رواية الموت الحي الفصل الثاني 2 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

جدا اعتذر على التأخير لكن الواتباد كان بي مشكلة وضليت كاعدة لحد الان احاول انزل البارت الكم حتى ما اعوفة لباجر واخليكم منتظرين فعذروني على التأخير ما كان بأيدي❤️

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

أنا امرأة
مجبولة من طين الأرض
مولودة
من براكين التعب
ووجع الأحلام
التائهة
قلبي أنا
زورقُ كبرياء
حينَ تشتدّ العاصفة
قلبي أنا
نداءٌ متواصل
للقلوب الحائرة
أيّا شاعر النساء
في عصر الظلمة
ألم تعلم بعد
أنّي أنا
أنا
استثناء القاعدة.

زبيدة

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
رأيتُ نساءَ الزمانِ كثاراً

وحسبكَ واحدةٌ في الزمانْ

فإن رميتها فالتمسْ وصفها

فقد ميزتْ بصفاتٍ ثمانْ

بوجهِ الجمالِ ورأسِ الذكاءِ

وعينِ العفافِ وصدقِ اللسانْ

وقلبِ الحبِّ وصدرِ الصبورِ

ونفسِ الكمالِ ودمِّ الحنانْ

وتلكَ هي السعدُ من نالها

فقد صارَ من بيتهِ في الجنانْ

ومن لم يكنْ حسنُها هكذا

فسخريةٌ عدُّها في الحسانْ

وسيلة 🖤

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

دُنيا : اووف كافي زبيدة تعبت خلي نكعد شوية

زبيدة : شبيج روحج مايعة ما صارلنه غير ساعتين

دُنيا : انتِ رياضية اكيد متحسين ، بس اني ما اكدر  حبابة والله تعبت

زبيدة : ماشي تعاي كعدي على هاي المسطبة واني اروح اشتريلج مي بارد هذا العندي خلص

دُنيا : خوش بس مو تتأخرين متت عطش

زبيدة : لا لتخافين هسة اجي ... رحت للمحل بسرعة ، اخذت المي وواكفه داطلع الفلوس حتى ادفع اجه واحد وكف ورايه لزك ، استغفر الله هذا المحل شكبرة شكده ماكو مكان غير وراي ، طلعت الفلوس دانطيها للرجال وحسيت بأيدي تنمد على جسمي من ورة

دُنيا : اباوع من بعيد اجت زبيدة بس كل شوية تدور وجها على واحد يمشي وراها وتضحك هاي شبيها
اول تالي تطلع منها هالتصرفات ، اجتي كعدت يمي شبيج زبيدة ؟

زبيدة : بابتسامه شبيه ؟

دُنيا : شنو شبيج عليمن هالتمضحك الماله داعي ، اجتي تجاوبني وقاطعنه السخيف الي اجه وذب ورقة يمنه وراح

الخبلني زبيدة دنكت اخذتها ودارت وجها عليه وابتسمت ياا هاي شبيها ... كومتها شو كومي يله امشي كافي ترة مصختيها

زبيدة : دفعتها دوخري خلينه نتونس شوية

دُنيا : نتونس !! شبيج زبيدة انتِ مو من هذا النوع شنو تتونسين امشينه يلة لتخليني اتندم اجيت وياج

زبيدة : عطت بيها سكتي كلت ... فتحت الورقة لكيت بيها رقم ومكتوب عليها سيارتي برة تجين نتونس ابتسمت ... يروح عمتك تريد تتونس مو بعيني

دُنيا : اباوعلها دارت وجها عليه فاتحه جنطتها ، زبيدة صلِ على محمد شجاي تسوين ماما وسيلة هيج ربتج والله عيب عليج عود هاي انتِ مربية الاجيال هيج

ركزت على ايدها طلعت موس , موس !!! شيسوي عدها الموس ... اباوعلها اشرتله اجاها يهرول الكبر ويه ما وصل يمها طلعت الموس وشرطت ايده اباوع لايده كامت تنفض دم والولد كام يصرخ بصوت عالي من الالم ومن كد ما صار صوته عالي
الناس التمت عليه

زبيدة : هاي عبرة الك ولامثالك حتى مرة ثانية متتجرئون تمدون اديكم القذرة على بنات العالم تففف عليك وعلى رجولتك هاي اذا جانت عندك رجولة نكس
جريت دُنيا ومشيت ذكور سريرية همكم بس غريزتكم الطايحظها مثل وجوهكم

دُنيا : مشيت وياها اباوع العالم كلها تباوعلها ومتفاجئة من تصرفها وتبسبس حقهم اني لسة ما مستوعبة الي سوتة  ، اباوع اجتي مرة كلتلها

دشوفي لبسج اكيد يتحارش بيج اذا انتِ لابسة هاللبس البسلي جبه لو عباية واتستر بالبيت احسلي كاعدات تفترن بالحدايق متستحن والله يا الله هنه ينطن مجال ويكلك ليش يتحارشون بينه بنات اخر وكت

وكالعادة زبيدة من سمعت هالكلام لازم تغرد بلسانها النظيف

زبيدة : حجية تمشين منا لا امطلج بمكانه والكعبة

دُنيا : جريتها كافي زبيدة لخاطر الله انفضحنه ، درت وجهي اباوع للولد لسه يصيح من ايده والشباب الي بالحديقة ملتمين عليه اجت ببالي ايدة شلون كامت تنفض دم ، كلبت معدتي يمة ركضت لحاوية الزبالة وضليت اتقيئ

زبيدة : ياا هاي شبيج ، اسم الله اسم الله ... شجاج مسحت على ظهرها خلص خلص اهدي ما صار شي

دُنيا : غسلت وجهي وحلكي مابية شي لتخافين امشينه نطلع ، يمة كلما اتذكر منظر ايدة روحي تشوغ ، اباوع لست زبيدة تمشي اميرة زمانها رافعة راسها وتتمضحك ، شسوالج بله حتى شوهتي ايده بهالطريقة چان غلسي عنه

زبيدة : شنو اسكت تحارش بيه

دُنيا : تحرش جسدي ؟

زبيدة : اي النكس مد ايدة

دُنيا : وين ؟

زبيدة : عطت بيها هو شنو الوين علساس متعرفين وين

دُنيا : خلص خلص اسفة

زبيدة : ما صار شي ، ابتسمت شنو رأيج اعزمج بالمطعم ونتريك

دُنيا : مو تريكنه وبعدين شلون الج نفس تتريكين بعد السالفة الصارت

زبيدة : وشنو يعني نتريك مرة ثانية ، اما بالنسبة للسالفة فهو اني عازمتج حتى احتفل بالانجاز السويتة اليوم ترة مو شوية انو تخلين ذكر من الذكور الجائعة والسايبة تعرف حجمها وشنو هي لو فكرت المره توكف بوجها ، كلش كافي علية حسسته بنفس الوجع الحسيته اني وكت المد ايده النكسة علية ... حضنة ايدها يله امشينه لا اغير رأيي تدرين بية ام فليس

دُنيا : ضحكت يله .... دنمشي وسمعنه واحد يصيح باسم زبيدة درنه وجوهنه عليه اباوع هذا عمو يحيى تلبكت من شفتة

يحيى : ولجن اوكف نعلا على ابيجن راحن رجلية واني اركض وراجن ادري زيبك خوما زيبك خرب يومجن ...  هاا باباتي دنيا حبيبتي شلونج مشتاقلج والله

دُنيا : بارتباك احم الحمدلله عمو انت شلونك

زبيدة : هاي شلابس انت ؟

يحيى : اكلي تبن انتِ ما عليج ، ما كلتلي وين رايحات

زبيدة : للمطعم ، خير ؟

يحيى : ومنو راح يدفع ؟

زبيدة : اني

يحيى : لعد يله جاي وياجن مادام انتِ تدفعين ، ليش تباوعيلي شنو نسيتي جم مرة عزمتج على ريوك

زبيدة : هههههه حتعيرني انت ، يله تعال شكلي حخلص راتبي اليوم عليكم

يحيى : تعالن نروح بسيارتي ما اكدر امشي تعبت

دُنيا : صعدنه ويا ، الطريق كله اني مرتبكة هذا عمو يحيى ابو يوسف ، صديق بابا المقرب من جانو بالمدرسة همه سوه ولحد هذا يومنه همة اعز اصدقاء
بحيث الي يشوف معاملة عمو يحيى النه يكول ذني بناته مو بنات صديقة رغم هو ما عندة بنات وخلفته كلها ولد بس حيل يحبنه ويعتبرنه بناته

بابا من النوع ميحب يكون عندة هواي اصدقاء قريبين علية ،هو بس عمو يحيى وعمي عبد الله اخو بابا الجبير والي بابا لحد هذا يومنه يبجي على فراكة بسبب النوح الي تبرأ منه وحرم الكل يتواصل ويانه والسبب محد بينه يعرفة
غير بابا وعمو يحيى وماما وسيلة و وئام .. وصلنه للمطعم نزلنه كعدنه وطلبنه الاكل ، جابو الاكل وكعدنه نتريك

يحيى : عمو دُنيا اشو احسج مو على بعضج اذا وجودي مضايقج اكوم اروح والله جاي احجي جد حبيبتي المهم تكونين مرتاحه

دُنيا : ابتسمتلة لا عمو لتحجي هيج ممضايقة بالعكس  بس شوية تعبانه لان مشيت هواي خليك ويانه لتروح

زبيدة : على اساس اذا صدك كلتيله روح راح يروح ؟ باحلامج

يحيى : ليش تخليني افلش هالكلاص براسج وانوب انسجن وتصيرين انتِ السبب

زبيدة : داتخيل يقبضون عليك وياخذوك للسجن بتراكك الوردي هذا هههههههههههه

دُنيا : غصيت بالجاي والله ذب على الضحك اريد اسكت ما اكدر

يحيى : داقج تراكي لان متكدرين تلبسين هاي الالوان يا معقدة يا كئيبة وانتِ الثانية تضحكين على عمج وتشمتين هالحية الركطه بيه

دُنيا : هههه اسفة عمو بس ما كدرت اسيطر على نفسي

يحيى : عمي لو تضلين هيج تضحكين كل يوم اجيب زبيدة واخليها تنكت عليه بس حتى اسمع ضحكتج الحلوة

دُنيا : العفو عمو شنو تنكت عليك على راسي انت

يحيى : حبيبتي بنتي ابد ما تغيرتي نفس لسانج الحلو ، شبيج انتِ شناقصج متصيرين مثلها

زبيدة : تدري بيه انت ما اكدر اصير لطيفة هيج

يحيى : صدك زبد من اجيت سألت عليك البنية التتمرن وياها وكلتلي اليوم متعارك وكاص ايد واحد

زبيدة : اي صحيح واحد تجاوز علية

يحيى : شسوالج ؟

زبيدة : احم انت تعرف عمو ما كو داعي ندخل بالتفاصيل

يحيى : بس قصرتي انتِ

زبيدة : بعصبية شنو قصرت جاي اكلك تجاوز حدودة وياية شنو تريدني اسكتلة لو اشكره

يحيى : المفروض مو بس تكصين ايده ، اشر على رجلية المفروض تنزعين البرجلج وتحطي بحلكة بالعرض حتى يحتم مرة ثانية يتجاوزلة على وحدة

زبيدة : ابتسمت يعني برأيك السويتة اليوم صح

يحيى : رب الصح وعاشت ايدج احنه عايشين بزمن يا بنيتي اذا متصير بي قوي وكادر تحمي نفسك يجي الصغير قبل الجبير يدوسك وساعتها القندرة الوصخة راح تدوسك قبل النظيفة فعاشت ايدج وراسج ينباس ، بتصرفج هذا خليتي هالجايف الماعندة غيرة كلما يشتهي يتحرش بوحدة يفكر الف مرة

دُنيا : حاطة ايدي على خدي واباوع لزبيدة شلون عيونها تلمع ومكيفه بكلام عمو لان ايد تصرفها وشلون بسرعة انسجمت ويا رغم زبيدة تكره الزلم بس علاقتها بعمو يحيى كُلش حلوة وقوية
ودائما جانت تكلي عمو يحيى يختلف عن باقي الزلم
ساعات من اشوفها شلون تعامل عمو وتتشاقة ويا انقهر على بابا اليدور منها الحجاية ويحاول يخلق اي موضوع بس حتى يسولف وياها ... تنهدت يا حبيبي يا بابا فدوة رحتلك

يحيى : يله بناتي اذا كملتن حتى نطلع اوديجن واروح للبيت اغسل وابدل حتى اروح لشغلي

زبيدة : عمو

يحيى : خير 

زبيدة : اجت الفاتورة

يحيى : اي متدفعين مو عازمتنه انتِ

زبيدة : ماراح تشيلك الغيرة وتكول عيب ذني بنات اني ادفع بمكانهن ميصير

يحيى : ليش يمة تشيلني الغيرة مو انتِ عازمتني  ددفعي وبطلي هالسوالف تمشيهن علية ولج هاي سوالفي

زبيدة : فتحت جنطتي استغفر الله طار الراتب

يحيى : ههههه بت الكلب يا راتب هذا الطار هنه بيضات وجاي وشوربة ولج

زبيدة : ضحكت يلة ما اعز عليكم الفلوس ، هاي دفعت يلة امشونه الساعة صارت بالعشرة ونص داومي يبلش بالوحدة يادوب اروح اشوف امي واطلع للمدرسة عندي امتحان اول درس يله بسرعة

دُنيا : طلعنه ويه عمو رايحين للبيت ، طبعا حيل تونست اليوم وية عمو وزبيدة اتعجب على اليكولون على زبيدة معقدة وانفه والله سوالفها تخبل بس لو ما طباكاتها التطلع ساعات

وصلنه للبيت سلمنه على عمو ونزلنه ... دخلنه للبيت لكينه العاملات ملتمات ويسولفن واكو ممرضة كاعدة بالصالة خير ان شاءالله هاي شكو

زبيدة : والله علمي علمج ... خالة ام حسن هاي شكو ملتمين بالصالة ومنو هاي وشعدها الممرضة

ام حسن : حبيبتي هاي ممرضة للست وسيلة جابها ابو معين

زبيدة : ليش ؟

ام حسن : غير طلعوها من المستشفى وهستوهم جابوها واجوي صعدوها لغرفتها

زبيدة : شلون شلون ,  ذبيت جنطتي وصعدت ركض فوك فتحت غرفتها لكيتهم ملتمين عليها  وهي نايمة ، بعصبية هاييي شنوووو منو سمحلكم تطلعوها من المستشفى ، انييييي مو كلت متطلع من المستشفى هوووو عناد لو شنو

ياسر : امچ نايمة بوية صوتچ

زبيدة : ببببحال امي انت ، لو مييت عليها جاوبني ليييش طلعتها انييي شكلت مو كلت متطلع

ياسر : تأدبي زبيدة ، هاي عليمن هالصياح شنو انوب اذا اريد اسوي شي اخذ رأيج او رأيي غيرج

زبيدة : هه ما سويتها قبل حتى تسويها هسة

ياسر : للمرة الثانية اكول احترمي نفسج ونصي صوتج من تحجين ويه ابوج ما اريد اعاملج بأسلوب اني نفسي اكرهه وادري بروحي راح اتندم عليه بعدين  كافييي ثكلي ترة مصختيها وطلعتيها من ماعونها مو بمعناها انتِ بنتي واني احبج واحترمج ممكن اسمحلج تقللين ادبج وياي

وئام : زبيدة حبيبتي والله هذا كان طلبها هي رادت ترجع للبيت وسألنه الطبيب واكدنه علية انو طلعتها ما راح تأثر على صحتها ولو الطلعة تاثر عليها  ولو واحد بالميه يمنع خروجها بس هو كال كُلش عادي واصلا وجودها بالمستشفى كل هالفترة يأذي نفسيتها وهاي كدامچ جبنه ممرضتها حتى تبقى وياها واحنه كلنه وياها وبخدمتها من صغيرنه لجبيرنه كافي يا امي صارلها فترة بالمستشفى تدمرت نفسيتها والله

زبيدة : انتِ رجاءًا طلعي خارج الموضوع ولتدخلين بشي ميخصج ، الجاي اسولف ويا هذا ابوية والنايمة كدامج هاي امي ، امي شنو !!  هاي روحييي تعرفين شنو يعني روحي لا يمكن اسمحلج انتِ او غيرج تتدخلين بامور تخصها

ياسر : بسسس كافي هييي ادبسزز شهاللسان الزفررر

زبيدة : لتعليييييي صوتك عليه

دُنيا : همه ملتهين يتعاركون واني عيوني على ماما وسيلة اباوعلها ولازمة كلبي ياحبيبتي يا ماما هاي شصاير بيج اخر مرة شفتها قبل شهرين وانهاريت
فبعد ما رحت لان تأزمت نفسيتي عليها واليوم رجعت شفتها ، حالتها صايره اسوء من قبل

خدودها الحمر الجنه نكرصها منهن ونكلها ليش ماعدنه مثلهن هسة رايحات ويه شحبوب بشرتها
لو شعرها الطويل الجانت تكعد وتنطي النه نظفر
بي واحنه متونسين وما لامتنه الدنيا  ..... نملت عيوني دموع واني اباوعلها حواجبها ورموشها التخبل  واكعة و ضعفانه لدرجة
عضامها مبينه بعد ما جانت مربربة ونضوجها من نكرص بيها ونصيحليها دبدوبنه الحلو وهي تضحك
وتضرب بينه ... يروحي يماما سودة عليه هاي شصاير بحالچ  .... فزينه على صوتها التعبان وهي تصيح لزبيدة

وسيلة : يمه زبيدة

زبيدة : رحتلها ركض ها يروحي ها يعمري انتِ طمنيني عنج شلون صرتي والله هستوني جنت رايحة ابدل واجيچ ... ليش طلبتي ترجعين للبيت يا حبيبتي والله المستشفى احسن الچ على الاقل كل كادر الاطباء مالتج داير مدايرچ واامن لصحتج .... اباوعلها شالت عيونها علينه ودموعها نزلت ليش تبجين يروحي موزين عليج الدموع

وسيلة : شتاقيتلكم واشتاقيت لبيتي كافي مليت من المستشفى ومن الادوية اريد ارجع بحضنكم واكضي البقى من عمري وانتو يمي  

دُنيا : اباوع لدموعها وكلبي يتكطع ... والي لفت نظري وشدني اكثر زبيدة الكاعدة كبالها شلون لمت اديها ورة ظهرها وكامت تكرص بيهن من كل وكلبها هاي ليش دتسوي هيج بروحها

زبيدة : احم ماما اذا كان وجودج بالبيت يريحج خلص على راحتج يروحي المهم صحتج ونفسيج تكون زينة
مو دنيا هي اذا بقت هنا راح تتحسن مثل ما كال الدكتور

دُنيا : سألتني وكأنها تريد واحد يكلها لتخافين طلعتها من المستشفى ماراح تأثر على صحتها ... اي اكيد ماما اكيد راح تتغير نفسيتج وتصيرين احسن قابل الطبيب ميعرف من كال خلوها تطلع

زبيدة : شفتي اكيد راح تصيرين احسن و وو واني ما راح اعوفج واذا تردين اخذ اجازة بدون راتب اكعد وياج حتى متملين شش شتكولين

وسيلة : لا حبيبتي ماكو داعي التزمي بدوامج واني ما طايرة باقية طول الوقت بغرفتي وانتِ ماما دُنيا ليش ما سلمتي علية تعاي ابوسج

دُنيا : فتحتلي اديها ... تقربت بسرعة بست ايدها وراسها وهي حضنتني ، خفت احضنها لا ااذي عضامها لان كُلش ضعيفة صايرة ، هي حست علية وشدتني الها وكأنها تحثني حتى احضنها ، حضنتها وبس شميت ريحتها الطيبة الي رغم ريحة المعقمات الموجودة بهدومها باقية بس شميتها بجيت وعضيت شفايفي حتى لا احسسها

وسيلة : شلون صرتي يا امي طول فترة علاجي وانتِ واخوتج على بالي ما مر عليه يوم الا واني واندعيلكم وبألاخص انتِ وقت الجنت اخذ الكيمياوي وعضامي تضل تصل علية اكله ربي بحق هاي الشده والابتلاء الخليتني بي تبرد كلبي بنيتي دُنيا وتخفف عنها المها على وليدها

دُنيا : اااااااه يا ماما شكد مشتاقتلج ومشتاقة لحجاياتج التبرد كلبي وهو نار

زبيدة : اباوع لماما شلون هي ودنيا وحدة حاظنه الثانية ويبجن ادري امي مشتاقة النه وتخاف تموت وتعوفنه ودنيا تبجي من وجع كلبها شلت راسي لكيت وئام تبجي وياهن وبابا عيونة مدمعة ، رفعت اصابعي اكرص بأيدي ، لتبجين لتبجين اياج اياج زبيدة اطيح حظج والله ... احم ماما حبيبتي اني لازم اروح تأخرت على دوامي وتعرفين الشارع ازدحامات تقدمت بسرعة بستها وطلعت اركض رايحة لغرفتي فتحتها ودخلت قافلتها بسرعة ، كعدت بالكاع وسمحت لدموع تنزل

يربي لا كُلشي الا امي لتعجل روحتها يمك اعرف علاجها ما جاي يجيب نتيجة والورم واصل مرحلة وياها لدرجة صارت اشبة بالمشلولة بدون مساعدة متكدر تكوم ، بس هم لا ما اريدها تروح ماعندي غيرها

الوحيدة الي مخليلي سبب اعيش لاجلة هو وجودها لمجرد تخيلي من اكعد من النوم هي موجودة بحياتي يجيني دافع اكمل اليوم واني فرحانة ، لو لمن تحضني واشم ريحتها الي عبالك مهدئ ترتاح الروح لو شمته

يربي ادري بروحي وكحه ولساني طويل وادري
بروحي ما باره بابوية بس لتاخذني بذنب وتعاقبني بأمي انت الوحيد تعرف هي شنو بالنسبة الي اذا
صار عليها شي اني انتهي يربي شافيها ياا رب اذا مو لخاطري لخاطرها هي كافي تعذبت لا بشبابها ارتاحت ولا من كبرت ارتاحت انت الرحيم ارحمها ... باوعت للساعة حتى البجية تجي باوقات غلط تنهدت ماسحة دموعي وكمت دخلت للحمام

اني زبيدة النوح ، اي وحدة لو تجي وتعيش حياتي يمكن تكون بقمة سعادتها كون ابوها ياسر النوح من اشهر التجار بالعراق والي ما مخلي بناته بعازة شي المدللات الي لو طلبن نجوم السما ينزلهن الهن والي  جدها النوح اسمة وحده صك يخلي اي واحد يسوي الي يعجبة بدون مينكله على عينك حاجب ، بس الحقيقة تختلف شوية

اني زبيدة الطفلة الجان ابوها يصيحها من يجي من السفر ويكون جايبلها جنطة بطولها مليانه العاب تجنن وتاخذ العقل وزبيدة مثل اي طفل من يفرح بحاجة يركض يراويها لامها حتى تشاركة فرحتة بس !! جانت زبيدة تفتح باب غرفة امها وهي متلهفه تالي  تلكاها كاعدة بالبلكون ، تبجي بسبب ابوها وبسبب كلب ابوها الي مو يم امها

من جنت طفلة واني الحضن التنزل دموع امي بي بعد كل ليلة يكضيها ابوية بحضن مرتة الثانية العشقها وفضلها على امي ، وعيت على الدنيا واني اشوف امي مخلية ابوية شي مقدس بالنسبة الها ما عمري سمعتها حجت علية لو ذمتة بكلمة وحدة

جانت دائما الصدر الرحب اله ولمشاكلة الصدر الينذب حمل ابوية علية وقت اليتعب ، جانت امي تحب ابوية لدرجة اذا تمرض وصخن تلكاها تنشغ علية مثل الطفل
العندة حاجة عزيزة وانمست ، عمري وحياتي ماشفت انسانة تحب رجلها مثل ما امي حبت ابوية ، حبتة لدرجة فضلت سعادته على سعادتها حبتة لدرجة فضلت دمعتها التنزل كل يوم مو دمعته على حب حياتة

جانت تحببني بي واني جنت كلما اشوفة وية وئام واشوف دموع امي المانشفت من 24 سنة اكرهه بالزايد وانفر من وجودة ، شكد حاول يتقرب مني وبكل مرة يحاول اكرهه اكثر تصرفاته وياية شلون اليحركلة واحد ويجي يكلة اني اسف
محاولات ابوية وياية جانت هاي الاسف والي مستحيل ارضاها منه وحتى مرض امي واصابتها بالسرطان كانت بسببه

اني بحثت وسألت هواي اطباء سواء داخل العراق او خارجة وكلولي انو السرطان عبارة عن تراكمات نفسية
تتجمع من سنين وتشحن الاوعية الدموية بالجسم وتزيد من احتمالية انتشار خلايا السرطان بالجسم حتى لو كان المرض بعدة ببداية النفسية عامل اساسي بانتشارة او مقاومتة وهالشي خلاني اكره ابوية اكثر من قبل ، امي لو نفسيتها مرتاحة وماكو ذيج الغصه التاكل بكلبها ما كان هذا حالها

امي انصابت بالسرطان الروحي من يوم الاعترفلها ابوية بحبة لارملة اخو ورغبتة انو يكمل حياته وياها ناسي الجاي يصارحها بمشاعره مرته مو امه وهذا الشي الي لحد الان ابوية ما ناوي يتقبلة انو وسيلة مرتة مو امه

ضعف امي وحبها لابوية وتعلقها بي لهالدرجة خلاني اكره كل الزلم لان ماكو مره بهالدنيا ارتاحت وياهم دائما اكو غصة تعيشها المره ويه الرجال حتى وان كان اكو حب متبادل بينها وبينه

وابسط مثال دُنيا ويوسف كان اليشوفهم سوه ويشوف نظراتهم لبعض يكول خلص ذولة ختموا الحب تالي بسبب هالحب دُنيا تعيش غصة لهذا يومنا تعاني منها ، لو ضي الي تزوجت مُبين عن حب والي موت روحة عليها ياله حصلها تالي الجايف من صارت عندة ميخلي ليلة تمر عليها اذا ميجنزها ويخلي دمها بطولها لا ويعيرها بعقمها الي ما الها اي ذنب بي لا وترة مو بس ذني اكو غيرهم آلاف من النساء جاي يعانن بسبب ادم

كل هالحالات الشهدتها خلتني اكون حذرة وياهم واكرهم ولا يمكن اسمح لنفسي اتعلق برجال او حتى افكر اتقرب منهم دائما جنت ومازالت خاله الف حاجز بيني وبينهم لايمكن اسمح الي صار ويه امي و ويه باقي البنات يصير وياي لا يمكن اخلي رجال يكون سبب
بضحكتي او دموعي مسسستحيل اني زبيدة اني استثنائية عن الكل ، اني حبيبة نفسي ، اني فرحتها وحزنها ، اني قوتها وضعفها ، وراح يبقى آدم المرض الي لاخر لحظه بعمري اقاومة واحصن نفسي منه حتى لا يصيبني واعيش بسببه نفس العاشنه قبلي

فتحت الدوش سبحت بسرعة باوعت للمراية عيوني حمر ، شكدددد اكرهجن دومجن فاضحاتني رجعت فتحت الدوش اخذت شامبو غسلت شعري بي مرة ثانية وفتحت عيوني متعمدة حتى يطب بيهن الشامبو اااخ خرب بس يلة حتى اليسألني شبيهن عيونج اكله طب بيهن شامبو وما اطلع جذابة
كملت وطلعت بدلت ملابسي ، اخذت جنطتي وغراضي وسويجي وطلعت

مريت على غرفة دُنيا دكيت الباب ودخلت لكيتها كاعدة تقرة قرآن ... اني طالعة محتاجة شي اجيبلج ويايه شي

دُنيا : صدقت وشلت راسي ، ابتسمت لا حبيبتي سلامتج ، ديري بالج على نفسج ولتسوقين بسرعة اعرفج مسودنه بالشارع

زبيدة : لا لتخافين عليه يله باي .. طلعت متوجهه لغرفة امي فتحت الباب لكيتها نايمة ابتسمت دخلت بوست اديها اروح فدوة لكل وريد ينبض بأيدج ، ربي ليحرمني منج ، غطيتها وطلعت لكيت وئام بوجهي شايلة صينية .. اشرتلها على الصينية شنو ؟؟

وئام : سويت شوربة لوسيلة اكيد جوعانه كلت تسد جوعتها علما يتحضر الغدا

زبيدة : شحاطه بيها ؟؟

وئام : على بختج زبيدة والله العظيم كُلشي ما حاطة بيها حتى اذا تردين هسة اكل منها كدامج

زبيدة : لا لا مو هذا قصدي ، اقصد خوما حاطه زيت او مكلية شي حتى زيت زيتون ميصير

وئام : لا كل الخضروات سلكتها ما خليت ولا قطرة زيت حتى سويتها الها بأيدي خاف العاملات ميسونها صح

زبيدة : ماشي ، اجيت اروح بس الفضول اكلني خرب يوم الفضول العندي ، بس سؤال انتِ مو عندج دوام ليش ما رحتي

وئام : اخذت اجازة تلث ايام

زبيدة : ليش !!

وئام : شلون ترديني اروح للدوام واعوف امج منو يدير باله عليها انتو كلكم بالدوام ودنيا متكدر وحدها قابل اخلي الخدم يهتمون بيها لا ما اامن عليها خليها كدام عيوني هالايام وعود نتناوب عليها اني وياكم  بعدين

زبيدة : باوعتلها وتنهدت ماشي على راحتج ، مع السلامة .... طلعت من البيت ، شنو هالحنية معقولة وئام صدك تهتم لامي اشو ميخش بدماغي هالحجي
وية مداطلع سمعت احد يصيحلي ردت وجهي شفت ضي وراي ... خير ؟

ضي : اوكفي يمعودة نسيتيني

زبيدة : باستغراب شنو نسيتج

ضي : غير نروح للدوام سوة شبيج زبيدة

زبيدة : هااا اي والله صحيح نسيت احنه نروح سوة والله شدهتوني اااااااالله ييييشدهكم 

ضي : صوتج ولج فضحتينه

زبيدة : فتحت سيارتي دصعدي شكلي راح اموت ناقصة عمر من وراكم ... صحت لعمو فادي عمووو

فادي : امريني بوية

زبيدة : ميأمر عليك ظالم فدوة عمو خوما اسوقها وتبنجر عليه مثل اول بالبارحه كون واحد ادمي صلحها

فادي : لا لتخافين جربتها قبل لا اجيبها مثل الورد رجعت

زبيدة : ماشي رحم الله والديك مقصرت ، يله باي حركت سيارتي وطلعت ، باوعت لاصابع ضي صايرات زرك على بنفسجي ، الخنزير رجع ضربج مو

ضي : شمدريج

زبيدة : ميرادلها ذكاء اذا نجيب مطي ونراوي ايدج راح يكول بدون تردد هاي مكتولة ،  هالمرة شنو السبب

حالة عصبية ؟ لو نفسيتة تعبانه وانتِ لحيتي علية بالطلبات ؟ لو حاسبتي لان يخونج ؟
لو لان امتنعتي عن فراشة لان نفسيتج تعبانه ومتكدرين ؟ لو لان ما صبغتيله اللون الكلج صبغي الي ؟ لو لان كلج سويلي اكل وكلتليه مابية حيل ؟ اي حجة او مبرر من ذني

ضي : اووووف يا زبيدة لتذكريني حبابة

زبيدة : جديات داحجي سولفيلي هالمرة ليش ضربج
ابو ايد الجربة

ضي : راد ذهبي وما انطيته اله فضربني وزلخ البتوت من ادية واخذهن جبر

زبيدة : ياخذ سم وزقنبوت بكلبة شنو ياخذ ذهبج عايز هو قابل مو حلكة عفن من الفلوس بحيث كامن يطلعن من خشمه ، نفسه دنت على الذهبات الجابهن ابوية الج شهالنننننفسية هاي يربي
ااااااخ كون نعال ومشمور بشمس البصرة واجيبه واحطه بحلكة هالكلب ، عطت بيها ولو هو مابي صوج انتِ الصوج بيج يطبج مرض 

ضي : انوب طلعت اني الغلطانه فوك ما اخوج يستقوي علية ويضربني واني لا حول ولا قوة والله لو عندي اهل فلا ابقى عندة بس وين اولي انتِ كليلي عند اخوتي ونسوانهم الجانن مسوياتني مكفخة وخدامة الهن ولبزرهن لو اروح لعمامي الي طردوني اني واخوتي من يوم الماتو اهلي واكلوا ورثنه

زبيدة : يغبرة الغبرات مو كتلج اذا يضربچ ضربي لتسكتيلة اليقلل ادبه وياج طلعيله انكس ما عندچ وبعدين اني مو انطيتج موس وكتلج كلما يحاول يعتدي عليج ضربي ... اباوعلها لطمت على صدرها

ضي : عزة بعيني ترديني اضربة بالموس

زبيدة : اوووي لعد هو عادي يضربج ويشوة عينج بس انتِ تتحسفين توجعي والله انتن النسوان مال واحد يحطجن ووين ميوجعجن ولج صيري عندج شخصية
ترة هذا جبان مادامه يتقاوى عليج يعني جبان اليطلع عضلاته على كائن مو بكده لا بالبُنية ولا بالقابلية اكيد ضعيف بي حظ خلي يطلعهن ذني على الزلم مو مبارك
هزيتلها كتفي صايرلي زلم على النسوان

ضي : ما ادري اني ما اكدر اصير مثلج روحي متنطيني

زبيدة : ولا بعمرج حتكدرين تصيرين مثلي ، بس اصبريلي عبالج ماكو احد بظهرج والله لربي الج بس خلي نرجع بخير وسلامة ... يلة وصلنة ... لحظة ،  مديتلها ايدي يله

ضي : شنو ؟

زبيدة : ايدج على الكروة

ضي : دولي انتِ وشقاج الماصخ هذا

زبيدة : ههههههه دنزلي  ... نزلنه دخلنه للادارة رحت لغرفة المدرسات خليت غراضي ورحت استنسخت اوراق للطلاب وتوجهت لشعبتي ... دخلت مبتسمة حتى ما اوترهم ، مساء الخير حبيباتي

الطالبات : مساء النور ست

زبيدة : هاا شلونها المعنويات للامتحان  ، ابد لتخافون المادة شرحناها وامتحنه بيها هواي وهسة حتشوفون الاسئلة شكد بسيطة ومن الشرحنا باليوم اصلا حتضحكون على الاسئلة يلة مستعدات اوزع ؟  ، اوك لعد يلة سمو بسم الله

بديت اوزع الهم الاوراق ، على كيفكم من تحلون عدكم الدرس كلة لتستعجلون هذا امتحان شامل للفصل اعتبرو روحكم دتمتحنون للوزاري ، حتى تاخذون درجه كاملة كالمعتاد
كملت توزيع وكعدت اصحح اوراق الشعبة الثانية
شوية وطبت طالبة اول مرة اشوفها اباوع للوجه عبارة عن لوحة من المكياج والعلج يطك بحلكلها استغربت منظرها باوعت للساعة صار ثلث ساعة على بداية الدرس ، هاي شلون دخلت ؟

: ممكن ادخل

زبيدة : اكيد ممكن بس الدرس صارله ثلث ساعة بادي جايبة ورقة وياج من الادارة تسمح بدخولج ؟

: لا

زبيدة : باستغراب لعد شلون دخلتي

: ما اعرف بابا دخلني وهسة ادخل لو لا ترة تعبت من الوكفة عندج شي سألي المدير هو كلي روحي

زبيدة : استغربت اسلوبها تنهدت ما اريد اعيط بيها ما احب طلابي يضوجون مني  ، اهدي زبيدة ، حبيتي ممنوع تدخلين بدون ورقة من الادارة علاوة على ذلك ، انتِ شلون دخلتي من الادارة بهالمنظر هذا المراقبات سمحولچ تدخلين بهذا المكياج واللبس 

: ليش شبي منظري ولبسي وبعدين منو ذني المفتشات حتى يحاسبني اني دخلت بأمر من المدير

زبيدة : ردت علية باسلوب قمة بالوقاحة ، طبعا هالبنية دتجبرني اترك دور المدرسة واطلعلها زبيدة الحقيقية واذا طلعت زبيدة الحقيقية راح تخرب سمعتي بين الطلاب ، تنهدت حتى اكون هادئة

عيوني نقطة راس سطر هاي المدرسة الها قوانين وهالقوانين تمشي على كل الطالبات ، حالج من حالهن هنه هم يحبن يحطن مكياج ويلبسن احلى ما عدهن
بس ملتزمات بقوانين الدائرة الهنه بيها فشنو فرقچ عنهن لو انتِ احسن منهن ؟ اني مالي اي حق اتدخل بيج او بأي طالبة خارج هالدائرة بس دخلها لا لازم كلنه نلتزم بالقوانين ، هالمرة حمشيها ، وهسة تفضلي دخلي لكن اتمنى هالمخالفات متنعاد بعد

اباوعلها مشت وتطك بالعلج شمرت جنطتها وكعدت شلون اللعبانه نفسها هزيت راسي يربي صبرني على هالعلة الجديدة الطلعتلي .... دك الجرس كمت اخذت الاوراق

: ست حبابة والله بعدني ما مكملة

زبيدة : وعليمن حتبجين يكلبي هياتي كاعدة انتظرج علما تكملين بنات الكملت تطلع ، كملت البنية ها شلونها الاسئلة

: ست كلش سهلة

زبيدة : ولا سهلة ولا ابد انتو قارين وسباعيات فتضحكون على المادة ابتسمت طالعة من الشعبة شكد ترتاح نفسيتي من اشوف طلابي يفتهمون علية ويحبوني احس يومي كله يتغير خصوصا من الطالبات يكلولي جنه نكرهه الرياضيات وحبينا بسببج يا الهي احس كلبي يضل يرفرف

دخلت للادارة اجت المعاونه انطتني فايل البنية الجديدة حتى انقل معلوماتها يمي فتحت فايلها اسمها لارا اباوع درجاتها كلها
100 حتى 99 ماعدها ما شاء الله ممبين عليها
كملت اليوم اني وضي وطلعنه المغرب ، طول الطريق عيني على ضي الصافنة بالفراغ ومبينه شكد مهمومه
شبيج ؟

ضي : سمعتي اليوم ست انفال شكالت

زبيدة : ما جنت مركزة شدتحجي شنو شكالت

ضي : كالت انو رجلها ضربها وكسر ايدها فراحت خابرت اخوتها واجوي اخذوها وسوو على رجلها كعدت عشاير لان ضربها ، اجه ببالي مُبين شلون
مرة ضربني بوكس على عيوني وطكلي شريان بعيني ونقلتوني للمستشفى وسويتولي عملية فورية كد ما جانت عيني متضررة

زبيدة : شجاب موقف انفال على الموقف الاجه على بالج

ضي : يعني اجه ببالي انو لو مجنت اني يتيمة او لو جان عندي اهل لو اخوان براسهم خير مو چان احتميت بيهم من مُبين وراحو اخذولي حقي بدل ما اني باقية مكفخة اله

زبيدة : واني شنو خراعة خظرة هنا لو ما ماليه عينج جم مرة اخذتلج حقج منه جم مرة اكل كتلة على حسابج واكون بكامل سعادتي لان انكتلت واني جاي ادافعلج

ضي انتِ اختي الماجابتها امي صدكيني معزتج من معزة خواتي والله متفرقين عنهن بشي وهسة تشوفين والله اليوم على هاي دموعج ما ابيتها لمُبين والله اله اقهره مثل ما قهرچ 
وصلت للبيت صفيت سيارتي بالكراج ونزلنه دخلنه جوه

ضي : اني صاعدة ارتاح لحد يصيحلي على العشاء

زبيدة : على راحتج حبيبتي اصلا لتنزلين اليوم
.... صعدت لغرفتي ركض اخذت حمام بسرعة ولبست تراك راهي افييش يمة شكد احب الملابس العريضة ... نزلت ركض

دُنيا : كاعدة احضر العشا وسمعت صوت هبط خير يا ربي طلعت بسرعة اباوع لزبيدة تنزل الدرج وتهبد
يالخبلة يالمسودنه شبيج هو الواحد هيج ينزل

زبيدة : ليش شلون ترديني انزل هسة عوفج مني مُبين وين وية مداسئلها طب مُبين يا هلا ومية هلا نورت وانست وشرفت فدوة لخشمك

مُبين : خيرج اليوم شنو هالاستقبال الغريب هذا لا ومنج يطلع هذا الاغرب

زبيدة : لعد شلون ما استقبلك هو كم خنزير اكو بهالبيت هو بس انت

مُبين : عفوا

دُنيا : خزرتها شبيج زبيدة شهالحجي بعدج هستوج اجيتي حتبديها بمشكلة

زبيدة : انتِ سكتي ومالج دخل ، باوعتلة اعذرني اخوية الغالي تخربطت علية الاشكال والروائح هم

دُنيا : زبيدة تجفي الشر

مُبين : سكتي بله دنيا ، تعاي ولج شو انتِ تلطشين بالحجي مشتهيلج كتلة الظاهر

زبيدة : اي والله مشتهيتها لفد واحد خنزير يطلع ذكوريته على النسوان المعفن لو نحطه بين الزلم 
يطلع مسويها على روحة

دُنيا : هي حجت هيج وما اشوف مُبين اجه وصفكها راشدي

زبيدة : لا ليش هيج ، ابتسمت عود عبالك توجعت ههههههههه هاي كل قوتك ، هزيتلة كتفي
رجفتني ، لج شهالنعومة مُبينه عبالك دتمسحين على خدي  يحلوة انتِ يدلوعة ههههه اعذرك ذكر هاي كل قوتك

دُنيا : كلام زبيدة استفز مُبين وهو عقلة صغير ويه ما كلتله هيج سحلها من شعرها ركضت اريد اجرها منه بس ماكو معرت بيها ميقبل يعوفها ملخ شعرها بأيده ويدفر بيها عبالك كيس ملاكمة مو بشر كدامة

اباوعلها مدري شلون لزمته ولكطته عضه بأيده  وجلبت بي انوب عافها واحتار شلون يوخر سنونها عنه بس ماكو منبته سنونها بأيدة اباوع لوجها تضغط باسناها
كل قوتها خلته يصرخ وعلى صراخة كلها نزلت تركض

مُبين : بت النعال ايدي ايدددييييييي ولج اييييدي

ياسر : خير خير شبيكم

مُبين : تعاااااااال وخرررر هالجلبة من ايدي ااااااااخ وللللللللج نعااااال عوفي ايدي

دُنيا : جنت حايرة شلون افك زبيدة من ايد مبين هسة كل البيت احتار شلون يسحب زبيدة عن مبين اباوع لبابا ركض شالها وهي بعدها مصره ومثبته سنونها بأيده لمن بابا شافها متقبل تعوفه لطمها على وجها ياله عافته هم يضحك وهم يبجي ، اختي انچلبت خطية

اباوع لايد مبين وحق الله سوتله ساعة مثل هاي الچنه نسويها واحنه صغار بس هاي ساعة من ساعة
والساعة تنزف دم ، وزبيدة بعد كل السوتة انهدت علية وبابا مجتفها حتى متتحرك

زبيدة : يالخنزير شوف اني المرة شسويت بيك هههههه خطية مو رجال كتلته مره ههههه باوع لايدك يحراممم مرة طلعت دمك هههه حتى مرة ثانية ميجي ببالك عود انت رجال وتكدر للنسوان خخخخخ تف عليك معفن كدرتكم على النسوان الضعيفة المرة المثلي تشك حلوككم وصلتين سفلة وانت بابا هدني شنو مجتفني راح اشرد قابل 

ياسر : وئام اخذي ابنج وصعدي فوك

مُبين : انتتتتتت راح تسكتتتتلها

ياسر : بعصبية روووح جاي اكول اني اتفاهم ويه اختك

زبيدة : استغفر الله هسة غير يهدني ، اباوعلة دفعني حيل حتى خرعني

ياسر : الظاهر انتِ يرادلج تلقيح بأسرع وقت صايرة مو امان لسانج طولان وتمشين وتعضين ،  باجر حضري نفسج تجين ويايه للمستشفى القحج

زبيدة : بعصبية شنو شايفني چلبة حتى تلقحني

ياسر : نصي صوتج من تحجين ويه ابوج حيوانة وهاي العنتكه والنترة بطليها فتهمتي لو لا ترة انطيتج وجهه زايد

زبيدة : ترة ان...

ياسر : ولا كلمه ادبسززز شنو مالج رداد انتِ اذا اي تصرف خارج يطلع منچ بعد صدك اعتبرچ جلب واعاملج مثل ما اعامل الحيوانات كافي ثكلي امج بيا حال وانتِ كاعدتلي تتعاركين لا وياريت وكاحتج طالعة على البكدج لا تتعاركين ويه اخوتج الكبار همممممه بكدچ ؟ ييييمج ؟  كرباچ ؟ ليش تتحارشين ومن واحد يحاچيچ تتمزعلين كافي احترم نفسي
كل يوم مشكلة كل يوم مشكلة هسسسه اني يطبني مرض لخااااطر امچ هيج قليلة ذوق انتِ وماعندج احساس

دُنيا : اباوع لزبيدة الدمعة صارت بطرف عينها لان هاي اول مرة بابا يرزلها هالرزاله

زبيدة : قبل لا تتهمني بقلة الادب وقلة الذوق چان سألتني اني ليش سويت هيج ، ترة مُبين مشوهه ادين ضي وتكدر تصعد وتشوف ايدها بنفسك ، واني سويت كل هذا حتى اخذ حقها ولتكلي ليش تتدخلين ما اكدر اشوفها ضعيفة ومكسورة ، اذا يتيمة عادي يعني رجلها يعنفها ويأذيها هيج والمفروض اذا هو اخونه منوكف ويه الحق وندافعلها ؟

عفوا منك بابا بس اذا انت تشوف دفاعي لضي
وعضتي لايد مُبين الاندمت عليها قلة ادب وذوق
فأفتخر بكوني قليلة ادب وذوق من رخصتك
عفتهم وصعدت لغرفتي 

دُنيا : من بعد كلام زبيدة بابا راح كعد وخله ايده على راسة ، الله يساعده منين يتلاكها من قلقه الملحوظ على ماما وسيلة لو من مشاكل البيت لو من الشغل الواكع كلة راسة تقربت كعدت بصفة اباوعله تمدد على رجلية ، مسحت على راسة المشيب هونها بابا عادي مشاكل بيت وتصير

ياسر : تعبت يا بنيتي ما اعرف شلون اتعامل ويه زبيدة او من يا باب اطبلها وافهمها تعبت ومرض امها تعبني اكثر

دُنيا : ترة بابا هي زبيدة شخصية معقدة ومزاجية يعني عادي يكون صعب عليك تتعامل وياها واذا على ماما وسيلة فشبيها مو هياتها بيناتنه ومثل الورد

ياسر : ياورد يادنيا يا ورد ، انتِ عبالچ رجعتها للبيت هيج لله ... ترة الطبيب بالنص كللنه اذا تريد تطلع طلعوها حتى تتحسن نفسيتها بيناتكم لان العلاج ما جاي يجيب وياها اي نتيجة فالافضل الها تبقى هاي الايام وياكم احسن ما

دُنيا : اباوع لعيونة الي انترست دموع وهو يسولف احسن ما شنو احجي بابا

ياسر : احم احسن ما تصعد روحها وهي بين الاجهزة
ايام وسيلة صارت قليلة يا دُنيا وياخوفي ياخذها ربج واني مو يمها لو ما الحك اودعها

دُنيا : لتحجي هيج بابا الاعمار بيد الله هذا الشي لا طبيب يكدر يحدده ولا اي احد اصلا كفران منك تاخذ بكلام الطبيب على انه صك ، علم الغيب بأيد رب العالمين هو اليحدد شوكت نموت وشوكت نعيش

ياسر : اااخ يا دنيا تدرين وسيلة چم مرة هسة سألتني شنو من الايام اليوم لو جم مرة اليوم سألتني اني شنو اسمي واني اكلها اسمج وسيلة وتاخذلها ربع ساعة وترجع تسألني نفس السؤال
ياسر اني شنو اسمي ؟ وسيلة كامت تنسى اسمها ومع  هذا مو هالشي القاهرني

دُنيا : لعد

ياسر : القاهرني انها نست اسمها بس ما نست اسمي يادنيا 

دُنيا : شوف لعد شكد تحبك

ياسر : واني هم والله احبها اذا ماتت وين انطي وجهي والمن اروح اني بلياها ما اسوه شي ، وسيلة بالنسبة الي الملجئ المحتويني اذا انطردت من ملجأها اضيع

دُنيا : اباوع لبابا الي دموعه ما وكفت لحظة وحده وهو يسولف على ماما وسيلة ومن حضنت راسة كام ينشغ شلت عيني لكيت امي واكفة ودموعها تنزل وكأنها هستوها اكتشفت تعلق بابا بماما وسيلة ... اشرتلي بأيدها ما احجي شي وعافتنه وراحت ضليت امسد على راسة لحد ما بدت عيونه تنسد سودة علية لعد شكد تعبان ، هستوني داكعدة حتى يصعد ينام بغرفتة وما سمعت الا صرخت ديمة التصيح لبابا بعلو صوتها من فوك .... كلنه كمنه نركض على صوتها

_________________________________

لهنا ويكون خلص البارت ان شاءالله يكون عجبكم❤️
+ لتنسون التصويت والتعليق على الفقرات ❤️❤️

شنو رأيكم بالاحداث ؟

شنو تتوقعون حيصير بالبارت القادم ؟

.