الموت الحي الفصل الرابع وأربعون 44 - بقلم براء الموسوي

"أسوء ما يصيب الإنسان ان يموت حيً "

- واكفة كدام ميز التواليت البس بالتراجي وعيوني عليه واكف عني بمسافة قليلة ويشاهد بصمت مثل عادته

كملت وانداريت متقربة منه بخطوات بطيئة ، وكفت كبالة ورفعت اديه محاوطة ركبته

بعدك مُصر متروح ؟

- الف مرة سألتيني وكتلج ما اروح وبعدين اني جم مرة كتلج لتتقربين مني هيج

- ابتسمت ونزلت ايدي مخليتها على الجهة اليسار من صدرة بالتحديد گلبه

حركت اطراف اظافري بخفة على منطقة صدرة وهمستله لسانك يكول متريد قربي بس الظاهر دكات هالحلو الي بصدرك اله رأي ثاني

رد عليه بنبرة باردة خالية من المشاعر ، عجيب هالانسان شكد يكدر يسيطر على انفعالته الخارجية لكن للاسف دائما انفعالته الداخلية تخرب عليه كل هالمجهود الصعب الي ديبذله

- لتضلين تمسلتين بكلام ماله اي معنى وبطلي هالسوالف

- بدون لا اجاوبه مشيت ايدي على جتفه ونزلت اصابعي بخفه ممشيتها على طول زنده لحد ايده

لزمت كفه ورفعته مخليته على خدي غمضت من ملمس ايده صار على بشرتي ، انحنيت بشفايفي مقبلة ابهامه

همست بخفوت يمكن تقنعني انُ كلامي فعلا ماله اي معنى بس شلون راح تقنعني رجفة جسمك الواضحة هاي مالها اي معنى

حسيت بأيده تشد على خصري مقربتني عليه ، سند جبينه على جبيني وغمض عيونه

- انتِ وتالي وياج متكليلي شتردين مني

- اريدك

- بـ****

- قاطعته الله يخليك كافي جذب ، ابتعدت ورفعت راسي مباوعه بعيونه

كلشي بيك ، عيونك ، شفايفك ، ايدك ، حضنك حتى شعر ايدك كل ذني يشهدن على جذب لسانك

تكرهني ، بس عيونك التباوعلي بهيام تكلك جذاب ، شفايفك التبادلني بكل مرة تكلك جذاب
ايدك الي بوكت عصبيتك تتخله وره ظهرك حتى
لترفعها عليه وبدون قصد تاذيني تكلك جذاب

حضنك الي كلما ادخل بي احس ضلوعي تتكسر يكلك جذاب ، لمست شعر ايده ، حتى شعر ايدك الكلما اتقربلك تكزبر خاضعة لتاثير جسمك بيه تكلك جذاب

فعن اي كرهه دتحجي انت !!

وكالعادة راح تغلس عني وتسوي نفسك ولا كإنما سمعت شي وتدفعني وتروح بدون متعلق على كلامي ، حفظت هالاصوانة

سمعت صوت موبايلي يدك ، ابتعدت عنه ورحت اخذت الموبايل من على الميز ورديت الووو

- الوو وينج يمعودة بعد ساعة تبلش الحنة وانتِ ماكو

- يله كملت ماعندي شي هسه بس البس حجابي واجي

- وياومن راح تجين

- صاحب راح يجيبني

- وشعجب حبيب الگلب خلاج

- باوعتله بالمراية وجاوبتها ، هاي بعد الله هدا ، يله ولج لتاخريني خلي الحك لا اروح اتاخر ويعوفوني

سديته منها ورحت ركض لبست حذائي ، كملت وكمت بسرعة سحبت الصاية والحجاب

وكفت لبستهن وحاجيته ، حبيبي عشاك حضرته وخليته بالفرن اذا جعت بس حمي وتعشى لتنتظرني وهم ملابسك كويتهن الك خاف تريد تطلع تلكاهن بالكنتور

كملت وكمت اخذت جنطتي من يمه وتقدمت بسته من شفايفه

يله حبيب باي

- باي

*************************************

- الووو هاا تقى شلونج

- هاا ولج بشري شصار

- سويت مثل ما كتيلي

- اي وشرد عليج هو ؟

- زعل واخذ هدومة وطلع نام بالاستقبال

- اييي همزين عاد فك ياخه عنج

- بس انقهرت احس نفسي هواي جرحته

- لعد شتسوين متكليلي هذا الحل الوحيد اليخلي ياخذ موقف وميقربلج بعد ياهو الاحسن برأيج يلزكلج اربعة وعشرين ساعة ويجبرج على فراشة

لو يزعل ويفك ياخه منج ، لتاخذج العاطفة انتِ نفسيتج متدمرة وحالتج حالة صايرة ، كافي فكري بس بنفسج ولو لمرة وحدة ما طيح حظج غير نفكيرج بالناس وبمشاعرهم

يمعوده كلمن يصيح ياروحي بهالدنيا ، طز بي وبمشاعرة شنو لزكة الف مره حسستي بعدم رغبتج ويرجع يدحس ويتعذر دخيل محمد شكد ماعندة كرامة

- بس تره هو خطية كلش حباب

- اكلج لتنرفزيني واذا حباب يعني شنو قابل تدوسين على روحج وتفرضي عليج جبر

- هيج رأيج ؟

- طبعاً ، يله هسه طبي سبحي واسترخي وكعدي شوفيلج فلم ما دام فرغلتج

- تمام ، سديت الخط وانداريت لكيت بصائر واكفه ورايه وعيونها تجدح نار من العصبية

عززه شكلها سمعتنا اني وتقى

*************************************

- كاعدة وخالة الملازم كدامي ، تنهدت وطكيت ركبتي
ااااخ يمه انكسر ظهري

باوعت للساعة ، الساعة بـ2 هذا وين صار ، سحبت موبايلي متصلة عليه ، هه مغلق

ذبيت الموبايلي وكمت فتحت الثلاجة ، اخذتلي نستلة اسد بيها جوعي وهم اكعد شويه اخذلي استراحة حتى اكمل قراية وانام

خلصت فترة استراحي واجيت اكعد ، شفت الباب ينفتح ويدخل حضرته بطلته البهيه ، اناقته ، شياكته شكله ، طوله كلشي بي ياخذ العقل

لكن للاسف اني مالي بهالانسان ذرة وحدة ولا الي حق اطالبه ولو بكلمة وحدة تجبر بخاطري وتحسسني إني انسانه

اباوعله تقدم وتخطاني داخل للحمام ولا كإني موجودة

وليش استغرب من تزوجنا ولليوم واني عايشة بهالغرفة على إني كائن غير مرئي فتعودت

فزيت على صوتة ورايه ، انداريت عليه ، اباوع لاسمها الموشوم على صدرة يتحداني كلما اباوعله وكإنه يكلي شوفي اني شنو بالنسبة لهالرجل

وانتِ ! انتِ شنو بالنسبة اله ؟ نكرة !!

- اكلج ما دامج كاعدة غسلي ملابسي باجر عندي دوام ومابيه حيل اكعد ارهم هدوم

- هزيت راسي بدون ما اجاوبه ودخلت للحمام حتى اغسلهن

فتشت سترته وخليتها بالغسالة ، سحبت القميص شفت طبع احمر الشفاه ماليته ملي ، رفعته مقربته لانفي ، عطر نسائي واضح وضوح الشمس

دمعت عيوني يعني طبع الحمره مو دليل على خياتنه بس العطر هو دليل ، شتحسين انتِ !

شمرته واخذت باقي ملابسة اكلبهن واذبهن بالغسالة لهناك وشفت شي كزبر كل جسمي منه ، ما تحملت القرف الشفته وسحبت القطعة الي بأيدي وطلعت شمرتها بوجهه

هايييي شنوووو

- قز القرط شبيج

- شهالقررررف هذاااا الله ياخذك

اباوعله دنك شايل الملابس ، باوعلهن وابتسم

- يا عيني يا فقيرة متعرفين هذا شنو

- ولان اعررررف هذاا شنوو اجيت احاججك ، ليش يا اخي دتسوي هيج بيه

وصلت بيك تعوف قذارتك وقذارة ذنيج الزانيات على هدومك وتطلب مني انظف وراكم ، ليش بس فهمني لييييش عمي لو متزوج الكاتلة اهلك متسوي بيها هيج

- اكلج تره مالي خلكج النص الحافظته مدري من يا مسلسل تركي اكعدي رطني ويه روحج لتطلعي عليه

جاي تعبان اريد ارتاح وراي دوام ما ناقصني انتِ متردين تغسلين هدوني يطبج طوب العاملات يغسلنهن بس جفيني شرج

وكفت كدامه وبجيت ، حباب كافي طلكني لخاطر الله وخليني ارجع لاهلي واشوف حياتي بعيد عنك على الاقل خلي انتشل البقى من كرامتي الصارت بالحضيض من يوم النطقت النعم وصرت مرتك

اني تعبت والله تعبت مداكدر اتقبل الاشياء الداشوفها خلينا ننفصل وانت عيش حياتك بكيفك وعوفني اعيش حياتي بعيد عن بيئتك ، الله يخليك والله حتى هدومي العليه اعوفهن هنا ما اخذ منك شي بس عوفني بحالي وطلكني

اذا بقيت وياك اشوف خيانتك كل يوم كبالي انجلط واموت والله اموت

- حجيناها قبل وراح نرجع نعيدها طلاكنا اني وياج راح يدمر العلاقة البين عوائلنا واني مستحيل اهدم العلاقات الطيبة البين اهلي واهلج علمود حضرة جنابج ستوج صحيتي واكتشفتي نفسج مو كد هالزواج

انتِ قبلتي وتدرين بيه كل هالصفات فبعد على شنو هالحجي الماصخ كعدي وانجبي واكلي من كدامج
لتسويلي هالافلام تره روحي طالعة

- هزيت راسي الله ينتقم منك دنيا واخره ، حسبي الله عليك الى يوم الدين

- ياعيني انقهرت كلش لالا اوكفي راح ابجي

عضيت اصابعي وزادت دموعي ، استاهل انييي والله استاهل شكد حذروني منك بس انييي غبييية والله غبييية ولك اول الناس الكلولي ولج هذا ميفيدج عوفي هييي

ضربت على رجلية وانيييي الغبية ما صدكتهاا وقبلت بيك عبالي خوش ادميي بس اثاريهااا تعرفك شنو وتدري بيك مو كفو ومو رجال

- ليش مو رجال خو كولي تحبني ورادت تطفشج

- ضحكت من بين دموعي ، تحبك !! هههههه ولك هي اصلا مشايلتك من كاعك

الكاعد تنفخ بروحك وتصيح تحبك عدها التراب اليمشي عليه رجلها يسواك ويسوه عشرة بكدك

- لوما اخذته جبر جان صدكتج دخيل محمد يالنسوان شكد حاقدات و وحدتجن تكيد للثانية

- جنت خايفة على مشاعرك ومردت اقهرك بس مدام دتحجي هيج خلي اراويك

سحبت موبايلي فاتحة الستوديو ، دخلت على اخر صورة ودرت الموبايل عليه

هاا باوع ، هنا رجلها كاعد يسولف ، باوع شلون دتباوعله وهو يسولف ، بذمتك وضميرك هاي اذا عندك ضمير ، هالنظرة نظرة وحده مجبورة

اكو وحدة مجبورة تباوع لرجلها بهيج نظرة ، دشوف ماكلته اكل بعيونها

ناسيه الدنيا والناس ومركزة على حبيبها شلون يحجي وعيونها تحجي قبل لسانها شكد حابته وشايفته وممصدكة

بله كلي اكو يوم شفتها تباوعلك بهالنظرة ، ما حصلت منه جواب

رفعت عيوني عليه لكيت عيونه مدمعة وكوه مسيطر على دموعه لدرجة اللون الابيض مالت عينه گالب احمر

تبجي !! اي ابجي تستاهل كل الصار والراح يصيرلك لانك عاصي ومو رجال

ويه ما حجيت هيج صفكني راشدي وجرني من شعري ، وعيونه تتنافض منها الدموع بشده

- منو هو المو رجال ولج ، بت النعال مو انيمج هنا واراويج المو رجال شيسوي والكعبة اسويج سبع وصل هسه واخليج تعضين اصابعج ندم

- من بين المي ضحكت ، ههه شكد مغفل انت والمثلك الي يعتبرون الجنس هو مقايس الرجولة

بس ما استغرب عدم معرفتك بمعنى الرجولة الحقيقي لان صدكني لو تعرف شنو هي الرجولة جان اتصفت بيها

حسيت بي يشد على شعري اااخ هددد شعررييي
الله ياخذك ، دفعته عني بقوه وعطت بي وجعتك الحقيقة مو ، اييي الحقيقة توجع وانت حقيقتك ذكر مريض ذرة رجولة ماعندك

ونهايتك بهالدنيا وحيد ومذلول ولك لو بيك حظ متخلي شهواتك تسيطر عليك وتسويك سلعة تسحبك لطريق يهز عرشه لرب السماوات جل في علاه

- د ك*** **

- ابتسمت وهزيت ايدي ، شجاوبك هسه اني بله بس ميخالف انت مريض ولا على المريض حرج

تصدك ردت احجي وياك حجايه بس خاف تسمعها وتروح تنتحر وتالي يوكع ذنبك بركبتي

مشيت عنه وحسيته يسحبني ايدي ويلويها

- انييي جم مرة كتتتتلج لتحاوليييين تلمحييين لهذااا الموضوع ليييييش تخلينييييي ااذيج

- هاا جرحك الموضوع تؤ تؤ خطية ، تستحي من تتذكر نفسك شلون انتحرت علمود حبيية الگلب

نترت ايدي منه ، هاي اول واخر مرة اسمحلك تمد ايدك عليه والا راح اوصل سوالفك كلها لابوك وانت تعرف كلش زين شنو ممكن يصيرلك اذا انفتح حلكي

عفته ودخلت للحمام سادة الباب ورايه ، صميت حلكي وبجيت بشوغة ، متت قهر من شفته يبجي عليها

يبجي من كل كلبه وصوت ونته واصله يمي واني بالحمام ، اني تعبت لا بيه انفصل عنه ولا بيه اكمل وياا

وللاسف بساعتها الشيطان استغل ضعفي واستحوذ تفكيري وخلاني امضي على فعل راح اتندم عليه طول حياتي

شوكت وشلون تجرأت و سحبت موس الحلاقة وقطعت اوردتي ما ادري

كل الاتذكرة إني فقدت الوعي فورًا وما حسيت على شي بعد

************************************

- باوعت للساعة ، ييوو حيصيرلي فوك النص ساعة كاعدة هنا والله حنفضح من وره سوالفه المكسرة

جريت روحي اريد اكوم وهو مثبتني بحضنه ، شلون يعني حضل بحضنك طول اليوم

- ببرود حلالي و بكيفي عندج مانع

- تنهدت ماسحة على كصتي ، لا إله الا الله ، يعني طول ذيج الفترة اني مزروعة بخلقتك كلشي ما سويت من صرت بعيدة عنك حليت بعينك وعجبك تحصرني هالحصرة بالدوام

- هو احب الختلة

- استغفر الله واتوب اليه ، عمي عوفني لخاطر الله ادري جبر هي وبعدين تره انت مديري هنا عيب عليك تتصرف هيج

- شو اشوف العيب

- ضربت ايده تأدب شكد مستهتر ومتستحي وحق هذا الله

- ههههههه بشرفج تره اعصابي كلش تعبانة

- خزرته انت تدري الوضع الاحنه بي هسه هاي اولا وثانيا تره على ساعة يطب علينا واحد من الموظفين وساعتها عود من يشوفوني كاعدة بحضنك تعال سولفلي على سلامة اعصابك

- طز بيهم اخر همي المهم عوفج من هالسوالف التعبانة اريد اكلج شغلة بخصوص موضوع جدج بس عليج الزهرة اذا تكلين لاحد لان الموضوع حساس وما اكدر احجي كدام احد

- خير ان شاء الله

- تعاي دنكي خلي اشوارج

- وليش تشاورني ؟ قابل اكو احد هنا

- كلشي يصير دتعاي

- دنكت عليه والسخيف اول ما صرت قريبه منه باسني من شفايفي وجتفني حتى ما اتحرك

حاولت ادفعة عني بس ما كدرت وبدون شعور ما حسيت بنفسي الا مبادلته ومقربته عليه

ما اعرف شكد مر وقت واحنه على هالحال ، ما فزينا الا على صوت الباب ينفتح

راشدة : استاذ ممكن توقعلي على هالاور....

هاي شنو !!!

************************************

- كعدت من النوم تمغطت واني مبتسمة ، رفعت الغطة على جسمي وكعدت ، اباوعله واكف كدام البلكون ، منطيني ظهره ويدخن

لفيت الجرجف على جسمي وكمت من الفراش ، حضنته من ظهره وبسته سانده راسي على ظهره

طايرة من الفرح ابد مجنت متوقعة حيجي يوم وارجع انجمع بي واتوسد حضنه

رجعت بسته من ظهره ، احبك

اباوعله اندار عليه ، الجكارة مزينه شفايفه وعيونه تباوعلي بغموض

سحب نفس منها ونفخه بوجهي ودنك باسني من شفايفي ، ابتسمت وبادلته بكل حب

ابتعد واندار طفه الجكارة بالنفضاه وباوعلي

- مدي ايدج

- ابتسمتله ومديتها كدامه ، اباوعله خله بيها ورقة مال فلوس

باوعتله باستغراب ، شنو هاي حبيبي ؟

- بهدوء فلوس الليلة

- صفنت بوجهه شـ شنو !!

*************************************

السلام عليكم حبايبي شلونكم ان شاء الله بخير

طبعاً اشكركم جدًا على سؤالكم عني ودعائكم الي بالفترة السابقة ، لطفكم ونقائكم خجلني بالله

جدًا اعتذر لو مرديت على احد منكم لكن بالله جنت غالقة النت بالفترة المضت والتهيت بالتجهيز لامور السفر علمود عمليتي فعذروني لو اخذتو على خاطركم بسبب عدم اجابتي لكن ثقوا لو كان عندي مجال مستحيل جنت افوت فرصة انُ اجاوب وادردش وياكم ❤️

وبصراحة اليوم حسيت نفسي كُلش متضايقة اسم الله عليكم فكلت افتح النت وانزللكم بارت يخص مشاهد من الجزء الثاني حتى اتونس وياكم وانتو هم تتونسون بالبارت

واتمنى يكون عجبكم وحمسكم للجزء الثاني بدل ليقتلكم الحماس

وبالمناسبة هالمشاهد الممكن تكون مفهمومة ام مبهمة الكم تعتبر نقطة ببحر من الي حيصير بهالرواية

والي سألوني عن عمليتي فلا مسويتها للان بس قربت اسويها احتمال لو هالاسبوع لو البعده اتمنى منكم تندعولي اكوم بالسلامة

واكرر اعتذاري لو ما رديت على احد بالايام الجايه بسبب انشغالي بوضعي الصحي ❤️

كل الحب ❤️

اختكم براء ❤️

.