المنجمة الفصل التاسع وأربعون 49 - بقلم كفايه بتاريخ2024/12/18

المنجمة
الكاتبة_كفايه

لاتنسون متابعة الحساب
تصويت وتعليق بين الفقرات لطفاً 🧡

ياعلي مدد ♕

____________________________

_كواكب: خفت على نيزك لان تعبانة بسبب الحمل حتى ماكدرت اسالها شبية اشر بعصبية على الباب

_ضيغم: غضنفر جاي يريد يشوفج

فتحت عيوني بصدمة مامصدكة راح اشوفة لثواني وضحكت مامصدكة:: عليك الله غضنفر هههههه

_ضيغم: ادخلن جوة راح يدخلن

شردن اخواته وهو يباوع لبسي رفع حاجبة ماقابل
_البسي جبة وشال هيج تشوفينة

هزيت ايدي علساس مايدري لو شي متغير علية هي ملابسة عادية ومابيهن شي مشيت بدون مارد علية بس ارد علية مااضمن لساني شنو يخرط
فتحت الباب وهو وراي شفت غضنفر مدنك راسة وراسة مكورع وصاير ابيض رفع راسة ضحكت من شفتة والله كلش فرحانة بشوفتة بقة يباوعلي مصدوم .

_كواكب: ها ولك شلونك

_غضنفر: ههههه زين ولج

_ضيغم: تبقون بالشارع شنو

_غضنفر: لا راح امشي بس اسلم عليها واتشكرها

_كواكب: فقار طلعك فدوة لكلبة روح تشكرة

_غضنفر: صدك فدوة لكلبة تشكرتة وانوب لكالي شغل

_كواكب: هاي اني كتلة بعد شتريد مني

_غضنفر: لا عمي وين الكة منج انتي

رفع عيونة لضيغم وكالي
_الف مبروك الزواج ان شاءلله الذرية الصالحة

_كواكب: مادريت غير لكيت اهلي ههههههههههههه
تذكر من ندور عليهم وديتني لبيت الناس عبالك اهلي تالي طلعو ذولة اهلي كلهم كتلهم على اهلي ضليت بس انت

_غضنفر: دريت ماتشوفيني مامصدوم

دمعت عيوني وخنكتني العبرة شكد جان يضحك علية من اكلة الكاهم اتذكرت سوالف القديمة وعيوني دمعت .

_غضنفر: يلا اني رايح مع السلامه

_كواكب: دوكف ما كتلي وين راح تعيش شنو راح تسوي

_سهلة يمعودة

_كواكب: ليش ماتكعد بيتنا شدكول

_لا يمعودة سهلة عندي فلوس جواي

_رجعت للحرام ماتبدي بداية جديدة

_الفلوس فلوس حلال وداعت سجينتج
ماتنطينياها بيها بركة

_ضامتها ما انطيها

_يلة يابة اروح اني

_دروح بس يا ويلك لو رجعت لشغلك العاوج الا اخلي الشرطة تخليك بسجن جوة الكاع

_لا بعد التوبة راح ابدي من جديد

_وازوجك بس تستقر ولك غضنفر والعباس اعرف بنية تمووووووت بمنطقة دراهم علما تستقر نروح نخطبها الك

_وترضة بيها

_ترضة اهلها فقرة وابوها ميت حتى ماتدرس

_منين هاي بلة وين صاير بيتهم

_شايف بيت ام عون ابنها الحرامي

_اي اعرفة

_بصفهم بيتهم صغير جنت اشوفها من افوت ومرات احجي وياها

_راح اشوفها حتى استعجل الم روحي

_ضيغم: اي شي تحتاج اني موجود بشنو تريد اساعدك حاظر

_غضنفر: رحم الله والديك ماتقصر

سلم وراح عدة هواي حجي بس لان ضيغم موجود ماحجة والا هو يخرط شكد مايسكت دخلت ضيغم ضايج بسرعة طلع ماحاجيتة كال شغل عندي .

البيت فارغ البنات بية ويدرسن ومن يجن خالاتة يغثن غث واني شلوني اتحملهن عود يواجبن الخايسات بس سلمت وعفتهن صعدت لغرفتي
خابرت على نيزك اطمن عليها نزلت كتلني الجوع
لكيت ياسمين طابخة فتحت الكدورة اكل وامدحها

_خالة مو دكولين مو خوش جنة هاي ترة بس اكل اني

_ياسمين: متعودة اطبخ اكل عوافي

مرات افكر شلون قبلت بيه كجنة وهي تعرف شلون عشت بس اغلس واكول لا حبابة ياسمين .
تعشينا وهو ما اجة البيت ملل اتذكر من اجيت شكد جان بية روح لان كلها متجمعة واخواتي موجودات..

اخذت رضا وطلعت برا كعدت بالحديقة نلعب ونسولف راح للشارع بعد مارجع طلعت وراة مشيت سحلتة وهو يريد يبقة يحب الشوارع نفسي .
ماحس الا سيارتة طبكت ونزل شافنا وهز راسة رضا طفر كدامة دخل رحت وراة امشي برهاوة

_اكلك وين جنت انت

_عندي شغل ليش طالعة بالشارع

_يعجبني

عفتة ومشيت صعدت للغرفة كعدت محظرتلي عركة دخل سد الباب ونزع سترتة فتح الدكم
واني كمت .

_اني رايحة لاهلي بعد ما اضل يمك

رحت للكنتور اطلع ملابس عبالة اتشاقة شافني هيج سحبني من ايدي نترتة ماعافني لزم وجهي بيدة:: شكو شبيج

_هو طايحة حظ تزوجت امداني لو باقية بدون زواج هسة ابوي سفرني ونسي

_تردين اسفرج؟

_ماررريد منك شييي وخرررر

_ليش تصيحين علية؟

_ولي ماتحبني بس تضحك علية حتى ازوجك

رفع حواجبة مصدوم
_مسويلج شي؟ ماذيج بكلام بفعل كولي

_ماريدك هنا ضوجة وكأبة حتى محد يتابع وياي اخبار ولا يسولف ارجع لاهلي اضحك على اخواتي

_يلة تعالي نتابع هي توها بدت الاخبار بالنهار يعودونها

_ماريد عمي عوفني انت ماتحبني جذبت علية وبس ضايج لان اجة غضنفر واني شكد كتلك شنو علاقتنا

_هسة اني حجيت شي وياة لو وياج؟؟

_ارجع لاهلييي عوفني التهي بالشغل احسن
اني بيش الكيلو؟

زعلت وطنكرت من صدك فلت الملابس من ايدي وشالني يبوس بوجهي ويكلي .

_اسف والقران اسف اذا حسيتي هيج

_الا اصير بالبرلمان واصير احسن منك
واتفيك عليك

_مابيها شي كولي حتى اقدملج على الخارجي ادرسي وادخلي جامعة وصيري

_بسيطة واخلي حماية بس تحجي يسحلونك

ضحك نزلني على القنفة وشغل البلازما جاب الريموت وكعد يدور على اخبار شي يخص السياسة خلاة على الشرقية وكعد اندمج يتابع
واني بالي مو يم الاخبار بس اباوع علية راد يحجي وانتبهلي صافنة علية ابتسم وسحبني اله اكثر

_ها عيني ام الصفنات
_منو الصافن عليك انت باب جرجوبة

ضربني راجدي خفيف يكلي
_الفاظج لج
_ابو العطور بكيفي
_مدوخج عطري والقران

ضحكت وخليت ايدي على حلكي
_تريد الصدك اييي عطرك فد شي خرافي
يخليني اغمض عيوني واستمتع بية شسمة عليك الله

_اخر شي تعرفينة اسم العطر
_ليش عيني
_احسن
_لا عليك الله كول شسمة
_مركب اكثر من نكهة
_بلة شنو العطور المخلوطات
_ماعرف للامانة اكو ولد يسوي عطور حسب الشخصية ياخذ منه معلومات شغلة وشنو يحب
يكول الهادئ عطرة يفرق عن العصبي يمزج عطور
ويخليك تجربة

_قصة العطر اطول من قصة حياتي
_ولله جد كلنا ناخذ منه عطور من زمان كلش
مانغير العطر باقين ثابتين علية

_اريد منه عطر
_ادللي اجيبلج من امرلة
_كلة مال وحدة بالبرلمان

ضحك لفني بيدة خنكني
_ضيغم: شو مصدكة السالفة تردين تصيرين بالبرلمان لو للشقة

_للشقة هي لعبة اصير بالبرلمان
_ليش اذا بنفسج ما اخليها ادرسي
_لا ما افكر بالدراسة بس يمكن اطك براسي وادرس

نصة البلازما جعصني اختنكت ضربتة اكلة
_شبيك خنكتني
_سمنانة ولج كوة شلتج
_منيلي
_هو غير اكل ونوم
_هم خلة عينة علية
_هههه لا اكلي عوافي هو اريدج تسمنين
_تدري صدك اني هواي اكل مدري ليش
_هسة اكلي خايفة عليمن
_عرفت ليش اكل هواي
_ليش
_ماحجي
_اخنكج اذا ماتحجين ليش

صار فوكي يجعص ويدغدغ خنكني صحت بيه يعوفني حتى احجي نهضت عيوني مدمعة من الضحك مسحتهن وكتلة واني اكركر ..

_هسة ردتة سر شبيك لازم كلشي تعرف شكد فضولي
_بس وياج فضولي بامتياز

_شوف هاي وين ما الكة اكل ثوابات محرم وغيرها شكد ماينطوني اكل حتى اعوض الايام الما اكل بيهن زين وهم جسمي تصير بية قوة مو اتعب بسرعة ويطكني فقر دم فمتعودة اكل كلشي مادام متوفر

اختفتت ابتسامتة رفع ايدي باسها وكال
_سودة علية

سحبت ايدي حتى اغير الجو
_اكلك جعت ما اكلت زين من وراك
_بدلي نطلع ناكل برا
_اييييي ايييييي سبع وخوش رجال طلعني عفية خليني اتونس اشوف العالم هسة دكول علساس ماطالعة

_طلعة عن طلعة تختلف
_والله خوش تحجي انت صدك اني اطلع ما اتونس ابد بالسوك وبالشارع اركض للشغل

_اخذج كل يوم مكان ادللي علية

ضربتة راجديات عشوائيات ما اتحمل هيج لطافة خربطت شعرة اكثر من مرة وكرصتة بخدة طفرت ورجعت بستة بوسة ام الطكة عفتة يضحك ورحت بدلت على السريع وكفت كدام المراية اشوف روحي احس روحي اخبل سبحان الله قبل اشوف روحي ولا حلوة ولايهمني شكلي هسة غير

لبست فستان شتوي طويل جاي مسطرة لون اسود وقمصلة جلد جوزية بوت شتوي جلد استود وحهي مااخليلة شي بس خليت عطر نزلت جان يم اخواتة يكللهن حتى يطلعن ويانة بس ما قبلن بقن يدرسن

طلعنا لمطعم عائلي اكلنا ومشينا نفتر شفت ابو البلبي سحلتة ناكل اخذت كاسة هو ماكل لان خاشوكة مو استعمال واحد هو كال شبعان بس اعرفه اني اكلت وكلت للرجال..

_عمي خليلي ماي بعد

خلالي وهو يخزر بية من اجو ولد صارت عيونة بكصتة يكلي استعجلي شربتها كلها بدون خاشوكة سحبني من ايدي وطلع كلنس اخذتة منه امسح حلكي .

_المثقف ينغار
_طبيعي مو رجال الما يغار على مرتة
_ها صح نسيت اني مرتك اكلك صبا شخبارها

_اشتعلت روحها شعندج وياها تجيبين سيرتها
_والله عيني خل اكلك من هسة لو سامعة حاجي وياها لو جايتك لو لمحتك تفكر بيها تصبح بالمغيسل

_يا ستار ياربي
_مو مرة الما تغار على رجلها عيوني

هز راسة يضحك الحمدلله متحملني ويعرف شخصيتي وسوالفي سحبتة من شفت محل حلويات .

_الحجي يصرف طاقة جعت

ضحك واخذني للمحل جاب حلويات من كل شكل منظرهن يشهي رجعنا للسيارة اكلت وهو اخذ قطعة وحدة اكلها عكسي ولا اشبع مدهورة

_اكلك ليش مانجيب حسين واخوة يعيشون يمنا شو البيت فارغ وهما حبابين

_ونجيب امهم وغضنفر ودراهم بعد
_ومحمود خوش ولد هم نجيبة
_هذا مو بيت ملجأ
_اني احب هيج اكلك هسة انت ونستني ونستني خل نروح لاهلي واشوف اخواتي

_يلة امشي احرك كلب اخوتج
_لا عيب ترة استحي هسة بس اشوفهم اسوي روحي ماعرفك

ضحك يكلي
_اعرف سوالفج هاي برا الغرفة عبالك عدوج

ضحكت على روحي صدك استحي منهم بعدني مامتعودة وصلنا لبيتهم نزلت اركض اعطر بالباب ضيغم بيدة علب الحلويات دك الجرس يكلي:: هذا المن مخلينة

_اول مرة اشوفة تدري
_حقج يابة هو منو يدك جرس بعد

فتح الباب فقار تفاجا بجيتنا فتحلي ادية ضحكت وشمرت روحي بحضنة بوسني واخذني حاضني

_ضيم ترة فقار احسن رجال بالدنيا

_ضيغم: ها هيج صارت

خليت ايدي على حلكي اهمسلة عن لايسمع فقار
_وانت هم احسن رجال

ضحك فقار دخلني وصاح
_شوف منو اجت يابة

جانو ملتمين بالصالة وصينية جاي كدامهم
الفرحة بانت بوجوهم عبالك منو داخللهم ولا جنها كواكب الجانت محد يريدها غير اخواتها كام ابوي يكول:: هلا بحبيبة ابوها

احس روحي تطير من الفرحة واخيراً لكيت ناس تحبني تفرح بوجودي تدللني عشت محرومة من ذني كلهن ركضت حضنتة وهو يبوس براسي ويسال عن احوالي رحت لامي طارت بية
نزلن اخواتي شهب بطنها كلش بارزة ونجوم قليل سلمن علية فرحانات بجيتي نجوم شاورتني

_ول بوية تموتين شنو هالجمال
_صدك والله
_والله عبالك جاية من خارج البلد شوفي البس الخلقة يمااااا اريد ابوسج بعد

بوستني وكلهم يباوعولنا كعدنا ونجوم راحت تسوي الضيافة اجت ود تضحك تصدكون ياناس حتى بت اخوي طلعت عندي وتحبني ؟؟

كلنا اجتمعنا قبس والبنات خلصناها سوالف
_اسامة: بابا ماناوية تغيرين جو خارج العراق

_ضيغم: لا ابد ما ناوية انت تكعد تصفن
كلت اريد اسافر سافر وحدك عوفها الي

_اسامة؛ ماكو احلى من السفر عندي
اذا ما اسافر اتمرض

_ضيغم: سافر بالعافية عليك بس لا تعرض عليها هيج عروض مغرية

ضحك وضيغم تنرفز عبالة اروح واعوفة همست اله بصوت ناصي:: ماريد اسافر بس فرفرني هنا اشتريلي لفة لبلبي حتى ما اخسرك فلوس

ضحك وكلهم انتبوهو علينة سويت روحي احجي وي ود كام كلي يلا بوسوني كلهم عبالك راح اسافر

_كواكب: قبس اشرح لشهوبة اذا ماتعرف شي
مو تغلس

_قبس:صار بعيوني

_وانت فقار نسيت شحجي شو انت خوش رجال
ما اريد اوصيك

كفخني قبس يكلي
_واني مو خوش طلعت
_لا والله انت خوش بس هاي لان تدرس حالة خاصة شبيك

سلمنا عليهم ورجعنا للبيت فد فرحانة لان رحتلهم وشفت محبتهم واهتمامهم، رحت بدلت ضيغم متمدد على الجرباية فتحلي ادية .

_اكلك ليش ما اجي طايرة اشمر روحي عليك
_دتعالي خطوتين هنا

ضحكت ورحت يمة سحبني يبوس بركبتي دفعتة وجعني رفع راسة يكلي:: اتاكد من الوشم اصلي لو يوكع

ضربتة بقوة
_بس عوف وشومي لاتتقرب علييييهن

ضحك سحبني من ايدي
_منو كالج دكدكي وشوم بجسمج
_واني ادري راح اتزوج ويجي واحد مسوي روحة مثقف يعضض بيهن
_محد شايفهن مو؟
_لااا حتى اخواتي ما مراويتهن الهن

_عفية حبيبتي بارك الله بيج

مسح على شعري بلطف ورفع ايدي يبوس بالوشم صفنت عليها اتذكرت الحرك شاغت روحي من حاجاني عبالك سحبني من ذاك المكان

_ها يروحي ها كوكبة

_لا بس تذكرت

دمعت عيوني وخليت راسي بركبتة شدد حضنتي
_ضيغم: لاتذكرين شي مو حلو

_لا... اتذكر من تخليلي مرهم حتى يطيب
اتذكر من تنشف شعري لان ما انشفة
اتذكر من تعوف كلشي وتبقة يمي
اتذكر ذيج الفترة من جنت وياي

_ماتذكرين من حصرتج على الباب وبستج بشفتج

رفعت راسي خزرتة وهو يضحك
_غير كتلتك وشبعتك حصو

_ها ومن بالليل ماحاجيتيني بوقتها طعمها غير
لان ماعرضتي

_اهووو عمي كافي فساد
_ماكو كاميرات يلة حبيبتي شو بوسيني
_اااني ابوسك ليش عيني
_مرتي وزلمتج اله حق بيج
_ما ابوس اني اليحبك يبوسك

_يعني انتي ماتحبيني بس اني احبج؟
حسيت ما تحبيني بس اني حارك روحي عليج

هز راسة باسف وذبلت ملامحة بقهر انطاني ضهرة وتمدد طفة الضوة من يمة ندستة من ضهرة

_شبيك مو كاعدين نسولف
_تعبان عوفيني
_منين تعبان اكو نسوان متعباتك رايحلهن

_لاتكلبين السالفة مو ماتحبيني عوفيني

عبرت لجهتة دفعتة ليورة لا اطيح حضنتة ما بادلني اباوعلة مغمض ولا يمة مديت ايدي اتلمس وجهة .

_تؤ نريد نام

عصرت خدودة ورجعت عصرت شفتة بيدي
_نام بس لاتضل تحجي بكيفك
الخايس لو ماحبك المن قبلت بيك وعفت اهلي الجدد واهتمامهم بية؟؟

ماترد ديلا ماترد أصلاً اني ما احبك شايف روحك مثقف وحلو عبالك ميتة عليك بس ردت اضحك عليك واخلي بيك كأبة تصير

_اذا ماتحبيني شعندج بحضني؟

_بكيفي

سكت ولا حجة شي مامعقولة هيج ينام ويعوفني صرت العب بصدرة اكتب ارقام وحروف تالي اتذكر وشمي ارسمه علية بلكت انعس وانام
لزم اصبعي وخرة من صدرة وهو مغمض عبرت للجهة الثانية صرت امرر ايدي على وشمة اسوي روحي ارسم بيه ماتحمل كلبني صار فوكي طاك عيونة .

_شبيج تتحارشين
_بكيفي عندك اعتراض؟
_ولي يلة نامي بعيد عني

رجع دار ضهرة عبرت على ذيج الجهة لعبت بعضلاتة اضرب عليهن .

_احنا سباااع ولد هالكاع ياجف اليلاويناااا
ضيغم ابنج يا كاع هد اتلكية
لازم بيكيسي وشاجور يحارب بيه
سبع وما دنك راسة مشهودتلة بصولاتتتتة

ماتحمل ضحك وفتح عيونة
_ضيغم: الريس محد غنالة هيج
_يروحلولك فدوة تسواهم كلهم

غير ملامحة للجدية ورجع غمض عضيت ايدي بحركة هسة من اكتلة هم احد يحاجيني عفتة ورحت نمت منطيني ضهرة الوصخ ضليت احوس ماكدرت انام احس تعودت على عطرة ودفو جسمة يكول صارلنة سنة متزوجين ضربتة بضهرة طلع صوت

_تعال ابوسك يلا تعاال تموتون على البوس
تشتغلون وطايح حظكم كلة علمود البوس
تعال ابوسك لا وجهك الصبح يطكك حب من الحرگة

اهتز ضهرة يضحك واني اضرب بيه دار ولزم ادية
سحبني علية:: يلة بوسيني
_بس عوف ادية

عافهن لزمت وجهة بستة وبالاخير عضيتة بقوة وطفرت من الجرباية امسح بشفتي .

_اسفة ضيم بعد ما اعضك
_ااااااااخ اذا الزمج

عض ايدة بقوة صاير عصبي لان عضيتةاشرت بيدي

_يلا كوم حتى اكتلك انت مال عركات مو بوسات
دكوم الا اخليك تبجي

كاملي خفت لاصدك يكتلني بس مابينت سديت جف ايدي حتى اضرب بوكس بعدين تذكرت سجينتي ركضت على الجرار اطلعها كمزت من لزمني من خصري قوي .

_ولج اطلعي وين رحتي وعفتيني خلينا ننتصر على الاعداء

رفعني من الكاع ومشة بية رفست اريد افلت بروحي منه شمرني على الجرباية وضحك بخبث
_اليوم اعلمج الاعداء منو

_واني صارلي شكد اهوسلك امداك يلا الا اكلبها
احنا مو اسباع وضيغم مو ابنج ياكاع
ماهد بيكيسي وشاجورة
ومامشهودتلة بصولاتة

_تفيدج هاي الموشومة

_______

_نيزك: قربت ولادتي جهزت ملابس الطفل وبالي اتذكر امير ماجهزتلة ملابس كواكب جابتلي
بس دنيا جهزتها وعلى بالي صايرة هالايام اتذكرها وكلبي يعصرني اصفن والكة روحي عركانة وامير يلعب وي علي يناغية رحت توضيت وكعدت اصلي
دعيت من كل كلبي ما ترجع حالتي ولا اتذكر دنيا

بطني توجعني ولا مرتاحة بنومة لو بكعدة يوم بعد يوم نفسيتي تسوء من اتذكر ولادتي القديمة
ضرغام من شافني كال اخذج للزيارة كيفت لان صدك يحتاجلها زيارة خابرت كواكب تجي وياي
طلعنا الصبح مرينا عليها ضيغم بدوامة خابرة ضرغام حتى يصير عندة علم اجت تركض بيدها شال شمرتة على راسة وصعدت خايفة .

اخذت مني علي وطول الطريق مانزلت عينها مني خايفة علية هي بولادتي ثنينهن هي وياي ابد ما عافتني واني ما ارتاح اذا مو هي وياي .

_ضرغام: ام دجة حليانة شنو الزواج يحلي
_لا انعديت من ابن عمك حلو وصرت حلوة
اني خايفة على اختي وهذا ابنها لا يطلع ازرك يشبهك

_محظوظ اليشبهني غير اخبل اسمر حنطاوي
_غير ازرك محترك يا حنطاوي يا اسمر
_بابا الزلم الخشنة يكونون سمر قابل مثل رجلج يلمع وفاهي

_فااااهي شنو شيخ الزلم هذا سبع مشهودتلة

_هو عبالة الشيخ ياخذ فصليات يمتها صار شيخ الزلم

_احسن منك خوش
_لا موخوش

_نيزك: هسة شبيك ضرغام مو طالعين نزور

_ضرغام: حبيبتي اني وبت عمي الملطلطة
_ماكو غيرك ملطلط
_لا والله انتي ملطلطة وخبيثة من وراج انكتلت
لان شككتي الصفحة العدنا بيها امتحان

_كواكب: بوية اني كواكب اعرفك تعرفني
_والله لو ماعرفج زين مدري ذني شلون يحبنج
باب جرجوبة

_كواكب: هاي اسوي عليها دم امثالي لحد يبوكهن
بس اني اكول باب جرجوبة خوش

_نيزك: بوية كافي لاتتعاركون

_ضرغام: لايابة عليمن نتعارك هسة اروح ادعيلها
الله يعقلها وتبطل فرفرة ويرزقها بالذرية الصالحة
الما تشبهة

_كواكب: واني ادعيلك كون تجوز من النسوان

_ضرغام: اختج هي جميع النساء بالنسبة الي

سوالفهم ماتخلص نزل جابلنا اكل لان يدري بكواكب تجوع يوكل بامير يكلة ..

_صير مثل خالتك ماتخلي اكل زايد وراها

_كواكب: راح اغصصصص راح امووووت

_منو وياج بس انتي خالتة

وصلنا اشرتة لكواكب احرام الصلاة بدون محد يكلة اخذتة منه لبستة ولزمت ايدي وامير لازمها وعلي عد ابوة من ردنا نزور ضرغام اخذ الجهال يزورهم واحنا وكواكب رحنا وحدنا ايدها صارت ثلج وترجف باوعتلي مسحت دموعها النزلت

_كواكب: راح ادخل للامام واني متاكدة مو بت حرام

زرنا على راحتنا وطلعنا سوى لكينا ضرغام متمدد مخلي على بطنة علي وامير يلعب بشعرة ويسولف علية
كعدنا يمهم شوية وكمنا دخلنا مطعم اكلنا ورجعنا

صار عندي وجع قوي وجهة الفجر خابرت كواكب خطية جانت نايمة فزت مرعوبة بخوف دكلي .

_ها نيزك لاتجيبين انتظريني اجيج

ضحكت والالم يدك بية بوست الجهال وشميتهم نايمين عفتهم ضرغام جاب جنطتي وكعد يلبسني جواريبي ماكدر اكعد لفيت شالي واخذت عباتي منه خابر على امة تبقة يم الجهال واني لازمة ضهري وافتر وهو وراي يفتر باسني وشمني ايدة وصوتة يرجفن .

_بعد لاتحبلين صارو عدنا تلاثة بس هالمرة
_ضرغام امانة ديربالك عليهم
_امشي واسكتي لاتجلطيني راسي كام يوجعني
احس ضغطي راح يصعد

رفعت ايدي الة
_دنك ابوسك

_لا لا امشي من تجيبين بوسيني

راح يفتر بتوتر وخوف رجع سحبني يبوس بية ولازم وجهي بيدة:: ارجعيلي سالمة
اني روحي متعلقة بيج لاتاذيني

طوطت السيارة فتح الباب واجت ذهب وسهلة علي جايبهن نزلت ذهب وسهلة كالت اروح وياكم
رحنا بسيارة علي ضرغام كاعد يمي لازمني ويعصر باصابعي حتى مايكدر يحجي من الخوف خابر ضيغم علية كلة يلحكنة للمستشفى وخابر على فقار يجيب البنات يم الجهال
وصلنا لكينا كواكب وضيغم برا واكفين كواكب احسها مو بعقلها من الخوف شافتني وتخبلت
اخذوني لصالة الولادة وهي وضرغام يتعاركون وي الدكتورات حتى يسوولي عملية لان كلبي تعبان والدكتورة دكلهم...

_مايحتاج العملية بيها امل كلش جبير طبيعي
وهي كل ولاداتها طبيعي

_كواكب: والعباس اذا صار بيها شي ما انشوف الا انتي

_اهدي حبيبتي على شنو خايفة اول مرة تجيب
والولادة الطبيعية ماتاثر عليها

ساعات مرت ولدت
جابو الطفل مسبحينة ومكمطينة ضرغام شايلة
يهمس وكواكب يمة يكللها
_عيونة ملونة يشبهج يخبل
_والله صدك يشبهني غير اختي تحبني اكثر منك
حتى صار يشبهني

ابتسمت على مناكرهم واخذت الطفل اباوع بشكلة
_نيزك: ورة الاربعين يلا تبين لون عيونة لاتحكمون من هسة

_كواكب: يشبهني بكيفج ليث حبيب خالتك وروحها
انت تشبهني

رجعنا للبيت ضرغام ذبح ذبايح لوجهة الله وزعوهن والبنات بقن يمي تلث ايام ورجعن بس كواكب بقت ضيغم يجي ينام بالاستقبال ولا عافاها وهي تشيل هذا وترجع هذا وخطية بالليل ياخذونة مني يسهرون علية حتى انام اسمع مناكرهم وضيغم يصيح بيهم..

_اريد انام ماتسكتون لاشغل ولا عمل

_ضرغام: دروح بابا اني وبت عمي شعليك روح نام اخذ راحتك

_ضيغم: حتى تتكافشون

صرت زينة وضرغام طرد كواكب يلا راحت كللها
_تسوينة زلمة يحجي يلا ترحين ورجلج

تعاركت وياة وطلعت وبقت تجيني كل يوم بالليل من غير الاتصالات بقت يمي ذهب وسهلة ماخلاها عمي هواي اخذها عبالك متزوجين جدد
كعدت الصبح لكيت ضرغام كاعد مخلي ليث بحضنة وامير يباوع بوجهة يكلة ..

_ضرغام: مو تشبهة كواكب ام دجة؟
_امير: اي والله

رديت علية
_حتى ماتنسة ملامحها وين ماتروح
_مابيها شي أصلاً احبها لاختج

كعدت يمة خلة ليث بحضني دنكت العب بية وامير راح يشوف علي ماحس الا يشتم بركبتي رفعت عيوني باوعتلة .

_احبج اني تدرين؟

ضحكت وهزيت راسي
_اي

_والله مو بس احبج احسج روحي
من الدنيا احب كواكب لان من وراها تعرفت عليج
واحب هذا البيت لان خلاني اشوفج مرة ثانية

_احب الصدفة الجمعتني بيك

_واني؟

_شلون ماحبك العوض انت

رفع ايدي يبوس بيها ويكلي
_ضاملج مفاجاة تخبل راح اعوضج عن كلشي عشتية بسببي ومو بسببي كل دمعة اعوضها بضحكة كل حركة بسعادة تتعوض لاخر انفاسي
اعوضج واسعدج ام عيون الطاكة تستاهل عيونج
الفرح

_الله يحفظك النا ابو علي

_ابني الجبير امير ماترهم ابو علي

ضحكت كلبي ينبض بالسعادة طلع امير يصيح بية
_الي بابا الي يبسي

كام ضرغام جابة وخلاة بحضنة فتح كماطة
وامير يلزم بيدة يبوسة هنا وصارت عندي عائلة
وحياة مستقرة بعد تعب وقهر وضيم رب العالمين عوضني بيهم .

اني نيزك البنية التزوجت بعمر صغير لشخص مابكلبة ذرة من الرحمة عشت وي عيال ضالمة قاسية ماتت بنتي بيدي واتهموني بقتلها
تخبلت وضنيت الحياة خلصت لكن طلعت حامل
وجنت كارهة روحي مو بس طفلي .

امير صار قطعة من روحي وتعرفت على انسان
زرع الله بكلبة محبتي ومحبة ابني عانيت من ماضية بس رب العالمين نصفة ونصفني
بحياة مستقرة واطفال منورين حياتنا .

_______

_جوري: عندي دوام بالجامعة مخلصة ومنتظرة الخط صديقتي جابت النة اكل وبقينا نسولف بالحديقة وناكل مثل كل يوم .

_اكلج جوري الولد الجان يباوعلج وراج

خفت حتى التفتت صار فترة يكللي اكو ولد يفتر ورانا بس ماعبالي علية بعدين انتبهن وراي يفتر وعيونة علية .

_جوري: يمة خفت بس لايخطفني مثل القصص
ويطلع سايكو ومهووس بيه

_ها عيوني كمتي تقرين قصص
_ورد لزكتلي الا اقرا يمة اكلج حبابات وصلني للخط يلا ترحن

ضحكن علية صدك خفت هسة يخطفني وتصير قصة من قصة كملت بسرعة اكل ومسحت ادية بكلنس مبلل اعدل بوجهي بشاشة التليفون..

_ماعندج نية تشوفين شكلة؟
_جوري: استحي ماكدر اباوع اكو هواي ولد موجودين تصير نظرة علية يلا بنات خل نكوم
الخط حيوصل

كمت قبلهن لبست جنطتي وهنا بعدهن ياكلن على راحتهن انتظرتهن بين مايخلصن ويلمن الاكل فتحت تليفوني اكلب بية وفزيت على صوت صديقتي دكلي .

_ولج اجةةةة اجةةةة

كلبي من الخوف طار ردت اطكها بركضة عبالك حرامي جايني صرت اتلفتت منا ومنا اريد افلت
بس لحظة وكفت مصدومة من شفت سمار جاي باتجاهي معقولة هو نفسة اليحجن عنة البنات !!

_ولج اجة اويليييي شوف المشية والنظرات

سكتت واني انكطع نفسي من صار قريب مني
_سمار: مرحبا بنات

ردن علية الا اني متعجبة ليش جاي
_سمار: جوري عندي كلمتين وياج احجيهن
واروح

_احجي

_اي بس امشي

باوعت لصديقاتي اخاف امشي وياة من دخلت الجامعة واني لازكة بالبنات اذا يجي ولد على المواد اباوع لصديقاتي حتى يجاوبن نيابة عني
صديقاتي يعرن حالتي لمن الاكل وراحن يذبنة بقت عيني عليهن راحن لطريق الحمامات .

_سمار: شبيج وجهج صار احمر ترة ما اسوي شي بس احجي

_شـ.. شنو احجي

_يا وردة الجوري الفواحة تدرين بيه خطبتج كذا مرة واخوج معند الا تكملين جامعتج يكول بعدها صغيرة بس بنظرة صغيرة بالحقيقة لا عمرج مناسب للزواج فهسة اقبلي بيه اني خوش ولد
احبج واريدج ادللج دلال والقران حتى بيت اشتريت قريب من اهلي لان اعرفج حساسة مو مال ناس خبصة وشغل

لساني نعكد ولسة دايخة بكلامة وطلبة احس وجهي صار نار وهو بكل اريحية وابتسامة يحجي
بقة صافن بوجهي جمعت كل قوتي وحجيت

_جوري: اخوي مايقبل ليش اجيت تحجي من وراة

_سمار: تزوج وراح يخلف واني ابقة هيج
كلها تزوجت ولفت النسوان الزينة كلت اجلب بوردة الجوري لان شكلها مورد وعطرها فواح

_شكاعد تحجي انت

_جوري اسئلي نجمة علية شلون اني خوش ولد وشاعر فوكها اشبعج اشعار هسة بس توافقين
اشعرلج محظرهن الج هسة ماكدر احجيهن جان سمعتهن الج.... هسة وين تلكين نفسي كارزما
وشاعر ويحبج

ردت امشي بدون مارد علية لان كلامة كلش جريء بالنسبة الي عبالك حاجي وياي قبل بس وكفت عد كلمتة وكتلة:: شوكت حبيتني؟ ليش الجذب

_افااا اني اجذب ولج والله احبج شايفج اكثر من مرة وبكل عرس الكم اشوفج بس انتي ماتنتبهين علية

مشيت بسرعة بدون ماحجي شي احس الكل يباوعلي وصارت فضيحة ويكولون هاي تدور ولد بس الحقيقة يمكن محد منتبة حسيت بية وراي طلعت من الجامعة يلا حجة .

_عليج الله انطيني فرصة تعرفي علية بفترة الخطوبة واذا ماعجبتج نفصخ وكل واحد يمشي بطريقة.. جووري جوري يا فتاة المعطرة
ايها الناصعة البياض ذات الشرايين البارزة الخضراء كانها انهار في يديكِ...
اني ما احب احجي فصحة دحجي شي ترة اكلب للعراقي واخاف احجي انوب تبطلين مني

وكفت انتظر الخط بعد دقايق حتى تصير ونص الا يجي دنكت راسي عيوني بالكاع وهو واكف كدامي

_سمار: اكلج انتي ماتنقهرين على اخوج قبل من جان مامتزوج؟ انقهري علية شوكت اتزوج شوكت اجيب جهال شوكت يكبرون واكشخ بيهم

_روح اتزوج منو لازمك

_وعلي انتي هيج لازمتني من امتوني اريدج انتي صارلي سنين اشوفج وساكت جنتي بالاعدادية هسة جامعة مابقة شي وتكمل وكل مايخطبولي وحدة ماتعجبني احسها مو زينة هاي من اخوج رفضني امي خطبتلي وبس شفتها تذكرتج ذيج
عينها وكحة تباوعلي ومبتسمة طفرت اركض
كلت لو جوريتي لو اضل عزابي طول عمري وعساها بحضكم وبختكم

_الله يخليك روح حيجي ابو الخط وهو يعرف اهلي

_رايح بس فدوة مو ترفضين راح ابني خيمة واعتصم كدام بيتكم

مشة واني ابتسمت على كلمتة الاخيرة اجة الخط صعدت بس اني بية بقيت صافنة بكلامة صدك هذا يحجي من زمان معجب بية وهو صح يجي بس على شغل ومرات هم واني مالي علاقة بيه ابد
مو بالي حاسبتة حالة حال اخوي وابد ماحاجاني مرة لو شفت نظراتة مو حلوة .

رجعت للبيت بقيت متوترة حتى ماكلت لوردة مخلصتها بين القصص وبين الدراسة حتى مالها علاقه بيه مثل قبل الموضوع ياكل وياي صار ومن محد جاب طاري غلست عنة .

بيوم الجمعة كاعدين مشغلين الصوبة كواكب تحمي خبز عليها وتاكل دبس وياة شهتني صارت تسوي وتنطينة ناكل اجة رضا طاير فحطان يصيح

_رضا: ولسسسن ازا سمااام واهلة

شركت كواكب باللكمة واني طفرت استعديت للركض.

_كواكب: ولك هيووو خرب تعال منو ذولة شكوووووووو

شالت الخبز والدبس للمطبخ شمرتهن واني طلعت للنسوان لان الباب يندك صعدت فوك مانزلت بعد بقيت افتر رايحة راجعة والبنات ولاصعدن بعد مرت نص ساعة يلا اجت وردة تركض وكواكب سحلتها لان ذيج تريد تحجي قبلها .

_كواكب: اني الجبيرة احجي انتي الصمي

_جوري: ها شكو

سحبتني من زندي واني شوية وابجي
_كواكب: ولج زينة الشباب اجة يخطبج سمار الخلقة والاخلاق اكللهم موافقة خوش عوفيها علية

_جوري: شنو هي بكيفج توافقين

_غصباً ماعليج مرت اخوج والكل بالكل اني بهذا البيت وكلمتي هي المسموعة وتتنفذ تقبلين يعني تقبلين

_جوري: اريد اكمل دراسة واصلا ضيغم رفضهم

_بكيفة يرفض حتى اشكة شك
يقبل وانتي اقبلي دراسة وتكملين وين تلكين رجل مثلة لو تخرجتي تضلين نايمة بالبيت خل الشهادة تفيدج بابا استغلن الفرص شهلغباء هذا .
اختي هم كالت ماريد وشوفي نجوم هسو تدعيلي انتي هم تدعيلي خطية حجة وياي قبل شوية

اكلتنا اكل بلسانها شنكدر نحجي وياها حتى تكفخنا
ماطلعت من غرفتي بعد اجت امي تحجي عنهم .

_ياسمين: والله يمة الولد خوش ولد واحنا نعرفة من زمان مو اليوم واهلة خوش ناس مو معقدين
سوالفهم تونس

_ورد: عوفوها تفكر

_ياسمين: هسة اني ما غاصبتها بس غير اكلها
هاي القسمة الزينة ماتتعوض

عافتني افكر وضيغم ابد مافتح الموضوع وياي بحيث امي اجت كالت ابوج يكول شنو رايها الناس منطيتنة خبر واني محتارة لان مو بالي ومتخوفة من فكرة الارتباط اخاف ما احصل مثل العيشة عند اهلي والدلال .

كواكب وصديقاتي وحتى ورد يقنعن بية اوافق
صليت صلاة الاستخارة ماكو دقايق خلصت ودخل ضيغم لغرفتي ابتسمت اجة سلم علية وباسني لان ماشايفني اتختل منه كعدت اسوي روحي اقرا وهو يباوعلي وساكت تالي حجة .

_كتلج قبل سمار رايدج وهسة هم رجع
الصراحة سمار ضامنة لان نعرف دروبة كلهن
ماعندة درب اعوج وحتى لو جان عندة قديم وتاب
كعدت وياة كعدات مو كعدة وحدة وشرطت وتفاهمت وياة على كلشي بالج ومو بالج
ضمنت مستقبلج اليوم وبالمستقبل الولد مستقتل عليج وكلنا نعرف ليش ادب واخلاق
واحد ينام وراسة بارد هو يعرف شنو مختار

وكع القلم من ايدي ورجعتة اكتب رجع وكع سحبة مني وكال .

_ضيغم: موافقة؟

حجيت بصوت يرجف من الخجل والتوتر
_دا ادرس اني

_ميخالف ماياثر عليج فتح عين غمض تخرجتي
عادي تكملين وتتوظفين وكتلج كلشي شرطت علية وهو موافق

من شاف ماكو رد مني كام واجت كواكب هادة علية عبالك اخوها ورفضتة تريد تكتلني تالي طلعت اسمعها دكلة:: موافقة يلا حددو الخطوبة

وصدك حددو الخطبة ولليوم ماعندي تواصل وياة
بيوم الجمعة صارت الخطبة رجعنا من الصالون لبست فقطان مغربي احسة انزك واحلى من البدلة مكياج وشعري عفتة مفتوح بتسريحة بسيطة
نيزك ما اجت لان اربعينها ما طالع واكيد ذهب ماخلتها لان تخاف تشتم ماعرف بهاي السوالف بس باقي البنات اجن باحلى طلة وشكل .

عقدنا وصدك اهلة ناس مرحين اجة حتى يلبسني الحلقة كواكب تهلهل وي اهلة عبالك اختة لو كرايبة سلم وكف يمي كلبي صار يدك بقوة
من باس راسي ولزم ايدي اخذ الحلقة من اختة ولبسنياها انطتني كواكب حلقتة رادت توكع من ايدي اخذ ايدي ولبسها بقت ايدي بيدة رفعها وباسها طول بالبوسة وشواربة جكجكتني احس جسمي قشعر نترتها منه ضحك فرحان كطعنة الكيكة وكلني واني هم وكتلة بس احس شي سخيف هالعادات مالها داعي ابد باس راس ذهب

_سمار: حفيدة الذهب صارت الي اني فرحان بنسبج الذهب

_ذهب: يابعد روحي ولك انت ذهب

_سمار: الج محبس ذهب يمي

_يا حبوبا عليمن دجهز روحك منيلك فلوس

_خير من الله عندي تستاهلين الماس ذهوبة

ضحكت فرحانة على سوالفة طلع وخلصت الخطوبة عبالي هاهية انتهت واروح ابدل
بس اجت كواكب الفلك تسحل بية .

_ولج الزلمة منتظرج بالاستقبال بالدفرات بقة وانتي تردين تبدلين

_شبيج كواكب عوفيني ماريد احجي وياة

سحلتني بالمعنى الحرفي وشمرتني بالاستقبال وسدت الباب من ورة وين راح الكل بس هو موجود مجاي اصدك تبخرت العالم صح الخطوبة صار بالساعة من خلصت بس مو هيج محد موجود

ضحك واجة يتقدم اريد افتح الباب ماينفتح
توترت واحس راح اتخربط من الخوف سحبني من ايدي للقنفات وكعت كاعد يمي خزرتة يعوف ايدي مايقبل .

_الف مبروك ورد جوري الفواحة هاي اولاً ثانياً اريد اقرالج شعر شنو نسيتي من كتلج اقرالج؟

هزيت راسي لا وابتعد عنة العب بالحلقة .
_سمار: شايف زليخة شلون دوهنها يوسف هيج اني حالي عليك بس ما اسولفك... كولي الله

بصوت ناصي وابتسامة كتلة
_الله

_سمار: هذا الشعر سمعتة عد واحد شاد وياي مدوهنتة حبيبتة للامانة مو شعري اني عندي غيرة بس اول اخذ نفس

ماجنت اعرف شنو قصد بس افتهمت من حوطني وخلة راسة بركبتي حتى انفاسة ثكلت واني احس راح اتخربط بيدة طبع بوسات خفيفة صعد ورجع نزل لحد عظم الترقوة وصل يبوس حتى ادية لازمهن حسيت خلص راح اتخربط من صدك انفاسة بوجهي حتى عيوني مغمضتهن ماكدر احجي من التوتر لزم فكي بيدة وطبع بوسة على شفتي ابتعد من شافني انتهيت حتى نفسي راح وجهي بوخ حرارة .

سحبت نفس بقوة خازرتة اريد اكوم وسحب خصلات من شعري قربهن لخشمة يشتم مغمض عيونة وبصوت هامس كال..

_ايام ما نايم من وكع شالج وانفتح شعرج
سباني سباية هالشعر بوية تخليلة مي ورد

سحبتة منه وكمت اطلع ما اشوف بعيوني ماحس الا عثرت بالمدة واضفري بالكاع انضرب شاغت روحي رفعني من خصري لازمني واني ابجي على اضفري وعلى الفشلة مسح دموعي واخذ اضفري يبوس بية ويخلية بحلكة سحبتة منه وهو يمسد على شعري .

_يلة مصار شي بس ولو هاي حوبتي لان عفتيني
_كلة من وراك

كلتة ومشيت مسحت وجهي وطلعت اركض لغرفتي تحلفت لو الزم كواكب الا املخها
اخذتني اله وهو شلون حباب .

صار عندي تواصل وياة بديت اتعرف علية وعلى سوالفة الما ربط مخبل مدري شبية احس تورطت مو جوي ولا نفسي هادئ خبل هذا .

العرس للعطلة الجبيرة فكلت منا لذاك الوقت اذا طلع روحي انفصل عنة بس هو صار يمر علية للجامعة ياخذني ناكل وللامانة مايتقرب مني حتى اتعود علية وما انفر منه .

__________

_شهب: اغلب وقتي ادرس واروح لنجمة تدرسني لو قبس مرات على اليوتيوب بديت اضبط كل المواد جهدت نفسي بالدراسة لان ولادتي تصادف قبل الامتحانات بفترة واكيد ما الحك ادرس خايفة لا اعيد وماكدر اكمل بعد جنت كاعدة مندمجة بالقراية والتفكير انسحب مني الكتب .

_قبس: كافي يلا خلص وقت القراية

طبك الكتب وخلاهن فوك الميز سحب طبلة جايب صينية فواكة ومكسرات على صفحة وكلاص حليب وهاي كل يوم مايخليني اكل حلويات واني هم كاطعتهن من سمنت كمت ابدل ملابسي لبست تراك
ستن اسود نص ردن وشعري قصير بعد ما طول

شغل البلازما مطلع المبارة كعدت يمة سحبني لحظنة ومندمج يباوع واني اكل لان مافهم بالطوبة ولا احبها كمت اغسل رجعت كعدت وخليت راسي على جتفة غضمت انام من وقت لان اكعد وي الاذان الفجر حتى اكدر اقرا واحس هذا الوقت مبارك
كلش استوعب بيه واخلص افصل بية .

سحب خدي كعدت
_نمتي ماحسيت
_لا حبيبي بس جنت افكر

عدل كعدتة وخر شعري من وجهي
_بشنو تفكرين
_اخاف ارسب لان اولد والتهي بالطفلة
_لا عيوني لاتفكرين هيج انتي شاطرة حافظة كل المواد من العطلة بديتي بيهن ضبطتبهن
والثالث بس نجاح مايحتاج معدل فلا تخافين

دنكت عيوني على بطني اتوسدها دنك عيونة عليها مد ايدة ضحكت لان تحركت بس خلة ايدة .

_حسيت بيها من تحركت
_حبيبتي حسيت بيها اوي فدوه تحبني من هسة

_بس رجاءً لاتحبها اكثر مني والله انقهر

سحب وجهي باسة ودنك على بطني يبوس بيها
_ثنينجن احبجن روحي من الدنيا ما افرق بينجن
انتي بنتي الجبيرة وهي الصغيرة

_شنو نسميها لحد الان ماصفينا على اسم
_كتلج اسميها ضي اتخيلها هيج وجهة يشع نور تشبهج وهم شكرة يلوكلها هالاسم

_تمام وافقت لان الصراحة ملكيت اسم حلو

باسني بقوة فرحان يكلي
_مبارك عليج ام ضي

كعدت الصبح اقرا قبس كعد سوى ريوك وصاحني اتريك تريكنا وراح للشغل رحت اكمل قرايتي واسمع فقار يصيح ..

_من الصبح تاكلن حلويااات راح يصير بيجن سكرررر

_نجمة: شبيك استاذ تصيح دنيا الصبح حتى عيب

_طاح حظ الاستاذ ولج نجوم حااامل اكلي بيض سلك شي صحي هسة بعد ماتشتهين من ورة الحلويات

_نجمة: لاتصيح علية هاي بنتك هي كلتلي نزليهن لو بس ترجع علية

_ود: بابا سامحنا حبااااب
_نجمة: اي والله حباب بعد ما ناكل لاتتعصب استاذ
تعالي ود نبوسة حتى يسكت

_فقار؛ ماريد منجن بوسة بس لاتحركن كلبي

اسمعهن باسنة بصوت عالي يضحكن مخبلات وعلي
طابكات سوية طلعت لان تكسرت كعدت بالصالة اشوفهم بالمطبخ نجوم تشاور بود وهو يثرم بالزلاطة اي هما هيج يتريكون لازم خضروات وشي صحي مو نفسنا جاي وجبن هم يخلون اجبان بس مو وحدها بيض سلك مستحيل ماياكلون .

كامت ترتب وياة وهو بعدة زعلان لان حقة من الصبح للضهر ماياكلن بس حلويات رفعت رجليها باستة بخدة وتعدل بقميصة رجعت كعدت يم ود وكعدو يتريكون .

_فقار: ماتخلن شي وراجن كلة تاكلنة
_نجمة: استاذ شو تتاخر ليش هالاهمال والبرود بالشغل راح اخلي اسامة يطردك

_اسامة اخوج الصغير

_لا عمي ومديرك وها راح ارجع للشغل
اريد اصيحلك استاذ حباب علمني هاي

_حتى نعوف الشغل وندخل بمواضيع اخرى

_اشتكي عليك اكلهم المدير يتحارش بية واني موظفة جديدة

ضحك على كلامة وهي تضحك على روحها
غسل وكام يريد يطلع جلبت بيدة .

_استاذ حباب اخذني وياك

_نجوم تعب عليج الكعدة تاذيج

_زين استاذ خليني اروح هيج وياك

_مو اليوم تاخرت كلش يلة باي

طلعن وراة ينطنطن وسوالفهن ماتخلص نجمة الطبخ عليها ومعروفة نجمة بالتنظيف مريحة عمتي
من الشغل وملتهية يا تدرسني يا ادرس ود وتختبرها سمعت جمانة تزوجت ود بعد ما سالت عليها مثل قبل وحتى ود نستها تعودت علينا كلش

كواكب تجي كل اسبوع ولو ما اجت نروحلها علاقتها باخواتها بدت تتعمق وتحاول تندمج وياهن هنا يسمنها سارة وحتى امها من تسمعهن تصيحلها سارة
نجوم بيها بنية طلع وفقار طاير بيهن ومدوخاتة
حتى ود من تسمع نجوم تصيحلة استاذ حباب صارت دكلة استاذ حباب مخبلات الرجال يجي
مايطلع منهن .

دخلت بشهر التاسع اكلت منة كم يوم وحولتني الدكتورة على المستشفى عملية جنت كلش خايفه واخواتي ماعافني وياي راحن للمستشفى وضرغام وضيغم وفقار كلهم اجو وياي قبل لا ادخل للعملية
ودعت اخواتي هنا خايفات اكثر مني لان اول ولادة الي قبس وجهها صار اصفر دنك باس كصتي ولزم ايدي يكلي:: خايف اني كلش

_ما خايفة اني كم ساعة وتشوف ضي

باس ايدي ودخلوني للعملية نورت ضي حياتنا
والدنيا ما واسعة قبس من الفرح حتى للدوام مايروح اخذ اجازة اصدقائة يجونة للبيت ياخذها ترجع متروسة فلوس اضمهن الي .

بعد ما طابت عمليتي بطني صفطت لان الدكتورة زالت الشحوم البطن من الولادة وقبس يكلي اذا تردين سوي عملية تجميلية للعملية لو عندي وقت سويت
بس ملتهية بضي وطبعاً ضي نسخة مني كلش هادئة عبالك نايمة كثر ماينسمعلها صوت كل يوم ياخذونها يلعبون عليها وعمتي تسبحها اول اسابيع بعدين عرفتلها .

رجعت ادرس والطفلة عد نجوم طول الوقت حتى تسبحهة وتغير ملابسها من اشتاق اروح ابوسها والعب وياها شوية وارجع اكمل حياتنا كلش هادئة ومستقرة
قبس من الدوام للبيت حتى مايطلع وي اصدقائة
يبقة ويانا سهران .

ماعندي شي بس منتظرة الامتحانات
قبس الرجال الحبيتة اول ماشفتة صار يحبني اضعاف وكلشي يصير يسولفلي وياخذ رأيي
على اقل شي دائماً يطلعنا يونسنا ومرات للزيارة
نروح .

احس شخصيتي قوت وصرت اناقش واحجي
واطرح رأيي والفضل لقبس ماعندة كلمة بكيفك
انت يكلي انتي اختاري عوفي كيفك .

شهب البنية الجانت ماتطلع الغرفة وحدها من ورة التحرش وكل هما تطلع من البيت هسة صارت ام وعدها اهداف وتخطط للمستقبل ومثل مايكولون وراء كل رجل عظيم امراة اني اكول وراء كل امراة ناجحة رجل ممكن يكون اب اخ لكن الله عوضني بزوج حقق احلامي ومساندني بكلشي .

_________

_ميس: البرود والملل يحاوط حياتي اصفن اكول كلشي عندي بيت سيارة فلوس ليش هالكأبة المرافقتني روتيني مملل وقاتل حياتي شغل بشغل
واذا مو شغل وين اروح وشنو اسوي !

جنت اتمنى نجوم تشتغل وياي حتى تونسني بس بعد نجوم حمل وبيت مو بحال شغل .

طلعت من الحمام انشف بشعري تعبانة اريد انام
بس قبل لا انام افتح خانتي واطلع سترتة اشتم عطرها يلا ابدي اغفى ومن ذاك اليوم من شميت عطرها ادمنتها ومستحيل يمر يوم وانام اذا ماخذ نفس منها احس بيها دفو اعرف هالشي حرام
بس ماكاعد افسرة شنو مرات اكول لان عطرة طيب
اضحك على روحي بذني السوالف

لكن الحقيقة علي مايطلع من راسي ومتت حتى اعرف السر قبل لا انام لازم اتذكر شكلة ضحكتة هزت راسة حركاتة احس راح انجن ومرات ابقة ابجي لان ما افهم روحي وليش افكر بية

التليفون بيدي ابحث عن سبب لهلحالة ويطلعلي
_ربما هذا الشخص يفكر بكِ ايضاً

شمرت التليفون متنرفزة علي يفكر بيه شكد بطرانين ذولة وين يفكر بية،،
علاقتنا اني وياة على كد الشغل اراسلة لو اتصل بيه
الدنيا تمطر بغزارة جنت اباوع من الشباك نزلت جوة
بقيت جوة المطر شعور حلو تبللت وتعبت من الوكفة يلا دخلت جوة سبحت من جديد بمي دافي بدلت ونمت كعدت تعبانة بدلت وطلعت للشركة عندي شغل كلش مهم حسيت افلاونزا بدت بية عيوني توجعني من الصخونة .

لساعة العشرة طلعت من شركتنا جان عندي موعد وي ابن صديق ابوية يخص الشغل كملتة واتصل بية فقار
بخصوص شغل مشترك جنت قريبة منهم فكتلة جاية
نص ساعة وصلت رحت لغرفتة كعدنا نتناقش
حتى نوصل لحل كام يسوي كهوة جاب كوبين قدملي واحد وكعد يشرب .

_نجوم شلونها
_شالعة كلبي نجوم
_هههه شبيها
_ماتلبس ملابس ثخينة فوكها تلعب بالمطر
ود من تشوفها وياها افز من النوم ما الكاهن
انزل الكاهن بالمطر متنكعات

_بعد نجوم وطكاتها

_لو تاكل حلويات وتعوف الوجبات الاساسية
فحطتني

_اتحمل تكبر وتعقل

ضحك يتذكر سوالغها والله نجوم سينما اليعيش وياها تونسة هاي منتهين منها رفع تليفونة كتب
جنت لازمة ورقة اكتب بيها اندك الباب التفتت دخل علي بسرعة درت وجهي عنة خفت لااصفن وفقار يكشفني كعد يمنة رفعت راسي ابتسمت .

_هلو علي شلونك

_فقار: علي للصعبات عايفينة تعال فكر بمكاني
اني دايخ

_ميس: واني مصخنة وراسي يوجعني فكر نيابة عني

رفع عيونة باوعلي بقلق ودنك يكتب ويشرح النا
علي مو بس ذكي لا فائق الذكاء خلصت الشغل
الاجيت بية وكمت سلمت على البنات وطلعت
صعدت بسيارتي وخليت راسي على الكشن
هاي الفلاونزا اذا مو اسبوع ماتروح شميت عطرة دقايق رفعت راسي ماتخيلت الكاة كدامي الجامة مفتوحة ومدنك راسة يباوعلي .

_ها علي محتاج شي

هز راسة بالنفي وفتح الباب كعد بالكرسي الصدر تفاجات شيريد هذا؟
طلع تليفونة يريد يكتب استوقفتة بصوتي .

_كم مرة كلت افتهم عليك اشر شنو تريد؟

صفن بوجهي ودنك راسة بعدين اشر
_تكدرين تسوقين؟

_لا

_هسة شلون ترحين؟

_ارتاح شوية واروح

سكتت رجعت راسي وشعري غطا وجهي وخرتة بيدي اشر .

_ليش ماتلبسين ثخين؟

_مكتبي دافي ومن اطلع للسيارة دافية لبيتنا
فمايحتاج البس ثخين بس هاي البارحة
لعبت بالمطر وتبللت اليوم تمرضت

بلع ريكة تفاحة ادم صعدت ونزلت اشر وفتح الباب
_اوصلج للبيت

ما كلت لا نزلت صعد بمكاني يسوق واني بصفة خليت راسي على الجامة نحلت طول الطريق ساكتين بس المحة يسرق النظرات كل شوي وصلني لبيتنا رفعت راسي .

_شكراً علي كلش هواية وهسة اخذ السيارة ارجع بيها

هز راسة لا ونزل نزلت افهمة يرجع بيها وهو قافل ياجر تكسي ما جادلت بقيت واكفة وراة بين ماتجي تكسي ويروح التفتلي اشر ادخل جوة هزيت راسي
لا وهو يخزر بية ضحكت هزيت ايدي ماتحركت الا من وكف تكسي ومشة سويتلة باي ودخلت للبيت
من هاليوم بعد ما التقيت بية لو تواصلت وياة

بلليل اكلب بالتليفون اتصلت بية كواكب وللمعلومة بينا تواصل فتحت كاميرا وهي كاعدة كدام الصوبة سلمت وبدت بالموضوع .

_كواكب: اكلج انتي ليش تجذبين عود؟
ماتستحين شكبرج تصيرين؟

_يا شبيج

_سترتة علي الانطاها الج بالحنة مدري بالعرس
وينها

_يمعودة شذكرج بيها قديمة نجوم راح تجيب

_كشفت جذبج يالجذابة من كتلج كلتي رجعتها اله
واني ولا نسيت تذكرت وسئلت علي كال ميس مضيعتها شوكت ضيعتيها ادري هاي جذبة

بلعت ريكي وجهي صار نار هاي شنو من بشر راحت تسالة يماااااااا اتذكر ورة العرس سالتني كلتلها رجعتها ورة فترة كلت لعلي ضاعت مني .

_هسة شتردين اشتريلج مثلها اربعة بس اسكتي

_كواكب: لج شوفي اني ماميتة على السترة
بس لاتجذبين علية اعرف الجذاب لو يطير
خوش

_هسة اني جذابة يلا شتردين

_امداج غمة عايفتها تشمشمين بيها وهو ضال
نايم وحدها دروحي اعترفي اله وادفي بحضنة
ضالة وحدج شكو

وجهي صار نار من كلامها وجراتها بالكلام هي معروف عنها دوم تجفص بس مو هيج .

_كواكب: ديلا لاتفتحين عيونج مصدومة علساس مادري بيج ماتحبينة وميتة علية

غمتني وسدت التليفون بوجهي واني احس بوخت وكلبي يدك بقوة صار هاي شنو من طركاعة .

_كواكب: رحت افتر بالبيت انتظر المثقف يحن ويرجع للمهجور بس انفتح الباب صعدت فوك لغرفتي عبالة ابدل لو اتحظرلة مايدري راح اموتة بس دخل طفرت علية طفرت الاسد ملختة تملخ
لزم ادية وشمرني صار فوكي يلا سيطر علية
وجهة صار احمر وشعرة كفش بيدي حجة فحطان

_شبيج ولج مجلوبة هاي بدال ماتتلكيني بوسة بحضن

_بنعل اتلكاك من الصبح ولهسة ماكو وين جنت
دعوفني افوخ كلبي بيك واطلع الشغل من عيونك

_انتي مو صاحية احلف عليج
_هستوك دريت غير عقلي طار بالانفجار
وانوب طب بية جنية من ورة سحورتكم

_راح اعوفج صيري عاقلة يلة حبيبتي

عافني وراح يعدل بشعرة ويمسح بوجهة
_كواكب: اذا ما تعوضني عن اليوم هسة الم ملابسي واروح يم دراهم لو ارجع لبيتنا

_انوب

_يلة مو جنت وي النسوان سوالف وضحك والجاي والقهوة والقبلات لاتخبلنييييي ترانييي مخبلة

_يابة اعوضج يلة بدلي بين ما اسبح

_تسبح؟؟

تقربت علية نزعتة القميص اركز بجسمة كفخني على راسي يكلي:: ماتشوفين العرك من وراج غير اسبح ارتاح عقل شوية عقل

_عفت العقل الك خوووش اني ما افتهم
تقبل اطلع من الصبح ماعرف عنك انوب اروح اسبح

_اي لان اعرفج وعندي ثقة بيج بس انتي ماعندج ثقة بية

_النسوان المشغلة عقلها ماتثق بالزلمة
لو سيد عمامتة فوك راسة هم مايتامن بلا طلع متزوج كلشي يصير

_هيج صارت؟

_امشي اسبحك حتى لا دكول مرتي هاملتني

اخذتة ادفع بية للحمام وهو خازرني صدك يحرك الكلب نهار كامل ماكو بشر طابوكة اني بدلت ونزلت انتظرتة جوة لكيت جوري تراسل بالحديقة وتضحك مشيت على كيف وصرت وراها اقرة لكيتها تباوع بفيديو لسمار دازة الها يكلها .

_طلع بية كمل من ضيم فركاج يسألوني
واكلهم هذا سمسم...

شوفي شعري شلون شاب اااخ ااخ يلة هانت جوريتي مارادة علية كاتبلها .

_دحجي شوكت تحجين شو اتصال وسديتية
يلا لا اجي بهليل

_جوري: مو البارحة طلعنا سوى

دزلها صوتية
_حصرة الزم ايدج تتكهربين انوب اخاف لاتتخربطين بس ابوسج شايل هم

_كواكب: شو هذا مايستحي يكلج ابوس
غير يسكت مو عيب يحجي هسة خو ضيم ولا حجة هيج عبنة زلمة خوش زلمة مؤدب

كمزت مصدومة
_جوري: هاي انتي يمة وكفتي كلبي
_مايوكف كلبج هسة سمار يوكفة

عفتها ومشيت طلع ضيغم سحبتة لازمة ايدة من زندة وادك على عضلت ايدة .

_حبيبي الحلو الانيق الجميل فدوة فدوه

_وين نروح

_نروح نستنسخك ونوزعك على البنات
المالهن رداد لان بس انت رداددهن

ضحك يهز بيدة صعدت بالسيارة
_كواكب: باوع
_باوعت

_شوف
_شفت
_يبوووووو خليني اكمل لاتقاطعني

ضحك يهز براسة حتى احجي
_باوع هذا علي يحب ميس يموت عليها

_عليي !!!

_اي ابن عمنا

_شلون عرفتي بلا

_عرفت عيوني ومو بس هيج ميس صارت مهووسة بية

_مهوووسة فرد مرررة.!!!

_اي اي ينغار(يغار) عليها خو بعرس فقار كشفتهم
واحد يباوع للثاني واني اكص ايدي وراسي انت كصة لان ماكدر اذا طلع مايحبها ويريدها

_علي وميس كواكب انثولت هما زملاء اصدقاء اي بس مو علاقة حب

_حببب حببب بينهم وترة ميس تحبة وقابلة بيه تفهم علية لان مايحجي وهي صح مسيحية
بس تدخل للاسلام عادي عدها لان تحبة

_هي كالتلج

_اي كالتلي تبجي علية بجي بس كدامة لا طبيعي

_وهو؟

_دمشينا نروح نحرك كيبل حتى تتاكد اذا يحبها لو اني اجذب عليك

شغل السيارة كتلة
_دكول حشاج من الجذب شو سكتت

_ادري بيج تطيرين فيولة

_حسبي الله ونعم الوكيل عليك يارب اخذ حقي منه لان يتهمني بالجذب واني ماكو اصدق مني والناس كلها تشهد

_ضيغم: هسة وين ماخذتني بهليل

_لبيتهم هم نسلم على ذهب مشتاقتلها وهم نحركة وانت اتاكد بنفسك من كلامي،

_يلا شعندي اهم شي ترتاحين

_باوع تذكرت مسلسل اخواتي يكعدن علية البطلة ماتريد البطل كالولها مات صحبانة واخذوها تشوفة هي سوت فلك بالبجي تالي كعد وتصالحو

_كواااااكب لاتجلطيني لاتفكرين اروحلج فدوه

_والله اني عندي افكار بس محد يساندني

_واليفتر بيج حتى ينفذ افكارج

تقربت بستة بخدة
_حبيبي الغالي تاج راسي وتاج راس العشيرة كلها انت زلمة معددددل بس لو ادري شتسوي بالنهار

ضحك متعود على طكاتي وصلنا لبيتهم الساعة 11
هز ايدة يكلي هسة ذهب تنجلط من تشوفنا تقدمت دكيت الباب فتحة علي باوعت لضيغم وضحكت
باوعلنا متفاجا بجيتنة .

_كواكب: هلو علي شلونك شخبارك احوالك امورك
جنا يم ضرغام وكلنا نمر عليكم

اشرلنا ندخل جوة كلة ضيغم
_تعبان اريد اروح

_كواكب: اي صدك لازم نروح لان ورانا كعدة الصبح وتحظير لازم اوصل اول الناس لخطبة ميوسة بت الهوامير المسيحية التشتغل بشركة ابوها تعرفها

ضيغم صافن بوجهة الولد فاتح عيونة لدرجة رموشة وصلن لحواجبة لزمت روحي لو بيدي اركص هسة كملت بجدية

_اي تعرف احنا صديقات بس شو تفاجات شنو
ماتعرف باجر خطوبتها

هز راسة لا وبلع ريكة عيونة دمعن انكسر كلبي علية
بس لمصلحتة سحبت ضيغم كتلة:: يلا سلمنا
وانت راسلها باركلها عيب زميلتك

بقة جامد بمكانة صافن نتر ايدي ضيغم كلي
_خطية ولج لا يصير بية شي

_لا مو خطية يريدها مايروح يكللها احبج صعبة
_ولج هو مايحجي

_تفتهم علية واذا اكو واحد شالو كلبة وراح تزوج
_كلبببببببببببة !!!!

_لا اقصد كليتة والمصارين مو كلهن شوية منهن

دار وجهة يعض بشفتة راح لعلي البعدة واكف بمكانة واني الطم ليش يكلة راح يخرب خطتي

_ضيغم: علي باجر مو خطوبة ميس جذب
_كواكب: صح نسيت مو خطوبة لا هيج
يجون اهلة بس

_ضيغم: صح شوف ميس خوش بنية
واحسك رايدها اذا الك نفس بيها حاول واعترف الها احسن ماتتزوج وتبقة كاتلك القهر والندم

_كواكب: اي والله ذهب البنية نعرفها من زمان صديقة اختي ماكو مثلها ودينها مو مهم نسحبها ويانة

_ضيغم: مثل ما كالت كوكبتي لاتضيع الفرصة
واحنا بضهرك بس تقدم

سحبني وصعدنا بالسيارة هو باقي بمكانة
_ها تاكدت
_اي والله
_حتى تكول علية جذابة واطير فيولة
_لا حبيبتي تطيرين نمل انتي

ضحكت بحماس كتلة
_مر على اختي نشوفهم
_هسة ضرغام يطردنة

_لا يحبك هو غير روح بالروح انتو
دخل يحجي نكتلة ثنينة ونطلع

وصلنا لبيتهم نزلت ودكيت الباب صعدت اشوف ليش ماطلعو .

_ضيغم: انزلي حبيبتي هسة يطلعون
_راح احسب للعشرة مايفتحون اطفر
واحددددد ثنييين البعيجيييي

_صووتج العالم

ردت اطفر وفتح الباب لابس شورت شافني صاح
_خير متحلمة بيه
_لا هذا ابن عمك تاج راسك كال راح يكتنلني الشوق على ضرغام جبتة واجيت

فتح الباب واني متعلكة بية طفرت وركضت جوة عفتهم وراي نزعت حذاتي ودخلت تلكتني نيزك سلمت عليها وسالتني على جيتنة كتلها

_هيج اجينا نفرفر

بوست الجهال نايمين رحت للمطبخ الجاي حار بالترمز صبيت وطلعتلي جرخ اكلت بسرعة بس خلصت صاح ضيغم نروح شربت مي وطلعت .

____

_ميس: صارلي كم يوم احاول انام بدون ما اشتم السترة اريد اتخلص من هالعادة الماعرف منين اجتني ولزكت بيها بقيت احوس عبالك مدمن وعاف شي نفس الشعور شي كلش صعب .

رحت رشيت من عطري غير يفيد ماكو تاخر الوقت كلش واني مانايمة عاندت روحي كلت اكلب شوية بالتليفون بلكت اغفى ولو اني اغفي من التعب بس مجاي انام .

اجاني مسج من علي كاتبلي كاعدة
رديت علية اي شافها بس مارد رجع كتب
_قريب من بيتكم تكدرين تطلعين؟

_هسة !؟

_اي هسة شوية اذا تكدرين
_صار شوية وانزل

كلبي صار يدك بقوة شنو صار حتى جاي بهذا الوقت المتاخر يشوفني معقولة بية شي؟ لا اسم الله ان شاءلله مابية شي لبست جاكيت فوك تراك النوم ونزلت اهلي نايمين طلعت الجو بارد والوقت كلش متاخر فتحت الباب اباوع بالفرع رمش تليفوني
باوعت طابك سيارتة بالركن رحت اتمشى ماعرف ليش خايفة !

صرت كدامة لابس تشيرت نص ردن بهلبرد!
واني الفلف بروحي عكدت حواجبي بخوف سالتة

_احجي علي شصاير

مد التليفون محظر الكلام اليريد يحجية التليفون دافي من لزمة ايدة اخذتة بيدي ماعرف شنو حسيت بساعتها بس كلش توترت قريت .

_علي: ميس عادي ترفضين الخطابة
احس محد يستاهلج .. مامطمن لهذا الزواج نفس القبلة هم هيج شعوري جان ارفضي ميس

رفعت حواجبي بصدمة هذا شجاي يحجي
كتب بسرعة واني انتظرة يخلص حتى افهم جيتة

_علي: ارفضية واني اتقدملج

ردت احجي ضم التليفون وبلاشارة عبر بحركة كلب
_اني اريدج اجي اخطبج تقبلين؟

اشر على بلعومة ولسانة بمعنى
_ما اكدر احجي تقبلين؟

كمل بالاشارة واني وكل واحد يكدر يفهمة
_صح اني مسلم بس ما اجبرج على شي
بس تدخلين الاسلام هاي ضروري
وشغلج تبقين تشتغلين ما اعارضج
هاي اني تقبلين حتى اتقدم؟

احس كلبي صار طبل وحتى هو سمعني كد ما عالي
قبل شوية جنت بردانة هسة احتريت هو صافن بوجهي منتظر مني كلمة لفيت الجاكيت وكتلة بدون مماطلات .

_ميس:اقبل ليش ما اقبل بس انطيني وقت اقنع اهلي

حتى ماشفت شكلة وردة فعلة رجعت بسرعة امشي سريع دخلت للبيت وهليلة ماكدرت انام للصبح
مامصدكة بادر وطلع معجب بية بس بقت مشكلة اهلي .

ثاني يوم من الصبح بعد الريوك اني وبابا كال
_شو اليوم ما مبدلة شنو ماترحين للدوام

_بابا عندي موضوع وياك اتمنى تسمعني للاخير
_احجي بابا

اخذت نفس كلش متخوفة من الرفض
_بابا علي فرقد عرض علية الزواج؟
والصراحة ماعندي اعتراض علي نعرف اخلاقة
ومعدنة

قاطعني مصدوم
_علي مسلم
_بابا ديانتي اغيرها مو مشكلة اصير مسلمة وياما ناس مسيح من ورة الحب دخلت الاسلام

حسيت على جفصتي وزادت صدمتة
_تحبينة. !!!

بلعت ريكي شلون الزكها هسة
_بابا اتمنى ما تعارض

_انتي صدك تحجين لو دتشاقين؟؟؟؟
علي مسلم ومايحجي اخررررس

_كلتلك ادخل للاسلام واني افهم علية من يحجي
يعني ضروري يلعلع بصوتة ؟؟

كام من مكانة متنرفز وصاير عصبي
_مستحيلة انتي مستحيلة سدي الموضوع كافي

عرفت مراح يوافق حتى صار مايحجي وياي
مو بس لان علي مسلم ومايحجي لا لان دايرة الشغل ومريحتة وخاف بس اتزوج اعوف كلشي .

شرحت الوضع لعلي واني يا سبحان الله
ماعرف ليش هيج حبيتة وتعلقت بيه باخر فترة
اجوي خطبوني وابوي رفضهم واجو مرة ثانية وهم رفضهم قفلت تليفوني حتى لا اشوف شدازلي وانقهر
بجيت دم بهلايام وعرفت ابوي مستحيل يغير راية
فجمعت ملابسي واخذت مستمسكاتي وطلعت جان كاعد جوة من شافني انصدم من الاخير، كتلة.

_ميس: الشغل بعد ما اخلي ايدي بية والشركة تحرم علية طبتها واني مسافرة

_على مزاجج شنووووو

_الزواج على مزاجك صار وافقت على اخس انسان بهذلني من اختاريت رفضت وتعرف لو اموت ما اتزوج اذا ما راضي فخلص خلي الولد يروح بحال سبيلة كتلة يتزوج واني اهج

مشيت وصدمني بكلامة
_جيبي مفتاح السيارة وبطاقتج وروحي بلشي من الصفر

_وشغلي الصار شكد اشتغلللل؟؟؟

_هواي صارف عليج اشتغلتي بفترة اعتبريها تعويض وعوفي كلشي

طلعت البطاقة شمرتها بالكاع فتحت جنطتي شمرت السويج بالكاع ودموعي نزلن شمرت جنطة الملابس

_حتى الملابسسسس ماريدهنننن
اخذ كلشيييي

_ليش تسوين كل هذا وين ترحين هسة
وانت ماعندج شي

_اروح يم صديقتي اكعد عدها بيت فارغ
احصل شغل واعيشش يهمككك

_لج بابا وهذا الخير كلة ليش تعوفينة

_خيررر شنو استفاديت منه انام مخنوكة واكعد مخنوكة الفلوس بدون حب ماتنراد
اني حبيتة لعلي وهسة اطلع انساة اريد
لاتخاف ما اتزوج بدونك

طلعت بطرك روحي وتليفوني دموعي تنزل ماعرف ليش هيج سويت بس صدقاً حياتي مملة مابيها شي حلو لاتصدكون الفلوس تجيب السعادة .

وكفت اجر تكسي طلع ابوي وراي هنا امي جانت مالها غرض بينة لان القرار الاول والاخير لابوي سحبني من ايدي يصيح بعصبية.

_وين تردين ترررحين لج ميس خلي عقلج براسج

_حتى زواج ماريد بعد بطلت بس عوفني

باصبعة نغر راسي يصيح
_لج ووووين رايحة

بجيت بقهر ابوي ابد ما مقصر وياي بشي
بس اني تعبت من ذاك اليوم التزوج بية قبس لهذا اليوم مامرتاحة تخطيتة ودفعت الثمن مشاعري
زواجي الفاشل وسرعة تخطيتة اخذتها بحيلي
ماتحمل يشوفني ابجي سحبني لحظنة يرزل بية ودموعي تنزل دخلني للبيت كتلة واني امسح بعيوني

_والله بابا ما اعوف الشغل
_بابا عوفي الشغل شايفة شنو صاير بيج

هزيت راسي ابجي كلي
_اصعدي ويصير خير

ذبيت روحي على فراشي ودموعي تنزل خاف مابجيت قبل هسة طلعن نمت تعبانة راسي انسطر كعدت وجة الصبح غسلت وشفت تليفوني
علي متصل 33 مرة ورسائل كومة داز يطمن علية
اخر رسالة جانت .

_علي: ميس باجر نجيكم ابوج وافق
احبج ميس

ضحكت مامستوعبة المسج الا من اجو الاستقبال انترست عمامة ولد عمة وبيبيتة وامة وكواكب اجتني تركض اطك اصبع وتهلهل بدون صوت

_كواكب: هلا هلااااا ذولة اجو بفضلي وبفضل رجلي الحلو لو باقية عليكم فلا تتحركون

_هاي انتي كايتلة مخطوبة

_اي كتلة باجر خطبتها بس ضيغم كسر خاطرة كلة لا بس يجون عليها

بقوة يحجون وبتفقون نجمة فاتحة كامبرا يم كواكب اعتقد اتصال جماعي لان اسمع اصوات البنات وجهالهن اخذت الضيافة ودخلت احس كلبي يريد يوكف وضحكتي ما قابلة تروح .

_ذهب: تعاي حبوبا اكعدي يمي وهاي راح ارتاح
من تصيرين مسلمة

حددو الخطوبة وبين التجهيزات خلصت الايام وصارت بادق التفاصيل بالبيت سويناها بعد العقد
دخل يلبسني الحلقة وابتسامتة مافاركت وجهة ولا اني جنت لابسة فستان مفتوح من فوك وشعري مبروم من اطرافة مكياج هادئ مريح للعين
وهو لابس قاط رصاصي وقميص ابيض طالع يموت بكل معنى الكلمة .

خلصت المراسيم الحلوة هلاهل وهوسات ترسوني ذهب وراحو دزلي مسج لا تبدلين بقيت افتر بالغرفة فرحانة لاول مرة اجرب الفرحة
الكل راح بس خالاتي بقن اجت بت خالتي دكلي خطيبج يريدج طلعت حتى ماشفت شكلي شلونة رحت للاستقبال ابوي طالع من البيت بس راحو
فتحت الباب ضحكت رفع راسة وضحك بفرح

سديت الباب وتقدمت رافعة فستاني صرت كدامة قريب منه:: صرت مسلمة

جنت متوقعة ياشر ويرد علية بس صدمني من سحبني من خصري جسمي انرطم بجسمة بقيت فاتحة عيوني مامصدكة هيج جريء ايدة ضابة خصري بقوة والثانية دخلها بشعري من ورة قربني علية ردت احجي سد شفايفي بقبلة طويلة
كطعت انفاسي واخذت حيلي بلع ريكة ومال راسة
لركبتي يطبع قبلات دافية عليها ويشتم بيها
رجلية ماشالتني بعد كعد على القنفة بحضنة كعدني
وكان يكلي مو بالكلام اعبر عن حبي ولهفتي الج

رجع يطبع قبلات على شفتي لزمت بية بقوة
مغمضة عيوني احس فراشات بطني تطير
طبع قبلة اخيرة على عظم الترقوة ونزل جوة لزمت ايدة لا هذا عود كلش خجول .

كمت ما خلاني بثنين ادية مطوقني حسيت نفسي اسيرة عندة بدون كلام بقينا الى ان حسيت وضعة مو تمام عفتة وطلعت للغرفة ركبتي بيها احمرار
تليفوني رن دزلي كاتب .

_من هسة جهزي نفسج احنا اعراسنا ماتطول
اسبوعين هواي انطيتج علم

_ليش مستعجل توة الناس

_ليش اليوم مو صارلي دهر منتظر

_بس ماتوقعت جريء خيبت ضني بيك

_لا كلش فقير واثبتلج بيوم العرس

مثل ماكال اعراسهم ماتطول لان بساطة مكونين انفسهم عقدنا محكمة واليوم يصادف الحنة والعرس بنفس اليوم وليش ماعرف هو راد هيج
بنفس القاعة الجنت ادخلها معزومة هالمرة اني العروس سوينا حنا ركصنا صورنا ماخلينا
اكثر عروس فرحانة بعرسها اني لعبت لعب بالركص اني وذهب كسرنا الكاشي على كولتها نجوم تصور كلشي بطنها كدامها فرحانة مامصدكة .

اجة علي النسوان موجوده جان هادئ وخجول بس اخذنا صور وحناني طلع رحت ابدل والبس بدلتي البيضة الاختاريتها بكل حب لبستها والبنات حوالية يرتبن بية واني اعدل بالمكياج واغير لون الحمرة
كواكب تخليلي بوطرة ونجوم تصور فيديوهات

_كواكب: ديلا ارتاحيت هسة بدال ماتشتمين سترتة اشتمية

فضحتنيييي مابقة واحد ماسولفتلة على السترة فد مفضوحة هالبنية رجعنا للقاعة واخذنا جلسة تصوير كل البنات محاوطاتني ولا عدهن خصوصية

_نيزك: شكد اكرة هاي المصورة غثة

_كواكب: تروج للفساد

خلصنا صور طلع واجت روان متاخرة سلمت وكالت.

_روان: بنات باركولي حاااااامل

فرحنا لفرحتها وباركنة الها روان بنية كلش راقية
وتحب الخير للناس اجو الولد والعريس وياهم شغلو الاغاني يركصون وبيبيتهم بنصهم ضرغام صيح
لكواكب:: تعاي اركصي

نزعت كعبها وصارت تبدج وياه وتهوس خزرهم ضيغم جان يركص فرحان اجة عليهم لزمت ايدة تركص وماعرف شنو تحجيلة حتى هيج يضحك وهي منتهية من الضحك .

سحبها ضرغام وياة تركص اخواتها من بعيد يصفكن ويضحكن طلع من نصهم وكف يمي اخذو شوية وطلعو بقينا وحدنا ونسوانهم طفو الاضوية
وبدلوها بخفيفة توسطنا القاعة لزم بخصري واخذ ايدي بيدة والثانية على صدره ركصنا سلوى
بعدها طلعنا الزفة لنفس الفندق .

الشارع انخبص بالمعزوفات والركص يمكن احلة عرس صار هو عرسة الكل مامصدك علي يتزوج
لان رافض الفكرة .

زفونا للفندق وراحو خبطت بطني من قفل الباب كلشي جاي اعيشة وياة كانما اول مرة عايشتة
نزع سترتة رفعت بدلتي ادور بملابسي رفعت راسي اشر افتحها الج جانت عبارة عن قياطين
هزيت راسي اي صار وراي وبدا من شعري يساعدني
بفتح البركع خلص ونزل يفتح بالبدلة انفاسة حارة صارت بركبتي واصابعة تمشي على ضهري غمضت عيوني من صار يطبع بوساتة هناك والبدلة وكعت

هنا اكتشفت علي انسان عبارة عن مشاعر دافية
تعويض من رب العالمين جان عيشني بعالم ثاني حسسني اني فراشة مو بشر، من دم ولحم .

توسطت صدرة ابتسمت وعطرة بخشمي حجيت واني بحضنة .

_سترتك عندي كل يوم اشمها قبل لا انام
اخاف عليها من الهوى لا يطير عطرها
مخليتها لوقت النوم بس اشمها انام

ايدة تلعب بشعري ويضحك فرحان كملت
_اني شميتها بفضول ماجنت اعرف راح احس بشعور غريب واحبك من يومها حسيت ماشميت عطر بسترة لا حسيت شميتك انت

ضمني بقوة لصدرة يبوس بيه بحب ولهفة
انتقلت اعيش وي اهلة بيتة بيت مليان مشاعر
بيبيته فرحانة لدرجة الدنيا ما واسعتها كل يوم تاخذنة للزيارة دكول ناذرة وهذا احلى شي اول مرة ازور الائمة .

علي يعدل بالعباية اخذتها من بيبيتة واني اضحك لان شعور جديد لازم بيدي كدام الامام احس بية يسلم امنياتة .

بدت مسيرتي وياهم اروح لشغلي واحاول ارجع من وقت علي كتلة يشتغل وياي رفض تفهمت شعورة
ما لحيت وياة هو بشغلة واني بشغلي لبسي غيرتة للافضل بقة الحجاب محد ضغط علية
واذا عجبني اتحجب بيوم بدا علي يشرحلي على الائمة ودينهم ويعلمني الصلاة بديت اتعلم
ومن اشوف جاي اطبق كلامة يفرح اضعاف

ولهنا قصتي بلشت ما انتهت .

________

_نجمة: بيدي طفلتي اشهر
سماها ابوها قمر وجانت صدك قمر وجهة عريض وقطعة بيضة والشي الطايرة بيهة بخدها غمازة
فقار يبوس بيها ويرجع يبوس غمازتي
ود مكابلتها طول الوقت وابوها يموت عليها

نامت قمر بعد ما شربت الحليب رحت يم فقار فتح ادية الي حضني يشتم بية ويبدي يتغزل ويحجي كلام يطير العقل ما جان زوجي احسة ابوية
صدك اعتبرني مثل بنتة طول الوقت يحاذر بية
ولو شاف عاكدة حواجبي يجي يكلي شبيج ضايجة
ود احسها اختي الصغيرة دائما اشبهة باموري اموت عليها وهي كلش تعلقت بية وباختها الصغيرة

مخليتها بحضنها وفقار كاعد يمها تسولف عليها
ودكلة:: بابا خلي نجوم تجيب بعد

_نجمة: حتى اتخبل يمة زين وصلت هاي
غير تموت الولادة اسكتي ود كافي طمع

فقار مكيف يضحك باوعت لعمي وعمتي بيدهم ضي
يموتون عليها شهب نجحت بمعدل جيد قبس جابلها هدية تخم ذهب بلشت تدرس للسادس والكل يشجعها ويشوفها شنو تحتاج مرات اشتغل وقبس مو هنا هي تحفظ وراها تراجع لازم واحد يلزملها الكتاب حتى تشوف نفسها حافظة

الكة عمي يسالها وهي تجاوبة من هو موجود ماتجيني تروحلة لان خلكة طويل ويعيدلها اكثر من مرة وهو كل مايشوفها يسالها على المواد تطير من الفرح تجي دكلي وعيونها مدمعة .

_شهب: احس اسامة ابوي مو بس ابو كواكب

قبس مداريها كلش ويحبها كللها بس انحجي نجاح وادخلج اهلية وعدها بس تنجح من السادس يسفرها .

خابرتني نيزك حتى نجي لبيت اهلي وهاي صار فترة ياخذها ضرغام يذبها وراها تجي كواكب ينضفن البيت واحنا وراهم نجي بس احنا وجهالنا بدون زلمنا لليل يلة يجون علينا وطبعا فكرة نيزك كالت

_بيت اهلنا فارغ كل البنات يطلعن يجتمعن عد اهلهن خلنا نروح لبيت اهلنا خطار وهم بعتبار صدك جايينهم ويا سبحان الله نفس الشعور من وحدة تروح لبيت اهلها .

كواكب ترش بالباب وغاسلة الشارع ذبت الصوندة وراحت تسلم على فقار ذبنة وراح خليت قمر بالاستقبال ود ووياي اطلعها لان البيت يفرغ
اجة امير يم بناتنا يلعب بيهن يموت عليهن

نيزك بالمطبخ تسوي دولمة كعدنا نلف وياها ونسولف عن كلشي يصير عبالك امنا كواكب وي الجهال خالستهم علساس تلعبهم وكلنا ندعي الله يرزقها بطفل .

الجدر على النار عافتة وبقينا نسولف كملت عزلت لضرغام بجدر اندك الباب راحت انطتة وراح بسيارتة صار وكت الغدا قبلها كواكب رضعت الجهال ممة واحنا نحظر بالغدا كعدنا بالمطبخ كلبت كواكب الدولمة .

_كواكب: شوفن شلون كلبتها تعلمن الفاهيات حشا
نيزك ام امير

نخلص ونغلس المواعين سوى بعدها نتعارك على الحمام نسبح ونكشخ نجتمع بالاستقبال نام شوية ونكعد العصر نيزك تجيب كليجة لو جرخ
وتسوي جاي نكعد عصرية بالطارمة وجهالنا يتصارخون وصوتهم شعلوة للعصر كلش يجي فقار لو قبس ياخذنا ونيزك اخر وحدة تبقة .

_____

_كواكب: تاريخ زواجنا اليوم شكد هو فرحان اني عكسة افكر خاف ما اخلف راجعت دكتورة اخذت علاج وماكو نتيجة كلت هالفترة اروح لغيرها
وحلفت بس يطلع السبب مني اعوف ضيغم ومستحيل ارجعة لان ماكدر اشوفة محروم من الاطفال واني السبب ليش شنو ناقصة خل يتزوج ويخلف هذا الحجي كلة مايدري بية هو ولا جايب طاري الموضوع بس من يجن خالاتة يبسمرن
وكلبي يحترك علية اني عندي استعداد اعيش عمر وحدي مو بدون اطفال .

لان يدري بية فاشلة بالمفاجات والتجهيزات اتصل بية كلي بدلي انتظرج بدلت وطلعت جنت متحمسة للمكان الراح ياخذني من تزوجنا ولهذا اليوم
كل يوم ياخذني يفررني ويخليني براحتي اكل اسولف انفعل بنص الشارع

وصلنا للبستان هاي مو اول مرة اجية ماخذني الة سابقاً لان طلبت منه اول مرة ادخلة كلش تاذيت وتذكرت كلشي بس هسة لا تعودت ضحكت من لكيتة مسوي جو بالبستان وطاولة وكيك وشموع ونفاخ واضوية .

مد ايدة بيها علاكة اخذتها منه كلي روحي جربيها
اخذتها للغرفة بيها فستان قطعتين صاير لبستة قياسي كلش ضابني برجلي فتحة طويلة وصلت يمة سحب القطعة الجوة .
_لازم اكو مسافة حبيبتي المن فصلوهن هما

سحب كرسي وكعدت صار وراي ولزم ايدي نكص الكيكة صغيرة كلش كطعناها واكلنا منها بعدين اجت فقرة الهدايا جابلي تلث زواج تراجي ذهب من هذا النوع الصاير حلقة رفيعة صغيرة كلش لان ذوقي شفت وحدة اجنبية لابسة منهن رحت زرفت زرفين وبقن بتراجي عاديات لا ينطمن .

لبسهن الي وباس شحمة اذني جنت ماجايبة هدية لان احتار شنو اجيب كلشي متوفر عندة
فتحت ادية حضنتة وبستة .

_اني احلى هدية

_كوكبي الجميل والارتاح وياة واعيش مشاعر مختلطة صدك احلى واثمن هدية

قضينا وقت خاص كلش استمتعنا
ثاني يوم رحت اراجع دكتور دزتني للتحاليل كاعدة على اعصابي اشوف شبية مرات اكول مو كلها
تنجمع عد واحد اهل وحب وخير ينقصنا الاطفال
خايفة من هذا الشي لان بوقتها اعوف ضيغم
الي هو اجمل شي بحياتي .

فززتني البنية من صاحت
_وينها كواكب

رفعت راسي جان بالي اخذ التحليل الماعرف مال شنو انطية للدكتورة وهي تشوف شنو بية
كاملها ضيغم ياخذ التحليل كلتلة..

_زوجتك؟
_اي
_االف مبروك حامل البشارة

من الفرحة احس كمت ما اسمع شي ضبغم طلع فلوس وانطاها واجة حاضني ضميت راسي بصدرة ودموعي تنزل شوف اني وين افكر وشوف رب العالمين شنو ضاملي .

جان اكبر همي اخبر اخواتي باي طريقة كلت اسويلهن مفاجاة من نجتمع وبوقتها حتى ميس اجت ويانا جانن حاسات ضامة شي عليهن لان الفرح مبين بشكلي .

_كواكب: عندي خبر
_ميس: واني هم عندي خبر

_كواكب: احجي يلا كدامي
_ميس: بناااااااااات اني حاااااااامل

_كواكب: ولج شنوووو اني حااااامل ولي هذا خبرري

_ميس: واني هم حامل والقران

صفنت بوجهها وطكيناها بضحكة الفرحة جانت ماتنوصف والبنات جابن جكليت يوزعن بمناسبة هالخبر الحلو .

جوري تزوجت و ورد تدرس خطبها صافي بس رفضت رفض قاطع دكول ما اتزوج الا اتخرج
واهلها مايدين قرارها، غضنفر عندي تواصل وياة ضيغم يخابرة جاي يشتغل والولد متابعينة
غضنفر بسرعة يختلط ومحبوب فصار صديق الولد

صار يوم ولادتي ولا خايفة واني طلبت عملية
ضيغم جان كلش خايف بوقتها يسحب بشعرة من التوتر واني اضحك علية .

دخلوني لصالة العمليات ونورنا
أيان ميس بعدي جابت طبيعي بولد سماة علي حسين لان الماشي علي ابو حسين .

مرت الايام وشهب نجحت من السادس
راحت قسم حاسبات حتى تشتغل وياهم بالشركة
راد يدخلها اهلية طب ماقبلت لان صعب ويطول راحو سافرو و
نجمة حبلت للمرة الثانية بولد ونيزك مكتفية حالياً باطفالها وامير الدخل مدرسة وبعدة يبلع احرف

جنت مجتمعين بيوم جمعة بيت اهلنا وهوسة جهال
خلصت صلاة نيزك واجتنا تسال بينا.

_نيزك: بنات تقرن زيارة عاشوراء مو؟

_شهب: ملتزمة بيها

_نجمة: واني هم

_كواكب: ضيم ملتزم بيها ويقراها نيابة عني

_نيزك: تدرين ليش تذكرتها لان امي بالحلم
اجتني باستني فرحانة سالتها شلونج كلتلي
زيارة عاشوراء توصلنا افضالها كل يوم
هاي لان اقراها واهديها الهم كل يوم

_شهب: ما انام اذا ما اقراها تعودت

_نجمة: اني اقراها الصبح

اجة ضيغم اخذني وبوس الاطفال كلهم
واجة فقار اخذ ابني بوسة وسلم علية انطاني فلوس واخذ البنات .

نيزك ضرغام يريد ياخذها للعمرة وشايلة هم افاركها جهالها تعوفهم وتروح هي مارادت تروح بسببهم بس احنا قنعناها كنالها هاي فرصة وهما متعودين على سهلة وذهب هناك عينها عليهم .
غضنفر اخر فترة خابرنا يريد يتزوج البت الكتلة عليها جانت صغيرة هسة كبرت ومامتزوجة باقية
حظرت روحي اروح وضيغم ما عارض دراهم اروحلها كل فترة ابقة يمها نص يوم ضيغم يجيبلها مسواك ومصرف ثنينا ننطيها ماتعوف مكانها
عبالك بية سر .

نومت ايان ونزلت جوة انتظر المثقف ابن المثقفين
اجة سحبت الدراجة على كيف لبست شفقتي وصعدت صعد وراي وطلعنا نفرفر بليل ابد ما نكعد بيوم الما اكلة نطلع هو يلح علية يكلي تعودت

اني اسوق وهو يتذكر اول مرة من صعد وياي
اكلت لفات وجابلي طاطلي ولبن شربت البن ورجعت من الطاطلي هواي نزلنا على كيف دخل الدراجة وردة تباوعلنا وتصور تبتزنة حتى ننطيها فلوس

صعدت طاير كتلتها ورجعت لغرفتي عفتها تشكي لضيغم مني غسلت ورحت تمددت راح ضيغم يبدل طفرت علية من ورة .

_يلا سبعي شيلني عفية السبع
_صايرة سمينة اخاف يصير عندي تشنج
_فيولة تطير صايرررر
_انعديت منج حبيبتي
_بسيطة ضيم ماتحترمني الا اصير بالبرلمان واخليك تاخذلي التحية

شالني على ضهرة اضحك واهوبز
_كواكب: كلهم نعل بس انت زلمة
_ولج
_لا اقصد اللطيف مثلك زلمة والمو لطيف نعال

ضحك على سوالفي واني ابوس ضهرة كال
_من جنتي صغيره هيج جنت اشيلج
_يروحي اروح فدوه من صغري مونسني

_شعندي غيرج كوكب اشرد اله من هذا الكوكب
_ضيمي الاحبببة
_مشاغبتي ومؤنستي خليلة فؤادي كوكبة

ابتدأت الرواية بـ
_ضيغم: محتاج شي يولد؟
_كواكب: اني بنية مو ولد

اني كواكب قصتي مختلفة
ابتدت من انفجار وانتهت باستقرار .

كل مايشتد الظلام يقرب الفجر
طلع الفجر على حياة كواكب
سارة ماتت بساعتها
ولدت كواكب موقعها بالعنان حاولو يخلوني
بالاسفال لكن شائت الاقدار ورفعتني للعنان

هنا يكون الختام
حيث السعادة والاستقرار عم المكان
نغلق ابواب المنجمة
باحكام
بقلمي انا الكاتبة كفايه

________________________

االى هنا نستودعكم الله
شكراً الكم ولكلامكم شكراً للمصممات النشرن عن الرواية 💛💛
واتمنى من كل مصممة تقرا الرواية ماتنساها بالتصاميم وتذكرها وي باقي الروايات
الرواية تستاهل اتمنة ماتنظلم

2025/1/1
كانت البداية

2025/7/27
كانت النهاية

تابعو حسابي انستا الرابط بالبايو
Ch_Kfiahامانة تابعو حساب الواتباد