الموت الحي الفصل الثامن وأربعون 48 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

زبيدة : كاعدة ومقابيلي اهلي الي عيونهم مصوبة عليه وبودهم ياكلوني بأسنانهم من بعد السمعو ببيت جدي

دنيا : اي ست زبيدة ما راح تتفضلين علينا وتوضحيلنا المهزلة الصارت من دقايق

زبيدة : مهزلتيش ؟

معين : زبيدة لتستفزيني وتخليني انسى انتِ اختي الصغيرة واتجاوز عليج ، شنو هالتمسلت الحجا جدي شنو عقدج بعد اسبوعين جايبينا تضحكون علينا انتو

زبيدة : تنهدت ، اعرف جان لازم اكللكم من البداية بس الموضوع صار بسرعة وجدي قرر فجأة يفتح الموضوع گدام الكل وما انطاني فرصة اكعد واسولف وياكم واوضحلكم كلشي

معين : تحجين ويانا بخصوص شنو ، على هالحجي معناها كلام جدي صحيح وانتِ !! انتِ وافقتي

زبيدة : اي وافقت

ديمة : وافقتي !! كل عقلج تحجين زبيدة شنو نسيتي السوا بيج هارون

يوسف : الظاهر الضربة الضربها الج خلتج تفقدين العقل الحاطته براسج ، لج انتِ تخبلتي شو كاعدة وتحجين طبيعي وكإن الصار شي عادي بيج شي انتِ ؟

دنيا : ميرادلها سؤال اكيد بيها شي والا وين اكو وحدة عاقلة تقبل بهيج زواج

زبيدة : ليش شبي هالزواج ليش داحسكم شادين ويه هارون زيادة عن اللزوم !!

يوسف : لج انتتتتتِ تحجييين صدددك ، مو هذا نفسه هارون الخله دمج بطولج ياااا محمدددد العربييي شهالبرووود هذا ترديييين تخبلينييييا انتتتتتِ

امين : اهدو يا جماعة وصلو على محمد هيج مواضيع متنحل بالهوسة والعياط ، خلونا نتفاهم بهدوء وعقل العصبية متجيب نتيجة

وئام : انت شكو على گلبك قابل اختك الوكعت بيها لو بتنا طبعا تحجي وانت مترهي

ديمة : يمه شهالحجي الماله داعي هذا

امين : لحظة ديمة ، اسمعي خالة اني تحملت منج كلام بما فيه الكفاية بس لحد واكلج اوكفي

اني من يوم الاخذت ديمة واني اشوف خواتها واخوها حسبة اخواني ويهمني امرهم واريدلهم الخير مثل ما اريده لاهل بيتي ومثل ما اني اخاف على اختي من خيالها اخاف على زبيدة نفس الخوف

معين : والنعم منك خوية

يوسف : اي والله ذهب انت امين

امين : رحم الله والديكم

المهم فيا خالة زبيدة اختي ولاني خايف عليها ويهمني امرها اريد نتفاهم وياها بهدوء لان عمره الصياح والعراك ما جاب نتيجة واحنه مو همج ولا جايين من الشوارع حتى نتحاور بهاي الطريقة وبالتالي يطلع صوتنا وهاي مو اخلاقنا

وهسه خوية زبيدة باوعيلي ، اني افتهم انتِ جبيرة وواعية ومحد اله حق يتدخل بحياتج الخاصة والله يحرسج كلنا ندري بيج عاقلة وتفتهمين وموافقتج على قرار مثل هذا اكيد جاي من سبب جبير

لان ومع احترامي الج ماكو واحد عاقل مثلج يشمر روحه هالشمرة ويرتبط بانسان مؤذي مثل هذا بدون سبب احجيلنا احنه اخوتج وكلنا سندج وبظهرج لتخافين من شي

زبيدة : حاولو تفهموني رجاءً ماكو لا سبب ولا اي شي من الي ببالكم مجرد جدي حاجاني بخصوص الموضوع واني من كعدت ويه نفسي حسيت انُ مبيها شي اذا اتزوج

اني كبرت بعد وخلص لازم استقر بحياتي ، الى متى ابقى وحيدة هيج العمر كاعد يتقدم بيه واني جاي اكبر خلي اعيش الباقي من عمري حالي حال البنات اريد اكون اسرة واصير ام كافي بعد الانسان يكبر ميصغر ومو كل يوم الواحد تجي فرصة يعيش

ديمة : وين الي على اساس حالفة الف يمين متتزوج وتبقى طول حياتها بدون زواج اشو كلامج هسه تغير
عبالك شخص ثاني ديحجي

دنيا : عمي اذا على فكرة الزواج نفسها ميخالف نكول الانسان من يكبر تتغير قراراته والزواج لا عيب ولا حرام هذا حقج محد يمنعج منه بس ما لكيتي غير هارون

خلصت الزلم من الدنيا ، خلص انقرضو وما بقى بهالكون الا هارون تتزوجي ، صاحية ، مخبلة انتِ

زبيدة : هسه شعليكم انتو لا اله الا الله عسى ما اشمر روحي من الشط انتو شكو والله حلوة هاي

معين : تاكلين تبن وتنجبين شعلينا شنو قابل هاي الحياة حياتج وحدج ، باجر عگبه اذا صار عليج شي تدمرينا تلاثتنا شنو لاكيج بالشارع احنه حتى نذبج هالذبه هاي

اسنعي ولج ترحين هسه وترفضين وتمشين عدل لو ارجع معين القديم واكوم امد ايدي عليج خاف عبالج ابوية مات واني تگرمت وتكدرين تلعبين بكيفج وماكو احد وراج بعد

زبيدة : لييييش تحجييي هيج هسه مرضك شعليه بالصار ولتكول على روحك مگرم شهالحجاية السخيفة هاي

امين : متكليلي ياخوية شجاج عود هاي انتِ العاقلة
، شجابرج وتقبلين تاخذين واحد اذاج ؟

ناقصج شي ، بعازة احد انتِ ، اشو بعدج صغيرة وجنج وردة تذبين روحج بهالنار ليش

يوسف : لانها غبية وللاسف كل احنه جنه مخدوعين بيها عبالنا عاقلة طلعت حمار لا والله الحمار طلع يفتهم اكثر منها

زبيدة : لتتتتتغلط عليييه

يوسف : انجبيييي واكلي تبن

دنيا : لا عبالج الحجيتي هسه انتِ اني مقتنعة بي لو خش بدماغي ، زبيدة انتِ محد يعرفج بهالدنيا بكدي
اعرف من نظرة عينج انتِ بشنو دتفكرين فلتحاولين تضحكين على عقلي

هاي السوالف وفريها على نفسج ولتكعدين تسطريها علينا ، افتهمنا تردين تستقرين وتتزوجين بس شنو السبب الخلاج تغيرين نظريتج تجاه الزواج

زبيدة : مو حجيت وكتلكم اني كاعدة اكبر واريد استقر خوما ابقى طول العمر وحيدة وتالي اعجز واموت وانوب تعفن جثتي ومحد يدري بيه

دنيا : آمنت بالله بهاي انتِ حقج بس ممكن اذا متصير زحمة عليج تقنعيني ما دام اني ثولة شلون الإنسان الطبيعي ممكن يتغير بأسبوعين هالتغيير الجذري هذا

من اسبوعين انتِ واكفه بنص استقبال بيت جدي تصيحين ومنتفضة على كلام جدي وصلتي لمرحلة جدي يمد ايده عليج ومتهتمين وتفرضين رأيج وبعلو صوتج تصيحين لو يبقى هارون اخر رجال بالدنيا ما اخذه

شنو الغيرج هسه وصرتي ميته عليه وتردين تتزوجي وتكونين أسرة ويا لا وتسعين حتى تصيرين ام هم

يله قنعيني احنه كلنا الكاعدين هنا منفتهم وانتِ العاقلة التفتهمين يله احجي ووضحيلنا سبب التغير المفاجئ هذا

زبيدة : ضليت صافنه بوجها احس لساني تربط ما اعرف شحجي بعد ، خلصت كل الاعذار العندي حتى جدي ما انطاني خبر انه راح يحجي اليوم وفجأة خلاني امام الامر الواقع

حتى ما حسبت حسابي وكعدت فكرت بشي ممكن اكدر اقنعهم بهالزواج من خلاله

ديمة : متحجين شبيج اكل لسانج البزون

زبيدة : باوعتلهم وتنهدت ، باعو اني راح احجي العندي ومن هسه كلام زايد ناقص ما اريد اسمع والا والله ردي ما راح يسركم

معين : احجي بس فضينا مو شلعتي گلوبنا حتى سكري صعد من وراج

زبيدة : باعو اني صدك ما جنت راضية وللان ما قابلة بس ، داكمل وقاطعتني دنيا

دنيا : والله عرفت من الاول عرفتج مجبورة وجدي جابرج

ديمة : اكيد ضربج لو هددج وقبلتي يا حبيبتي يازبيدة الميخافون من الله عنفوج

زبيدة : لا محد تقربلي او سوالي شي بس ، جريت انفي والله استحي احجيها ، احم باعو جدي ساومني على شي واني على اساسه وافقت

معين : ساومج على شنو ؟

زبيدة : بستان ، وعدني يسجل البستان الي بالـ***** بأسمي وراح يشتريلي بيت بالـ*** مقابل إني اوافق على هالزواج واني وافقت

رفعت راسي لكيتهم صافنين بوجهي

ديمة : عود صدك تحجين ؟

زبيدة : هزيت راسي

وئام : ليش انتِ بعازة الفلوس ، ما استحيتي على روحج تحجيها كدامنا

دنيا : والله كلشي توقعت الا هالشي ، معقولة زبيدة ، انتِ !! انتِ الي طول عمري اشوفج مثل اعلى الي بعزة النفس والكرامة هسه جايه تكولين راح تقبلين بقرار جدي علمود الفلوس ، زين ليش ؟

لج انتِ تركتي وظيفتج الروحج بيها بس لان تساومتي على شي يتعارض ويه مبادئج وين القيم والاخلاقيات الجنتِ تحجين بيهن

قيمج واخلاقج تسمحلج تهينين نفسج علمود الفلوس
من طاحظج اي والله ما دام الفلوس خلتج هيج بليه كرامة

ديمة : والله يا زبيدة الظاهر الاشياء الثمينة العرضها عليج جدي خلتج تتنازلين عن كلشي واولهم نفسج

معين : مع الاسف عليج يا خوية ، لو محتاجة فلوس وكايلتلنا قسم بالله جان اني اول واحد تنازلتلج عن حصتي بالبيت والمحل وحتى حصة ابوية الي يم جدي مستعد اتنازلج عنها ولا اشوفج تسوين هيج

ليش هيج يا خوية شفرقج هسه عن مبين مو ذاك كسرنا علمود الفلوس وانتِ هسه سويتي نفس سوايته هم بعتي روحج وحياتج وسعادتج علمود الفلوس

زين عوفج من الفلوس لو نفرض وافقتي وتزوجتي هارون شلون تتوقعي ممكن يحترمج او يحبج وهو يدري بيج قبلتي بي مقابل امور مادية قدمها الج جدي حتى تقبلين ترتبطين بي

وئام : فوكاها جانت تحجي على مبين وكلما كعدت وصاحت دنعل ابو الفلوس التخلي الواحد يتنازل عن مبادئة ويصير اناني لعد السويتي انتِ هسه شنو
مو انانية علمود مصالحج الشخصية

ليش جنتِ تعدين وتصفين على مبين وانتِ النسخة الثانية منه ، انتِ ويا وجهين لنفس العملة ثنينكم من توصل السالفة لمصالحكم مستعدين تدوسون حتى على نفسكم في سبيل تحطولكم فلسين تلاثة بجيبوبكم الانانية نمشي بدمج انتِ وذاك الحقير

زبيدة : كلامهم استفزني لدرجة ما كدرت اسكت وبدون ما احس انفجرت بكلام عمري ما توقعت إني ممكن احجي

اكلكم لحد يصير براسي نبي وهو ولا غيره ، حضرة جنابكم جايين تعتبون عليه ليش يمه اليسمعكم هسه تحجون عليه يكول مابيها مجال ذوله اقدس من الملائكة

كاعدين تحجون شامي عامي واني ساكته الكم بس لهنا وبس تكولون عليه انانية ليش انتو شنو

ست وئام قبل لتوصفيني على إني انانية باوعييي لروحج مو انتِ نفسج القبلتي تاخذين حماج المتزوج الي بمقام اخوج ورضيتي على نفسج تستحوذين على حياتة وتهدمين بيته وانتتتتِ تدريييين مرته تموت عليه ومع هذا رضيتي على روحج تظلميها وتاخذين حب حياتها منها

معين : تأدبي زبيييدة

زبيدة : انتتتت الثاني ولا حرررف شنو نسيت روحك شسويت بأبوك الرجال الشيبة علمود مرتك مو انت نفسك العميت عين ابوك علمود الذهب الاخذنا من مرتك الحرامية

ما كلت لروحك هاي فلوس وين كرامتي واني امد ايدي على ابوية سندي وظهري في سبيل ما اخسر الفلس الفلسين الدتحجي عنهن

لو دنيا التحجيلي بالاخلاقيات والمبادئ وييين جانت مبادئج من تركتي رجلج وتطلگتي منه وهو باتعس حال وين اخلاقج وانتِ تحملين انسان شريف ذنب مو ذنبه وبسببج سنتين هو كاعد على العربانة وانتِ كلبج ما رف عليه ولو لحظة وحدة وكلتي خلي اوكف ويا بالشدة الهو بيها لانه شريف وما قبل تشتري الفلوس

باوعت لديمة ، خو انتِ بالذات ميحقلج تنطقين كلمة وياي ، اني من وافقت على هالزواج ما ضريت غير روحي ، انانيتي اذيت بيها روحي

لا بگت من احد ولا انطيت روحي لاحد ولا ضحكت على احد وخدعتة وصرت كدامة ملاك خالي من الذنوب واني جواية جبل من القذارة

لحد يجي يتفلسف براسي مو بس اني انانية كلكم انانيين وانانيتكم ما انحسرت على نفسكم بس على الاقل اني انانية على نفسي وبس وما ضريت احد ولا مسيت احد ولا فكرت اني اهجم بيت احد والاهم من كل هذا ما خليت اهلي يغضبون عليه مثل ما انتو سويتو

دنيا : مع الاسف عليج عمري ما توقعتج توكفين تعيرين بينا هيج

زبيدة : خلي كل واحد يباوع لروحة وللقذارة الجوا قبل ليجي يحجي ويطلعلي روحة معصوم وما طالع منه الموزين

كل واحد بيكم عايش حياته ومستقر الا اني ، حضرة جنابج رجعتي لرجلج والله عوضج خير من الفقدتي واختج تزوجت واستقرت عد عيال لو تلف الدنيا كلها متلكه مثلهم

واخوج راح يسافر وان شاء الله ربنا يسهله ويرجع يوكف على حيله ومصيرة بالنهاية يتزوج ويكون عائلة يكمل وياهم حياته

حتى امج هذا البيت جدي خلا الها هي وام حسن حتى تعيش وتستقر بي

الا انييييي راح ابقى وحيدة واراوح بنفس المكان ، كلكم راح تلتهون بحياتكم واني اكابل هالحياطين
واكعد

ولجن اني اسبوع صارلي ما حاجية ويه ولا وحدة منجن ، كل ساعة اباوع للموبايل اكول هسه يخابرني
يسألن عليه

هسه يدگ موبايلي ويخابرني احد يستفگدني ويسالني وينج ، نايمة كاعدة ، انتِ كاعدة وحدج بين حياية خوما احد اذاج خوما احد سمعج حجاية تغث

اكو شي بكلبج تردين تحجي ، اكو شي قاهرج تعاي فضفضي النه احنه نسمعج

كل واحد بيكم ملتهي بحياته وناسيني هسه من كمت افكر بنفسي صرت اختكم وتردون مصلحتي وميتين عليه

السويته هذا حقي ومحد اله حق ينطق وياي بحرف واحد اني من اشوف نفسي وحيدة من بعد امي وابوية حقي افكر نفسي واكول لهنا وبس خلي التفت لروحي ، اخليلي شي يشيلني من اكبر حتى لا انذب بالشوارع لو بدور العجزة

خلي نكون صريحين احنه عايشين بزمن كل واحد بينا يصيح يا روحي واني كضيت عمري اصيح اهلي واهلي بالوقت الجنتو انتو مرتاحين اني محدبة واشتغل بالمطبخ مثل المرصع ، اطبخ واخبز واوصل ومتحملة الاهانة من اليسوه والميسوه علمودكم وعلمود ابوية

بس لهنا وكافي عوفوني افكر بروحي ولو لمرة وحدة
خلوني احس اني مقدمة لنفسي شي حتى لو جان على حساب مبادئي مثل متكولون عوفوني براحتي
انتو مو اعرف مني بمصلحتي

عفتهم ومشيت طالعة من البيت ، كوه كدرت اسيطر على دموعي ، متت قهر من سمعت كلامهم

اني !! اني يشبهوني بمعين ويطلعوني انانية بعد كل السويته علمودهم ، لييييش لييييش

ضليت امشي وحجيهم يدگ بگلبي ، ما لكيت نفسي الا واصله للاسطبل ، دخلت جوه ، جانت الدنيا هدوء

كعدت وضميت رجلية وبجيت ، كلامهم هواي جرحني واذآني والله اني كل الداسوي علمودهم ، عمري ما جنت انانيه دائماً مخليتهم من اولويات حياتي افكر بيهم قبل لا افكر بنفسي ، معقولة ينطيهم كلبهم يحاجوني هيج

سمعت صوت صهيل خافت ، رفعت راسي ودموعي مغرگة وجهي ، باوعت لصاحب الصوت ، جان خيل لونه اسود وشعره ناعم ، ما اعرف اذا ذكر لو انثى
بس الاعرفه هو الصهل بصوته ولفت انتباهي

ضل يباوعي واني اباوعله ، ما اعرف ليش حسيته يواسيني بعيونه ، يمكن لان اني مقهورة داحس بهالاحساس او هو فعلاً هيج

كمت وتقربت منه ، صرت كباله وباوعتله ، ما شاء الله كلش جبير ، باوعت اكو مثل الطابوگة صايرة على شكل طبله ، شلتها وصعدت عليها ، صرت قريبة عليه

رفعت ايدي حتى امسح على راسه وهو بسرعة نفر ابتعد لوره مبين خايف مني

انداريت ادور على شي انطي اله ، شفت ثلاجة جبيرة معزولة على صفحة ، نزلت متوجهه الها ، فتحتها لكيتها مليانة صناديگ تفاح ، اخذت ثنين ورحت
للحصان

كعدت على الطبلة وقدمتله ايدي ، تعال اگل لتخاف والله ما ااذيك

اباوعله تقرب واكلها من ايدي ، ابتسمت من حسيت بحلكة يلامس كف ايدي رغم قشعر جسمي بس فرحت بردة فعله ، انطيته الثانية ومديت ايدي على ركبته

تدري شعرك يجنن ، حتى احلى من شعري ، لونك كلش حلو وسوادك يلمع ، سبحان الخلقك على هالجمال

تدري داشتم ريحة شعرك طيبة مبين هستوك سابح صح اني اكرهه صاحبك بس للامانة مبين هواي معتني بيك وباخوانك ، مكانكم نظيف وريحتة مو سيئة

ضليت امسح على ركبته وظهره وكلما ينفر مني اركض اجيبله تفاح واجي

حسيت نفسي مختنكة واريد ارفهه عن نفسي والظاهر الله كتبلي اجي لهالاسطبل والتهي ويه هالحلو حتى اخفف عن نفسي

تنهدت ونزلت من يمه وكت الشفت الدنيا غربت ، نزلت من الطبلة وانداريت حتى اطلع وصار بوجهي هارون ، فزيت لازمة گلبي ، بسم الله الرحمن الرحيم

هارون : شعندج هنا ؟

زبيدة : شي ميخصك

هارون : هذا الاسطبل الي ، والحصان الجنتِ يمه حصاني الي

زبيدة : ادري الحصان الك بس الاسطبل حسب علمي راجع لبيت جدي يعني مالك حق تمنعني ادخله

هارون : للمرة الاخيرة انبهج ما اريد اشوف خلقتج هنا ونصيحة لوجه الله ما دامنا على البر خليج بعيدة عن اي يخصني ولو فد عشر مترات حتى لتتأذين

زبيدة : بغض النظر عن كل الكلام الحجيته بس على كولتك ما دامنا على البر خلي انطيك معلومة عن نفسي

اني ما احب احد ينصحني بأي شكل من الاشكال فلتعيدها بعد

عفته ومشيت وقبل لا اطلع تذكرت شي وحاجيته

بالمناسبة انت لسه متعرفني وبعدك كلشي ما شفت مني واذا عبالك اني راح اسكت على السويته بيه تكون غلطان ومضحوك عليك كلش هواي يا هارون

جاوبني وهو منطيني منطيني ظهره حتى ما كلف نفسه يندار

هارون : المتگدرين تسوي بلسانج سوي بايدج والمتگدرين تسوي بايدج سوي بـ****

زبيدة : فتحت عيوني من سمعت اخر كلمة من لسانه النكس ، هذا شكد سافل ومنحط

________________________________

دنيا : صافنه على الطريق وفزيت على صوت تيم الجاي من وره ، انداريت عليه هاا حبيبي

تيم : يريد يمج

دنيا : رفعتله اديه اخذته كعدته بحضني ورجعت عيوني على طريق ، حسيت بايدي تنسحب

باوعت ليوسف سحبها ورفعها لشفايفه باسها وخلاها على صدره

يوسف : حبيبي لتزعلين من زبيدة تره الحجته اني متاكد مو من گلبها بس احنه استفزيناها وخليناها تنفجر هيج

دنيا : يوسف فدوة اروحلك سد الموضوع مو كادرة اسمع اي شي هسه اصلاً لتجيلي طاريها لزبيدة

وصلنا للبيت نزل يوسف شال تيم الغفه واني شلت جنطته ومشيت ويا

تلكتنه خالة بالباب همزين ما اجوي لا هي ولا عمو والاهم ما اجه حليم حتى ليسمع ويسويلنا مشكلة

رميم : هاا يمه الله يساعدكم شو تاخرتو خير خو ماكو شي الساعة عبرت الوحدة

يوسف : لا يمه ماكو شي اخذتنا الكعدة ، حبيبتي انتِ ليش كاعدة لسه وما نمتي

رميم : والله يا يمه عيني متاخذ نوم وهذا اخوك لسه ما رجع وادگ عليه ميرد خبلني والله كلت حدي للـ2 اذا ما رجع اكعد ابوك اخاف ليصير عليه شي

دنيا : ويه ما حجت دخل حليم يضحك

حليم : هلاوووو شو مجتمعين الحبابيب يله محضرين المزه لو اطلع اجيب

رميم : الله يطيح حظك يا عار الزلم ، ولك شوكت تبطل هالزحير التتزحره كل يوم

يوسف : روحي يمه نامي وعوفي اني اعلمه الظاهر ابنج اشتهى يرجع مراهق ويندگ بالنعال

حليم : ااااالله ارجع مراهق وترجع زبيدة متلبس مني حجاب واكعد العب بشعرها وتكوم تكتلني ههههههه

رميم : روح يمه يوسف اخذ اخوك ليضل يجفص تدري بلسانه انت

يوسف : تعال امشيي لا بارك الله بيك ، خرب عرضك على هالريحة شماكل جثة نعلعلا يومك

دنيا : اخذت تيم من يوسف وصعدت فوك ، دخلت للغرفة خليت تيم بفراشة وغطيته عدل ورحت اخذت دشداشة مال نوم ودخلت للحمام

ذبيت مي على جسمي وبدلت وطلعت لكيت يوسف متمدد على الجرباية ، اول ما شافني فتحلي اديه ، تقربت نمت صدره وهو حضني

يوسف : اذا تحبين تحجين اني اسمعج

دنيا : يوسف سؤال

يوسف : جواب يا بعد يوسف

دنيا : شتكول باجر اروح لزبيدة واعتذر منها احس مصختها اليوم بالكلام وياها

يوسف : ما انصحج السالفة بعدها حامية واحتمال اذا رحتيلها تزيد المشكلة بينكم خلي تهدئ الاوضاع هالجم يوم وعود كعدو وتفاهمو

دنيا : كلامك صحيح ، سندت راسي على صدره وباوعتله ، اكول حبيبي خوما ضجت من زبيدة جابت طاري الخلاف الصار بيناتنه من سنين

يوسف : والله ولا هز شعره مني بالعكس احس الاحنه بي هسه عوض عن الصارلنا قبل

دنيا : وما شلت بگلبك عليه على السويته بيك

يوسف : ليش اجذب واسوي نفسي مثالي ، شلت بگلبي عليج وهواي هم فترة من الفترات الضعفت بيها ودخلت مستشفى حتى كره كرهتج بس سبحان ربج كل الكره البگلبي جان يتبخر من تطلعين گبالي

انسى اني منو وانتِ منو والظروف الصارت ويانه شنو كلشي انسى والشي الوحيد الاضل اتذكره حبي الج
وكمية الاشتياق الي بگلبي تجاهج

دنيا : احبك اني تدري مو

ابتسمت من حسيت بشفايفه تقبل شفايفي ، بادلته وابتعدت بسته من ركبته وحضنته مغمضة عيوني

ويه ما غفت عيني ، فزيت على الم بظهري جبرني اكعد على حيلي وخطية هو هم فز وياي

يوسف : هاا حبيبتي هم الالم رجعلج

دنيا : لزمت ظهري ، اي

يوسف : يله يله گايم اجيب دواج

دنيا : خطية راح جابلي المسكن وانطاني مي شربت وتمددت على بطني ما اكدر انام من الوجع

حسيت بايده بتدلك بظهري ، تنتهدت متذكرة البلوه الطلعتلي مدري منين

"عودة ، قبل اسبوع "

دنيا : من بعد ما باسني يوسف وبادلته ما اعرف شلون انتهى بينا المطاف نايمين على الجرباية

بوقتها فصلنا عن العالم وكإنه من نريد نوعى على شي
لكن ماكو شي يدوم جان لازم نرجع للواقع والي رجعنا للواقع وفززنا صوت موبايل يوسف الي رن بالغرفة

من استوعبت الوضع الاحنه بي ، فزيت دافعه يوسف عني

جريت المنشفه بسرعة سادتها عليه ، كمت من الجرباية وباوعتله هذا شوكت نزع قاطه وبقى بطرگ البنطرون

انوب يباوعلي ويغمض ويفتح بعيونه شلون الجان نايم ، عطت بي

انت !! انتتتت شسويت

يوسف : اني !! شسويت ؟ لحظة لحظة اوكفي ، الووو هاا يابه اي هاي دنيا من نزلت تيم يمكم طلعت راجعه نايمة وكوه كعدتها حتى تسبح وتبدل ونطلع

اي ايي هسه بس تكمل اخذها واجي لالا منتأخر ان شاء الله شويه ولا حكيكم يله الله وياك

دنيا : سد الموبايل ، باوعلي وعض شفايفه

يوسف : خرب عرضج ڤاليوم مو مرة

دنيا : احترررم نفسسسسك وبعدييين شلوووون تتجرأ تبوسني هيج بدون موافقتي متحس نفسك هواي تماديت يوسف

يوسف : لا بله عود انتِ هسه ما موافقة يعني

دنيا : سحبني من مقدمه المنشفه وقربني عليه

يوسف : باعي اظافرج شمسوية بصدري ، هاي عود ما موافقة وهيج لو موافقة شتسوين يمه

كعدي راحة وهالسوالف عوفيها على صفحة خلص بعد انكشف امرج ومشاعرج غدرتج وفضحتج بدون متحسين

كافي دنيا خلينا نعيش الباقي من حياتنا واحنه باحضان بعض ، مو كافي كابرنا بما فيه الكفاية وشحصلنا غير شلاع الگلب

دنيا : اباوعله دنگ وباس مكان گلبي

يوسف : شوكت ناويه تخلين هالگلب يطلع البي ، راح تضلين شالعة گلبي وگلبج بعنادج هذا

احجي سمعيني صوتج ، اذا بعدج ما متقبلتني كليلي حتى اسحب روحي وبعد ما اتأمل إني ممكن ارجعج لحضني

دنيا : اني ، اني يوسـ

يوسف : ما اريد اسمع اي كلام جانبي ، ترديني لو لا

ماعندج جواب ؟ هاهي براحتج

دنيا : اباوعله حتى ما انطاني مجال احجي شي عافني وراح اخذ قاط ثاني ودخل بدل وطلع

يوسف : راح انتظرج بالسيارة ربع ساعة اذا تأخري اعوفج واروح

دنيا : طلع واني لزمت راسي ادگ عليه ، والله ردت احجي بس احس لساني انربط اريد اگله اريدك واحس اكو شي يمنعني

رحت بدلت ووكفت كدام المراية الف حجابي ، ضليت صافنه ركبتي صايرة خارطة العالم ، عزة بعينك يوسف هاي شمسوي بيه

تنهدت ولبست الحجاب واخذت جنطتي بسرعة ونزلت ، طلعت بره لكيته كاعد بالسيارة ينتظرني ووجهه ميكصة الطبر

فتحت الباب وصعدت يمه وهو حرگ وساق بدون مينطق بحرف ، طول الطريق احنه ساكتين لا هو حجه ولا اني بادرت

وصلنا للشركة هو راح لمكتبة واني رحت لشغلي بس اجذب اذا اكول كدرت اشتغل شي طول اليوم تفكيري
بي

حتى عواطف من شافتني مشدوهه اخذت شغلي هي اشتغلته هاي هم خطية ابتلت بيه كلما صارلي شي تجي هي تتبرع وتشتغل شغلي وشغلها ما اعرف بشنو اجازيها والله

بألف يا الله ياله كمل اليوم حتى تيم من خابرني ما هالكد تفاعلت ويه مثل كل مرة اكتفيت بجم كلمة وسديت الموبايل

خلص الدوام واني ضليت بالمكتب انتظر مكالمة منه حتى نطلع

انفتح باب المكتب عليه ودخل حليم

حليم : يله دندون كومي

دنيا : وين ؟

حليم : للبيت يعني وين ؟

دنيا : لعد يوسف وينه

حليم : عنده اجتماع هو وجياد خارج الشركة فطلع هو ويا من ساعتين ومن يكمل الاجتماع يرجعون

دنيا : ما گلك شوكت يرجع ؟

حليم : لا والله ، يله امشينه

دنيا : اجيت ، اخذت جنطتي وطلعت ويا ، وصلنا للبيت

اني اخذت تيم وصعدت مالي نفس اكل اي شي وهمه عافوني على راحتي ، دخلت للغرفة صارت عيني على الجرباية وتذكرت الصار الصبح

تنهدت واخذت تيم مددته وضليت اطبطب على ظهره حتى ينام واني خذتلي زاوية صفنت بيها ، يعني شيصير لو ناطقة الدرة وكايلتله اريدك شرح ينقص من وزني مثلاً

درت وجهي على تيم لكيته كاعد و متربع يباوعلي

تيم : ثبيج

دنيا : زعلانة

تيم : مني ؟

دنيا : ابتسمت ومسحت على راسه لا يروحي اني ازعل من الكل ومنك ما ازعل

اااخ يا تيم اتمنى تفتهم عليه واكدر احجيلك الي بگلبي

تيم : ننه نامي

دنيا : انام بحضنك ، هزلي راسه تمددت على رجليه وهو حبيبي كام يلعب بشعري مثل ما اسويله من يريد ينام

تيم : بابي وين

دنيا : عنده شغل ، اكتفى بالسمعه مني وبعد ما سأل ضل يدك على راسي لحد ما تعب دفع راسي واجه نام على صدري وحضني

حضنته ودكدكت اله لمن غفه وخرته عني وغطيته وطلعت حتى لا ازعجه بحركتي

كعدت على القنفه واخذت الريمونت اگلب بالتلفزيون بملل اريد بس اضيع وقت

سمعت الباب تندگ ، كمزت من مكاني عبالي يوسف ، صحت تفضل ، اباوع دخلت سهير

سهير : ممكن ادخل

دنيا : اكيد حبيبتي ، تعالي أهلا وسهلا

دخلت وسدت الباب ، باوعتلي مكتفه اديها ومبتسمة

سهير : شبيج اليوم گالبه خلقتج حتى غده ما تغديتي الكل انتبه عليج بس محد حجه حتى ليحرجوج

بس اني خولت نفسي بإن اكون متطفلة واجي اسألج شبيج ومن هسه لتحاولين تجذبين عليه لان تدرين انتِ اني محد يكدر يجذب عليه

دنيا : تنهدت وجاوبتها ، اني ويوسف تعاركنا

سهير : السبب ؟

دنيا : والله ما اعرف شكلج

سهير : لتخجلين طلعي الي بگلبج واحجي ، لتعتبريني صديقتج ، اعتبريني دكتورة وانتِ جايتني تتعالجين عندي قابل راح تستحين مني ؟

دنيا : غمضت عيوني وبديت احجيلها كلشي بالتفصيل من بداية دوامي ويه يوسف ولحد الي صار اخر شي اليوم الصبح

سهير : زين سؤال انتِ ليش ما صارحتي بمشاعرج تجاهه ، خفتي تكليله ما اريدك وتحرجي ؟

دنيا : لا بالعكس اني احم اني اريده وبعدني لحد الان احبه

سهير : لعد ليش ما حجيتيله الي بگلبج ، تستحين منه مو

دنيا : بالضبط ما احس وكإني متزوجة يوسف من زمان وهاي الامور مارة عليه وعاديه عندي تصير

احس عبالك اني صدك هستوني تزوجت ومشاعري مقيدة ويه يوسف استحي اظهرها ما اعرف ليش

سهير : بابتسامة ، هذا الشي كلش عادي حبيبتي انتو صارلكم منفصلين اكثر من 8 سنوات وهسه من رجعتو سوه طبيعي تحسون اكو حواجز بيناتكم

خصوصاً المره لان الرجل هو بطبيعة تكوينة يكون جريئ واكثر الاحيان هو الي يقود العلاقة فطبيعي تشوفي هو الي يتجرأ ويبادر بمشاعره بالبداية

ويوسف سوه الشي الي اي رجل غيره ممكن يسوي وانتِ ردة فعلج هم حالها حال ردة فعل اي إمراة عدها حياء وخجل

بس مع هذا مو بمعناها احنه عدنه حياء نكوم نخلي يتجاوز حده ويوصل لمرحلة يقيدنا لدرجة يمنعنا نمارس مشاعرنا ويه شريك حياتنا

اني ادري بيج تحبين يوسف وكلش متعلقة بي مو هسه من زمان ، ليش متحاولين تتغلبين على خجلج وتظهرين المرأة المحبة الي بداخلج

المرأة التتمنى حبيبها وتريده ، تركز على ابسط تفاصيله وتحب حتى العيوب الي بي

كل وحدة بينا عدها كائن بداخلها مفعم بالمشاعر الجياشة والله سبحان وتعالى خلق النه هاي المشاعر الحلوة حتى نتشاركها ويه الانسان الي نحبه بالحلال

دنيا : كلامج كله صحيح بس اني ما ادري ليش داستصعبها على نفسي

سهير : وليش دتستصعبيها اشو يوسف زوجج وانتِ زوجته ورب العالمين انطاكم احلى هدية بالدنيا تيومي وانتِ تحبي وهو يحبج فبعد شنو الصعب عليج

بابا روحي احتضني زوجج واختلي جوه جناحة وربو ابنكم وتوجو اسرتكم الحلوة من جديد ، الله ديقدملج سعادة على طبق من ذهب ليش متاخذيها وتشكري وتعيشيها

ليش ترفسين النعمة وتالي ربنا من يشوفج متستحقيها يسحبها منج وينطيها لشخص احق بيها منج

اني راح اطلع انتظر جياد هسه اكيد يرجع مماكل ومنتظر يرجع حتى ناكل اني ويا ، يله اعوفج تفكرين واني اروح انتظر سعادتي بيباي

دنيا : سدت الباب وطلعت ضليت الوب كلامها گام يدك براسي خصوصاً اخر شي من كالت (ليش ترفسين النعمة وتالي ربنا من يشوفج متستحقيها يسحبها منج وينطيها لشخص احق بيها منج )

لزمت گلبي يمه اسم الله ، الله ليكولها ليش اني شعندي غير اهلي ويوسف وتيم غير اتخبل اذا خسرت واحد بيهم

تنهدت وكمت توضيت وصليت ركعتين لقضاء حاجة وتسهيل امر وطلبت من الله سبحانه وتعالى يدليني على الطريق الصحيح ويساعدني

شلت السجادة ووكفت ارطب اديه حتى اروح اناملي جم ساعة واكعد

سديت الموطب وباوعت لركبتي ، مو كافي يا دنيا ما مليتي من البعد ، متردين ترتاحين الى متى علاقتج انتِ ويوسف تبقى مزعزه هيج

لا لهنا وكافي بعد خوما اضل العمر گله شالعه گلبي وگلبي شكو بيها اذا ابرد گلبه واخلي يبدي صفحة جديدة بعد الضيم الشافه قبلي وبعدي

تمشيت بتردد للغرفة ، فتحت كنتوري وسحبت دشداشة قصيرة مالت نوم ، ماعندي ملابس نوم غيرها الهدوم الجانن عندي قبل ثمن سنوات كلهن انطيتهن من كمت على حيلي واني بطبعي احب الملابس الواسعة فنادراً ما الواحد يلگه عندي ملابس
ادبسزيه

اخذت الدشداشة ودخلت للحمام سبحت وطلعت سشورت شعري ورتبته وتمكيجت وتعطرت وكمت عطرت الغرفة ورتبتها

باوعت لروحي بالمراية ، عزه العزاني هاي شجايه جني وحدة اليوم عرسها ، عزه شكد عيب هسه اذا يشوفني شيكول عليه ما شايفه رجال

ولو هو اني وين شايفه رجال غيره ، شبيج دنيا شنو السالفة الي يشوفج يكول اول مرة تمرين بهيج موقف
الله يرحم ايام الاستهتار والهيلكه مالتج ومالت يوسف

كعدت اكلب بالموبايل اريد الهي روحي ، حتى قران ردت الزمة واقرالي كم سورة واستحيت الزمة واني بهاللبس والمكياج هذا

ضليت كاعدة لا ساعة ولا ساعتين ، باوعت صارت الساعة بالسبعة بالليل وهو ماكو يله هسه يجي
مرت ساعة ثانية وصارت بثمانية حتى وكت الاذان خلص وهو ماكو

زهكت وكمت هو مو صوجة صوج الينتظرة ، توجهت للحمام حتى اغسل بس وكفت من شفت الباب ينفتح وكفت بسرعة شلون المسويله عمله وانلزم

اباوعله دخل ومبين روحة صايره بخشمة ، ضليت واكفة انتظر اشوف ردة فعله

سد الباب واندار عليه شافني وضل صافن بوجهي

بادرت اني وحجيت ، هاا اا الله يساعدك

يوسف : ويساعدج

دنيا : اشر على وجهي وحجه

يوسف : خير ان شاء الله شو لابخة وين ؟

دنيا : هنا بالغرفة ، اباوعله انطاني نظرة صفح ومشه
، اوكف

يوسف : نعم ؟

دنيا : مشيت ووكفت كدامه ، تقربت بسته من خده وحضنته بقوة ، اني اسفة

يوسف : باستهزاء على شنو ؟

دنيا : ابتعدت وباوعتله ، على الي صار الصبح ، ييـ يوسف أني احم اني احبك واريد نعيش اني وياك وتيم بسلام حالنا حال اي عائلة طبيعية ، تقبل ؟ تقبل نرجع مثل قبل واحسن

ضليت اباوعله منتظرة منه يگلي اي بس ما سمعت منه شي بالعكس نزل اديه عنه وابتعد داير وجهي

احس گلبي كام يوجعني من شفت ردة فعله ، انحصرت الدموع بعيوني ، شكد استرخصت نفسي بساعتها

بس لا والله اني بادرت وهو الرفض ما دام هيج سوه يحلم بعد اباوع بخلقة ، رفعت راسي مسحت دموعي لكيته واكف بمكانه يباوعلي بس شافني شلت راسي فتح اديه على كبرهن

يوسف : دتعاي احتركت لشتلج هو يا مشعول صفحة يتجرأ ويكلج على شي لا

دنيا : ابتسمت وركضت ذبيت روحي بحضنه

يوسف : افييييش بوية افيييش هاي هيج ابني كل يوم ينشلگ

دنيا : ضحكت بحضنه وشديت اديه على خصرة ، شكد انقهرت قبل ثواني بس هسه احس الروح ردتلي

ابتعد عني وبوسني من خدودي واديه

يوسف : احبج والله اموت عليج

دنيا : واني اموت عليك

يوسف : يا بويه شكد مشتاق لهالحجي من لسانج ، مشتهي ارجع ادلل بحضنج ، اصبح وامسي ابوس بالتفاحات الي بوجهج اااخ دنيا ااخ متكليلي شسويتي بيه 8 سنين ، 8 سنين الوب عليج لوب
ادور وجهج بوجوه كل النسوان وما الگا خبلتيني والله خبلتيني

والزهرة لو راكعتني بسحر من ام عباس ما احبج هيج

دنيا : لعد شعبالك اني دنيا النوح ، اليدخل گلبي وحضني يدمني

يوسف : على طاري الادمان خلي نرجع ناخذ جرعات ما دام صارلنا سنين تايبين

دنيا : دنك باسني من شفايفي وشالي ماخذني لحضنه ومن لحظتها بدت ليليتنا اني ويا

ما جانت ليلة عادية بالنسبة النا ، جانت ليلة كلها حب وعتاب ابد ما انسى بيومها من گد اشتياقنا لبعض بعيدًا عن زواجنا الفعلي حتى دموعنا نزلت

ابد ما تخيلت انُ بعد 8 سنين ، 8 سنين عذاب وفراگ يشاء الله ان يلم شملنا اني ويوسف من جديد

نايمة على صدره ، حاضنته ومغمضه ، كل شوية ابوسه من صدره اريد اتاكد الداعيشه هذا صدك حقيقة لو داتوهم

يوسف : كافي بوس يمعودة ستري علينا ورانا دوام باجر والزهرة ابويه يخزينا اذا تأخرنا

دنيا : ضربته على صدره شكد سخيف انت

عفته وكمت عنه ، سحبت الدشداشة لبستها ووخرت الغطة عني

يوسف : تعال يروحي وين رايح وعايفني

دنيا : خلي المخدة تبوسك اني رايحة لتيومي

يوسف : لا بشرفج لتعوفيني

دنيا : ابتسمت ، حروح اسبح حتى انام لان عيوني بعد ما اشوف بيهن من التعب

يوسف : ليش يمه تعبتي

دنيا : دنكت وضربته على صدره حيل ، تأدب وكافي يله

يوسف : ههههه ولج مردتي صدري خرب يومج

دنيا : تستاهل ، عفته ودخلت للغرفة تيم ، مشيت على اطراف اصابعي سحبت ملابس وطلعت بسرعة سبحت وطلعت ويوسف كام دخل ورايه

عزلت الغرفة وحضرت ملابسي مال باجر ، خليتهن على صفحة ورتبت الفراش

حسيت بيوسف يحضني من وره

يوسف : نعيما يا حلو

دنيا : ابتسمت ، الله ينعم عليك حبيبي

يوسف : اروح فدوة لهالحلك ، اكلج حبيبتي اني جعت راح انزل اكل شي اجيبلج شي وياي

دنيا : لا حبيبي الف عافيه اني شبعانه قبل لتجي اكلت فواكهه ، باسني من راسي وراح واني تمددت على الجرباية ما طولت حتى غفيت

ذبيت روحي جنازة بس حسيت بيوسف يدخل للغرفة بطفي الاضويه ويجي يحضني ، بادلته الحضن وغفيت

كعدنا ثاني متأخرين وطلعنا ركض للشركة وصلنا متاخرين ربع ساعة والله ستر عمو يحيى ما ريگنه رزالة ناشفة

طبعا طول اليوم البنات يسألني شبي وجهج منور اليوم واني بودي اختفي ، احس الكل كاشفني ويعرف شبيه حتى بوجهم ما كمت اباوع احس روحي مفضوحة

واستاذ يوسف كل شوية يدزلي رسالة مابيها غير هالجملة "مابيها مجال تجين "

واني اشوفها واغلس المهم كملنا دوام ورجعنا تغدينا ونمنا الظهر وهم رجعنا سهرنا بالليل اني ويوسف وهالمرة ويانا تيومي كعدنا نشوف فلم وطبعا الكعدة لا تخلو من سوالف يوسف المكسرة

ومن نومت تيومي رجع تقربلي بس هالمرة ما ادري ليش حسيت بألم بظهري ومحالبي ماعرفت شنو السبب يمكن لان صار فترة طويلة يوسف متتقربلي ومن تقربلي جسمي انطه ردة فعل

غلست وما بينت ليوسف ، داومنا ثاني يوم واني الالم مكطعني الوج لا خليت مسكنات لا خليت شي وماكو تحسن اخر شي انهاريت من الوجع

كمت على حيلي وطلعت من غرفتنا وتوجهت لمكتب يوسف ، فتحت الباب ودخلت ابجي سوده عليه هو اول ما شافني كام مخروع

يوسف : شبييج

دنيا : اشرتله ، ظهري يوسف ظهري راح اموت

يوسف : اسم الله حبيبتي اسم الله شجاج تعاي كعدي

دنيا : اخذت ايده وكوه كعدت على القنفه واون من الوجع

يوسف : اوكفيلي بس انطي خبر لابويه واخذت ونروح للمستشفى

دنيا : بألم لالا ما اريد للمستشفى اخذني للبيت فدوة اروحلك راح اموت

يوسف : صار صار ، بس اوكفيلي الووو هاا يابه هاي دنيا تخربطت راح اخذها واطلع

دنيا : اباوع لعمو دخل يركض

يحيى : شبيج بويه شبيج حبيبتي

دنيا : جاوبته كوه ، تعبانه شويه عمو عفيه عادي اطلع للبيت مابيه اكمل والله

يحيى : انعل ابو الدوام صدك تحجين ، امشي بوية امشي اخذ مرتك وارجع للبيت

دنيا : تقدم يوسف راد يلزمني ما خليته لالا لتجي وياي راح اطلع اني اوكفلك بره وانت الحكني ليشوفنا احد

يوسف : ليش تخيلني اغرد هسه شو دمشي

دنيا : حباب يوسف لتشلع كلبي مابيه احجي ، قبل ليجاولني عفته وطلعت ، متت علما وصلت للسيارة

شويه واجه يوسف يركض شغل السيارة وصعدني وطلع

يوسف : بس فهميني شجاج شنو شهريتج تريد تجي وظهرج كام يأذيج

دنيا : لا مو هذا موعدها هو اني قبل اسبوعين كملت

يوسف : لعد شبيج شنو شايله شي ثكيل خاف لان تشيلين تيم فقراتج هاجت عليج

دنيا : لا شعلي تيومي سودة عليه اصلا بخف الريشه هو

يوسف : دخلي ارجعج للبيت هسه ارتاحي والعصر نروح للطبيب

دنيا : اي فدوة يوسف مابيه اتحمل بعد راح اموت من الوجع احس ضربات تحفر بظهري موتتني

يوسف : ميخالف حبيبتي تحملي منا للعصر والله لو اكو دكتور هسه مفتح ابسطله بباب العيادة بس كلها تكعد العصر فمضطرين ننتظر

دنيا : هزيتله راسي بتفهم مابيه احجي ، خطية اباوعله يلوب عليه وما بايده شي

وصلنا للبيت كوه صعدت فوك وهو سوده عليه بدلي وغطاني واخذ تيم لخالة واني بس متمدده ومغطايه ما كدرت انام من وجع ظهري ومحالبي

ماعولت العصر يجي حتى ابدل واطلع للدكتور ، شفت الساعة صارت بالاربعة كمت دخلت للحمام شفت نازل عليه دم

سويت اللازم وطلعت كلت لسهير وخالة رميم

سهير : ما دام الدورة رجعت اجتج وهي ما صارلها غير اسبوعين من خلصانه ، روحي لدكتورة نسائية وخلي تفحصج وتشوف

دنيا : وشجاب الم الظهر على دكتورة النسائية

سهير : كلشي وارد يا عيني وبعدين هياتج انتِ دتكولين محالبج هم تاذيج احتمال بسبب خربطة الدورة صارتلج هالآلام انتِ روحي وچيكي روحج واذا ماكو شي اكيد الطبيبة راح تحولج على طبيب غير اختصاص

دنيا : هاهي على كولتج ، كلت ليوسف وطلعنا للدكتورة النسائية وصلنا لكيناها صايرة كربلاء من الهوسه

سجلنا اسمي وكعدت اني ، يوسف خطية شاف العيادة كلها نسوان وبس هو واكف كلي اني طالع اكعد بالسيارة من يجي دورج خابريني

ضليت كاعدة ووره ساعتين تقريباً ياله وصل سرايه ، رمشت على يوسف ودخلت للطبيبة ، رحبت بيه واني شرحتلها الحالة بالتفصيل ، فحصتني وكلتلي اسوي سونار

طلعت ليوسف ورحنا اني ويا اخذنا سونار الي وانتظرنا يكمل واخذنا ورجعنا للدكتورة

يوسف : هاج اخذي السونار ودخلي للدكتورة واني راح اكعد انتظرج هنا مو مال ارجع بره بالي يضل يمج

دنيا : اخذت السونار ودخلت للدكتورة ، خليت السونار كبالها وكعدت

: امممم عزيزتي عندج اكياس كبيرة حول المبيضين وين جنتِ الفترة السابقة ليش هامله نفسج هيج

دنيا : والله دكتورة اني جنت ملتزمة بمواعيد المراجعات الدورية بس صار عندي ظروف والتهيت عن نفسي شويه ، ليش دكتورة صاير بيه شي لا سامح الله ؟

: اي حبيبتي ولازم تسوين عملية باسرع وقت بيج ومتستعجلين

دنيا :بلا زحمه عملية شنو بالضبط ؟

: عملية استئصال للمبيضين

*****************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

ملاحظه/ اعتذر على التأخير الصار بتنزيل بالبارت ثقو بالله البارحة فصل النت يمي وره ما كملت البارت وضليت حايرة من الساعة 12 ولحد الـ6 الصبح اني كاعدة انتظر على امل انُ يرجع النت وانزللكم وماكو فائدة وهستوه ياله رجع النت عندي وهاي كدامكم شوفو وقت اخر تعديل للبارت كان بإي ساعة حتى تتأكدون اني ما تأخرت بمزاجي ولا تعمدت ما انزل البارت بوقته المحدد ❤️

.