الموروث نصل حاد الفصل الثالث وستون 63 - بقلم اساور حسين

_______________الموروث
﷽

𓆩 اســاور حــسين 𓆪
بقلمي رواية : الموروث

أمس روحي رادت واحد مزعلها
وحنت والمحنة ما تطيحلها
أمس حطيتهن مرسال يم مرسال
وعاينت الردودك ما استاهلها.

" لطفا لا تنسون التصويت والتفاعل بين الفقرات 🌷. "

⊰ مُـرجانـة ⊱

جريت جر بالكلمة احاول انطق وافهمه
مُـرجانـة: وين اني ؟
_ بگلبي .

غمضت جفني ثگيل وايدي صعب ارفعها
بلعت ريگي وگلبي يدگ سريع من شفته
سحبني اكثر عليه نومني على ايده
شامر قميصه ومبتسم ابتسامة شخص
انتصر ، جريت بالكلمة وهمست بصعوبة
_ انتَ شسويت بيه .
_ مارست مهنتي .
_ شـ ... شنو .
_ التخدير خدرتچ .

باس خدي وضحك بصوت عالي مرتاح على وضع
وارث : مايفيد وياچ عيني واغاتي .
_ دخليني اصحصح .
_ ههههه اممم شسوين .
_ اموتك .
_ ميت بيچ من زمان موتيني .

رفعت ايدي عبالك طابوگه مو ايد اريد اضربه
وارث : صحصحي وعفت البيت الچ فارغ كسري
الحياطين طلعي الطاقة السلبية ههههههه .
_ اخذني اسبح حتى افشل فشمك .

ضم راسه برگبتي يضحك
_ تحجين مشفر هههههه اذا ما اخليچ هيج
مخدره واشفي نار گلبي بيچ يا ام طنگوره .
بجيت من النعاس واستفزازه
مُـرجانـة: اكره الخطف والله حرام عليك .

ضمني بحضنه حاضني بين ايده وبهدوء يرد
_ الخاطر حبنا سويتها اموت بدونچ ولچ
لمصلحتنا والخاطر سجاد كلشي يهون .
_ اكرهك يا منبوذ .
_ منبوذ متوحد مكروه كله قابل بيها المهم
دلوعتي بحضني بين ايدي رجعتها .

غفيت ماكدرت اكعد ابد راسي طابوگه صاير
وجسمي خشب حتى تفكير ما اكدر افكر
نمت فترة طويلة ماوعيت بعد على نفسي
غير على ذبذبات صوت سجاد يروح ويرجع
بأذني تگلبت بمكاني فريت جسمي على صفحتي
اليسار واحس بأصابع دافيه تتحرك على وجهي
وريحة طيبة دخلت انفاسي ، فتحت عيني ما مستوعبه
شي شفت غرفة فارغة ما بيها غير دوشگ چبير مال
چرباية ضخم بوسط الغرفة ونايمه عليه ومغطيني
وسجاد بنفس الهزاز اللي چان بالسيارة بس
نايم منزله ومغطي وبنهاية الغرفة اكو دفايه كهربائيه .

رفعت جسمي وضغطت حيل بيدي على راسي من الدوخة
لزمت فستاني انزل بي مرفوع بكثر ما متحركه وجريت
اللحاف أتغطى بي من البرودة واسمع صوت برا
وخطوات تقترب من الغرفة وفات بكل برود ولا عبالك
جابرني ومتصرف تصرف خطف واني اكره هل تصرفات
واخاف من احد يخدر ويخليني ينغمي عليه ويوديني
من مكان المكان مليت وبزعت روحي من هاي التصرفات .

بعدني ما نسيت شلون ضربني شهاب وطلعني من البيت
الموقف نعاد عليَّ وجسمي كله كزبر واني اتذكر من لگيت
روحي هناك بذاك البيت وشهاب مگابلني وگاعد واني
بملابس نومي وكعد يهدد بيه يريد يموتني من غيرته
وصوته يتردد بأذني وهو يصرخ ويضرب بروحه
" حبيتي مجهزه روحچ الوارث الخاين المنبوذ "

حسيت على حركة الصينية من نزلها على فراش قريب
مني فتحت عيني على وسعها بعيونه وجسمي
ثلج صار بس النار تفوور تفووور بگلبي
رفعت ايدي بكل علوها اريد اضربه براشدي
على هاي تصرفاته اصحي على زمانه تلاحگ
على ايدي ضغط على معصم ايدي وخزرني
متعجب شلون رفعت ايدي عليه ابتسم بتصنع
حتى يشيل المشاحنات الصارت قوس ايدي
بين ايده وحنه ظهره باس باطن ايدي
وارث : عيب لا تعيديها حتى ما اخليچ تكرهيني گلبي .

جريتها من بين ايده ودفعت الصينية من گدامي
وشمرت اللحاف نزلت رجلي من الفراش اغلي
وگفت الغرفة بكبرها افترت براسي فر تلاحگني
يعرف بس اوكف ادوخ ضربته على صدره نزل ايدي
ضغبان رجعني كم خطوه حتى اسند جسمي على حايط
مُـرجانـة : رجعني هسة ترجعني .

رفع اصبعه على شفايفه وعيونه تريد تنط گد ما فتحها
وارث : صيري حبابه لا والعباس ارجع اخدرچ .
_ ما اريدك كرامه ما...

سد شفايفي بيده ورجع راسي حيل على حايط
وارث : تگصرين هل لسان لو اگصره بأسلوبي الشخصي ؟
لزمت ايده آريد تنزل من شفايفي ما يقبل فر راسي
على جهه ورفعه حتى يترك مسافه لنفسه يقرب روحه
ويطبع بوسة بعد بوسة على رگبتي متعمد يثبتني
بين ايده هنا لا حول ولا قوة مابيدي شي اغيره .

مثل البرق ابتعدت ورجلي مثل الخيوط صارت
حتى ما اعرف شلون اخطي خطواتي انطبگت
وحده بالثانية عثرني وگعت چفي على عكوس ايدي
شهگت وصرخت متأذيه روحي شاغت وفرفحت
رفعني من الگاع رجعني على دوشگ اريد ادفعه
لزمني قوي يثبتني وسجاد من صوتي فز يصرخ
وارث : والعباس اذا اسمع بعد نفس واحد منچ
اضربچ ابره يومين اخليچ نايمه ما تدرين
بالدنيا طشت لو رشت .

كمل تهديده عافني وراح على سجاد مد ايده
شاله وباسه بخده ويضحك براحه
وارث : لا تبجي يا بعد روح ابوك لا تخاف
من اروحلك فدوة لصوتك وهل وجه الحلو .

اجه بصفي كعد على دوشك وسجاد بين ايده
_ لا تصيحين بعد ماما سجاد يخاف .
_ وارث رجعني ما اريدك اجباري هوَ ما اريدك.
_ تريديني مثل ما اشوفچ هسة گدامي متأكد تحبيني .
_ ترجعني لو اشرد ؟
_ اكو واحد صاحي يرجع شي حلو صار بحياته ؟

غطيت وجهي ابجي وهوَ رجع سجاد بفراشه
وبعده على فراشنا حتى مايسمع اصواتنا ويفز
قرب الصينية مني ويفتح بالعلب مال اكل
_ تريدين لفه ؟
_ امي وعمي ضـلـيل متفقين وياك مو ؟
_ لا .
_ متفقين متأكدة امي متفقه وياك وقنعت عمي ضـلـيل .
_ وداعتچ مايعرفون ناوي اشرد بيچ قنعتهم بسالفة
لقاح ومن وصلنا هنا خابرتهم ما ترجعين وعمچ
گاعد يدور عليه صاير عصبي .

ضغطت على راسي متعجبه منه
مُـرجانـة : معقولة هاي تصرفات دكتور ؟
_ ما تجين الا بالعين الحمرا شسوي .
_ متعجبة والله صادمني .
_ هسة اطير العجب منچ .
_ شقصدك .
_ خير كل خير .

وگفت امشي لازمه بالحايط طلعت من الغرفة
شفت الحمام فتت اغسل وجهي فتحت
الماي بارد ثلج شمرت على وجهي ورگبتي
عسى ولعل اگدر اتحرك وافكر عدل غسلت
افتر وهوَ تركيزه ويايه من بعيد بقيت اعصاب
شلون يخطفني وبعده واثق من روحه ويستفزني بضحكته .
سديت الماي واباع على بيت فارغ مابي اي اثاث
بس مبين مصبوغ وبناء جديد وصاير بارد رجعت
على غرفة ايدي جامده كعدت على فراش قبل لا اتخربط
راح على دفايه شالها قربها يمي واجه يمي جر ايدي
قربها منها ويحضن ايدي بين ايده حتى يروح البرد
منها جريتها منه ورحت غاد عنه ما اريده يطخني .

فركت وجهي قوي احاول اتفاهم وياه بدون صياح
مُـرجانـة: هسة انتَ سويتها وخطفتني وهل خرابيط
وبعدين يعني راح نستمر هيچ الى متى تبقى حابسني ؟
ذب نفس بحسرة مسح على لحيته صافن بوجهي
وارث : شبيچ تخبلتي ؟
_ انتَ تخبلت ؟
_ ما تخبلت بكل قدرتي احاول زواجنا ما ينهدم .
_ مهدوم ما يتعمر وارث مستحيل ارجع للخوف
والمشاكل وخطف وعرك وتعذيب مو مخبله .

جرني من اجتافي والغضب ترس وجهه
كزيت على اسناني بخوف ورفعت ايدي
فوك راسي اخاف يمد ايده ويضربني
طوق وجهي من فكي وحط عيني بعينه غصبان
وارث : يا خوف من جنت وياچ اني اني من وياچ
تخافين من مشاكل بيني وبينچ تصيررر ؟
أعذبج انا هسة صرت اعذب بيچ لچ مو جنتي
تنتظرين رجعتي من الشغل حتى نظل سوية
يا عركات بعد هاي تحجين بيها مُـرجانـة نسيتي ايامنا
الحلوة مخبلة صدك مخبله والله مخبله اذا نسيتي .

حضن وجهي بخوف وحنيه خايف لا اذاني
من شاف ملامحي كشت بوجع وكمل كلامه بقهر
وارث: والله انا ما نسيت ابد ما نسيت ضحكتچ من
تستقبليني وسهرتنا بليل سوالفچ الحلوة وحبنا
ما نسيته اكل عقلي الأفكار احير شلون ارجع اذكرچ
لچ فقدتي الذاكره معقولة ما حنيتي ما تشتاقيلي
مُـرجانـة ابددد ما تشتاقين .

دخل اصابعه بين خصلات شعري وعيونه
صارت تلمع مال راسه ورفع ايدي على گلبه حطها
وارث : تعبتيني مُـرجانـة كافي والله من اشوفچ
ما تريديني گلبي يرجف عليچ مشتاقلچ اريد اموت
بكثر ما اريدچ خرّب گلبچ شنو من گلب شايله ما يحن .

دگات گلبي بقت ادگ براسي وايدي عصرتها عصر
تأملت وجهه ثواني اول ما اقترب ناري يبوسني
درت وجهي منه رجعت ضعري على حايط ولميت
رجلي الصدري وايدي لازمه برجلي دايره وجهي منه
وما ناوي الموروث يستسلم اقترب واني على گعدتي
حاصرني بين ايده حط راسه برگبتي وجر نفس
طويل كله لهفه وايده ترجف وهوَ يحضني
_ ما أملّ منچ دلوعتي تحبين ادوخ بيچ
اتحمل الخاطرچ هل طنگورات اتحملها وابقه احبچ .

باوعتله بطرف عيني متعصبه گرص خدي وضحك
فهيت بوجهه بين ايده مدري شبي گلبي دگاته احس
راح يسمعهن اذا يظل قريب مني ، تحمحمت وهمست
_ يلة عوفني روح بعيد مني .
_ احبچ .
_ وارث ..
_ گولي وليدي مشتاقلها .
_ مو جنت تكرهه .
_ حنيت اسمعها قابل إنّا مثلچ .

ايدي على اكتافه ادفع ولا يتأثر
مرجانة : روح مني روح .
_ گولي جنتل مان مالتي .
_ انتَ ؟
_ اي .
_ لا مو جنتل وما اكمل الكلمة حتى ما تسمعها .
_ عمي ستر الله على خباثة شيخ ضـلـيل
عمي ستر الله على عصبية شيخة غـاليـة
عابرتهم انتِ بمراحل متقدمة واصلات بيچ
شني هذا هنا گلب حجارة بوووية قابلية ..

عافني وراح على اكل سحبه رادني اكل ماقبلت
وبقيت على طنگورتي راح على سجاد من گعد شاله
ونومه بالدوشك الجبير وفتح الگماط منه فك ايده
متحرر منه وارث يضحك على حركته شلون كور جسمه
ظل گاعد بالگاع وساند ايده على دوشك يلعب وياه
عبالك يفتهم يبوس برجله وايده ويشم بعطره
وارث : تروحلك العشيرة كلها فدوة ولك اكبر يلة
حتى احجي وياك ونلعب سوية ، باع امك شلون تخوزر
شنو رأيك الزمها واكتلها هسة كتله معدلة تنعنع ضلوعها
تصحيها على زمانها لأن ورمت گلبي .

وهذا يتنغوص يطلع اصوات وروثيات يترجم بكيفه
وارث : اي شفت شلون صار ساعة اريد اصاحبها
واقنع بيها نجيب اخت الك بس قافله شسويلها .

وسعت عيني خزرته خزوره من كل اعماق عيني
مُـرجانـة : روح ربعك يجيبون اخو لأبنك .
وارث : هههههه اصير مثل ساجر من كل حرمة ولد .
_ تنوع الملامح .
_ ههههههههه الخرسة ام لسان اله اگص لسانچ بسيطة .

اخذت سجاد من عنده اخذته للحمام اريد
اغسله الماي ثلج اجه يمي شافني حيرانه
وارث : انتظري دقيقة .
راح على سيارته جاب غلاية مال مي حطها على
كهرباء وترسه ماي من حمه اجه يدفي بالماي بالطشت
وبقه ويايه غسلت سجلد وهوَ لفلفه بالمنشفه واخذه
للغرفة على دفايه حتى ما يبرد ، نظفت الحمام وغسلت
ورحت عليه بدلتله ملابسه وراح هوَ يدفي ماي من جديد
سويت الممه وهوَ مخلي بحضنه من بدل ما يعوفه .

درت وجهي منهم خليته عنده ونمت دايخة بعد فترة
حسيت سحبني من خصري على إيدي نومني
رجع شعري حتى يترك مكان برقبتي يطبع بوسات
ما تحركت وبقيت مغمضه الى ان رجعت نمت .

ميمونة ..

مرات الأنسان من يتعرض الصدمة او خسارة
بحياته يتمرض ويحاول يتخطى الصار وياه
ويرجع يوگف على رجله ويكمل حياته هذا
المعروف مهما كانت الصدمة ونوع الخسارة
الحياة تمشي ولازم نمشي وياها ما نوگف .

الا زهراء توهمت وحبت والمفروض بعد ما توضح
عدها وعرفت هل شخص ما يحبها ولا راح يصير
لها بيوم تتمرض وتصحى على زمانها وهي بعز
شبابها وحتى اصغر مني بس هل بنية تمرضت
وصحت من مرضها على مرض اكبر واصعب
من الحرارة صحت على مرض اسمه وهواس
ومثل ما خسرت ناوية ترجع تخسرنا كل حياتنا .

تصرفاتها غريبة لدرجة وصلتني مرحلة
اريد اخليها گدامي واكتلها كتل وافتح
عقلها اشوف شنو نايم بي من حيوان
من بعد يوم مر وياها بالمشاكل والضغط
النفسي منها وبندر صار اربع ايام بدوامه
عنده انذار بقيت بغرفتي انظف بيها قبل
لا يبلش هذا اليوم الجديد وانزل جوه عدهم .

رتبت كلشي وخابرت على بندر انتظرت شوية ماكو رد
عفت التلفون ونزلت على صوت العلوية تسأل عني
واسمع زهراء بالمطبخ تحاوبها
_ كاعدة من الصبح وصعدت حتى اصيحها
تاكل ويانا اني ورقية صارت عصبية يمكن
بينها وبين بندر مشاكل بس ماتحب تحجي .

خليت ايدي على ظهر العلوية وابتسمت من التفتت
ميمونة : صباح الخير .
_ هلا يمه توني سألت عنچ .
_ گولي علوية امر خدمة تدللين .
_ ما يأمر عليچ ظالم بعدّ امچ اريد تجين
ويايه للغرفة بس تنظفين البوفيه مالتي .
_ تشلعين عيوني صار .
_ تريگي بالبداية وبعدين تعالي .

عافتني وراحت رحت للقوري مال جاي خدرت
الجاي وطلعت جبن باقي قطعتين من ابو البقرة
السعيدة وبيضة طگيتها وطفيتها من استوت زين
رحت اطلع صمون ماكو طلعت من صدري فلوس
وطلعت الف بحجابي متعودين على جهال المنطقة
من نطلب منهم يفرحون يحبون بيت السادة على
حبهم لجدهم السيد يدللهم كل ما يگعد بالباب
يلعب وياهم ويحزرهم حزورات فتحت الباب
وصحت على ابن جوارينا
_ عامر تعال حباب .
_ ها خالة .
_ جيب صمون بألف حباب ركض .

اخذ الفلوس وراح يركض على ابو الصمون
بنهاية فرعنا سديت الباب وبقيت واگفه انتظره
ماطول دقيقتين واجه ماخذ وحده ياكل بيها
_ اخذتها لان حارة طيبة .
_ انطيك وياها بيضة .
_ لا خالة ماكل والله .
_ تعبتك حبيبي .
اريد اسد الباب وشفت سيارة بندر اجت من شافني
رفع اصبعه وعضه قوي وگف السيارة بقيت واكفه
اضحك اول ما نزل هز ايده ويحاجيني
_ مركبتلي گرون واگفه بالباب .

لزمت ايده اضحك من فات وسد الباب خربت من
الضحك خليت راسي على صدره جر صمونه
شوية ياكل بيها ويگرص بيدي
بندر : ضحكي على جروحي .
_ الله يساعدك .
_ غيري الموضوع الباردة .
_ خابرتك ماتجاوب زعلت وگلت اوكف بالشارع .
_ راسي ثگل من طول وثخن گروني .

مريت من الحديقة شفت الدجاجة والكتاكيت مالتها
ياكلن بيضة مستويه شكيت بس كملت طريقي
ودخلنا اني وياه اجت زهراء بيدها كلاص مي
قدمته اخذه من ايدها شرب وعافنا وفات جوا
على صوت ابو والعلوية يحجون ، اباع على طاوة
فارغة مابيها بيض ، وقطعتين الجبن فارغات
والچاي مشتغله بعده صاير فحم من الثخن ما ينشرب
وهي بعين صلفه مابقت بالمطبخ راحت اختفت .

الغده بعده مكمل وبندر صعد فوك تعبان
طلعت بتيته گليتها وطماطة وبصل سويتها بطاوة
لاچعه ورجعت خدرت جاي جديد صبيت واخذت الصينيه
والصمون وصعدت فوك متزوهره تزهوهر منها معدتي
گلبت گلاب من افعالها ومر ادري الى متى اصبر واسكت
مشيت من الحمام عرفت بندر يسبح من الصوت
خليت الصينية بالغرفة بالگاع وبقيت افتر احاول
اهدي روحي ما اريد العصبية تبين عليه ، رحت
للمراية عدلت وجهي ورشيت عطري وجهزت
ملابسه اول ما دخل اجه حضني قوي وملامحه
تغيرت من شاف وجهي ماعرفت شلون اخفي قهري
_ صاير وياج شي .
_ لا ابد.

هز راسه ما مصدگ كلامي ولو كشفني وعرف
راح يسويها هوسة علينا شلون انسي الموضوع
بدل وگعد اجيت بصفه اريد اكل معدتي متروسة
ضيم من هاي الحيوانه جبرت نفسي استمع لكلامه
على دوام وجماعته ما صدكت كمل اخذت الصينية
ونزلت جوه غسلت المواعين والعلوية فاتت مني
زعلانه وجهه ثگيل عليه تريد ماي .

رحت انطيها ما قبلت ونترت ايدها مني تگلي
_ ما تحب المنافق بوجهي مرايا وبظهري سلايه
اجيت ردت تسوين بوفيتي لأن احبچ
وزينة وياچ انا شلون گدامي تگولين اي وصار
ورايه تسبين بيه وتصيحين انتوا نظفوا الها
انا مو خدامة ، چا انا مثل امچ لو نظفتي بوفيتي
ملابسي مو معناتها خدامه شكو بيها شصار عليچ
بس بعد توبه اذا اجي واريدن منچ حاجة الغريبة ما تنتخي .

لزمت ايدها مو بس مصدومة لا والله نرگعت على وجعي
_ علوية والله العظيم اجيت اسويها الچ
هسة توني كملت اكل ونزلت ركض .
_ الله لا يعوزني زهراء سوتها وكملت ماريد منچ شي .

شفت زهراء بيدها علاگه مال زبالة وطلعت من الغرفة
خلتها بالگاع وراحت للحمام غسلت ايدها واجت
من يمي فاتت راحت تذب الزبل برا ، ماتحملت
طلعت وراها دفعتها على حايط وفريت وجهه فر
براشدي برد گلبي ودفعتها على الحايط خنگتها
ميمونة : لچ سگط اذا ما تشيليني من راسچ
اخليچ بحلگ بندر ينعل سلفه سلفاچ يا سگط
يا بلا كرامه حتى ماعندج كرامه نعدمها الچ
هي من گاعهاا معدومة يا مريضة .

دفعتها بالگاع وهي بحرف ما نطقت فاكه عينها
بس تباوع بعيني خليتها واول ما دخلت صار
بندر مقابيلي شافني من ضربتها وعرفت سبب
سكوتها وماردت لأن شافته موجود ، خزرني
ما مفتهم الصار لزم ايدي نترتها منه وصعدت
فوك واشوف زهراء فاتت للبيت
بندر : بيج شي ؟
زهراء : لا مابيه شي .
_ شصاير ليش هيج سوت .
_ من شفتها صعدت گلت خطية اكيد
راح تبقه فوك لان بندر اجه رحت ساعدت العلوية
جانت نيتي اخلصها من شغلها وهي تظل فوك
بس هي عبالها اني خبيثه من العلوية رزلتها
لأن ما نظفت بوفيتها.

جذابة جذابه الحقيرة الحيوانه دخلت للغرفة
طبگت الباب بكل قوتي دخنت احس بدخان
يطلع من راسي وعيوني وهوَ ما صعد بعد
محفظته ومبايله والمفاتيح كلها هنا بالغرفة
بس هو ابد ما صعد عليهن وظل جوه
وجهي گب نار واحس بعظامي وجع منها
سبحت ونزلت جوه من صار العصر لگيت بندر
ماكو طالع ، وامشي واشم بعطري بالبيت جوه
من دخلت على غرفة العلوية شفتها تباوع
على تلفزيون ومقلصه عينها تقرا بالكتابة
وزهراء بصف رقية متمدده لابس دشداشة
نفس لون دشداشتي الصبح وردي فاتح
وعطرها عطري ضحكت هزيت راسي وحجيت
بصوت مسموع ما تحملت حتى اكتم الصوت
ميمونة : مريضة .

دخل سيد مصطفى وياه اخته ام اسماء واسماء
بتها وياها خدرت الهم چاي وجبت كعك وگعدنا
كلنا سوية واسماء كلامها واسلوبها ما ينمل منه
انشغلت وياها ومن بين كلامنا شفت زهراء عافتنا
وطلعت من الغرفة بقيت بمكاني ورجعت احجي
وياها الى ان صار العشه رحنا نطبخ ونجهز
وباقر فات توه رجع من دوامه وگعد بالمطبخ
يحجي هو واسراء على دوامها وجامعتها
واني اطبخ البنية خجلانه منه وخدودها وردن
ابتسمت على باقر شلون فاصل عن الكل ومركز
وياها ويخلق الحديث بس حتى يفتح مواضيع
ويطول حديثه وياها وهي بعد كل سؤال ترد جواب بكم كلمة .

جهزت الكباب اخلي بي بالطاوة ونزلت زهراء
من فوك مخبوصه تنزل بدشداشتها وتعدل بشالها
من شافت باقر وجهه صار ينطي الوان وخجلت
ما دريت شبيها بس ام اسماء تباع على درج
وعليها وهي نست ودخلت للغرفة مال امها جوه .

صبت ام اسماء جاي واجت بصفي اني اجهز
بالأكل وبنتها تعدل بالمواعين ، باقر راح وبس
ام رقية موجودة تستسمع على كلام ام اسماء
_ امي ماتحب ترا احد يرتب بوفيتها بس
تگول استنظفها لميمونة وطلبت منها مو قصدها
عود تخدميها وانتِ خدامة هنا بالعكس معزتچ
بمعزة بندر عدها وانتِ تعرفين شگد تحب بندر .

جريت ماعون اخلي بي الكباب والتفتت عليها احاجيها
_ الله شاهد لا حجيت ولا گلت خدامة بالعكس
اخدم العلوية بعيوني حالها حال امي واني
بطبيعتي ما اتعاجز من شغل .
ام رقية : اي والله امانة الله البنية تنتخي
ولا فد يوم تعاجزت من طلب وراها احجيها وگدامها .

نزل بندر من فوك يرفع بشعره يعدله بهتت
والدم نشف بعروگي هذا شوكت رجع ومن شوكت
صعد وو لااا مستحيل اعوذ بالله من الشيطان
ماحط عينه بعيني عبرنا وفات على ديوانية
ذبيت الماعون وعفتهن يحجن وصعدت فوك
لگيته شامر ملابسه بالحمّام والغرفة مو على
حالها فتحت الثلاجة اخذت بطل ماي شربته كله
وجسمي صار قالب ثلج اريد افتهم الصار اتصرف
اخاف خفت اخطي اي خطوه واغلط وتوگع براسي
ما اتسرع اي اي بالعجلة الندامة ميمونه لا تستعجلين
جريت نفس وتذكرت كلام همام بيوم عرسنا
" بندر متزوج زهراء ، تزوجچ حتى ينتقم "

ضربت راسي بيدي اطرد الأفكار
وگفت اخبط بالحياطين غسلت وجهي واردد
مثل المخبلة يحبني اعرفه لا متزوجها ولا يريدها
يكرهه ومتجاهلها اول ما يرجع يدورني ، بس كلهم
ما يضوجون من تدخلها بحياتنا وجدها دائماً يقربها
منه ويطلب منها تخدمه هل شي طبيعي !

اي طبيعي متعلمين واحد يدير باله على ثاني لا اهجم
خياتي ما صدكت نحتمع اني وبندر ما اخلي هل چلبه
تخرب بيتنا ابد هوَ حتى مستعد يعوف البيت ونطلع منه الخاطري كافي ميمونة كافي الخاطر بندر .

عدلت شالي عيوني طگن دماراتها من التفكير والصدمة
رجعت على مطبخ لگيت رقية واسماء بمكاني اخذت
منهن الماعون وصافنه على زهراء مبدله ملابسها
وعطري معبي المطبخ مخليه من عطري !
اخذت بتيته بيدها تاكل بيها وتضحك ويه البنات
مرتاحة عكس الأيام السابقة كله بجي خلصتها وحزن
ومرض هسة وجهه ابيض ومخليه مكياج وكل
ضحكه تطلع منها اعلى من الثانية وتسرق بنظراتها عليه .

رقية : جيبي الماعون احترك الأكل ياا ميمونة شبيچ .
بلعت ريگي وراحت عيني على طاوة اشوف رقية
شلون تشيل بالأمل وتخلي بالماعون والزيت يغلي
فاتت امها من برا جانت طالعة غسلت وراحت للعلوية
حجت وياها واجت گعدت بصف زهراء تتشاور هي
وياها وزهراء تحجي ومبتسمة وخجلانه عيني
ما گدرت اشيلها منهن عبالك دخلوني بوسط
نار تغلي من باستها امها عبالك تباركت لها.

قبضت ايدي قوي ورتبت المواعين كلها
اخذت ام اسماء السفره فرشتها بغرفة العلوية
رتبتها رقية واسماء ويسولفن ويضحكن
وعقلي يخبط خبط بالأفكار واطردها ما اصدك
بيها ، مديت راسي على ديوانيه شفتهم كلهم
كملوا صلاة وبندر رتب السجاده توه خلص
ميمونة : السفرة جاهزة .
سيد مصطفى : اجيت بوية .
بقيت بمكاني عيوني على بندر من شافني
حط السجادة وطلع تلفونه من جيبه وطلع .

رحت وياهم على سفره كعدنا عيوني هلكت
اول ما فات وراح بصف ابو يحجي وياه
بصوت ناصي ، وجدهم اشر حتى ياكلون
كلها تاكل واني ضايعة بينهم هل اثنين
وغبية اني والله غبية من رخصت نفسي
وذليتها وعذبتها بهاي المراقبة واحرگ
بروحي عليمن وليشش اسوي هيچ بروحي
ليش ما وقت بوقته الزمها هي وياه امرعدهم
والله اذا لبراسي صح يا زهراء ويا بندر افرغ
جلكان الزيت مال سيارة بجدر واسبحكم بي .

الشكوك اذت راسي ما كدرت حتى امثل واكل
قبل الكل نهضت من السفرة مجبورة على كلشي
مجبوره لا تگابليهم سوي حل خدرت جاي واسمع
اليوم اريد جواب على مل سؤال وهوَ ليش هيج
صار يعاملني بغرابة حتى مايباع بوجهي
بشنو ترست راسه مثل ما ملت عقل العلوية عليَّ .

كملت استكانات الجاي ورحت اوزعها عليهم
وصلت السيد مصطفى بيده الدشداشة مالته
تذكرتها هاي جانت بغرفتي شجابها هنا
_ بعدني ما كويتها عمو هسة اخلص المواعين
واكويها الك وانزلها منو نزلها هاي ؟
سيد مصطفى: مايحتاج بوية من البارحة عندج
وصيت تكويها وما كويتيها لو منزلتها للبنات
يكونها ولا تزعلين وداعتج ماردت اتعبج من البداية
ولا تفكرين مخلين المسؤولية عليچ بس لأن احب شغلچ .

بندر نزل الأستكان بالگاع يباع علينا وكلها
التفتت على كلام سيد مصطفى
_ ليش ازعل هوَ اني اوصيك تنطيني ملابسك اكويهم .
بندر : شسالفه بوية ترا .
_ لا ترا ولا مره وصلني الكلام .
بندر : يا كلام بوية شكوو هووو شكووو .
_ هسة انتَ ياهو مالتك .
ميمونة : غير افتهم يا كلام والقران
ما زعلانه ولا متعاجزه وردت هسة اكويها
_ مصار شي بوية زهراء كوتها الله يبارك بيها .

العلوية : شني جده حسدناج تعاجزتي من عدنا شبيچ .
- اني ما اتعاجز .
بندر : كافي سدوا الموضوع.
_ والقران ما متعاجزه بعد .
بندر : گلت كافي .
سيد مصطفى: ومن اليوم يرجع كلشي لحاله
رقية البنية مو مكلفه تخدمنا عليها بزلمتها وبس
الباقي تتعاونين عليه انتِ وزهراء .
رقية : صار بوية .

زهراء راح تجمع بالأستكانات وتجاوبهم
_ حاضر عمي .
طلعت من الغرفة رحت وراها اني امشي
سريع واسمع خطوات تمشي بنفس سرعتي
وصلت للمطبخ اريد اجرها من ايدها وانسحبت
ايدي قوي وفرني شفت بندر مقابيلي سد
حلگي وزهراء رجعت ليوره بكم خطوة
بجيت ما تحملت الصار رفعت ايده وهمست
ميمونة : بندر هاي مدري شدتسوي .
بندر : اشششش مصار شي طز بالبيت كله .

اخذني من ايدي صعدني والشر ترس وجهه
اول ما سد الباب ردت احجي رفع اصبعه على شفايفه
_ اشششششش ولا نفس .
الدنيا كلها افترت بيه كعدت ومغص القهر صار بمعدتي
ردت استفرغ من خباثتها شنو من بشر هاي معقولة
بندر : تايهه هي عدها اهل وكل شوية
رايحة تريدين تضربيها الصبح اعتذرت
منها وسكتت الخاطري هسة لا ضاربتها
وعاطت واهلها شافوها مضروبة يسكتون برأيچ .

ما جاوبته وتجاهلته لا فهمته ولا افتهمت
منه ما طايقة بالأصل حرف واحد احجي
بي وياه من شاف سكوتي اقترب يفتهم
مني دفعته وگفت بعيد عنه وعطت
_ روح اطلع اريد انام تعبت اليووم .

بندر : ميمي شبيچ اليوم من رجعت لحد الأن
متخبله عليه حتى من دزيت عليچ رقية الظهر
ما قبلتي تصعدين وتشوفيني شسويت وياج
حاجيني زعلانه لان غبت كم يوم على بيت
احجي ليش تكبرين المشاكل بيناتنا .

لزمت راسي رقية ما اجتني ولا گالت بندر يريدني
اني العصر من اجت ام اسماء ما ادري بي راجع
ولا احد اجه بلغني ، مستحيل اللي ديصير ويايه
والله عقلي راح ينفجر من الضغط ، تركته بحيرته
وعصبيته ورحت على چرباية اريد انام تمددت
وهوَ اغتاظ شلون اتجاهله لزم اديناتي اثنينهم
قوي وعت جسمي كله گعدني
_ راح تسودني لچ ميمووووووووونة .

اخذت ايدي منه وبنفس علو صوته عطت
_ طلعنا من هذا البيت بعد ما اريد اعيش هنااا .

سد حلگي من علو صوتي كملت بصوت ناصي
_ هل چلبه بنفس البيت بعد ما اعيش وياها .
ما صدك رد فعلي ابتعد بكم خطوة وهمس
_ يعني كلام جدتي وابوي صح ؟
ميمونة : يا كلام ؟
_ تغيرتي على كل حتى نطلع بيت وحدنا.

_ بندر انتَ شبيك هاي زهراء دا تخبث عليه
وتزرع افكار سم براسهم عني ما تشوف
ردت اضربها لأن تخبث عليه اليوم حرگت
الچاي والبيضه شمرتها للدجاج ومن صعدت
اكلت وياك غسلت عقل العلوية والملابس نزلتهن
متعمده حتى تخليهم يزعلون مني وحتى
انتَ جانت تدري بيك موجود من ضربتها
هاي مريضة والله بندر مريضة تخلي مثل عطري
وتقلدني شكو شي اسوي تقلده خبلتني .

كعد بصفي لزم ايدي بهدوء وتغير شكله
من العصبية للسكون تلمس وجهي وهمس
بندر : نطلع من البيت وانتِ تعرفيني افضل
راحتي وراحتچ على دنيا كلها ونكدر نطلع
بطلب منچ تجين وبدون مشاكل گولي حبيبي
طلعني بيت وحدي ومن عيوني انفذها ، وهذا واجبي
راحتچ واجبي من اشوفچ ما مرتاحة بمكان اغيره
هوَ واهله ، ماله داعي تصير هل مشاكل ميمونة
عيب واتفشل وياهم عيب والله عيب زينين ويانا
خلي نطلع بدون مشاكل وزعل شبيچ ميمونة
والله قهرتيني ما توقعتها منچ ابد والله .

بجيت من كل گلبي حضني دفعته وصرخت
_ حتى انتَ تصدگها بندر توقعتك
تعرفني وذكي بسرعة تعرف كلامي صح
وهاي الشيطانة مريضة تخبلت عليه
تالي تجذب الصدك وتصدگ جذبهااا !

ردت اطلع وگف بالباب وصاح
_ گلت بلا مشاكل .
_ بندر بعد ما اريدك والله صدمتني ما اريدك .
_ اه ميمونة .
_ اي والله اي جذبتني وص..
_ مجذب منوو وصدگت ياهو ومنو يهمني غيرچ .

رحت للكنتور جريت عباتي اخذها من ايدي
شگگها تشگگ وسد حلگي حتى صوتنه ما يطلع
واحد يسمع واذا اكو غايه عدهم نحققها
بندر : نطلع اني وياچ كافي اسكتي يلة
لا تبجين ولا تتعاركين وقهر لا تنقهرين
هسة اذا تريدين نطلع مايهمني .

ميمونة : لا روح عاونهااا روحها گول لزهراء
اني صدگت كلامچ وگلت لميمونة عيب تسوين
مشاكل خليهاا تفررح خطية تمررضت من القهر روح فرحهاا .

كعدني على كرسي ولزم راسي
_ وراسچ ما مصدگ احد ولا يهمني احد غيرچ
لچ كافي انتِ مو گلتي ما اقهر روحي على كلشي اليوم شبيچ .
_ تعبتني تمرضت وصحت مفلفله ام فلفوله
ال**** امووتهااا والله اموتهااا حرگت گلبي .

حضني قوي خايف عليَّ احجي واريد استفرغ
من الصراخ ، صعدت العلوية كعدت بصفي
واشرت لبندر يطلع هوَ ما گدر ظل يمي لازم
ايدي يمسح بعيوني حتى اشوف والعلوية
فتحت ماي غسلت وجهي بي حجت الها
كلشي صار وافعال زهراء بقت ساكته
ما نطقت بحرف يضمضمون الها ولأفعالها
وحتى لو غلطت ما شوفهم يحجون يبررون .

بندر احتاار بيه لا كدر يطلع ولا يكعد حاضني ويهمس
_ والله من باجر نطلع وراسچ وعيونچ ميمي .
_ بعد ما اريدك .
_ اششش شسالفة من اول مشكلة نعال على
زهراء وعلى مرضها ومشاكلهاا تروحلچ فدوة
بس كافي تحرگين بگلبي .

رحت على فراشي واني احذره
_ ممنوع تجي يمي بندر ما اريد توصل
والله بليلة ظلمه اشرد منك والقران عوووفني .
خليت راسي على مخده اشهگ شهگات من گلبي
تطلع غفيت بقهري وجع راسي وبين فترة والثانية
افز مخروعه وحده من فزاتي الفجر على صوت الأذان
كعدت شفت بندر نايم بالگاع بدون فراش بس
مخده مالته مهليها جوه راسه ونايم بتعب
صار اربع ايام ما شايفته واول ما رجع بدت
المشاكل تكثر وتكثر ، جنت متجاهلتها بس اليوم
زادت اضعاف قبل وكلشي تسوي دارسته .

بقيت صافنه بوجهه ودموعي نزلت من عيني
على مخده ، كل عقلي اصدك بندر يخوني
لو ينتقم سووه المستحيل ويدري بيه غلطانه
وحرگته واستقتل حتى يحصلني وبرجعني
واني على نومتي صحت
_ بندر .
فز يفرك بوجهه يباع على چرباية
_ اسم الله شبيك .
_ يوجعچ شي ؟
_ باردة الگاع تعال اصعد نام على چرباية .
_ تنامين على ايدي .
_ لا .
_ چا عوفيني هنا .

درت وجهي منه انطيته ظهري حسيت بي يقترب
وصعد صار بظهري مد ايده جوه راسي حضني ونام
_ اذا ناوي تنتقم مني لهنا وكافي بندر رجعني .
_ شنو ؟
_ اذا تزوجتني حتى تكسرني ابوس ايدك
لا تكمل اذا تعوفني ادمرني والله حاربت اهلي
الخاطرك وصلت للموت حتى ارجعلك .

فرني من اكتافي عليه رجع خصلات شعري
بندر : اذا انتِ تحبيني انا عاشگچ
على گص رگبتي ما اعرفچ ولو خيروني
بينچ وبين هل دنيا اختارچ بكل مرة اختارچ .

ضميت وجهي بحضنه هل مشاكل استنزفتني
نمت على وجع وكوابيس الثاني يوم هديت
روحي من شفته ماكو نزلت اكمل شغلي حتى
ما يگولون متعاجزه ، اول ما وصلت الدرج العطر
مال ديتول والمنظفات معبي البيت الدرج يلمع
نزلت لگيت البيت كله مغسول ونظيف واكلهم
ملتمين بالغرفة يتريگون دخلت عليهم لگيتهم
ياكلون بس بندر ماكو بيناتهم
ميمونة : صباح الخير .
سيد مصطفى اول ما شافني تحمحم وطلع
من المكان عاف الأكل وام اسماء ابتسمت وجاوبت
الكل وجههم ثگيل عليه عبالك موتت واحد بيهم .

طلعت على گراج نظيف يلمع بعده ينشف
من الماي والحديقة ساقيها مبلله وعطرها
معبي الجو ، جريت نفس وعرفتها منظفه
البيت قبل لا انزل عدها سباق خطية
بس تريد تثبت اني ما اشتغل والصراحة
من هل دقيقة طبها طوب خلبها تكرب
وخليهم شنو يفكرون يفكرون مشكلتهم
مو مشكلتي راضين زعلانين مايهم لان
اعرف بنفسي ما غلطانة واكو من يكيد ويخبث
ما احاول ولا ادخل بسباقات المكتوب مكتووب وخلص .

اجت ام اسماء اشرت على سمج زبيدي
_ انظفه اني وياج نجهزه قبل الغده
حتى من يجوعون كله جاهز .
هزيت راسي ولبست كفوف من الجرار همزين
اعرف اسويهن هذني وعلى سنگ انظف بيهن
و ام اسماء تملح بيهن ، فاتت اسماء حتى هاي
وجهه تغير عليه وتحجي كله قليل ويايه بنفسي
اعرف شلون تگدر وشنو تحچي بحيث تقنعهم يكرهوني.

جلفت السنگ ونظفت المطبخ من جديد
نگعت التمن ورحت على مغاسل اغسل
بيدي وكلهم ملتمين وقت صلاة يصلون
شفت من بعيد ام زهراء تظفر بشر بنتها
عفتهن واخذت الخبز اليابس طلعته
علگته على شجرة فد شوية يحي ولد
صغير يفتر ياخذهن عدهم حيوانات .

رجعت للبيت طبخت التمن وبديت اگلي
بالسمج من شفت بعد ساعة ويرجع باقر
وبين المطبخ والبيت والطبخ التهيت
وكت ما اصب اكل البنات اخذن السفرة
افتقدت زهراء ووجودها ، تجاهلتها هل زعطوطة
وبلشت اصب وارتب وياهن الحد ما صاحت ام رقية
_ رقية روحي صيحي بندر من فوك ياكل ويانا .
ميمونة : بندر طالع .
_ يا مو صعد من باب الأستقبال قبل ساعة .

بهتت بوجهه صافنه ضحكت ، ذبيت الخاشوگة
وبحجت اشوف ام زهراء دخلت على غرفة ما شفتها
زهراء ماكو رحت على العلوية هم ماكو ، جريت نفس
ورجلي صارت خيوط واني اخطي بأول خطواتي اصعد
الدرج ودوخة فرت راسي وتوازني يروح ويرجع
من الزم المحجر ، بعدني على درج وباب غرفتي
گابلني وما اشوف غير زهراء ايدها على يده مال بابنا .

تسد بي وشالها مو على راسها من شافتني
ثبتت بمكانها ، صعدت كم خطوة وهي ركضي من
الغرفة ونزلت تهرول بكل سرعتها ، فتحت الباب
رگعته بالحايط متمدد الخقير متمدد فز من ممانه
بعز غضبي رفعت المشط ثگيل على ميز المرايا
اول ما فز والتفت ضربته بي لزم راسه متخبل
واجه عليه يعبر بخطوات طويلة فر ايدي فر بيده واني صرخت
_ انتَ ما تسوي الحرام انتَ متزوووجهاااااا !!!

ملِكه ..

شال الجنطة من استقبال اهلي وعاف ظرف على
طبلة بي مصرف وامي تخبلت مثل كل مرة يسويها
ما ترضى وتخجل منه وهوَ يجاوبها
_ واجبي هذا يمه شسالفه مو تگولين انتَ ابني .
_ واعز الله يحرسك ويطول عمرك يمه .
_ لا تحرمينا من دعائج اهم شي عندي .

لزمني من ظهري وطلعنا للسيارة دنيا غروب
والجو بارد ، صعدت ولزمت ايده ملت جسمي
اول ما طلعنا من منطقتنا بست خده وهمست
_ اشتاقيتلك .
_ والدليل گطعتي المكالمات شركة اسياسيل بقت
تشكي من مكالماتچ الرگع على تلفوني .
_ حامل نوم وخمول .
_ والله احساسي ما يجذب يگول مسويتلچ رطينه .
_ هههههههيييييي ضحكتني .
_ والله عرفت .

عضيت شفايفي ورمشت كم رمشه وهمست
_ گلت المرجانة وارث مات .
راد يحچي غص غمض وظل يكح
_ وارث مااات .
_ ما تدري ؟
_ ملِكهههههه .

خفت جريت بريك بكلامي وتراجعت
_ شبيك حتى اخوفها وترجعله قابل
اخوك يموت وما ينطوك علم .
_ تفاولين على اخوي ؟
_ على اساس مزلغ روحك على اخوك .
_ اذا ما ازلغ روحي على اخوي تموتي .
_ هلبت تحسون انتَ ومرته .

رفع رجله لابس البسطال العسكري
بيرغ : شلون هسة ادفرها دفره اجيبها مبكر .
ملِكه : خليني اكمل .
_ بعدچ ما مخلصههههه .
_ غير بعدين گلت الها ايليا ماتت جفصت
نسيت هي مريضة ومحد مبلغه صديقتها ماتت .
_ ربي شني من بشر هاي ربي .
_ ربك ما جابرك والله عوفني اذا مو گد المقام .
_ گد القندره لاعبه لعب .
_ ما اعتب على تربية لان اعرف منو مربيك .

درت وجهي على جامع ادردم
_ حتى يكول مو رومانسية انتِ عود گلت اشتاقيتلك
سواها عركه دخلنا بعكه ومكه مو وجه رومانسية .
باوعلي صفح وجر ايدي لزمها
ملِكه : عود رومانسي السويقط .
_ بربوئه لزمت ايدچ حتى ما تضربيني .
_ جبان .
_ غداره .

دخلنا بمنطقة واشر على بيت بناء حديث
_ هذا بيتنا .
نزل بقيت گاعدة ما نزلت وهوَ واگف فتح
الباب ويحجي وحده عباله اني وراه اجيت
التفت يتفقدني لگاني بعدني بالسيارة
ابتسمت وهوَ فتح ايده يأشر انزلي
رفعت ايدي اشرت تعال ، اجه قريب
فات رجال سلم عليه ما يعرفه ودنگ
فتحلي الباب وعاط بيه
_ ما تنزززلين يولو شعندچ هين گاعدة ؟
_ ول عيوني مو الضباط بخدمة المواطن
واني مواطنة حامل تعال اخدم المواطنه ونزلها .

صفگ بيده وعض اصبعه يگلي
_ يولو انزلي راح اجي اسحلچ .
_ ابد مو حنين صاير ماتصير حباب الا بالكتل
من جنت اضربك تمشي مسطره صار هواي ما مكتول .

ضحك واجه عليه فتح الباب وعاط
_ امشي انزلي راح تنسحلين .
لزمت عباتي وحجيت بصوت واضح
ملِكه : دستور جلالة الملكة ملِكه تتقدم .
فك حلگه واني نزلت وذبيت عباتي ومشيت رافعه راسي .

بيرغ : يا ملكه يا سلطانة غير كرشج فات للبيت قبلچ .
_ حبله يا متخلف .
_ يا حبله بالشهور الأولى.
_ هي هاي حبالتي .
_ گولي راتبك بكرشي .
_ عشتو من شفتك وشفتني مربربة
والدليل سحلتك لأن مربره بيه خيرر .

فتت على بيت صفنت بالكراج
بيرغ : شنو هذا الگراج اثنين يوگفون بي يصير ازدحام .
_ دگولي يا الله وفوتي شوفي البيت .
_ عود ردت اخلي مرجوحة وين اخليها اذا
اخلي ينسد الشباك صغير لا خلي نرجع البيت العايلة .
_ ماكو بيت عايلة بعد هل موضوع ما ينفتح .

دخلت على استقبال وبعده المطبخ والصحيات
وغرفة وفوك نفس التصميم بس صغير
ماِكه : هذا البيت مال نفرين وين يلعبون جهالنا
ما طلعت الورث واشتريت اكبر دستات انطاك اخوك .
_ وين دستات .
_ صرفتهن على معارض اربيل ؟
_ معارض راسچ هههههههه .
_ ضابط ما عليك عتب .

البيت كله تراب مگلوب گلاب واني خيل مابيه
اشيل روحي شلوو راح انظف رحت شكيت
وضعي يمه گال
_ وتريدين اني انظف .
_ شكو بيها .
_ خدام ؟
_ دحگ عيني هذا الزواج مثل ما شايله
ولي العهد مالتك تساعدني بالتنظيف
مو الحباله عليَّ والتنظيف عليَّ والحياة عليَّ
وبس المصاريف والفلوس عليك شسالفه اني اصعب .
_ ههههههههههه صار كم يوم ولا ضاحك عوضتهن .

طل يشكي ما يعرف واني اعلم بي غسل بس الاستقبال
ونزل فراشات اثنين من السيارة وامي انطتني صوبة
شغلتها على ما نأثث آلبيت وانظف، ونزل الحافظات
مال اكل طبختها بيت اهلي عرفت ماكو مطبخ ونجوع
عدلتها بالگاع وگعدت اني وياه ناكل ونسولف على
بيت وشنو نأثث وبالبداية منين نبدي
_ باجر اصيح همام يعاوني .
_ سَــهم ما حصلتوا مكانه .
_ دفع وارث لواحد وطلع يدوره
وهم جماعتي واني كاعدين ندور
وهمام عنده معارف گلبنا الدنيا ولعده ماكو .
_ اي ادري ما خابر ما يگول اخلي بقلق .
_ عندي شك براسي واتمنى يطلع غلط .
_ شنو ؟
_ سَــهم عند خلف .

هزيت راسي غاصه بالأكل شربني مي واني اريد احجي
_ مو طلع اسمه بالمطار ؟
_ اي طلع يمكن دز ناس وياه اشك بي هناك ملزوم
لأن هنا ما يگدر يسوي شي وارث محاصرهم .
_ صخام اذا صدك .
_ وارث هم شك وطلع روحه لخلف بالتهديدات
وسجن ضياء قبل كم يوم هوَ وجبر اثنينهم .
_ جـبر ليش ؟
_ جـبر من زوجنه ميمونة خبث ابو وضياء استغلوا
زعله علينا وخلوا يضحك على سَــهم وساعدهم
حتى يفوتون ويستغلون سَــهم ويخربون صورته عدنا .

ذبيت نفس مخنوگه من هيج بشر
اكل وشرب ببيتهم وطعن وغدر بيهم
ملِكه : كاسر خاطري وارث شوو يتحمل من مشاكل.
خزرني ضايج من كلامي واضح مو بس زعلان
عليه لا الموضوع اكبر هل مرة تختلف عند بيرغ .

لميت الأكل الباقي ورحت غسلت وهوَ غسل
وطلع برا يدخن حتى ما اشم دخان تمددت
بفراشي اجه يمي نام واخذني بحضنه باس خدي
_ انا هم اشتاقيتلچ هواي بس جنت عصبي
گلت خلي اهدي اعصابي شوية وارجع اخذها
اخاف يرتفع صوتي عليچ بلا قصد .
ملِكه : احنا مو متفقين بالحلوة والمره سويه ؟
_ صح بس ماحب ازعلچ مني جنت ثور
لعبت بجماعتي طوبة وعاقبت مفوض واليوم
رحت سحبت الشكوه منه واعتذرت منه خليت
قهري بالعالم وهمه مالهم ذنب ما رديت تعيشين ظلم مني .

تلمست خده وبسته
_ زعلان من وارث .
_ مو بس زعلان گلبي يوجعني من ذكر اسمه .
_ لأن تحبه هوَ الزعل على قدر المحبه .
_ اختار حياته بعد ميفيد احبه اكرهه
هوَ اختار يعيش بدون اخوته وسمعت اشتره بيت
دام عوَ مرتاح بدوني خلي الله يوفقه بحياته الجديدة.

ردت احجي سكتني من باس شفايفي يريد ينسى
الموضوع متجاهل الدنيا ما يحب يسمع وعبر عن
اشتياقه بكلامه واحضانه وحبه ولازم اتنمر عليه ويتنمر عليه ..

نمت اول ليلة بالبيت مالتنا الجديد براحه
للفجر حسيت بي طفه الصوبة ورجع حضني
حتى ما ابرد وكملنا نومتنا الثانب يوم الصبح
گعدت على صوته يشتغل برا غسلت وطلعت
لگيت الجگارة بين شفايفه ويفتح بالباب يطلع سيارته
_ وين رايح ؟
_ اجيب ريوك محتاجه شي اجيب ويايه .
_ راح اخابر امي وخواتي يجون يساعدوني .
_ اخاف عيب .
_ لا معليك عادي .
_ البيت بيتچ بكيفچ .

رجعت للبيت خابرت على جنى طلعت بالدوام
جنى : بي اكمل الدوام امر على طيف اجيبها
واجي انظف وياچ ولا يهمچ تدللين .
ملِكه : اعتمد عليچ .
_ راح احچي وبه دكتور عمر يتوسط اخذ
اجازه واطلع من وقت اجي المع الچ البيت تلمع .
_ اروحلچ فدوة ام الوگفات الحلوة دكتورتنا .

سديت الخط ودخلت للبيت كنست الغرفة
مليانه هوسة وطابوگ وتراب اجمع بيهن
واسمع تلفوني يرن رحت عليه شفت اسم مُـرجانـة
_ الو مُـرجانـة هاي انتِ .
_ صباح الخير ملِكه .
_ عبالي زعلانه عليه والله اسفة
وروح ابوية زل لساني وحجيت .
_ لچ بالعكس شكراً لأن زل لسانچ رحت
زرت ايليا وشفت اختها اية .
_ جذابه وايلين ؟
_ ايلين باعوها رجل خالتها واخوانه .
_ لا يا سويقطين يا زلم .

تنهدت وعبالك اخد يمها تحمهمت وهمست
مُـرجانـة: احمم ملِكه انتِ وين .
_ بالبيت الجديد البارحة رجعنا .
_ تعرفين العنوان ؟
_ ليش تريدين تجين ؟
_ هذا وارث خطفني ؟
_ شنو ؟
_ خطفني خدرني وخطفني .
_ تشاقين مو ؟
_ لا .
_ وهسة انتِ وين .
_ بالبيت مالته الجديد .
_ ههههههههه عليج الله .
_ عليمن تضحكبن لچ .
_ خطفچ خطفچ .
_ اي .

رجعت تحمحمت واسمع صوت وشوشه يمها
مُـرجانـة : اگلچ ملِكه وين عنوانكم .
_ ليش ؟
_ بعدين تعرفين .
_ اخاف بيرغ ما يقبل .
_ حذفي المكالمة وما اگول انتِ دزيتي العنوان.
_ تمام احنه بمنطقة الـ**** بالفرع الثالث قريبين
على اسواق *** روحي هسة اجه اجه بيرغ .

مُـرجانـة ...

بعد ما اصريت على رجعتي انهار وصرخ
وصار يشكي ويجمع اغراضي حتى يرجعني
وگف قبل لا نطلع وصار يعدد المشاكل اللي
يمر بيها وصرخ اني اصعبها ، ثبتت بمكاني
ورحت مقابيله خايفة من حالته
وارث : اگول مسحوره لو عقلها مسحول اعذرها
بس هذا كرهچ ماكو مبرر اله اني ما اذيتچ
مُـرجانـة اني لليوم اتعالج من اعمال صلوات
اذا انتِ نسيتي لأن انا ما اشكي اني ادمرت
من الكوابيس وحياتي مخربطة ومسحور
وما كرهتچ واريدچ انتِ شبيچ .

اقتربت اكثر مستغربة مديت ايدي
رفعت راسه من رفض يباوع بعيوني مهضوم مني
مُـرجانـة : انتَ مو گلت بندر وصلك لواحد وعالجك ؟
_ بعده بيه ما مرتاح بحياتي ابد نوم ما انام
من الكوابيس ، والأكل گطعته مدري من القهر على
فراگچ انتِ وسجاد مدري من اعمال صلوات بيه
ما اسامحهاا والله دمرتني وزمرت عايلتي .

صار يشكي على علاقته بأهوانه وصدمني بسهم
واختفائه ، تمسكت بقراري صح ما اريده بس گلبي
ما ينطيني اعوفه بهاي حالته وتدكرت كلام عمي ضـلـيل
من گال المره الأصيلة اللي تعمر بيت بعد خرابه
واعرف بوارث دام اخوانه زعلانين ما يرتاح ابد
قنعته نخطي خطوة ونصالح عزيزه بيرغ
هذا قطعن من گلبه صار مرات احس وارث يعتبر
بيرغ هوَ الچبير بكثر ما كلامه وقراره مهم .

بعد محاولات إقناع سلمني التلفون تواصلت
ويه ملِكه اخدت العنوان خابرت على ام وارث
وحجيت وياها وحدي هوَ طلع يشرب جگاره
قنعتها ترجع للغربية وماتعوفه وحجيت الها
على حالته وشلون ليل كله كوابيس بالنوم
خفت عليه ومن حالته شلوو متحمل يكمل
ويشتغل وهوَ نوم مايگدر ينام عدل .

اتفقت وياها الثاني يوم راحت على بيت
بيرغ مباشرةً ما اجت على بيتنا لأن زعلانه من
وارث ، من عرفت بيها وصلت بدلت عدلت نفسي
ورجع اخذ تلفوني يخاف اعوفه ومتوتر
من كل خطوة مني لا اغدره واروح من عنده
صعدني بالسيارة وسجاد بحضني راح قفل
البوب ورجع صعد يسوق بالسيارة ودايخ .

صعد الجام ويحاجيني بصوت ناصي
وارث : اخوي واعرفه راسه يابس .
_ مو اكثر منك ، وگفنا على مطعم ناخذ غدانا ويانا .
_ راح تعوفيني والله كلبي مقبوض .
_ ما اعوفك هية والله اريد اتأكد تصالحت وياهم .
_ وتعوفيني .
_ وارث لا تضغط عليَّ الله يخليك خلينا نعيش
كل ساعة بساعتهاا الله يعلم بعدين شيصير .

نزل على مطعم جاب المنيو اختاريت غده
تمن على لحم على مرگات وراح بلغهم
ورجع صعد بالسيارة بين ما يجهز
درت وجهي منه عافني ونزل مقابيل
السيارة شرب جگاره وفات اخذ الأكل ورجع
صعد يسوق بهدوء الى ان وصلنا شفت
همام يغسل بالماسحة برا لابس تراك وكاف
البجامه وردن التراك ويجلف بالشارع
فات وما انتبه على سيارتنا .

الباب مفتوح طبگ السيارة وارث واجه اخذ سجاد مني ونزلني
مشيت وياه اول ما دخلنا البيت شفت بيرغ
يجلف بالشبابيط وهمام بالبوب وام وارث
بالدشداشه وشاده راسها وتجلف بالسيراميك
وجنى وطيف يلمعن بالمطبخ وام همام ويه
ملِكه تعدل ، خطف بيرغ نظره بعيونه ورجع
يجلف ورد يباوع على وارث مصدوم بوجوده .

وارث : تستقبل اخوك لو نرد منين ما اجينا.
بيرغ : بيتي مفتوح للغريب والقريب
بعد شوف انتَ عليمن حاسب روحك
بالحالتين بيتي مفتوح الك ما اعرف
اطرد بشر هلا بيكم.

باوع بيرغ عليه وصاح
_ شلونچ خوية هلا بيچ فوتي للبيت .
طلعت ام همام ترحب بينا وملِكه وياها
رحت اسلم عليهن وشفت وارث تقدم على بيرغ
_ سجاد يريد عمه .
بيرغ نزل نفسه غسل ايده وظل يمسحها بملابسه
واخذ سجاد من ايد وارث ، وهمام اتقرب باسه
بيرغ : لا تبوسة وجهك بارد خطية .
همام : ول عمو سجودي .
بيرغ : شلونك بعد عمك .

ما قاوم وباسه بخده بيرغ وملِكه وام وارث تضحك
وارث مقهور لأن بيرغ انطاه ظهره وهمام ما مهتم
وعبروه وراحوا فاتوا على ام وارث وهمام وام ملِكه
جوه ومحد سلم ، عاف البيت وطلع وهمام ضرب بيرغ
_ طلعععع وارث طلع .
نزل بيرغ الطفل بحضن ام وارث ويصيح
بيرغ : لا تخلي يروح لك اركض لزمه خررب انه خررب .

ركض همام ويمشي بصعوبة الگراج كله ماي وزاهي
وصل بصعوبة طلعت خايفة لا صدك راح هو منا
مقهور مني وشاف اخوانه ما سلموا لزمه همام
من ايده فحطان وبصعوبة يحاجي
همام : وين رايح شبيك تعال .
وارث : شعندي باقي بمكان محد يحترمني بي .
همام : احترامك حاضر واجبك على عين والراس
ابونا انتَ شلون ما نحترمك لا تروح .
حضنه قوي وارث طبطب على ظهره .

وبيرغ واگف بالباب من شافه وارث ابتسم
وارث : طلعت افوت الأكل بالسيارة لا تخافون ما اروح .
بيرغ دردم بصوت ناصي
_ الخايس ركضني .
والتفت شافني وراه ضحكت وفتت وياه جوه .

دخلنا بيده الأكل نزل راسه سلم على خوات
ملِكه وجنى هو يمشي سألته
_ صار كم يوم ما اداوم شنو ماخذ اجازه .
_ اي اجازه .
راح على امه باس راسها واني بقيت مثل الصنم
يا اجازه مو گال ابطل ، اني هم ثوله صدگت
قابل يعوف شهادته ودوامه والله حتى ارجع .

انتبهت امه بعدها زعلانه منه گوه سلمت
وارث : اراضيهم هذولي ويه النفس عندي
وعلي ما اگدر بدونهم ولا اگدر بدونچ .
ام وارث : سَــهم وينه ؟
_ والله هل يومين ارجعه بس لا تزعلين عليه .
رحع باس راسها ويدها وتربع يمها گعد وبيرغ
وهمام كملوا الگراچ وفاتوا گعدوا وياهم .

رحت على ملِكه لگيتها ترتب بالأكل هي وخواتها
ملِكه : هلا بالمخطوفه .
مُـرجانـة : صارت بلسانچ بعد .
جنى : شصاير .
ملِكه : دكتور وارث مات موووت على دلوعته
وهاي راسها يابس لچ مخدرها وخاطفها من بيت
اهلها وحابسها بيته الجديد مايقبل يهدها .

بقيت مركزه بملامحها ابتسمت ودارت وجهه تخلي
المقبلات عدل على كاونتر وهمست
_ وتصالحتوا ؟
ملِكه : تعلميني بمرجانة ما تگدر تقاوم وارث
جانت من بوسة تذوب وهوَ يوميه يمها
هسة صار اشهر بينهم زعل يمكن من نظره
وحضنه تتصالح وياه ويه عشيرته .

ضحكت وذبيت عباتي وشالي عدلته وهمست
_ بعدنا بس حتى لو ما نتصالح مايعوفني .
ملِكه : مايمل بعد دلوعته متعلم عليها .
مُـرجانـة : كافي لچ .
ملِكه : احسه ذايب بس لا صحتي وليدي
لو جنتل مان مالتي هوَ هنا مو بس يتحمل
الطنگوره حتى مصايبچ مستعد يعيدها .
مُـرجانـة : راد يسمعهم گال گولي وليدي
مشتاق اسمعها منچ ما قبلت هههههه .
ملِكه : خبيثه .

راح ملِكه بيدها السفره فرشتها كلهم جوعانين
جنى : خطية وارث مبين تعبان .
مُـرجانـة : هههههههه روحي فحصي .
جنى : شلون .
_ اگول انتِ اعرف بالتعب والمرض .

عفتها ورجعت على استقبال اخذت سجاد من
حضن ام وارث وگعدت بصفها
ام وارث : وخالك فؤاد من شاف اخوان جعفر
واصلين وعدهم ايادي خبيثة گال لوارث اطلع
على غربية واخذ اية كم يوم غيب عن العين .
وارث : خلي يجون عندي .
بيرغ : بيته مفتوح الفؤاد وأولاده .

مد ايده وارث على اكل ياكل عود واخوانه حواليه
وملِكه صاحت امها وخواتها گعدوا على سفره
وارث : هسة اخابره يجيبها ويجي عندي احسن .
ام وارث : اي خطية ، بس قبلها ترا عرفوا موقع
ايلين گال خالك اخابر وارث يجي ويانا نروح عليهم
وبندر هم گايل الهم يروح وياهم ياخذوها منهم
خالك گال حتى لو ارجع الهم فلوسهم المهم ارجعها .

هز وارث راسه وبلغها
_ هسة اخلص واخابر خالي اروح بالبداية
اشوف موضوع البنية بعدين احيبهم واجي على غربية .
كمل كلامه وما تحمل الأكل نهض من السفرة بسرعة

رحت وراه لگيته برا على مغسله مستفرغ دم
مد ايده يمنعني اشوفه وهزها بمعنى روحي
تقدمت دموعي تجمعت بعيوني مليت ايدي ماي
وغسلت وجهه وهوَ فحطان لازم الحايط
من ارتاح شوية راح واني غسلت المغسله ورحت عنده
_ تروح مستشفى اصيح بيرغ .
_ لااا لااا متعود ميصير اكل هيچ معدتي تعبانه بعدها .
_ هاي من سحرها مو ؟
_ الشيخ يگول اي عمل ، لأن طبياً مابيه اي مرض .

ماحب يكمل ولزمني من ايدي دخلنا جوه لگيت
البنات يشيلون بالأكل غطيت سجاد عدل وگعدت
وهوَ بصف امه رجع تقربت منه تهمسله
_ رجعتها ارتاحيت .
وارث : ما تريدني .
التفتت عليه تگلي
_ يااا ليش ما تريدك .
مُـرجانـة : اجباري ؟
ام وارث : چا شلون رجعتها .
_ بگتها بوگ وهسة تريد ترجع .
_ وترجعها ؟
_ ما تريدني .

لزمت عمي سجاد وهمست
_ ليش يمه غير رجعتوا وبيتكم وحدكم
والله بعد ماكو مشاكل ليش ما تريدي .
مرجانة : ما اريده .
وارث : متأكدة ؟
_ اي ما اريدك .
_ متأكدة واثقة من كلامچ .
_ اي اي .
_ خوش تحملي ثمن قرارچ.

رحت منه ارتب ويه ملِكه وجنى وامها راحت
هناك بيدي الصينية مال الجاي ودخلت بيها
واسمع وارث يگول
_ خالتي ام جنى صار ايام اريد اتواصل وياچ
بخصوص جنى وقت ماعندي ملتهي بي دام
اليوم ملتمين اريد افتح وياچ موضوعها .

عدلت حنى گعدتها وباوعت بعيونه
جنى : وارث لو سمحت اذا الموضوع نفسه
مو وقته نأجله فترة بعدين كلشي بوقته .
وارث : ليش هل تأخير دام متفاهمين ومتفقين
عليه خلي امچ يصير عدها علم بي حتى كلشي
يصير رسمي وبما يرضي الله .
بقيت بمكاني اباع عليها وعليه شنو متفاهمين
متفقين على شنوو ، ويصير رسمي شكوو شديصير ؟!

يتبع ..

ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد .