الموت الحي الفصل الأربعون 40 - بقلم براء الموسوي

مرحبا حبايبي العسل شلونكم ❤️❤️

عظم الله اجورنا واجوركم باستشهاد امير المؤمنين الامام علي (عليه السلام)

#الموت الحي
#للكاتبة براء الموسوي

زبيدة : ويه ما انداريت ما احس الا البزون ينفخ بوجهي ويكمز عليه منبت اضافره بوجهي

يمكن لو اريد اعد هالموقف من اتعس واصعب المواقف بحياتي ما راح اكون ابالغ

انوب اريد ارفع ايدي واشيل البزون عن وجهي ما اكدر وبدون شعور كمت اصرخ اريد واحد ينجدني
مجنت متوجعة بكد مجنت خايفة من الموقف

ضليت اصرخ لدرجة حسيت احبالي الصوتية تتكطع
واكثر كلمة رددتها بهذا الموقف "يمه"

وكاني بلحظتها جنت متوقعه انها راح تنجدني حتى وهي ما موجودة !! شلون ما اعرف

لهناك وسمعت صوت احد يعيط بالبزون

هارون : تيموووووور

زبيدة : ويه ما عاط هارون بسرعة البزون ابتعد عني وطلع يركض

من الهبطة كعدت بالكاع وغطيت وجهي وكمت ابجي

احس وجهي يبث نار واديه صارن رطبات ، شلت اديه عن وجهي وباوعتلهن جانن مليانات دم

من الصدمة ضليت صافنه ، رفعت ايدي على وجهي وكلما امسح خدودي تزداد اديه دم

شلت راسي من شفت رجلين تنثني باتجاهي ، اباوع لهارون كعد كدامي وبايده كلينس

هارون : شو اشوف

زبيدة : باوعتله باستغراب

هارون : ببرود وجهج جاي ينزف

زبيدة : بدموع الفضل للجلب مالتك

هارون : لتخافين البزون ملقح مابي ضرر هاج هذا كلينس امسحي وجهج وعقمي

يله طلعي بره وبعد لتدخلين هنا هالمره راح اسكت لان تيمور سوه الواجب وياج بس مره ثانية ما اضمنلج ردة فعلي

زبيدة : استوعبت الحال الاني بي من سمعت كلامه ، كمت بسرعة ناسية الم وجهي

لك انت ششايف نفسك ، شنو بحالك اني لو بحال غرفتك المعفنة هاي بدال ما تعتذر على تصرف حيواناتك الهمجية مثلك جاي تهددني اذا ادخل لهالمزبل خان هذا

طز بيك وبغرفتك وباهلك ، ببيتكم كله هذا اني ما اعبره بارخص قندرة اخليها برجلي

هارون : خلصتي ؟ يله طلعي بره

زبيدة : بحقد ، الله ياخذك

طلعت من الغرفة ورحت اركض لغرفتنا ، دخلت بوجهي للحمام ، باوعت لروحي بالمرايه وانصدمت جان وجهي كله ينزف واكثر شي متأذيات زلوفي لان
الجلب ثبت اضافره بزلوفي وعضني من خدودي

فتحت الحنفية وغسلت الدم عن وجهي بحذر ، كملت واخذت الخاولي طبطبت على وجهي بخفه وطلعت فتحت الثلاجة ادور بيها على كريم صخام يخفف من الحرك العندي وجهي احسه مشتعل نار

بحوشت منا منا ما لكيت غير سيلافكس اخذته وخليت على خدودي وزلوفي وهو منا بارد احس وجهي برد

كملت ، اخذت حجابي وطلعت نازلة جوه اريد اشوف شلون محد سمعني واني اصيح اريدلي شريف ينجدني ماكو

نزلت للصالة ما لكيت احد ، وينهم !!

رحت للمطبخ هم ما لكيت احد ، لهناك وسمعت صوت معين جاي من غرفتة ، رحت بسرعة فتحت باب غرفته لكيته كاعد وحدة

معين : هاا حبيبتي شبيج تصيحين وو لحظة لحظة هاي شبي وجهج ليش داهنته هيج

زبيدة : تنهدت هذا بزون الجلب عضني

معين : بزون الجلب شنو ؟

زبيدة : بزون ابن عمك هارون كمز عليه وعضني وخرمشني

معين : شو تعاي يمي خلي اشوفج

زبيدة : رحت كعدت يمه وهو لزم وجهي يباوع بي

معين : تؤء تؤء شلون مارد وجهج زين بله هذا اذا يدري الحيوان العنده هيج مؤذي ليش مخلي بالبيت

زبيدة : شمدريني لعنة الله وعلى بزونه ويا وجهي مشتعل نار هسه

معين : بيه ولا بيج حبيبتي

زبيدة : ابتسمت وبسته من راسه اسم الله عليك

معين : تدرين ما مصدك هاي الكعدة اني كاعدها وياج
لحد الان ما مستوعب تصدكين جان عبالي راح تبقين العمر كله حاقدة عليه وتكرهيني

زبيدة : ابتسمت تره اني مو سيئة لهالدرجة وهم انت تغيرت فأكون اكبر غبية لو ما انطيتك فرصة خصوصاً
بعد ما تغيرت وصرت انسان ثاني

المهم عوفك من هالموضوع ما احب نسولف بي ، تعال احجيلي الجماعة وين شو نزلت ما لكيت احد جوه

معين : لعد غير عمتج بيداء كاتلة جنتها وطلعن بيبيتي والبنات يركضن على صوت المكرودة التصرخ

زبيدة : يااا ليش كتلتها

معين : والله علمي من علمج بس هي عمتج مبينه صلفة وماعدها خجل من احد

زبيدة : ليش شسوتلك

معين : ما سوتلي شي بس اسألتها غريبة تخيلي اليوم الصبح تسألني انت من انشليت انشل كلشي بيك لو بعدك رجال وتكدر تتزوج

زبيدة : بعصبية وهي شعليها بيك شهالاسئلة السخيفة هاي

معين : اني هم ضليت صافن شمدريني شجانت تحس

زبيدة : لا عود حضرة جنابها تريد تضوجك عفيه هاي شنو من مله شدعوة حاقدة علينه كلنا هيج

معين : ختولي يمعودة لتخليها براسج لبسها

زبيدة : باسف ادري بكلامها جرحك بس تولي تروح فدوة لرمش عينك والله

معين : ههههه لا يمعودة عليمن انجرح صدكيني ولا ببالي

زبيدة : ابتسمت ان شاء الله باقرب فرصة راح اخذك ونشوف احسن طبيب حتى يعالجك وترجع تمشي عى رجليك مرة ثانية

معين : هوني على نفسج حبيبتي ولتخلين بالج يم موضوع شبه مستحيل يصير سبق وكتلج دكتوري كال نسبة شفائي جدًا ضئيلة واني الحمدلله اقتنعت بقضاء الله وقدرة ومتقبل نفسي بشكل متتخيلي
يعني الموضوع ما صار يشكل فرق عندي

زبيدة : ميشكل فرق عندك بس عندي اني يشكل وصدكني راح احاول بدال المرة الف المهم عندي
اشوفك واكف على رجليك وما راح امل ولا اكل لو اعرف ابيع الفوكي والجواي حتى اسفرك وتمشي
هم اسويها

وهسه يله اعوفك واطلع اشوف شصاير بره مبين بهالبيت حنشبع اكشن

معين : هههه كلش

زبيدة : ابتسمت وعدلت حجابي طالعة بره البيت ، تمشيت لبيت عمتي المو غالية ، جان بيت جدي بالنص وعلى جوانبه 3 بيوت بيت لعمتي بيداء وبيتن لعمي فؤاد وفاضل

وصلت لبيتها لكيت الباب مفتوحة وصوت الصياح واصل لبرة ،دخلت وشفت بيبيتي واكفة بالطرمة وحاضنه عمتي بيداء التصيح تريد تلزم جنتها
وما كادرة لان ام المسموم وبيبيتي لازماتها

الي لابده وره بنات عمي وخواتي وتبجي

بيداء : ولج يمه هديني خليني انعل والديها بنت الفكر ام عين الضيگة الوصخة بت الفيترجي

هيام : كافي يا بيداء شبيييج صدك جذب

بيداء : وللللج عوفيني خلي ابرد كلبي ، لج ساقطة گ***** تردين تعزلين بيت وحدج موو تردين تاخذين ابني مني وتطفرين بنت القنادر
عبالج تخلصين مني اليوم

زبيدة : مديت ايدي بجيبي وطلعت علج خليته بحلكي وضميت اديه مستمتعة بالمشهد

بس للامانة عمتي طلعت فد شي واو ، من العصبية كامت تزكط ومحد كادر يسيطر عليها

رجعت اباوع واطك بعلجي

حمزية : كافيييي ولج كافييي شنوووو مالج رداد انتِ اني واكفة وفرفحت روحي وانتِ ولا كإن

عوفيها هيام وخلي اشوفها تتقرب للبنية اذا ما افرك حلكها بايدي ، هاي هديناج يله فنج تتقربيلها

بيداء : يمه لتدافعيلها وتقويها عليه

بدرية : شتقويج عليها شجاج مشوهه البنية ليش هيج هي هاي الامانة

بيداء : ولكم لتدافعولها هاي حية وتنكط سم محد يعرفها غيري لتغركم دموعها دموع التماسيح هاي

حمزية : اخذيها هِيام دخليها جوه وهديها ما اريد امد ايدي عليها وهي مرة جبيرة واكول عيب بحقها

وانتن جيبن البنية وتعالن للبيت خلي نفتهم منها ، امشي يمه امشي لعنة الله على الشيطان بهالمغرب

زبيدة : اندارن خواتي عليه وشهكن

دنيا : يااا زبيدة هاي شبي وجهج

ديمة : عزه شهالحَمار وين تعورتي

زبيدة : سولفتلهن بشكل مختصر واني امشي

وئام : سودة عليه ، فدوة يمه بعد لتتصخريلهم الي يريد حاجة هو يكوم يجيبها ما لاكيتج بالشارع اني بله صاير عليج شي الربح بيمن

تعاي وياي بسرعة خلي اعقملج وجهج مرة ثانية واخليلج مرهم جروح هسه يبرد وجهج

زبيدة : ابتسمتلها بامتنان لا خالة شكراً خليت مرهم وهسه وجهي برد نوعا ما لتشيلين هم

دخلنه للبيت شفنه البنية الي ما اعرف اسمها كاعدة وتبجي وبيبي والبنات كاعدات يسمعنها

حمزية : سولفيلي يمه هاي المسودنه ليش هيج ضاربتج

افنان : حجية اني جنت اسولف ويه احمد هيج سوالف مرة ورجال ، كتله ليش منطلع بيت وحدنه
هيج مجرد اقتراح اقترحة عليه

وهي جانت تتصنت علينه وكل عقلها عبالها جاي احرضه حتى يعوفها واليوم كعدتلي من الصبح تكرب عليه تاليها بس طلع احمد لزمتني وهاي شوفة عينج كسرت الماسحة عليه

انتِ كليلي حجية تقبليها على اي اساس تمد ايدها عليه واني حامل بله طرحت من وراها منو يعوضني ضنايه هي

حمزية : لا حول الله والله ما اعرف شكلج يا يمه بس هي عمتج تحب ولدها بزيادة وتغار عليهم غيرة موت شتسويلها

افنان : اذا هيج تحب ولدها المن عرستهم ما خلتهم يمها شنو ذنبنا احنه مراويتنه نجوم الظهر والله يا حجية تعاملنه مثل ما تعامل البهايم سواء اني أو
شفاء ( مرت معتز ) لاعبة بينه لعب

اله اكلج حتى الاكل تحسبه علينه حساب من غير العار والمعيار مالتها كلما شافتنه وصاحتلنه يا بت الفيترجي يا بنت الحلاق حتى بأسمائنا متصيحلنه
ادري ماخذتنا فصلية هي خوما ماخذتنا فصلية

حمزية : والله حقج يا يمة واني اعتذر منج بالنيابة عنها وعهد عليه حقج ارده الج مربع بس اهدي
وكومي صعدي ويه البنات نامي وارتاحي وميكون خاطرج الا طيب

زبيدة : راحن البنات صعدنها فوك واني اشرتلي بيبيتي

حمزية : تعاي يمي

زبيدة : رحت كعدت يمها

حمزية : شبي وجهج

وئام : البزون مالت هارون نافخ بوجها ومخرمشها شلون تخلون بزون ما مروض بالبيت بله لو صاير عليها شي لو مديوسه من الخرعة وين اروح بيها اني

حمزية : امشي ولج غيداء صيحيلي هارون

غيداء : اني ؟

حمزية : شبيج مثل الثولة اكو غيداء غيرج امشيييي

زبيدة : كلبت عيوني من سمعت بنعلون راح ينزل ، عفية بيبي سدي الموضوع

حمزية : سكتي انتِ

زبيدة : اباوع لغيداء صعدت وشويه ونزلت تلهث

دنيا : اسم الله اسم الله شبيج

غيداء : هاا لا مابيه شي

حمزية : وينه هذا

غيداء : هسه جاي بيبي

زبيدة : ويه ما حجت نزل الشفية برهاوه ولا كأنما اكو هيج

هارون : نعم

حمزية : يعني وتالي وياك انت والعتوي مالتك هذا شنو حالفين ترفعولي ضغطي ، جم مرة كتلك اني
العتوي مالتك خلي بالحديقة ولتدخلة جوه

هارون : باردة عليه بره

وئام : واحنه شنو مشكلتنا حضرة جنابة مشوهه وجهه بنتي لو صايرة الضربة بعينها ومنعمية بشنو يفيدنا بزونك متكلي

زبيدة : انتبهتله باوع لخالة وئام من فوك لجوه باستهزاء واندار على بيبيتي ، هذا شكد ادبسز

هارون : حجية تيمور باقي بالغرفة وميطلع منها الا اني اطلع وانتِ تدرين بي ميحب احد يدخل للغرفة فليش تدخلولها ومن تتاذون تجون تعاتبوني

حمزية : يعني طلعنا احنه الغلطانين هسه لان دخلنا لغرفة جنابك

هارون : بملل راح نضل نتنافش هالنقاش التافهه هذا
من رخصتج عندي شغل بعدين نتنافش

زبيدة : اباوعله وره مكمل عاف المكان وطلع ولا كإنما بيبيتي تحجي ويا ، هزيت ايدي فوكاها امه تكول عليه اني صلفة دخلي تشوف ابنها الدايح

صعدت فوك اني وخواتي ، دخلنه للغرفة وتمددنه ، ما سولفتلي شلون جان يومجن شسويتن مسويتن

دنيا : كعدت يم راسها وبديت اخليلها كريم ، رحنه عقدنه واخذنه امين عزمنة على غدة ورجعنه

زبيدة : لج ديمة مبين رجلج كريم استغلي هالخصلة

ديمة : رجلي !! تصدكن لحد الان ما مستوعبة فكرة انُ خلص بعد اقل الاسبوعين اني حتزوج ومنو امين !

دنيا : صدكيني امين وردة ومع الايام حتشوفين نفسج شلون حتتعلقين بي

ديمة : ادري بي حباب بس ما ادري عمري ما تخيلت نفسي اتزوجه

زبيدة : انتِ الي اختاريتي توافقين عليه وتقبلين تكملين حياتج ويا فالمفروض تتحمل نتيجة قرارج
ومتظلمين الولد وياج

ديمة : شي اكيد اني مستحيل اضر امين لو ااذي بغض النظر عن كوني ما احبه بس ما انكر انه ميستاهل الاذيه ولا اني اكسر بي بأي شكل من الأشكال

دنيا : وشلون بيج بيوم زواجكم والراح يصير بيناتكم
راح تتقبلي وانتِ متحبي مثل متكولين ؟

ديمة : كزبر جسمي من جابت طاري هالموضوع

زبيدة : متجاوبين

ديمة : والله ما اعرف بس راح احاول

دنيا : لزمت ايدها الله يساعدج وييسر امورج انتِ وامين تستاهلون كل الخير

ديمة : ابتسمتلها بامتنان

زبيدة : اكول شوكت تطلعين تجهزين غراضج

ديمة : باجر غير

زبيدة : اروح وياكم

دنيا : شعجب

زبيدة : تدرن بيه سوالف المشتره وهم ناقصني جم حاجة اريد اروح اخذها

دنيا : بعد احسن على الاقل تساعدينه بشيل الغراض

زبيدة : بطلت ما اروح

دنيا : هههههه طاحظج ، عابت بس تريد تشرد حتى محد يصخرها

زبيدة : ضحكت اشاقة وياج لا اروح باجر حتى اساعدجن

دنيا : خوش لعد

وفعلا ثاني يوم طلعنه من الصبح نحضر غراض ديمة
ما خلينه مكان ما افترينا وديمة تشلع الكلب مو اي شي يعجبها ومن كل محل ندخله ميعجبها بي غير قطعة لو قطعتين شلت رجلينه

زبيدة : شوفي هذا ديمة حلو

ديمة : لا مو حلو ووين البسه

زبيدة : هو انتِ هم عندج ذوق ، راح اخذه اني

حمزية : يااا ولج شتسوين بي

زبيدة : شسوي بي يعني غير البسه

حمزية : ولج عيب هذا مال متزوجات

زبيدة : رفعته كدامي جان ثوب مال بيت لحد الفخذ لونه اسود وبي ورد لونه وردي وابيض ، شنو البي مالت متزوجات

حمزية : عزه بعينج ولج هذا يطلع الزرور

زبيدة : وخلي يطلعهن هو اني ماخذته انام بي قابل راح افتر بي

حمزية : خفه وجهج ماكو ماعدنه بنات يطلعن زرورهن وهمزين لو زرورج بيض الزركة

زبيدة : يااا والله زروري بيض من ارجع اله البسه واراويج لج عيني اني عليه جسم يشك شك يخلي الميشتهي يتفرج شتحجين انت

حمزية : ياا خفه حلكج شكد فاسدة ولسانج فالت

زبيدة : ضحكت على كلامها واخذته خليته ويه الملابس العجبني وطلعنه نكمل

ماكو من الصبح للظهر احنه ما مكملين تالي تعبنا وكعدنا نتغدة بالمطعم

حمزية : نعلعلا بليسه اليريد البنات ، بادن رجليه

ديمة : وشبيهن البنات بيبي لعد انتِ مو بنية

حمزية : همجن جبير يبعد روحي حتى بتجهيزات عرسجن تشلعن الكلب والف شغلة يرادلجن

وئام : شحلات التعب والفلوس اذا ينصرفن على البنات وخصوصاً بناتي فدوة رحتلهن ماي العيون قليل عليهن

حمزية : ولج مو على الفلوس قحط هي الفلوس يا مكثرها بس اقصدلج التعب تربية البنات تتعب

زبيدة : ديله على اساس الولد ميتعب ويهد الحيل كلش كافي من يطلع ساقط ويدور نسوان بالحرام لو بكل مكان يتعارك جنه ثور هايج لو من يسويله مكسورة ويه وحدة ويخزيكم

حمزية : هو صح انتِ طايح حظج بس كلامج صحيح

زبيدة : هههههه انعم الله عليج

دنيا : يله يا جماعة تاخرنا خلصو اكل دنطلع اني طفيت من التعب

ديمة : حتى اني بعد ما اشوف بعيوني

وئام : صدك ديمة خابرتني ام امين كالت بالليل يمرون علينه حتى نروح نشتريلج الغرفة

ديمة : ضروري اروح ؟

حمزية : لعد شلون غير ترحين تختارين الغرفة على ذوقج

ديمة : تنهدت بتعب وغمضت عيوني يربي واسمك تعبت

كملنا اكل وطلعنا راجعين للبيت وبوجهنا للنوم ، ما كعدنا الا بالليل من اجت امي كلتلي امين وامه بالطريق حتى اكوم اتجهز

كمت بملل غسلت وبدلت ملابسي ، تعطرت ونزلت جوه اني وماما ننتظرهم لمن اجوي رمشولنه وطلعنه

لكيتهم واكفين بالباب بس انصدمت من شفت امين جاي بسيارة وكاعد بمكان السايق

وئام : شبيج صافنه متمشين

ديمة : مشيت وياها صعدنه وسلمنه عليهم وطبعا امي متكدر تسكت لازم تسأل

وئام : شنو امين اشتريت سيارة ؟

امين : لا وين خالة هاي سيارة صديقي اخذتها منه حتى ناخذ راحتنه واحنه نفتر

وئام : هاا عبالي اشتريت سيارة

هناء : ان شاء الله على عين ديمة الله يفتحله ابواب الرزق ويشتري احلى سيارة

وئام : ان شاء الله

امين : خالة اكو مكان ببالكم تحبون نروحله

وئام : اي اخذنه لـ****** هذا معميلنه من زمان

ديمة : ندستها وخزرتها هامسة وين تردي ياخذنه انتِ تعرفين اسعار الغرف هناك شكد غالية ارخص غرفة هناك بتسع ملايين

وئام : بهمس وشنو يعني قابل تردين تاخذين غرفة شلون ما جان

ديمة : بس مو لهالدرجة ما كاعد الولد على بنك شويه قدري ظروفه

احم امين من رخصتك لتاخذنه لهذا ابو الاثاث اني ميعجبني التصاميم العنده

هناء : خالة حبيبتي اذا اكو ببالج مكان انطينه العنوان حتى نروح ونشتري على ذوقج

امين : اي ديمة لتتقيدين

ديمة : لا ممتقيدة انت وين ميعجبك اخذنه اني بالنسبة الي ما اندل بس هذا الكالت عليه امي وميعجبني

هناء : اكول يمه متاخذنه لهذا المحل الي اشترت منه بت خالتك غرفتها بعرسها خلي يشوفون الجماعة بلكت يعجبهم شي

امين : نروح ؟

ديمة : وجه السؤال النه واني جاوبته لان امي طنكرت بعد ، اي هاهي

ورحنه للمكان الكالت عليه خالة وفعلا مجان شي قليل هم حلو ومناقصة شي ، صف امين واحنه نزلنه
ننتظرة يعدل السيارة ويجي حتى ندخل

اباوعله نزل متوجه النه ، جان لابس تيشرت نيلي وبنطرون اسود سادة ، طبعا اليشوفه الصبح وهو طالع لشغلة يكول هذا شكد مبهذل على عكس هسه
شكله شكد نظيف ومرتب

فززني صوته من حجه

امين : يله نمشي

هناء : يله حبيبي

ديمة : دخلنه للمحل واجانه الموظف يسألنه شنو نحب وشنو عاجبنه تصاميم غرف

امين : انتِ شنو تحبين

ديمة : رفعتله كتافي ما اعرف بكيفك انت شيعجبك اختار

امين : لا الغرفة غرفتج انتِ محد راح يبقى بيها كثرج فاختاريها على مزاجج انتِ

ديمة : مو خاف ميعجبك ذوقي

امين : كلشي يجي منج وباختيارج يعجبني ، وهسه كليلي شنو رأيج بهاي الغرفة بصراحة

ديمة : بصراحة مو حلوة

امين : لعد تعاي

ديمة : اباوعله عاف امه وامي وجرني ورا ، ضلينه نفتر بالمحل واغلب الغرف تجنن بس مبينه غالية واني اتعمد كلما يسألني اكله مو حلوات

اخر شي شفت غرفة لونها ابيض جدا بسيطة وحلوة ، شنو رايك ؟

امين : حلوة بس هاي ماليزي

ديمة : وشنو يعني ؟

امين : بس منظر يعني مو عملية وسامع خشبها مو شي

ديمة : ماله علاقة الحريص متخرب عنده حاجة لتخاف اني اعرف شلون احافظ على الحاجة

امين : هاهي

ديمة : عجبتك ؟

امين : حلوة بس شعجب ما اختاريتي الوردية

ديمة : باستغراب شمعنى وردي يعني ؟

امين : منتبهلج من زمان دائما تلبسين الوردي وتدرجاته حتى السجلات الجنتي تلزميهن الصبح من تطلعين للكلية لونهن وردي

ديمة : هواي مركز وياي

امين : بتنهيده فوك متتخيلين

ديمة : احم باوع اني عجبتني هاي البيضة لان نكدر نرهم عليها فراش على مزاجنه ونغير ديكور الغرفة بيها بدون متنشز

امين : اذا عاجبتج هاهي ، خوية من رخصتك هاي شكد سعرها

ديمة : اجه الولد وضل امين يتفق ويا

وئام : هاا اختاريتي ؟

ديمة : اي عجبتني هاي البيضة

وئام : ياهي منهن ؟

ديمة : هاي شبيج ماما

وئام : ماليزي اهمداج ، تدرين هاي سعرها تفاليس

ديمة : ماما شبيج اني قابله حتى لو بالف لتغصين عليه

وئام : امداج يغبره هسه بنات عمامج وعماتج يتشمتن بيج بصبحتج

ديمة : ديله عاد شلونهن هنه هالمنفقات ذني بالوجه مرايه وبالكفه سلايه خلي يحجن ميهمني

وئام : خليج يفكرية خليج

امين : يا جماعة هاهي احجز الغرفة ؟

هناء : اذا عاجبه ديمة وامها هاهي حبيبي على ذوقهم

ديمة : حبيبتي خالة فدوة لكلبج اي هاهي اني عجبتني

هناء : لعد تمام بالعافية على كلبج حبيبتي وجهها خير عليكم ان شاء الله

وئام : شدعوة ام امين هي غرفة

هناء : ههه احم والله عذريني من كد ما فرحانه بالشباب على ابسط الامور اندعيلهم بالتوفيق والسعادة

امين : متقصرين حبيبتي اني لوما دعائج اضيع

هناء : حبيبي بعد امك

ديمة : حجز امين الغرفة واخذ موعد حتى يجي يدفع ويستلمها واحنه طلعنه ننتظرة ومن طلع اخذنه عشانه بره رغم مقبلنه بس هو اصر

تالي عشانه ورجعنه للبيت وثاني يوم طلعت ويه خواتي اجهز وهيج يوم يتبع يوم لمن خلص الاسبوع الاول وتبعه الاسبوع الثاني

وصار موعد زواجي اني وامين اليوم الي ودعت بي اهلي ورحت حتى ابدي حياة جديدة بس الله الي يعرف شنو بيها وهل راح تكون حياة زينة لو لا

كعدوني الصبح ركض ركض ريكوني واخذوني للمركز وهناك استلموني من الصبح مساج وعناية حرفيًا نسيت نفسي على هالاجواء الصارلي سنين كاطعتها بسبب الظروف المرينه بيها

والا اني جنت كل اسبوعين لازم اروح اجدد نشاطي بهاي السوالف ، حسبي الله ونعم الوكيل عليك يا مبين سلبت منه ابسط الاشياء الجنه عايشيها

تنهدت واخذت قضمة من اللفه ، اباوع لزبيدة المغمضة عيونها والعاملة كاعدة تسوي مساج لشعرها
انتبهت لملابسها جانت لابسة تيشرت تعلاكة لونه اصفر وويا برموده قصيرة ظاهره جمال بشرتها المخملية ، ابتسمت من شفت زندها شلون صاير ازرك

طبعا بيبي جبرتنا جبر ننزع الاسود ما قبلت نبقى بي تكول الاسود يجر واذا ضلينه للسنة لابسين اسود واحد ثاني بالعائلة راح يموت وهي متريد احد ثاني يموت

وشي اكيد كبت عيطة شكبرها بين بيبي وزبيدة الي متقبل تنزع الاسود تالي بعد نقاش طويل حصرت بيبي زبيدة وعضتها من زندها خلتها تفرفح

وبالنهاية كعدت بيبي تبجي وتقنع بينه ومن شفناها شلون جديه ومبينه خايفة لا تخسر احد بعد ذبينا لخاطرها ولو الموضوع لسه حاز بكلبنه خصوصا بابا
مطالعة لسه السنة مالته

: ست يله اجه دورج

ديمة : ثواني ، كملت اللفه وكمت غسلت واكلت علج ورحتلها وبلشت بيه لا ساعة ولا ثنين اني من يمي جزعت وطلعت روحي

لو متمكيجة اني احسلي هم جان كملت اسرع ، انوب شعري اخذ فترة كلش طويلة ياله كمل رغم انه مجان طويل وحتى تسريحة ما خليتها تسويلي غير انها تركبلي اكستنشن وتبرمة على طوله

المهم بالف يا الله ياله كملت المكياج والشعر

: يله حبيبتي كملنه

ديمة : باوعت للمرايه وابتسمت من شفت شكلي ، جد جنت طالعة كلش حلوة رغم مو اول مرة اخلي مكياج بس مدري ليش دائما مكياج العروس يكون مختلف
ويخلي الوحدة تشوف نفسها بشكل مختلف

كمت ودخلت لغرفة التبديل ولبست بدلتي الي جانت على ذوقي ومثل ما احب ، بيضة وقصيرة منفوشة بشكل جبير وعليها طرحة على طولي

من جنت صغيرة دائما اتخيل نفسي بهيج فستان وكت الاتزوج وفعلا اليوم شفت نفسي بنفس الصورة
الجنت اتخيلها

كملت لبس البدلة والطرحة اجت ام المركز رتبتها الي
خلصت وطلعت جانن جايات وياي بس إمي وخواتي وبيبي واهل امين الباقين ما اجوي لان كنالهم ماكو عرس

من طلعت شفت نظرات الاعجاب بعيون الكل واولهم خواتي

دنيا : دمعت عيوني من ديمة ، حبيبتي طالعة اميرة
تجنن بالبدلة وشكلها رغم المكياج الا انها جانت بقمة البرائة عبالك طفلة

زبيدة : ما شاء الله ديمة طلعت لعابة خلتنا كلنه صافنين عليها ، كلشي بيها جان يجنن صحيح هي من الاصل حلوة كلش بس اليوم ببدلة العرس طالعة غير
صدك تجنن

هناء : اللهم صلِ على محمد وال محمد عين الحارة باردة ان شاء الله ، يمه جنتي طالعة تخبل

بصائر : لك عيني امون نيالك شلون حمامة هاي

ديمة : ابتسمت على اطرائهم ودمعت عيوني من شفت دادا شاعله حرمل وتفتر داير مدايري وتقره المعوذتين وتنفخ بوجهي وامي واكفه على صفحة وتبجي

من شفتها فتحتلها اديه وهي اجتي حضنتني واني بادلتها وبجيت

دنيا : لالا ديمة مكياجج ديربالج

ديمة : ابتعدت ومسحت بخفه دموعي

وئام : الف مبروك يروحي مهناية ان شاء الله

ديمة : حبيبتي ماما

زبيدة : اهووو اشتغلت الاجواء الرومانسية عمي اني معدتي تكلب من الرومانسية يله فضونه زفو باربي خلي نرجع ننام ونجي باجر نستفسر على الاكشن
الراح يصير

حمزية : شكد فاسدة هالبنية

دنيا : هههههههه اي والله بيبي شو هاي صايرة كلش هيلك

زبيدة : جنت اضحك ومن سمعتها كالت هيلك تذكرت ذاك المسموم من كلي هيلك

الكبر شكد اكرهه

رجعت ضحكت ما اريد اعكر مزاجي بسببه هالحيوان
رحنه بدلت لبست عباية فستاني ودنيا هم بدلت علمود نصور ويه ديمة

وفعلا اجه امين وطلعنه وياهم للستوديو وعوفناهم ياخذون ياخذون صور على راحتهم وانوب احنه اخذنه وياهم واخذنه ويه ديمة

لمن كملنه كلشي وطلعنه ويه اسلام اخو امين ، جانو مسوين زفة بسيطة بيناتهم من مكان الستوديو لحد الفندق ياله وكفت الزفة وطبعا حليم هو الزف امين
بسيارة

اباوع للفندق الوكفنه كدامة جان فندق كلش راقي وغالي كلش تفاجئت من دريت بيهم حاجزين هنا تالي بعدين عرفت حليم حاجزلهم هنا يومين على حسابة

وهو وامين متعاركين بسبب هالشي بس اني اعرف حليم لزكة لايتعب ولا يمل والظاهر عارف شلون يقنع امين

_________________________________

ديمة : كاعدة على الجرباية بالغرفة واباوع لاضافري
متوترة وخايفة ومترددة من هواي امور

ما حسيت باي شي اريد بس هاليوم يخلص احسه هم ونايم على صدري حتى النفس ثكيل عليه

بعز قلقي وتفكيري وما احس الا باب الغرفة تنسد
ويدخل امين

*************************************
لهنا يكون خلص البارت ان شاءالله يكون عجبكم ❤️
+ لتنسون التصويت والتعليق برأيكم ❤️❤️

شنو رأيكم بالاحداث ؟

شنو تتوقعون حيصير بالبارت الجاي ؟

ملاحظة / اعرف البارت قصير بس تكدرون تعتبرو تمهيد للبارت الجاي ❤️

.