الموت الحي الفصل السابع وثلاثون 37 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

ديمة : منو هذا ؟

دنيا : الظاهر سمعها جدو لان هو الجاوبها

النوح : هذا ابن عمجن عبدالله "هارون النوح"

وئام : هذا هارون !!

النوح : اي

وئام : ما شاء الله شلون كبران اتذكره جان كصير وسمين بذاك الوكت هسه كلش متغير

النوح : ماكو شي يبقى على حالة

دنيا : رجعنه نظرنا عليه ، جان نازل من الحصان ويتمشه باتجاهنا توقعته حيجي يسلم علينه او على الاقل يحاجي جدو

بس الفاجئنا انه عبرنا وراح ولا كأنه شايف بشر كدامه حتى ما باوعلنا ، للحظة حسيته اعمى لان الي يشوفه ميكول انه شايفنه اصلا

ديمة : هذا شبي ؟

دنيا : رفعتلها كتافي بعدم معرفة لان حتى متفاجئة من الموقف ، درت وجهي على جدو لكيته معبس ملامحة ولا كأنه جان مبتسم قبل شويه

النوح : يله امشو موزين عليكم الشمس

دنيا : اجيت امشي بس لفت نظري زبيدة الي دايرة جسمها ومصوبه عيونها على هارون المنطينه ظهره
ويمشي ، دغيتها شبيج ؟

زبيدة : هااا لا مابيه شي يله امشي خلي ندخل اذتني الشمس

دنيا : مشينه وجدو يمشي بمحاذاتنه ويسولف ويه دادا

وصلنا ودخلنا لجوه لكيناهم على نفس كعدتهم بس بيبي تلوج وبس شافتنه كامت على حيلها

حمزية : هاا هاا شبي اخوجن

النوح : لتخافين عيوني مابي شي وهسه اخدو الولد للمستشفى حتى يجيكون خاف صاير عنده شي بسبب ضربة الحصان

وهذا الكلب ابن الكلب محروك الچلوه زيد بس الكفه احرك ابو ابو وكع كلبي الخسيس

حمزية : ياا هذا زيودي هههههه بعد كلبي سوالفه ميبطلها رحتله فدوة

دنيا : اباوع لجدي جان كاعد يمها ومن حجت بيبتي هز ايده وغمها

ما انكر الموقف ضحكني خصوصا من شفت بيبيتي تضحك لان جدي غمها

عدلت حجابي واخذت نظره على كل الحاضرين ، جان اكو 3 نسوان كبار بالعمر يطلعن بكد امي واكو بنات هواي كاعدات ويباوعن النا ويتبسبسن

ومن بيبيتي انتبهت الهن ، اشرت عليهن وبدت تعرفنا عليهن وجدي كاعد يمها يباوع بدون ميحجي

حمزية : كومن بنياتي تعرفن على بنات عمجن ، اعرفجن يمة هذني الثنين عماتجن خوات ابوجن

هاي ام صاحب بدرية عمتجن الجبيرة وهاي ام معتز بيداء عمتجن الصغيرة ، امشن سلمن عليهن ليش مستحيات بعد روحي اهلجن احنه

دنيا : تقدمنا نسلم عليهن

بدرية : هلا بعد روحي هلا حبيباتي ، تعالن بعد عمتجن

دنيا : حضنتنا وضلت تبوس بينه وتبجي

بدرية : عمت عيني عليك ياخوية رحت وماشفتك ولا كدرت احن على بزرك

النوح : بحدة بدرية

بدرية: العفو يابه

دنيا : ابتعدت وباستنا كل وحدة من خدودها ، يربي شكد حنينه هالمرة

بدرية : زبيدة يروحي شلونج

زبيدة : ببرود بخير

بدرية : تدرين امج جانت صديقتي المقربة وجنه نقرة سوه اني وياها واليشوفنه عباله احنه توم

دنيا : اباوع لزبيدة من سمعت كلام عمتي عيونها صارت لمعت

زبيدة : صدك والله

بدرية : بابتسامة والله حتى جنه كاعدين بنفس الرحلة ، بس سبحان الله انتِ شكد تشبهيها احس عبالك هي واكفة كدامي بس انتِ ملامحج احد منها

زبيدة : ابتسمت اي كلها تكول

بدرية : وانتِ دمام شلونج ، عاد انتِ ميحتاج واحد يسألج امج منو لان علامة الجودة مطبوعة عليج وعلى امج بعد كلبي عيون البزون

ديمة : ابتسمت شكراً عمة

بدرية : حبيبة عمتج

دنيا : راحت عمتي بدرية سلمت على امي بس جان سلامها عادي مو مثلنا ، انقهرت على امي حبيبتي كل اليجي يسلم علينه يروح يسلم عليها ببرود

وهي سودة عليه ترد بكل هدوء وتسكت كسرت كلبي والله

اباوع اجتي عمتي بيداء سلمت علينه بس من ورة خشمها على الرغم احنه سلمنه عليها بحرارة بس هي جانت باردة وزبيدة من شافتها سلمت عليه هيج
ما تقربت يمها وسلمت عليها من بعيد حتى ما بوستها

اباوع اجت عمتي بدرية حضنتنه وصارت تعرفنا على كل الموجودين

بدرية : هاي مرت عمجن فؤاد " منال " وذني بناتها
زهراء وغيداء وهدى وذني بنات عمجن عبدالله
نور و نوال

دنيا : اجتي مرت عمي سلمت علينه هي والبنات ، جانو كلش لطيفات لعد شعجب بابا جان ميحبهم

كعدنا وضلن يسولفن واحنه نرد باختصار لان منحرجين بواسطة اول مرة نلتقي بيهم

حمزية : يمه بنيات كومن صعدن وارتاحن علما نصب الغده ونصيحلكم اكيد تعبانات وتردن تسبحن وتبدلن
اخذن راحتجن بعد كلبي لتجبجبن بيتجن هذا حبايب

يمه وئام كومي حبيبة شبيج بيتج وبيت بناتج هذا كومي ليش مستحيه

النوح : لحظة ام عبدالله ، لتصعدون فوك ، اكو امور لازم نحجي ونتفاهم بيها وعود اخذو راحتكم

حمزية : ياعيني خليهم يرتاحون ويتغدون وعود سولفو على راحتكم مو وكتها هسه

النوح : لا وكتها ما طايرة الراحة ولا الاكل طاير لاحكين يشبعون بطونهم ويرتاحون

زبيدة : ببرود ما كاتلين نفسنه على الراحة ببيتك ولا جاييك ناكلين بطونه الكم عيب هالحجي

حمزية : يا يا ولج شلون تردين على جدج هيج

زبيدة : ما كلت شي غلط

بيداء : شهاللسان هذا !!

زبيدة : الكلام ما موجه الج فلتدخلين

دنيا : همستلها كافي زبيدة عيب

زبيدة : لا مو عيب العيب هو كلام جدج اشو ديحجي ويانه وكأنه مشايفين لو مماكلين ، جان يكدر يحجي باسلوب الطف من هيج بالنهاية هو الجابنه لهنا مغصوبين ما اجينه بمزاجنه حتى يمن علينه بكلامه

دنيا : اباوع البنات فاتحات عيوهن ويتنادسن خو بيبي وعماتي ضلن صافنات على تحول زبيدة واسلوبها بالكلام بس هاي زبيدة عدها تموت ولا تسمح لاحد يسمعها حجاية

بدرية : عمة حبيبتي ميصير تحجين ويه الاكبر منج بهالاسلوب واحتمال انتِ فهمتي اسلوب جدج غلط تره ما جان قصدة شي وبالعكس منو الكال ناكلين بطونكم ماعيب

بيداء : حتى لو قصدة شلون تتجرئ تحاجي جدها بهاي الطريقة ، شنو من تربية هاي معقولة امج الصايمة المصلية ما علمتج انُ عيب تنترين على الاكبر منج بهالطريقة

زبيدة : لا علمتني بس الحياة هم علمتني ما اسكت عن اي شخص يفكر يقلل من شأني بأي شكل من الاشكال وبالنهاية انتو مو امي ولا ابوية حتى اتعامل وياكم بهالقدسية

وئام : زبد كافي يمه سدي الموضوع جدج كاعد يخزر بيج ، تجفي الشر وسدي الموضوع فدوة اروحلج

زبيدة : بهمس ما شفتيهم شلون يحاجونه ويباوعولنه
من دخلنا لسه عبالك مانين علينه منيه

وئام : ميخالف امسحيها بوجهي ، عمي تره زبيدة متقصد شي

زبيدة : لا اقصد

حمزية : كافييي لج انطيناج عين هواي شهالوكاحة هاي ، يمه يمه اكلتينه وشربتينه على حجايه ما مقصودة شبيج جايه متحمله ما توقعتج هيج
ولا مبين عليج هيج صلفه

النوح : كافيييي سدو الموضوع وانتو تحركي لمكتبي اكو موضوع اهم من هاي التفهات وانتِ هاي صارتلج
الثانية وراح اعبرها بس بالثالثة اقسم وداعة ابوية
راح انسى انج حفيدتي واطلعلج الوجه الثاني

وهسه لحكوني ، شبيكم صافنين ييييييله

دنيا : والله عاط بينه عيطه فززنا من مكانه خطية حتى ديمة من الخرعة عاطت بدون متحس

مشينه ورا صاعدين فوك ، اباوع على الطابق الثاني
ما شاء الله شنو من بناء وترتيب رغم انُ تصميمه قديم بس مرممي بشكل يجنن

مشينه ورا لنهاية الممر ، اباوعله فتح باب بالمفتاح ودخل واحنه دخلنا ورا ، جان مكتب كلش جبير
وتطغى عليه الالون الغامقة

النوح : سدو الباب وراكم

دنيا : دخلت اني اخر وحدة وسديتها ، اباوعله وكف كدامنه وضم اديه يباوعلنه بنظرات حادة

النوح : ما راح اكلكم استريحو لان هالمكتب مامسموك يدخله الا اهل البيت والقريب مني وانتو لحد هاللحظة ما محسبوين على اي وحدة من هالفئتين

على كل حال لازم تعرفون انُ هالبيت من قبل لتنولدون انتو بهالدنيا اله قوانين ثابته وكل اليعيش بهذا البيت مفروض عليه ينفذ هالقوانين بحذافيرها
وبدون اي اعتراض واليعترض

زبيدة : طمنا وكول ينطرد

النوح : هه طبعا لا ، اني ارتكبت خطأ واحد بحياتي مرة وطردت اما هسه فلا ، اني انسان من وعيت واني اؤمن بالعقاب وما اخفي عليكم احب العقوبات على كلبي هي العقوبات الشديدة ، التوجع وتكسر الظهر

فلتخلوني اضطر في يوم من الايام إني انعطف وياكم لهذا الطريق لان لو سويتها راح اخليكم تشتهون الموت ومتحصلو واني اعني كلامي وامكم شاهدة
تكدرون تسألوها ، هاا وئام

دنيا : باوعنا لامي الي دمعتها على خدها ، مبين انها تذكرت شي مؤذي هلي بجت

ما تحملت الموقف ولا الكلام وقررت اني احجي

جدو انت ليش هيج دتعاملنا ، احنه بشنو اذيناك ؟ ادري جانت اكو مشاكل بينك وبين بابا بس احنه شنو ذنبنا ، شسوينه حتى تكرهنا هيج وتعاملنا وكأنه
مو احفادك ، من اول ما شفتنا وانت تهدد بينه

انت جدنا والمفروض من بعد بابا تصيرلنا سند وجناح يلمنا من الدنيا واذيتها مو بالعكس

النوح : اني ما كلت اكرهكم ولا جاي اعاملكم معاملة سيئة ، اني هذا اسلوبي ، عندي قوانين اليمشي عليها
يشوف جنة السمه بالارض واليخالفني يخسر
خسارة تخلي يعض اصابعه ندم

وللعلم تشددي بالكلام هسه وياكم اني متعمد بي حتى من هاللحظة تستوعبون جدية الكلام الراح احجي ومتاخذو بضحك وشقة لان اني ما اسامح اليطلع عن
شوري

دنيا : بس جدو انت هيج دتخوفنه بكلامك

النوح : احسن الخوف يعدل الشوف

وهسه سمعوني بدون لتقاطعوني

اول شي هالبيت مابي شي اسمه بكيفي ، ممنوع اي احد بيكم يتصرف اي تصرف بدون ليرجعلي

ممنوع اي واحد بيكم يرجع بعد الساعة الـ1 بالليل
تصير الساعة بالوحدة البيبان تتقفل ومحد يدخل
للبيت باستثناء ايام المناسبات

ممنوع احد ياكل وحدة ، الكل يكعدون سوه على نفس السفرة ، باستثاء المريض اله سماح ، خلاف ذلك ينحرم من الاكل وينسحب منه المصرف واني اعني كلامي

ممنوع عليجن تختلطن بأي احد غير كرابتنا وولد عمامجن ، سوالف الاوبن مايند هاي متمشي يمي احنه عائلة متحفظة وهم لبسجن هذا ما مقبول

صحيح لبسجن مستور بس البنطرون الكابوي ممنوع
وانتِ بالذات لبس المتشبهين بالرجال هذا ممنوع وحرام

زبيدة : وياي !!

النوح : لا ويه امي

زبيدة : جنت لابسة بنطرون اسود وسويتر اسود طويل للركبة ولابسه ربطه وفوكاها خاله كلاو

شبي لبسي وشنو متشبها بالرجال اخاف شايفني افتل بشواربي وامشي

النوح : تصرفاتج كلها مو مال بنات ، لبسج ، اسلوبج
طريقة بالكلام تحسسني عبالك جاي احجي ويه رجال مو مره

زبيدة : مو فد قندرة الزلم حتى اتشبهه بيهم واقلدهم

دنيا : اباوع لجدو اول ما حجت زبيدة زنكها من هدومها بقوة ، رغم انه رجال جبير ورغم انُ زبيدة
بنيتها نوعا ما ضخمة بس هو بحركة وحدة طيرها من مكانها حتى هي ضلت صافنه

النوح : بخفوت ، لتختبرين صبري يابت ياسر ، لسانج هذا انتبهيله شيحجي ، ما اريد انسى امج منو تره والخلقج ما مخليني صابر وساكت عنج غير وسيلة
كلما اريد ااذيج توكف بعيني واخاف تزعل عليه
وهي بكبرها

فلتجبريني ازعلها وهي بكبرها ، لزمي لسانج وامشي عدل ، اني مو ياسر ابو كلب الطيب واسكت وامشي

اني النننننوح اخاف متعرفينيييي لو ما حاجيييلججج
عليه ولللللج انيييي ابوج وعمامج والاكبر منهم ممشيهم على الصراط المستقيم تكدريليييي انتتتتتِ الحشرة وتجاوبيني

دنيا : دفعها حيل بعد ما مكمل كلام ، اباوع لزبيدة طول مجان يحجي هي تخزر بي ولا كأنما عورها
واذاها بالكلام ، انتبهت للسويتر مالتها انشك
كد ما جان جاره بقوة

النوح : ام حسن تاخذين هاي وتفهميها علينه وعلى طباعنا بالتفصيل الممل ، واذا ماعرفتي تتعاملين وياها كليلي ، تره بعدني عندي حيل واكدر ارجع اربي من جديد

طلعو يله انتهى كلامي وياكم وهم حسبو حسابكم كل يوم جمعة كعدتكم تصير من الـ7 لان نروح للبستان

كلامي مفهوم ، متحجوووون

دنيا : جاوبنا كلنا ماعدى زبيدة

النوح : خوش حجي ، وهسه كعدو خلي نتفاهم بهدوء

دنيا : كعدنا وهو سحب كرسي من المكتب وكعد كبالنه وضل يحرك بالسبحه ويباوع لديمة

النوح : اول شي اريد احجي على زواج ديمة ، حسب العرفته عنج انج مخطوبة وعاقدة عقد شيخ وبعدج ما عاقدة محكمة مو ، متحجين شبيج تتصفنين

ديمة : هزيت راسي

النوح : رجلج شيشتغل

ديمة : كصاب

وئام : صانع عد كصاب

النوح : وشبيج مستنكفه وانتِ تحجين ليش اهلج مو جانو بذاك الوكت صناع عد ابوية ؟

وئام : احنه عمرنا ما اشتغلنا صناع

النوح : خلي المضموم مضموم احسن يا وئام ، احجيلي ديمة رجلج دراس لو هيج عطال بطال

ديمة : لا جدو دارس ومتخرج

النوح : شدراس

ديمة : هندسة معماري ، اباوعله هز راسه وتنهد

النوح : وسفه مهندس ويشتغل صانع ، الله يقوي ، على كل حال اني اليوم رايحله ويه عمامج

ديمة : ليش جدو تره والله امين حباب وما مسوي شي

النوح : مو وحوش حتى نأذي ، راح نروح نعتذر على سوء الفهم الصار بواسطة اخذناج ورحنا بدون منرجعله خبر ، تبقين مرته ومالنه حق نتصرف بدون
علمه بس الموضوع صار ركض ركض وشدهنا

ديمة : تعتذون منه ؟

النوح : لعد شلون اذا مرحناله معناها احنه مستصغري واني ما اريده يحس هيج وهم راح اعزمه هو واهله لهنا يوم الجمعة للبستان حتى نتعرف عليه ويتعرف علينه

زبيدة : ما شاء الله عليكم تنزفون اصول

النوح : شكلتي ؟

زبيدة : سلامتك ، اكو شي بعد حضرتك تريد تكوله لو تسمحلنا نطلع

النوح : لا هاهي مسموحلج تطلعين

دنيا : طلعت زبيدة كدامنا و وجهها مدخن من العصبية واحنه طلعنا وراها ، دنريد ننزل وصارت بوجهنا غيداء بنت عمو فؤاد

غيداء : هلاووو

دنيا : ابتسمتلها هلا بيج حبيبتي

غيداء : تعالن كلبي لتنزلن بيبي كالت اوصلكم لغرفكم حتى ترتاحون ومن يصير الغده اصيحكم

تعالو تفضلو منا بيتكم هذا لتستحون تره احنه اهلكم
يله عيني يكيك انتِ امشي

ديمة : اني ؟

غيداء : لعد اكو كيك غيرج جنج باربي انتِ وامج صلوات على النبي شحلاتكم ، امشو امشو

دنيا : ابتسمت على اسلوبها فدوة شلون حبابه ، دنمشي وياها واستوقفنا صوت جدو

النوح : غيداء

غيداء : نعم جدو اامرني

زبيدة : اامرني !!

دنيا : خزرتها حتى تنجب

النوح : هارون وين

غيداء : والله ما ادري بس اخر شي شفته رجع من الاسطبل ، احتمال صعد لغرفته

النوح : خوش لعد استعجلو بالغدة وروحي شوفي اذا بغرفته كليله جدي يكلك روح جيب السمجات وتعال

غيداء : هاا اني اروحله ؟

النوح : لعد امي

غيداء : العفو هسه اروح بس اوصل البنات وخالة

النوح : بارك الله بيج

دنيا : مشت غيداء واحنه وراها ، اباوعلها فتحت بابين
واشرتلنه

غيداء : خالة هالغرفة الج ولخالة ام حسن وهالغرفة للبنات

زبيدة : اخوية معين وين غرفته وشلون حيصعد للدرج وهو ميكدر يمشي ، شوفولنا غرف جوه منكدر نصعده لهنا

غيداء : حبيبتي انتِ ليش هيج عصبية اهدي واخذي نفس موزين عليج تره

وبخصوص معين فلتخافون من البارحة الولد رتبوله غرفة جوه يم غرفة عمة بدرية وانتو بأي وقت تكدرون تنزلوله وهم جدو رادة جوه حتى الولد يطلعون ويطبون عليه علمود ميمل

زبيدة : ليش عمتي بدرية عايشة هنا ؟

غيداء : اي لان زوجها مستشهد من زمان فعاشت هي وصاحب هنا ، يله اعوفكم ترتاحون واي شي تحتاجو
انطوني خبر ، من رخصتكم لازم اروح لهارون

دنيا : راحت غيداء وامي ودادا دخلن لغرفتهن واني وخواتي دخلنه لغرفتنا ، اباوع للغرفة كلش جبيرة
وبيها تلث اسرة وكنتور جبير

راحت زبيدة ذبت نفسها الجرباية ونزعت حجابها

زبيدة : اني ما مرتاحة هنا

ديمة : ولا اني

دنيا : ديمة انتِ اول وتالي حتتزوجين وترحين منا واني هم بس الطامة الكبرى بهاي الغبرة الراح تبقى وحدها هنا شلون بيها وهي من اول يوم كرهت كل الي بالبيت بيها

زبيدة : عشتو طبهم مرض حبوني لا حبوني بحالهم اني لو اكلبهم بالشمس لو بالفي طز بيهم وبعشرة من امثالهم

والله وداعة امي لوما وصية بابا جان ركعتهم بميت نعال ورجعت لبيتنا ، اشو شغل وعندي ويدر عليه خير من الله وبيتنا ملك وعدنا محل بحالهم احنه

وصدك تعاي شنو سالفة رجعتج ليوسف سمعت البارحة بابا شكاتب بس مجان ببالي اسألج
غمزتلها هو انت بتزاكر من ورانا

ديمة : اي صحيح صدك حترجعين ليوسف

دنيا : هاا اي بس لتفهمن غلط مو علمود شي بس لخاطر تيم

زبيدة : حنينة بعد روحي

دنيا : جديات داحجي اني حرجع ليوسف علمود تيم وهم لو مجنت قابله فهسه راح اقبل في سبيل اخلص منا اني تعبانة نفسيًا ما اتحمل هالشد النفسي الي بهالبيت البيه مكفيني

ديمة : بس متشوفين الدتسوي مو صح بحق الطفل
بالنهاية هو يضل ابن رجلج ومهما حاولتي تبقين مرت اب

دنيا : ليش ماما هم فد يوم حسست زبيدة هي بنت رجلها

زبيدة : ميحتاج تحسسني اني حاسه من كاعي

دنيا : لا الله عليج هم فد يوم واحنه صغار امي اذتج بشي لو حسستج انج مو بنتها

زبيدة : الشهادة لله واني ورايه حساب ، ابد جانت عادتني حالي من حالكم وشتجيبلكم تجيبلي وياكم
وحتى من جانت نبقى بس اني وياها ماجانت تأذيني بالعكس بس اني ما احبها

دنيا : طاحظج اي والله مو جنتي تحجين مثل الاوادم

زبيدة : ما اكدر اتصنع وازيف مشاعري مو بأيدي صدكيني اما بخصوص كلام اختج فرغم كل الصار اني مطمئنه على تيم لان انتِ موجودة

انتِ انسانة طيبة وتخافين ربج مستحيل تأذين طفل باي شكل من الاشكال مو عاد ابن يوسف الشايفته وممصدكه وتره من البداية اني ادري بيج راح ترجعيله
لان لا هو يكدر يتوالم ويه غيرج ولا انتِ تكدرين
تتوالمين ويه غيره

دنيا : تنهدت وكعدت مو مهم هالكلام هسه ، المهم عندي بالوقت الحالي انجمع اني وتيم ببيت واحد وعود كلشي بعدين يرهم

زبيدة : لزمت ايدها ، لتخافين اني واثقة انتِ حتكونين ام رائعة وحتشوفين شلون تيومي ويوسف راح يعوضوج عن كل الصارلج

دنيا : هيج تتوقعين ؟

زبيدة : ابتسمت اكيد

دنيا : اباوع لديمة صافنه على زبيدة ، حاوطت زبيدة وفتحتلها اديه اجتي حضنتني من جهتي الثانية ، بستهن رحتلجن فدوة لوما انتن ما اعرف وين انطي
وجهي ، الحمدلله الخلاجن خواتي

ديمة : فدوة لكلبج دندون نيال تيومي عليج والله على هالحنيه الشايلتها

دنيا : ونيال امين عليج هم لعد انتِ شناقصج

ديمة : تنهدت وغمضت عيوني شريد احجي واكول ، موضوع امين وزواجي حيل مخوفني ، خايفة منه وبنفس الوقت خايفة عليه

اني ما اكدر اتقبله وبنفس الوقت ما اريد اكسر بخاطرة وااذي وهو ميستاهل شلون حتعامل ويا والله ما ادري

سمعنا الباب تندك وتدخل بعدها هدى ونور بنات عمامي

هدى : يله بنات تعالو الغده جهز ، وهم جدو يكول خلي زبيدة تبدل ملابسها وتلبس صايه لو دشداشة

زبيدة : عفوا ؟

نور : تره احنه مالنه علاقة جدو كال هيج

دنيا : طبطبت على ظهرها ميخالف زبد لتضوجين عادي احنه متعودين على الصايات والدشاديش

زبيدة : مشكلتي لا ويه الصاية ولا ويه الدشداشة مشكلتي ويه جدج اليريد يمشينا بكيفه بعد هالسنين

هدى : زبيدة تره والله جدو كلش حباب وحنين بعدج متعرفي ، لتشوفي هيج مبين عصبي تره احن من كلبه ماكو وكلنا نموت عليه بس همه كل زلم هالبيت قاسين وميحبون يبينون مشاعرهم

نور : هاي بس ابوج هيج اني ابويه فدوة لطوله عسل على الكلب لا يأذينا ولا يقسى علينه

هدى : واخوتج شمسوين بيجن كلش كافي عليجن هارون

نور : لتجيبين طاري هارون اخويه مريض ما اقبل تذمي

ديمة : شبي

نور : منعرف شبي بس هو مريض

دنيا : حسيتها متريد تحجي فما سألتها بعد ، خطية الله يشافي

هدى : شبيج طنكرتي ولج

نور : شكراً حبيبتي ، وانتِ سكتي عني كلما حجيتي وحطيتي اخوتي بالوسطة مشايفه اخوتج اهل النسوان المسلوعين

يله بنات تعالن جدو ميقبل واحد يتأخر على السفرة

دنيا : مشينه ويه البنات بعد ما بدلت زبيدة ، و اول ما نزلنا شفنه معين لاف ايده ، ركضناله

هاا حبيبي طمني شلونك

زبيدة : خوما ايدك انكسرت

ديمة : احجي حبيبي خوما متأذي

معين : بابتسامة لتخافن اني زين بس صار عندي رضوض والضربه ما جانت قوية حتى مالحك الحصان يضربني يا دوب شويه لاحني

زبيدة : بله انت متوازي تجر الحصان من ذيله

ديمة : اي والله يعني شلون تتجاوز عليه هيج هسه انت تقبل واحد يجرك من شواربك

دنيا : ويه ما حجت ديمة سمعنا صوت ضحك دوى بالصالة ، درت وجهي عليهم لكيت ولد عمامي يضحكون همه والبنات وبيبتي تهتز من الضحك

معين : هههههه والله سوالفج يا ديمة وبعدين اني ما جريته شنو مخبل واجر الحصان من ذبله بس هذا ابن عيسى الله يحفظة جاي يدفعني ومن وكفنا جر الحصان من ذيله وشرد

زبيدة : مسحت وجهي ذكرني بكاظم الله يذكره بالخير جان كلما يشوفني يترس وجهي تفال

مسحت على ايده بأسف سودة عليه مبينه ايده توجعه ، غطيت رجليه وعدلت رجليه وكعدت يمه
وراحن البنات يجيبن الاكل واني كعدت اسولف ويه
خواتي وخالة وئام اريد اضيع الوقت

لهناك وشفت مجموعة ولد يدخلون من بره غير الجانو كاعدين

: السلام عليكم

زبيدة : اباوعلهم كلهم سلمو وصعدو فوك ورجعو نزلو صوت ضحكهم وشقاهم يدوي بالمكان

ما انكر كعداتهم واجوائهم حلوة وبيها شي عمري ما التمسته بس رغم كل هذا اكرههم وما راح اغير فكرتي

اباوع لجدي نزل وكلها كامتله الا اني ضليت كاعدة ، عشتو عليمن اكوم شنو كاعدين بمدرسة

راح كعد يم بيبيتي ويسولف ويه الولد ويشاقهم وهو يشاقو بس بادب وبدون تجاوز

النوح : صاحب وموسى المصلبخ وين

موسى : اني هنا تاج راسي ، اامرني

النوح : اخوتك وين

موسى : عيسى هسه جاي ويه ابويه وهارون راح يجيب السمج مثل ما وصيته

النوح : عاشت اديكم وانتِ حجية طبختي غير السمج مثل ما وصيتج مو

حمزية : اي طبعا سويت تمن وفاصولية وشويت دجاج اخاف معين وديمة ودنيا وامهن مياكلن السمج

زبيدة : عشتو عود استثنتني منهم بحال اكلج اني شحال لو ما اني طباخة واعرف اطبخ احسن من احسن واحد بيكم

اباوع لخواتي اللوكيات كامن يساعدنهم واني ضليت كاعدة بمكاني والله ولا تحركت

دنيا : دخلنا للمطبخ ، تحبون نساعدكم بشي

منال : لا بعد عمري عليمن مزحمات نفسجن احنه كومه هنا ، اذا تردن اوكفن يمنه خلي نسولف وندردش علما نكمل صب

زهراء : اكول ديمة انتِ مخطوبة مو

ديمة : شفتها تباوع للحلقة ، اي مخطوبة

نور : مبروك حبيبتي

منال : مهنايه يمه

ديمة : ابتسمت شكراً الله يبارك بيكم

نوال : وانتِ دنيا متزوجة لو لا

دنيا : حرت شكلهن ، متزوجة لو منفصلة ، اخر شي كلت ليش اجذب ، جاوبتها منفصلة

هدى : يااا هذا يا ماعنده ذوق طلكج

غيداء : اذا ما طلع اجكم وحافي منتف اطلع كلشي ما افتهم

دنيا : ابتسمت ، تمنيت اكلها لو شايفه جماله وشخصيته مجان حجيتي هيج

اباوع لعمتي بيداء دخلت واول ما شافتنه نترت بوجوهنا

بيداء : تعالن شيلن البنات جاي يصبن شبيجن صافنات

منال : شجاج خيه اني كتلهن اوكفن يمنا

بيداء : وانتِ منو حتى تصدرين اوامر بكيفج ، يله امشن الحجي يريد يتغدة ويطلع ما فارغ

دنيا : بدون منجاوبها شلنه ويه البنات وطلعنا بره
دنكلت خليت الاكل بالسفرة و ويه ما شلت راسي
صار بوجهي هارون ، جان داخل وبايده السمج
وويا ولد شايلين البقيه

مدري ليش من شفته انقهرت ، رغم اني ما اعرف بشنو مريض بس انقهرت عليه اي مرض بهالدنيا صعب وياخذ من الانسان كل حيله وخصوصاً هو مبين بعده شباب يعني يطلع ببداية الثلاثينات

كمت رجعت اشيل ويه البنات وزبيدة الادبسز ااشرلها تكوم ويانه تسوي روحها متشوف

كملنا كلشي واجوي عمامي كعدو واحنه هم كعدنا

النوح : هيام وين ؟

دنيا : سمعنه صوت على الدرج ، شلنا راسنا وشفنا منظر خلانه صافنين

نزلت مره من فوك بس اللهم صلِ على محمد وال محمد شنو من جمال شايله من صدك تجبر الواحد جبر يباوعلها رغم انها جبيرة بالعمر بس كلش حلوة

طبعا على كد ما امي حلوة ابد مجنت انُ ممكن تجي وحدة تكون احلى منها لكن من شفت هالمرة سحبت كلامي

اباوعلها اجتي والذهب يضوي وياها

هيام : السلام عليكم

: وعليكم السلام

النوح : يله بويه تعاي كعدي

هيام : صار عمي بس خلي اسلم شلونج ام معين البقاء في حياتج

وئام : ببرود حياتج الباقية

دنيا : اباوعلها راحت كعدت يم عمي عبدالله واستندت على رجله ، معقولة هاي مرته ؟ يعني هاي هسه ام عيسى وموسى وهارون ونور ونوال
باوعتلهم فعلا تنطيهم شبه بس هي احلى واكثر واحد ينطيها شبهه منهم هارون

ديمة : شفتنها شلون حلوة

دنيا : تخبل ، بده جدي واحنه بدينه ورا واني مدري شبيه كل شويه ارفع راسي على هارون ، اباوعله ياكل طبيعي ابد مامبين عليه مريض

صاحب : من رخصتج يبنيه اطيني الكلاص اليمج

زبيدة : شلت الكلاص بايدي النظيفة انطيته اله ، اسمي زبيدة ، اباوع لهاي الاسمها هيام اشرتلي

هيام : انتِ بنت وسيلة

زبيدة : بلا مبالاة ، اي

هيام : تشبهيها

زبيدة : ادري

دنيا : دغيتها ، احجي عدل

زبيدة : رجعت اكمل اكل ، احس بيهم يباوعولي بس مغلسه خليني هيج احسن ذوله مال لبس

كملت وكمت حتى اغسل

بيداء : وين رايحة

زبيدة : اغسل !

بيداء : ميصير تكومين وجدج بعده ما مكمل تعلمي الاصول

زبيدة : وانتِ يعني الراح تعلميني الاصول

فؤاد : احجي عدل ويه عمتج وكعدي علما يكمل جدج وكومي حالج من حالنا ، كعديييي

زبيدة : جرتني دادا كعدتني ، كعدت على اعصابي اني ما متعودة هيج مدري منين جايبين هالسوالف التعبانة بله جدي قرر يكمل باجر شنو نضل مكابلي وكاعدين

النوح : الحمدلله ، دايمة ان شاء الله

زبيدة : اباوعله كام واني طفرت ورا ، رحت للمغاسل لكيته واكف يغسل

النوح : اذا ايدج نظيفة اطيني الخاولي الوراج

زبيدة : سحبت الخاولي قدمته اله وره ما كمل

النوح : عشتي

زبيدة : شكراً ، اباوعله راح واني صرفنت رداناتي و وكفت اغسل ، كملت ونشفت اديه بهدومي يله محد شاف ، درت وجهي اريد امشي بسرعة دافلت لفوك
وانام مالي خلكهم عايشين دور حريم السلطان بزيادة

مشيت بسرعة ولسوء حظي انردمت بجتف واحد ، بس بعدني ما استوعبت الموقف وما احس الا دفعه قوية تجيني بحيث انضرب ظهري بالمغسلة بقوة

انتبهت لروحي انضربت بهارون ابن عمي ، لزمت ظهري بألم وباوعتله شلون دفعني الحقير وضل يمسح بجتفه عبالك شو شنو وكع عليه

لا وبكل صلافة عافني واخذ الطريق طول داخل للحمام ولا كأنما سوه شي ، الكبر حتى الكبر هذا شبي

بس عود اسكتله والله فلا اسكتله بسيطة ، مشيت داريد اصعد فوك حتى انام بس كالعادة السلطان
نوح لام الاسرة الملكية وكاعد يشرب جاي ويسولف ولازم اني ما اصعد لان هيج جاي اقلل من احترمه

مدري بيا عصر عايشين ذوله ، رحت كعدت وسندت راسي على جتف دادا وهي حضنتني وباستني

ام حسن : نعستي مو

زبيدة : اي والله

ام حسن : يله هسه بس يكملون جاي اخذج ونصعد اني هم نعست وما اكدر ما انام الظهر

زبيدة : جتفت اديه وكعدت استمع لكلام جدي الموقر

النوح : اليوم الفجر ان شاء الله تجي المنشئة وتاخذنا نزور كربلاء والنجف ونتريك هناك ونرجع وطبعا بيت ياسر تجون ويانه

دنيا : اني كيفت لان صارلي هواي مزايره وحتى ديمة وامي ودادا كيفن ، هاا زبد ترحين

زبيدة : اباوع لهذا الحيوان طب وكعد يم جدي ، درت وجهي على دنيا ، اي طبعا ما اضيع الزيارة اجتني من الله الا مسودنه وما اروح

دنيا : لعد خوش حنتونس صار هواي مطالعين

ديمة : اي والله

النوح : حجيه اجرت سيارة صغيرة للعاملات خلي يجن ويانه يغيرن جو

حمزية : اي والله عاشت ايدك خطية راحت رواحهن من كعدة البيت

هيام : حبيبي هارون انت تجي مو

هارون : لا ما اجي

زبيدة : اباوعله رد على امه بنتر الكبر هذا حتى ويه امه ادبسز

ديمة : بهمس هذا ليش هيج صوته

دنيا : والله ما اعرف احتمال يدخن

ديمة : يمكن

النوح : جدي ليش متجي تتونس وتغير جو

هارون : عندي شغل ومُلهم ماله خلك ما اكدر اعوفه

عبدالله : هو يوم يا حبيبي تعال ويانه غير جو

هارون : ما فارغ يابه

عبدالله: هاهي براحتك

دنيا : شفت زبيدة كامت تتثاوب ، احم جدو من رخصتك عادي نصعد ننام

النوح : براحتكم جدي

دنيا : اشرت لزبيدة وكمنا كلنا صعدنا فوك ، ذبيتا رواحنه على الفراش وغفينا لليل كعدنا شويه ويه البنات وهم رجعنا نمنا مدري شبينه جنه بيومها عبالك مطلوبين نوم

بالليل كلش اجتي دادا كعدتنا حتى نلحك نطلع دنوصل وقت الاذان ، كمنا حضرنا ملابسنا دخلت ديمة واني وراها ، كعدت الف حجابي وسمعت هبد جاي من الحمام

كمت بسرعة فتحت الباب لكيت زبيدة تكمز

زبيدة : خرب حظي خرب حظييي

دنيا : شبيج ولج مالت السم خرعتينا

زبيدة : اجتني الشهرية ما راح اكدر اروح وياكمم

ديمة : ياااا

دنيا : ديله ميخالف غير وكت عود روحي ما طارت الدنيا ، عادي لتضوجين

زبيدة : كعدت جنت منتظرة الروحة دازور امي وابوية تاليها اجتني ست الحسن

دنيا : عادي حبيبتي ، يله كومي نامي واني حكللهم تخربطتي بالليل ومكدرتي تجين

زبيدة : رحت تمددت ، والله متت قهر فوكاها كاعدة من الليل وداخلة اغسل غسلة الزيارة تالي خوش انركعت بوري

تلفلفت بالبطانية وضليت اكلب بموبايلي ، اباوع لخواتي كملن ونزلن وقبل ليطلعون خابرتني دنيا كلتلي حيطلعون

سلمت عليها وسديته ، تغطيت وحاولت انام بس ما كدرت

اباوع الساعة ب2 واني عيني متاخذ نوم ، ضليت اتكلب فترة طويلة تالي معدتي كامت تطلع اصوات ، تنهدت طارت النومه ، شلت البطانية واخذت حجابي ونزلت جوه

دخلت للمطبخ ، فتحت الثلاثة لكيت كباب شوي سويتلي لفه وطلعت كعدت بالصالة حتى اكل
رفعت اللفه داريد اخذ منها قضمة واستوقفني
صوت انين مال وجع جاي بكفاي

كمت مفزوعه على صوت الصياح ، بلعت ريكي يمه هاي شنو ، ذبيت اللفه ومشيت على اطراف اصابعي
فتحت الشباك اليطل على الطرمة

وبس فتحته صار الصوت اقوة واوضح ، مبين الصوت لواحد جاي يستنجد ويبجي

نزلت عيوني داريد افتح الباب بس انصدمت من لكيتها مفتوحة ومردودة بشكل ميبين انها مفتوحة

اتذكر دنيا كالت سدينه كل الابواب وطلعنا لعد هاي شلون انفتحت ، فتحتها على كيفي وطلعت

مدري شجنت احس بوقتها ، اي واحد بمكاني وانحط بهيج موقف لابد انه يركض لغرفته او يخابر اهله ينطيهم خبر

الا اني جينات كونان تلعب بدمي اذا ما اطلع بنفسي واشوف شكو ما ارتاح ، طلعت امشي على اطراف اصابعي متوجهه لمصدر الصوت

المشكلة الصوت جاي من وره البيت واني اصلا ما مفتره بي فاخاف اخطي اي خطوة تالي سميت بسم الله ومشيت تابعة مصدر الصوت

وفعلا جان جاي من الحديقة الخلفية ، وصلت للكرفان الي ديطلع منه الصوت ، اباوع الباب مفتوحة واني صايرة على جانبها

اسمع صوت واحد يبجي

: افتح عيوني والكعبة اذا سويتلي شي جدي يشرب من دمك والله والله ولك اني حفيد النوح ديربالك تندك بيه يطلعك جدي من جوه الكاع

زبيدة : جان الولد يهدد ويبجي بنفس الوقت كسر خاطري ، تجرأت ومديت شويه من راسي

يبست رجليه من شفت اليبجي ازهر ابن عمتي بيداء والاتعس الرجال الرابطة وساد عيونه هارون ابن عمي عبدالله

اباوعله واكف كدامه ، لابس جفوف وبأيده خاشوكة كاعد يحميها على النار ، يربي هذا ليش ديسوي هيج

ازهر : والله اني ما مسوي شي والله اذا تريد تاخذ فلوس اخذ كل فلوسي وهاي ساعتي الذهب هم اخذها بس عوفني

زبيدة : رجعت مديت راسي شفت هارون شال الخاشوكة من النار وبدون مقدمات لزكها على خد ازهر الي فرفحت روحه وصار يصرخ

شهكت وبادن رجلية من شفت جلدة وجهه تموع
ولسوء حظي بنفس اللحظة اندار هارون وصارت عينه بعيني

بدون شعور من شفته يباوعلي ركضت بكل قوتي واحس كلبي يريد يطلع من مكانه ، شكد وكحه اني بس بيومها حسيت روحي اريد اموت من الخوف
والرهبه

دخلت جوه داريد اصعد فوك وما احس الا شعري ينجر بقوه ، عطت بألم من دفعني على الحايط
وخنكني

صرخت عوفنييييي عوفنيييييي

حاولت ادفعه بس ما كدرت رغم اني مو ضعيفه بس هو يبقى رجال واني ما اكدره ، جاييييي اكلللللك عوفنيييي

اباوع لوجهه وارجف من الخوف ، ما انكر خفت يسوي بيه مثل ما سوه بأزهر ، حسيت بي يشدد ايده على ركبتي خانكني اكثر

شفته دنك عليه ورفع ايده بوجهي هامس بتحذير

هارون : بهمس الي شفتي اذا وصلتي لاي احد ، صدكيني راح ارجع اعيده بيج وبخواتج واخوج

زبيدة : اجيت اجاوبه بس ضاع الكلام من لساني وكت الي انتبهت لايده الرافعها بوجهي

ايده جان موشوم عليها عقرب بشكل واضح وصريح على طول الايد و وهالعقرب هذا اني شايفته ومتأكدة هو نفس العقرب الجنت اشوفه بالحلم

من هول الموقف ما حسيت بنفسي الا ويغمى عليه

***************************************
لهنا يكون خلص البارت ان شاءالله يكون عجبكم ❤️
+ لتنسون التصويت والتعليق برأيكم ❤️

شنو رأيكم بالاحداث ؟

شنو تتوقعون حيصير بالبارت الجاي ؟

.