الموت الحي الفصل الثالث وأربعون 43 - بقلم براء الموسوي

مرحبا حبايبي العسل شلونكم ❤️❤️

~~~~~~~~~~~~~~~~~~

كلماته قاسية جداً ، عيناه تحمل كُل البراءةِ يفكر بطريقة شيطانية ويتصرف بعفوية وتلقائية كئيب حد السوداوية وطيب حد الجنون ممزق بين الف شخصية هو

هو !

" موتها الحي "

~~~~~~~~~~~~~~~~~~

#الموت الحي
#للكاتبة براء الموسوي

زبيدة : دخلت للمطبخ جان بي ضوه خافت ، فتحت الثلاجة وجريت جم كاسة مي

انداريت لكيت واحد ورايه يمه بسم الله الرحمن الرحيم

هارون : وخري

زبيدة : عدلت حجابي وابتعدت عنه مو لان خفت بس من بعد الشفته والسمعتة عنه قررت اتجبنه بشكل تام

يمكن شفقة ويمكن تجنبًا للمشاكل ، ما اعرف !

اباوعله اخذ قوطية ببسي وراح كعد على الميز ، ضليت صافنه على ايده ، هذا ليش هيج يرجف

جانت اكو رجفه كلش واضحة عليه بحيث ايده جانت حرفيًا ترعش حتى قوطية الببسي وكعت من ايده كد ما يرجف

انوب اندار عليه خزرني عبالك اني الموكعتها ، الكبر هذا شبي

هارون : ممـ مترحين شبيج صافنة معروض فلم كدامج

زبيدة : وانت شعليك شنو مطبخ ابوك هو ، عشتو ، سحبت كاسات المي خليتهن بصينية واجيت اروح استوقفني منظرة من دنك يحاول يشيل القوطية
وميكدر لان توكع من ايده

اخر شي دفرها برجله وراح كعد على الميز يتحسس وجهه ويصم بايده ويفتحها حتى تخف الرجفه بس الظاهر ما جاي يكدر يسيطر على نفسه

مدري ليش من شفته هيج انقهرت عليه ، ذبيت الصينية ورحت يمه ، بيك شي ؟

هارون : للـ لا لا

زبيدة : تحب اصيح لاحد ، شوف اديك شلون يرجفن

هارون : لا ببـ بس يمكن سكري هبط

زبيدة : شنو بيك سكر انت ؟

هارون : لالا بس فتحيلي القوطية بسرعة

زبيدة : فتحت قوطية الببسي وقدمتها اله ، اباوعله رفعا يده يريد يلزمها بس ميكدر ، مدري شحسيت بوقتها من رفعت ايدي مخليتها على ايده ومثبته القوطية حتى يشرب منها

ما اجه ببالي ساعتها اي شي غير اني اساعده ، يمكن كلام نور عنه خلاني انقهر واتأثر عليه خصوصاً اني شفت نوبه من نوباته كدام عيني وجان فعلا حالة مو طبيعي

كمل القوطية واني نزلتها وسحبت ايدي من ايده بسرعة ، احم هاا شلون صرت

هارون : الحمدلله مابيه شي

زبيدة : زين تريد شي بعد لو اروح ، تحب اصيح احد من اهلك يبقى وياك ؟

هارون : احم لا ميحتاج

زبيدة : هزيت راسي واخذت الصينية واجيت اطلع بس استوقفني صوته

هارون : اوكفي

زبيدة : انداريت عليه ، نعم

هارون : مرة ثانيه اذا شفتيني بهالحالة لتتقربين مني هالمرة راح اعديها الج لان جنت بوضع ميسمحلي امنعج بس مرة ثانية راح يكون الي غير تصرف وياج

خليج بعيدة عني وثكلي شوية ماله داعي هالتزگ ما راح تحصلين مني شي اني مو من هذا النوع

زبيدة : ضليت صافنه بوجهه ، ولك انت صدك متستحي ، هاي فوك ما ساعدتك

بدال متتشكرني كاعد تتمنطق براسي ، بس هو مو صوجك اني الما عفتك تهتز هز من الرعشة

بس هو انتو هيج الزلم مال لبس مو مال احترام ، متفيد وياكم غير التعاملكم بالنعال ، صاحين ولا مرضى نفس القندرة كلكم

اشرت على دماغي وهذا المحطوط هذا عبارة عن مستودع جنسي ميفكر غير بس بالسوالف المكسرة والتعبانة مثلكم

شايفين نفسكم قندرة جبيرة وعبالكم كل النسوان ميتة على شكولكم الزفرة وانتو فلس احمر متسوون

عفته ومشيت بس شنو نار ووجت بيه اول مرة اسمع هيج كلام ، طول عمري حافظة نفسي واحترامي الا اليوم احس انهانيت خصوصاً من انوصفت على اني
جاي ادحس بي

رغم والله اني مو هذا جان قصدي بس لان شفته بهالوضع انقهرت عليه وساعدته

فتحت زيگي ، يمن انقهر عليك الدود والعگارب السود بحق محمد وال محمد

______________________________

صباحاً

دنيا : غافية واحس اكو شي ثكيل خانكني ، فتحت عيوني وشفت شي احمر بوجهي ، ضليت صافنه
بحدود الخمس دقايق وبعدين استوعبت

هذا تيم كاعد على وجهي ويهز بروحه

رفعت اديه شلته ودرته عليه لكيته يضحك

من شفته طكيتها بضحكة ، نعلعلا بليسك بهالصبح ما لكيت مكان تكعد عليه غير وجهي

تيم : شباح هير

دنيا : بسته من ركبته يمه كبدي اليصبح عليه ، صباح الورد ، كمت وشلته واني ابوس بي

يعني يا حبيبي هاي ارض الله الواسعة ما حلتلك الكعدة غير على وجهي واكول اني كعدت مختنكة اثاري حضرتك كاتم عليه النفس

احاجي وهو يدردم عليه عود يفتهم ، ضحكت واخذته وطلعت لكيت يوسف واكف بطرگ الخاولي يتعطر ومن شافنه بالمرايه ابتسم

يوسف : هاا صباح الخير

دنيا : صباح النور ، اجه اخذ تيم مني واني ضليت صافنه عليه مدري ليش من شفت منظرة داهمتني الذكريات مرجعتني وييين

عودة للماضي

دنيا : واكفه كدام الطباخ احمي الاكل وبطني المنفوخة سابقتني ، سمعت باب الغرفة ينسد انداريت لكيت الافندي طالع بطرگ المنشفة الملفوفه على خصره ويفتر

عيني سيادة النقيب روح بدل واستر علينا ليخرط الخاولي وتخزينه

اباوعله لزم الريمونت وكعد يگلب بالتفزيون

يوسف : ديله عيني المستحية همزين حامل

دنيا : هههههه يااا اشو انت كلما حجيت وصحت حامل

يوسف : اي قبل لتحجين تذكري ماضيج القذر

دنيا : ههههه يمه يا ماضي قذر هذا

يوسف : تتذكرين شلون جنت تحصريني ببيتكم وتطيحيلي بوس واني رجال فقير اطلع التفت وامسح بحلكي وركبتي المطبعة بحمرتج

دنيا : شمرت الجفجير وانداريت عليه ياا هاي اني ؟

يوسف : لعد اني ، تتذكرين من تزوجنا شلون وكفتيلي بليلة الدخلة بباب الحمام تصيحين اطلع ما اسويلك
شي واني ارجف من الخوف حتى امي خابرتها كتلها تعاي يمه هاي واكفتلي وتصيح اطلع

دنيا : شمرت الوصلة عليه كووول هذااا انت الحصرتنييي ساعة بالحمام تصيح اطلعي ما اسويلج شي بس اشكج شك

خليتني لا اخذ ولا انطي وكضيت اليوم مرعوبه وارجف بالحمام

يوسف : ههههههههه شكد جذابة

دنيا : طالعة عليك ابو الجذب

انداريت اكلب بالتمن ، حسيت بي يوكف ورايه ويحضني من خصري ، ضحكت من حسيته يصعد وينزل باديه على خصري ، شدتسوي

يوسف : ادور على خصرج شو ماهو

دنيا : انداريت بسرعة وخزرته شقصدك !!

يوسف : ههههههه والعباس اشاقة وياج

دنيا : دفعته ودرت وجهي عنه ، حسيت بي يرجع يحضني

يوسف : بويه والزهرة اشاقة وياج ، باعي هذا خصرج ، هاي بطنج ، ذني زرورج وهذا .....

دنيا : دفعت ايده وخر مستهتر

حسيت بي يخلي راسه بركبتي

يوسف : بهمس شوفي عفتها اليوم علمودج

دنيا : غمضت من حسيت بملمس لحيتة على ركبتي ، ابتسمت من كام يحكها بركبتي ويبوس بيه

وخرر شكد لزكة

يوسف : اوكفي جاي ابوس

دنيا : وخر ما اريد بوستك ، هههههه يبوووو يوسف لتلزگ

يوسف : لعد متدرين بيه اني من جنت صغير يصيحولي يوسف اللزكة

تعاي ابوسج من كدام خوما اخليج بحسرة البوسه

دنيا : دارني عليه وكام يبوس بوجهي وشفايفي ، انوب اني بدال ما اتفاعل ويا الله ذب عليه الضحك بحيث اريد اسكت بعد ما اكدر

وهو من يشوفني هيج يطيحلي تعضعض في سبيل اسكت واني ازيد ما انقص

اباوعله ابتعد وتفل بصفي

يوسف : وعابت لهالخشه انتِ وجهه رومانسية وبوس انتِ ، شكولج مال واحد زبط بط يطفي الضوه ويادي واجبه

دنيا : هههههه اسفه اسفه يله تعال ابوسك

يوسف : امشي ولي

دنيا : اباوعله كل عقلة زعل وراح ، طفيت التمن وركضت وكفت كدامه وحضنته

يوسف : وخري

دنيا : ههههه والله خلص راح اسكت ، دنك عليه خلي ابوسك

يوسف : دوخري بحال بوستج الفاهيه اني

دمغتها دكافييي شبيج تتمضحكين ادري تافل بحلكچ الشيطان

دنيا : هسه موزين اكيف بوجودك واضل بس اضحك
غير وحده تتلكه رجلها مادة بوزها متر لكدام

انت كون تكيف بيه ، تقربت حضنته وبسته من صدرة ، هم عندك مره فرفوشه وبس تضحك وهم تحبك وتبوسك وتدللك وين تلگه مثلي متكلي

يوسف : نعلعلا والديج شكد احبج

دنيا : حضنت ركبته من شفته دنك عليه ، غمضت عيوني من حسيت بشفايفه تنطبع على شفايفي ، شديت على ركبته وحضنته مقربته الي ومبادلته

عودة للحاضر

دنيا : صافنه وما احس الا يوسف يعيط بيه بس والله فزيت فزنه

يوسف : يمعوده صدك جذب وين صافنه صارلي ساعة احاجيج

دنيا : هاا شنو جنت تكول

يوسف : سلامتج بس امي تكلج يله بدلي ونزلي تريكي حتى ياخذكم حليم لاهل امين

دنيا : هاا اي اي هسه اروح

يوسف : دجيبي تيم وروحي تجهزي

دنيا : هزيت راسي ومشيت فتحت الباب

يوسف : يمعوده وين طالعة الحمام ذاك ويا

دنيا : انتبهت لروحي فاتحة باب الغرفة ، انداريت عليه ، شبيك دتصيح عليه

يوسف : اني صيحت !!

دنيا : اي لتصيح شنو الواحد ميشردله شويه اكلتني اكل عبالك شو شسويت شنو متصفن انت

يوسف : احد كلج اني مطي واتصفن

دنيا : يعني اني مطي !!

يوسف : اني اكول طبي سبحي وتحضري واني راح ابدل لتيم لان انتِ الظاهر كاعده هرموناتج مخربطة اليوم وتردين تتعاركين واني بصراحة رجال كبرت على سوالف المراهقين هاي

دنيا : اباوعله اخذ تيم ودخل لغرفته ، هذا شبي

هزيت ايدي ودخلت للحمام ، رفعت ايدي اريد انزع التيشرت وتذكرت اني مجايبة وياي ملابس ، نزلت ايدي وفتحت الباب وطلعت

شكول على عقلي السزز الذكرني بسوالف سخيفة وخلاني دربي ما اشوفهز

دخلت للغرفة لكيت يوسف ساحب دشداشتي الستن مالت النوم الجنت لابستها ورافعها لخشمه

رفعتله حاجبي من شفته اندار عليه ، اباوعله نزل الدشداشة عن وجهه و كام يبلعم

يوسف : احم هاي الدشداشة جانت واكعة بالكاع واني شلتها

دنيا : مديت ايدي كدامه شكراً ، جيبها

يوسف : شنيه ؟

دنيا : دشداشتي جيبها ،اخذتها منه ، ورحت طلعتلي هدوم انداريت لكيته يباوعلي ويمسح على لحيته

مشيت للحمام سويت نفسي ولا كإنما شفت شي ، دخلت سبحت بسرعة وبدلت ، طلعت ما لكيتهم بالغرفة ، نشفت شعري ولبست حجابي ورتبت وجهي ونزلت لكيتهم كاعدين يتريكون

صباح الخير

: صباح النور

دنيا : اخذت تيم من خالة وكمت اوكله ، كملنا ريوك بسرعة وراحت خالة تجيب جنطتها وتجي حتى نطلع

حليم : يله يمه يله خويه دنيا امشونه

دنيا : لعد البنات ميجون ؟

جمانة : لا حبي احنه العصر نجي فشلة نروح هسه عود العصريات من يمر عليكم حليم نجي ويا نبارك للعرسان سوه

تيم : ننه وياج

دنيا : هاا يروحي ، طبعاً يبعد روحها لننه اذا انت ما اخذك اخذ منو ، بوسته من خدوده ورديت على جمانة براحتكم كلبي شوكت متحبون تجون كل الهلا بيكم

رميم : يله يمه امشينه

دنيا : نزلت تيم بالكاع واخذت ايده ومشيت لاحكتها

يوسف : لحظة دنيا

دنيا : هاا ، اباوعله مد ايده بجيبه وطلع صمة فلوس

يوسف : هاج

دنيا : شسوي بيهن ؟

يوسف : كلشي يصير تحتاجون شي ، تعوزون شي يمج فلوس ، هاج يله اخذيهن وروحي

دنيا : بس اني عندي

يوسف : حتى وان يله روحي

دنيا : اخذتهن منه ومشيت وره خالة ، صعدنا بالسيارة ومشينه

حليم : اكول دنيا اهلج راح يجون مو

دنيا : اي طبعا اكيد هسه الكاهم هناك

رميم : هيج ويوم الاعرسك ويجونه الوادم هيج الصبح تباركلنا بزواجك

حليم : اهووو بدينا بهالقوانة

رميم : وقز القرط فوك ما ادعيلك تعرس ولو انت منو تقبل بيك ابو العرگ

دنيا : اباوع لحليم اندار وخزر خالة ، استغربت المفردة الكالتها خالة ، شنو حليم يشرب !!

حليم : ههههه شبيج صوفرتي دنيا تره الوالدة تجفص

رميم : احترم نفسك قليل الادب اجفص شنو وعليمن تغمزلي خلي مرت اخوك تعرفك على حقيقتك شلون صايرلي من حضن لحضن بطلك بايدك وتصبح وتمسي بالملاهي

خليها تسمع وتوصل لاختها العبالها انت كاتل روحك عليها ، والله عمي تفتهم من ما قبلت بيك اثاريها عدها بعد نظر

حليم : هيج من ********** ارتاحيتي هسه من كتيتيهن

دنيا : يمه كزبر جسمي والله كفر كفره خله جسمي كله يرجف

وخالة مقصرت لطمته على حلگه

رميم : شلل بحلگك كون ، شالك الكفرت بي كون تف عليك يا نذل

دنيا : اباوع لحليم صار وجهه احمر مبين غده نار واني سويت روحي كلشي ما سمعت ، حرف واحد ما نطقت

وانوب اني سامعه الجهال تخترع من الصوت العالي وتبجي الا تيم شاف بيبيته لطمت حليم على حلگه اشو هذا خرط من الضحك

هيبة الموقف طارت من ورا حتى واني وخالة ضحكنه على ضحكته

وصلنا لمنطقتنا ، باوعت للفرع وتذكرت بابا ، بدون شعور دمعت عيوني ، حبيبي شكد مشتاقتله ، سودة عليه جان يدك الطريق منا للمحل كله مشي وبالحر تدك بي الشمس وبالبرد يكرص بي الهوى

الف رحمة ونور على روحك يا روحي انت ، ياريتني اكدر انجمع بيك ولو لحظة واخفف ولو شويه من الاشتياق البيه تجاهك

رميم : يله يمه

دنيا : تنهدت ونزلت اني وياها ، اباوع لحليم شخط السيارة وطلع كبل

رميم : تعاي حبيبتي عوفج منه الخبل ، زعل عشتو شلون حجيت كدامج على سوالفه يخاف لا توصلين لزبيدة ،

لعد اذا هيج تحبها وتخاف على زعلها متجر عدل وتمشي مثل الاوادم ، ابن الغبرة حرگلي دمي بهالصبح

دنيا : لتضوجين خالة فدوة لكلبج

رميم : لا يمعودة عليمن اضوج تعودت على سوالفه ، امشينه خلي نطب فشلة واكفين بنص الزلم

دنيا : دخلنا جوه تلكتنا خالة

هناء: هلا وميه هلا تفضلو تفضلو

دنيا : بوستنا واستقبلتنا ذاك الاستقبال الحلو وللمرة الما اعرف شكد هالمره تنحط بنص الكلب على اسلوبها وطريقتها بالتعامل ويه الناس

دخلنا جوه لكينا بيبيتي وامي وبنات عمامي بالمختصر كلها جايه ، سلمت على الكل اني وخالة وكعدنا شويه

لهناك وشفت زبيدة كاعده بالزاويه بس مبين عليها ضايجة ، رحتلها هااا يحلو صباح الخير

زبيدة : كمت حضنتها هلوو صباح النور

دنيا : احجيلي شبيج كالبة خلقتج

زبيدة : كعدت وحجيتلها كل الصار البارحة ، والله من وره حجاية النذل اني للصبح عيني ما غمضت ، تندمت على عدد شعر راسي لان صرت ادميه وساعدته

دنيا : بله صدك تحجين وانتِ سهرانة للصبح وضايجه وكالبه خلقتج علمود هذا السخيف

زبيدة : ولج انتِ ما سمعتي ولا شفتي شلون يحاجيني وكإني فاتحة حضنه ولابده بي

هو زقنبوت ببطنه ساعدته يتسممه هاي امها وهاي ابوها ، سواني اتدحس بي وكاتله روحي عليه عوزه شويه ويسويني راودته عن نفسه

دنيا : والله انتِ بطرانة لج بابا هذا يتعمد يستفزج لبسي وبعدين تعاي اذا همه اهله يكولون عليه مو صاحي يعني همه بالسانهم معترفين انه مو طبيعي واي تصرف يبدر منه مينوخذ بعين الاعتبار

زبيدة : قهرني السافل

دنيا : تره لحيتي

زبيدة : ولج اول مره واحد يحاجيني هيج وداعة امي لوما الدنيا ليل واكول عيب جان جبته براشدي اله اكسر سنونه بحلگه

دنيا : باوعتلها صفح ، دكعدي راحة ياهو هذا التكسرين سنونه بحلگه ، انتِ شايفه جف ايده لو حاجيلج عنه

وحق الله لو يفكر يصفكج راشدي مو بعيده حتى عظام وجهج يفلشهن

زبيدة : حتى اكسر ايده واشيلها اله

دنيا : دعوفج من هالموضوع وفرفشي شبيج عبالك كاعده بعزاء ، هاج باعي الجمال بشرفج لو تدورين العراق كله تلكين هيج كيك

زبيدة : ابتسمت من شفت تيم ، اخذت منها بوسته وعضيته من خدوده وهو اندار وبرطم مأشر لدنيا

تيم : عڤتني

دنيا : يبعد روحي

زبيدة : ضحكت من شفت دنيا باطمت ويا ، بوسته وانطيته الها هاج اخذي ليبجي وسولفيلي وضعيتج شلونها

دنيا : من اي ناحية قصدج

زبيدة : انتِ ويوسف من اي ناحية قابل

دنيا : والله يا زبيدة عادي

زبيدة : شنو هو العادي ، بعد كل هالسنين رجعتو اجتمعتو والوضع عادي ، صدك تحجين !!

دنيا : اي والله اصلا كلش عادي

زبيدة : والله ما اعرف شكلج بس اتمنى متكونين متندمه لان تسرعي بالرجعة

دنيا : حضنت تيم وبسته من راسه ، لتخافين مدام تيم يمي ونفسه يدور حواليه واكدر اشوفه والزمه كل يوم فاني كلش راضية واصلا مستحيل اتندم لان رجعت

____________________________

امين : هاا ولك وين صرت

حليم : جايكم هسه تحضرو

امين : شبي صوتك

حليم : بعدين اسولفلك

امين : خير ان شاء الله ، سديته منه ودخلت للغرفة لكيت ديمة تلم بالملابس ومطيتني ظهرها

تقدمت حضنتها من خصرها وبست جتفها ، هاا كلبي اساعدج بشي

ديمة : دفعته عني ، لا ماعندي شي وعفيه شويه تدنه عني تره جسمي يوجعني

امين : ابتعدت عنها ، احم على راحتج حبيبتي ، جيبي هاي الجنطة خلي انزلها

ديمة : حسيت بي ضاج بس مو بأيدي البارحة رجع تقرب مني واني كوه تحملت ما اتقيئ عليه ، احس نفسيتي صارت صفر

كارهه نفسي وجسمي وكلشي داير مدايري والاهم من كل هذا كامت تلعب نفسي من امين احسه شايف وممصدك لازكلي هاللزكة واني ما احب واحد يلح وياي وهو مبين عليه لحوح

واهتمامه الزايد عن حده بده يضوجني ، احس نفسي محتاجة ارتاح واكعد ويه نفسي وهو هواي ديلح عليه حتى من ادخل للحمام واطول يدك عليه الباب يسألني ليش طولت وخوما بيه شي

تنهدت سادة الجنطة الثانية ، اباوعله دخل اخذ الجنطة الثانية وطلعها بدون ميتقربلي وهذا الافضل لان حرفيًا اني كوه داسيطر على اعصابي واخاف على ساعة انفجر ويبدر مني شي اتندم عليه بعدين

رحت لميز التواليت عدلت فستاني وحجابي ، رتبت مكياجي وانتظرته

امين : يله حبيبتي تعالي

ديمة : اخذت جنطتي وطلعت كدامه وهو اجه اخذ الجنطة الثانية وقفل الغرفة واجه

نزلنا بالمصعد وطول الوقت ساكتين لاهو حجه ولا اني ، وصلنا للطابق الارضي استقبلنا حليم الجفت على امين وبوسه

حليم : الف مبروك حبيبي شايف كل الخير

امين : حبيبي يوم الالك ان شاء الله

حليم : هاا باربي شلونج

ديمة : هلو بيك

حليم : يله امشونه العالم منتظرتكم

ديمة : طلعنا ويا ، طول الطريق هو وامين يسولفون واني صافنه على الطريق والناس

اتمنى لوما صادقت هبه

اتمنى لوما شفت راسل

اتمنى لوما حبيته

اتمنى لوما خنت ثقة ابويه

اتمنى لوما صار الي صار بينا واجينا لهالمنطقة وشفت امين

اتمنى واتمنى واتمنى وياريت لو اكدر احقق وحده بس ، بس وحده من هالامنيات لكن للاسف ادري
الشي الداتمنى مستحيل

وصلنا للمنطقة ونزلنا ، شفت الشباب شلون تلكو امين يبوسون بي ويباركوله بحرارة وهو يبادلهم بنفس اللهفة والحماس ، مبين الفرح يشع من عيونه على عكسي

اباوعله اجه اخذ ايدي بعد مسلم على الكل ودخلنا جوه ، استقبلنا الكل بالهلاهل والجكليت والصلوات

من كل العالم ما جذبني غير امي بحيث اول ما شفتها ركضت ذبيت روحي عليها

وئام : يروحي يبعد كلبي ، شلونج

ديمة : الحمدلله حبيبتي مشتاقتلج

وئام : اني الاشوق بعد عمري والله گلبي عندج صار يومين لا ليلي ليل ولا نهاري نهار

امين : شلونج خالة

وئام : هلا بيك

يله دمدم تعاي ارتاحي بغرفتج

ديمة : لعد خواتي وين

وئام : هنه وبيبيتج بغرفتج جهزنها وعطرتها مرة اللخ وكعدن هناك حتى كبل من تجين هنه يطلعن

ديمة : اخذت ايدها ومشيت وياها ، دخلت لغرفة من الغرف الجوه ، فتحت امي الباب واني دخلت وراها

اباوع لغرفتي ، غرفة بسيطة جداً او حتى اقل ما يقال عنها بسيطة

ما جذبتي ولا حسيتها غرفتي ما اعرف ليش

شفت خواتي اجن عليه يسلمن حضنتهن وكوه سيطرت على نفسي حتى ما ابجي

دنيا : الف مبروك حبيبتي

زبيدة : مبروك دمدم

ديمة : ابتعدت مبتسمة الله يبارك بيكم

دنيا : الف مبروك خوية امين ربي يجعلها زواجة الخير عليكم ثنينكم

امين : رحم الله والديج خويه

زبيدة : مبروك ان شاء الله العمر كله سوه

امين : آمين يارب يسمع منج الرحمن ، شلونج حجية شلون صحتج عذريني والله ما شفتج

حمزية : هلا بعد عمري ولا يهمك حبيبي

ديمة: طلع امين وانتبهت لدنيا تاشر لامي والظاهر اني افتهمت فاخذت بيبيتي وطلعن ، شمرت الحنطة وكعدت على الجرباية

زبيدة : احجيلنا شبيج وجهج يلطم

ديمة : ما تحملت احس كلمة شبيج هيج كل المواجع عليه ، بجيت بحرگه گلب ، مقهورة حيل مقهورة

احس طاقتي مسلوبه ودخلت بطريق ما ممكن إني اكدر ارجع منه واذا حجيت كلها تلومني وتكول هذا اختيارج

دنيا : دمدم حبيبي هسه عليمن هالبچي ، احجي شبيج احنه وياج مو عليج يا گلبي انتِ

مسحت على راسها سولفيلي شنو امين جبرج على شي انتِ متردي

ديمة : هزيت راسي ، لا مجبرني وتقربلي بس مجنت كادره أبعده عني واكله عوفني

زبيدة : ادري متوازية جان كلتيله مو جاهزة خليني اتعود عليك شنو طايرة انتِ

ديمة : وعبالج يعني لو ردت اگله هيج عود حگدر ولجن طول ما احنه بالغرفة اخاف اعترض على شي حتى لا احسسه بشي مو طبيعي

حموت والله حموت لعبانه نفسي وقرفانه من الوضعية الزفت الاني بيها ، عضيت ايدي حيل ااااااه
ااااااه لو ما ناطقتها وگايله ايييي

دنيا : حضنتها ، سوده عليه منهارة فرد مرة ، كسرت خاطري والله

ديمة : اخذوني وياكم عليكم الله والله كلشي ما اريد بس اخذوني منا ، ما اكدر ابقى هنا واضل عايشة هالعيشة

ما اعرف ازيف مشاعري والله ما اعرف حاولت شكد وما كدرت تاليها اليوم كد ما زهكت عطت بالوليد وكسرت بخاطرة وهو ممسويلي شي غير انه اهتم بيه

زبيدة : دهدئي وصلِ على محمد هاي كل تراكمات صايرة عليج وماذيتج ، اهدئي وحاولي تتجنبي هالفترة كليله بعدني ممتعودة عليك

اخذيلج فترة نقاهه وحاولي تتعرفين عليه بلكت تتقبلي حالج حال الي تزوجن تقليدي وعاشن حياتهن
مو اول وحدة انتِ تتزوجين تقليدي فليش هالخوف والسترس الانتِ بي

ديمة : بدموع اني بعدني ما تخطيت يا زبيدة ، الصار بعده يدگ بكلبي

السوا بيه راسل لسه ينهش بيه نهش ، انتن متعرفن اني شكد حبيته ولجن ما حبيت احد كد ما حبيته ولا تمنيت احد كد ما تمنيته تاليته كسرني وشمرني ورا حالي حال قميص قديم عنده

ومو بس هيج ذلني ودمرني وخاني ويه اقرب الناس
الي شلون تردني اتقبل امين واني سوايه راسل لسه تاكل بيه

دنيا : خزرتها اسمعي ديمة هاي هسه حجيتها كدامنا وراح امشيها الج ،مرة ثانية اياني واياج تجيبين طاري هالموضوع حتى بينج وبين نفسج

انتِ خسرتي مرة والله ساعدج ونجاج وانطاج حياة جديدة ايالج هسه تخلين ماضيج ياثر على حاضرج

وديربالج عقلج يخليج متميزين ، تره امين شي وراسل شي ثاني

ذاك بعالم وهذا بعالم ثاني ، ذاك خسيس ونذل ما خاف الله بيج وهذا ماشي مثل الساعة وامه لا اله الا الله كلها تمدح بي وتصيح هنيالج عليه

نصيحة محب لتخسري وحاولي قدر المستطاع تتقبلي ، اعتبري نفسج تزوجتي حالج حال اي بنية
وهاي الفترة هي فترة تعرفج على رجلج

لتستعجلين وانطي لنفسج فرصة

زبيدة : اني ايدها ورغم اني اكرهه جنس ادم بس احس امين يستحق تنطين لنفسج فرصة وتحاولين تتقبلي مهما كان انتو هسه بعلاقة جديه على الاقل حاولو متخلوها تفشل

خصوصاً ماكو سبب يخليها تفشل مدام هو يحبج ومداريج والاهم من كل هذا يخاف الله بيج ويصونج مو يغردج ويعرض بيج

ديمة : غطيت وجهي يربي محد يفهمني والله محد يفهمني لو اكعد احجي منا لسنة محد يحس بالجرح غير صاحبة

تنهدت ومسحت دموعي

دنيا : كومي يله بدلي ملابسج ولبسي فستانج الثاني وذبي حجابج حتى الناس تباركلج عيشي اللحظة يحظي شبيج

ديمة : تعبانه دنيا والله مالي خلك واريد انام

دنيا : ميخالف حبيبتي تحملي لوره الغده واخذي راحتج على مزاجج ، يله زبد تعاي خلي نعوفها ترتاح
ونروح نساعد خالة وبصائر

ديمة : طلعن خواتي واني تمددت ، اخذتلي ساعة متمدده وصافنه

دموعي تنزل بصمت والشهكة معلگه ببلعومي متقبل تطلع ، اخر شي كلت خلي اكوم اتحضر

رحت بدلت وسويت شعري وجددت مكياجي وكعدت شويه واجوي اخذوني سلمت على كرايب امين وكعدت لحد ما اجه الغده اكلت بغرفتي ونمت وهيج مر اليوم

وباقي الايام ركضن بدون ما احس واني متجاهله امين وكل ساعة اطلع حجه وهو عايفني براحتي

____________________________

زبيدة : كعدت الصبح شبعانه نوم ، باوعت للساعة ب6 الصبح

كمت دخلت للحمام غسلت وجهي وبدلت ملابسي ونزلت جوه ، بعد وكت هسه كلهم تلكيهم نايمين يكعدون بحدود السته ونص او السبعة علمود الدوامات

خليت الربطه على راسي وفتحت الباب وطلعت ، واول ما خطت رجليه الحديقة ضرب الهوى البارد وجهي

ابتسمت واخذت نفس افييييش شكد طيبة ريحة الهوى الممزوج بريحة الورد وخصوصاً الصبحيات

كعدت على المسطبه ورفعت راسي للسما اشوف الجمال لو الحمام شلون يطير واحد وره الثاني سبحانك يا الهي شنو هذا الجمال

يعني الواحد شلون ممكن يوصف ابداعك ، صدك جل في علاه ، نحير عليمن نباوع وعليمن نركز اذا هو بس منظر السما الصبح ياخذ الروح

دنكت راسي شفت صاحب بوجهي مبتسم

صاحب : صباح الخير

زبيدة : هلوو صباح النور

صاحب : شعدج كاعدة من الصبح

زبيدة : البارحة امك كعدت تلعب بشعري ونومتني بال10 بالليل وهياتني كدامك كعدت قبل الديج

صاحب : هههه امي حيل تحبج ودائما تسولف بيج

زبيدة : ابتسمت واني هم كلش احبها ، الله يحفظها الك

صاحب : شكراً ويحفظ اهلج

زبيدة : تنهدت ما كتلي شعدك انت كاعد هسه بله اني شبعانه نوم انت شمكعدك بهيج وقت

صاحب : ماكو بس سيارة جدي الجديدة وصلت ورايح استلمها من الوكالة

زبيدة : يا سيارة

صاحب : شبيج الـ****** النزلت قبل اسبوعين

زبيدة : هااا اثاري حب السيارات والهوس بيهن مجان طبع عد بابا وانما وراثة

صاحب : مو بس ابوج ، عدج جدي ، خالي عبدالله ، اني هارون كل احنه نموت على السيارات

تعاي وياي خلي اراويج شي

زبيدة : وين ؟

صاحب : دتعاي

زبيدة : كمت ومشيت ورا لورة البيت ، باوعت للحديقة الخلفية باعجاب ، الله

صاحب : شفتي الجمال

زبيدة : تجنننن هاي مالتمن

صاحب : مالتي ، تحبين اخذج فره بيها ؟

زبيدة : عادي ؟

صاحب : طبعاً عادي يله

زبيدة : لا اني اعرف اسوق ، عادي اني اجربها

صاحب : جوه قندرتج

زبيدة : ابتسمت واخذت السويج ، شغلتها وصعدت ،
دست بانزين وتحركت بيها

يمه احس الروح ردتلي صار شكد مسايقة ، الله لا بوفقك يا مبين هاليوم وكل يوم حرمتنا من سيارتنا ومن كلشي حلو جنه عايشي

ضليت افتر بيها بالحديقة والاجمل انُ حدايق البيت مساحاتهن جدًا ضخمة وواسعة تسوي واهس

ربع ساعة ووكفت شامرة عليه السويج ، كلش شكراً

صاحب : تدللين بنت الخال بس تصدكين ما توقعتج تعرفين تسوقين

زبيدة : جانت عندي سيارة تجنن بس بسبب الظروف اضطريت ابيعها على كل حال شكرًا والله كلش تونست

صاحب : تدللين يابه شوكت ميعجبج تعاي اخذي السويج وتونسي

زبيدة : ابتسمتله بامتنان ومشيت ويا ، ضل يسولف واني ارد عليه

الشي الوحيد الخلاني اخذ راحتي ويا انه محترم وماعنده تصرفات سخيفة عكس حليم بس اضحكلة يكلي احبج

ما احب الرجال الخفيف

دنمشي اني وصاحب ونسولف ومنحس الا المسموم يطلع بوجهنا

الكبر حتى الكبر لهالخلقة مخنزر بالوجوه عود شوفوني والله يا الله

صاحب : هاا هارون خيرك خويه محتاج شي

هارون : سيارتي وين؟

صاحب : بالكراج الخلفي ، الحرس طلعو كل سياراتكم بره علمود السيارة الجديدة مال جدي

هارون : وصلت ؟

صاحب : اي وهسه رايح استلمها واجي ، تبقى تنتظرني

هارون : عندي دوام للاسف ، عود من ارجع

صاحب : براحتك

زبيدة : اباوعله يباوعلي باستهزاء عبالك شو شمسوية هذا شبي لا وكل شويه يرفع ايده يحك بحاجبة

مدري هو يتعمد يراويني الوشم مدري اني المركزة زيادة عن اللزوم وهواي لاحه بموضوع الوشم

صاحب : تدرين زبيدة هارون احسن واحد بهذا البيت

زبيدة : اهووو راح يبدي الصبغ ، شمعنى ؟

صاحب : الوحيد بهذا البيت الماله شغلة ولا اله علاقة ، لا ينافق ولا يحجي على احد عايش منه لنفسه ميدري بالدنيا طشت لو رشت

زبيدة : خطية فقير

صاحب : كلش رغم اليشوفه ميحسه هيج بس هو كلش فقير وانسان بسيط ونيته صافية

زبيدة : تحسست ركبتي وتذكرته من خنكني واجه يموتني ، هو مبين كلش بسيط وفقير

دخلت جوه لكيت جدي وبيبيتي هستوهم كاعدين ، صباح الخير

حمزية : بعد طولي صباح النور ، شعدج كاعدة يمه بهالصبح

النوح : صباح النور ، خليها تكعد تشوف نور ربنا بهالصبح احس ما تضل نايمة

حمزية : هم كولتك ، يله يمه تعاي تريكي

زبيدة : شوكت لحكتي تسوين ريوك هو اني ما صارلي ساعة من كعدت

حمزية : لعد تجيبين فهاوتجن هالجيل المايع لندارتنا ولج بساعة اني اكف بيت كامل مو عاد اتكاسل على بيضات وجاي

كعدي كعدي هاج اصبلج جاي فكي ريكج وتريكي

زبيدة : كعدت اكل واسولف ويه بيبيتي

النوح : احم اكلج ابن عمج شفتي طلع

زبيدة : شربت من الجاي ، ياهو منهم ؟

النوح : هارون

زبيدة : اي شفته

النوح : صبحتي عليه ؟

زبيدة : عفواً ؟

النوح : حجية حطيلي شويه شكر ، شبيج انتِ ثولة متسمعين جاي اكلج خواتج باجر يجن مو

زبيدة : هو انتو مو باجر عازميهن على غده غير باجر يجن

حمزية : اي يمه هو لازم وره سبعتهن نعزمهن هنا حتى رجولتهن يبدون يتأقلمون علينا وتنكسر حواجز الخجل والرسمية بينا وبينهم لو شتكول حجي

النوح : والله يا حجية انتِ لسانج مينطق غير الدرر

حمزية : بعد روحي

زبيدة : وكفت اللكمة بزردومي ، يااا شو ذولة كلبو على الرومانسية من الصبح

شربت جايي بسرعة وفلتت ايييع ما احب هاي السوالف بره شنو وحده تكل لواحد بعد روحي

انعل ابو الانطي روحي عشتو

_______________________________

ديمة : كاعدة يم خالة بالمطبخ هي تعجن واني انظف بالخضرة

هناء : يا حبيبتي عوفي من ايدج لتشتغلين شي بعدج عروس يبعد كلبي عليمن متعبة نفسج

ديمة : ابتسمت شنو السالفة خالة هنه خضروات قابل شمسويه اني وبعدين خليني اساعدج ولو بشي بسيط

هناء : يمه الف الحمدلله من جعلج من نصيب وليدي
بعد كلبي لو هيج الجناين وجوه وطباع تفتح النفس لو ميرادن

ديمة : ابتسمتلها حبيبتي خالة ، كمت نكعت الخضرة بمي وملح

اكول خالة لعد بصائر شنو لسه نايمة

هناء : اي والله سودة عليه البارحة نامت ب3 الصيدلة هدت حيلها تقره وما ملحكه وهاي شوفة عينج غاديه جلد وعظم من الدراسة

ديمة : الله يعينها ويساعدها خطية بعد لتصخريها بشي فدوة اي شي تحتاجي تعاي كليلي هي تعبانة خطية

هناء : الله يوفقج يا ديمة ويرزقج بالذرية الصالحة مثل ما رزقني بيها بحق الحبيب محمد

ديمة : حبيبتي خالة ، كعدت اساعدها بالغده علما اجه اسلام وكعدت بصائر تغدينه وكل واحد رجع لمكانه

خالة نامت واني كعدت انتظر امين لان ما اعرف شوكت يجي واليوم اول يوم يروح للشغل من بعد زواجنا ، شفته تاخر فكمت اعزل بالغرفة ، رتبتها وعزلتها ، اخذت المعطر عطرت الغرفة وطلعت ملابس لامين حتى من يجي كبل يسبح وينامله ساعة ويطلع للمسلخ

دارتب بالفراش وما احس الا احد يحضني ، صفنت شويه واستوعبت الموقف

امين : الله يساعدهم

ديمة : انداريت عليه ، اباوعله طاب بالحذاء للغرفة ملابسه كلها تراب وطين وجهه شحاله من الشغل

انوب انتبهتله دنك يريد يبوسني مدري ليش لعبت نفسي من منظرة ودفعته بسرعة

امين : شبيج ؟

ديمة : هاي شنو امين صدك بله تحجي طاب للغرفة بحذائك وملابسك كلها ريحة تراب وطين لا تطاق
واني هستوني منظفة الغرفة ومعطرتها

لو ادري هيج تدخل للغرفة مجان نظفتها وبعدين اني مو عازلتلك ملابس ليش متاخذهن وتروح گبل للحمام

كاعد تشتم ريحة الغرفة شلون صارت عبالك كاعدين بالشارع ، هاك هاي الملابس روح بسرعة اسبح علما احضرلك الاكل

اباوعله صفن بوجهي ورفع اديه مسحهن بقميصة ولزم الملابس باطراف اصابعه

امين : اا اسف ما ادري طبتي للغرفة هيج راح تضوجج بعد ما ادخل وملابسي خليهن الي بالحمام حتى على كولتج ما ادخل واوصخ الغرفة

ديمة : اخذ الملابس وراح واني طلعت احميله الغده
حميته وكملته ، انتظرته يطلع حتى اصبله

اباوعله طلع بس توجه للغرفة ، امين وين رايح تعال تغده

امين : عاشت ايدج ما اشتهي اريد انام وبالمناسبة جدج خابرني وعزمنا باجر على غدة يمهم

ديمة : عوفك من جدي خابرتني بيبي كلتلي ، ليش مراح تتغده تره شفتك الصبح متريكت ممعقولة حتى غده متتغده

امين : كتلج ما اريد

ديمة : عافني ودخل ساد الباب ورا

تنهدت ماسحه على رأسي وكعدت وحدي بالمطبخ وهيج مضى اليوم لحد ثاني يوم

صادف خميس ، كعدنا الصبح وتجهزنا حتى نروح لبيت جدو ، وصلنا ولكينا دنيا قبلنا هناك هي وبيت عمو يحيى

رحت بوستها هي وزبيدة وكعدنه

دنيا : شلونج

ديمة : الحمدلله زينه

زبيدة : وضعيتج شلونها بعدها نفس الشي

ديمة : محاولة اتعايش ، شبيج دندون شو وجهج اصفر

دنيا : والله ما ادري شو كعدت مالي خلك اليوم

ديمة : خاف حامل ؟

زبيدة : شوف هاي البطرانة

دنيا : ضحكت لا يمعودة مو حامل بس تعبانه شويه بواسطة هالاسبوع كضيته دوام ومن ارجع ابقى ويه تيومي فداتعب لان بعدني ممتعودة

وعلى طاري تيومي خلي اكوم اجيبه واجي ليغافل يوسف ويشرد ، كمت طلعت بره لكيت يوسف خاله بحضنه

يوسف انطيني تيومي اخلي يمي لغافلك ويكوم وهم حتى اوكله

يوسف : لا عوفي كاعد وساكت على الهوى ولتخافين ستوني انطيته بسكت يعني شبعان

دنيا : اوك ، مسحت على راس تيم ومشيت داخلة لجوه

حليم : لحظة دنيا اوكفي

دنيا : انداريت عليه هاا حليم كول

حليم : عادي شويه تجين

دنيا : طلعت وكفت يمه ، خير شبيك هيج مرتبك

حليم : اريد اسألج سؤال بس بداعة تيم عليج لتجذبين عليه

دنيا : لا وداعة تيم ما اجذب عليك اسأل

حليم : ذاك اليوم الموضوع الحجت بي امي بالسيارة خوما وصلتي لزبيدة تتذكري مو

الله عليج خوما سولفتيلها تره صارلي سبع ايام ليلي ما نايمة وجم مرة ردت احاجيج واستحي فالله يخليج اذا حاجيتلها شي كليلي حتى اروح

دنيا : لا والله لا حجيت ولا جبت طاري ، اصلا الموضوع بساعتها طلع من راسي وحتى بيني وبين نفسي ما فكرت بي

حليم : ذمة بركبتج مو توصلين السالفة لزبيدة اني من غير شي مأيس منها وباقي متأمل على يوم ممكن الله يكتبلي نصيب وياها فاذا انتِ كلتيلها على موضوعي وحق ربج سلام بعد متسلم عليه

دنيا : حليم بغض النظر عن انُ زبيدة اختي بس صدكني انت وزبيدة متتوالمون وهي من البداية ماخذه قرارها بخصوص هالموضوع يعني سواء حاجيتلها اني او محاجيتلها مراح يشكل فرق عدها

لانها اصلا معدها مشاعر تجاهك فياريت تحاول تكمل حياتك وتشيلها من بالك وصدكني زبيدة لو تريدك من البداية جان اجت وكلتلك

بس الظاهر هي اصلا مخاله الموضوع ببالها ويفضل انت هم تشيل هالموضوع من بالك وتشوف حياتك بعيد عنها حتى لا انت تتاذه ولا تاذيها وياك

عفته ومشيت داخلة جوه وويه دخلتي صار هارون كبالي

هلوو هارون شلونك

هارون : گ***

دنيا : من سمعت الكلمة الكاها ضليت باهته بوجهه ، هاي وياي

هارون : كلجن گ**** انتِ وخواتج كلجن ساقطات
ونكستن البيت

دنيا : انت شبيك شهالحجي السخيف هذا ، ششايف علينا انت ؟

هارون : كلشي شايف وابسط شي موقفج هسه ويه حماج ، نگسه

دنيا : ما نكس الا انت يا منحط بالسانك دتكولها حمايه يعني اخوية

هزيت راسي الله يعينك على نفسك المريضة اعوذ بالله منك ومن امثالك محد دمرنا غير تفكيركم السز
دمرتو العلاقات البريئة وشوهتو شكو شي على حب الله بسبب تفكيركم المريض

حسبي الله ونعم الوكيل عليك وعلى كلمن يرمي محصنات

عفته ومشيت بس شنو دمي فاير ، دخلت للمطبخ ما لكيت زبيدة ولا ديمة ، صعدت فوك وطبيت لغرفة زبيدة لكيتهن كاعدات

زبيدة : ها ولج شبيج شو وجهج كلب كركم فرد دور

دنيا : سكتي عني زبيدة اعصابي تلفت

ديمة : شبيج دترجفين

زبيدة : صبيت مي وشربتها ، هاج شربي واهدي ، شبيج

دنيا : ولج جنت واكفه اسولف ويه حليم بره ودخلت شفت هارون بوجهي وو ..... سولفتلها كلشي

اباوعلها فتحت عيونها على وسعهن

زبيدة : هو كلج هيج ؟

دنيا : مسحت دمعتي اي والله ولج هيج عينك عينك تهمني باطل ونزل عليه فشار اريد اعرف شنو شايف عليه وحاجاني هيج

اباوع لزبيدة ويه مكملت جرت حجابها وطلعت تركض

ديمة : عزه ولج هاي بس لا تروح تسويلنا هوسه

دنيا : نزلنا نركض وراها ، زبيدة يمعوده اوكفي يوووو لو اعرف فلا احجي كدامج

المسودنه نزلت تهبد على الدرج ، نزلنا وراها وصار هارون كبالنا كاعد بالصالة وكدامه صينية اكل وكاعد يتغده

اباوع لزبيدة ركضت جرت طاسة التشريب الحارة وشمرتها على صدرة خلته يكوم من مكانه بسرعة

هيام : ياااا ياااا ولج لييييييش

حمزية : عزه العزاج زبيدة هاي ليش هيج

دنيا : على صوت صياح خوات هارون وامه طبو الكل لجوه

هارون مجان عنده اي ردة فعل بارد بشكل ولا چنه انجوه وزبيدة واكفة كدامه وكلها ترجف

زبيدة : اسمع ولك ما گ*** الا نسوانكم وما ساقطات الا المعاشرهن اني وخواتي اشرف منك ومن عشرة گبالك

وشرفنا يسواك ويسوه كل واحد يشد على ايدك ولك احنه عشنا ايام نكلي طماطه وناكل وياها خبز بايت وشحالة في سبيل منمد ادينه لاحد ولا نطلع عن الطريق

تالي تجي انت الزبالة تكول علينا گ**** والله ما گ*** الا امك وخواتك لان الظاهر شايف عليهن شي وعبالك كل النسوان مثلهن

دنيا : اباوع لهارون بدون ميجاوبها رفع اصابعه وسوالها حركة سخيفة بأيده

وزبيدة بنفس اللحظة تفلت بوجهه وهو بدون سابق انذار لزم راسها ورگعه بالطبلة الكزاز

سمعت اصوات شهكات تتعالى بالصالة ، نزلت عيوني وشفت دم زبيدة يتناثر بالصالة

يمه اني منا جايه متخربطة وانوب شفت الطبلة الكزاز منگعة بدمها ، ما احس الا يغمى عليه من هول المنظر

ما فزيت الا على ريحة عطر قوي يدگ براسي ، فتحت عيوني لكيت روحي بحضن يوسف

يوسف : هاا دنيا

دنيا : كمت من حضنه مخروعة وفاحطة من البجي ، يوسف يوسف زز زبيدة راح وجهااا راااح دمها نكع الصالة كل من ورايه انيييي كله من ورايه

يوسف : اهدي اهدي هاي وياها زبيدة وراج والله كلشي مابيها انداري عليها شوفيها

دنيا : درت وجهي لكيت زبيده كاعدة وراسها كله مشدود من ناحيه الجبهه ولحد الشعر كله هذا مضمد
ووجها اصفر وحلكها كالب ازرك

ركضت حضنتها وبجيت ، سوده عليه كل من ورايه صوجي اني شجايه وحجيت

زبيدة : اهدي يكلبي والله ما بيه شي شوفيني كدامج جني ورد

دنيا : اكيد اكيد انتِ زينه ديمه عليج الله زبيدة زينه

ديمة : والله العظيم زينه ستوه خيط راسها الدكتور لتخافين عليها

النوح : حمزية جيبي زبيدة وتعاي للاستقبال بسرعة

حمزية : نوح البنية مابيها حيل روحها

النوح : كوميييييي كلتتتتتت

دنيا : اجت بيبي وامي اخذن زبيدة ، حاوطنها ومشن وياها واني لحكتها بس وكفني جدي

النوح : اوكفي انتِ وامج بس حمزية تدخل ويه زبيدة

وئام : تردون تموتهاااا حرام عليكم خافووو الله كافييي خلوني اخذها واطلع منا لو ميته الربببيح بيكم

النوح : سدييي حلگج الميطلع بس الحجي السخيف وعوفي البنيه انتِ مو احرص منه عليها

يله حمزية جيبي البت وتعاي

زبيدة : دخلت ويه بيبيتي للاستقبال ، اباوع لعمي عبدالله ومرته كاعدين وذاك الجلب كاعد ولازم موبايله ولا كإنما سوه شي

عمي من شافني ضرب على فخذه وعض ايده

عبدالله : ااااخ منك هارون اااخ وتاليي ويااااك انييي وتاليييي عساني ميت ولا اشوف امانة اخوية يشوهه ابني بهالطريقة

النوح : ما اريد صوت اني جبتكم هنا حتى نحجي بالمهزلة الصارت قبل جم ساعة

اسمع هارون وهاي اني احجيها كدام امك وابوك وبيبيتك وبت عمك شاهدة

من انت طفل واني اتغاضى عن كل اذيه تسويها ، انت تخرب واني ابني وراك ، انت تأذي واني اجي اطمطم وراك

كل سوالفك الطايح حظها اني تغاضيت عنها بس من توصل بيك تتجرا تمد ايدك على بنات ابني اني اكلك
اوكف لهنا وبسسسس حدك واكسر ايدك

هيام : بس عمي هـ

النوح : انتِ سكتييي اني جبتج هنا تسمعين مو تحجين افتهمتييي

وانت الثاني اني سبق وحذرتك باخر مرة وكتلك هاي اخر فرصة الك بعدها ما راح اسكتلك وراح تتعاقب حالك حال اي شخص بهذا البيت

ولهذا مثل ما انت شوهت بنت عمك وخربت ملامحها
فأنت الراح تتحمل المسؤولية وتتزوجها

زبيدة : شلون شلون

**************************************

لهنا يكون خلص البارت الاخير من الجزء الاول ان شاء الله يكون عجبكم ، ياريت لو كان هالجزء شي ممتع ومفيد الكم جميعاً وان شاء الله تكونون استفاديتو واستمعتو ويه ابطالنا

موعدنا ان شاء الله بالجزء الثاني المليئ بالاحداث الجميلة والرائعة بعد عمليتي بأذن الله + مو تنسون تندعولي 😁❤️

اتمنى ما اكون قصرت بسرد الرواية مثل مقصرت بالالتزام بالتنزيلها بسبب ظروفي واتمنى تكون عجبتكم وحبيتوها

كتبولي اذا تحبون اسوي بارت بي كم مشهد من الجزء الثاني او لا

اتابع تعليقاتكم ❤️

اما بخصوص الجزء الثاني فموعدنا قريب ان شاء الله

كل الحب والاحترام

اختكم براء الموسوي ❤️