الموت الحي الفصل الخامس وأربعون 45 - بقلم براء الموسوي

مرحبا حبايبي العسل شلونكم ❤️❤️

••••••••••••••••••••

التضحية هو بدابة الطريق لخسارة الذات

••••••••••••••••••••

#الموت الحي
#للكاتبة براء الموسوي

ديمة : كاعدة بره ولازمة راسي احس جسمي صار خيوط اريد اوكف على حيلي وما كادره

موقف هارون وهو يلزم راس زبيدة ويركعة بالطبله ميروح من بالي

منظر زبيدة وهي غايبه عن الوعي وملامحها مختفية من كثرة الدم المنتشر على وجها يقشعر الجسم

وهذا الحقير مردلي گلبي مرد من شافها اغمى عليها واندار ماشي لا وبكل قساوة وحقارة داس على ايدها وعبر ولا كإنما مسوي شي

والله العظيم احس رجله داست على گلبي مو على ايدها ، رفعت راسي للسما وبجيت

ياربي احنه الى متى نبقى نعاني هيج ، جم سنة مرت علينا واحنه نعيش يوم واحد زين وعشرة لا ، تعبنا ياربي والله تعبنا

حسيت باحد يوكف على جانبي ، درت وجهي لكيته امين ، اباوعله قدملي منديل قماش

امين : مسحي دموعج واهدي

ديمة : من سمعت نبرته زادت دموعي ، هذا الثاني مدري شبي ويايه من البارحة يحاجيني من ورة خشمة وكلما احاجي يرد عليه ببرود

اباوعله كعد يمي ورفع ايده بتردد وحضني واني عبالك واحد وداس على جروحي ، حضنته وبندت من البجي

امين : كافي يا حبيبتي شنو السالفة مو هاي زبيدة كدامج قبل شوية كعدت وكلشي ما بيها
على كيفج ويه روحج يا روحي انتِ لتتخربطين ويختل سكرج

ديمة : منظرها مديروح من بالي امين ، ابتعدت واشرتله على راسي ، باوع هذا هارون فلش راسها بالطبله

دمها ترس الصالة ترس خشمها وحلكها وراسها
كلهن ينزفن حرنا شلون نتعامل وياها لوما ستر الله وركضوا الولد جابو الدكتور جان هسه هي ميتة لو رايحة بغيبوبة بسبب ذاك النذل

امين : خلص اهدي وكافي بجي ، جدج رجال حقاني اكيد ما راح يسكت على الصار بزبيدة واني متاكد راح يحاسب ابن عمج وياخذ حقها من عيونه

ديمة : بـ... ، سكتت من سمعت صوت صياح جاي من جوه ، كمنه اني وامين نركض دخلنا لكينا باب الاستقبال مفتوح وصوت الصياح الجاي راجع لمرت عمو عبدالله

دخلنا للاستقبال لكيناها تعد وتصف على زبيدة بس الفاجئني زبيدة اختي ضامه اديها وتباوع عليهم باستهزاء ولا كإن هي صاحبة الموقف

النوح : عبببدالله اذا متسكت مرتك احشر رصاصة بزردموها واسكتها للابد واقسم بمن نزل القسم اسويها و ولا يرفلي جفن وانت تعرفني

عبدالله : كافييي غضب ااالله علييييج سديييي حلكج لا بارك الله بيج وبلسانج

هيام : اسكتتتت تريدنييي اسكت على هالمهزلة هايييي ، انييي اخذ بت ياسر لابني من عمتتت عيني كووون

حمزية : ابنج شنو هذاا يمه ، لتنسين نفسج انتِ هنااا چنه البزر بزرنا واحنه ويا نتجازة انتِ تنجبين وتخليج خارج قوس

هيام : اخلي نفسي خارج قوس في حال لو جانت البنية الاختاريتوها مو بنته لياسر ، شنوو نسيتو ياسر شسوه باختي وشلون هجم بيتنا وشوه سمعتنا انييي وخواتييي اذا ناسييين اني اذكركم

ديمة : كلامها خلانه صافنين ، شنو هارون ياخذ زبيدة وشنو ياسر سوه باختي ، يا ترى شنو الصاير وهاي ليش دتبجي ومنهارة هيج

اباوع لجدو ويه ما حجت هيج ضربها على حلكها

النوح : انييي جممم مرة كلتتت هذا الموضوع ما اريييده ينفتتتتح بنتتتتت النعال بنتتتتت الكلب تفتحيين دفاتر عكتتتتك لييييش

هيام : عمي ابوس ايدك تعال حتى رجلك ابوسها كلشي سوي واني هذا حلكي اصمه وحرف ما انطق بس هالشغلة اتركها النبي عليك كلشي ولا بيت ياسر ما اريد يرتبطون بيه بأي شكل من الاشكال والله احركها لروحي اذا بنت ياسر اخذت ابني

النوح : عندج نفط وجداحة لو اصيح للحرس يدبرولج

ديمة : اباوع من جاوبها جدو كعدت بالكاع وكامت تلطم وتخرمش بوجها وصوت بجيها يكطع الگلب

ولدها وبناتها خطية ركضو حضنوها ويحاولون يسحبون باديها حتى لتاذيها نفسها

الا هارون واكف وره عمي عبدالله وما ابدى اي ردة فعل مجرد واكف ويتابع بصمت

زبيدة : اباوع للوضعية السخيفة الكدامي ، حرفياً حسيت نفسي اريد اتقيئ من لعبان النفس الجاي اشوفه

واني منا شلون احب الدراما اموت عليها ، تنهدت بملل وحجيت حتى انهي هالمهزلة

على كيفج عيني على كيفج يگلبي راح تموتين روحج من البجي واللطم حريمة كل هالمجهود هذا لو ضامته لمحرم اشرفلج

ليش كاعدة تهوسين على شي منتهي من الاساس ، كاعدة تلطمين وابني مياخذ زبيدة وكلشي ولا بنات ياسر

ليش يمه منو كلج بنته لياسر ترضه اصلا تباوعلج ، اصحي على نفسج اني زبيدة ياسر لا انتِ ولا ابنج ولا بيتج كله هذا اني اشتري بزبانه واني اصلا الما اقبل اخذ واحد منحط ومخبل مثل ابنج

عايزني اني شكول شكول ياهو الاغبر لافي عليه ، هارون ياخذ زبيدة مو تايهتلكم اني وبكيفكم تقررون عني

النوح : انتِ سكتييي

زبيدة : ليش يمه الكاعدين تحجون عنها هاي اني لو كرايبي احجيلي خاف اكو وحدة غيري اسمها زبيدة واني ماخذتني الحمية وكاعدة ادافع عبالي تحجون عني

اسمعني زين جدي اني انفرض عليه اجي لهنا واكعد وياكم غصبًا ما عليه تلبية لوصية ابوية ، مشيت على قوانين تافهه ما الها اي داعي وكلت ميخالف بيت جدي واني عايشه عدهم غصباً عني امشي بقوانينهم
واتعايش وياها

لكن من يوصل الموضوع انكم تتحكمون بحياتي وتقررون عندي وتختارون إنُي اتزوج هذا والله شنو شوهني ولازم يصحح خطأه ويتزوجني

شهالحجي الماصخ هذا ، سلعة اني واليخربني ياخذني ، بدال ما تشد على ايدي وتكلي امشي جدي اشكتي على هذا الحقير ودخلي سجن واخذي حقج من عيونه

جايني تكلي تزوجي والله لو على كص ركبتي ما اقبل انييي زبيدة اخذ هذا المخبل من عمت عيني كون ولا شفت بعد

حمزية : تكسرين حجاية جدج ولج

زبيدة : واكسرها شنو يعني كلام جدي أمر سماوي حتى التزم بي وما اكسره

اباوع لجدي رفع ايده حتى يضربني ، لزمت ايده قبل لتوصل لوجهي

النوح : تلزمين ايدي ولج !!

زبيدة : ايالك جدي ايالك تفكر تمد ايدك عليه تره صدكني اني مو مؤدبه مثل ما مبين عليه وكلشي ممكن يطلع مني فلتخليني اتصرف وياك تصرف يجردني من تربيتي واحترامي لذاتي

ويه ما كتله هيج رفع ايده الثانية وصفكني راشدي بكل قوته وعلى اثر ضربته الي تعالت اصوات الكل بالاستقبال

النوح : يله بلع راويني شراح تسوين

زبيدة : شديت على فكي وصار ابوية كبال عيني ضغطت على ايده اللازمتها ونزلتها

المشكلة انت ابو ابوية وهنا الطامة الكبرى لو اريد انفذ الي براسي راح اغضب ابويه واني ما اريد ااذي وهو بكبره

نترت ايده وطلعت من الاستقبال بسرعة

ديمة : طلعت زبيدة تركض لفوك واحنه لحكناها ، اباوعلها ركضت لغرفة ماما ودادا ، فتحت الباب ودخلت يم دادا ام حسن الي جانت كاعدة وتقره قران في سبيل تبرد السالفة ومتصير مشاكل

لكن الظاهر ارادة رب العالمين جانت بهاليوم متتوافق ويه دعاء دادا

ام حسن : ولج يمه سودة بوجهي شصعدج فوك لو واكعة ومفتوحة خياطاتج

دنيا : غبييية ومتفتهممم صعدت تررركض وهي ما صارلها غير جم ساعة من طالعة من المستشفى
شهالتسيب الانتِ بييي لو مغمى عليج وواكعة
تردين تموتينا انتتتتِ

زبيدة : اششش انتتتتِ اششش سكتتتي ، انداريت على دادا سمعي دادا راح اسألج سؤال وديربالج تجذبين عليه

السبب الخله جدي يطرد ابوية من البيت ويتبرى منه اله علاقة باخت هيام لو لا

ام حسن : ها

زبيدة : لتسويلييي هااا كليلي لو اييي لو لااا ، اباوعلها هزت راسها

لزمت ركبتي احس الهوه ضاك بصدري ، باوعتلها وباوعت لخالة وئام الكامت تبلعم ، هسه تحجلي شنو الصار بين ابوية واخت هيام لا قسمًا بالله اروح اخذ هدومي واطلع منا وبعد متشوفون وجهييي الى يدم الدين

وئام : زبيدة اني حالفة لابوج على كلام الله ما اجيب طاري هالموضوع وما اكدر اكسر حلفاني

ام حسن : واني هم وروح الحسين ، ولج يمه شلج بهالسالفة انتِ موضوع راح وانتهى تنبشين بي لييش

زبيدة : يا راح وانتهييى انتِ صدك تحجين هاي وئام دكت ولطمت لمن كال الله بس شهالموضوع الشنيع اليخلي وحدة توصل لهالمواصيل

احجنننن فضنييي ، هيج صارت متقبلن تحجن مو لعد على راحتجن بس لتلومني على الراح يبدر مني

ديمة : اوكفي زبيدة وييين موليه

زبيدة : وخرريييي ، فتحت الباب وصارت بوجهي عمتي بدرية

بدرية : لترحين وطبي جوه واني احجيلج

زبيدة : هاا

بدرية : مو تردين احد يحجيلج السبب الخله جدج يطرد ابوج من منا ، لعد كعدي واني مستعدة احجي كلشي بس بشرط

زبيدة : وهو ؟

_________________________________

امين : كاعد وعيني على حليم اليروح ويجي وكل شوية راكع الكرسي الكاعد عليه يوسف دفره

يوسف : دكافييي هي حيوان عوف الكرسي راح تجي رجلك بكلاتي

امين : شبيك تلوج متكعد تره وترتنا

حليم : اي حقكم مو هو الايده بالماي مو نفس الايده بالنار

يوسف : افتهمنا بيك تحبها بس مو هيج العالم حست عليك فشلتنا حتى الحرس البره درو بيك

امين : مفضوح غير

حليم : شتريدني اسوي يعني اكعد واخلي ايدي على خدي

امين : ما كنالك خلي ايدك على خدك بس هم مو تفضح روحك هيج ، شلون تجيت على الرجال لوما الله ساتر واني ويوسف ساحبيك جان صارت دمايه بينك وبينه

حليم : انت ما شفته ، الدنيا مشتعله وحظرة جنابه كاعد يدخن ويشرب جاي ، كاعد بكهوة ابن النعال !!

يوسف : مو بس انت شفته كلنا شفنا بس منكدر نتدخل بوجود الكبار جد البنات وعمامهن وابوية موجودين منكدر ناخذ اجراء ويا ونزيد المشكلة

اني لو عليه وداعة ابني انطي بوكس اخلي وجهه بعلباته بس ما ردت ازيد الطين بله وهي اصلا السالفة عالكة بينهم وبين ابوية

حليم : اااخ اااخ كون يطوني يا نص ساعة بس نص ساعة يلاخلي حتى **** يخيطو

امين : انجب واحجي عدل لك شهالحجي السخيف هذا مو طفل كاعد يمك ليسمعك ويعيد وراك

حليم : دسكت انت اني وين وانت وين

امين : اباوع لحليم اندار على البلكون وكام يستغفر
درت وجهي شفت هارون واكف بالبلكون يباوعلنا وبايده شي ما كدرت اميزة

وهو من شاف عيني على ايده قدمها وشمر البيها ، لزمتها بسرعة طلعت ثلجه جبيرة ، اباوعله اشرلي على خدة وعلى حليم ودخل جوه

فهمت قصده يريدني اخلي هالثلجة على مكان الضربة الضربها لحليم

حليم : شلون يخليني اصعد هسه انعل والديه

يوسف : الظاهر اني الراح اصعد اادبه واعرف وين اخليله هالثلجه

امين : صلو على محمد يمعودين تره مبين جاي يحاول يستفزكم حتى تتعاركون وتزيد المشكلة
هذا مو صاحي عوفو

حليم : بسيطة هذا شاربي ازينه اذا ما ربيته

___________________________

زبيدة : كلبت عيوني من شفتها خلت القران كدامي

بداية : اريدج تحلفين حالج حال خواتج السالفة الراح احجيها ما اريدجن تجيبن طاريها كدام احد من اهلنا
لان الموضوع يوجع ومحد عنده القدرة يتذكرة

زبيدة : خليت ايدي على القران وحلفتلها ما احجي
يله عمه طربينا

بدرية: سمعن

بيوم الايام التعيسة جنه نايمين حالنا حال العالم وما كعدنا غير على صوت الصياح اليجي من بيت عمي
عبد القادر ( ابو هيام)

فزو اخوتي وابوية يركضون لبيت عمي حتى يفتهمون شنو سبب هالصياح ، احنه كل عقلنا احترك احد بيتهم لو ماتهم عزيز

طلعنا وره ابوية واخوتي ومنشوف غير ولد عمي عبد القادر نايمين على بنية بالطرمة ويخنكون بيها ومرت عمي وبناته يصرخن

ركضو اخوتي جرو الولد عن البنية لهناك وطلعت البنية الجانو يخنكون بيها اختهم الصغيرة زهراء

انوب ابوية شاف زهراء بهالحال گلب الدنيا على عمي وولده حتى ضرب ضرب اخوتها

ديمة : يستاهلون شنو يتقاوون على بنية لا حول ولا قوة

دنيا : اكيد اكو سبب مستحيل كل هالتعنيف يكون اعتباط

زبيدة : كملي عمة شنو السبب الخلاهم يضربوها هيج

بدرية : زهراء بذاك الوكت جانت مدلله وتتمجعص والوحيدة جانت بين خواتها من تجيها الشهرية توصل بيها حتى تموع روحها من الوجع

وبيومها اجوي اهلها ولكوها مغمى عليها كل عقلهم عبالهم مثل كل مرة من الالم مايعة روحها واخوتها خطية شالوها وركضو بيها للمستشفى

لهناك يعمه ويحللولها وتطلع حامل وعليها شهرين وهي اصلا ما متزوجة

ديمة : لطمت على صدري عزه العزاني لعد شلون حبلت اذا ممتزوجة

زبيدة : لا اله الا الله ديمة انتِ دماغج شمحشه متكليلي

بدرية : ديمة زهراء غلطت ويه واحد وللاسف نتيجة هالغلطة حبلت

دنيا : زين وبعدين عمه شصار

بدرية : الي صار اخوتها طلعوها من المستشفى وجابوها للبيت كطعوها تكطع يردون يفهمون منو الغلطانة ويا وهي رافضة تنطي اسمة

وكلتلهم كتلوني وما انطيكم اسمه وهمه من شافوها هيج رادو يكتلوها لوما أبوية واخواني يلحكون على اخر لحظة

وهي من شافت ابوية ركضت عليه وتحامت بي والله رغم غلطها بس مردت كلوبنا شلون جانت ترجف وتبجي ودمها بطولها يشرح الوضع الشنيع الواصلتله

زبيدة : وجدي شسوه

بدرية : شيسوي يعني بنت اخو طفلة وتحامت بي قابل يعوفها

وكف بوجه عمي وولده وكلهم زهراء اني اتحمل مسؤولياتها وابو الطفل راح يعرفه ويخلي يتزوجها غصبًا عنه وياخذها ويروح حتى لا ننفضح وتدري
بينا العشيرة وساعتها يسقط احترامنا امام الناس

وهنا هو داس على الوتر الحساس مالت عمي وولده
خصوصاً بذاك الوكت جانو اهل أبوية ناس اصحاب ديوان وهيج فعل تنزل راسهم أمام كل العشيرة وهمه ولد شيوخ

فاضطرو يخضعون للامر الواقع وانطو لابوية مهلة اسبوع في سبيل يلكه النذل لضحك على عقل زهراء

وابوية كلهم تم واخذ زهراء وجابها لبيتنا وما قبل اي واحد بينا يتعرضلها ، كعد وياها وحاول قدر المستطاع يطمنها ويخليها تحجي وتعترف منو ابو الطفل

لكنها رغم كلشي جانت رافضة تنطق بحرف ، شكد حاول وياها ابوية بالشده ، بالين نفس الشي

البنية جانت غريبة كل التكوله انها متكدر تحجي بس تكول اسمه يذبح ابنها

شكد حجه وياها ابوية وكلها انتِ بحمايتي ومحد يكدر يوصلج بس عبث ما جانت تقبل تحجي

زبيدة : وتالي شنو صار

بدرية : طلبت من ابوية يحميها من اهلها وميخليهم يذبحوها ، كلت لابوية شردني خلي اعيش اني وابني
وكلشي ما اريد منك بس ابوية ما قبل يشردها لان هيج يكون ارتكب جريمة بحقها

بكل الاحوال لو وين ما راحت اهلها واصلين وحي على الصلاة راح يلكوها لو تنضم بسابع كاع خصوصاً عمي بذاك الوكت لواء ومحد يكدر يكله على عينك حاجب

المهم ضلت زهراء عدنه 3 ايام بس جنها مخبله تكعد بالليل تصرخ وتصيح لتذبحوني ، خطية وصلت لمرحلة نلكاها كاعدة تضحك ويه روحها جنها مسودنه

مشت الايام وصارن الـ3 ايام 5 والمفروض ابوية ينطي اسم ابو الطفل لعمي بعد يومين مثل ما وعده
لكن للاسف ابوية وصل لمرحلة عجز يحصل شي من زهراء وهم ميريد ادين اخو تتلطخ بالدم وتتدمر سمعته بين الناس

فجمع اخوتي وطلب من ياسر بالتحديد يجذب على عمي ويعترف هو الغلطان ويتزوج زهراء فترة ويطلكها

زبيدة : وشمعنى ابوية بالذات مو عنده 5 ولد لو ابوية الحايط النصيص

بدرية : ابوجن الوحيد الجانو ممكن يصدكون انه ابو الطفل لان عبدالله وفؤاد ماخذين هيام ومنال خوات زهراء فمستحيل يكونون همه الغلطانين وياها

وعمجن المرحوم جان مستشهد بوقتها وفاضل جان طالب كلية ويدرس بغير محافظة ومنشوفه بالسنة حسنة فابوجن الصار بوجهه المدفع

زبيدة : هذا ابوج شنو من بشر شلون يحط ابنه بهيج موقف اكو واحد يتهم ابنه هيج اتهام باطل والله شنو حتى يحافظ على كرامة اخو

لعد وكرامة ابنه شنو !! من ياخذ وحدة زانية ويسجلهت بأسمة شلون راح يكدر يرفع راسه بين اخوته وجهالة وهو متزوج وحدة مو زينة

بدرية : للاسف يا بنتي ابويه دومة خالنه كبش فداء ، اهله بالمرتبة الاولى واحنه مجرد سلع هو اليقرر عن كل واحد بينا شيسوي وميسوي عمره ما اخذ رأينا بشي دومة يحجي واحنه الننفذ بدون جدال

وخصوصاً ابوجن لان جان طيب ويخاف الله وميعصي امر لابوية وامي توقع الحجي انه ممكن يكدر يضغط عليه ويخلي ينهي هالمشكلة مثل ما جبره ياخذ مرت المرحوم ودمره ودمر وسيلة ويا

دنيا : زين عمة وبابا شسوة

بدرية : گلب الدنبا گلاب ابد ما انسى وكفته بالصالة يصيح ودمعتة على خده كدام الكل

يكله يابه انت شالتك الغيرة على بنت اخوك وما شالتك الغيرة عليه ما كلت باجر عكبة هذا عنده جهال شلون راح يحترمو وهو بعينهم زاني وضاحك على زعطوطة ولاعب بعقلها

تراضها عليه اتحمل ذنب مو ذنبي ليش مو اني بيت الله ما افاركة ( المسجد ) شلون تريدني ابين كدام الكل زاني والعب باعراض الناس

ديمة : وجدو شرد عليه

بدرية : هه گله ياهو الاهم كرامتك لو الروح الممكن تصعد لربها بسببك ، بنت اخوية تحامت بيه واجتي دخيلة عندي واني كتلها انتِ بحمايتي واطلع خسيس اذا اسلمها لابوها واخليها تموت وهي طفلة غلطت بدون ادراك وانضحك على عقلها

وياسر سودة عليه كام يدك على راسة من سمع ابوية واخوتي كلهم ساندو ابوية ما عدى عبدالله حلف اذا ابوية تزوج زهراء يطلكها لهيام وهنا كبت العيطة ببيتنا وتكاتل فؤاد وياسر صارو دماية

ورغم كلشي ضل ياسر مُصر على موقفه وحلف وقسم ميحمل نفسة هيج اثم هو ما مسوي وابوية ضرب ياسر وجانت هاي المرة الاولى اليرفع بيها ابوية ايده على واحد من اخوتي

دنيا : وتالي عمة شصار ابوية وافق ؟

بدرية : لا يعمة ابوج بقى مصر وما رضه شكد حاول ويا أبوية كله اجيبلك واحطلك بس اقبل حتى لو تاخذها بس هيج كدام العالم وطلكها بعدين وهم ابوج ما قبل

تالي باليوم السابع كعدت نص الليل ميتة عطش كمت حتى انزل اشرب ماي وما اسمعلجن غير صوت بجي ونحيب جاي من غرفة ياسر

كل وعبالي وسيلة جاي تبجي مثل عادتها لان ياسر يم وئام وادفعلجن الباب والكه زهراء نازلة على رجلين ياسر تتوسل بي يعقد عليها بس في سبيل اهلها ميذبحوها

ما انكر بوقتها اني نفسي تعاطفت وياها وتمنيت ياسر يقبل بيها لكن ابوجن رفض وبصريح العبارة كلها

عذريني انتِ غلطتي واني ما مجبور اتحمل نتيجة غلطتج ما اكدر احط نفسي بهيج موقف اني صاحب عائلة وعندي اطفال ما اكدر

وهي من حست بنفسها ما راح تحصل شي عافته وكامت طالعة من الغرفة وبيومها وسيلة حاجت ابوجن بخصوص هالموضوع ولعب بيها لعب

المهم بعد ما طلعت زهراء منعرف شلون وشوكت ويمتى غافلتنا وطلعت لاهلها

وهناك شاء الله ان تصعد روحها لباريها

ديمة : ياا ماتت

بدرية : اي من راحت لاخوتها وسلمت نفسها الهم وللاسف غواهم الشيطان وخلاهم ينحروها ويهدرون دمها

زبيدة : لزمت كلبي مدري ليش هزني الموقف ، ما اتخيل فكرة انُ انسان ينذبح وعلى ايده منو على ايد اهله

دنيا : لا اله الا الله ، زين شلون عرفتو انتو

بدرية : فزينه الفجريات على صياح هيام الدتك على غرفة اهلي طلع ابوية وسولفتله وهي تلطم وتتحسب على علينا عبالك احنه السبب بالي صار

ابوية انمرد مرد خصوصاً هو حيل يعزها ويحبها لزهراء لان المرحومة جانت حبابة وتدخل للكلب بسرعة ومالها اذيه على واحد شوكعها هالوكعة ما ادري

المهم ماكو يومين وامها تخبلت من هول الموقف الشافته وعمي ما تحمل ما طول شهر وتوفى بجلطة

واخوتها بعد ما قتلوها علنوا وفاتها بحادث و من مستاحهم من نسابتهم ومن عمامي شالو لغير محافظة وذاك يوم وهذا يوم بعد ما شفناهم

وابوية بسبب خسارتة لاخو ولبنت اخو تهور وطرد ياسر من البيت وحلف كدام الكل انه متبري منه الا يوم الدين

وهم ياسر ماجذب خبر اخذ وسيلة ووئام ومعين ومبين وطلعت وياهم ام حسن الوكفت بوجهه ابوي وكلتله انت ظالم وظلمت ابنك واني مالي عيشة ببيت انسان ظالم وابوية من سمعها طردها وياهم

ومن يومها ابوية منع اي واحد بينا يتواصل ويه ياسر وذاك يوم وهذا يوم بعد ما شفنا ياسر ومات اخيي الحنين واني واخوتي وامي ضل فراكة حسرة بكلوبنا

هاي القصة الردتي تسمعيها يا زبيدة ارتاحيتي هسه يعمة

زبيدة : شلت راسي على دادا ام حسن لكيتها خاله شيلتها على وجها وتبجي

سألتها باستغراب ليش دتبجين

ام حسن : سودة عليه يياسر هواي تعذب بحياته شاف ضيم وقهر من اقرب الناس عمت عيني عليه عاش معلعل ومات معلعل

زبيدة : غمضت عيوني كلامها نخر گلبي نخر ، باوعت لوئام بس كليلي انتِ شنو من بشر

وئام : اني !! اني شسويت

زبيدة : شلون تقبليها على نفسج ترضين نجي لهنا ونكعد ونسولف وياهم ولا كإنما شيء صار وهمه ظالمين ابونه

صاحب هالبيت طردج انتِ ورجلج وبزرج بليلة ظلمة وما سأل عنج وانتِ هسه كاعدة وياهم وبيتهم ، كرامتج وين

ديمة : زبيدة امي شنو ذنبها قابل جيتنه لهنا صارت بكيفها مسوية نفسج متدرين بوصية ابوية

زبيدة : وإاان هذا البيت هان ابونا واذأه واذا نبقى بي نكون جاي نهين كرامتنا وكرامة بابا هم

اني بالنسبة الي مستحيل ابقى ثانية بهالبيت جدجن انسان اناني وميخاف الله ، رب اليكدر ويطاوعة گلبه يشمر قطعة من روحة تلاثييييين سنة وميسأل هذا شيسمو

اذا انتن ماعدجن غيرة على ابوية فاني كرامة ابوية عندي بالدنيا كلها ولا يمكن اسمح ابقى بمكان انظلم بيه ابوية

عفتهم وطلعت لغرفتي بسرعة ، سحبت جنطة وكمت اخلي بيها هدومي واديه ترجف منا الالم اليدك براسي ومنا قهر كلبي الكام يوجعني من السمعته

سديت الجنطة بسرعة واخذتها وطلعت وخواتي وراي واني مغلسة عليهن

دنيا : زبيدة انتِ متخربطة ليصيرلج شي يمعودة صدك جذب تحجين

ديمة : لزمتها اوكفيييي انتِ مو تردين ترحين ميخالف احنه هم نطلع وياج بس انتظري اگل لامين واخذج ويايه ونروح بس اهدي

كافي حبيبتي الله يخليج لترحين توكعين والله ما بينه هبطة بعد

كاعدات نقنع بزبيدة وفززنا صوت جدي ، اندارينا عليه الظاهر جان من البداية واكف ويسمعنا

اباوعله تقرب وكف كدامنا وعيونه على زبيدة

النوح : اني ما راح اكلج لترحين منا ولا راح افرض عليج تبقين هنا

زبيدة : اني محد يكدر يفرض عليه شي

النوح : اريدج تجين لمكتبي عندي موضوع وياج

زبيدة : ماكو موضوع يجمع بيني وبينك

النوح : نص ساعة مو اكثر وطلعي للمكان التردي ما راح امنعج ، لحكيني منتظرج بمكتبي

دنيا : اباوع لجدو راح ودخل لمكتبة ، باوعت لزبيدة ، زبيدة روحي شوفي شيريد منج خلي طلعتنا منا تكون بسلام الله يخليج تره اذا يمنعنا جدي منكدر نخطي خطوة وحدة منا

زبيدة : هزيت راسي وعفت الجنطة وتوجهت لمكتبة ، فتحت الباب ودخلت لكيته واكف ومنتظرني

تفضل شتريد مني

النوح : تعاي كعدي

زبيدة : مرتاحة هيج ، اباوعله زفر الهوه بعصبية وهز راسة

النوح : ماشي ، شوفي زبيدة اني رجال واضح وما احب الف وادور والسالفة التنحشر بزردوني ما اعوفها بجوفي واطلعها گبل

بس هالمرة اني اريد ابدي بمقدمة وبعدها نحجي بالتفاصيل

انتِ تدرين بابن عمج هارون مريض مو ؟

زبيدة : ادري بي قز القرط

النوح : اللهم طولج يا روح ، شوفي بوية اني وياج اذا نضل هيج منتفاهم خليني احجي رحمة لامج

زبيدة : تفضل كمل

النوح ابن عمج مريض واعتقد عرفتي عنده توحد وهو مرض عادي حاله حال الأمراض بس جماعتنا الهمج بكيفهم يجيبون ويسطرون الي يكلج مخبل والي يكلج بي جني خبلو الولد وطلعو عليه مو خوش سمعة

خصوصاً انه خطب اربع مرات وفصخ فالكل كام يجيب طاري بالموزين حتى برجولته الناس كامت تشكك

واذا متدرين فالمثل حالة هارون الضغط الشديد هذا عليه يولد عنده انفجار واحتمال يقوده للانتحار واني ما اريد اخسرة

هارون عيوني الاشوف بيها اذا خسرته اخسر نفسي
معزة هارون عندي من معزة امي الله يرحمها ، لهالسبب تشوفيني احاول بكل الطرق اطلعة من الهو بي واسد حلوك الناس عنه

زبيدة : اي فكلت شسوي اكربسه براس بت ياسر طبعاً مو ابوية جان كبش الفداء لمصالح حضرتك الشخصية وهذا الشي ما كفاك هسه اجيت على بناته وكلت خلي استغل وحدة منهن ازوجها لحفيدي المخبل وهي يطبها مرض تعيش تموت هي كلها بنت ياسر

النوح : ما اخفي عليج انتِ من اول ما اجيتي وشفتج وانتِ تدورين بدماغي واريدج لهارون والصار اليوم جان انسب وقت اكدر بي اضغط على هارون حتى يتزوج

زبيدة : طبعاً شكد شفت ناس صريحة مثلك ما شفت

النوح : ولا راح تشوفين ، اني انسان واضح وما احب الف وادور

زبيدة اريدج لهارون ومستعد اسويلج الي تردي بس وافقي

زبيدة : شمعنى اني ، بنات ولدك كومة ما متزوجات هاا تذكرت ذنيج عزيزات متجازف بيهن

النوح : بالعكس اني اختاريتج انتِ بالذات لانج ادبسز وقليلة ادب ولسانج زفر وبس المثلج تصمد ويه هارون وطباعة الصعبة

زبيدة : تحجي صدك انت !!

النوح : هاي الصراحة انتِ هيج ولهالسبب اني اريدج لهارون ، وتره هارون مو غرير جنه عگرب يندس ويضم راسه ومو اي وحدة تكدرله

اما انتِ فاني متاكد راح تكدرين تغيري وتأدبي وتتادبين ويا هم

وبغض النظر عن المصالح الشخصية ابن عمج بوضع نفسي حرج ويحتاج يستقر بحياته وانتِ حسب الوصلني عنج رافضة فكرة الزواج فلو تزوجي هارون او غيره ما راح يشكل فرق عندج فليش متخلين ايدج بايدي ونتعاون سوه

زبيدة : ههههه والله انت تحجي بسراب ماكو كل فائدة لتحاول

النوح : بستان اسجلة باسمج واشتريلج بيت بالمكان التردي وبالمساحة الترديها حتى مدرسة اهلية افتحلج انتِ مو مُدرسة مستعد اجيبلج موافقة وابنيلج المدرسة واسجلها باسمج شنو التشتهي نفسج اسوي الج بس وافقي

زبيدة : ابتسمت للاسف اني احقر من إني اوافق على واحد مريض مقابل امور تخدم مصالحي الشخصية
من رخصتك

عفته وتوجهت ، خليت ايدي على مقبض الباب واستوقفني صوتة

النوح : اخوج معين البارحة جان يم الدكتور وگله الطبيب اكو احتمال جبير انك ترجع تمشي بشرط انك تسوي عملية خارج العراق

زبيدة : انداريت عليه ، گلبي خفق من سمعت بمعين ممكن يرجع يمشي

صدك الدكتور گله هيج ، لعد ليش مگلي البارحة جنت يمة

النوح : هو حاجاني وكال ما اريد امي وخواتي يدرن

زبيدة : للـ ليش

النوح : العملية متتسوة بالعراق والدكتور الرشحة النه الطبيب عراقي وعايش بأميركا والمفروض معين يسافر لاميركا يسوي العملية ويبقى هناك فترة لا تقل عن ستة اشهر ياله يكدر يمشي

ولأن العملية مكلفة جداً معين بطل ورفض يسويها حتى لا يكلفكم

زبيدة : شكد تكلف عمليتة

النوح : بحدود الـ*****

زبيدة : بلعت ريكي من سمعت بالمبلغ ، فعلاً احنه ماعدنه الامكانية نسويله العملية هاي لان تكاليفها عالية

باوعتله عبالك يعني بكلامك هذا تكدر تلوي ذراعي ، اباوعله راح كعد على مكتبة وطلع فايلات وخلاهن كدامه

النوح : اختج دنيا الاعرفة انُ ابنها انقتل قبل ثمن سنوات والسبب جان مسؤول معروف بالدولة مو

زبيدة : اي صح

النوح : شنو رأيج لو نشيله من منصبه ونجيب لدنيا القتلوا ابنها ونقدمهم للعادلة ونستردلها حقها

زبيدة : هاا

النوح : اختج ديمة جانت على علاقة بواحد اسمة راسل وابتزكم علمود فلوس مو ؟

زبيدة : بادن رجلية من جاب طاري ديمة ، لزمت القنفة وكعدت انت شـ شمعرفك بسالفة ديمة

النوح : شبيج وجهج گلب اصفر ، لتخافين ما راح ااذيها تبقى بالنهاية حفيدتي واليضرها يضرني

اما عن كيفية معرفتي بالموضوع فاحب اكلج اني جوه ايدي ضباط بالاستخبارات وهمه عيوني بكل مكان والاريدة يوصلني بحركة من ايدي

هاي الملفات الكدامج بيها كلشي يخصجن انتِ وخواتج واخوتج من تسجلتن بالمدارس ولهذا يومنا
فلتتوقعين انكم ممكن تضمون عني شي

المهم شنو رأيج ويه ما نسفر معين وناخذ حق دنيا ندور على هذا الخسيس ونعلمة درس وناخذ حق ديمة

لحظة همزين تذكرت ، اخوج مبين ، شنو رأيج بالي يجيبه للعراق ويعاقبة على كلشي سوا بيكم

هههههههه لتباوعيلي هيج حتى هاي اعرفها ومكانه اندله بالملي بيا دولة وبأي محافظة حتى رقم الدار الكاعد بي اندله

شنو رأيج زبيدة ما حابه تبردين گلبج بالي اذو اخوتج وعلى حسب علمي خواتج واخوج حيل عزاز عليج وما اعتقد ممكن تفتين هيج فرصة من ايدج

زبيدة : اباوعله اجه وكف گبالي

النوح : وافقي زبيدة وافقي وطاوعيني صدكيني انتِ الربحانة عاونيني وسمعي كلامي تره عمره السمع كلامي ما خاب

بما انج ساكته يعني تردين تفكرين بالموضوع راح اعوفج على راحتج الج مني اليوم كله فكري براحتج ورديلي خبر

اخذي راحتج خلصت النص ساعة

زبيدة : كمت فتحت الباب وطلعت متوجهه لغرفتي ، دخلت وفتحت البلكون وصار بوجهي ديمة ودنيا كل وحدة كاعدة يم رجلها ومعين كاعد يم امه ويسولف وياها

دنيا خالة تيم بحضنها وتبوس وتشم بي شلون المشايفه وهو يبوس بيها ويحضنها

يا ترى دنيا لوما ماخوذ منها ابنها ومقتول كدامها جانت راح تكون مهووسة بتيم هيج ؟

حولت عيوني على ديمة الجان امين يحاجيها وهي تجاوبه من وره خشمها اي واحد يشوفها يتوقع انها ما طايقته لزوجها

ديمة لوما السوا بيها راسل وهبه ما جانت راح تنجبر تقبل بامين حتى تخلص من نظرات العتاب والاتهامات الي توجهتلها من اقرب الناس الها وهسه جاي تعيش حياة تعيسة ويه انسان متحبه وبالتالي ظلمته وظلمت نفسها ويا

باوعت لمعين المغطي رجلية ويباوع للجهال اليلعبون ويضحك وياهم

يا ترى معين اذا طاب وكدر يوكف على حيله هل ممكن انه يتزوج ويصير عنده اطفال يعوضو عن اطفاله الراحو

تنهدت ومسحت على راسي ، باوعت على انعكاس صورتي بالشباك ، لوما السوا مبين الكلب ما جان كلنا وصلنا لهالمواصيل

غمضت عيوني ونزلت دموعي ، يايمه اني وكعت بين نارين شسوي

جريت نفس وفتحت عيوني ، طلعت من الغرفة ودكيت الباب على جدي لكيته كاعد وكإنه منتظرني

النوح : هاا زبيدة

زبيدة : اني موافقة

اباوع لملامحه استبشرت وكام بسرعة باسني من راسي وحضني

النوح : جنت متأكد راح تقبلين والله راهنت نفسي عليج وربحت ههههههه

زبيدة : عضيت شفايفي مانعة صوت شهكاتي تطلع

ابتعدت عنه وحمحمت ، اني صح موافقة بس عندي شروط

النوح : كلشي يجرالج

زبيدة : قبل ليصير اي شي رسمي بيني وبين حفيدك اريد معين يسافر يسوي العملية

النوح : هاهي واني اصلا بلشت امشي باجراءات سفره

زبيدة : هزيت راسي ، غير المواضيع التتعلق باخوتي والوعدتني تنفذها اريد بيت ما اريد ابقى وياكم بنفس البيت على الاقل هالفترة

النوح : ولا يهمج من باجر افرغلكم بيت عمج فاضل كعدو بي ومن يرجعون بيت فاضل من السفر يكون بيتهم الجديد كامل

بس من تتزوجين انتِ وهارون تعيشون هنا

زبيدة : ماشي ، اباوعله راح اخذ موبايله وخابر احد ومن حجه عرفته جاي يحجي ويه هارون

النوح : الوو هارون تعال لمكتبي بسرعة لتتأخر

زبيدة : شويه واندكت الباب ودخل الشفيه ، باوعلي من فوك لجوه ورجع نظرة على جدي

هارون : نعم

النوح : حبيت ابلغك بنت عمك وافقت على الزواج منك

هارون : ايييييه عالخير

زبيدة : فتحت عيوني انت موافق !!

النوح : جاوب بنت عمك حقها تسمع الرد منك

هارون : طبعاً موافق وين الگه احسن من بنت عمي

النوح : على بركة الله ان شاء الله باجر اتناقش ويه اهلكم بكلشي يخص زواجكم وهسه اخذو راحتكم

زبيدة : ما تحملت بعد طلعت بسرعة وجانن خواتي جايات باتجاهي

ديمة : يله حبيبتي زبيدة جيبي جنطتج خلي نروح

زبيدة : ما راح اروح

ديمة : ليش ؟

زبيدة : بعدين اسولفلجن هسه اريد ارتاح

دنيا : حبيبتي خوما جدي سوالج شي

زبيدة : ابتسمت حتى اطمنهن لا بس تفاهمنا اني ويا واصلا من البداية اني جنت متسرعة بقراري ،
بوستهن وودعتهن ومشيت داخلة لغرفتي

سديت الباب وكعدت فحطت من البجي ، اااني !! اني اتزوج من عمت عيني كووون

بندت من البجي حتى عيوني كمت ما اشوف بيهن كد ما بجيت ومن كد التعب ما حسيت بنفسي الا ونايمة

ما كعدت الا دكات الباب ، اباوع للساعة بالـ11 بالليل
خليت الحجاب على راسي وكمت فتحت الباب

شفت الميسمى بوجهي ، خير !!! شعدك هنا

هارون : بما انُ احنه راح نتزوج فلازم نكعد نتفاهم بأمور معينة

زبيدة : تمشي منا لا اقسم بالله اسوي وجهك خرايط

اباوعله ابتسم وهزلي راسه

هارون : ميخالف مقبولة منج راسج مشكوك اعذرج الخيوط البراسج اكيد ماذيتج وما كادرة تسيطرين على اعصابج

زبيدة : انتتت متفككك ياخه عنييي شترييييد

هارون : سمعيني بغض النظر عن الصار بيناتنه اليوم
صدكيني اني هم ما موافق ومجبور لان ما اكدر اكسر حجاية جدي

فكلت اجي واكعد اتفاهم اني وياج بلكي نلكه حل نخلي جدي يتراجع عن قراره لان هذا زواج مابي لعب
وميصير اني وياج ندخل بهيج علاقة لان محد راح يتأذه بالنهاية غيرنا

زبيدة : استغربت من طريقته بالكلام شهالادب النزل فجأة

تنهدت واشرتله روح للحديقة واني شويه واجي وراك

هارون : لا مو مال نحجي بالحديقة بهالبيت الحيطان الها اذان واني ما اريد احد يدري بالراح نحجي بي

زبيدة : لعد شتريد ؟ اباوعله ابتسم ابتسامة غريبة

هارون : نطلع اني وياج وحدنا نكعد بمطعم او حديقة عامة نحجي ونتفاهم ونرجع

زبيدة : من حجة اجه على بالي كلام نور من كالت هارون اي وحدة يخطبها يطلب يطلع وياها وحدهم

وهسه اجه وعاد عليه نفس الطلب يريد نطلع اني ويا وحدنا ، صار عندي فضول اعرف شنو الراح يسوي ووين يريد يوصل

هزيتله راسي ، ماشي ابدل واجيك ، طبكت الباب بوجهه ودخلت بدلت بسرعة واخذت سچينة الفواكهه
والمواسه خليتهن بجنطتي وفتحت مسجل صوت بموبايلي وخليته بالجنطة حتى خاف يصير شي على الاقل عندي دليل

اصلا اتمنى يبدر منه شي حتى جدي ينهي كلشي واني اطلع منها بسلام واللوم يوكع على هارون

طلعت نازلة جوه ، فتحت باب المطبخ وطلعت متوجهه للكراج لكيت الشفيه كاعد بسيارته ومنتظرني

فتحت الباب وصعدت وهو حرك طالع من البيت

هارون : وين تحبين نروح ؟

زبيدة : تعمدت اكله بكيفك اريد اشوفه وين راح ياخذني

اباوعله ضل يمشي بينه طول وطول الطريق احنه ساكتين لا اني حجيت ولا هو

هارون : شبيج وجهج اصفر

زبيدة : اني للا لا ما بيه شي بس دايخة شويه

هارون : هاج شربي ماي هسه تهدئين

زبيدة : اباوعله مد ايده على الكشنات الوره وقدملي كاسة ماي ، ما اريد

هارون : شبيج خايفة ؟

زبيدة : عليمن اخاف يمه شنو طالعة ويه بعبع

هارون : لعد هاج شربي واهدي وهاي كدامج تره كاسة جديدة لتخافين ما مفتوحة حتى تشكين إني حاطلج بيها شي

زبيدة : اخذتها منه ، باوعتلها صدك ما مفتوحة ، فتحتها وشربت لان جنت ميته عطش

كملتها وخليتها على صفحة

هارون : اعليلج التبريد ؟

زبيدة : لا ما اريد

انداريت وضليت اباوع للطريق ، الطريق كله بساتين وشجر والحجي بيناتنه يخوف

فجأة كمت احس الصورة كدامي تتغوش ، فركت عيوني ونفس الشي الرؤية عندي تروح وتجي

انداريت على هارون لكيته مبتسم بطريقة غريبة
ااا الدنيا للـ ليش جاي تغوش

هارون : هذني شكد ست زبيدة

زبيدة : اباوع لايده تروح يمنه ويسره ، ممـ ما جاي اكدر اشوف

هارون : لانج غبية

زبيدة : قبل لا اجاوبه حسيت بصورة سودة تحاوطني
ما كدرت اقاوم اكثر وما ادري شلون انتهى بيه المطاف مغمى عليه

***************************************
لهنا يكون خلص البارت ان شاء الله يكون عجبكم❤️
+ لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

..