رواية المنجمة الفصل الثامن عشر 18 - بقلم كفايه

﷽

المنجمة
الكاتبة_كفايه

لاتنسون تصويت ومتابعة للحسابCh_Kfiah
تعليق بين الفقرات لطفاً💙

ياعلي مدد ♕.

__________________________

نجمة...

على اعصابي كاعدة وساكتة خالي صاير نااار وبس يحجي على نيزك وشلون طلعت وحدها مرتة تهدي بية يزيد ماينقص...

_همام: يعني ماتدخل العقل بنية عابرررة محافظااات وحدهااا مخليتنا نررركع راس براس ماصاررت هاي لاكالت ولاشارت هيج وحدها ركعتنا رركع ولايمها يكولولي بنت اختك وين حررت شكلهم وجهي صار هلكدوتة

_اعصابك عيوني البنية هم تعبانة ومريضة
لاتنسى هي حالتها النفسية مو زينة
راحت تزور مصار شي زوجها يتفهمها هناك تسكتة بس انت على كيفك

_همام: فشلتني كدامهم والله فشلتني

سكتت واني باقية اكل بروحي اكل راسي من كثر مابجيت يوجعني نيزك ماترتاح دومها مشلوع كلبها
لزمت تليفوني اتصل بشهب وهاي بس تبجي وتناشغ حركت گلبي اكلها هسة تجي ماتقتنع سديتة منها ومن حركة كلبي نفضت البيت نفض ماخليت حتى طبخ طبخت غديتهم واني انتظر بلكت ترجع وصار الليل مرت خالي من شافت وجهي اصفر سحلتني حتى اكل ..

احس روحي صفرت طاقة تمددت انام ودخلت على حساب استاذ فقار كتبت واني انعس..

_مرحبا استاذ
عادي باجر اغيب والله تعبانة

ماجاوبني طلعت منه ودخلت لحساب ميس ضحكت بتعب ورفست برجلية العوبة ردت علية بـ راجعة للعراق وبعد ماردت اجت بعدها ماعرف قفلت التليفون ونمت كعدت الصبح صليت سويت ريوك خالي احسن من البارحة وجهة يبشر بخير مو نفس البارحة مثكل علية طلع للدوام من وقت .
مرتة تعبانة تشرب بعلاج ماخليتها تشتغل عزلت البيت كلة من الصبح ابتسمت بوجهي وكالت .

_اروح فدوه للنادرة نجومة
_احمممممم
_شنو اليوم ماترحين للدوام؟

شهكت ودكيت على صدري رحت للغرفة اركض
_يماااا وين تليفوووني

اني نسيت ماجاوبني يعني هسة ماعرف اداوم لا رفعت التليفون ودخلت على المحادثة فحطت كلبي يدك بقوة لكيتة راد علية بـ

_هلا نجوم
خيرج بابا؟ عادي اكيد ارتاحي بس طمنيني عليج

تنفست براحة يمة همزين كلي غيبي ردت ارد علية وطفت الكهرباء بعد عفت الموبايل طلعت بوجهي صارت شهب عيونها وجهة احمر شمرت روحها بحضني بستها وشميتها بعدتها عني افحصها بعيوني .

_شبيج حبيبتي؟
_شهب:نيزك ماكو انقهرت عليها
_مابيها شي بالزيارة مو راحلها ضرغام هسة يجون

عيونها انملت بالدموع ضغطت على ايدة بقوة وبوجع تحجي .

_انتي ماشفتيها هاي مرتين كدام عيني طاحت
ولج نزل شايلها ميتة بحضنة ماشفتيها من اخذوها الدكاترة وركضو لو من قرت الزيارة للامام وراحت گلبي وكف بوكتها

نزلت دموعها تمسح بيهن حضنتها امسح على ضهرها اني ماشفت شي وشصار بية مو هي حقها والله دخلت مرت خالي تصيحلها .

_رجلج يكول خل تجي يريد يروح

مسحت وجهي وطارت طيور طلعت وراها لبست شالي اشوفة يفتر مبدل مبين راح يروح للشركة
صارت كدامة كرص خدها مدنك يحجي وياها .

_قبس: شكلت اني مو كلت لاتبجين؟
_اي مابجيت
_لاواضح بهاي خدودج

رجع يمط بيهن مبتسم وهي تحير من الخجل والتوتر تودي اديها منا ومنا وعيونها ترفعهن وتنزلهن ولايكول زوجها عبالك مخطوبين .

_قبس: طالع اني مامحتاجة شي؟
_سلامتك
_اذا ردتي شي كليلي تمام
_تمام

رفع عيونة خزرني دخلت راسي الطم بالكاع صاح علية طلعت اباوعلة .

_قبس: شو هنا ماترحين للدوام؟ يلة امشي
_اه اه اروح هسة؟
_اي وياي اوصلج امشي

باوعت لنفسي لابسة دشداشة باوعتلها وباوعتلة اشرت على روحي:: هيج امشي بدشداشتي !

باوع لملابسي سكت هز ايدة
_قبس: بدلي يلة بسرعة

_اهووو عمي ماروح روح انت
_قبس: وياي كلت اوصلج احسن ماترحين
_شكراً والف شكراً للنسيب بس اليوم اخذت اجازة

_قبس: شبيج تاخذين اجازة اشو السانج وبعدة بمكانة

_نجمة: اجازة مال ناس تتعاير بكيفي
_قبس: مو صوجج صوج المسوي روحة مدير
_احسن منك
_اني اعلمج نجمة اله اصير بمكانة واطردج

كالها وطلع طلعت وراة مادة راسي من الباب الرئيسي:: هو انت مال مدير مو زين ومشغلينك وياهم يخلون سمار مدير ولا يخلونك

_قبس: دروحي خلية يفيدج بوقتها عود

صعد السياره وشخطها دخلت احجي وي شهب
_هذا رجلج ولا يحبني شفتي شلون يحجي علية
بس يريد يبطلني يلا يررررتاح يكول عبالك منافستة

سكتت ولا جاوبتني تعرف برجلها اكبر غثة وماينحمل حضنتها ودخلت اسالها وهي تجاوبني على اوضاع بيتهم والاكشن الصاير بية خلتني اتحمس الفاهية .

_ولج هاي غير وصية مو جد هذا
يفحطهم تفحط يلا يحصلون الورث

_شهب: ييي

_دكعدي الفاهية اكعدي وكملي شكو ماكو بس سرعي البصمة اءءقصد كلامج لاتبقين تجرين جر اني اشوف شنو اسوي غدة

سالت مرة خالي كالت سوي بكيفج عاد نجمة بالطبخ معروفة قررت اسوي برياني دجاج اشتغل واطفر من اسمع سوالفها اندك الباب وجههة تصوفر كامت خايفة غسلت ايدي على السريع ولبست شالي دفعتها تدخل جوة صحت بصوت عالي،

_منووووو

رجع اندك ماجاوبني بلعت العافية شلت شحاطة بيدي ورحت افتحة خفت لايطلع سراج فتحتة وبهتت ملامحي ونزلت النعال بالكاع من شفت قبس راجع بلعت ريكي بفشلة كال..

_شبيج رافعة النعال صرصر داك الباب
_حشاك اكيد النسيب انت تفضل لا اقصد شعندك رجعت مو جنت هنا قبل شوية

دفعني بالباب ودخل سديت الباب اندارلي يكلي
_قبس: روحي صيحي اختج خل ارجعها

_يااا يااا صدك تحجي ماصارلها دقااايق من اجت

_هاهي المهم شافتج وشفتيها

_لا احس مقلببب

_دمشييي صيحيها ماريد اصيح

_تخاف على حنجرتك اوووي

طكيتها ركضة كدامة صدك لو كالت وردة يكفخ هذا طلعت متفاجا وخاصة من عرفت برجعتة اخذتها لازمتها بيدي بالباب بقيت مجلبة بيها ماخليها تروحلة واحجي .

_نجمة: يلة كول شرايد منها

_قبس: يلا يابة ارجعج للبيت

_شهب: ماصارلي هواي من اجيت

_قبس: ماكدر اخليج هواي

_نجمة: ليش عيني؟

_قبس: اخاف عليها

_نجمة: بس لا من عندييي

رفع حاجبة يخزر بشهب
_قبس: لا يجي هذا المكبسل ماعرف بيا كاع شارد امشي عيني مو امان هنا

باوعتلي شهب سكتت مامانعت نسيت ولا على بالي سراج من ذيج المرة من دفر الباب عليها بقت بالة
خطية لبست صايتها وطلعت .

_شهب: ماشبعت منج شوف
_ولا شبعت منج سوالف فاهية
_ماتجين وياي
_ولي
_يا ليش اولي
_ماعرف بس ولي

_شعندج باقية هنا امشي هم تشوفين البنات وتتعرفين عليهن ها؟

_لااا

رفعت راسي لقبس من كال
_روحي وياها ماتشوفينها ضايجة
_خو بقيها هنا
_قبس: ودوامي؟
_اتصل باستاذ فقار ينطيك اجازة

_قبس: اي مو اني نجووم.

ضحك باستهزاء وشهب تتوسلني اروح وياها مرت خالي صاحت علية
_روحي وياهم خالة
_نجمة: مووو

_قبس: اوصلج غيري يوصلج بس تحركي

بقت شهب تباوعلي مكسور خاطرها هزيت راسي وطرررت بدلت على السريع وطلعت حذاتي بيدي وهذا بس يطوط خبصني بالسيارة كعدت البس بحذائي وصلنا من دخلنا يلا راح .

مشيت وياها اباوع باستغراب يمة اني شجااابني المن اجيت هاي شلون راح اسلم لا وحدة ولا ثنين والله ولا اباوسهن بس من بعيد عزا عزا شكد ذولة عفية بيت شلون لامهم لم .

سلمت وبس ياسمين وذهب باوستها وجوري ورد
النسوان الجوا يخزرن بية خزر سالت وحدة منهن شهب:: هاي اخيتج

_شهب: يي

_نضال: حلوة فدوه

تحمحمت ارد عليها
_اكيد عيونج الحلوة

اختفت ابتسامتي من كالت وحدة منهن بخباثة
_ياا انتن هنا وين راحت اختجن يوم كامل يدورون عليهااا وماكو؟

_سندس: الله اعلم

_ياسمين: هو شنو الله اعلم عيوني مو سمعتي
بالزيارة لو ماسمعتن هاي كتلجن

_سندس: ماكالت لواحد اكو واحد يروح بالبوكة للزيارة زيارتيش هاي مخلية الزلم تتراكض تدورها

ضحكت والوياها مبتسمات سحبتني شهب نترت ايدها مني وتخوصرت::وانتي شعليج عيوني؟
لهلدرجة فضولية تردين تعرفين كلشي عيشي لنفسج وعوفي الناس تطلع للزيارة للخارج هي حرة بحياتها تخلي الزلم والنسوان تدورها هم ميخصج

اكو ثنين بنات يباوعلنا بحقد خزرتهن وحدة منهن انهدت بالحجي .

_دعاء: شوف اللسان شووف ولابيجن فقيرة وحدة ازيد من الثانية شكالت هسة هي شكااالت بكدج هي تحجين هيج وياهااا

_نجمة: ريلاكس حبيبتي رررريلاكس

سحبتني شهب الوياها خاتلة بس تباوع عفتهن يحجن وصعدت شمرتني بالغرفة تردد

_شهب: عوفيهن خيولن ذني لاتحجين وياهن
_نجمة: نعل عليهن احجي وشيسون بلة يطلكني من رجلي؟

شمرت روحي على الجرباية فاتحة ادية منا ومنا شوية وكمت عافسة وجهي:: اكلج هنا قبس ينام مو؟

كانها عرفت الراح اكولة هزت راسها لا كمت كعدت على الطرف:: يلا اكعد على الطرف هي بعد كلها اله ماخذها طول بعرررض

دورت عيوني بالغرفة رجعت صايتها وشالها تصفط بيهم هاي لو اني شمرتهن من بعيد الغرفة فد نضيفة ومرتبة تعال واكعد بيها ونام اندفع الباب ودخلن بنات وردة تدفع بيهن شالها واكع على جتوفها تحجي بعصبية .

_ادخلن سلمن تعرفن على الناااس شبيجن كااابة تووحد

دخلن مستحيات كمت الهن سلمت عليهن وعرفتني عليهن وردة يكول ماخذه خاوة عليهن خطية احسهن خايفات منها نفس حركتي سوت شمرت روحها على الجرباية وتسولف .

لهناك نزلنا صح اسولف واضحك بس بالي وي نيزك وشهب تحوص يم الباب دخلو ولد بس يباوعون ويدردمون بينهم واحد حاضن الثاني ويسولفون عبالك يحجون بسر مايردون واحد يعرفة .

جنت اكطع بالاوراق مال الشجرة التفتت على صوت اموري شهب حاضنتة تبوس بية بقوة ركضت اخذتة منها ابوس بية دخلت نيزك ركضنا عليها خوفتنا شكلها مايبشر بخير مصوفرة سالتها .

_وين ضرغام شو وصلج وراح صاير شي؟

_نيزك: صديقهم مدعوم

فتحت عيوني على وسعهن ايدي صارت ترجف على بالي اجو صافي وسمار بخوف سالتها احس ريكي نشف .

_نجمة: منو منهم؟
_نيزك: اسمر

شهكت ادك على صدري
_يمة سماار يمة

رحت افتر مامصدكة اريد اشك زيجي والعباس متت گلبي احسة نارر صار كلشي ولا سمار رجعتلها اعض باصابعي ..

_نيزك: اكلج فدوه نيزك تاذة حيل؟ خاف مات اسم الله اسم الله

_نيزك: لا كال زين

_نجمة: راح الولد رراح

لطمت على خدودي بقن يباوعلي مفهيات رفعت ايدي احجي مبررة:: زميلي خوووش ولد وحباب سودة على البال ميس

باوعت لشهب وتذكرت البال ميس قبس هزيت اي اصيح لا خطية شذنبة طلعن تلكن نيزك ماسمعت شنو يسولفن سحبت شهب اكلها .

_اكلج اريد اروحلة خطية لا يموت واني ماشايفتة غير انتحر امشي جيبيلي فلوس اروح للمستشفى

خزرتني ماقابلة
_شهب: شبيج تخبلتي وين تررحين
_والله اروح زميلي هذا احبة اني ولج انوب حتى تليفوني ماجايبتة اتصل بواحد منهم اكو وحدة ثولة تنسى موبايلها بالبيت وتطلع؟ خبصتوني خبص

اخذتها وصعدنا فوك نيزك راحت لغرفتها، طلعتلي فلوس خايفة ولاقبلت اروح بس اني دكيت رجلي كلشي ولا ابو سميرة .

_شهب: شوفي خل اتصل بقبس يطمنه شلونة احسن ماترحين وحدج انوب

_ديلا بلة اتصلي

اتصلت بية غير يرد ماكو شكد اتصلت انوب خفت بالزايد بس لا مات والتهو بالبجي واالطم طلعت ماشايفة احد كدامي اجرت تكسي وللمستشفى
وصلت هناك واشوف واحد من الموظفين يريد يدخل جلبت بية وادخل وياة وصلني للردهة ..

رمشت بعيوني مرة وثنين وتلاثة اريد انطم بمكاني ضرغام وفقار وصافي وضيغم كلهم موجودين يباوعولي مستغربين وين اروح وين انطي وجهي تنفست براحة من شفت روان موجوده اجتني وذولة بس يخزرون من بعيد .

_روان: شجابج نجمة
_شبيهم ذولة جنهم دفانة كليلي الولد عايش مات

_روان: مابية شي
_والحادثثثث؟

مو بس هي سمعت حتى البلعمليات سمعو صوتي خليت ايدي على حلكي سحلتني منهم بعيد تحجي بصوت ناصي،

_روان: زين سمار خطية ايدة راحت انكسرت وراسة متاذي

_نجمة: اكلج شلون سوى حادث؟ وانتي شعجب جاية

_روان: يمعودة غيرر قربب عن الشركة اندعم خطية

_سيارة ضربتة؟

_اي

التفتنا على صوت ضرغام يصيح
_هو ليشش زماااال مو كلناااا مايروح

طلع يمشي سريع وفقار وراة يصيح
_شبية قبس ضرغااااام

_ضرغام: مااعرف

_ضيغم: كالها وطلع طلعنا وراة اخذت فقار بسيارتي وضرغام تحرك بسيارتة سمار تعارك وي ولد الباشا من زمان احنا وياهم مو على صلح واذا التقو الشباب لازم تصير بوكسات على اقل شي اليوم الصبح كاسرين علية
واكيد بالليل ملتقين بشي مكان
ومتلاغين .

التهينا بسمار ضربتة خفيفة بس السيارة متاذية هواي الامامية رايحة هما عمدا مايردون يأذونة بس يردونة .

فقار حرك الموبايل على قبس حرررك ومن رد علية بصوت عالي صاير نار يصيح علية .

_فقار: منوووو كلككك ترررروح الهم
هييي هاي المراجل من خ** بالمراجل اذا هيييج
عقل ماتفكررر بعقل طيح الله حظك

سد الموبايل بوجهة يصيح علية
_فقار: امشييي بسرعة امشي

_ضيغم: هي سيااارة مو طيارة ازيد من هاي السرعة تريدنا نحلق بالسماء ان شاءلله

عض اصبعة بقوة
_فقار: ضرغام هذااا ضرغام احسن منه اخخ قبس اااخ متسرررع دومة وزمانة

وصلنا للمكان نزل فقار شاف قبس لو تسودن خشمة يصب دم وقميصة الابيض ملطخ ومتملخ علية شعرة مكفش وصافي مو اقل منة كفكف رداناتة فقار واندار لل** ضرغام قبلة نازل يموووت على المشاكل ضرغام رحت وراهم اركض لكيت ضرغام لازم اخوهم الجبير ودك بوكسيات ثنين منهم منتهين واكعين والدم ماعرف منين ينزل فقار راح على ابن عمهم يموت منه يموت وهو اساس المشاكل بينة راحلة وصار واحد يردم بالثاني وقبس رجع بوكسيات اجو اصدقائهم اكتملت لو مااجو الحرس باسلحتهم يلة تفاككنا

طلعنا من المكان وضرغام يسب ويفشر عليهم ساق راح فقار على قبس لزمة بقوة من قميصة رجة رجة يصيح بية .

_تررروح وحدك صااير باتماااان
انت غبيييي غبييي لو كلهم جايين وانتو وحدكممم
زمال انت زمااال لو تبيع بطولات ماخذ بطووولات

_قبس: مسوين رواحتهم زلم يلا شوفتهم الزلم العدهم شلون تنسحل مثل الطليان

_بخشمك هذااا امشي للمستشفى الدم
منين هذا الدم ؟؟؟

لزمة يكلب بية وهو لازم خشمة بقيت بمكاني اباوعلهم فحطت وخر قميصة ينزف مشكوك .

_فقار: بسجينة هااي؟
_قبس: لا هيج وكعت

نتر روحة منه وصعد بالسيارة وهو متخبل علية صعد وياة ماخلاة يسوق هو ساق وصافي صعد وياي ضربتة على ركبتة .

_ضيغم: دمشي انت تمشي من وحدك غير تحجي تكوول

_صافي: ماتستاهل اجينا نادب الزوج ونرجع

هزيت ايدي وشخطتها وراهم للمستشفى .

نجمة...

واكفين يم سمار يشيل برجلية ويرجع ينزلهن شال ايدة الصاحية وراد يشيل ايدو المضبرة صرخ

_سمار: ايدي فقدتتت ايدي فقدتها

_روان: مابيها شي بس كسرر

_سمار: شخليتي وراج انوب دكول بس كسررر هو الكسررر هين اني عظمي رقيق شيلمة بعد

_نجمة: اشرب حليب جاموس تصير اعظامك حديد باسبوع يلتم العظم ويطيب

_سمار: الله عليج نجمة الله ولج وصلت الموت شوفي راسي

_شفتة والله مو زين بهاي طلعت اني عبالي متت
ردت الم المنطقة عليك

_سمار: اي عفية الطمي علية اني ماعندي اخوات يلطمن وراي لو متت

_نجمة: اسم الله عمرك طويل

_روان: شبيك هو كسر لاتموت روحك بليز

_سمار: وجهة الشيطان امشن من عندي ترة يدكن بروحي دككك

_نجمة: مو عبرت قاارات وتداينت فلوس علمودك وسفة والله وسفة طردتني

_سمار: ماطردتج نجمة بس هسة روحي علما استعيد قدرتي الكلامية ارجعيلي هسة اريد افشر عليهم

سحبتني رزان وطلعنا تحجي علية
_يععع خبل هذا خبل ولايحترم

_يمعودة مريض خطية خل يحجي

_هذا اررعن كلش

_هسة دعوفية يحجي ويغلط عليهم

خزرتني تهز بيدها كعدت على صفحة لزكت روحي بيها همست:: اكلج راح ارجع للبيت هسة يرجعون ويشوفوني عيب منهم

_روان: خل يرجعون ونروح

_لا اني راح ارجع بس اسلم على سمار

فعلاً تحمدتلة على السلامة خطية مشخط تشخط طلعت من المستشفى اريد سيارة طبكت علية سيارة حديثة تلمع لمع فتحت عيوني وحلكي صرخت من الصدمة بصوت عالي مامصدكة

_مييييييس

فتحت الجامة تضحك نزلت ودموعي صبت حضنتها بقوة اشم بعطرها احس روحي ردت بعدتها عني اباوعلها مامصدكة وجودها

_عليج الله هاي انتي
_ميس: لا
_اي كاصة شعرج الجلبة تبقى الجلبة احسن منج

دنكت عضيتها من زندها بقوة صرخت بالكتمان فركت ايدها واني اباوعلها بحقد

_بالجذب ما اتصلتي شتخسرين من تكولين هلو عوبة وتسدينة ؟

_مو بالشارع بلييييييز

سحلتني من ايدي للسيارة ضحكت امسح بعيوني وكفختها تكفخ طلعت حركتي بيها .

_ميس: مو هيج نجوووم حرررجع والقرآن
_لا شافج القررران العوووبة هيج تعوفيني متفرفحة روحي عليج

_اسفة بس ثقي جنت غالقة التليفون ومبتعدة عن الكل

ذبلت ملامحي بحزن كتلها
_اشتاقيتلج، راح ترجعين لو تبقين

_بعدين اكلج

كرصت خدي طنكرت بعد شيفكها شوية باوعتلها وضحكت حضنتها فد متغيررة اول شي شعرها كاصتة وضعفانة .

بعدنا نحجي وطبكت سياراتهم بسرعة رررهيبة
نزلو ضيغم فقار وصافي وقبس قميصة مدمة ثنينة شهكنا من شفناة ميس فتحت الباب وراحت تركض واني وراها بخوف صاحت عليهم .

_ميس: شبية قبس فقااار

_فقار: مابية شي لاتخافن

راح وراة ما جاوب ميس بقت تلطم بمكانها لزمت ضيغم تسال بية وهو يجاوبها .

_ميس: هم رجعتو الهم مو صار زمن مبتعدين عنهم وكل واحد كافي خيرة شررة هالقذرين ولا يعيشون ويعوفونكم

_ضيغم: شباب ويلتقون باماكن كلمة منا وكلمة منا صارت بعد من رخصتجن اروح اشوفهم .

راح وهي وجهها مايتفسر صفنت عليها وبلعت ريكي .

_اكلج ميس هما ذولة نفسهم السولفتيلي عليهم؟
_نفسهم نفسهم

راحت تشوف قبس هو مابية شي بس خشمة بطل نزف وملابسة لو تشوفة شهب تتسودن راحت ميس تحجي وياهم ووياة واني من بعيد اباوعلهم انتبهتلي اشرتلها راح اطلع اجت وراي .

_شكو نجوم
_ماكو شي راح اطلع بس
_نجمة نجمة باوعيلي اني ماعندي شي وياة بس خفت علية

_عادي حتى اني خفت علية
_اي اي والله خفت هيج قبس صديقي بس

ابتسمت اكمل طريقي كملت تكول
_هالمرة بس صديقي فعلاً
_اعرف والله لان تزوج وانتي من جان شاب ماعندج شي وياة ولاسويتي علاقة بية مو هسة

صفنت بوجهي ورفعت شفتها بقهر ترجف عيونها تلالت بالدموع وبصوت يرجف كالت .

"راح اتزوج اني عن قريب "

فتحت حلكي وعيوني سووى من الصدمة قبل لااحجي لزمت ايدي تهديني:: اتشاقة وياج

ذبيت نفس وغميتها بيدي:: امداج عبالي
بس يلا هم تزوجي اريد اركص واخذ اخو العريس بشرفج وبشررف امج حتى لو مسيحي اخلية يدخل للاسلام علمودي .

ابتسمت تهز بيدها وموبايلها دك جاوبت بانزعاج
_ها بابا يلا اجيت

انخبصت خبص قفلت تليفونها اعتذرت وكالت
_اسفة راح اعوفج هالمرة بس اوعدج نلتقي باجر او غير يوم هسة مشغولة

شمرتلي بوسة وراحت تمشي سريع صحت وراها
_نجمة: مو تسافرين وتعوفيني ميس ترا بعدني ماشبعت منج

وهي تمشي حجت باستعجال
_باقية باقية

درت وجهي هم يلا ارجع للبيت مشيت وعلي اجة هستوة يدخل شافني وكف .

_نجمة: ماكو شي لاتخبص روحك بس سمار خطية تكسر كلش وقبس دمة بطولة وهو وصافي وفقار مكفكف رداناتة وشعره مخربط يمكن مكتول حتى ضيغم خطية

راح يمشي سريع واني احجي وراة
_على كيفك ياا مابيهم شي ريلاكس ريلاكس

ردت ارجع اشوف العركة وشكولهم بس خفت من ضرغام والله مادري ليش اخاف منه خاصة من يصير عصبي احس شكلة يخوف يصير هاي شلون نيزك عايشة وياة عجيب وخو قبس ازيد هسة اذا اروح يركعني بالحايط عبالة اتشمت هما بيهم بس عليوي وضيغم وفقار حبابين .

طلعت اجر تكسي وارجع للبنات اشوف نيزك شتسوي تتعارك اخاف وتحتاج فزعة هالمرة صدك افزعلها واعارك لان كواكب ماكو اني بمكانها انزل سجاجين المطبخ واهد عليهن بيها .
_________

شهب..

مخلية راسي بحضن نيزك وامير يلعب بالغرفة رفعت راسي اباوع بعيونها:: ها نيزك حتبقين هنا؟

_نيزك: خل يجون اول
هسة عوفيهم وركزي باختج الملكوفة رايحة للمستشفى شكو عرفة ولفة والله مال كتلة هالبنية

_شهب: دكول خطية حباب

_نيزك: كل اليضحكلها كالت علية حباب هاي اختج ينخاف عليها ومنها تصرف بدون تفكير

_شهب: نجمة جبيرة ماعليها شي

_نيزك: لو شماتكبر يبقة عقلها عقل طفلة
انتي بنظري احسن منها

كلش ضاجت وصارت عصبية على نجمة لزمت ايدها اتوسلها:: حبابة خطية لاتحاجينها هسة تحقد علية لان كتلج

_نيزك: نجمة ماتحقد اتمنى تحقد والله اتمنى

كمزت منها انزل اشوفها بلكت تجي نيزك من اجت ولا نزلت جوة سوالف دك رحت للمطبخ وكفت بمكاني اسمع عمو فرقد يحجي وي سهلة .

_فرقد: انتي شتردين؟ بس لو اعرف شتردين وترضين

جاوبتة برود وهي تشتغل ومنطيتها ضهرها
_سهلة: سلامتك عيني

_فرقد: ماتستحين على روحج تخليني اتوسلج؟
هذا راسج اليابس ما يلين

_سهلة: الا راسي مايلين الك عيوني فرقد العاشق الولهان قبل فترة تتمعشك بنية بكد ابنك ومسجل كلشي باسمها وهسة جايني! روح منا خل اكمل شغلي .

_فرقد: بسببج كلة بسببج شكد احاول وياج وانتي مامنطيتني اي اهمية صرت ادور مشاعر وحب واول ماشفتها حبتني تعلقت بيها بس طلعت حيالة

_سهلة: روح عيوني سوالفك مو مال مطبخ
لاتجي وحدة تسمعك تسويك صنفة خلي محد يعرف عنك شي

_فرقد: ولا ابريج الذمة نفسي بيج

كالها وطلع من المطبخ جانت تشتغل عافت البيدها مدنكة راسها بتعب مسحت وجههة بزندها تذب حسرات دخلت سويت نفسي هستوني جاية .

_شهب: جيبي عمة اكمل عنج

_تروحلج فدوه عمتج اني اشتغل مابقى شي

كعدت وعيني على الباب الرئيسي انداريت من سألتني:: صدك شهوبة ماعندج عمات؟

_شهب: وحدة وميتة من شابة
_سهلة: وخالات؟
_عندي هواي خالات بس مايحبنا لان مايحبن امي

اندارتلي رافعة حاجبها مصدومة ابتسمت بحزن

_شهب: مو امي الوحيدة من ابوهم امها ماتت من صغيرة بعدها جدي تزوج امهم اتذكرها زينة خوش مرة بس لا بناتها ولا ولدها زينين وي امي يتظاهرون يحبونها علمود الفلوس دوم يجون ياخذون منها فلوس ومن ماتت محد سال علينة بالجذب

كمت من مكاني ماريد اكمل هواي حاقدة عليهم وكارهتهم ماعدهم شي واحد حلو ويانة مواقفهم شي انكس من شي خاصة بعد ماتزوجت نيزك لو نعيش دهر ما نتقربلهم .

رحت كعدت بالحديقة نحلانة كلش الكاع مبللة وريحة الزرع والورد تموت غمضت عيوني احس روحي ذبلت بس اريد انام كمت من مكاني تجمدت ولاتحركت خطوة شفت اخو رفل واكف وراي يدخن بجكارة هستوة مورثها اخذ نفس مقلص عيونة يباوعلي باوعت بتوتر وخوف على الطريق بس اريد اعبر وافلت .

تحركت خطوات اريد اعبرة وكفني بسؤالة
_تميم: انتي مرة قبس؟
_اي
_حلوو

شنو الحلو مافهمت عبرتة امشي سريع صارن بوجهي دعاء واسيل بقن يخزرن بية عبرتهن كالبة عيوني صاحت وراي دعاء .

_شبيج تكلبين بعيونج مانعجب؟
يمة منجن يكول تعرفنة من زمان وهيج حاقدات علينة

_اسيل: عوفيها زعطوطة عقلج وي الزعاطيط؟

_دعاء: اكيد لا طبعاً عقلي وي الكباااار، الكباااار

ضحكت ضحكة رنانة لعبت نفسي شكد مستفزة واني بالعناد ولا ارد عليها البسها لبس واخليها تمووت .

رجعت كعدت بالمطبخ بس هو فارغ البنات يقرن عدهن امتحانات ماحب اروح يمهن انقهر من اشوف قلقهن وخوفهن من الاسئلة وياشرن ويلخصن المواد

ايدي على خدي ساكتة وكاعدة دخلت بيبي ذهب ابتسمت بوجههة من بعيد بصوت عالي كالت .

_ذهب: اروح فدوه لهلضحكة الحلوة

_حبيبتي بيبي

اجت كعدت يمي تباوع بوجهي بتركيز توترت عدلت شالي اتاكد ماطالعة ركبتي لو شعري ضحكت .

_ذهب: ها ولج شبيج

_مبية شي بيبي

_خوش قيس شلونة وياج

_زين

_هسة انا شفهمت من الزين ماتحجين عدل

_شلون والله ماعرف شنو اكلج بس هو زين

_جعلكم دوم بالخير وزين وياج انا هالايام اشوفج تتختلين شكو

_يعني شلون اتختل بيبي؟

_تمشين بصف الحايط وماتنزلين بيج شي كليلي

_ما انزل قبس كلي لتنزلين جوة لان اكو شباب بس من يرحون انزل

_والله هذا قيس شايخ شيوخ يامر وينهى يلا انا ما اعلكها بينكم ضلي هيج كون مرتاحة ومتفاهمين

كطعت كلامها واندارت وراها واني هم اجت نجمة فحطانة خدودها صايرة حمر وعركانة خلت ايدها على خاصرتها تتنفس سريع .

_ذهب: ها ولج وين رحتي

_نجمة: يمة فحطت خل اشرب مااي

راحت للثلاجة طلعت دولكة تشرب منها وذهب تصيح بيها::ولج مايصير تشربين وانتي واكفة اكعدي اول وشوية شوية

_فحطت وعطشت يبسو ريكي

كعدت يمنة وارتجت علية خلت راسها تهفي على وجهها .

_نجمة: هذا ابو التكسي خلاني افعل شخصية العكيد ابو شهاب

_ذهب: ولج حمرة صفرة جاية وحدج بتكسي
ماتخافين ياخذج يمفلوكة

_نجمة: لابيبي محد ياخذني حتى الياخذني يومين بلهواي ويشمرني بالحاوية واني شنو ما اصعد تكسي الا ارتاح للرجال

هزت ايدها ذهب وهي تحجي بجدية بعيد عن الضحك والشقى .

_ذهب: هسة انتي شنو المهمة السويتيها بروحتج هاي؟

_نجمة: سويت العجايب بيبي صديقهم مااات ماات بس من شافني رجع للحياة وصار يتنفس حتى كالو مابية شي جان موات قبل الدكاترة تعجبت كالو معجزززة

ضربتها ذهب على ضهرها متعجبة من سوالفها هي نجمة لو تسكت لو تعلك بالحجي متعودين عليها

_نجمة: شبيج بيبي تضربيني خو روحي اضربي احفادج اهل المشاكل والعرررك

_ذهب: ولج لاتحجين على احفادي لا اكتلج احفادي خط احمر

_نجمة: سووهم تشريب دجاج الج اليوم خو قبس انكتل كتلة غسسل ولبس

شهكت وضربت على صدري اريد احجي احس انخرست لزمتني من ايدي تندمت من شافتني خايفة اني وذهب .

_نجمة: مابية شي هيج ولج راجدي ودفرة
بس هيج

_ذهب: ولج احجي يمفلوكة لاتضمضمين كولي شصايرر

_نجمة: اهووو هسة اني المن حجيت تورطت بعد
شمعرفني باحفادج اني عراكة صايرين وي منو نسيت والله بس اتذكر ميس كالت نسيت شكالت

عتيتها من ايدها ادير بوجهها علية كلبي يدك بقوة من الخوف .

_شهب: فدوه شبية قبس كولي

_نجمة: يبووو يبووو يبووو مابية شي

كامت من مكانها وذهب صاحت بيها
_ذهب: امشي جيبي التلفون ررركض

_نجمة: واني شمعرفني وين تليفونج
ايييي ايي رحت

اجت ياسمين تباوع بالوجوة قبل لاتتنفس نجمة كالتلها:: خالة اركضي جيبي تليفون ذهب بساعج

_ياسمين: شكو شصاير؟

_نجمة: ماكو شي لاتخافين بس الولد تعاركو وابنج اولهم انكتل

شهكت المرة طفرت اجيب التليفون راح تكببها وتجلطهن بس تحجي زايد جبتة وانطيتة لذهب كلتلي اخابر على فقار اتصلت بية وكلها التمت .

_ذهب: خاب لاتلتمن علية ابعدن بعيد عني

من شافتهن ماتحركن كامت تطلع برا لحكتها لازكة بيها كلبي طاير على قبس مشت تحجي كلهن يباوعن من بعيد ماطلعن جاوبها فقار .

_ذهب: ها ولك وين انت..
شصااير ويامن متعاركين ..
هسة انت معليك ياهو كالي كلي صدك صايرين تشريب دجاج؟ من طاح حظكم مابيكم خير بس كل واحد شكبرة.. هسة انت شعليك منو بلغج دتعالو تعالو لا اجيكم هسة للشركة واشهركم شهيرة ..

باوعت علية طكطكت اصابعي بخوف همستلها
_اسالية على قبس فدوه

_ذهب: قيس شبية قيس؟
ولك لاتجذب علية دتعالو اشوفكم يلة الكم مسافة الدرب لا اتخربط واموت يمة كلبي كلبي اااخ راح اموت اشم ريحة مووووت

لزمت ايدي تصيح
_ذهب: حبوبا احس ملك الموت يفتر تجوون ولكم لحكو اشوفكم كبل لايجي

شمرت، علية الموبايل طفيتة واخذتها من ايدها ادخلها جوة فحطت تمشي كوة تكلي بصوت ناصي

_لاتخافين الاصيفر مابية طاح طحيل هساع يجي

تلكنها جناين حفصة يسالنها جاوبتهن وهي تمشي
_ماكو شي حبوبا ماكو شي

كعدتها ونجمة جابتلها كلاص مي اخذتة منها تشرب

_نجمة: ضغطج علك يبوو يبووو

_ذهب: ادري بروحي راح اموت ديرن بالج على اخبتجن اوصيجن وسلملي عليها كللها طاك كلبها عليج المرحومة وانتن لاتصيرن فاهيات تسبعن

_نجمة: لاتخافين احنا سباع بيبي

دخلو الثلاثي اخوهم الجبير تكتر على صفحة باوع للوضع وصعد لغرفتة ذولة الاثنين اجو يسالون شكو ودعاء تحجي وياهم اجو شمرو رواحتهم على القنفة يم ذهب .

_حسين: ذهب لاتموتين فدوا خل نشبع منج شوف
_ذهب: جا انا بكيفي اموت لو لا

_حسين: اتمسكي بالحياة لخاطرنا احنا نحبج بس من يصعد سوكج نبيعج

ضحكو وهي غمتهم التمو عليها يشاقونها عبالك احفادها ويعرفونها من زمن ضحكت وكلنا ضحكنا على سوالفهم الماتنمل وتخلص .

عفتهم وصعدت اشوف نيزك ماتت عاشت لاحس ولاخبر هي وامير دخلت لكيتها كاعدة صافنة وامير كاعد على التليفون اجيت يمها حضنتها ودرت وجهها علية بيدي ..

_شبيج حبيبتي

_نيزك: حايرة
_بشنو حايرة كولي

ذبت حسرة عيونها ذبلانة تحجي بقهر
_اني ضرغام انقهر علية والله احسة يحبة هو يمكن يحبني من صدك ويحب ابني بس شهب صعبة والعباس صعبة

_شنو الصعبة؟

_ماعرف البنية حامل يطلكها ها؟ لو مايطلكها
اذا مايطلكها اني ما ابقى واذا يطلكها..

سكتت كاطعة كلامها لزمت راسها بثنين اديها تردد
_كون الله يقوي كلبي ومايهمني احد غير نفسي

_ان شاءلله

حضنتها بقوة ابوس بكتفها واهديها بكلامي
_شهب: لاتفكرين وتنقهرين كلشي ينحل من وحدة صدكي

_نيزك: هو هم هيج كواكب دكول المكتوب مامنة مهروب

ضربت على رجلها بقهر وشفتها تنرفع بقهر عيونها معلكة ليكدام تحجي بروح خاوية ..

_نيزك: كالت لسالم اندمك كالتلة بيتك اخلي عالية سافلة كالتلة ماخليك ترتاح وتتحسر على الراحة بس هسة

صفكت ايد بيد تهز بيدها
_نيزك: راحت وعافتهم مرررتاحين راسهم فايخ وهي الجانت كل يوم توعدني وتكول شوفي شنو راح اسوي بيهم ليش هيج سوت وعافت كلشي

عيونها انملت بالدموع عصرت اصابع ايدها كوة لازمة دموعي انقهر واموت من اشوفها بهذا الضعف تعودنا عليها قوووية مو هشة مكسورة .

_شهب: الانتقام مو حلو رب العالمين هو الينتقم من الضالم تريد تعيش براحة بعيد عن سالم

_نيزك: والله مامصدكة وهذا كلبي يوجعني عليها ولج والله اشتاقيتلها ميتة على شوفتها شلون ينطيها كلبها هيج تبتعد عني واني من الصغر وياها ماعفتها

نزلت دموعها غطت وجهها بيدها تنحب بخنكة حضنتها ثنينة نبجي شهكاتها تمرد روحي مسحت على ضهرها اسكت بيها .

_هسة شرايدين منها اهم شي مرتاحة

اجت نجمة بهدوء دخلت وكعدت من الجهة الثانية لنيزك حضنتها خلت راسها نيزك على كتف نجمة دموعها تنزل بهدوء .

_نيزك: بنات هسة شجاي تسوي برأيجن؟
تشتغل بالسوك بعدها بالمخظر لو بدلت شغلها

مسحت عيونها تهز براسها
_نيزك: ماتعوف السوك ولاتطلع منه دوم
ااخ يمة ااخ كون تزوج وتستقر
والله يبرد كلبي بيها ادعلها بكل صلاة بكل وقت مو تنسنها اختنا هاي

_نجمة: راح اروح اشوفها وادور عليها

_نيزك: واني هم اروح واطيح حظ حظها خل تحجي هو كلبي وانذبح مرة ماينذبح مرررتين
اسحلها وافرها براجدي اني اعلمها

_نجمة: حتى تدجج بسجينتها

_نيزك: خليها تجني بلكت اموت وهي تحير بابني

ابتسمت وانرسمت ابتسامة قهر على وجوهنا بس شب الامل بداخلنا عاد نشوفها ونعرف اخبارها من بعيد من قريب المهم نطمن عليها .

اندفر الباب كمزنا تلاثتنة دخلت ورد فحطانة جاية تركض العوبة .

_ورد: نجمة امشي اجو الولد وراح تصيررر مسرحية تموووت يلا كومي

طفرت من مكاني
_شهب: اجة قيس

_ورد: والله انتي بطرانة تسالين علية شكووو
كومي نجمة

طفرت نجمة تحب العلوم نفسها نزلت وياهن نجمة من شافتهم مجتمعين ختلت بضهري مجلبة بية
كلهم موجودين وجواد واسامة وعدنان هستوهم دخلو جانو سوى طالعين كعدو وبس قبس باقي واكف تصيح بية .

_ذهب: تعال ولك تعال خشمك شبية اشوفة احمرر

_قبس: مابية شي تتخيلين اروح اصعد

جان لابس قميص اسود وهو طالع بقميص ابيض بهتت ملامحي وبقيت واكفة بمكاني فقار يخزر بية خفت شمسويتلة بعدين انتبهت لنجمة تهمسلي اتحرك سويت روحي ماسمعتها وبقيت اسمعهم .

_جواد: انتو ماتجووزون من سوالفكم مرراهقين؟
المراهقة وخلصتتت ماتخلصون انتوو جبتو عمركم تتعاركون وتتمالخوون كل واحد بشغلة ومكانة وما خلصتتت

_اسامة: بابا فقار انت شبيك العاقل عود بلة ذولة ما اعتب عليهم انت شبيك هيج انهديت؟ يعني كل فترة مخابرينة عليكم

_فقار: يستاهلون ولو يطلعون بوجهنا جان اكسررررهم تكسررر وانعل ابهاتهممم ماكو شريف البيهم كلهم..

كطع كلمتة ومسح وجهة بعصبية كام من مكانة يريد يطلع رفعة اصبعة يحجي بتهديد .

_فقار: بلغ عمهم اصورلة حلقة لفلم اكشن
بولدهم اخلي الدماية تترس الحياطين والكيعان
لايتقربون علينا حتى لا انفذ

صعد وعافهم قبس فلت روحة وفات مني يباوعلي من فوك ليجوة صعد واني وراة ونجمة تسحل بية تريدني ابقى رجعت سحلتها سحل وشمرتها بالحديقة .

_شهب: العبي بالمرجوحة شوية وارجعلج

_نجمة: امداج الخايسة تركضين ورة الخايس ولا همج اختج

_شهب: هسة شنو سوالج قبس اوووي جايتج هسة

دخلت لكيت البنات باستعجال كتلهن
_روحن يم نجمة بالحديقة شوية واجي

_محسن: وين اكو نجمة بالحديقة النجوم بالسماء اختي تتفق وياي حسين؟

_حسين: اتفق وياك ضلعي

صعدت فوك لغرفتي دخلت ماموجود ملابسة مشمرهن على الجرباية لميتهن خليتهن بالسلة وبقيت افتر بين مايطلع من الحمام باوعت لملابسي مرتبات ونظيفات بس شافني بيهن الصبح بما ان يطول بالسبح طلعت ملابس بيت غيرهن مرتبات

وكفت على المراية اتعطر ومكياج ما اخلي ممنوع بس سحبت عيوني بكحل وخليت ومسكارة لون بني وحمرة بناتية لون وردي مبينة طبيعي .

افتحت شعري رتبتة ولفيتة طلع من الحمام عفت كلشي من ايدي وابتسمت رجعلي الابتسامة بقيت بمكاني اباوعلة وكلبي يريد يطير دائما يجيني سؤال كل النسوان المتزوجات هيج يحسن من يشوفن رجلهن؟ لو هاي لان بعدنا متزوجين جديد؟

اندارلي وفتح ايدة
_قبس: ماتجين

جنت منتظرة شوكت يكلي هيج حتى اروحله مشيت بهدوء واني لو بيدي اركض ركض سحبني ولفني بايدة باسني بكصتي .

_شلونج؟
_زينــة انت شلونك كلش خفت عليك اليوم
عبالي بيك شي

باوعت بوجهة بتركيز دنك يشم بركبتي غمضت عيوني احس نعست بعد عني نسيت شردت احجي

_سنجوبة هاي نجمة الكالتلكم؟
_هئ

باس ركبتي ورجع كال
_نجمة الكالت؟
_ييي

رفع راسة يكلي
_فلم هندي سوتة لج هاي احسها حفيدة ذهب ثنينهن نفس الاكشن والتأليف

ضحكت اميل براسي
_بس حلوات هيج كلامهن يونس
_يجلطططط

ابتعدت عنة رحت كعدت على الجرباية وهو يرتب بشعرة ويخلي عطور كمل واجة كعد يمي تقربت منه اخذني بحضنة خليت راسي بركبتة عطرة يموت نعست وعيوني وحدهن ينسدن حسيت بكرصة بزندي خفيفة همهمت وحركت راسي بركبتة

رفع راسي بسرعة يهمس وجهة ورقبتة صايرات دم
_قبس: شبيج نمتي؟

_اممم شوية

_ها

_احب عطرك

_بس عطري؟

_هئ انت احبك
_منو يكول؟
_اني
_بلة تجذبين علية

رفعت حاجبي وعدلت كعدتي
_وليش اجذب عليك؟
_اثبتي انتي مو جذابة

رفعت كتفي وكتلة
_مدا اجذب
_اثبتي
_عادي احلف

ضحك قربني علية وجهة صار بوجهي انفاسنة اختلطت سوى .

_قبس: اليحب مايحلف اليحب يثبت بافعالة اثبتي حبج الي

_اي شلون كتلك احلف بس

جر شفتي بيدة
_قبس: الكلام يترجم بشكل بوسة وكل ماكانت طويلة حبج الي قوي

_ها
_اي يلة بوسيني ماريد بوسة خد

اشر على شفتة غمضت عيوني وبدون اي كلام مني تقربت علية كملها هو وطفر عني عيوني ينفتحن وينسدن راح يطلع ملابس يصيح .

_ماعجبتني هاي الملابس

نزع التشيرت ضهرة صاير احمر اخذ الملابس ودخل للحمام رتبت روحي وغسلت وجهي بمي بارد شربت منه ونزلت جوة هسة نجمة تفضحني لا والله لكيتها كاعدة بالمرجوحة بيدها بطل ببسي صغير ترج بية بقوة وردة حلكها متروس جبس هاي تسولف عليها ومختنكة ماتكدر تضحك شافتني كامت .

_نجمة: اني رايحة يلة عيني
خالي راح يجي بس شوية بعد

_شهب: مابقيتي لليل
_نجمة: لاعيني اروح انتو عشيرة جبيرة كلها تخازر بية ولا واحد يحبني بس عليووي العلم

_ورد: تااج وبااج عليوي العللممم والقلم والهمزة واللمزة اااح

_نجمة: وذولة الولد والله جوهم حلووو

_ورد: ذولة يخبلون جووهم يموووت كل ما اشوفهم اتخيل روحي ولد واصاحبهم

_نجمة: واني كون وياج نشتري دراجات على كد فلوسنة ونبطح بيها

_ورد: حتى يسمونة ام البطحات

سكتن ثنينهن من طلع عطرة يهف هف طفرت نجمة من مكانها شافها ابتسم لوحتلة بيدها مثل المخبلة
راح واني ارزل بيها بهدوء .

_شهب: ثكل ماما شبيج هيج خفيفة ملكوفة

_نجمة: تالي علية الزعاطيط تعلمني الثگل دوووولي

هزت ايدها ورجعت كعدت ورد تخلي بحلكها جبس والبطل بعدها ترج بية ابتعدت عنها لاتفتحة وينفجر علية .

_شهب: هذا بطلج لاتفتحية ترة ينفجر

_نجمة: شوية وافتحة مو هسة

انداريت اشوف علي اجة باتجاهنا عدلت وردة كعدتها ومسحت ايدها كلها جبس بضهر نجمة ردت احجي وسكتت .

كامت نجمة راحتلة وهو بيدي علبة عطر بغلافها مدها لنجمة حلكها انشك من الضحك اخذتة تكلب بية فتحتها ورشت من العطر مغمضة عيونها

_نجمة: اووويليييي شوف العطرر شووووف

اجتني تشممني عفست وجهي رغم العطر يموووت طبعاً لاحظت هنا كل واحد عطرة شكل وقوي وجذاب الى درجة مو بس علي .

_نجمة: والله عاشت ايد ايد ايد ايدددك
ميتة بهذا العطر كلي شكد سعرة

خلة ايدة على صدرة يهز براسة حجيت بلا ادراك
_شهب: يكول على حسابي خليها

ابتسملي يهز براسة ونجمة انتفضت
_نجمة: هو شنووو على حسابك بكيفك هييي
عيني هاك عطرك هاك ماريدة بطلت

انطتة اله ولا اخذة وهي الا ياخذة دكت روحها تحجي تحجي ولو عندة لسان جان لم العالم من وراها على صوتهم اجة وفقار عاكد حواجبة باوعلنا وهز راسة يسال :: شكو شبيكم

ذبت نفس نجمة فحطت البنت
_نجمة: استاذ كول لعلي لو ياخذ عطرة لو ياخذ فلوسة

باوع لايدها وكال بخفوت
_فقار: ياعطرر؟؟
_هذا العطر مالت علييي

اجت خلتة بيدي تكلي
_عوفية بغرفتة هسة ماشايلة فلوس بالدوام ينطية الي

اندارت على الباب
_نجمة: خالي اجة يلا باي اني ررايحة

_فقار: نجووم نجووم

_نجمة: هاها

_فقار: روحي شوفي موبايلج لاتتجاهلين

عكدت حواجبها وكالتلة
_ماشايفتة والله ما اتجاهل اني ابددد

كلش ضايج وجهها مايتفسر رادت تحجي نجوم من شافتة هيج بس سكتت وكلنا سكتنا من طلعت نيزك لابسة عبايتها وامير كدامها يركض رحتلها وضرغام وراها ماعرف شكد صارلة جاي .

_ضرغام: نيززززك اوكفييي هسة بس تلم نعالاتها تطلع لو اني اطلعهاااا مسحووولة

مشت ولا التفتت علية بصوت ثابت قوي جاوبتة
_نيزك: اريد ارتاح كم يوم ومن ينحل كلشي تعال اخذني

فتحت الباب طلع خالي صفنت بوجهة وهو يباوعلها ساكت تحركت تكلة:: شلونك خالي؟

_هلا بروح خالها هلا حبيبتي

اخذها باسها براسة ونجمة فاتحة حلكها فشلتنا مبين مصدومة .

_همام: ضرغام عمو نيزك يمي ترتاح كم يوم
ورتب وضعك وتصرف وي ناسك تالي تعال عليها يلا جدو حبيبي

مد ايدة لامير اخذة وحضن نيزك امير ركبتة بقت مكسورة على ضرغام يسويلة باي بيدة ويشمر الة بوسات والي صعدو وتحركو بقة بمكانة يباوعلهم منا لمن راحو حتى رمشة مارمش انتبهت لفقار يباوعلة بتركيز وبصوت مسموع كال .

_هسة صار لازم ادور على كواكب .

كواكب...

شالني واني بيدة صرخت وشمرت روحي بالسيارة
_اني امشي وخرررر لاتشيلنيييي

هز راسة فحطان خفت والله خفت اول مرة اخاف من غضنفر احسة مكبسل مو بوعية ابد ماعاندت نزلت بس وخر راح يفتح الباب ركضت اشرد بكل ماعندي طاقة وحيل جن جناح عندي وطرررت بالسما مركزة بالكدامي ما التفتت ولا اهتميت لصياحة وتهدديدة يصيح بصوت عالي قووووي .

_غضنفر: لج اررررجعي تموووتين بس تعوفينيييي

استمريت اركض بلكت اخلص منهم ومن شرهم وكف عن الركض حسيتة وهدد بصوت فحطان

_راح ارررررميج

جنت عبالي كلام كلعادة مستحيل يسويها ويرمي بس صدمني من رمى علية بالجو خفت متت خوف بس ماوكفت وكملت المصيبة الطريق جان واحد طووويل مابية لوفات شعل الجو بالرمى متاكدة طلقة تصوبني شاغت روحي ويصوت عالي مليان وجع صررخت وكعت على وجهي بلوكة جوة بطني صارت موووتتني بس ردت اكوم احس روحي تيبست بالكاع .

تنفست بقوووة التراب صار بخشمي اريد بس اتحرك ماكدرت اجاني يركض رفعني فحطان عتيت روحي منة تكورت جسمي صل علية صل اشك بعظامي تكسرت على هاي الوكعة .

يريد يلزمني وافلت روحي منه شايغة روح رروحي
عصرت بطني بيدة ودرت وجهي عنة ارفع التشيرت اشوفها نزلتة بسرعة وصحت بية بجزع

_كواكب: عوووفني شترررريد مني عوفنييي اررروح

فحطان يحجي كوة والمسدس بيدة نازل بيدة الثانية يديرني علية .

_غضنفر: كتلج لاترحين هاي ولا طلق امشي امشي

صرخت بوجهها بحركة وسحبت المسدس من ايدة لو ما جلب بية جان رميتة ولا يرفلي جفن بقينا نتلاوى هو يسحبة علية ويصيح .

_غضنفر: راح تثوووووور الطلقة ولج عوووفية

_كواكب: انعلللل ابووووك اكتلكككك واخلص منكككك موووت وخلصنااا موووت المن باقيييي عايش

سحبة بقوة ولا فكرت بشي بس ردت اخذة بيدي عن لايسوي شي لان مو بوعية فلت من ايدي بعديش بعد ماثارت طلقة بمنو ماعرف واحد صفن بوجهة الثاني كلبي احسة يريد يطلع من صدري دنكت عيوني اشوف الكاع انملت دم توسعت عيوني بخوف وابتعدت خايفة .

رفع ايدة تنزف اخذ المسدس بيدة الثانية بخوف حجيت اجمع حروفي:: انت انت السبب.. ما ما عفتة بيدي

حولة بيدة الثانية ورفع عيونة بوجهي خالية من اي كلام ماكدرت اقرا بيهن شي او استنبأ.

_غضنفر: هو اني بكل الاحوال ميت على ايدج

رجعت ليورة من حار بيدة يطبة مرض هو مايموت واني ماعندي غير هاي الفرصة اريد اشرد لان خفت واني نادراً اخاف .

ولا همتة ايدي رفع المسدس بوجعي بيدة الثانية لازمة ولا عبالك ايدة متصاوبة وتصب دم تنفست بصعوبة واني ارجع ليورة مخلية ادية ليكدام افهمة

_كواكب: على كيفك نزلة نزلة احنا اصدقاء ونفس الصنف تذكر من جنت تكول ثنينة من الشارع

ابتسمت والخوف مسيطر علية ولاعبالك سمعني بقة على وكفتة صحت بعصبية بية .

_لكككك نزلة نزلة لاتضغطططط على الزناااد
تموووت روحك بس تكتلنييي لا لا نزلة

نزلة ماشر على ايدي
_غضنفر: اصوب ايدج حتى نتساوى؟؟

ضميت ايدي وراي عيوني من الخوف احسهن يريدن يطلعن صحت بخبال .

_لا ولك لا عليك الله لاااا اني كواكب كواكب انييي
شوف شوف من وراك ايدي تخيطت لاترجع مرة ثانية تاذيني وجسمي يخرب ويبقى اثرررر

اشر بالمسدس على البيت وكلي
_كدامي للبيت تمشين بس تتحركين لاتتوقعين غير جسمج كلة خياطااات

رفعت ايدي باستسلام وتحركت كدامة امشي للبيت كل ماريد اسوي شي لو حركة اخاف يصوبني وماعرف وين تجيني الطلقة وساعتها اعض ايدي ندم على غبائي دخلت للبيت مسلوب منه الحياة مو بيت عبالك مجزرة .

التفتت على الباب دخل قفلة ودخل لوحدة من الغرف رفعت شعري اسحب بية بحركة شجابني عليك ماعرف شجابك علية يا غضنفر هم حضي هذا .

رحتلة لكيتة لازم سجينة يطلع بالطلقة رفعت عيوني من ايدة لعبانة روحي باوعت بوجهة ولاعبالك يحس شي طبيعي عندة مثل اليكص بردن قميصة تاكدت شارب مخدرات لو حبوب كبسلة مو صاحي بساعتها.

طلعت والخوف يقرا الف لا والله مليووون بحياتي ماخفت منه بس اليوم، كعدت بالزاوية لامة روحي
ومديت ايدي بجيبي طلعت موزة ممرودة ومناك التفاحة صايرة لينة من الضربة اكلتهن واني من الخوف اكل نيزك تنام .

طلع بيدة لفاف بلعت لكمتي وعفت البيدي اجة يمي مد ايدة وشمر اللفاف علية بدون مايحجي شي
اخذتة اللفة اله لا خياط ولا شي .

_كواكب: انت حيوان؟ ماتحس حشا الحيوان ولك يحس الحيوان هسة بس يوكع يضل يصوول انت طلقة بيدك خيطها روح عقمها خاف تلتهب يصير بيك كزيز صخام

_لفي عدل

_زين وتحجي شبيك ماتكلي شارب شي نعلعلة شيب الخلفك ليش تشرررب

_حتى نعيش

همسها همس واخذ ايدة يكمل لفها بقيت لا اخذ ولا انطي خوفني لو باقية وي الاعرج ولا هاي جيتي عاد هناك اكشن هنا السالفة تخوف بس اني وياة بالبيت .

كمت من مكاني ومشيت على كيف من بعيد لمحتة بالغرفة رحت للباب افتح بية واحاول ما اطلع صوت بس ولايفيد مقفول انداريت لكيتة وراي ماحجة شي .

_كواكب: غضنفر شبيج اني كواكب لاتنسى جنت اعتبرك صديقي حتى لو شوية بس ميخالف افتحلي الباب خليني اطلع

تقربت منة احجي بهدوء عسى ولعل يقتنع اعرفة اني ينفذ كلامي بس صدمني حتى مارد علية

_شوف والله العظيم والخلقنا كلنا اذا طلعت ما اجيبكم بالطاري أصلاً اني ماعندي شي وياكم اعتبرها سفرة وخلصت اروح اعيش حياتي ولو الشرطة تاخذني ادك علية اعترف عليكم انكر وجودكم بس خليني اطلع

_تموتين بس تطلعين منا تموووتين

_الاعمار بيد الله ما اموت تعرف بية واني متاكدة ما اموت بعد نهايتي مو هسة عوفك من هالكلام غوغو خليني اطلع

هز ايدة تخبلت ما اصدك عيوني غضنفر هذا شكيت بية شخص ثاني يشبهلة .

_غضنفر: انسي تطلعين منا

كالها ودخل جوة لحكتة ومن حركت كلبي سديت ايدي وبكل قووتي ضربت على ضهررة خبلني من ماسوى شي وعافني اضرب بية عبالك جاي اضرب الحايط ابتعدت عنة اصيح .

_حسس انت ماتحسس لاضرب ولا كلام احجيي هندي شبيك شبيييييك

فحطت سكت اتنفس سريع كعد بالكاع لازم المسدس بيدة عبالك ريبورت .

_كواكب: افهم ما احجي شي خارج المألوف
كتلك طلعني اروح تريد اعوف دراهم والمنطقة كلها اني خااادمة والله اطلع وحتى شكلي بعد ما تشوفونة .

_غضنفر: بس تطلعين يلا تعرفين حجم الخطر البية انتي جبتج حتى احميج يا ثوووولة
ياكلونج لحم ويشمرونج عظم
ورطتج وياي اقل شي اسوية الج احميج منهم ومن شرررررهم

افتريت بالغرفة بعصبية ارفس واصيح
_كلكم شررر انتووو كوة مدبرة عيشتي لحكتوووني وطينتوها خاف جانت مامطينة الله اكبرررر عليكمممم اريد اعيييش ماتخلون الواحد يعيش

اشرلي بالمسدس
_غضنفر: اطلعي منا اطلعي

رفعت ايدي اسب بية
_نعلعلة الخلفك والخلف الخلفك ياجلب يابطن سطعش جلببببب

طلعت من الغرفة كون انهدمت على راسة وخلصنا منه افتريت البيت صغير، كلش وقديم صحت واني بالمطبخ .

_يكووول المنعل عندة بيت وسياررة وحياة
تفلشش وينك الفكررر وينك بس لا ضامهن علية اي بيها باب وجواب

خليت راسي جوة الحنفية نار صرت من وراة
فتحت الثلاجة حتى سم فار مابيها ريحتها تكتل ركعت بابها بقوة وانهديت علية .

_حتى سممم ماكو بيتك المن جايبني وحابسني تريدني امووت واعفن اشبع عفونة نفسسسك

بصوت ناصي جاوبني
_روحي هسة يجيبون اكل ومسواك

ردت اطلع بس استخطيتة حسيتة مو طبيعي ايدة على عيونة مخليها كعدت يمة همست.

_شبيك غضنفر كول بيك شي اساعدك والله ماغدرك لان صاحبي انت

رفع ايدة عن عيونة ابتسم وبصوت تعبان كال
_كلهم يغدرون بس انتي لا
_حسب لاتصدك اقصد صدك اني ما اغدر
هسة كول شبيك اساعدك

_بس اطلعي وعوفيني روحي كوووووووومي

طفرت من مكاني بسرعة همزين مادفرني طلعت اسب بية قفل الغرفة علية ولا طلع بعد ولا صوت اله سمعت اروح وافتر من مليت دنكت اباوعلة من جوة الباب متمدد وباقي بمكانة تعبت كلش تعبت
طلعت غطا تعبان بس خليتة فوكي حتى انام
وفعلا نمت كعدت مادري بيش الساعة ولا اعرف شكد صارلي نايمة جسمي مكسر من الكاع مطيت جسمي غسلت وجهي

افتريت بالبيت كلة علية مالة اثر بطني من الجوع تطلع صوت رحت للثلاجة مترددة افتحها وتطلع فارغة ساعتها اكسر البيت لو اموووت ما اتحمل الجوع اني .

خليت ايدي على حلكي اضحك فدوه فدوه وسبع فدوات الثلاجة متروسة من كلشي وشغلها حتى ريحة خايسة مثلة مابيها طلعت طماطة غسلتها واكلتها هيج ماعرف اطبخ طاح حظك خو جيب اكل جاهز هسة يلا شسوي.

مر وقت روحي طكت لاملابس عندي ولا اكل بية مابية سويت طماطة كلي طلعت ماصخة مدري حامضة تلعب الرروح حشا نعمة اكلة كوة اكلتها

ولهنا غير تنتهي محد وصلني يوم كامل محبوسة بالمجهوم ريتة انهجم على راس صاحبة اروح للشبابيك بس اريد اشوف شي لو الوقت ماكو
مغلف ولاواضح شي منة .

اريد اصلي ماعندي شال ولا تشيرت ردن عفت الصلاة وشلون جان بواهسي اصلي مرت الساعات بروحي والله بروحي جنت نايمة طفرت على فتحة الباب دخل كمزت علية اريد اخذ المفتاح واطلع اختنكت سحبة بقوة عني كلة تراب .

_غضنفر: هانت هانت بس كم يوم

نزلت دموعي اصيح واريد بس الوح المفتاح
_بس ارريد اطلع ماريد شيييي

_غضنفر: اصبري اصبري لاتضيعين تعبي راح اساعدج واطلعج على موتي اطلعج ما اخليج بس ابقي هنا

_مااا ماااا طلعنيييي

دفعني وخلة علاليك وطلع قفل الباب دفرت صرخت غلطت فشرت ماخليت تعبت وطحت بالكاع ضهري صار على الباب ودموعي نزلت طاقتي صفرت، اسمع نفسة العالي يعني موجود ما راح

_كواكب: فدوه طلعني فدوه راح اموت وحدي هنا
اذا اموت خطيتي ماتعوفك تموتك وانت عايش غضنفر تسمعني طلعني

بعد فترة كلش طويلة رد علية.

_راح اطلعج منا للابد اخذيها كلمة مني
وروحي هاي روحي ما رايدها بعد بس اطلعج منهم وامن عليج

اختفى صوتة وهو اختفى سحبت الاكل واكلت وهيج مر وقت اضافي ماشفتة ولا اجة ولا حتى سمعت صوتة عن بعيد او قريب .

جنت كاعدة مطلعة سلة الطماطة واسوي دوائر بالطماطة اخلي بنصهن بصل وهيج العب حتى يخلص الوقت انفتح الباب طفرت اركض لاكاني يلهث مستعجل كلة ترراب جان لابس اسود بعدني ماحاجية باستعجال كلي.

_يلا اطلعي افررراج افرراج

ضحك فرحان واني مامصدكة فتحلي الباب والضوة اجة بعيوني غمضت وخليت ايدي من الضوة اضحك بصوت عالي وهو يضحك على ضحكتي يكلي .

_راح اخلصج منهم اخليج تعيشين صح بعيد عنهم

هزيت راسي وطلعت للشارع سيارة بالباب طابكة اشرلي اصعد بيها وقفل الباب حسيتة رجع غضنفر الاعرفة خلة ادية منا ومنا يمم حلكة يصيح بصوت عالي المخبل رجع .

_غضنفر: روحي فانتي حررررة لوجهة الله
اطلقت صرراحج هههههههههههههه ام دجة عيشي والخلقج طلعتج بعد ماكو الاعرج

اجة يركض ويضحك مامصدكة بروحي حتى ماكدرت احجي بحرف راد يصعد بالسيارة واجة سيارة طااايرة شهكت وكلبي عصرتة عصر من رمو طلق بعد ماكدرت اباوع وادير وجهي ..

يتبع.....

_____________________

اللهم صلِّ على محمد وآل محمد

بارت طويل هو علساس جنت انزل تكملة قليلة بس كلتها بارت 🫢
توقعاتكممم
تعالو نتناقش بالبارت بالقناة