الموت الحي الفصل التاسع وثلاثون 39 - بقلم براء الموسوي

مرحبا حبايبي العسل شلونكم ❤️❤️

°°°°°°°°°°°°°°°°°°°°°°°°°°°°°°

أراكِ فتضحكُ الدُّنيا لعيني
وتَبْتَسِمُ الأماكنُ والزوايا !

أرى كُلَّ الوُجُوهِ تفيضُ حُبًّا
كأنَّ شُعوريَ اكْتَنَفَ البرايا !

عبد الخالق الحفظي

امين 🖤

°°°°°°°°°°°°°°°°°°°°°°°°°°°°°°

#الموت الحي
#للكاتبة براء الموسوي

زبيدة : واكفه واباوع على اجواء البستان والجمال ، رغم جمال كلشي هنا بس اني ممرتاحة واحس اكو شي ناقصني بس ما اعرف شنو هو

انتبهت لزيد ابن عيسى يتقرب يمي ويرفع كيس مليان جلاتين

زيد : تردين ؟

زبيدة : ابتسمت الك حبيبي الف عافية

زيد : لا والله اخذي كلش طيب

زبيدة : اخذت وحده اكلتها وغمضت عيوني نعلعلا بليسك حامضة

زيد : ههههههه

زبيدة : ابتسمت على ضحكتة ، انت بيا صف

زيد : بالسادس ابتدائي انتِ بيا صف

زبيدة : اني بصف الحايط هههههه لا اشاقة وياك اني مدرسة

زيد : يعني ست مو

زبيدة : هزيتله راسي

زيد : هاااا وتحطين عشرات لو بس صفارة

زبيدة : ضحكت لا اخلي عشرات

زيد : اي عفيه

زبيدة : سوالي حركة بايده ، شنو يعني

زيد : لايك يعني اعجبني

زبيدة : هههههه والله سوالفك تضحك

انت ابن عيسى مو

زيد : اي

زبيدة : وامك مموجودة مو ، اباوعله كعد يمي وخله كم قطعة جلاتين بأيدي

زيد : اي عد اهلها هي وخالتي افكار

زبيدة : انقهرت عليه ، عندك اخوان انت

زيد : اي عندي بعد اخو زياد واخت طيبة بالكماط

زبيدة : وينهم؟

زيد : زياد ذاك وطيبة عد بيبي هيام

زبيدة : هزيت راسي هم تشتاق لماما

زيد : لا عوفيها عد اهلها خلينا خلصانين منها بس تكتلنا اني وزياد وتصيح علينا

يله اني رايح تجين وياي ؟

زبيدة : وين رايح ؟

زيد : للاسطبل تجين ؟

زبيدة : اي يله كمت ولحكته وهو يهرول كدامي ، اوكف ولك لا اروح اتيهه وما اعرف ارجع

زيد : دتعاي اطيني ايدج شكد فاهية

زبيدة : اجه جر ايدي وركض ساحبني ويا عززه هذا شنو ، ضحكت ذكرني بكاظم والله بس هذا ابيضاني
ونظيف

ضليت اركض ويا واضحك جني مسودنه بس للامانة تونست على برودة الجو وريحة الزرع احس شي بروحي من جوه برد

وصلنا للاسطبل بعد فترة ، وكفت التقط انفاسي

زيد : يله تعاي اراويج الحصونه

زبيدة : اسمهن احصنه

زيد : نفس الشي المهم بيهن حصان ، تعاي شوفيهن

زبيدة : تحركت اباوع لامكان الاحصنة ذاك اليوم من اجينه ويه جدو ما ركزت هواي

بس ما شاء الله بيت جدي عدهم عدد مو قليل منهن شيسوون بيهن ما اعرف بس منظرهن يجنن

زيد : لتدنين يمهن

زبيدة : ليش ؟

زيد : ذني لعمو هارون لتدنيلهن ميقبل

زبيدة : كلهن اله ؟

زيد : لا بس هو الي مربيهن

زبيدة : هزيت راسي وضليت افتر بالمكان واباوع على جمال الخيول ، طلعت موبايلي من جيبي وصورتهن

لهناك وانتبهت اكو زاوية مغطايه بشرشف اسود ، استغربت المنظر وتقدمت رفعت شويه من الغطة

ابتسمت من شفت حصان ابيض گطن وشعرة طويل وجسمه يلمع لمع ، انتبهت لشعره شلون مضفور بطريقة تجنن ، سبحان الله شنو هالجمال

جريت الشرشف وخرته وفتحت الكاميرا حتى اخذله صورة بس توقفت من سمعت صوت ركض بالاسطبل ، انداريت وشفت هارون يركض باتجاهي

وبس شافني واكفه بهالمكان فتح عيونه واشر على الشرشف

هارون : انتِ وخرتي الغطة ؟

زبيدة : باستغراب اي

هارون : بعصبية منووو سمحلج تشيلييييي غبيييييية

زبيدة : لتصيح عليه افتهمت لو لا خاف عبالك ذاك اليوم سكتتلك على الموقف السويته هسه راح اسكتلك احترم نفسك وصوتك هذا متعلي عليه

لتخليني اطلعلك وجهي الثاني وان سمعتك بعد تغلط عليه اراويك النبي عربي شنو

اباوعله رفع ايده الموشومه وحك طرف حاجبه ، من شفت الوشم مدري شصار بيه ، رجعت تذكرت الحلم
معقولة هالوشم مجرد صدفة لا اكثر لو اكو شي ورا واني الما جاي اكدر افسره

ضليت صافنه على ايده لحد ما فزيت على ايد تجرني من طرف قميصي ، اباوعله سحبني بقوة من طرف هدومي جارني بره الاسطبل

دفعته هاي شجايييي تسوووي انتتتتت شلووون تتجرأ تلزمنيييي هييييج ، جاوبني وهو يصك على اسنانه

هارون : طلعي منا باحترامج احسلج نصيحة لتخليني ااذيج

زبيدة : يا اخي شعليك انتتتتت شعليييييك اسطبل ابوك هو شيخصكككك بيييييه

اباوع لجدي دخل واجه يركض على صوتي

النوح : هاا هاا خيير شبيج تصيحين شسوالج هارون احجي هارون شسويت لبنت عمك

هارون : بخفوت ما سويتلها شي ، مُلهمة قرب موعد ولادتها واني صارلي اسبوع عازلها بمكان وحدها حتى اهيئها للولادة وعايفها تكعد ويه نفسها بهدوء حتى تستعد

تالي اجيت لكيتها شايله الغطة عنها وزاعجة نومتها وهاي كدامك على صوت صياحها اكيد اخترعت
وراح تحس بخطر وتأجل موعد ولادتها

وحفيدتك اكلها طلعي متقبل تطلع ياريت انت تتصرف وياها وتوخرها من وجهي تره اعصابي تلفت من وراها وما اريد اسوي شي اتندم عليه بعدين

زبيدة : اباوع لجدي اندار عليه وخزرني

النوح : شجابك هنا متكليلي

زبيدة : اجيت ويه زيد وبعدين شمدريني ست الحسن عدها ولادة اصلا عبالي ذكر ولا ادري بيها انثى

هارون : ما شفتي بطنها يعني

زبيدة : احد كلك طبيبة اني شمدريني بيها وهاي اول واخر مرة اسمحلك تحاجيني بهذا الاسلوب خليني محترمة فارق العمر الي بيناتنه احسلك ما اريد امد لساني عليك واهينك

النوح : كافييي لج ادبسززز شلون تحجين هيج كدامي

زبيدة : تنهدت ماسحة على راسي لا اله الا الله اني شجابني عليكم ساعة السودة الاجيت بهنا وابتليت
وطبيت لهالاسطبل الاكشر

عفتهم ومشيت ، ربي اخذ عمري وخلصني منهم بعد ما اتحملهم عائلة فول دراما يسوون من الحباية كباية
خبصوني على حصان وياريت لو بيهم حظ ويقدرون البشر مثل ما يقدرون الحيوانات

حضرة جنابة مسويلي روحه حنين على الفرس وهو مشوهه ابن عمته بكلب بارد لو الجد الثاني مسويلي روحة ينزف انسانية شحال لو ما اتبرى من ابنه وعافه سنين بدون ميرف كلبه

عائلة ما مخابيل

رجعت للبستان ورحت كعدت يم خواتي واباوع لهذا الكلب زيد اختفى وعافني هناك اكل الرزالة وحدي
سالني خواتي واني سولفتلهن

دنيا : وشدعوه عليهم قابل انتِ شدراج

ديمة : اي والله وتره ما اكلتيها انتِ لو اذيتي الفرس حتى هيج يتعصبون

زبيدة : شمدريني مخابيل لو ذاك المسودن كلب الامة من الكبر لذيج الخلقة وخفت

دنيا : لتحجين عليه هيج خطية مريض

زبيدة : ولج ياهو المريض عود فرعون لا والله احنه المرضى ذاك ويا شوفة عينج اصحى من الحصان يا مريض يا صخام

دنيا : لا زبيدة عليمن نضحك هو صح ما مبين عليه مريض بس لو تصفنين راح تلاحظين مثل عين الشمس ذاك وينه بي شي مو طبيعي

شكد صارلنا هنا خو اربع ايام بهاي الاربع ايام اني مركزة ويا مو شلون ما جان ، لا يكعد يم احد ولا يسولف ويه احد واصلا كل الي بالبيت ميتقربون منه
ومنشوفة غير بس على وجبات الاكل

البارحة انتِ نايمة كل الشباب اتفقو وطلعو يغيرون جو الا هو عافو كاعد وحده فوك ومحد صاحله
خطية تحسي منبوذ ومحد يريده

ديمة : لا ولج اني جنت بالمطبخ البارحة اجه صاحب كل لامه تروح تكل لهارون بلكي يقبل يروح وياهم جان عمه تكله عوفه متدري بي يكره التجمعات

يعني مو همه الميردو هو اللابسهم وميحب يكعد وياهم اوووف يا زبيدة شلون حتبقين وحدج
كاعدة هنا

زبيدة : ليش يمه شنو راح ياكلوني

دنيا : والله يا زبيدة لو تسمعين كلامي وتقبلين بحليم والله تربحين وتعيشين فوك النخل ، أولا حليم مثقف ويحبج وبيت عمو يحيى يموتون عليج ويتمنوج لحليم امنية بس انتِ مدري شبيج

زبيدة : اني اخذ حليم ؟ ايييييع

دنيا : ليش ولج ايع شناقصة ايد ، رجل ، جمال ، شهادة شو كامل والكمال لله

ديمة : حتى عيونه زرك شتردين بعد

زبيدة : يابه مو بايدي ما احبه هيج غريب تحسي مو راحة لالا سدن الموضوع هذا نهائي ايييع اني اتزوج والله لو اموت

دنيا : خليج اشوفج راح تعضين اصابعج ندم بعدين وعود تعاي تبچبچي

زبيدة : لا اسم الله عليمن اتبجبج هو راح اعزل روحي واتجفه شرهم وهاهي طبعا ما عدى كم نفر ان شاء الله اتفرغلهم وازوعهم العافية

عوفجن من هالموضوع وين صارو نسايبي اشو لسه ما بينو

ديمة : نسابتج ؟

زبيدة : اي لعد امين ويوسف شيصيرون مني غير نسابتي عشتو

دنيا : شفت سيارات توكف كدام الباب الخارجية ، هياتهم اجوي

اباوع للحرس فتحو الابواب ودخلت سيارة يوسف ووراها سيارة جياد وحليم

ابتسمت من شفت خالة رميم تنزل من سيارة يوسف وشايله بايدها تيم ، اباوع لامين نزل من سيارة حليم هو واهله فدوة هالانسان شكد شكلة مريح بحيث الي يشوفة يحس بالطمئنينه مباشرةً

يله ديمة تعاي نسلم عليهم

ديمة : هاا اني اروح

دنيا : اي شبيج فشلة خوما نضل واكفات ، اخذت ايدها ومشيت ولحكتنا زبيدة ، اباوع لجدو استقبل
عمو يحيى ذاك الاستقبال ومن وصل لامين صافحة وبوسه

النوح : أهلا وسهلا ميه هلا ومرحبا ، تفضلو استريحو المكان مكانكم

يحيى : رحم الله والديك عمي متقصر

دنيا : اجوي كعدو ورحنا احنه نسلم على النسوان

رميم : هلا بعد كلبي دندون شلونج

دنيا : بوستها واخذت تيم حضنته ، يمه وليداتي يمه

تيم : ننه ننينج (دنيا وينج)

دنيا : بوسته هياتني يروحي انت ، رحت سلمت على البنات

جمانه : هلا حبيبتي شلونج عفيه شنو هالخبر اليجنن السمعنا صدك راح ترجعون انتِ ويوسف

دنيا : بخجل اي

سهير : الف مفروك حبيبتي اي واخيرًا راح ترجع لمتنه مثل قبل

جمانه : اي والله اني اشتاقيت لكعداتنه سوه وسهراتنه للفجر شلون جانت ايام تجنن

سهير : ان شاء الله نعيدها

دنيا : ابتسمت طبعًا اني وجمانه مرت كريم وسهير مرت جياد جانت علاقتنا كلش قوية وابد منضم على بعض شي بس للاسف الظروف قطعت العلاقة الي بيناتنه

عفتهن بعد ما سلمت عليهن ورحت سلمت على خالة هناء وبصائر وكوه جبرت ديمة تسلم مدري شبيها هالبنية

ديمة : احم شلونج خالة

هناء : هلا بجنتي هلا شلونج يمه حبيبتي شلونها صحتج

ديمة : الحمدلله خالة انتِ شلونج

هناء : اذا انتِ بخير اني بخير حبيبتي

ديمة : رحت لبصائر واول ما شفتها حضنتها ، مشتاقتلج هواي

بصائر : ههههه اني الاشوق يعمري ، تصدكين من عفتونا لليوم واني احس المنطقة تريد تاكلنه حتى امي من كامت تخبز تذكركم وتكعد تبجي والله

هناء: والله يا ديمة من رحتو اخذتو الونسه وياكم هسه الحي صار ممل ولا تشتهين تطلعين

ديمة : يا حبيبتي يا خالة فدوة لعينج شكد رقيقة وحساسة

كعدت يم بصائر اسولف وياها واعرفها على البنات
مدري شنحس اني ودنيا هي استلمت بيت عمو يحيى
قدمتهم لبيت جدو واني سويت نفس الشي ويه اهل امين يمكن بيومها جنه عايشين الدور بزيادة

داسولف ويه بصائر وشلت راسي لكيت امين كاعد يم حليم وعينه صايره علينه او عليه ومن شافني انتبهتله ابتسملي ، ما انكر بلحظتها ابتسامتة جانت صادقة لدرجة خلتني اني هم ابتسم

غيداء : هاا ولج المن كاعدة توزعين ابتسامات

ديمة : ياا اني ؟

غيداء : لا خيالج ما كتيلي وينه خطيبج

ديمة : شايفه هذا اللابس اسود وبنطرون بيجي

غيداء : عزززه بعينج هذا خطيبج

ديمة : لا الي بصفه

غيداء : هااا بس ولج هم حلو ما قاصر بس حلكة جبير

ديمة : ديله يا ام حلك الصغير همزين حلكج مترتين

غيداء : ياا شبيج ديمة شنو زعلتي

ديمة : لتتنمرين حرام وبعدين هو حلكة مو جبير بس لان ضعيف يبين هيج

غيداء : اسفه ديمة والله ما عبالي راح تزعلين عمي اني الحلكي حلك غاگه ورجلج حلكه مسقول شتردين بعد

ديمة : ضحكت على وصفها وانداريت ادور على خواتي لكيت دنيا ماخذه تيم وكاعده توكل بي وكل شويه تبوسة ويبوسها

وزبيدة كاعدة يم عمو يحيى بنص الولد وجدي يخوزر بيها وهي ولا يمها

زبيدة : هاي شطالع اليوم عمو

يحيى : اخبل مو

زبيدة : والقران جنك قلم جاف بقميصك الجويتي هذا هههههههههه

يوسف : انتِ المفروض الواحد يلبس كدامج اسود ياله يخلص

يحيى : ومحمد كرهتني بكل الالوان

زبيدة : ضحكت لالا جديات طالع انيق اليوم يمعود اهم شي ما لابس وردي ولا جلد النمر

هاك شوف حتى امين يضحك مو كلامي صحيح اكو رجال يلبس قميص مرسوم عليه جلد النمر شنو وين كاعد بافريقيا

امين : هههههه صراحة اي جلد النمر كلش فاول

يحيى : الله يفضحج يازبيدة مثل ما فضحتيني

زبيدة : ههههههه

النوح : زبيدة كومي ساعدي البنات

زبيدة : هستوني جنت يمهن ما محتاجات شي

النوح : بخزرة كومي كلت

زبيدة : تنهدت اوف اوف هالرجال يريد يموتني والله كمت وعفتهم دامشي وشفت فرعون بوجهي
عبرته ومشيت بس سمعته يهمس بينه وبين نفسه

هارون : هيلك

زبيدة : شكلت ؟ اباوعلي انطاني نظرة سخيفة وراح وكف يم الشوايات ، هذا شبي حاط كوره من كوري ادري كاتله ابو اني

غميته شكد مكروهه ولا ينطاق دخيلك ياربي عمري ما مر عليه هيج انسان يوغف على الكلب بحيث من اشوفه احس راح اتقيئ كد ما تلعب نفسي منه

رحت كعدت يم البنات علما كمل الغدة وكامو الولد يفرشون السفرة ويصبون بالاكل واحنه كاعدين بس الفاجئني انُ كلنا كعدنه سوه ما سوو بيها حلال وحرام
مثل عادتهم

انوب اجه السلطان نوح ترأس السفرة وتبعته العائلة الملكية وطبعا الجواري الي هنه احنه كاعدين بنهاية السفرة ننتظر جلالة السلطان يبلش حتى احنه نتزقنب ورا

النوح : تفضلو ، الف عافية مقدمًا وعذرونا من التقصير

يحيى : لا عمي حشاك من التقصير

النوح : جدي امين مد ايدك شبيك مستحي وليدنه انت ما حاجة اكلك اني

امين : والنعم منكم حجي

دنيا : بلش جدو واحنه بلشنه ورا ، بيبي وعمة بدرية اندمجن بسرعة ويه خاله هناء وخالة رميم وماما هم هالمرة شويه احسن كعدت تسولف على غير العادة

اباوع لاسلام فدوة لكلبه يفلس سمج ويخلي على الطاولة الكاعد كدامها معين يربي هالولد من شنو مصنوعين شنو هالاخلاق والحنية العليهم الله يحفظهم لخالة هناء ويخليهم الها

حسيت بتيم يجرني من حجابي ، هاا حبيبي انت

تيم : نمنم

دنيا : سودة عليه نسيتك يروحي ، مردت خبزة بالتشريب ووكلته بس شنو ليصني تليص

حسيت بموبايلي يهتز بجيبي ، كعدت تيم بالكاع وانطيته خبزة وطلعت موبايلي بايدي النظيفة لكيت رسالة من يوسف

يوسف : عوفي تيم واكلي تره مو جوعان وبس يريد يخبص ، اني وكلته قبل لا لنجي

دنيا : شلت راسي لكيته يباوعلي ، رجعت كتبتله ، كاعدة اكل ومرتاحة لتشيل هم ، سديته ورجعته بجيبي واخذت الخاشوكة ضليت اكل واكل تيم

لهناك وسمعنه صوت هيام مرت عمي عبدالله تجي
هاي والله ما اعرف شنو سالفتها اشو دائما تجي اخر وحدة تكعد على السفرة ما اعرف ليش

هيام : السلام عليكم

: وعليكم السلام

النوح : وين جنتي بويه

هيام : العفو يابه حقك عليه بس جنت اصلي تدري بيه ما اكدر ااخر صلاتي خصوصا اليوم جمعة

دنيا : ويه ما حجت هيج منحس الا هارون يطكها بضحكة رنانه خلتنه كلنه باهتين

النوح : شبيك جدي

هارون : سسـ هههههههههه سلامتك سلامتك

دنيا : اباوعله يريد يسكت ميكدر من صدك جان جاي يضحك مو يستهزء يعني ، انوب كام على حيله وعاف الاكل واخذ طريقة للبيت بس طول ما هو يمشي لازم بطنه ويضحك

والمشكلة محد افتهم على شنو كام يضحك

النوح : بابتسامة توتر ، عذرونا الظاهر هارون تذكر شغلة وما كدر يسيطر على نفسه

يحيى : عادي حجي شنو السالفة قابل شسوه الولد شنو كفر ضحك

دنيا : انسد الموضوع ورجع الكل يكمل اكل الا زبيدة الوحيدة ضلت طول الوقت صافنه ، شبيج حبيبتي

زبيدة : هاا لالا مابيه شي بس شبعت ، يربي هذا شبي والله مو طبيعي انوب ضحكتة تخوف الظاهر هالهارون صدك مريض واخته متشاقة

كملنه اكل وكمنا شلنه الاكل ونقلنا للمطبخ واجوي العاملات يغسلن المواعين واحنه طلعنه كعدنه بره

النوح : صاحب وليدي الجاي

صاحب : تدلل

زبيدة : راح صاحب جاب قوري مدري منين جايبي تكول جدر الحسين ( عليه السلام ) مو قوري

خلا على الحطب

لمن كمل راحت ورا نور صبت واجه هو يوزع ، اخذ جدي جايه وبده يحجي هو وعمو يحيى بموضوع
العرس

يحيى : حجي احنه نريد نعقد لدنيا ويوسف ويه عقد ديمة وامين طبعا اذا ماكو اشكال عدكم

النوح : لابويه عليمن هالاشكال اذا الشباب مقتنعين ويردون هيج شكو بيها

يحيى : لعد هاهي ، بوية امين شوكت ناوين تعقدون محكمة انتو

امين : عكب باجر ان شاء الله طبعا اذا الجماعة ماعدهم مانع

النوح : هاهي ابني على حجايتك عكب باجر عقدو حتى نتفق على تفاصيل العرس

يوسف : اسمحلي حجي احنه من ناحيتنه من البداية متفقين منسوي عرس مجرد نجدد العقد

امين : واني هم حجيت ويه ديمة واتفقنا نتزوج بدون عرس وهوسه بالنهاية منكدر نفرح ونسوي عرس جبير لا هسه ولا من تدور السنة لان عمي متوفي
مجرد نسوي حفلة بسيطة بيناتنه للاشهار لا اكثر ولا اقل

النوح : هاا ديمة جدي متردين عرس ؟

ديمة : اي جدو ما اريد

النوح : هاهي براحتكم بويه الي تشوفو بالنهاية هاي حياتكم وانتو حرين

زبيدة : ديمة ليش ماراح تسوين عرس

ديمة : اسوي حفلة واركص واغني وابوية ما صاير على وفاته حتى سنة شنو مسودنه لو ماعندي اخلاق
مستحيل نفسيتي متتقبل

زبيدة : هزيت راسي مبتسمة حبيت احترامها لبابا وبصراحة موقفها هي وامين هواي كبرهم بعيني
حسيتهم صدك يحبون بابا وميكدرون يفرحون وهو مموجود

ضل جدو يتناقش ويه عمو وامين بخصوص الزواج واني كمت اتمشى بالبستان وبرودة الثيله تضرب رجليه

حليم : سلام

زبيدة : انداريت عليه ، وعليكم

حليم : ديمة ودنيا راح يتزوجن

زبيدة : صدك والله

حليم : اي والله يوم الالج

زبيدة : الله ليسمع منك

حليم : هههه شلونج احسج ما مرتاحة هنا

زبيدة : ضميت اديه تريد الصراحة ابد ما مرتاحة واريد ارجع لبيتنا بس وصية بابا مانعتني

حليم : يله ما بقى شي وتطلعين منا

زبيدة : حليم سبق وكتلك اني زواج ما راح اتزوج فلتضل تلمح

حليم : ولا اني شكلي راح ابقى اعزب وياج وتاليتي التقي بيج بدار العجزة وهناك يمكن تحبيني بس شنو الفائدة حتى سنوني راح تلكيهن واكعات

زبيدة : ضحكت هو اني ما حبيتك وانت بهالشكل تريدني احبك وانت معجز الا تخبلت

حليم : زين عاد تعترفين انُ شكلي حلو

زبيدة : منو كال عنك قبيح تره شكلك فعلا حلو بس انت مو ستايلي ولا ذوقي

حليم : الظاهر تحبين المصلبخين

زبيدة : ابتسمت تره والله السالفة مو سالفة جمال اني مشكلتي وياك انك رجال لا اكثر ولا اقل

وانتو الزلم اني كلكم اكرهكم قاطبةً ومستحيل كلبي يرف على واحد بيكم لا هسه ولا بعدين

حليم : غير الله خلقني رجال متكليلي شسوي قابل اتحول ياله ترضين

زبيدة : هههههههههه ينطيك العافية والله ضحكتني

حليم : هاك استلم متريد واحد يحبها وهي بس ضحكتها ترد الروح

زبيدة : احم كافي تأدب مو انطيك مجال يله روح منا
لزكة

عفته ومشيت همه ذولة الزلم مينعطون وجهه ، رحت دخلت جوه علما راحو الجماعة واجوي خواتي سولفلي على كلشي يخص العرس

وفعلا وره يومين راحن الصبح ويه امي وبيبي يعقدن
واني كضيتها نايمة

دنيا : واكفين بره المحكمة ومنتظرين يوسف وامين ، باوعت للساعة وين صارو ذولة

ديمة : خاف بطلو ميردون يتزوجون

دنيا : ديمة انتِ فطيرة لو غبية شنو ميردون لعبة هي

حمزية : لاحكة يبيبي شبيج مفلفله

ديمة : يعني شنو ؟

دنيا : بيبي تره ديمة متعرف شنو معنى هالالفاظ

حمزية : لتخافين عليها انطيها شهر وره العرس تلكيها
مفتحة باللبن

ديمة : اني ما افتهمت شتقصدين بس اعرف الموضوع بي قلة ادب

حمزية : عاد زين لكفتي ولو شويه

دنيا : ضحكت على مناكر بيبي وديمة ، بيبيتي نادرة وديمة فاهيه ابد ميتراهمن وهاي من وصلنه لسه بيبيتي كل شويه تتعارك ويه ديمة

اباوع لسيارة يوسف وكفت ونزل منها عمو وامين ووياهم شيخ

يوسف : السلام عليكم ، عذرونا تاخرنا بسبب الازحامات والله كوه طلعنه

النوح : ما صار شي بويه بس منو الاخ

يحيى : يابه يوسف يريد يجدد عقد السيد والمحكمة بنفس اليوم خوما بيها ازعاج اعذرنه انشدهنه وحتى نسينه نسأل على طلبات دنيا

النوح : بيها الخير بويه لا يابه يا طلبات احنه اهل ما بيناتنه هيج امور لو شتكولين بويه عندج طلبات انتِ؟

دنيا : بخجل احم لا جدو

النوح : لعد هاهي امشونه

دنيا : دخلنه للقاعة مالت العقد اول شي عقدنا اني ويوسف

بصراحة كلشي توقعت بحياتي الا إني انفصل عن يوسف وابقى سنين بعيدة عنه وهسه ارجع اتزوجة من جديد وبأرادتي

وما استوعبت إني خلص رجعت مرته الا لمن سمعت الشيخ يباركلنه

وئام : الف مبروك يمه حبيبتي

ديمة : مبروك ندون تستاهلين كل الخير حبيبتي

دنيا : شكراً الله يبارك بيجن

النوح : يله جدي امشونه خابرني صديقي سراكم وصل

دنيا : دخلنا للقاعة وعقدنا محكمة ورجعت اني مرتة ليوسف شرعًا وقنونًا بس يا ترى راح اكدر اتعايش ويا مثل قبل هذا الشي الخايفة منه

كملنه احنه وطلع الشيخ لغير مكان الظاهر جان عنده عقد ثاني

وراحو ديمة وامين يم القاضي يعقدون فدوة منظرهم يجنن شلون خجلانين وامين مبين مو صاحب علاقات وديمة اول تجربة بحياته بحيث طول ماهو واكف يمها متوتر وايده ترجف

لحد ما عقدو وباركلهم القاضي ياله فكو شويه

يوسف : الف مبروك عضيدي يوم الولد ان شاء الله

امين : حبيبي ابو تيم رحم الله والديك

دنيا : مبروك يروحي سبع سعادات ان شاء الله

ديمة : حبيبتي والج هم

وئام : مبروك

ديمة : شكراً ماما

حمزية : حبيباتي الف مبروك ان شاء الله منا لسنة نفرح بولادتجن

ديمة : شنو السالفة بيبي بعدنه بسم الله

حمزية : ليش يمه بس لا ناويات متحبلن من ليليتها

دنيا : بيبي ابوس ايدج تصي صوتج فضحتينه والله

حمزية : مو انتن تفتن الكلب اوي عشتو هو مو صوججن صوجي اني انتن وجهه دعوة

النوح : يله يابه امشونه تاخر الوقت

امين : حجي اني بهاي المناسبة عازمكم

النوح : بويه والله ميحتاج خلي فليساتك بجيبك لتصير تلاف وراح عرس حبيبي انت

امين : لا حجي شنو السالفة تفضلو يله

يحيى : تعال ولك احنه معزومين مو

امين : عيب عمي المكان الكم وعتبته الي شهالحجي هذا ابويه انت

يحيى : بعد روحي والله عمي انت على الراس

دنيا : رحنه وياهم وتغدينه بالمطعم وخطية امين ذب فوك الورقة

انقهرت عليه لان ادري بي على كد حالة بس مع هذا ماحب يبين صغير لو ماعنده بالعكس نفسه طيبة بشكل بحيث خطية كام ينزل بهالاكل ويرجع لوره

النوح : بويه والله ماله داعي شدعوة هالكد كلفت نفسك

امين : حجي رجاءًا لتقيدني خليني على راحتي تره كلامك هذا يضوجني

النوح : هاهي براحتك وليدي

دنيا : شربنه جاي وطلعنه بره المطعم وكف جدو تسالم ويه امين وعمو ويوسف

النوح : يله بويه امشونه

يوسف : حجي من رخصتك دقيقة بس احجي ويه دنيا

النوح : براحتك بويه مرتك هاي

دنيا : اباوعله اجه وكف كبالي ، هاا يوسف

يوسف : حضري روحج اليوم بالليل اجي عليج

دنيا : باسف اسفه يوسف ما اكدر اجي اليوم

يوسف : باستغراب ، ليش شعندج ؟

دنيا : مو تعرف ديمة بعد اسبوعين على زواجها وما اكدر اعوفها وحدها تجهز لازم اكون وياها ، ان شاء الله بس تتزوج ديمة اني احضر غراضي وارجع وياك بنفس اليوم

اباوعله كلب خلقته

يوسف : هاهي براحتج

دنيا : ياا هذا شبي ، انوب امين اجه وره يوسف ، اباوعله يريد يحجي بس متردد ، احجي خويه اسمعك

امين : طلعت الظرفين من جيبي ، تفضلي خويه هذا وارد الشهر

دنيا : مالت شنو ؟

امين : خويه اني متفق ويه معين اسلام يشتغل بمحل المرحوم ويستلم كلشي والربح يتقاسمو بالنص هو ومعين وبيتكم البارحة اجو عليه مؤجرين وخابرت معين كلي اجره واستلم الدفعة الاولى

واليوم الصبح من خابرته كلي انطي الفلوس لدنيا ، وهاي كدامج الفلوس كاملة ما ناقص منها ربع

دنيا : عيب امين اخونه انت شنو هالحجي قابل ندور وراك احنه ، اخذتهن تسلم وربي يرزقك انت واسلام من اوسع ابوابه لوما انتو جان المحل انعاف هيج وكل الحلال البي ضاع

امين : اهل احنه خوية واليضركم يضرنه ، يله من رخصتج وسلميلنه على معين وزبيدة

دنيا : يوصل ان شاء الله

رحت صعدت بالسيارة وسألني جدو واني سولفتله

النوح : ما شاء الله امين واسمه عليه ، شلون ولد دره
انتبهتله اول البارحة من اجونه راسه ما شاله من الكاع

حمزية : هو مبين عليه حيل متربي

النوح : كلش والله اني حيل مأمن على ديمة لابد جنت خايف لا يطلع طماع لو مو خوش ادمي بس من رحناله ذاك اليوم وشفنه شلون انسان خلوق ولسانه حلو حيل عجبني

والاهم من كل هذا شاغول وسمعته بين الناس مثل الورد ما سألنه عليه واحد اذا ما كال انطو وانتو مغمضين

ديربالج على رجلج جدي تره المثله قليلين بهذا الوكت
المرة البيها خير وعدها هيج رجال تحطه على راسها
لو شتكولين حجية

حمزية : اي والله بعد طولي كلامك كله صحيح

ديمة : عزززه بيبي اشو انتِ كلش رومانسية

حمزية : جا شبيه اليترومسن احسن مني لو احلى مني والله ماكو مره تلحكني بس غير كبرت لعنة الله على العمر بس تره بعدني شابه اني ششفت من الدنيا

ديمة : بيبي انتِ شايفه جهال احفادج شتردين تشوفين بعد

حمزية : خفه حلكج وانتِ ماعندج حلك لعد غير اني ابوي عرسني واني عمري 12 سنة يادوب ستوها جانت واكعة عليه ومن ليلتها حبلت وبطن وره بطن

تره اني صغيرة وحتى جدجن تزوجني وهو صغير متشوفي هو وعمامجن نفس الكصة

ديمة : وشدعوه ابوج متوازي يزوجج وانتِ قاصر

حمزية : هاي بعد يا بيبي اهل قبل هيج جانو بس تبلغ البنية يعرسوها بس الحجي بيناتنه همزين عرسوني لان لو باقيه وين الكه مثل جدجن

دنيا : تحبي ؟

حمزية : يااا غير اموت عليه ما انام ولا تغمض عيني اذا مينام بصفي

ديمة : هلاووو هاي بيبي طلعت صدك رومانسية

دنيا : ههههههه والله ياديمة عليج سوالف

وصلنه وره فتره للبيت ، نزلنه واول ما دخلنه استقبلتنه زبيدة ووجها يضحك

زبيدة : حضنت دنيا الف الف مبروك واخيرا راح تستقرين بحياتج بعد هالتعب كلش فرحانتلج

دنيا : بعد عمري يوم التحققين كل الي ببالج

اباوعلها ابتعدت ومدت ايدها لديمة

زبيدة : مبروك

ديمة : باوعت لايدها وتقدمت حضنتها بقوة ومن ردت ابتعد حسيت باديها تحاوطني ، ابتسمت وتشبثت بيها

زبيدة : بابتسامة الف مبروك مهناية ان شاء الله

ديمة : شكراً حبيبتي

حمزية : ولج زبيدة عوفي الاحضان وركضي لحكيني بكلاص نومي بصرة بس حطيلي ثلج

زبيدة : شنو ضغطج علك

حمزية : الظاهر هيج شو احس روحي رخت ، ركضيلي ولج ذني فهايه سنه ياله يسولي حاجة عاد انتِ نادرة اشوه منهن

زبيدة : هزيت راسي ودخلت للمطبخ ، فتحت الثلاجة لكيت بطل بي عصير نومي بصرة ، اخذته وفتحت الفرزير ما لكيت ثلج

انداريت على البنات ، اكول بنات شو ماكو ثلج بالفريز

غيداء : فتحي المجمدة حبي احتمال اكو كاسات مجمدة

زبيدة : فتحت المجمدة هم ما لكيت

هيام : لتضلين تدورين ما راح تلكين صعدي فوك شوفي الغرف احتمال بيهن

زبيدة : ما رديت عليها طلعت لبيبيتي ، بيبي هذا العصير بس ماكو ثلج

حمزية : ولج النومي بصرة ميبلع بليه ثلج بعد كلبي صعدي لغرفتي شوفي اكو ثلج واذا ما لكيتي روحي لغرفة هارون اكيد تلكين عنده البارحة العاملات ترسن ثلاجته كاسات

زبيدة : رجعت للمطبخ اخذت صينية صغيرة وصعدت فوك لغرفتهم ، فتحت الباب ودخلت ادور على ثلج وما لكيت تالي طلعت لغرفة المسموم
البارحة شفته يدخللها فاندلها

فتحت الباب بدون ما ادك الباب لان ما جان موجود
دخلت للغرفة وسديت الباب

اباوع غرفة عادية جداً مابيها اي شي ملفت للنظر غير انها جبيرة نوعا ما وبيها اشياء تخص الملاكمة يمكن هذا الشي الوحيد الي لفت نظري بيها

رحت فتحت الثلاجة بس استغربت من شفتها مليانه خبز مجيس وبكميات كلش جبيرة

سديتها وفتحت الفريزر وفعلا لكيت بيها ثلج اخذت جم كاسة وخليهن بالصينية

و ويه ما انداريت ما احس الا البزون ينفخ بوجهي ويكمز عليه منبت اضافره بوجهي

*************************************
لهنا يكون خلص البارت ان شاءالله يكون عجبكم ❤️
+لتنسون التصويت والتعليق برأيكم ❤️

شنو رأيكم بالاحداث ؟

شنو تتوقعون حيصير بالبارت الجاي ؟

ملاحظة / اكو فيديو شفته من زمان واتذكر بيومها حيل شبهته على صوت هارون وضحكتة لو اكدر انشره هنا جان نشرته لكن للاسف الواتباد مابي هيج خاصية فراح انشر الفيديو بالانستگرام فالي يحب يشوفه حيلكا بحسابي مالت الانستا وهسه حخليلكم صورة البروفايل في حال لو حبيتو تشوفون الفيديو ❤️