رواية الموت الحي الفصل الاول 1 - بقلم براء الموسوي

مرحبا حبايبي العسل شلونكم ❤️

#الموت الحي
#للكاتبة براء الموسوي

علمتني لغة البكاء
أفقدتني الإحساس.
لا تغيب عن مخيلتي فصورة وجهك عند الوداع تلاحقني في كل مكان
همساتك ما زالت عالقة في أذني، وقلبي ينبض بحبك ،
يا لقسوة هذا الزمان الذي حرمني منك دون أن يكون لي يد بشيء.
رفقًا أيها الزمن بنا،يكفي أن تأخذ منا من نحب فقلوبنا ليست بقسوتك.

دُنيا : اباوعلهم لزموا وهو بفرفح بين اديهم ووجه ازرك من الضرب وعيونة علية يستنجد بيه واني ساعة اصرخ وساعة املخ بروحي وساعة اتوسل وابوس برجليهم يعوفوا لكن لا حياة لمن تنادي
حركة وحدة
لحظة وحدة
اخذت النفس من رئاتي واني اشوف اللازمة بحركة وحدة طك ركبته وفصلها عن جسمة وشمرة بالكاع واخذ جماعتة وطلعوا عايفني 
بادن رجلية وصوت صراخي اختفى واني اشوف
ابني ساكن بالكاع لا حس ولا نفس

ما حسيت بنفسي الا واني ازحفلة برجلية ما كادرة اوكف احس اكو خدر بأطرافي ، وصلتلة شلته من الكاع ضامته لصدري شامة ريحتة يمة حمودي ، حبيبي بعد امك اكعد هسة حيجي بابا ياخذنه اكعد امي اكعد ، بعدت وجهه عن صدري مباوعه لملامحة المطفية ، ضربت خدودة بخفة حبيبي اكعد راويني  عيونك الخضر ماماتي حبيبي اكعد مو جوعان انت
اييي ااا اي جوعان اكيد جوعان انت
طلعت صدري واديه يرجفن ييي ي يل يله يله اكعد ارضع يروحي يله يله مي ممم ميصير تبقى جوعان يله ارضع ماما حتى نرجع للبيت

فريت عيوني على ملامحة مباوعتلة لا حس ولا نفس دنكت بهدوء خاله راسي على كلبة ، ماكو ميدك ، ليش !! ، جريته بقوه عاصرته بحضنه يمه وليدي يمه كلبه ميدك شنو مات ؟ معقولة !! لالا مستحيل ، ما حسيت بروحي الا وكمت اصرخ والطم على وجهي لااااااااا
يمه حمودي اكعد لااااااااا يمه لااااا وليديييي ربي كلشي ولا وليدييييي يمه وليدييييييي رااااح محمد يمه محمددددد يييييييمة

فزيت من النوم على صوت المنبه مخترعه ، بسم الله الرحمن الرحيم ، اعوذ بالله منك يالشيطان اعوذ بالله منك ، مسحت على كلبي بآيات من القران لحد ما هدئت 
داعب اذاني صوت الاذان كمت على كيفي فتحت شباك غرفتي مباوعه للسما تنهدت من اجتني برودة الهوا كون الدنيا شتاء
اووووف كل الناس الليل صايرها سبات ، هدوء وسكينه إلا اني النوم عدوي كلما تغفل عيني على امل انو انام الكوابيس تجيني وكأنها تأنبني وتكلي شلون غفيتي وابنج مقتول !!

فرت دمعة من عيني رافعة تراكة لخشمي شميته وكأنه الهوا المخليني اعيش اووووف يا كسرة ظهري يا يمة اااه لو اني ميتة بهاليوم ولا انت عمت عيني عليك يا حبيب امك رفعت ايدي مثل كل يوم ، الهي مرت خمس سنين كلها نست بس اني وياك ما نسينه اريد ثاري من القتلوا منك ياربي بجيت ثاري اريدة منك يا رب العباد اني ضعيفة وانت القوي انت الوحيد التكدر تنتقم الي وتاخذ حق ابني

دخلت لغرفتي متوجه للحمام غسلت وجهي وتوضيت باوعت لروحي بالمراية خمس سنين مرت 5 سنين كل يوم اكعد من النوم عيوني دم حتى بنومي اني ابجي تنهدت طالعة فرشت سجاتي وصليت ، كملت صلاة قريت قرآن شوية وكمت لابسة مشمر لان الجو بارد اخذت تراك محمد وصورتة ضميتها ونزلت حتى اكعد بالحديقة

اني ُدنيا النوح قبل خمس سنين جنت وحدة من اسعد البنات بهالدنيا كانت طلباتي كلها مجابة وتتنفذ قبل حتى لا اكول او انطق جنت عايشة اميرة زماني كُلشي اكولة سمعًا وطاعة ويصير بدون نقاش ، چانوا اهلي مستعدين يملكوني الدنيا لو بس اشرت بأصبعي العالم كلهم جانو يحسدوني على السعادة الاني بيها جانت حياتي كد ما حلوة ومليانه بهجة وسعادة ما جنت اتمنى اليوم بيها يخلص ، عمري ما اتذكر انو بجيت بيها ولو مرة وحدة غير بولادتي بمحمد ، اني طالبة ادارة واقتصاد وبنت اغنى اغنياء العراق وزوجة اشرف وانزهه نقيب بالدنيا عندي عائلة تجنن
مثالية لدرجة لا توصف لكن تمر الرياح بما لا تشتهي السفن

كوني بنية مثل كل البنات حبيت ابن صديق بابا وهو هم حبني كان ضابط ، خطبني وتزوجنه مثل اي ثنين يحبون بعض وعشنه احلى سنتين سوة شكد ما جنت مدلله عد اهلي تدللت عندة اضعاف اضعاف الدلال چان عيوني الاشوف بيها
يوسف اكثر بشر حبيته بهالدنيا واكثر بشر اتمناله الموت هسة ، ورة زواجي من يوسف بفترة حملت بمحمد ابني ، وجبتة عشت احلى سنة بوجودة انهوست بي لدرجة جنت احطه واكعد بس اباوعلة من جمالة
الي جان نسخة من جمال ابو العيون الخضر والبياض وكلشي جانو نسخة من بعض ورغم جانت اسرتي صغيرة بس جنت سعيدة بيها وشايفتها وممصدكة  لحد ما اجة اليوم المشؤوم اليوم الي تدمر بي كُلشي

جان يوسف من الضباط النزيهين جدا ما چان يقبل بالغلط لو على كص ركبتة وهذا الشي چان مخلي اغلب الي ويا يكرهو ، كونه غير مرتشي ويخاف الله بكلشي وعمره ما دخل لكمة حرام ببطنه

وبيوم الايام صارت اكو عركة بين 3 شباب بكازينو من الكازينوات الراقية والمعروفة بالمحافظة وبحالة عصبية واحد من الشباب ساحب سلاحة ومصوب صديقة والطلقة اجت بالغلط بكلبة وموتتة بنفس اللحظة

وكون الولد صاحب السلاح ابن واحد مسؤول وواصل بالدولة تطمطمت السالفة وتلبست للولد الثالث والمسؤول رشه كل الي بالكازينو وخلاهم يشهدون ضد الولد الثالث والي اصلا ما چان اله علاقة وجان مجرد يحاول يفاككهم لكن وكعدت براسة وحتى السلاح الشباب الجانوا بالكازينو شهدو زور وكالو هو سحبة من ابن المسؤول وصوب على الولد

ولسوء حظي هاي القضية استلمها يوسف وكونه ذكي كدر يلزم لزمة عليهم ويعرف الحقيقة عن طريق اعتراف واحد من الشباب والكامرات اكدتلة هذا الشي ولمن وصل خبر للمسؤول حاول يرشي بس في سبيل يتراجع وميقدم الادلة العندة للمحكمة لكن يوسف رفض رفض قاطع انو يبيع ضميرة واصر يساعد الولد
شكد اجانه تهديد لكن يوسف ما اهتم نهائيا وقدم بلاغ للمحكمة بمنع ابن المسؤول من السفر حتى لا يشرد كونه متهم وية الولد الثاني

واجة اليوم الدمر حياتي ودفعني ثمن كل لحظة سعادة عشتها بحياتي ، يوم المحاكمة اليوم الي انسلب بي ابني مني ، مثل اي ام عدها طفل عمرة سنة كاعدة العبة واناغي وما احس غير باب بيتي ينفتح علية ويطبون زلم ملثمين يسحلوني بهدوم نومي مال البيت اني وابني كدام الجوارين الي ولا واحد بيهم شالتة النخوة وكال هاي مرة لاحول ولا قوه خلي نفزعلها

سحلونه بالسيارة وملخونه تملخ واليوجع اكثر من قباحتهم جانو يلزمون طفل عمرة سنه ويصفكو راشديات وهو يفرفح بين اديهم بس ماكو رحمه بكلوبهم ، اخذونه لمكان شكد ما اوصف قذارتة ما اكفي ريحة الدم بكل مكان ودم ضحاياهم منتشر بكل مكان على الحياطين وعلى الارضيات الغرفة الجنت بيها حياطينها تصرخ بألم ضحاياها وكأن اصوات آلامهم لسة تداعب الحيطان بسبب ناس ما بكلبها ذرة رحمة ووحدة من الناس اني فرفحت بين اديهم ، لا خليت ايد ولا رجل ما بستها بس حتى يعوفون ابني بس محد يسمعلي

ابد ما انسى من جانو يرفعوا لمكان عالي ويذبو ويوكع بالكاع على راسة ويضل يصرخ لو يخوفون بي وهو يضل يتراجف شلون البي صرع جانت روحي تطلع واني اشوف حالته وهو يصيح اممممه عود يمة
شعري شلعته بأيدي من قهري علية وبكلشي ما احس تفكيري وبالي كلة يم وليدي اليتعذب كدام عيني واني لا حول ولا قوة ما بأيدي اساعدة وهو يستنجد بيه  ضلوا يعذبونه لحد ما خابرهم المسوؤل وكلهم يوسف قدم الادلة للمحكمة وانحكم ابن المسؤول 25 سنة بلحظتها سمعت جملة مستحيل انساها لو يبقى اخر يوم بعمري . المسؤول خابرهم وهو يبجي وكال

"اريدكم تحركون كلبة مثل ما حرك كلبي على ابني"

هو كلهم هيج وهمه بلحظة وحده طكو ركبة محمد عن جسمة وبدم بارد جان اكو واحد منهم يصورهم وهمه يعذبونه من اول ما اجينه لحد ما قتلوا محمد تالي عافونه وطلعو بدم بارد وهمه يضحكون اي يضحكون على شهكات طفل ماله ذنب ودموع ام

غطيت وجهي باجية الله لا يوفقكم الله لا يرحمكم الله لا يوفقك يا يوسف الكلب اااااخ عساني لا شفت وجهك ولا حبيتك ، ضليت كاعدة مثل كل يوم ابجي والشجر داير مدايري شاهدة على المعاناة الجاي اعيشها من خمس سنين

حسيت بأيدي تلتف على كتفي سندت راسي على صدرة وحاضنتة

ياسر : كابوس كالعادة مو ؟

دُنيا : بدموع تعبانة بابا حييبييل تعبانة كلبي يوجعني وعيوني تعبت من الدموع

ياسر : ااااااخ يا بوية ما ناوية ترحمين روحج مو  كسرتي ظهري بحزنج الما ناوي يخلص

دُنيا : ما اكدر بابا محمد مجاي يروح من بالي موتة والطريقة الي انقتل بيها لحد الان عقلي ميستوعبها حاولت وجاي احاول واعافر حتى اخفف على نفسي بس مجاي اكدر حالتي احسها جاي تسوء يوم بعد يوم
بعد ابني عني هدلي حيلي

ياسر : ليش يروح ابوج تحجين هيج انتِ نسيتي روحج مو سنتين انتِ مكرمه ومتكدرين توكفين على رجليج من الصدمة مو تكورعتي ووكع كل شعرج الجان يمشي وياج حمدي ربج وشكري يبعد ابوج انو كدرنه ويه العلاج نوصل لهالمرحلة الحمدلله والشكر رجعتي تمشين وشعرج طلع وطال ونفسيتج احسن بهواي من قبل على الاقل كمت تسولفين تحجين على اقل تقدىر هالعيون الحلوة رجعت تتفاعل وتبتسم مو بس تبجي مثل قبل

دُنيا : هو منو الطفه عيوني غيره يا بابا ، كل الصارلنه بسبب يوسف الله لا يوفقة دمرنه عسى بأنكس حال

ياسر : يوسف وضعة مو احسن منج يابوية بسبب الي صار فقد النطق وسنين يتعالج وفوك كل هذا استقال من وظيفتة وترك الشرطة كلها رغم جان نقيب و من اكفئ الضباط بالدولة ومن يومها وهو يشتغل وية ابو وعمج يحيى يكول يوسف عبارة جسم يتحرك
ويشتغل بس ولا عبالك بي روح ومتمر ليلة عليهم اذا ما سمعو صوته وهو يبجي على محمد ، ترة يوسف متأذي اكثر منج اي لتباوعيلي هيج تعرفين شنو يعني الابو يحس نفسة هو السبب بموتت ابنة تانيب الضمير ينهش بالروح نهش يابوية

دُنيا : يطبه مرض كل الصار بينه من ايده لوما مثالياته ما چان صار الي صار

ياسر : لا مو من ايدة يوسف انسان شريف لو واحد غيرة وينعرض علية المبلغ العرضه علية ****** مو جان رأسن وافق بس هو فضل يكون المظلوم ولا الظالم انتِ جاوبيني لو  يوسف ما مقدم الادلة بيومها للمحكمة مو چان راح بيها ولد بريئ ماله اي ذنب ومو بعيدة ينعدم وهو مظلوم شنو انتِ احسن من ام الولد لو بس انتِ ام ، وام الولد مو ام نفسج وعدها نفس الفطرة العندج لو الولد رايح اعدام وابنج العايش جنتي راح تسامحين نفسج ، راح تكونين سعيدة ؟؟

دُنيا : بدموع المشكلة كلامك كلة صح بس افهموا اني ام ، حملتة وجبتة وسنة كاملة يلعب كدام عيوني والله العظيم الصار مو سهل علية شكد احاول اخضع للامر الواقع بس ما اكدر والله ،، رفعت راسي لكيت بابا يبجي تشبثت بي وزادت دموعي ويا

ياسر : تدرين ساعات اكول ياريت لو رب العالمين ماخذني اني بذيج اللحظة ومخلي حمودي الج على الاقل راح يكون المج بلحظتها اهون من المج هسة ، ياريت لو ينعاد الزمن واكون اني الفداء لروح ابنج ولا هالكسرة الانتي بيها يا بعد ابوج

دُنيا : ابتعدت عنه شنو هذا الكلام بابا والله العظيم بعد اذا تحجي هيج فلا احجي وياك اسم الله عليك من عمري على عمرك تدري من بعد موتت محمد الشي الوحيد المصبرني على الحياة هو وجودك بيها انت بصيص الامل الوحيد البقالي من هالدنيا حسك عندي بالدنيا كلها والله يا بابا من اصفن واتذكر مأساتي بس تجي انت على بالي ابتسم واكول يله الحمدلله المهم بابا موجود يهون علية ، رجعت حضنته تدري هالحضن التحضنه الي شكد يسوه عندي لو شكد يسحب من هموم كلبي انت اغلى شي بحياتي بابا

ياسر : يا بعد كلبي يابنيتي وفدشة عيني انتِ اول بنية الي وفرحة كلبي يوم الربي رزقني بيج وبخواتج عبالك كلي هاي الدنيا سلمتها بأيدك افرح بيها ودير بالك تقصر وياها 

دُنيا : حاولت ابتسم واغير الموضوع مسحت دموعي ودموعة ، هسة عوفك مني وسولفلي انت شمكعدك بهالوقت

ياسر : عيني متاخذ نوم

دُنيا : عينك متاخذ نوم لو بالك يم ماما وسيلة ، اباوعلة شال عيونه على الشجر وملامحه تبين شكد هو مهموم

ياسر : وسيلة ابد مو زينة يا دنيا الكيماوي متعبها والورم مثل متعرفين بمرحلة متقدمة وماكو اي تحسن بحالتها ، احس روحي تريد تطلع واني اشوفها شلون تعاني من المرض

دُنيا : تحبها ؟؟!

ياسر : ااااخ والله ما اعرف شكلج وسيلة احسها امي الي انحرمت منها بسبب النوح الانسانه الوحيدة الي لكيت عدها حنان امي وصلابتها الوحيدة التفهمني شكد مر علية بشر ماكو واحد كدر يترجم روحي وتعبها غير وسيلة

دُنيا : اسفة على كلامي بابا بس اذا انت هالكد متعلق بيها ليش تزوجت عليها ماما وئام

ياسر : ببساطة حبيتها ، وقت الاستشهد عمج الله يرحمة وفرض علية النوح اتزوج مرت اخوية الي هي امج ماجنت راضي وروحي تكش مجرد اتخيل روحي أخذ ارملة اخوية اليتيمة ، شلون وشوكت ويمته حبيتها وشوكت دخلت كلبي وشوكت كمت اصبح وامسي وهي تمسي وية تفكيري ما ادري ، ما انكر جانت وسيلة ما مقصرة وياية قيد شعرة جانت تحبني وتحترمني واني هم جنت احترمها وحاطها على راسي بس عمري ما اعتبرتها غير صديقة مقربة لروحي او امي عمري ما حبيتها بكلبي جان عقلي يميل الها ولهالسبب تشوفين لحد هذا يومنه ما اسولف اسراري غير الها ورغم تعلقي بامج بس محد كدر يفهمني غير وسيلة اما امج حبيتها بكلبي ردتها كرجل من يحب حبيتها وردتها جانت ومازالت امج الانسانة الي من اشوفها احس بشعور لحد هذا يومنه ما اكدر اوصفة لا لنفسي ولا لاحد

دُنيا : تدري بابا لاحظة عليك شغلة من تسولف على ماما وئام تبتسم بس من تحجي على ماما وسيلة عيونك تلمع بشكل غريب ، اباوعلة لدموع عيونة وهي تنزل على تجاعيد بشرتة

ياسر : احم يمكن لان متعلق بيها وو ويم يمكن لان ما اريد اخسر امي للمرة الثانية

دُنيا : حضنته يا حبيبي يا بابا فدوة رحت لحنيتك ما توقعتك لهالدرجة متعلق بماما وسيلة شوية وحسيته دفعني عنه بقوة مصطنعه

ياسر : كافي يله انملينه نكد صار ساعة ننوح انمليت طاقة سلبية من وراج وراح اشيب واني بعدني بزهرة شبابي وجمالي

دُنيا : شبابك !!!! سلام الله على الصبغ خلينه ساكتين بابا

ياسر : معقولة ابوج يصبغ ؟ شنو معجز ولج واصبغ دشوفي عضلاتي ورشاقتي اصلا لتستغربين اذا اطك الثالثة بعد جم يوم اي لتباوعيلي شنو ميلوكلي 

دُنيا : ليش لا يلوكلك بعدك شباب تكول ستوك بالثلاثين فدوة لكلبك ولجمالك

ياسر : صدك والله لو تصبغين بيه لان ابوج

دُنيا : لا والله صدك بعد كلبي تخبل وين اكو مثل جمالك

ياسر : مليون يتحول لحسابج اليوم على هالحجاية الحلوة

دنُيا : هههههه حضنته ومشيته يله تعال نتريك دخلنه للبيت لكينة ماما وئام واكفة كالعادة برشاقتها وجمالها واتيكيتها توصي العاملات على الريوك وكأن عدها عزيمة مو مجرد ريوك دارت وجها علية وعلى بابا

وئام : يا عيني على جمال هالصباح صباحكم خير ان شاء الله

دُنيا : صباحج ورد ماما

ياسر : صباح النور ، ليش مكعدة العاملات خطية بعد وكت

وئام : غير حتى يسون الريوك

ياسر : هو ريوك يا ام معين بيضات وجبنات وجاي ميرادلها روحة للقاضي روحوا بابا روحوا كملوا نومتكم ام معين والبنات يكملن روحن بوية

العاملات: بس بابا

ياسر : بسيش بوية يلة لغرفجن اسمعن الكلام ما عليجن بأم معين

دُنيا : رجع بابا العاملات يكملن نومتهن وعافنه وصعد حتى يبدل ويروح لماما وسيلة... باوعت لأمي شبيج ماما

وئام : شفتي ابوج لازم يخرب نظام البيت كتلة هاي الطيبة الزايدة مو حلوة بس شلون لازم كلبة الطيب يغلب القوانين ويخرقها

دُنيا : ماما ترة خطية ما شفتيهن هلكن البارحة من التنظيف هم خطية وبابا صحيح كلامة قحط هو ريوك دقايق ويصير ليش تعلعلين نومتهن والجو ثلج واصلا احنه هيج هيج طالعين كلنه بعد شكو عوفيهن

وئام : والله تعلون الكلب انتِ وابوج ولو اني ويامن احجي ، نفس الصنف انتِ ويا ، اني بهالبيت محد يفهمني وجاي على مرامي غير ديمة فدوة رحتلها ، روحي كعديها هي واخوج ومرتة خلي ينزلون يتريكون ويرحون لدواماتهم حتى اني هم اطلع

دُنيا : لعد وزبيدة

وئام : ليش زبيدة هنا ؟ شو سيارتها مو هنا

دُنيا : البارحة بنجرت سيارتها واخذها عمو فادي للصناعي وهي رجعت وية بابا

وئام : هاا خوش لعد روحي كعديها وعلى كيفج وياها شوية تدرين بيها نفسيتها تعبانه على حساب امها سودة عليه الله يشافيج يا وسيلة

دُنيا : اول مرة اشوف وحدة تدعي لضرتها هيج دعاوي حلوة

وئام : حقج متعرفين وسيلة شسوت وياية اووف يا وسيلة مرضتج تكسر الظهر ، هاي شنو كاعدين نسولف تأخرت اني امشيييي صيحي لخواتج واخوج خلي اريككم واطلع وية ابوج وزبيدة اشوف وسيلة واروح للمدرسة عندي اصطفاف اليوم 

دُنيا : تمام ... صعدت فوك متوجهه لغرفة زبيدة دكيت الباب ودخلت ، اخترعت من شفت منظرها واكفة على اديها ورافعه جسمها بالمكلوب ، لزمت كلبي بسم الله الرحمن الرحيم هاي شمسويه بروحج ؟

زبيدة : خير ؟

دُنيا : ترة كلت صباح الخير اذا سمعتي !

زبيدة : صباح النور تفضلي ست دُنيا شتردين متشوفيني جاي اتمرن ؟

دُنيا : ممكن تنزلين ونسولف مثل الاوادم ، اباوعلها طوت رجليها على اديها صار جسمها قطعة وحدة شاغت روحي لازمة رجلية زبيدة اوكفي رجليه كامن يوجعني والله

زبيدة : استغفر الله كمت شلون يعني بهالبيت محد يكدر يختلي بروحه ، ويتمرن على راحته

دُنيا : عوفج من التمرين الي مدري شنو اسمة اصلا اجيت اصيحلج حتى تتريكين و تطلعين وية بابا وماما وئام تشوفون ماما وسيلة

زبيدة : اخذت الثقل رفعته ، ياعيني على الحنية الله يسلمهم حيل حنان خصوصا الوالد الكريم

دُنيا : زبيدة شبيهم وياج وياهم ترة بابا يموت على ماما وسيلة وحتى ماما وئام كون تشوفيها شلون تبجي على امج

زبيدة : اي ابوج يحبها لدرجة تزوج مرت اخو اليتيمة المفروضة علية والي اوووباااا كام يحبها وتحبة وتالي الوكت شمرو امي بالزاوية مثل مزهرية لو كدرية قديمة وكملوا حياتهم وهي ضلت هالسنين ياكلها القهر شو دسكتي يا حب هذا

دُنيا : انتِ عاد راح يضل هالموضوع ينخر بكلبج للموت المهم يلة تعاي نتريك حتى تطلعين وياهم

زبيدة : ما راح اكدر اروح وياهم

دُنيا : ليش ؟

زبيدة : ميعجبني اشوفهم سوه علاوةً على ذلك اليوم برنامجج يكول لازم تطلعين تتمشين لمدة ساعتين وكالعادة لازم نطلع نتمشى حتى تتنشط الدورة الدموية برجليج وهم تغيرين جو

دُنيا : ضميت ادية مو علساس انتِ تكرهيني اشو حافظة جدول علاجي صم من سنين واعياد ميلاد واحد واحد بينه تتذكريها هم غير كرهه هذا !! كرصتها يكدااب انت يجميل  

زبيدة : دفعت ايدها منو كال اتذكرها وبعدين يلة طلعي برة اريد ابدل واجي اتزقنب اييع شكد اكرهكم عائلة مزعجة

دُنيا : ابتسمت عايفتها وطالعة هاي زبيدة اختي الوسطانية بنت بابا ياسر وماما وسيلة الوحيدة اجتي وراية ب3 سنوات مدرسة رياضيات بمدرسة اهلية  حدة وكحة لسانها باذر وصلفة بشكل مو طبيعي دائما بابا يشبة شخصيتها ببيبي الحجية حمزية يكول نفس الشخصية بالضبط اضافة انو زبيدة بيها طبيعة غريبة تكرهه الزلم قاطبًة بدون اي سبب ولا اي مبرر حتى اخواني تكرههم ويمكن الشخص الوحيد التحبة زبيدة بهاي الدنيا امها وسيلة بس رغم وكاحتها ولسانها السليط
وقلة ادبها بس كلبها عبارة عن كطن ابيض واليشوفها شلون تتناكر وياية وشلون تعاملني ميصدك اني وياها صديقات مقربات اكثر من كونه خوات

وصلت لغرفة ديمة دخلت اباوع لغرفتها الي عبارة عن لون وردي بكل مكان والانسة كاعدة تتمكيج كالعادة قبل لا تطلع للكلية ... صباح الخير

ديمة : يا صباح النور يا صباح العسل يا صباح الايجابية

دُنيا : اجتني باستي ابتسمت هاي شكو هاللبخ من الصبح

ديمة : حبيبتي اني ديمة النوح لا يمكن اطلع من البيت الا واني اميرة تقبلين تجي وحدة جربانه للكلية وتطلع احلى مني

دُنيا : تأدبي عيب هالحجي احنه مو احسن من اي احد يلة كملي وتعاي وخففي مكياج لا ياسر يشوفج ويطين عيشتج

ديمة : ووو بابا شكد معقد بعدة ماخذ عقلية اهلة المتخلفين شكو بيها البنية اذا تتمكيج وتلبس اليعجبها وتطلع بكامل اناقتها

دُنيا : للمرة الثانية اكول تأديي الجاي تحجين علية هذا ابونه راح اطلع واعوفج لان كمتي تجفصين

ديمة: لحظه دندن

دُنيا : درت وجهي عليها نعم

ديمة : مكياجي ولبسي شلونه

دُنيا : يخبل

ديمة : بغرور اصلا جنت ادري بس حبيت اتاكد يلة روحي

دُنيا : هزيت ايدي وطلعت هاي ديمة اخر العنكود واختنه الثالثة لعابة البيت اهم شي بحياتها مكياجها ولبسها وستايلها النسخه الثانية من ماما طالبة هندسة معمارية مرحلة ثانية ، طبعا هي و زبيدة اعداء مينجمعن سوه نهائيًا اذا جمعناهن لازم تصير كارثة لان زبيدة شخصيتها مناقضة لشخصية ديمة تماماً

تنهدت الله يساعدج يا ام حسن شلون متحملة كل يوم تجين تكعديهم وباقية صامدة رحت لغرفة مبين اخوية دكيت الباب طلعتلي ضي مرت مبين اباوع لوجها ازرك وجفنها مورم كد ما يضربها مبين كسر بأيدة ان شاء الله خطية لا حول ولا قوة صايرتلة خدامة يكفخ بيها ويرجع لورة كم مرة بابا كتله وطردة من البيت على حسابها وبسبب امي تصالحه وياها جبر وتخلي يرجع للبيت

كون زبيدة تشوفها تطيح حظه لان ضي تصير صديقتها والله رغم هي اصغر من اخواني بهواي بس كد ما لسانها زفر يتجنبوها بس والله سباعية مشيتهم عدل

ضي : صباح الخير دندون

دُنيا : صباح الورد حبيبتي اجيت اكعدكم داسولف وياها طلع مبين دفعها ودفعني وطلع الكبر اي والله حتى صباح الخير ما كال عابت لشكلة شكد مستفز
تعاي يلة خلي ننزل عوفي هالفاشل اصلا اني اجيت اكعدج الج لزمت ايدها ونزلنة لكيناهم كاعدين كعدنه شوية ونزلن خواتي اجن كعدن

ديمة : صباحوو يحلوين

زبيدة : اييع شتحسين ؟؟

ديمة : أستغفر الله انتِ شكو اكو احد حاجي وياج

زبيدة : دكافي شكد تتصنعين دخيل محمد مرة وحدة ظهري على حقيقتج

ياسر : كافي بابا شبيجن ... خلونا نتريك مثل الاوادم
دمدم بابا خلصي بسرعة حتى اوصلج للكلية

ديمة : بابا يعني ميصير شوكت تشتريلي سيارة حالي حال خواتي شنو هاي التفرقة 

ياسر : تخرجي حالج حال خواتي واني اخذج بأيدي والسيارة الترديها اشتريها الج واني عمري ما فرقت بيناتكم عيب هذا الحجي ، تخرجي وعيوني الج خو ما مقصر اني

وئام : حشاك من التقصير حبيبي

دُنيا : درت وجهي على زبيدة لكيتها مكرمشة وجها شلون اللعبانه نفسها لزمتني الضحكة

زبيدة : وسم شبيج

دُنيا : همستلها ماشفتي وجهج شلون طالع

زبيدة : مو امج تتماوع وتتدلع اكول اختج عليمن طالعة لعبن نفسي

وئام : ماما زبيدة ليش متاكلين سويتلج بيض عيون مو تحبي

زبيدة : جاي اكل متشوفين

وئام : هاا ل لا اشوف بس كلت اذا معاجبج الاكل اسويلج غيرة

زبيدة : لا شكرا اذا ردت شي اني اسوي لنفسي

ياسر : بحدة زبيدة

زبيدة : نعم ؟

ياسر : تهدي برحمانج

زبيدة : متهديه بي لتخاف علية

دُنيا : ندستها كافي زبيدة مصختيها عيب احترمي نفسج ، اباوعلة باوعتلي صفح ورجعت تكمل اكلها  اباوع اجة مبين وضلوا يتناقشون واني وزبيدة ناكل وهمه يسولفون

وئام : اووف هالايام البنات صايرات يشلعن كلبي وكحات ومينحملن الي تجي ممكيجه والي تجي ما ملتزمة بالزي المدرسي وتسريحات الشعر العجيبة تكول رايحات عرس مو اعدادية موتني والله

مبين : انتِ مو كلتي مسوية لجنة تفتيش بعد عليمن متعبة روحج الي تخالف عاقبيها

وئام : غير يفيد وياهن ولا يفيد

زبيدة : والله اني برأيي انتِ مالج حق تحاسبيهن

ياسر : زبيدة كافي بابا شجاج اليوم

وئام : لحظة ياسر ، ليش بله ست زبيدة مالي حق احاسبهن

زبيدة : صبيت لروحي مي ، والله عاد اذا ترحين للمدرسة بتنورتج القصيرة هاي وبالتوب المبين جسمج وبمكياجج الصارخ هذا فأنتي الي رايحة لعرس مو هنه وكون المدرس والمدير قدوة للطلاب فأذا المديرة هذا لبسها وهي مرة جبيرة بالعمر لعد شيترجا الواحد من الطلاب ؟ اكيد من الطبيعي راح يقلدوج باللبس والمكياج لو انتِ وحد عنهن ، اعتقد المدرسة مؤسسه تربية وتعليم والها قوانين فاذا انتِ ما ملتزمة بالقوانين شلون تردين الطالبات يلتزمن بيها !!!

ديمة : ليش تردين امي تصير مثلج معقدة ومتلبس غير ملابس العجايز يمعودة انتِ كل الطلاب يكرهوج كد ما شكلج كأئيب ويجيب الهم

زبيدة : والله عاد اني اتعمد اخلي لبسي محترم او كأئيب مثل ما حضرتج تكولين حتى ميتعلمون مني طلابي وتالي يطلعون من امثالج انتِ وامج

دُنيا : اباوع لماما كامت ومبين عليها صارت عصبية

وئام : اولا اني مو مرة جبيرة وما اسمحلج تهينيني بالطريقة وثانيا اني المديرة ويحقلي البس الي يعجبني التربية ما فرضت على المدرس يبلس لبس معين و المدرسة اصلا مال بنات مو ولد حتى اخذ حذري وللمرة الالف اسلوبج وياي حسني عيب اني بمقام امج شنو هالحجي شنو متردين طلابج يطلعون من امثالي ليش انتِ شنو شايفة علية اذا شايفه علية شي كولي

زبيدة : كمت الحمدلله ، اخذت موبايلي عذريني صار وقت طلعتي اني ودنيا تأخرنا لو بغير وقت جان جاوبتج بس وقتي ضيق .... يله باي اني طالعة انتظرج دنيا استعجلي مو تتأخرين

ياسر : زبيدة اوكفي

زبيدة : بابا رجاءًا اجلها مستعجلة لازم اطلع وراية كومة شغل ورة ما ارجع دنيا للبيت وهاا خلي عمو فادي يستعجلي بالسيارة تدري بيه ما اكدر استخدم غير سيارتي يلة باي

دُنيا : اباوعلها عافتنه وطلعت

مبين : يابة بيها راشدي اله اشوهه وجها شهالصلافة والقباحة الشايلتها متكلولي بوية ترة انت منطيها اكبر من حجمها شنو هالاسلوب الجاي تحجي بي وية امي يابة والقران لوما انت موصينة منحجي وياها لو مهما سوت جان راويتها الما شافه بشر

ياسر : ميخالف ابني تحملوها هاي الفترة تدرون بوضع امها شنو هالفترة وشلون اعصابها مشدودة وحقها متنلام اي واحد بمكانها يدورله اي حجة حتى يحجي ويخفف من الهم الي بكلبة وانتو تعرفون زبيدة شكد انسانه حساسة بس متبين بنيتي واني اعرفها تحاول تطلع حركتها بأي احد بس في سبيل متختلي بروحها وتبجي

ديمة : لا بابا العفو منك زبيدة دائما هذا اسلوبها ويانه عمرها ما احترمت احد بينه وحتى انت تقل ادبها وياك بس انت ما ادري ليش دومك تدافع الها
عبالك ملاك ويمشي على الكاع رغم حتى هي تكرهك ومتحبك وتحجي عليك

دُنيا : كافي ديمة شبيج شهالحجي الماصخ الماله داعي ، اباوع لبابا هز راسة وكام ادري بي استهضم من كلام ديمة ، بابا من واحنه اطفال يحاول بأي طريقة يتقرب لزبيدة بس هي دائما تنفره وتبتعد عنه وهالشي مسببلة ازمة كونه يدري زبيدة تضوج منه ولهذا يومنه هو يحاول يقربها منه بأي طريقة لكن ما كدر للاسف بقت زبيدة حاقدة علية لان تزوج على امها ودائما تحمله مسؤولية كلشي يصير ويه ماما وسيلة تنهدت صاعدة فوك بدلت واخذت صورة حمودي ونزلت طلعت برة لكيت زبيدة تسولف وية عمو فادي وتضحك يا ريت هالضحكة والسالوفة يطول منها بابا ولو شوية ، هاا يلة نمشي

زبيدة : حضنة ايدها ومشيت يله تعاي ، استشقت الهوا ااااااااالله شكد الجو حلو اليوم

دُنيا : زبد ترة عيب كلامك وية ماما قبل شوية

زبيدة : رجاءًا دنيا سدي الموضوع وخلينه متونسين بهالجو اليجنن

دُنيا : زبيدة انتِ صدك تكرهين بابا

زبيدة : تنهدت اي لان كل الصار لامي بسببه

دُنيا : يعني اسم الله على بابا اذا مات ماراح تنقهرين علية

زبيدة : هاا ما ادري بس اني ما اتمنى لموت لاي احد ماعدى اخوتج الساقطين السرسرية تلعب روحي منهم وخاصة مبين الكلب

دُنيا : ولج حرام لومهما يكن يبقون اخوانه

زبيدة : لوكية ومصلحجية اكرهم ، عوفج مني سولفيلي انتِ نفسيتج شلونها

دُنيا : يعني الحمدلله احاول اكون زينة

زبيدة : طبطبت على ايدها على فكرة اني دائما موجودة يمج ومستحيل اعوفج ابد خلي ببالج هالشي

دُنيا : مو علساس تكرهيني غير كرهه هذا

زبيدة : دفعتها عني دولي يلة هو انتِ مال واحد يعاملج باحترام وحنية ولي يلة كرهتج

دُنيا : عابت لهالحنية المرعبلة مثل وجهج

زبيدة : يلة وصلنه للحديقة خلي نهرول شوية بيها ما دام ماكو احد من الكلاب السائبة

دُنيا : كلاب سائبة ؟

زبيدة : شبيج يحظي هو اكو كلاب سائبة غير الزلم ولو عيب بحق الكلاب هالوصف

دُنيا : هاا هههههه بهاي وياج حق

_______________________________

لهنا ويكون خلص البارت ان شاءالله يكون عجبكم❤️
+ لتنسون التصويت والتعليق على الفقرات ❤️❤️

شنو رأيكم بالاحداث

.