رواية المنجمة الفصل الخمسون بقلم كفايه

﷽

#المنجمة
الكاتبة كفايه

لاتنسون متابعه الحساب
تصويت وتعليق بين الفقرات لطفاً 💙

يا علي مدد
كنت ارددها وبشدة حيث اعطتني
العون على ان اكمل ما بدأت به
ويبقى سرها داخل سطور هذة الرواية .

_______________________

ورد: طفرت من النوم متاخرة عن الدوام ركضت بساع بساع ابدل وارزل بروحي احلف بعد ما اقرا رواية كاملة والاحداث تجرني الى ان اختمها .

سحبت جنطتي حتى ما بدلتها ولا نسقت لبسة
مثل كل مر. فستان لبستة نزلت اركض حتى فحطت وكوة اتنفس لاكتني امي كاعدة هي وابوي يلعبون وي ايان يطفر عليهم ويضحك وهما ميتين علية .

رفعت راسها شافتني تعجبت دكلي
_ياسمين: وين رايحة ولج

_وين صخاام وصخمني يمممممممة
عندي امتحان

_ياسمين: اليوم مو عندج عطلة شنو

_لا دوام بس اخذتني النومة يلة بابا كوم اخذني حباب

طفر يكلي بس ابدل ضليت الطم هسة ياخذلة ساعة يلة يرجع فتحت موبايلي صديقاتي كلهن متصلات بية اتصلت بيهن مايردن كلهن سجاجات
هسة داخلات محاظرة اتصلت على غيرهن ..

_صباح الخير كسولي

_صباح النور عيوني

_ورد: اكلج الامتحان يامحاظرة صار بس
لاتجلطيني ودكليلي الثانية وهي الاولى راح تخلص

شربت كهوة وكالت
_لا عيني اخر شي صار

ذبيت نفس براحة وسديتة منها نزلت راسي لايان يلعب جوة رجلية ويسحل بملابسي يريد اشيلة
ضحكت ورفعتة ابوس واعض بخدودة .

_ورد: يمة وين كواكب نايمة؟

_ياسمين: ماتعرفينها تكعد من الصبح

_شو مالها خبر

_اخذها اخوج لدراهم

_ها صح كالت اريد اروحلهم

انطيت ايان لامي يضحك ويريدني ابقة اشيلة اخذتة امي تطلع بية برا دكول حتى يطكة الهوى وتلوحة الشمس رحت الح على ابوي يستعجل سبح بالعطر يلا طلع يكلي..

_شعري بعدة ما مشطة عدل

_دمشي شلعت كلبي بحال شعر الزكة بيدك

_لا شلون طريق وناس

_والله لو ما متاخرة جان كلت لامي يدور حلوات

ضربني بخفة يضحك وصلني وخبصتة خبض سوق سريع منا لمن وصلت كلي:: ارجعي وي خطج
بعد لاتعيدينها ونامي من وكت

مشيت سريع احجي علية
لان سياقتة بطيئة
لكيت، صديقاتي طالعات من المحاظرة يقرن
كعدت بنصهن اراجع واذا عندي شي مافاهمتة
هنا يشرحلي .

امتحنت وجنت مجاوبة نص ونص مثل كلمرة
تلزيك درجاتي عود اقرا بس ادخل للامتحان
انسى القريتة واموت من القهر قبل جنت ما اقرا
ودرجاتي ناصية هسة عود اقرا .

رجعت للبيت كفختني ريحة الاكل دخلت للمطبخ
بقيت مصدومة وفاتحة عيوني على وسعهن
تطبخ والجداري تارسة الطباخ شافتني ابتسمت..

_كواكب: هلا بوريدة هلا بعمة الولد

_شمسوية ولج؟

_طبخت اخوج يكول ميت على طبخ فدوة
اترجاج ابوس عيونج الحلوة اطبخيلي

رفعت حواجبي مامصدكتها
_ورد: اخوي يريد طبخ منج !
خرب ولج ليش تجذبين هو طبخج حتى المعدة ماتهضمة

شالت الجفجير وتخوصرت تردع بلسانها ردع
_كواكب: اني اعلمج الخايسة الفاهية
تعيبين علية وتدورين مشاكل يجي
اخوج واكلة عليج هسة ما احاجيج اعاملج
باخلاقي واسلوبي بس من يجي اخلية يسحلج

دخلت اكلب بالكدورة وهي ماتقبل افتحهن
_كواكب: مو تعيبين على طبخي يلا ولي
اكلي خبز وكتشب

_شبيج ماكلت شي بس اكول ليش المطبخ مكلوب انفجار طاك بية

_عليج انتي تغسلينة اني طبخت

رفعت حواجبي ودفعتها
_مو بكيفج تكلبينة كلاب واني اغسل

ضحكت تسد السالفة بعدين تكبسني تريد صارت تفتح القبوقة وتغمض عيونها تشتم الريحة

_كواكب: اححححح شمي وشوفي المنظر
ضبطت الطبخة وداعة دراهم

_هسة يطلع بس شكل

_دضوكي بعدين الغي بكيفج

_اي ليش لا

اخذت خاشوكة اتذوق طبخها مسوية دجاج وبرياني جنت متوقعة يلعب الروح بس لا والله طلع طيب وحتى التمن صح ماصخ شوية بس طيب وحتى ما معجن بقيت اباوعلها بشك وهي ترفع بالتشيرت حمت بعد .

_كواكب: الحلوة النادرة كلشي تعرف ابوسني سبعين بوسة

_اممم خاف امي طابختة

_دروحي اسأليها

غسلت ادية وكعدت خل اتغدى واصعد بعد ولا انزل تفتر هي البجامة لازكة عليها وطالعة رجليها والتشيرت عريض صاحت لامي وابوي موجود
رضا جاي من المدرسة متغدي ونايم... رتبت الطاولة لبن وخضرة زلاطة وفواكة كمت اصب وياها

_ورد: اليوم رايحة لدراهم؟

عيونها قبل شفايفها تضحك وعلى واهسها ابتسمت احسها من تسولف الفرحة تنشر بالبيت من داخلها

_كواكب: اخذت دراهم ورحنا لبيت غضنفر
انطيت لمرتة فلوس واخذتلهم مسواك
والله ماتدرين شكد فرحت من تزوج وصار عندة بيت ويشتغل بالحلال

_حتى اني فرحتة اله كدما تسولفين بية

_ههههههههه والله كلها فرحت اله وكلهم وكفو بعرسة فرحت بعرسة اكثر مافرحت لاخواتي
زفيت اخوي واطمنت علية والف الحمدلله من بدا بداية جديدة والله عوضة عن اهلة بيت وبنية حبابة تنكرط كرط وهو مخبلها بسوالفة
جنها شهوبة بسرعة تتحسس وخدودها تصير حمر

ضحكت بفرح وعيونها دمعن خطوبة غضنفر وعرسة كل مرة تكعد تطلع الفيديوهات وتضحك عليهن من كل كلبها واني وياها اباوع احس مو عرس عادي ولا فرحة عادية صار هالزواج
كواكب بكلشي شاركت ولا عافتهم شوية الا ان كمل بخير وسلامة .

اجو ابوي وامي كعدنا ناكل وهي راحت لابنها صاحت بيها امي تجي تاكل كالتلها .

_كواكب: انتظر ضيم هسة يجي ناكل سوى

راحت وامي مامصدكة هذا طبخها واني عبالي امي مسويتة .

_ياسمين: هي دوم تطبخ ساعة يخرب وساعة يضبط اسكتي لا تجيج تكتلج

ضليت اباوع للباب لا صدك تجيني تسحلني من حضن امي وتكتلني كامت امي تلم المطبخ واني جوعانة بعدني اكل صبيت مرة ثانية .

_ياسمين: صايرة هواي تاكلين مو زين ماما
راح تصيرين دبة هو انتي صايرة دبة

_عادي مايهم

_مو تجين تبجين يمة اريد منحفات وعمليات
تحلمين

سكتت مارديت عليها مايعرفون واحد جوعان
باوعت لكواكب دخلت لابسة دشداشة قصيرة
وردنها ربع ضابة الحزام على خصرها بارزتة
وشعرها بوي كاصتة ابد ماتطولة ومن بعد الولادة سمنت مو مثل قبل دجت بيها لحمة على كولت امي

شايلة ايان تلعب بشعرة وعطرها ترس المطبخ كعدت يمي وكامت بايان يبجي..

_كواكب: اسكت راح يجي ابوك
ملش شعرة يلا يمة يلا لاتبجي صير سبع
مثل ابوك

_ياسمين: شنو ابوة ماجان يبجي من الصغر

_كواكب: يمة لاتسمع ابوك مشهودتلة بصولاتة
واحنا سباع ولد هالگاع ياجف اليلاوينا ضيم ابنج ياگاع هد اتلگية لازم بيكيسي يحارب بيه سبع ومادنك راسة مشهودتلة بصولاتة

طلعت وامي تضحك عليها عدها طكات يابو
طكات واحنا متونسين عليها حتى من تجذب
نتونس على جذبها،، كعدت هي وايان بالمرجوحة غسلت وصعدت جوري خابرتني حاجيتها ونزلت انطي التليفون لامي تحاجيها .

كعدت اريدها تخلص ماكو الا تصفرة طلعت بالطارمة الباب يندك راحت هي وابنها فتحتة دخل ضيغم وشال منها ايان يبوسة ويحضن راسها
يكرص بخدودها ويبوس بابنة وهي تضحك

_كواكب: اجة ابوك السبع شيخ الزلم

وضيغم ياكل بية اكل ويشمة بقوة اجة سلمت علية ودخل يضحك اخذت منة ايان غسل ادية وكعد صبتلة الاكل ورتبتلة الطاولة الضحكة تارسة وجههة تشتغل
ودكلة .

_كواكب: طبخت الك طبخة بوياااااا مو طبخة تموووت ضبطت ضبطة وصارت تفلشش
حتى دكول مرتي كلشي تعرف ومدللتني

_ضيغم: اروحلها فدوه

ضحكت وعود تستحي الخايسة خدودها تصير حمر كعدت يمة مامتغدية بعدها تباوع لضيغم حتى ينطي رأية بالاكل شال راسة وهي دكلة:: ها

اشر بيدة فول وكلها
_يموت مو طبخ ابوس ادينج التطبخ

_كواكب: ماريد بوس اريدك تطلع وياي بالليل
نفتر بالدراجة

هز راسة وهي طارت تاكل وابنها يريد ابوة من حضني ويريد يطفرلة افتريت اهزة مد ايدة انطيتة اله كعدة بحضنة يباوعلة يضحك

_كواكب: كلة ضيم يلة ايان گلة بابا ضيم ابو العطور المثغف ابن المثغفين

ضيغم يضحك ويرفع راسة لايان يكلة
_ضيغم: يروحلك فدوه ضيم.

_كواكب: واني هم

_الدولة شلون ما اروحلج فدوه

رفعت راسها الي ترفع بحواجبها عود دكلي
مسيطرة على اخوج غميتها من وراة وطكيتها ركضة لغرفتي قفلت الباب لاتدخل علية وتكتلني
خليت موبايلي على الشحن ونمت للغروب كعدتني امي .

كاعدة بالمرجوحة اقرا وهي وامي بالمطبخ يسون عشا وايان عند ابوة كملن وصاحتني رحت تعشيت وياهم وهي تموت من غسل المواعين كلشي عدها الا المواعين غسلتهن خطية ابنها هم شالع كلبها يخبث عليها كلش بس من يجي ابوة يسكت .

كملت ورجعت اقرا نص ساعة والباب صار يندك طلعت افتحة وصاح ابوي علية رزلني لان رايحة افتحة واني لابسة تراكات دخلت احجي بصوت وكفت بالطارمة كالبة خلقتي
ومن شفتة فتح الباب ويرحب بهتت ملامحي
وطفرت جوة اركض لاكتني امي تسألني منو

_ورد: اخوان ابوي اجو

_فرقد واسامة؟

_لا لا ذولاك

طفرت وياي راحت تشوف وتفاجئنا من نسوانهم وبناتهم اجن يمنا سلمنا عليهن وكعدن يسولفن طرت بالفرح من شفت البنات تمنيت جوري موجوده رحنا للمطبخ نسوي جاي وكواكب سحلتهن
من الفرحة كلساع حاضنتهن وهنا يضحكن

_كواكب: اي عيوني ريا ورهف شلونجن شخبارجن

_ورد: ريا وسكينا ههههههه

_رهف: الحمدلله بخير

_كواكب: اكعدن عندي سوالف وياجن

كعدن وكواكب سحبت كرسي كدامهن عبالك تحقيق عدها وياهن .

_كواكب: حفصة وسندس وياكم بالبيت

_رهف: لا هي وسندس وبناتهن كاعدات بيت

_شعجب

_مو سندس محد يريدها منا لا هي ولا بناتها
وبيبي تعاركت وي الولد وطلعت وي بتها

_ولاء ودعاء وين صفا بيهن الوكت هم تروحولهن

_مرة رحنا وي امي دعاء اجتها خطابة بس ماتريد تزوج

_شتريد ما تولي

_وامها تريد تزوجها بس تبجي

سكتت تعصر باصابعها واختها بسرعة حجت تضحك بعفوية .

_ريا: تبجي على فقار جانت تريدة عبالها يتزوجها هههههههه

_كواكب: اي وجان كلساع طاردها والله ايام هههههههههههههه

_مامصدكة تزوج وصار عندة اطفال
تريد تروحلة وامها كتلتها كالتلها والله اطلع
واروح احاجية لو تنكلب

سكتت اباوع لكواكب كلبت عيونها وجهة احتقن
_جلبة قابل يگلبها

تسويها دعاء بس تصيرلها فرصة يكولون حتى امهن ماتطلع من البيت من وراهن تخاف لايسون شي واخوانها مهددينها يكولون لعمامهن ياخذونهن منها حجيت مغيرة جو

_رفولة شلونها شخبارها

انكلبت معاني وجههن للحزن كامت كواكب تخلي شكر بالاستكاين وهنا ساكتات .

_كواكب: ماتحجن شبيها اختجن

_رهف: هي مو صديقتجن شعجب ماتراسلنها

_ورد: والله شكد اراسل ماكو اختفت

_ريا: زعلانة بالبيت رجلها يريد يطلكها

وبدال مانزعل ونلطم فرحنا وضحكنا ثنينة وهنا يباوعلنا ساكتات
كواكب عافت الجاي وراحت تبوسهن ودكلهن

_كواكب: كل وحدة الها عشرتالاف على هذا الخبر ولجن نيزك دوم تذكرها وتنقهر عليهم

_ورد: كون صدك تطلك هي مارايدتة حتى من جنت اتواصل وياها تشكيلي بلكت صدك تخلص منه

_ريا: هو الولد يريد يطلك وهي متنازلة عن كلشي بس ابوي مايقبل يلكلها لو ترجعين لو يطلكج وينطيج حقوقج وضالين على هاي السالفه

_كواكب: ابوجن شكد جلب حشى الجلب
هو وذاك الثاني هم جلب حشى الجلاب منهم
عاف ابنة متخبل وما كالة لا خوية عوف البت لابني ماطول رايدها وهي هم تريدة

_ورد: هو حسن هسة وين؟

_رهف: تخرج وجاي يشتغل

اجة ابوي اخذ الجاي ودخل جوة وكواكب اخذت صينية الجاي للنسوان صايرة ام بيت ومعزبة
قدمتلهن وكعدنا يمهن كطعن سالفتهن يباوعلنا
والبنات توترن يريدن بس يكومن حسيت جيتهم
مو خالية .

حجت مرت عمي وهي عينها علية حسني كلبي بكلامها وشنو رادت تحجي .

_ام تميم: اليوم جيتنا هاي حتى نقرب المودة بينا ام ضيغم اجينا طالبين وردتكم لتميم

شهكت وايدي على كلبي فاتحة عيوني على وسعهن تميم ! كابوسي الاسود خزرتني امي اسكت وهي دكلها .

_ياسمين:تحجين صدك جنج؟!تميم ابو العملة السودة لاهيج ولا هيج جاية تخطبينها اله

_والله الولد تغير وتعرفين بذيج الفترة كلنا مسحورين وهو اولهم مشبعاتة سحورة يكول يمة مادري شلون سويت هيج مو بارادتي

_اسكتي خية لا تكملين

_ليش ام ضيغم والله الولد هاويها وهاي شكد يحجي واني أجل بالسالفة

_لاتفتحين الموضوع ماعوزنا ضيغم ولد عمة وهي أصلاً وردة صغيرة وتريد تكمل دراسة

قاطعتها
_ميخالف تكمل يمنا جامعة هو قابل

سكتت امي واني كمت مصدومة وحتى ماعرف شحجي من الصدمة صعدت اركض وجهي صار نار غسلتة اكثر من مرة والبنات لحكني خزرتهن وهنا خايفات من ردة فعلي .

_رهف: باعي هو صارلة شكد يكول اخطبولي وردة
بس اهلي مايقبلون تسودن علينة يكول احبها واذا

كطعت كلامها فتحت عيوني انتر بيها بحركة
_كملي واذا شنو واذا؟؟؟
ها كولي شيريد يسوي؟

_ريا: ترة هو مايعرف يتصرف دوم واحنا
مالنا دخل بية ولا نريدج توافقين بكيفج

اخذت اختها ونزلن بقت ورة الـ اذا الف احتمال
وتهديد واضح وصريح اذا رجع شيكدر يسوي هالمرة بشنو يبليني ؟

االتفكير ياكل بية اكل واحس حرارة بصدري ماعرف ابوي شكالهم اجتني كواكب شايلة ايان تهز بية خلت ايدها ورة ضهري تطمني .

_شكو شبيج؟ هسة احنا نطيناج هما مجرد خطبو وراحو بعد شكو راح تموتين

شهكت كوة اجر النفس
_كواكب انتي ماجنتي موجودة والله موتوني بيدهم لو ما اخوي ولد عمي
وكفو وياي وصدكوني... تخيلي هسة اني جان متزوجتة وماعرف شلون يعاملني وهم عندي جهال
وحال الضيم حالي

دكت على ضهري تسكتني وتكلي
_يلا ماصار شي الحمدلله اسكتي لا يبجي ايان
وعلي اكتلج واعوفة عليج

سكتت وهي طلعت دقايق واجة ضيغم فتح الباب ومد راسة شافني كدامي الكتب وجذب اذا اكول اقرا ابتسم ودخل عدلت كعدتي صار كدامي دنك حضن وجهي بيدة .

_ضيغم: اسمعي منا وطلعي منا تمام حبيبي؟

_يعني ما افكر بشي اطمن

_بذاك الوقت ما انطيتج انطيج هسة !؟

_ضيغم

سكتت عيوني مدمعة غمضت عيوني باسني بكصتي بصوت هادئ حنون يكلي .

_يا روحة لضيغم فدوة يروحلج وردتي لاتهمين بشي واخوج موجود

ضحكت وختلت بحضنة بقيت حاضنتة وهو يشوف المادة واني احجيلة عنها انفتح الباب صارت بوجهنا كواكب مخنزرة علينة .

_هذا ابنك بهذلني عمي يخبث وياي
اخذة وخلصني لو انطية لنيزك واخذ واحد من جالها بدالة شلون جهال مؤدبين يخبلون
بس ابني ماينجرع

اخذة من ايدها يبوس بية يضحك ويكللها
_يشبهج طالعة عليج نسخة

_اي مو اني جنت هيج بحضك وبختك؟

ضحك وهي صارت نار باس ايان بركبتة يكلها
_بحضي وبختي يابة جنتي لو ما اني اخذج
وافر بيج الشوارع فلا تسكتين

_ترة جنت زعطوط بوقتها لاتضل تهمبل
_ضيغم: صح صغير بس اتذكر طفولتج

_ديلا هسة اريد اطلع بالدراجة اياااان ااخ ايااان
لا تخليني ارشح بالبرلمان واعوفك انت وابوك

شافتة ساكت عند ابوة عافتهم وطلعت اخذة وراح وراها شوية ولحكتهم تصيح عليهم

_روحو انتو اشوف اخبار البلد احسلي
مايرتاحون الا يعكرون مزاجي

اخذت ايان من ابوة وبقة هو يمها يقنع بيها
اجة رضا يلعب وي ايان ويبوس بية جايبلة طوبة تنجعص من المدرسة يخليها بيدة يريدة يجعصها وكل شوية بايس ايدة اجت باستة ايان تعب صار يغفي شالتة ادك علية وتسال برضا..

_خاف واحد يضوجكم بالمدرسة؟

_رضا: لا محد بس اكلج هذا امير يحب بنية حلوة هناك

انصدمنا اني وكواكب وهو ضايج يكلها
_رضا: يشتريلها وينطيها جبس والعاب هم

دارت وجهها خازرتني رفعت ايدي
_ورد: لا تكولين طالع على ضرغام الحمدلله مو ابوة الحقيقي

_كواكب: التربية تاثر اكثر يمة ابن اختي راح
اروح احاجي اهلة اكلج رايحتلهم ماترحين وياي

_وين بعد ترحين ابنج نام

_اعوفة يم امج

_بكيفج

_يلا بدلي خل نروح نضحك عليهم يغيرون جو ذولة وهم نمر على ذهب ونشوف اخبار الجماعة

راحت واني طفرت لبست شال ورضا يضحك علية
_رضا: لابسة شال وتراكات يععععع مو حلوة

_انجب هسة البس صاية واصير محتشمة حلوة

لبست وهو نزل يبدل ورجع يرش من عطوري ويمشط بشعرة كتلة .

_ماعدهم بنات مارايحين لبيت اسامة حتى تشوف بنات فقار

خزرني ماعاجبة ومشة كدامي رجع التفت علية
رفع اصبعة وكلي .

_احترمي نفسج اني ماحب البنات هذا امير
يحبهن مو اني

_الا اكلة عليك

_رضا: دولي يلا ولييي

كفختة ونزلنا كواكب كدام هي ورضا واني ورة شغلت اغنية مال عطوانين وعلتها وخطية اخوي ساكت ومتحمل صحت بيها تغيرها اندارت علية خازرتني .

_كواكب: شو تشرطين شكو خير

_راسي طك هي هاي هم اغاني !؟

_تهي بهي فوكها تشرط فوك ماجبتها وياي

_حبيبتي سيارة اخوووي ماجايبتنا بدراجتج
العايبة

ضربت ضيغم بجتفة دكلة بحركة
_تسمع تسمع اختك تعيب على دراجتي واني كلشي ولا هي

مارد عليها بس يهز براسة التفتت علية رافعة اصبعها
_كواكب: اذا ما الزمج واحصرج حصرة
انتي اندكيتي بية بسيطة عاكولة

هزيت ايدي ودرت وجهي عنها تريد تعارك بهليل
وصلنا لبيت ضرغام وهي تدك بالباب بقوة وضيغم يكلها على كيفج .

_كواكب: مادام بيت البعيجي مو على كيفي

_رضا: شنو يعني بعيجي؟

_ضيغم: اسكت انت

فتح ضرغام الباب يباوعلنا مستغرب لازم الباب بيدة
_ضيغم: مساء الخير

_ضرغام: هلا بابن العم

تصافحو وكواكب رغم ضرغام ساد الباب فاتت من جواهم التفتت ضرغام وراها بصوت ناصي يحاجي ضيغم .

_ضرغام: بس لو ادري شلون عايش وياها ولك والله خبلة مو صاحية

_ضيغم: ااسكت لا تسمعك

_اكلك خاف باقي بالتهديد وياها

ضحك ضيغم ودخل جوة التفتلي ضرغام يكلي
_ها ام عيون الدكم شلونج

_بعد وكت تسلم علية

_انتي هم لايحج خيط من كواكب

هز ايدة وراح كعد سلمنا على نيزك والجهال ملتمين على كواكب تبوس بيهم .

_كواكب: فدوه لله ذولة وابني خرررب

_نيزك: شبية ايان

_كواكب: مخبلني وعلي بس يخبث ويبجي
لا مريض ولا بية شي بس يوون

_ضرغام: طالع عليج امه منو

_كواكب: خليني ساكته منا جهالك اموري ماتجي وياي بيوم الجمعة شو مشتاقتلك

_رضا: اي اموري تعال يمي نقرا سوية

_امير: بكيف بابا اذا يقبل اجي

ابتسم ضرغام وفتحلة ايدة راحلة يركض بوسة وكعد بصفة حاضنة كلها شاهدة على حب وتعلق ضرغام بامير وعلاقتهم الحلوة ضيغم باوع لرضا سحبة علية حضنة وباسة عود مو بس امير..

كمنا للمطبخ نيزك تسوي جاي وكواكب كاعدة تسولفلها على جية البنات واخبار رفل ونيزك تدعي تطلك وتزوج حسن، اخذت نيزك صينية الضيافة واحنا وراها رحنا كعدنا وهي بس قدمتها اخذت علي
بحضنها لان متضايق من الكعدة صارت تمسح على ضهرة وليث صار يبجي علي وليث نفس العمر تقريباً عبالك توم، اخذتة كواكب يلا سكت بقينا يمهم شوية وكمنا لان ايان كعد يبجي وبس وصلنا اخذتة كواكب تفتر بية نريد مايسكت تالي ضيغم اخذة من عندة وطلع بية برا البيت اشوف كواكب رايحة راجعة
تهز بيدها وتحجي وي روحها منا يمن اجة ضيغم نايم ايان صعدة فوك بعد ماسمعت صوتة للصبح .

مرت فترة ايان شالع كلبنة وهاي كواكب العصبية بس ساكتة وتفتر بية شكد نحاول نريد ناخذة منها ماتنطية ذهب دكول انحسد لان ما شاء الله عيونة ملونة ويخبل سمين وضخم كعدت يمنة وصارت تنشرلة شوية صار احسن وكواكب جلبت بيها ماتقبل تروح وتعوفها وعلي كل يوم جاي عليها ياشرلها ماتجين ؟

_كواكب: ها عليش ها ما مليت منها جبت عمرك مكابلها دعوفها اني الما شفت منها شي ولاكبرت كدام عينها خل اشبع منها شوف

اشرلها براحتج وذهب كامتلة تبوس بية
_ذهب: ابو حسين فدوة اروحلك لاتضوج اجي
بس اخذلي مدة ومن تجي جيب وياك حسين و
وميسونة

هز راسة اي عافلها مصرف وهي بقت تحجي وراة ودكلة انت شعندك تعوفلي وكواكب دكلها خايفة عليهم اخذي واسكتي .

خلص دوامي وطلعت اشتري واروح للخط جان داخلي مرتاح لاهم ولاغم على كلبي اشتريت حلويات علاكة حسبت حساب الكل طلعت فرحانة بس اختفت فرحتي وصابني الخوف والهلع بمجرد شفت
شكلة وبعد كل الفترة الفاتت مانسيت شكلة اول ماشفتة عرفتة متغير وكبران ابتسم من شاف خوفي وملامح وجهي .

_تميم:: شلونج وردة؟

اخذت نفس ومشيت سريع متجاهلتة احس بية يمشي وراي صرت ارجف الفرع طويل وبية بيوت قديمة طلاب تمر بية شهكت من سحبني من ايدي بقوة فتحت عيوني على وسعهن ونترت ايدي بقوة ضاب عليها خلة عيونة بعيوني يحذر .

_تميم: لاتجاهليني اجيت احجي وياج

_عوووف ايدددي عووفها شعندددك لاحكني شعندككك

_صوتج صوتج شوفي وردة ترة ابوي جان مهددني بشغلة في سبيل ما اوصل صوبج ومتحمل كل هاي الفترة اباوعلج من بعيد لبعيد بس هسة طفح الكيل واجيت اكلج بكل ادب واحترم تقبلين بيه

ضحكت باستهزاء وسحبت ايدي
_ادب واحترم حتى اقبل؟!!!!
بيك لو تموووت والله

ابتسم مركز بعيوني
_ما اموت وداعتج بس ما اضمن سلامتج
اذا بقيتي على قرارج

هزيت ايدي وحجيت متكتمة على الخوف البداخلي
_دطيررر بيك خير حافظ على روحك الا اخليهم يسحلونك

درت وجهي ومشيت بس بقت ضحكتة ترن بالشارع وصوتة العالي من گال كلمتة الاخيرة ::

_كليلهم كليلهم مايخوفوني والله لا يلزموني ولا يكسرولي جنح انتي وردة انتي تطيحين بيها

مادرت وجهي مشيت واني اتحلف احجي لضيغم واول ماوصلت الخط اتصلت بضيغم خفت لا انسة احجيلة ويصير شي ما جاوبني خطة مغلق كعدت بالخط اكل حلويات بنص الطريق اتصل بية رفضتة ودزيتلة رسائل لان استحيت احجي كدام البنات بس قرائهن اتصل بية فوراً صوتة عالي وخايف .

_ضيغم: سوالج شي وردة؟

_لا والله مثل ماكتبتلك بعد ماصار شي

_نعلعلة على الخلفوة اذا ما اسگطة السكط ابن السكط

رجعت للبيت وابوي جان على علم بالموضوع ضيغم مخبرهم صايرين نار ومتوترين صعدت بوجهي ماريد اتذكر الصار قبل وارجع احقد على ابوي هو اني كوة نسيت .

كعدت متاخرة من النوم طلعت من غرفتي باوعت من المحجر هوسة صايرة وبيت عمي جايين هما ولدهم
فركت بعيوني اصحصح واسمع ابوي يهدي بالولد ويكلهم..

_جواد: ولكم شنو زعاطيط شبيكممم
ماتنردون مو ابوة انطاكم كلمة وكال بعد مايوصلها
هسة لو صار بية شي مايشمرونكم سجن
بلة طگة من الطكات تموتة صاحين انتو ؟

وضرغام بعصبية يصيح محترك دمة
_وانعل اصلة واكسر ضهرة وضهر كلمن يطلع وراة هالجبان لو بية خير مايشرد جنة جريذي كون زلمة يبقى بيتة حتى اعرف يجي لمنو ويهدد

فقار يخزرة كاعد باريحية مشمر ادية يحجي بهدوء عكسهم:: شنو نسيتو الصار ليش عمي مستصغر الموضوع بلة سوالها شي هنا شنسوي؟
لو عدكم زوجوها اله وخلص !

طفر ضيغم من المكان وراة ضرغام يسب بيهم ويتوعد وابوي يصيح بعصبية .

_جواد: واني شسوي يكول مودية وهيج كابين علية

_قبس: انت بس اطلع منها واحنا نعرف شغلنة

كالها وطلع من شفت عين فقار علية صار دخلت لغرفتي وجهي نار صاير ماتخيلت هيج تكبر السالفة
شوية واجت كواكب شايلة ابنها خلتة على الجرباية وكفت كدامي .

_ها شبيج وجهج اصفر؟

_ورد: مابية شي

_عود لاتخافين شيلي ابن اخوج وتعاي وياي اسويلج اكلة

_منج من الشيطان

خزرتني تهز بيدها
_كواكب: صوجي اني الحبابة الفقيرة

راحت فتحت الباب واندارت علية
_يلة تحركي

_فقار بعدة موجود؟

_لا طلعو محد موجود

شلت ايان ابوس بية وطلعت وراها كعدت بالمطبخ وهي تشتغل وتكلي:: راح اسويلج اكلة تموت وشوفي مرت اخوج شكد حبابة ومداريتج

_بس لاتذليني فدوه

ضحكت وهي تثرم دك تليفونها فتحت الاتصال وخلت التليفون كدامها مثبتتة اجة صوت البنات
دفعة وحدة وهوسة جهال .

_كواكب: سكتن جهالجن هيوووو
_ميس: هلو بنات اني ابني يم بيبي ذهب
فارغة

_كواكب: الا اخذها منج مجلبين بيها ذهب
بس عليش حفيدها يكول

ضحكت ميس تغورها ودكلها
_والله ابني يموت عليها وطول الوقت يمها

_شهب: شدكولين النة يمكن انتو تجيكم الا احنا منسيين ولا عبالك بيت ابنها الجبير

_كواكب: شوفن لاتحركني بهليل وعلي اروح اهد عليها اسحلها واجي بعد تحلمين تشوفينها

_ميس: بنات الغيرة مو زينة

_كواكب: ام التشمشم اسكتي لج ماضيج يمي
لا انكتة

_نجمة: ها ولجن سكتت سيوفي واجيت كواكب
فدوه احجي على ام التشمشم افضحي ماضيها حبابة

_ميس: كواكب والله اطلع من الكروب وبعدين ولا اصعد اتصال جماعي

_نجمة: كواكب احجي معليج

_كواكب: غير تسكت ام الشكولاتة استاذ بس انت حباب

حجتها بصوت نجوم وخلت ميس تضحك بصوت عالي ودكلها:: اي بعد بعد تموووع

_نجمة: كواكب اني اختج

_مرت اخوي منين صرت اختج والحمدالله
اخوي فضح اسرارج الي

_نجمة: اني اعلمة يجي لو مايجي بسيطة

_كواكب: خاب دكومي هو انتي من تشوفين
تسرسحين

_نيزك: كافي ولجن لاتتعاركن احنا اتصلنا نسأل عن وردة وهاي السالفة الجديدة مو للمعاير

_كواكب: ام امير العلم يرحلج فدوه ذني الزعاطيط دووولة وعلمممم واحلى اخت بالكوووكب ام عيون الطاكة

_شهب: شفتي نجوم مو اكلج ماتحبنا بس تحب
نيزك

_نجمة: مو جديدة ادري بس ساكتة
اروح اشوف بناتي احسلي

_كواكب: انطيني امي احجي وياها

نزلت نجوم وكواكب تسولفلهن عن الصار والهوسة
شوية وهاجر اخذت التليفون من نجوم قمر كاعدة بحضنها ود تلم بالالعاب واسامة وراهن يبوس بضي ويسولف عليها البنات سدن الكاميرا خاف يشوفهن وسكتن بس يسمعن .

_ها يمة شلونج؟

_هاجر: هلا ومية هلا بيج يمة سارة
شلونج بعد روحي

_كواكب: الحمدلله شوفي يمة اسوي اكل لحماتي
خاف يكلولج ماتشتغل بتكم

_هاجر: من فدوه لايدج
ابنج شلونه صار؟

_لا زين من ايد ذهب صحى الحمدلله
احسن من قبل ابوي شلونة

_هاجر: هذا وياج

اخذت نجوم التليفون الة رفع راسة وابتسم يلوح بيدة .

_اسامة: هاي منو الحلوة ام عيون الحلوة

_كواكب: ههههه بتك يابة طالعة عليك حلوة

_اسامة: لا بابا على امج حتى لون العيون

_ما انكر صح كلامك بس الشخصية مال الناس الثكيلين عليك هاي

ضحك فرحان يموت عليها وعلى سوالفها من يجتمعون يشبعون ضحك .

_كواكب: ها بوية شو مكعد هاي بحضنك
شكو ولد الولد اعز من الولد ماتمشي يمي
ترة اغاررر

لزم خد ضي وباسة بقوة وهي مبتسمة للكامرا
_اسامة: هاي حبيبة كلبي هاي

اجتة ود متخوصرة وعصبية صايرة صاحت بية
_ود: جدوووو

ضحك وسحبها علية يبوس بيها ويكلها
_يابعد جدج انتي الاصل روحي انتي

هزت ايدها كواكب ومن كل عقلها دكلة
_روح روح ابقة يم حفيداتك يلة باي

_اسامة: تعالي نسافر وحدنا ونعوفهم

_كواكب: ماريد باي باي

_ولج خل اشوف حفيدي

دارت الكامرا على ايان واسامة بقة شكد يحجي وياة خلصت الاكلة كعدت اكل وعبالنة البنات نزلن من الاتصال طلعن موجودات يسمعن .

_كواكب: نسيتجن عبالي رحتن

_نيزك: شلون نروح وتفوتنا هاي السوالف الحلوة
ضحكتي شكت وجهي حتى امير يسمع وياي

_كواكب: كلة خل يجيني مشتاقتلة

_نيزك: مايكدر يفارك اخوتة متعلمين علية

_ميس: بنات اني رايحة اجة علوشكي باي نروح ندلعة

_كواكب: ديلا ولي گلعة

بقن يسولفن ونجوم ابنها يبجي طلعت من الاتصال تسويلة ممة نجوم صار عدها ولد سمتة سيف وشهب بس ضي ملتهية بالدراسة اما نيزك ضرغام يخاف عليها مايخليها تحبل وهي تريد بنية دكل لكواكب .

_بس بنية واكطع بعد بنفسي

_كواكب: نيزك مابينة حيل والله عوفي السالفة

_نيزك: حتى انتي كواكب

_اي ماريدج تحبلين والله ابقة شايلة هم
واخاف عليج بعد وكت خل جهالج بعد يكبرون
واحبلي

كمت اغسل المواعين وايان بحضن امة ادك على نايم سدت التليفون وشاتلة شوية واجة ضيغم
درت وجهي علية متوترة واكف ورة ضهري ابتسم
باريحية وكال .

_تعشيتي

_اي مرتك سوتلي والله صايرة طباخة اكلت هواي

_تعجبج ام البرلمان

غسلت ادية نشفتهن وكتلة
_باجر اداوم لا؟

_وليش تسألين عندج عطلة شنو؟

_لا بس..

كطعت كلمتي وهو كال
_دوامي اكيد ليش شكو صاير حتى تغيبين

_مو..

تقرب حضن خدي بكف ايدة ونضراتة الدافية بثت الامان بداخلي
_ماكو شي عمري لاتشيلن هم واحنا موجودين
زعطوط ورديناة

مرت الايام اداوم خايفة احس يسويلي شي لو يخطفني حتى من الجامعة ما اطلع الخط يطبك بالباب ياخذني ويجيبني بس صار يراسل من حسابات يعتذر ويكلي .

_تميم: احبج وردة خل نتزوج فدوه

احضرة ويدزلي من حساب ثاني فيديو الة يدخن بمكان اضلم ويحجي بصوت ناصي كوة ينفهم
_لو تشربينها تذوبين لج بس تعاي

بعد هواي كلام وسوالف كلت لامي علية ماخلتني احجي لضيغم دكول يكتلونة موت اني احجي وي امة وبيوم راحتلهم للبيت بدون مايدرون رجعت تصفك ايد بيد ودكلي

_مايفيد هذا مو صاحي لج يهدد ويكول الا اخذها صخام بوجهي جنة ناوي يخطفج عناد بولدنا

متت من الخوف وامي خايفة اكثر لان طاردينة من البيت ومحد يعرف مكانة حتى الولد يدورون علية مايلكون اله اثر رجعو اهلة خطبوني يكولون لابوي

_بعد احنا سوينا العلينا واجينا بكل احترام نطلبها للزواج خاف يصير شي احنا مالنا دخل لاتجون علينة انتو قافلين والولد يكلكم اريدها

وضيغم بس يسمع هيج يتخبل هو والولد وتگب هوسة شكبرها وكلهم يهددون اذا لزموة يموتونة شلون يهددنا ابوي بس خلاهم يطلعون يكلهم من كل عقلة ويخبلهم .

_جواد: مابيها شي خل نزوجها اله ماطول يحبها ورايدها هو لو مايحبها كلساع يودي اهلة

الولد يتخبلون ومن يشوفهم هيج يكللهم
_شنو الحب حرام صار انتو مو حبيتو واخذتوهن منو مو ضرغام كتل روحة على وحدة عدها ولد وشاردة عمها يريد يذبحها ولا وراها احد
وكلكم هيج بس علية

مرت فترة نفسيتي تدمرت وابوي يقنعني اوافق واقنع اخوي يكول احسن ماتصير مشاكل واخوج يدخل سجن مؤبد لو ولد عمج واني اموت منه وكرهتة اضعاف اضعاف

ضيغم حتى اهل الامنية منطينهم علم مايدخل للجامعة وبس يردون يلزمونة وهو ماينلزم

ببالعطلة كال ضيغم جهزو روحكم للزيارة نروح طرت من الفرح صدك نفسيتي مدمرة لبست
ومنتظرتهم جوة كواكب تصيح على رضا ومسوية البيت هوسة حتى ايان امي بدلتة .

اندك الباب رحت اركض افتحة بقيت صافنة واكفة بمكاني من شفت صافي اول ماشافني ابتسم بفرح وفتح عيونة جنة مامصدك يشوفني حقة من يوم الخطبني بعد ماشافني توترت من نظراتة وردت امشي بس وكفني من كال .

_صافي: شلونج وردة

هزيت براسي ودنكت عيوني جنة راد يحجي بس سكت واني ماحجيت شي دخلت جوة كلت لرضا الباب يندك راح يركض يشوفة منو والنوب رجع لضيغم يكلة:: صاحبك ابو الصوف بالباب

درت وجهي متوترة من كل عقلي ضيغم يباوعلي
دخلت جوة شوية جوري اجت وجهها احمررر وتضحك قبل لا تسلم علينة كالت .

_جوري: يمة حااامل يمةةةة

نزلت دموعها وكواكب بس سمعت حتى ما مستوعبة الخبر طكتها هلهولة اهل المنطقة سمعوها امي حضنت جوري وهي من الفرحة شبعت بجي شكد راجعت دكاترة على مود الحمل وتعبت .

بساعتها الفرحة ما وسعتنا باركنالها وامي طلعت تبارك لسمار حتى مايكدر يحجي بس يضحك
بعدة واكف واجة ضرغام ونيزك سلم وخزر سمار

_ضرغام: شبيك حلگك مشگوگ طالع اسمك بالبرلمان

_كواكب: عمي عوفو سالفة البرلمان كلشي وكلتو طلع اسمك بالبرلمان مو انهجممم هجممم على اهلة

_ضرغام: حجت ام دجة اسكتي يلا اسكتي
مو وياج

_كواكب: اسكت انت لا نتولاك اني وزلمتي السبع نجعصك

ضحك ضيغم يكل لضرغام
_بارك لسمار راح يصير اب

ضرغام خزر جوري وهي ختلت بعدها تخاف منهم
بارك لسمار وكلة:: يلة حضرو رواحتكم نروح للزيارة سوى وهم وزع جكليت بالامام

_ضيغم: خير يا زيارة هاي؟

_ضرغام:نروح نزور

_ضيغم: سيارتي يادوب تكفي لاهلي شكو انت

_ضرغام: يا سيارة هاي انتو ترحون واحنا لا

_ضيغم: ماتروح احد لازمك

_ضرغام: هو نروح سوى بعد ام امير واسباعي
يحبون خالتهم مايكدرون يفاركونها اجرت كوستر
وحتى فافونة راح تجي مو بس انتو رايحين كلنا بعد فد مرة

بقينا ننتظرهم الكوستر اجت وهما بعدهم ماجايين كواكب دزت رضا يحجز مكان الها هي اختارتة ونيزك دكلها.::تكعدين وحدج واني؟

_كواكب: نسيت يلا نكعد سوى

اجو بيت عمي فرقد كلهم امير حاضن سهلة يسولف وياها اخذتة وراحت للكوستر امي شالت ايان وكواكب نيزك تلف بشالها اخذت ابن علي ورحت كدامهن حجزت يم الجامة ضرغام حاير بالجهال
صعدت نيزك انطاهم الها وكواكب بصفها كعدت جوري وامي سوى كعدتنا مخربطة كلش .

_ذهب: تعاي ميسونة يمي اكعدي وين كاعدة وحيدج

_ميس: هسة تجي نجوم تكعد يمي

التفتتت عليهن كواكب خازرتهن
_كواكب: ها ذهب هاا ماگلتي تعاي اكعدي يمي
رايحة لميس تگليلها تؤ تؤ شكد تفرقين

_ذهب: يا حبوبا مو اشوفها كاعدة وحدها

_كواكب: لا يابة لا هاي مرت علاوي الغالي
شعندج غيرهم بعد مفضلينج

_ذهب: شوف شوف حتى انتي خليتي عينج
على علاوي

_كواكب: ما الوم ضرغام

مد راسة من الباب الجكارة بحلگة قلص عيونة وكال:: ما انلام من اسميها فافونة

_ذهب: يمن كون جبح الجبحك يالمزنجر
ولك ولدك لاياخذونها من حلگك ويصيحولي بيها

_ضرغام: لا ما اقبل يصيحولج فافونة اريدهم
يكلولج نحاسة

ضحك وي تحجي علية محترك گلبها اندارت على نيزك دكلها:: ماتصيحين برجلج الفاسق فسوق

_نيزك: واني سالمة من لسانة هم نفسج
انوب الجهال صار يسموني ام عيون وياة

_ضرغام: بعد لاتكليلي فاسق فسوق احترمي روحج
خوش لا اعوفج بدرب مهجور وارجع

عيني على الشارع وضيغم يخابر بفقار يكلة وصلنا
من بعيد والمح ولد يمشون شوية شويو يلا ميزتهم ضحكت وضيغم وضرغام تلگوهم سلمو

_ضرغام: خير شعدكم جايين مصيبة وراكم

_حسين: خير بوجهك اخي العزيز جايين خطار ولو احنا من اهل البيت ان شاءالله

_ضرغام: خاب ماتگوم شنو من اهل البيت

_حسين: ابن عمي الغالي تمون

_ضرغام: كولو شعدكم مصيبة خبررر؟؟

_حسين: خطارر الله اكبر نكطع صلة الرحم تريد
عمي اذا ماتردون اهلنا احنا شعلينة بيهم

محسن افتر على الكوستر يكل لحسين
_ولك جنهم رايحين للنجف صخام الصخمهم بس
لا دفنو ذهوبة ورايحين يزورونها

_حسين: يا صخاام الوجهة احنا جايين نشوفها
بس هي التگلنا هلا راحت ام هلا

تكابلو يريدون يلطمون وضرغام دفر حسين خلاة يكمز ذهب صاحتلهم:: ولكم تعالو هنا اني مامتت

اجوها يركضون سلمو عليها هالولد ابد ما كطعو علاقتهم بينا بس من صارت مشاكل كطعو .

_حسين: الحمدلله من طلعتي عايشة گلنا نموت بس يصير بيج شي تتفق وياي موحسن؟

_اتفق وياك ضلعي

_كواكب: هااا ولكممم هاااا انييي هنااااا

وذولة سلامهم ماينتهي بعد اخذو ابنها يبوسون بية ويكلولها :: حرامات صرتي بنية لو باقي چنچ ولد عاد تفرفرين بينا بدراجتج

كواكب تسولف وتضحك وياهم وتذب ميانة كلش وهما كبرو حتى شكلهم تغير ولد شباب بلحية وشوارب ضيغم يخزر بيهم وبيها وهما مستمرين يدكون سوالف اخذ ابنة منهم انطاة الها .

_ضيغم: يلا كافي اجت الناس تريد تصعد وخرو

_حسين: يلا حبيبي موحسن اصعد بالصدر احسن

_ضرغام: وين ان شاءالله

_محسن: وين ماترحون نروح سبحان الله يكول گلبنا يعلم راح تطلعون

_حسين: الامام يحبنة واختارنا نزورة

راح فتح باب الصدر والولد صافنين صاحت بيهم ذهب:: خلوهم يرحون ويانة السيارة جبيرة وتكفي يلا اسكتو

وصدك سكتو ماحجو وصلو بيت اسامة
الولد كعدو ليكدام واحنا رجعونا ليورة
فقار شايل ابنة سيف من كلهم كعدو يلا صعد
مخلية بحضنة وميس ونجوم بس يسولفن
ود بس تحركت السيارة كالت اريد يم ابوي لحد هالوقت متعلقة بية بس التهتت وي اخواتها تهتم بيهن وتموت على قمر وضي حولت وسيف صار يبجي
اخذتة نجوم ترضعة حسين ابن علي يشلع بشعر قمر وهي تبقى تبجي صاح بية فقار
خنس الولد وراة يم ابوة .

جايبين وياهم اكل واحنا هم ماخذين وصار عبالك مطعم الجهال يتكلبون مانريد هذا ونريد من هذا من غير الصريخ كلشوية باجي واحد منهم يسكتونه يرجع الثاني ومن غير السوالف والضحك هوسة راسي انسطر .

_كواكب:يمة من دولمتكم انطيني شو طيبة

_هاجر: هاي ام قمر سوتها

_لا هي نجمة طباخة من زمان وطبخها يموت

_ضرغام: دولمة ام امير رقم واحد عراق

_كواكب: ماكو فرق هنا اخوات على عنادك مانفرق بينا

_ضرغام: الا انتي كلشي ماكو لاطبخة ولا نفخة

_كواكب: نخفو براسك كون منو گلك ماعرف عمممممة ضيييم

_ضيغم: طبخها يموت كلشي تعرف تسوي

هي صح تطبخ بس مرة طبخة طيبة ومرة تشمرها بالزبل محد ياكلها .

_ياسمين: لا عمي طباخة ام ايان

_ضرغام: والله زمن ام دچة صار اسمها ام ايان

_كواكب: مثل الزمن..

صاح بيها ماخلاها تكمل جملتها الشهيرة سكتت تاكل وتخزر بية .

_كواكب: ما تدير وجهك شكو تباوع

_ضرغام: مباوع عليج على مرتي

_كواكب: ترة اخذها منك اختي هاي

_ضرغام: عمي ماتخلصوني من اختكم
وتعوف مرتي بحالها كل ماهاي وكالتلها امشي وياي
شنو تايهة جهالها وراها وبيت ورجل قابل فارغة

_قبس: اخوات احنا مانتدخل بين الاخوات

_ضرغام: منين ماملتي غرفتي كلها اخوتها واخواتها

_كواكب: بس لاتحط عينك يماااا لاتحسدني
ترا ذني نسوان اخوتي

صاحن شهب ونجمة بصوت واحد
_هااا

دارت وجهها عليهن تعض بشفتها وتردد بلسانها
_اخاف ننحسد شبيجن

اخذو الطريق كلة سوالف على عرك على ضحك
انام وافز على عركاتهم لو صريخ الجهال
وصلنا وكواكب وي اخواتها تعدل بعباة هاي لو تضم بشعرهن اليطلع من الحجاب فقار وقبس يباوعولها ويضحكون فرحانين من شافتهم مركزين وياها مشت يمهم .

_كواكب: فاهيات شالعات كلبي امشو يلا امشو

فقار شايل ابنة ود وي كواكب تمشي تسولف وياها
امير ورضا يمشون بصفها على الواهس
زرنا مجموعات وكعدنا بالصحن اكلنا وكمت اصور كل كبل هما وجهالهم وكل ما اخلص من مجموعة امد ايدي يخلون بيها فلوس اجاني ضيغم شايل ايان يسألني وعيونة تروح منا ومنا .

_وين كواكب؟

_هنا

كلتها ودرت وجهي اباوع وياه كل مجموعة سوى يصورون بجهالهم وهي ماكو مشيت ورة ضيغم
ادور عليها وين مالكيتها اختفت فقار من شاف ضيغم مو طبيعي صاح وراه شكو ماجاوبة وكفت ارد علية .

_يدور كواكب

_وين راحت

_ماعرف والله

_ضرغام: هسه ترجع وين راحت قابل شنو ماتندل
تلكونها راحت للحمامات

مرت دقايق صارت كلها تدور يتصلون بيها جنطتها عايفتها يم امها كلها خافت عليها رغم يدورن مايصيرلها شي وموجودة قريب .

ايان عند ميس ترضع بية واحنا ندور بصفحات فقار ما خلة البنات يمشن خاف يضيعن بس اني رحت واخذت تليفوني دخلت للامام خاف رجعت تزور
بس وين الكاها امشي واباوع بالوجوة مالها اثر
اتصلو بية يسألون اذا لكيتهم لحد هسة ماكو !
خفت ورجعت ادور وين راحت ؟ امشي وادعي الكاها وكفت من شفتها متمددة بالكاع ضامة رجليها لصدرها خدها على الارضية ودموعها ينزلن تمسح بيهن التليفون يرن بيدي جاوبتهم ومن كثر الهوسة ماسمعت صوتي بقيت واكفة بمكاني مترددة اروحلها وهي بهيج حال .

كعدت يمها فزت وكامت تتلفت لزمت ايدها عيونها حمر وشرايين دم مبينة من كثر ما باجية مسحت وجهها بقوة صارت تعدل بشالها .

_شبيج كواكب؟ غير دكولين رايحة اوزر صارلنا شكد ندور عليج

كامت تعدل بالعباية بصوت مبحوح من البجي جاوبتني:: اجيت ازور بعد ماشبعت

طلعنا كلها متجمعة وضيغم حيل خايف ومتعصب يريد يحجي بس من شافها سكت وامها سحبتها تبوس بيها اخوتها يباوعون لضيغم خاف مضوجها وضيغم مستغرب حالة حالهم شوية اخذها فقار وطلعو قبلنا .

مرت فترة كواكب تغيرت كلش من وحدة طاقة وحيوية وصوتها يلعلع ضحك واخبار وتناقش وي ابوي على السياسة ويسولفون الى منعزلة هادئة
مو بس احنا الكل لاحظها وبيبي كد ما تحبها
اجت كعدت يمنا ابنها تلعب بية طول الوقت لان خاف هو مضوجها وحتى ايان مو مثل قبل صاير كلش زين ولا يبجي .

اخواتها من الناحيتين واهلها يجون ورة العشاء يغيرن جو الها بس بنص الكلام تصفن وين يلا ترجع كلها تحس بيها تمثل هي زينة والكل حار بيها
اخواتها من جهة يردن ياخذنها لبيت اهلهن فترة
يكعدن سوى بس هي رافضة ونيزك متخبلة
اهلها يكلولها تعاي لبيتنة فترة وهم رافضة
ابوها يقترح عليها تسافر وياة وهم رافضة
عيشتنا بحالة قلق عليها وحتى وي ضيغم بطلت ماتطلع بالليل وهنا الكارثة .

جنت نايمة وامي كعدتني تكلي كواكب ماكو بالبيت
طفرت مخروعة وهي تلوب خايفة .
_شنو يمة وين راحت؟

_من راح اخوج لدوامة هي هنا
رجعت نمت مالكيتها اتصل بيها موبايلها مغلق

_ذهب ما كايلتلها قبل لاتطلع

_كايلتلها راح اطلع شوية وهاي راح يأذن الاذان وماكو

اخذت تليفوني اتصل فتحت الخط وامي اخذتة مني::وين انتي ولج راح يصير بية سكر

_كواكب:ها عمة جاية

_ياسمين:مو ادك عليج ليش ماتجاوبين وتريحين گلبي

_اعتذر عمة مادري بية مسويتة وضع طيران
جاية

امي احتارت بايان ومن اجت بدراجتها ولابسة اسود شفقة ولثام مامبين بس عيونها دخلت بدراجتها ركنتها واني وامي مصدومين شعجب
طالعة بهيج لبس واصلا هي ماتطلع !!

_كواكب:رحت افتر شوية ضايجة

كالتها ودخلت جوة بعد ماطلعت من غرفتها صار الغدا صبت امي صينية اخذتة منها اصعدة
لكيتها مضلمة الغرفة فتحت الضوة ورحت اكعدها متاكدة ما نايمة عفتة ونزلت كلت لامي من اجة ضيغم ماتحملت وعاتبتة .

_ياسمين:يمة انت هم گلي شبيك وي مرتك
محاجيها لو خاف تعيرها بالماضي غير تفهمني
ترة هاي ام ابنك وصح هي عاشت مو نفسنا
بس مايصير تذكرها لو تحسسها بشي

بقة ضيغم فاتح عيونة مصدوم من كلامها رفع شعرة يكلها::شبيج يمة تحجين صدك !
اني احجي هيج وياها !!

_ياسمين:لعد شبيها متكلي اليوم طالعة بدراجتها
وهدومها رجعت للنگبة

رفع حواجبة مصدوم
_ضيغم:يمتها شو مكلتلي

صعد وما نزل مرت ايام جوري حاجتني على صافي سمار محاجيها يكلها الولد يكول تنطيني كلمة اذا مو علمود الدراسة رفضها حتى اشوف دربي
جنت عايشة بحالة قلق من ورة تميم وتهديداتة
هوسة وشخصيتة المتناقضة وانفصامة الجاي الاحظة بكل مرة يدز من حساب كلام غير
وامي مصرة ما احجي تخاف يصير شي
كل هذني خلني اقتنع بصافي رغم اني الولد ماحبة
واحسة عادي حالة حال البقية انطيت موافقتي
لان حسبت بيوم تصير فد سالفة ويزوجوني لتميم البعدني براسة .

امي اكثر وحدة فرحت بهذا الخبر لان ابوي يقنع بيها على تميم يكول يحبها وهي حتى امي تدري بية مو صاحي الولد .

اجو خطبوني اهلة واني روحي مقبوضة بس اليسألني اكول موافقة واقنع بنفسي صافي خوش ولد ويعرف نبذة عني عاقل مو مخبل مثل ذاك

قرو الفاتحة واختة جان عدها عملية اجلو الخطوبة ضيغم حذر الكل مايحجي وحتى ابوي، ابوي جان ما هاوي كلش ومحد يعرف السبب .

جنت ماجايني نوم افكر واهوجس طلعت بالحديقة لزمت كلبي بيدي من شفت الدخان صاعد وي ما اتقرب گلبي لجمني كاعدة باللضلمة تدخن والكاع متروسة كطوف !

سحبت منها الجكارة متعجبة اباوع للكطوف واحسب شكد شاربة هالبنية هزيت راسي احجي متخبلة..

_لج خرررب شبيج شبيججج ليش هالكد مدخنة

مسحت وجههة ودارتة ماردت علية كعدت بصفها لزمت جف ايدها ثلج مسحت علية وبهدوء حاجيتها

_شبيج كواكب احجي مردتي كلوبنا

بدون ماتباوعلي كالت
_اكلج قررت اروح لدكتور نفسي
بس استحي احجي وي ضيم

_باوعيلي ليش تستحين

_عبالة مخبلة بس هو قبل كلي علية
وهسة تذكرتة اني احتاج اتعالج تعبانة مدري شبية

_توكلي بالله وروحي لاتهمين لشي
واصلا اخوي لو كلتيلة يفرح كلش

كواكب صارت تراجع دكتور نفسي وكلنا مهتمين بنفسيتها رغم هي تحاول ماتبين بيها شي
ضيغم يكللها تردين تطلعين باي وقت روحي لاخواتج لبيت دراهم لو غضنفر بس يخاف عليها من الدراجة
فـ جاي يعلم بيها سواقة يريد يشتريلها سيارة حتى تطلع براحتها وبدون ماتتعرض لمضايقة لو تضطر تتلثم .

شايلة ايان واندك الباب راحت كواكب تفتحة اجت طايرة بيدها بوكس وتضحك وكفت يمي فحطانة ترفع بالبوكس عيني صارت علية كلش جذاب

_ها شموصية؟

_كواكب: عطور اوربية مثل عطور ضيم اليهفن تهفي

_ههههههه منو علمج على الشحن

_هو وصالي من ذني اليشتري منهن
بس والله ضجت على الفلوس الواحد سعرة كلية

_يرخصلج الغالي هههه

_ابو عطور الاوربية والفرنسية خررب تدرين جذب علية يكلي منا اجيبهم اخ يماااا الريحة تعط

نست حتى ابنها وراحت تفتح بالبكج
صعدت ونزلت عطرها يمشي كدامها من بعيد تاشرلي ودكلي:: ها وصل

ضحكت اهز براسي اي وهي تكمز وتصيح
_هلا بام العطور راح اقتحم الشركة شنو بس نجوم تشتغل وي اخوي وتروح للشركة اني هم اريد اروح وي ضيم نغير جو

_وابنج اخذية وياج حتى يسفط ويكعد الرجال

_اي اخذ ايوني وياي ونفتر بالشركة
بيتنا ونلعب بيه شعدها غرض بينا الناس

مرت الايام تمت خطوبتي من صافي بالسر محد يعرف عنها بيناتنا بس وبطلب من ابوي وسمعت من نيزك رفل تطلكت وكلها فرحانة الها
رغم كلشي حلو وزين جاي يصير خاصة فترة تجهيز للعرس
الا اني خايفة من تميم اذا عرف شيسوي ؟
ويبقى السؤال الاخير هل راح يمر كلشي على خير؟

لهنا الختام الاخير
جنت ناوية اكتب اكثر بس وقت ماعندي
محتاجين دعواتكم حبايب 🤎

حساب الانستغرام 👇🏻