الموت الحي الفصل السادس وخمسون 56 - بقلم براء الموسوي

مرحبا حبايبي العسل شلونكم ❤️❤️

عظم الله اجورنا واجوركم بإستشهاد سيد شهداء اهل الجنة الامام الحسين واهله ( عليهم افضل الصلاةوالسلام)

#الموت الحي
#للكاتبة براء الموسوي

زبيدة : شلت الموبايل بسرعة لان انخبصت خبص ، بس فتحت الخط اجاني صوت ديمة تبحي

ديمة : الوووو زبييييدة لحكيلييييي

زبيدة : ماتن رجليه من سمعت صوتها ، اريد اوكف بعد ما اكدر

انوب أريد احجي ما اكدر ، ششـ شبيج

عطت بيها ، ولج شكو شصاير لييييش دتبجيين احجي بيج شي اكو واحد من اهلي بي شي ، احجي ديمة لخاطر الله راح انجلط والله

يربي متحجي بس تبجي خبلتني والله

كعدت واديه يرجفن ، اخذت نفس محاولة اهدئ نفسي

ديمة حبيبتي بس بطلي بجي ، اهدي وفهميني شبيج وليش دتبجين هيج والله العظيم كلبي راح يوكف من الخوف عليج

ديمة : لج زبيدة اا هذا امين واهله راحو راحو لبيت خالته لكربلاء كالو راح يزورن ويجيبوها ويجون
ووو

زبيدة : لزمت گلبي وشنو بس لا صارلهم شي بالطريق

ديمة : لا ببـ بس اني كتلهم روحو واني راح اطبخ الغدة وامين تسوكلي كلشي قبل ليروح

زبيدة : اي وبعدين ولج احجييي من احتركت روحححج خبلتينييييي

ديمة لخاطر النبي عوفيلي البجي وفهميني ليش كاعدة تلطمين مابيه بعد روحي فرفحت

ديمة : تنشغ ، باعي امين مو تسوكلي وراح وياهم واني على اساس من الصبح اكعد اطبخ واكمل كلشي للخطار

ببـ بـ بس خربت الاكل كله ، لج زبيدة الفاصولية صارت حمص بطحينة والتمن صار شوربة

بس الدجاج صصـ صار وهمه ممـ مابقى شي ويجون وراح ااتفشل وياهم

ححـ بابة علمينيي شسوي خاف يجون ويشوفون الكارثة السويتها بالاكل

زبيدة : باستنكار ، على هاي جاي تبجين ؟

ديمة : بدموع ايي ايي

زبيدة : نهدت من الله يطيح حظج يا كلبه يا حقيرة والله عبالي صاير وياج شي اكبر طلعتييي تبحين علمود هالسبب التافه من الله لا ينطيج اجيتييي تجلطنيييي حيوانة

ديمة : اسفه زبيدة بس والله ما اعرف شسوي وما لكيت غيرج كدامي

زبيدة : بس بطلي بجي و روحي خابري المطعم وطلبي اكل وفضي السالفة عليمن ناصبتلي هالمناحة من طاح حظة اليعوف حاجة بايدج

ديمة : للـ لالا اذا اطلب من المطعم يعرفون مو اني الطابخة واني كتلهم راح اضوككم طبخي

زبيدة : لا إله الا الله ، زين همه شوكت يجون

ديمة : ما ادري امين گلي يمكن بـ3 يوصلون

زبيدة : دروحي يله واني جاييتج هسه ، سديته وكمت بسرعة اخذت ملابسي ودخلت بدلت وطلعت حتى البس حجابي

شفت هارون واكف كبالي ، تيبسن رجليه عزززه اني نسيت هذا هنا ، الله لا ينطيج يا ديمة شدهتيني

انوب رجعت تذكرت انه شافني بذاك المنظر السزز
بلعكت ريكي وغلست

سويت روحي اصلاً ما شايفته ، لبست حجابي بسرعة واخذت جنطتي واجيت اطلع بس هو عارض طريقي

رفعت راسي مباوعتله واكف مختصرلي وعلى وجهه ملامح استفهام

هارون : وين ؟

زبيدة : عندي ظرف طارئ ولازم اطلع لاختي ، وخر عن طريقي

هارون : ليش جدج ما كايلج الطلعه الظهر وحدج ممنوعه

زبيدة : اروح ويه الحرس

هارون : ماكو روحه

زبيدة : خوش وخر يله بعدين نتقاش

عبرته ناويه اطلع وصدمني من جرني من ايدي مرجعني لمكاني

هارون : اعتقد الكلام الكلته واضح

زبيدة : اكلك سوالف الغيرة والرجولة هاي لتطلعهن عليه وتعيش دور الزوج زيادة عن اللزوم تره مالي خلكك

هارون : مو قصة غيره انتِ كلج على بعضج متهميني بس الحرس اصلاً ما راح يقبلون ياخذوج بدون اذن من جدج وجدج اصلا ما موجود هسه وحتى لو طلبتي تكسي ميخلوج تطلعين الا اذا وياج واحد من العائلة

زبيدة : أستغفر الله على ما بلاني

زين اني شلون بيه ، اختي كلش محتاجتني ومو مال اتأخر لو اغلس عليها ابد

باوعتله ، هارون اخذني انت وانطيك كروة

هارون : عفواً ؟

زبيدة : بس هالمرة سويلي هالخدمة ما اريد منك بس توصلني واني وعد اردها الك وبفلوسك مو بلاش يعني

فزيت من نتر ايدي بقوة

هارون : امشي فضيني

زبيدة : طلع واني طلعت ورا ، نزلنا جوه لكينا الحبايب متجمعات ، شافتنا بيبتي وكامت

حمزية : هاا يمه خيركم

هارون : ماكو شي طالعين نتغدة بره

هيام : وين اكو غدة الساعة عشر ونص الصبح

هارون : وانتِ شكو

زبيدة : ضليت صافنه هذا شلون يحاجيها بهالاسلوب

بدرية : عيب عمة شلون تحاجي امك هيج

بيداء : اي والله شدعوة عليك

هارون : حجية احنه طالعين لحد ينتظرنه على الغدة

حمزية : روح بيبي الف عافيه على كلبكم

زبيدة : طلع واني طلعت ورا حتى ما علقت مالي خلكه

صعدت بالسيارة على الساكت وهو حرك

هارون : وين صاير بيت اختج

زبيدة : دليته المكان وطلعت موبايلي اتصلت عليها

الووو ديمة اي اني بالطريق ، باعي طلعي فاصولية جديدة ونكعيها بمي حاير يفور ووياها خلي خاشوكة جاي ممسوحة صودة

خوش يله باي ، سديته وتنهدت والله اكلت هبطة من هبطة اليوم

وصلنا للمنطقة ، وكفني هنا سيارتك متدخل الفرع ضيگ

طبعًا قابل راح يسمع كلامي يموت غير ، سوه بالعناد ودخل للفرع وهو سيارته رياضية

انوب طب وانحصر خوش حصرة ، حيييل وابو زايد هذا الميسمع كلامي

هارون : يله نزلي ومن تكملين خابريني

زبيدة : ماكو داعي ارجع وحدي

هارون : جاييي اكول خابرينييي واني اجيييج ثولة انتِ متفتهمين

زبيدة : شبيييك تصيح هاهي عشتو يصيح

فتحت الباب واجيت انزل بس رجعت كعدت بمكاني مباوعتله

هارون : شكو رجعتي

زبيدة : ماعندي رقمك استاذ

هارون : هاج سجلي وفضيني

زبيدة : اخذت رقمه ورجعتله الموبايل ، نزلت يم بيت ديمة

اجيت ادك الباب بس لكيتها مفتوحة ، دفعتها وطبيت صارت بوجهي ديمة كاعدة بالمطبخ وبس شافتني ابتسمت و كامت

ديمة : وين صرتي انتظرتج هواي

زبيدة : هزيت راسي وذبيت جنطتي بالطرمة

ديمة : ليش هنا دتذبيها طبي جوه

زبيدة : عفت الجنطة ودنكت نازعة حذائي ، شلت وحدة من الفردات وركضت وراها وهي من شافتني اركص هي هم طبت تركض

ديمة : شبييييج

زبيدة : ويييين تفلتييين منيييي اليوم اطييييح حظظظظج ساييييبه

صعدت وراها فوك وحصرتها بالصالة ، وكتلتها كتله فوخت كلبي بيها الحقيرة اجتي تجلطني

ديمة : يييييمه لج ااخ ااخ لتضربين الله لا ينطيج لتعضينييي عليج الله كافيييي

زبيدة : حقيرة اجه كلبي يوكف من وراج ، دفعتها وكعت الهث بالصالة الفوك

اباوعلها شعرها مكفش وتلزم بجسمها وتبجي

ديمة : اااخ يمه ظهري الله لا يوفقج

زبيدة : ولا يوفقج لو ميته من الخرعة هسه الربح بيج انتِ ام الوصخ

ديمة : احترمييي نفسج انتِ ببيتييي تره

زبيدة : شلت حذائي وكمت ، ما دام هيج لعد خلي ارجع لبيتي احسن مع السلامة

اجيت انزل وجلبت بيه ولييي وليي اني رايحه

ديمة : لا عليج النبي لترحين ، ميخالف حتى لو تضربيني قابلة بس لعوفيني وتروحين

زبيدة : لعد عدلي شعرج ولحكيني

نزلت جوه وبوجهي للطرمة جبت جنطتي وذبيت حذائي ودخلت كعدت بالمطبخ بس شنو كوه اجر النفس

ديمة : هاج شربي مي وجهج انكلب من الحر

زبيدة : اخذت المي ، شربت وتنهدت

ديمة : تدرين اذيتيني والله

زبيدة : يطبج مرض لعد هاي سواية تسويها بيه

ديمة : اسفه والله انشدهت

زبيدة : ديله تعاي خلي نستعجل بالغدة قبل ليجون

ديمة : يله علميني شسوي

زبيدة : سحبتها من ياختها ، وخري وخري اني الاطبخ

ديمة : لا ما اريد ازحمج

زبيدة : على اساس انتِ ممزحمتني من جبتيني منا لهنا ، دروحي طلعيلي جدر الضغط

ديمة : هاج وهسه كليلي شراح تسوين

زبيدة : خلي اشوفج شمخبصه بالاول ، وكفت على الطباخ فتحت الجدورة وصفنت

خرب يومج ديمة مسويه الفاصوليا هريسه خو التمن عجين صاير ولج بس فهميني هذني شكد طبختيهن حتى ماردتهن هيج

ديمة : والله ما سويت شي الفاصوليا جانت منكعه من البارحة واني حطيتها بالمي حتى تستوي مثل ما مكتوب باليوتيوب

زبيدة : وشكد عفتيها ؟

ديمة : 3 ساعات

زبيدة : من الله لا ينطيج على هالعملة ، اذا هي منكعه من الليل متطول عندج غير نص ساعة وتستوي

ديمة : شمدريني قابل اني

زبيدة : زين والتمن شلون سويتي هيج

ديمة : هم نكعته وكلت اسوي بزل لان ما اعرف للكبس بس عجن

زبيدة : طبعًا يعجن يا مطية هذا تمن وجبة مو هندي حتى يطول بالتنكيع عشر دقايق كلش كافية عليه

اااخ من ثوالتج اااخ ولج اكو واحد يتعلم براس الخطار

ديمة : شسوي بعد هذا الصار

زبيدة : دامشي طلعي تمن يكفي عددكم وكعدي لگطي

واني راح اسوي التتبيله علمود نشوي الدجاج ونخلص منه عاد زين منج وما مخربة الدجاج

رحت شغلت الفرن وطلعت الدجاج ، جانن اربع دجاجات بس والله خوش مسويتهن ، طلعتهن وتبتلهن

سلكت بتيته نص سلكه وصفطتهن ويه الدجاج بصينية الطباخ ومن حمه دخلتهن حتى يتشبعن بالصلصة

هاا نكعتي التمن

ديمة : اي ودافور المي مثل مكلتي

زبيدة : خوش ، رحت بسرعة سويت التمن وما اخذ وقت بسرعة استوه كملته وعفته يتهدر على نار ناصية

امشي ديمة طلعيلي لحم واذا ماعدكم اروح بسرعة اجيب واجي

ديمة : لا عدنه البارحة امين تسوك اشكال علمود الخطار

زبيدة : عاشت ايده

ديمة : وايدج يا گلبي انتِ

زبيدة : ابتسمتلها ، جابتلي اللحم ، سويته قطع وباوعتها ، اكلج صارلج شكد منكعه الفاصوليا

ديمة : ساعتين

زبيدة : لعد خوش ، رحت اخذتها وغسلتها زين وخليتها بجدر الضغط هي واللحم وسلكتها

ديمة : ولج خاف ترجع تنهرس بجدر الضغط

زبيدة : لا لان حضرتج ما منكعتها من الليل ما راح تنمرد واصلا يرادلها وقت علما تستوي هي واللحم

امشي ثرمي راس بصل صغير وويا ثوم وطلعيلي الحلبة

راحت هي واني ركضت سويت زلاطة وخليتها بالثلاجة

باوعت منا منا ، احس اكو شي ناقص ، اكلج ما دام ما بقالنا غير المركة شتكولين لو نسوي حلاوة

ديمة : يا زبد هو منو ياكل حلا بهالحر

زبيدة : مالج علاقة انتِ العليج متقصرين ويه الضيوف بشي ، عاد اكلو لو ما اكلو بكيفهم المهم انج قمتي بواجبهم على اتم وجه

ديمة : بكيفج بعد بس شنو تردين نسوي ؟

زبيدة : صفنت بتفكير ، مو مال اسوي كيك ولا كنافة لان شكولج مبينه مو مال هيج سوالف حدج شغلات بسيطة

باوعتلها اكلج عدكم كاستر وجوز ؟

ديمة : اي اكو بالثلاجة العلبة والجوز بالمجمدة

زبيدة : لعد خوش ، جيكت على التمن ومن شفته تهدر طفيته والدجاج شفته بعده ديبقبق فعفته

رحت سويت الكاستر وخليته بمواعين التقديم وزينته بجوز

وكمل الدجاج طفيت الطباخ عليه وعفته حتى يبقى حار

انوب تفرغت للمركة ، فتحت جدر الضغط والحمدلله طلعت مستوية هي واللحم عاد ركبتها وكملتها وعفتها تتعقد

كعدت بس شنو مكضيه گضي من التعب ، نعلعلا يومج ديمة هديتي حيلي

ديمة : حضنتها فدوة اروحلج زبد والله تعبتج هواي ابوس هالايدين الحلوة

زبيدة : ابتسمت وبادلتها ، انتو تدللون على گلبي قابل شعندي غيركم

باوعت للساعة صايرة بالـ1:30 ، اخذت موبايلي خابرت نعلون حتى يجيني

علما كمت غسلت وصليت دك عليه

هارون : اني بره طلعيلي خمس دقايق اذا تتأخرين اعوفج

زبيدة : بعدني حتى ما حجيت اتفتك عليه هالفتكه
الكبر

سديته وكمت لبست صايتي وحجابي ، يله دمدم طفي الطباخ على الفاصوليا ونقلي مواعين الكاستر
للميز الي بالصالة خاف ينعدمن

ديمة : وين رايحة انتِ صدك تحجين عاد كعدي تغدي

زبيدة : لا والله ما اكدر تأخرت وانتِ عيالج على وصول يله مع السلامة

ديمة : والله ميصير من الصبح انتِ هنا وحتى استكان جاي ما شربتي

زبيدة : دنجبي لج احنه من يمتى بيناتنا هالسوالف وبعدين ششرب جاي بهالحر ويني وين الجاي

يله تعاي ابوسج حتى اطلع ، بوستها وطلعت لكيت الشفية واكفلي بنفس المكان مشيت وصعدت بالسيارة

تنهدت براحة من كفخني التبريد ، رجعت ظهري على الكُشن وباوعتله شكراً هارون تعبتك وياي اليوم

هارون : ماكو داعي تشكريني اني ما اسوي شي بدون مقابل يعني لتعتبرين توصيلتج هاي لله

زبيدة : هزيت راسي بتفهم وطلعت عشرة قدمتها اله
تفضل

هارون : هه عشرة ؟ وين احطها هاي

زبيدة : لعد شكد تريد غير هاي كروتك حالك حال اي سايق دياخذ اجرة

هارون : حالي حال اي سايق !! مصعدج بسيارة باحلامج ما ممكن تصعديها وفاتحلج تبريد على اعلى درجة

وجايه تنطيني عشرة تضحكين عليه لو على روحج انتِ ؟

زبيدة : اوووف اوووف ، رجعت العشرة وطلعت خمسة وعشرين وانطيته

طايح الحظ سواها صدك واخذها شكد سزز وميستحي

اكو واحد ياخذ فلوس من مرته

صفنت ، مرته !! شبيج زبيدة مرته شنو ، شو انتِ هم كمتي تمسلتين

انداريت عنه ، سندت راسي على الجامة وغمضت عيوني

فتره وحسيت السيارة توكف ، فتحت عيوني لكيتنا واكفين كبال مطعم

درت وجهي باوعتله باستفهام

هارون : نزلي

زبيدة : وين انزل ؟

هارون : جايبج للسوگ نزلي اخذيلج فرة

زبيدة : لتتساخف شعدك جايبنا للمطعم

هارون : ليش اليجي للمطعم شيسوي ، ياكل لو يتطهر ؟

دنزلي وبلا لغوة زايدة عفيه لسان يختنك اذا يكعد بلهاتج

زبيدة : نزلت ورا ، دخلنا لصالة العوائل واخذنالنا طاولة

اجه النادل انطانه المنيو ، اخذت المنيو باوعت للاكل وللامانة اشتهيت آكل لان من الصبح متريكه ولسه باقيه بدون اكل ومو مال ارجع اطبخ لو احمي فكلت خلي اتغده ما دام اجيت اجيت

طلبت مقلوبة وهو طلب قوزي ، اجه الاكل ، اكلنا بصمت وما دار بيناتنا كلمة وحدة وهالشي ريحني

كملنا اكل ، هو طلب جاي واني طلبت عصير ليمون

كلمن اخذ طلبه وشربنا ، كمت اني غسلت ورجعت لكيت الفاتورة جايه

هارون : تعاي دفعي فلوس اكلج ، شبيج تباوعيلي كل واحد يدفع لنفسه

زبيدة : واني ما كتلك ادفعلي ، سحبت الفاتورة لكيت حسابي ويه العصير صاير خمسة وعشرين ، خليت الفلوس بدفتر الفاتورة ورجعته

علما كمل الافندي دورة شرب الجاي العنده كام اخذ سترة القاط واشرلي

هارون : يله امشينه

زبيدة : طلعنا راجعين للبيت وطبعًا اول ما دخلنا جوه لكينه الوجوه تتلاطم عبالك شو شمسوين

هارون : السلام عليكم

الكل : وعليكم السلام

النوح : وين جنتو من الصبح لسه

هارون : طلعنا نغير جو وتغدينا بره

زبيدة : اباوع لجدي توسعت ابتسامته وهز راسه بقبول

النوح : الف عافيه زين سويتو بعدكم عرسان طلعو وتونسو هاي احلى ايام ممكن تعيشوها

زبيدة : باوعلي هارون صفح وصعد فوك

عشتو وخفه هالطول ، رحت كعدت يم بيبتي ، سندت راسي على جتفها

حمزية : شبيج يمه

زبيدة : تعبانه شويه

بيداء : من الدياحة غير

زبيدة : ابتسمتلها ، الف عافيه على گلبي بزود هارون حبيبي فدوة لكلبه

كمت من يمهم حتى اصعد فوك ، اييييع هارون وحبيبي والله العظيم حتى مترهم باللسان

صعدت وشفته واكف مثل عادته قريب على المحجر وبس اليرفع راسه ينتبه لوجوده

حسيت اكو نظرات استغراب على وجهه ، واني هم ما ركزت غلست ودخلت للغرفة

ذبيت روحي ونمت وما كعدت غير بالليل ، نزلت ساعدتهم بالاكدر عليه ومريت لدادا وخالة وئام سويتلهن عشه وكعدت وياهن ورجعت سهرتلي على فلم منا لمن نعست ياله نمت

ثاني يوم الصبح كعدت من النوم ، هارون بالدوام وبس اني بالغرفه

تمغطت وكمت حتى ابدل وانزل اتمرن شويه ، دنكت حتى اسفط فراشي اخاف لا يطب احد ويشوفني فارشه بالكاع وساعتها يسوولنا سالفه

شلت البطانية ودنكت داشيل الدوشگ وصفنت على شي يم راس المخدة

هاي شنو شلته من الكاع لكيته ملفوف بكلينس ، فتحته طلع فلوس !!

فتحتهن جانن 50 الف عبارة عن خمسه وعشيرنات ثنين

صفنت متذكره اني البارحة انطيت خمسة وعشرين لهارون وخمسة وعشرين للمطعم وهسه الخمسين كلها رجعتلي

ما اخذت وقت حتى اعرف انُ هارون الخلاهن يم راسي

ابتسمت وهزيت راسي ، بس لو افتهم اذا هو ميقبل ياخذ فلوس مني ليش ديتصرف بهالطريقة من الاساس

والله غريب انت يا هارون وللاسف شفرتك صارت مثيرة بالنسبة الي وشكلي راح ابدي احل بيها

______________________________________

دنيا : كاعدة وبالي كله يم كلام سجى ، من يوم الحجتلي واني مزوهره لا ليلي ليل ولا نهاري نهار

لزمت راسي وغمضت عيوني ، يربي مداستوعب انُ عمو يحيى ممكن يطلع منه هيج تصرف

من يوم يومي واني اشوفه حسبه بابا واحبه لدرجة اشوفه ملاك مثل ما اشوف ابويه

بس هم البنية تحلف وتتقسم انها مدتجذب وحتى رادت تحلفلي على القران لوما اني منعتها

سمعت عواطف تحاجيني ، شلت اديه عن راسي وباوعتلها

عواطف : شبيج دندن شنو مالج خلك

دنيا : لا حبيبتي مابيه شي ، كولي شنو تردين

عواطف : هاي الاوراق كملتها بلا زحمه عليج بس اخذيهن لاستاذ يوسف يوقعهن وخليهن يمه هو عود يدزهن بايد السكرتير مالته لاستاذ يحيى

دنيا : اي تدللين

اخذت الاوراق وطلعت لمكتب يوسف ، بلغت سكرتيرة الجديد ينطي خبر حتى ادخل

شويه وگلي دخلي ، دكيت الباب ودخلت لكيت يوسف كاعد يشتغل

السلام عليكم

يوسف : وعليكم السلام تعاي حبيبي

دنيا : خليت الاوراق على مكتبه ، شوف هذني الاوراق ووقع عليهن

يوسف : ثواني علما اكمل البيدي واشوفهن روحي كعدي

دنيا : لا ما اريد اكعد خليني واكفه ظهري تخشب من الكعده

يوسف : على راحتج

دنيا : ضليت واكفه يمه وهو يشتغل

طبعًا يوسف بطبعه كلش جدي بالشغل يعني مرات انسى اني ويا متزوجين من كد ما نكون رسميين

يوسف : هذا شغل منو ؟

دنيا : شغل عواطف ليش شبي

يوسف : خوش شغل عاشت ايدها الاوراق كلها مضبوطة ، تفضلي

دنيا : كام وانطاني الفايل ، اخذته وباوعتله من لزم وجهي

يوسف : شبيج حبيبي صارلج فتره وضعج ما عاجبني حتى بنومتج صايره قلقه

شنو تيم متعبج لو اني حتى صايره هيج خامله

دنيا : خليت الفايل على الميز ، شديت على ايده وبست باطنها

اني لو اعيش عمري كله اخدمكم انت وتيومي مستحيل اخمل لو اتعب منكم

لتخلي ببالك حبيبي اني هالفتره شويه متضايقه ومشتاقه لمعين هلي تحسني مالي خلك

يوسف : يعني اكيد بس هذا السبب

دنيا : اي صدكني ، اخذت الفايل وتقربت شميته من ركبته وبسته

احبك اني واعشق اهتمامك بادق تفاصيلي

يوسف : ليش اني چم دنيا عندي حتى ما احب واهتم واركز على تفاصيلها

انتِ حبيبة الروح وانسية الخاطر يا دنيا

دنيا : حضنته وهو بادلني الحضن بقوة وهاي المره الاولى الي يصير بيناتنا هيج شي بالدوام

ابتعد وباسني من خدي

يوسف : وهاي سويتلج بوسة ام الطگه مثل تيم حتى متكولين رجلي ميعرف يبوس

دنيا : ضحكت ورجعت بسته وطلعت اكمل الشغل

وكالعادة من كملنا دوام طلعت ويه يوسف وهو حبيبي الطريق كله ساعه يلزم ايدي ساعة يشغل اغاني بس يريدني اغير جو

واني لخاطرة اسوي روحي كلش متونسه بس بداخلي اطحن طحن

وصلنا للبيت وصعدنا بوجهنا بدلنا ونزلنا نتغده

تيم : ننه يريد يدعد بحڤنج (يكعد بحضنج)

دنيا : تعال حبيبى ، كعدته بحضني وكمت اوكله شويه ويوسف هم يوكله وهو حبيبي يتدلل ومكيف

علي : شسالفه ادري اول طيحة البزر شبيكم

يوسف : شبيك خوية من يمك انت

علي : ميصير راح تهيلكو بهذا الدلال وبعدين من يطلع مدلل ومهيلك تكعدون تشتكون

يوسف : اعتقد كلمن حر ببزره وتربيته اني مالي حق اتدخل بطريقة تربيتك لاولادك وانت هم مالك حق تعلمني شلون اربي ابني

اما بالنسبة للدلال فما دام اني وامه راسنا يشم الهوى خلي يشبع دلال ويتدلل ويتهلك على راحته واذا
عود كبر واستهتر الناس راح تسبنا احنه محد راح يدوسلك على طرف

علي : اي براحتكم اني حبيت انصحكم

يوسف : ببرود متقصر غالي واعرف كلبك علينا

دنيا : من كل الحديث الدار ما دگ براسي غير كلمة وحده

امه !!

يا يابه شسوت بيه هالحجاية وشفززت بداخلي ، شكد اموت على تيم اني بس ولا مره انطيت نفسي الحق بهاي الكلمة

ولا مره كتله صيحلي ماما ولا اني كلت عنه ابني رغم ربي يشهد عليه لو اني الجايبته لتيم ما راح احبه نفس هسه

ومن استرجعت لفظ الكلمة بلساني ابتسمت وكمت ابوس بتيم والدموع تلالي بعيوني

كملتله اكل وكمت غسلتله وجبته كعدته بالصالة ويه جهال عمه يباوع طيور الجنة بيبي واجيت كعدت يم يوسف

يوسف : هاج حبيبتي هذا جايج

دنيا : عاشت ايدك

يوسف : سبعين عافية

دنيا : اخذت استكاني وبديت اشرب وعيني على عمو يحيى الي يضحك ويداهر الولد وخالة

والله العظيم ما اصدك هالانسان يطلع منه هيج شي ، شكد هو طبعه سبورتي ويحب يضحك ويتشاقة ومبين حتى من لبسه انه انسان يحب الحياة وميهمه غير ملذات الدنيا

بش الشهادة لله عمو يحيى من الناس الي كلش قريبين لله عمرنا ما طلعنا وشفنا باوع لوحدة بنظرة دونيه

صحيح دائما يشاقه ويكول فلانه حلوة وفلانه عجبتني وراح اكوم اعرض عليها الزواج ويداهر خالة بس ولا مره تجرأ وسوه اي تصرف مو حلو

شلون سجى دتكول يتحرش بيها ويمد ايده على جسمها ما ادري

يحيى : هاا حبيبتي دندونه شبيج تباوعيلي ، اكو حجي بلسانج احجي حبيبتي

دنيا : لا عمو سلامتك ماكو شي

يحيى : الله يسلمج ويخليج يارب

اكول صدك بلغي خواتج الجمعة الجاية تره غداهن هنا

دنيا : شنو المناسبة

يحيى : علمود زواج زبيدة لازم نعزم رجلها ونعرفه علينا قابل زبيدة غير عن ديمة هم لازم نقوم بواجبها امام زوجها تبقى بنيتنا خوما نعوفها تنسحب من يمنا
والله شنو لان تزوجت

دنيا : باوعت لحليم الي كاعد وعيونه تبث نار من الاعصاب

علي : وشلها داعي هالعزيمة

حليم : ليش شكو بيها خلينا نتعرف على زوج زبيدة عن قرب يجوز نحبه نفس ونصاحبه نفس امين

علي : وانت تجيب هذا المتكبر لامين الدرة فرق السما عن الگاع

يحيى : كلام زايد ما اريد هاي العزيمة لخاطر زبيدة اي تصرف يضوجها هنا اني الراح اردع صاحبه فتحذرو

وانتِ بابا بلغي خواتج واني هم بنفسي راح اتصل واعزمهن

دنيا : تمام عمو

رجعو يتناقشون بامور جانبيه واني ويوسف صعدنا فوك حتى ننام واخذنا تيم ويانا

نمنا كم ساعة وكعدنا وكلمن طش لمكان اني الهتيت ويه تيم والبنات واليوم كله مشفت سجى

اجه الليل وبعد العشا كلمن كعد بغرفته

يوسف : حبيبي بيج حيل تسويلي جاي

دنيا : اي من عيوني بس خلي تيومي يمك

تيم : لااا عبيبتي يريد وياج

دنيا : دنكت بوسته اخاف يوكع عليج الجاي ويسويلك اوا ، اكعد يم بابا واني من اجي انطيك نستله كلش طيبه ماشي

هزلي راسه حبيبي اليسمع الكلام ، كعدته يم يوسف ونزلت ما لكيت احد بالصالة كالعادة كلها بغرفها

توجهت للمطبخ علمود اسوي الجاي وتوقفت من شفت عمو يحيى واكف يم سجى

اتذكر بوقتها جانت الساعة بالـ11 بالليل

مشيت على اطراف اصابعي وصرت كلش قريبة على باب المطبخ بحيث اكدر اسمع الكلام الي بالمطبخ

باوعت لعمو خال ايده على راس سجى ويبتسم ، هدأت نفسي وبديت اسمعه شيحجي وياها

يحيى : امانه الله بنتي مثل ما وصيتج ذاك اليوم اي شي تحتاجي لترحين لاي احد

عندج اني وخالتج ام علي تعاي كليلنا ولتكولين عيب واستحي ومن هالحجي ، انتِ هنا عايشة عدنا ومسؤوله من بعد امج منا

فأي شي تحتاجي تعالي احجي واذا تستحين مني عندج ام علي هي هم مثلي متقصر ابد

وهم خاف واحد يضوجج تعاي كولي مو تغلسين تره بهالبيت الكل سواسية واي واحد يغلط يتحاسب حتى لو اني

خوش بابا ، عفيه بيج يله تصبحين على خير ، وهم اذا خلصتي بدلي ملابسج بنتي كمامج منگعه لتتمرضين

يله من رخصتج

دنيا : عدلت وكفتي من سمعته ديريد يطلع ، اباوعله طلع وشافني گبل ابتسم

ممبين عليه ارتباك ولا اي شي جان طبيعي نفس عادته

يحيى : هاا دندون شبيج واكفه هنا

دنيا : لاعمو هستوني نزلت اسوي جاي ليوسف

يحيى : لعد اخذي راحتج تصبحين على خير حبيبتي

دنيا : وانت من اهل الخير عمو حبيبي

ضليت واكفه لحد ما راح واني طبيت للمطبخ بس شنو صايرة بارود من العصبية

شفتها واكفه ، صكيت على اسناني وعطت بيها ، مو كلتييي عمو ديتحارشش بيج اشو اني صارلي ساعة واكفه اتسمع عليكم اريده يحجي ولو حجايه تدل على انه يتحرش بيج وماكو

جاوبتني وكامت تبجي

سجى : ست ليش ما شفتي شلون مد ايده على راسي وذاك اليوم طبطب على جتفي

دنيا : تره اني جنت واكفه وشفته مسح على راسج من باب الابوه وحتى يطمنج انه مثل ابوج وتكدرين تعتمدين عليه

وهالحركة يسويها ويانا كلنا مو قصده قذر مثل الي ببالج وحتى على حركة الجتف اني متأكدة ما سواها بدافع موزين

سجى : واني شمدريني يا ست احنه ناس محافظين وما عدنا هيج حركات شلون ترديني اميز حركاته هاي على انها طبيعية واني ممتعوده عليها

دنيا : هو عمو يحيى يتصرف بتلقائية ويه الكل شمدري قابل انتِ راح تفهمي غلط

زين تعاي كليلي هو كلج شي بي تحرش لفظي يعني تجاوز عليج بالكلام

سجى : لا ست

دنيا : لعد شلون فسرتي وتيقتني انُ الرجال ديتحرش بيج

سجى : والله ما ادري يا ست بس الظاهر اني فهمت الاستاذ غلط

دنيا : لعد مرة ثانية انتبهي وتأكدي قبل لتهمين احد هيج اتهام

هذا تحرش يجيب بلاوي ومصايب الها اول ما اخر ويخرب بيوت

ياريت انوب ثمنين الحجاية قبل لتحجيها حتى لتوكعينا بمشاكل وهاي اعتبريها نصيحة من واحد حريص عليج

عفتها وصعدت فوك ، متت قهر وضجت من نفسي لان شكيت بعمو وهو سودة عليه لا بيها ولا عليها

صدك لا كالو سوي زين وذب بالشط

فتحت باب الغرفة ودخلت لكيت يوسف منتظرني ، اباوعله يباوع لاديه الفارغات

يوسف : صارلج نص ساعة جوه وين الجاي ؟

دنيا : صفنت بوجهه عزه نسيت الجاي

يوسف : شبيج دنيا

دنيا : هاا حبيبي ، ظهري هاج عليه وممـ ما كدرت اوكف صارلي نص ساعة كاعدة جوه ردت اكوم وما كدرت

خطية هو سمعني منا وكمز من الجرباية منا

يوسف : خيرج خيرج شنو رجعتلج اللآم مرة ثانية نروح للمستشفى هسه

دنيا : لزمت ايده حبيبي شجاك والله مابيه شي شويه الم مفاجئ صار عندي وما كدرت

اسفه على الجاي بس والله انشدهت

يوسف : يمعوده يا جاي يا بطيخ ، تعاي كعدي تعاي

دنيا : كعدت وهو سودة عليه مصدك اني متخربطة
مددني وكعد يمرغلي ظهري

وعلى ايده ما احس بروحي الا غفيت بصف تيم

وما كعدت غير ثاني يوم وهيج مر الاسبوع لحد ما اجه يوم الجمعة والي هو يوم عزيمة زبيدة

كلنا انخبصنا لان عمو مسوي عزيمة من عزيمة من صدك ما خله شي يعتب عليه

وكل شويه وصاح هذا كله لعيون زبد

ومن اجت زبيدة تلكاها هي وهارون ذاك الملكه وهي حبيبتي كيفت بي

وكالعادة هارون وجهه يلطم بي سبع لطمات مو لطمة وحدة

انوب تلاكه هو وحليم يبوووو ، حليم يخوزر بي وهارون يباوعله باستهزاء وكل شويه يذبله حجايه
وحليم يشيل روحه ويركعها بالگاع

وويه طبت هارون وزبيدة اندك الجرس واجتي ديمة وامين وبصائر

هالمرة اجت بصائر لان عمو عزمها خصيصاً علمود تتونس ويه البنات واصر على امين يجيبها وياهم

رغم احنه عزمنا بيت امين كلهم بس خالة هناء ما كدرت تجي علمود اختها تكول متكدر تعوفها فعفناها
براحتها

المهم اسقبلناهم واني رحت سلمت على بصائر وعيوني على ديمة الي عيوني حمر ورغم المكياج مبينات

تقربت بوستها وهمستلها شبيج

ديمة : مابيه

دنيا : شنو صاير بينج وبين امين شي

ديمة : لتجيلي طاري تره روحي لعبانه منه وكوه متحملته

******************************************
لهنا يكون خلص البارت ان شاء الله يكون عجبكم ❤️
+ لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

" حساب الانستگرام 🖤"