الموت الحي الفصل السابع وأربعون 47 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

ديمة : كاعدة بغرفتي وصافنه بالفراغ ، يا ترى ليش سألني اسلام عن هبه ؟

من بعد ما غصيت خطية انخبصو بيه لان لوما الله ستر وخالة متلاحكتني بخبزة جان اختنكت ورحت بيها

لزمت بلاعيمي والله كد ما كحيت احسهن تجرحن ، تمددت وبالي يم اسلام ما عندي الجرئة حتى اروح اسأله شمعرفك بهبه وليش جاي تسألني

سحبت الغطة وكالعادة لجئت للنوم في سبيل ما اضل افكر وتاليها بسبب القلق يصعد سكري واتخربط

غفيت وما كعدت الا صوت الطگطگه بالغرفة ، رفعت الغطة عن راسي وكعدت

صار امين گبالي ، واكف كدام ميز التواليت ويعدل بشعرة

حاجيته ، هاا الله يساعدك ، اندار عليه وابتسم

امين : ويساعدج حبيبتي

ديمة : شوكت اجيت ؟

امين : من زمان وهسه طالع

ديمة : باوعت للساعة بالـ6 المغرب حييل هاي اني شكد نايمة ، وخرت الغطة عن جسمي وكمت

عفية امين غير من تجي تكعدني حتى احضرلك الغدة ، صدك تحجي بله اكيد هسه انت هسه باقي جوعان اكعد اكعد خلي اروح احميلك الاكل واجي

سحبت الروب حتى البسه واطلع وهو سبقني ولزم ايدي

امين : الله الله على كيفج ويه روحج، اني اجيت ولكيت امي كاعدة وهي حضرتلي الغدة وتغديت الحمدلله

ديمة : ليش زحمتها لو مكعدني

امين : شفتج غاطة بالنوم ما هانلي اكعدج ، يله ما صار شي لتكبرين الموضوع حبيبتي

ديمة : كعدت على نهاية الجرباية وباوعتله ، مبدل لابس بنطرون بيجي وقميص اسود ، تفاجئت شعجب كاشخ بالعادة بهيج وقت يلبس ملابس معينة مخصصها للشغل

ما تحملت ما اسأله لان مبينه كشخته هاي مو مال شغل ، وين رايح ؟

امين : اليوم دفعتنا مال الشباب بالكلية مسوين جمعة بالمطعم واتصلو عليه فاخذت اذن من المدير وكلت اروح اشوفهم واغير جو صارلي فترة ما شايفهم

ديمة : هااا اكول ليش كاشخ وتبخ بهالعطر ومملحك اثاري السالفة بيها دفعة وبنات ، غمزتله اي عيني اي تونس

امين : ههههههه شنو بس لا تغارين

ديمة : ياا لا والله بالعكس اصلا اني اكيف اذا تطلع وتتونس يمعود اطلع وغير جو شوف ناس جديدة نسوان جديدة الانسان هم يحتاج يغير

امين : ههههههه حلوة هاي مال الانسان يحتاج يغير

ديمة : وكفت كدامه والله ما اشاقة شبيك روح متع عيونك وشوف اشكال جديدة ما مليت مني مكابلني وكاعد

امين : ولا عمري راح امل ، انتِ عندي بنسوان الدنيا كلها ، انتِ متعتها لروحي ميحتاج ادور على شي يمتع عيوني ويشغلها وانتِ موجودة

ديمة : لزمت خدودي ، اكلك اوكف شو اني خجلت عززه امييين شهالحجييي هذااا اني مو كايلتلك استحي لتحاجيني هيج

امين : ههههه اروح فدوة لليستحي شو تعاي خلي اشبگج

ديمة : حضني بقوة واني ابتسمت وبادلته ، ابد ما اضوج من يحضني احس حضنه نظيف ودافي ميدل على شي شهواني او بي رغبة بالعكس وهذا الشي الوحيد الاتقبل بي قربي من امين

ابتعد وباسني من راسي وخدودي

امين : يله اني طالع ، محتاجة شي ؟

ديمة : لا سلامتك تونس

امين : ان شاء الله يله مع السلامة ولتنتظروني نامو لان احتمال اتأخر بالرجعة

ديمة : تمام ، اباوعله فتح باب الغرفة ديطلع واندار عليه

امين : صدك قبل لا اطلع اسلام خابرني اليوم وگلي اكو وحدة اجت للمحل وسألت عنج على اساس هي صديقتج من الكلية واسمها شنو يربي ، اي اسمها هبه

تكول جاي تتصل على موبايلج ومتحصلج فأجت لمحل ابوج تسأل عنج

ديمة : هاا ايي ايي رقمها ضاع مني من بدلت موبايلي

امين : صدك انتِ موبايلج ذاك وينه ؟

ديمة : و وكع اي وكع وتكسر فذبيته بالزبل

امين : وخطج !!

ديمة : هااا هو كسرته ويا وكلت ابدله

امين : خوش ، على كل حال اني كلت لاسلام ينطيها رقمج الجديد حتى تتواصل وياج يله في امان الله

ديمة : اا الله وياك ، سديت الباب ورا ولزمت راسي واني افتر جني مسودنه

ليش امين ليش ، ليش انطيتوها رقمي ، يربي هاي شتريد مني ما كفاها السوته بيه شرجعها هسه من الله لا يوفقها ما اكتفت بتدميرها لماضيي جايه هسه تدمرلي حاضري

يربي دخيلك وسترك شسوي هسه وشلون بيه إذا كامت تتردد للمحل وتسويلي مشاكل

رحت بسرعة لزمت موبايلي الجديد فتحته ، اباوع ماكو شي ، يارب يكون اسلام غلطان بالرقم وما مطنيها رقمي الصحيح يارب بجاه النبي كون يطلع اكو غلط بالرقم والاخذته مو رقمي

سمعت خالة تصيحني ، اخذت الروب والحجاب وطلعت خليتهن على صفحة خاف اسلام يجي فجأة

دخلت لكيتها كالعادة بالمطبخ ، هااا خالة حبيبتي صحتيني

هناء : اي بعد عمري سويت جاي وضايجة وحدي كلت اصيحلج تشربين وياي ؟

ديمة : اكيد خالة روحي انتِ كعدي بالصالة واني اصب واجي

هناء : اكو كعك بالدهن واكو هم بالسمسم جيبي وياج طيب ويه الجاي

ديمة : بعيني ، صبيت الي والها وخليت كعك واخذته هو والجاي بصينية وطلعت

لكيت خالة مطلعة برنامج مال طبخ وتباوع ، طبعا خالة هناء وين منضيعها نلكاها حاطة قنوات الطبخ وكاعدة

خليت الصينية وكعدت يمها

هناء : عاشت ايدج يمه عسى هالايد الحلوة تمسح على حجر الكعبة

ديمة : ابتسمت امين يارب ، اخذت كوبي وكعدت اتابع وياها بس اجذب اذا اكول جاي اركز بشي غير سالفة المتسمه هاي المدري منين طلعتلي

شلت راسي على صوت الهبط لكيت بصائر تنزل من فوگ واول ما شافتنا شهكت

بصائر : عزززه خياااانة تسون عصرونية ومتصيحلي

ديمة : غير عندج امتحانات ما ردنه نلهيج عن دراستج

بصائر : خليت ايدي على بطني ، بس بهاي تصيرين حريصة على دراستي لو عندج تنظيف جان گبل اجيتيني مع الاسف عليج و الله

ديمة : يبووو ما طلع جاي هذا كعدي خلي اروح اصبلج ، كمت صبيتلها واجيت انطيته الها

بصائر : اوووف شوكت اخلص امتحانات واكعد وياكم على راحتي

هناء : هانت يبعد گلبي ما بقى شي ان شاء الله عگب باجر تكملين امتحانات وعود كابلينا وكعدي من الصبح لليل

ديمة : اي والله اني منتظرتها تكمل امتحانات عندي كومة سوالف اريد اسويها اولها شعرها هذا المكورع لازم نشوفله صرفة

بصائر : لزمت راسي ، اي والله صاير شحالة من القراية جاي يوكع وما ملحگ

ديمة : هو خلصي واني اتولى مهمة العناية بشعرج

بصائر : والله تسوين فضل ، يله من رخصتجن اخذ جايي وافلت خاف ياخذني الواهس وبعد ما اكوم اندعولي

هناء : موفقة يمه الله ينطيج على گد سعة رحمتة

ديمة : صعدت بصائر واني سالت خالة ، اكول خالة شتحبين نسوي عشه

هناء : اني سلكت لوبية وهسه عايفتها على النار تستوي براحتها وطلعت بتيتات كشترهن ونكعتهن وبالي اگلي وياهن گبة

ديمة : لعد خلي اكوم اقلملج البتيتة واسوي زلاطة

هناء : كعدي يمه الدنيا حارة عليج بالمطبخ خاف تتخربطين وانتِ سكرج موزين

ديمة : شنو السالفة خالة هي بتيتة وزلاطة قابل حطبخ مفطح وهاي علمودج حجيبهن هنا اسويهن

هناء : اي بعد عمري كعدي كدام المبردة

ديمة : صار ، كمت جبت الاشياء الاحتاجها وكعدت بالصالة اشتغل وافكر لو راسلتني هبه شراح اسوي

احظرها لو اعتب عليها عالسوته بيه لو شنو اسوي بالضبط ، اتمنى اسألها اني بشنو اذيتج حتى تغدرين بيه هيج ، الله شاهد جنت حاسبتها وحدة من خواتي
عمري ما فكرت اني ااذيها ولو بكلمة حتى مصروفي جنت اقسمة بيني وبينها لان ادري بوضعها المادي شنو

لكن للاسف الاحسان البدر مني تجاهها رجع عليه بالغدر والاذية والخيانة اووووف شكول على الدنيا الذبتني بهيج طريق مؤذي

كملت وكعدت ويه خالة امضي وقت لمن اذن الاذان كمنا صلينا وبدينه نسوي العشة ، كملنا وانتظرنا اسلام علما يجي

بالـ9 بالليل رجع اسلام واني وخالة صبينة العشة وصحنه لبصائر وكعدنا نتعشه ، كملنا وشربنا جاي وكل واحد طش بمكان

اني دخلت لغرفتي اخذت برنص وخاولي وعباية راس ورحت للحمام سبحت لان صار بيه ريحة گلي ، كملت ولبست البرنص والخاولي ولفيت روحي بالعباية حتى ليبين من شي

طلعت ودخلت بسرعة للغرفة وسديت الباب ، علكت العباية ورة الباب وكعدت على ميز التواليت اجفف بشعري طبعًا اهل امين كلهم ياخذون ملابسهم ويبدلون بالحمام من يسبحون الا اني ما اعرف اله بالغرفة

ومرة جربت ومن اجيت البس البجامة زلكت و وكعت على ظهري ومن يومها بطلت وكمت اخذ عباية راس من اطب اسبح حتى ألبسها على البرنص

كملت شعري ونزعت البرنص وبديت ارطب جسمي ، كملت وتعطرت ولبست دشداشة قصيرة مال نوم واخذت موبايلي اگلب بي علما يرجع امين

صارت الـ12 وهو ماكو واني عيني متاخذ نوم ضليت كاعدة انتظرة ، للـ12 ونص ياله رجع

امين : السلام عليكم

ديمة : وعليكم السلام ، تاخرت

امين : اي والله صارلنا هواي ما متشاوفين واخذتنا الكعدة ، ليش انتظرتني جان نمتي

ديمة : فتحت الكنتور طلعتله تراك ، عيني متاخذ نوم
انطيته التراك راح بدل واجه

امين : اكلج الغرفة بيها ريحة كيك

ديمة : قدمتله ايدي ، اباوعله نزل راسه باسها

امين : اي ما كتيلي شنو هالريحة

ديمة : ههههه ما اقصد تبوسها بس داكلك شمها ، تقصد هالعطر مو ؟

امين : اي والله صح هاي ريحة جسمج

ديمة : اي هذا المرطب مالتي بريحة الفانيلا ، طيب ؟

امين : يخبل تصدكين ساعات اصفن عليج اريد الگالي لولة وحدة بيج وعجزت الگه

ديمة : شنو يعني لولة ؟

امين : يعني عيب

ديمة : منو گال ، انداريت عليه شوف وحدة من العيوب العندي

امين : شنو

ديمة : اشرتله على النمش الي على جتافي ، باوع جتافي مليانات نمش هنه وظهري ، ما سمعتله صوت انداريت لكيته صافن عليه ، شبيك ؟

امين : كل عقلج تعتبرين هذا عيب ؟

ديمة : طبعاً عيب متشوفهن شلون مشوهات جسمي ، اباوعله سحب التعلاكة مالت الدشداشة ودنك خال شفايفة على جتفي

امين : انتِ تكولين عنهن عيوب وهمه يكولون ( وما النمّشُ إلّا رِمالُ جنةٍ؛ تطايَرتْ فسقَطَ بعضُها على الأرص ولم يجد مستقراً فلجأ الى الجميلات )

انتِ تشوفيهن عيوب واني اتمنى ابوسهن نمشه نمشه وعند كل نمشه اوكف واغازلها ياله اعبر على البعدها

ديمة : قشعر جسمي من كلامة وغمضت عيوني من حسيت بشفايفة تتحرك على جتفي وركبتي

امين : بخفوت عدديلي كل العيوب العندج حتى ابوسهن عيب عيب

ديمة : حاولت ادفعه عني بس هو اطول واخشن مني ما اگدرله ، همستله امين حباب و... ، ابتعد وسند راسه على راسي

امين : اششش كلشي لتحجين ، مشتاقلج اني ديمة اريدج الى متى راح تبقين حارمتني منج

اني كاعد اعيش حرب نفسية وياج صاير حالي حال العطشان ويمه دولكة ماي باردة ثلج وما كادر يلزمها ويروي عطشه بيها ، اني هيج وياج ديمة

ديمة : كلامه لصمني على حلگي ، جبرت نفسي اسكت واخلي يسوي الي يريده بالنهاية لو رفضت هسه شراح اگله شنو عذري ومشت عليه اليوم وبعدين ؟

فزيت على ملمس ايده التسحب الدشداشة عن جسمي ، مددني على الجرباية وصار فوكي ومن دنك عليه باسني بدت معاناتي بهالليلة الطويلة

تقربلي واني جوا وكلما اسمعه يتغزل بيه غزل جريئ احس روحي تريد تطلع ، هسه هو مو زوجي وراح يصيرلي شهر ويا ليش لحد الان مداكدر اتقبلة او على الاقل اتعود على هالشغلة التصير ببيناتنا ما اعرف

مرت الليلة وانتهى بيه الامر نايمة على صدره وميغطيني غير لحاف خفيف

اني صافنه بالفراغ وهو ايده على شعري وكل شويه يبوسني من راسي ، حسيت بايده تلزم حنجي وترفعه اله ، باوعتله شكد مبين مرتاح حتى عيونه تضحك

امين : شبيج يروحي ليش كلما اتقربلج احسج مو طبيعية

ديمة : لا متوهم بس انت تدري لان مريضة اتعب بسرعة ، مسح على خدي ودنك باسني من شفايفي

امين : اسف اذا اذيتج بدون ما اقصد والله كاعد احاول اعاملج بحذر بس الظاهر من تصيرين بحضني افقد وما احس على روحي بعد

ديمة : حاولت ابتسمله ولا يهمك ما صار شي ، باس شعري وشدد حضنته عليه ، رجعت راسي على صدره وغفيت وبگلبي الف هَم

_____________________________________

دنيا : كاعدة ادخل المعلومات اليمي بالحاسبة ودگ موبايلي وكالعادة المتصل خالة رميم

عواطف : ادري شنو السالفة موبايلج مسنتر الوقت ميتصل الا واحنه بعز الشغل

دنيا : ضحكت وكمت ، هاي بعد ، اخذت الموبايل وطلعت ، فتحت الخط الوو خالة حبيبتي

رميم : حبيبتي دندون هذا تيم اگل راسي حتى دربي تيهته من ورا متحاجي وتخلصيني من نگه راح اشك دشداشتي من ورا

دنيا : ابتسمت انطيني يا

رميم : هاك تيومي احجي ويه ننه

تيم : الووو ننه وينج هذا احمد عڤني وسوالي تفف

دنيا : يا حبيبي ميخالف اني اعلمه هسه بس ارجع ابسطه

تيم : ثوكت تجين

دنيا : شويه واجي يروحي ، تريد اجيبلك شي ويايه

تيم : لا بس تعاي

دنيا : سودة عليه والله بس اكمل الي بأيدي اجيك ، يله يكلبي روح اكل عمية ويه بيبي ونام واني من اجي انام يمك

تيم : ماثي بيباي

دنيا : بيباي حبيبي ، سديته ربي ليحرمني هالصوت ، انداريت لكيت يوسف ورايه لازم كوابة جاي

قدميلي واحد ، اخذت رشفه منه وتنهدت

يوسف : كالعادة تيم مو

دنيا : اي والله كسر خاطري يريد ارجع للبيت

يوسف : هواي جاي يستفقدج وسالفة الدوام هاي مأذيته بواسطة تعود على وجودج ويا طول اليوم

دنيا : شسوي هاي بعد لازم يتعود بالنهاية اني عندي شغل ومضطرة اعوفه واداوم

يوسف : ما مضطرة

دنيا : لا مضطرة هذا مستقبلي ولازم اعتمد على نفسي وابني ، الواحد مجبور رغم الظروف يبنيله حايط يستند عليه لان ميعرف شضامتله الايام

يوسف : كلام سليم

دنيا : هزيتله راسي بتأكيد ، يله من رخصتك اروح اكمل شغلي ، رجعت للمكتب اشتغل بكل مابيه ما اريد يبدر مني اي خطأ حتى ما اخلي عمو والولد يكولون عليه من تزوجت يوسف كمت اخربط بالشغل

صارت الوحدة وصار وقت انتهاء الدوام ، بدو الاغلبية يطلعون الا اني ابقى اخر شي لان عمو والولد اخر الناس يطلعون واضطر ابقى حتى ارجع ويه يوسف

جيهان : هاا دنيا هم متطلعين ؟

دنيا : للاسف لا خطي يتأخر شوية راح اكعد هنا انتظرة

سفير : تجين اني اوصلج

دنيا : لا شكراً جزيلاً متقصر ، اني منتظرة الخط ، سلمو عليه وطلعو واني كعدت ارتب بالمكتب لحد ما اتصل عليه يوسف حتى نطلع سوه

كمت لميت غراضي وطلعت صار بوجهي عمو والشباب

يحيى : الله يساعدكم بويه

: ويساعدك يابه

يحيى : يله استعجلو خلي نطلع ميت جوع اني وامكم مسوية دولمة يعني مابيها مجال اليتأخر انعل والديه

جياد : توكل يابه احنه لاحكيك

يوسف : يله دنيا

دنيا : طلعت ورا ، صعدت وهو حرگ

يوسف : محتاجة شي الج او لتيم نجيبه ويانه

دنيا : لا كلشي عندي ، ضميت اديه وغمضت عيوني والله من التعب عيوني بعد ما اشوف بيهن

يوسف : اليوم الشغل هواي مو

دنيا : تنهدت اي والله ايدي ماتت كد ما كتبت واشتغلت على الحاسبة ما شاء الله اليوم كلش صار علينا لود

يوسف : لتضغطين على نفسج زيادة عن اللزوم ، لتنسين من غير الشغل عندج تيم وحدة يرادلة عشر حواصل واني جاي اشوفج حتى نوم ما جاي تنامين زين

على كيفج ويه روحج تره تاليها يتراكم عليج التعب وتتمرضين

دنيا : اعرف والله بس مو بأيدي اذا على تيم ما اكدر بدون شعور رغم تعبي ما الگه روحي اله افتر ورا لعد اني عليمن اجيت يا يوسف غير علموده

اباوعله شو هذا باوعلي صفح وگلب خلقته ، هذا شبي هستوه جان يحجي طبيعي شبي هسه

يوسف : يله ست تفضلي

دنيا : نزلت ولحكته ، دخلنا جوه وتلكانه تيم بالصالة يصفقگ لان اجينه

يوسف : هلا هلا بالتلگه اهله افيييش بوية شهالبوسة

دنيا : ابتسمت ، حبيبي شلون فرحان لان اجينه

يوسف : يله دنيا تعاي

دنيا : سلمت على خالة والبنات ولحكته ، صعدت بسرعة اخذت تيم علما يوسف يسبح حتى ياخذه واني اكوم اسبح

بوست اديه تدري شكد اشتاقيتلك اليوم ، كل شوية اكول شوكت ارجع وابوس تيومي واسويله شبيگه

تيم : سويلج شبيگه ؟

دنيا : اي حباب ، حضني بوست ركبته يمه الشبگه يمه
ابتعدت عنه وباوعت لخده وفزيت ، هاي ليش هيج خدك حبيبي

تيم : مو دتتلج احمد عڤني

دنيا : يحبيبي زين بيبي وين جانت عنك

تيم : يمي وسيحت على احمد وببريز (ابريز) سيحت على بيبي وسوتلي تفف

دنيا : استغربت كلامه ، ابريز سوتلك تفف !!

تيم : اي

دنيا : يابه غير متت قهر من سولفلي بله هاي ما استحت على كبرتها حاطه عقلها بعقل طفل صدك جذب جهال بيناتهم شهالتصرفات التافهه هاي

والله كون اگل ليوسف حتى يطيح حظها بس اني اعرف بس يحاجيها تسويلها مشكلة وتحرض علي ويرجع يتكاتل ويه يوسف وهمه ما عولو يصالحوهم
بس بسيطة اني اعلمها عباله تستغفل عدم وجودنا وتستفرد بالطفل

سمعت صوت يصيحلي ، صحت من مكاني هاا يوسف صحتلي ؟

يوسف : اي جيبلي خاولي من يمج هذا اليمي وكع من التعلاكة

دنيا : يله ثواني ، كعدت تيم على الجرباية وكمت فتحت الكنتور حتى اطلعه خاولي ، سحبت خاولي واجيت اروح بس صارت عيني على قمصانه

انداريت اتاكد ماكو احد ورجعت سحبت قميصة صعدته لانفي ، اخذت نفس من مكان الياخة وغمضت عيوني ، اووووف اتمنى لو اكدر اتقرب منك واشمك هيج

رجعت القميص لمكانه وسديت الكنتور ورحتله ، دكيت باب الحمام ، فتح الباب ومد راسه ، اباوع لكتافه منكعه وشعره يقطر مي

احم الخاولي ، قدمته اله اخذه وصفن بوجهي

يوسف : ما بيها مجال تجين تليفين ظهري ؟

دنيا : اي وحدة طبيعية تنسأل هيج سؤال مو المفروض تصير عدها ردة فعل ؟ الا اني الحمارة بدور شعور تقدمت مثل الثولة وما احس الا بايدة تدفعني بخفه

يوسف : هوب هوب يمعودة وين اشاقة وياج شجاج اصلا اني خلصت حمام

دنيا : والله العظيم طبيت بنص هدومي ، غير بلحظتها ردت الكاع تطمني ولا صاير بيه هالموقف

انوب شفته اخذ الخاولي وطب يضحك غير متت قهر
رجعت كعدت يم تيم واعض بأصابعي والله حتى عيوني دمعن من الفشلة

اباوعله طلع لاف المنشفه على خصرة وينشف بشعرة
اشرلي بأيده

يوسف : يله كومي سبحي بسرعة حتى ننزل نتغدة

دنيا : بدون ما اجاوبه اخذت هدومي ومشيت

يوسف : اذا تردين واحد يليف ظهرج عود صيحيلي

دنيا : عطت بي ، انت ليش متحترم نفسك ، اندار عليه وخزرني

يوسف : احجي عدل احترم نفسك شنو ليش تخليني اجاوز عليج

دنيا : لا تتجاوز عليه ولا اصلاا الك علاقة بيه

يوسف : كل هالعصبية لان ما خليتج تليفين ظهري عمي لو ادري هيج تضوجين جان فتحتلج الباب على وسعها

دنيا : احس وجهي اشتعل نار خزرته ومشيت للحمام بدون لا اجاوبه

سبحت بمي ثلج واحس دمي فاير ، كملت حمام وبدلت وطلعت لكيته مبدل وكاعد منتظرني ، سحبت تيم منه اخذته ونزلت وهو ورايه

رميم : هاا يمه نعيمًا يله تعالو كعدو

دنيا : كعدنا نتغدة وطول ما احنه كاعدين اني عيني على ابريز كلما اتذكر انها مصيحة على تيم وتافله عليه بودي اكوم اخلي راسها بالماعون

يحيى : بوية دنيا ليش ما جاي تاكلين شنو ما عجبج الاكل اخابرلج المطعم اطلبلج اليعجبج

دنيا : لا عمو فدوة لكلبك والله الاكل يخبل عاشت ايدج خالة

رميم : لعد يمه ليش ما جاي تاكلين

دنيا : والله خالة تعبانه ما اعول اكمل واروح انامي جم ساعة

ابريز : والله اني ما اعرف عليمن خابصة روحج بالدوام متكعدين وتسكتين حالج حالنا لو انتِ وسهير تموتن اذا كعدتن بالبيت روحجن بالشارع

دنيا : كلمن ينام عالجنب اليريحة حبيبتي واني مرتاحة بالشغل ، افضل التهي بمستقبلي احسن ما اكعد بالبيت واضل ادور مشاكل و احجي على فلان واشيل غيبة علان

علي : شهالحجي الماله داعي خوية هسه صارت التكعد بالبيت تدور مشاكل وتشيل غيبة العالم شو انتِ متعرفين تحجين ثمني كلامج انوب

يوسف : وانت اصلا ليش تدخل بسوالف النسوان وشنو تصيح على مرتي صوتك هذا ممنوع يتعلى عليها بحضوري

علي : هاي بعد متكدر متدخل لازم الد**** البيك تنبص

يوسف : هاي ويامن هالحجي ولك

دنيا : اباوعله كام يريد يروح لجهة علي ، لزمت ايده عليك الله يوسف اكعد لتسويلنا مشكلة

يوسف : ما سمعتي شيمسلت

يحيى : اكعد بوية ، اكسر الشر واكعد حبيبي وانت الثاني لك ما استحيت على روحك شلون تحاجي اخوك هيج مو هذا احترامه من احترامك

باجر عگبه شلون بزرك يحترموك وهمه يشوفك تجاوز على اخوك ولسانك يتلفظ بهالفاظ السخيفة هاي هسه اذا واحد منهم نطق هالكلمة بره تكدر تگله ليش تحجي هيج مو هو متعلمها منك

علي : العفو يابه اني ما متقصد اقلل من احترام احد بس مرت يوسف الحجته عيب

يحيى : ما عجبك كلامها هي اخيتك صيحلها على صفحة وكلها خوية ترة انتِ كيت وكيت حجيتي واني ما تقبلت كلامك مو تصيح عليها كدامنا وهي تره تكدر تردك بس احترمت وجود رجلها ووجودنا وسكتت

علي : العفو خوية ما انتبهت على روحي من صيحت عليج امسحيها بشاربي

دنيا : ما صار شي واني هم اعتذر

يحيى : بارك الله بيكم ، يله كعدو خلي نكمل غدة

دنيا : كعدنا همه كملو بس اني ويوسف ما اكلنا ، اعرفه اني من يضوج من شي تنسد نفسيته

كمل الكل غدة واني كمت الم المواعين ويه البنات

جمانة : ااخ ااخ اريد فد يوم نلتم ونتسمم ومتسويلها مشكلة

سهير : يعني ما تعودتي على سوالفها كلما شافتنا ملتمين ومتونسين تطلعلنا سالفة

دنيا : خليت المواعين يالسنگ وباوعتلهن اكلجن شو اني تندمت لان رديت عليها احس فشلة صارت بسببي مشكلة والاكل طلع زقوم عليكم من ورايه

رميم : ليش انتِ شعليج ، هي البدت وبعدين احنه متعودين على هاي النقاشات متشوفين عمج وره ما نهى السالفة رجعنا ناكل ولا كإنما اكو شي

الحجي بيناتنه كل البيت تعلمو على سوالف ابريز وكامو يلبسوها وهي من متشوف وجه تنجب وتسكت

فلو حجت وياج بعد انطيها الاذن الطرشة ولتتعبين لسانج وياها لان هاي وحدة روحها بالمشاكل وتكيف من واحد ينطيها وجهه ويرد عليها

يله يمه لتضوجين روحج وصعدي نامي وارتاحي

دنيا : تمام يله من رخصتكم ، صعدت فوك ، فتحت باب الغرفة ودخلت لكيت يوسف نايم ومخلي ايده على عيونه لا ما دام السالفة صارت بيها تغطية عيون معناها يوسف واصل مرحلة من العصبية

اشرت لتيم يسكت واجيت شلته وطبيت للغرفة بدلت ملابسي وتمدد يمه وكمت ادكدك اله علما نام واني هم نمت

كعدت العصر ما لكيت تيم يمي ، كمت طلعت من الغرفة لكيت يوسف هم ما موجود عرفته ماخذ تيم ونازل لبست ثوب صيفي طويل ومستور مال بيت ويا حجاب ونزلت

لكيت خالة كاعدة وباب الحديقة مفتوح على الصالة وجاي هوى من بره يجنن رغم الجو حار بس العصر وبالليل الهوى حلو وعمو خال مبردات كبار بره فاليطلع ميحس بحر

اكول خالة شكو شنو هالوهسه البره والولد ويوسف وين

رميم : غير سوالف عمج المكسرة والله شنو طلع يتمشى للمجمع وشايف هناك بانيو نفخ واشتهى للجهال يسبحون بي

وهاي شوفة عينج جابه واجه وهسه فارشلي يا بنص الحديقة وراح جابلي رجال ينفخة اله وذاك ويا هو واحفاده بطرگ الشورتات مطبشيلي بالماي

بشرفج هاي هم سوالف رجال عاقل البكعده هسه كاعدين ومكابلين السجادة مو حايريلي بهالسوالف

جمانة : ههههه والله خالة ولتزعلين مني انتِ كئيبة يعني شكو بيها اذا ونسهم وونس روحه

سهير : اي سودة عليه من الصبح للظهر هو كاسر ظهرة بالشغل خلي يغير جو شويه ويرفه عن نفسه

رميم : والله انتو كلكم متعجبوني

دنيا : هههههه والله سوالفج يا خالة ، اكول صدك تيومي وينه شو باوعت هسه ما لكيته

تيم : اني هنا

دنيا : انداريت عليه ، اباوع نازع وباقي بالحفاظة ، كعدت بمستوا ، هاي ليش نازع حبيبي

تيم : بابي گال اسبح وياهم

دنيا : ميخالف بس اوكف اجيبلك ملابس حتى من تطلع ابدلك هسه اجي مو تروح ، ركضت لفوك جبتله خاولي وملابس ونزلت

باوعتله شو هذا بس شافني سحب لزكات وركض وهو مصلخ ، عزة بعيني ركضت ورا اريد الحگه ماكو تكولون طار

طلعت للحديقة ورا اصيحله وهو يركض عباله راح الزمه اطببه جوه انوب شافه يوسف مصلخ كام ورا يركض ويضحك

يوسف : يا بوية هذا طالع مصلخ انفضح شرفك وسترك يا يوسف يا بوية يابوية ولك تعااال ابن الگلبب مطلع البامية وتركض فضحتنااا

دنيا : لزمه يوسف وذاك ميت ضحك عباله جاي نلعب ويا

يوسف : نعلعلا والديك اسحنت روحي واني اركض وراك مو عيب تطلع هيج اني مو كايلك هذا المكان عيب تطلعه وتمشي

دنيا : تؤ تؤ ليش تصيح عليه تره طفل قابل شيفتهم هو ، اخذته منه ، تعال حبيبي خليته على القنفه ولبسته حفاظة وفوكاها شورت وشلته كعدته ويه ولد عمامه بالبانيو

اباوعله من كعد كام يضرب المي برجلية ويضحك ههههه بعد عمري مكيف ، رحت جبتلي كرسي وكعدت
يمه خاف يوكع يصيرله شي ، اباوع ليوسف جاب كاميرا مال صور فورية وكعد يصور بتيم

يوسف : شو باباتي باوع هنا ، عفييييه بالسبع ، باعي دنيا

دنيا : يبعد گلبي شلون مكيف

يوسف : والله صوجي اني صار هواي ما مطلعة ولا مونسه ، شتكولين اخذكم الاسبوع الجاي لكربلاء هم نزور وهم نغير جو

دنيا : ياريت والله حتى اني ضايجة

يوسف : لعد هاهي متفقين على الاسبوع الجاي ان شاء الله

دنيا : ان شاء الله ، رجعت كعدت وجره وحدة 3 ساعات ياله تيم افندي قبل يطلع من البانيو ، سحبت الخاولي لفيته بي وكمت دخلت بي لجوه ، بدلت ملابسه كلهن

يوسف : ابن النعال باع عيونك من الماي شلون صارن

دنيا : هسه اخلي ثلجه بالخاولي وابردهن اله لتشيل هم ، مضى اليوم بين كعدتي ويه البنات وخالة وبين تيم

اليوم ركض ركض ، وطبها من كد ما افتريت وره تيم
ما حسيت بروحي شوكت غفيت من التعب

ما كعدت الا صوت يوسف يكعدني للدوام ، كمت فتحتله الباب ، تثاوبت والله بعد بيه نومة ،
صباح الخير

يوسف : صباح النور

دنيا : باوعتله لابس قاطة معناها لازم استعجل وما اتاخر ، عفية يوسف ودي تيم يم خالة واتزل انتظرني جوه علما اسبح عالسريع وابدل والحكك

يوسف : خوش لعد منتظرج جوه مو تتأخرين

دنيا : لا ما اتاخر ، دخل هو اخذ تيم واني رحت طلعت هدومي شمرتهن على جرباية يوسف

دخلت سبحت بسرعة ولفيت الخاولي على جسمي وطلعت ، شهكت اول ما شفت يوسف كاعد على الجرباية وهو من شافني گبل عاط بوجهي

يوسف : يمعوده صدك جذب شلون تطلعين بدون خاولي على راسج هسه تتمرضين فوكاها وراج طلعة وراح تطلعين شعرج منگع

دنيا : لزمت شعري ، على كيفك شجاك ، اباوعله راح طلع من كنتورة خاولي واجه

يوسف : شو وخري ايدج

دنيا : نزلت ايدي وهو خله الخاولي على راسي وفرك شعري وهو يدردم

يوسف : والزهرة هسه تتمرضين ، ليش تطلعين هيج

دنيا : لعد انت مو تطلع هيج لو هو الحساب بس اليه

يوسف : يايوم شفتيني طالع من الحمام بدون ما انشف راسي ، دباعي شعرج شلون يكطر ماي

دنيا : سكتت عنه لان يوسف دكمة اذا اشتغلت بعد شيسكتها

ضل ينشف شعري ، شويه وحسيت بايدة توكف على راسي ، باوعتله صافن على ركبتي

يوسف : شبيها ركبتج ؟

دنيا : استغربت سؤاله ، شبيها ؟ اباوعله مد اصابعه مشاهن بخفه عليها

يوسف : هنا اكو اثر شخطة

دنيا : هاا ما ادري يمكن تيم وهو حاضني جرحني باظافرة اليوم اقرض اظافرة

لزم اطراف شعري وخرهن عن ركبتي ورجع يمشي اطراف اصابعه على ركبتي

يوسف : ياذيج الاثر

دنيا : للـ لا لا اصلا ما احس بشي

بلعت ريكي من حسيت بي يدنك يخلي راسه بركبتي ويبوسني

يوسف : وهسه هم متحسين بشي ؟

دنيا : يوسف رجاءًا وخر شهالتصرفات ههـ ها.. غمضت عيوني من حگ لحيتة بركبتي

يوسف : زين وهسه ما حسيتي بشي ؟

دنيا : صار تفكيري يم لحيتة التمشي على ركبتي واذاني ، حاولت ادفعه عني بس اديه ميحملني

فقدت اخر ذرة سيطرة على جسمي من لزم وجهي باديه وهمس ضد شفايفي بخفوت

يوسف : يا گلبه ليوسف انتِ ، ميت عليج اني ، احبج والزهرة احبج

دنيا : بعد نهاية هالهمسات الي اخترقت كل ذرة بجسمي تقرب وباسني من شفايفي

ما جانت مجرد قبلة ، جانت مجموعة من المشاعر اجتمعت بقبلة وانفجرت بلحظة ما مخطط الها

حسيت شفايفه تعاتبني ، تشتاقلي وتحضني ، اهتزت كل حصوني على إثر هالقبلة

والي من بعدها تغيرت هواي اشياء بحياتي

___________________________________

زبيدة : سديت جنطتي وسحبتها نازلة جوه ، تلكاني جدي بباب الخروج

النوح : هاهي قررتي ترحين تكعدين بذاك البيت

زبيدة : اي ، اريد ارتاح بعيدًا عن الهوسة على الاقل بس هالفترة

النوح : على راحتج ، اني وديت العمال من البارحة يجهزو الكم واليوم يوصل الاثاث والغرف الجديدة

يعني اليوم بس ودو غراضكم وباتو هنا وباجر انتقلو على راحتكم

زبيدة : ماشي يله من رخصتك

النوح : زبيدة حسبي حسابج الاسبوع الجاي على جية عمج فاضل من بره هو وعائلته راح ابلغ الكل بخطوبتكم انتِ وهارون وخواتج ورجولتهن لازم يكونون حاضرين

زبيدة : هزيت راسي ومشيت طالعة من البيت ، طبعًا من يوم الجدي گل لهارون تزوج زبيدة والعركة الصارت اثر هالقرار واني وين ما اروح اسمع المشاور واشوف المنداس بين بنات وولد عمامي

خو من قررنا نطلع من بيت جدي كامت هيام تطب وتطلع تتبسم بتشفي وكلما تشوفني تصيح روحة بلا ردة واني انقهر عليها عبالها خوفًا منها احنه طلعنا من البيت خطية متدري جدي شضاملها من مفاجأة

تنهدت وكملت طريقي لبيتنا الجديد ، جان على يسار بيت جدي وعلى اساس جانو بيت عمي فاضل كاعدين بي وحبو يغيرون البناء فكلهم جدي عوفو هالبيت وابنو القطعة الي بصفه وكعدو بيها

وحسب كلام بيبي همه هسه مسافرين لدبي وراح يرجعون من يكمل بيتهم والظاهر هالايام راح يكمل بيتهم لهالسبب الاسبوع الجاي راح يجون

دخلت للبيت لكيت خالة وئام ودادا واكفات ميدري شيحجن على البيت ، خليت الجنطة على صفحة وسلمت عليهن

وئام : هلا امي ليش تاخرتي

زبيدة : علما لميت غراضي اخذت وقت ، هاا بشرن شلونه البيت

ام حسن : يخبل والله ما ادري عمج ليش ما عاجبه البناء البي

وئام : هاي سوالف غفران المسموسة هو شعليه

زبيدة : منو غفران ؟

وئام : مرت عمج الشفية

زبيدة : شبيها ؟

وئام : الله ليراويج البيها يا يمه ، روحي انتِ يمه رجعي ارتاحي ببيت جدج راسج بعده ما طاب لتضلين تفترين

زبيدة : تمام واذا احتاجيتو شي خابروني ، عفتهم وطلعت اتمشى بالحديقة واديه بجيوبي

فكرة الزواج شي عمري وحياتي ما جنت متقبلتها ومن الله خلقني واني نافرة فكرة انُ احد يشاركني حياتي

وهسه لازم اقبل اتزوج ومنو ، هارون !! الماشفت منه شي زين من شفته وشافني

غير هيج هو مريض واني عصبية شلون نتراهم سوه
لا اني اكدر اتحمله ولا هو تالي هالعلاقة الفاشلة شنو ما ادري

زين خواتي واخوية شلون راح اكدر اواجهم وبأي عين ، اني الجنت احجي على فلانه واقلد على علانه وما مخلية امام ونبي ما حالفة بيهم إني ما راح اتزوج
ومستحيل ادخل ادم واسمحله يشاركني علاقة حتى لو جانت مجرد اسم

يا ترى شنو ردة فعلهم من يدرون إني راح اتزوج اكثر انسان زاح الحدود والانسانية بيني وبينه

خوفني ، حجة عليه ، طعن بشرفي وبشرف خواتي ، ضربني ، خدرني ، ربطني وكإني دابة ، هجج حيواناته عليه ، وصلني لمرحلة عمري ما وصلتلها

يومين اني بسببه ما اكدر انام مثل الاوادم انام وافز مخروعة ، شلون راح اكدر اباوع لنفسي بالمرايه واشوف نفسي بنفس الصورة الجنت اشوفها قبل واني راح اتزوج هالشخص

هسه عرفت معنى مقولة "اهلك تهلك "

فعلا الانسان بدون اهله "امه وابو " يهلك ، ينذل وتنفرض عليه امور عمره ميتخيل نفسه يسويها

وهذا الداعيشه اني ، صدك احس نفسي داهلك وامي وابوية مو وياي وينجدوني ، وحيدة ماعندي احد

خواتي واخويه رغم كلشي عدهم امهم تحبهم وتحن عليهم بس اني ماعندي احد يحبني ويحن عليه

حتى جدي الي المفروض يكونلي سند وقوة بعدم وجود اهلي لكن للاسف هو جان اول الناس الي استغلو ضعفي ووحدتي واول ما ساومني ساومني على سعادة اخواني المستحيل اكون انانية وافضل سعادتي على سعادتهم

ما اكدر ارفض واشوف معين طول حياته مشلول وحتى للحمام ميكدر يروح وحدة وحياته محصورة بكرسي متحرك

دنيا كدام عيني تصبح وتمسي تبجي وتتحسب على القتلو ابنها لا وللان متكدر تتقبل يوسف لان تحس اله ايد بالي صار ، ما اكدر ارفض واني ادري اذا القتلو ابنها تعاقبو على السوو ممكن يبرد گلبها وتكدر تكمل حياتها بسلام

ديمة انتهكت حرمة جسمها من اقرب الناس الها وصوها صارت اداة تتهدد بيها ، انخانت من اعز الناس الها

والإنسان الجانت مستعدة تتحمل كلشي علموده اول ما خذل خذلها وخسرها اهم شغلتين ممكن يملكها الانسان ، احترامها بعيون اهلها وصحتها الما ممكن تكدر تعوضها بعد لو اشترت مال الدنيا

ما اكدر ارفض واعيش حياتي بسلام واختي عدها حق وبإمكاني ارده الها وانتقم من كلمن اذاها ووصلها لمرحلة تصير مثل الجهال متكدر تسيطر على نفسها

والله انعل ابو سعادتي التخليني اشوف اخوتي معلعلين واني مرتاحة وبالي صافي

مسحت دموعي وانداريت راجعة للبيت ، بطريقي شفت معين ، ابتسمت وتقربت منه ، كعدت يمه ، شبيك

معين : جدي گلي البارحة راح يدفعلي تكاليف السفر مال العلاج واني ما رضيت

زبيدة : سويت نفسي ما اعرف عن شنو جاي يحجي ، علاج شنو ما افتهمت

معين : باعي زبيدة راح اسولفلج بس اريد الموضوع يبقى بيني وبينج

زبيدة : احجي اسمعك

معين : باخر مراجعة الي يم الطبيب گلي اكو احتمال ارجع امشي بشرط اسافر بره اسوي عملية معينه ياله اكدر ارجع امشي

زبيدة : كمزت عليه حضنته عود اني ما ادري يعني وكلش متفاجأة ، ايييي الف الحمدلله واخيراً راح اشوفك تمشي مرة ثانية

معين : شبيج زبيدة جاي اكلج اني رفضت

زبيدة : وليش رفضت يحظي هاي فرصة واجتك على طبق من ذهب

معين : زبيدة العملية جداً مكلفة وادري لو كايلج جان رحتي بعتي المحل والبيت حتى تسفريني ادري بسوالفج ومن هسه والله العظيم وداعة ولدي الكسرو ظهري ربع دينار منج ما اخذ هاي اني جاي اكلج

زبيدة : عوفك مني هسه ليش متقبل جدي يساعدك وهو متمكن يعني فلوس عمليتك لا شيء بالنسبة اله

معين : وكرامتي زبيدة ! هاي عود انتِ العاقلة هيج تحجين ، شلون تقبليها عليه اخذ منه فلوس واخلي يفضل عليه وهو تهجم عليه وضربني هو اني حجي ما احجي ويا شلون اخذ فلوس منه

الله وكيلج حتى مصرفجن ومصرفي مو منه من إيرادات المحل لا عبالج عايشات هنا من جيبه

زبيدة : كلامك كله صحيح واني ايدي بأيدي وعاشت ايدك من تفكر هيج

بس هم خلي ببالك شغلة احنه النه يم جدي فلوس وبابا الله يرحمه كاتب بوصيته انُ اله يم جدي مبالغ جبيرة اجرة السنين الجان يشتغل بيهن ويا وجدي ما انطاهن اله

بس قانوناً هنه اله لان حسب الفهمته من دادا جدي جان يعامل عمامي حالهم حال الموظفين والهم نسب وارباح بالشغل وكل هالشي مسجل مستندات موثقه

فشنو رأيك احاجي جدي واخلي يقدر المبلغ شكد وتروح بي تسوي العملية وهيج انت مسافر بفلوس ابوك مو بفلوس جدك ومحد متفضل عليك شتكول ؟

معين : على يا اساس زبيدة هذا حقنا كلنا شلون ترديني اخذ حقج وحق خواتي واتصرف بي بكيفي لا مستحيل اسويها هذا حقجن وانتن اولى بي

زبيدة : ومنو كال انت راح تاكل حقنا بالعكس احنه حقنا مضمون

معين : ما افتهمت شلون مضمون

زبيدة : انت راح توقع وتبصم على ورقة مكتوب بيها انُ اني ودنيا وديمة وامك النه يمك كذا مبلغ وهيج احنه راح نضمن حقنا وانت تعتبر هذا دين شوكت ما الله يرزقك رجعه النه شكلت ؟

اباوعله دنك راسه ودموعه نزل ، لزمت ايده هاي ليش دتبجي حبيبي صدك جذب انعل ابو الفلوس التنزل دموعك والله لو اعرف اخلقلك الفلوس خلق ولا اشوفك بهالحال

معين : بغص النظر عن كلشي صار بس احمد الله الف مرة من رزقني باخت مثلج ، المثل گلبج وطيبتج يا خيتي بهالزمن قلال ، سبحان الزرع بيج وبأمي وسيلة هالحنية والگلب الطيب

زبيدة : حضنته ومسحت على راسه ، سعادتك عندي انت وخواتي تسوه الدنيا وما بيها ، والله وطلعت احبكم هواي وما حاسه على نفسي

معين : وعد زبيدة وعد وروح عمار وايثار كل فلس راح اخذه منجن راح ارجعله الجن ضعف بس خلي الله يكتبلي اكوم على حيلي

زبيدة : ان شاء الله تكوم وترجع توكف وتمشي مثل الورد ، بست راسه وابتعدت ماسحه دموعه يله كافي دموع ابتسم وراويني سنونك مو خابصنه بيهن انت سنوني يخبل وسنوني بيض خلي نشوفهن المن ضامهن

ابتسمت من شفته يضحك ، طبطبت على ايده وكمت دخلت جوه وهيج مضى اليوم والاسبوع ركض بينا ركض

ما حسيت الا باصوات الكل جوه تسلم وتأهل بالعائلة الجديدة الدخلت علينا والي الله يعلم شنو طينتها يا ترى من طينة عمة بيداء وعمو فؤاد لو من طينة عمة بدرية عمو عبدالله ويا خوفي لو الزمرة الجاية تشبه بيداء وفؤاد

تنهدت وسديت الشباك ، نزلت جوه وطلعت لبيت جدي ، دخلت لكيت البيت مكلوب كلاب

خو بيبتي ما مخلية شي ما مسويته اصلا ما اتفاجئ اذا طبت علينا بعد شوية طابخة جدي وشايلته ببلم

شفت خواتي رحت سلمت عليهن ، ديمة كالعادة وجها يضحك وتضوي ضوي ما شاء الله عليها اما دنيا فما ادري شبيها وجها اصفر وكالبه وجها

اشرت لديمة شبيها دنيا ؟

ديمة : والله ما ادري صارلي اسبوع اخابرها مو على بعضها وداني امين يمها شفت هيج حالها حجيت ردت وياها ولا نطقت تكول كلشي ما بيه بس اني متاكدة جاي تجذب

زبيدة : لعد ما خابرتيني شبيج لسانج بي عظم

ديمة : ما ردت اقلقج عليها والله

زبيدة : بسيطة هسه وره الغدة تجن وياي لبيتنا ونكعد نفتهم شبيها ست الحسن

ديمة : تدرين شكد متشوقة اشوف البيت الجديد ، ذاك الاسبوع امين مشغول وما كدرت اجي

زبيدة : هسه تجين تشوفين البيت وتشبعين منه

حمزية : يله بيبي تعالن سلمن على بيت عمجن

زبيدة : مشينه وره بيبي تلكانه عمي الي استغفر الله كل نور ماكو بوجهه

فاضل : هلا ببنات العزيز شلونجن عمي

زبيدة : ردينا عليه بعد ما تعرف على اسمائنا وسلمنا على مرته المسمومه على كولة خالة وئام

غفران : انتِ بنت وسيلة مو

زبيدة : اي

غفران : ايييي مبين

بدرية : حبايباتي تعالن سلمن على بنات عمجن ، هاي
خيال واشواق وحنين

زبيدة : شهالمشاعر هاي

كرصتني ديمة ، احم اهلا وسهلا ، سلمنا من بعيد وما بادرنا ولا بوسناهن

حمزية : يله يمه تعالو تغدو

زبيدة : اني وخواتي سوينه حزب ويه بيت عمو يحيى وكعدنا نتغدة

اجه جدي وبلش واحنه بلشنا ناكل ورا وطبعًا حظي المصخم خله الشفيه يكعد كبالي والله من شفت خلقته انسدت حتى نفسي من الاكل

ذبيت الخاشوكة وفتحت بطل اللبن الي بصفي وشربت منه

النوح : بما انُ كلنا اليوم ملتمين على حب الله حبيت ابلغكم بعد اسبوعين ان شاء الله عقد بنيتنا زبيدة على ابنا هارون فتحضرو

زبيدة : من سمعته گبل طلع اللبن من خشمي وانظار الكل تحولت عليه وعلى هارون

****************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

برأيكم السوته زبيدة ويه اخوانها صحيح لو لا ولو جنتو بمكانها شنو جانت حتكون ردة فعلكم ؟

اتابع تعليقاتكم ❤️

.