الموت الحي الفصل الثاني وأربعون 42 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

ديمة : فتحت باب الحمام وطلعت داريد احاجي امين حتى اخابر ماما بس استوقفني صوته الجاي من البلكون

اسمعه يحجي بعصبية وانفعال واضح

امين : انتِ وتالي وياج ، الف مرة عدت عليج وكلت كافي متصيرلج چارة لو اله تسويلي مشكلة ياله ترتاحين

ديمة : ويه مديحجي اندار شافني ورا واني بدون مقدمات سألته ، ويامن دتحجي ؟

اباوعله سد الموبايل وابتسم

امين : هاا حبيبي نعيمًا

ديمة : الله ينعم عليك ، ويامن دتحجي !!

امين : تعاي وياي خلي انطيج علاجج وكعدي تريكي واني اسولفلج

ديمة : مشيت ويا وكعدت على الطاولة مالت الاكل وهو راح جاب علاجي وانطا الي ، اخذته منه وهو بده يحجيلي بكل هدوء ولا كإنما قبل شويه جان نار كبره من العصبية

امين : شوفي هاي السمعتيني احجي وياها قبل شويه وحدة سايبه ومنحطة هيج ارد احجيها

صارلها سنين لازكتلي هاللزكة وبسببها ردت اموت لوما ستر الله وهم ما جازت مني وبقت ورايه

وبالجديد مدري منين عرفت اني البارحة زواجي وخابرتني هسه تنعى براسي واني استلمتها مثل ما شفتي بعينج وتالي وره ما رزلتها سديت الموبايل بوجها وهاي امها وهاي ابوها خلصت السالفة

ديمة : زين هي هاي شمعرفها بيك ؟

امين : حظي الاغبر خلاني اشتغل عامل بنه ببيت رجلها وشافتني هناك وضلت مدبگة بيه لمن عرف رجلها ودز عليه ناس متخاف الله خطفوني و
ضربوني طلق واختفو وبعد ما شفتهم

ديمة : ياااا يعني جانت طيحتك بالمستشفى بسبب هالموضوع

امين : اي نعم

ديمة : عززه بعينها زين كمل وبعدين

امين : ماكو بعدين دخلت للمستشفى ومن طلعت هي اختفت من حياتي وهاي صارلها شهر تقريبًا من رجعت تخابرني

ديمة : ما عرفت شتريد منك

امين : تمسلت يمعوده ، رجلي طلگني تعال نتزوج وامنلك مستقبلك ومن هالكلاوات التعبانة

ديمة : يااا هاي شكد جريئة

امين : هاي مو جرئة هذا يسمو استهتار

ديمة : ياي والله تحمست للسالفة كمل

امين : هههههه شكمل هي هاي كل السالفة

ديمة : زين امين عليك الله بصراحة يعني انت هم جان اكو بينك وبينها شي

امين : استغفر الله مرة متزوجة وعلى ذمة رجال وفوگ كل هذا تعادلني عمرين شلون ترديني اقبلها على روحي واغضب ربي علمود هيج وحده رخيصة
اعوذ بالله ان تطلع مني هيج سوالف

ديمة : تدري انت متربي عشر مرات

امين : هههه صدك والله

ديمة : اي والله ، اباوعه ابتسم ومسح على خدي

صفنت بوجهه هذا شعنده ويه خدودي !!

امين : اكول خوما ضجتي تره قبل شويه من شفتيني متوتر فلان جنت خايف عليج وما ردتج تفهميني غلط ومن وره هيج وحدة نذله تخرب علينا هاي الايام الحلوة

وتره والله اني ماعندي اي شي وياها ولا ويه غيرها

ديمة : ابتسمت لا والله مضجت وحتى لو جان اكو شي وياها او ويه غيرها مثل متكول فعادي اعتبره ماضي وراح اصلا ما افكر بي

اباوع لابتسامته اختفت واشتدت ملامحة

امين : ماكو هيج حجي ماضي شنو ! هاي يسموها علاقات خارجة عن نطاق الدين ورب العالمين واني ما اتقبلها ولا اقبل بيها

واني من حبيتج وشفت نفسي الي رغبة بيج اجيت وسألتج وتقدمتلج بما يرضي رب العالمين وبعيدًا عن السوالف التعبانه

لان اني لا احب سوالف الحبجيات ولا اقبل بسالفة ماضي وعلاقات سابقة ولا اي مسمى من هاي المسميات السخيفة اني اقتنع بي

ديمة : بلعت ريكي من سمعت كلامه ، احم زين فرضاً لو جنت مخطوبة قبلك هم راح تحجي هيج

امين : طبعا لا ، مخطوبة لشخص على سنة الله ورسولة شي وعندج علاقات وسوابق شي ثاني

ديمة : احس الدنيا ضاگت بعيني من سمعت حجي امين

رغم حبه الي وطيبته الا إني اكتشفت هسه انه انسان صعب وعقليته متتقبل الامور الحچه عنها بحيث من جان يحجي كل اعصابه مشدودة ولا كإنه نفسه امين الي اني اعرفه

فزيت من صفنتي على صوته

امين : وين شرد الحلو

ديمة : هاا وياك وياك بس بالي راح يم ماما وخواتي
اشتاقيتلهن

اسفه شنو جنت تكول

امين : اكلج يله ابدي اكلي موزين عليج تبقين بدون اكل وبالنسبة لامج وخواتج فمن نكمل عود خابريهن على راحتج

يله هاج الصمونة واني رايح اصبلج جاي و اجي

ديمة : اخذت الصمونه وغمستها بلكيمر وحشرتها بحلكي كوه كدرت ابلع اللكمة مدري شبيه توترت
احس حتى معدتي مغصتني

اباوعله صبلي وصب لنفسه جاي واجه ، حمحمت وحاولت اغير الموضوع ، امين الكيمر منين جبته مشفتك طلعت اليوم

امين : مو اني جبته بيت جدج دزو

ديمة : شنو المناسبة ؟

امين : صدك تحجين !!

ديمة : والله شبيك ما اعرف شنو المناسبة

امين : متعرفين هاي عادة ، اهل العروس همه اليجيبون ريوك لاهل العريس وبيت جدج اليوم الصبح دازين لاهلي كيمر وكاهي واجبان وامي دزت
اسلام يجيبلنه هم

ديمة : يااا والله اول مرة اسمع بهالسالفة

امين : وهاي سمعتي يله اكلي بس لتثكلين موزين على سكرج

ديكة : خله لكمه بحلكي ، مضغتها واني اباوعله شلون يبتسم يربي هذا شبي والله وترني

_____________________________

دنيا : نايمة وسمعت صوت الباب مالت الغرفة يندك ، شويه وسمعت صوت خالة ويوسف

وخرت تيم عن ايدي وكمت على حيلي ، تقربت للباب اسمع يوسف يصبح عليها

يوسف : هاا يمه صباح الخير

رميم : هلا حبيبي صباح النور ، اكول يمه لعد شو الفراش البصفك مرتب ، شنو مريتك وينها

يوسف : نايمة بغرفة تيم

رميم : ياا عزه بعيني شعدها نايمة يم تيومي غير تنام يمك

يوسف : شنو السالفة يمه البنية عجبها البارحة تنام يم تيم قابل انكلبت الدنيا عادي خليها على راحتها

رميم : ولك شو انت بارد وتحجيها عادي ولا جنك مشتاق لمرتك حتى لهفة ماكو بوجهك

اني الاعرفه ماكو عين تغفه لرجال اذا وحدة مثل مرتك كاعده ويا بنفس المكان بس شو انت مدري شلونه وضعك ولا جنك منقطع صارلك سنين

يوسف : شنو قابل اول مرة انام وياها اشو كضيت وياها سنتين هريتها *** هري لمن گال الله بس المسكينة حتى مشي ما جانت تمشي مثل العام

عوفيها هسه ترتاح تتأقلم شويه لاحكين على طياح الحظ

رميم : شكد ادبسز انت وما مربه ، احترم نفسك شويه من تحجي ويه امك ابو لسان الزفر والله انوب اضربك اذا تفشر كدامي حتى بركة البيت طارت من لساناتكم الفالته انتو وابوكم

يوسف : تره يمه عمري 37 سنة مو جاهل اني وتخوفيني

رميم : جاهل بعيني وجبير على نفسك اني ذاك اليوم جنت اشطفك واغسل حضاينك الوصخة

يوسف : اهووو عاد بكل حجاية والثانية وكعدتي تعيرينه جنت اشطفكم وجنت اصخمكم عمي انعم الله عليج ما قصرتي ورحم الله والديج

وهسه ممكن ادخل اكمل نومتي اذا متصير زحمه عليج ؟ لان والعباس كوه واكف

رميم : يا نوم ولك الريوك جهز امشي كعد مرتك وابنك وانزلو تريكو لعد شحجيت اني البارحة

يوسف : يمه عليج الله عوفينه نايمين وتريكو وحدكم

رميم : ماكو هو بس يوم الجمعة والسبت احنه ننجمع بيهن وهم تتهربون من اللمه

بعد عمري لتكسرون بخاطري هو اني ما اشوفكم ملمومين سوه بس هاليومين فبعد كلبي صيح لمرتك ونزلو يحيى والكل منتظريكم يله يمه يله حبيبي

يوسف : خوش بس اكعدهم ونجي

دنيا : سمعت الباب تنسد وصوت خالة يختفي ، شويه واندكت باب غرفة تيم ، كمت فتحت الباب صار يوسف بوجهي

يوسف : صباح الخير

دنيا : هلو صباح النور

يوسف : شلون نمتي البارحة خو ما اكو شي ضايقج

دنيا : لا بالعكس اصلا كُلش ارتاحيت

يوسف : الحمدلله لعد اذا ماعندج شي تحضري حتى ننزل جوه نتريك اهلي منتضرينه

دنيا : تمام بس ابدل واكعد تيم واجي ، سديت الباب ودخلت

باوعت لتيم شلون نايم وابتسمت ، تقدمت كعدت كدامه ، تمتم حبيبي يله اكعد خلي ناكل عميه

اباوعله رفع اديه وكام يفرك بعيونه ، كزكزت عليه ودنكت ابوس بي واحك خشمي بطنه سمعت صوت قهقهته وابتعدت

صح النوم ياحلو يله كومي كافي نايمة وعايفتني وحدي ضجت

رفع اديه عن عيونه ، باوعلي وضحك مكشر عن اسنانه

تيم : شباح هير ننه

دنيا : يمه شباح النور والسرور يبعد كلبها لننه ، شلته من فراشه وبوسته ، جوعانه يروحي

تيم : ييي ميه

دنيا : صار هسه اسويلك اطيب مميه بس اول شي تعال نغسل ونبدل حتى نصير حلوين ، شلته وكمت طلعت بره شفت يوسف كاعد يمشط شعره كدام المرايه

تيم : شباح هير بابي

دنيا : اباوع ليوسف ضحك واجه اخذه مني

يوسف : صباح الورد ، هاا سرسري وجهك متفح اليوم الظاهر البارحة خوش نمت نومه

تيم : ننه شبيگة

يوسف : صدك والله ننه سوتلك شبيگة ، شلون بله شو سويلي وحدة

دنيا : اباوع لتيم شبگ يوسف حيل وباسه من ركبته ، يروحي شلون سوالف عليه

يوسف : افييييش بويه افييييش شلون شبگه هاي ، يله تعال اغسلك

دنيا : لا يوسف جيبه اني ابدله واغسله واجي

يوسف : لا روحي بدلي ملابسج عوفي اني متعلم ابدله

دنيا : دخلنه سوه للحمام اني غسلت واخذت فرشة اسناني ووكفت افرش وعيني على يوسف النزع تيم
واجه للمغسلة غسلة جسمه و وجهه وهو يضحك من يوسف يكرص بي

يوسف : بويييه شلون لحم زبد زبد

دنيا : هههههه لا لتكرص بي شوف رجليه شلون صارن حمر

يوسف : هههههه السرسري يسوي واهس

دنيا : ابتسمت وغسلت وطلعت عايفتهم سوه ، لبست ثوب مالت بيت واخذت ربطة وطلعت حتى الفها

لكيت يوسف ممدد تيم وكاعد يلبسه حفاضة ، طبعا يوسف يموت على الاطفال من زمان وبطبعة كلش يحب يهتم بيهم ومو من النوع التلعب نفسه لو يتعاجز ابد

اتذكر جنت قبل من جايبة حمودي ، جان هو يرجع من الخفارة غادي خردة من التعب ومن يشوفني شلون تعبانة ويه محمد يجي هو ياخذ يسبحه ويحفضه

ويكعد يبوس ويشمشم بي ، حرفيًا جان مأدي دورة كأب من كل النواحي وهسه داشوفه يعيد نفس الشي ويه تيومي

يوسف : يله دنيا كملتي حتى ننزل

دنيا : اي بس دقيقة لفيت حجابي عدل وتعطرت واخذت تيومي من يوسف ونزلنه

يوسف : باعي دنيا راح ننزل نكعد يم اهلي هسه ، تيم متنطيي لاي واحد من الجهال وخصوصاً جهال علي
واذا ردتي تكومين لتعوفي عد تبريز

وعينج عليه لا تخلي يكوم ولا يلعب واذا تعبتي منه كليلي اني اشيله عنج بس لتعوفي

دنيا : زين ليش

يوسف : بعدين اسولفلج المهم هسه تركزين على كلامي

دنيا : تمام ، نزلنه جوه هو راح للحديقة واني دخلت للمطبخ كلت فشلة خلي اشوف خاف محتاجين شي عيب اجي على الجاهز اكعد

دخلت ولكيت البنات واكفات ، صباح الخير

اباوع لجمانة وسهير بس شافوني ابتسمو

جمانة : هلا يروحي صباح الكيك يا كيك ، شلونج شخبارج مشتاقتلج والله

دنيا : ابتسمت بصدق الحمدلله اني الاشوق والله

سهير : هلووو دندون صباحج خير ان شاء الله ، يمه همزين رجعتي والله فرحت من كل كلبي متتخيلين شكد جنت اتمنى يرجع ينلم شملكم انتِ ويوسف والحمدلله ربنا ما قصر ورجعكم لبعض بعد هالسنين

جمانة : اي والله فرحتنا اليوم متنوصف ايييي اخيرًا رجعتي والله اشتاقينا لكعداتنا قبل وطلعاتنا تتذكرين دنيا شلون جنه متونسين سوه

دنيا : بابتسامة شلون انسى والله دائما تجي جمعاتنا على بالي

سهير : ان شاء الله نرجع نعيدها قابل شعدنه اشو لمه ورجعنا التمينه

جمانة : اي والله عفيه والله متحمسة

دنيا : ابتسمت على حماسهن ، طبعًا جمانة مرت كريم وسهير مرت جياد مجانن مجرد نسوان حمى بالنسبة الي

حرفيًا جنه كروب واحد ، طلعاتنا سوه وسفراتنا سوه مجنه نتفارك ابد واليشوفنه شلون گلب على گلب
يتفاجئ وعباله خوات محد جان يصدك احنه نسوان حمى

جمانة معلمة وعدها 3 اطفال ولد ( ميثم ، هيثم ، ميثاق )

وسهير معالجة نفسية وعدها عيادة بس سودة عليه حبيبتي مو يوم الي تزوجو هي وجياد وهمه ماعدهم اطفال وباقين طول هالسنين يعالجون ويحاولون ديصير عدهم طفل وابد مصار ومع هذا الي يشوف كمية الحب والمودة البيناتهم يضل صافن

بحيث جياد اذا سهير صخنت يكعد يبجي عليها شلون الجهال وهي هم شايفته وممصدگه ، شكد احب علاقتهم سوه ، هادئين ومالهم حس لا يتدخلون بحياة احد ولا الهم شغلة بشي ولهالسبب كل الي بالبيت يموتون عليهم

على عكس بيت علي وعلى طاري علي ومرته ، فززني من صفنتي صوت ابريز اكثر كائن مزعج ممكن يمر على البشرية كلها

ابريز : هاا دنيا رجعتي ، الحمدلله على السلامة

دنيا : الله يسلمج

ابريز : شعجب رجعتي عشتي ويانه عبالي راح ترجعين مثل قبل وتكعدين ببيت وحدج

دنيا : حاليًا احنه مستقرين هنا عود اذا حبينه نرجع نطلع ببيت وحدنه انطيج خبر ، شديت على حضن تيم واخذته وطلعت ويه البنات

جمانة : ولج هاي شنو ما عرفتج من شوكت صرتي تردين على ابريز

دنيا : تنهدت ، الظروف والسنين يا جمانة تغير الانسان هواي واني مو دنيا القديمة التخاف من كلشي ويرجفها اقل صوت عالي

اني تغيرت هواي والحياة علمتني ما اسكت لاحد مهما كان

سهير : بنات سدو الموضوع فدوة خلينه متونسين يله تعالن بسرعة الكل منتظرنه هسه خالة ترزلنه لان تأخرنا

دنيا : طلعنه للحديقة لكينه الكل كاعدين ، صبحت على الكل واجيت كعدت يم يوسف

يحيى : يا هلا بهالصباح اي وأخيراً رجع البيت نور ، حبيبتي بنيتي والله رجعتج بيناتنه ردت الروح للبيت

دنيا : ابتسمت حبيبي عمو فدوة لكلبك ، كعدت يم يوسف والكل استقبلني احلى استقبال ، كلش حسيت نفسي مرتاحة بيناتهم احس جزء بحياتي جان ناقص

واليوم من كعدت وياهم حسيته اكتمل خصوصاً بيت عمو يحيى من النوع المتآلفين سوه كلش هواي وجماعتهم وكلبهم الصافية تخلي اليعاشرهم يحبهم بدون اي مجهود

رميم : يله يمه يله حبايبي بلشو ليبرد الاكل

دنيا : بلشنه ناكل واني التهيت بتيم اوكل بي والشباب بيناتهم يسولفون

حليم : يمه حضري روحج باجر نروح لبيت امين نوجبهم

رميم : ليش همه باجر يرجعون

حليم : اي باجر يخلص الحجز واني اروح اجيبهم فاذبج الصبح قبل لا اروحلهم

دنيا : اذا ترحين خالة اخذيني وياج مو تنسيني فدوة

رميم : اي حبيبتي هو كلنا راح نروح باجر نباركلهم وانتِ هم تشوفين اختج وتطمئنين عليها

ابريز : اني ما اروح

رميم : هاك حبيبي ميثاق افتح حلگك ، اي براحتج مو باللزوم تجين

دنيا : اباوع لابريز خزرت رجلها مدري ليش وهو اشرلها بعيونه تسكت ، ما اعرف شنو السالفة بس الي انتبهت عليه اغلب الكاعدين يتجنبون ابريز بشكل مو طبيعي

هو اوك هي جانت من زمان صاحبة مشاكل وانسانة متكبرة بس مجانو يعاملوها هيج وخصوصا خالة رميم من النوع الجداً بسيطة وماعدها هيج اسلوب بالتعامل

يوسف : چيلتين مو ؟

دنيا : انداريت عليه ، هاا ؟

يوسف : اخليلج چيلتين شكر على الجاي لو تغير ذوقج وكمتي تشربين الجاي مر

دنيا : رفعتله حاجبي لا اشربه حلو وزايد هم

يوسف : اكول ليش سمنانه الظاهر كاعدة تكثرين سكريات

دنيا : باوعت لروحي ، اني سمنانه !!

صفنت ما مستوعبة الجملة وما احس الا راشدي ينزل على وجهي

اباوع لتيم ركعني راشدي بس شنو من راشدي خدرلي خدي والله

تيم : ننه ميه

دنيا : يعني اليريد عميه يا حبيبي يصفك بالعالم راشديات ادري شنو ذنب خدودي اني ، وكلته والله ذب عليه الضحك

ههههههه استغفر الله صدك هذا الشبل من ذاك الاسد ، يوسف هم جان بالشقة يطيحلي تعضعض وراشديات لمن تفرفح روحي ياله يعوفني وهسه ولله الحمد ابنه استلمني

بس يمه شلون استلام يخبل بسته افييييش يمه رحتلك سبع فدوات مو وحدة

ضلينه كاعدين لحد ما كملنا وكمنه احنه والعاملات نلم المواعين

خليناهن بالمطبخ وطلعنا ، انطيت تيم ليوسف واخذت موبايلي حتى اخابر ديمة

اتصلت عليها ، شويه وردت عليه ، الووو هاا حبيبي دمدم

ديمة : الو

دنيا : الووو هاا حبيبي دمدم شلونج

ديمة : الحمدلله

دنيا : حسيت صوتها مو طبيعي ، كعدت على صفحة وحاجيتها ، بيج شي حبيبتي سولفيلي ليش صوتج هيج

ديمة : دنيا راح اموت

دنيا : اسم الله يكلبي خيرج احجيلي شكو ، ما جاوبتني بس صوتها مهضوم وكل حسرة تجرها شكبرها

ديمة : احم دنيا اني زينه حاجي ماما وطمنيها عني لان هسه تعبانه وما اكدر احجي وياها واخوفها

دنيا : شنو امين يمج ومدتكدرين تحجين ؟

ديمة : بهمس اي هياته اجه

دنيا : زين اهدي انتِ واني باجر راح اجي الصبح اشوفج ونتفاهم خوش حبيبتي

ديمة : تمام يله باي هاي زبيدة دتخابرني

دنيا : ماشي حبيبتي يله مع السلامة وسلميلي عليها ، سديته منها وتنهدت اوف يربي شلون ويه ديمة
كلبي يمها وكلشي ما افتهمت من كلامها غير انها
منهارة وبس تريد تبجي والمانعها وجود امين

انشدهت بيها وحتى ما افتهمت منها اذا خلت امين يتقربلها او لا ، يربي دخيلك سهل امرها ومشي حياتها
باليرضيك لان لا هي تستاهل ولا الولد يستاهل

اخذت الموبايل ورجعت كعدت يم البنات ، خلصنه اليوم سوه ، ضحك وسوالف وعتب ما حسينه بالليل شوكت اجه خلص اليوم واحنه خاتلين بغرفة سهير

لمن اجه جياد يريد ينام ياله طلعنا وكل واحد راح لغرفته

وطبعا مستر تيم ما قصر كمز ولعب لمن هلك من التعب تالي ركعته بممه خليته بعشر دقايق يغفي تالي اخذته وكمت من نام

ابتسمت بوسته من خدوده ياربي والله احس روحي طايره من الفرح لان كمت اكدر اشوفه واشيله وابوسه بالوقت اليعجبني بدون لا اخاف من احد او اتردد للحظة وحدة

دامشي على كيفي حتى لا اكعده وصادفتني ابريز الشايله ابنها العرفته صارلها كم شهر من جايبه

وبالمناسبة عمو يحيى ماعنده بنات وولده كلهم طلعو عليه ، علي عنده 3 ولد وكريم هم عنده 3 واني من تزوجت يوسف هم جبت ولد ومرت يوسف سرى هم جابت تيومي يعني هالبيت من صار ولهذا يومنا
مصارت بي حفيدة بنيه كلها ولد

بعد بس سهير وجياد كون الله يرزقهم بالذرية الصالحة ويترس حضنهم بطفل وحيلم كون الله يهدي ويتزوج ويستقر

ابريز : شعندج تفترين بالطفل وهو غافي تره خطية

دنيا : عفواً بس شعليج انتِ وتره دتشوفيني ماخذته وداصعد فوك انيمه فبعد شنو الداعي لهالحجي

اباوعلها تقربت وربتت على چتفي

ابريز : استهدي بالله وديربالج على هالطفل ومو تأذي لان عود انتِ مرت ابو تره الله فوگج وشاهد على كل فعل يبدر منج تجاه هالمسكين

خليج حذرة وايالج في يوم لو الله رزقج تكرهي وتأذي لو تحرضين ابو عليه وتخلي يفرق بينه وبين اخوته تره الله يصير الج بالمرصاد ومثل ما اخذ محمد يرجع ياخذ اليجون بعده

دنيا : هاي شبيج بابا ، ااذي شنو !! مخبلة اني لو ماعندي ذمة وضمير حتى أذي طفل وبعدين هو شمسويلي قابل حتى اكرهه

اكو كائن طبيعي يكرهله طفل ؟

وصدك شنو احرض يوسف عليه ، بله مو عيب عليج احد كلج اني جايه من الشارع لو ما اخاف الله حتى
احرض ابو على ابنه

ابريز : كلشي يصير يختي مرت الابو لو تحط روحها متكدر تحن ولا تحب مثل الام يبقى اكو كرهه وغل بكلبها لو مهما حاولت

دنيا : لج خافي ربج وهالسم هذا بطلي ، مع الاسف عليج واني عبالي تغيرتي وهذا الحقد ودس السم بالعسل بطلتي بس صدك لا كالو ابو طبع اسأل على سلامتة

ابريز : هاي شبيج عليه هو هذا اليسوي زين وينصحج
هاي فوكاها بدال ما تشكريني لان جاي انبهج من هسه حتى تتحذرين للمستقبل

دنيا : هاي السوالف عوفيها على صفحة مو جديدة عليج اني سوالفج هاي حافظتها على ظهر خاطري

واصلا همزين حجيتي اني كيفت والله ، اسمعيني زين من هسه خلي انطيج المفيد ، اقسم وداعة امي وابويه وضناي الراحو وكسرو ظهري وراهم ان شفتج تدوسيلي على طرف لاسوي بيج سوايه ما سوتها مره

ومن هسه احترمي نفسج وفگي ياخه عني وعن تيم احسلج لتخليني احطج بحلگ يوسف واخلي هو اليتعامل وياج

عفتها ورحت قبل لتجاوبني ، حقيرة عبالها اسكتلها ، فتحت باب الغرفة ودخلت لكيت يوسف كاعد

بس شافني عگد حواجبة مستغرب

يوسف : بيج شي ؟

دنيا : لا مابيه شي ، دخلت خليت تيم بفراشه واخذت تراك ودخلت للحمام ، بدلت ملابسي وغسلت وتعطرت وطلعت

لكيت العاملة واكفه وشايله علبة وتحجي ويه يوسف وبس شافتني ابتسم

: ست الحجية دزتلج دهين وتكلج دزيت عليه من النجف على مودج اكلي والف عافية

دنيا : ابتسمت واخذته منها حبيبتي عاشت ايدج

: محتاجة شي ست لو اروح

دنيا : لا حبيبتي على راحتج وتصبحين على خير ، سديت الباب وراها ورفعت العلبة لخشمي

شميت ريحة الدهين وغمضت عيوني اووووف شكد احب هالحلاوة اموت عليها سودة عليه بابا چان بكل زيارة يجيبلي كيلوات واني من اضمها ومن اشتهيها واريدها ذايبه اخليها شويه بالفرن واطلعها اكلها وهي حارة

كسمت لروحي شويه واكلت ، اااااالله ، انداريت على يوسف مقدمة الماعون كدامه ، تفضل

يوسف : الف عافية سبقتج

دنيا : هزيتله راسي ورحت خليتها على ميز التواليت وكعدت اكل

يمكن صارلي 3 سنوات مماكلتها ، رغم الياكلها ينحمس حمس بس والله طيبة

يوسف : نصيحة حاولي تخففين سكريات تره جاي تسمنين

دنيا : اني !!

يوسف : اكو كائن حي غيرج هنا ؟

دنيا : بس اني مو سمينة وحتى وان شبيها السمينة ؟ وعلى حسب علمي انت تحب السمان من شوكت صرت تنتقدهم وميعجبوك ؟

يوسف : هاي بعد الانسان يتغير ذوقه مع مرور الزمن

دنيا : سديت العلبة وانداريت عليه ، متحس نفسك هواي لاح بالجملة هاي

يوسف : لا بالعكس خو كولي عاجبتني ، حلوة الانسان يتغير ذوقه مع مرور الزمن

دنيا : والله شكلج راح تخليني افكر هواي بهالمقولة واغير ذوقي حتى بالناس

يوسف : الزلم بالتحديد ، صدك بعدج تحبين اللحية لو تغير ذوقج

دنيا : من جاب طاري اللحية رفعت ايدي حكيت ركبتي وهو من انتبهلي مد ايده على لحيته معدلها

كزبر جسمي من حركته ، كمت دخلت للحمام غسلت وطلعت دافوت للغرفة بس استوقفني صوته

يوسف : ما جاوبتيني

دنيا : على شنو ؟

يوسف : بعدج تحبين اللحية مثل ما اني احب الرمان لو تغيرتي

دنيا : مجاوبته ودخلت للغرفة ساده الباب ، لزمت كلبي اليدك بسرعة

شكد مستهر وعقله سخيف ، دمغت روحي لا دنيا لا لتتذكرين خرب يومج وين رحتي ادبسز

_________________________________

زبيدة : متمدده على رجلين دادا وكالعادة من يوم الاجيت لهذا البيت واني ماخذة دور المستمعة

اشاهد بصمت ومستلمهم بداخلي ، مفلستهم تفلس واحد واحد

النوح : اكول حجية دزيتي ريوك العرسان مو

حمزية : اي عيني وصيت على الكيمر والاجبان والعسل والمربى والخبز كله على اكمل وجه وصل ودزيته بأيد صاحب اليوم الصبحيات

النوح : عاشت ايدج والغدة ؟

حمزية : انطيت الفلوس لام امين وكتلها طبخي على مزاجج للمعازيم تعرف باجر كل النسوان كرايبهم يحضرن بالصبحة وهي اعرف بعد بمعارفها شيحبون وشيناسبهم

النوح : بارك الله بيج وهدية العروس

حمزية : باجر من اروح انطيها الها وهدايا عمامها هم اوصلهن ونشوفها ونرجع

النوح : خوش حجي ذكريني بعد اكو شي ناقص

زبيدة : اي اني اكلك بقى بس تاخذوها هي وامين والمعازيم تزوروهم بيت الله

شدعوة كل هذا تره عرست حالها حال البشرية ما حررت القدس

حمزية : انجبي انتِ بالمدمغة شمعرفج انتِ بالعادات والتقاليد ، خفه حلگج الميطلع غير الحجي الاغبر

بيداء : تغار من اختها جيف احلى منها العانس

زبيدة : هههههه لا بهاي حقج عاد اني كاتله نفسي على العرس متشوفيني اصبح وامسي ابجيلي على رجل لا خليت امام ولا شيخ ما نخيته بلكت يجي واحد ينفكني

حمزية : وشكو بيها الرجل ستر للمرة

زبيدة : مو عريانه اني ويجي الرجل يسترني ، بيبي مع احتراماتي لحضرتج بس فدوة لتربطون الستر والعفة بالزواج لان ماكو اي ربط بين الموضوعين

ياما نسوان مستورات وعفيفات راحن للرجل وانشهرهن وانمسح بشرفهن وسترهن الگاع بسبب رجال د**** ميخالف الله بيهن

ام حسن : اي والله بعد حلكي درر

حمزية : ولج انتِ خوش تحجين ام لسانين

زبيدة : ضحكت وسويتلها لايك على گولة زيد ابن عيسى

عدلت نومتي وشفت جدي صافن بوجهي ، اختفت ابتسامتي ، عزززه هذا نسيته كاعد وانطلقت بدون ما انتبه هسه يخزيني

انوب اريد انزل عيني عنه بس عيونه مصوبة عليه حتى خلاني اتوتر

النوح : زبيدة

زبيدة : دخيلك يالحمزة ، احم نعم جدو

النوح : انتِ شكد عمرج ؟

زبيدة : استغربت سؤاله راح اصير 27

اباوعله رفع اصابعه وصار يحسب ، ساعة يضيق عيونه وساعة يهز براسه يااا هذا شبي

بيداء : هاا يابه بس عندك رجل لبنت ياسر

النوح : احجي عدل خفه حلكج احنه بناتنا معززات مكرمات مندورلهن رجوله اليريدنه يدك بابنا وهو الممنون واحنه النتشرط ونتفضل عليه ولو ننطي لو مننطي

زبيدة : اباوعله كام بعد ما زرل بيداء اييييي حيييل
برد كلبي

النوح : يله اني رايح انام ، وانتِ كتيلي عمرج 26 مو

زبيدة : 27

النوح : بعدج ما طبيتي بيها لتكبرين بروحج يله تصبحون على خير

زبيدة : هسه شهالالحاح بالعمر هذا والله حلوة هاي حتى عمري يكبره ويصغرة على مزاجه

هزيت ايدي شهالعائلة المريبة هاي ، كمت صعدت حتى انام ، دخلت للممر البي غرفتي لكيت بابها مفتوح

تقربت لكيت العاملات ناكثاتها نكث ، هاي شنو ؟.

: مدام ماما كبيرة كول رتب غرفة زبيدة وشيل الاسرة مال ماما دنيا وديمة وسوي سرير جديد فراش جديد لانت

زبيدة : سرير جديد لاني ، لزمت راسي يبووو هسه وكتها والله اني والمطي صايرين سوه من النعاس
من طلعتلي بيبيتي بهالسالفة

زين اني وين انام اليوم ؟

سمعت صوت نور ورايه ، درت وجهي عليها

نور : تنامين يمي ، هستوها بيبي خابرتني كالت خلي زبيدة تنام بغرفتج منا لمن تجهز غرفتها الجديدة

زبيدة : لا شكراً ماكو داعي انام يم دادا وخالة وئام

نور : وانتِ ليش تزعجين نفسج وتعلعلين نومتهن وياج خو تعاي نامي يمي غرفتي جبيرة وتكفي كومة

تعاي يمعودة خلينه نتونس ونغير جو بدال هالكئابه هاي ، شبيج متجبجبه بنات عمج احنه يعني خواتج
امشي امشي

زبيدة : جرتني وياها للغرفة واني من النعاس مطفية ابد مو مال اتناقش

دخلت للغرفة وفتحت البشت مالتي وشمرت الحجاب
همزين لابسه تراك ، ذبيهن وشمرت روحي على الجرباية

من رخصتج عزيزتي انتِ العزمتيني على النومة يمج فتحملي قلة ادبي واحتلالي لغرفتج بدون استأذان

نور : ههههههه اخذي راحتج واعتبريها غرفتج وبالمناسبة انتِ بدون حجاب كلش حلوة

زبيدة : ابتسمت واشرتلها على راسي حبيبتي انتِ الاحلى ، غمضت عيوني وهستوها دتشكل عيني
وفزيت على صوتها

نور : فتحي ايدج

زبيدة : شنو ؟

نور : هاج كرزات

زبيدة : يربي راح انام على روحي يا صخمات بهالزلك ، استحيت افشلها وهي مستقبلتني بغرفتها

اخذت منها وكعدت اكرط منا لمن يسهل الله ويخلصن حتى انام

نور : سولفيلي عنج زبيدة شتحبين شتكرهين خليني اتعرف عليج

زبيدة : والله ميحتاج تتعرفين عليه مابيه شي مثير للدهشة كلشي مكشوف كدامج كلبيني وتعرفي براحتج

نور : اووو والله انتِ متسوين واهس

زبيدة : هههههه للاسف اي هاي السوالف تكيف عليها ديمة

نور : زين انتِ بشنو تحبين تسولفين

زبيدة : اوكفي بله خلي اتذكر ، رفعت اكتافي ، الطبخ مثلاً ، السيارات ، الرياضة وبالتحديد الملاكمة ، الشعر الرقص يعني هالامور

نور : عجيب شي ميشبه شي

زبيدة : ابتسمت هاي بعد ، ضلينه ندردش شويه واندكت الباب ، اباوع دخلت وحدة من العاملات شايلة سلة ملابس

: ماما نور ملابس بابا هارون كملتهن

نور : عاشت ايدج جيبيهن خلي اوديهن اله

زبيدة : شعجب انتِ توديهن اله ؟

نور : مو باعي اخوية ميقبل واحد يدخله للغرفة غيري
فآني الاودي هدومة وانظف غرفته دائما

زبيدة : باستغراب ، ليش يعني ؟

نور : والله ما اعرف هو هيج ميحب احد يدخل لمكانه

زبيدة : كرزت الحباية وهزيت راسي عود مسوي اتنشن ابو الوصخ

اباوعلها راحت ورجعت ضايجة ، هاا شبيج ؟

نور : هارون

زبيدة : شبي ؟

نور : اخذ الهدوم وصيح عليه لان بعدنب سهرانة تالي طبك الباب بوجهي وراح ، ادري ليش يعاملني هيج هسه اني شسويلته

زبيدة : هذا شبي اخوج مخبل شنو فوك متخدمي وحايره بشكولة الزفرة صدك ناس متستحي

نور : لازبيدة لتحجين عليه سودة عليه مريض ميخالف اتحمله

زبيدة : تره والله دقيتيني كلما كعدنا وواحد جاب طاري اخوج صحتي مريض ، رحمة للكائنات متكليلي شنو مرضه وتريحيني

نور : والله محد يعرف

زبيدة : شنو هالكلاوات هاي شلون محد يعرف شنو بي مرض نادر مثلاً ؟

نور : باعي خلي اسولفلج وانتِ راح تفهمين اني شنو اقصد

شوفي حسب السمعتة من الكل اخوية هارون جان بطفولتة يختلف جذريًا عن هسه ، على كولة بابا الكاع تصيح الغوث منه

وكح بشكل بحيث جانو مسوين شفتات بس في سبيل يسيطرون عليه وهم جان يغافلهم ومدري شلون يفلت للشارع وتالي يلكو حاصر الجهال ويدكهم بالصوندة

زبيدة : ياااا هذا طلع عنده فيوز ولادي خطية

نور : ولج مو هذا قصدي ، اقصد انه جان مرح ويلعب ويطلع بالشارع وكل الي بالبيت يحبو لان اجتماعي
وسوالفه حلوة

خصوصاً امي وره مجابته بقت هي ونسوان عمامي اربع سنوات ولا وحدة منهن جابت طفل فتركز اهتمام اهل البيت على هارون

وبذاك الوكت هو جان ماخذ عقولهم بسوالفه وحركاتة
يعني بالمختصر شايفي وما مصدكين حيل متعلقين بي

زبيدة : اي وتالي

نور : جاييتج بالحجي ، المهم هارون بقى هيج لحد ما صار عمره عشر سنوات يمكن والولد اسم الله عليج بيوم وليلة تغير جذريًا

من طفل همه اللعب والطلعة لطفل غريب عجيب لا يقبل يحجي ويه احد ولا يقبل يختلط بأحد اربعة وعشرين ساعة ساكت وميقبل احد يلزمه نهائي

حالة هارون جانت صدمة لكل الي بالبيت ، وفوك كل هذا كامت تجي نوبات صرع مؤقتة ويبقى يرتعش
ويرجف وحده لمن يهدئ ويغيب عن الوعي

زبيدة : خطية زين ما عرفو شنو السبب

نور : ابويه وجدي ما خلو مكان ما اخذو هارون اله بحيث ختمو دكاترة العراق على ايدهم ومن ما لگو نتيجة

اخذو وسافرو للادن وللهند بذاك الوكت وهم ما حصلو شي كل دكتور يحجي شكل

تالي من ملو من الدكاترة حولو على السادة والشيوخ وبذاك الوكت جان اكو شيخ كلش معروف انه انسان خير ويخاف الله ، اخذو اله ومن كشف عليه كلهم
كلشي مابي لا ممسوس ولا اكو اي عمل شيطاني مسوه اله

وحتى اجه للبيت وفحصه مكان مكان وما لگه شي

زبيدة : وبعدين

نور : استمرو على هالحال لمن ملو ، كبر هارون وكبر هالطبع ويا واهلي شبه تعودو على شخصيتة هاي
واتأقلمو عليها ما عدى ابويه وامي

اوووف يا زبيدة سودة عليه لسه يبجون على حالته وكون تشوفيهم شلون يدورون الحجاية منه دواره وهو مجافيهم ولا كإنهم اهله

ومو بس همه الكل ، لا يحجي ويه اخواني ولا اله كل علاقة بينه ولا كإنما احنه اخوانه ، يكعد ياكل ويانه ويكوم ، تصير مناسبة ميحضر ولا يوصل ، عازل نفسه وفنج تحاولين تتقربين منه لو تلحين عليه بموضوع

احسبي ليلج تنامي تونين من البجي والوجع ، تخيلي مرة من المرات اتذكر اني جنت صغيرة وهارون يمكن عمرة عشرين واحد وعشرين سنة بهالحدود يعني

جان هستوه راجع من الكليه وامي تلكته بالباب لازمة طاسة السبيناغ تدري بي يموت على هالمركة وخطية كعدت من الصبح تسوي بيها حتى يجي ياكلها بلكت تتغير نفسيته تخيلي امي شكد جانت مهتمه بي بحيث ابسط التفاصيل جانت تركز عليها

زبيدة : خطية ، كملي

اي المهم فاجه هو بس جان مبين عليه ضايج وهي تلكته حتى يتغده وهو كلها ميريد فهي حالها حال اي ام ما هانلها ابنها ينام بدون اكل فضلت تلح عليه حتى يتغدة

تالي فنج من زهك منها شسوه

زبيدة : شسوه ؟

نور : شال طاسة المركة الحارة ودارها على راسها وعافها ومشه ولا كإنما مسوي شي

زبيدة : عززززه بعينه هذا شنو من بشر

نور : والله العظيم وبيومها وجهه امي انچوه ونقلوها للمستشفى وسوده عليه راسها احترك والمركة لان حارة كلش حركت وجهها

زبيدة : بس ما مبين وجها محروك

نور : غير وره ما نشف حركها گبل سافرت للبنان سوت تجميل ياله رجعت

زبيدة : بس تصدكين على حجيج هذا صدك اخوج مو طبيعي ، معقولة ماكو طبيب كدر يشخص حالته بشكل دقيق

نور : مو كتلج كل واحد يحجي جان يحجي شكل
واحد يكول متعرض لصدمة
واحد يكول بسبب الصرع
واحد يكول مخبل وووو عينج ومتشوف الامراض وهو جان ابد ميحجي ولا ينطي من روحة ابد

تالي اخر دكتور راجعو عنده كعد ويا فتره طويله والنتيجة الطلع بيها انُ عنده طيف توحد

زبيدة : طيف توحد ويصير بعمر عشر سنوات ، معقولة !!

نور : والله ما اعرف كتلج اهلي من كثر المراجعات وتنوع التشخيصات من الاطباء ملو بس الثبتو عليه بعدين حسب تكرار كلام الاطباء يا اما يكون عنده طيف توحد او متعرض لصدمة

زبيدة : ويجوز فعلا متعرض لصدمة ، تحرش مثلا بما انج دتكولين مجان ميقبل احد يلزمه

نور : ما اتوقع لان هذا الموضوع الوحيد الهارون حجه بي وگلهم محد مسويلي شي وحسب كلام نوال اختي
جان مصر وواثق من كلامه بحيث الكل استبعد يكون
متعرض لصدمة

زبيدة : شغله غريبه والله

نور : حيرتج هاي اني اشوفها بعيون ابويه كلما يكعد بيناتنا هارون

زبيدة : زين معقولة ابد ابد متغير من جان صغير ولحد الان ولا اي تغير حتى لو بسيط

نور : لا بس جان قبل عصبي كلش وهسه نوعا ما هادئ وماله شغله يكمل دوامه يرجع ينام ويكعد لو يروح للاسطبل لو يطلع للمحمية هيج مكضي حياته

زبيدة : محمية !! ليش اخوج شيشتغل ؟

نور : هارون طبيب بيطري ومن تخرج درس هم وصار مروض مال حيوانات وهسه ديشتغل بمستشفى الصبح وبالاضافة لهذا شغلة هم ديشتغل مدرب ومروض حيوانات فيروح للمحمية دائما

زبيدة : هزيت راسي ، مروض حيوانات كتيلي ، مهنة غريبه

نور : هو اخويه كله غريب بقت على المهنه يختي

زبيدة : طبطبت على ايدها لتضوجين ان شاء الله يتعالج

نور : للاسف يا زبيدة اخويه كبر بعد وما اعتقد ممكن يتغير

زبيدة : ليش اخوج شكد عمره ؟

نور : 33

زبيدة : هااا وشعجب بيت جدج مخلي يوصل لهالعمر وميلحون عليه حتى يتزوج تحت مسمى زوجو ويعقل

نور : هههههه لا حاولو وهواي هم بس مترهم

زبيدة : اكيد هو اليرفض مو

نور : لا بالعكس اصلا هو يريد يتزوج

زبيدة : لعد شنو المشكلة ؟

نور : شوفي هو مجان عنده اي مشكلة بخصوص الزواج بالعكس من جانو يحاجو يقبل وهو يكلهم خطبولي

وحتى اربع مرات خطب وفصخ

زبيدة : ليش ؟

نور : باعي هو مو يروح يشوف العروسة وهي تشوفه حسب الاصول والبنيه تقتنع بي لان ميحتاج اكلج اخويه رغم مريض بس صاحب كاريزما وجمال يعني لا يقاوم فگبل البنات جانن يوافقن عليه اول ميشوفنه

زبيدة : منيله كاريزما ابو گرعة

نور : انجبي منيله گرعة تره شعره اثخن من شعرج وشعري بس هو يحب يزينه خفيف مو اگرع ينادره

زبيدة : المهم كملي

نور : اي فالبنات مو جانن يقبلن فهو شنو مجرد جان يطلب يكعد ويه البنيه وحدهم لو يلتقي بيها بمكان عام حتى يتفاهمون ويتعرفون على بعض وهذا الشي من حقه

والاهل عادي يوافقون لان مابيها شي

ولج يازبيدة هي البنيه تطلع ويه هارون منا ترجع گبل تفصخ كلشي منا ومو بنيه وحده لا اربع بنات خطبناهن اله ونفس الشي بس يكعدن ويا
يفصخن

زبيدة : خاف هو شو شيسويلهن

نور : لا لان جانو يستفسرون وميحجن شي غير انهم ما مقتنعات تخيلي اخر وحده جانت كرايبنا كتلت نفسها عليه حتى هي الوصت وكالت تعالو خطبوني

ومن رحنه خطبانها وطلعت ويا البنيه انطت لاهلها خبر انها مموافقه واختفت من حياتنا وحق ربج حتى بالمناسبات مالتنا كامت متحضر

زبيدة : ليش عود شي ياخذ العقل والله

تنهدت متثاوبة ولج اخوج يرادله واحد صاحي يكعد يفصخة ويفهم شنو سالفته هاي

نور : اندعيله الله يوفقه ويسهل امره دائما احسه ضايج ومهموم واموت قهر عليه

زبيدة : نكثت اديه من كشور الحب ، الله يهدي ويشافي

انداريت ادور على مي ، ولج بس لا ماعندج مي هنا؟

نور : خليج خلي اروح اجيب واجي

زبيدة : كعدي اني كايمة اغسل وامشي رجليه واجيب واجي

لبست وطلعت نازله جوه ، دخلت للمطبخ جان بي ضوه خافت ، فتحت الثلاجة وجريت جم كاسة مي

انداريت لكيت واحد ورايه يمه بسم الله الرحمن الرحيم

***************************************
لهنا يكون خلص البارت ان شاءالله يكون عجبكم ❤️
+لتنسون التصويت والتعليق برأيكم ❤️

شنو رأيكم بالاحداث ؟

شنو تتوقعون حيصير بالبارت الجاي ؟

حبايبي الدارسين طب نفسي او علم نفس او حتى عدهم معلومات بخصوص هالعلم ياريت تكتبولنا ارائكم بشخصية هارون وحسب رأيكم الشخصي وتحليلكم شنو المتوقع يكون يعاني منه
وبأي تشخيص من تشخيص الاطباء النفسيين تحسو اقرب لشخصيتة وانسب لواقعه

اتابع تعليقاتكم ❤️

.