رواية الموروث نصل حاد الفصل الخامس والستون بقلم اسـاور حسين 🦢✨

_______________الموروث
﷽

𓆩 اســاور حــسين 𓆪
بقلمي رواية : الموروث

" لطفا لا تنسون التصويت والتفاعل بين الفقرات 🌷. "

⊰ وارث ⊱

على معبر عتبة الباب واگف مديت ايدي تصافحت
ويه رجل بعمري طوله بطولي مرحب بينا قبل لا يعرفنا
استداريت على اية اشوفها وينها حتى يشوفها
واگفه بصف شيخ فؤاد ومنزله راسها الى ان دخلنا
لداخل البيت وگعدنا بديوانه بيت بناء قديم بس
نظيف واثاثه تعبان بس مرتب وعطر البخور منتشر
بكل زاوية ، دخل الرجال بيده الماي وزعه علينا وگعد
مايعرفنا متعجب من دخلتنا بس استقبلنا .

تحمحم ابوي وبصوت مسموع بالديوان تحاور وياه
شيخ فؤاد : الله بالخير .
_ الله بالخير والعافية اتفضلوا امر خدمة ؟
دگ خالي فؤاد على صدره يعرف عن نفسه
_ انا الشيخ فؤاد وهذولي اولادي .
_ وانا عقيد نوح تشرفت بيكم شيخ كل الهلا
شيخ فؤاد : من عشيرة الـ**** .
قلص حاجبة من عرف فؤاد من عشيرة ايلين
_ اي والمطلوب ؟

بقينا واحد يباع بوجهه الثاني من عرفنا تعرف علينه
شيخ فؤاد : عدنا يمكم بت اسمها ايلن اصير
انا عمها من بعيد وابني زوج اختها الله يرحمها
واجيت ادفع بيها دم گلبي وارجعها لأختها
بقت بس هاي عدنا .

عدل الرجال گعدته منزعج من كلام ابوي
بس كل احترام شفنا من عنده رد بكل هدوء
_ مع احترامي لشخصك الكريم بمقام والدي انتَ
واجب احترامك، بس ما مسموحلك تذكر طاري عرضي
بوسط ديوان زلم ما اقبل ينذكر اسمها رجاءً .

دخلوا اثنين زلم كبار وگفنا وهوَ عرفنا عليهم اخوته
وهوَ اكبرهم وردينا گعدنا نكمل كلامنا وياه
وارث : البنية انتَ مشتريها من شخص اسمه جعفر .
فر عيونه على اخوانه وتحمحم واضح ما يعرفون
_ خوية انتَ فاهم غلط ماكو هيج

تراث : اختصر الكلام البنية نريدها .
رگع الرجال الطبلة وگف على حيله
_ تريد منوووو ولك تسودنت احترم نفسك
وخليني محترمكم لا ينگطعن خيوط عقلي .

لزمه ابوي فؤاد من ايده وگعده بكل هدوء
واني رحت على تراث اسكت بي منه حتى نفتهم
شيخ فؤاد : اذكر الله ابني خلينا نتفاهم .
_ عمي انا زلمة شروگي ليذكر طاري عرضي يمسني
وانا متربي ما مسموح لكائن من يكن يمس عرضي
لو اعرف اهدر دم واهدم بيوت حاجي ابنك يلزم حدوده .

وارث : خوية لا نهدر دم ولا نهدم بيوت عدنا
امانة يمك ندفع الك اللي دفعته الجعفر وردها .
ضرب على طبلة بيده ونهض يصول بالديوان
نوح : البنية ما مشتريها متزوجها على سنة الله
ورسولة ما اقبل تگول اشتريتهااااا وتقلل منهااااا
انطيت مهرها واخذتها من السگط ذاك ، وعقدت عليها
شرّعاً وقانوناً وهي ام بيتي ارجعهااا شنو ! .

شيخ فؤاد : وين دليلك ؟
نوح : سبق وذكرت انتَ بعمر والدي واجب احترمك
انتظر دقيقة واجي بأثبات اثبت كلامي يابه احنا
زلم من نحجي دليلنا جدامنا نخلي .

طلع من الديوانية وإخوته وجوههم نگلبت من سمعوا
الكلام ومثل لصاروا يربطون احداث براسهم ويتهامسون
دخل بيده اوراق وسلمها لشيخ فؤاد وصاح على اخوانه
وهوَ منطيهم ظهره وعيونه بعين شيخ فؤاد
_ اسعد حمزه الحجيه تريدكم بساعكم .

بمجرد ما طلعوا ابوي گال
_ العقد صار شهر بس والبت صار ست اسهر عندك .
نوح : البنية اشتريتها اهلي مايعرفون وسترتها
بروحي وعلى طول لست اشهر الشاهد الله وروح
ابوي الغالي ما مسيتها ولا قللت منها وكل العشيرة
تعرفها مرتي لا تخربون صورتها وكل اللي بنيته .

طبگ ابوي الورق وسأل
_ ليش ما تزوجتها من البداية .
_ اخذتها من لزمت جعفر بتهمة مشبوهه
حلفت هي بريئة ومجبوره ونيتي وياها جانت
تخدمنا ما نويتها تصير زوجتي من عرفتها
بت ناس وشريفة تاج تنحط على راس تزوجتها .

شيخ فؤاد : البنية هسة وينها .
_ موجودة معززه مكرمه عايشة هنا .
اية : اني اختها والله اختها انتَ شايفتي خليني اشوفها .
لزمها خالي فؤاد ورجع العقد بيد نوح
_ صيح البنية .
_ تعذرني والله ما تدخل حرمتي بوسط ديوان
زلم تدخل اختها تشوفها اي سهلة .

شيخ فؤاد : بمثابة ابوها وهذول اخوتها
گلوبنا نار على بنية يتيمات وتعذبن صيحها
بوية بس احاجيها وبوجودك .
رفض ومايقتنع كلنا نحجي وياه بالنص ساعة
وفاتت امه حرمة جبيرة سلمت ودخلت وراها بنية لابسة
عباية راس ، ونوح عيونه نطت ما راضي ابد وجهه غضب
نزلنا راسنا كلنا الولد من ركضت على اية واية راحت عليها حضنتها تبوس براسها وصوت البجي مسموع .

لزمت ايلين وجهه اية تطمئن عليها
ايلين : شلونچ يا گلبي اسفة عفتچ وحدچ هناك
سودة عليه يا نظر عيني ايو شلونج نار گلبي عليچ
والله بس ادعيلچ ما جان بيدي شي غير ادعي تخلصين .

شبگتها اية تعاتبها
_ مو گلتي ما اطول واجي اخذچ ليش عفتيني .
ايلين : ماجنت اگدر والقران حاولت وما گدرت اجي .
عرفنا السبب بدون ما تحجي واضح نوح شگد
معقد من هاي الناحية ومايقبل احد يطلع

لزمها من متونها واشر على باب
نوح : اخذي اختچ وفوتي يلة .
لزمتها من ايدها تريد تاخذها وشيخ فؤاد صاح
_ السلام عليكم بوية ايلين .
وگفت ودارت وجهه تباوع بزعل وعتب
_ هلا .
_ حقچ والله زعلانه الشاهد الله ما جنت اعرف
بحالتچ وحال اختچ دوم عمامكم يگولون مرتاحات
ويه خالتهن عايشات وما عليهن شي .
ايلين : عادي عرفت ما عرفتوا بالحالتين
انتوا مو گد الأمانة والدليل موت ايليا ظلم .

وگف نوح بوجهه ورفع اصبعه صاح
_ اشششش ..
اعترضت على سكوت وصاحت وعيونها على تراث
ايلين : مو گدها ابنك يحافظ على اختي ، مو بس
اخوية يتحمل موتها لو اختي مرتاحة بحياتها
وياكم ما چان عافت بيتكم وطلعت ويه اخوي وموتها .

بجت منهارة متذكره
ايلين : حوبة اختي ما تتعدى كون كلمن عذبها
وتعبها واحنا يتيمات محد رحم بحالنا ولا صان
الأمانة بينا ناخيه ابو فاضل يسطر كل واحد دمرها ودمرنا .

فتح الباب طلعها نوح وابة فاتت وياها
طبگ الباب ورجع طلع امه ويصيح
_ نفسسس بعد ما اريد اسمعععع كاااافي .
فؤاد : والله حقها اي والله حقها الله يلوم كلمن يلومها .
نزل تراث راسه ضاغط عليه بأثنين اديناته
ونوح گعد واخوته فاتوا وياه وبحيل صدر كمل
نوح : صار عدكم معلوم زواجي منها
شرع وقانون وزوجتي اريدها ما ابدلها بكنوز الدنيا
واخو من مكانه صاح
اسعد : هي ام البيت هنا صارت .

فؤاد : ادري ضغطت عليك بس اخر طلب اطلبه
اذا تقبل افوت بس احجي وياها كم كلمة واسمع
منها مرتاحة هنا حتى اگدر ارتاح ، ما رفض بكل
احترام بلغهم واخذه وفات وياه ، اقتربت من تراث
لزمت راسه وبصوت خافت حاجيته
_ بيك شي ؟

مارد ولا بأي كلمة ، واسمع ابوي يحجي وياها
_ بوية بكلمة منچ هسة اخذچ .
نوح واگف بالباب عيونه عليها ما اشوفها انا
بس هوَ قلق ويمسح براسه عرگان يخاف تروح
ايلين : ماروح اني مرتاحة هنا.
شيخ فؤاد : نوح شلونه وياچ ؟
ايلين : احسن من اخوية سند وصار اهل زلمة
متربي وخاف الله بيه ومن شفته لليوم ما رفع صوته عليه .
_ معناتها مستقره حياتچ .
_ الف الحمدلله.
_ ما تريدين تجين ويانا .
نوح : شيخنا ما تجي وما اخليها تطلع من بيتي
صدك لا تحاول بعد واريدك تعرف هي بيت زلمة
يفداها بروحه لو احتاجت صدك وآمن بالله هي بأمان .

عافهم ابوي وطبطب على ظهر نوح وصاح
شيخ فؤاد : دامها بخير يلة بوية نتوكل .
نوح : لا وعلي ما تطلعون من البيت اذا
ما تتغدون يمنا وترتاحون لباجر روحوا للبصرة .

ابوي ماقبل وهوَ طبك الباب وصاح
نوح : محسوبين اهل المره ودخلتوا بيتي واخليكم
تطلعون بلا ضيافه افاا مو من شيم اهل الناصرية .

شيخ فؤاد : قابل جاي اجربكم اعرفنكم اهل كرم
متعني اشوف بنتي والحمدلله بلغتني هي بخير .
نوح : ما طول اجيت تشوفها اتفضل
ارجع اكعد شيخ وراح اخلي بنتك تجهز غداكم .

رجع الشيخ وفات للبيت نسمع بصوته يبلغها
تجهز تراث وگف على حيله واشر لأخو جعفر
_ بلا امر عليك سويلي طريق اطلع .
لزمت ايده امنعه سحبها وطلع معترض راح
ورحت وياها ماقبل يحجي ولا انتظر احد اجر سيارة
واختفى اخابرة مايجاوب رجعت بلغت ابوي ما يگدر
يحجي عيب من العالم واخوان نوح يسولفون الحد
ما دخل ودزهم اثنينهم واجه گعد ويانا تفكيرنا كله
بتراث بس عيب نگطع سالفته .

مد السفرة من رجعوا اخوانا جايبين الكباب من برا
وطبخ بيتهم وما گدرت اگعد گلبي نار وشيخ فؤاد
محرج من نوح اخابر على تراث تلفونه نغلق
بس كملنا ندك الباب نهض نوح وصاح
_ اجيت عيوني.

اخذ الجاي من ايلين وزعه علينا يحجي
نوح : انا جبير اخواني عندي هل اثنين متزوجين
ابوية عنده قاعدة اذا تزوجت اطلع بيت وحدك
من تزوجوا ساعدهم واستقروا بقيت بس اني وياه
والوالده وقبل سنتين خسرت ابوي وبقيت بس اني
والحجية بالبيت والبيت فرغ علينا من اجت زوجتي
ردت الروح للبيت وامي تعودت عليها .

شيخ فؤاد : ما تخلينا ناخذها فد يومين
هم تشبع من اختها وهم تزور اختها ؟
نوح : قبل شهر اخذتها شافت اختها واهلها كلهم
من زرت ابوي وهي حالها من حالي كل ما اروح على
ابوي هي تروح على اهلها ما اقبل احد ياخذ زوجتي غيري
واذا على روحه وياكم بلغتك الحجية متعلمه عليها وتريد
الصدك ما نكدّر والله ننطيها هي بعد ام البيت اعذرني .

وغير الموضوع على دوامه حتى ما ناخذها
ما يريدها تطلع ابد ورجع وعلى جعفر وهوَ
يعرف بالسجن واخوانه جعفر واصلين
خبثاء غدارين ظل يحذر بينه منهم وختمها
_ امانة الله اي شي تحتاجون انا بالخدمة .
شيخ فؤاد : والله يا بوية يعجز السان على وصفك
واخلاقك وتربيتك من الف نور ورحمة على ذاك الأب الطيب .

وگفنا وهوَ يتشكر من ابوي سلمنا وصاح على اية
وگفت ايلين وره الباب وصاحته راح دقايق ورجع
نوح : شيخ اطلب منك اول طلب .
_ اي گول .
_ تبقي اية هنا اختها تريدها خطية .
_ مسؤولية ابني عليك ما نكدر اعذرني .
ظل يحاول ويانا رفض ابوي لان عنده اخوان وغريب .

طلعت اية عيونها من البجي مورمات اخذناها
وصعدنا سياراتنا قبل لا نحرك صاح نوح
_ شيخ بس رقم تلفونك انتَ واخوي وارث اخاف احتاجكم .
اخذ ارقامنا وحركنا سياراتنا منهم ورجعت اخابر على
تراث ماكو اي رد من عنده ، ابو يسب بي ورجع سأل
_ اية بوية اخاف من طلعت اختچ حجت نوح مايقبل
وتصير بينهم مشاكل عيب ؟
_ هو زعل بس هي حجت وياه وعادي تصالحوا
بالعكس حتى گال فترة ويجيبها تشوفني .
شيخ فواد: وردة هل زلمة شني من تربية واخلاق .
وارث : اي والله معدل .

رجعنا على بصره وهذا ماكو خبر منا والتعب
كسر اعظامنا ما صدگت افوت للبيت مالتهم
سبحت وفاطمة جهزت ملابس من تراث لبست
ونمت على تخم بين ما جهزوا اكل اكلت ورجعت
غفيت بوسط حلمي واسمع صياح ابوي فؤاد
شيخ فؤاد : شااارب ولككك ترررراث تشرب
من طرگاعة على راسك وراس ابوووووك .

ذبيت البطانية مني وطلعت اركض على صوتهم
اني واخوته وشوفه گاعد بالگاع بنص الگراج
وجهه يخوف شارب الى ان مطفي على اخير
وبعده يضرب على وجهه وملابسه ابو من
الضرب مشگگها وهوَ منهاااار
_ مو زلمة موتني بوية اكتلني استاهل اموت
شربت وطلعت من الطريق وراح ادمن مخدرات
وكلشي اسوي حتى امووت اريد اموت ما استاهل اعيش .

لزمه سحبه قريب من المغسله يغسل بوجهه
نگعه تنگع بالماي ويرجف عليه مقهور من حالته
شيخ فؤاد : ليش هيج تسوي بروحك والك تعبتني .
ضرب راسه بالحايط ضربه وره الثانية يصرخ
تراث : ايلياااا يابه ايليااااا تعبتني .
اجت فاطمة گعدت يمه تمسح بوجهه
_ لا تعذبها صلي الها مثلي واقرا قران اهدي الها
حتى يرتاح گلبك اذا تبقه هيچ تعذبها وتعذب روحك .

هز راسه معترض وصاح
تراث : هي زعلانة مني تكرهني لو ما تكرهني ماتروح مني
تريدني اتعذب اتوسل عمه كل يوميه اتعب اتوسل
بس تجيني بحلم عمه حلممم تمرررني بي تگلي
سامحتني اني نذل وياها سامحنني ، اريد اعرف مرتاحة
هسة هي شلونهااا ادفع عمري كله بس اعرف شلونهاااا
ايلياااتي شلونهااا عمههه زينة هي زينة ..

وارث : صدك احسن منك هي برحمة الله وماتت مظلومة
انتَ هسة شگاعد تسوي تشرررب كل عقلك تشررب .
رجع راسه على حايط تعبان
_ اريد انساها وانام مرتاح شربت وزادت
براسي يابه وينك ياااااابه وووينكككك .
عصر شيخ فؤاد عيونه وجاوبه يمسح بعيونه
_ هناك ولك بوية شلعت گلبي .
_ اريد ايليااااا اكتلني شربت يابه مو ما تقبل نشرب
جگاير يمك وتضربنا هسة انا شربت موتني اكتلني
استاهل ما حويتها يابه شفت نووووح زلمة هذا زلمة
حبها محترمها محتويهااا اناااا تعبتهاااا عذبتهااا
الله لا يوفقني كون الله ياخذني ويعذبني عذبتها
سودة عليه ايليااااااااتي سودة بوجهي تعبتچ .

درت وجهي على صوت نحيب اية ورجعت
بعدت نظراتي منها شفتها تبجي وتباع من بعيد
رحت عليه جريته اني واسمر غصب من ايده دخلنا
على استقبال نومته بفراشي وفاطمة تمسح على راسه
فاطمة : نام تراث كافي نام ابوك لا يموت .
_ واحلم بيها ؟
_ اي تحلم بس نام .
_ شلون سامحتيني وعافتج من ورايه .
فاطمة : لا ربي انطاني بنية وماتت محروگة هي واختك
واخذها وهي صغيرة ، وايليا ظنيتها عوض وهم اخذها
الله ينطي وياخذ والحمدلله على كل حال لا اعتراض .

بست راس فاطمة من بجت وادري بيها ما نستها
ومحتفظة بملابسها لليوم وكل ما تاكل تغص بالأكل
وتاخذ حصتها تحلف بأسمر ينطيها لفقير ويقرأ الفاتحة
على روحها ، خلت راسها عليه تبجي محروك گلبها على
تراث وحالته تبجي العدو كل شهگه يشهگها تكسر الخاطر .

بعده ما نايم وگعد يعصر بگلبه يبجي
يتذكر المواقف وضميره يأنب بي ويصرخ
_ من تزعل مني ما اصالحهااا امداني
سودة علية من تسوي اكل تگلي هاك اكل
مسويتلك حصه وحدك مداريتك ومن انام
تخاف افزز اخخخخخ شتذكر ناااااار بووية
ناااار اكلتني اكل خلووهاا تعوووفني اريد امووووت .

اخذته للحمام اني وكريم واسمر يجهز بملابسه
اغسل براسه خليته يسبح وبدل انشف بي
ويون من التعب والتفكير وجهه من كثر ما يضرب
بنفسه ضرب قوي يورم يصير ازرگ ، خليته على
فراش بقيت قريب منه الى ان نام ورحت على فاطمة
لگيتها مخليه راسها على مخده وتبجي
وارث : فطومة تبجي اروحن فدوة لدموعچ .
فاطمة : نام تراث ؟
_ اي ، شبيچ تبچين ؟
_ تذكرت بنيتي هي وبت فؤاد شلون ماتن
الله ينطي وياخذ مو اگول لو بذاك اليوم ما عايفيهن
نايمات بالغرفة والصوبة مشتغله وصاعدين نغسل
الزوالي بالسطح چان ما احترگن وماتن اثنينهن
بس حرام هذا قدرهن ، وايليا فكرتها عوض الله بعد
خسارة بنيتي وهم اخذها والحمدلله ما اعترض ابد .

مسحت عيونها وجاوبتها
_ انتِ مؤمنة وهذا قدرهن ويومهن اريدچ تصيرين
زينة وارجعي فاطمة اللي نعرفها كلنا وساعدي
هذا تراث يكمل لا يموت وننفجع بي .
انفتح الباب دخلت اية اشرت على فراش
اية : خالة عادي انام هنا بالغرفة هناك صوت و..
فاطمة : لالا ما تنامين هنا روحي بغرفة ام تراث
لو تصعدين فوك بغرفة اختچ القديمة لا تجين يمي .

طبگت الباب البنية وراحت وگفت على حيلي
وارث : ليش هيچ تعامليهاا خالة شسالفة .
فاطمة : مابيه احبنها وتموت ويتلوع گلبي
بعد حيل ما عندي خليها بعيده يمه انت من
احب من گلبي يمووت .
فتحت الباب شفتها گاعدة تعبانة ونعسانة
بالمطبخ ، دنگت راسي وطلعت على ابوي فؤاد
لگيته گاعد على تخم مقابيل تراث
وارث : بوية هاي البنية عيب ماعدها مكان
فرغ الها غرفة تاخذ راحتها بيها البيت كله ولد .

راح عليها اسمعها ما تقبل تبقه بغرفة ايليا
تعرفها غرفة تراث ، اخذها فوتها على فاطمة
وبقيت گاعد الوقت متأخر خابرت على امي
ومشيت بالگراج من جاوبتني سلمت عليها
واسمع صوت سجاد يمها بهذا الوقت
_ هذا سجاد عندچ ؟
_ اي نايمين بغرفتي هوَ وامه .
_ ليش ؟
_ ماتعرفله وحدها مُـرجانـة .
_ نايمة لو كاعدة ؟
_ هاچ نحلته يريدچ سمع موجودة فصل .

شغلت جگارة اول ما جاوبتني
_ الو .
_ الوات الو منا لباجر .
_ احم انتَ وين .
_ بالمستشفى .
_ ها شسوي عود بالمستشفى مو گلت تروح للناصرية .
_ متخربط بكثر ما مشتاقلچ الخبيثة .
_ ظل متخربط مع السلامة .
_ لااا لاا تعالي اشاقة بالبصرة اني وباجر الصبح يمج .

ضحكت وكملت كلامي
_ شعندچ تنامين جوه .
_ نومي ثگيل واخاف انام وسجوديات يگعد وما اسمعه.
_ اي مثل من خطفتچ نايمة واني صرت مربي
اغسل وابدل واشربه حليب وهي نايمة والله مخطوفة .
_ ابو المستشفيات مجبور تخطفني ؟
_ اريدچ ولچ اريدچ.

سمعتها تمشي طلعت من الغرفة وهمست
_ عود شنو قصدك مساع تگول مستشفى ؟
_ اتاكد تغارين ؟
_ اغار من المستشفى؟
_ اي .
_ لا ما اغار المهم عود من تجي جيبلي
حلويات حصار عندي الله يذكر رائد ابن عمو مقتدر
بالخير چان باليوم اربع مرات يشتريلي حلويات
يعرفني عايشة عليهن ما اكل ، هسة لو تلفوني يمي
اخابره اخلي يجيب حلوياتي المفضلة هوَ حفظهن .

شمرت الجگارة وصرخت بيها
_ مررررررجانة .
_ ها وارث .
_ تخبلتي تريدين تنسحلين .
_ ليش .
_ شنو قصدج تذكرين الچلب ابن الچلب رائد .
_ نفس قصدك من ذكرت المستشفى.
_ بعد لا تعيديها .
_ اسلوبك يتحكم .

والله ونگلب السحر على الساحر انسحب
وارث : سهلة اني اعلمچ على اسلوبي بس خلي ارجع .
_ هلا بيك البيت بيتك .
_ اخ احترك گلبي .
_ خدره مارس تخصصك .
_ ميصير اطبق تخصصي على روحي
اعرف بس اطبقه على مقابل راح اطبقه عليچ بكثره .

طبگت الخط بوجهي ابتسمت ودخلت لگيت
ابوي گاعد اشر على تراث
_ هذا يظل هيچ انوب لا يروح يصير مدمن.
_ اخذه يمي اشغله بالأراضي اخلي يلتهي .
_ وهاي البنية ؟
_ حجيت وياه رافض يتزوجها ومايقبل تتزوج احد
لأن البنية ما قابلة تتزوج ايد رافضه هل فكرة
وگال اذا ابوية يفتح الموضوع اسوي مشكلة
لا تضغط عليه ولا على بنية عوفه براحته والبنية
بقيها عندك اعتبرها بنتك اكسب بيها اجر .
_ البيت كله زلم وارث شبيك شلون تظل هيچ ؟
_ چا نجبرها خليها على الله وخلي الأيام تمشي
وتراث يصير زينة والبنية تشوف دربها والله كريم تنحل .

انتظرت الفجر يجي ردت اخذ تراث واية ما قبل ابوي
ركبت السيارة سلمت ورجعت للغربية وصلت للبيت
تعبان والولد مخلين غداهم بالحديقة يريدون ياكلون
فتح سَــهم الباب يركض نزلت بالشارع
وارث : معمرين نرگيله واكل ومرتاحين تعال لك
فووتهاا للسيارة رجلي بعد ما احس بيها من التعب .

غسلت ايدي وجهي بالمغسلة البرا ورحت على
كعده الخارجية مسويها فارشين دواشك ومخاد
جريت النركيله اخذت نفس وهمام عدل الفحمات
وامي طلعت ترحب بقت عيني على باب
وارث : مُـرجانـة وسجاد وينهم.
همام : اجه شيخ ضـلـيل وراحت وياه .

غـاليـة ...

دخل السيارة لوسط الگراج نزلت والهوا البارد يطير عباتي
فتحت الباب الخلفي وشلت عباية امي حتى تنزل
وفارس شايله ضـلـيل يلجر بلحيته يهمسله
_ بابا بابا .
_ يا تاج راس ابوك .

وفر عيونه على امي يرحب
_ هلا بالغالية نورت الغربية وعرة جلالته .
_ منوره بيك شيخ تعبتك ويايه خجلانه منك
خليتكم تجوني تاخذوني اعذرني .
_ خادم يمه اتفضلي البيت بيتچ .

نور عيوني التعب والعمر بين عليها تمشي وتفحط
دخلتها للبيت وكوثر من الباب ترحب بيها صار
الها كم يوم وجهه مگلوب من يوم ما مُـرجانـة تعاركت
ويه نبراس شاده وجهه بحديد من طلعنا هل يومين
ذاب الثلج وحست ، گعدت امي يمها ذبيت عبايتها
وعدلت شالها مزعتها جواريبها ونقش نزلت تركض
تبوس براسها وشاهين نزل وراها هوَ يسلم وراحت
على مطبخ من عمها صاح على ماي جابت النا توزع
فتحت الشال بي بقيته على راسي وقبل لا اروح
للغرفة رخت للمطبخ لگيت نقش مخبوصه
غـاليـة : مجهزه الأكل ؟
نقش : ها شسمه بس التمن بعد يتهدر دقايق .
_ مو خابرنا قبل ساعة وتدرين راح نوصل عمچ جوعان !
_ يمه غير هذا شاهين رجع من الدوام .
_ اخ منچ تنسى نفسهااا من يرجع .

طلعت من الحمام وشاهين گاعد بصف عمه
وفارس بيده وضليل گاعد على نفس كرسيه
شاهين : شدعوة عمتي شدعوة تاخذين
دور العمه والجنه على حرمتي .
غـاليـة : خلي البنية تشتغل شاهين .
ضـلـيل : هساع ادفره اخلي يبطل من ختلاته .
شاهين : عمي شبلاكم علينا عحل غير زلمتها
انا وجنت بالواجب واليوم رديت شصار عليكم
اكلتونا بگشورنا شدعواكم مو خوش نسابه .

اخذت فارس ودخلت للغرفة اضحك اخذت ملابس
سبحت فارس بدل ورحت وسبحت امشي وقت بين
ما تكمل نقش حتى ما يحجون لميت شعري ولبست
الشال طبگت الباب لگيت مقتدر ورائد گاعدين
ضـلـيل من شافني رفع حاجبة وابتسم
_ شلونك ابو رائد .
_ هلا بأم فارس .
وگفت بصف ضـلـيل ومقتدر والباقين يسولفون ويه
امي ضـلـيل استدار شوية يباع عليه
_ جوعان .
_ عطرچ طيب .
_ ههههههه شيخهم تاج راسهم استقر .
_ بت ذياب عدليها لا اغرد مواويل .
_ شيخي تاج الراس استقر .
_ ليش مو تاج راسچ .
_ شوية صعبة .
_ افاااااا شيخة افاااا .
_ هههههه احبك .

دار وجهه لازم عيونه يفرك بيها مبتسم واني ابتسمت
عفته ورحت للمطبخ لگيت عزيزة تساعد بنقش
عزيزة : الحمدلله على سلامتكم .
_ الله يسلمچ بشري شلون صرتي .
_ لا الحمدلله .
فتحت الجدوره اقتربت مني تحتجيني وعينها على ضـلـيل
_ غـاليـة حجيتي ويه ضـلـيل على موضوعي ؟
_ بالطريق ما گدرت خفت منه يصير عصبي ويرجعني
ووبالرجعه امي ويانه تعرفين مايحب احجي واحد
موجود يستلمني شلچ غرض وياهو مالتچ
خلي ياكل ويفوت للغرفة يرتاح واحجي وياه .
_ بعد انتِ اعرف بي بس لا تنسين حبابه .

گرصت خدها وهمست
_ هههههه لا ما انسى الظاهر حبيب گلبچ يلح .
_ اكل راسي كل يوميه يگول راح اجي بس اني
اريد اخذ موافقة يعني اجس النبض قبل جيتهم .
_ خليها عليه بعد گلبي لا تشيلين هم حتى لو
رفض اقنعه ما دامچ راضية ومقتنعه محد يدخل .

صحت على ننوس عافت مگابله ضـلـيل وگاعدة
تحش وتفتن وهوَ يضحك على سوالفها تشكي
من نقش لأن عافتها وصعدت بغرفتها وبقت بس عزيزه
يمها وابوها يرزل بشاهين وشاهين يشي بيها ويشمرها
عالي وهي جبانه تغير اقوالها بسرعة وتختل بحضن ابوها .

اجتني تركض اخذت السفره من ايدي وشمرتها على
شاهين ورائد وهمه يسولفون وتضحك من كل گلبها
مستنده على رجل ابوها لأن لازمين وجهم من الضربة
رفعت وجهه على ابوها فحطان مو الضحك
_ ضربتهم .
_ انعلي خيرهم ههههههه .
شالها من الگاع خلاها على رجله وشاهين تحلف الها .

فرشوا السفرة وصبيت ونقش وعزيزة يرتبن
شلت اخر شي الخبز ورحت بمكاني بصف ضـلـيل
تعودت اگعد ما اغير مكاني وامي گعدتها بصفي
درت عليها اوكلها تستحي وماتحجي ابد
اكلت وركزت على ضـلـيل اكل شبع وراح للغرفة
اسمع بس صوت الماي عرفته يسبح ، رحت خدرت
الجاي وزعته على كل وبس كملت امي اخذتها فوتتها
بالغرفة الجوه الصغيرة جانت كاعدة بيها مُـرجانـة
معدله الچرباية مالتها والكنتور فرغته الها
ام غـاليـة : راح ابقه عندج بس كل شهر ارد البيتي هناك
اظل فد اسبوع وعند هم ارجع يمچ لان اموت اذا اترك بيتي .
_ اوف على ذاك البيت گطع گلبچ .
_ بي ذكريات حلوة بي ريحة احبابنا .

حضنتها قوي امسح عيونها من ذكرت احبابها بجي
_ يمه والله اخاف اعوفچ وحدچ باقية على نار
ماعندچ غير اخوتچ هناك وكل كم يوم عود يجون
يشوفون حالچ باقية معتمده عليهم ليش ابقي هنا
بيت بنتچ معززه مكرمه بعيني اخليچ فدوة يمه
بعد لا تعوفيني والله تخليني بوسط النار .

كعدت على جرباية وجاوبتني
_ بيتي ومكاني وحياتي شلون اعوفهن .
_ اخذج البغداد والله بس اهم شي تبقين يمي
ادير بالي عليچ وباجر اخذج دكتور حتى ارتاح
بعد نظام اكل وعلاج كله جدول باقية انتِ هناك واني
حال الضيم حالي عليچ هنا والله قلقه عايشة واهوجس
اذا ما تجاوبين اخاف صار بيها شي وحدها بالبيت .

طلعت دزدانها تشوف فلوسها وخلتهن جوه المخده
نومتها وطفيت الأضاءة عليها اول ما شافتني كوثر
صاحت : غالية تعاي .
رحت عليها لو بيدي ما احاجيها على مسبات والصياح
مالتها على زعل بتها ، واني لازم اسكت حتى لو بتها
تذب سم على مرجانة ، وگفت بعتبة الباب اسمعها
كوثر : حجيتي ويه ضليل .
_ هذاك هوَ ماتروحين تحاجي .
_ حجيت وياه وصار عصبي مايريده .
_ اي قنعي .
_ قنعي انتِ مثل ما قنعتي بالمنبوذ نسيبچ .
_ يا منبوذ عمي هذا حجي لسان تعرفونه
انتِ صيت وسمعه مثل الفل ريت كل نسيب مثل نسيبي .

ورحت على غرفتي لگيت ننوس گاعدة على جرباية
بصف ابوها توه سابح ومتجهز حتى ينام تعبان
ذبيت شالي واخذت الكريم من الميز ورحت گعدت
بصفه اخذت ايده ناشفه من البرد متشگگه من كثر
ما يستخدم الماي وبرد
_ تعبان گلبي .
_ انتِ مرتاحة ؟
_ آي والله هسة من اجت يمي ارتاحيت .
_ عجل انا هم مرتاح ، اهم شي شيخة گلبي راضية .
_ الله يطول عمرك ومايحرمني منك تاج راسي .

رفع عيونه بغرور فرحان مسحت الكريم على ايده
امسح بيها وهوَ غمض براحه وننوس طفرت من
الچرباية طلعت ماتعرف تثبت بمكان واحد
غـاليـة : قبل لا تنام گلبي عندي موضوع وياك .
_ عفية مواضيع ماتخلص عندچ يا بنت ذياب .
_ هي هاي حياة الشيخة يوصوها ولازم تبلغ الشيخ .
_ قنعتيني .
_ هههههههه فدوة شيخهم قنوع .

سديت المرطب وخليته على ميز واقتربت عليه اكثر
_ سمعت عزيزة خاطبيها منك .
_ اي .
_ ورافض ؟
_ اي
_ ليش ؟
_ مالچ غرض .

بست خده ورفعت رجلي لميتها على چرباية
_ ميصير ترفض من يمك يمكن عزيزة راضية .
_ ياهو مالتچ غـاليـة بكيفي .
_ شيخهم اني اگول لو تبلغ اختك يمكن تريده.
_ عزيزة فقيرة ماتسلك ويه العگارب أقاربنا احنا
ما ننجرع واحدنا لسانه متبري منه لا تدخلين بعد .

وگفت رحت رجعت الحريم من شفت عناده
صار الهم بالشهرين يتوسلون قافل ما ظلت
محاولة ما سووها بزعت رواحتهم العالم
رحت على كنتور جريت ملابس النوم حتى
اگدر انام براحه بعدهن بيدي وذبيت كلامي
_ شيخ ترا عزيزة رايدته ومقتنعه بي وهذا رفضك
ماله داعي تمنع اثنين واحد يريد الثاني شكو ؟
_ منو گال تريده !
_ كلها تدري عزيزة تريد ابن خالها وابن خالها
يريدها انتَ شلك غرض توگف بوجهه نصيبها .

تخبل من عرف عزيزه هم تريده يريد يطلع
اعترضت طريقة قفلت الباب وخليت المفتاح بصدري
_ ارجع ضـلـيل .
_ فكي الباب لا اكسره على روسكم انتَ وياهم .
_ ضـلـيل مو اتفقنا التفاهم احسن من العصبية .
ولا يتفاهم بعد دفعني يعت باليده طلعت المفتاح
فتحه وطلع مستعجل صعد فوك وامه تدفع بيه
ما تكدر تصعد رفعت دشداشتي وركضت وراه
غـاليـة : ضـلـيل موو احجي وياااك استغفر الله .

دفع باب غرفة عزيزة وگف فوك راسها على چرباية
ضـلـيل : صدك هذا اللي سمعته ،
_ شـ .. شنـ..شنو سـ... معت .
_ تريدين عمار ؟ ابن خالچ هذا الخايس ابو لسان
وين تكدرين عليهم وعلى لساناتهم وانتِ لو واحد
صاح يمچ تصيبچ حالة نفسية واكتئاب.
_ لالا وين اريده ولا اريده ضـلـيل شسوي بي .

اشر بيده عليها وعينه عليه صاح
_ سمعتي لو ما سمعتي الموضوع ينقفل قفل
ومفتاح القفل ينشمرررر بنهرر زين لو مو زين ؟
يريد يطلع وگفت مقابيله وذبيت كلامي
غـاليـة : وگفت فوك راسها مثل ملك الموت
اكيد تگول ما تريده غير تخاف ، بس هذا المتوقع
شيخ ال صليل وين يعرف يكعد وبالتفاهم يحل
شغله اذا مو صراخ والبيت ينهجم ما مقبول .

فريت ايدي وطلعت وهوَ عيونه نطت وحاجبه
تشنج بكثر ما رفعه مايقبل بكلامي ، شاهين
طلع من غرفته يفرك بعينه
شاهين : شصاير هنا خير ؟
_ اسأل عمك الحباب المتفهم هوَ يجاوب .
ضـلـيل : التفاهم عفته الچ العرررمة بنت ذيااااب
خل ادحگ لو اسمع بعد تدخلين واعلمچ شسوي .

بقبت استفزه كفيت ردن دشداشتي خزرته ونزلت ادردم
كوثر : شلون بي انوب هذاك لا يسوي وياه مشكله .
غـاليـة : حيري بي هذا ما يتقارش .
مانزل وظل فوك وبقيت بقلق على بنية لا يمد ايده
عليها ويعرف عنده تواصل وياها ، خابرت على نقش
من جاوبتني ركض عطت بيها
_ يمه نقوشه گلبي تسمعي على صوته
اخاف يضرب عمتچ خطية .

راحت تتسمع وهمست
_ يمه واكفين هوَ وشاهين يمها يحجي وياها
بس ما ضربها ولا يصيح بس يسمع منها
طلع يمه نزززل نززل ، طبگت الخط وطلعت من غرفتي
وگف مقابيل امه وصاح
_ ما راضي بي هذا ابن اخوج بس لان عزيزة
عزيزه على گلبي وهي موافقة ما اوگف باب قسمتها .

كوثر : معناتها قبلت .
_ امرري لله اي قابل .
راحت عليه بوسته من خده وراسه هوَ عاف البيت وطلع
مايريد يرجع حتى خاف تصير مشكلة ، جريت التلفون
وكتبت برسالة
" شيخهم ارجع نام انتَ رجال شايب مو زين عليك
ما ترتاح يروح وضعك الصحي يتدهور ونديح .

اقل العشر دقايق وفات على غرفة خشمه عالي
غـاليـة : اشرب علاج شيخهم مال ضغط .
_ مالچ غرض .
_ اخاف عليك .
_ اممم العرمة .
_ ههههههه شيخهم والله اضيع بدونك .
_ تضيعين بلد بحاله وما تضيعين .
_ لا اضيع اضيع .
_ عينچ گويه .
_ بيك يا بعد عيني شيخهم .
_ شلون تخليني اسلمهااا تراب على گولت امي .
_ ههههههه جعل محد يسلمها تراب غيرك شيخهم .

اجه بصفي نام مد ايده اخذني بحضنه يشم
بشعري وحاضني يرجع بشعري وره اذني
_ كون زعلتي ؟
_ بالعكس مو مهمه البدايات المهم كلام منو يمشي بالأخير .
_ انطمي ونامي راح تبدين تغثيني .
_ شيخهم هاي عليمن .
_ عليَّ وعلى خلفوووني .

نمت بتعب الثاني يوم لگيت كوثر مجمعه بناتها
يتفقن على خطبة وصاحتني تخطط شنو نجهز
اجه ضـلـيل من الديوان صبيت الجاي وكعدنا كلنا
كوثر : نذبح ونطبخ .
غـاليـة : ما اكدر اطبخ وحدي ايدي توجعني
ومن التعب الشقيقة تهج عليه احتاج اخد يساعدني .
كوثر : هسة ازوج ضـلـيل نجيب وحده تعاونچ .

غلس وخاط الجاي يحاجيني وسبحته فارها على ايده
ضـلـيل : اجيب بنگاليه تساعدج .
_ اي والله .
ضـلـيل : اجيب روسيه احسن .
غـاليـة : هاي انتَ واهلك تصير تخدمها .
ضـلـيل : هههههه شلون صاحبي جايب روسيات .
_ شلك بيها .

شرب شوية من الجاي وجاوبني
_ ذاك اليوم عزمني قدمن الاكل والضيافة .
_ شووووووكت هاااي شوو ما تحجي .
_ ذاك اليوم ونظيفات يساعدنچ .
_ اني رايحة البغداد عود جيبهن يساعدنك .

عدل حاجبة حطّ الاستكان على طبلة وگف فر سبحته
وحط التلفون بيده والمفاتيح وصاح
_ ماكو خطبة لا يجي احد .
كوثر : ياااا يااا ول سويتها صدك غير كلنا
نوگف بالمطبخ خواتك وخواتي ونكمل لا مساعده
ولا اجنبيه ولا بغداد من طرگاعة على بغداد .
باوعلي بطرف عينه وجاوبها
_ ونسوان بغداد على هيچ طرگاعة .

رجع للديوان وشاهين نزل راح وياه دخلتا للمطبخ
ولتهيت بالهوسة وامي يمي للعصر اخذنا ضـلـيل
ورحنا على دكتور نظم علاجها واخذت ورقة بوجبات
اكل تفيدها ورجعت على صيدلبة اخذت العلاج
وتسوكت كم شغله نقص ورجعتا للبيت لگيت نقش
كلشي ما مسوية وگاعدة بالمخزن لازمه راسها
_ شبيج ولج منو وياج .
_ روحي لعبانه دايخه مسطوره .

تقربت عليها ساعدتها توكف وهمست
_ اخذج للمستشفى .
فات شاهين مقلص عينه يباع عليها مستغرب
_ ها عيوني .
غـاليـة : انتَ وين شاهين لگيتها وحدها دايخة .
اشر على ديوانية عرفته گاعد هوَ واولاد مقتدر
واجه عليها لزمها من فكها رفع راسها
_ شبلاچ قبل شوية جنتي زينة .
نقش : عندي حرگه بمعدتي دوخه ونعسانه .
شاهين : الله عشقي هاي المضاعفات .
نقش : شنو هاي مضاعفات .
_ يولي مضاعافات الحمل .

مسحت على راسها مبتسمه
نقش : شاهين انتَ وامي عوفوني هوَ اني دوم تصير
ويايه لا تبقون كل شهر تصيحون حامل راح تخلوني
افقد مصداقية الحمل كل شهر وصاح حامل .

شاهين : گلبي يگلي هل مرة صدك حامل.
غـاليـة : واني هم والله واثقه .
شاهين : اختبار حمل سريع .
نقش : ما عوفوني هاي لأن ثگلت بالاكل اليوم .
عافها تحجي وحدها وطلع بالسيارة
اخذتها للصالة گعدت ورحت على غرفة
بدلت ملابسي ومن طلعت شفته راجع
ساحبها من ايدها وبيده علاگه ، جهزت امل امي
اقل الربع ساعة واسمع ضجه صارت فوك صعدت
لگيت شاهين شايل نقش بفتر بيها وهي تضرب
بظهره وتضحك بعلو صوتها لازمه اختبار الحمل
نزلها فرحان اجت تشوفني
_ يمه حامل طلعت هاي خطين شوفي يمه .

فرحتي ما انطيها لبشرة فرحتها ونزلت شاهين
دخل على ديوان يصيح بعالي صوته
_ راح اصير اب عمي اب والله راح اصيررر اب .
نزلت نقش على صوت ضـلـيل مسحت دموعها
وحضنها فرخان بيها يبوس براسها
ضـلـيل : اثنين اعزاز على گلبي راح يجيبون الغالي
مبروك بووية انتِ وياه تستاهلون كل خير .

حضنها شاهين وهي خجلانه اثنينهم متشابهين
بالكلام والأسلوب ومتفهمين من يوم زواجهم لليوم
مرت اشهر ولا يوم سمعت الهم صور لو طلعت مشكله
الهم برا غرفتهم ، ومقابيل الكل بينهم احترام وحب
شاهين يستاهلها رجل بمعنى الكلمة ونقش تستاهل هل عوض .

طلب ضـلـيل بقلاوة وزعل على بيت وعلى بيت مقتدر
وخواته بهالخبر، ومن بعد هل ليلة الكل انشغل بخطوبة
عزيزة واخيراً شفتها بفستان الخطوبة ابيض وجانت
بنفس هدوء نقش خجولة وطيبة وابتسامتها على طول
الخطوبة ما فارقتها ، عقدت وخواتها محاوطاتها
وتمت خطبتها واضح بعيون عمار شگد يحبها ورايدها
دخل لبسها نيشان خطوبتها ما رفع عينه على غيرها
نظراته على حُب حياته ، وايده ما تركت ايدها وبكل
فرصة يحصلها ما يخجل يعبر عن حبه ويبوس ايدها
بكل مرة يبتسم بيها وياها ، ابتسامتها وضحكتها
تخلينا نطمئن عزيزة اخذها الشخص اللي يستاهلها ..

كملت بوقت متأخر امي التهت وتونست ويه
النسوان الكبار منهن خوات واقارب كوثر
وكوثر حبت امي وگعدتها وصارن صديقات
بهذا العمر وحده تفتهم للثانية من بعد عداوة
طولت سنوات الى ان فكت اللعنة من كوثر .

نقش مگابله المطبخ وصواني البقلاوة وتاكل
وشتهين واگف بصفها يضحكون بيناتهم يتهامسون
اول ما خفت الهوسة اخذت صينية گهوة وبقلاوة بالماعون
ودخلت على ديوان لگيت ضـلـيل گاعد يخابر خليت
الصينية وگعدت بصفه لزم اصابيعي يفر بالمحبس
الى ان كمل المكالمه ابتسم
غـاليـة : تريد تبيع المحبس دعوفه .
ضـلـيل : دعفته عيني شصار .
غـاليـة : هم ضحك على لهجتي .
ضـلـيل : عمي غير اللهجة البغدادية تسحر اكبر شارب .

خليت راسي على اكتافه اضحك وصحت
غالية : اويلي .
_ طالعة جلطة .
_ هههههه ضـلـيل .
_ ومحمد ما اتحمل الحلاوة تجلط .
_ انتَ طالع هيبة .
_ احبنچ غـاليـة .
_ احبك يا روح وعمر غـاليـة .

رن تلفونه قطع كلامنه وقره الرسالة
_ عرفت عنوان بيت المستهتر اهل الصدوره المدلع .
_ ومرجانة هم يعني بيته وبيت اهله .
_ اي كل اهله شايفين اخوانه عنده .
_ وشنو راح تسوي .
_ امشي نروح نجيبها من عنده اذا ماتريده .

مُـرجانـة ..

فتحت عيني شفّت الساعة تاخرت وبعدني نايمة
وسجاد يبجي طلعت غسلت بالحمام فرشت اسناني
ورتبت كفشتي صايرة فلم واسمع بصوت وارث
يصيح عرفته رجع البيت نظيف ريحة الغده معبيه
البيت وميمونة واگفه تباع على برا وتضحك
رجعت على سجاد شلته واسمع وارث يصرخ
_ شلون تخليهااا تروح وياه يمه صار اشهر
احاول وياها تالي ما تالي تضيعون تعبي
هذا شلوون عرف العنووووان .

مافهمت واني طالعه عليهم وصار وارث بوجهي
فك عيونه ودار عليهم مهبوط لازم واسه
وارث : هاي عود صدك تحجووون ؟
مُـرجانـة: شنو .
عافني وراح على همام وسهم طفرهم برا ورجع
اخذ سجاد وراح على استقبال فتح الگماد
متربع تك رجل على تخم يلعبه وعذا يريد يبجي.

غسلت الممه مال سجاد وسويتها اخذتها للأستقبال
مُـرجانـة : هاي خلي يشربها .
اخذها من ايدي وجر ايدي وياه وگفني بين رجله
ومثبت حركتي ما يخليني اتزحزح
مُـرجانـة : عوفني عيب لا يجي احد .
_ سلمي عليه .
_ الحمدلله على سلامتك .
_ مشتاقلچ مُـرجانـة .
_ تشتاقلك العافية .

غمض عيونه برغبة وسحبني قوي من ايدي نزلني
وبقبل لا اسحب روحي باس شفايفي بعدت روحي
متأذيه لازمه شفايفي فاكه عيني من الصدمة
_ واررررث !!
_ اقصد هـذا الإشتياق يمتى تحسين ؟

متت بدمي لا يجي احد غفل ويشوفني بهل
خالة وهوَ جر شالي وفتح شعري كلها بثواني
طلعت من الغرفة شردت منه ومن الخجل ركضت فوك
حتى محد يشوف ايدي ورجفتها وتوتري ارفع بشعري
واسمع خطوات ورايه اول ما دخلت الغرفة طبگ الباب
ودخل ارتفع صوت انفاسي من الأرتباك همست
_ وارث .
_ نحلته .
_ وارث نسيت .
_ طماطيته شناسي .
_ ميصير تقترب اوگف مكانك .
_ طني بعد طني احب طناتچ .

انضربت بالحايط لزمته وهمست
_ ما اقبل تقترب مني بأي شكل من الإشكال .
_ الى متى تبقين هاجرة زلمتچ .
_ اليوم الدين .
_ ا ح ب ج ، م ش ت ا ق ل ج .
يضغط على كل حرف ينطق بي فهمني الكلمة اهتز جسمي .

اول ما اجه يمي وگفت ونترت بوجهه
_ كاااااافي تجبرررني واررررث .
ثبت بمكانه خفت حتى أتحرك من كثر ما عصبي
حسيته راح يملخني تملخ سوالي طريق طلعت من
الغرفة لازمة گلبي وامشي اطبش بخطواتي
لگيت ميمونة هي واخوانها ياكلون بالگراج
وام وارث وام همام وياهم وسجاد بحظنها
يلعب بيده ورجله يرافس والشمس عليه
ام وارث دوم تگلي الشمس مفيدة لسجاد بهذا عمره .

رحت بصف ميمونة ما كدرت اكل بس سولفت وياها
وفرت التلفون عليه قريت رسائل بندر طالب منها
يخابرها وهي ما مجاوبة
مُـرجانـة : خابري احسن .
_ ما اكدر تعبانه من عنده ومن اهله هاي الحقيرة
بخباثتها كرهتني بالسادة والشهادة لله همه ماكو
منهم بالطيب والكرم والاحترام بس وحده عمت على كل .

طبگت التلفون وكملت سوالف من كملنا رتبت البيت
اني وياها والثاني يوم اتصلت بينا ملِكه تمل وحدها
وحلمانه حلم مو حلو وتخاف وحدها ومبلغته
تريد تجي تخلص يومها عدنا ولا يقبل بيرغ
من يعاند ويقفل ما ينطاق مثل ما عاند وقفل
على ملِكه ياخذها وسواها واخذها.

بقيت جوه للساعة 11 بليل گعد وارث نزل
ميمونة : نوم العافية گلبي .
ابتسم وفات على غرفة امه دقايق وطلعت للمطبخ
تجهز اكل رحت عليها اساعدها وعفت سجاد بالمطبخ
_ اساعدچ .
_ لا مايقبل تساعديني .
_ ليش عود ؟
_ اندري گال ما اريد مُـرجانـة تلزم اكلي .

عفتها ورحت على غرفة لگيته متمدد يگلب بالتلفون
وگفت قريب منه كتفت ايدي الصدري وهمست
_ شنو قصدك مُـرجانـة ماتلزم اكلي .
_ شلون ما تفهميها فسريها .
_ واررررث .
_ امشي من وجهي يلة .

تركته ورجعت بصف ميمونة خلاني اغلي
اباع على تلفزيون وتفكيري شاطح الى ان كملت
راح على سجاد هوَ نايم يبوس بي من گعد شاله
يخلي بحضنه وجر الصينية ياكل ويضحك وياه
وسجاد بقمة الهدوء يتحرك ويصفن بوجهه ابو .

فات سَــهم غسل وگعد بصفه يحجي على شغل
وشلون ماشي وهمام على كم ورقة وقع وكم عامل
موجود ومبلغ الراتب لكل عامل شكثر ويشوفه
صور الشغل الجديد مالتهم عجبه وضحك
_ انتَ وهمام ماكو منكم وعلي .
_ تعلمت منك جنت ما افتهم بيهن بالبداية .
_ بعد بس كم شغله وتصير توب .
_ وره الزواج اتعلم والله .
_ ليش مو قبل ؟
_ اعذرني تفكيري كله بالمره صاير صار فترة
ما حاجي وياها من اتذكر بودّي اخليكم انتِ
وخلف وربعه بغرفه واصلح بينكم وياهو بيكم
يعاندني اضربة بمكانه اخلي يودع الملاعب .

بعد وارث الصينية ورجع على حايط ساند ظهره
وارث : يمكن بعدك ماتعرف سجنت ضياء وابنه
الچبير ولزمت جـبر عدت تأهيل تربيته من جديد
وعرفت ما ينلام بي بندر من ضربة على بطنه
وخلاه يزوع الزاد والملح لأن مو گد الزاد ولا الملح
وعاملته مثل ما عامله بندر وهسة بعده عنده
ما اهده اذا ما اخبل خلف وانعل خيرهم واطم
شرهم كرزت بي وبولده مشاكل .

صفر وجهه لسهم وبهت
سَــهم : على هذا كلامك بعد شلون اخذها .
وارث : چا انتَ عبالك بالتراضي اخذها الك منهم
هذولي لچلاب لو عرفوا يدفنوها هي عايشة حتى
ما ينطوها ويحرگوو گلبك وگلبهاا .
سَــهم : والحل انا رايدهاا منطيها وعد والله وارث .
وارث : مفاوضه افاوضهم بگعده واخذها منهم
حتى اطلع شياء وابنه وارجع جبر وينطوني ترف لسهم .

امه ما قبلت وميمونه تعجبت ضربت على خدها
ميمونة : عززا تاخذها فصلية ؟
وارث : لا شسالفه هوَ انا اكره هاي التقاليد
مو فصلية بس بحجة ناخذ منكم بنية حتى تنحل
المشكلة وديه ولا تخاف خلف ينطيها الخاطر ضياء .

ام وارث : وهوَ هذا زواج اخوك هيچ تكسر بعرسه .
وارث : يمه وعلي انا ابنچ شبيچ ترجفين عليهم
وترزلين ببه كل ما اسويلي شغله اطلع خبيث .
ام وارث : چا غير انتَ مادري شلون تفكر
تريد تزوج وليدي هذا سهومي بلا عرس .
وارث : وداعت عيونچ اسويله عرس اخلي الغربية
تسولف بي بس خلي يعقد عليها بالبداية
سَــهم : اريده اقوه من عرسك ههههه .
_ من عيني هاي قبل هاي تدلل .

دخل همام ميمونة ركضت حمت باقي الأكل
وخلته هوَ وسهم ياكلون وارث يحجي وياهم
وهمام يگله : رحت شفت بيرغ .
_ شلونه .
_ يگول زين سألني عليك هم .
رفع وارث سجاد باسه وعافه بحضن امه
وارث : اروح انام تعبان وباجر عندي دوام بالمستشفى .

وصل للدرج وصاح
_ عود جهزولي ملابسي ورتبوها مو اگعد الصبح دايخ .
شلت المواعين غسلتها وصعدت اخذت ملابس كويتها
ونسقت الوانها ورتبتهن بالكنتور وحتى الحذاء مسحتها
ونزلت اخذت سجاد صعدته نومته بالغرفة ورحت
اخذت حمام سريع ورجعت بغرفتي انشف بشعري
سحبت اللحاف ونمت على مخده قريب منا فر جسمه
عليه وجر نفس طويل وبصوت ذبلان منتهي صاح
_ احاااا يغربية نداء للبصرة انصهرررنا وعلي .

التفتت عليه وجهي صار مقابيل وجهه وهمست
_ نريد انام طفي النداءات باجر سويهن انتَ وربعك
بعد ما تحتسون القهوة الصباحية نادي بكيفك .
وارث : بعلي من اسويها صدك واخليچ تگمزين .
_ شتسووووووي يا دكتور يا محترررم !
_ نداءات .
_ وارررث .
_ يروح فدوة وارث وعشيرته للحاجب وهل عيون .

سديت شفايفة بيدي وعيني بعيونه وبهدوء همست
مُـرجانـة : اريد انام .
اشر على ايده هزيت راسي بـ لا
_ نام بعيد عني واني بعيده منك ما انام على ايدك .
اشر على كتفه وصدره
_ ما اريدك .
باس كف ايدي ومد ايده على خصري حاوطني
نزلت ايدي من شفايفه حتى ادفع ايده صعب
_ وارث .
_ يحبچ لچ خبيثه .

بعدت جسمي وبقيت اباوع بعيونه وهوَ ما شال
نظراته مني مكتف ايده ونايم صفح الحد ما غفيت
ما راد يجبرني لو يغصبني حتى لا أخذ موقف
ومن النوع وارث تقربه مني لازم برضاة الطرفين
من المستحيل يسويها ويحس او بواحد بالمية رفض مني .

ثاني يوم على صوت بخات العطر صحيت
نظرة عليه مبدل ومتعطر عبالك عنده خطوبة
مو دوام اجه شاف سجاد واجه يمي باس راسي
وظل گاعد مطوقني بيده ويتصفح بالتلفون
اقل الخمس دقايق ونهض من مكانه طبگ الباب وراه وراح .

نزلت قبل ل11نظفنا البيت اني وميمونة وطبخت
رجع سَــهم اخد اكل بالأراضي وسوت ام وارث جدوره
اثنين صغار وصته يوصلهن لبيت بيرغ وملِكه
وضمت حصة وارث من الأكل ، وهل يوم وارث
صار العصر ومارجع للبيت ، ومن نخابر عليه ماكو
طبگته ام وارث الخط وخابرت على جنى جاوبتها
_ يمه وارث وينه .
_ قبل ساعة خلص العمليات وهسة بمكتبه
گاعد يرتاح احتمال ساعة ويطلع ، محتاجة
شي خالة ابلغه تريدين ؟
_ اي فدوة عود بلغي امه تريده .
جنى : هسة اروحله صار .

طبگت الخط والتهيت بسجاد ما ينام خبلني
للمغرب رجع راح سبح وكمل صلاة بغرفة
امه وصعد فوك ، اقل الربع ساعة وفات بيرغ
بيده اوراق اثنين گعد بالأستقبال بعد ما قدمت
جاي وماي گال : وارث وين احتاجه بسرعة .
مُـرجانـة: بالغرفة هسة ركض اصيحه الك .

هرولت بكل سرعتي ماحب اتأخر على بيرغ
الوحيد استحي منه ، فتحت باب غرفتنا
بعدها على خالها لعد هذا وين واح نام ؟
مشيت على حمتم مفتوح وفارغ بس صوت طبات
بغرفة التدريب مالته ومال اخوانه فتحت الباب
لگيته لابس فانيله لون اسود ورابط حزام حديد
على خصره يلزم ظهره بي وشايل ثگل قوي
رفع راسه انتبه عليه اشر براسه شكو وفحطان
من التعب يجر النفس بصعوبة فهيت وجسمي
قشعر ونمل وصار حار وبارد ومغص ببطني
كلهن حسيت بيهن من رفعت ايدي ولساني ثگل
مرجانه : هذا اخوك شسمه نسيت هذا .

ذب الحديد من ايده وصاح من الثگل وبحركه
سريعة مد ايده على دگمه بالحزام فتحه وگع
بالگاع وطلع منه صوت عالي جر المنشفه
يمسح بوجهه ويتقرب عليه سحبني من ايدي
طبگ الباب صرت بينه وبين الحايط وريگي نشف
نزل نفسه عليه طبع بوسه على خدي ونزل راسه
برگبتي باسها اكثر من بوسة ودار وجهه على جهه
الثانية من رگبتي باسها كم بوسة ومد ايده اصابعه
دخلت بشعري ثبت وجهي وهمس
_ منو شسمه ؟

غمضت عيوني بضعف وايدي المو مؤدبه صعدت
تكتشف قوة عضلاته وتتحسسها خطف شفايفي
جسمي صار مثل الريشة طوق خصري بيده وهمس
_ النحلة أستسلمت .

رفعني بين ايده بلا ما اگدر انطق بحرف طلعنا
من غرفة الحديد دخلني غرفتنا وقفل بابها
_ وارث ..
قبل لا اكمل وانطق اي كلمه ما ترك فرصة ابد
تملك كل جسمي ومشاعري وحواسي وهوَ
يقترب مني ويترك اثار حبه ورجعني لأحضان الموروث .

مر الوقت جنت نايمة بس اسمع بصوت ميمونة
تحجي وياه برا الغرفة باوعت عليهم طالع من الحمام
ينشف بشعره ويحاجيها يريد يفور للغرفة رفعت
الغطوه اكثر عليه اغطي بروحي واسمعهم
وارث : وهسة وينه بيرغ راح ؟
_ اي عاف الأوراق بيد همام .
_ تأخر الوكت باجر أشوفهن اريد انام .
_ بيرغ ظن انتَ ما نزلت لأن زعلان .
_ لا جنت نايم ومرجانة ما گعدتني لگيتها نايمة .
فكيت حلگي شكد جذاب مو اجيت عليه وسوالي اغراء .

غمضت اول ما فات اجه يمي باس خدي وهمس
_ كاشفچ گاعده صايرة طماطيه هههه .
_ ماتستحي روح مني روح .
_ اسمعي .
_ اممممم .
_ لا تعوفيني .

فتحت عيوني حضني ورفع جسمي عليه
_ بطلي عناد .
_ اعتذر .
_ مال شنو اعتذر .
_ تتذكر من صرت عليه عصبي بيوم
المشكلة وردت اطلگني واذب ابني و..

سد حلگي بيده وخزرني متعصب
_ لا تذكريني هذا الموضوع بالذات امسحي من راسچ .
_ اسمعني ما زعلانه من هذني ؟
_ چا منين ؟
_ گتلي چلبه بنت الچلب هاي اول مرة تغلط عليه هيچ .
_ اول مرة اغلط واول مرة اصير عصبي وازعل منچ
لهالدرجة ما واصلين لهاي الحالة ابد واخر مرة هم
ما تنعاد بعد لا مني الغلط ولا منچ الصغيرة والچبيرة
تعرفين بيها وانا اعرف الجبيرة والصغيرة وبكل خطوة
تخطيها وتفكرين تخطيها بحياتچ زين ؟.

دنگت راسي العب بأصابعي وهمست
_ اعتذر بالبداية .
_ اعتذر ، تريديها بس كلمة لو افعال .
_ اريد افعال جنتل مان .
_ راح اخليچ تنسين الصار كله وعد زلمة.
حضنته من طوقني بين ايده وهمست
_ وليدي الحباب شكد مشتاقتلك واحبك .
_ احاااااا بوية گلبي احاااااا ..

هل ليلة جانت مميزة بيها اعتاب واشتياق ولهفة
مرت مثل الحلم واحنا نرسم خيوط وطريق مستقبلنا
والفرحة ما فارگتنا ، الثاني يوم اسمعه يتصل يعتذر
مايكدر يداوم واخذ اجازه ، خليت راسي على صدره
ورجعت غفيت ماعرفت شگد مر وقت بس گعدت على
صوت اذان الظهر وتذكرت يجاد بعده عند عمتي وميمونة
نهضت من مكاني وعفته نايم ركضت اخذت حمام ورجعت
بدلت ملابسي ونزلت على عمتي لگيتها تلعب ويه سجاد
وهمام دخل مـن الأستقبال يحجي
_ اجه بندر .
ام وارث : اي خلي يفوت عندي حجي وياه .
_ تصادمت وياه بالكلام وراح .

ميمونة گاعدة على سجادة تصلين لمتها
بلا كلام وراحت بغرفة امها ماحجت
همام : وارث وين اريد اسلمه اوراقه .
_ نايم بعده تريد اگعده ؟
_ اي والله .

رحت على سجاد بوسته وهمست
_ تعبچ مو خالة ؟
جرتني من ايدي گعدتني بصفها
_ بشريني مـا تصالحتي انتَ وارثنا ؟
سحبت شالي وطگطگت اصابعي بخجل
_ تصالحنا البارحة .
جرت راسي باسته وضحكت
_ الف الحمدلله ياربي والله امشي ودايخة
ايدي على گلبي لا تعاندين وتروحين وهل ولد
يعيش نفس قصة خياة الو ويتبعذل بينكم .

بقيت ساكته ماعندي جواب وهي دفعتني
اروح اصيحه لان همام كاعد ينتظره ، صعدت
لگيته ماكو بالغرفة درت وجهي على باب الحمام
طلع بالمنشفه والدنيا باردة ثلج صايرة الصالة
دفعني الداخل الغرفة وقبل لا انطق بحرف باسني
رافض احجي لو ابلغه احد يريده ومايريد ينزل
ولا يسمع من احد ولا يحل مشكلة شخص ضيعني
بي ونسيت الدنيا كلها بين ايده .

هذا اليوم ما نزلت غير من ميمونة دگت الباب
اكثر من مرة وصاحت حتى تسمعنا ومستعجله
_ وارث اهل مُـرجانـة هنا امها وعمها جوه .
ضحك بمكر وباوعلي وهو رافع حاجبه فاك عيونه
وارث : هسة اتحداج تروحين وياهم هههههه .

ضربت على خدي مفتهمه كلامه وطفرت من الجرباية
ركض للحمام سبحت ورجعت اسحب بدشداشة
جديدة اخذتها لبستها مستعجلة وشديت شعري
ينگط ماي لفيت الشال وهوَ راح للحمام رشيت عطري
وبكل سرعتي نزلت الدرج وفتحت باب الأستقبال
شفت امي واحس روحي وجعتلي من اشوفها
احس روحي قوية حضنتها اشم عطرها وهي باستني
تتفحص بوجهي خايفة بيه شي ، رحت على عمي بوسته
وبست راسه گعدني بصفه يمسح على ظهري
ضـلـيل : شلونچ بوية شخبارچ سامحيني تأخرت عليچ .

قبل لا اجاوبه دخل وارث شعره مبلل لابس دشداشة
لون ابيض ويرفع براسه النوم بعيونه
وارث : كل الهلا بشيخ ال ضـلـيل ، هلا بأم فارس .
تصافح هو وعمي وسلم على امي وراح گعد مقابيلنا
وارث : شلون عرفت العنوان ؟
ضـلـيل : تصعب عليه ؟
كاعدين واحد يخوزر بالثاني وساكتين على اعصابهم
اني اعمز لوارث يهدي لعب ويه عمي وامي تنز برجل
عمو ضـلـيل حتى يخفف من نبرة صوته العالية .

عمتي ام وارث دخلت بيدها صينية ضيافة
خلتها قريب من امي وعمي وترحب بيهم
وتسولف وياهم وراحت بصف امي اخذتها
شوية بعيد من عمي وارث وبقت تحجي وياها
واني اسولف ويه عمي وجان ضحك متذكر من سألته عن نقش
ضـلـيل : نقوشه حامل الف الحمدلله والشكر .
مُـرجانـة : يا كلبي صدك عمو .
_ اي والله وشاهين فرحان راح يصير اب .
وارث : الله يتممها على خير يستاهل شاهين .
ضـلـيل : خوش زلمة معدل ينحط على جرح يطيب .

وارث ما گدر يتم ضحكته ضحك وسأل
_ واني هم نسيبك ما تخليني مرهم على جرح .
ضـلـيل : الجرح منك ، واذا اخليك يلتهب الجرح .
باوعله بطرف عينه يشرب بالجگارة كش بملامحه
وارث يستفز بي بالكلام وحتى الغمزات بعد ماتفيد .

عرفونا تصالحنا بس عني سألني اذا اريد اروح
وياه ما گدرت اكسر كلمة وارث وبقيت بس ودعتهم
وصيتهم على كتبي ، حضنت امي وبقت توصيني بالباب
وخلفت وارث يرجع تلفوني وراحت ، ومن ثاني يوم وصلت
كتبي بيد ابن مقتدر اخذهن وارث وبلشت اقرا واجهز
نفسي حتى اخذ شهادة الثالث وارث خصص باليوم
الظهر ساعتين يقريني وبليل ساعتين وباقي اليوم
نظمته مراجعه وتلخيصات واحاول ابسطها على نفسي .

وبعدها بأسبوع اني گاعدة امتحن بورقة سواها
كلها عيارة عن اسأله على كل الفصل قرب ايده
وخط علبه مقابيلي فتحتها وعيوني بعيونه اهمس
_ شنو هاي ؟
_ نحله تتذكرين قبل من گلت اذا تبردبن
گلبي بصلوات اشتريلچ ذهب .
_ لا تذكرني بيها .
_ ما اذكرچ گلبي بس طالبتني انتِ مو بس
بردتي گلبي خلصتينا ههههه جبت الچ شي تستاهلي .

فتحت العلبة شفت تخم ذهب نازك قلادة واسوار
وتراجي ومحبس كلهن على شكل حلقات يجننون
عفت العلبة ورحت حضنته وهوَ يبوس بخدي
_ نحلتي الطنانه تستاهلين ماي العيون .
_ انتَ نفر جنتل مان والله اروح فدوة شكراً حبيبي .
_ ضحته وراحته وعمره ونظر عيون حبيبچ افديچ .

لبسني الذهب بس رفضت انزع هديته القديمة
الگلادة مالته ايام الخطوبة بعدها برگبتي لزمها
باسها وهي برگبتي وجلدي تحسي شفايفه
وارث : جنت مل ما افقد الأمل ما تريديني من
شفت بالمستشفى بيوم ولادتچ لابستها بعدج
وقريت العبارة مالته رجعت الايام الحلوة
قرها بصوت عالي حتى يأكدها من جديد
ركزت بالقلادة محفور بظهرها عبارة مكتوب
" تذكري لو سكتت كل گلوب الدنيا عن حبج ، كلبي يظل يدك بحبج "

رفع راسي بس شفتي وهمس بحب
_ للموت احبچ ، للموت اريدج ، ما احب غيرچ
روحي بيچ ام بيتي ام سجاد نحلتي الطنانة طماطيتي .
مُـرجانـة : گد كلامك تعبتك وبقيت تحبني وتتحمل خبالاتي .
_ دلالچ دلوعتي تدلل .
_ وحاولت وبقيت تحبني ورجعتنا .
_ حياتي ما تسوى شي بدونچ وبدون ابني .
_ انتَ احسن جنتل مان والله انتَ جنتل مان وارث
گول وفعل نفذتها وصرت جنتل مان احبك هوواي .
_ هوَ اني شطيحني غير هاي لجنتل مان ووليدي
وهذا الحاجب من اروحن فدوة لهاي العيون .

ميمونة ...

على كاشيات الحمام الباردة واگفه اغسل بوجهي
وبيدي جهاز اختبار الحمل ايدي ترجف نظراتي
ثابته على خطين اللي شكلهم يصير واضح ويختفي
من الدموع تغوش عيوني تگطعت انفاسي خليت
ايدي على راسي وتذكرت اني من جنت هناك اشك
بنفسي حامل وقبل لا تصير مشكله سويت التحليل
وطلع ماكو شي بس بقيت شاكه اني حامل وصارت ..

مشاعري متناقضه بين الفرح والخوف والصدمة
احس الوقت ابد مو مناسب رغم اريد هل شي
صگت اسناني من التفكير والخبر صدري ضاق
والنفس بصعوبة اجره اخذت الأختبار ورجعت
للغرفة امي تنتظرني سديت الباب علينه وشوفتها
الجهاز حضنتها وبچيت من كل خاطري
_ حرب بداخلي يمه مادري شنو اسوي هسة
ما اريد يرجعني بس الخاطر الطفل اريد اثبت
هو يريدني ويحبني ويحاول يحل هاي المشكلة الخاطري .

لزمت ايدي وسألتني
_ وشنو ناوية تسوين لازم يعرفون اخوانچ
وبندر حتى لا تصير مشكلة وهم همام يخف على بندر .
ميمونة : لا يمه الخاطري اذا تحبيني لا تبلغين احد
وخلي هل موضوع بيناتنا بس هل فترة .
_ لا تگولين بس هل فترة يعني لشوكت ميصير .
_ يصير يمه اريده يجي وافتهم منه واتفاهم وياه
واشوفه متمسك بيه يقبل بطلباتي لان بس يحبني
اذا يعرف بالطفل ويقبل بطلباتي اكيد بس الخاطر
الطفل اريد تفهميني يمه حبابة .

بقر معترضه بين قلبله وبين رافضه وحلفتني
ابلغ بس وارث وبقيت اأجل بالموضوع الى ان
اجه اليوم واني اعدل بملابس امي دخل وارث
گعد على چرباية مقابيلي
_ شلونها المعنويات اليوم ؟
_ الحمدلله مشكور على طلعت البارحة غيرنا جو .
_ تأمرون امر ، ميمونة بندر يريد يحجي وياچ
وهسة هوَ بالاستقبال وهذا همام تعرفين بي شكد
يشد وياه ، اللي اطلبه منچ تنطين لنفسچ مجال
ومحاولة الخاطر العشرة وتروحين تتفاهمون سوية
خلي النقاط على حروف بندر مو لأن صاحبي
والله بس اعرفه يريد خاطرج .

امي عيونها عليَّ ماكدرت ارفض وتخاف تحجي
قبل لا اتفاهم جريت وكفت اخذت الشال وارث
ينتظرني بعدني ما فتت لزمني من ايدي وصاح
_ همام وينك .
طلع همام بكثر ما متجادلين مختنگ خنگ من بندر
اخذه وارث وقبل لا يطلع فتح الباب ومن ظهري قدمني
من دخلت سد الباب حتى ما يطلع صوتنا واخذ همام
وطلع هوَ وياه بالكراج .

السكوت بيناتنا مسيطر على المكان انفاسي سريعة
عكسه چان گاعد بملابسه العسكرية واضح توه راجع
من الواجب وجاي بوجهه علينا ، ثبتت نظراته بعيوني
ما حجيت ولا هوَ نطق بس العتب واضح عليه بقيت واگفه
ما دخلت ولا گعدت رفضت اخطي اي خطوه عيونه
بيها لمعه وجهه تعبان صوته خشن وهوَ يگول
_ تعاي گعدي بصفي .
_ مرتاحة هنا .

ذب حسرة طويلة شاغت روحه بيها وجر باكيت
الجگارة شغل وحده جر منها نفس وسألني
_ تلفونچ وينه ؟
_ موجود .
_ مو اراسل واخابر ليش ما تحاوبين.
_ مايحتاج احجي .
_ ليش عرفتيني متزوج ؟ لو شفتيني لعيونچ ويه وحده .
_ الثانية شفتها وبعيوني تجذبون عيوني تريدون .

جر نفس ثاني من ااجگارة وعيونه تشخصت
علىَّ ويأشر بيده الثانية على روحه
بندر : يعني شفتيني بعيونج خاين ؟
مصدكه اريد غيرج لو احب لو نفسي تريد بنية ؟
بلعت صوتي من طفه الجگارة وگف على حيله
نظرات العتب بعيونه تشرح قهر الأيام الفاتت
بندر : وحگ ابو الحسنين تعرفيني مو خاين
ولا ادور بنات مكتفي بيج وحتى مال اتزوج
اثنين صعبة ماعندي فلوس .

كتفت ايدي ورفعت حاجبي من جوابه
_ شنو قصدك يعني اذا عندك فلوس تتزوج ؟
_ ميمونة عايني بعيوني واحجي الحق
اني اخون ميمي ؟ اضيعج من ايدي ما صدگت
نرجع نلتم بيت واحد تصيحين انتقام يا انتقام
وعلي نسيت حتى انتِ شوهتي وجهي مافكر
بيها لأن ماريد مشاكل وياچ .

فتح ايده وعيونه تعبانه
بندر : ستين دقيقة ؟
هزيت راسي ممتنعه من طلبه سبقني بخطوة
وحضني حضن شخص ضايع يريد يرجع يلملم نفسه
ماحسيت بالوقت بس جنت اشوف المسافة بيناتنا
اختفت انهار وراسه على كتفي يهتز جسمه حضنت
وجهه متعجبه ما مصدگه واني اشوف عينه حمره
دم ودمعته نزلت بقهر مني رجع راسه على كتفي
وبصوت يرجف من الموقف همست
_ بندر لا ؟

انهار گدامي لزمت ايده گعدته ايده وكل جسمه
من المشاكل والضغط تعب الدوام والمشاكل عليه
ما تحمل مثل الجبل وبلش يتكسر من الحمل
مسحت عيونه وبستها واحجي بسرعة
_ اعرفك تحبني واني ما زعلانه منك والله
راحت الضوجة الأيام الفاتت راجعت كل الصار
وادري بيك مو خاين واعرف هاي لعبة من زهراء .

حط راسه على كتفي وانفاسه ترجف على شعري
يتحرك وصدره يدگ بطريقة خوفتني باوعت
على وجهه بعده اثر ضرباتي بذاك اليوم الخراميش
موجودة بهالحظه صعب اقاوم وابقه زعلانه ما يهون
بندر على گلبي حضنته بدون مقاومة بحضن سمعت
بي گلبي مو عقلي وطعت حبي وما متندمه .

عفته من بعد دقايق جبت اله كلاص الماي شرب
وكعد يجر نفس وشغل جكارة ثانية لازم ايدي
بندر : عفتيني ورحت واحنا بألف يا علي رجعنا
ليش عود متفقين ما نتعاوف ونحلها بيناتنا
اني بذاك اليوم لو باقية ما آخذ حقچ؟
_ يا حق بندر تعرف الغيرة على شخص تحبه
تخليك تفقد عقلك ما تحكمت بنفسي ردت اموتك
والقران لو بذاك الوكت بيدي شي يموت جان موتتك.

ركز بكل حركه مني مت رفع نظراته
_ اي اي اموتك شعبالك اغااار عليك انتَ ملكي وحدي .
_ ميمي اني تعبان واصل مرحلة مشاكل بعد ما اتقبل
تعرفين شنو انسان مل من المشاكل بوده يعيش بجزيرة
هاي انا اريد اهج بجزيرة اعيش من كثر الملل والتعب
فدوة اروح لطولچ سالفة تخون لو تتزوج بطليها
تسمعين تشوفين ما اسويها ، اريد حل هسة نرجع
اريدچ شلون ما لون ما ادري بس اللي اعرفه اريد نرجع.

من سكتت قرب اصابعه بكل حذر
يحركها على رموش عيني
_ شنو تردين ؟
_ صعب ارجع وياك على بصرة .
_ هاي الحيوانه تربت ما ..
_ اشش بندر ما اكدر ارجع مو بس زهراء السبب.

عدل گعدته وثبت على نفس هيئته يسألني
_ المطلوب ؟
_ اريد بيت قريب من بيت اخواني ما اتحمل
اعيش بغربة حتى لو ردت اهلي لازم انتظر
ساعات واحصلهم صعبة ما اكدر ابد ما اكدر .
_ وابوية ميمونة تعرفين بي شگد فرحان لأن رجعت عنده .

احتاريت بالجواب واحس بنيران تاكل بروحي
ميمونة : براحتك بندر بس افهم شغله من المستحيل
بعد ارجع وبوسط بيت اكو ناس تحفر وتكبد بي
عشت بضغط مو طبيعي هناك وما جنت اشكي
حتى ما ادوخك واكثر المشاكل بس كل ما اسكت
يدوسون على راسي اكثر من قبل ما اكدر بعد
مثل ما انتَ تعبت اني مثلك واكثر.

اتفهم الكلام وگف يريد يروح لزمت ايده
_ وين رايح .
_ ارجع للبيت صار هواي لا رايح ولا مجاوبهم
وهم اتفاهم اني وابوي واشوف تاليها .
_ بات اليوم نام هنا وباجر الفجر ارجع .
رحت على باب الأستقبال فتحته وصحت وارث
_ بندر يريد يرجع للبصرة هسة .
وارث : شني ما رايد روحك ولك تسوق ساعات .

كعده من لزم اكتافه ويقنع بي يظل
عفتهم ورحت اجهز اكل ومرجانة اجت تساعدني
جهزت الصينية اريد افوت سمعتهم يحجون
على تراث وبندر يكول لوارث : قبل لا التحق رحت
شفته هم شارب وحجيت وياه يبس حلگي ولا يقتنع .
وارث : تخبل هذا يريد يموت اول تالي يشرب !
_ حيوان بعد قفل .
_ نروح عليه خوما يظل هيچ ياكل نعال .
_ تجي ويايه للبصرة ؟
_ باجر نروحله .

وارث : وانت وميمونه تفاهمت وياها .
_ تريد بيت هنا .
_ اي ؟
_ قبلت ما اريد اهدم بيتي ميمونة غـاليـة عليه .
_ چا وابوك .
_ الله كريم وارث .

دخلت بالصينية خليتها بالگاع وارث صاح
على همام عفتهم وحدهم يتفاهمون بينهم
وخدرت الجاي وجهزت فراش من كمل وشال
همام الصينية اخذ الفراش فرشه والجاي وزعه
حجيت لأني ومرجانة وام وارث كل الححي الدار بيناتنا
وبعد ما دخلت عليهم الثاني يوم الفجر راح وارث وبندر
للبصرة ظل وارث اربع ايام هناك ومن رجع وياه تراث
واية جايبها بقت عدنا وتراث بالأراضي يبات
وهمام وسهم قليل يرحعون على بيت منبه عليهم وارث .

البنية صوتها ما ينسمع مسالمة نضحك تضحك
نسولف تسولف تنام من وقت وتكعد بالليل اسمعها
تصلي واروح اكمل صلاتي وعي تظل تقرا قران
وبلش خلف يضغط على اخواني يريد اولاده
وسمعت من همام جـبر عدهم بس عايفه وارث
باقي بس ضياء وابنه واتفقوا على گعده تصير
بوسط بيت خلف لان وارث عنده غايه بيها
وعرفته يريد يضرب عصفورين بحجر ويسويها خطوبة .

وانثبت الشك بأستقبال شيخ عقد خطوبة
وشيخ فؤاد موجود وزلم من العشيرة يحترمهم وارث
وتحركت سياراتهم البيت خلف وام وارث بقت تنتظر
على نار ومرجانة مخليه كتبها تراجع وسجاد نايم
بصفها وتباع علينه من نسولف ام تدعيله لان سَــهم
راح ويوصي ويبوس بينا ادعولي ، والساعة خلصت
والساعتين واربع ساعات ورجعوا وجوههم تبشر بالخير.

نسمع شيخ فؤاد يگول الوارث
_ زين سويتها ساومته وخليته يعقد الهم .
وارث : وعلى اتفاقنا ما يطلع ضياء اذا ما تطلع
بنت ضياع عروس لسهم ، يحتاجون شهر زمان
بين تجهيزات الغرفة وتجهيزات البنية ونستعجل
وحلف ما يعارض كل همه يطلع ايده اليمين ضياء
وحتى اضمن البنية ما تصيبها اذيه ثبتت على
كلمتي ما يطلع ضياء اذا ما يتزوج سَــهم .

سَــهم الدنيا ما واسعته من الفرح ويفوت
ويطلع يبوس بينا ويصيح بفضل الله ودعواتكم
ويخابر بترف يضحك وياها ويحير بيا طريقة يعبر .

البيت من بعد هل يوم شهرين انشغلنا بتجهيزات
وصبغ غرفة سَــهم وبيرغ يختار قاط عرسه
ويرتبون بسفرته وظل اخر شي بالبيت
المطبخ نجلف اني ومرجانة وملِكه تمسح
بالطبلات مال استقبال وما اشوف غير
صارت طبه ورايه التفتت واشوف وارث
اجه من الكراج يركض ومرجانه واگعه
بالباب مال المخزن تبجي لازمه رجلها
متزحلگه بالزاهي على ظهرها .

لزمها من ايدها يمسح بظهرها
وارث : هسة شني هذا الزززززززاهي .
وامه وراه تغمزلي اسحب الماي امي جرتني من ايدي
لا اوگع وصاحت لهمام يمسح بي وايده كلها دهن
اسود من السيارة وارث يوگف بمرجانه وترس ايدها
وملابسها صخام من ايده يبدلون مال سيارته
گعدها على كرسي وهي وجهه ينطي الوان
وارث : شنو يوجعج طگت رجلج .
_ ظهري انكسر وهم وگعت على راسي .

ولازمه برجلها طگعت من اصابعها بلون ازرگ
من رفعها يشوف اركباتها وملابسها صار بيها دم
رفع عيونه عليها فاتحهن وهي لازمه ظهرها تبجي
وگف على حيله يغسل بيده بالمغسله ويصيح
_ همااااام شغل سيااااارتك اررركض
يمه بدلي تعالي ويايه بسااااع .

اخذت عباتي عدلت شالها واجه سندها من ايدها
ويخابر بالتلفون صعدها بالسيارة يريدون يروحون
وام وارث من الدم هبطت ، اخذت عبايه ثانية ورحت
وياهم خليتها ترجع لزمتها من ظهرها تصرخ منه
ميمونة : اسم الله عليچ مو حذرتچ لا تشمرين زاهي هواي .
وارث : اخخخ بس مو شفتها وكلبي نغزني عبالك
عرفت گلت الها قللي زاهي لبسي نعال راح توگعين تكمز .
مُـرجانـة : شبيك وارث شبيك ظهرري .

وارث : همام دوسلهااا يلة .
لزمت بالباب من السرعة نزلنا مقابيل المستشفى
مالته من دخلنا دكتور منتظرتنا دخلها طوارىء
فحوصات سونار واشعة ودخلت جنى سلمنا عليها
واحت بيدها ورقة اخذها وارث منها وطلع عدلت
نومت مُـرجانـة وراح وراهم واجت وياها جهاز ورقة
والدكتورة تگول الها بالبداية نتأكد ، اخذوا الها
سونار زين وتحاليل بيدهم من خلصت صاحت
على وارث ماكو بالصيدلية
_ انتظر دكتور وارث دقايق .
وارث : اجيت دكتورة .
الدكتورة : ابو سجاد اخو سجاد جاي بالطريق
الف مبارك وربي يتمم بخير وتگوم ام سجاد بالسلامة .

مُـرجانـة نست وجع ظهرها گعدت
متوجعه لازمه بطنها وتحجي وياها
_ ذاك اليوم جبت دكتورة غلطانة يمكن كل يوميه
قابل احمل واجيب فدوة وين بيه حيل .

وارث مدري من فرحة الحمل مدري مو كلامها
ضحك ضحكات مصايره اجه يبوس راسها
وعي بعدها ما مستوعبه ولا راضيه تشاور بي
_ هاي ما تفتهم وارث مو حامل .
_ انجبي حامل .

گرصته من ايده وجنى واگفه بصف الدكتورة
جنى : الف مبروك حبيبتي مُـرجانـة .
مُـرجانـة : ويبارك بيج يوم الج .
جنى :وارث الف مبروك تستاهل كل خير .
وارث : خيتي الغالية ممنون .

طلعت هي والدكتورة واجه دكتور على وگعه
ورجعت بس الدكتورة مسجله علاج وبلغتنا
لازم ترتاح هل فترة وهي منا قرب موعد امتحاناتها
رجعنا للبيت حط وارث مرهم على مكان الوگعه
وبقاها بغرفة امه على چرباية ميصير تتحرك .

كملت تعديل البيت وراها بيومين بس
اجه بندر وگعد هو واخواني وامه وام وارث
وياهم اخذت الجاي ما قبل ياكل سلمت وهمام
اخذ مني الجاي وزعه واني رحت بصف امي
اول ما طفه الجگارت وخاط الچاي گال
_ حجيت ويه ابوي وبلغتهم راح انقل سكني
ودوامي هنا ، ولگيت بيت قريب عليكم مثل ما رادت
ميمونة واريد اخذها تشوفه اذا اقتنعت استأجره .

وارث : ما طول كلكم كاعدين اريد ابلغك بشغله
سالفة ورث امك ترا هذا حقك وبلغتك قبل بعد بذمتي
انا معليه بأبوي الحق حق ، وميمونة حقها عندي اذا
تقبل انتَ وميمونة انطيكم بيت 100 متر بأسمكم
ويصير هو هذا حقك بالورث والباقي من ورث
ميمونة يتحول بأسمها هي الوحيدة من اخواتي
ما اخذت حصتها .

بندر : بس البيت اكثر من الورث .
وارث : ورث اختي موجود عدها ، ومبلغ ورثك
هذا اعتبره مقدمه وسجل البيت بأسمك وتنطيني
باقي المبلغ دفعات مثل الايجار كل شهر الى ان تسد المبلغ .

بقيت اباع على وارث ادري ذاك البيت مالته
اللي اشتره وبقت بي مُـرجانـة كم يوم ، ونيته
ما تخرب حياتي ويطمئن عليه والخاطري ادري بي
الخاطري عاف البيت حتى استقر بحياتي وهم قريبة
علبهم والبيت جديد ، بقيت ساكته بندر رفض واخواني
ساكتين ومستغربين بنفس الوقت من مبادرة وارث
وارث : هو شرايه تشتري مني عندي ورث امك يمي
وانت بدل ما تدفع ايجار طول عمرك اعتبر روحك
مشتري بيت اقساط وكل شهر ادفعلي وفضت
لا تكبررهااا لا نتخارب والله .

يبس بندر راسه وطلع يقنع بي وبعد ساعة
كامله صاحوني بدلت حتى نشرف البيت
اخواني بسيارة قبلنا واني وبندر بسيارة وحدنا
جريت الحذاء مال بيبي صغيرة لون ابيض
لفيتها بعباتي وطلعت وياهم صعدت ويه بندر
حركت سيارة اخواني واحنا وراهم وبندر
ساكت ابد ما يحجي ويايه باوعت علبه وهمست
_ صاير شي ؟
_ لا .
_ شبيك .
_ زعلان .
حجاها وخزرني
_ ليش ؟
_ صار شهرين حتى بالجذب ما سألتي زوجي وينه .

التزمت السكوت لدقايق وجريت الحذاء مال بيبي
واخذت ايده وهوَ يسوق ما منتبه مركز بالشارع
خليتها بكف ايده باوع عليها ورجع يركز بالذريق
وشخط السيارة بنص الفرح وشهگ بصدمة
_ ولچ شني هاي .
_ حذاء طفل .
_ اي يعني شني معناتها .
لزمت بطني وابتسمت
_ ابنك لو بنتك بالطريق .

حط الحذاء حاضنها على گلبه واخواني
رجعوا بالسيارة مستفقدين سيارتنا
نزل همام وبيرغ وياه بسرعة
بيرغ : شنو عطلت سيارتك ؟
فتح ايده شوفهم الحذاء بيرغ افتهم قبل همام
ضحك واخذها من ايده وهمام يباع على حذاء
ويباع علبه فاتح حلگه على وسعه
بيرغ : ول ميمونة حامل .
هزيت راسي امسح بعيوني نزل بندر من السيارة
وارث حاي علينا يصيح شكو وشكو وبندر يمشي ويگله
_ ولك اختك حامل .

اجه بندر عليه نزلني من السيارة حضني
وبيرغ اخذني منه باس راسي وارث وهمام يضحكون
وارث : مبروك بعد عيوني .
خجلت حتى ارد ، راحوا للسيارة وهمام بعده حتى
ما بارك مصدوم ، وبندر طايررر طااااير محلق من الفرح .

نزلنا مقابيل البيت نظيف وجديد بس بحتاج
تنظيف واثاث وتعديل ، رجعوني وهل ليلة
بات عدنا بندر سهروا للصبح يسولفون والثاني
يوم راح بندر وارث سحل البيت بأسمه ودفع فوك
الورث مبلغ سد ثلث البيت وظل قليل ، امي وام وارث
راحوا على بيت كله غسلوا واني وياهن وبندر
جاب غده واحنه ناكل اندك الباب واشوف سيارة
حمل مليانه ملي اغراض بالبواكيت ، راح بندر
لبست الشال واشوفه يأشر
بندر : هاي شني وارث .
_ هدايا .

واخواني اربعتهم مشاركين المطبخ كاونتر واجهزه
على همام ، وبيرغ تخم الأستقبال ، وارث كل اجهزة البيت
وسهم تلفزيون ، واخر شي نزل سَــهم بطانية
فتحها بنص الغرفة مكتوب بيها احبك بلون احمر جبيره .

بندر مايحب هيج ويخجل تشكر منهم وارث يگله
_ انت صاحبي قبل لا تصير زوج اختي
حتى لو متزوج غيرها هم اسويهن وياك هذني
غير صديق طفولتي وشبابي وصاحب عمري .
بندر : لو هيج المتوحدين لو ماكو شني هل كرم دكتور .

البيت كله ترتب وصار يفتح النفس والغرفة
اشتريتها على ذوقي تجنن رتبتها وحديقة
صغيرة مثل ما تخب ببها مرجوحة سويتها
وكل حلم تحلمته وياه حققه وسندوني اخواني .

واخيراً كدرت اگول استقريت ويه اول حب بحياتي
بعيد على كل المشاكل ، كبرنا حبنا وبلشنا من جديد
بالبيت الجديد ، منتظرين مولودنا ..

ملِكه ..

داعيش باجمل ايام حياتي ويه انسان بكل
الطرق ردت اخلص منه بس رب العالمين
مبقي عوض اليه على كل تعب تعبته
صار اخ واب واني فاقدتهم زوج وصديق
واني صرتله اهل ، ايام حملي خلصت
وياه بضحك ولا يوم قصر ويايه رجل
بكل ما تعني الكلمات صرت اخاف يخلص
يومي وما ادحگ وجهه واحجي وياه ويضحكني .

باسني مثل كل يوم الصبح قبل لا يداوم
وطلع للدوام تارك تلفوني يم راسي والفلوس اخاف احتاج
رجعت غفيت مابيه اي شي ولا حتى حسيت بوجع
غير رحت للدكتورة قبلها بيوم فخصتني وگالت بعد
وبليل حسيت بوجع قليل وراح ، گعدت الظهر على
الم بظهري وماي سابحه بفراشي ، بقيت ارجف
اريد احر التلفون ايدي ترجف وجع يروح ويجي
خابرته وصحت واول مرة اعيش هيج ووحدي
_ بيرغ عندي ولاده تعاااال .

طبگت الخط منه واتصلت على جنى من طمني راح يجي
جنى : راح احضر الج كلشي انتوا بس تعالوا .
زاد الوجع واني انتظر واشوف الباب يندك
اتصلت على بيرغ ابجي واصرخ
_ تعال فووت ما اكدر اجي بطني توجعني .
_ هذا وارث وسهم اني بعدني ما اجيت
هذا ابن الملب ما يقبل اطلع اليوم والدي والدي انعله
حتى لو يفصلوني اكتله واطلعع.

دريت يقصد مديرة الحقير من يوم يومه
مشاحنات وياه بقيت وياه على خط اتوسل بي
ما يتعارك لا يروح ينسجن ، وفتحت الباب لوارث
گتله يحجي وياه بين ما رجعت للبيت اخذت
جنطة الطفل مجهزتها وبس جنطتي حضرتها
بدلت وطلعت وياهم الوجع ملخني تمليخ
وصلت للمستشفى منتهيه يزيد بطريقة غريبة
احس الطفل يريد ينزل دخلتني جنى بغرفة
الدكتورة گالت ضروري هسة تولدين عندج ولاده
فاتت امي لزمت بيدها ابجي اريد بيرغ ، جنى
بدلت ملابسي جهزتني وكعدت بالغرفة خابرته
ما حاوبني انفتح الباب قبل لا ادخل حضني قوي
لزمت ايده وصرخت من الوجع وعضيتها قوي
بيرغ : ما بقيتيها بنفسچ سويتيها .

راح الوجع خليت راسي على صدره حاضنته حيل
ما مهتمه بكل الموجودين روحي صايرة بي
احس حتى الوجع يخف من هوَ موجود واسمع صوته
ترد روحي شكد ما تعبانة روحب تستقر لازمه بيده
كل ظني من انوجع راح اضربه واصرخ بس حتى
اخاف اعانده حتى ما ياخذوني منه اريده وهوَ
مثل كل موة احس بوجع ما يعوف ايدي ولا يخليني
تعبانه يمسح براسي يبوس بايدي يطمني .

اخذوني الصالة الولادة ابجي من الخوف
عشت اصعب وجع بحياتي وجع ما بعده وجع
استصعبوا ولادتي الى درجة بقيت اتوسل بجنى
تخلصني وهي على البجي مالتي تبجي وانزاح
الوجع بيوم سمعت صوت بجي الطفل وشفته بيد الدكتورة
_ الحمدلله اجتي البنوتة بسلامة .

نمت ارجف من البرد طلعوني واشم بعطر بيرغ يمي
وصوته يهمس بأذني لزمت ايده ورجعت نمت الى ان
راح التعب شوية والوجع والدكتورة ضربتني ابره
وجنى ما تركتني لحظة وفرحتهم وضحكهم فوك
راسي وجعني للواقع وبعدني ما اگدر اترك ايد بيرغ
دخلن جنى بيدها الطفلة اخذها وارث منها وهمس
_ هلو بابا هلا بالغالية .
صار يسمي ويقرا القران والشهادة
بأذنها ومن بعد اتفاقنا همس قريب اذنها
_ اسمچ يا بابا ريم ..

خليتها بحضني الوس بيها تشبه ابوها اكثر مني
وبيرغ يعدل بيها وارث تقرب حط بالگماط مالتها
اسوارات اطفال ذهب صغار ناعمات بعلبة
وارث : اول قطعة ذهب تلبسها من عمها الوارث .

بارك النا وهمام وياه طلعوا ورضعتها
لبسني حجل برجلي ذهب هدية ولادتي
وما عافني دقيقة خايف وفرحان بنفس الوقت
ساعتين وطلعوني ام وارث حاضنه الطفل
وارث قفل ما اروح على بيت امي لازم اجي
على بيتهم وگعد هوَ وبيرغ بالشارع واحد يهدد بالثاني
وارث : وداعت ابني يا بيرغ اذا تاخذهم وتروح .
بيرغ : لاااا تحلف .
_ وداعت ابني بعمري كله ما احجي وياك بعد
ترجع على بيت العايلة معيش كلنا سوية كافي
خلصنا عمرنا واحد بعيد على ثاني ما شبعنا من
خوتنا خلينا نعوضها هسة لا تعاند .

بيوم ما اجت ريم استسلم بيرغ ورجع البيت
عائلته ورجعنا بيت عائله مليان اصوات حلوة
وضحكات وما يفرغ من مشاكل مرات ومواقف
ببهن حلوة وبيهن مو حلوة بس نعديها
بتفاهمنا كلنا بهذا البيت متعوبين نريد نستقر
متعلمين نتغاضى وننسى حتى نكمل مرتاحين .

ومن بعد فرحة ولادة ريم ، تجهزنا بعدها بأشهر
زواج سَــهم اللي كل شهر يتأجل بخباثة خلف
واعتراض ضياء وارث مبقي بالسجن حتى يقبل
والقدر مكتوب والقسمة شكد تتأجل بالأخير لازم اتم
الشارع بهاليوم سيارات مليان شيوخ ودكاترة
جماعة وارث ، وضباط ربع بيرغ ، وبيت شيخ فؤاد
ولدهم كلهم وام تراث بس اية وفاطمة ماكو
عدها دوام وامتحانات وما كدرت تجي اية
وفاطمة بقت يمها تخاف تبقيها وحدها ، وتراث
ما قبل بحضر عرس رغم مرة سنة واشهر على وفاة ايليا .

اصوات الأغاني والرگص والهوسات هزت المنطقة
ميمونة وامهاتهم راحت وياهم اني ومرجانة
باقين بالبيت بسبب سجاد وريم ، وحملها صعب
الدوخة ما تعوفها وبطنها كبرت هل مرة ، بالخمس
ساعات طولوا ورجعوا نصبوا العشه بالشارع
والعرسان مناك وطالعين على فندق .

ودخلت ام مُـرجانـة ونقش بطنها هواي كبرانه
بس صايرة تخبل ومبلشه تجهز الولادته
بقينا كاعدات بين ضحك وركص خلصنا هل
يوم بخير ودعنا كل المعازيم وصعدت اني
وريم على غرفتي بدلت الها ورحت اخذت حمام
ورجعت للغرفة اعدل بشعري ودخل سيادة المقدم
حضنته وهوَ باسني يغمزلي
_ على هل لبس الحلو واليوم عرس رگصيلي
مو من تزوجنا لليوم انوح على الرگص .

شغل نفس الاغنية بداية زواجي شغلها
هزي هزي واني وياه خربانين ضحك ونهز
رگصت بين ايده اتمايل ، حضني يبوس بخدي
_ المربربه جبت راسج وخليتج ترگصين .
_ برضاتي وقناعتي سويقط .
_ تستاهلين انتظرج احبچ .
_ سيادة المقدم اموت عليك .

مُـرجانـة ..

شكد ردت اصير عمه واليوم انتظر بالباب
اني وننوس بيت عمي ضـلـيل دخلت نقش
وكفت سيارتهم طشيت جكليت وذبيحة
جوه رجلها ذبحوها ، اخذت الطفل من ايد امي
ابوس بي صغيررر صغيرر كلش ، ونقش بيد
شاهين دخلها جوه يدفي بيها نومها بغرفة
بيبي ام اني ويلبس برجلها جواريب ، صبيت الشوربة
كلها دجاج اخذها مني يوكل بيها ، وركضت اساعد
بأمي بعد ما طلعت من الحمام فرشنا السفرة
ومدتها كلها سمج وشاهين طلع من نامت يضحك
_ وينه ابني ؟

شافه بحضن عمي ضـلـيل راح عنده وكعد بصفه
شاهين : عندك فارس وعندي فراس .
ضـلـيل : هههههه يتربى بعزك يا سبع .
اخذه منه صافن بوجهه فرحان بي عبالك لعبه .

انطيت هدية لنقش ومن خابر وارث ما كدرت ابات
رحت وياه بعد ما فات وگعد وياهم بارك وطلع
بعدنا بالسيارة وارث فتح التلفون قريت اسم زهرة
مُـرجانـة : شنو تريد هاي الاولى .
_ هههههههه اقري المحادثة حتى مـا تگولين
يضم عليه وعنده اسرار وغامض .
_ غامض لو حامض .
_ ما تضحك .

قريت الرسائل وسجاد بحضني مسلمه
عليه وكاتبه راح اتزوج سامحني وحاجيه
على حمامة وبيرغ مستقرين بالخارج ومسلمته
عنوان الحهال من هوَ طالبه حتى يروح يشوفهم
وهي باقية تذكر الماضي وهي حبته ورادته
ما مجاوبها ومسوي حضر رجعت التلفون وهمست
_ ادري بيك خوش وليد .
_ هههههههه اتعلم من الغلط .

دخلت للبيت لگيت ترف مكمله مل البيت وتوها
سابحه وفاتحة هي وسهم لعبة بالتلفزيون يلعبون
بيها وفات وارث من شافها عصبيه يخسر بيها
اخده من ايدها يلعب هو وسهم ، ونزل بيرغ
يصيح عليهم لان صوتهم عالي وهوَ نايم
خدرت ترا الحاي ورحت بدلت ودخلت على ملِكه
_ ثول حتى ثول ما تشبعين نوم .
_ انجبي الليل كله كاعده من وره هاي ريم .
_ امشي ننزل ما ماكله انتِ من البارحة
بقيها يمي معليچ بيها يلة لا يوجعچ راسچ .

اخذت ريم ونزلت وهذا سجاد يغار منها
كل ما اطيح بيده يحرها من شعرها وبيرغ يصيح
_ من نعلعله ابوك على هيج تربية خايسة
لا تضربهاااا راح اعلگه بالبنكه والله .

وسحاد يركض لحضن ابو ضربه براسه
لزم وارث سنونه ختله يسب بي ويحمي
من بيرغ وريم تبجي اخذها مني سويت
الها ممه واخذتها اشربها وهمه يلعبون
وملِكه نزلت حتى تخلص من بحي بتها
راحت تساعد ترف بالمطبخ ، ام وارث هي
وام همام عند ميمونة اليوم وبس احنا بالبيت
اكلنا والولد رجعوا يلعبون واحنه كعدنا بالاستقبال
اسولف الهن على نقش وولادتها وخابرتني اية .

اخذت التلفون وصعدت فوك احاجيها
_ هلو ايو .
_ واج اخابر عليج من الصبح ماكو .
_ مو راسلتج بليل هاي نقش جابت .
_ الحمدلله على سلامتها هوَ ظل بالي يمها .
_ انتِ شلون صرتي الفلاونزا راحت .
_ هسه اخذني تراث ضربت ابره واكلت
لبلبي خار برا ورجعت اكمل امتحاني باجر .

طبگت الباب وكعدت على جرباية
_ اي وكون حجه على ملابسج الجديدات اليوم .
_ لا ابد بالعكس من شافني گال محتشمات حلوات .
_ وشيخ فؤاد رجع ؟
_ اي ولچ وتراث بعده ما بحجي وياه لأن
سمعت من فاطمة تراث تعارك وياه مايقبل
يدكر طاري الزواج لان اني مثل ما حجيتي ويايه
رحت حجيت ويه تراث گتله اريد اخذ شهادتي ويشوف وظيفة .

طلعت من الجراره نستله اكلتها وكملت
_ وايلين شلونها .
_ خابرتني العصر مسافرين هي ونوح
الكربلاء يباتون هناك ويمكن تمر على نجف .
_ نوح زين وياها .
_ اي حتى حجه ويايه گال تعالي ويانا
بس عندي دراسة وادري بتراث مايقبل
واخاف هم نروح ويشوف تعامل نوح ويه ايلين
ويرجع يشرب ويأذي روحه مهما غلط بس اخاف
يموت لو يصير بي شي ويزوجوني .

طمنتني عليها وعلى دراستها وسديت الخط
وبقيت بغرفتي هدوء الى ان دفع سجاد الباب
ودخل يبجي خابرت على وارث وگتله
_ هذا نعسان وعمه ماكو تعال .
صعد بسرعة ذب اغراضه وقميصه وسجاد يباع
عليه ويبجي شاله من ايده وتمدد بصفي
وارث نومه على ايده وسحاد مثل الدگمه
وطفت عنده نام بنفس الدقيقة .

اخذت هاي الفترة شهادة الثالث فرحتي ما اوصفها
وفوكاها حصلت هدايا من كل الجهات ، هم استفاديت
بالنجاح وهم استفاديت ، وكملت فرحتي بولادة اطيب
انسانه اعتبرها بهاي العائلة ميمونة ، حتى ولادتها جانت
سهلة مثل ما هي تسهل كل صعب ، سيد بندر هلكهم
هلاك بخوفه بس كملت هل يوم بخير وسلامه ولدت
احلى بنوته تشبه امها الى درجة وابوها طاير بيها
من رجعوا للبيت ومن اول لحظات وارث صار
ما يصيح لبندر غير " ابو رحمة "
وميمي صارت ام رحمة الحلوة
"فاز حبهم انتصر عشقهم وحصلوا بذرة حبهم رحمة "

بقت عدنا كل فترة النفاس وارث وبندر بين
الغربية والبصرة باقين ما يعوفون تراث ابد
وكل ما يسافر وارث على بصرة تعلگ المشاكل
بينه وبين بيرغ بسبب وبدون سبب .

وبيوم ميلاد ترف ومن بعد ايام حمل مرت
اهون من حمل سجاد خلصت الأشهر مرتاحة
بدون مشاكل وبنص التاسع حددت موعد العملية
بس حب الطفل يسوي حفله بهذا اليوم خاصه
بي بكثر ما ركضت بالسوك وروحي واصعدي ونظفي
مكياج وتبديل وطلباتهم ما تخلص قرر ينورنا هل ليلة
وجهزت كل ملابس ابني ورحت اخابر بأمي
ما قبلت اولد طبيعي ابد واختاريت عمليك
ولدت ولاده اسهل بالف مرة من ولادة سجاد
وبدون مشاكل فرحت بنور عيوني " حسن "
والموروث صار عنده سجاد وحسن طاير بيهم
رباهم بوسط بيته بنص عمامهم وعائلتهم
وما تركهم يعيشون نفس مصيره ابد .

بمناسبة ولادتي وسلامة الطفل ام وارث هي
وارث اتفقوا على عزيمة يلمون بيها الموروثين
وال ضـلـيل كلهم بيتنا الولد جهزوا علمهم وارث
مثل ما تعلم من شيخ فؤاد لازم الحياة مساعدة
ومشاركه مو معناتها زلمة ما يساعد بالبيت
ترتب البيت والاكل كل ما تشتهي النفس
ومن الشارع اسقبل وارث وبيرغ اهلي
دخلت بيبيتي وياها كوثر تمشي وامي ونقش
وننوس ركضت من الباب حضنتني ، دخل عمي وشاهين
بوستهم وخزرني حتى افوت من دخل عمي مقتدر
واولاده وزوجته كلهم رحب بيهم ودخلهم للديوان
والنسوان بالصالة طلع يعض بأصبعه واني اضحك
وارث : احترمي نفسج لا اخليج ترافسين يلة .

ضحكت من كل خاطري على غيرته وملامحه
وصعدت اصيح بملِكه ، ورجعت ادور على ترف
شفتها اطلع خواشيگ من المخزن وبيرغ
يستقبل بام ملِكه وخواتها ، سلمت عليهن وملِكه
دخلتهم ويه النسوان ، ملِكه طلعت المواعين وهمست
_ خالة ام وارث هاي المواعين لو هذني ؟
ام وارث : اسألي مُـرجانـة .

اشرت على ثانيات وطلعتهن وياها
ما اكدر اتحرك زين ، وترف اجت مستعجله
_ مرجانه منين اخذ منشفات يكول سَــهم اجهزهن برا .
اخذتها ورحت على غرفة ام وارث طلعت مناك
بكل يوم اعيش هنا كلنا نلاحظ ام وارث شلون
تريد تحسيهم اني زوجة الجبير واليه كلمه
بالبيت وعودتهم يسألون بيه بس اني روحي رياضيه
ملِكه : وينچ وين ام البيت .
مُـرجانـة : بمزاجي ما مشدده عليچن .
ترف : كل هذا وما مشدده عجل من تشددين شتسوين .

صبت ملِكه التمن وفرت راسها
ملِكه : اني داقتني فقرة الاكل عود شنو
ما يسووها اذا ما يسألون هاي الخايسة .
ترف : اي وهي تدري ما احب السمج البارحة
تگول الهم هلي نسوي سمج .
مُـرجانـة : ولج غير وارث يحب السمج هو وبيرغ خطية .

ميمونة طلعت من غرفة امها مبدله وتضحك
وتراس بسيد بندر وهوَ گاعد ويه اخوانها وتضحك
جريت التلفون منها وضربتها
_ ترا ايعععع صار هواي ما شايفيچ شبيج
بس تراسلين بي ما شبعانه من السيد .
ميمونة :لج بس يقلد يموت ضحك .
ملِكه : عليمن يحجي .
ميمونة : يگلي عم مُـرجانـة وگع بسامير على وارث
وارث بالع لسانه ما يحجي وياه يخاف ياخذ مُـرجانـة
وباقي صاير وساكت يشمر بسامي خفيف .

هوسونا تهوس على اكل اخذوه ياكلون وصوتهم
عالي وكعدنا كلنا النسوان ذيج السفرة والسوالف
والضحك ، رحت اخدر الجاي ميمونة يمي
مرجانة : ما مصدگه خلصنا والموروثين مجتمعين
بيت واحد وسفره وحده ويه ال ضـلـيل .
ميمونه : الف الحمدلله خلصنا من الشياطين بحياتنا .

شفت امي فرحانة ومطمئنة على بناتها واخيراً
وملِكه مرتاحة براحة اهلها وعينها عليهم
وبيرغ ما قصر لا وياها ولا وياهم
ميمونة فاز حبهم واستقرت هي والسيد
ونقش اخذت العوض من بعد التعب شاهينها
وسهم حصل حب حياته ترف وبلش يبني عائلته وياها ..

بعد ما شربوا الجاي وكعدتهم بالحديقة
وقبل لا تظلم الدنيا صاح عمي عليهم حتى يروحون
طلعت سلمت عليه وهوَ يوصي بوارث عليه
لان راح يسافر هوَ وامي على عمره هل يومين
مُـرجانـة : عمو انتَ هم دير بالك على امي .
اشر على عيونه ويضحك فر سبحته ولزم
فارس من ايده وطلع بي برا البيت ينتظرهم .

ودعت امي وبيبيتي ونقش وبندر اخذ ميمونة
ورجعوا على بيتهم وبيرغ اخذ ام جنى ورجعهم
دخلت لگيت البنات ينظفون وعمتي تحجي هي والولد
بالاستقبال على عزيمة شكد حلوة وشلون الاكل مرتب
لزمت بطني وصعدت فوك بيه ما بيه بدلت ملابسي
ونمت بالفراش اخاف من بطني ، دخل وارث شايل
حسن نومه بالكاروك ، وسجاد باقي عند عمتي
رفعت جسمي وعدلت گعدتي من اجه گعد يمي
رجع شعري وره اذني يبوس بخدي
_ مرتاحة ؟
_ الحمدلله.
_ راضيه على عزيمة .
_ صارت تخبل .
_ مرتين ردنا نتكاتل اني وضليل وعلي
الزم روحي الخاطرج يدوس بالمصارين .
_ هههه انت وعمو ضراير مو مثلكم .

وارث : همه ال ضـلـيل كلهم نفسيات ما ينحملون
وانتِ اكبر دليل من اطنگرين شيفكهااا الطنگوره .
_ لا بالله .
وارث : بس تعودت عليكم .
_ هم نعمه .

باس شفتي وهمس من فصلها
_ بس تصيرين زينة اريد تبلشين تقرين للسادس .
_ تقريني .
_ اي والله اني وياج وياج ونكمله ان شاء الله .
_ لو هيج الموروثين لو بلاها .
_ ههههههه خوش ناس مو نفسيه .
من طنگرت حضني يضحك
_ احبچ .
_ احبك جنتل مان مالتي .

الموروثُ نصلٌ حاد
العشق في حياتهِ وجد مكان
فكان هُيامًا مملوءًا بالوقار
يُداوي ما انكسر ويُطفئ ما اشتعل من نار.

وحرب الإرث التي ظنّها أبدية
لم تكن سوى طريقٍ قادَه إلى إخوةٍ بالدم والروح ازلية
ليكتشف أن النصر الحقيقي هو الاطمئنان
ذلك السلام الذي وُلد من بين العناء والجراح
ليكون الموروث أخيرًا... ميراثَ قلوب لا صراع فيها ولا انكسار .

هـكذا اكتملـت الـحكـايــة ...

" ملخص سريع "

عزيزة تزوجت قبل ولادة مُـرجانـة .

ولاداتهم كاتب متباعدة بس اختصرت وذكّرتهم بالأحداث

عمل بندر ما ذكرته ولا قبلوا اذكره لان بفترة
من تشوهه وجهه هواي عالم عرفته وجماعته
المقربين يعرفون قصته اذا نطرق اكثر التفاصيل
حياته ودوامه يخافون ينكشف ويوصل لبندر
خبر قصته مكتوبه ووو بس الله يستر من السيد
فـ اختصرت عمله وباقي اسرار شغله للحفاظ على
خصوصية الرواية وحتى ما نتعرض المشاكل ..

اذا تتذكرون واكو هواي متابعات يتذكرون غـاليـة
من كانت بالبيت مال بغداد بلغت وارث اكو سر
هوَ ما يعرفه واذا عرفه بيوم راح يعوف مُـرجانـة
واحتمال بكرهه وهي بقت محتفظه بالسر ومن
ردت اكتبه گالت " اهله اخته ونسوان اخوانه يقرون
الرواية واخاف ينكشف السر ويطلع وتخرب حياة بنتي "
فـ لهذا السبب ما ذكرت السر وحتى مُـرجانـة ما تعرفه
بس السر متعلق بعابد ابو مُـرجانـة على ما اظن ..

جنى لليوم ما تزوجت ، وهمام ما متزوج

تراث لليوم ومن بعد خمس او اربع سنوات
ما اكدر اذكر السنوات بالضبط ما متزوج
ولا حب على ايلياته ابد ، وما نساها بالعكس
كل فترة يروح يزورها ومثل ما سمعت من
المقربين منه هوَ ديعوض اية يحافظ
عليها بلا زواج ويخليها تحقق احلامها
وما يقبل احد يفتح وياها موضوع الزواج .

وفاطمة ما كدرت تترك اية وصارت الها ام
اية بخير وحياتها مستقرة الحمدلله ..

اسمر تزوج قبل سنة تقريباً
وتاج خاطب بنت صديق ابو
باقي اخوانه بعدهم نفس اوضاعهم .

"شهاب " تعالج من مرضه بفضل بيرغ وبعده
بيرغ متابع حالته الصحية وباقي سنة وحده ويطلع
من السجن بعد ما خلص اربع سنوات بالسجن
تقريباً سنة 2026 شهر الثامن يطلع ..

والى هنا تنطوي صفحات الحكاية
وتبقى الشخصيات عايشة بين قلوبكم
مثل ما عاشت بين سطوري ، الحمدلله
على تمامها، والشكر لكل قلب تابع وتعلق
وصبر وياي لآخر حرف شكراً بنات ♥️