الموروث نصل حاد الفصل الرابع وستون 64 - بقلم اساور حسين

_______________الموروث
﷽

𓆩 اســاور حــسين 𓆪
بقلمي رواية : الموروث

عاملني بغرابة وأنه مصَدوٰم
مرهَ يدزلي بوسهَ ومرهَ سهمهٰ
ومرهَ بكل لطافهٰ يسوَلف وياي
ومرهَ بنص كلامه يخلِي سمهٰ..

" لطفا لا تنسون التصويت والتفاعل بين الفقرات 🌷. "

⊰ مُـرجانـة ⊱

بقيت بمكاني اباع عليها وعليه شنو متفاهمين
متفقين على شنوو ، ويصير رسمي شكوو شديصير ؟!
جنى : سبق وحجيت وياك بهذا الموضوع وبلغتك
افكر بي وبعدني مارديت اي جواب حتى الكُل يعرف .
بيرغ : يابه شالموضوع تحجون الغاز ماتحجون عدل ؟

تحمحم وارث واني گلبي يريد يوگف رحت گعدت
بصف عمتي واخذت سجاد نومته بحضني وفاتحه عيني
وارث : الموضوع ومابي زميلنا دكتور عمر يعرف
بخيتي جنى تقربلنا بحكم اخوي ماخذ اختها
واحتراماً طلب مني اتوسط وابلغ والدتها يريد
الزلمة يجي هوَ واهله يطلبوها منكم على سنة
الله ورسولة والزلمة داخل بنيه صافية مو ملعب
بالعكس زلمة محترم الأبعد الحدود ورايدها .

بعد ماجنت كاتمه حتى النفس بعد كلامه
تنفست براحة وبصوت مسموع من الهبطة والخوف حجيت
_ اوووف وگع گلبي الحمدلله .

استوعبت الفشله من التفت الكل عليه
وجنى اولهم مبحلقه عيونها بعصبية مدري شبيها
وارث دار وجهه عليه بيني وبينه امه فاصلة مغطي
عيونه بيده بحجة يرفع شعره من راسه وجهه صار
دم من الضحك ، تحمحمت وبديت الزگ بيها
مُـرجانـة : وگع گلبي هذا شسمه .
ونسيت اسم سجاد من الخجل اشرت عليه واسأل بوارث
_ شسمه هذا .
وهوَ جسمه يهتز من الضحك ويكتم بيها يريد يسيطر
وارث : اسمه سجاد .
_ اي وگع گلبي سجاد راد يوگع مني .

مد ايده يمسح على راس سجاد
كشفني خفت لا يخطبها بس شحده
انوب يخطبها بوجودي الا ما رايد روحه
وبلش يحجيلي بالألغاز مشفر بيني وبينا
وارث : ديري بالچ عليه زين لا يطير من ايدچ .
مُـرجانـة : اي والله اي راح ادير بالي .

على صوت بيرغ التفتنا
_ يعنّي عندج علم بالموضوع.
جنى : والصراحه رافضه الموضوع.
وارث : يعني ماتريدين دكتور عمر ؟
جنى : بلغته قبل كم يوم اني رافضته .
وارث : ليش ؟ يعني عفواً بس شنو السبب بي شي عمر ؟
جنى : لا بالعكس انسان جداً محترم وخلوق بس
بالوقت الحالي رافضه فكرة الزواج شايلتها من راسي .

وارث عيونه على صينية الجاي شمرتها بالگاع
حتى نسيت اوزعها عليهم جرها واخذ استكان
وارث : براحتچ خوية اني هم ابلغه لأن منتظرني عيب .
بقت ساكته وامها تتهامس وياها ، حسيت صارت
مشاحنات بيناتهن ومرادد اجت ملِكه اخذتها من ايدها
وطلعت هي وياها صعدن فوك بالطابق الثاني .

بيرغ : خوية مُـرجانـة جددي الچاي صار شربت .
عفتهم كلهم ورحت خليت سجاد بحضن وارث
اخذت الصينية ورجعت خدرت الجاي وصبيت
من جديد على سريع ورحت افتر عليهم واحد واحد
بيرغ مايحجي هو وارث ابد داير وجهه منه
وهمام صاير مرسال بينهم بالكلام
وارث : اشتريت بيت .
همام : بالعافية عليك تستاهل .
وارث : بيت جبير ، مال عائلة مو صغير .

شرب ببرغ الجاي كله وفتح تلفونه يتصفح
مُـرجانـة : ويريد ترجعون مثل قبل عائلة وحده .
بيرغ : لو يذبحوني فلا اعيش وياه بعد .
همام : بيرررغ مو وكتهااا عيب .
بيرغ : عجل الموضوع ينسد ماينفتح مرة ثانية
تريدون ترجعون رجعوا انا بعد اشتريت بيت
وبديت اشتري بالأثاث وراح استقر ومرتاح الحمدلله .

عدل وارث شعره وعينه ما شالها من بيرغ
وفاشل بالتعبير گلبه يمهم مايگدر يعيش بدون اخوانه
وارث : قابل بكيفك من اگول الكل يرجع معناتها ترجعون .
بيرغ : دحگ بعينك يول يمصگوع همام خلي يبلع
اثمو ويسكت عني يلة ، گال غصباً علينا گال ههه بطران .

وارث : برضاك غصب عنك ترجع يعني ترجع
اشتريته بعد البيت وانا ما ارتاح ولا تغمضلي عين
اذا ما اشوفكم حواليه مرتاحين ومستقرين ونايمين
بوسط بيت انا موجود بي .

شغل بيرغ جگارة همام اخذها منه
همام : سجاد هين يمعود لا تشرب .
طفاها وبيرغ بعد الباكيت متذكر
بيرغ : اسمع احنا مو زعاطيط ، ولا لعبة بيدك
عيش مثل ماتريد وخلينا نعيش مثل مانريد.

خجل وارث من ام جنى رغم المره فد حبابه
وابد ما تدخل بيناتهم بالعكس تلزم بيد بيرغ
تهدي بي وام وارث تكسر الخاطر لا تگدر ادافع
على ابنها ولا تحامي لبيرغ باقية بوسطهم
وارث : انا سويت العليه واجيتك معتذر .
بيرغ : غير تدري بنفسك غلطان .
وارث : غلطان رديت حقكم وخلصت من سم العالم ؟

ام وارث راحت گعدت بصف بيرغ
_ يمه وروح اهلي كلهم وداعته هوَ انا فلا اگدر اعيش
بوسط بيت چبير بي وارث وانتوا ماكو ، مثل ماهو
ابني وعزيز انتوا اعز فدوة اروحلك الخاطري ترد .

بيرغ : ابد لا تحاولين لو اعرف بذبحوني مارد .
وگف وارث وحد اعصابه نتر بيهم
_ عوفي يمه عوفي ميبس راسه يريدني اتوسل
خلي لا يرد براحته ما تجبره لا يعيش ويايه بكيفه .
كمل وفتح باب الأستقبال وطلع من البيت برا .

ندسّ بيرغ همام واسمعهم يتهامسون
بيرغ : اطلع وراه اگلك لا تخلي يروح .
_ ومحمد يشرب جگاره ويرد شبيك .
_ روح اطلع بلغو انتَ تعيش وياه لا يحترك گلبه .
_ اذا انتَ ما ترد انا شني رجعتي لواگه لو كلنا
نرد لو كلمن يعيش بيت وحده بس نخسره والله .
_ هسة عوف نرجع ومانرجع وروح حاجي غير
الموضوع لا يرتفع ضغطه گلبي نغزني .

فتح همام البرده يباع عليه من وراها
_ مو گلت يشرب جگارة .
حجه وگام طلع همام وظل بيرغ كاعد عصبي
ملامحه ما تتفسر وام وارث لزمت ايده
ام وارث : لو وارث مايدري بروحه غلطان مايجي .
مُـرجانـة : بيرغ والله العظيم وارث مريض .
بيرغ : بس هوَ عافنا هوَ مارادنا وياه .

ام وارث : حقك عافكم وعافني حتى اني هاي صار
شكثر بيت اخوي ما يجي ويگلي رجعي بس هوَ
تعب يا يمه من جهه كلام الناس عليه ومن جهه
مشاكل ومرته والنه مو عنده راد بس يحلها
ورجع حقكم حتى يبري ذمته هوَ ما طمعان بيكم
ولا راح يطمع والله يمه يشهد العباس لو تريدون
گلبه ما يعزه عليكم روحه مو الدنيا انتوا سنده . ف
_ تعلميني بوارث يمه تعلميني بأخوي .

_ چا لا تعوفه فدوة اروحن لطولك ، والحسين يا يمه
اذا انتَ واخوتك ما رجعتوا تعيشون وياه انا هم
بعد شعندي اخذ غراضي واروحن اعيش بالبصرة
غاط بس وعلي لا ارضى عليكم ولا على ابني ولا اريدن
بعد اشوفنكم دامكم مو گلب على گلب .

طال صمته وتمسك بقراره وغير حديثهم اول
مارجعوا دخلوا همام وارث مستعجل
اخذ محفظته والمفاتيح واشر بيده
_ يلة يمه امشينه نرد للبيت ، مُـرجانـة لبسي بساعچ .

وگفت على طولي اخذت العبايه ودرت على بيت
بعده فارغ يحتاج هواي اثاث وام ملِكه صاحت
على ملِكه نزلت جنى عينها صايره دم احمر
بوست ملِكه وحجيت
_ امانة اذا تحتاجون خابريني .
ملِكه : عندچ تلفون ؟
_ وين اكو مخطوفه عدها تلفون .

ضحكت وطلعت شافني اضحك نزل راسه واخذ
مني سجاد من صعدت رجعه بحضني وامه
ما قبلت تجي وكفت بالباب تگله
_ روحوا انتوا يمه باقية عند بيرغ
مرته حامل ما تگدر وحدها تكمل البيت .

مانطق بحرف وياها عرفته صار عصبي وانقهر
لأن حتى هي عافته ، صعد يريد يطگ من القهر
ينافخ نزلنا مقابيل البيت يريد بس يفوتنا
شال سجاد هو وفراشه ليورا طلعه ودخلنا
شغل التدفئة وأمن على سجاد بفراشة
وگفت بالباب مال الغرفة اباوعله من راد
يطلع اعترضت طريقة واستحيت اخلي
عيني بعينه نزلت راسي تحمحمت وهمست
_ وين رايح ؟
_ كملي عليَّ غثيني .
_ ها .
_ بقيتي بس انتِ ومجبوره عليَّ
غصب باقية هم عوفيني وروحي .

عبرني دفعني بجسمه قفل البوب كلها وطلع للسيارة رحت شفته
حركها وراح شكد مغثوثه بس گدرت اتنفس براحة بعد ما خطب
جنى لدكتور زميله معناتها هوَ عينهابد مو عليها جريت نجانه
بالحمام غسلت عباتي زين وبدون ما اجففها بس عصرتها شريتها
برا ورجعت على فستاني هوَ هل فستان اي ملابس ماعندي ولا جابلي
غسلته وشريته بالگراج ويه العبايه بلكي ينشفون للصبح استغليت نوم
سجاد سبحت بماي دافي همزين صلح الماي لميت روحي بالمنشفه
وركضت على دفايه جمدت من البرد بالبيت جريت الفانيله الداخلية
البسها جوه الملابس حتى ما يبين جسمي من جوه بين ما ينشف
بقيت بس بيها وفتحت شعري انشف بي على حرارة الدفايه
احترگ وجهي من الحرارة وشعري ما نشف لميته ورحت على
سجاد من گعد غيرت كل ملابسه وجهزت الممه مالته شربها
ورجع نام ، سحبت فراشه قريب من فراشي وخليت الدفايه
علينا غطيت روحي ونمت نومه طويلة ما حسيت بروحي بعد.

فزيت جاحظة عيوني على ساعة ب1 بليل
وارث بعده ماكو وسجاد نايم ، ذبيت الغطوة
من سمعت صوت الماي بالحمام مديت راسي
عرفته راجع ، ركضت بفراشي غطيت روحي
تسترت من دخل همس بتعب
_ كاعدة .
_ وين جنت ؟
_ ادور على سَــهم .
_ ليش وينه .
_هذا اكل بالمطبخ خليته وجبت ثلاجة
وطباخ حميهن واكلي ولا تفكرين بأحد بعد.

لبس ملابسه واجه بالجهه الثانية ينام تعبان
حسيت بي جوعان وكفت ومشيت سريع انزل
بملابسي مستحيه منه مدري شبيه ، فتحت
الثلاجة اشوف شعدنا جايب اكل من برا بس
طلعتهن حميت الدجاج وخليت المقبلات بالصينية
ورجعت للغرفة اتحمحم بصوت عالي واگفه
شال ايده من عيونه صافن بيه
_ جوعان تاكل ؟

عدل گعدته خليت الأكل بالگاع وهمست
_ تعال اكل .
_ لفلفي روحچ بالغطوه .
_ عود ليش .
_ بحلكي حجي اذا أحجي اخليج تزاگطين .

رفعت حاجبي وجريت الغطوه خليتها جوايه
الگاع بارده تربعت وگعدت هوَ ما يريد بس
غير رأيي واجه مقابيلي متربع اخذ صمونه وفر ايده
_ كاعدة مدلعه وتدلع وهسة اذا اگرب منها تسويني مغتصب.

اكلت اول لگمه ورديته
_ روح جيبلي ملابس حتى استر روحي
وما ادلع غير ماعندي ملابس قابل متعمده.
_ ابقي هيچ .
_ اي عادي باقية شعندي قابل الدنيا باردة .
_ اذا على بروده اخذچ بحضني اطير ابو البرد منچ .

بقيت ما جاوبت كملت وهوَ مارفع عينه مني
خجلت وگفت اخذت الصينية ما اكل غير قليل
رتبت المطبخ ورجعت الأكل غسلت ورجعت لگيته
شايل سجاد ينوم بي اول مانام رجعه وطلع برا
شرب جگارة واني متمدده فات مستند على باب
وارث : اريد تنطيني اسباب تقنعني ليش ما ترديني
صلوات وربعها خلصنا منهم
اخوتي رجعت حقهم وحتى عفتهم
لچ حتى امي عفتهاا زعلانه مني
زين جنتي شاكه بجنى اكو واحد
تعجبه بت يروح يطلبها لصاحبه ؟

رجعت شعري وره راسي وجاوبته بحيره
وهوَ اجه گعد بصفي على طرف الفراش
مُـرجانـة : بس جنى رفضت الدكتورة وتبجي لأن تريدك .
_ مو گال تريدني ؟
_ حسيت .
_ مُـرجانـة نهجم بيتنا والله انتِ حسيتي
لچ موتيني والعباس علعلتي گلبي بهذا عنادچ
وداعتچ وداعت سجاد بعمري ما تقربت ولا لزمت
ولا حبيت ولا عجبتني حرمه غيرچ والعباس والله
والأنبياء والرسل والأئمة أجمعين ماحبيت غيرچ
ولا عجبتني غيرچ بيوم ولا مفكر اخونچ لو اعوفچ
انا هسة عندي بس اريد ترجعين مرجانتي حبيبتي
وام بيتي تحبيني وما تعوفيني والله ماريد شي بعد .

قرب ايده تلمس بيها وجهي وقربها من رگبتي
واقترب اكثر حط ايده الثانية تتلمس عيوني
_ انا احبچ .
_ وارث .
_ يا بعد روح وارث يا دگات گلبه .
_ اني ما اكرهك ولا كرهتك بيوم ابد .

ابتسم وهوَ يبوس خدي بلهفة وعيونه تلمع
_ أدرّي بيچ والله ادري وبقيت اريدچ اعرفچ تريديني .
_ انتَ اول بشر حبيته من كل گلبي .
_ ادري والله ادري .
_ والله العظيم مايهون عليَّ اشوفك تعبان
ومقهور بس اني خايفة وارث ما اريد اتعذب
مثل قبل اريد اعيش حياة طبيعية بدون مشاكل .

حضني خليت راسي على صدره وغمضت عيوني براحه
وارث : حقچ تدرين والله اعذرچ تعبتي الصار
وياچ صعب وجنتي بوسط بيتي ونخطفتي
حقج والله حقچ بس وعد مايتكرر الصار بعد ابد
اخذيها كلمة زلمة مني .
_ شلون وهي حياة مانعرف شنو يصير بيها .
_ احنه وياها وياها نستقر اخليچ تكملين دراستچ
مو تريدين تكمليها وعد زلمة تكمليها وانا ادرسچ .

شلت راسي من حضنه اشوف عيونه
مُـرجانـة : والله ؟
_ والله العظيم كمليها واخليچ اطلعين معدل
قوي واذا حصلتي طبيه يمكن تجين بيوم اداومين
ويايه بنفس المكان مو بعيده لو انتِ عندچ حلم ثاني ؟
_ هسة اريد بس اكمل بعدين افكر شنو اصير
اخليها على رب العالمين شنو يطلع اليه معدلي قابله .

اشر على عيونه الأثنين
_ من عيني هاي قبل هاي دراسه اعتبريها تمت
ونعيش بذاك البيت واختاري اثاثه على ذوقچ .
_ ما اريد بعد تبطل من دوامك عادي داوم بالمستشفى.
_ مشكوره كثر الله خيرچ .

رفع شعري وره اذني ونزل ايده تلمس فكي
_ گلت يمكن لأن ماحب اختلط ما عجبني
غيرها خليني اروح اداوم واطلع واطب حتى اخلص
من حبها والله مُـرجانـة والله لگيت روحي ادور عليچ
گلبي وعقلي رافضين رفض قطعي يحبّون غيرچ .

تحمحمت بعصبيه حجيت خازرته وايدي
على خواصري خليتهن
مُـرجانـة : معناتها صدك حاولت تحب جنى .
_ ههههههه الوحيدة جنى ولا ردت تعجبني
ولا فكرت بيها جنت محترمها وخايف عليها
الخاطر ملِكه حاسبها اختي الله شاهد عليه .
_ لعد ليش تاخذ گهوه وتروح لمكتبها .
_ يا طلابت الگهوه يا طلابت الگلاص .
_ جابولي حجي ترا لا عبالك الماي يجري جوايه .
_ يا طلابه ما تخلص هههههههه .

لزمت راسي وابتعدت ليغاد عنه گعدت ولميت رجلي
_ عوفني الله يخليك لا تضغط عليه .
_ ابقي فكري زين اني هم حجيت ويه عمچ
وامچ اليوم وعمج عصبي بلغته ينطيني مهلة
اسبوع اذا بقيتي على قرارچ ما تريديني ارجعچ .
_ وطلگني هم .
_ ترضين تعوفيني ؟
_ وارث نحاول اسبوع اذا ما گدرت اكمل ترجعني .
_ هاي هي متفقين .

نمت والف فكرة براسي ، وكل ساعة افز على كوابيس
وارث اگعده للفجر لزمني من ايدي نومني على ايده
وبعد نام ما فز ، الثاني يوم بس تريگنا لملم اغراضنا
وارث : خلينا نروح على بيت امي هناك تنتظرنا
وتراث واية راح يوصلون خطية .

جمعت اغراضنا وعفنا هل بيت واستحيت اسأل
هذا البيت ايجار لو مالته ليش گاعدين بي وليش نعوفه
وصلنا على بيت قريب على بيت اهلي بعد كم فرع يمهم
اخذت سجاد ودخلت بسرعة خفت لا يتمرض لگيت
عمتي تنظف وحدها بوستها وخليت سجاد بيدها
مُـرجانـة : همزين اجيتي وارث البارحة انمرد
گلبه من عفتي وبقيتي عند بيرغ .
ام وارث : چا غير خابر خاله عليه وفؤاد لعب بيه طوبة
شلون تعوفين وارث وتقهري وتفشلي غير توگفين وياه
يگلي حتى اخوته يرجعون وياه چا انتوا كلكم عليه .

ذبيت عباتي على تخم نفسه تخم البيت القديم
مخلي بالصالة والأستقبال جايب جديد
المطبخ بعده مفصخ بس نظيف مالتنا
مُـرجانـة : زين يسوي بيچ شي فؤاد .
گعدت على تخم تبوس بسجاد وارث فات
_ يمه خابرتي همام يجي نشد الكاونتر .
_ خابرت امه گالت بس بگعد من النوم يجيبها
تجي هي وياه علينا وشده وياه .

كفكف ردن القميص وبلش يشتغل وهي تباع عليه
من بعيد مقهوره عليه تهمس بلا ما يسمعها
_ سوده بوجهي يمه فدوة اروحن لطولك .

اخذت اغراض التنظيف استحيت
من ام وارث وحدها تشتغل صعدت فوك
اغسل بالغرف شفت غرفه مسدوده فتحتها لگيت
مالته الأجهزة مال تدريب مرتبهن ومنظف الغرفة
طبگت الباب ورجعت اغسل بالباقي واسمع صوت
اية جوه ام وارث ترحب بيها غسلت ايدي بالحمام
الفوك ونزلت اباع عليها خجلانه گوه گاعده
مُـرجانـة : هلا بـ ايوتات .

وكفت مبتسمه رحت عليها حضنتها ابوسها
ما اگدر اشوفها غير ايليا گلبي يرفرف عليها
بودي ابجي بس اخاف اقهرها لزمت روحي
وگعدتها لازمه ايدها بارده
مُـرجانـة : شلونچ شخبارچ اسفة بعد ما سألت عنچ .
اية : معذوره اكيد مشغوله عادي .
_ ايدج بارده .
_ من اتوتر تصير ثلج .
_ تعالي ويايه غسلي بالحمام عدلي نفسچ
حتى ترتاحين ولو بعدنا هوسة عذرينا .

اخذتها امشي وياها وهي خجلانه
اية : اني اعتذر اجيت ودخلتكم بمشاكلي .
مُـرجانـة : بلعكس والله العظيم فرحانين اجيتي
هسة بس ملِكه وميمونة يعرفون بيچ يجون
عليچ يتعرفون متأكده راح تحبيهن هواي .
اية : منو هذني ؟
_ ملِكه زوجة حماي ، وميمونة اخت زوجي .
_ ايليا جانت تعرفهن ؟ تحبهن ؟
_ اي كلنا صديقات .
_ تمام لعد اني هم احبهن .

فوتتها للحمام وعفتها تاخذ راحتها ورحت
على مطبخ ماكو احد باوعت على باب الأستقبال
شفت ام وارث بيدها يحاد وگاعده مقابيل تراث
للي الشيب ترس راسه ولحيته ومبين ذاك هو الفاقد
عزيز على گلبه يظل ملچوم ، وارث بصفه يحاجي
بي وهوَ يشكي من ابو وصوته مسموع
تراث : عمه تفهمين ابوي يريد يخبلني
الصار قبل ماريد ينعاد لو على موتي تعاركت
وياه وعفت البيت واخذتها وطلعت عمه سالفة
والله البيت كله زلم لازم واحد يعقد عليها حتى
نكف لسانات العالم ومحد بعد عنده حق بيها واگفه
وما اقبل بيها لو على موتي وحگ هو علي ما تتزوج
البنية حجيت وياها ما تريد تتزوج ، فوكاها گدامها يگلي
انتَ اخذها حافظ عليها راد يموتني عمه انا والله گلبي
مو زين من القهررر هوَ يريد يجلطني .

ام وارث : والله من العالم ولك عمه وحتى بعد
محد يگدر يطالب بيها گال ياخذها لو تراث لو اسمر .
تراث : اسمر يحب بنيه وهوَ يدري ومن زمان
حتى ايليا جانت تعرفها وتسولف وياها
ومنتظرها بس تكمل سادس ويروح يخطبها .

وارث : لا تصير عصبي بس خليني اكمل كلامي وياك
اخذ بيت قريب على اهلك لا تعيش وياهم وارجع اشتغل
وهاي البنيه بقت يتيمة لا اهل لا خوات على اقل انتَ
اخذها هم ادير بالك منها وهذا تأنيب الضمير يروح
منك لك هذا يكتلك وعلي بمكانك جلطة .

تراث : ياريت وارث هيچ واموت واخلص .
ام وارث : ولك يمه بعدك بعز شبابها .
تراث : وايليا دفنتها بعز شبابها وما حققت احلامها
تعبان عمه تعبان روحي صارت بالنجف بس اريد
ابقه هناك ما يخلوني ، وهسة حتى صعب اعوف
هل بنية اخاف تنظلم اخوها بعده عايش
حق ايليا ما اخذته اخاف يرجع ويكتل هاي اليتيمة
وهم ما ينلزم هذولي چلاب عمه والله چلاب
ومن جهه ما اريد تنجبر تتزوج احد ماتريده .

سكتها وارث بيده بدون ما يشوفه تراث
وارث : واختها حصلتوا العنوان .
تراث : اي حصله بندر بالناصرية مسجله .
وارث : يمتى نروح عليهم .
_ ابوي يريدك تجي ويانا من يصير عندك
وكت نرجع من الغربية للناصرية نروح عليها
حتى لو ندفع المبلغ اللي دفعه حتى ياخذها
ابوي يگول عادي ادفع اهم شي اخلصها.

بقيت ويه اية ماعفتها ابد والبنية فقيرة الى درجة
عكس ايليا جانت تضحك ومرحة واجتماعية
اية خجولة وتخاف حتى تضحك ويمكن من
كثر المشاكل اللي مرت بيها والتعب بحيث
ما الها صوت ابد هادئة .

تشوفني انظف تجي ويايه ، للمغرب اجه همام
هوَ وامه هوَ وارث وتراث ركبوا الكاونتر ورتبوا المطبخ
كله وصلنا اخر شي للكراج غسلوا وجمعوا الأنقاذ
وملِكه خابرت على تلفون ام وارث گعدنا اني وام
وارث نقنع بيها حتى تقنع بيرغ وتظل تحجي براسه
حتى يرجع ويانا بي هذا بيرغ راسه يابس .

وما نسمع غير همام فر من مكالمة يصيح على وارث
_ ميمونة ولك وارث ميمونه .

ميمونة ..

_ انتَ ما تسوي الحرام انتَ متزوووجهاااااا !!
لزمت گلبي عشت ازمة خوف وهلع رهيبة
اريد اجر النفس ما اگدر وگعت بالگاع وهوَ
يفتح بشالي اريد اتنفس ياربي دخيلك
اهز براسي روحي فرفحت فاكه عيني على وسعها واصيح
_ لا بندر لا لا بندر لااا لاا .

لزم وجهه مكان الضربة ورجع يهفيلي بيده
مرعوب يصرخ ومخبوص يوگف ويرجع يمي يصرخ
_ ميمونة شبيچ لچ بس حاجيتي ياهوو وياچ .
دموعي نزلت على هدي بأسف وخذلان منه
_ ليش بندر ليش حرام عليك حررام تغدرني .

يريد يوگفني رجلي ماحس بيها من الثگل ودموعي
غوشت وجهه ضربت على وجهي بقهر وعطت
_ عاندت اخوي تعاركت ويه اهلي گال همام والله
حذرني وگال متزوج زهراء تريد تنتقم انتَ مني .

لزمني من زندي وگعدني على چرباية واخذ گلاص
الماي على ميز بصف الچرباية غسل وجهي
واني ايدي مخليتها على گلبي اشهگ ادور النفس
ميمونة : بالقران مثل ما انتَ تعذبت اني تعذبت
ليش تحرك بگلبي بندر حرام عليك ما راح اسامحك
تخون بيه بغرفتي على فراشي وياهااا ليش .

فرك عينه حيل متعجب مو بس متعجب انضرب على
راسه بكلامي حسيته ضاع الكلام منه
بندر : شهل حجي ميمونة .
_ والله العظيم ما اظل يمك ابد شيل ايدك مني .
جريت ايدي ورحت على كنتور انضرب اصبعي
الصغير بطرف الچرباية شاغت روحي بالزايد
وگعدت بالگاع اضرب على وجهي وهوَ يلزم
بيدي ويشوف بأصبعي ، دفعته وجريت الشال
والعبايه من الكنتور گلبي احس بگلبي يريد بوگف .

بندر : شصار تحجين لو احرك البيت على راسكم
منو وياچ شحاجين وياچ هذول والعباس ما خنت
ميمونة ويامن اخون بيچ .
ميمونة : لا تجذب لا تجذب بعيني شفتها طلعت من
غرفتنا تعدل بملابسها وهاي مو اول مرررررة .

رفعت ايدي من حرگت گلبي ضربته على وجهه
على مكان الأثر وقبضت ايدي بكل حيلي گعدت
على ركباتي اضرب باثنين اديناتي على وجهه
وعلى گلبه وهوَ ما يمنعني من يشوف شهگاتي
والنفس مو منتظم ابد يخليني اضرب الحد ما
وگعت بالگاع ايدي ورمت بكثر ما ضربته
عافني بقمة غضبه دفر الباب بالحايط رگعه .

وطلع خليت ظهري على كنتور اضرب على گلبي
رافعه راسي اجر الهوا واگفه الغصه بوسط بلعومي
زحفت على باب قفلته ورحت على تلفوني ايدي
ترعش وزاد هل رهبة صوتهم جوا والصريخ
نسوان وزلم تصيح ، دگيت رقم همام بعز خنگتي صرخت
_ كلامك صح هماااام ما سمعت كلامك اني غبيه
والله غبيه وعيوني عميتهااااا گلبي همام گلبي راح يوگف.

سمعت انخبص وارث يصيح بي يگله
_ شبيك ولك وين رايح تعااال همااام .
همام : ميمونة وارث تبجي خابرتني .
ميمونة : تعاال فدوة تعال اخذني ما اريده بعد تعال .
وارث : ميمونك تسمعيني .
_ وارث متزوجها بندر متزوج زهراء والله بعيوني
شفتها شلون طلعت من الغرفة مالتنا يخوني وياهااا .

نشغت والباب يتكسر وبندر يصرخ
_ ميمووووونة فتحي الباااب .
وارث : ضربج بس گولي مد ايده عليچ .
_ لا لا بس والله گلبي وارث گلبي حلفته اني
حلفته ما يغدرني وما يخوني ولا يكسرني
شلون اخلي عيني بعين همام واني عاندت اخوي ورجعتله.
_ اجيت اني وهمام عليج اهدي انتِ لا تمووتين
القران عليج بس جري نفس وابقي ويانا على خط .

الغرفة كلها افترت بيه والمغص صار بنهاية
بطني كتلني كتل ، والباب ضرباته تزيد
وصياحهم يرتفع وصريخ بندر مسموع
بندر : تريد تلعب وتهجم بيتي بنتك السگط
والله احركها وانعل والديهااااااا جيبهااا خلي تجي
تواجهني تحجيلي شسوت ولكمممم شسووت .

سيد مصطفى: بس نطلع نحجي اصعد اذا تريد
اني اتفاهم وياها ولك شهرتناااا بس اسكت .

بندر : بوووية وكتهاا هسة تسوي مصايب
مو تدري بيه خلصتها مشاكل ما صدگت اجيبها وارتاح .

سيد رضا : افتهم منها والله لو غلطانه بيدي اذبحها .
بندر : زهراء اذا توگعين بيدي دمچ اشربه وعلي
محمل عليچ اناااا وساكت لا عبالچ ما ادري بالخباثة
انعل **** يا چلبه ياا حيوانه يا زماله .

ومن الضرب والتكسير جوه صرت هلگدني
مقهوره وخايفة ، صوت ضرب على باب وسيد
مصطفى صوته ناصي يگلي
_ بنتي ميمونة خليني احجي وياج فتحي الباب .
بقيت ساكته حرف ما نطقت وهوَ من سكوتي
اجه يدك بالباب كسره تكسير فلشه يصيح
بندر : ميمونة وابو الحسنين ماعندي شي
صدگي وامني بالله بيش احلف بعد ماعندي شي
جنت نايم مصار هواي من فتت للبيت بس نتفاهم
والله افهمچ كلشي بس فتحهي المهجووم بووووية
حاجيهاااا خلي تفتح البااااااااب .

همام : خلي يولي لا تفتحين الباب بس اوصل
اعرف شغلي وياه هل چلب والله عرفت عنده شي وياها .
وارث : ماعنده شي هوَ كلشي يبلغني .
همام : يبلغك هوَ متزوج على اختك عاقل انتَ
لو يخونها بغرفتها ويگول صدك اي خنتچ
بغرفتچ طبعاً ينكر هل مكار الجذاب .

ذبيت التلفون من سمعت وارث يجاوبه
_ بندر ما يخاف من احد لو غلط يگول
اي انا غلطت لو مسويها يعترف هوَ سواها
واحنا هسة رايحين عليهم واواجهه اذا مسويها
اعرفه يحجي صدك او جذب اذا سواها وحگ علي
محد يخلصه من ايدي اخنگه .

طبگت الخط من سمعته يكسر بالباب وابو يمنع بي
_ اخاف تخربطت بوية ماكوو صوتهااا
عفتهااا ما تگدر تتنفس هد ايدي هدني .

ظل يضرب بالباب الى ان صار نصين من بعد وقت
ومحاولات هواي دخل وگفت على طولي دايخة
ميمونة : والله اذا تجي يمي هسة اركض
واشمر روحي من فوك الدرج لا تجي يمي ابد .

نزل عيونه شاف التلفون وعيونه ذبلت
_ خابرتي اهلچ .
_ خابرت اخوتي يجون ياخذوني بعد ما اريدك .
رگع التلفزيون بوكسات وحده وره الثانية واجه يمي ويصرخ
_ ليشششش ميمونة تخلين اهلچ يتدخلون
والحسن لعبة والله العظيم لعبة شبيچ انتِ شبيچ .
اشرت على عيني وهمست
_ شفتكم بعيني تريد اجذب عيوني ؟

لزم ايدي نترتها منه وطلعت من الغرفة للحمام
وطبگت الباب غسلت وجهي واسمع بي يصرخ
_ شنو شافت بوية !
_ انتَ وين جنت ؟
_ بالغرفة .
_ وزهراء لچ رقية تعاااااي .
رقية : بوية والله معليه جنت بالمطبخ .
سيد مصطفى: وزهراء .
رقية : بغرفة بندر .

فتحت الباب ورجعت للغرفة عبرت الخشب
وگعدت مخنوگه على چرباية وهوَ نزل لزهراء
صريخها وصريخ امها يدوي بالبيت
ام زهراء : راح يرجع باقر يموتهااا ولله
ما تفتهم وجانت فوك انتوا خليتوا براسها
الغلط منكم مو منها خبلتوا البنية .

سيد مصطفى : بنتچ شسوي جانت بغرفته .
ام اسماء : ولابسه نفس لون ملابسها وعطرها
لبنية وگاعدة بغرفتهااا وتخبث عليها وترست
عقلكم كلام غلط على بنية شبيهاا تخبلت
غير متزوج مايريدهااا شلون انوب تريد تهجم بيته .

ام زهراء : لا بس هوَ حلال هجم گلبهاا هجم
وخلاها مريضة طريحه بالفراش .
بندر : من شفتها وشافتني مبلغها ما احبها
ولا اريدها بشنو هجمت گلبهاااا وشلون .
ام زهراء : چا غير خطبتهااا .
بندر : جيبيهااااا احاجيها .

سيد رضا : تريد تضرب بنتي وانا موجود ولك .
_ بنتك هجمت بيتي .
_ كلشي يتصلح بوية لا تتهووور .
بندر : اخخخ بوية اخخخ تمنيتهاا زلمة
اطب عليها اطشر دمهاا وابو الحسنين
اطلع صمصوم گلبهااا بيدي الچلبه .

صعد فوك يريد يحجي ويايه سديت اذني منه وصحت
_ عوفني راح يوگف گلبي عوفني .
_ لچ وين تروحين راح يجون وين تروحين .
_ اذا ما يطلگوني احرك روحي هل مرة ما احرگ وجهك .
حجيتها هوَ گعد مقابيلي يحجي واني ما نطقت
ولا تأثرت شگد حاول صعدت العلوية مثل ما صدگتها
اني ما اخذت بكلام احد بيهم هل بيت ذبحني
فكرة انتَ تريد تعيش واحد يحفر گدامك ووراك صعبة .

خلص حيلي ونمت على مخده جسمي يكزبر
من اتخيل رخصها وخيانتهم بوسط غرفتي
عيوني انعمت عمي من الغيرة بعيني شفتها
طلعت من غرفتي محد اجه حجاها لا شفتهاا
وقبلها هم شفتها نزلت وهوَ فوك ، شعدها تصعد
فوك حتى غرفتها مو فوك شسوووي بغررفتي وهوَ
موجود ما اگدر حتى افكررر بيها ، دگ تلفوني
عرفتهم وصلوا اخذ التلفون واني جريت عباتي والشال
ونزلت لزم ايدي على درج وحضني
_ محلفچ بالله بداعت امچ ما تروحين وعلي ما خنت وعلي .

دفعت ايده من شفت باقر طلع من غرفته التفتت
عليه ومن كل گلبي صرخت
_ انزل ربي اختك الرخيصه هجامة البيوت
اخاف ماتعرف اريدك تعرف هسة اختك تواصلت
ويه اخوية قبل لا اتزوج بندر وتگله عندي تواصل
ويه بندر وبلغته بندر متزوجها وخلته يكتلني
زلمة ما رضاها على اخته تاخذ واحد متزوج
واني غبيه ما صدگته بس اختك الفاشله
كلامها صحيح وحققت غايتها خليها تاخذه
بالعافية عليهااا ما اريده بعد .

امه صعدت تلطم على خدها وهوَ صرخ
باقر : شني هذآ الكلام ؟!
ميمونة : اختك فاتت لغرفة نومي بغيابي
وبقت هي وابن عمك بعد انتَ اعلم شنو هل كلام
حلل الشوارب اللي مخليهن بوجهك
وروح صير زلمة على اختك واعرف منها شنو
جانت تسوي بغرفتي وليش تلبس نفس ملابسي
وترس نفس عطري وتركض وراه شنو غايتها
حتى شواربك بذاك الوكت يگعدن بمكانهن
خوما تربون شوارب وعرضكم يلعب بكيفه .

نزلت وبندر ورايه مابرر لباقر ولا خاف وتردد
بالعكس ثابت وصياح باقر ينسمع بمل البيت
دفعت باب الأستقبال وركضت على وارث
اول ما شفته واگف لازم جگارته خايف عليه
حضني وبندر هجم عليه همام ضربه
همام : تحلم بعد تلمح ظلهاااا يا چلب .

بندر : وارث وروح امي ما خنتها ولا متزوجها
وماتقبل تحجي شنو شافت جنت نايم والله
دورت على بيت واجرته ورجعت للبيت ارتاح
لا مفكر بغيرها ولا رايد غيرها .

گعدني وارث على تخم واني گلبي دگاته سريعة
وحلگي يابس صاح بي
وارث : روح جيب ماي البنية راح تموووت .
فات سيد مصطفى بيده الماي اخذه
همام من ايده وگف مقابيلي يغسل بوجهي
واسمع صريخ زهراء يضرب بيها باقر
بالحزام كسرها تكسر وتصرخ
_ راح يموتني يمهههه بعد ما اعيدها توبه والله توبه .

همام راح يخلي الگلاص على طبلة وما نشوف
غير فاتت على ديوانيه علينا مزلغ جسمها
تزلغ بالحزام وخشمها ينزف دم لزمت ايد
همام من زنده وختلت بظهره تصرخ
_ اني دخيله عدكم راح يمووتني راح يكتلني .

جر همام شالي من راسي بقيت بالعبايه
وشمره عليها صاح
همام : ستري نفسچ .
فاتوا ابوها واخوها وجدهم وسيد مصطفى وبندر
متخبلين من تصرفها وشلون تنتخي بيهم
وعيبه على همام لو رجعها وهي دخيلة ظل
واگف وارث راح بصفه يهدي بيهم
وارث : لا توصلوها للدم تفاهموا وعوف الضرب .

فر بندر عليها جرها من وره همام وهي لزمت
بقميص همام قوي تصرخ
_ لا يموووتوني والله بعد ما اعيدها غلطانة
ميمونة عليچ الحسين احجي وياهم والله
اسفة ولا اغلط بعد راح يكتلني باقررررر .

غطيت وجهي گلبي محمل عليها بس ما اريد
تموت من ورايه وگفت لزمتها من ايدها وهمست
_ شفتها بالصالة الفوك مو بغرفتي بس
اني والله كرهتها لان تخلي العلوية والسيد يكرهوني
وگلت بغرفتي ما جانت بغرفتي وبندر نايم .

باقر يريدها ظل يهد عليها كفشها
من يمهم وخنگها يطلع بيها من الأستقبال
بندر يباع بعيوني واني حقدت على عائلتهم كلها
واجذب بالصدك بقيت حتى لا اشيل ذنب موتها
وامها گطعت روحها برا الديوانية ، بقوا اخوتي
لا نگدر نطلع ونعوفها ولا نظل هنا ادخل جدها
واخذوا منه كلمه محد يضربها بعد وهمه ماعدهم
هيچ بالعكس يحترمون نسوانهم وبناتهم بس
هي هاي الچلبه رادتهاا الله لا يوفقها ، اخذني
همام من ايدي طلعني وارث هو وبندر واگفين
اثنينهم يسولفون وبندر محترك دمه .

خليت راسي على جامه وغمضت عيني الى إن حركنا
روحي فرفحت تفرفح من الحرگه بگلبي نااار وتاكل
ماخليت عيني بعينه ابد راد وارث يحجي همام صاح
_ دخيل الله لا تبرر عوفها ترتاح دحگ حالها .
وارث : سگط اريد اگول اخذها للمستشفى
تخلي مغذي لا تتخربط بالطريق .

رفعت راسي وهمست
_ لا اريد امي اتحمل ما اتخربط .
سمعوا مني وجنت غلطانه بوسط الطريق
ومن القهر والطريق معدتي بقت تگلب
نزلت بالطريق استفرغ وهمام يغسل بوجهي
وارث ذب عباتي لازمني لا اطيح ، رجعوني
بالسيارة كل ظني نمت بس فقدت الوعي
گعدت اشهگ مثل الغرگان وطلع من الماي
ميمونة : اختنگت .
همام : اخخخ بس اخخخ شحجي شگول .

وصلنا للبيت جنازة هي بس فكرة وحده تحبه
ويايه هاي ادمرني مو اتحمل شوفتها تطلع
من غرفتي وتتقمص شخصيتي وتحرگ بيه .

تلگتني امي وام وارث من الباب ومرجانة بالباب مال مطبخ
بيدها سجاد راح عليها وارث خلت بيده سجاد واجتني
لزمتني فوتتني جوه شفت بنية گاعدة بالصالة
لابسة شال ماعرفت حتى اسلم نمت على تخم
وهمام فات بيده علاگه بيها مغذي وابره تربع
يمي وارث يخليها بيدي وهمام يمسح على راسي
ويحرك اصابعه بهدوء على عيوني حتى يخف الوجع.

ما عافني الى بعد ماخلص المغذي وساعدني
افوت للحمام اسبح ومرجانة ويايه ساعدتني
نشفت شعري وبدلت ملابسي وطلعتني تلبسني
بالجواريب وركضت للمطبخ تسويلي گلاص
حليب دافي الجو ثلج وارث يقرب الدفايه مني
وهمام گاعد يمي يمسح على ضهري
_ القران عليچ لا تحرگين بگلبچ .
_ لا ابد روح ارتاح .
_ باقيّ يمچ من تصيرين زينة ارتاح .

فات بيرغ يرعد من العصبية من شافني صاح
_ شبي هذا وياهاااا .
همام : لحيت انتَ واخوك خوش رجال
زوجهاا دحگ الخوش رجال .
بيرغ : اه ضاربهاااا ؟
وارث : عمي ضاربها شني هي ضاربته .

همام : ميمونة ؟!
بيرغ : ضاربته ؟
وارث : كاتلته ملخت وجهه تملخ
مو اخوك شافه اني عبالي ابو ضاربه طلعت ميمونة .
ميمونة : لان محروگ گلبي ما ادري بروحي .

خلت مُـرجانـة الحليب بيدي ايدي ترجف واخواني
واگفين فوك راسي والبنية فاتحة حلگها گاعدة
وام وارث ما تگدرت تتحرك لان سجاد بحضنها
ام همام : عوفوها ترتاح واطلعوا بالديوانيه احجوا .
سمعت صوت تراث مـن الأستقبال يصيح
_ وارث هذا بندر برا تعال .
بيرغ : اجه وياكم .
همام : لا عفنا هناك بالبصرة .
وارث : كل عقله جاي ورانا .

طلعوا الولد خليت راسي على مخده وباع على بنية
مُـرجانـة : هاي اية اخت ايليا .
گعدت على حيلي والبنية اجت يمي بوستني
اية : ما تشوفين شر يارب ربي يبرد گلبچ .
_ شكراً حبيبتي .

غفيت من التعب الى ان فاتت ملِكه گعدتني
_ ما تگعدين يا بنية .
حضنتها اول ما گعدت طگ گلبي عليها
لزمت بطنها وهمست
_ توأم ؟
_ هههههه لا بنية بيه .

مُـرجانـة : واخيراً خلاچ تجين ابو راس .
ملِكه : تعاركت وياه عركه شكبرها واجه اخذني .
ام وارث : بعد لا تروحين خيولي ابقي عدنا خلي وحده هناك .
ملِكه : ما اگدر اكسر كلمته گدامكم عيب والله
بس اذا تگدرين اقنعي انتِ وارث وابقه هنا .

انتبهت ملِكه على اية شهگت وهمست
_ يمه عبالي ايليا .
حجتها بصوت ما سمعه غيرنا ، وراحت عليها
حضنتها تبوس بيها وترحب وگعدت بصفها تتعرف عليها
مُـرجانـة نزلت مبدلة توها مخلصه شغل گعدت بصف ام وارث
_ يمكن وصلت غرفتنا اللي وصيناها .
ام وارث : ما عرفت الكم توصون غرفة نوم انتِ وياه
ومن نحجي تصيحون اسبوع وكل واحد يروح بطريقة .

دخلنا بغرفة ام وارث الجديدة نفس اثاثها
القديم خلاها ورتبتها مُـرجانـة سمعت من ام وارث
والعمال صعدوا اثاث الغرفة فوك وهمام وگف
عليهم الى ان كملوا نزلهم ، لزمت مُـرجانـة وهمست
ميمونة : بندر راح ؟
_ تعاركوا هوَ والولد وطلع هو وتراث يمكن
راح على بيت امه القديم اعتقد بس ما اظن رجع على بصرة .

شفت اية نامت على فراش بغرفة ام وارث
كلنا سكتنا وطلعنا من الغرفة وبيرغ اجه يمي
حجيت كلشي بدون زيادة ولا نقصان هز راسه وهمس
_ هسة ارتاحي وبعدين لكل حادث حديث
ارتاحي هنا گعدي معززه مكرمه لا تشيلين هم
ولا تفكرين دام اخوتچ وياچ وشنو تردي احنا جاهزين انفذ .
بسته من هده وهمست بخجل
_ كون الله يحفظكم اليه گلبي اريدكم سالمين .

من شفت همام وارث فاتوا ناقصهم سَــهم
بجيت مشتاقتله نص انهيار اعصابي
هذا والقلق عليه خايفة لا صار بي شي
هوَ ما متعود يغيب هل غيبه من عدنا
باس راسي بيرغ وهمام صاح
_ عليمن تبجين انوب تزيد .
_ ما عرفتوا اخبار سَــهم .
وارث : اعرف اخباره قابل كل هل مده ما اعرفه وين
واوكف هيج مجتف ايدي كل عقلچ طبعاً عرفت .
بيرغ : صدك .
وارث : اي وعلي عرفته وين هل يومين اروح
الزمه اكتله كتله مرتبه حتى مايعيدها ويفرفحني .

ام وارث : شني تكتله وعلي ازعل عليك .
بيرغ : بالعراق ؟
_ اي بأربيل راجع من تركيا صار يومين .
بيرغ : ليش ما تحجي ؟
_ غير انتَ ما ترد على مكالماتي ولا تقبل تحجي ويايه .
بيرغ : من تروح اجي وياك .

وگف عدل ملابسه وصاح
_ يلة ملِكه امشينه هم يلة نوصل صارت ظلمه .
ام وارث : عوفها ويه البنات كلهن ملتمات
وانتَ بات ويه اخوتك .
_ باجر اجيبها .
وارث : بات وانجب .
_ لا تغلط .
_ انجب وبات .
_ نطلع بكرامتنا احسن .

اعترض وارث طريقة ودفعه
وارث : مخبل انتَ ما عولت تطلع شبيك
مو اجيت واعتذرت منك راسك يابس ارجع يلة .
ام وارث : ظل يمه الخاطر اخوك .
بيرغ : ابد والله .

عافهم وطلع وصاح على ملِكه لبست عباتها
وطلعت وراه تعذر من عدنا وگفت بصف وارث
ملِكه : وداعت حملي هوَ يحبك ومشتاقلك
بس زعلان منك امانة الله ابو سجاد خوية
بداعت سجاد لا تزعل من عنده وظل حاول وياه .
وارث : لا خوية ما ازعل منه ابد والله .
_ واذا تگدر فد شوية تعال وحدك على بيتنا
اتفاهموا بيناتكم بلكي يذوب الجليد مالته .
_ صار فد ساعة واجي وراكم من بطن عيني .

جهزت مُـرجانـة حافظات اكل الهم ما قبلت
ملِكه تاخذهن بس وارث صاح بيها
_ اخذيهن من ايدهاا .
ام وارث : تعشوا بيهن بين ما يجي وارث .

صعد وارث فوك وهمام اجه يمي ومرجانة
جابت صينية خلتها يمنا بالگاع وصاحت
_ يلة عيوني تعالوا اكلوا همام خليها تاكل .
همام : عاشت ايدچ يا طيبة .
ضحكت ورجعت للمطبخ اخذت صينية وصعدت
فوك بقت وسجاد بيد ام وارث باقي روحها بي .
ساعة ونزل وارث ومرجانة وراه مبدلة
وارث : يمه رايحين البيت بيرغ محتاجة شي .
_ لا يمه سلامتكم روحوا الله وياكم .

خلت مُـرجانـة الصينية بالمطبخ وراحت وياه
صعدت بالصدر وراحوا ، وامي اجت يمي
تسولف ويايه على صار ساعة ورجع تراث
وهمام راح وياه بالإستقبال اجت ايه يمي
بقيت احجي وياها على اختها وحياتها
قبل ومر الوقت بسرعة للساعة 12 ورجعت
مُـرجانـة مبتسمة وارث وراها
ام وارث : ها بشروني يمه .
مُـرجانـة : هوَ يبس گلوبنا قافل يريد حتى
من يرجع سَــهم ياخذه يعيش وياه وارث
كل شوية گب عليه وگوه اهدي بي ابنچ
صاير ناررر ما يتفاهم .

وارث راح على مغسله يغسل وهي كملت
_ بس گال عوفوني افكر بالموضوع كم يوم .
_ يبيع ثگل براسي الحيوان .
مُـرجانـة : عاد انتَ تحب الناس من تدلع تحمل دلع اخوك .
وارث : تخيلت بيرغ لابس ملابس خلاعي .
ميمونة : لا يسمعكم ويخلع اخلاقه .

نمت على مخده من وجع راسي الفضيع
راح وارث ويه همام وتراث بالأستقبال
ومرجانة صعدت اقل العشر دقايق واجه
اخذ سجاد من امه وصعد بي فوك واية
راحت بغرفة ام وارث ، شلت المخده ورحت
بغرفة امي شفت تلفوني على شحن
اخذته وتمددت بصف فراش امي ونرج
بيدي فتحت الرسالة من بندر كاتب
" ما اگدر اعوفنچ ميمونة وين عفتيني "

طبگت التلفون ومن شافني شفت الرسالة
بقه يكتب رسالة بعد رسالة فتحتهن هو يكتب واني اقراهن
"رجعتيني لنقطة الصفر "
" كل لحظة وانتِ بعيده مني تكسر ضلع بروحي "
" ما تفگديني حاجيني "

قفلته ودرت وجهي على حايط مكسور خاطري
نمت واعرفه مكسور خاطره ماجنت اظن نرجع
لهنا بعد المعاناة اللي عشناها جنت متصوره نكمل سوية ..

الثاني يوم گعدت اغسل بوجهي واسمع صوت طگطگه
بالمطبخ رحت انشف ايدي ومن بعيد شفت وارث مبدل
قميص ابيض والبنطرون قماش اسود جسمه مرتب
وگاعد على كرسي مرجع ايده وطابگ رجل على رجل
بالمطبخ وبصفه ميز الطعام ومرجانة تجهز بالريوك
خلته على ميز الطعام وجرت كرسي گعدت بصفه
شالت استكان الجاي تشرب منه وتباوع بعيون
وارث وهوَ صوته خشن ظل مركز بعيونها ويغازلها
_ السيف في الغمد لا تخشى مضاربه
وسيف عينيك في الحالين بتار
أن المفاتن في عينك مخمرة
من نظرة منك يغدو المر ، سكرانا
عيناك منظومه تحوي قصائدها
كي تبعث السحر تتلو منه ديوانا
فقل للقوافي إذا مالت بأحرفها
الشوق بحر وفي عينيك مرسانا .

ابتسمت على كلامه وتعجبت اخوية يعرف هيچ
يغازل اني من اشوف وارث اخجل احسه
مايعرف يغازل ابد وعملي ، مُـرجانـة خدودها
تحولن طماطة بس ثابته بعدها صامده
بس ابتسامتها ماعرفت تسيطر عليها
باسها من راسها وشرب چاي وگف يريد يروح .

ميمونة : صباح الخير .
تحمحم ورجع للواقع عاف عيون مُـرجانـة والسيف
وارث : هلا صباح الخير شلونچ اليوم .
لزم راسي يشوف حرارتي
_ زينة .
_ واضح .
مُـرجانـة : يحجي بالواضح لأن راح يروح للمستشفى .
وارث : شلون احنا بالغيرة عمي افتح كاميرا هناك .
_ لا تفتح بعد انتَ وضميرك اني يوصلني الحجي .

وارث ...

دخلت على مستشفى خلصنا اول عمليتين
واخذت اجازه وطلعت لگيت بيرغ منتظرني
برا توه نزل من التكسي صعد بسيارتي
وتوجهنا على اربيل
_ مرتك وين ؟
_ وديتها على بيتك .
_ بيتنا .
_ راح يبلش شيخلصنا .
_ بيرغ ارجع الخاطري اذا عندي خاطر يمك
شبيكم من تزعلون مني تعنفصون تعنفص جيره بفرگك .

ضربني على ايدي وصاح
_ صاير هواي تسبني احترم نفسك .
_ فهموني من تزعلون واراضيكم شبيكم تعذبوني ؟
_ ماتعرف تصالح هي گوه .
_ لا بالله ؟
_ مو ما تعتذر من عدنا هواي من يصير وكتها
كل ما تعتذر نتمتع بيها نطلب ذلتك اكثر .
_ الله يذلكم كون مثل ما تذلوني .
_ شو تجمع .
_ انتَ وكل واحد يذلني بصلحته .

سقت السيارة سريع اريد بس اوصل على اربيل
اول ما دخلنا السيطرة خابرت على ولد اخذت
العنوان مضبوط وبلغني هسة هوَ بمطعم
دخلنا للسيطرة سوينا اقامة ودخلنا متوجهين
للمطعم نزلنا بالگراج گعدنا هناك ادور عليه
من گامت عائلة من طاولة واشوفه طلع بيده
منظفات وصله راح على طبلة ينظف بيها
اعتصر گلبي مو من شغله لا بالعكس اريدهم
يشتغلون ويعتمدون على روحهم بس انهضمت
اخوي اضطر يشتغل ويبعد من عدنا شكله
ومنظره وهوَ ينظف هدم گلبي وبيرغ ما تحمل صاح
_ سَــهم لك سهمممممم ..

رفع راسه على صوت بيرغ ملهوف وصارت
نظراته عليه شافني واگف وعيونه هلو دموعها
بهضم وكسره ، دفعت الطاولة خفيف من ذب الوصله
من ايده واجه يركض حضني يبجي رفعت عيوني
من العمال والعالم تباع علينا لزمت وجهه وعاتبته
_ ليش ولك هيچ تخليني متبهذل ادورك
گطعت گلبي ولك خوية .

مسحت عيونه بست راسه وهوَ يريد يبوس ايدي
سَــهم : والله ما خنت الأمانة وارث ما غدرتك .
بيرغ سحبه حضنه خايف عليه وهوَ ضعفان
من التعب وجهه لونه شاحب وايده ترجف من التعب
بيرغ : انعل ابو الفلوس لابو الملفات لابو الشغل
ولك ياااا امانة انتَ اهم منهن كلهن والله اهم منهن .

عينه عليه مسحهن ويگلي
_ بعدك زعلان مني ادري بيك اني خسرتك
واستاهل تكتلني وتعوفني اسف والله اسف .
وارث : چا انتَ مو تگول تعتبرني ابوك ؟
_ اي والله وارث والله اعتبرك ابوي .
_ چا اكو واحد يزعل ويسافر لأن ابو خاف
عليه وصار عصبي وطرده مو نعرف احنا
الأب حتى لو طرد نرجع ما نزعل .

ذبيت منه ملابسه وهوَ يشكي
_ سافرت حتى اخلصكم مني .
وارث : ما تنجب ولك طيح الله حظك امي فرفحت عليك
وميمونة مريضة لأن ماكو اثر منك ، واخوانك محتارين
يدورون عليك شبيك ولك اكتلك ؟
سَــهم : بس گلبي برد گلبي انتَ مسامحني .
وارث : وعلي مسامحك وگلبي ابد ما شايل عليك
ولا اشك بيك صرت عصبي بس انتِ عزيز گلبي
ابني ولك ابني اعتبرك ليش تروح .
سَــهم : عافتني وارث خسرت ترف .

بيرغ : ماتروح اذا تريدها وتحبها نزوجها
الك غصباً على اكبر شارب بيهم .
لزمت شاربي وگتله
_ اخذها من هل شارب ترف بنت ضياء الك ماتصير لغيرك .

بيرغ : يلة خلي نرجع يلة تعبنا كافي بجي .
سَــهم : مو مستلم راتب وصرفته على ايجار
ومصاريف اكلي وشربي وملابس ولازم اكمل
شغلي هنا من اخلص ارجع .
وارث : شگد الراتب ؟
_ 250 اخذت من صاحب المطعم .
انطيت المفاتيح لبيرغ وگتله
_ انتَ طلعه للسيارة واني راح اتفاهم ويه المدير .

سلم سَــهم على جماعته وطلع واني انتطرت المدير
تأخر خابرته وبلغته تركت المبلغ مال الراتب ويه
عامل فلان وعفتهم ورجعت للسيارة ركبت لگيت
سَــهم يعدل بشعره مرتبك
_ دليني على مكان البيت ناخذ اغراضك .
مشينا الحد ما وصلنا الشقة تعبانه جواها
محل مال مشروبات كحول صعدت وياه مأجر
غرفة صغيرة بيها حمام ونفسها الغرفة مطبخ
لم بيرغ الغراض وياه وهوَ خجلان طلعنا
اخذت غراضه من ايده وحضنته من اكتافه
_ الك وحشه والله مشتاقلك يا زمال .

مسح عيونه ادمع وحضني
سَــهم : تعبت بدونك اني جنت اعرف اذا
تعوفوني اتبهذل وطلع صدك وارث نكسر ظهري .
_ والله ما عفتك ولا راح اعوفكم لا انتَ ولا اخوتك
حتى لو يمرنا الزعل بس ماعندي غيركم .
بيرغ : ولا احنا عدنا غيرك .

صعدت الجنطة بالسيارة وگتله
وارث : سَــهم ترا هذا طلع بيت وحده وعافني .
بيرغ : وزع ورثنا ترا وظلت حصتك وياه وطردنا .
وارث : جذاب ما طردتهم وهسة هم اشتريت بيت
واتوسل بي جنه حصيني راسه راس تيس مايقتنع .
بيرغ : بوس ايدي وارجع وياك .
وارث : خاب الخايس طبك طوب لا ترجع .

صعدنا بالسيارة نضحك ورجعنا مو اربيل
للغربية بس طهري طاح من السيارة وعيني تزغلل
اول ما وصلت لزمت سَــهم من اكتافه حضنته وفتت
وارث : يمهههه تعالي شوفي منو رجع .
عرفته امي واجت تركض من شافته شهگت
وهوَ راح يبوس بيدها ونزل يبوس رجلها
گعدت وياه بالگاع ما تخلي وحضنته تعاتب بي .

ظل بحضنها وميمونة اجت تسلم عليه فتت من باب
الأستقبال على صالة ادور حبيبي لگيته نايم بفراشه
فاتحين الگماط منه ويلعب بيده ورجله شلته بين ايدي
ابوس بي ريحته اووف ريحته ترد روحي وامه من
بعيد واگفه باب المطبخ تباع علينا .

صاحت امي على بنات يجهزن سفرة الأكل
وارث : يمه چا تراث واية وين ؟
_ والله يمه اخذها ومدري وين راح بيها .
مُـرجانـة : لا يمكن يشتري الها ملابس لأن البنية ماعدها .

خليت سجاد بفراشه وصعدت فوك بدلت ونزلت
كلنا ملتمين على سفره وحده بس همام احنا
ماكل فات لزم سَــهم وكتله وبيرغ يخلص بي
من برد گلبه لزمه وحضنه يگرص بي
همام : عيدها بعد وادحگ بعيونك الملص
شلون املص راسك يا زعطوط يا ابو زعيله
متعلم الزعولات من مثالك الأعلى وروثي .

مبين مشتاق ينضرب ما خليته بنفسه
وطگيته على رگبته وشمرت عليه خاشوگه
وارث : انجب واكل لا اخلي راسك بالسفره .
بيرغ : يكره الحق .
وارث : يمه يسكتون لا اهججهم .
همام : عمي انجعم انتَ وياه لا يطردنا .
بيرغ : ويجيب ولد فؤاد يعيشهم وياه .
ميمونة : بيرغ احسك تغار على وارث من ولد فؤاد .

واني هم احسه باوعتله خازره وهو خازرني
انزاح هم چبير من گلبي وهسة اگدر ارتاح
صعدت نمت وللمغرب انطيتهم خبر راح
نطلع الفجر للناصرية ، بقيت هل ليلة نايم
الثاني يوم طلعنا الفجر وتراث ويايه بالصدر
واية ليوره خالي فؤاد واولاده منتظرين بنص علي
الطريق ألتقينا حتى نتحرك ونوصل كلنا سوية واول
ما وصلنا للعنوان نزلنا من سياراتنا واية نزلت
بس ما متوقعين اللي صار بهذا البيت راح يسبب
للكل صدمة وهجم ما تبقه بتراث من صبر وقوة
انهار انهيار كامل بعد ما دخل وسمع وشاف ..

يتبع ..

ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد .