رواية الموت الحي الفصل السادس وثلاثون 36 - بقلم براء الموسوي

مرحبا حبايبي العسل شلونكم ❤️❤️

اتمنى من كل القرو البارت يتفاعلون عليه ، كلش حابه اشوف تفاعلكم على اخر بارت انزله لهالرواية وصدقًا اني غرضي من طلب التفاعل حتى اشوف ارأئكم بخصوص الرواية واتونس بتعليقاتكم
لا اكثر ❤️

#الموت الحي
#للكاتبة براء الموسوي

ديمة : اندارت عليه ويا ريتها ممنداره

: صباح النور

ديمة : صفنت بوجها محاولة استوعب

انتِ سجى مو ؟

سجى : اي

ديمة : انتِ مو جنتِ تشتغلين عند بيت عمو يحيى لو اني غلطانة ؟

نترت بوجهي

سجى : وهسه گمت اشتغل هنا عندج اعتراض ؟

ديمة : نصي صوتج وانتبهي على لهجتج من تحجين وياي

ما كتلج شي اني ولا سبيتج حتى تنفعلين وتنترين بوجهي هيج

اباوعلها شو هاي بجت وشمرت الوصلة مال الطباخ وطلعت من المطبخ تركض والمناشغ مالتها ماله والي

والله خلتني صافنه

شدعوة هسه اني شگتلها وموتت روحها من البجي !!

سمعت باب البيت تنسد ، باوعت للكاميرات الي بالمطبخ لگيت امين شايل علاليك وطاب

تقدمت فتحت باب المطبخ وهو من شافني ابتسم

امين : صباح الخير يا ورد

ديمة : صباح النور

وين جنت ؟ كعدت ما لكيتك

امين : اي طلعت اشتريت چم حاجة ناقصة وهم رحت اشتريت سمج وكلت اسويلج سمج شوي
ادري بيج تحبي

ديمة : ابتسمت زين بعدك تتذكر

امين : وراح اضل طول عمري اتذكر ابسط التفاصيل
البيج

وهسه سولفيلي تريكتي لو بعدج ؟

ديمة : لا بعدني

امين : لعد وينها سجى ما سوتلج ريوك ، معقولة بعدها نايمة مو بالعادة ؟

ديمة : ماكو مشكلة اني اصلًا مو جوعانة بس على طاري سجى

امين هالبنية شعجب دتشتغل هنا اقصد يعني هي مو جانت عند بيت عمو شجابها هنا ؟

لتفهمني غلط بس استغربت وجودها

امين : دروحي طلعيلي گلاصين تمن مناك ونكعيهن ومن تخلصين صعديلي

اني رايح ابدل وانتظرج حتى اسولفلج لأن ما اگدر احجي هنا ما اريد البنية تسمعني وتنقهر

ديمة : تمام ، كرص خدي وصعد

طلعت التمن ونكعته وصعدت ، دكيت باب الغرفة

امين : تعاي حبيبي

ديمة : دخلت للغرفة وشفته ديلبس التشيريت مال التراك

صارت عيني على ظهره المقسم ، ما شاء الله جسمه كلش متغير

وين چان ووين صار ، صلوات زنده شكبره من العضل ولاچنه امين اليريد ينگطم

اباوعله كمل لبس وباوعلي مبتسم ، مدلي ايده

امين : تعاي

ديمة : لزمت ايده ، سحبني كعدي على القنفة وگعد بصفي

امين : باعي حبيبتي ، سجى جانت تشتغل عاملة يم بصائر وابد ما جانت متوالمه وياها

يعني يوميه گابه العركه بيناتهن ، وهاي من تشوف بصائر موزينة وياها تضل تعاند وذيج متسكتلها
وكل يوم مشكلة

لمن مرة من المرات كبرت السالفة والظاهر صارت عركة جبيرة بيناتهن وطاردتها من البيت

وحليم ما گادر يرجعها لأهله لأن مرت كريم حالفة اذا سجى تطب للبيت هي تطلع

واني بيومها جنت يمهم وشفت الهوسة مرت كريم تصيح من صفحة ما اريدها وبصائر تصيح ما اريدها

تالي صراحة من شفتها تبجي وتگل لحليم راح ابقى بالشارع وامي مرة مريضة وتحتاج علاج منين اصرف عليها وانتو طردتوني

گتلها خوية اني محتاج عاملة جيبي امج واشتغلي عندي والراتب الينطو الج انطيج نفسه

وهي قبلت وجابت امها وانطيتهن غرفة فوگ وهاي كدامج صارلهن سنتين عندي هي تطبخ وتنظف ودايره بالها على البيت وبالمقابل تاخذ راتب

ديمة : وما عرفت شنو السبب اليخليهم كلهم هيج ينفرون منها

امين : علساس تگول بصائر تتحارش بحليم ومو راحة

بس شو من جبتها لهنا وهي لا الها حس ولا لنفس
البنية هم محتشمة دائمًا لابسة صاية عريضة وحجابها ميوگع من راسها

وما شفت اي شي عليها موزين

فما اعتقد كلام بصائر صحيح ، هي بطبعها شكاكه
حتى بروحها متثق وتلگين هاي تخيلات يرسمها الها
عقلها

ديمة : اني عفت كل الحجي وركزت على جملة وحدة

"البنية محتشمة وحجابها ميوكع من راسها "

امين : شبيج ؟

ديمة : يعني هسه سجى متنزع الحجاب كدامك ؟

امين : لا ابد وعلى يا أساس تنزعه گدامي !!

ديمة : والله حرت مدري اصدگه مدري اصدگ عيني

امين : شبيج حبيبتي شنو سوتلج شي هي ، سولفيلي ؟

ديمة : هاا لالا ما سوتلي شي بس تفاجئت من شفتها هلي سألتك

امين : يله تگومين تساعديني نسوي الغدة سوه ؟

ديمة : لعد سجى مو هي التطبخ ؟

امين : اي بس اني اليوم مشتهي اوكلج من ايدي ، بيها شي ؟

ديمة : ابتسمت لا مابيها شي

ضحكت من كرصني حيل من خدودي وبوسهن

امين : اروح فدوة اني لهالخدود اليردن الروح

ديمة : يله كوم تره اني جوعانة

امين : انعل ابو الجوع يله امشينا

ديمة : لزمت ايده ونزلنا جوه ، بديت اني ارتب المسواك وهو ينظف السمچ

اكول امين شدعوة جاين سمجتين هو بس اني وياك

امين : لا مو هاي وحدة النا ووحدة لسجى وامها خطية خوما احنه نتغده وهنه يبقن بدون غده

ديمة : اي صح كلامك نسيتهن

ساعدته بتحضير الغدة وهو بعد ما تبل السمجة طلع للحديقة شغل الشواية وحط الحطب وخلا السمجة

واني بعد ما جيكت على التمن الأحمر نصيت النار وطلعت يمه

چان مسوي كعدة حلوه بالحديقة قريب على الشوايات وخال مراوح كهربائية ومكان الكعدة چان بالفي يعني اليطلع بره مينحمس من الحر

كعدت وهو يسولف وياي وكل شويه يندار يباوعلي ويبتسم

مدري ليش من شفت فرحته بيه تذكرت بداية زواجنا
هم چان هيج مكيف ومداريني

معقولة هالعز والنعيم ما غيره من جوه وبقى نفس ما چان ، يا ترى فعلًا الطيبة الشايلتها روحه بعدها موجوده مثل ما داحس اني

لو هو مجرد احساس ومع الوقت راح يتغير

امين : بلا زحمه عليج حبيبي روحي شوفي التمن اذا تهدر طفي حريمة ليروح يشوط

ديمة : تمام لعد اني حروح اشوفه واصلي واجيك

امين : لا لتجين بعد خاف حارة عليج ابقي جوه واني من اكمل اطب

ديمة : لا هسه ربع ساعة وراجعه

امين : على راحتج

ديمة : كمت دخلت جوه داشوف التمن وشفتها كاعدة تباوع للكاميرا ودموعها تصب

ومن شافتني طبيت گبل فزت وكامت تمسح بعيونها

سجى : سسـ ست ليش خليتي الاستاذ هو يسوي الغدة لو كايلتلي اني اسويلج التردي

خطية الأستاذ طالع بهالشمس يشوي بره خاف تجي ضربة شمس ويتمرض

ديمة : ما رديت عليها بس عيوني تتنقل على ملامحها ، اباوعلها مغيرة ملابسها ولافه روحها بالحجاب لف حتى معاصم لابسه

انوب تسولف وياي وعيونها على الكاميرات ما نزلتهن ثانية

لتعبين نفسج امين هو الي عجبه يسويلي الغدة اليوم انتِ ارتاحي

انطيتها ظهري طفيت التمن بعد ما تأكدت انه تهدر وباوعتلها صافنه عليه

بيج شي ؟

سجى : سلامتج ، راح اروح اسويلج زلاطة

ديمة : ميحتاج امين سوه

سجى : هاا اي لعد اني راح اگعد هنا انتظره من يكمل حتى اساعده وارتبلكم السفرة

ديمة : لتعبين نفسج روحي ارتاحي اني اساعده

اباوعلها شو هاي خزرتني ومشت طالعة من المطبخ

هزيت ايدي ، الحمدلله والشكر خايف اني عايزه مخابيل طلعتلي هاي

صعدت فوگ داروح لغرفتنا واجاني صوت المناشغ الجاي من الغرفة الثالثة

تقربت امشي على اطراف اصابعي ، وكفت يم الباب واسمع صوت بجيها وصوت مرة جبيرة تحاجيها

ام سجى : ميخالف يمه ميخالف هي هاي قسمتج
كولي يا الله ، الله يعوض خير

سجى : مو بأيدي يمه مو بأيدي گلبي راح يوكف من القهر

ديمة : هاي الجملتين الوحيدات الي سمعتهن باقي الحجي كلشي ما افتهمت منه

حاولت اسمع اكثر بس صوت بجيها چان طاغي ومديخليني اسمع شي

ابتعدت عن بابهن ورجعت لغرفتنا ، دخلت توضيت وصليت

كعدت اسبح وافكر بحجيهن منو هذا المو قسمتها
معقولة تقصد امين ؟ لو خاف غير واحد

الله اعلم بعد

كمت لميت سجادتي ونزلت جوه باوعت لأمين واكف يهفي على السمج

رحت فتحت الفريز طلعت مكعبات ثلج خليلته بگلاص وصبيت فوكه مي وطلعتله

تأخرت عليك مو ؟

امين : لا يگلبي ولا بهمج وبعدين اني مو كتلج ابقي جوه بس انتِ متسمعين الكلام

ديمة : رفعتله الكلاص ، اشرب حارة عليك اكيد عطشت

امين : اي والله اجه بوكته عاشت ايدج

ديمة : الف عافية

ضليت واكفه يمه لمن خلص وشال السمج خلا بصواني

امين : شلون سمج صار يلوك لهالحلك اليخبل

ديمة : ابتسمت ودخلت ويا صبيت التمن وحضرت صينية لسجى وامهن ورجعت صبيتلهن

راح امين صاحلها

امين : سجىىى يا سجىىى تعاي خوية اخذي غداكم

ديمة : اباوعلها نزلت تركض

سجى : بعد گلبي استاذ ليش تعبت نفسك يبو فوكاها شايل الصينية بأيدك سودة عليه تعبناك والله

لو صايحلي اني الاسويلك الغدة بعيوني ولا اتعبك

امين : لا العفو ماكو تعب تفضلي

ديمة : عزه بعينها اكلته وشربته حتى هو استحه وما عرف شيجاوبها

انوب تگله بعد گلبي هزيت ايدي والله يا الله

امين : يله حبيبي تعاي كعدي

ديمة : وين رايح انت ؟

امين : اجيبلج دبس رمان مو تحبي ويه السمج

ديمة : ابتسمت اي احبه

امين : شفتي خو حافظج اني ، وهاي دبس الرمان كدامج تفضلي

ديمة : شكراً

امين : انتِ تدللين على گلبي ، يله بسم الله

ديمة : سمينه وبدينا ناكل

الله امين الاكل يخبل عاشت ايدك والله ، مطكت
انوب السمجة حامضة ويه خيط الحلا الي بدبس الرمان طالعة فدشي

امين : مليون عافية وانتِ هم عاشت ايدج على التمن يخبل

ديمة : صدك والله

امين : والله كلش طيب

ديمة : ابتسمتله بالعافية

كملنا غده وطلع امين سوالنا جاي على الحطب وشلون جاي طلع يخبل

كمنا بعدها لملمنا المطبخ واني غسلت المواعين وامين راح سبح ونام شويه الظهرية واني كملت ترتيب كنتوري ورتبت اداوتي على مكتبي الصغير الي بالغرفة

وهيج مرن 3 ايام حيل حلوات وهادئات بعيدًا عن تصرفات سجى الغريبة

امين چان كلش حباب ومعتني بيه ويحاول بگد ما يگدر يقربني منه واني مدانفره وداحاول هم اتقرب منه بالتدريج وهالشي مريحني

اليوم خلصت اجازتي وداومت ، دخلت لمكتبي ولگيته كله ورد

سمعت الباب ينفتح انداريت لكيت معين وعمو عبدالله ورايه

عبدالله : ميصير عروستنا تداوم بدون ما نستقبلها استقبال يليق بيها

معين : بالنهاية هاي مديرة آل نوح

ديمة : يا روحي انتو ، رحت بوستهم وحضنتهم

شكرًا هواي فرحتوني والله

معين : اني ما عليه هاي فكرة عمج

ديمة : بس فهمني عمو انت من شنو مصنوع ، يعني الواحد يحير شلون يوصفك

حضني وباس راسي

عبدالله : ليش جم دمدم عدنا احنه هي بس وحده

ديمة : ابتسمتله بصدق ، يربي كلما اباوعله يجي بابا على بالي

سبحان الله الشبه البيناتهم فضيع بس الاختلاف البيناتهم عمو عبدالله اول ما الواحد يشوفه
يحسه انسان طيب من ذوله الناس الي
گلوبهم صافية وبيض من جوه

اما بابا حبيبي فچان شكله يبين انه شخصية صارمة ومغرورة نوعًا ما

اشبه الهالة مالته لزبيدة اختي صح يبين عليها متكبرة بس اول ما الواحد يكعد ويسولف وياها تتغير نظرته
عنها جذريًا

كعدت على مكتبي بعد ما همه طلعو ، بديت اشتغل واكمل المسؤوليات الي عليه

التهيت بالتصميم وما نبهني على الوقت غير صوت اشعار موبايلي

فتحت الموبايل لكيت امين دازلي رسالة فتحتها لكيته دازلي "اشتاقيتلج"

ابتسمت وسديت الموبايل ، مجاوبته وصراحة استحيت اگله اني هم اشتاقيتلك

رجعت اكمل شغلي لحد ما خلص الدوام وطلعت راجعة للبيت

صفيت سيارتي وباوعت سيارة امين ماكو معناها اني اخلص دوام قبله نزلت فتحت باب البيت ودخلت جوه

طبيت للمطبخ وشفتها كاعدة تمسح بالطباخ ، طبعًا اني سولفت لخواتي وحذرني منها وگللي اي
شي اشوفه عليها اروح اگل لأمين واخلي
يطردها

صراحة هي مدتسوي شي ملموس يخليني اطردها بس تصرفاتها مريبة خاصة انها تعاملني شكل گدام
امين وتتصرف بغير شكل من يكون مموجود

كلت خلي اسلم السلام لله

سلمت وما ردت عليه ، لبستها وصعدت فوك بدلت وصليت وانتظرت امين من اجه من الدوام

طبعًا هو اجر مكان وديشتغل بي حاليًا منا لمن يكمل بناء الشركة الجديدة بالأرض الجديدة
الي اجرها

اما مكان الشركة القديمة فرفع قضية على اصحاب الگاع وان شاء الله يربحها ويرجعوله فلوسه
الخسرها

المهم اجه وتغدينا ونمنا ما گعدنا غير بالليل ، هو راح لمكتبه واني كعدت اشتغل بالغرفة

لمن جعت ياله توقفت ، نزلت جوه خليت القوي على النار وطلعت اجبان ورحت لمكتبه دكيت الباب ودخلت

لكيته لابس نظارة طبية وگاعد يخطط ، صراحة شكله جان طالع تحفه

شال راسه باوعلي وابتسم

امين : تعاي حبيبي ليش واكفه بالباب

ديمة : دخلت وسديت الباب ، مكتبك حلو

امين : ان شاء الله راح يصير عندج احلى منه بس انتظريني فترة واجهزلج احسن مكتب فوك

ديمة : لا ميحتاج اني مرتاحة بالغرفة

امين : حتى لو بمكتبج الخاص راح ترتاحين اكثر

ديمة : هزيت راسي وتقربت وكفت يمه حتى شديسوي

خليت ايدي على جتفه وباوعت للخرائط الراسمها

امين : شنو رأيج ؟

ديمة : شو اشوف ، اخذت الورق من ايده ، حلوة كلش حلوة عاشت ايدك بس مو كإنما ناقصها شي ؟

فزيت من جرني كعدني على رجليه

امين : شنو النقص راويني ؟

ديمة : بلعت ريگي وأخذت القلم الرصاص من ايده ورسمت على الورقة ، شنو رأيك لو تضيف هيج
شـي ؟

امين : لو بأيدي اضيف كل الي ببالي بس رغبة اهل هالگاع لازمتني

ديمة : هاا يعني همه محدديك بأشياء معينة

امين : للأسف

ديمة : حريمة

امين : اي والله صدك حريمة والا اني لو عليه ما اخلي شي ما اسوي بهالكاع بس شسوي اخاف لا ازعل اصاحبها واني اصحاب هالكاع احبهم

ديمة : مبينين خوش معـ... سكتت من شفته ديباوعلي واصلاً مو يم الورقة ولا شايفها

ششـ شبيك ؟

كزبر جسمي من حسيت بأيده تنحط على خصري

امين : لو انتِ صاحبة هالكاع تقبلين اتصرف بكيفي على ارضج ؟

ديمة : ما رديت عليه لأن فهمت شيقصد

امين : بنفسي اضيف شغلة وحدة ، وعد بس وحدة

ديمة : اباوع لعيونه تنتقل بين عيوني وشفايفي

غمضت عيوني على كيفي من لزم شعري وسحبني بخفه بايسني من شفايفي

ضغطت على ايده بقوة اثر الشعور الي حاوطني ، ما بعدته عني بس هم ما بادلته

ما اعرف شگد مر وقت واني غايبة وكإني اصلًا مموجودة بهالعالم

وما فززنا من لحظتنا غير صوت الهبط الصار على الدرج

كمنا بسرعة على صوت سجى التصير احترگنا

طلعنا من المكتب وبوجهنا للمطبخ لان صوتها اجه مناك

طبينا للمطبخ وشفنه الثعويلة ، اباوعلها شايله القوي وخالته جوه المي

انتبهتلها تباوعلنا وعيونها ساعة تصفن بأمين وساعة تصفن عليه

باوعت لأمين يلهث واني فستاني دگمه كلها مفتوحة ، رفعت ايدي سديت الدكم بسرعة

امين : شكو شبيج تصيحين ؟ وشنو هاي الثعويلة

سجى : مو اني والله هاي اكيد هي ناسيه قوري الجاي

امين : انتِ عفتي القوري ؟

ديمة : حكيت ركبتي ، هاا اي مو اني گلت اعوف القوري يفور واصيحلك حتى تجي ونتعشه سوه

تتـ تالي اجيتك للمكتب واخذتنا السوالف ونسيت القوري

اباوعله يباوعلي وحاصرته الضحكة وذيج شافته يباوعلي ويبتسم وچان تتسودن

سجى : تنتبهين لو محروگ البيت هسه ، عفية بعد لتطبين للمطبخ

عود اذا ردتي شي كليلي اني اسويلج لترحين تحركين البيت وتموتينا بسبب ندارتج

امين : انتِ منتبهه لنفسج شلون جاي تحجين وياها !!

شنو هالأسلوب نغمة جديدة عندج لو اني الما منتبه سابقًا ؟

هذا الأسلوب ما مقبول وما اسمحلج ترفعين صوتج عليها انتبهي لنفسج

لأن هالمرة راح اكول اخذتج الخرعة وكمتي تجفصين مرة ثانية راح يكون الي رد عليج

سجى : اني اعتذر استاذ لتزعل مني والله مو قصدي اعتذر ست مو قصدي

ديمة : ما صار شي

اباوعلها صعدت فوگ تركض ، عفية سوالف الهندود هاي ولا تبطلها حيل متأثرة بالمسلسلات

عوجت حلكي وباوعت لأمين المتخصر ويباوعلي
توقعته ضاج مني

اني اسفة لأن حرگت القوري تره ما متقصدة والله

تقربت مني وعدل شعري ، لزمني من خدودي وباسني حيل من شفايفي وابتعد

امين : اذا تجيني يومية للمكتب وتعيشيني مثل ذاك العشة فحرگي التردي البيت كله حلال عليج مو بس المطبخ

ديمة : حكيت كصتي اكلك احس نفسي مو جوعانة وما اريد عشه بعد تريد اسويلك

امين : لا وداعتج بعد العسل الاكلته قبل شويه انتخمت ويمكن منا لباجر ما راح اكل شي بعد

ديمة : خخـ خلي نروح ننام

امين : يله

ديمة : رحنا نمنا

وهيج مر شهرين على رجعتنا سوه ، علاقتنا بهالفترة كلش تحسنت واكو تحسن ملحوظ من ناحيتي
اني شخصيةً

بگد ما هو ديتلهف عليه اني هم گمت ابادله نفس اللهفة صح ما بيناتنا للأن علاقة حقيقية

بس مثل ميگولون العافية بالتداريج واني مرتاحة بتطور علاقتنا شويه شويه

الحمدلله لحد الأن ما احس إني ندمانة لان رجعت
بالعكس مرتاحة كلش واحس نفسيتي مستقرة

اما هالبلوة الطلعتلي ومو عارفة اتصرف وياها بحث اخر

البنية قسم بالله مو صاحية يومية طالعة بسالفة
حتى غرفتنا من گمنا نطلع اني وامين اقفلها
اخاف تروح شنو شتذبلي بالغرفة

هي خو صاحبة سوابق ويه دنيا مرة قميص نوم ومرة عطر ومرة فوطة مال دورة

بدعت ومحد يعرف شنو السبب تصرفاتها هاي وامي تگلي هاي يمكن اعمال شيطانية

حاجيت امين وكتله اني ما مرتاحة بوجودها وگلي صبري بس خله الگه واحد عرف يحتاج عاملة واوديها
هي وامها يمه

ميريد يطردها يگول خطية وين تروح واخاف اطردها وتمشي بغير درب حتى تحصل فلوس والله يحاسبني

واني من سمعته هيج سكتت بس كمت اتجنبها حتى الطبخ كمت اني اطبخه واطلع حصتي اني وامين بجدور واصعدها للثلاجة الي بغرفتنا

ومن نرجع انزلهن واحميهن رغم السالفة بيها شلاع گلب عليه وتعب بس ميخالف الحذر واجب واني
حياتي معايزة

وامين خطية عايفني على راحتي وابد ميحجي
يگلي سوي اليعجبج وما عليج بأحد واني هذا
الداسوي

امين : وين صافن الحلو

ديمة : ابتسمت وسحبت القراصة ناكشه شعري ، سلامتك

امين : اكلج انتِ ما شايفه شغلي بالواقع مو ؟

ديمة : لا

امين : لعد تعاي اراويج البيوت الي اشتغلتهن على وانطيني رأيج

ديمة : تمددت بصفه بعد ما لبست دشداشة قصيرة تعلاكات

عبر ايده وسحبني نيمني على صدره وگام يراويني
واني اتفاعل ويا

ضحكت ودفعت وجهه عن المدحوس برگبتي ، وخر امين خليني اباوع مو تريدني اشوف شغلك

ميرد عليه يبوس بركبتي ويتمضحك ، كوه جريت ركبتي مني

باسني من خدي بشوغة

امين : افيش

ديمة : ابتسمت ورجعت راسي على صدره
اكعد كافي تره اكوم والله

امين : لا العفو هاهي كلشي ولا تكومين

ديمة : ابتسمت وكمت اباوع ويا بالموبايل تالي عفنا الموبايل واخذتنه السوالف على الشغل ، اني اسولفله شصار وياي باليوم وهو نفس الشي

دنسولف عادي واندكت باب غرفتنا

كمت من حضنه ورحت اني افتح الباب لأن هو باقي بدون تيشيرت

فتحت باب الغرفة

اباوع لسجى نازعة الحجاب ولابستلي دشداشة ستن لونها عنابي وتتبكبك كالعادة

بس هالمرة لازمة بطنها

سجى : اخ يمه اخ بطني راح اموت

ديمة : شبيج ؟

متجاوبني بس تبجي وتنوص بصوتها

اجه امين على بجيها يعدل بتيشيرته يريد يشوف شكو والله حقه يفز اني من يمي اخترعت

انوب شافها بدون حجاب گبل دنك راسه

حريمة فاتته الدشداشة العنابي الظاهر ما لاحظها

امين : خير خوية شبيج ؟

سجى : راح اموت استاذ دخيلك اخذني للمستشفى
بطني دتتكطع

امين : اي اي هسه اخذج بس فهميني انتِ شبيج
خاف ماكله شي ومتأذية ؟

ديمة : اباوعلها شالت راسها تباوعلنا وتعض بشفتها

ياا هاي شبيها

سجى : لا استاذ مماكله شي بس هاي يمكن بسبب الشهرية

ديمة : شلت راسي على امين شفت وجهه صوفر والله وهي الادبسز ولا كإنما تنعم بصوتها وكل شويه صايحه

هسه افتهمنا هي الدورة شغلة طبيعية ومابيها شي بس شنو الداعي تجي تگل لرجال غريب عنها

لا هو دكتور لا هو ابو اختصاص بهالأمور فشنو الغاية من تجي تگله عليها الدورة

تگدر تكول عندي مرض نسائي وتاكل تبن وتنجب مدري منو مقنعها الدورة نوع من انواع الاغراء
حتى خابصتنا بيها

الچفن واوهووو على كولت بيبي حمزية

شفت امين يباوعلي ويبلعم ميعرف شيجاوبها

امين : حبيبتي بدلي ملابسج وامشي ناخذها للمستشفى

سجى : لالا ماكو داعي انت اخذني بس يضربوني ابره اهدئ ماكو داعي تتزحم المدام

ديمة : روح امين اخذها واني انتظركم هنا

امين : ماشي لعد روحي وياها بدليلها علما اني ابدل
واخذها

ديمة : صار

عيني يالرقيقة تگدرين تمشين لو نشيلج

سجى : لا اگدر بس عينيني حبابة

ديمة : لزمتها ومشيتها لغرفتها ، فتحت الباب وطببتها
وانطيتها صايتها وحجابها

اباوع لأمها مرة كاعدة وبس شافتني حجت

ام سجى : سودة بوجهي زحمناج عيني بس شنسوي
البنية بعدها صغيرة ورحمها بعده نشط هلي كل شهر تتأذه

ديمة : وشعليه الم الدورة بنشاط الرحم !! لو فيكه جديدة هاي

الالم يصير من التقلصات قصدج

هاج حجية لبسي بنتج ونزليها حتى ياخذها امين للمستشفى بلكت ترتاح اذا ضربوها ابره

عفتهن ونزلت لأمين الكاعد بالصالة

امين : هاا كملت

ديمة : هسه تنزلها امها

امين : اكلج اني والله استحي اخذها للمستشفى ، يعني شريد اكل للدكتور

جايتها الشهرية لو شگله بالضبط ؟

ديمة : وداعتك هاي جذابة وكلاواتها متخلص شبعنا من سوالفها

وبالنسبة لحالتها انت ما عليك بس وصلها واقطعلها باص وخلي تروح اكيد تعرف وتندل

شويه ونزلتها امها وكلش مسوية روحها حتى التطلگ متصيح هيج

سجى : بعد گلبي استاذ علعلت نومتك سودة عليه
لو اگدر اتحمل الألم والله ما ازعزع نومتك

ديمة : تكله بعد گلبي عشتو ، من سم بكلبج كون

اخذتها امها صعدتها بالسيارة وراح امين يوديها للمستشفى

الأماية صعدت فوك واني ضليت جوه انتظرهم

خابرت زبيدة سولفتلها وذيج گامت تفرفح

زبيدة : ولج هاي والله بـ****

ديمة : سكتي زبيدة متت قهر كون تشوفيها شلون تتماوع وكل شويه مدنگه مطلعه الدلعة مال صدرها

زبيدة : ورجلج باوع عليها ؟

ديمة : لا وين اصلا هو من شافها بدون حجاب گبل دنگ بعد ما شال راس

زبيدة : عفية بنسيبي كفوو والله

ديمة : هههههه والله انتِ بطرانة يزبيدة

زبيدة : شوف الفاهية تضحك واني دمي محترك

بت النعال تلبسلي ستن تريد تغري الرجال متدري بنعال ميعبرها

حاولت ويه يوسف وما حصلت شي وحاولت ويه كريم وما حصلت شي تالي انوب رجعت على حليم

ولج صح اني اكره بصائر بس الظاهر هي دواها تفتهم من طردتها

بنت القندرة ما شبعت لافت على امين انوب

كون اوديها على هارون بلكت تجرب حظها ويا حتى ياخذها للمحمية هناك يطبب عليها النمر يخليها
تحبل بهجين ما موجود بالدنيا

يصير عبارة عن مطي ونمر سوه لأن هي من فصيلة المطاية خوما تحسبيها علينا بشر

ديمة : ههههههههه

دروحي نامي روحي شكول عليج خربتي مودي الحزين

زبيدة : ياا عشتو عليمن حزينة بالنعال اركعلج ياها
اخليها تمشي مثل الثولة بس خلي تلعب بذيلها

يله ولج خلي اروح هذا هارون يصيحلي يريد العب بشعره حتى ينام عشتو اليسمعه يگول عنده شعر

يله باي

ديمة : ابتسمت باي

سديت الخط وكعدت منا لمن صارت بالـ11 ياله سمعت صوت باب البيت تنفتح

شويه ونزلت هي وامين ، اباوعلها وكفته قريب على الحديقة مدري شتحاجي ضلو فترة بس مبين
امين صاير عصبي

مشيت فتحت الشباك اليطل على الحديقة داسمعها
شتحاجي

سجى : بس اعقد عليه كلشي ما اريد منك اعيش خدامة جوه رجليك والله

امين : يابه انتِ شكاعدة تحجين استغفري ربج

سجى : انت ما خسران شي جرب ، اني تره هم حلوة
وعندي جسم حلو مثل ديمة اعقد عليه وجربني

والله ادللك دلال انسيك ديمة والدنيا كلها بس انطيني فرصة اني احبك والله والمرة التحب الرجال تعرف
تدلله

امين : والله العظيم ما اعرف شجاوبج چان استحيتي تحجين هالحجي

بوية اني رجال احب مرتي صارلي اربع سنين حفيت ياله خليتها ترجعلي تالي متالي اعوفها واخذج انتِ

شنو مسودن دروحي بابا روحي اني مو من هالنوعية
ومن جبتج هنا من البداية كتلج انتِ اختي واعتبري
هذا البيت بيت اخوج

يعني لا املتج بشي ولا تجاوزت حدودي وياج بشي
اني حتى كلام ماكو بيني وبينج على يا اساس
سمحتي لعقلج يفكر هالتفكير النكس

وتره لتتصورين تلگين شخص يحترمتج ويصونج اذا انتِ هيج مرخصة نفسج

سجى : زين عوفك من كل الحجيته لتعقد عليه ، خليني يمك بالبيت وتعرف عليه عن قرب يجوز
اعجبك

حباب امين حباب

امين : نزليييي ايييدج لتلزمينييي، تره انتِ مو سلعة حتى اجربج واذا عجبتيني اخذج

هذا الحجي حرام وعيب خافي الله واحترمي نفسج
كافي امج مرة جبيرة مو حلوة بحقها تجيبلها
سمعة بهالعمر

سجى : امين اني احبك والله احبك لتكسر بيه حباب

امين : كافي انجبي وترسي حلكج تبن ما اريد مرتي تسمعج وتنغث وهي راعية سكر

وحق من سوه محمد نبي اذا يصير بيها شي اشرب من دمج

ومن باجر تلمين هدومج انتِ وامج واخذجن ارجعجن لحليم وكلمة زايدة ما اسمع

الظاهر اني غلطان من البداية لأن عطفت عليج وكلت خطية

سجى : حباب امـ....

امين : ما اريد اسمع صوتج روحي صعدي فوك ولتراويني وجهج منا لباجر لتخليني اطلع من طوري بهالليل واشمرج بالشارع هسه

سجى : ماشي على راحتك

ديمة : اباوعلها عافته وطبت تركض

ابتعدت عن الشباك بسرعة وطبيت للصالة قبلها ، طبت هي للبيت وشافتني كاعدة

سجى : حسبي الله عليج دمرتي حياتي حسبييييي اااااالله بسسس بسيطة واااالله بسيييييطة

ديمة : صعدت فوگ وامين طب وراها بس شنو وجهه مطعون ودمارته مبينه من العصبية صاير نار

شمر السويج على الطبلة وگعد لازم راسه

كمت جبتله گلاص مي واجيت

هاك اشرب

امين : ما اريد

ديمة : كعدت بصفه ووخرت اديه عن راسه ، لزمت وجهه ، شبيك

امين : ما سمعتي هاي الرخيصة شحاجتني بره

ديمة : لا سمعتها بس انت ليش هيج منفعل خلي تولي
انت مو باجر حترجعها لبيت حليم هاهي ماكو داعي تتعصب

امين : تره ديمة اني وداعة امي ما عندي شي وياها واصلًا ما واعدها بشي

الله شاهد انظرلها مثل ما انظر لبصائر ولا ادري بيها مفكرة هيج تفكير لو ادري والله من لحظتها
اطردها

ديمة : ميحتاج تبررلي اني اعرف انت ماعندك هيج نفسية ومستحيل يبدر منك هيج تصرف

مسحت على لحيته ، خلص اهدئ تره اني من اشوفك هيج متوتر اتوتر وياك

اخذت كلاص المي وقربته من شفايفه ، اشرب واهدأ

اخذه من ايدي وشربه ، كمل ورجعه على الطبلة
اباوعله يفرك بكصته حيل

امين : استغفر الله واتوب اليه

ديمة : شبيك

امين : هاجت عليه الشقيقة ، كومي كومي خلي ننام

بنت النعال تريدني اعقد عليها دنعل ابو اليسوي خير بهالوكت

ديمة : سندته وصعدنا فوگ

خطية ضل يلوب من الم راسه ويون من الوجع
حرت شسوي ويا

تالي ضليت ادلكله راسه وكصته ياله هدئ شويه ونام
واني من شفته غفه ياله گدرت انام

مرت فترة واني بين النايمة والكاعدة وفزيت على ريحة غريبة

كعدت من النوم وكعدت امين

امين : هاا حبيبي شبيج ؟

ديمة : كاعد تشم الريحة ؟

اباوعله كعد على حيله وگام يشم

ريحة نفط مو ؟

امين : اي صدك ريحة نفط وريحة قوية هم بله خلي اگوم اشوف شكو

اني عايف جليكانات ثنين وره البيت بس كلهن مقفلات

ديمة : گام امين طلع من الغرفة واني طلعت ورا
نزلنا جوه وصارت الريحة اقوى

شفنا باب المطبخ مفتوحة ، راح امين طلع وما سمع بس صوته يصيح

لج انتتتِ مخبلة

طلعت ركض ورا وهبط گلبي من شفت سجى لازمة جليكان النفط وتنكع روحها وتشمر على الحديقة والبيت

سجى : انت مو متريدني خلص براحتك الا احرك روحي واحرگلك بيتك وياي

اذا ما ابليك واكلهم هو حرگني واخليك تخيس بالسجن اني معتبه

امين : كولي يا الله يمعودة حرام عليج الجاي تسوي ليش تخسرين دنيتج واخرتج

سجى : بكيفي اني اريد اخسر انت شعليك ميت عليه قابل لو بحالي

انت بحال هاي الشكرة الواكفه وراك

تموتووون على الحلوات انييي محد يگلبني ومحدددد يحبنيييي

كلها متريدنييي كللللهاااااا

امين : بس اهدي وخلينا نتفاهم الله يخليج لتسوين هيج

انتِ بنية بعدج بعز شبابج جنج وردة ليش تسوين هيج بنفسج

سجى : شسويلك كتلك بس اعقد عليه سيد حتى محكمة ما اريد

كتلك اني احبك وراضية بكلشي بس اقبل بيه وانتتتت رفضتتت تگلييي انتتتتِ رخيصة

وهوو انييي لأن رخيييصة ارييييد اموووت
بس والله ما اخليك تتهنى اله ابليك بموتي اله

هذا بيتك المخبوص بي اله احرگه الك

عوددد ختفيدددك ديمة

ديمة : اباوعلها شلون المسودنه تبجي وترش على روحها نفط وترجع تفتر بالطرمة وترش على الحيطان والزرع

انوب لزمت الجداحة وقربتها عليها

امين : اوكفي اوكفي لتتهورين

انتِ مو ترديني اعقد عليج خلص اني موافق بس لتشعلين النار بنفسج

اذا صار عليج شي ما راح اسامح نفسي ،اذا جان زواجي منج يخليج تحافظين على حياتج

فآني موافق ومن الصبح راح اخذج اعقد عليج

سجى : امشييي لك گـ**** تضحك عليه انت
عبالك ما ادري بيك جاي تجرجرني على ما احرك روحي وابليك

ادري بيك متعوف مرتك وتاخذني لو تموت
امشييي ولييي مناااا

ديمة : اني واكفه بباب المطبخ وعيني عليها شلون رجعت ضمت الجداحة ورجعت ترش روحها وتبجي

سجى : محددد يريدنيييي محددد شبيييه انيييي شبييييه

ديمة : باوعت اكو طابوگ بالحديقة وامشي على كيفي واشيلي طابوگة واشمرها عليها

اجتي على صفحة وجها بالضبط

وچان توكع بالگاع ويجيت عليها امين يجتفها وهي تصرخ وتحاول تتملص منه حتى تطلع الجداحة

ركضت جتفتها وياا وهو طاحلها راشديات وهي استلمتنا ذاك الفشار والغلط وكامت تصرخ

گوه امين جر الجداحة من صدرها وگلبها على ظهرها حتى يقيد حركتها

امين : هاج اخذي الجداحة بسرررررعة خليهااا جوه وحطي شيييي على راسج وطلعي صيحي الجوارين

بسررررررعة

ديمة: اخذتها منه وركضت جوه شمرتها فوك الكاونتر
وركضت حطيت شي على جسمي وراسي وطلعت ركض من باب البيت ودكيت الباب على الجوارين

خطية طلعو مخروعين

: خير بنتي شبيج

ديمة : احجي وحلكي ناشف من الهبطة ، دخيلكم تعالو ساعدونا العاملة مالتنا تريد تحرگ روحها
وزوجي لزمها ويريد واحد يساعده لتروح شو
شتسوي بنفسها وتبلينا

ينطيهم العافية ما گالو لا ركضو همه وولدهم لأمين الباقي لسه مجتفها وهي تصرخ

والله لزمها وگدرو يسيطرون عليها ، گام امين بسرعة خابر للشرطة

واشرلي اطب جوه ، طبيت ونص ساعة تقريبًا واجتي الدورية واخذوها هي وامها الجانت محبوسة فوگ بعد ما شافوها بالكاميرات تحاول تحرگ روحها

الحمدلله الله ستر علينا وما صار شي والأ جان رحنا بخبر كان

ضلو الجوارين همه وامين يغسلون الحياطين بعد ما فصلو الكهرباء حتى خاف تطلع شرارة تحرك البيت

الاقدار متنعرف ويكلك الحذر يسبق القدر مالنا خلك التايهات

والله لحد ما اذن الأذان ياله كملو الجوارين وراحو ، كعدت على ارضيه المطبخ بعد ما بيه اوكف من الهبطة

حلكي عبالك صحراء اشرب مي وما احس

تالي تخربطت وركض بيه امين للمستشفى سودة انسگم سگم اليوم

وللصبح ياله استقر سكري ، كعدت لكيت امين لازم اديه وغافي

حركت ايدي على شعره ، شال راسه وباوعلي

امين : هاا حبيبي شلون صرتي

ديمة : بالي يمك انت شلونك

امين : عوفج مني اني يطبني طوب المهم انتِ

ديمة : تعال خلي اشبگك يمه عود صدك مابيك شي

كعدني وحضني

حاوطت ركبته وتنهدت يمه لو صاير عليك شي جان متت

امين : اسم الله عليج يومي گبل يومج ان شاء الله

ديمة : عزة امين تصدگ اذا اكلك اني بعدني احبك
هاك شوف گلبي يدگ خفت لتروح الجلبة شو شتسويلك وتموت

امين : اني هم احبج واموت عليج يا بعد گلبه لأمين وروحه

ديمة : ضحكت بس بشرفك مو سباعية اني

شفتني شلون ركعتها بالطابوگة

امين : هههههه يكلك شر البليه ما يضحك ، وحق ربج كلما اتذكر الموقف اخرب ضحك

ديمة : زين وهسه شصار عليها

امين : هسه اوديج للبيت واروح للمركز اشوف

ديمة : لزمت ايده وگمت بدلت ورجعنا للبيت

للظهر ياله رجع من المركز

هاا بشر

امين : وكلت المحامي يرفع عليها قضية والفهمته من الضابط اول ما ماخذيها

امها متصلة على كرابتهم وجاييها ، يگلي البنية هاي اصلا مو صاحية شلون مخليها ببيتكم

گرايبها معترفين عليها يكلك مريضة نفسياً واكو اوراق عد خوالها ثبت هذا الشي

حتى طليقها السابق طلعت طاعنته بسجينة وشاردة لأن مكتشفته يخونها

ومن ماخذيها كرايبهم تعيش يمهم بايگه فلوسهم وشاردة بالمختصر لاعبة لعب

شلون عمي يحيى چان مستقبلها هي وامها عنده ما اعرف

ديمة : اكيد ما چان يعرف وهي اصلًا ما جانت عايشة وياهم تره قبل چم سنة انفصلت واشتغلت بدال امها

امين : بس والله حلوة الحركة السويتيها ، طلعتي قوية ولج

ديمة : هههههه لعد شعبالك اعجبك اني

امين : بأبتسامة انتِ دومج عاجبتني

_____________________________________

بعد مرور عام

ديمة : كعدت لازمه بطني وصحت

يييييله اميييين وينك تعال لبسني حذائي تأخرنا تره

يربي شوكت اجيب واخلص متت

يييييله حبيبيييي تعااال

امين : اجيت حبيبتي اجيت

ديمة : اجه شايل حذائي دنك لبسني ياها لأن ما اگدر ادنك طبيت للشهر السابع وكوه شايله روحي

اذا تحركت منا اكوم الهث اليشوفني عباله حامل بتوم ولا جني بيه بنية

امين : يله كملت ، انطيني ايدج

ديمة : لزمت ايده وكمت

طبعًا اليوم عيد ميلاد هارون وكالعادة زبيدة خابصتنا وكل سنة لازم تسويله حفلة معتبره

تليق بمقامه على كولتها

وصلنا للمطعم ولگينا الدنيا مگلوبة ، بيت جدي وأهل امين وبيت عمو يحيى

مثل كل سنة زبيدة حاجزة كل المطعم لهارون

دخلنا وسلمنا على الكل ، كعدني امين وراح يم الولد

نور : هاا حجية شلونج

ديمة : سكتي راح افطس

دنيا : سودة عليه يله هانت هانت ما بقى شي ان شاء الله

ديمة : اكلجن صدك زبيدة شجابت هدية لهارون
الحقيرة البارحة اخابرها اسألها متقبل تگلي

قهرتي والله واني حامل

نور : والله هي هالمرة ما حجت

بس باعي هي العام اشترتله خاتم ياقوت والقبلة اشترتله خيل هالمرة شراح تهدي محد يعرف

دنيا : بس مو كإنُ تأخرو وين صارو

ديمة : ويه حجايه دنيا انطفت الكهرباء ومن هالحركة عرفناهم وصلو وفعلًا دقيقة وطبو سوه وطكت الشعالات

واعتلگ الضوه وبدينا نغني اغنية الميلاد لهارون

وهو يباوعلنا ويضحك مصدوم

هارون : مو علساس عيد ميلاد ابن صديقتج ؟

زبيدة : ههههههه خو انت كل سنة تمشي عليك السالفة
وترجع تنسى

هارون : انتِ وتالي وياج تردين تخبليني بسوالفج ؟

زبيدة : ابتسمت كل عام وانت بخير ياروحي كل سنة وانت اجمل وافضل واحلى شي بحياتي

هارون : احبج

زبيدة : ضحكت وحضنته ، ابتعدت واخذت ايده لطاولة الكيك

خلصو الجماعة اغنية عيد الميلاد وقطع هارون الكيكة
وبدو الكل ينطو الهدايا وهو يتشكر منهم

واستمرت الحفلة بأفضل ما يكون لحد ما خلصت
والكل راح

رجعنا للبيت وبس وصلنا للبيت شهكت

هارون : شبيج ؟

زبيدة : عزه هارون يونس خلصانة حفاظاته وماعندي احتياط بالبيت

هارون : وين جنتي ستوج تذكرتي

زبيدة : راح عن بالي شسوي شون بيه هسه

هارون : داخذي ونزلي علما اروح اشوف الصيدليات بلكت الگه احد مفتح

زبيدة : اي بعد وكت اكيد تلگه

شلت يونس ونزلت وهو رجع طلع بسيارته

بس شفته راح حضنت يونس حيل وركضت لبيت اهلي ، دكيت الباب بسرعة

فتحها الي دادا

ام حسن : هااا طلع هارون

زبيدة : اي هاج يونس غراضه عفتهن يم خالة وئام وباجر اجي الصبح اخذه منج

ام حسن : جيبي وروحي مالج علاقة

زبيدة : يله مع السلامة

رجعت اركض لبيتنا وبوجهي لغرفتي ، غيرت ملابسي
لفستان مفتوح على طول الظهر

وعدلت مكياجي وشعري بين ما كملت كلشي سمعت صوت سيارته

ركضت جريت شال خفيف غطيت بي ظهري وضليت واگفه

شويه وطب شايل كيس الحفاظات

هارون : وينج زبد هاي الحفـ... ...

شنو هذا الجمال

زبيدة : ابتسمت وتقربت منه

مو كأنُ نسيت تسألني وين هديتك ؟

هارون : بس لا هالمرة هاي هديتي بس اني شسوي بيهن ؟

زبيدة : ضحكت من رفعلي كيس الحفاظات

اخذتهن من ايده وخليتهن على صفحة

لا مو هاي هديتك

هارون : عوفي الشقة ، اكو هدية صدك ؟

زبيدة : عيب عليك اذا ام الزبد متجيبلك هدية لعد منو يجيبلك ؟

ابتسمت وضم اديه

هارون : اطربيني هالسنة شعندج ؟

زبيدة : مستعد ؟

هارون : ههههه مستعد يله جيبيها خلي اشوفها

زبيدة : غمض عيونك

هارون : وهاي غمضنا

زبيدة : من شفته غمض انداريت وسحبت الشال من على ظهري وشمرته

لميت شعري وخليه على الجانب وحاجيته

هسه افتح عيونك

هارون : يا الله

زبيدة : من بعد ما فتح عيونه ضل فتره ساكت

قشعر جسمي من مشه اصابعه الباردة على طول ظهري

هارون : صدك تحجين زبيدة ؟

زبيدة : شنو رأيك ؟

دارني عليه ، اباوعله صافن بوجهي وماكو على وجهه ردة فعل

هارون : ليش سويتي هيج ؟

زبيدة : ليش منو يستحق بهالدنيا اوشم اسمه على جسمي غيرك ؟

والله يلو اموت واحيا بدال المرة الف هم راح ارجع اوشم اسمك وما اتردد ولو لحظة وحدة

شكلك لسه ممستوعب انت شنو بالنسبة الي ، من گد
غلاتك عندي اتمنى الموت قبلك لان ما اگدر اتحمل
فراكك

ابتسمت وكملت

هارون انت هسه توازي محبة الكل بگلبي ، كل اهلي حبيتهم بطريقة وانت وحدك حبيتك بطريقة ثانية

ولو اكو شي ثاني اكدر اعبرلك بي عن حبي وعشقي وهيامي بيك اكثر من اني اكتب اسمك على طول ظهري هم جان سويته

حجه وعيونه تلمع

هارون : دائمًا تخليني عاجز وما اعرف ارد عليج بهيج مواقف والله ما اعرف شكلج احس لساني مربوط

ما جاي اعرف اعبر ، اريد كلمة وحدة تسعفني وتعبر عن الجوايه بس ما جاي الگه

زبيدة : ابتسمت وتقربت بسته وابتعدت

حركت اصابعي على مكان گلبه ... گلي احبج

هاي الكلمة تكفي .

***************************************

وهسه نگدر نگول ختمنا الموت الحي بحق ❤️

شكرًا جزيلاً من صميم قلبي لوجودكم وقراءتكم الها
اشكركم على الدعم والمساندة الدائمة الحاوطتوني
بيها من بلشت اكتبها وللأن

ممتنه منكم جدًا واسرة الموت الحي ايضًا ممتنين لمشاعركم الحلوة وتفاعلكم ويه قصتهم

ياريت تكتبولي رأيكم الشخصي بالرواية ككل
حابة اقرأ تعليقاتكم واشوف ارائكم سواء ثناء او انتقاد اتقبل اراء الجميع ❤️

واخيرًا دمتم بخير وسعادة ولتنسوني بدعائكم

احبكم ❤️

اختكم براء ❤️