس توصلين هاي العلاكة لمكان ××××
ادخلين للمكان تنطينها لوحدة اسمها ×××
وترجعين

باوعت للعلاكة صغيرة كلش رفعت حاجبي ردت الزمها سحبها ما خلاني اشوف شبيها  .

_كواكب:شبيها
_توصلينها مايخصج
_واذا ماوصلتها
_تتندمين اسلمج للاكثر مني شر تشتغلين شغل مامفكرة بية بحياتج وانتي الممنونة

___

نيزك  ...

صعدت وي خالي مستغربة من ردة فعلة تحركت السيارة واني مركزة وياة باوعلي من الجامة وذب حسرة   .

_همام: ماكدرت انطي بيج رغم غلطانة
تبقين بنت اختي ومالج احد والماشاف واحد وراج يكسرج

_نيزك: ما انساها الك هاي اعتذر منك

_همام: ماتنعاد كولي بس

_ان شاءلله

همستها وحضنت ابني عيوني على الطريق وصلنا مرت خالي رحبت بينة نجوم استلمت الشغل واني رحت للغرفة كعدت ايدي على خدي كعدت مرت خالي تحجي علية بس اهز براسي شسوي تنحل وتبقى سوالف مثل ما كالت ويا روحي تفرفح على شوفتها  .

ثاني يوم من الصبح خالي طالع للدوام كعدت بالحديقة ساكتة مالي صوت وبهاي الحالة اتمنى افقد ذاكرتي وارتاح، نجمة تفتر اشوفها تروح منا وترجع منا بيدها موبايلها وتلم بكفشتها صاحت تدك رجلها بالكاع  .

_نجمة: يبوووو هسة شحجي شحجييي

اشرتلها بيدي ماانتبهت صحت باسمها اجت تركض لزمت بريك بالكاع شاخطة تتنفس بصوت عالي ايدها على خاصرتها والثانية لازمة بيها التليفون

_شبيج شكو

كعدت يمي مدت التليفون داخلة على محادثة انطتني اقرا اخذتة منها وفتحت عيوني على وسعها اقرا .

_فقار: ها نجوم ماكو ردي طمنيني

وين يلا رادة علية
_استاذ اسفة والله مامتجاهلة مثل ماكلت التليفون نسيتة بالبيت

مخلية سمولات تبجي
_فقار: والله تشلعين الگلب يانجوم

_نجمة: حرام عليك استاذ حررام

دازة سمولات كالبة عيونها راد بضحكة طويلة ومكمل المحادثة.

_فقار: نجوم لاتاخذين العطر من علي
_نجمة: يااا ليش؟؟

_عطرة خايس
_لا والله يخبل متت بية
_خايس كلش عطرة مو طيب
_استاذ ماعندك ذوق انت غير، عطرة يمووت تمووت

ماراد عليها بس قاري الكلام عكدت حاجبي وهي تحجي متفشلة تشرحلي  .

_شوفي شكد ثولة اني شرديت علية
انوب قراها ردت امسحهة بس تصخمت وتلطمت بعددد شكول هسة زعل

_عوفي الزعل شكو مراسلج

رجعت المحادثة بينهم من البداية وصلت للاتصال بالليل صاير لزمتها من زندها بقوة طاكة عيوني بوجهها  .

_نيزك: تحجين وياة بالليل متصلة بية!!!
لج انتي بعقلج رجال وبالليل تتصلين بية شكووو

بهتت ملامحها من ردة فعلي، رادت تحجي صحت بيها اجرجر بيها من طرف ردنها  .

_نيزك: وين عقلج نجووم وييين شنو هاي الميااانة شكد باقين تحجوون شكوو تحجين وي الرجال

سحبت روحها مني عيونها دمعت
_نجمة: والله علمود الشغل هيج مرات استفسر منه وتاخذني السوالف

_نيزك: طاح حظجج نجووم هذا اسلوب هذااا ذابة ميانة ماتستحين على روحج انتي  ؟؟ علي منو فقار منو يعودولنا نعرفهم غرربة ذولة غررربة

_نجمة: شبيج والله مامسوية شي هو غير اجاوبة

سحبت التليفون بقيت لازمتة بيدي ومن شفتها رادت تبجي لينت ملامحي ونبرة صوتي  .

_نيزك: لاتزعلين احجي لمصلحتج اني والله
اني ادري اسلوبج هذا بس مايصير تعاملين الكل هيج وماخذة ميانة وياهم بالبيت صيري شكل وياهم شكل ثاني يبقون هما زلم والناس تاخذ عليج نظرة بس يشوفون هيج علاقتج وياهم

_نجمة: مو هما نسابتي كلهم يعرفون

_منو نسابتج فقار مو نسيبج ولا علي بس قبس الج حق تحجين وياة بس

_هسة شسوي والله اسفة منج ومن استاذ فقار

_اعتذري من فقار وبعد غيري اسلوبج وتعاملج اتصرفي بثكل شخصيتج الطفولية انسيها

رفعت شفايفها تهز براسها سلمتتها التليفون دنكت عيونها تباوع بية رادت تكتب بس ماكدرت مدتة الي

_نجمة: هاج اعتذري منه بطريقة محترمة وكليلة بعد ما احجي وياك

غميت كصتي بحركة وصحت بيها
_ولج هي لو طكة لو اطلع مخة غيررر تشغلين عندة شلون ماتحجين وياة

_نجمة: والله حيرتيني احجي وياة تكليلي مايصير ما احجي هم مايصير

رفعت ايدي افهم بيها بهدوء
_ما كلت لاتحجين بس لاتذبين ميانة على كد الشغل احجي وياة لاياخذج الواهس زيادة

_فهمت فهمت

راحت تركض هزيت ايدي واضح فهمت المشكلة هاي طبيعتها واني اخاف عليها من طبيعتها هاي  .

_نجمة: طلعت للدوام وهالمرة غير مقهورة على متفشلة وخاصة من كلام نيزك والله حرت شلون اتصرف واحجي هسة كون اسجل بمعهد يعلم على الرد والكلام  .

فتحت الموبايل اباوع بصفحة الشركة اكو منشورات قديمة لاستاذ فقار وابوة اكثر شي وبعد هواي اشخاص بلبس رسمي واجتماعات واضح جان استاذ فقار موضف عادي او مسؤل على قسم وابوة هو المدير  .

ماحسيت بالوقت بسرعة وصلت انطيت التكسي فلوسة وصادفتني موظفة جديدة ابتسمتلها اجت يمي  .

_سما: صباح الخير

_صباح الخير عمري

مبين عليها تريد تحجي بس بقت ساكتة بنص الطريق كالت بضحكة:: اكلج صدك قبس نسيبج

_نجمة: نسيبي اي وتاج راسة اختي طبعاً طبعاً

_سما: وهما وظفوج هنا لان نسابتج؟؟

_لايمعودة بالبداية اجيت هنا بعدين شائت الصدف والاقدار ان ننجمع في مكان اخر

_هاا

_اي اي

_اكلج بعد سؤال واحد

_اسئلي

_علي احمم

باوعتلها مقلصة عيوني بشك كلتلها:: شبية علي شو صارت بيها احم

تقربت علية تهمسلي وعيونها تروح منا ومنا
_سما: معجبة بية شلون اتزوجة

لطمت خدي اهمسلها:: من الاعجاب طفرتي للزواج شبيج مدكليلي هسة كولي اسوي علاقة بية بيها مجال

_مو حبيتة دخل كلبي

_والله الصراحة هو يدخل الگلب شكلج

_هسة انتي عوفية رادلج واحد لسانة طويل سولفيلي يحبلة وحدة مرتبط

_لا هذا محترم مايدور علاقات اذا عجبتة بنية يخطبها

_اويلييييي فدوة ياربي فدوووة هيج ويكلي راح اجيب اهلي واجي اخطبج

_ها هو مايحجي

_اي اعرف المهم نتزوج شنو اسوي بصوتة

_اتفق وياج بس اكلج هو عندة بنات عم هواي وكلهن صاكات للنخاع خو وردة تفلش وحبابة يمكن تحبة وبعد ذني جديدات اجن بيتهم بعد مادري دبري روحج

_سما: مو خوش خبر هبطتي معنوياتي والله

_هسة مو زين حتى اسرارهم فضحتها الج دروحي نشفتي ريكي

صعدنا سوى راحت تركض لمكانها الممر فارغ هسة لو اني ركضت جان طلعلي وين الثكيل بس هي حظوظ خل امشي احسلي ماعندي حظ اني  .

وصلت للمكتب عدلت ملابسي وباوعت بوجهي بالمراية والله اخبل هسة اذا تشوفني الناس مخبلة من جمالي تخبلت طبعاً دكيت الباب ودخلت ريحة الكهوة كفختني دورت بعيونة لاستاذ فقار ماكو بمكتبة شفتة واكف بصف مكينة الكهوة بيدة كوب

_صباح الخير استاذ

وهو بمكانة حتى ما التفت علية كال
_صباح النور

هذا شبية ديلا شعلية خليت غراضي وعدلت اسمي كعدت واخذت كلنس اللمع بية ابتسمت وفتحت الحاسبة طلعت علبة الككو اخذت وحدة وبديت اشتغل  .

رفعت راسي خلة كوب كهوة على مكتبي اباوع بوجهة ملامحة جامدة يباوعلي واكف بمكانة يمكن منتظرني احجي  تحمحمت وكتلة  .

_شبيج استاذ ترة اعتذرت منك وكتلك ما اقصد اعيب على ذوقك

هز راسة وبقة على وضعة شبكت ادية من التوتر ومن نظراتة حسيت وجهي اشتعل نارر  .

_استاذ عليك الله لاتزعل علية ماقصد اسفة

خلة ادية على المكتب منا ومنا رجعت ليورة شنو حتى عطرة اجة بخشمي بهدوء وبصوت ناصي كال

_فقار: لاتاخذين العطر من علي
_ليش
_مال ولد بس مايصير تخلية البنات

_هو مختلط استاذ عادي للنساء والرجال
_تؤ بس رجال لاتخلين منه
_مو خطية اشتراة الي
_اجيبلج غيرة
_لا ماريد خطية علي هسة شيكول علية

كمزت من ضرب ايدة على المكتب
ابتعد يهز بيدة كمت من مكاني التفت علية صاير عصبي راد يحجي سبقتة وحجيت.

_استاذ بس اخذة ما اخلي منه ها؟

مسح وجهة يهز راسة
_فقار: طبعاً انتي بس تحركين الگلب
_اسفة بعد اسكت حتى ما احجي

اشر على الكوب وذب حسرة
_اشربي كهوتج بردت

رجع لمكتبة بعد ماشفت وجهة شو انقهرت علية عبالك مسويتلة شي ومادري بروحي كعدت وسحبت كوب الكهوة شربت منه ومديت راسي بس اريد اشوفة ماشفتة ركبتي كصيرة ماتوصل من مكاني كتلة 

_استاذ عاشت ايدك خوش تسوي كهوة

_فقار: بالعافيه بابا

_الله يعافيك استاذ ولاتضوج الدنيا ماتسوى

مارد علية دنكت اكمل بشغلي متت من الكعدة بس خلصت كمت امط بادية رحت يمة انكسر كلبي علية خطية يعتب حتى كومة مايكوم رفع راسة  .

_استاذ راح اطلع بس اذا تريد اساعدك

_فقار: ماعندي شي روحي يم البنات

_بكيفك بس انت هم خطية هواي تشتغل خلي قبس يشتغل اشمر علية شغلك

_والله نسيب صار راح اتعبة الج

_نجمة: استاذ اني مو حقيرة بس هو يكلي من اصير مدير افصلج وخل فقار يفيدج خو تتذكر من بديت الدوام شلون طردني

_فقار: يولي الا اخليج بمكانة واجلطة

_كرررريم كررريم لو كل المدراء نفسك لو تعزل الشركات

ضحك واني طلعت اضحك صدك فرحني بكلامة قابل نفس قبس بس يغث يععع لاكاني هو سمار
جانو يسولفون سمار يداوم رغم الجراح والالم لاجذب بس رجلة فتحها من ذاتة يكول طابت مرات من يمشي انتبهلة  مايحطها بالكاع  وايدة ملفوفة بعدها  من اجيت سكتو يخزر بية بعيونة عود يخوفني مو اني شهب الخوافة رجعتلة الخزرة   .

_سمار: تدري بنظرتك تهجم بيوت
دخيلك لاتباوع كاعد ايجاار
كولي الله

ضحكت اكلة
_الله

_سمار: عليج الله مو ارهم اصير شاعر؟
_نجمة: اي والله شعرك حلو

خلة ايدة بشعرة يرمش بعيونة
_شكراً شكراً بعد ما ازينة

_نجمة: لا اقصد الشعرر التكولة

_سمار: عمري خلصتة القي اشعار محد كلي الله بس انتي الله اوكفي اسمعج بعد واحد

_قبس: هسة انت ماتنجب وانتي ماتمشين

_نجمة: خل يكمل مايصير امشي واعوفة

_سمار: حرامات انطيتوة مرة اني شعر ما انطية
مايستاهل

خزرة قبس ابتعد عنة يباوعلي
سمار:اسمعي اسمعي هذا جديد صرت خلفة بغيابك البخ جروح بس جرحك جبير يحتاج خباطة

_نجمة: الله

_وصليها للفتاة المتكبرة

_قبس: حتى تتفل بوجهة خاف ماتباوع بية ماتسكت انت ادور على اشعار خايسة مثل حالك هسة احفظ شعر براسة حظ مو مخلص وقتك تحفظ هيج اشعار

هز ايدة مشة يصيح
_سمار: عمي اني اكتب ما احفظ ولا اجيبهن من النت شبيكممم ولايكولون واحد موهوب

رحت امشي سريع شو هذا قبس يريد يكتلتي هم ناقصة ان شاءلله رحت يم البنات والله متونسات يشتغلن ويسولفن ضحكهن وين واصل احسن من ذنيج الحاقدات ذني مسويات جو والله استاذ فقار خوش سوى من غيرهن  .

كلنا نزلنة جوة طلبن اكل وكعدن يكصن بالموظفين روان راحت للحمامات رجعت لاكاها استاذ حسن بقت تسولف وياة نزل الاكل على السريع اكلت وهنا يسولفن وراي شغل يابو شغل عيب من الرجال ما اكملة اجة سمار باوعلنة يهز براسة  .

_سمار: هاي الخيانة بعينها تاكلن ولاذكرتني بلفة شكد فكورة

_بنان: جنك على اكل يا لفات هسة اطلبلك مينيو كامل

_سمار: كرريمة بت كريم يروحلج فدوة قبس
اكلج ماتعزميني على باجة

_بنان: حدد يوم وبعيوني

_سمار: دطلبي اكل عوفي الباجة اني اعزمج عود

_بنان: عيععع اني ما اكلها بس الك

_سمار: عيارة ولي

هز ايدة وراح صاحت وراة
_: والاكل طلبتلك

_سمار: اكلية انتي رايح اكل باجة

عيونها بقت علية الى ان ابتعد ذبت نفس وخلت راسها على كتف سما ضربتها تكلها:: شبيج

_بنان:قياساتي

اللكمة بحلكي اريد اسالها شنو يعني قياساتها بس من نزل استاذ فقار سكتت اول ما ابتعد صعدت اكمل الشغل كلشي ولا الشغل مرت فترة طويلة انفتح الباب رفعت راسي عبالي استاذ فقار رجع بس طلع ضيغم سلم ودخل  اسمعة يدور بغراض استاذ فقار وكف مسافة عن مكتبي بيدة ملفات يكلب بيهن حك طرف كصتة ورفع عيونة يحاجيني

_ضيغم: اكلج نجمة اختج شلونها

_نيزك زينة

_لا الثانية
_يمكم هي ماشايفتها والله
_اقصد الموشومة

صفنت بوجهة حرت شكلة وين مانعرف اخبارها
بلعت ريكي ودنكت عيوني  .

_بصراحة ماعرف اخبارها كلت اروحلها بهلكم يوم بس وقت ماكو

_هي بعدها يم دراهم؟
_ااي
_تمام

طلع ومن لحظتها كتلني القهر والتفكير بيها شغل عقلي يا علي شكد مشتاقتلها ومشتاقة لسوالفها وحنيتها خلصت شغل واتصلت بنيزك ابلغها  .

_نجمة: اكلج رايحة اشوف كواكب

_نيزك: تعالي هسة تاخر الوقت على باجر نروح سوى

_نجمة: حتى انتي ترحين؟
_نيزك: اروح اطيح حظهاااا

كل الكلام الكالتة نيزك ماصدكتة مامعقولة كواكب ماتريدنة والله لو اسمع كلامها بذني ما اصدكها هي غير تموت علينا  .

رجعت متاخرة لكيت نيزك وجهها مايكصة السيف اذا انفخ عليها تنفجر ذبيت غراضي ورحت اسالها

_شبيج ضرغام اجة محاجيج

_نيزك: اشتعلت رروح ضررغام واشتعل سالم الك***

_شبيج شنو صار؟؟

_ماكو شي بس هالكلبة بنت الكلب دازة امها الي حتى تحاجيني

كامت مفرفحة تفرفح من الحركة لحكتها اركض وراها:: ام مرتة ياا يااة شتريد منج  ؟

_تبيع براسي مثاليات من انعل ابوهن على هيج تربية سكط هسة صارن شريفات واني المو شريفة
اااخ لو ما مرة جبيرة جان سحلتهااا

دخلت جوة صايرة نار سالت مرة خالي كالتلي
_تكلها حرام عليج تخلينة يطلكها وهي حامل اذا مافكرتي بيها جان فكرتي بالطفل شنو ذنبة يتدمر مستقبلة بسبب انانيتج

_نجمة: لا والله

_كلتلها اختج الماكدرها يغص بيها يعترف بيها مايعترف مايخصني بيكم وهم تعاركت وياها سحلتها منا الجيران ذيج السانها مدري شلونه وهاي ماتسكت

_نجمة: حرامات لو كاتلتها

_انتي هم مدري شلونج صايرة

_هاي الناس مو مال احترام يولن

لليل نيزك على طنكورتها اتصلت شهب فتحت كاميرا مخلية راسي بحضن نيزك تلعب بشعري واموري يلعب بتليفونها نايم على رجلها  .

_نجمة: ها فاهية شلونج

_شهب: هلو نجوم انتن شلونجن

_زينين

_شهب: نيزك شلونج؟اموري حبيبي

سمع صوتها شمر تليفونة واخذ التليفون من ايدي يضحك ويحجي وياها غير يخلصون ماكو يسولف يسولف ماعرف عليمن طالع هيج يحب السوالف
اخذتة منه احاجيها  .

_اي شكو ماكو البيت شلونة

_شهب: ماكو شي بس ضرغام مريض

كمت كعدت على حيلي اباوع لنيزك كلبت عيونها عود مامهتمة  .

_نجمة: شبية ضرغام؟
_شهب: والله كلش مريض هسة الولد يمة حتى مايحجي يصيح راسي

_نجمة: خاف ضغطة ارتفع

_شهب: لا ولج ضيغم كلشوية يقيسة مابية شي بس هو ماعرف شبية حتى ماطلع من الغرفة ولاياكل يكول تلعب روحي

_سلامتة مايستاهل

_شهب: يلا نازلة اشوفهم مادام الولد ذولاك ماموجودين

سديت التليفون ورجعت لحضن نيزك رفعت عيوني لوجهها:: انقهرتي علية؟

_نيزك: ضرغام زين لحد الان ما اذاني لو ماهاي السالفة الطلعت احنا فوك التمام

_ها يعني انقهرتي؟

_شبيج نجمة

_عليج هاي تمرض مبين

سكت ماحاجتني اجة اموري بيدة التليفون يكلي
_امير: نزمة هل نسوف الفلم اني وسهب نتابعة سنا

_سنا لو شيعة ههههههههههه

خزرني صفح هاي العالم كلها تخوزر اخذت التليفون طلعت الفلم وكعدنا نتابعة هو شهب مايطلع وراها شي زين، اباوع لنيزك تحوس الشغل كلة كملتة راحت سبحت واجت تشرب بعلاجها

امير نام خليتة على فراشة وغطيتة طفيت التليفون اخذتة تضرب بية ايدها بتوتر تمددت اباوعلها نظراتها كلها حيرة كالت بتردد  .

_نيزك: اكلج اخابرة  ؟

_خابرية خطية
_لا مو خطية هسة نام يمكن
_هسة شبيج هو اتصال شبيج اوووي هاي لو اني رحتلة اركض حافي حتى ما اصعد سيارة من الخوف علية

_اشوف اخرتج وين تصير بهاي تصرفاتج
_دولي هو اليحب مايحقد ويدوس على كلشي عود انتي هم تحبين امداني

_نجمة اسكتي لا اجي اخنكج تحجي بالحب الزعطوطة

هزيت ايدي وسكتت هذا هم حضي اجت كعدت يمي يرن التليفون مايرد احسها راح تفلشة من العصبية هواي اتصلت تالي شمرتة تصيح.

_نيزك: هم صوجي اتصل اطلع قندرة اذا اسمع كلامج

_هسة يمكن نايم مو كالت تعبان كلش

كطعت كلامي من رن سحبتة وباوعتلي والله عيونها يخوفن فتحت الخط والمكبر وبرود كالت

_الو

اجانة صوتة تعبان كوة ينسمع
_ضرغام:: ام عيون الطاكة

_شلونك  ؟
_مريض تعبان
_اخذ علاج
_اخذت علاج وداعتج مايفيد علاجي شوفت عيونج

بلعت ريك تباوعلي جنها راح تكول جلبت بيها اهمسلها:: خل اسمع حبابة

همزين بقت عاد اسمع سوالف العشاق الجفاف طكني  .

_ضرغام: افتحي كاميرا اشوفج فدوه

فتحت ورفعتة بس وجههة يشوفة رجعت كذلتة ورة اذنها وصوت حسراتة وصلني بقو ساكتين ثنينهم واحد يباوع بوجهة الثاني  .

_ضرغام: مشتاق نيزك راح اموت عليج
_مو بعيدة تجي من تنحل الامور وترضيني

_رايدج هسة يمي

وجههة صار احمرر تدير بعيونها منا ومنا ضحك يكلها:: اباوع بعيونج اني رجال مابية حيل لعنادج

_نيزك: اي صح صح

_ضرغام: جنت مفكر نكعد بيتنا. وحدنا صرنا كل واحد بيت اجيج نيزك هسة

_مو مريض انت  !! تجي شكو تجي بليل؟
_اصير زين بس اشوف اموري اريد ابوس  اشتاقيتلة

_نايم هسة

_عادي الكاعد ابوسة

ضميت وجهي بالفراش ارفس برجليني متت ضحك يمة نظراتها تموت الله يساعدة عليها شكد مستفزة وهو ميت باستفزازها طلعت بس عيوني اشوفها شمرت التليفون بعيد لو ما الكاع مفروشة جان تفلش اختفت ضحكتي وسالتها بخوف صارت ترجف  .

_شكو شحجة وياج مو قبل شوية غزل وحب

_نيزك: اجتتتة بت الكلب

عضت اصبعها بقوة سحبت ايدها راح اصبعها ضربت على رجلها تحجي بحركة وتتوعد  .

_نيزك: اذا ماخليتة يحلممم حلم بينة ما اتسمى نيزك

وجههة صار احمر خفت عليها يصير بيها شي كوة سحلتها للحمام غسلت وجهها انطيتها مي بارد شربت لزمت ايدها خايفة عليها  .

_فدوه نيزك لاتحتركين والله مو زين عليج احنا كلنا نتمرض لو يصير بيج شي فكري بينة بابنج

_نيزك: لا هاي عليمن احترك شعلية بية هاهي انتهت

راحت لفراشها التليفون يضوي رفعتة هو يتصل رفعتة الها:: اكلج جاي يتصل

_خاف ما انكسر اكسره وروح ابوي اخذية مني

لفت راسها وبقة التليفون محترك بالاتصالات اتصال يركع اتصال وهاي لو للصبح يبقة يتصل ماتجاوب اخذتة وطلعت برا ماينطيني كلبي انقهرت علية فتحت الخط.

_ضرغام: شبيج نيزك شبيج والقرآن طردتها هي هيج تحجي عمداً لا داز عليها ولا رايد شوفتها وداعت عيونج

_نجمة: نيزك ماتقبل تحجي وياك اني نجمة لاتتصل ضرغام بعد ماتجاوب لو شيصير

_فدوه فهميها

_حتى تركعني بالحايط اني والتليفون

_لاتتعصب فدوه لاتخلينها لاتطيح بالليل

_لا هديتها هي كالت يطبة مرض بعد اني مالي دخل بية

رفعت عيوني استوعب كلامي رفست رجلي بلكاع هسة لو بيدي املخ روحي بفشلة كتلة  .

_لا مو هيج كالت هاي، من يمي مال طبك مرض هي كالت مايهمني بس يلا مع السلامه احلام شنيعة هنيئة هنيئة

طفيتة حتى ماسمعت صوتة خطيه خليتة على الشحن وشربت دولكة مي من الفشلة رجعتلها سحبت الغطا ودخلت بحضنها دحست روحي

_بدال ضرغام اليوم ولو هو بكدي خمس مرات
_نيزك: انجبي

_ديلا عود ماتقبل واحد يحجي علية شلون نسوان ماتعرف ويامن وعليمن
_اني اكول تنامين لا ادفرج
_نايمة

غمضت عيوني وثكلت انفاسي احس بيدها تلعب بشعري ودموعها حارة نزلت على وجهي همست بنعاس:: لاتبجين محد يستاهل دموعج

_نيزك: اتذكرت اليسوون البجي جانت كواكب تنام بحضني احسها بنتي والله

_واني جنت اتمنى انام بحضنجن
_روحي مكسورة عليها كسرات الناس ما احسبها وي كسرتها باجر الصبح اروحلها بس اشوفها

_واني هم مشتاقتلها اروح وياج وبعد لاتبجين فدوه

_نيزك: انتظرت الصبح ساعة ساعة كعدت وي الفجر صليت بعد مانمت سويت ريوك كعد خالي يتريك  .

_همام: تعالي خالي تريكي وياي
_ما اشتهي بالعافية اكل

_خالي لاتضوجين هي فترة ان شاءلله وترجعين معززة مكرمة اكيد ضرغام راح يجي ياخذج ويشوف حل وي مرتة

_خالي عوفك من ضرغام اريد احجي باختي كواكب اليوم اروح اشوفها

_ماترحين وحدج هاي انسيها تتنتظريني من اجي اخذج

_مو تتاخر اريد اروح هسة هم يلة
_لا ما اتاخر الضهر اخذج

هزيت راسي ساكتة ماريد اجادلة هو بس النة بهلدنيا تريك وطلع وكلعادة نجوم تكعد من النوم تركض تتاخر وتخبصنا بدلت على السريع وطلعت

كعد امير سويت ريوك للجهال كعد وياهم يتريك للضهر اني اسوي بغدا اندك الباب راحت مرة خالي تفتحة طولت مارجعت طلعت اشوف وين راحت ريتني ماطلعت شفت مرة خالي جاية شافتني فتحت عيونها مامصدكة شوفتي شجابها النة رفعت ايدها تصيح من بعيد  .

_هاي منو هااي المخبلة هااي اليوم لافية الديرررة

دخلت جوة شلت السجينة من السلك طلعت ارتجيت على الباب وهي بيدي اشرتلها وبرود وصوت مسموع كتلها  .

_ها خير ان شاءلله مخبلة شتردين منها
لو لحكتن المخبل على خبالة

باوعت للسجينة وكالت
_ولايصير براسج حظ رجلج شمرج اي وين اكو واحد ياخذ مخبلة عرف حقيقتج وشمرج هالشمرة حتى ماطلع فلوس العرس

طلعتلها مرت خالي همام دفعتها تكلها
_صوتج منا الناس

طلعت تذب بكلامها المسموم متعودة عليها بس يحترك كلبي شمسويتلها وهيج تكرهني وحاقدة علية مو بس هي كلهن بس مرت همام الله هاديها علينة  .

اجت تعتذر مني على كلامها ضحكت على الاختلافيات الموجودة بالكون،، هي خطية هم مريضة ماخليتها تشتغل حتى جهالها اني الهم وهما ابد ما يتعبون يجوعون يطلعون وياكلون جهزت الغدا الجهال اكلو بقينا ننتظر خالي واكفة بالمطبخ اسوي حلاوة الهي بيها روحي بين مايخلص الوقت واروح لكواكب سمعت طبة قوووية عبالك واحد طفر من الباب نصيت الطباخ وطلعت شهكت بخوف طفر وفتح الباب الهم دخلو  .

ولد سالم ثنينهم ولد عمهم تلاثة ركضو علية قبل لايوصلوني انسحلت روحي ماكدرت اتحرك صرخت وسراج سحلني من شعري يصيح 

_نزلتن روسنا وسمعتنا صارت بالكاع من وراجن وانتن هنا عايشات ومرتاحات العالم تعاير بينة مو زلم صرنا من وررراجن عااارجن نغسلة

ضرب راسي بقوة بالحايط يفلش بية تفلش والضربات ماعرف منين تجيني واحد يشمرني على الثاني ضربة اقوى من ضربة مرت خالي لمت الجوارين وناس تسحل بية منا ومنا حسيت نفسي صرت نصين تملخ جسمي بديهم  .

وبصوت عاااااالي صاح سامر اعرف صوتة وقبل لا افقد الوعي سمعتة كال:: اطلعووو اجة اجةةةة غدرررنا يووووسف ال****

***

شهب..

الدنيا عصر كاعدين بالحديقة اني والبنات وبيبي ذهب تحجي على حفصة وجناينها مسوين صينية جاي وكعك اجة فرقد طردتة  .

_ذهب: ماريد شكولكم عوفوني متونسة وي ذني الحلوات غاد مني غاد

_فرقد: شبيج يمة

_ذهب: وكون غمة التغمك يا اغم يمة كال يمة غاد عني غاد

راح خطية لحكتة جوري تصبلة جاي كمت وراها والتفتت بكل جسمي دخل ضرغام يرركض للبيت طلع شايل بيدة رشاشة وحزام الطلق وراة يسحل
ركض يصيح اليوم احرك المنطقة على روسهم

بقت وحدة تسال بالثانية مصدومين وامة هبطت كلنا هبطنا دخلو قبس وضيغم يركضون وعلي وراهم طلعو بيدهم اسحلة يركضون ياسمين جلبت بضيغم تسالة الصار باستعجال جاوبها والرشاشة بيدة  .

_ضيغم: ضرغام راح يدكهم وحدة الاغم ما كايل الواحد من عدنا

ضربت على صدرها تكلة:: منو ذولة شصاير ولك

_ضيغم: يمة كتلو مرتة

كالها وراح يركض رمشت بعيوني كلهن اندارن يباوعلي كلبت عيوني وطحت من طولي مادريت بشي كعدت لكيت روحي بغرفة ذهب طلعت دنيا ليل وهاجر تخابر بواحد من الولد فاتحة المكبر كلها مجتمعة تسمع وياها   .

_تسودن ضرغام شبية كافي خل يفكها شيفيد الرمي

_فقار: يارمي هو ضل بيت احترك وراح شسوووويلة احط طلقة براسة واخلص يخلص مخزن يشكل الثاني تخببل وذولة وياة تعبو وخلص فشگهم (طلق) وهو بعدة نايم على الشواجير

صوت الرمي قوي يصلي صلي صاح بصوت عالي اجت الشررررطة والكممم زمايل غيرر ضباط اجووو مايتفاهموون

انكطع الاتصال والخوف والقلق موتنا اريد انطق واسال على، اختي لساني انبلع سحبتني جوري غسلت وجهي تكلي  .

_زينة اختج والله زينة

ماكدرت حتى احجي كعدت بس عيوني ترمش
شهكت ونزلت دموعي، من شفتة دخل عيونة دورتني طفرت من مكاني وركضت اله فتحلي حضنة شمرت روحي لفني لف بجيت بصوت عالي ارجف رفع راسي يبوس بية ويمسح بوجهي يفهمني  .

_ماكو شي وداعتج

شفتي ترجف اريد احجي ماكدر باسني بخدي وصاح بالبنات:: بسرعة صايتها وجواريب وحذاتها وياجن

ريحة البارود تارستة ترس حسيت كلبي يريد يوكف من الخوف ضيغم تراااب كل ملابسة وفقار يدفع بـ علي اي سلاح مابيدهم بس ريحة البارود وشكلهم منتهي  .

_فقار: تنحل بالرررمي هييي انحلت شصااار زماايل انتو زماايل فوك ماهووو مخبل تخبلونة بالزايد
هسة شنو استفاديتو بس شعلتو الجو والعالم متاذية من وراكم

شرد منه علي اجة صاير نار عكسهم ضرب ضيغم على ضهرة يصيح بية:: هذا انت العااقل عود تخبلت شبيك تخبلت وترمي

_ضيغم: دعوفني انت راجع بس علية

اخذني قبس على صفحة اخذ الصاية من وردة لبسني انطاني الجواريب ماكدرت البسهن هزيت راسي لا بس اريد اطلع وهذا ماعرف شلون يفكر دنك لبسني وعدل شالي  .

هسة يلا انتبهت بيبي ذهب وسهلة ماموجودات لكيتهنن قبلنا ونجوم منتهية ونيزك حالتة تخوف ماخلوني اشوفها من بعيد واولهم نجمة تصرخ بية متخبلة وشكلها من البجي ماتبين بية ملامح   .

_نجمة: مايبين بيها شي زراك بزراك موتوها موتوها

اسبوعين مر يلا صارت احسن وطلع صوتها عشنا بقهر وعذاب نفسي راسها كلش متاذي وركبتها صاير بيها انزلاق الفقرة متاذية مال ضهرها  .

وضرغام يحير بيها مادري يحير يقدم شكاوي ويدور عليهم كلهم شردو ضاعت اخبارهم والبيت احترك وانتهى بعد لايكعدون بية ولايوصلونة هما وشكو واحد جان وياهم  نسوانهم بصفحة وهما بصفحة بس يوسف موجود
محد تقرب صوبة هو المخابر ضرغام اول ماطلعو لبيت خالي يكلة ماكدرت امنعهم  .

اليوم بليل يصادف اول يوم رمضان غسلن البيت والترتيبات والمسواك كلها تحضر طلعت من نيزك اشوف امير اجت سندس جانت بالسوك بس دخلت فارغة تلكتها اسيل اشوفها تحجي وياها وانطتها علاكة اخذتها وراحت وراها، دعاء هالفترة ورة ود تمشي تلعب بيها ومكابلتها وكاعدة احس ود بدت تميل الها  .

الضهر على الغدا كلهم التمو بس نيزك وهاي من طلعت ولليوم ماتكعد يمهم جنت يمها اقنع بيها تكوم تاكل ماتحاجيني رفعت عيونها الي ذبلانة كالت بتعب وبغصة  .

_نيزك: اريد اشوف كواكب خالي يكول رحت بس ما لكيتها كالولة عدها شغل

نزلت دموعها اختنكت ماكدرت تكمل شهكت تبجي لزمت كلبها لزمتها ارفع براسها حتى تتنفس وامسح على ضهرها كملت بقهر  .

_نيزك: وصلها خبري بس ما اجتني ما اجت شافتني واني بهذا حالي

ماكدرت حتى احجي واتمنى هسة اروحلها احجي وياها ليش هيج تسوي وليش ماتريدنا  !!

بقيت يمها ماكمت صرت انغث يذبن كلام واسيل نظراتها كلش تغثني اني ماعرف ليش ضرغام لحد الان ماطلكها وهو اليوم الطلعت بية نيزك خبص البيت علينا كالتلة بس اليوم ابقى على ماتجي امي بالزيارة مو هنا بس تجي تاخذني ثاني يوم بعد ماشال راسة وهسة ساكت عنها وكلها ساكتة عنها

اجة ضرغام بيدة صينية خلاها على صفحة ورفع نيزك يعصر، بوجهها:: كومي اكلي كومي

_نيزك: ما اشتهي اكل انت

_ضرغام: مو هي بمزاجج ان شاءلله اكعدي عدل لا اهفج راجدي اعدل ملامحج

ضحكت بقهر تهز بيدها
_نيزك: وين ضلت عندي ملامح

رفع اصبعة بوعيد يكللها
_وداعت عيونج اسويهم نثاية بس يطيحون بيدي

يسويلها لفات وغصباً عنها يوكلها عفتهم وطلعت قبس مو هنا صعدت لغرفتي اسمع الهوسة بس ما اطلع مالي خلك اجن البنات يمي منتظرات النتائج وريا ورفيف يحسبن بدرجاتهن  .

_ريا: يعني اني انجح مجاوبة مجاوبة
_رفيف: ننجح ان شاءلله حتى لو بس نجاح

_وردة: اذا انتن تنجحن نجاح اني بالدفرات انجح غير كلة سج تسجن ميااات ميااات قابل مثل حضي

_ريا: منين ميات ستينات زين اذا طلع

اخذت اختها وطلعن وردة تصيح وراهن
_اطردن عيووون اطرردن سوالف سنيدس هااي

شمرت روحها على الجرباية تلف بشعرها وتفكر بصوت:: بلكت انجح حتى لو نجاح اوووف هنيال نجمة ماتدرس ولاتفكر بنتيجة

_شهب: غير كملت وطاح حظ حظها

_ورد: اهو دولن اني ماحسد

عافتني ونزلت رحت وراها لكيت عمامهم موجودين  كلش استحي منهم ابتعدت اسمع سندس تسولف
وي ابو حسن  .

_واشوفلك حسين ومحسن وي ذاك ابو الهورنات سيارتة تلصف مراهق موكف شعرة والاغاني عالكينها والسرعة السرعة مووت مووت هسة تنكلب بيهم السيارة لاتحصلهم والناس تروح بيها مدري هذا يكبسل شكلة يكبسل هسة يعلمهم على هاي السوالف

يبس حلكها شربت ماي دكلةة:: اني من خوفي عليهم اجي اكلك

كام من مكانة متحلف بيهم كلها
_لا هاي هي خوش من اجيتي كلتيتي عليهم

طلع مبين يدورهم امهم ماقبلت وكلتلها
_نضال: هسة المن كلتيلة ماتدرين بية مايرحمهم

_حفصة: تردينهم يسيبون الا يكبسلون يلا ترتاحين فوك ماتكلكم

_سندس: يكول ولا احبهم ولا ولد اخوتي غير اخاف عليهم

جنت بالمطبخ اساعد بعمتي هاجر اليوم نفسيتها طيبة وتشتغل اجن بناتها راحت تلكتهن سلمت عليهن شوية واجو الولد سلمو عليهن وفقار دنك يسلم على الجهال واحد واحد مبين شكد يحبونة راحو ركضو جابو نتائجهم يراوون اخوالهم وماقصرو الاول ينطونة خمسة وعشرين والثاني نصها وماشاء الله نتائجهم كلها عشرات والكبار درجات زينة  .

صعد قبس رحت وراة سديت الباب لكيتة يبدل راح يدور بملابسة منطيني ضهرة يكلي..

_بيج شي اليوم
_هئ

كعدت على الجرباية ابرم بكذلتي ماعرف منين تعلمت هاي الحركة ذب حسرة رفعت عيوني اله

_اسبح واجيج لاتسوين هيج حركات

هسة اني شمسوية شبية هذا طلع وين يلا خلص تعديلات ورشرشة عطور وكفت يمة خلة عطر بيدة يريد يخلي لركبتي منا ومنا بلحظة الاخيرة رفع ادية مسحهن بملابسة  .

_ليش ماخليتلي عطر
_احب عطرج

خل راسة بركبتي يشتم ويبوس عصر شفتي بيدة وباسها بقة عاصر، وجهي بيدة يكلي  .

_اكو شي مضوجج كولي بدون جذب
_ماكو شي هيج

دنك يبوس بركبتي ويعيد بالسؤال جلبت بية بقوة اكلة:: بس ضجت من شفت البنات ينتظرن النتائج

رفع راسة عدل شعري بيدة
_قبس: تردين تدرسين؟
_بنفسي
_اقدملج خارجي السنة التجي اذا تردين

توسعت عيوني بفرح مامصدكة
_عليك الله صدك عادي ارجع ادرس؟؟؟؟
_اكيد عادي اذا تردين من باجر اجيبلج كتب

ضحكت احس كلبي يريد يطير، من الفرح حضنتة رفع راسي بيدة مثبتة رفعت روحي ابوس بوجهة حتى نفسة ضاع ابتعدت عنة من سمعت صريخ جوة سبهم وعدل روحة بالمراية طلع لبست شالي من فوك مديت راسي اشوف محسن وحسين ابوهم يضربهم موتهم بالحزام بذاك الغلط عليهم والرزايل خلفلة على فقار فكاهم منه يصيح بية

_فقار: شباب تتعامل وياهم بهلطريقة تخسرهم وبدال ماتفهمهم تسودنهم وتنفرهم منك

اشرلي قبس، ادخل جوة دخلت اتحسب وادعي على سندس كلة من وراها  صعد قبس يهز بيدة يريد ينام جعصني جعص يلا نام بس غفى نزلت جوة على كيف طلعت لايفز بية  .

عمتي هي والبنات يسولفن كاعدات صاحلي كعدت يمهن يسالن بية  .

_ماصار عندج شي؟

_شهب: لا
_شعجب مارحتي لدكتورة
_شهب: ماعرف هو ماكال
_االرجال مايكول ولايسولف بهيج مواضيع هاي سوالف نسوان غير انتي تفتحين مواضيع وياة عن الاطفال طبعاً مو كل الزلم اكيد

_شهب: والله ماعرف
_منا وهيج راجعي وكليلة

هزيت راسي وكمت وياهن اساعدهن كلش لطيفات يسولفن على امهن ويشكن من عيالهن تحجي عليهن وتنصحهن تمنيت امي عايشة هسة وهيج نجي نسولفلها طلعت للصالة ضيغم كاعد وردة تفرك بضهرة ورضا بحضنة يبوس بية يسولف علية

_ضيغم: خو ما تطلع بالشارع
_رضا: لاع لاع
_ورد: جذاب يطلع واركض وراة
_ضيغم: وانتي شكو تطلعين وراة

خزرها سكتت تمتمت ورضا يكلة
_تسوف الولد دكول هلوين ااالله

طفرت علية تعض بية وتصيح:: شوكت الجذاب شوووكت يمااا شوف شيكوول

طلعة ضيغم منه حماة وراة وجهها صار احمر تحلف يمينات هو يجذب اخذ رضا يحجي علية وهي تتوعدلة  .

_الخايس الزمك ابو خيسسة
_رضا: الجدابة تكولين الله هلووين الولد

ضيغم سد حلكة وصعد بية يكلة عيب راحت وراهم تركض ضحكت وياهم واستمتعت بجمعتهم هاي
صعدت لغرفتي نيزك يمها ضرغام لاهي المنطيتة وجهة ولا مخلية المرة تباوعلة بس يجي يدنك راسة ويدخل لغرفتها والكاتلني ليش ساكتين حتى اختي ساكتة ماتجيب طاريها ماعرف يمكن لان  البنية ماتحجي خانسة هالفترة خايفة من هاي خنستها  .

قبس نايم بسابع نومة كعدت يمة اباوع بوجهة وابتسم شكد احبة دنكت بهدوء ابوس بوجهة ورافع شعرة الاشقر اتاملة وابتسم شلت ايدة خليت راسي عليها والثانية خليتها فوكي غمتت راسي بصدرة ضب ادية علية ابتسمت وحسيت بية جان كاعد بس يسوي روحي مايحس  .

كعدت شبعانة نوم صوت الطوبة بذني رفعت روحي لكيتة كاعد مربع والايباد بحضنة مركز بية يباوع طوبة مديت راسي شفت شوية وابتعدت
كمزت من شمر الايباد وطفر ضايج ويصيح بعصبية  .

_قبس: ولايعرفون يلعبون سمار يلعب احسن منهم
_شبيك عصبي
_ولد النعال حركو كلبييي
_هي طوبة عوفهم خل ننزل ناكل تراني جوعانة كلش

_يلا ننزل نسوي اكل

البيت صنطة كل واحد بغرفتة وكو اجتماعات ثانوية داخل الغرف دخلنا بهدوء حسين ومحسن جانو يحجون وحدهم ويتوعدون  .

_حسين: وجهة الجوبلس اذا ما اخلبها فلا اتسمى حسين وانت محسن

_محسن: موحسن اني اي عزيزي اتفق وياك اني هم اريد اخلبها

_ هسة على اتفاقنا باجر ان شاءلله

_قبس: يا اتفاق هذا

االتفتو متوترين واحد يباوع بوجهة الثاني
_حسين: يا اتفاق هذا شبيك اختي شلونج

_قبس: منين صارت اختك ابن النعال دروح
_حسين: اختي وتاج راسك هم

طلعو غمهم بثنين ادية ضحكت بالكتمان وهو طلع مخضر من الثلاجة كعد يكشر واني اباوعلة صفنت وكتلة  .

_اكلك هم تتمنى يصير عندك اطفال؟؟

رفع راسة ابتسم نص ابتسامة وسكت انتظرتة يحجي كلبي نار بس اريد اعرف، شيكول  .

_ها يعني ماتحب الاطفال
_ماكو رجال مايحب الاطفال اكيد احب وبنفسي
_لعد ليش ماتجيب

رفع حاجبة مصدوم خليت ادية جوة خدودي
_شبيك صدك ليش ماتجيب
_تريدين احبل؟؟
_لا اكيد ماتحبل بس غير تجيب انت

اشرلي بالسجينة يكلي:: برا اطلعي بررا

كمت من مكاني:: شبيك صدك احجي ترا افهم مو ماعندي عقل هو المرة تجيب بس ليش اني ماجيب
يعني انت تجيب 

_النوم ماثر، عليج روحي صحصحي

خزرتة وطلعت هسة غير يفهمني ماكو رحت ورجعت لكيت دعاء كدامي خزرتني من فوك ليجوة وكالت

_عفية زلم تطبخ بيدها ومايكولون للنسوان حظوظ مدري سحورة ناس محبوسة حبس

هزيت ايدي وكتلها
_خلي السحورة تفيدجن احنا من الله ساحرينهم

لكيتة مكمل الاكل كعدنا ناكل ساعدني بالهوسة وصعد غسلت المواعين ولحكتة للتلاثة كلهم كعدو وابو الطبل يدك يم بابنا نزلنا نتسحر كلهم متجمعين بالصالة حتى اموري كاعد مخلية بحضنة ويوكل بية
كعدني قبس بصف امة وهو منا حتى ما اشوف منو  موجود هو يجيب ويخلي كدامي  .

ثاني يوم الصبح افكر بكلام اخواتة اتخيل يصير عدنا طفل شعور غريب يجيني يجنن تمنيت فعلاً يصير عندي طفل اجت جوري شافتني بغير، عالم كالتلي.

_وين الحلو سارح
_اكلج يعني شلون اذا حملت اعرف نفسي،
_من تغيب عنج فترة لو تصير، عندج اعراض الحمل

صفنت اتذكر فتحت عيوني مامستوعبة
_اكلج صارلها هواي متاخرة عبالي هرمونات
يعني هسة اني حامل؟

_لا يمعودة تغيب وترجع بس احتمال احتمال نجرب اذا هيج

_شلون

_اكعدي ماعليج يمي

راحت وبعد مارجعت للضهر حسيتها نست الموضوع واني هم مافتحتة جنت اني وامير نباوع كارتون دخلت انطتني جهاز ابيض 

_جوري: بطلاع الروح جبتة الج

علمتني علية وراحت بقيت متوترة اسوية وما اسوية اموري ماقبل اعوفة الا نكمل الفلم وعفتة للعصر اجة قبس سبح ونزل يحجي وي ابوة على شغل رحت للحمام اجربة خايفة ومتوترة كلبي ينعصر بيدي
كملت وعفتة على الميز مشيت افتر ثبت بمكاني من فتح الباب ودخل  .

_قبس: اكلج البوس يفطر الصايم مو؟
_ماعرف
_رادلها شريعة انتي بس تردين ابوسج
_ياا شبيك يمتها

راح تمدد مدلي ايدة باوعت للميز سحبت الجهاز اباوعلة بية خطين بقيت ارمش بعيوني مامصدكة رحت يمة خليتة بيدة   .

_اني حامل  .

يتبع....

_________________________

اللهم صلِّ على محمد وآل محمد 💙

داريتكم بالقفلة 🔥❤️‍🔥❤️‍🔥❤️‍🔥
موعدنا 22
طبعاً عندي فاينل لهذا السبب متوقفة
ما اكتب

توقعاتكم

تعالو هنا نتناقش بالبارت